1-2. Chaw teˇ gʼaˇ Baˆtiˆsaˬ haꞈ yuˬ gaˇ ve kʼo, yawˇ aˬ htoꞈ ma awˉ lawˉ gʼa te sheˍ ve le?

 Peuˬ laˬ ve 5 hkʼawꞈ htaˇ, 1 lanˬ gʼaˇ hpaˆ Baˆtiˆsaˬ haꞈ yuˬ leh Yaˬhoˉvaˬ ve Shaˉhkiˆhkanˍ ve chaw hpehꞈ la ve yoˬ. Yawˇ hui hkʼaw ve chaw teˇ hpaˍ lehˬ, awˉ lawˉ peuˇ teˇ co˗e htaˇ Tiˆmoˉseˍ hkʼaw shuˍ “yaˇ ehˉ hpehꞈ htaˇ kaꞈ” awˬ tehˬ ve htaꞈ gʼa henˇ jaw ve yoˬ. (2 Tiˆmoˉseˍ 3:14, 15) Chaw teˇ hpaˍ kʼo, uiˍ la˗oˬ htaˇ maˇ heˆ leh chaw mawˇ hpehꞈ˗oˬ htaˇ, Yaˬhoˉvaˬ htaꞈ shiˍ la ve yoˬ. Yaˇ miˇ teˇ gʼaˇ Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ leh a shaꞈ 97 hkʼawꞈ htaˇ Baˆtiˆsaˬ haꞈ yuˬ ve yoˬ.

² Nawˬ Liꞈ hpu henˇ chehˇ ve maˇ heˆ leh Shaˉhkiˆhkanˍ ve chaw yehˬ kʼa hkʼaw uiˍ la ve kʼo, nawˬ Baˆtiˆsaˬ haꞈ yuˬ tuˬ dawˇ nyi˗oˬ laˇ? Dawˇ nyi˗oˬ ve kʼo, chi daꞈ jaˇ. Yaꞈ hkʼaˇ, nawˬ Baˆtiˆsaˬ maˇ haꞈ yuˬ sheˍ htaˇ, nawˬ Yaˬhoˉvaˬ htaꞈ awˬ to awˉ lawˉ gʼa chiˇ aꞈ piˇ ve yoˬ. Awˬ to chiˇ aꞈ ve aˬ htoꞈ ma htaꞈ kʼoˆ gaˇ ve awˬ lawn chi ve hkʼaw teˇ geh henˇ tuˬ yoˬ. Leh nawˬ Yaˬhoˉvaˬ htaꞈ awˬ to chiˇ aꞈ leh Baˆtiˆsaˬ haꞈ yuˬ tuˬ gu hehnˇ taˍ˗oˬ ve kʼo, htawˇ dawˇ nawˬ dawˇ maˇ cawˬ tuˬ ga laˇ gʼa ve kaꞈ awˬ lawn chi ve hkʼaw teˇ geh henˇ tuˬ yoˬ.

AWˬ TO CHIˇ Aꞈ VE Aˬ HTOꞈ MA KʼOˆ GAˇ VE LE?

3. Liꞈ hpu ve awˬ co˗e htaˇ Yaˬhoˉvaˬ htaꞈ awˬ to chiˇ aꞈ piˇ ve chaw awˬ lawn tawˇ pa haˉ kʼoˆ maˍ laˇ sheˍ.

³ Liꞈ hpu hkʼaw awˬ to chiˇ aꞈ ve tcuhˉ kuiˬ lehˬ, daꞈ jaˇ ve tehꞈ gʼa fuiˍ teh taˍ ve yoˬ. Iˉsaˍreˍlaˆ chaw Yaˬhoˉvaˬ htaꞈ awˬ to chiˇ aꞈ ve chaw ceuˬ hpehꞈ ve yoˬ. Yaꞈ hkʼaˇ, chi hkʼe hpehꞈ ve htawˇ, chi hkʼe ve chaw ceuˬ teˇ hpaˍ lehˬ Yaˬhoˉvaˬ htaꞈ awˬ to chiˇ aꞈ ve daꞈ jaˇ ve chaw ceuˬ hpehꞈ ve yoˬ. Tawˇ pa haˉ te kʼo, Aˍronˍ yawˇ ve oˉ kʼoˍ hkʼoˆ lo uˉ nyiˉ nyiˉ piˇ leh, Gʼuiˬ sha kʼoˆ taˍ ve hkʼe “uˉ nyiˉ oˇ ve awˬ hkʼoˆ lo daꞈ kehˬ  ve shi baˉ yuˬ hpeh piˇ taˍ ve yoˬ.” Iˉsaˍreˍlaˆ chaw ve paw hkuˇ lonˉ Aˍronˍ Gʼuiˬ sha ve kanˉ daꞈ jaˇ ve htaꞈ te tuˬ daꞈ kehˬ ve shi baˉ yuˬ hpeh taˍ ve yoˬ. (Oˉ kʼoˍ pui ve 8:9) Chi hkʼoˆ kaꞈ, Naˍzaˍriˆ chaw hpehꞈ ve lehˬ Yaˬhoˉvaˬ htaꞈ awˬ to chiˇ aꞈ ve daꞈ jaˇ ve awˬ ceuˬ hpehꞈ ve yoˬ. Naˍzaˍriˆ chaw hpehꞈ ve Heˍbrehˇ hkawˇ tcuhˉ kuiˬ lehˬ “yawˇ ve awˬ to Gʼuiˬ sha htaꞈ chiˇ aꞈ taˍ ve awˬ heˆ hpehꞈ ve yoˬ.” Naˍzaˍriˆ chaw hpehꞈ ve lehˬ Moˉseˍ ve awˬ liˇ tawˇ hkawˇ teˇ hpaˍ hpaˍ htaꞈ hkʼa dehꞈ gʼa na yuˬ cawˇ ve yoˬ.—Heh puiˉ hkʼaw 6:2-8.

