1. Yaˬhoˉvaˬ ve kanˉ te ve chaw teˇ hpaˍ aˬ htoꞈ ma htaꞈ htawˇ dawˇ nawˬ dawˇ cawˬ ve le?

 “Gʼuiˬ sha lehˬ yawˇ ve chaw teˇ hpaˍ htaꞈ nyi ma cawˇ ve” yoˬ tehꞈ ngaˬ hui gʼa shiˍ htaˇ awˬ gʼaˇ gʼa jaˇ ve yoˬ. (Chiˇ mvuh ve 149:4) Yaꞈ hkʼaˇ, chaw teˇ hpaˍ hkʼa dehꞈ maˇ yonˍ gʼa leh htawˇ dawˇ nawˬ dawˇ cawˬ ve, ‘Yaˬhoˉvaˬ yawˇ htaꞈ nyi hkʼaˇ suh˗aw laˇ?’ Liꞈ hpu ve awˬ co˗e htaˇ, Gʼuiˬ sha ve kanˉ te ve chaw teˇ hpaˍ kaꞈ chi hkʼe dawˇ jaw ve yoˬ.—1 Saˍmo˗eˍlaˆ 1:6-10; Yawˇbaˆ 29:2, 4; Chiˇ mvuh ve 51:11.

2. Yaˬhoˉvaˬ a shu htaꞈ nyi hkʼaˇ suh jaˇ ve le?

² Maˇ biˇ ve chaw yaˇ kaꞈ Yaˬhoˉvaˬ nyi hkʼaˇ suh tuˬ te piˇ gʼa ve tehꞈ, Liꞈ hpu hkʼaw hkʼa tawˍ lehˆ hpeuꞈ maw laˇ ve yoˬ. Chi hkʼaˬ hkʼe te hpehꞈ kʼai gʼa ve le? Chaw oˇ ve teˇ gʼaˇ Yeˍsuˆ htaꞈ yonˍ leh Baˆtiˆsaˬ haꞈ yuˬ ve kʼo, hpehꞈ kʼai gʼa ve yoˬ. (Yoˇhanˬ 3:16) Chi htaꞈ pa taw, ngaˬ hui awˬ tehˬ awˬ na venˇ baˆ dawˇ hpfuhˆ˗oˬ ve tehꞈ, awˬ nu ve chaw mawˬ tuˬ gʼa te cawˇ leh, Yaˬhoˉvaˬ loˍ ve teˇ ceuˬ le le te tuˬ ngaˬ hui awˬ to chiˇ aꞈ˗oˬ ve tehꞈ, awˬ nu ve chaw mawˬ tuˬ kaꞈ gʼa te cawˇ ve yoˬ. (Tcuh yaˇ 2:38; 3:19) Ngaˬ hui Yaˬhoˉvaˬ geh meuˆ daꞈ tuˬ, awˬ ceuˬ chi ve teˇ hpaˍ htaꞈ te ve yawˇ ha lehˬ jaˇ ve yoˬ. Ngaˬ hui awˬ to chiˇ aꞈ taˍ ve hkʼe gʼaꞈ te ve kʼo, Yaˬhoˉvaˬ ngaˬ hui htaꞈ nyi hkʼaˇ suh jaˇ leh yawˇ ve awˬ chawˇ tehꞈ shawˍ laˇ ve yoˬ.—Chiˇ mvuh ve 25:14.

3. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

³ Yaꞈ hkʼaˇ, aˬ htoꞈ ma pa taw chaw teˇ hpaˍ Yaˬhoˉvaˬ yawˇ hui htaꞈ nyi hkʼaˇ maˇ suh ve tehꞈ dawˇ ve le? Yaˬhoˉvaˬ yawˇ hui htaꞈ nyi hkʼaˇ suh ve tehꞈ hpeuꞈ maw piˇ tuˬ, aˬ htoꞈ ma awˬ hkʼaˇ cawˬ ve le? Yaˬhoˉvaˬ ngaˬ hui htaꞈ nyi hkʼaˇ suh jaˇ ve tehꞈ hkʼaˬ hkʼe te yonˍ gʼa tuˬ ve le?

Aˬ HTOꞈ MA TE CHAW TEˇ HPAˍ YAˬHOˉVAˬ YAWˇ HTAꞈ NYI HKʼAˇ MAˇ SUH VE TEHꞈ DAWˇ VE LE?

4-5. Ngaˬ hui awˬ hpfuhˇ maˇ cawˬ ve tehꞈ dawˇ ve htawˇ, aˬ htoꞈ ma htaꞈ yonˍ gʼa ve le?

