1. Awˬ pa awˬ e yaˇ htaꞈ aˬ htoꞈ ma ve awˬ lawn maˍ piˇ gaˇ ve le?

 Awˬ pa awˬ e hpehꞈ ve chaw˗oˬ, nawˬ ve yaˇ Yaˬhoˉvaˬ htaꞈ shiˍ daꞈ leh haꞈ tuˬ hkʼaˬ hkʼe taw ga piˇ gaˇ ve ngaˬ hui shiˍ ve yoˬ. Yaꞈ hkʼaˇ, ngaˬ hui Gʼuiˬ sha htaꞈ maˇ mawˬ gʼa ve awˬ hkʼoˆ kaꞈ, Yaˬhoˉvaˬ awˬ tehˬ awˬ na cawˬ leh yaˇ yawˇ geh meuˆ daꞈ gʼa tuˬ nawˬ yaˇ htaꞈ hkʼaˬ hkʼe ga piˇ gʼa tuˬ le?—Yaˍkoˆ 4:8.

2. Yaˬhoˉvaˬ ve te hkʼaˇ dawˇ hkʼaˇ htaꞈ caˉ daꞈ ve yaˇ htaꞈ maˍ piˇ tuˬ awˬ pa awˬ e hkʼaˬ hkʼe te gʼa ve le?

² Yaˬhoˉvaˬ ve te hkʼaˇ dawˇ hkʼaˇ htaꞈ caˉ daꞈ ve yaˇ htaꞈ maˍ piˇ leh yaˇ yawˇ geh meuˆ daꞈ tuˬ ga piˇ ve a yeˇ uiˍ jaˇ ve awˬ hkʼaˇ lehˬ yaˇ htaꞈ Liꞈ hpu maˍ piˇ ve yoˬ. (2 Tiˆmoˉseˍ 3:14-17) Chi hkʼoˆ kaꞈ, yaˇ Yaˬhoˉvaˬ htaꞈ hkʼa dehꞈ shiˍ daꞈ tuˬ ga piˇ gʼa ve teˇ hkʼaˇ cawˬ sheˍ ve yoˬ. Awˬ lawn chi ve Tawˇ naˉ ve liꞈ hkʼaw kʼoˆ laˇ taˍ ve yoˬ. Oˇ kaˬ lo awˬ pa teˇ gʼaˇ yaˇ paˍ htaꞈ kʼoˆ piˇ ve, Yaˬhoˉvaˬ ve te hkʼaˇ dawˇ hkʼaˇ teˇ hpaˍ htaꞈ hkʼaˬ htaˆ kaꞈ dawˇ nyi sheˍ. Chi ve lehˬ Gʼuiˬ sha te hpanˍ taˍ ve awˬ ceuˬ htaꞈ mawˬ gʼa ve yoˬ. (Tawˇ naˉ ve 3:19-21) Chi htaꞈ pa taw, awˬ pa awˬ e lehˬ Yaˬhoˉvaˬ hpanˍ taˍ ve awˬ ceuˬ teˇ hpaˍ htaꞈ cuˇ leh yawˇ ve te hkʼaˇ dawˇ hkʼaˇ teˇ hpaˍ htaꞈ caˉ daꞈ ve yaˇ htaꞈ hkʼaˬ hkʼe maˍ piˇ gʼa tuˬ teˇ geh henˇ tuˬ yoˬ.

3. Awˬ pa awˬ e lehˬ yaˇ aˬ htoꞈ ma te tuˬ ga piˇ gʼa ve le?

³ Liꞈ hpu hkʼaw kʼoˆ ve, “Gʼuiˬ sha hpanˍ taˍ te taˍ ve awˬ ceuˬ teˇ hpaˍ htaꞈ gʼa mawˬ ve htaꞈ pa taw, Gʼuiˬ sha awˬ lawn mehˆ mawˬ maˇ hpehꞈ ve teˇ hpaˍ htaꞈ gʼa kʼawꞈ mawˬ ve yoˬ.” (Roˉmaꞈ 1:20) Awˬ pa awˬ e hpehꞈ ve chaw˗oˬ, nawˬ yaˇ geh teˇ geh ca guiˇ˗e gaˇ ve maˇ heˆ laˇ? Teˇ geh ca  guiˇ˗e ve awˬ yanˇ htaˇ “Gʼuiˬ sha hpanˍ taˍ te taˍ ve awˬ ceuˬ” yawˇ ve te hkʼaˇ dawˇ hkʼaˇ daꞈ jaˇ ve yaˇ shiˍ tuˬ kʼoˆ maˍ piˇ sheˍ. Yeˍsuˆ yehˇ ve tawˇ pa haˉ htaꞈ teˇ geh nyi sheˍ. Leh awˬ pa awˬ e hpehꞈ ve chaw Yeˍsuˆ htaꞈ hkʼaˬ hkʼe henˇ yuˬ gʼa ve kaꞈ teˇ geh henˇ tuˬ yoˬ.