4. (a) Nawˬ Yaˬhoˉvaˬ htaꞈ awˬ to chiˇ aꞈ piˇ htaˇ nawˬ awˬ pon a yeˇ uiˍ jaˇ ve awˬ ceuˬ aˬ htoꞈ ma le? (b) “A shu yawˇ awˬ to awˬ pon maˇ kʼawꞈ teꞈ” chi ve aˬ htoꞈ ma htaꞈ kʼoˆ gaˇ ve le? (Awˬ han htaꞈ nyi sheˍ.)

⁴ Nawˬ Yaˬhoˉvaˬ htaꞈ awˬ to chiˇ aꞈ piˇ ve tcuhˉ kuiˬ lehˬ, nawˬ Yeˍsuˆ ve awˬ laꞈ gʼawˇ hpehꞈ tuˬ leuˆ yuˬ leh Yaˬhoˉvaˬ loˍ ve awˬ ceuˬ a shaꞈ teꞈ kuiˬ hkʼaw a yeˇ uiˍ jaˇ tehꞈ shawˍ ve yoˬ. Hkriꞈ yaˇ awˬ to chiˇ aꞈ ve aˬ htoꞈ ma htaꞈ kʼoˆ gaˇ ve le? Yeˍsuˆ kʼoˆ ve, ‘chaw teˇ gʼaˇ gʼaˇ ngaˬ hkʼaˇ suh laˬ gaˇ ve kʼo, a shu yawˇ ve a loˍ htaꞈ gʼa baˬ taˉ ve yoˬ.’ (Maꞈhtehˍ 16:24) Heˍlaˍsaˆ hkawˇ hkʼaw kʼoˆ ve, “a shu yawˇ awˬ to awˬ pon maˇ kʼawꞈ teꞈ.” Chi kʼoˆ gaˇ ve tcuhˉ kuiˬ lehˬ, ‘a shu yawˇ ve a loˍ htaꞈ gʼa baˬ taˉ ve yoˬ.’ Nawˬ Yaˬhoˉvaˬ htaꞈ awˬ to chiˇ aꞈ piˇ htaˇ, yawˇ ve a loˍ htaꞈ maˇ cawˇ ve kʼo teˇ ceuˬ le le kaꞈ maˇ te tehꞈ nawˬ kʼoˆ ve yoˬ. (2 Kawˇrenˍhtuˆ 5:14, 15) Chi ve lehˬ “awˬ suhˍ awˬ shaˍ ve kanˉ teˇ hpaˍ” lehˬ pehꞈ ve tzuhˆ ve htaꞈ te ve chi ve htaꞈ maˇ caˉ daꞈ ve yoˬ. (Gaˍlaˍtiˆ 5:19-21; 1 Kawˇrenˍhtuˆ 6:18) Yaˬhoˉvaˬ htaꞈ haꞈ leh yawˇ ve awˬ liˇ tawˇ hkawˇ nawˬ awˬ pon awˬ bon cawˬ ve tehꞈ yonˍ ve kʼo, Yaˬhoˉvaˬ ve tawˇ hkawˇ htaꞈ gʼaꞈ te ve lehˬ, nawˬ a shaꞈ teꞈ kuiˬ hkʼaw shoꞈ shaꞈ jaˇ tuˬ te laˇ˗aw laˇ? Maˇ te laˇ? (Chiˇ mvuh ve 119:97; Iˉsaˍyaˆ 48:17, 18) Awˬ viˉ awˬ nyi Neˆhkaw˗laˆ kʼoˆ ve, “Yaˬhoˉvaˬ ve awˬ liˇ awˬ hkʼaˇ lehˬ a shu yawˇ te gaˇ ve hkʼe maˇ gʼa te ve htawnˍ hkʼaw haw tiˍ taˍ laˇ ve htaꞈ shuˍ ve tehꞈ dawˇ ve, maˇ heˆ leh yawˇ ve awˬ liˇ awˬ hkʼaˇ lehˬ, laˇ caˬ shiˉ nawˬ htaꞈ maˇ gʼa cheˆ caˇ tuˬ, hkawˆ hkʼaw hawˍ tiˍ taˍ ve htaꞈ shuˍ ve tehꞈ nawˬ dawˇ˗aw laˇ?”