⁴ Chaw laiˉ gʼaˇ yaˇ ehˉ htaˇ kaꞈ awˬ hpfuhˇ maˇ cawˬ ve tehꞈ dawˇ ve yoˬ. (Chiˇ mvuh ve 88:15) Awˬ viˉ awˬ nyi En˗di˗an meh ve teˇ gʼaˇ kʼoˆ ve,  “ngaˬ awˬ hpfuhˇ maˇ cawˬ ve tehꞈ hkʼaˬ htaˆ kaꞈ dawˇ ve yoˬ. Yaˇ ehˉ htaˇ ngaˬ ve yehˬ kʼa miˬ guiˬ awˬ suhˉ hkʼaw gʼa chehˇ tuˬ, ngaˬ bon lawˬ ve htaꞈ tawnˇ gʼa ve yoˬ. Yaꞈ hkʼaˇ, ngaˬ te hkʼaˇ dawˇ hkʼaˇ maˇ daꞈ ve pa taw, maˇ gʼa chehˇ taˬ tehꞈ dawˇ ve yoˬ.” Hto˗niˇ awˬ pa awˬ e Shaˉhkiˆhkanˍ ve chaw maˇ hpehꞈ ve yawˇ kʼoˆ ve, “ngaˬ pa ngaˬ e ngaˬ htaꞈ haꞈ leh nyi hkʼaˇ suh jaˇ tehꞈ maˇ kʼoˆ laˇ jaw. Ngaˬ daꞈ ve hkʼaˬ hkʼe taw te ve htawˇ, yawˇ hui awˬ pon maˇ daꞈ sheˍ.”

⁵ Teˇ pawˆ pawˆ ngaˬ hui awˬ hpfuhˇ maˇ cawˬ ve tehꞈ dawˇ ve kʼo, Yaˬhoˉvaˬ ngaˬ hui htaꞈ yawˇ geh laˬ tuˬ gʼawˬ veu laˇ ve tehꞈ tawnˇ taˍ sheˍ. (Yoˇhanˬ 6:44) Awˬ nu ve chaw ngaˬ hui daꞈ ve htaꞈ te ve maˇ mawˬ ve htawˇ, Yaˬhoˉvaˬ mawˬ leh yawˇ ngaˬ hui ve nyi ma hkʼaw kaꞈ mawˬ ve yoˬ. (1 Saˍmo˗eˍlaˆ 16:7; 2 Raˍsaˍvanˍ 6:30) Chi htaꞈ pa taw, Yaˬhoˉvaˬ ngaˬ hui yawˇ awˬ pon awˬ hpfuhˇ hkʼaˆ jaˇ tehꞈ kʼoˆ ve htaꞈ ngaˬ hui yonˍ gʼa ve yoˬ.—1 Yoˇhanˬ 3:19, 20.

6. Tcuh yaˇ Pawˇluꞈ venˇ baˆ te yaꞈ jaw ve htaꞈ hkʼaˬ hkʼe dawˇ ve le?

⁶ Awˬ tehˬ ve maˇ henˇ sheˍ htaˇ, chaw teˇ hpaˍ maˇ daꞈ ve htaꞈ te jaw ve pa taw, nyi ma luˬ jaˇ ve yoˬ. (1 Peˍtruˆ 4:3) Gʼuiˬ sha ve kanˉ ka tiꞈ yeˬ ve hkʼaw te ve chaw teˇ hpaˍ htawˇ, maˇ daꞈ ve dawˇ hkʼaˇ htaꞈ gʼa tawˍ daꞈ ve yoˬ. Hkʼe kʼo, nawˬ awˬ pon Yaˬhoˉvaˬ teˇ pawˆ pawˆ nawˬ htaꞈ venˇ baˆ maˇ hpehˇ laˇ gʼa tehꞈ dawˇ˗aw laˇ? Nawˬ chi hkʼe dawˇ ve kʼo, taˇ dawˇ haˍ. Yaˬhoˉvaˬ ve kanˉ ka tiꞈ yeˬ ve hkʼaw te ve chaw laiˉ gʼaˇ htawˇ, chi hkʼe dawˇ jaw ve yoˬ. Tawˇ pa haˉ te kʼo, tcuh yaˇ Pawˇluꞈ yawˇ maˇ biˇ ve chaw hpehꞈ ve tehꞈ, dawˇ ve pa taw nyi ma luˬ jaˇ ve yoˬ. (Roˉmaꞈ 7:24) Pawˇluꞈ venˇ baˆ dawˇ hpfuhˆ leh Baˆtiˆsaˬ haꞈ yuˬ˗oˬ ve htawˇ, yawˇ awˬ to htaꞈ kʼoˆ ve, “ngaˬ lehˬ tcuh yaˇ hui awˬ hkʼaw lo i jaˇ ve teˇ gʼaˇ hpehꞈ ve yoˬ.” Leh yawˇ kʼawꞈ kʼoˆ sheˍ ve, “ngaˬ lehˬ venˇ baˆ uiˍ ve chaw teˇ gʼaˇ hpehꞈ ve yoˬ.”—1 Kawˇrenˍhtuˆ 15:9; 1 Tiˆmoˉseˍ 1:15.

7. Ngaˬ hui te yaꞈ jaw ve kʼo, aˬ htoꞈ ma htaꞈ tawnˇ taˍ cawˇ ve le?

⁷ Ngaˬ hui venˇ baˆ dawˇ hpfuhˆ ve kʼo, Awˬ pa Yaˬhoˉvaˬ ngaˬ hui htaꞈ venˇ baˆ hpehˇ laˇ tuˬ yoˬ tehꞈ ka tiꞈ te taˍ laˇ ve yoˬ. (Chiˇ mvuh ve 86:5) Chi htaꞈ pa taw, ngaˬ hui te yaꞈ jaw ve htaꞈ nyi ma luˬ jaˇ ve kʼo, Yaˬhoˉvaˬ ngaˬ hui htaꞈ awˬ tehˬ awˬ na venˇ baˆ hpehˇ laˇ tuˬ yoˬ tehꞈ, yawˇ ka tiꞈ te taˍ laˇ ve htaꞈ yonˍ gʼa ve yoˬ.—Kawˇlawˇsehˇ 2:13.