4. Yeˍsuˆ lehˬ Yaˬhoˉvaˬ hpanˍ taˍ ve awˬ ceuˬ htaꞈ cuˇ leh awˬ laꞈ gʼawˇ hui htaꞈ hkʼaˬ hkʼe maˍ piˇ ve le? (Luˉkaꞈ 12:24, 27-30)

⁴ Yeˍsuˆ lehˬ Yaˬhoˉvaˬ hpanˍ taˍ ve awˬ ceuˬ htaꞈ cuˇ leh hkʼaˬ hkʼe maˍ piˇ ve teˇ geh nyi sheˍ. Teˇ pawˆ htaˇ Yeˍsuˆ awˬ laꞈ gʼawˇ hui htaꞈ kʼoˆ piˇ ve aˉ naˆ kʼaˍ leh heh puiˉ hkʼaw lo ve suhˉ veˆ htaꞈ chaˬ nyi sheˍ. (Luˉkaꞈ 12:24, 27-30 gʼaw sheˍ.) Yeˍsuˆ lehˬ Yaˬhoˉvaˬ hpanˍ taˍ ve awˬ nu ve a shaꞈ teꞈ ve htaꞈ cuˇ leh tehˆ maˍ piˇ kaꞈ gʼa ve yoˬ. Yaꞈ hkʼaˇ, Yeˍsuˆ lehˬ ngaˆ leh suhˉ veˆ chi ve htaꞈ awˬ laꞈ gʼawˇ hui hkʼa dehꞈ shiˍ ve htaꞈ tehˆ maˍ piˇ ve yoˬ. Yawˇ hui lehˬ aˉ naˆ kʼaˍ mvuhˇ hpe lo poˬ ve leh heh puiˉ hkʼaw lo ve suhˉ veˆ htaꞈ mawˬ jaw ve yoˬ. Yeˍsuˆ aˉ naˆ kʼaˍ leh suhˉ veˆ htaꞈ juˆ leh tawˇ pa haˉ tehˆ maˍ piˇ ve htaꞈ nawˬ dawˇ mawˬ gʼa˗aw laˇ? Yeˍsuˆ tawˇ pa haˉ chi ve 2 maˬ tehˆ maˍ piˇ peuˬ hkʼawꞈ nawˉ yawˇ hkʼaˬ hkʼe kʼawꞈ kʼoˆ sheˍ ve le? Yeˍsuˆ ve Awˬ pa Yaˬhoˉvaˬ lehˬ piˇ gaˇ puiˉ ve nyi ma cawˬ leh nyi ma daꞈ jaˇ ve tehꞈ awˬ laꞈ gʼawˇ hui htaꞈ maˍ piˇ ve yoˬ. Yaˬhoˉvaˬ lehˬ aˉ naˆ kʼaˍ leh heh puiˉ hkʼaw lo cawˬ ve suhˉ veˆ htaꞈ nyi haꞈ shaˉ ve kʼo, Yaˬhoˉvaˬ yawˇ ve kanˉ te ve chaw htaꞈ caˇ tuˬ leh aˉ poꞈ veuꞈ kʼaˇ cawˬ tuˬ hkʼaˬ htaˆ kaꞈ nyi haꞈ shaˉ piˇ tuˬ yoˬ.

5. Nawˬ Yaˬhoˉvaˬ hpanˍ taˍ ve awˬ ceuˬ htaꞈ cuˇ leh yawˇ htaꞈ caˉ daꞈ ve awˬ lawn yaˇ htaꞈ hkʼaˬ hkʼe maˍ piˇ tuˬ le?

⁵ Awˬ pa awˬ e hpehꞈ ve chaw˗oˬ, Yeˍsuˆ maˍ laˇ ve htaꞈ nawˬ hkʼaˬ hkʼe te henˇ yuˬ gʼa tuˬ le? Nawˬ dawˇ cawˇ ve suhˆ cehˬ maˇ heˆ leh to nuˇ to shaˆ htaꞈ kʼoˆ leh chi ve Yaˬhoˉvaˬ htaꞈ caˉ daꞈ ve hkʼaˬ hkʼe maˍ laˇ ve yaˇ htaꞈ kʼoˆ maˍ piˇ sheˍ. Yaˇ suhˆ cehˬ maˇ heˆ leh to nuˇ to shaˆ hkʼaˬ hkʼe ve htaꞈ dawˇ cawˇ ve nawˬ na nyi piˇ sheˍ. Nawˬ yawˇ dawˇ cawˇ ve awˬ ceuˬ htaꞈ cuˇ ve kʼo, yaˇ htaꞈ Yaˬhoˉvaˬ ve awˬ lawn maˍ piˇ htaˇ, yawˇ hkʼa dehꞈ na tuˬ yoˬ.