5. (a) Nawˬ hkʼaˬ hkʼe te Yaˬhoˉvaˬ htaꞈ awˬ to chiˇ aꞈ piˇ gʼa tuˬ le? (b) Awˬ to chiˇ aꞈ ve leh Baˆtiˆsaˬ haˬ yuˬ ve hkʼaˬ hkʼe peun daꞈ ve le? (Awˬ han htaꞈ nyi sheˍ.)

 ⁵ Nawˬ Yaˬhoˉvaˬ htaꞈ hkʼaˬ hkʼe te awˬ to chiˇ aꞈ piˇ tuˬ le? Chi hkʼe te gʼa tuˬ nawˬ bon lawˬ ve hkʼaw Yaˬhoˉvaˬ htaꞈ ceh tiˉ oˉ kʼoˍ pui tuˬ yoˬ tehꞈ ka tiꞈ te leh, Yaˬhoˉvaˬ loˍ ve awˬ ceuˬ nawˬ a shaꞈ teꞈ kuiˬ hkʼaw a yeˇ uiˍ jaˇ tehꞈ shawˍ tuˬ ka tiꞈ te ve yoˬ. Nawˬ Yaˬhoˉvaˬ htaꞈ ‘nyi ma hkʼa peu˗eˬ, co ha hkʼa peu˗eˬ, dawˇ hkʼaˇ hkʼa peu˗eˬ leh awˬ gʼaˇ awˬ shaˉ hkʼa peu˗eˬ haꞈ tuˬ yoˬʼ tehꞈ ka tiꞈ te ve yoˬ. (Maˍkuˆ 12:30) Awˬ to chiˇ aꞈ ve lehˬ nawˬ Yaˬhoˉvaˬ geh bon lawˬ ve yoˬ. Yaꞈ hkʼaˇ, Baˆtiˆsaˬ haꞈ yuˬ ve lehˬ nawˬ Yaˬhoˉvaˬ htaꞈ awˬ toꞈ chiˇ aꞈ˗oˬ ve tehꞈ awˬ nu ve chaw htaꞈ hpeuꞈ maw piˇ ve yoˬ. Nawˬ awˬ to chiˇ aꞈ htaˇ, a yeˇ uiˍ jaˇ ve awˬ ceuˬ Yaˬhoˉvaˬ geh nawˬ ka tiꞈ te ve yoˬ. Chi htaꞈ pa taw, nawˬ ka tiꞈ gʼa yeˬ leh Gʼuiˬ sha kaꞈ nawˬ htaꞈ chi hkʼe te tcuh gaˇ ve yoˬ.—Cuˇ yiˍ piˇ ve 5:4, 5.

Aˬ HTOꞈ MA TE NAWˬ YAˬHOˉVAˬ HTAꞈ AWˬ TO CHIˇ Aꞈ TUˬ DAWˇ CHEˆ VE LE?

6. Ngaˬ hui Yaˬhoˉvaˬ htaꞈ awˬ to chiˇ aꞈ gaˇ tuˬ aˬ htoꞈ ma te laˇ ve le?

⁶ Nawˬ Yaˬhoˉvaˬ htaꞈ awˬ to chiˇ aꞈ piˇ ve a yeˇ uiˍ jaˇ ve lehˬ, yawˇ htaꞈ haꞈ ve yoˬ. Haꞈ ve chi ve lehˬ ‘yonˍ veʼ leh “co ha hpawˇ ve cuˇ yiˍ maˍ yiˍ” geh ceh tiˉ laˬ ve maˇ heˆ. Nawˬ Yaˬhoˉvaˬ htaꞈ caˉ daꞈ ve gʼa henˇ leh yawˇ htaꞈ leuˉ leh haꞈ ve yoˬ. (Kawˇlawˇsehˇ 1:9) Nawˬ Liꞈ hpu hkʼaw gʼa henˇ ve awˬ hkʼaˇ teˇ hpaˍ lehˬ, (1) Yaˬhoˉvaˬ awˬ tehˬ cawˬ ve, (2) Liꞈ hpu lehˬ Gʼuiˬ sha dawˇ pawnˍ piˇ taˍ ve liꞈ hpehꞈ ve, leh (3) Yaˬhoˉvaˬ yawˇ ve a loˍ awˬ tehˬ hpehꞈ tcuh gʼa tuˬ yawˇ ve kanˉ hkʼaˇ htaꞈ cuˇ ve tehꞈ nawˬ yonˍ ve yoˬ.