8-9. Yaˬhoˉvaˬ htaꞈ hkʼaˬ hkʼe taw te piˇ kaꞈ maˇ lawꞈ sheˍ ve dawˇ hkʼaˇ htaꞈ gʼaˇ tuˬ aˬ htoꞈ ma ga laˇ gʼa ve le?

⁸ Ngaˬ hui teˇ gʼaˇ le le te gʼa ve hkʼe Yaˬhoˉvaˬ ve kanˉ hkʼa dehꞈ te gaˇ ve yoˬ. Yaꞈ hkʼaˇ, chaw teˇ hpaˍ Yaˬhoˉvaˬ nyi hkʼaˇ suh tuˬ, hkʼaˬ hkʼe taw te piˇ kaꞈ maˇ lawꞈ sheˍ tehꞈ dawˇ ve yoˬ. Awˬ viˉ awˬ nyi yaˇ miˇ A˗min˗daˇ chi hkʼe dawˇ ve yoˬ. Yawˇ kʼoˆ ve, “ngaˬ daꞈ jaˇ ve awˬ ceuˬ Yaˬhoˉvaˬ htaꞈ piˇ ve lehˬ ngaˬ leuˉ leh gʼa te cawˇ ve htaꞈ kʼoˆ gaˇ ve tehꞈ dawˇ ve yoˬ. Hkʼe te leh, ngaˬ te gʼa ve aꞈ kehˉ kʼawꞈ te tuˬ dawˇ law taˍ ve yoˬ. Ngaˬ dawˇ taˍ ve hkʼe te maˇ gʼa htaˇ, Yaˬhoˉvaˬ ngaˬ htaꞈ nyi hkʼaˇ maˇ suh ve tehꞈ dawˇ ve yoˬ. Awˬ lawn kʼo, ngaˬ kaꞈ ngaˬ awˬ to htaꞈ nyi hkʼaˇ maˇ suh ve yoˬ.”

⁹ Yaˬhoˉvaˬ htaꞈ hkʼaˬ hkʼe taw te piˇ kaꞈ maˇ lawꞈ sheˍ ve tehꞈ dawˇ ve, dawˇ hkʼaˇ htaꞈ ngaˬ hui gʼaˇ hpehꞈ tuˬ hkʼaˬ hkʼe ga laˇ ve le? Yaˬhoˉvaˬ lehˬ awˬ hkʼaˇ ca puiˉ ve Gʼuiˬ sha hpehꞈ ve tehꞈ tawnˇ taˍ sheˍ. Ngaˬ hui te maˇ gʼa ve awˬ leuˉ Yaˬhoˉvaˬ ngaˬ hui htaꞈ maˇ te tcuh laˇ taˬ. Ngaˬ hui te gʼa ve hkʼe yawˇ awˬ pon te ve htaꞈ yawˇ awˬ hpfuhˇ shiˍ ve yoˬ. Chi hkʼoˆ kaꞈ, Liꞈ hpu hkʼaw Yaˬhoˉvaˬ ve kanˉ nyi ma awˬ tawˬ hkʼa gaˬ te ve chaw awˬ lawn htaꞈ dawˇ nyi sheˍ. Tawˇ pa haˉ te kʼo, tcuh yaˇ Pawˇluꞈ ve awˬ lawn hpehꞈ ve yoˬ. Yawˇ Yaˬhoˉvaˬ ve kanˉ laiˉ hkʼawꞈ te ve yoˬ. Laiˉ hinˉ kiˇ loˇ kʼai leh Hkriꞈ yaˇ awˬ moˍ laiˉ kaˬ cawˬ tuˬ kaꞈ te ve yoˬ. Yaꞈ hkʼaˇ, peuˬ laˬ htaˇ hkʼe yawˇ Gʼuiˬ sha ve kanˉ hkʼa dehꞈ te maˇ gʼa htaˇ, Yaˬhoˉvaˬ yawˇ htaꞈ nyi hkʼaˇ maˇ suh˗oˬ ve tehꞈ yawˇ dawˇ˗aw laˇ? Maˇ dawˇ. Awˬ lawn kʼo, yawˇ te gʼa ve awˬ ceuˬ htaꞈ coˇ caˇ leh te ve pa taw, Yaˬhoˉvaˬ yawˇ htaꞈ awˬ bon naꞈ piˇ ve yoˬ. (Tcuh yaˇ 28:30, 31) Chi ve hkʼa shuˍ shuˍ, ngaˬ hui Yaˬhoˉvaˬ htaꞈ te piˇ ve awˬ ceuˬ awˬ tcuhˉ awˬ yanˇ pa ve hkʼe gʼaꞈ te ve yoˬ. Yaꞈ hkʼaˇ, Yaˬhoˉvaˬ awˬ pon a yeˇ uiˍ jaˇ ve lehˬ, yawˇ ve kanˉ caˉ leh te ve yoˬ. Yaˬhoˉvaˬ ngaˬ hui htaꞈ nyi hkʼaˇ suh jaˇ ve tehꞈ mawˬ tuˬ, hkʼaˬ hkʼe ve awˬ hkʼaˇ cawˬ ve htaꞈ teˇ geh nyi sheˍ.