6. Hkiˆ˗tu˗faw awˬ e ve awˬ lawn htaꞈ ngaˬ hui aˬ htoꞈ ma henˇ yuˬ gʼa ve le?

⁶ Awˬ pa awˬ e lehˬ yaˇ geh Yaˬhoˉvaˬ ve awˬ lawn maˇ yaw daꞈ sheˍ htaˇ, suhˆ cehˬ maˇ heˆ leh to nuˇ to shaˆ htaꞈ caˉ daꞈ ve hpfuhˆ nyi tuˬ awˬ yanˇ gʼa yehˇ maw jaˇ ve laˇ? Nawˬ chi hkʼe taw taw awˬ yanˇ yehˇ tuˬ maˇ loˍ. Aˉ naˆ kʼaˍ aˬ htoꞈ ma caˇ ve leh hkʼaˬ hkʼe ma caˇ ve maˇ heˆ leh suhˉ veˆ hkʼaw ve she˗e (cell) hkʼaˬ hkʼe hpehꞈ ve Yeˍsuˆ hkʼa biˇ maˇ gʼa kʼoˆ laˇ taˬ. Teˇ pawˆ pawˆ kʼo, nawˬ ve yaˇ hpanˍ taˍ ve awˬ ceuˬ htaꞈ caˉ daꞈ ve hkʼa peu˗eˬ kʼoˆ maˍ laˇ tcuh gaˇ ve yoˬ. Yaꞈ hkʼaˇ, teˇ pawˆ pawˆ kʼo nawˬ yaˇ htaꞈ kʼoˆ piˇ ve maˇ heˆ leh hkʼa sha sha˗ehˬ na piˇ ve lehˬ chi nawˬ yaˇ htaꞈ kʼoˆ piˇ gaˇ ve awˬ ceuˬ yawˇ na gʼa˗oˬ ve yoˬ. Awˬ viˉ awˬ nyi hawˉ hkʼaˆ Hkiˆ˗tu˗faw yawˇ maˇ uiˍ sheˍ htaˇ ve awˬ lawn htaꞈ kʼoˆ ve, “ngaˬ e lehˬ hpanˍ taˍ ve awˬ ceuˬ awˬ paˇ awˬ kui hkʼa sha sha˗ehˬ ve htaꞈ cuˇ leh maˍ laˇ ve yoˬ. Tawˇ pa haˉ te kʼo, ngaˬ hui hkʼaw hkʼoˆ lo ca guiˇ˗e htaˇ ngaˬ e kʼoˆ ve, ‘yaˇ˗oˬ, hkʼaw mvuh jaˇ ve oˇ ve htaꞈ nawˬ mawˬ˗aw laˇ? Daꞈ jaˇ leˇ? Yaˬhoˉvaˬ cheuˬ jaˇ ve maˇ heˆ laˇ?’ Maˇ heˆ leh ngaˬ hui laˇ tsuhˇ gʼuiˬ lo ca guiˇ˗e htaˇ ngaˬ e kʼoˆ ve, ‘yaˇ˗oˬ, nawˬ gʼuiˬ baˇ hehnˇ jaˇ ve htaꞈ mawˬ ve yoˬ. Yaˬhoˉvaˬ kanˇ paˆ uiˍ jaˇ ve, maˇ heˆ laˇ?’” Hkiˆ˗tu˗faw kʼoˆ ve, “ngaˬ e kʼoˆ maˍ laˇ ve tawˇ hkʼa sha sha˗ehˬ hpehꞈ ve htawˇ, ngaˬ dawˇ nyi gaˇ tuˬ te laˇ ve yoˬ.”

7. Yaˇ Yaˬhoˉvaˬ hpanˍ taˍ ve awˬ ceuˬ htaꞈ caˉ daꞈ ve dawˇ nyi gʼa tuˬ nawˬ hkʼaˬ hkʼe maˍ piˇ gʼa ve le?

⁷ Yaˇ uiˍ la˗oˬ htaˇ Yaˬhoˉvaˬ hpanˍ taˍ ve awˬ ceuˬ htaꞈ caˉ daꞈ ve yaˇ dawˇ nyi tuˬ nawˬ maˍ piˇ sheˍ. Yaˬhoˉvaˬ htaꞈ caˉ daꞈ ve yawˇ htaꞈ hkʼaˬ hkʼe maˍ laˇ ve dawˇ nyi tuˬ kaꞈ maˍ piˇ sheˍ. Hpanˍ taˍ ve awˬ ceuˬ teˇ ceuˬ htaꞈ cuˇ leh yaˇ htaꞈ na piˇ ve, “Yaˬhoˉvaˬ htaꞈ caˉ daꞈ ve nawˬ htaꞈ aˬ htoꞈ ma maˍ laˇ ve le?” Yaˇ hkʼawꞈ laˇ htaˇ nawˬ anˇ ve maˇ heˆ leh ha lehˬ jaˇ tuˬ yoˬ.—Maꞈhtehˍ 21:16.

8. Iˉsaˍreˍlaˆ chaw hpehꞈ ve awˬ pa awˬ e lehˬ “yaꞈ kʼaw te toˇ chehˇ htaˇ” yawˇ hui aˬ htoꞈ ma te tuˬ awˬ yanˇ cawˬ ve le?

⁸ Liꞈ hpu hkʼaw kʼoˆ ve, Iˉsaˍreˍlaˆ chaw awˬ pa awˬ e hpehꞈ ve chaw lehˬ “yaꞈ kʼaw te toˇ chehˇ htaˇ” yaˇ htaꞈ Yaˬhoˉvaˬ ve awˬ liˇ awˬ hkʼaˇ gʼa maˍ piˇ ve yoˬ. (Bon maˍ ve 11:19) Iˉsaˍreˍlaˆ chaw hui yaꞈ kʼaw te toˇ chehˇ htaˇ to nuˇ to shaˆ, ngaˆ leh suhˉ veˆ teˇ hpaˍ  htaꞈ kaꞈ mawˬ ve yoˬ. Yawˇ hui yaꞈ kʼaw te toˇ chehˇ htaˇ Yaˬhoˉvaˬ hpanˍ taˍ ve awˬ ceuˬ teˇ hpaˍ htaꞈ caˉ daꞈ ve awˬ pa awˬ e yaˇ htaꞈ maˍ piˇ tuˬ awˬ yanˇ cawˬ ve yoˬ. Awˬ pa awˬ e hpehꞈ ve chaw kaꞈ chi hkʼa shuˍ te gʼa ve yoˬ. Chi beuꞈ teˇ co˗e ve awˬ pa awˬ e teˇ hpaˍ hpaˍ hkʼaˬ hkʼe te ve teˇ geh nyi sheˍ.