7. Ngaˬ hui awˬ to maˇ chiˇ aꞈ sheˍ htaˇ aˬ htoꞈ ma gʼa te cawˇ ve le?

⁷ Yaˬhoˉvaˬ htaꞈ awˬ to chiˇ aꞈ piˇ gaˇ ve chaw lehˬ, Liꞈ hpu hkʼaw awˬ lawn lonˉ ma htaꞈ gʼa na gʼa tcuh  ve yoˬ. Leh Yaˬhoˉvaˬ ve awˬ liˇ awˬ hkʼaˇ htaꞈ gʼa gʼaꞈ te ve yoˬ. Chi hkʼoˆ kaꞈ, yawˇ ve yonˍ hkʼaˇ awˬ nu ve chaw htaꞈ kʼoˆ maˍ piˇ tuˬ yawˇ gʼa coˇ caˇ ve yoˬ. (Maꞈhtehˍ 28:19, 20) Yawˇ Yaˬhoˉvaˬ htaꞈ leuˉ leh haꞈ ve kʼo, Yaˬhoˉvaˬ teˇ gʼaˇ htaꞈ ceh tiˉ yawˇ oˉ kʼoˍ pui gaˇ ve yoˬ. Nawˬ chi hkʼe dawˇ˗aw laˇ? Dawˇ ve kʼo, Liꞈ hpu maˍ laˇ ve chaw, awˬ pa awˬ e nyi hkʼaˇ suh tcuh gaˇ ve, maˇ heˆ leh awˬ chawˇ hkʼaˇ suh gʼaꞈ te gaˇ ve pa taw, awˬ to chiˇ aꞈ leh Baˆtiˆsaˬ haꞈ yuˬ ve ceh maˇ te gaˇ.

8. Nawˬ Yaˬhoˉvaˬ htaꞈ awˬ to chiˇ aꞈ piˇ gaˇ tuˬ awˬ bon uiˍ hkawˇ shiˍ ve lehˬ nawˬ htaꞈ hkʼaˬ hkʼe ga laˇ gʼa ve le? (Chiˇ mvuh ve 116:12-14)

⁸ Yaˬhoˉvaˬ nawˬ awˬ pon te laˇ ve teˇ ceuˬ le le htaꞈ nawˬ dawˇ nyi htaˇ, nawˬ awˬ hpfuhˇ shiˍ leh yawˇ htaꞈ awˬ to chiˇ aꞈ piˇ gaˇ ve yoˬ. (Chiˇ mvuh ve 116:12-14 gʼaw sheˍ.) Liꞈ hpu hkʼaw kʼoˆ ve, Yaˬhoˉvaˬ lehˬ “daꞈ ve awˬ ceuˬ hkʼa peu˗eˬ leh, biˇ ve laꞈ shawnˍ hkʼa peu˗eˬ” peꞈ laˇ ve yoˬ. (Yaˍkoˆ 1:17) Yaˬhoˉvaˬ nawˬ htaꞈ daꞈ jaˇ ve laꞈ shawnˍ peꞈ laˇ ve lehˬ, Yeˍsuˆ nawˬ awˬ pon htaiˍ hkʼawꞈ tcuh laˇ ve yoˬ. Laꞈ shawnˍ chi ve hkʼaˬ hkʼe taw daꞈ jaˇ ve htaꞈ dawˇ nyi sheˍ. Htaiˍ hkʼawꞈ ve chi nawˬ Yaˬhoˉvaˬ geh meuˆ daꞈ tuˬ ga laˇ gʼa leh nawˬ co co taiˍ taiˍ ve a shaꞈ gʼa tuˬ dawˇ law kuiˬ cawˬ tuˬ kaꞈ ga laˇ ve yoˬ. (1 Yoˇhanˬ 4:9, 10, 19) Chi htaꞈ pa taw, Yaˬhoˉvaˬ nawˬ htaꞈ haꞈ leh yawˇ nawˬ htaꞈ daꞈ ve awˬ ceuˬ peꞈ laˇ ve htaꞈ nawˬ awˬ bon uiˍ jaˇ tehꞈ kʼoˆ piˇ gaˇ ve pa taw, yawˇ htaꞈ awˬ to chiˇ aꞈ piˇ ve lehˬ, daꞈ jaˇ ve awˬ hkʼaˇ hpehꞈ ve tehꞈ hpeuꞈ maw piˇ ve yoˬ. (Bon maˍ ve 16:17; 2 Kawˇrenˍhtuˆ 5:15) Awˬ lawn chi ve Nawˬ ve a shaꞈ co co taiˍ taiˍ ha lehˬ gʼa ve liꞈ kʼoˆ hkʼaw kʼoˆ taˍ ve yoˬ. Awˬ lawn 46, awˬ tawn 4 hkʼaw VDO Nawˬ ve laꞈ shawnˍ Gʼuiˬ sha htaꞈ piˇ sheˍ hkʼaw cawˬ ve yoˬ.

