1. Yawˇbaˆ Yaˬhoˉvaˬ htaꞈ hkʼa dehꞈ shiˍ daꞈ tuˬ aˬ htoꞈ ma ga piˇ ve le?

 Yawˇbaˆ a shaꞈ teꞈ ve teˇ co˗e yawˇ awˬ nu ve chaw geh tawˇ yaw daꞈ tuˬ awˬ yanˇ cawˬ maˇ ve yoˬ. Yaꞈ hkʼaˇ, teˇ pawˆ htaˇ yawˇ Yaˬhoˉvaˬ geh tawˇ gʼa yaw daꞈ ve htaꞈ leunˇ maˇ gʼa ve yoˬ. Gʼuiˬ sha cuˇ yiˍ hkʼaˬ hkʼe taw cawˬ ve htaꞈ Yawˇbaˆ shiˍ tuˬ, yawˇ hpanˍ taˍ ve anˇ tuˬ uiˍ jaˇ ve teˇ hpaˍ htaꞈ nyi tehꞈ Yawˇbaˆ htaꞈ kʼoˆ piˇ ve yoˬ. Yaˬhoˉvaˬ lehˬ yawˇ ve chaw htaꞈ nyi haꞈ shaˉ gʼa ve tehꞈ Yawˇbaˆ yonˍ gʼa tuˬ kaꞈ te piˇ ve yoˬ. Tawˇ pa haˉ te kʼo, Yaˬhoˉvaˬ to nuˇ to shaˆ htaꞈ hkʼaˬ hkʼe te nyi haꞈ shaˉ piˇ gʼa ve, Yawˇbaˆ shiˍ tuˬ kʼoˆ piˇ leh yawˇ Yawˇbaˆ htaꞈ kaꞈ nyi haꞈ shaˉ gʼa ve tehꞈ shiˍ tuˬ kʼoˆ piˇ ve yoˬ. (Yawˇbaˆ 38:39-41; 39:1, 5, 13-16) Yawˇbaˆ Gʼuiˬ sha hpanˍ taˍ ve awˬ ceuˬ teˇ hpaˍ htaꞈ dawˇ nyi htaˇ, yawˇ Yaˬhoˉvaˬ ve te hkʼaˇ dawˇ hkʼaˇ daꞈ jaˇ ve teˇ hpaˍ htaꞈ gʼa shiˍ la ve yoˬ.

2. Yaˬhoˉvaˬ hpanˍ taˍ ve awˬ ceuˬ teˇ hpaˍ htaꞈ chaˬ nyi tuˬ aˬ htoꞈ ma te maˇ sha ve le?

² Yaˬhoˉvaˬ hpanˍ taˍ ve awˬ ceuˬ teˇ hpaˍ htaꞈ ngaˬ hui chaˬ nyi htaˇ, yawˇ htaꞈ caˉ daꞈ ve awˬ lawn ngaˬ hui shiˍ la ve yoˬ. Yaꞈ hkʼaˇ, chi hkʼe te ve ngaˬ hui maˇ sha tehꞈ dawˇ ve yoˬ. Ngaˬ hui venˇ lonˉ hkʼaw chehˇ ve kʼo, hpanˍ taˍ ve awˬ ceuˬ daꞈ jaˇ ve htaꞈ ngaˬ hui hkʼa dehꞈ nyi maˇ mawˬ. Ngaˬ hui venˇ baˬ lo chehˇ ve htawˇ hpanˍ taˍ ve awˬ ceuˬ htaꞈ dawˇ nyi tuˬ awˬ yanˇ hkʼa dehꞈ maˇ cawˬ. Yaˬhoˉvaˬ hpanˍ taˍ ve awˬ ceuˬ teˇ hpaˍ htaꞈ awˬ yanˇ yehˇ leh, hkʼa dehꞈ chaˬ nyi ve awˬ lawn chi ve hkʼaw teˇ geh henˇ tuˬ yoˬ. Yaˬhoˉvaˬ leh Yeˍsuˆ hpanˍ taˍ ve awˬ ceuˬ htaꞈ cuˇ leh ngaˬ hui htaꞈ hkʼaˬ hkʼe maˍ laˇ tuˬ ve kaꞈ awˬ lawn chi ve hkʼaw teˇ geh henˇ tuˬ yoˬ. Awˬ ceuˬ chi ve teˇ hpaˍ htaꞈ ngaˬ hui henˇ yuˬ gʼa tuˬ hkʼaˬ hkʼe gʼa te cawˇ ve kaꞈ teˇ geh henˇ tuˬ yoˬ.