9. Hpu˗nyiˆ˗taˍ leh Hkaˆ˗hta˗ya ve awˬ lawn nawˬ htaꞈ aˬ htoꞈ ma maˍ laˇ ve le?

⁹ I˗diˉyaˆ mvuhˇ miˬ venˇ lonˉ hkʼaw chehˇ ve awˬ e teˇ gʼaˇ Hpu˗nyiˆ˗taˍ kʼoˆ ve, “awˬ nu ve venˇ hkʼaw ngaˬ hui ve awˬ viˉ awˬ nyi geh ca guiˇ˗e htaˇ, Yaˬhoˉvaˬ hpanˍ taˍ ve anˇ tuˬ cawˬ jaˇ ve awˬ ceuˬ htaꞈ caˉ daꞈ ve ngaˬ ve yaˇ htaꞈ maˍ piˇ tuˬ awˬ yanˇ cawˬ ve yoˬ. Chaw maˇ jaˇ kuiˬ venˇ hkʼaw yaˇ maˇ chehˇ htaˇ Yaˬhoˉvaˬ hpanˍ taˍ ve awˬ ceuˬ htaꞈ caˉ daꞈ ve yaˇ na gʼa ve tehꞈ ngaˬ dawˇ ve yoˬ.” Awˬ pa awˬ e hpehꞈ ve chaw˗oˬ, nawˬ hui yaˇ htaꞈ shiˍ leh hpanˍ taˍ ve awˬ ceuˬ daꞈ jaˇ ve htaꞈ ca nyi ve yaˇ maˇ leunˇ gʼa ve yoˬ. Monˍdoˬvaˬ mvuhˇ miˬ lo chehˇ ve awˬ viˉ awˬ nyi yaˇ miˇ Hkaˆ˗hta˗ya kʼoˆ ve, “ngaˬ maˇ uiˍ sheˍ htaˇ tawnˇ gʼa jaˇ ve awˬ ceuˬ lehˬ, ngaˬ pa ngaˬ e venˇ baˬ lo ca shiˍ guiˇ˗e laˇ htaˇ yoˬ. Yaˬhoˉvaˬ hpanˍ taˍ ve awˬ ceuˬ htaꞈ chaˬ nyi tuˬ ngaˬ pa ngaˬ e ngaˬ maˇ uiˍ sheˍ htaˇ kaꞈ maˍ laˇ ve awˬ bon uiˍ jaˇ. Chi ve lehˬ ngaˬ Yaˬhoˉvaˬ htaꞈ shiˍ maˇ la tuˬ ga laˇ ve yoˬ.”

10. Awˬ pa awˬ e awˬ nu ve teˇ venˇ lo maˇ ca guiˇ˗e gʼa ve kʼo, Yaˬhoˉvaˬ hpanˍ taˍ ve awˬ ceuˬ htaꞈ caˉ daꞈ ve yaˇ htaꞈ maˍ piˇ gʼa tuˬ yawˇ hui hkʼaˬ hkʼe te ve le? (Awˇ ceˍ awˇ fa “ Awˬ pa awˬ e htaꞈ ga piˇ gʼa ve awˬ ceuˬ” htaꞈ nyi sheˍ.)

¹⁰ Nawˬ awˬ nu ve teˇ venˇ lo ca guiˇ˗e maˇ gʼa ve kʼo, hkʼaˬ hkʼe te tuˬ le? I˗diˉyaˆ mvuhˇ miˬ lo chehˇ ve A˗mon kʼoˆ ve, “ngaˬ chehˇ kuiˬ teˇ tawn lo awˬ pa awˬ e hpehꞈ ve chaw lehˬ kanˉ laiˉ naˍ riˍ gʼa te ve yoˬ. Awˬ nu ve venˇ lo ca guiˇ˗e ve kʼo, hpu gʼa yehˇ maˇ jaˇ. Yaꞈ hkʼaˇ, ngaˬ hui chehˇ kuiˬ lo chaw guiˇ kuiˬ maˇ uiˍ ve cawˬ leh yehˬ teˇ yehˬ le le kaꞈ caˉ lawˇ cawˬ ve yoˬ. Hkʼe te leh, Yaˬhoˉvaˬ hpanˍ taˍ ve awˬ ceuˬ htaꞈ yaˇ chaˬ nyi tuˬ ca shiˍ maˍ piˇ ve daꞈ jaˇ ve awˬ ceuˬ hpehꞈ leh Yaˬhoˉvaˬ ve te hkʼaˇ dawˇ hkʼaˇ htaꞈ caˉ daꞈ ve yaw daꞈ ve lehˬ daꞈ jaˇ.” Chi htaꞈ pa taw, nawˬ coˇ caˇ leh chaˬ nyi ve kʼo, Yaˬhoˉvaˬ hpanˍ taˍ ve awˬ ceuˬ htaꞈ caˉ daꞈ ve nawˬ ve yaˇ htaꞈ maˍ piˇ gʼa tuˬ yehˬ paˇ yehˬ kui lo kaꞈ cawˬ ve yoˬ. Tawˇ pa haˉ te kʼo, ngaˆ, naˇ naˇ te puiˉ ve awˬ ceuˬ, suhˆ cehˬ, maˇ heˆ  leh awˬ nu ve awˬ ceuˬ htaꞈ kaꞈ cuˇ leh maˍ piˇ gʼa ve yoˬ. (Chiˇ mvuh ve 104:24) Jaˬmaˬniˬ mvuhˇ miˬ lo chehˇ ve Hka˗ri˗naˇ kʼoˆ ve, “ngaˬ e suhˉ veˆ htaꞈ dawˇ cawˇ jaˇ. Ngaˬ maˇ uiˍ sheˍ htaˇ ngaˬ e ca shiˍ guiˇ˗e laˇ ve teˇ pawˆ le le daꞈ jaˇ ve suhˉ veˆ htaꞈ juˆ maˍ laˇ ve yoˬ.” Chi hkʼoˆ kaꞈ, awˬ pa awˬ e hpehꞈ ve chaw˗oˬ, Yaˬhoˉvaˬ hpanˍ taˍ ve awˬ ceuˬ yaˇ htaꞈ maˍ piˇ tuˬ VDO, liꞈ kʼoˆ, Gʼuiˬ sha ve kanˉ hkʼaˇ hkʼaw ve maˍ laˇ ve awˬ ceuˬ teˇ hpaˍ yaˇ htaꞈ maˍ piˇ sheˍ. Yaˇ hpanˍ taˍ ve awˬ ceuˬ htaꞈ chaˬ nyi gʼa tuˬ nawˬ teˇ yanˇ le le maˍ piˇ sheˍ. Nawˬ yaˇ htaꞈ maˍ piˇ gʼa tuˬ Yaˬhoˉvaˬ ve te hkʼaˇ dawˇ hkʼaˇ teˇ hpaˍ hpaˍ htaꞈ teˇ geh kʼawꞈ nyi sheˍ.

11. Yaˬhoˉvaˬ haꞈ pehnˇ ve htaꞈ yaˇ mawˬ tuˬ awˬ pa awˬ e hkʼaˬ hkʼe ga piˇ gʼa tuˬ le?

¹¹ Nawˬ ve yaˇ Yaˬhoˉvaˬ haꞈ pehnˇ ve htaꞈ mawˬ tuˬ to nuˇ to shaˆ awˬ yehˇ htaꞈ haꞈ shaˉ leh hkʼaˬ hkʼe taw haꞈ ve nawˬ ve yaˇ chaˬ nyi tuˬ maˍ piˇ sheˍ. (Maꞈhtehˍ 23:37) Chi hkʼoˆ kaꞈ, Yaˬhoˉvaˬ laiˉ ceuˬ hpanˍ taˍ ve htaꞈ nawˬ ve yaˇ chaˬ nyi tuˬ kaꞈ maˍ piˇ sheˍ. Hka˗ri˗naˇ kʼawꞈ kʼoˆ ve, “ngaˬ e ngaˬ hui teˇ geh ca juˇ guiˇ˗e htaˇ ngaˬ e ngaˬ htaꞈ jehˇ sheˍ tehꞈ kʼoˆ laˇ ve yoˬ. Yaˬhoˉvaˬ ngaˬ hui htaꞈ haꞈ ve tehꞈ mawˬ tuˬ suhˉ veˆ teˇ veˆ leh teˇ veˆ hkʼaˬ hkʼe taw daꞈ ve ngaˬ e ngaˬ htaꞈ maˍ laˇ ve yoˬ. Laiˉ hkʼawꞈ gaˬ˗oˬ ve htawˇ suhˉ veˆ, awˬ sheuˉ, awˬ hoꞈ awˬ han chi ve teˇ hpaˍ htaꞈ nyi ve dawˇ cawˇ ve yoˬ. Leh suhˉ veˆ teˇ ceuˬ leh teˇ ceuˬ maˇ shuˍ daꞈ ve htaꞈ kaꞈ gʼa mawˬ ve yoˬ. Ngaˬ suhˉ veˆ htaꞈ nyi ve teˇ pawˆ le le Yaˬhoˉvaˬ ngaˬ hui htaꞈ haꞈ jaˇ ve tehꞈ ngaˬ hkʼaˬ htaˆ kaꞈ dawˇ ve yoˬ.”

12. Yaˇ Yaˬhoˉvaˬ ve cuˇ yiˍ htaꞈ mawˬ gʼa tuˬ awˬ pa awˬ e hkʼaˬ hkʼe ga piˇ gʼa ve le? (Chiˇ mvuh ve 139:14) (Awˬ han htaꞈ nyi sheˍ.)

