1. Ngaˬ hui Yaˬhoˉvaˬ ve kanˉ hkʼaˇ hkʼaw gʼa chehˇ htaˇ aˬ htoꞈ ma awˬ bon gʼa ve le?

 Awˬ leh meuˇ ve awˬ yanˇ tuꞈ ve hkanˍ ve gʼa hpuˇ ve htawˇ, ngaˬ hui Yaˬhoˉvaˬ ve kanˉ hkʼaˇ hkʼaw gʼa chehˇ ve daꞈ jaˇ ve yoˬ. Miˬ guiˬ chi lehˬ gʼaˇ hteꞈ luˬ kʼai chehˇ ve htawˇ, Yaˬhoˉvaˬ lehˬ ngaˬ hui htaꞈ teˇ yehˬ kʼa hkʼaw ceh tiˉ hkʼe ve awˬ viˉ awˬ nyi cawˬ tcuh laˇ ve yoˬ. (Chiˇ mvuh ve 133:1) Ngaˬ hui ha lehˬ jaˇ ve yehˬ kʼa cawˬ tuˬ yawˇ ga laˇ ve yoˬ. (Eˇfeˇsuꞈ 5:33–6:1) Yaˬhoˉvaˬ ngaˬ hui htaꞈ cuˇ yiˍ cawˬ tuˬ peꞈ laˇ leh ngaˬ hui nyi ma gawˬ lehˍ ve cawˬ tuˬ kaꞈ ga laˇ ve yoˬ.

2. Ngaˬ hui aˬ htoꞈ ma gʼa te cawˇ ve le? Leh aˬ htoꞈ ma pa taw le?

² Chi hkʼe hpehꞈ ve htawˇ, Yaˬhoˉvaˬ ve kanˉ ka tiꞈ yeˬ ve hkʼaw coˇ caˇ leh te cawˇ ve yoˬ. Aˬ htoꞈ ma pa taw le? Awˬ lawn kʼo, teˇ pawˆ pawˆ shu kʼoˆ ve, leh te ve awˬ ceuˬ, ngaˬ hui nyi ma maˇ sha tuˬ te laˇ ve yoˬ. Leh ngaˬ hui awˬ to kaꞈ te yaꞈ peuˬ kaꞈ te yaꞈ ve htaꞈ nyi ma luˬ ve yoˬ. (1) Awˬ viˉ awˬ nyi ngaˬ hui nyi ma maˇ sha tuˬ te laˇ htaˇ, (2) ngaˬ hui ve awˬ ca ngaˬ hui nyi ma maˇ sha tuˬ te laˇ htaˇ, leh (3) ngaˬ hui dawˇ taˍ ve hkʼe te maˇ gʼa htaˇ, yeunˇ hkanˍ ve hkʼaw Yaˬhoˉvaˬ ve kanˉ caˉ leh te cawˇ ve yoˬ. Leh awˬ lawn chi ve teˇ hpaˍ htaꞈ caˉ daꞈ ve, leh Liꞈ hpu ve awˬ co˗e htaˇ Yaˬhoˉvaˬ ve kanˉ te ve chaw awˬ lawn htaꞈ kaꞈ teˇ geh henˇ tuˬ yoˬ.

AWˬ VIˉ AWˬ NYI NAWˬ NYI MA LUˬ TUˬ TE LAˇ HTAˇ YEUNˇ HKANˍ SHEˍ

3. Yaˬhoˉvaˬ ve kanˉ te ve chaw shoꞈ shaꞈ ve awˬ lawn aˬ htoꞈ ma gʼa hpuˇ ve le?

³ Shoꞈ shaꞈ ve awˬ lawn. Awˬ viˉ awˬ nyi teˇ hpaˍ te hkʼaˇ dawˇ hkʼaˇ ngaˬ hui maˇ dawˇ cawˇ ve teˇ ceuˬ ceuˬ cawˬ ve yoˬ. Awˬ viˉ awˬ nyi teˇ hpaˍ maˇ dawˇ nyi leh tawˇ yaw ve, maˇ heˆ leh te ve teˇ ceuˬ ceuˬ htaꞈ ngaˬ hui maˇ dawˇ cawˇ ve yoˬ hehˉ. Gʼuiˬ sha ve kanˉ hkʼaˇ hkʼaw sheh kʼai paˍ te yaꞈ ve yoˬ hehˉ. Chi hkʼe hpehꞈ htaˇ chaw teˇ hpaˍ hpaˍ  htawˇ dawˇ nawˬ dawˇ cawˬ ve, chi ve awˬ tehˬ awˬ na Gʼuiˬ sha ve kanˉ hkʼaˇ hpehꞈ ve laˇ? Chi hkʼe dawˇ ve aꞈ kehˉ awˬ viˉ awˬ nyi geh teˇ geh ‘Gʼuiˬ sha htaꞈ oˉ kʼoˍ pui’ cawˇ ve yoˬ. Chaw teˇ hpaˍ yawˇ hui maˇ dawˇ cawˇ ve chaw geh tawˇ maˇ yaw daꞈ ve, maˇ heˆ leh hpawnˬ daꞈ kuiˬ yehˬ lo kaꞈ maˇ kʼai˗o ve yoˬ. (Zeˍhpaˍniˆ 3:9) Chi hkʼe te ve cuˇ yiˍ cawˬ˗aw laˇ? Liꞈ hpu ve awˬ co˗e htaˇ, Yaˬhoˉvaˬ ve kanˉ te ve chaw shoꞈ shaꞈ ve awˬ lawn hkʼa shuˍ gʼa hpuˇ ve teˇ geh henˇ tuˬ yoˬ.

4. Tcuh yaˇ Pawˇluꞈ shoꞈ shaꞈ ve aˬ htoꞈ ma gʼa hpuˇ ve le?

⁴ Liꞈ hpu hkʼaw ve awˬ lawn. Awˬ viˉ awˬ nyi lehˬ maˇ biˇ ve chaw hpehꞈ ve tehꞈ tcuh yaˇ Pawˇluꞈ shiˍ ve yoˬ. Tawˇ pa haˉ te kʼo, Pawˇluꞈ Yeˍruˆsaˍlehnˍ venˇ Hkriꞈ yaˇ awˬ moˍ hkʼaw ca guiˇ˗e peuˬ hkʼawꞈ nawˉ, yawˇ awˬ tehˬ ve awˬ laꞈ gʼawˇ hpehꞈ la˗oˬ ve tehꞈ awˬ viˉ awˬ nyi teˇ hpaˍ maˇ yonˍ ve yoˬ. (Tcuh yaˇ 9:26) Peuˬ hkʼawꞈ nawˉ chaw teˇ hpaˍ Pawˇluꞈ htaꞈ maˇ heˆ heˆ kʼoˆ leh awˬ meh luˬ tuˬ te piˇ ve yoˬ. (2 Kawˇrenˍhtuˆ 10:10) Pawˇluꞈ lehˬ awˬ hoˉ chaw mawˇ teˇ hpaˍ maˇ cawˇ ve awˬ ceuˬ te ve htaꞈ kaꞈ gʼa mawˬ ve yoˬ. Chi ve lehˬ awˬ viˉ awˬ nyi teˇ hpaˍ nyi ma maˇ sha tuˬ te piˇ ve yoˬ. (Gaˍlaˍtiˆ 2:11, 12) Pawˇluꞈ meuˆ daꞈ jaˇ ve awˬ chawˇ Maˍkuˆ kaꞈ Pawˇluꞈ nyi ma luˬ tuˬ te piˇ ve yoˬ. (Tcuh yaˇ 15:37, 38) Chi ve hkʼa peu˗eˬ Pawˇluꞈ awˬ viˉ awˬ nyi chi teˇ hpaˍ geh tawˇ maˇ yaw daꞈ kaꞈ gʼa ve yoˬ. Yaꞈ hkʼaˇ, yawˇ chi hkʼe maˇ te. Pawˇluꞈ awˬ viˉ awˬ nyi htaꞈ daꞈ ve hpawˇ nyi leh, Yaˬhoˉvaˬ ve kanˉ nyi ma pfuhˇ ve hkʼaw te chehˇ sheˍ ve yoˬ. Pawˇluꞈ chi hkʼe te gʼa tuˬ aˬ htoꞈ ma ga piˇ ve le?

5. Pawˇluꞈ awˬ viˉ awˬ nyi htaꞈ dawˇ law gʼa tuˬ aˬ htoꞈ ma ga piˇ ve le? (Kawˇlawˇsehˇ 3:13, 14) (Awˬ han htaꞈ nyi sheˍ.)

⁵ Pawˇluꞈ awˬ viˉ awˬ nyi htaꞈ haꞈ jaˇ ve pa taw, yawˇ awˬ viˉ awˬ nyi htaꞈ daꞈ ve hpawˇ nyi tuˬ te piˇ leh yawˇ hui maˇ biˇ ve htaꞈ maˇ nyi. Chi hkʼoˆ kaꞈ, Kawˇlawˇsehˇ liꞈ 3:13, 14 hkʼaw yawˇ bvuhꞈ taˍ ve hkʼe, haꞈ pehnˇ ve chi lehˬ yawˇ daꞈ ve awˬ ceuˬ te tuˬ ga piˇ ve yoˬ. (Gʼaw sheˍ.) Pawˇluꞈ Maˍkuˆ htaꞈ venˇ baˆ hkʼaˬ hkʼe te hpehˇ piˇ ve teˇ geh nyi sheˍ. Pawˇluꞈ miˍshenˍnaˍliˍ te ve awˉ lawˉ teˇ pawˆ htaˇ, Maˍkuˆ yawˇ htaꞈ baˬ taˉ piˇ ve htawˇ Pawˇluꞈ yawˇ htaꞈ venˇ baˆ maˇ taˍ. Peuˬ hkʼawꞈ nawˉ Kawˇlawˇsehˇ venˇ hkʼaw chehˇ ve Hkriꞈ yaˇ awˬ moˍ htaꞈ Pawˇluꞈ liꞈ bvuhꞈ piˇ htaˇ, Maˍkuˆ lehˬ “ngaˬ maˇ maˇ dawˇ sha la” tuˬ te laˇ ve daꞈ ve awˬ chawˇ hpehꞈ ve tehꞈ chiˇ mvuh piˇ ve yoˬ. (Kawˇlawˇsehˇ 4:10, 11) Pawˇluꞈ htaꞈ Roˉmaꞈ venˇ lo yehˬ hkʼaw haw tiˍ piˇ htaˇ, yawˇ htaꞈ ga laˇ tuˬ Maˍkuˆ htaꞈ shiˍ veu laˇ˗oˆ tehꞈ liꞈ hteˇ˗ehˍ bvuhꞈ piˇ ve yoˬ. (2 Tiˆmoˉseˍ 4:11) Pawˇluꞈ awˬ viˉ awˬ nyi htaꞈ dawˇ law chehˇ sheˍ ve tehꞈ hkʼa tawˍ lehˆ gʼa mawˬ ve yoˬ. Pawˇluꞈ ve awˬ lawn ngaˬ hui htaꞈ hkʼaˬ hkʼe maˍ laˇ ve le?

6-7. Awˬ viˉ awˬ nyi maˇ biˇ ve chaw hpehꞈ ve htawˇ, ngaˬ hui yawˇ hui htaꞈ caˉ leh haꞈ tuˬ aˬ htoꞈ ma ga laˇ gʼa ve le? (1 Yoˇhanˬ 4:7)

⁶ Henˇ tuˬ ve. Yaˬhoˉvaˬ lehˬ ngaˬ hui awˬ viˉ awˬ nyi htaꞈ haꞈ tcuh gaˇ ve yoˬ. (1 Yoˇhanˬ 4:7  gʼaw sheˍ.) Awˬ viˉ awˬ nyi teˇ gʼaˇ gʼaˇ ngaˬ hui nyi ma luˬ tuˬ te laˇ ve kʼo, yawˇ ngaˬ hui nyi ma luˬ tuˬ te laˇ gaˇ ve maˇ heˆ tehꞈ dawˇ sheˍ. Leh yawˇ kaꞈ ngaˬ hui hkʼa shuˍ Yaˬhoˉvaˬ nyi hkʼaˇ suh tuˬ coˇ caˇ leh teˇ piˇ chehˇ ve yoˬ. (Tawˇ naˉ ve 12:18) Yaˬhoˉvaˬ ve kanˉ te ve chaw teˇ gʼaˇ le le awˬ gʼaˇ nuˇ ve, maˇ heˆ leh yaꞈ kuiˬ cawˬ ve htawˇ yawˇ yawˇ hui htaꞈ haꞈ jaˇ ve yoˬ. Ngaˬ hui te yaꞈ htaˇ Yaˬhoˉvaˬ ngaˬ hui htaꞈ baˬ taˉ leh, yawˇ hkʼaˬ htaˆ kaꞈ beuꞈ chehˇ ve maˇ heˆ. (Chiˇ mvuh ve 103:9) Chi htaꞈ pa taw, Yaˬhoˉvaˬ Gʼuiˬ sha ngaˬ hui htaꞈ hkʼaˬ htaˆ kaꞈ venˇ baˆ hpehˇ laˇ ve, ngaˬ hui henˇ yuˬ tuˬ daꞈ jaˇ ve hpehꞈ ve yoˬ.—Eˇfeˇsuꞈ 4:32–5:1.

⁷ Haiˬ ve miˬ guiˬ awˬ yanˇ peuˬ la paˇ neˇ ve kʼo, ngaˬ hui awˬ viˉ awˬ nyi geh leuˉ leh gʼa meuˆ daꞈ cawˇ ve tehꞈ tawnˇ taˍ sheˍ. Fawˉ ve mehˍ ve leuˉ leh gʼa hpuˇ tuˬ yoˬ tehꞈ ngaˬ hui shiˍ gʼa leh, yonˍ ve htaꞈ pa taw htawnˍ hkʼaw lo gʼa chehˇ tuˬ kaꞈ shiˍ gʼa ve yoˬ. Chi hkʼe hpehꞈ ve kʼo, peuˬ laˬ htaˇ aꞈ kehˉ ngaˬ hui awˬ viˉ awˬ nyi geh leuˉ leh meuˆ daꞈ cawˇ ve yoˬ. (Tawˇ naˉ ve 17:17) Saˬpenˬ mvuhˇ miˬ lo chehˇ ve nyi haꞈ shaˉ paˍ Co˗sheˆ a ve awˬ lawn htaꞈ teˇ geh nyi sheˍ. Yawˇ leh awˬ viˉ awˬ nyi hawˉ hkʼaˆ laiˉ gʼaˇ mvuhˇ miˬ hpawˇ choˬ paˉ oˇ paˉ maˇ chehˇ ve pa taw, htawnˍ hkʼaw lo yuˬ keu piˇ ve yoˬ. Co˗sheˆ kʼoˆ ve, “htawnˍ hkʼaw lo chehˇ htaˇ ngaˬ hui hkʼaˬ htaˆ kaꞈ teˇ geh gʼa chehˇ ve pa taw, nyi ma maˇ sha tuˬ te laˇ gʼa ve yoˬ. Yaꞈ hkʼaˇ, ngaˬ hui teˇ gʼaˇ leh teˇ gʼaˇ yeunˇ hkanˍ daꞈ leh, hkʼaˬ htaˆ kaꞈ venˇ baˆ hpehˇ daꞈ ve pa taw, ngaˬ hui ga daꞈ leh nyi haꞈ shaˉ daꞈ ve yoˬ. Htawnˍ yaˇ Shaˉhkiˆhkanˍ ve chaw maˇ heˆ ve geh kaꞈ ngaˬ hui gʼa chehˇ ve yoˬ. Teˇ pawˆ htaˇ ngaˬ laꞈ gʼawˇ naˬ leh hpa hpeh tsuhꞈ taˍ ve pa taw, kanˉ hkʼa dehꞈ te maˇ gʼa. Yaꞈ hkʼaˇ, awˬ viˉ awˬ nyi hawˉ hkʼaˆ teˇ gʼaˇ ngaˬ htaꞈ veuꞈ kʼaˇ tsuhˇ laˇ leh laiˉ ceuˬ ga laˇ ve yoˬ. Ngaˬ htaꞈ ga laˇ tuˬ loˍ jaˇ htaˇ, haꞈ ve awˬ viˉ awˬ nyi ngaˬ htaꞈ hkʼa dehꞈ ga laˇ ve yoˬ.” Chi teˇ hkui kaꞈ ngaˬ hui awˬ viˉ awˬ nyi htaꞈ haꞈ leh venˇ baˆ gʼa hpehˇ daꞈ cawˇ ve tehꞈ hkʼa tawˍ lehˆ gʼa mawˬ ve yoˬ.

NAWˬ VE AWˬ CA NAWˬ NYI MA LUˬ TUˬ TE LAˇ HTAˇ YEUNˇ HKANˍ SHEˍ

8. Awˬ hpawˇ awˬ miˇ ma shoꞈ shaꞈ ve awˬ lawn aˬ htoꞈ ma gʼa hpuˇ ve le?

⁸ Shoꞈ shaꞈ ve awˬ lawn. Heuˆ daꞈ˗oˬ ve chaw teˇ nyi maˇ heˆ kʼo teˇ nyi shoꞈ shaꞈ ve awˬ lawn gʼa hpuˇ tuˬ yoˬ. Awˬ lawn kʼo, Liꞈ hpu hkʼaw hteˇ˗ehˍ kʼoˆ laˇ ve heuˆ daꞈ˗oˬ ve chaw “awˬ suhˍ awˬ shaˍ hpawˇ tuꞈ ve hkanˍ ve gʼa hkanˍ tuˬ yoˬ.” (1 Kawˇrenˍhtuˆ 7:28) Aˬ htoꞈ ma pa taw chi hkʼe gʼa hpuˇ ve le? Awˬ lawn kʼo, heuˆ daꞈ ve lehˬ maˇ biˇ ve chaw 2 gʼaˇ teˇ geh chehˇ ve pa taw yoˬ. Teˇ gʼaˇ leh teˇ gʼaˇ te hkʼaˇ dawˇ hkʼaˇ maˇ shuˍ daꞈ ve, dawˇ cawˇ ve leh maˇ dawˇ cawˇ ve kaꞈ maˇ shuˍ daꞈ ve yoˬ. Leh awˬ hpawˇ awˬ miˇ ma teˇ ca ca kʼo, chaw ceuˬ maˇ shuˍ daꞈ ve, chaw liˇ vaˇ liˇ leh hpehꞈ laˬ ve kaꞈ maˇ shuˍ daꞈ ve yoˬ. Teˇ gʼaˇ leh teˇ gʼaˇ maˇ heuˆ daꞈ sheˍ htaˇ, maˇ te tawˆ la ve te hkʼaˇ dawˇ hkʼaˇ kaꞈ gʼa mawˬ ve yoˬ. Leh chi ve teˇ hpaˍ yawˇ hui deˇ daꞈ tuˬ kaꞈ cawˬ la ve yoˬ. Teˇ gʼaˇ leh teˇ gʼaˇ shoꞈ shaꞈ ve awˬ lawn gu tuˬ ga daꞈ cawˇ ve htawˇ, yawˇ huiˉ maˬ nyi gʼaˇ gʼaˇ yaꞈ ve htaꞈ teˇ gʼaˇ leh teˇ gʼaˇ venˇ baˆ taˍ daꞈ ve yoˬ. Teˇ ca ca kʼo, teˇ gʼaˇ teˇ kaˬ chehˇ ve maˇ heˆ leh baˬ daꞈ ve kʼo, daꞈ jaˇ ve awˬ hkʼaˇ hpehꞈ ve tehꞈ dawˇ ve yoˬ. Chi hkʼe te ve lehˬ yawˇ hui ha lehˬ tuˬ te piˇ˗aw laˇ? b Liꞈ hpu hkʼaw chaw teˇ gʼaˇ yawˇ ve awˬ ca geh shoꞈ shaꞈ ve awˬ lawn cawˬ ve gʼa yeunˇ hkanˍ jaˇ ve htaꞈ teˇ geh nyi sheˍ.

9. Aˍbiˆgeˍlaˆ shoꞈ shaꞈ ve awˬ lawn aˬ htoꞈ ma gʼa hpuˇ ve le?

⁹ Liꞈ hpu hkʼaw ve awˬ lawn. Aˍbiˆgeˍlaˆ Naˍbaˍlaˆ htaꞈ heuˆ ve yoˬ. Liꞈ hpu hkʼaw kʼoˆ ve, Naˍbaˍlaˆ lehˬ nyi ma maˇ daꞈ leh haiˬ ve chaw hpehꞈ ve yoˬ. (1 Saˍmo˗eˍlaˆ 25:3) Aˍbiˆgeˍlaˆ hawˉ hkʼaˆ chi hkʼe ve geh gʼa chehˇ ve nyi ma luˬ jaˇ ve yoˬ hehˉ. Leh yawˇ chi ve hpaˇ geh maˇ heuˆ daꞈ˗o ve laˇ? Maˇ heˆ. Naˍbaˍlaˆ Daˍviˆ leh yawˇ ve chaw htaꞈ nyi cha piˇ ve pa taw, Iˉsaˍreˍlaˆ ve jawˇ mawˇ Daˍviˆ yawˇ htaꞈ  tiˇ pehˍ tuˬ dawˇ cheˆ htaˇ, Aˍbiˆgeˍlaˆ awˬ hkʼaˇ ca ve yoˬ. (1 Saˍmo˗eˍlaˆ 25:9-13) Awˬ tehˬ kʼo, Aˍbiˆgeˍlaˆ hpaw˗e leh Daˍviˆ Naˍbaˍlaˆ htaꞈ tiˇ pehˍ tcuh kaꞈ gʼa ve yoˬ. Yaꞈ hkʼaˇ, yawˇ chi hkʼe maˇ te. Daˍviˆ Naˍbaˍlaˆ htaꞈ maˇ gʼa tiˇ pehˍ tuˬ yawˇ lawˬ hkawˉ piˇ ve yoˬ. (1 Saˍmo˗eˍlaˆ 25:23-27) Aˬ htoꞈ ma pa taw Aˍbiˆgeˍlaˆ chi hkʼe te ve le?

10. Aˍbiˆgeˍlaˆ awˬ hpawˇ geh shoꞈ shaꞈ ve awˬ lawn gʼa hpuˇ ve htawˇ, yawˇ yeunˇ hkanˍ gʼaˇ tuˬ aˬ htoꞈ ma ga piˇ ve le?

¹⁰ Aˍbiˆgeˍlaˆ Yaˬhoˉvaˬ htaꞈ haꞈ leh yawˇ ve awˬ ca htaꞈ yawˆ yan ve yoˬ. Aˍdanˍ leh Eˇvaꞈ chaw yaˇ awˉ lawˉ teˇ ca heuˆ daꞈ htaˇ, Yaˬhoˉvaˬ aˬ htoꞈ ma kʼoˆ piˇ ve htaꞈ Aˍbiˆgeˍlaˆ shiˍ ve yoˬ. (Awˬ hkuiˉ puiˍ 2:24) Heuˆ daꞈ ve lehˬ Yaˬhoˉvaˬ gu teh taˍ laˇ ve daꞈ jaˇ ve awˬ ceuˬ hpehꞈ ve tehꞈ yawˇ shiˍ ve yoˬ. Aˍbiˆgeˍlaˆ Yaˬhoˉvaˬ nyi hkʼaˇ suh tuˬ te piˇ gaˇ ve pa taw, yawˇ ve yehˬ kʼa hkʼaw ve chaw teˇ gʼaˇ le le leh yawˇ ve awˬ hpawˇ htaꞈ kaꞈ haꞈ shaˉ piˇ tuˬ, yawˇ te gʼa ve hkʼe teˇ ceuˬ le le te ve yoˬ. Daˍviˆ Naˍbaˍlaˆ htaꞈ maˇ gʼa tiˇ pehˍ tuˬ Aˍbiˆgeˍlaˆ tawˍ piˇ leh yawˇ ve yaꞈ kuiˬ maˇ heˆ ve htawˇ, awˬ hpawˇ ve yaꞈ kuiˬ htaꞈ Daˍviˆ geh yawˇ lawˬ hkawˉ piˇ ve yoˬ. Aˍbiˆgeˍlaˆ haꞈ hanˉ leh yawˇ awˬ pon tiˉ maˇ dawˇ nyi ve htaꞈ Yaˬhoˉvaˬ haꞈ jaˇ ve tehꞈ ngaˬ hui gʼa mawˬ ve yoˬ. Awˬ hpawˇ leh awˬ miˇ ma hpehꞈ ve chaw, Aˍbiˆgeˍlaˆ ve awˬ lawn htaꞈ hkʼaˬ hkʼe henˇ yuˬ gʼa ve le?

11. (a) Yaˬhoˉvaˬ lehˬ awˬ hpawˇ awˬ miˇ ma htaꞈ aˬ htoꞈ ma te tcuh gaˇ ve le? (Eˇfeˇsuꞈ 5:33) (b) Hka˗min ve awˬ lawn nawˬ htaꞈ aˬ htoꞈ ma maˍ laˇ gʼa ve le? (Awˬ han htaꞈ nyi sheˍ.)

¹¹ Henˇ tuˬ ve. Yaˬhoˉvaˬ lehˬ awˬ hpawˇ awˬ miˇ ma htaꞈ yawˆ yan daꞈ tcuh gaˇ ve yoˬ. Yawˇ huiˉ maˬ teˇ geh chehˇ ve shoꞈ shaꞈ ve awˬ lawn cawˬ ve htawˇ, hkʼaˬ htaˆ kaꞈ teˇ geh chehˇ tcuh gaˇ ve yoˬ. Awˬ hpawˇ awˬ miˇ ma shoꞈ shaꞈ ve awˬ lawn cawˬ ve htaꞈ coˇ caˇ leh gu ve, teˇ gʼaˇ leh teˇ gʼaˇ haꞈ daꞈ ve, leh yawˆ yan daꞈ tuˬ coˇ caˇ ve kʼo, Yaˬhoˉvaˬ ha lehˬ jaˇ tuˬ yoˬ. (Eˇfeˇsuꞈ 5:33 gʼaw sheˍ.) Hka˗min ve awˬ lawn htaꞈ teˇ geh nyi sheˍ. Yawˇ heuˆ daꞈ ve 6 hkʼawꞈ peuˬ hkʼawꞈ nawˉ, yawˇ Yaˬhoˉvaˬ ve Shaˉhkiˆhkanˍ ve chaw geh Liꞈ hpu tanˬ henˇ leh Baˆtiˆsaˬ haꞈ yuˬ ve yoˬ. Hka˗min kʼoˆ ve, “ngaˬ ve awˬ hpawˇ Liꞈ hpu henˇ ve htaꞈ maˇ dawˇ cawˇ. Yawˇ Yaˬhoˉvaˬ htaꞈ hkawehˉ ve, yawˇ ngaˬ htaꞈ deˇ laˇ leh baˬ taˉ tuˬ yoˬ tehꞈ kawˆ ho laˇ ve yoˬ.” Chi hkʼe hpehꞈ ve htawˇ, Hka˗min yeunˇ hkanˍ leh 50 hkʼawꞈ hkʼa gaˬ awˬ hpawˇ geh chehˇ sheˍ ve yoˬ. Yawˇ awˬ hpawˇ htaꞈ haꞈ leh hkʼaˬ htaˆ kaꞈ yawˆ yan piˇ ve yoˬ. Yawˇ kʼoˆ ve, “awˬ yanˇ ponˬ kʼai htaˇ ngaˬ hpawˇ ve dawˇ hkʼaˇ htaꞈ na gʼa tuˬ ngaˬ coˇ caˇ leh yawˇ htaꞈ yawˆ yan ve hkʼaw tawˇ yaw piˇ tuˬ awˬ hkʼaˇ ca ve yoˬ. Heuˆ daꞈ ve lehˬ Yaˬhoˉvaˬ gu teh taˍ laˇ ve daꞈ jaˇ ve awˬ ceuˬ hpehꞈ ve tehꞈ ngaˬ shiˍ ve yoˬ. Ngaˬ hpawˇ geh shoꞈ shaꞈ ve awˬ lawn maˇ gʼa cawˬ tuˬ, ngaˬ te gʼa ve hkʼe te ve yoˬ. Ngaˬ Yaˬhoˉvaˬ htaꞈ haꞈ ve pa taw, chi ve teˇ hpaˍ te tuˬ awˬ gʼaˇ maˇ nuˇ.” c Chi htaꞈ pa taw, nawˬ ve awˬ ca geh shoꞈ shaꞈ ve awˬ lawn cawˬ ve kʼo, Yaˬhoˉvaˬ nawˬ paˇ lo chehˇ ve tehꞈ nawˬ yonˍ gʼa leh nawˬ yeunˇ hkanˍ gʼaˇ tuˬ yawˇ ga laˇ tuˬ yoˬ.

 NAWˬ DAWˇ TAˍ VE HKʼE TE MAˇ GʼA HTAˇ YEUNˇ HKANˍ SHEˍ

12. Ngaˬ hui venˇ baˆ uiˍ jaˇ ve htaꞈ te ve kʼo, shoꞈ shaꞈ ve awˬ lawn aˬ htoꞈ ma gʼa hpuˇ ve le?

¹² Shoꞈ shaꞈ ve awˬ lawn. Ngaˬ hui venˇ baˆ uiˍ jaˇ ve htaꞈ te htaˇ, a shu yawˇ awˬ to awˬ hpfuhˇ maˇ cawˬ ve tehꞈ dawˇ leh awˬ gʼaˇ nuˇ jaˇ ve yoˬ. Liꞈ hpu hkʼaw kʼoˆ ve, ngaˬ hui venˇ baˆ te yaꞈ htaˇ “nyi ma” luˬ jaˇ ve yoˬ. (Chiˇ mvuh ve 51:17) Awˬ viˉ awˬ nyi Ro˗beuꞈ ga piˇ shehˍ hpaˇ gʼa te tuˬ laiˉ hkʼawꞈ coˇ caˇ jaˇ ve yoˬ. Yaꞈ hkʼaˇ, yawˇ venˇ baˆ uiˍ jaˇ ve htaꞈ te htaˇ, yawˇ Yaˬhoˉvaˬ htaꞈ hpfuhˆ ve tehꞈ dawˇ ve yoˬ. Yawˇ kʼoˆ ve, “ngaˬ ve dawˇ shiˍ puiˉ ve nyi ma ngaˬ htaꞈ shoꞈ shaꞈ laˇ jaˇ leh ngaˬ nyi ma luˬ jaˇ tuˬ te laˇ ve yoˬ. Ngaˬ Yaˬhoˉvaˬ geh bon lawˬ leh gʼaˇ hteꞈ hawˬ ve yoˬ. Ngaˬ Gʼuiˬ sha nyi ma luˬ tuˬ te piˇ ve pa taw, oˇ ve teˇ yanˇ yawˇ ngaˬ ve bon lawˬ hkawˇ maˇ na laˇ˗o ve tehꞈ dawˇ ve yoˬ.” Ngaˬ hui venˇ baˆ te yaꞈ htaˇ, Yaˬhoˉvaˬ ngaˬ hui htaꞈ a yeˇ maˇ yuˬ laˇ˗o leh ngaˬ hui yawˇ ve kanˉ caˉ leh te maˇ gʼa˗o ve tehꞈ dawˇ ve pa taw, nyi ma luˬ jaˇ ve yoˬ. (Chiˇ mvuh ve 38:4) Nawˬ chi hkʼe dawˇ jaw ve kʼo, venˇ baˆ uiˍ jaˇ ve htaꞈ te ve htawˇ, yeunˇ hkanˍ ve hkʼaw Yaˬhoˉvaˬ ve kanˉ caˉ leh te ve chaw ve awˬ lawn Liꞈ hpu hkʼaw dawˇ nyi sheˍ.

13. Tcuh yaˇ Peˍtruˆ aˬ htoꞈ ma htaꞈ te yaꞈ ve le? Leh yawˇ haiˬ jaˇ ve aˬ htoꞈ ma te ve le?

¹³ Liꞈ hpu hkʼaw ve awˬ lawn. Yeˍsuˆ miˬ guiˬ hkʼoˆ chehˇ ve awˬ leh meuˇ teˇ haˉ htaˇ, tcuh yaˇ Peˍtruˆ laiˉ pawˆ te yaꞈ ve pa taw yawˇ haiˬ jaˇ ve awˬ ceuˬ htaꞈ te ve yoˬ. Peˍtruˆ yawˇ awˬ to htaꞈ yonˍ gʼa jaˇ ve pa taw, tcuh yaˇ hui Yeˍsuˆ htaꞈ baˬ taˉ ve htawˇ yawˇ Yeˍsuˆ htaꞈ maˇ baˬ taˉ tehꞈ kʼoˆ ve yoˬ. (Maˍkuˆ 14:27-29) Peuˬ hkʼawꞈ nawˉ, Geˍseˍmaˍniˆ hko hkʼaw Yeˍsuˆ Peˍtruˆ htaꞈ shaw taˍ˗oꞈ tehꞈ kʼoˆ piˇ ve htawˇ, yawˇ laiˉ pawˆ zuhꞈ muiˉ kʼa ve yoˬ. (Maˍkuˆ 14:32, 37-41) Peuˬ hkʼawꞈ nawˉ chaw awˬ moˍ lonˉ Yeˍsuˆ htaꞈ ca hpeh la htaˇ, Peˍtruˆ hpaw˗e ve yoˬ. (Maˍkuˆ 14:50) Hkʼe te leh, Peˍtruˆ Yeˍsuˆ htaꞈ maˇ shiˍ tehꞈ 3 pawˆ kʼoˆ leh chiˇ baˬ piˇ ve yoˬ. (Maˍkuˆ 14:66-71) Peˍtruˆ yawˇ haiˬ jaˇ ve awˬ ceuˬ htaꞈ te ve tehꞈ shiˍ htaˇ, yawˇ hkʼaˬ hkʼe dawˇ ve le? Yawˇ te yaꞈ jaˇ ve tehꞈ shiˍ htaˇ nyi ma luˬ jaˇ leh gʼaˇ hteꞈ hawˬ ve yoˬ. (Maˍkuˆ 14:72) Oˇ ve hkʼawꞈ nawˉ hkʼaˬ nyiˇ naˍ riˍ maˇ gaˬ sheˍ kaꞈ Yeˍsuˆ htaꞈ shu tiˇ pehˍ piˇ ve pa taw, Peˍtruˆ nyi ma hkʼaˬ hkʼe taw luˬ ve htaꞈ dawˇ nyi sheˍ. Chi htaꞈ pa taw, Peˍtruˆ yawˇ awˬ to awˬ hpfuhˇ maˇ cawˬ ve tehꞈ dawˇ ve yoˬ.

14. Peˍtruˆ yeunˇ hkanˍ leh Yaˬhoˉvaˬ ve kanˉ caˉ leh te gʼa tuˬ aˬ htoꞈ ma ga piˇ ve le? (Awˬ htaꞈ hpawˇ ve awˬ han htaꞈ nyi sheˍ.)

¹⁴ Peˍtruˆ yeunˇ hkanˍ leh Yaˬhoˉvaˬ ve kanˉ kʼawꞈ te kʼai gʼa ve aˬ htoꞈ ma ga piˇ ve le? Awˉ lawˉ teˇ ceuˬ lehˬ, yawˇ teˇ gʼaˇ tiˉ maˇ chehˇ taˬ. Yawˇ awˬ viˉ awˬ nyi geh kʼai leh yawˇ hui Peˍtruˆ htaꞈ awˬ gʼaˇ peꞈ piˇ ve yoˬ hehˉ. (Luˉkaꞈ 24:33) Chi hkʼoˆ kaꞈ, Yeˍsuˆ kʼawꞈ teꞈ tu la peuˬ hkʼawꞈ nawˉ yawˇ awˬ to Peˍtruˆ htaꞈ mawˬ tcuh piˇ leh awˬ gʼaˇ piˇ ve yoˬ hehˉ. (Luˉkaꞈ 24:34; 1 Kawˇrenˍhtuˆ 15:5) Peuˬ hkʼawꞈ nawˉ Peˍtruˆ te yaꞈ jaˇ ve htaꞈ Yeˍsuˆ kʼoˆ piˇ ve aꞈ kehˉ, yawˇ a yeˇ uiˍ jaˇ ve awˬ vuiˬ htaꞈ gʼa te tuˬ yoˬ tehꞈ Yeˍsuˆ kʼoˆ piˇ ve yoˬ. (Yoˇhanˬ 21:15-17) Peˍtruˆ  yawˇ haiˬ jaˇ ve htaꞈ te ve tehꞈ shiˍ ve htawˇ, yawˇ awˬ to yawˇ dawˇ law chehˇ sheˍ. Aˬ htoꞈ ma pa taw le? Awˬ lawn kʼo, Jawˇ mawˇ Yeˍsuˆ yawˇ htaꞈ dawˇ law chehˇ sheˍ ve tehꞈ Peˍtruˆ shiˍ ve yoˬ. Awˬ viˉ awˬ nyi yawˇ htaꞈ hkʼaˬ htaˆ kaꞈ ga laˇ tuˬ yoˬ tehꞈ yawˇ shiˍ ve yoˬ. Peˍtruˆ ve awˬ lawn ngaˬ hui htaꞈ aˬ htoꞈ ma maˍ laˇ ve le?

15. Yaˬhoˉvaˬ lehˬ ngaˬ hui htaꞈ aˬ htoꞈ ma awˬ lawn yonˍ gʼa tcuh gaˇ ve le? (Chiˇ mvuh ve 86:5; Roˉmaꞈ 8:38, 39) (Awˬ han htaꞈ nyi sheˍ.)

¹⁵ Henˇ tuˬ ve. Yaˬhoˉvaˬ ngaˬ hui htaꞈ haꞈ leh hkʼaˬ htaˆ kaꞈ venˇ baˆ hpehˇ laˇ tuˬ yoˬ tehꞈ yonˍ gʼa ve yoˬ. (Chiˇ mvuh ve 86:5; Roˉmaꞈ 8:38, 39 gʼaw sheˍ.) Ngaˬ hui venˇ baˆ te yaꞈ htaˇ nyi ma luˬ ve yoˬ. Ngaˬ hui teˇ gʼaˇ le le kaꞈ chi hkʼe dawˇ ve yoˬ hehˉ. Yaꞈ hkʼaˇ, ngaˬ hui te yaꞈ htaˇ Yaˬhoˉvaˬ ngaˬ hui htaꞈ maˇ haꞈ laˇ˗o ve tehꞈ maˇ dawˇ nyi cawˇ leh venˇ baˆ maˇ hpehˇ laˇ taˬ tehꞈ kaꞈ maˇ dawˇ nyi cawˇ. Chi hkʼe dawˇ ve aꞈ kehˉ ga laˇ tuˬ laꞈ haˉ lawˬ cawˇ ve yoˬ. Ro˗beuꞈ kʼawꞈ kʼoˆ ve, “ngaˬ awˬ to htaꞈ ngaˬ gʼaˇ va leh beˬ ve lawˇ ve htaꞈ ngaˬ tawˍ daꞈ gʼaˇ tuˬ yoˬ tehꞈ dawˇ ve pa taw te yaꞈ ve yoˬ.” Peuˬ hkʼawꞈ nawˉ Ro˗beuꞈ nyi haꞈ shaˉ paˍ geh tawˇ ca yaw daꞈ˗e cawˇ ve tehꞈ dawˇ ve yoˬ. Yawˇ kʼoˆ ve, “ngaˬ nyi haꞈ shaˉ paˍ geh tawˇ yaw daꞈ˗oˬ htaˇ, Yaˬhoˉvaˬ ngaˬ htaꞈ haꞈ chehˇ sheˍ ve tehꞈ mawˬ tuˬ yawˇ hui ga laˇ ve yoˬ. Nyi haꞈ shaˉ paˍ ngaˬ htaꞈ dawˇ law chehˇ sheˍ leh Yaˬhoˉvaˬ ngaˬ htaꞈ maˇ baˬ taˉ laˇ ve tehꞈ mawˬ tuˬ yawˇ hui ga laˇ ve yoˬ.” Yaˬhoˉvaˬ ngaˬ hui htaꞈ haꞈ jaˇ leh ngaˬ hui venˇ baˆ dawˇ hpfuhˆ ve kʼo, hpehˇ laˇ tuˬ yoˬ tehꞈ yonˍ gʼa ve yoˬ. Ga laˇ tuˬ lawˬ leh maˇ kʼawꞈ te yaꞈ tuˬ coˇ caˇ sheˍ. (1 Yoˇhanˬ 1:8, 9) Ngaˬ hui chi hkʼe yonˍ gʼa ve kʼo, ngaˬ hui te yaꞈ htaˇ, a shu yawˇ awˬ to htaꞈ dawˇ law gʼa sheˍ.

16. Aˬ htoꞈ ma te nawˬ yeunˇ hkanˍ hkʼaw Yaˬhoˉvaˬ ve kanˉ caˉ leh te gʼa ve le?

¹⁶ Tuꞈ jaˇ hkanˍ jaˇ ve awˬ leh meuˇ ve awˬ yanˇ chi ve hkʼaw ngaˬ hui coˇ caˇ leh Yaˬhoˉvaˬ ve kanˉ te ve htaꞈ yawˇ awˬ hpfuhˇ shiˍ ve yoˬ. Ngaˬ hui dawˇ taˍ ve hkʼe laiˉ ceuˬ te maˇ gʼa ve htawˇ, Yaˬhoˉvaˬ ga laˇ tcuh ve kʼo, yawˇ ve kanˉ yeunˇ hkanˍ ve hkʼaw te kʼai gʼa ve yoˬ. Ngaˬ hui awˬ viˉ awˬ nyi htaꞈ leuˉ leh haꞈ leh yawˇ hui ngaˬ hui nyi ma luˬ tuˬ te laˇ ve htawˇ, venˇ baˆ hpehˇ piˇ sheˍ. Ngaˬ hui Gʼuiˬ sha htaꞈ haꞈ leh Gʼuiˬ sha gu teh taˍ laˇ ve awˬ ca htaꞈ yawˆ yan ve tehꞈ hpeuꞈ maw piˇ sheˍ. Awˬ ca geh shoꞈ shaꞈ ve awˬ lawn cawˬ ve kʼo, coˇ caˇ leh gu sheˍ. Ngaˬ hui venˇ baˆ te ve kʼo, Yaˬhoˉvaˬ ga laˇ tuˬ lawˬ gʼa ve yoˬ. Yaˬhoˉvaˬ ngaˬ hui htaꞈ haꞈ leh venˇ baˆ hpehˇ laˇ tuˬ yoˬ tehꞈ yonˍ gʼa ve yoˬ. Ngaˬ hui yawˇ ve kanˉ caˉ leh te tuˬ dawˇ teh taˍ sheˍ. Ngaˬ hui ‘daꞈ ve htaꞈ te ve awˬ gʼaˇ maˇ nuˇ’ ve kʼo, awˬ bon maˇ maˇ gʼa tuˬ yoˬ tehꞈ yonˍ gʼa ve yoˬ.—Gaˍlaˍtiˆ 6:9.