 YAˬHOˉVAˬ TE VE AWˬ HKʼAˇ YAWˇ NGAˬ HUI HTAꞈ NYI HKʼAˇ SUH JAˇ VE TEHꞈ GʼA MAWˬ VE

10. Yaˬhoˉvaˬ ngaˬ hui htaꞈ nyi hkʼaˇ suh jaˇ ve tehꞈ kʼoˆ ve awˬ hkawˇ hkʼaˬ kaˬ lo gʼa kaˇ ve le? (Yoˇhanˬ 16:27)

¹⁰ Liꞈ hpu. Yaˬhoˉvaˬ yawˇ ve kanˉ te ve chaw htaꞈ haꞈ leh nyi hkʼaˇ suh ve tehꞈ hpeuꞈ maw laˇ gaˇ ve yoˬ. Yaˬhoˉvaˬ yawˇ ve Yaˇ Yeˍsuˆ htaꞈ haꞈ leh nyi hkʼaˇ suh jaˇ ve tehꞈ, Liꞈ hpu hkʼaw 2 lawn bvuhꞈ taˍ ve yoˬ. (Maꞈhtehˍ 3:17; 17:5) Yaˬhoˉvaˬ nawˬ htaꞈ chi hkʼe kʼoˆ laˇ ve nawˬ gʼa kaˇ gaˇ˗aw laˇ? Yaˬhoˉvaˬ ngaˬ hui htaꞈ hteˇ˗ehˍ chi hkʼe maˇ kʼoˆ laˇ ve htawˇ, yawˇ ngaˬ hui htaꞈ Liꞈ hpu hkʼaw kʼoˆ laˇ leh, ha lehˬ ve bon hkawˇ liꞈ 4 daw hkʼaw Yeˍsuˆ ve tawˇ hkawˇ htaꞈ ngaˬ hui gʼaw htaˇ, Yaˬhoˉvaˬ ngaˬ hui htaꞈ nyi hkʼaˇ suh jaˇ tehꞈ kʼoˆ ve gʼa kaˇ ve yoˬ. (Yoˇhanˬ 16:27 gʼaw sheˍ.) Yeˍsuˆ lehˬ Yaˬhoˉvaˬ htaꞈ hkʼa dehꞈ henˇ yuˬ gʼa ve yoˬ. Chi htaꞈ pa taw, Yeˍsuˆ awˬ laꞈ gʼawˇ hui htaꞈ chiˇ mvuh piˇ ve, leh Yeˍsuˆ yawˇ hui htaꞈ nyi hkʼaˇ suh jaˇ tehꞈ hpeuꞈ maw piˇ ve kaꞈ ngaˬ hui gʼa gʼaw ve yoˬ. Yaˬhoˉvaˬ ngaˬ hui htaꞈ chi hkʼe dawˇ ve tehꞈ ngaˬ hui kaꞈ dawˇ mawˬ gʼa ve yoˬ.—Yoˇhanˬ 15:9, 15.

11. Aˬ htoꞈ ma te ngaˬ hui shoꞈ shaꞈ ve gʼa hpuˇ htaˇ, Yaˬhoˉvaˬ ngaˬ hui htaꞈ nyi hkʼaˇ maˇ suh˗o ve tehꞈ kʼoˆ gaˇ ve maˇ heˆ ve le? (Yaˍkoˆ 1:12)

¹¹ Te ve. Yaˬhoˉvaˬ ngaˬ hui htaꞈ hkʼaˬ htaˆ kaꞈ ga laˇ tuˬ gu hehnˇ taˍ ve yoˬ. Tawˇ pa haˉ te kʼo, ngaˬ hui loˍ ve awˬ ceuˬ yawˇ peꞈ laˇ ve yoˬ. Yawˇbaˆ shoꞈ shaꞈ ve awˬ lawn gʼa hpuˇ ve hkʼa shuˍ, teˇ pawˆ pawˆ kʼo Yaˬhoˉvaˬ lehˬ ngaˬ hui htaꞈ kaꞈ hpuˇ tcuh laˇ ve yoˬ. (Yawˇbaˆ 1:8-11) Yaꞈ hkʼaˇ, ngaˬ hui shoꞈ shaꞈ ve awˬ lawn gʼa hpuˇ ve, Gʼuiˬ sha ngaˬ hui htaꞈ nyi hkʼaˇ maˇ suh˗o ve tehꞈ kʼoˆ gaˇ ve maˇ heˆ. Awˬ tehˬ kʼo, chi ve ngaˬ hui Yaˬhoˉvaˬ htaꞈ haꞈ leh yawˇ htaꞈ gʼaˇ va ve tehꞈ hpeuꞈ maw piˇ ve awˬ yanˇ hpehꞈ ve yoˬ. (Yaˍkoˆ 1:12 gʼaw sheˍ.) Ngaˬ hui tuꞈ ve hkanˍ ve gʼa hpuˇ htaˇ, Yaˬhoˉvaˬ ngaˬ hui htaꞈ nyi haꞈ shaˉ laˇ leh yeunˇ hkanˍ gʼaˇ tuˬ, hkʼaˬ hkʼe ga laˇ ve htaꞈ gʼa mawˬ tuˬ yoˬ.