¹² Chi hkʼoˆ kaꞈ, nawˬ ve yaˇ Yaˬhoˉvaˬ ve cuˇ yiˍ htaꞈ mawˬ tuˬ kaꞈ ga piˇ sheˍ. Yaˬhoˉvaˬ ngaˬ hui aꞈ kehˉ cuˇ yiˍ cawˬ jaˇ ve htaꞈ yaˇ mawˬ tuˬ kaꞈ ga piˇ sheˍ. (Roˉmaꞈ 11:33) Tawˇ pa haˉ te kʼo, iˉ kaˆ hkʼaˬ hkʼe te moˬ hpehꞈ gʼa ve nawˬ ve yaˇ htaꞈ kʼoˆ maˍ piˇ sheˍ. Moˬ teˇ kaˬ lo hkʼa sha sha˗ehˬ hkʼaˬ hkʼe te jiˆ kʼai gʼa ve kaꞈ yaˇ htaꞈ maˍ piˇ sheˍ. (Yawˇbaˆ 38:36, 37) Maˇ heˆ leh ngaˬ hui ve awˬ to anˇ tuˬ cawˬ jaˇ ve kaꞈ yaˇ htaꞈ kʼoˆ maˍ piˇ gʼa ve yoˬ. (Chiˇ mvuh ve 139:14 gʼaw sheˍ.) Awˬ pa teˇ gʼaˇ La˗di˗mi˗aˬ kaꞈ chi hkʼa shuˍ te ve yoˬ. Yawˇ kʼoˆ ve, “teˇ nyi htaˇ ngaˬ ve yaˇ paˍ sho kuˇ gʼaꞈ guiˇ htaˇ pfuh˗e leh hkui tcuhˉ kʼu hkʼaw˗e ve yoˬ. Yaꞈ hkʼaˇ, hkʼaˬ nyiˇ nyi maˇ gaˬ sheˍ kaꞈ na˗e la leh ngaˬ leh ngaˬ miˇ ma yaˇ htaꞈ kʼoˆ maˍ piˇ ve, Yaˬhoˉvaˬ lehˬ ngaˬ hui ve awˬ to hkʼaw hkʼaw kuiˬ yawˇ hkʼaˇ yawˇ kʼawꞈ na˗e la gʼa tuˬ hpanˍ taˍ laˇ ve yoˬ. Yaꞈ hkʼaˇ, chi hkʼe ve chaw yaˇ te gʼa ve ngaˬ hui maˇ mawˬ jaw. Tawˇ pa haˉ te kʼo, kaˇ guˆ daꞈ ve kʼo,  paˆ˗a ve yawˇ hkʼaˇ yawˇ kʼawꞈ gu maˇ gʼa. Ngaˬ hui yaˇ htaꞈ chi hkʼe kʼoˆ maˍ piˇ htaˇ, Yaˬhoˉvaˬ cuˇ yiˍ cawˬ jaˇ ve tehꞈ yaˇ na gʼa la ve yoˬ.”

13. Yaˇ Yaˬhoˉvaˬ ve kanˇ paˆ htaꞈ mawˬ tuˬ awˬ pa awˬ e hkʼaˬ hkʼe ga piˇ gʼa ve le? (Iˉsaˍyaˆ 40:26)

¹³ Yaˬhoˉvaˬ lehˬ ngaˬ hui htaꞈ mvuhˇ naw ma lo chiˇ nyi tcuh gaˇ leh meuꞈ keu shiˍ awˬ moˍ awˬ cuˇ lonˉ htaꞈ hteˇ hteˇ shawˇ shawˇ te piˇ gʼa ve yawˇ kanˇ paˆ hkʼaˬ hkʼe taw cawˬ ve htaꞈ dawˇ nyi tcuh gaˇ ve yoˬ. (Iˉsaˍyaˆ 40:26 gʼaw sheˍ.) Chi htaꞈ pa taw, nawˬ ve yaˇ mvuhˇ naw ma lo chiˇ nyi tcuh leh awˬ lawn chi htaꞈ caˉ daꞈ ve dawˇ nyi tcuh sheˍ. Tai˗wanˬ mvuhˇ miˬ lo chehˇ ve Htin˗htinˍ meh ve yawˇ maˇ uiˍ sheˍ htaˇ ve htaꞈ dawˇ nyi leh kʼoˆ ve, “teˇ pawˆ htaˇ ngaˬ e ngaˬ hui teˇ geh guiˇ˗e leh ca haˉ˗e ve yoˬ. Ngaˬ hui venˇ baˬ lo kʼai leh mvuhˇ hpeuꞈ htaˇ meuꞈ keu shiˍ htaꞈ hkʼa tawˍ lehˆ gʼa mawˬ ve yoˬ. Oˇ ve teˇ yanˇ ngaˬ htaꞈ awˬ chawˇ nyiˉ laˇ leh ngaˬ Yaˬhoˉvaˬ ve hkawˇ hkʼaˬ htaˆ kaꞈ na yuˬ gʼa tuˬ naˍ maˇ shiˍ ve pa taw, ngaˬ dawˇ maˇ jaˇ ve yoˬ. Ngaˬ meuꞈ keu shiˍ htaꞈ nyi tuˬ ngaˬ e kʼoˆ laˇ leh Yaˬhoˉvaˬ kanˇ paˆ hkʼaˬ hkʼe taw cawˬ ve htaꞈ dawˇ nyi sheˍ tehꞈ kaꞈ kʼoˆ laˇ ve yoˬ. Yaˬhoˉvaˬ meuꞈ keu shiˍ chi ve hkʼa peu˗eˬ htaꞈ hpanˍ gʼa leh Yaˬhoˉvaˬ oˇ ve htaꞈ kanˇ paˆ piˇ gʼa ve hkʼa shuˍ ngaˬ htaꞈ kaꞈ peꞈ laˇ gʼa leh awˬ lawn chi htaꞈ yeunˇ hkanˍ gʼaˇ tuˬ ga laˇ gʼa ve yoˬ. Chi ve teˇ pawˆ ca guiˇ˗e peuˬ hkʼawꞈ nawˉ ngaˬ Yaˬhoˉvaˬ htaꞈ hkʼa dehꞈ shiˍ daꞈ gaˇ leh yawˇ ve kanˉ hkʼa dehꞈ te tuˬ coˇ caˇ gaˇ ve yoˬ.”

14. Yaˬhoˉvaˬ lehˬ ha lehˬ ve Gʼuiˬ sha hpehꞈ ve tehꞈ yawˇ hpanˍ taˍ ve awˬ ceuˬ teˇ hpaˍ htaꞈ cuˇ leh awˬ pa awˬ e yaˇ shiˍ tuˬ hkʼaˬ hkʼe maˍ piˇ gʼa ve le?

¹⁴ Yaˬhoˉvaˬ lehˬ ha lehˬ ve Gʼuiˬ sha hpehꞈ ve tehꞈ yawˇ hpanˍ taˍ ve awˬ ceuˬ ngaˬ hui mawˬ tuˬ te laˇ ve yoˬ. To nuˇ to shaˆ maˇ˗awˍ ve kaꞈ leˍ guiˇ ve htaꞈ dawˇ cawˇ ve tehꞈ chaˬ nyi tehˆ nyi paˍ gʼa mawˬ ve yoˬ. (Yawˇbaˆ 40:20) To nuˇ to shaˆ mehˉ nyi ehˉ leh hpuiˇ ehˉ teˇ geh leˍ guiˇ ve htaꞈ nawˬ ve yaˇ gʼa mawˬ htaˇ gʼuiˬ yawˬ ve maˇ heˆ laˇ? To nuˇ to shaˆ gʼuiˬ yawˬ tuˬ te maˍ laˇ ve htaꞈ yaˇ gʼa mawˬ leh gʼuiˬ yawˬ htaˇ, Yaˬhoˉvaˬ lehˬ nyi ma daꞈ leh ha lehˬ ve Gʼuiˬ sha hpehꞈ ve tehꞈ nawˬ ve yaˇ shiˍ tuˬ kʼoˆ maˍ piˇ sheˍ.—1 Tiˆmoˉseˍ 1:11.

15. Yaˇ yawˇ dawˇ ve awˬ ceuˬ kʼoˆ maˍ laˇ tuˬ awˬ pa awˬ e hkʼaˬ hkʼe te gʼa ve le? (Tawˇ naˉ ve 20:5) (Awˬ han htaꞈ nyi sheˍ.)

¹⁵ Teˇ pawˆ pawˆ kʼo, yaˇ shoꞈ shaꞈ ve awˬ ceuˬ gʼa hpuˇ ve awˬ pa awˬ e htaꞈ kʼoˆ maˍ laˇ tcuh tuˬ maˇ sha ve yoˬ. Awˬ pa awˬ e lehˬ hpanˍ taˍ ve awˬ ceuˬ htaꞈ yaˇ nyi tuˬ ca shiˍ guiˇ˗e htaˇ, yaˇ nyi ma hkʼaw cawˬ ve awˬ ceuˬ kʼoˆ maˍ laˇ tuˬ sha ve tehꞈ dawˇ ve yoˬ.  (Tawˇ naˉ ve 20:5 gʼaw sheˍ.) Aˬ htoꞈ ma te chi hkʼe kʼoˆ gʼa ve le? Awˬ hkʼaˇ teˇ hkʼaˇ lehˬ, yehˬ kʼa hkʼaw ve chaw geh teˇ geh ca guiˇ˗e htaˇ awˬ pa awˬ e leh yaˇ yawˇ hui teˇ geh chehˇ ve awˬ yanˇ htaꞈ awˬ nu ve awˬ ceuˬ maˇ shoꞈ shaꞈ laˇ ve yoˬ. Tai˗wanˬ mvuhˇ miˬ lo chehˇ ve awˬ pa teˇ gʼaˇ Ma˗seh˗hi˗ko meh ve awˬ hkʼaˇ teˇ hkʼaˇ htaꞈ kʼoˆ ve, “ngaˬ hui yaˇ geh teˇ geh haˉ hpawˇ hkʼoˆ lo taˆ˗e ve maˇ heˆ leh ngaˬ hui laˇ tsuhˇ gʼuiˬ pfuhˍ lo teˇ geh ca guiˇ˗e htaˇ yaˇ nyi ma sha jaˇ ve yoˬ. Oˇ ve teˇ yanˇ yaˇ nyi ma hkʼaw cawˬ ve awˬ ceuˬ leh yawˇ hui hkʼaˬ hkʼe dawˇ ve awˬ ceuˬ kʼoˆ maˍ laˇ tcuh tuˬ sha ve yoˬ.” Hkaˆ˗hta˗ya kʼawꞈ kʼoˆ ve, “liꞈ henˇ ve hpehˇ peuˬ hkʼawꞈ nawˉ ngaˬ e lehˬ, chaw guiˇ kuiˬ daꞈ jaˇ ve awˬ ti lo shiˍ guiˇ laˇ ve yoˬ. Oˇ kaˬ lo gawˬ lehˍ cawˬ leh ngaˬ nyi ma sha jaˇ. Liꞈ henˇ yehˬ lo ngaˬ aˬ htoꞈ ma gʼa hpuˇ ve leh ngaˬ aˬ htoꞈ ma ve awˬ lawn htaꞈ dawˇ haˍ ve ngaˬ e htaꞈ kʼoˆ maˍ piˇ tuˬ sha ve yoˬ.”

