1-2. Baˆtiˆsaˬ haꞈ yuˬ peuˬ hkʼawꞈ nawˉ ngaˬ hui aˬ htoꞈ ma awˬ bon gʼa ve le?

 Ngaˬ hui Baˆtiˆsaˬ haꞈ yuˬ leh Yaˬhoˉvaˬ ve yehˬ kʼa hkʼaw gʼa chehˇ ve ha lehˬ jaˇ. Leh yawˇ geh gʼa meuˆ daꞈ ve kaꞈ daꞈ jaˇ ve yoˬ. Chiˇ mvuh ve liꞈ bvuhꞈ paˍ Daˍviˆ kʼoˆ ve, “nawˬ leuˆ yuˬ ve htaꞈ gʼa hkanˍ ve chaw leh, nawˬ ve bon yehˬ hkʼaw chehˇ tcuh piˇ tuˬ nawˬ shiˍ veu laˇ taˍ ve chaw lehˬ, gʼa ha lehˬ ve” tehꞈ Daˍviˆ kʼoˆ ve hkʼe ngaˬ hui kaꞈ dawˇ ve yoˬ.—Chiˇ mvuh ve 65:4.

² Yaˬhoˉvaˬ yawˇ ve bon yehˬ lonˉ hkʼaw a shu teˇ gʼaˇ kaꞈ loꞈ la hpehꞈ ve maˇ heˆ. Peuˬ taˉ ve teˇ lawn hkʼaw ngaˬ hui gʼa henˇ ve hkʼa shuˍ, Yaˬhoˉvaˬ htaꞈ shiˍ gaˇ leh yawˇ geh meuˆ daꞈ ve chaw ceh tiˉ yawˇ awˬ paˇ lo jiˆ laˬ hpehꞈ ve yoˬ. (Yaˍkoˆ 4:8) Nawˬ awˬ to chiˇ aꞈ leh Baˆtiˆsaˬ haꞈ yuˬ htaˇ, nawˬ Yaˬhoˉvaˬ geh leuˉ leh meuˆ daꞈ gʼa ve yoˬ. Nawˬ Baˆtiˆsaˬ haꞈ yuˬ peuˬ hkʼawꞈ nawˉ, Yaˬhoˉvaˬ lehˬ ‘awˬ bon awˬ shinˉ hkʼa biˇ naꞈ laˇ chehˇ ve’ tehꞈ nawˬ yonˍ gʼa tuˬ yoˬ.—Maˍlaˍhkiˆ 3:10; Yeˍraˍmiˆ 17:7, 8.

3. Hkriꞈ yaˇ awˬ to chiˇ aꞈ leh Baˆtiˆsaˬ haꞈ˗oˬ ve chaw a yeˇ uiˍ ve awˬ vuiˬ aˬ htoꞈ ma htaꞈ gʼa te cawˇ ve le? (Cuˇ yiˍ piˇ ve 5:4, 5)

³ Baˆtiˆsaˬ haꞈ yuˬ ve lehˬ, Yaˬhoˉvaˬ ve kanˉ awˬ hkuiˉ puiˍ te tuˬ tanˬ ve yoˬ. Nawˬ Baˆtiˆsaˬ haꞈ yuˬ˗oˬ htaˇ, beˬ ve lawˇ ve maˇ heˆ leh tuꞈ ve hkanˍ ve gʼa hpuˇ ve htawˇ, nawˬ Baˆtiˆsaˬ haꞈ yuˬ taˍ ve hkʼe leˇ hkʼa dehꞈ gʼa gʼaꞈ te ve yoˬ. (Cuˇ yiˍ piˇ ve 5:4, 5 gʼaw sheˍ.) Nawˬ Yeˍsuˆ ve awˬ laꞈ gʼawˇ hpehꞈ ve awˬ hkʼoˆ kaꞈ, nawˬ yawˇ htaꞈ henˇ yuˬ leh yawˇ ve tawˇ hkawˇ te gʼa ve hkʼe hkʼa dehꞈ na yuˬ ve yoˬ. (Maꞈhtehˍ 28:19, 20; 1 Peˍtruˆ 2:21) Awˬ lawn chi ve hkʼaw nawˬ chi hkʼe te tuˬ ga laˇ ve yoˬ.