12. Deh˗mi htiˆ ve awˬ lawn ngaˬ hui htaꞈ aˬ htoꞈ ma maˍ laˇ ve le?

¹² Aˍshaˆ miˬ guiˬ lo chehˇ ve awˬ viˉ awˬ nyi hawˉ hkʼaˆ Deh˗mi htiˆ ve awˬ lawn htaꞈ teˇ geh nyi sheˍ. Yawˇ kanˉ maˇ gʼa te˗o leh laiˉ ha pa kanˉ ca ve htawˇ maˇ gʼa sheˍ. Yawˇ dawˇ cheˆ leh Yaˬhoˉvaˬ ve kanˉ leuˉ leh te ve yoˬ. Awˬ lawn kʼo, yawˇ chi hkʼe te ve lehˬ Yaˬhoˉvaˬ htaꞈ gʼaˇ va ve tehꞈ hpeuꞈ maw piˇ ve yoˬ. Yaꞈ hkʼaˇ, laiˉ ha pa peuˬ hkʼawꞈ nawˉ kaꞈ yawˇ kanˉ ca maˇ gʼa sheˍ. Peuˬ hkʼawꞈ nawˉ, yawˇ maˇ chehˇ sha leh hkʼaˬ htaˆ kaꞈ ku˗iˍ hkʼoˆ lo gʼa zuhꞈ taˍ ve yoˬ. Yawˇ daꞈ ve awˬ hpawˇ leh daꞈ ve awˬ pa hpehꞈ sheˍ ve laˇ tehꞈ htawˇ dawˇ nawˬ dawˇ cawˬ ve yoˬ. Leh Yaˬhoˉvaˬ yawˇ htaꞈ nyi hkʼaˇ maˇ suh ve hehˉ laˇ tehꞈ yawˇ htawˇ dawˇ nawˬ dawˇ cawˬ sheˍ ve yoˬ. Teˇ nyi htaˇ yawˇ ve yaˇ miˇ Iˉsaˍyaˆ liꞈ 30:15 bvuhꞈ leh yawˇ zuhꞈ kuiˬ ku˗iˍ paˇ lo ca yuˬ peꞈ laˇ ve yoˬ. Liꞈ hpu chi teˇ tawn hkʼaw  kʼoˆ ve, “ngaˬ htaꞈ gʼaˇ ca kʼawꞈ va la˗o. Oˇ hkʼe te ve kʼo, nawˬ hui awˬ gʼaˇ kʼawꞈ cawˬ la leh, gawˬ lehˍ gʼa chehˇ tuˬ yoˬ.” Yawˇ ve yaˇ miˇ kʼoˆ ve, “ngaˬ pa˗oˬ, nawˬ hkʼaˬ hkʼe htaˇ nyi ma maˇ sha ve kʼo, Liꞈ hpu awˬ tawn chi ve htaꞈ tawnˇ taˍ sheˍ mehˍ.” Chi ve htaꞈ pa taw, Deh˗mi htiˆ yawˇ ve yehˬ kʼa caˇ tuˬ cawˬ ve, aˉ poꞈ veuꞈ kʼaˇ cawˬ ve, chehˇ kuiˬ cawˬ ve, Yaˬhoˉvaˬ htaꞈ awˬ bon uiˍ jaˇ tehꞈ kʼoˆ piˇ ve yoˬ. Yawˇ kʼoˆ ve, “ngaˬ nyi ma gawˬ lehˍ cawˬ leh Yaˬhoˉvaˬ htaꞈ gʼaˇ gʼa va cawˇ ve yoˬ.” Nawˬ shoꞈ shaꞈ ve awˬ lawn chi ve hkʼa shuˍ gʼa hpuˇ ve kʼo, Yaˬhoˉvaˬ nawˬ htaꞈ dawˇ haˍ leh nawˬ yeunˇ hkanˍ gʼaˇ tuˬ yawˇ ga laˇ tuˬ yoˬ tehꞈ yonˍ gʼa ve yoˬ.