16. Awˬ pa awˬ e lehˬ Yaˬhoˉvaˬ hpanˍ taˍ ve awˬ ceuˬ htaꞈ cuˇ leh yaˇ pyawˍ leh nyi ma sha tuˬ hkʼaˬ hkʼe ga piˇ gʼa ve le?

¹⁶ Yehˬ kʼa hkʼaw ve chaw hkʼa peu˗eˬ hpanˍ taˍ ve awˬ ceuˬ htaꞈ teˇ geh ca nyi˗e htaˇ pyawˍ leh nyi ma sha tuˬ te laˇ leh yawˇ hui hkʼa dehꞈ meuˆ daꞈ tuˬ kaꞈ ga piˇ ve yoˬ. Liꞈ hpu hkʼaw kʼoˆ ve ‘gʼuiˬ yawˬ ve awˬ yanˇ leh kʼaˍ hkʼeˆ ve awˬ yanˇ’ cawˬ ve yoˬ. (Cuˇ yiˍ piˇ ve 3:1, 4) Ngaˬ hui laiˉ ceuˬ te gʼa leh ha lehˬ ve cawˬ tuˬ Yaˬhoˉvaˬ lehˬ daꞈ jaˇ ve awˬ ti htaꞈ hpanˍ taˍ ve yoˬ. Laiˉ yehˬ kʼa laˇ tsuhˇ gʼuiˬ lo guiˇ˗e ve, iˉ kaˆ gʼuiˬ ce kʼoˍ lo teˇ geh guiˇ˗e ve, maˇ heˆ leh hkʼaw hkʼoˆ lo taˆ˗e ve, leh heh puiˉ hkʼaw lo teˇ geh guiˇ˗e ve kaꞈ dawˇ cawˇ ve yoˬ. Yaˇ teˇ hpaˍ kʼo chaw guiˇ kuiˬ lo leˍ guiˇ ve, to nuˇ to shaˆ htaꞈ nyi ve leh iˉ kaˆ lawˬ maˇ heˆ leh laˇ tsuhˇ gʼuiˬ lo iˉ kaˆ lawehˇ ve htaꞈ dawˇ cawˇ ve yoˬ. Yaˬhoˉvaˬ hpanˍ taˍ ve awˬ ceuˬ ngaˬ hui ha lehˬ gʼa tuˬ laiˉ ceuˬ cawˬ ve yoˬ.

17. Aˬ htoꞈ ma te awˬ pa awˬ e lehˬ yaˇ Yaˬhoˉvaˬ hpanˍ taˍ ve awˬ ceuˬ htaꞈ a yeˇ yuˬ tuˬ maˍ piˇ cawˇ ve le?

¹⁷ Miˬ guiˬ awˬ suhˉ hkʼaw gaˬ kʼo, awˬ pa awˬ e leh yaˇ Yaˬhoˉvaˬ hpanˍ taˍ ve awˬ ceuˬ htaꞈ ha lehˬ jaˇ tuˬ yoˬ. Oˇ ve teˇ yanˇ gaˬ kʼo, ngaˬ hui to nuˇ to shaˆ htaꞈ maˇ kawˆ˗o leh to nuˇ to shaˆ kaꞈ ngaˬ hui htaꞈ maˇ kawˆ˗o. (Iˉsaˍyaˆ 11:6-9) Chi hkʼoˆ kaꞈ, hpanˍ taˍ ve awˬ ceuˬ teˇ hpaˍ htaꞈ ngaˬ hui hkʼaˬ htaˆ kaꞈ ha lehˬ jaˇ tuˬ yoˬ. (Chiˇ mvuh ve 22:26) Yaꞈ hkʼaˇ, awˬ pa awˬ e hpehꞈ ve chaw˗oˬ, hpanˍ taˍ ve awˬ ceuˬ miˬ guiˬ awˬ suhˉ gaˬ htaˇ hehꞈ yaˇ htaꞈ maˍ piˇ˗a tehꞈ taˇ dawˇ. Chi teˇ hkui kaꞈ tanˬ leh Yaˬhoˉvaˬ hpanˍ taˍ ve awˬ ceuˬ htaꞈ caˉ daꞈ ve yawˇ ve awˬ lawn nawˬ ve yaˇ htaꞈ maˍ piˇ ve kʼo, yawˇ hui jawˇ mawˇ Daˍviˆ kʼoˆ ve hkʼe, “[Yaˬhoˉvaˬ]˗oˬ nawˬ te ve hkʼe te gʼa ve chaw teˇ gʼaˇ kaꞈ maˇ cawˬ” tehꞈ dawˇ tuˬ yoˬ.—Chiˇ mvuh ve 86:8.