3. Yaˬhoˉvaˬ yawˇ hpanˍ taˍ ve awˬ ceuˬ htaꞈ cuˇ leh Aˍdanˍ ha lehˬ tuˬ aˬ htoꞈ ma te piˇ ve le?

³ Yaˬhoˉvaˬ lehˬ yawˇ hpanˍ taˍ ve awˬ ceuˬ chaw yaˇ awˉ lawˉ teˇ gʼaˇ ha lehˬ tuˬ te piˇ ve yoˬ. Yaˬhoˉvaˬ Aˍdanˍ htaꞈ hpanˍ leh daꞈ jaˇ ve hko hkʼaw chehˇ tcuh htaˇ, hko oˇ ve Aˍdanˍ htaꞈ nyi haꞈ shaˉ tcuh ve yoˬ. Leh miˬ guiˬ hkʼoˆ lo hko oˇ ve awˬ meu˗eˇ awˬ meu˗eˇ uiˍ kʼai  tuˬ kaꞈ te tcuh ve yoˬ. (Awˬ hkuiˉ puiˍ 2:8, 9, 15) Awˬ yeˬ yeˬ la leh suhˉ cehˬ hkʼoˆ suhˉ veˆ hkʼa biˇ veˆ taˍ ve htaꞈ yawˇ gʼa mawˬ htaˇ hkʼaˬ hkʼe taw ha lehˬ jaˇ ve htaꞈ dawˇ nyi sheˍ. Aˍdanˍ lehˬ Eˍdenˍ hko htaꞈ gʼa nyi haꞈ shaˉ ve daꞈ jaˇ ve awˬ vuiˬ gʼa leh Yaˬhoˉvaˬ lehˬ Aˍdanˍ htaꞈ to nuˇ to shaˆ ve awˬ meh kaꞈ meh piˇ tcuh ve yoˬ. (Awˬ hkuiˉ puiˍ 2:19, 20) Awˬ tehˬ kʼo, to nuˇ to shaˆ htaꞈ Yaˬhoˉvaˬ awˬ meh meh piˇ kaꞈ gʼa ve yoˬ. Yaꞈ hkʼaˇ, Yaˬhoˉvaˬ lehˬ kanˉ chi ve Aˍdanˍ htaꞈ te tcuh gaˇ ve yoˬ. Aˍdanˍ to nuˇ to shaˆ htaꞈ aˬ htoꞈ ma awˬ meh meh piˇ tuˬ yawˇ to nuˇ to shaˆ ve awˬ hoꞈ awˬ han maˇ heˆ leh hkʼaˬ hkʼe hpehꞈ ve htaꞈ awˉ lawˉ gʼa chaˬ nyi ve tehꞈ ngaˬ hui dawˇ mawˬ ve yoˬ. Kanˉ chi ve lehˬ yawˇ ha lehˬ tuˬ te piˇ ve yoˬ. Yaˬhoˉvaˬ cuˇ yiˍ cawˬ jaˇ leh yawˇ hpanˍ taˍ ve daꞈ jaˇ ve awˬ ceuˬ Aˍdanˍ hkʼa tawˍ lehˆ mawˬ tuˬ kaꞈ te piˇ ve yoˬ.

4. (a) Yaˬhoˉvaˬ hpanˍ taˍ ve awˬ ceuˬ teˇ hpaˍ htaꞈ ngaˬ hui chaˬ nyi tuˬ awˬ hkʼaˇ teˇ hkʼaˇ lehˬ aˬ htoꞈ ma le? (b) Yaˬhoˉvaˬ hpanˍ taˍ ve awˬ ceuˬ teˇ hpaˍ htaꞈ nawˬ dawˇ cawˇ jaˇ ve aˬ htoꞈ ma le?

⁴ Yaˬhoˉvaˬ hpanˍ taˍ ve awˬ ceuˬ htaꞈ ngaˬ hui chaˬ nyi cawˇ ve awˬ hkʼaˇ teˇ hkʼaˇ lehˬ “mvuhˇ naw ma htaꞈ chiˇ nyi sheˍ. Nawˬ hui mawˬ chehˇ ve meuꞈ keu shiˍ oˇ ve teˇ hpaˍ htaꞈ a shu te hpanˍ taˍ ve le?” Chi ve teˇ hpaˍ yawˇ ngaˬ hui htaꞈ chaˬ nyi leh shiˍ tcuh gaˇ ve yoˬ. (Iˉsaˍyaˆ 40:26) Yaˬhoˉvaˬ mvuhˇ naw ma hkʼoˆ lo cawˬ ve awˬ ceuˬ teˇ hpaˍ htaꞈ ceh tiˉ hpanˍ taˍ ve maˇ heˆ. Miˬ guiˬ hkʼoˆ lo leh laˇ tsuhˇ gʼuiˬ hkʼaw lo cawˬ ve awˬ ceuˬ teˇ hpaˍ anˇ tuˬ uiˍ jaˇ ve htaꞈ kaꞈ yawˇ hpanˍ taˍ ve yoˬ. Chi ve teˇ hpaˍ lehˬ Gʼuiˬ sha htaꞈ caˉ daꞈ ve awˬ lawn ngaˬ hui shiˍ tuˬ te laˇ ve yoˬ. (Chiˇ mvuh ve 104:24, 25) Chi hkʼoˆ kaꞈ, Yaˬhoˉvaˬ ngaˬ hui htaꞈ hkʼaˬ hkʼe te hpanˍ taˍ laˇ ve htaꞈ kaꞈ dawˇ nyi sheˍ. Gʼuiˬ sha ngaˬ hui htaꞈ hpanˍ taˍ laˇ ve lehˬ yawˇ hpanˍ taˍ ve awˬ ceuˬ daꞈ jaˇ ve htaꞈ ngaˬ hui ha lehˬ tuˬ kaꞈ te laˇ ve yoˬ. Gʼuiˬ sha lehˬ ngaˬ hui jawˬ puiˉ ve awˬ ceuˬ 5 ceuˬ cawˬ tuˬ kaꞈ te laˇ ve yoˬ. Chi ve lehˬ mawˬ puiˉ ve, kaˇ puiˉ ve, jawˬ puiˉ ve, awˬ cheh htaꞈ shiˍ ve leh awˬ shaˉ hawnˉ puiˉ ve chi teˇ hpaˍ hpehꞈ ve yoˬ. Chi ve teˇ hpaˍ lehˬ Gʼuiˬ sha hpanˍ taˍ ve awˬ ceuˬ teˇ hpaˍ htaꞈ ngaˬ hui ha lehˬ tuˬ kaꞈ te laˇ ve yoˬ.

5. Roˉmaꞈ liꞈ 1:20 hkʼaw kʼoˆ taˍ ve hkʼe, Yaˬhoˉvaˬ hpanˍ taˍ ve awˬ ceuˬ teˇ hpaˍ htaꞈ ngaˬ hui chaˬ nyi htaˇ aˬ htoꞈ ma awˬ bon cawˬ tuˬ te laˇ ve le?

⁵ Chi hkʼoˆ kaꞈ, Liꞈ hpu hkʼaw teˇ ceuˬ kʼawꞈ kʼoˆ laˇ sheˍ ve lehˬ, Yaˬhoˉvaˬ hpanˍ taˍ ve awˬ ceuˬ htaꞈ ngaˬ hui chaˬ nyi cawˇ ve yoˬ. Chi ve lehˬ Yaˬhoˉvaˬ ve te hkʼaˇ dawˇ hkʼaˇ teˇ hpaˍ htaꞈ caˉ daꞈ ve ngaˬ hui htaꞈ maˍ laˇ ve yoˬ. (Roˉmaꞈ 1:20 gʼaw sheˍ.) Tawˇ pa haˉ te kʼo, hpanˍ taˍ ve awˬ ceuˬ daꞈ jaˇ leh anˇ tuˬ uiˍ jaˇ ve yoˬ. Chi ve teˇ hpaˍ htaꞈ hpanˍ shehˍ hpaˇ Gʼuiˬ sha lehˬ cuˇ yiˍ cawˬ jaˇ ve tehꞈ ngaˬ hui gʼa mawˬ ve yoˬ. Miˬ guiˬ hkʼoˆ lo caˇ tuˬ laiˉ ceuˬ cawˬ maˇ jaˇ ve htaꞈ ngaˬ hui dawˇ nyi sheˍ. Yaˬhoˉvaˬ chaw yaˇ htaꞈ haꞈ jaˇ ve tehꞈ nawˬ dawˇ nyi tuˬ te laˇ ve maˇ heˆ laˇ? Yaˬhoˉvaˬ hpanˍ taˍ ve awˬ ceuˬ teˇ hpaˍ hkʼaw yawˇ ve te hkʼaˇ dawˇ hkʼaˇ teˇ hpaˍ htaꞈ ngaˬ hui gʼa mawˬ htaˇ, ngaˬ hui yawˇ htaꞈ hkʼa dehꞈ shiˍ la ve yoˬ. Hkʼe te leh, ngaˬ hui yawˇ geh gʼaˇ hteꞈ meuˆ daꞈ gaˇ tuˬ kaꞈ te laˇ ve yoˬ. Yaˬhoˉvaˬ yawˇ hpanˍ taˍ ve awˬ ceuˬ teˇ hpaˍ htaꞈ cuˇ leh ngaˬ hui htaꞈ aˬ htoꞈ ma maˍ laˇ ve teˇ geh nyi sheˍ.

6. Ngaˆ teˇ kaˬ lo hpaw˗e ve awˬ lawn ngaˬ hui htaꞈ aˬ htoꞈ ma maˍ laˇ ve le?

⁶ Yaˬhoˉvaˬ lehˬ yawˇ tinˍ taˍ ve awˬ yanˇ cawˬ ve. Iˉsaˍreˍlaˆ chaw lehˬ teˇ hkʼawꞈ le le ha pa 2 maˬ peuˬ la hpawˇ leh ha pa 5 maˬ awˬ kʼaw ji htaˇ ngaˆ teˇ ceuˬ awˬ na hpawˇ lo poˬ hpaw˗e ve htaꞈ gʼa mawˬ ve yoˬ. Yaˬhoˉvaˬ Iˉsaˍreˍlaˆ chaw htaꞈ kʼoˆ piˇ ve, ‘ngaˆ hpaw˗e tuˬ ve awˬ yanˇ shiˍ ve yoˬ.’ (Yeˍraˍmiˆ 8:7) Ngaˆ chi ve hpaw˗e tuˬ Yaˬhoˉvaˬ awˬ yanˇ tinˍ taˍ piˇ ve htaꞈ shuˍ ve hkʼe, Yaˬhoˉvaˬ kaꞈ yawˇ suhˉ jehˬ tuˬ ve awˬ yanˇ tinˍ taˍ˗oˬ ve yoˬ. Chi beuꞈ teˇ co˗e ngaˆ teˇ kaˬ lo hpaw chehˇ˗e tuˬ poˬ kʼai chehˇ ve htaꞈ ngaˬ hui gʼa mawˬ htaˇ, chi ve ngaˬ hui htaꞈ shaˍ tiꞈ peꞈ laˇ ve, Yaˬhoˉvaˬ lehˬ miˬ guiˬ hkʼoˆ lo haiˬ ve awˬ ceuˬ hkʼa peu˗eˬ htaꞈ “[yawˇ] tinˍ taˍ ve awˬ yanˇ gaˬ kʼo,” te luˬ tuˬ yoˬ tehꞈ ngaˬ hui yonˍ gʼa tuˬ te laˇ ve yoˬ.—Haˍbaˍkuˆ 2:3.

7. Mvuhˇ naw ma hkʼoˆ lo ngaˆ poˬ ve htaꞈ ngaˬ hui gʼa mawˬ htaˇ, chi ngaˬ hui aˬ htoꞈ ma awˬ lawn htaꞈ yonˍ gʼa tuˬ te laˇ ve le? (Iˉsaˍyaˆ 40:31)

⁷ Yaˬhoˉvaˬ yawˇ ve kanˉ te ve chaw htaꞈ awˬ gʼaˇ piˇ ve. Yaˬhoˉvaˬ tcuh kaˍ paˍ Iˉsaˍyaˆ htaꞈ cuˇ leh ka tiꞈ te piˇ ve, Yaˬhoˉvaˬ ve chaw awˬ gʼaˇ nuˇ htaˇ, “aˉ ceˬ lonˉ hkʼa shuˍ toˍ laꞈ kʼuˉ nawꞈ leh tu la tuˬ yoˬ.” (Iˉsaˍyaˆ 40:31 gʼaw sheˍ.) Aˉ ceˬ lonˉ lehˬ mvuhˇ jaˇ kuiˬ lo poˬ taˆ˗e htaˇ mvuhˇ haw awˬ shaˉ htaꞈ yehˇ leh yawˇ ve awˬ gʼaˇ htaꞈ maˇ yehˇ ve tehꞈ Iˉsaˍreˍlaˆ chaw maˇ˗awˍ ve shiˍ ve yoˬ. Aˉ ceˬ lonˉ chi ve teˇ hpaˍ ngaˬ hui shiˍ tuˬ te laˇ ve, Yaˬhoˉvaˬ yawˇ ve chaw htaꞈ kʼoˆ piˇ ve, yawˇ aˉ ceˬ lonˉ chi ve teˇ hpaˍ htaꞈ awˬ gʼaˇ piˇ gʼa ve kʼo, yawˇ leuˉ leh ngaˬ hui htaꞈ awˬ gʼaˇ peꞈ laˇ tuˬ yoˬ. Aˉ ceˬ lonˉ mvuhˇ hpe lo gʼaˇ hteꞈ poˬ taˆ˗e htaˇ, to laꞈ kʼuˉ naˇ naˇ maˇ te ve htaꞈ nawˬ gʼa mawˬ ve kʼo, nawˬ shoꞈ shaꞈ ve htaꞈ yeunˇ hkanˍ gʼaˇ tuˬ, Yaˬhoˉvaˬ awˬ gʼaˇ peꞈ laˇ tuˬ yoˬ tehꞈ tawnˇ taˍ sheˍ.

8. Yawˇbaˆ Yaˬhoˉvaˬ hpanˍ taˍ ve awˬ ceuˬ teˇ hpaˍ htaꞈ dawˇ nyi htaˇ aˬ htoꞈ ma gʼa shiˍ ve le? Leh awˬ lawn chi ngaˬ hui htaꞈ aˬ htoꞈ ma maˍ laˇ ve le?

⁸ Yaˬhoˉvaˬ lehˬ ngaˬ hui yonˍ gʼa ve Gʼuiˬ sha hpehꞈ ve. Yaˬhoˉvaˬ lehˬ Yawˇbaˆ yawˇ htaꞈ hkʼa dehꞈ yonˍ tuˬ ga piˇ ve yoˬ. (Yawˇbaˆ 32:2; 40:6-8) Gʼuiˬ sha Yawˇbaˆ geh yaw daꞈ htaˇ yawˇ hpanˍ taˍ ve laiˉ ceuˬ meuꞈ keu shiˍ, moˬ, leh mvuhˇ tiˉ po˗eꞈ chi teˇ hpaˍ htaꞈ kʼoˆ maˍ piˇ ve yoˬ. Gʼuiˬ sha heh nuˇ leh iˉ mvuhˇ htaꞈ kaꞈ kʼoˆ taˍ ve yoˬ. (Yawˇbaˆ 38:32-35; 39:9, 19, 20) Chi ve teˇ hpaˍ lehˬ Yaˬhoˉvaˬ kanˇ paˆ hkʼaˬ hkʼe taw cawˬ ve htaꞈ mawˬ tuˬ ceh te laˇ ve maˇ heˆ. Yaꞈ hkʼaˇ, chi ve teˇ hpaˍ lehˬ Yaˬhoˉvaˬ haꞈ pehnˇ ve leh kanˇ paˆ cawˬ jaˇ ve htaꞈ kaꞈ mawˬ tuˬ te laˇ ve yoˬ. Chi teˇ pawˆ yaw daꞈ ve lehˬ, Yawˇbaˆ Yaˬhoˉvaˬ htaꞈ hkʼa dehꞈ yonˍ tuˬ te piˇ ve yoˬ. (Yawˇbaˆ 42:1-6) Chi ve hkʼa shuˍ shuˍ, Yaˬhoˉvaˬ hpanˍ taˍ ve awˬ ceuˬ teˇ hpaˍ htaꞈ ngaˬ hui chaˬ nyi htaˇ, yawˇ lehˬ kanˇ paˆ leh cuˇ yiˍ cawˬ jaˇ ve htaꞈ ngaˬ hui mawˬ tuˬ te laˇ ve yoˬ. Ngaˬ hui shoꞈ shaꞈ ve leh tuꞈ ve hkanˍ ve htaꞈ yeunˇ hkanˍ gʼaˇ tuˬ, Yaˬhoˉvaˬ ga laˇ gʼa ve tehꞈ chi ve ngaˬ hui shiˍ tuˬ te laˇ ve yoˬ. Leh chi ve ngaˬ hui Yaˬhoˉvaˬ htaꞈ hkʼa dehꞈ yonˍ tuˬ kaꞈ te laˇ ve yoˬ.

9-10. Mvuhˇ nyi leh mvuhˇ yeˬ Yaˬhoˉvaˬ htaꞈ caˉ daꞈ ve awˬ lawn ngaˬ hui htaꞈ aˬ htoꞈ ma maˍ laˇ ve le?

⁹ Yeˍsuˆ lehˬ hpanˍ taˍ ve awˬ ceuˬ teˇ hpaˍ htaꞈ hkʼa dehꞈ shiˍ ve yoˬ. Yaˬhoˉvaˬ mvuhˇ naw ma miˬ naˆ ma htaꞈ hpanˍ htaˇ, Yeˍsuˆ lehˬ Yaˬhoˉvaˬ “awˬ paˇ lo” hkʼaˬ htaˆ kaꞈ chehˇ taˍ ve yoˬ. (Tawˇ naˉ ve 8:30) Leh Yeˍsuˆ miˬ guiˬ hkʼoˆ lo chaw yaˇ hpehꞈ htaˇ, hpanˍ taˍ ve awˬ ceuˬ teˇ hpaˍ htaꞈ cuˇ leh Awˬ pa Yaˬhoˉvaˬ htaꞈ caˉ daꞈ ve awˬ ceuˬ awˬ laꞈ gʼawˇ htaꞈ maˍ piˇ ve yoˬ. Yeˍsuˆ yehˇ ve awˬ lawn teˇ hpaˍ htaꞈ teˇ geh nyi sheˍ.

¹⁰ Yaˬhoˉvaˬ chaw yaˇ teˇ gʼaˇ le le htaꞈ haꞈ ve. Yeˍsuˆ hkʼaw pui hkʼoˆ lo bon maˍ htaˇ, mvuhˇ nyi leh mvuhˇ yeˬ htaꞈ cuˇ leh awˬ laꞈ gʼawˇ hui htaꞈ tehˆ maˍ piˇ ve yoˬ. Chi lehˬ awˬ nu ve chaw awˬ pon kʼo a hkʼe leˇ hpehꞈ ve yoˬ. Yaꞈ hkʼaˇ, chi ve 2 ceuˬ lehˬ miˬ guiˬ hkʼoˆ lo cawˬ ve teˇ ceuˬ le le awˬ pon a yeˇ uiˍ jaˇ. Yaˬhoˉvaˬ lehˬ mvuhˇ nyi leh mvuhˇ yeˬ yawˇ ve kanˉ maˇ te ve chaw htaꞈ maˇ piˇ kaꞈ hpehꞈ ve yoˬ. Yaꞈ hkʼaˇ, yawˇ teˇ gʼaˇ le le htaꞈ piˇ ve yoˬ. (Maꞈhtehˍ 5:43-45) Yaˬhoˉvaˬ lehˬ chaw teˇ gʼaˇ le le htaꞈ haꞈ ve tehꞈ Yeˍsuˆ awˬ lawn chi ve htaꞈ cuˇ leh awˬ laꞈ gʼawˇ hui htaꞈ maˍ piˇ ve yoˬ. Hpanˍ taˍ ve awˬ ceuˬ daꞈ jaˇ ve, mvuhˇ nyi loꞈ˗e ve, maˇ heˆ leh mvuhˇ yeˬ duˆ duˆ laˬ ve htaꞈ kaꞈ gʼa mawˬ ve yoˬ. Yaˬhoˉvaˬ chaw mehˆ hpfuhˇ htaꞈ maˇ nyi leh chaw yaˇ teˇ gʼaˇ le le htaꞈ haꞈ ve ngaˬ hui dawˇ nyi sheˍ. Yaˬhoˉvaˬ htaꞈ ngaˬ hui henˇ yuˬ leh haꞈ pehnˇ ve tehꞈ  hpeuꞈ maw piˇ gaˇ tuˬ te laˇ ve lehˬ teˇ gʼaˇ le le htaꞈ hto maˍ piˇ ve yoˬ.

11. Mvuhˇ hpe lo ve ngaˆ htaꞈ ngaˬ hui chaˬ nyi htaˇ aˬ htoꞈ ma awˬ gʼaˇ gʼa ve le?

¹¹ Yaˬhoˉvaˬ lehˬ ngaˬ hui a shaꞈ teꞈ kuiˬ hkʼaw loˍ ve awˬ ceuˬ cawˬ tuˬ nyi haꞈ shaˉ laˇ ve. Yeˍsuˆ hkʼaw pui hkʼoˆ lo bon maˍ htaˇ kʼoˆ ve, “mvuhˇ hpe lo poˬ toˇ ve ngaˆ teˇ hpaˍ htaꞈ nyi˗o. Yawˇ hui lehˬ caˬ maˇ ti, caˬ maˇ gʼeuꞈ leh caˬ ciˇ yehˬ awˬ hkʼaw lo caˬ shiˍ maˇ pfuhˇ keu. Yaꞈ hkʼaˇ, mvuhˇ naw ma hkʼoˆ chehˇ ve nawˬ hui ve Awˬ pa lehˬ, yawˇ hui htaꞈ caˍ piˇ taw piˇ chehˇ ve yoˬ.” Oˇ ve teˇ yanˇ Yeˍsuˆ kʼoˆ ve htaꞈ na chehˇ ve chaw lehˬ ngaˆ poˬ chehˇ ve htaꞈ mawˬ ve yoˬ. Leh Yeˍsuˆ yawˇ hui htaꞈ kʼoˆ piˇ ve, “nawˬ hui lehˬ, ngaˆ oˇ ve teˇ hpaˍ aꞈ kehˉ awˬ hpfuhˇ hkʼaˆ ve maˇ heˆ laˇ?” (Maꞈhtehˍ 6:26) Ngaˬ hui a shaꞈ teꞈ kuiˬ hkʼaw loˍ ve awˬ ceuˬ Yaˬhoˉvaˬ nyi haꞈ shaˉ laˇ tuˬ yoˬ tehꞈ, Yeˍsuˆ tehˆ maˍ ve awˬ lawn ngaˬ hui yonˍ tuˬ ga laˇ ve yoˬ. (Maꞈhtehˍ 6:31, 32) Awˬ ceuˬ chi ve htaꞈ caˉ daꞈ ve hpanˍ taˍ ve teˇ hpaˍ lehˬ, chi beuꞈ teˇ co˗e Yaˬhoˉvaˬ ve kanˉ ka tiꞈ yeˬ ve hkʼaw te ve chaw htaꞈ awˬ gʼaˇ peꞈ laˇ ve yoˬ. Saˬpenˬ mvuhˇ miˬ lo awˬ viˉ awˬ nyi gʼuˇ suhˍ peuˍ ve yaˇ miˇ teˇ gʼaˇ yehˬ ngaˍ tuˬ awˬ hpfuhˇ pawˇ ve htaꞈ ca maˇ gʼa sheˍ ve pa taw, awˬ gʼaˇ nuˇ ve yoˬ. Yaꞈ hkʼaˇ, ngaˆ iˉ shiˍ htawˆ caˇ chehˇ ve htaꞈ yawˇ gʼa mawˬ htaˇ, awˬ gʼaˇ gʼa ve yoˬ. Yawˇ kʼoˆ ve, “Yaˬhoˉvaˬ ngaˆ chi teˇ hpaˍ htaꞈ haꞈ shaˉ piˇ ve kʼo, yawˇ ngaˬ htaꞈ awˬ tehˬ awˬ na nyi haꞈ shaˉ laˇ tuˬ yoˬ.” Yaˬhoˉvaˬ yawˇ htaꞈ nyi haꞈ shaˉ piˇ ve pa taw, maˇ maw yawˇ kaꞈ yehˬ ngaˍ kuiˬ ca gʼa ve yoˬ.

12. Maꞈhtehˍ liꞈ 10:29-31 hkʼaw jaˍ meuˇ ngaˆ ve awˬ lawn Yaˬhoˉvaˬ htaꞈ caˉ daꞈ ve ngaˬ hui htaꞈ hkʼaˬ hkʼe maˍ laˇ ve le?

¹² Yaˬhoˉvaˬ ngaˬ hui teˇ gʼaˇ leh teˇ gʼaˇ htaꞈ awˬ hpfuhˇ shiˍ ve. Yeˍsuˆ awˬ laꞈ gʼawˇ hui htaꞈ bon maˍ˗e tuˬ maˇ kʼai tcuh sheˍ htaˇ, yawˇ hui tawˍ ve tsuhˇ ve htaꞈ maˇ kawˆ tuˬ Yeˍsuˆ ga piˇ ve yoˬ. (Maꞈhtehˍ 10:29-31 gʼaw sheˍ.) Iˉsaˍreˍlaˆ mvuhˇ miˬ hkʼaw mawˬ gʼa ve ngaˆ teˇ ceuˬ htaꞈ Yeˍsuˆ tehˆ maˍ piˇ ve yoˬ. Chi ve lehˬ jaˍ meuˇ ngaˆ hpehꞈ ve yoˬ. Yeˍsuˆ ve awˬ co˗e htaˇ ngaˆ chi ve teˇ ceuˬ lehˬ awˬ hpfuhˇ pawˇ jaˇ. Yaꞈ hkʼaˇ, yawˇ awˬ laꞈ gʼawˇ hui htaꞈ kʼoˆ piˇ ve, “nawˬ hui ve Awˬ pa a loˍ maˇ cawˬ kʼo, teˇ hkeh kaꞈ miˬ guiˬ hkʼoˆ lo maˇ ce.” Leh yawˇ kʼawꞈ kʼoˆ sheˍ ve, “jaˍ meuˇ ngaˆ teˇ hpaˍ aꞈ kehˉ nawˬ hui awˬ hpfuhˇ hkʼaˆ jaˇ ve yoˬ.” Awˬ laꞈ gʼawˇ hui teˇ gʼaˇ leh teˇ gʼaˇ htaꞈ Yaˬhoˉvaˬ awˬ hpfuhˇ shiˍ ve tehꞈ Yeˍsuˆ ve tawˇ hkawˇ yawˇ hui yonˍ gʼa tuˬ te piˇ ve pa taw, yawˇ hui fawˉ mehˍ ve gʼa hpuˇ ve htaꞈ maˇ kawˆ ve yoˬ. Awˬ laꞈ gʼawˇ hui venˇ hkʼaw lo leh hkʼaˆ hkʼaw lo bon maˍ˗e ve teˇ pawˆ le le jaˍ meuˇ ngaˆ htaꞈ gʼa mawˬ htaˇ, yawˇ hui Yeˍsuˆ ve tawˇ hkawˇ htaꞈ dawˇ mawˬ ve yoˬ hehˉ. Chi ve hkʼa shuˍ shuˍ, nawˬ hui jaˍ meuˇ ngaˆ htaꞈ gʼa mawˬ htaˇ, “jaˍ meuˇ ngaˆ teˇ hpaˍ aꞈ kehˉ nawˬ hui awˬ hpfuhˇ hkʼaˆ jaˇ ve” yoˬ tehꞈ Yaˬhoˉvaˬ shawˍ ve htaꞈ tawnˇ taˍ sheˍ. Nawˬ tawˍ ve tsuhˇ ve gʼa hpuˇ htaˇ Yaˬhoˉvaˬ nawˬ htaꞈ ga laˇ tuˬ ve pa taw nawˬ kawˆ tuˬ maˇ loˍ.—Chiˇ mvuh ve 118:6.

13. Yaˬhoˉvaˬ hpanˍ taˍ ve awˬ ceuˬ teˇ hpaˍ htaꞈ ngaˬ hui henˇ shiˍ tuˬ aˬ htoꞈ ma gʼa te cawˇ ve le?

¹³ Yaˬhoˉvaˬ hpanˍ taˍ ve awˬ ceuˬ htaꞈ cuˇ leh ngaˬ hui yawˇ htaꞈ laiˉ ceuˬ henˇ shiˍ gʼa ve yoˬ. Chi ve ngaˬ hui hkʼaˬ hkʼe te gʼa tuˬ le? Awˉ lawˉ htaˇ hpanˍ taˍ ve awˬ ceuˬ teˇ hpaˍ htaꞈ ngaˬ hui gʼa chaˬ nyi ve yoˬ. Leh ngaˬ hui mawˬ ve awˬ ceuˬ Yaˬhoˉvaˬ htaꞈ caˉ daꞈ ve aˬ htoꞈ ma maˍ laˇ ve htaꞈ kaꞈ dawˇ nyi sheˍ. Yaꞈ hkʼaˇ, chi hkʼe te tuˬ teˇ pawˆ pawˆ kʼo maˇ sha ve yoˬ. Keˬmaˬronˇ mvuhˇ miˬ lo chehˇ ve awˬ viˉ awˬ nyi yaˇ miˇ Ceh˗lan˗din kʼoˆ ve, “ngaˬ venˇ hkʼaw lo uiˍ la ve pa taw, hpanˍ taˍ ve awˬ ceuˬ teˇ hpaˍ htaꞈ chaˬ nyi tuˬ  gʼa coˇ caˇ jaˇ.” Nyi haꞈ shaˉ paˍ An˗hpon˗soˍ meh ve kʼoˆ ve, “ngaˬ teˇ gʼaˇ tiˉ chehˇ leh Yaˬhoˉvaˬ hpanˍ taˍ ve awˬ ceuˬ teˇ hpaˍ htaꞈ chaˬ nyi tuˬ awˬ yanˇ shawˍ teh ve yoˬ. Leh Yaˬhoˉvaˬ htaꞈ caˉ daꞈ ve ngaˬ htaꞈ aˬ htoꞈ ma maˍ laˇ ve le, kaꞈ dawˇ nyi ve yoˬ.”

14. Daˍviˆ lehˬ Yaˬhoˉvaˬ hpanˍ taˍ ve awˬ ceuˬ htaꞈ caˉ daꞈ ve yawˇ dawˇ nyi htaˇ yawˇ htaꞈ aˬ htoꞈ ma maˍ piˇ ve le?

¹⁴ Daˍviˆ lehˬ Yaˬhoˉvaˬ hpanˍ taˍ ve awˬ ceuˬ teˇ hpaˍ htaꞈ caˉ daꞈ ve yawˇ hkʼa dehꞈ dawˇ nyi ve yoˬ. Yawˇ Yaˬhoˉvaˬ htaꞈ kʼoˆ ve, “nawˬ te hpanˍ taˍ ve mvuhˇ naw ma, ha pa leh meuꞈ keu shiˍ teˇ hpaˍ htaꞈ ngaˬ chiˇ nyi ve teˇ yanˇ, nawˬ yawˇ htaꞈ gʼa dawˇ nyi tuˬ chaw yaˇ lehˬ aˬ htoꞈ ma hpehꞈ ve le?” (Chiˇ mvuh ve 8:3, 4) Daˍviˆ mvuhˇ hpeuꞈ htaˇ mvuhˇ naw ma htaꞈ nyi leh dawˇ cawˇ ve ceh tiˉ maˇ heˆ. Meuꞈ keu shiˍ awˬ moˍ awˬ cuˇ lonˉ htaꞈ yawˇ gʼa mawˬ htaˇ, Yaˬhoˉvaˬ htaꞈ caˉ daꞈ ve yawˇ htaꞈ aˬ htoꞈ ma maˍ laˇ ve kaꞈ dawˇ nyi ve yoˬ. Yaˬhoˉvaˬ lehˬ uiˍ jaˇ mvuh jaˇ leh cuˇ yiˍ cawˬ jaˇ ve tehꞈ yawˇ gʼa henˇ ve yoˬ. Chi hkʼoˆ kaꞈ, awˬ e ve gʼoˇ peˬ hkʼaw keu taˍ laˇ ve anˇ lawꞈ lawꞈ ve awˬ ceuˬ htaꞈ kaꞈ Daˍviˆ kʼoˆ sheˍ ve yoˬ. Yawˇ ve awˬ to anˇ lawꞈ lawꞈ ve hkʼaw hpanˍ taˍ laˇ ve htaꞈ yawˇ dawˇ nyi htaˇ, Yaˬhoˉvaˬ ve cuˇ yiˍ htaꞈ yawˇ dawˇ cawˇ jaˇ ve yoˬ.—Chiˇ mvuh ve 139:14-17.

15. Hpanˍ taˍ ve awˬ ceuˬ Yaˬhoˉvaˬ ve te hkʼaˇ dawˇ hkʼaˇ htaꞈ caˉ daꞈ ve nawˬ htaꞈ aˬ htoꞈ ma maˍ laˇ ve le? Tawˇ pa haˉ kʼoˆ maˍ laˇ sheˍ. (Chiˇ mvuh ve 148:7-10)

¹⁵ Nawˬ kaꞈ Daˍviˆ hkʼa shuˍ te gʼa ve yoˬ. Yaˬhoˉvaˬ htaꞈ caˉ daꞈ ve dawˇ nyi tuˬ hpanˍ taˍ ve awˬ ceuˬ htaꞈ nawˬ chi fui fui ca nyi tuˬ maˇ loˍ. Nawˬ awˬ paˇ awˬ kui lo cawˬ ve awˬ ceuˬ htaꞈ nyi ve ceh kaꞈ Yaˬhoˉvaˬ ve te hkʼaˇ dawˇ hkʼaˇ htaꞈ caˉ daꞈ ve nawˬ laiˉ ceuˬ henˇ gʼa ve yoˬ. Tawˇ pa haˉ te kʼo, mvuhˇ shawˉ naꞈ htaˇ mvuhˇ cha lehˬ lehˬ ve htaꞈ nawˬ ca lehˬ˗e htaˇ Yaˬhoˉvaˬ ve kanˇ paˆ uiˍ jaˇ mvuh jaˇ ve htaꞈ nawˬ shiˍ gʼa ve yoˬ. (Yeˍraˍmiˆ 31:35) Leh nawˬ ngaˆ awˬ hpui te chehˇ ve htaꞈ gʼa mawˬ htaˇ, Yaˬhoˉvaˬ ve cuˇ yiˍ htaꞈ kaꞈ nawˬ gʼa mawˬ ve yoˬ. Maˇ heˆ leh hpuiˇ yawˇ ve mehˍ tu htaꞈ hpfuhˆ geuꞈ guiˇ htaˇ Yaˬhoˉvaˬ lehˬ nyi ma daꞈ jaˇ ve Gʼuiˬ sha hpehꞈ ve htaꞈ nawˬ gʼa shiˍ ve yoˬ. Maˇ heˆ leh awˬ e yawˇ ve yaˇ geh leˍ guiˇ htaˇ Yaˬhoˉvaˬ ve haꞈ pehnˇ ve htaꞈ nawˬ mawˬ leh nawˬ yawˇ htaꞈ awˬ bon uiˍ jaˇ kʼoˆ piˇ gaˇ tuˬ te laˇ ve yoˬ. Yaˬhoˉvaˬ htaꞈ caˉ daꞈ ve ngaˬ hui laiˉ ceuˬ gʼa henˇ ve yoˬ. Yaˬhoˉvaˬ hpanˍ taˍ ve uiˍ ve i ve htaꞈ kaꞈ ngaˬ hui gʼa mawˬ ve yoˬ. Vuiˇ ve maˇ heˆ leh maˇ vuiˇ kuiˬ lo chehˇ ve htawˇ, Yaˬhoˉvaˬ ve awˬ meꞈ awˬ hponˇ gʼa tuˬ te piˇ ve yoˬ.—Chiˇ mvuh ve 148:7-10 gʼaw sheˍ.

16. Ngaˬ hui teˇ gʼaˇ le le aˬ htoꞈ ma te tuˬ dawˇ teh taˍ ve le?

¹⁶ Yaˬhoˉvaˬ lehˬ cuˇ yiˍ cawˬ jaˇ leh kanˇ paˆ uiˍ jaˇ ve Gʼuiˬ sha hpehꞈ ve yoˬ. Yaˬhoˉvaˬ lehˬ ngaˬ hui htaꞈ dawˇ haˍ jaˇ ve yoˬ. Hpanˍ taˍ ve awˬ ceuˬ htaꞈ ngaˬ hui hkʼa dehꞈ chaˬ nyi htaˇ Yaˬhoˉvaˬ ve te hkʼaˇ dawˇ hkʼaˇ chi ve teˇ hpaˍ leh awˬ nu ve awˬ ceuˬ htaꞈ kaꞈ ngaˬ hui mawˬ gʼa sheˍ ve yoˬ. Hpanˍ taˍ ve awˬ ceuˬ teˇ hpaˍ htaꞈ ngaˬ hui teˇ gʼaˇ le le dawˇ nyi leh Yaˬhoˉvaˬ htaꞈ caˉ daꞈ ve ngaˬ hui htaꞈ aˬ htoꞈ ma maˍ laˇ ve kaꞈ dawˇ nyi sheˍ. Ngaˬ hui hkʼaˬ htaˆ kaꞈ chi hkʼe te ve kʼo, ngaˬ hui Yaˬhoˉvaˬ geh leuˉ leh meuˆ daꞈ tuˬ yoˬ. (Yaˍkoˆ 4:8) Gʼuˇ suhˍ teˇ lawn hkʼaw awˬ pa awˬ e lehˬ hpanˍ taˍ ve awˬ ceuˬ teˇ hpaˍ htaꞈ cuˇ leh yaˇ Yaˬhoˉvaˬ geh meuˆ daꞈ tuˬ hkʼaˬ hkʼe maˍ piˇ gʼa ve htaꞈ teˇ geh henˇ tuˬ yoˬ.