NAWˬ AWˬ TO CHIˇ Aꞈ LEH BAˆTIˆSAˬ HAꞈ YUˬ TUˬ GU HEHNˇ TAˍ˗Oˬ LAˇ?

9. Aˬ htoꞈ ma te awˬ to chiˇ aꞈ ve lehˬ nyiˉ laˇ ve tehꞈ ngaˬ hui maˇ dawˇ nyi cawˇ ve le?

⁹ Nawˬ awˬ to chiˇ aꞈ leh Baˆtiˆsaˬ haꞈ yuˬ tuˬ maˇ te gʼa sheˍ tehꞈ dawˇ ve yoˬ hehˉ. Yaˬhoˉvaˬ ve awˬ liˇ awˬ hkʼaˇ htaꞈ gʼaꞈ te gʼa tuˬ, laiˉ ceuˬ gʼa pa sheˍ tehꞈ nawˬ dawˇ ve yoˬ hehˉ. Maˇ heˆ leh nawˬ ve yonˍ hkʼaˇ yonˍ yeˬ maˇ la tuˬ te cawˇ sheˍ ve tehꞈ dawˇ ve yoˬ hehˉ. (Kawˇlawˇsehˇ 2:6, 7) Liꞈ hpu henˇ ve chaw teˇ gʼaˇ le le hkʼa shuˍ uiˍ la mvuh la ve maˇ heˆ. Leh Shaˉhkiˆhkanˍ ve chaw ve yaˇ a shaꞈ hkʼa ma˗ehˬ htaˇ awˬ to chiˇ aꞈ leh Baˆtiˆsaˬ haꞈ yuˬ ve kaꞈ maˇ heˆ. Chi htaꞈ pa taw, nawˬ hkʼaˬ hkʼe taw uiˍ la mvuh la˗oˬ ve htaꞈ chaˬ nyi leh, nawˬ gʼa pa cawˇ sheˍ ve aˬ htoꞈ ma cawˬ ve htaꞈ kaꞈ chaˬ nyi leh nawˬ awˬ to awˬ nu ve chaw htaꞈ taˇ tehˆ daꞈ.—Gaˍlaˍtiˆ 6:4, 5.

10. Nawˬ awˬ to chiˇ aꞈ leh Baˆtiˆsaˬ haꞈ yuˬ tuˬ maˇ gu hehnˇ taˍ sheˍ ve kʼo, aˬ htoꞈ ma te gʼa sheˍ ve le? (Awˉ ceˬ awˉ fa “ Shaˉhkiˆhkanˍ ve chaw ve yehˬ kʼa hkʼaw uiˍ la ve yaˇ awˬ pon” htaꞈ nyi sheˍ.)

¹⁰ Nawˬ Yaˬhoˉvaˬ htaꞈ awˬ to chiˇ aꞈ piˇ tuˬ maˇ gu hehnˇ taˍ sheˍ ve kʼo, awˬ gʼaˇ taˇ nuˇ piˇ sheˍ. Nawˬ Yaˬhoˉvaˬ htaꞈ awˬ to chiˇ aꞈ piˇ tuˬ caˉ leh dawˇ teh taˍ sheˍ. Nawˬ gʼa pa cawˇ ve htaꞈ Yaˬhoˉvaˬ ga laˇ tuˬ bon lawˬ sheˍ. (Hpiˇliˇpiˆ 2:13; 3:16) Yaˬhoˉvaˬ nawˬ ve bon lawˬ hkawˇ htaꞈ na leh ga laˇ gaˇ jaˇ ve tehꞈ nawˬ yonˍ gʼa ve yoˬ.—1 Yoˇhanˬ 5:14.

Aˬ HTOꞈ MA TE CHAW TEˇ HPAˍ MAˇ DAWˇ CHEˆ HAˆ VE LE?

11. Yaˬhoˉvaˬ lehˬ ngaˬ hui ka tiꞈ yeˬ gʼa tuˬ hkʼaˬ hkʼe ga laˇ ve le?

¹¹ Aˬ htoꞈ ma te chaw teˇ hpaˍ awˬ to chiˇ aꞈ leh Baˆtiˆsaˬ haꞈ yuˬ gʼa˗oˬ ve htawˇ, maˇ te haˆ ve yoˬ. Yawˇ hui kawˆ ve, ‘Baˆtiˆsaˬ haꞈ yuˬ peuˬ hkʼawꞈ nawˉ ngaˬ venˇ baˆ uiˍ jaˇ ve htaꞈ te leh Hkriꞈ yaˇ awˬ moˍ hkʼaw tawˆ cheˆ laˇ ve kʼo, hkʼaˬ hkʼe te tuˬ le?’ Nawˬ chi hkʼe ve htaꞈ kawˆ ve kʼo, Yaˬhoˉvaˬ nawˬ htaꞈ ga laˇ tuˬ nawˬ loˍ ve teˇ ceuˬ le le yawˇ peꞈ laˇ tuˬ yoˬ tehꞈ yonˍ sheˍ. ‘Yaˬhoˉvaˬ htaꞈ keunˍ daꞈ ve hkʼe nawˬ hui te kʼai leh, teˇ ceuˬ le le awˬ hkʼaw lo yawˇ nawˬ hui htaꞈ nyi hkʼaˇ suh tuˬ yoˬ.’ (Kawˇlawˇsehˇ 1:10) Chi hkʼoˆ kaꞈ, nawˬ cawˇ ve awˬ ceuˬ htaꞈ te tuˬ Yaˬhoˉvaˬ awˬ gʼaˇ peꞈ laˇ tuˬ yoˬ. Yawˇ laiˉ gʼaˇ htaꞈ ga piˇ leh te gʼa˗oˬ ve yoˬ. (1 Kawˇrenˍhtuˆ 10:13) Chi htaꞈ pa taw, Hkriꞈ yaˇ awˬ moˍ hkʼaw tawˆ cheˆ ve hkʼa dehꞈ maˇ cawˬ. Yaˬhoˉvaˬ yawˇ ve chaw ka tiꞈ yeˬ tuˬ ga piˇ ve yoˬ.

12. Ngaˬ hui venˇ baˆ uiˍ jaˇ ve htaꞈ maˇ te tuˬ aˬ htoꞈ ma ga laˇ gʼa ve le?

 ¹² Chaw yaˇ teˇ gʼaˇ le le maˇ biˇ ve pa taw, te yaꞈ tuˬ beˬ laˇ ve yoˬ. (Yaˍkoˆ 1:14) Chi hkʼe hpehꞈ ve htawˇ, beˬ laˇ ve gʼa hpuˇ htaˇ hkʼaˬ hkʼe te tuˬ nawˬ leuˆ yuˬ gʼa ve yoˬ. Miˬ guiˬ hkʼoˆ lo ve chaw te maˇ gʼa tehꞈ kʼoˆ laˇ ve htawˇ, daꞈ ve awˬ ceuˬ htaꞈ maˇ te tuˬ nawˬ a shu yawˇ awˬ to htaꞈ yuˬ tiˍ tuˬ shiˍ ve yoˬ. Nawˬ maˇ daꞈ ve dawˇ hkʼaˇ cawˬ la ve kʼo, maˇ daꞈ ve awˬ ceuˬ htaꞈ nawˬ maˇ te tuˬ leuˆ yuˬ gʼa ve yoˬ. Chi htaꞈ pa taw, nawˬ chi hkʼe te gʼa tuˬ teˇ nyi le le bon lawˬ ve, a shu yawˇ hkʼaˇ yawˇ Liꞈ hpu henˇ ve, Liꞈ hpu hkʼaˬ htaˆ kaꞈ gʼaw ve, hpawnˬ daꞈ˗e ve leh hto toˇ˗e ve yoˬ. Chi teˇ hpaˍ nawˬ hkʼaˬ htaˆ kaꞈ te chehˇ ve kʼo, nawˬ yonˍ yeˬ ve cawˬ tuˬ ga laˇ leh awˬ to chiˇ aꞈ taˍ ve hkʼe te gʼa ve yoˬ. Yaˬhoˉvaˬ nawˬ htaꞈ ga laˇ gʼa ve tehꞈ tawnˇ taˍ sheˍ.—Gaˍlaˍtiˆ 5:16.

13. Yoˇsehꞈ lehˬ ngaˬ hui awˬ pon daꞈ ve henˇ yuˬ tuˬ hkʼaˬ hkʼe hpehꞈ ve le?

¹³ Beˬ ve lawˇ ve htaꞈ gʼa hpuˇ htaˇ, hkʼaˬ hkʼe te tuˬ nawˬ awˉ lawˉ htaˇ kaꞈ dawˇ teh taˍ ve kʼo, awˬ to chiˇ aꞈ taˍ ve hkʼa shuˍ gʼaꞈ te gʼa ve yoˬ. Liꞈ hpu hkʼaw ve chaw laiˉ gʼaˇ maˇ biˇ ve htawˇ, te gʼa ve htaꞈ kʼoˆ taˍ ve yoˬ. Tawˇ pa haˉ te kʼo, Yoˇsehꞈ htaꞈ Pawˇtiˇhpaˍ ve awˬ miˇ ma geh zuhꞈ la tuˬ laiˉ pawˆ jehˬ piˇ ve htawˇ, hkʼaˬ hkʼe te tuˬ Yoˇsehꞈ shiˍ ve yoˬ. Liꞈ hpu hkʼaw kʼoˆ ve, “Yoˇsehꞈ lehˬ yawˇ geh maˇ ca zuhꞈ piˇ.” Leh yawˇ kʼawꞈ kʼoˆ ve, “ngaˬ lehˬ, hkʼaˬ hkʼe te chaꞈ chiˆ ve kanˉ chi hkʼe ve htaꞈ te leh, Gʼuiˬ sha htaꞈ te yaꞈ hpehꞈ tuˬ le?” (Awˬ hkuiˉ puiˍ 39:8-10) Yoˇsehꞈ lehˬ Pawˇtiˇhpaˍ ve awˬ miˇ ma geh zuhꞈ la tuˬ jehˬ laˇ ve kʼo, hkʼaˬ hkʼe te tuˬ yawˇ awˉ lawˉ htaˇ kaꞈ dawˇ nyi˗oˬ ve tehꞈ hkʼa dehꞈ gʼa mawˬ ve yoˬ. Chi hkʼe te ve pa taw, yawˇ beˬ ve lawˇ ve gʼa hpuˇ htaˇ, dawˇ cheˆ tuˬ sha ve yoˬ.

14. Nawˬ beˬ ve lawˇ ve gʼa hpuˇ htaˇ hkʼaˬ hkʼe te gʼa ve le?

¹⁴ Nawˬ hkʼaˬ hkʼe te Yoˇsehꞈ htaꞈ henˇ yuˬ gʼa tuˬ le? Nawˬ beˬ ve lawˇ ve gʼa hpuˇ htaˇ hkʼaˬ hkʼe te tuˬ chi teˇ hkui kaꞈ awˉ lawˉ dawˇ teh taˍ sheˍ. Yaˬhoˉvaˬ maˇ dawˇ cawˇ ve awˬ ceuˬ htaꞈ te la tuˬ gʼa hpuˇ htaˇ, laꞈ haˉ tawˍ baˬ sheˍ. (Chiˇ mvuh ve 97:10; 119:165) Nawˬ beˬ ve lawˇ ve gʼa hpuˇ htaˇ hkʼaˬ hkʼe te tuˬ shiˍ˗oˬ leh, chi nawˬ yonˍ yeˬ gʼa tuˬ te laˇ ve pa taw nawˬ htawˇ dawˇ nawˬ dawˇ maˇ cawˬ.

15. Ngaˬ hui ‘Yaˬhoˉvaˬ htaꞈ ca ve tehꞈ’ hkʼaˬ hkʼe te hpeuꞈ maw piˇ gʼa tuˬ le? (Heˍbrehˇ 11:6)

¹⁵ Nawˬ awˬ tehˬ ve htaꞈ ca mawˬ leh Yaˬhoˉvaˬ ve kanˉ nyi ma awˬ tawˬ hkʼa gaˬ te gaˇ ve tehꞈ shiˍ˗oˬ ve yoˬ. Yaꞈ hkʼaˇ, teˇ ceuˬ ceuˬ nawˬ awˬ to chiˇ aꞈ leh Baˆtiˆsaˬ haꞈ yuˬ maˇ haˆ tuˬ te laˇ ve yoˬ. Chi hkʼe hpehꞈ ve kʼo, nawˬ jawˇ mawˇ Daˍviˆ hkʼa shuˍ te gʼa ve yoˬ. Nawˬ Yaˬhoˉvaˬ geh lawˬ gʼa ve “Gʼuiˬ sha˗oˬ, ngaˬ htaꞈ lawˇ nyi leh ngaˬ ve nyi ma htaꞈ shiˍ˗oꞈ. Ngaˬ htaꞈ chaˬ nyi leh ngaˬ ve dawˇ hkʼaˇ htaꞈ  shiˍ˗oꞈ. Ngaˬ awˬ hkʼaw lo haiˬ ve awˬ ceuˬ teˇ ceuˬ ceuˬ cawˬ ve kʼo, oˇ ve htaꞈ hpeuꞈ tawˆ leh, co co yeˬ ve yaꞈ kʼaw hkʼoˆ lo ngaˬ htaꞈ shiˍ kʼai laˇ˗oˆ.” (Chiˇ mvuh ve 139:23, 24) Yaˬhoˉvaˬ lehˬ “yawˇ htaꞈ ca ve chaw hui htaꞈ” awˬ bon naꞈ piˇ tuˬ yoˬ. Nawˬ awˬ to chiˇ aꞈ leh Baˆtiˆsaˬ haꞈ yuˬ tuˬ dawˇ teh taˍ ve htaꞈ coˇ caˇ leh te ve kʼo, nawˬ Yaˬhoˉvaˬ htaꞈ gʼaꞈ ca chehˇ ve yawˇ mawˬ tuˬ hpeuꞈ maw piˇ chehˇ ve yoˬ.—Heˍbrehˇ 11:6 gʼaw sheˍ.

YAˬHOˉVAˬ GEH HKʼAˬ HTAˆ KAꞈ MEUˆ DAꞈ SHEˍ

16-17. Shaˉhkiˆhkanˍ ve chaw ve yehˬ kʼa hkʼaw uiˍ la ve chaw awˬ pon kʼo, Yaˬhoˉvaˬ yawˇ htaꞈ hkʼaˬ hkʼe gʼaw veu laˇ ve le? (Yoˇhanˬ 6:44)

¹⁶ Yeˍsuˆ yawˇ ve awˬ laꞈ gʼawˇ htaꞈ kʼoˆ piˇ ve, yawˇ hui Yeˍsuˆ geh laˬ gʼa ve lehˬ Yaˬhoˉvaˬ gʼaw veu laˇ ve pa taw yoˬ. (Yoˇhanˬ 6:44 gʼaw sheˍ.) Awˬ lawn chi hkʼaˬ hkʼe taw anˇ tuˬ cawˬ ve htaꞈ dawˇ nyi sheˍ. Leh nawˬ awˬ pon aˬ htoꞈ ma htaꞈ kʼoˆ gaˇ ve le? Yaˬhoˉvaˬ lehˬ yawˇ gʼaw veu laˇ ve chaw daꞈ ve awˬ ceuˬ htaꞈ nyi mawˬ ve yoˬ. Yawˇ hui htaꞈ “yawˇ ve chaw hpehꞈ” ve tehꞈ Gʼuiˬ sha shawˍ ve yoˬ. (Bon maˍ ve 7:6) Gʼuiˬ sha kaꞈ nawˬ htaꞈ chi hkʼe shawˍ ve yoˬ.

¹⁷ Yaꞈ hkʼaˇ, Yaˬhoˉvaˬ ve Shaˉhkiˆhkanˍ ve chaw yehˬ kʼa hkʼaw uiˍ la ve yaˇ nehˬ awˬ pon kʼo, nawˬ awˬ pa awˬ e te ve hkʼe te leh Gʼuiˬ sha nawˬ htaꞈ maˇ gʼaw veu laˇ ve tehꞈ nawˬ dawˇ ve yoˬ hehˉ. Yaꞈ hkʼaˇ, Liꞈ hpu hkʼaw kʼoˆ ve, ‘nawˬ hui Gʼuiˬ sha geh jiˆ laˬ˗oꞈ. Hkʼe te kʼo, yawˇ nawˬ hui geh jiˆ laˬ tuˬ yoˬ.’ (Yaˍkoˆ 4:8; 1 Raˍsaˍvanˍ 28:9) Nawˬ awˉ lawˉ Yaˬhoˉvaˬ geh jiˆ kʼai ve kʼo, yawˇ kaꞈ nawˬ geh jiˆ laˬ tuˬ yoˬ. Nawˬ awˬ nu ve chaw te leh te ve hkʼe Yaˬhoˉvaˬ maˇ dawˇ. Yaˬhoˉvaˬ lehˬ teˇ gʼaˇ leh teˇ gʼaˇ htaꞈ yawˇ gʼaw veu laˇ ve yoˬ. Chi ve lehˬ Shaˉhkiˆhkanˍ ve chaw ve yehˬ kʼa hkʼaw uiˍ la ve chaw hui kaꞈ hpehꞈ ve yoˬ. Chaw teˇ gʼaˇ leh teˇ gʼaˇ Yaˬhoˉvaˬ geh awˉ lawˉ jiˆ laˬ ve kʼo, yawˇ kaꞈ Yaˍkoˆ liꞈ 4:8 hkʼaw kʼoˆ taˍ ve hkʼa shuˍ te tuˬ yoˬ.—2 Hteˇsaˍlawˇniˆ 2:13 htaꞈ tehˆ daꞈ sheˍ.

18. Gʼuˇ suhˍ teˇ lawn hkʼaw ngaˬ hui aˬ htoꞈ ma htaꞈ henˇ tuˬ le? (Chiˇ mvuh ve 40:8)

¹⁸ Nawˬ Yaˬhoˉvaˬ htaꞈ awˬ to chiˇ aꞈ piˇ leh Baˆtiˆsaˬ haꞈ yuˬ ve kʼo, nawˬ Yeˍsuˆ hkʼa shuˍ dawˇ leh te ve yoˬ. Yaˬhoˉvaˬ Yeˍsuˆ htaꞈ te tcuh gaˇ ve awˬ ceuˬ teˇ ceuˬ le le Yeˍsuˆ te leh yawˇ Yaˬhoˉvaˬ htaꞈ awˬ to chiˇ aꞈ piˇ ve yoˬ. (Chiˇ mvuh ve 40:8 gʼaw sheˍ; Heˍbrehˇ 10:7) Gʼuˇ suhˍ teˇ lawn hkʼaw ngaˬ hui Baˆtiˆsaˬ haꞈ yuˬ peuˬ hkʼawꞈ nawˉ, ka tiꞈ yeˬ ve hkʼaw Yaˬhoˉvaˬ ve kanˉ caˉ leh te gʼa tuˬ aˬ htoꞈ ma ga laˇ gʼa ve htaꞈ teˇ geh henˇ tuˬ yoˬ.