13. Yaˬhoˉvaˬ ngaˬ hui htaꞈ nyi hkʼaˇ suh ve tehꞈ yonˍ gʼa tuˬ yawˇ a shu htaꞈ yehˇ leh ga laˇ ve le?

¹³ Awˬ viˉ awˬ nyi. Yaˬhoˉvaˬ ngaˬ hui htaꞈ nyi hkʼaˇ suh jaˇ ve tehꞈ, ngaˬ hui yonˍ gʼa tuˬ yawˇ awˬ viˉ awˬ nyi htaꞈ yehˇ ve yoˬ. Tawˇ pa haˉ te kʼo, ngaˬ hui awˬ gʼaˇ loˍ htaˇ, awˬ viˉ awˬ nyi ngaˬ hui htaꞈ awˬ gʼaˇ peꞈ laˇ tuˬ Gʼuiˬ sha yehˇ ve yoˬ. Aˍshaˆ miˬ guiˬ lo chehˇ ve awˬ viˉ awˬ nyi yaˇ miˇ teˇ gʼaˇ chi hkʼe ga piˇ ve htaꞈ gʼa ve yoˬ. Oˇ ve teˇ yanˇ yawˇ dawˇ haˍ jaˇ ve awˬ lawn gʼa hpuˇ ve yoˬ. Yawˇ kanˉ maˇ gʼa te˗o ve awˬ hkʼoˆ kaꞈ naˬ jaˇ ve yoˬ. Yawˇ ve awˬ hpawˇ venˇ baˆ uiˍ jaˇ ve htaꞈ te leh nyi haꞈ shaˉ paˍ maˇ gʼa te˗o. Yawˇ kʼoˆ ve, “aˬ htoꞈ ma pa taw awˬ lawn chi hkʼe ve ngaˬ gʼa hpuˇ ve naˍ maˇ na gʼa. Ngaˬ aˬ htoꞈ ma te yaꞈ ve le naˍ tehꞈ dawˇ leh Yaˬhoˉvaˬ nyi hkʼaˇ maˇ suh tuˬ te piˇ ve naˍ kaꞈ dawˇ la ve yoˬ.” Yaˬhoˉvaˬ yawˇ htaꞈ nyi hkʼaˇ suh ve tehꞈ yawˇ yonˍ gʼa tuˬ yawˇ Yaˬhoˉvaˬ geh bon lawˬ ve yoˬ. Gʼuiˬ sha hkʼaˬ hkʼe te ve le? Yawˇ kʼoˆ ve, “nyi haꞈ shaˉ paˍ ngaˬ geh yaw daꞈ leh Yaˬhoˉvaˬ ngaˬ htaꞈ hkʼaˬ htaˆ kaꞈ haꞈ ve tehꞈ yonˍ gʼa tuˬ ga laˇ ve yoˬ.” Peuˬ leh awˬ viˉ awˬ nyi yaˇ miˇ chi teˇ gʼaˇ Yaˬhoˉvaˬ yawˇ htaꞈ haꞈ chehˇ sheˍ ve tehꞈ shiˍ tuˬ yawˇ geh bon lawˬ ve yoˬ. Yawˇ kʼawꞈ kʼoˆ ve, “oˇ ve teˇ nyi awˬ viˉ awˬ nyi ngaˬ htaꞈ liꞈ bvuhꞈ laˇ ve yoˬ. Liꞈ chi ve ngaˬ gʼaw peuˬ hkʼawꞈ nawˉ, Yaˬhoˉvaˬ ngaˬ ve bon lawˬ hkawˇ htaꞈ hkʼawꞈ laˇ ve tehꞈ shiˍ ve yoˬ.” Yaˬhoˉvaˬ ngaˬ hui htaꞈ nyi hkʼaˇ suh ve tehꞈ yonˍ gʼa tuˬ yawˇ awˬ viˉ awˬ nyi htaꞈ cuˇ leh ngaˬ hui htaꞈ awˬ gʼaˇ peꞈ laˇ ve htaꞈ hkʼa tawˍ lehˆ gʼa mawˬ ve yoˬ.—Chiˇ mvuh ve 10:17.

14. Yaˬhoˉvaˬ ngaˬ hui htaꞈ nyi hkʼaˇ suh ve tehꞈ hpeuꞈ maw laˇ tuˬ awˬ nu ve teˇ ceuˬ lehˬ aˬ htoꞈ ma le?

 ¹⁴ Yaˬhoˉvaˬ ngaˬ hui htaꞈ nyi hkʼaˇ suh ve tehꞈ yonˍ gʼa tuˬ awˬ nu ve teˇ hkʼaˇ lehˬ, ngaˬ hui beˆ maˍ laˇ tuˬ loˍ htaˇ yawˇ awˬ viˉ awˬ nyi htaꞈ cuˇ ve yoˬ. Tawˇ pa haˉ te kʼo, awˉ lawˉ peuˇ ve teˇ co˗e htaˇ, Yaˬhoˉvaˬ tcuh yaˇ Pawˇluꞈ htaꞈ cuˇ leh awˬ viˉ awˬ nyi Hkriꞈ yaˇ htaꞈ liꞈ 14 puꞈ bvuhꞈ piˇ tcuh ve yoˬ. Liꞈ chi ve hkʼaw awˬ viˉ awˬ nyi htaꞈ beˆ maˍ piˇ ve htawˇ, haꞈ pehnˇ ve hkʼaw bvuhꞈ taˍ ve tehꞈ hpeuꞈ maw piˇ ve yoˬ. Aˬ htoꞈ ma te Yaˬhoˉvaˬ Pawˇluꞈ htaꞈ dawˇ pawnˍ piˇ leh liꞈ chi teˇ hpaˍ bvuhꞈ tcuh ve le? Awˬ lawn kʼo, Yaˬhoˉvaˬ lehˬ daꞈ jaˇ ve Awˬ pa hpehꞈ leh “awˬ pa lehˬ yawˇ haꞈ ve yaˇ paˍ htaꞈ deˇ maˍ piˇ ve hkʼe” Yaˬhoˉvaˬ yawˇ haꞈ ve yaˇ htaꞈ maˍ piˇ ve yoˬ. (Tawˇ naˉ ve 3:11, 12) Chi htaꞈ pa taw, Liꞈ hpu hkʼaw beˆ maˍ laˇ ve htaꞈ ngaˬ hui gʼa htaˇ, chi Yaˬhoˉvaˬ ngaˬ hui htaꞈ nyi hkʼaˇ maˇ suh ve tehꞈ kʼoˆ gaˇ ve maˇ heˆ. Chi Yaˬhoˉvaˬ ngaˬ hui htaꞈ haꞈ ve tehꞈ hpeuꞈ maw laˇ ve yoˬ. (Heˍbrehˇ 12:6) Yaˬhoˉvaˬ ngaˬ hui htaꞈ nyi hkʼaˇ suh ve tehꞈ aˬ htoꞈ ma hpeuꞈ maw laˇ sheˍ ve le?

YAˬHOˉVAˬ NGAˬ HUI HTAꞈ NYI HKʼAˇ SUH VE TEHꞈ SHAˉ HKIˆ GʼA MAWˬ VE

15. Yaˬhoˉvaˬ daꞈ kehˬ ve awˬ ha hpu a shu htaꞈ piˇ ve le? Leh chi ngaˬ hui yonˍ gʼa tuˬ aˬ htoꞈ ma te laˇ ve le?

¹⁵ Yaˬhoˉvaˬ yawˇ nyi hkʼaˇ suh ve chaw htaꞈ daꞈ kehˬ ve awˬ ha hpu piˇ ve yoˬ. (Maꞈhtehˍ 12:18) Ngaˬ hui a shu yawˇ awˬ to htaꞈ na nyi cawˇ ve, ‘ngaˬ a shaꞈ teꞈ kuiˬ hkʼaw Gʼuiˬ sha ve awˬ ha hpu ve awˬ shiˍ nawꞈ ve tehꞈ hpeuꞈ maw piˇ˗aw laˇ?’ Nawˬ Yaˬhoˉvaˬ htaꞈ maˇ shiˍ sheˍ htaˇ aꞈ kehˉ, chi teˇ hkui nawˬ awˬ nu ve chaw geh yeunˇ hkanˍ gʼaˇ ve htaꞈ mawˬ˗aw laˇ? Nawˬ Gʼuiˬ sha ve awˬ ha hpu ve awˬ shiˍ nawꞈ ve tehꞈ hpeuꞈ maw piˇ ve kʼo, Yaˬhoˉvaˬ nawˬ htaꞈ nyi hkʼaˇ suh jaˇ ve tehꞈ hpeuꞈ maw piˇ chehˇ ve yoˬ!—Awˇ ceˍ awˇ fa “ Awˬ ha hpu ve awˬ shiˍ nawꞈ ve teˇ hpaˍ lehˬ . . .”

16. Daꞈ ve awˬ lawn sha tanˇ hto toˇ tuˬ Yaˬhoˉvaˬ a shu htaꞈ yehˇ ve le? Leh chi nawˬ hkʼaˬ hkʼe dawˇ tuˬ te laˇ ve le? (1 Hteˇsaˍlawˇniˆ 2:4)

¹⁶ Yaˬhoˉvaˬ yawˇ nyi hkʼaˇ suh ve chaw htaꞈ ha lehˬ ve bon hkawˇ maˍ tcuh ve yoˬ. (1 Hteˇsaˍlawˇniˆ 2:4 gʼaw sheˍ.) Co˗seh˗lin awˬ nu ve chaw htaꞈ daꞈ ve awˬ lawn sha tanˇ hto maˍ piˇ htaˇ, aˬ htoꞈ ma awˬ bon gʼa ve htaꞈ teˇ geh nyi sheˍ. Teˇ nyi htaˇ Co˗seh˗lin mvuhˇ shawˉ tu la leh dawˇ maˇ jaˇ ve yoˬ. Yawˇ kʼoˆ ve, “ngaˬ Yaˬhoˉvaˬ htaꞈ te piˇ gʼa tuˬ teꞈ chiˉ maˇ cawˬ leh ngaˬ gʼuˇ suhˍ peuˍ ve te chehˇ ve tehꞈ dawˇ ve pa taw, yaꞈ nyi ngaˬ gʼa hto toˇ˗e cawˇ ve yoˬ. Hkʼe te leh, ngaˬ bon lawˬ peuˬ hkʼawꞈ nawˉ hto toˇ˗e ve yoˬ.” Oˇ ve teˇ nyi hkʼaw Co˗seh˗lin yaˇ miˇ Meh˗liˇ meh ve htaꞈ gʼa mawˬ daꞈ ve yoˬ. Yawˇ nyi ma daꞈ jaˇ. Yawˇ Co˗seh˗lin geh Liꞈ hpu henˇ tuˬ kʼoˆ piˇ ve yoˬ. Laiˉ ha pa peuˬ hkʼawꞈ nawˉ Meh˗liˇ Co˗seh˗lin htaꞈ kʼoˆ maˍ piˇ ve, chi awˬ gʼuˇ suhˍ htaˇ Gʼuiˬ sha ga laˇ tuˬ yawˇ bon lawˬ ve yoˬ. Peuˬ leh Co˗seh˗lin yehˬ miˉ ca htawˆ la ve yoˬ. Awˬ lawn chi ve htaꞈ dawˇ nyi htaˇ Co˗seh˗lin kʼoˆ ve,  “‘ngaˬ nawˬ htaꞈ nyi hkʼaˇ suh jaˇ’ ve tehꞈ Yaˬhoˉvaˬ kʼoˆ laˇ chehˇ ve htaꞈ shuˍ ve yoˬ.” Ngaˬ hui awˬ nu ve chaw htaꞈ Liꞈ hpu henˇ tuˬ jehˬ piˇ htaˇ, teˇ gʼaˇ le le dawˇ cawˇ ve maˇ heˆ. Ngaˬ hui coˇ caˇ leh awˬ nu ve chaw htaꞈ daꞈ ve awˬ lawn sha tanˇ hto maˍ piˇ htaˇ, Yaˬhoˉvaˬ ngaˬ hui htaꞈ nyi hkʼaˇ suh jaˇ ve tehꞈ yonˍ gʼa ve yoˬ.

17. Htaiˍ hkʼawꞈ ve htaꞈ caˉ daꞈ ve Venˇhkiˆ kʼoˆ ve tawˇ hkawˇ nawˬ htaꞈ hkʼaˬ hkʼe maˍ laˇ ve le? (Chiˇ mvuh ve 5:12)

¹⁷ Yaˬhoˉvaˬ yawˇ nyi hkʼaˇ suh ve chaw htaꞈ htaiˍ hkʼawꞈ piˇ tcuh ve awˬ hpfuhˇ hkʼawꞈ jaˇ. (1 Tiˆmoˉseˍ 2:5, 6) Ngaˬ hui htaiˍ hkʼawꞈ ve htaꞈ yonˍ leh Baˆtiˆsaˬ haꞈ yuˬ˗oˬ ve htawˇ, Gʼuiˬ sha ngaˬ hui htaꞈ nyi hkʼaˇ suh ve tehꞈ maˇ yonˍ gʼa sheˍ ve laˇ? Ngaˬ hui ve te hkʼaˇ dawˇ hkʼaˇ htaꞈ maˇ yonˍ gʼa ve tehꞈ tawnˇ taˍ sheˍ. Yaꞈ hkʼaˇ, ngaˬ hui Yaˬhoˉvaˬ htaꞈ yonˍ gʼa ve yoˬ. (Chiˇ mvuh ve 5:12 gʼaw sheˍ; Roˉmaꞈ 3:26) Htaiˍ hkʼawꞈ ve htaꞈ caˉ daꞈ ve dawˇ nyi ve lehˬ Venˇhkiˆ htaꞈ ga piˇ gʼa ve yoˬ. Teˇ nyi htaˇ Venˇhkiˆ htaiˍ hkʼawꞈ ve htaꞈ caˉ daꞈ ve hkʼa dehꞈ dawˇ nyi peuˬ hkʼawꞈ nawˉ yawˇ kʼoˆ ve, “Yaˬhoˉvaˬ ngaˬ htaꞈ hkʼaˬ htaˆ kaꞈ yeunˇ hkanˍ laˇ ve yoˬ. . . . Yaꞈ hkʼaˇ, ngaˬ te ve awˬ ceuˬ ‘Gʼuiˬ sha ngaˬ htaꞈ haꞈ laˇ ve maˇ lawꞈ sheˍ. Ngaˬ te ve venˇ baˆ htaꞈ Gʼuiˬ sha ve Yaˇ htaiˍ hkʼawꞈ laˇ ve kaꞈ maˇ lawꞈ sheˍ’ tehꞈ kʼoˆ piˇ chehˇ ve htaꞈ shuˍ ve yoˬ.” Htaiˍ hkʼawꞈ ve htaꞈ caˉ daꞈ ve hkʼa dehꞈ dawˇ nyi ve lehˬ, Venˇhkiˆ Yaˬhoˉvaˬ yawˇ htaꞈ haꞈ ve tehꞈ hkʼa dehꞈ shiˍ tuˬ ga piˇ ve yoˬ. Ngaˬ hui kaꞈ hkʼa shuˍ shuˍ, htaiˍ hkʼawꞈ ve htaꞈ caˉ daꞈ ve ngaˬ hui hkʼa dehꞈ dawˇ nyi htaˇ, Yaˬhoˉvaˬ ngaˬ hui htaꞈ haꞈ leh nyi hkʼaˇ suh ve tehꞈ yonˍ gʼa ve yoˬ.

18. Ngaˬ hui Yaˬhoˉvaˬ htaꞈ leuˉ leh haꞈ ve kʼo, aˬ htoꞈ ma awˬ lawn htaꞈ yonˍ gʼa ve le?

¹⁸ Awˬ lawn chi ve hkