AWˬ LAWN 12
KʼA MUIˬ HKAWˇ 77 Naˆ hoꞈ ve miˬ guiˬ hkʼoˆ ve awˬ gʼeuˆ
Awˬ gʼeuˆ hkʼaw chehˇ ve, naˆ hoꞈ ve hkʼaw taˇ chehˇ
‘Nawˬ hui awˉ lawˉ htaˇ naˆ hoꞈ lehˍ hpehꞈ ve htawˇ, chi beuꞈ awˬ gʼeuˆ hkʼaw chehˇ la peuˬ.’—EˇFEˇSUꞈ 5:8.
HENˇ TUˬ VE TEˇ HPAˍ
Eˇfeˇsuꞈ liꞈ kaˇ nanˉ uiˍ 5 hkʼaw naˆ hoꞈ ve, leh awˬ gʼeuˆ htaꞈ tehˆ taˍ ve awˬ lawn ngaˬ hui htaꞈ aˬ htoꞈ ma maˍ laˇ ve le?
1-2. (a) Pawˇluꞈ Eˇfeˇsuꞈ venˇ hkʼaw chehˇ ve Hkriꞈ yaˇ htaꞈ liꞈ bvuhꞈ piˇ htaˇ, yawˇ hkʼaˬ kaˬ lo chehˇ ve le? (b) Aˬ htoꞈ ma ve na hkawˇ htaꞈ ngaˬ hui henˇ tuˬ le?
Tcuh yaˇ Pawˇluꞈ Roˉmaꞈ venˇ hkʼaw shu ve aˉ hkʼaw lo haw tiˍ taˍ piˇ htaˇ, yawˇ awˬ viˉ awˬ nyi htaꞈ awˬ gʼaˇ piˇ gaˇ jaˇ ve yoˬ. Yaꞈ hkʼaˇ, yawˇ awˬ viˉ awˬ nyi geh kʼai maˇ gʼa ve pa taw, liꞈ bvuhꞈ piˇ ve yoˬ. Yawˇ bvuhꞈ ve liꞈ teˇ kʼoˆ hkʼaw lehˬ, Eˇfeˇsuꞈ venˇ hkʼaw chehˇ ve awˬ viˉ awˬ nyi awˬ pon hpehꞈ ve yoˬ. Chi ve lehˬ aˬ laˬ hkʼe 60 hkʼawꞈ maˇ heˆ leh 61 hkʼawꞈ C. E. htaˇ hpehꞈ ve yoˬ.—Eˇfeˇsuꞈ 1:1; 4:1.
2 Peuˬ laˬ ve aˬ laˬ hkʼe 10 hkʼawꞈ htaˇ, Pawˇluꞈ lehˬ Eˇfeˇsuꞈ venˇ hkʼaw chehˇ jaw ve yoˬ. Oˇ ve teˇ yanˇ yawˇ daꞈ ve awˬ lawn sha tanˇ bon maˍ leh oˇ kaˬ lo ve chaw htaꞈ kaꞈ maˍ piˇ ve yoˬ. (Tcuh yaˇ 19:1, 8-10; 20:20, 21) Pawˇluꞈ awˬ viˉ awˬ nyi htaꞈ haꞈ jaˇ. Yawˇ awˬ viˉ awˬ nyi Yaˬhoˉvaˬ htaꞈ hkʼaˬ htaˆ kaꞈ ka tiꞈ yeˬ tuˬ ga piˇ gaˇ ve yoˬ. Yaꞈ hkʼaˇ, aˬ htoꞈ ma te Pawˇluꞈ leuˆ yuˬ taˍ ve Hkriꞈ yaˇ htaꞈ naˆ hoꞈ ve leh awˬ gʼeuˆ ve awˬ lawn liꞈ bvuhꞈ piˇ ve le? Pawˇluꞈ beˆ maˍ laˇ ve htaꞈ ngaˬ hui teˇ gʼaˇ le le aˬ htoꞈ ma gʼa henˇ ve le? Hkʼawꞈ laˇ hkawˇ htaꞈ teˇ geh nyi sheˍ.
NAˆ HOꞈ VE HKʼAW CHEHˇ JAW VE HTAWˇ AWˬ GʼEUˆ HKʼAW CHEHˇ LA PEUˬ
3. Pawˇluꞈ Eˇfeˇsuꞈ venˇ hkʼaw chehˇ ve Hkriꞈ yaˇ htaꞈ liꞈ bvuhꞈ piˇ htaˇ aˬ htoꞈ ma ve awˬ lawn htaꞈ tehˆ maˍ piˇ ve le?
3 Pawˇluꞈ Eˇfeˇsuꞈ venˇ hkʼaw chehˇ ve Hkriꞈ yaˇ htaꞈ liꞈ bvuhꞈ piˇ ve yoˬ. Oˇ kaˬ lo kʼoˆ ve, ‘nawˬ hui awˉ lawˉ htaˇ naˆ hoꞈ lehˍ hpehꞈ ve htawˇ, chi beuꞈ awˬ gʼeuˆ hkʼaw chehˇ la peuˬ.’ (Eˇfeˇsuꞈ 5:8) Pawˇluꞈ Eˇfeˇsuꞈ venˇ hkʼaw chehˇ ve Hkriꞈ yaˇ htaꞈ naˆ hoꞈ ve leh awˬ gʼeuˆ ve awˬ lawn tehˆ maˍ piˇ leh kʼoˆ maˍ piˇ ve pa taw, yawˇ hui ve te hkʼaˇ dawˇ hkʼaˇ pa gʼa ve yoˬ. Aˬ htoꞈ ma te awˬ viˉ awˬ nyi chi teˇ hpaˍ ‘awˉ lawˉ htaˇ naˆ hoꞈ lehˍ hpehꞈ ve’ tehꞈ Pawˇluꞈ kʼoˆ ve htaꞈ teˇ geh nyi sheˍ.
4. Eˇfeˇsuꞈ venˇ hkʼaw chehˇ ve chaw hui lehˬ bon hpawˇ hkʼaˬ hkʼe te naˆ hoꞈ ve le?
4 Bon hpawˇ naˆ hoꞈ ve. Awˬ tehˬ ve maˇ henˇ sheˍ htaˇ leh Hkriꞈ yaˇ maˇ hpehꞈ la sheˍ htaˇ, Eˇfeˇsuꞈ venˇ hkʼaw chehˇ ve awˬ viˉ awˬ nyi maˇ heˆ heˆ ve bon htaꞈ yonˍ leh, faˍ te ve htaꞈ dawˇ cawˇ jaˇ ve yoˬ. Eˇfeˇsuꞈ venˇ hkʼaw An˗teh˗miˆ gʼuiˬ sha ma ve bon yehˬ kaꞈ cawˬ ve yoˬ. An˗teh˗miˆ gʼuiˬ sha ma chi htaꞈ oˉ kʼoˍ pui tuˬ chaw yaˇ maˇ maˇ oˇ kaˬ lo kʼai ve yoˬ. Eˇfeˇsuꞈ venˇ hkʼaw chehˇ ve hpu dawˆ paˍ teˇ hpaˍ An˗teh˗miˆ gʼuiˬ sha ma ve shaˉ hoꞈ leh yawˇ hui oˉ kʼoˍ pui kuiˬ yehˬ ehˉ te hawˇ ve pa taw, yawˇ hui maˇ maˇ paw sha la ve yoˬ. (Tcuh yaˇ 19:23-27) Chi hkʼe ceh tiˉ maˇ heˆ. Eˇfeˇsuꞈ venˇ hkʼaw chehˇ ve chaw hui lehˬ faˍ te ve htaꞈ kaꞈ dawˇ cawˇ jaˇ ve yoˬ.—Tcuh yaˇ 19:19.
5. Eˇfeˇsuꞈ venˇ hkʼaw chehˇ ve chaw pehꞈ ve tzuhˆ ve hpawˇ hkʼaˬ hkʼe te naˆ hoꞈ ve le?
5 Maˇ daꞈ ve te hkʼaˇ dawˇ hkʼaˇ hpawˇ naˆ hoꞈ ve. Eˇfeˇsuꞈ venˇ hkʼaw chehˇ ve chaw haˉ chawˇ haˉ paˆ te leh yawˇ hui te ve awˬ ceuˬ kaꞈ maˇ yaꞈ taw ve yoˬ. Venˇ oˇ ve hkʼaw ve awˬ han leh bon hpawˇ ve pawehˇ kaꞈ pehꞈ ve tzuhˆ ve htaꞈ tiˉ caˉ daꞈ ve yoˬ. (Eˇfeˇsuꞈ 5:3) Venˇ oˇ ve hkʼaw maˇ˗awˍ ve chaw lehˬ “yaꞈ taw puiˉ ve teˇ ceuˬ maˇ cawˬ.” Tawˇ hkawˇ chi ve hteˇ˗ehˍ kʼoˆ ve kʼo, “te yaꞈ kaꞈ maˇ dawˇ shiˍ puiˉ ve yoˬ.” (Eˇfeˇsuꞈ 4:17-19) Eˇfeˇsuꞈ venˇ hkʼaw chehˇ ve chaw teˇ hpaˍ Yaˬhoˉvaˬ ve awˬ liˇ awˬ hkʼaˇ cawˇ maˇ cawˇ ve htaꞈ maˇ gʼa henˇ sheˍ htaˇ, yawˇ hui te yaꞈ htaˇ maˇ yaꞈ taw puiˉ leh, Yaˬhoˉvaˬ hkʼaˬ hkʼe dawˇ ve htaꞈ kaꞈ a yeˇ maˇ te ve yoˬ. Chi htaꞈ pa taw, Pawˇluꞈ yawˇ hui htaꞈ kʼoˆ piˇ ve, “yawˇ hui lehˬ, nyi ma heh leh teꞈ chiˉ maˇ shiˍ ve pa taw, yawˇ hui shiˍ puiˉ ve teˇ ceuˬ naˆ hoꞈ lehˍ hpehꞈ kʼai” ve yoˬ.
6. Aˬ htoꞈ ma te Eˇfeˇsuꞈ venˇ hkʼaw chehˇ ve Hkriꞈ yaˇ “awˬ gʼeuˆ” hkʼaw chehˇ la peuˬ tehꞈ Pawˇluꞈ kʼoˆ ve le?
6 Yaꞈ hkʼaˇ, Eˇfeˇsuꞈ venˇ hkʼaw chehˇ ve chaw teˇ hpaˍ naˆ hoꞈ ve hkʼaw tawˆ la ve yoˬ. Pawˇluꞈ yawˇ hui htaꞈ kʼoˆ ve, ‘nawˬ hui awˉ lawˉ htaˇ naˆ hoꞈ lehˍ hpehꞈ ve htawˇ, chi beuꞈ Jawˇ mawˇ Yeˍsuˆ awˬ hkʼaw lo awˬ gʼeuˆ hkʼaw chehˇ la peuˬ.’ (Eˇfeˇsuꞈ 5:8) Hkriꞈ yaˇ chi teˇ hpaˍ Liꞈ hpu hkʼaw awˬ tehˬ ve chi awˬ gʼeuˆ htaꞈ shuˍ ve tehꞈ haꞈ yuˬ ve yoˬ. (Chiˇ mvuh ve 119:105) Yawˇ hui maˇ heˆ heˆ ve bon liˇ htaꞈ caˉ daꞈ ve teˇ ceuˬ le le maˇ te leh, haˉ chawˇ haˉ paˆ kaꞈ maˇ te˗o ve yoˬ. Yawˇ hui ‘Gʼuiˬ sha te ve hkʼe te’ leh, Yaˬhoˉvaˬ htaꞈ ha lehˬ ha kʼa ve hkʼaw oˉ kʼoˍ pui leh, yawˇ nyi hkʼaˇ suh tuˬ kaꞈ te piˇ ve yoˬ.—Eˇfeˇsuꞈ 5:1.
7. Ngaˬ hui Eˇfeˇsuꞈ venˇ hkʼaw chehˇ ve Hkriꞈ yaˇ htaꞈ hkʼaˬ hkʼe te shuˍ daꞈ ve le?
7 Ngaˬ hui kaꞈ hkʼa shuˍ shuˍ, Liꞈ hpu maˇ henˇ la sheˍ htaˇ, bon hpawˇ naˆ hoꞈ ve hkʼaw chehˇ leh ngaˬ hui maˇ daꞈ ve awˬ liˇ awˬ hkʼaˇ kaꞈ te chehˇ ve yoˬ. Leh teˇ hpaˍ kʼo, bon hpawˇ jehˇ ve awˬ liˇ awˬ hkʼaˇ htaꞈ te jaw ve yoˬ. Teˇ hpaˍ kʼo, haˉ chawˇ haˉ paˆ kaꞈ te jaw ve yoˬ. Yaꞈ hkʼaˇ, Yaˬhoˉvaˬ htaꞈ gʼa shiˍ daꞈ la htaˇ, ngaˬ hui ve te hkʼaˇ dawˇ hkʼaˇ htaꞈ pa leh Yaˬhoˉvaˬ ve awˬ liˇ awˬ hkʼaˇ htaꞈ tanˬ te ve yoˬ. Chi hkʼe te ve lehˬ, ngaˬ hui awˬ bon laiˉ ceuˬ gʼa ve yoˬ. (Iˉsaˍyaˆ 48:17) Chi teˇ hkui ngaˬ hui a shaꞈ teꞈ kuiˬ hkʼaw shoꞈ shaꞈ ve gʼa hpuˇ ve htawˇ, ngaˬ hui baˬ taˉ ve naˆ hoꞈ ve hkʼaw maˇ gʼa caˉ daꞈ˗o leh ngaˬ hui “awˬ gʼeuˆ” hkʼaw caˉ leh gʼa chehˇ ve yoˬ. Chi ngaˬ hui hkʼaˬ hkʼe te gʼa tuˬ le?
Image digitally reproduced with the permission of the Papyrology Collection, Graduate Library, University of Michigan, P.Mich.inv. 6238. Licensed under CC by 3.0
Eˇfeˇsuꞈ venˇ hkʼaw chehˇ ve Hkriꞈ yaˇ htaꞈ Pawˇluꞈ liꞈ bvuhꞈ piˇ ve lehˬ, ngaˬ hui awˬ pon kaꞈ awˬ bon cawˬ ve (Awˬ tawn 7 nyi sheˍ) b
NAˆ HOꞈ VE HTAꞈ TAˇ CAˉ DAꞈ
8. Eˇfeˇsuꞈ liꞈ 5:3-5 hkʼaw kʼoˆ taˍ ve hkʼe, Eˇfeˇsuꞈ venˇ hkʼaw chehˇ ve Hkriꞈ yaˇ aˬ htoꞈ ma htaꞈ maˇ caˉ daꞈ˗o ve le?
8 Eˇfeˇsuꞈ liꞈ 5:3-5 gʼaw sheˍ. Eˇfeˇsuꞈ venˇ hkʼaw chehˇ ve Hkriꞈ yaˇ pehꞈ ve tzuhˆ ve naˆ hoꞈ ve hkʼaw kaꞈ maˇ caˉ daꞈ˗o ve yoˬ. Yawˇ hui Yaˬhoˉvaˬ maˇ dawˇ cawˇ ve awˬ ceuˬ htaꞈ kaꞈ maˇ caˉ daꞈ˗o ve yoˬ. Tawˇ pa haˉ te kʼo, yawˇ hui haˉ chawˇ haˉ paˆ maˇ te˗o ve awˬ hkʼoˆ kaꞈ, awˬ lawn chi hkʼe ve htaꞈ kaꞈ maˇ yaw daꞈ˗o ve yoˬ. Pawˇluꞈ Eˇfeˇsuꞈ venˇ hkʼaw chehˇ ve Hkriꞈ yaˇ htaꞈ shaˍ tiꞈ piˇ ve, “Hkriꞈ leh Gʼuiˬ sha ve mvuhˇ miˬ awˬ hkʼaw lo” loꞈ˗e gaˇ ve kʼo, awˬ ceuˬ chi teˇ hpaˍ htaꞈ maˇ gʼa caˉ daꞈ.
9. Pehꞈ ve tzuhˆ ve te yaꞈ la ve awˬ ceuˬ htaꞈ aˬ htoꞈ ma te ngaˬ hui maˇ caˉ daꞈ cawˇ ve le?
9 Ngaˬ hui “naˆ hoꞈ ve kanˉ teˇ hpaˍ htaꞈ a ciˉ kaꞈ” maˇ gʼa te tuˬ gʼa coˇ caˇ ve yoˬ. (Eˇfeˇsuꞈ 5:11) Ngaˬ hui laiˉ pawˆ gʼa mawˬ ve, chaw yaˇ pehꞈ ve tzuhˆ ve awˬ lawn awˬ han nyi ve, liꞈ hkawˇ na ve, leh pehꞈ ve tzuhˆ ve awˬ lawn tawˇ yaw daꞈ ve kʼo, chi ve teˇ hpaˍ lehˬ te yaꞈ tuˬ te piˇ ve yoˬ. (Awˬ hkuiˉ puiˍ 3:6; Yaˍkoˆ 1:14, 15) Tawˇ pa haˉ te kʼo, mvuhˇ miˬ teˇ mvuhˇ miˬ hkʼaw awˬ viˉ awˬ nyi laiˉ gʼaˇ in˗teu˗neꞈ leˍ guiˇ ve kʼo, yawˇ hui tawˇ yaw daꞈ leh caˉ daꞈ tuˬ awˬ moˍ cawˬ ve yoˬ. Awˉ lawˉ htaˇ yawˇ hui awˬ moˍ hkʼaw tawˇ yaw daꞈ ve lehˬ, yonˍ ve htaꞈ caˉ daꞈ ve yoˬ. Yaꞈ hkʼaˇ, maw la htaˇ chaw teˇ hpaˍ maˇ daꞈ ve tawˇ tanˬ yaw ve yoˬ. Tawˇ pa haˉ te kʼo, teˇ geh zuhꞈ ve awˬ lawn yaw daꞈ ve yoˬ. Chi teˇ moˍ hkʼaw ve awˬ viˉ awˬ nyi teˇ hpaˍ kʼoˆ ve, yawˇ hui chi hkʼe tanˬ yaw daꞈ ve lehˬ pehꞈ ve tzuhˆ ve te yaꞈ tuˬ te piˇ ve tehꞈ shiˍ ve yoˬ.
10. Saˍtanˍ coˇ caˇ leh ngaˬ hui htaꞈ hkʼaˬ hkʼe heˍ laˇ chehˇ ve le? (Eˇfeˇsuꞈ 5:6)
10 Haˉ cawˇ haˉ paˆ te ve maˇ heˆ leh Yaˬhoˉvaˬ kʼoˆ laˇ ve maˇ daꞈ kehˬ ve awˬ ceuˬ Saˍtanˍ ngaˬ hui htaꞈ maˇ yaꞈ tehꞈ dawˇ tcuh gaˇ ve yoˬ. (2 Peˍtruˆ 2:19) Chi hkʼe dawˇ tcuh laˇ ve ngaˬ hui anˇ tuˬ maˇ loˍ. Awˬ lawn kʼo, chi ve Saˍtanˍ yehˇ ve awˬ hkʼaˇ maw jaˇ˗oˬ ve teˇ ceuˬ hpehꞈ ve yoˬ. Saˍtanˍ lehˬ chaw yaˇ aˬ htoꞈ ma cawˇ maˇ cawˇ ve htaꞈ htawˇ dawˇ nawˬ dawˇ cawˬ tuˬ te laˇ ve yoˬ. (Iˉsaˍyaˆ 5:20; 2 Kawˇrenˍhtuˆ 4:4) Chi teˇ hkui TV hkʼaw maˇ heˆ leh vehˆsaiˉ teˇ hpaˍ hkʼaw kaꞈ Yaˬhoˉvaˬ ve awˬ liˇ awˬ hkʼaˇ htaꞈ maˇ cawˇ ve hpawˇ ngaˬ hui htaꞈ Saˍtanˍ te tcuh gaˇ ve tehꞈ hkʼa tawˍ lehˆ gʼa mawˬ ve yoˬ. Maˇ daꞈ ve awˬ ceuˬ htaꞈ te leh haˉ chawˇ haˉ paˆ te gʼa ve tehꞈ Saˍtanˍ ngaˬ hui htaꞈ dawˇ tcuh gaˇ ve yoˬ. Yaꞈ hkʼaˇ, chi ve lehˬ pyawˍ leh kawˆ tuˬ maˇ cawˬ ve tehꞈ kaꞈ dawˇ tcuh gaˇ ve yoˬ.—Eˇfeˇsuꞈ 5:6 gʼaw sheˍ.
11. Ehn˗ci˗laˇ ve awˬ lawn ngaˬ hui Eˇfeˇsuꞈ liꞈ 5:7 hkʼaw beˆ maˍ laˇ ve htaꞈ gʼaꞈ te tuˬ hkʼaˬ hkʼe ga laˇ ve le? (Awˬ han htaꞈ nyi sheˍ.)
11 Yaˬhoˉvaˬ htaꞈ a yeˇ maˇ yuˬ leh yawˇ ve awˬ liˇ awˬ hkʼaˇ htaꞈ maˇ gʼaꞈ te ve chaw geh Saˍtanˍ ngaˬ hui htaꞈ awˬ chawˇ te tcuh gaˇ ve yoˬ. Chi ve htaꞈ pa taw, Pawˇluꞈ Eˇfeˇsuꞈ venˇ hkʼaw chehˇ ve Hkriꞈ yaˇ htaꞈ shaˍ tiꞈ piˇ ve, “yawˇ hui htaꞈ awˬ chawˇ taˇ te daꞈ.” Chi ve lehˬ Gʼuiˬ sha yaꞈ ve tehꞈ kʼoˆ ve awˬ ceuˬ htaꞈ te ve chaw hpehꞈ ve yoˬ. (Eˇfeˇsuꞈ 5:7) Ngaˬ hui mawˬ daꞈ gʼa ve chaw htaꞈ ceh tiˉ awˬ chawˇ te ve maˇ heˆ tehꞈ tawnˇ taˍ cawˇ ve yoˬ. Yaꞈ hkʼaˇ, in˗teu˗neꞈ hkʼaw ngaˬ hui yaw daꞈ ve chaw htaꞈ kaꞈ kʼoˆ gaˇ ve yoˬ. Chi ve lehˬ Eˇfeˇsuꞈ venˇ hkʼaw chehˇ ve Hkriꞈ yaˇ maˇ gʼa hpuˇ. Aˍshaˆ miˬ guiˬ lo chehˇ ve Ehn˗ci˗laˇ a in˗teu˗neꞈ hkʼaw kawˆ tuˬ hkʼaˬ hkʼe taw cawˬ ve htaꞈ kʼoˆ maˍ laˇ ve yoˬ. Yawˇ kʼoˆ ve, “chi hkʼe ve lehˬ va htaw taˍ ve htaꞈ shuˍ ve yoˬ. Chi ve ngaˬ ve dawˇ hkʼaˇ awˬ meu˗eˇ awˬ meu˗eˇ pa tuˬ te laˇ ve yoˬ. Liꞈ hpu hkʼaw ve awˬ liˇ awˬ hkʼaˇ htaꞈ maˇ gʼaꞈ te ve chaw geh ngaˬ awˬ chawˇ te ve lehˬ maˇ yaꞈ tehꞈ dawˇ tuˬ te laˇ ve yoˬ. Leh peuˬ hkʼawꞈ nawˉ, Yaˬhoˉvaˬ maˇ dawˇ cawˇ ve awˬ ceuˬ htaꞈ ngaˬ te ve lehˬ maˇ yaꞈ tehꞈ dawˇ la ve yoˬ.” Ehn˗ci˗laˇ yawˇ ve dawˇ hkʼaˇ pa tuˬ nyi haꞈ shaˉ paˍ ga piˇ ve daꞈ jaˇ. Yawˇ kʼoˆ ve, “in˗teu˗neꞈ hkʼaw cawˬ ve awˬ ceuˬ htaꞈ a yeˇ yuˬ ve aꞈ kehˉ chi teˇ hkui ngaˬ ve yonˍ hkʼaˇ yonˍ yeˬ tuˬ htaꞈ a yeˇ yuˬ ve yoˬ.”
Daꞈ ve awˬ chawˇ htaꞈ leuˆ te ve lehˬ Yaˬhoˉvaˬ ve awˬ liˇ awˬ hkʼaˇ htaꞈ te gʼa tuˬ ga laˇ gʼa ve. (Awˬ tawn 11 nyi sheˍ)
12. Ngaˬ hui Yaˬhoˉvaˬ ve awˬ liˇ awˬ hkʼaˇ htaꞈ yonˍ yeˬ tuˬ aˬ htoꞈ ma ga laˇ gʼa ve le?
12 Miˬ guiˬ hkʼoˆ lo maˇ˗awˍ ve chaw haˉ chawˇ haˉ paˆ te ve htaꞈ haꞈ yuˬ gʼa ve dawˇ hkʼaˇ chi hkʼe cawˬ ve chaw htaꞈ, ngaˬ hui gʼa tawˍ daꞈ ve yoˬ. Chi hkʼe ve awˬ tehˬ hpehꞈ ve maˇ heˆ tehꞈ ngaˬ hui shiˍ ve yoˬ. (Eˇfeˇsuꞈ 4:19, 20) Chi htaꞈ pa taw, ngaˬ hui a shu yawˇ awˬ to htaꞈ na nyi cawˇ ve, ‘kanˉ te kuiˬ lo ve awˬ chawˇ, liꞈ henˇ kuiˬ lo ve awˬ chawˇ, maˇ heˆ leh Yaˬhoˉvaˬ ve awˬ liˇ awˬ hkʼaˇ htaꞈ maˇ yawˆ yan ve chaw, chi teˇ hpaˍ geh awˬ chawˇ maˇ te tuˬ coˇ caˇ˗aw laˇ? Miˬ guiˬ yaˇ hkʼe ve dawˇ hkʼaˇ maˇ cawˬ ve tehꞈ chaw teˇ hpaˍ ngaˬ htaꞈ kʼoˆ laˇ ve htawˇ, ngaˬ Yaˬhoˉvaˬ ve awˬ liˇ awˬ hkʼaˇ htaꞈ yonˍ yeˬ˗aw laˇ?’ Chi hkʼoˆ kaꞈ, 2 Tiˆmoˉseˍ liꞈ 2:20-22 hkʼaw kʼoˆ taˍ ve hkʼe, teˇ gʼaˇ le le ngaˬ hui Yaˬhoˉvaˬ ve kanˉ caˉ leh te kʼai tuˬ ga laˇ gʼa ve maˇ heˆ ve pa taw, Hkriꞈ yaˇ awˬ moˍ hkʼaw ve chaw geh ngaˬ hui awˬ chawˇ te htaˇ gʼa leuˆ cawˇ ve yoˬ.
“AWˬ GʼEUˆ YAˇ HKʼE TE KʼAI˗O”
13. “Awˬ gʼeuˆ yaˇ hkʼe te kʼai˗o” tehꞈ kʼoˆ ve hkʼaˬ hkʼe kʼoˆ gaˇ ve le? (Eˇfeˇsuꞈ 5:7-9)
13 Eˇfeˇsuꞈ venˇ hkʼaw chehˇ ve Hkriꞈ yaˇ htaꞈ Pawˇluꞈ beˆ maˍ piˇ ve, yawˇ hui naˆ hoꞈ ve htaꞈ maˇ caˉ daꞈ ve ceh tiˉ maˇ heˆ. Yaꞈ hkʼaˇ, “yawˇ hui awˬ gʼeuˆ yaˇ hkʼe te kʼai” cawˇ ve yoˬ. (Eˇfeˇsuꞈ 5:7-9 gʼaw sheˍ.) Chi hkʼaˬ hkʼe kʼoˆ gaˇ ve le? Awˬ tehˬ kʼoˆ ve kʼo, ngaˬ hui ve te hkʼaˇ Hkriꞈ yaˇ hpehꞈ ve htaꞈ hkʼaˬ htaˆ kaꞈ gʼa hawˍ daꞈ piˇ ve yoˬ. Ngaˬ hui chi hkʼe te gʼa tuˬ ve teˇ hkʼaˇ lehˬ, Liꞈ hpu gʼaw leh henˇ ve yoˬ. Liꞈ hpu hkʼaw yuˬ la taˍ ve liꞈ kʼoˆ teˇ hpaˍ htaꞈ kaꞈ ngaˬ hui gʼaw ve yoˬ. Yeˍsuˆ lehˬ “miˬ guiˬ ve awˬ gʼeuˆ” hpehꞈ ve pa taw, yawˇ ve awˬ lawn leh yawˇ maˍ ve awˬ ceuˬ htaꞈ ngaˬ hui henˇ tuˬ a yeˇ uiˍ jaˇ.—Yoˇhanˬ 8:12; Tawˇ naˉ ve 6:23.
14. Daꞈ kehˬ ve awˬ ha hpu ngaˬ hui htaꞈ hkʼaˬ hkʼe ga laˇ gʼa ve le?
14 Ngaˬ hui “awˬ gʼeuˆ yaˇ hkʼe te kʼai” tuˬ daꞈ kehˬ ve awˬ ha hpu gʼa ga laˇ tcuh ve yoˬ. Aˬ htoꞈ ma pa taw le? Awˬ lawn kʼo, miˬ guiˬ hkʼoˆ lo haˉ chawˇ haˉ paˆ te ve cawˬ maˇ jaˇ ve pa taw, ngaˬ hui daꞈ ve htaꞈ te tuˬ sha ve maˇ heˆ. (1 Hteˇsaˍlawˇniˆ 4:3-5, 7, 8) Daꞈ kehˬ ve awˬ ha hpu lehˬ, ngaˬ hui miˬ guiˬ yaˇ ve dawˇ hkʼaˇ htaꞈ tawˍ daꞈ gʼaˇ tuˬ ga laˇ gʼa ve yoˬ. Chi ve lehˬ, Gʼuiˬ sha ve dawˇ hkʼaˇ htaꞈ maˇ hawˍ daꞈ ve chaw yaˇ ve cuˇ yiˍ leh dawˇ hkʼaˇ htaꞈ kaꞈ kʼoˆ gaˇ ve yoˬ. Chi hkʼoˆ kaꞈ, “awˬ gʼeuˆ ve awˬ shiˍ lehˬ, daꞈ ve hkʼa peu˗eˬ hteˇ ve cawˇ ve hkʼa peu˗eˬ” chi ve ngaˬ hui cawˬ tuˬ daꞈ kehˬ ve awˬ ha hpu ga laˇ gʼa ve yoˬ.—Eˇfeˇsuꞈ 5:9.
15. Ngaˬ hui daꞈ kehˬ ve awˬ ha hpu hkʼaˬ hkʼe te gʼa tuˬ le? (Eˇfeˇsuꞈ 5:19, 20)
15 Ngaˬ hui daꞈ kehˬ ve awˬ ha hpu gʼa tuˬ ve teˇ hkʼaˇ lehˬ bon lawˬ ve yoˬ. Yeˍsuˆ kʼoˆ ve, Yaˬhoˉvaˬ geh “hkʼa lawˬ ve chaw teˇ hpaˍ htaꞈ daꞈ ve kehˬ ve awˬ ha hpu yawˇ piˇ tuˬ” yoˬ. (Luˉkaꞈ 11:13) Hpawnˬ daꞈ kuiˬ hkʼaw awˬ viˉ awˬ nyi geh teˇ geh Yaˬhoˉvaˬ htaꞈ chiˇ mvuh htaˇ, ngaˬ hui daꞈ kehˬ ve awˬ ha hpu gʼa ve yoˬ. (Eˇfeˇsuꞈ 5:19, 20 gʼaw sheˍ.) Daꞈ kehˬ ve awˬ ha hpu lehˬ ngaˬ hui Gʼuiˬ sha nyi hkʼaˇ suh ve te piˇ tuˬ ga laˇ gʼa ve yoˬ.
16. Ngaˬ hui cuˇ yiˍ cawˬ ve hkʼaw dawˇ cheˆ gʼa tuˬ aˬ htoꞈ ma ga laˇ gʼa ve le? (Eˇfeˇsuꞈ 5:10, 17)
16 Ngaˬ hui a yeˇ uiˍ ve awˬ lawn gʼa dawˇ cheˆ htaˇ, ‘Yaˬhoˉvaˬ ve a loˍ’ hkʼaˬ hkʼe cawˬ ve htaꞈ ngaˬ hui coˇ caˇ leh gʼa na gʼa cawˇ ve yoˬ. Leh chi ve htaꞈ gʼa gʼaꞈ te ve yoˬ. (Eˇfeˇsuꞈ 5:10, 17 gʼaw sheˍ.) Ngaˬ hui teˇ ceuˬ ceuˬ gʼa hpuˇ htaˇ, chi ve htaꞈ caˉ daꞈ ve ngaˬ hui Liꞈ hpu hkʼaw ve awˬ liˇ awˬ hkʼaˇ htaꞈ gʼa hpfuhˆ nyi ve yoˬ. Chi hkʼe hpfuhˆ nyi ve lehˬ, Yaˬhoˉvaˬ hkʼaˬ hkʼe dawˇ ve htaꞈ ngaˬ hui shiˍ gaˇ leh yawˇ ve awˬ liˇ awˬ hkʼaˇ htaꞈ ngaˬ hui gʼaꞈ te ve kʼo, cuˇ yiˍ cawˬ ve hkʼaw dawˇ cheˆ gʼa ve yoˬ.
17. Awˬ yanˇ htaꞈ vuiˬ hkʼawꞈ leh hkʼa dehꞈ yehˇ ve hkʼaˬ hkʼe kʼoˆ gaˇ ve le? (Eˇfeˇsuꞈ 5:15, 16) (Awˬ han htaꞈ nyi sheˍ.)
17 Chi hkʼoˆ kaꞈ, awˬ yanˇ htaꞈ vuiˬ hkʼawꞈ leh hkʼa dehꞈ yehˇ˗oˆ tehꞈ, Eˇfeˇsuꞈ venˇ hkʼaw chehˇ ve Hkriꞈ yaˇ htaꞈ Pawˇluꞈ beˆ maˍ piˇ ve yoˬ. (Eˇfeˇsuꞈ 5:15, 16 gʼaw sheˍ.) “Haiˬ ve awˬ shehˍ hpaˇ” Saˍtanˍ lehˬ miˬ guiˬ hkʼoˆ lo beˬ laˇ ve awˬ ceuˬ ngaˬ hui htaꞈ leuˉ leh te tcuh gaˇ ve yoˬ. Ngaˬ hui chi hkʼe tiˉ te chehˇ ve kʼo, Gʼuiˬ sha ve kanˉ te tuˬ awˬ yanˇ maˇ cawˬ ve yoˬ. (1 Yoˇhanˬ 5:19) Hkriꞈ yaˇ teˇ hpaˍ hpu ca ve htaꞈ awˉ lawˉ teh ve, liꞈ chi mvuh mvuh henˇ ve, maˇ heˆ leh Yaˬhoˉvaˬ ve kanˉ te ve aꞈ kehˉ, chi ve teˇ hpaˍ htaꞈ a yeˇ uiˍ jaˇ tehꞈ shawˍ ve yoˬ. Chi hkʼe te ve kʼo, yawˇ miˬ guiˬ yaˇ hkʼe ve dawˇ hkʼaˇ cawˬ la˗oˬ ve yoˬ. Awˬ tehˬ kʼo, chi ve teˇ hpaˍ yaꞈ ve maˇ heˆ. Yaꞈ hkʼaˇ, chi ve teˇ hpaˍ ngaˬ hui awˬ pon a yeˇ uiˍ jaˇ ve tehꞈ taˇ shawˍ. Ngaˬ hui “awˬ gʼeuˆ yaˇ hkʼe te kʼai” ve kʼo, ngaˬ hui “awˬ yanˇ htaꞈ vuiˬ hkʼawꞈ leh hkʼa dehꞈ yehˇ” chehˇ ve yoˬ. Chi ve lehˬ a yeˇ uiˍ jaˇ ve awˬ ceuˬ htaꞈ awˉ lawˉ te chehˇ ve yoˬ.
Eˇfeˇsuꞈ venˇ hkʼaw chehˇ ve Hkriꞈ yaˇ awˬ yanˇ htaꞈ vuiˬ hkʼawꞈ leh hkʼa dehꞈ yehˇ ve lehˬ, bon maˍ ve (Awˬ tawn 17 nyi sheˍ)
18. Awˬ yanˇ htaꞈ vuiˬ hkʼawꞈ leh hkʼa dehꞈ yehˇ gʼa tuˬ Do˗naˆ hkʼaˬ hkʼe te ve le?
18 Nawˬ Gʼuiˬ sha ve kanˉ leuˉ leh te gʼa tuˬ awˬ hkʼaˇ ca sheˍ. Aˍfaˍriˆkaˆ miˬ guiˬ awˬ hawˉ hpawˇ lo chehˇ ve Do˗naˆ chi hkʼe te ve yoˬ. Yawˇ kʼoˆ ve, “ngaˬ hpehꞈ chehˇ ve awˬ ceuˬ htaꞈ dawˇ nyi leh Gʼuiˬ sha ve kanˉ htaꞈ leuˉ leh te gʼa tuˬ dawˇ nyi ve yoˬ. Ngaˬ Yaˬhoˉvaˬ ve kanˉ hkʼa dehꞈ te gʼa tuˬ yawˇ geh nyi ma awˬ tawˬ hkʼa gaˬ bon lawˬ ve yoˬ. Ngaˬ hto toˇ˗e ve awˬ yanˇ cawˬ tuˬ kanˉ ca gʼa tuˬ bon lawˬ ve yoˬ. Yaˬhoˉvaˬ ga laˇ ve pa taw, ngaˬ kanˉ chi hkʼe ve ca gʼa ve yoˬ. Ngaˬ leh ngaˬ miˇ ma hkʼaˬ htaˆ kaꞈ gʼuˇ suhˍ peuˍ ve teˇ geh te ve yoˬ.”
19. Ngaˬ hui lehˬ “awˬ gʼeuˆ yaˇ hkʼe te kʼai” tuˬ hkʼaˬ hkʼe ga laˇ gʼa ve le?
19 Eˇfeˇsuꞈ venˇ hkʼaw chehˇ ve Hkriꞈ yaˇ htaꞈ Pawˇluꞈ liꞈ bvuhꞈ piˇ ve lehˬ, yawˇ hui yonˍ hkʼaˇ yonˍ yeˬ tuˬ ga piˇ gʼa ve yoˬ. Pawˇluꞈ beˆ maˍ laˇ ve, chi teˇ hkui ngaˬ hui awˬ pon kaꞈ yehˇ gʼa sheˍ ve yoˬ. Ngaˬ hui gʼa henˇ˗oˬ ve hkʼa shuˍ, Pawˇluꞈ beˆ maˍ laˇ ve lehˬ ngaˬ hui te gʼa˗oˬ ve awˬ ceuˬ, leh cuˇ yiˍ cawˬ ve hkʼaw awˬ chawˇ leuˆ tuˬ ga la gʼa ve yoˬ. Leh yawˇ beˆ maˍ laˇ ve ngaˬ hui awˬ gʼeuˆ yaˇ hkʼe caˉ leh te kʼai tuˬ kaꞈ ga laˇ gʼa ve yoˬ. Chi ve lehˬ, ngaˬ hui hkʼaˬ htaˆ kaꞈ Liꞈ hpu gʼaw ve yoˬ. Chi hkʼoˆ kaꞈ, ngaˬ hui daꞈ ve te hkʼaˇ dawˇ hkʼaˇ hpeuꞈ maw piˇ gʼa tuˬ daꞈ kehˬ ve awˬ ha hpu ga laˇ gʼa ve htaꞈ kaꞈ Pawˇluꞈ kʼoˆ ve yoˬ. Pawˇluꞈ beˆ maˍ laˇ ve htaꞈ ngaˬ hui gʼaꞈ te ve kʼo, ngaˬ hui cuˇ yiˍ cawˬ ve hkʼaw dawˇ cheˆ gʼa leh Yaˬhoˉvaˬ loˍ ve awˬ ceuˬ htaꞈ te gʼa ve yoˬ. Chi ve lehˬ miˬ guiˬ hkʼoˆ naˆ hoꞈ ve htaꞈ ngaˬ hui maˇ caˉ daꞈ tuˬ ga laˇ leh awˬ gʼeuˆ hkʼaw caˉ leh chehˇ kʼai tuˬ kaꞈ ga laˇ ve yoˬ.
NAWˬ HKʼAˬ HKʼE HKʼAWꞈ TUˬ LE?
-
Eˇfeˇsuꞈ liꞈ 5:8 hkʼaw kʼoˆ taˍ ve, “naˆ hoꞈ ve” leh “awˬ gʼeuˆ” hkʼaˬ hkʼe kʼoˆ gaˇ ve le?
-
Ngaˬ hui “naˆ hoꞈ ve” htaꞈ maˇ caˉ daꞈ tuˬ hkʼaˬ hkʼe gʼa te cawˇ ve le?
-
Ngaˬ hui “awˬ gʼeuˆ yaˇ hkʼe te kʼai” tuˬ hkʼaˬ hkʼe te gʼa ve le?
KʼA MUIˬ HKAWˇ 95 Shaˬ te shaˬ awˬ gʼeuˆ ba la chehˇ ve
a Awˬ lawn chi ve hkʼaw awˬ meh teˇ hpaˍ hpaˍ pa ve.
b AWˬ HAN HTAꞈ KʼOˆ MAˍ TAˍ VE : Tcuh yaˇ Pawˇluꞈ sho caˆ hpeh taˍ leh Roˉmaꞈ ve maꞈ yaˇ 1 gʼaˇ chehˇ taˍ ve htawˇ liꞈ bvuhꞈ chehˇ ve.