 BEˬ VE LAWˇ VE MAˇ HEˆ LEH TUꞈ VE HKANˍ VE GʼA HPUˇ VE HTAWˇ, YEˍSUˆ ‘AWˬ HKʼAˇ SUH KʼAI˗O’

4. Yeˍsuˆ ve awˬ laꞈ gʼawˇ ‘a shu yawˇ ve a loˍ htaꞈ baˬ taˉ ve’ hkʼaˬ hkʼe kʼoˆ gaˇ ve le? (Luˉkaꞈ 9:23)

⁴ Nawˬ Baˆtiˆsaˬ haꞈ yuˬ peuˬ hkʼawꞈ nawˉ, shoꞈ shaꞈ ve awˬ lawn gʼa hpuˇ tuˬ yoˬ. Yeˍsuˆ yawˇ ve awˬ laꞈ gʼawˇ htaꞈ hkʼa tawˍ lehˆ kʼoˆ piˇ ve, ‘teˇ nyi le le a shu yawˇ ve a loˍ htaꞈ baˬ taˉ leh ngaˬ hkʼaˇ suh laˬ˗oꞈ.’ (Luˉkaꞈ 9:23 gʼaw sheˍ.) Yeˍsuˆ chi hkʼe kʼoˆ ve lehˬ, awˬ laꞈ gʼawˇ hui hkʼaˬ htaˆ kaꞈ tuꞈ ve hkanˍ ve gʼa hpuˇ tuˬ ve laˇ? Maˇ heˆ. Yawˇ hui awˬ bon gʼa ve awˬ hkʼoˆ kaꞈ a shaꞈ teꞈ kuiˬ hkʼaw shoꞈ shaꞈ ve gʼa hpuˇ tuˬ yoˬ. Teˇ pawˆ pawˆ kʼo, ngaˬ hui a shaꞈ teꞈ kuiˬ hkʼaw shoꞈ shaꞈ ve gʼa hpuˇ leh nyi ma luˬ jaˇ ve pa taw awˬ gʼaˇ nuˇ la ve yoˬ.—2 Tiˆmoˉseˍ 3:12.

5. Yeˍsuˆ ka tiꞈ te taˍ laˇ ve laiˉ ceuˬ yuˬ tanˇ ve chaw aˬ htoꞈ ma awˬ bon gʼa tuˬ le?

⁵ Nawˬ a shaꞈ teꞈ kuiˬ hkʼaw Gʼuiˬ sha ve mvuhˇ miˬ a yeˇ uiˍ jaˇ ve tehꞈ shawˍ tuˬ, yehˬ kʼa hkʼaw ve chaw tawˍ laˇ ve, maˇ heˆ leh hpu chi ma ma gʼa tuˬ ve htaꞈ maˇ gʼaꞈ ca ve yoˬ. (Maꞈhtehˍ 6:33) Chi hkʼe hpehꞈ ve kʼo, nawˬ Yaˬhoˉvaˬ awˬ pon te ve htaꞈ yawˇ mawˬ ve tehꞈ yonˍ gʼa ve yoˬ. (Heˍbrehˇ 6:10) Yeˍsuˆ ve tawˇ hkawˇ nawˬ awˬ pon awˬ tehˬ hpehꞈ ve tehꞈ gʼa mawˬ ve yoˬ. Oˇ kaˬ lo kʼoˆ ve, “ngaˬ awˬ pon leh ha lehˬ ve bon hkawˇ awˬ pon, a shu yawˇ ve yehˬ, a shu yawˇ ve awˬ viˉ awˬ nyi, a shu yawˇ ve awˬ pa awˬ e, a shu yawˇ ve awˬ yaˇ awˬ duˬ leh a shu yawˇ ve ti mi teˇ hpaˍ htaꞈ baˬ taˉ ve chaw hkʼaˬ ve teˇ gʼaˇ maˇ kʼoˆ, chi teˇ caꞈ naꞈ awˬ hkʼaw lo yehˬ, awˬ viˉ awˬ nyi, awˬ e, awˬ yaˇ awˬ duˬ leh ti mi teˇ hpaˍ htaꞈ 100 pun gʼa ve yoˬ. Chi teˇ hpaˍ geh teˇ geh tuꞈ ve hkanˍ ve htaꞈ htawˇ gʼa ve yoˬ. Awˬ hkʼawꞈ nawˉ teˇ caꞈ naꞈ awˬ hkʼaw lo co tiꞈ ha tiꞈ htaꞈ htawˇ gʼa ve yoˬ.” (Maˍkuˆ 10:29, 30) Chi htaꞈ pa taw, nawˬ shonˇ kʼai ve aꞈ kehˉ chi teˇ hkui kaꞈ awˬ bon gʼa maˇ jaˇ ve yoˬ.—Chiˇ mvuh ve 37:4.

6. Nawˬ Baˆtiˆsaˬ haꞈ yuˬ˗oˬ ve htawˇ “awˬ suhˍ awˬ shaˍ a loˍ te gaˇ ve” htaꞈ hkʼaˬ hkʼe te gʼa tawˍ daꞈ sheˍ ve le?

⁶ Nawˬ Baˆtiˆsaˬ haꞈ yuˬ peuˬ hkʼawꞈ nawˉ, nawˬ maˇ biˇ ve chaw hpehꞈ ve pa taw, “awˬ suhˍ awˬ shaˍ a loˍ te gaˇ ve” htaꞈ gʼa tawˍ daꞈ sheˍ ve yoˬ. (1 Yoˇhanˬ 2:16) Teˇ pawˆ pawˆ kʼo, nawˬ tcuh yaˇ Pawˇluꞈ hkʼa shuˍ dawˇ ve yoˬ. Oˇ kaˬ lo kʼoˆ ve, “ngaˬ ve nyi ma hkʼaw lo tiˉ kʼo, Gʼuiˬ sha ve awˬ liˇ tawˇ hkawˇ htaꞈ ngaˬ ha lehˬ ve yoˬ. Yaꞈ hkʼaˇ, ngaˬ ve awˬ to awˬ hkʼeun teˇ hpaˍ awˬ hkʼaw lo, awˬ kaˍ awˬ nu awˬ liˇ htaꞈ ngaˬ gʼa mawˬ ve yoˬ. Awˬ liˇ chi teˇ maˬ lehˬ, ngaˬ ve nyi ma dawˇ hkʼaˇ htaꞈ bawˆ daꞈ chehˇ leh, ngaˬ ve awˬ to awˬ hkʼeun teˇ hpaˍ awˬ hkʼaw lo cawˬ ve venˇ baˆ teˇ ceuˬ ngaˬ htaꞈ hpeh kʼai tuˬ kaꞈ te chehˇ ve yoˬ.” (Roˉmaꞈ 7:22, 23) Nawˬ maˇ cawˇ ve awˬ ceuˬ htaꞈ gʼa tawˍ daꞈ ve pa taw, awˬ gʼaˇ nuˇ ve yoˬ hehˉ. Yaꞈ hkʼaˇ, nawˬ Yaˬhoˉvaˬ htaꞈ awˬ to chiˇ aꞈ piˇ htaˇ, ka tiꞈ te taˍ ve htaꞈ dawˇ nyi sheˍ. Awˬ lawn chi ve htaꞈ dawˇ nyi ve nawˬ yonˍ yeˬ tuˬ te laˇ leh, beˬ ve lawˇ ve htaꞈ tawˍ daꞈ gʼaˇ tuˬ kaꞈ ga laˇ ve yoˬ. Nawˬ awˬ to chiˇ aꞈ piˇ htaˇ ka tiꞈ te taˍ ve htaꞈ dawˇ nyi ve lehˬ, nawˬ dawˇ cheˆ gʼa tuˬ ga laˇ ve yoˬ. Yaꞈ hkʼaˇ, chi hkʼaˬ hkʼe ga laˇ gʼa ve le?

7. Nawˬ Yaˬhoˉvaˬ htaꞈ awˬ to chiˇ aꞈ piˇ ve lehˬ yawˇ htaꞈ ka tiꞈ yeˬ tuˬ hkʼaˬ hkʼe ga laˇ gʼa ve le?

⁷ Nawˬ Yaˬhoˉvaˬ htaꞈ awˬ to chiˇ aꞈ piˇ htaˇ, nawˬ a shu yawˇ ve a loˍ awˬ hkʼaˇ suh maˇ te˗o ve yoˬ. Chi kʼoˆ gaˇ ve lehˬ, nawˬ Yaˬhoˉvaˬ nyi ma luˬ ve awˬ ceuˬ htaꞈ maˇ te leh yawˇ maˇ dawˇ cawˇ ve awˬ ceuˬ htaꞈ kaꞈ te tuˬ maˇ dawˇ ve yoˬ. (Maꞈhtehˍ 16:24) Chi htaꞈ pa taw, nawˬ beˬ ve lawˇ ve htaꞈ gʼa hpuˇ htaˇ, nawˬ hkʼaˬ htaˆ kaꞈ Yaˬhoˉvaˬ htaꞈ ka tiꞈ yeˬ tuˬ leuˆ yuˬ˗oˬ ve pa taw, maˇ daꞈ ve awˬ ceuˬ htaꞈ maˇ te tehꞈ dawˇ ve yoˬ. Nawˬ Yaˬhoˉvaˬ nyi hkʼaˇ suh tuˬ te piˇ tuˬ yoˬ tehꞈ dawˇ teh taˍ ve yoˬ. Nawˬ chi hkʼe te ve kʼo, beˬ ve lawˇ ve gʼa hpuˇ jaˇ ve htawˇ, Yawˇbaˆ hkʼa shuˍ te gʼa ve yoˬ. Yaꞈ hkʼaˇ, Yawˇbaˆ kʼoˆ sheˍ ve, “ngaˬ suh htaˇ hkʼa gaˬ ka tiꞈ yeˬ tuˬ yoˬ!”—Yawˇbaˆ 27:5.

8. Nawˬ awˬ to chiˇ aꞈ htaˇ ve bon lawˬ hkawˇ htaꞈ caˉ daꞈ ve hkʼa dehꞈ dawˇ nyi ve kʼo, beˬ ve lawˇ ve htaꞈ tawˍ daꞈ gʼaˇ tuˬ hkʼaˬ hkʼe ga laˇ gʼa ve le?

⁸ Awˬ to chiˇ aꞈ htaˇ ve bon lawˬ hkawˇ htaꞈ caˉ daꞈ ve nawˬ hkʼa dehꞈ dawˇ nyi ve kʼo, beˬ ve lawˇ ve gʼa hpuˇ ve htaꞈ tawˍ daꞈ gʼaˇ tuˬ ga laˇ gʼa ve yoˬ. Tawˇ pa haˉ te kʼo, nawˬ shu ve awˬ ca htaꞈ maˆ tuˬ laˇ?  Nawˬ chi hkʼe maˇ te taˬ. Nawˬ Yaˬhoˉvaˬ nyi ma luˬ tuˬ maˇ te piˇ tehꞈ ka tiꞈ te˗oˬ ve yoˬ. Nawˬ shu ve awˬ ca htaꞈ maˆ tuˬ dawˇ hkʼaˇ maˇ cawˬ tcuh ve kʼo, dawˇ nyi tuˬ kaꞈ awˬ yanˇ maˇ shonˇ. Leh nawˬ “haiˬ ve chaw hui kʼai ve chehˇ kuiˬ lo” maˇ kʼai taˬ.—Tawˇ naˉ ve 4:14, 15.

9. Nawˬ awˬ to chiˇ aꞈ htaˇ ve bon lawˬ hkawˇ htaꞈ caˉ daꞈ ve hkʼa dehꞈ dawˇ nyi ve lehˬ, Yaˬhoˉvaˬ htaꞈ oˉ kʼoˍ pui ve nawˬ a shaꞈ teꞈ kuiˬ hkʼaw awˉ lawˉ teh tuˬ hkʼaˬ hkʼe ga laˇ gʼa ve le?

⁹ Awˬ nu ve chaw nawˬ htaꞈ kanˉ te tcuh laˇ tuˬ kʼoˆ laˇ htaˇ, kanˉ chi ve hpawnˬ daꞈ ve maˇ kʼai gʼa ve kʼo hkʼaˬ hkʼe te tuˬ le? Chi hkʼe ve nawˬ maˇ te tuˬ tehꞈ awˉ lawˉ htaˇ kaꞈ dawˇ teh˗oˬ ve pa taw, maˇ te ve yoˬ. Kanˉ chi ve htaꞈ maˇ dawˇ nyi˗o leh hpawnˬ daꞈ kuiˬ lo kʼai ve yoˬ. Yeˍsuˆ yawˇ ve Awˬ pa nyi hkʼaˇ suh ve te piˇ tuˬ dawˇ teh taˍ˗oˬ ve yoˬ. Chi ve hkʼa shuˍ shuˍ, nawˬ Yaˬhoˉvaˬ htaꞈ awˬ to chiˇ aꞈ piˇ˗oˬ ve yoˬ. Yaˬhoˉvaˬ maˇ dawˇ cawˇ tuˬ awˬ ceuˬ te piˇ la ve htaꞈ nawˬ shiˍ ve kʼo, nawˬ Yeˍsuˆ hkʼa shuˍ htawˇ dawˇ nawˬ dawˇ maˇ cawˬ leh laꞈ haˉ tawˍ baˬ tuˬ yoˬ.—Maꞈhtehˍ 4:10; Yoˇhanˬ 8:29.

10. Nawˬ Baˆtiˆsaˬ haꞈ yuˬ peuˬ hkʼawꞈ nawˉ Yeˍsuˆ ‘awˬ hkʼaˇ suh kʼai’ tuˬ Yaˬhoˉvaˬ hkʼaˬ hkʼe ga laˇ gʼa ve le?

¹⁰ Nawˬ beˬ ve lawˇ ve maˇ heˆ leh tuꞈ ve hkanˍ ve gʼa hpuˇ htaˇ, chi ve lehˬ nawˬ Yeˍsuˆ ‘awˬ hkʼaˇ suh kʼai’ tuˬ dawˇ teh taˍ ve tehꞈ hpeuꞈ maw piˇ leh Yaˬhoˉvaˬ nawˬ htaꞈ ga laˇ tuˬ yoˬ tehꞈ yonˍ gʼa ve yoˬ. Liꞈ hpu hkʼaw kʼoˆ ve, “Gʼuiˬ sha htawˇ, ka tiꞈ yeˬ leh, nawˬ hui hkanˍ maˇ gʼa ve beˬ ve lawˇ ve htaꞈ gʼa hpuˇ tuˬ, yawˇ a hkaw˗anˬ maˇ piˇ. Yaꞈ hkʼaˇ, beˬ ve lawˇ ve htaꞈ hpuˇ htaˇ, nawˬ hui hkanˍ hpehꞈ tuˬ, ponˬ ve yaꞈ kʼaw htaꞈ yawˇ gu taˍ tuˬ yoˬ.”—1 Kawˇrenˍhtuˆ 10:13.

NAWˬ YEˍSUˆ AWˬ HKʼAˇ SUH HKʼAˬ HKʼE TE GʼAꞈ KʼAI GʼA TUˬ LE?

11. Yeˍsuˆ awˬ hkʼaˇ suh kʼai ve daꞈ jaˇ ve teˇ hkʼaˇ lehˬ aˬ htoꞈ ma le? (Awˬ han htaꞈ nyi sheˍ.)

¹¹ Yeˍsuˆ Gʼuiˬ sha ve kanˉ kaiˬ ve hkʼaw te leh yawˇ Yaˬhoˉvaˬ geh meuˆ daꞈ tuˬ hkʼaˬ htaˆ kaꞈ bon lawˬ ve yoˬ. (Luˉkaꞈ 6:12) Chi htaꞈ pa taw, nawˬ Baˆtiˆsaˬ haꞈ yuˬ peuˬ hkʼawꞈ nawˉ Yeˍsuˆ awˬ hkʼaˇ suh gʼaꞈ kʼai gʼa tuˬ daꞈ jaˇ ve teˇ hkʼaˇ lehˬ, nawˬ Yaˬhoˉvaˬ geh  leuˉ leh meuˆ daꞈ tuˬ ga laˇ gʼa ve awˬ ceuˬ teˇ hpaˍ htaꞈ gʼa te cawˇ ve yoˬ. Liꞈ hpu hkʼaw kʼoˆ ve, “ngaˬ hui hkʼa gʼaꞈ mi taˍ ve teˇ hpaˍ htaꞈ vawˆ taˍ leh hteˇ lehˍ kʼai˗a veuˬ.” (Hpiˇliˇpiˆ 3:16) Ponˬ laˬ htaˇ awˬ viˉ awˬ nyi laiˉ gʼaˇ Gʼuiˬ sha ve kanˉ coˇ caˇ leh te ve htaꞈ nawˬ gʼa mawˬ ve yoˬ. Tawˇ pa haˉ te kʼo, chaw teˇ hpaˍ Gʼuiˬ sha ve mvuhˇ miˬ hto toˇ ve liꞈ henˇ yehˬ lo kʼai ve (SKE) maˇ heˆ leh hto toˇ ve chaw loˍ jaˇ kuiˬ lo kaꞈ kʼai ve yoˬ. Nawˬ chi hkʼe te tuˬ dawˇ teh taˍ ve kʼo, daꞈ jaˇ ve yoˬ. Yaˬhoˉvaˬ ve kanˉ te ve chaw teˇ gʼaˇ le le yawˇ ve kanˉ leuˉ leh te gaˇ ve yoˬ. (Tcuh yaˇ 16:9) Yaꞈ hkʼaˇ, chi teˇ hkui nawˬ oˇ hkʼe te maˇ gʼa sheˍ ve kʼo, hkʼaˬ hkʼe te tuˬ le? Nawˬ awˬ viˉ awˬ nyi hkʼe taw te maˇ gʼa ve tehꞈ taˇ dawˇ. Hkriꞈ yaˇ awˬ pon a yeˇ uiˍ jaˇ ve lehˬ yeunˇ hkanˍ ve hkʼaw caˉ leh ka tiꞈ yeˬ ve yoˬ. (Maꞈhtehˍ 10:22) Nawˬ te gʼa ve hkʼe Yaˬhoˉvaˬ ve kanˉ hkʼa dehꞈ te ve htaꞈ yawˇ ha lehˬ jaˇ ve tehꞈ nawˬ taˇ leunˇ sheˍ. Chi htaꞈ pa taw, nawˬ caˉ leh Yeˍsuˆ awˬ hkʼaˇ suh kʼai gaˇ ve yoˬ.—Chiˇ mvuh ve 26:1.

12-13. Nawˬ Gʼuiˬ sha ve kanˉ te ve nyi ma hkʼa dehꞈ maˇ pfuhˇ ve kʼo, aˬ htoꞈ ma ga laˇ gʼa ve le? (1 Kawˇrenˍhtuˆ 9:16, 17) (Awˉ ceˬ awˉ fa “ Caˉ leh enˍ daꞈ ve” htaꞈ nyi sheˍ.)

¹² Yaꞈ hkʼaˇ, peuˬ kʼai ve awˬ yanˇ nawˬ bon lawˬ ve lawˬ peuˬ kaꞈ lawˬ leh Yaˬhoˉvaˬ ve kanˉ te ve ha lehˬ ve hkʼa dehꞈ maˇ cawˬ ve kʼo, hkʼaˬ hkʼe te tuˬ le? Maˇ heˆ leh chi teˇ hkui nawˬ oˇ htaˇ hkʼe leˇ Liꞈ hpu gʼaw ve hkʼa dehꞈ maˇ dawˇ cawˇ ve kʼo, hkʼaˬ hkʼe te tuˬ le? Nawˬ Baˆtiˆsaˬ haꞈ yuˬ peuˬ hkʼawꞈ nawˉ chi hkʼe dawˇ ve kʼo, Yaˬhoˉvaˬ geh daꞈ kehˬ ve awˬ ha hpu maˇ gʼa ve tehꞈ nawˬ taˇ dawˇ. Chi hkʼe ve dawˇ hkʼaˇ lehˬ maˇ biˇ ve chaw yaˇ teˇ gʼaˇ le le cawˬ ve yoˬ. Nawˬ Gʼuiˬ sha ve kanˉ te ve nyi ma hkʼa dehꞈ maˇ pfuhˇ tehꞈ dawˇ ve kʼo, tcuh yaˇ Pawˇluꞈ ve awˬ lawn htaꞈ dawˇ nyi sheˍ. Yawˇ Yeˍsuˆ htaꞈ henˇ yuˬ tuˬ coˇ caˇ jaˇ ve htawˇ, Yaˬhoˉvaˬ ve kanˉ te ve teˇ pawˆ le le nyi ma hkʼa dehꞈ maˇ pfuhˇ ve yoˬ. (1 Kawˇrenˍhtuˆ 9:16, 17gʼaw sheˍ.) Yawˇ kʼoˆ ve, “ngaˬ maˇ te gaˇ ve kaꞈ ngaˬ htaꞈ chiˇ aꞈ taˍ laˇ ve kanˉ cawˬ leh gʼa te ve yoˬ.” Pawˇluꞈ Gʼuiˬ sha ve kanˉ hkʼa dehꞈ maˇ te gaˇ ve htawˇ caˉ leh te ve yoˬ.

 ¹³ Chi ve hkʼa shuˍ shuˍ, te gaˇ ve nyi ma nawˬ aˬ htoꞈ ma te tuˬ, maˇ heˆ leh maˇ te tuˬ, taˇ te laˇ tcuh. Nawˬ maˇ te gaˇ ve htawˇ, cawˇ ve awˬ ceuˬ htaꞈ caˉ leh te sheˍ. Awˬ lawn kʼo, nawˬ cawˇ ve awˬ ceuˬ htaꞈ caˉ leh te ve kʼo, awˬ yanˇ maw la htaˇ nawˬ ha lehˬ ve cawˬ tuˬ yoˬ. Nawˬ Hkriꞈ yaˇ ve awˬ vuiˬ htaꞈ hkʼaˬ htaˆ kaꞈ te sheˍ. Tawˇ pa haˉ te kʼo, a shu yawˇ hkʼaˇ yawˇ Liꞈ hpu henˇ ve, hpawnˬ daꞈ˗e ve, leh hto toˇ˗e ve yoˬ. Nawˬ Baˆtiˆsaˬ haꞈ yuˬ peuˬ hkʼawꞈ nawˉ awˬ ceu chi teˇ hpaˍ te ve lehˬ, nawˬ Yeˍsuˆ awˬ hkʼaˇ suh kʼai gʼa tuˬ ga laˇ ve yoˬ. Nawˬ Gʼuiˬ sha ve kanˉ hkʼaˬ htaˆ kaꞈ coˇ caˇ leh te ve htaꞈ awˬ viˉ awˬ nyi gʼa mawˬ htaˇ, yawˇ hui kaꞈ awˬ gʼaˇ gʼa jaˇ tuˬ yoˬ.—1 Hteˇsaˍlawˇniˆ 5:11.

“YONˍ VE AWˬ HKʼAW LO YEˬ CHEHˇ˗AW LAˇ, MAˇ YEˬ CHEHˇ LAˇ, A SHU YAWˇ AWˬ TO HTAꞈ HKʼA DEHꞈ TEHˆ NYI LAWˇ NYI SHEˍ”

14. Aˬ htoꞈ ma htaꞈ hkʼaˬ htaˆ kaꞈ chaˬ nyi cawˇ ve le? Leh aˬ htoꞈ ma pa taw le? (2 Kawˇrenˍhtuˆ 13:5)

¹⁴ Chi hkʼoˆ kaꞈ, Baˆtiˆsaˬ haꞈ yuˬ peuˬ hkʼawꞈ nawˉ a shu yawˇ awˬ to htaꞈ hkʼa dehꞈ tehˆ nyi lawˇ nyi chehˇ ve lehˬ, awˬ bon cawˬ ve yoˬ. (2 Kawˇrenˍhtuˆ 13:5 gʼaw sheˍ.) Nawˬ awˬ ceuˬ chi ve teˇ hpaˍ htaꞈ te chehˇ˗aw laˇ tehꞈ a shu yawˇ awˬ to htaꞈ teˇ pawˆ teˇ yanˇ hkʼa dehꞈ chaˬ nyi sheˍ. Tawˇ pa haˉ te kʼo, bon lawˬ ve, Liꞈ hpu gʼaw leh henˇ ve, leh awˬ yanˇ cawˇ cawˇ hpawnˬ daꞈ˗e ve leh hto toˇ˗e ve yoˬ. Awˬ ceuˬ chi ve teˇ hpaˍ htaꞈ te htaˇ, ha lehˬ ve leh awˬ bon cawˬ ve htaꞈ te sheˍ. Tawˇ pa haˉ te kʼo, a shu yawˇ awˬ to htaꞈ na nyi cawˇ ve, ‘Liꞈ hpu hkʼaw awˬ lawn lonˉ ma ngaˬ awˬ nu ve chaw htaꞈ kʼoˆ maˍ piˇ gʼa˗aw laˇ? Gʼuiˬ sha ve kanˉ te ve hkʼaw ngaˬ ha lehˬ ve cawˬ tuˬ aˬ htoꞈ ma te gʼa sheˍ ve le? Ngaˬ Yaˬhoˉvaˬ htaꞈ gʼaˇ va ve tehꞈ hpeuꞈ maw piˇ tuˬ, ngaˬ ve bon lawˬ hkawˇ hteˇ˗ehˬ kʼoˆ piˇ˗aw laˇ? Hpawnˬ daꞈ˗e ve ngaˬ awˬ yanˇ cawˇ cawˇ kʼai˗aw laˇ? Hpawnˬ daꞈ ve hkʼaw ngaˬ a yeˇ hkʼa dehꞈ yuˬ leh awˬ gʼaˇ piˇ daꞈ ve kaꞈ te˗aw laˇ?’

15-16. Awˬ viˉ awˬ nyi hawˉ hkʼaˆ teˇ gʼaˇ beˬ ve lawˇ ve htaꞈ tawˍ daꞈ gʼaˇ ve awˬ lawn nawˬ htaꞈ aˬ htoꞈ ma maˍ laˇ ve le?

¹⁵ Nawˬ awˬ gʼaˇ nuˇ kuiˬ hkʼaˬ kaˬ lo cawˬ ve hkʼa dehꞈ chaˬ nyi sheˍ. Awˬ viˉ awˬ nyi Ro˗beuꞈ ve awˬ lawn htaꞈ teˇ geh nyi sheˍ. Yawˇ kʼoˆ ve, “ngaˬ a shaꞈ 20 hkʼawꞈ htaˇ, ngaˬ ve kanˉ lehˬ awˬ yanˇ hkʼa biˇ maˇ te ve yoˬ. Teˇ nyi htaˇ, kanˉ te peuˬ hkʼawꞈ nawˉ kanˉ teˇ geh te ve yaˇ miˇ teˇ gʼaˇ yawˇ ve aˉ hkʼaw lo kʼai tuˬ jehˬ laˇ ve yoˬ. Yawˇ kʼoˆ ve, ‘ngaˬ huiˉ maˬ ceh tiˉ cawˬ ve mehˍ. Pyawˍ tuˬ teˇ geh te˗a laˇ?’ Awˉ lawˉ htaˇ ngaˬ hteˇ˗ehˬ maˇ kʼoˆ piˇ haˆ leh awˬ nu ve awˬ ceuˬ kʼoˆ ve yoˬ. Yaꞈ hkʼaˇ, peuˬ hkʼawꞈ nawˉ aˬ htoꞈ ma te ngaˬ maˇ kʼai ve hteˇ˗ehˬ kʼoˆ piˇ ve yoˬ. Ro˗beuꞈ lehˬ beˬ ve lawˇ ve htaꞈ tawˍ daꞈ gʼaˇ ve, chiˇ mvuh tuˬ cawˬ jaˇ. Yaꞈ hkʼaˇ, peuˬ hkʼawꞈ nawˉ yawˇ awˬ lawn oˇ ve htaꞈ kʼawꞈ dawˇ nyi htaˇ, awˉ lawˉ htaˇ kaꞈ yawˇ haˆ tawˍ baˬ cawˇ ve tehꞈ dawˇ ve yoˬ. Yawˇ kʼoˆ ve, “ngaˬ laꞈ haˉ kaꞈ maˇ kʼai tehꞈ kʼoˆ piˇ cawˇ leh Yoˇsehꞈ Pawˇtiˇhpaˍ ve awˬ miˇ ma htaꞈ kʼoˆ piˇ ve hkʼa shuˍ ngaˬ te cawˇ ve yoˬ. (Awˬ hkuiˉ puiˍ  39:7-9) Chi hkʼe ve ngaˬ gʼa hpuˇ htaˇ haˍ jaˇ ve yoˬ. Yaˇ miˇ oˇ ve teˇ gʼaˇ geh ngaˬ maˇ kʼai tehꞈ kʼoˆ piˇ gʼa ve anˇ jaˇ. Ngaˬ gʼa pa cawˇ sheˍ ve cawˬ maˇ jaˇ leh Yaˬhoˉvaˬ geh leuˉ leh meuˆ daꞈ tuˬ gʼa te cawˇ ve tehꞈ ngaˬ shiˍ ve yoˬ.”

¹⁶ Beˬ ve lawˇ ve htaꞈ nawˬ tawˍ daꞈ gʼaˇ ve htawˇ, Ro˗beuꞈ ve awˬ lawn nawˬ a shu yawˇ awˬ to htaꞈ chaˬ nyi tuˬ ga laˇ gʼa ve yoˬ. Yaꞈ hkʼaˇ, a shu yawˇ awˬ to htaꞈ na nyi cawˇ ve, ‘beˬ ve lawˇ ve htaꞈ ngaˬ tawˍ daꞈ gʼaˇ tuˬ awˬ yanˇ hkʼaˬ hkʼe maw gʼa yehˇ ve le?’ A shu yawˇ awˬ to gʼa pa cawˇ ve tehꞈ shiˍ htaˇ awˬ gʼaˇ taˇ nuˇ. Nawˬ gʼa pa cawˇ ve awˬ gʼaˇ nuˇ kuiˬ htaꞈ mawˬ ve lehˬ daꞈ jaˇ ve yoˬ. Awˬ lawn oˇ ve htaꞈ caˉ daꞈ ve bon lawˬ sheˍ. Yaˬhoˉvaˬ ve awˬ liˇ awˬ hkʼaˇ htaꞈ nawˬ a shaꞈ teꞈ kuiˬ hkʼaw gʼaꞈ te gʼa tuˬ coˇ caˇ sheˍ.—Chiˇ mvuh ve 139:23, 24.

17. Ro˗beuꞈ ve awˬ lawn hkʼaˬ htaˆ kaꞈ ka tiꞈ yeˬ ve lehˬ Yaˬhoˉvaˬ ve awˬ meh htaꞈ awˬ bon cawˬ tuˬ hkʼaˬ hkʼe te piˇ ve le?

¹⁷ Ro˗beuꞈ ve awˬ lawn cawˬ sheˍ ve yoˬ. Yawˇ kʼoˆ ve, “ngaˬ maˇ kʼai tehꞈ kʼoˆ piˇ htaˇ, yaˇ miˇ oˇ ve kʼoˆ ve, ‘nawˬ beˬ ve lawˇ ve htaꞈ gʼaˇ peuˬ.’ Chi hkʼaˬ hkʼe kʼoˆ gaˇ ve le tehꞈ ngaˬ yawˇ htaꞈ na piˇ ve yoˬ. Yawˇ kʼoˆ ve, yawˇ ve awˬ chawˇ teˇ gʼaˇ Shaˉhkiˆhkanˍ ve chaw hpehꞈ jaw ve kʼoˆ ve, Shaˉhkiˆhkanˍ ve chaw ve yaˇ teˇ gʼaˇ geh kʼo, teˇ ceuˬ te ve yoˬ. Te tuˬ ve awˬ yanˇ cawˬ htaˇ yawˇ hui te gaˇ ve hkʼe teˇ ceuˬ le le te ve yoˬ. Yaˇ miˇ chi ve teˇ gʼaˇ awˬ chawˇ oˇ ve teˇ gʼaˇ htaꞈ kʼoˆ piˇ ve, nawˬ kʼoˆ ve hkʼe awˬ tehˬ laˇ ngaˬ yawˇ htaꞈ lawˇ nyi piˇ tuˬ yoˬ. Yaˬhoˉvaˬ ve awˬ meh luˬ tuˬ ngaˬ maˇ gʼa te piˇ ve ha lehˬ jaˇ.”

18. Nawˬ Baˆtiˆsaˬ haꞈ yuˬ peuˬ hkʼawꞈ nawˉ aˬ htoꞈ ma te tuˬ dawˇ teh taˍ ve le? (Awˉ ceˬ awˉ fa  “Nawˬ dawˇ cawˇ ve laiˉ lawn cawˬ ve” htaꞈ nyi sheˍ.)

¹⁸ Nawˬ awˬ to chiˇ aꞈ leh Baˆtiˆsaˬ haꞈ yuˬ htaˇ, hkʼaˬ hkʼe hpehꞈ ve htawˇ maˇ kʼoˆ nawˬ Yaˬhoˉvaˬ ve awˬ meh htaꞈ hkʼaˬ htaˆ kaꞈ yawˆ yan gaˇ ve tehꞈ hpeuꞈ maw piˇ ve yoˬ. Nawˬ shoꞈ shaꞈ ve awˬ lawn leh beˬ ve lawˇ ve aˬ htoꞈ ma gʼa hpuˇ chehˇ ve htaꞈ Yaˬhoˉvaˬ shiˍ ve tehꞈ yonˍ gʼa ve yoˬ. Ka tiꞈ yeˬ ve chaw htaꞈ Yaˬhoˉvaˬ awˬ bon naꞈ piˇ leh, nawˬ caˉ leh ka tiꞈ yeˬ gʼa tuˬ ga laˇ gʼa ve Yaˬhoˉvaˬ daꞈ kehˬ ve awˬ ha hpu peꞈ laˇ tuˬ yoˬ tehꞈ nawˬ yonˍ gʼa ve yoˬ. (Luˉkaꞈ 11:11-13) Nawˬ Baˆtiˆsaˬ haꞈ yuˬ peuˬ hkʼawꞈ nawˉ Yeˍsuˆ awˬ hkʼaˇ suh gʼaꞈ kʼai gʼa tuˬ Yaˬhoˉvaˬ ga laˇ tuˬ yoˬ.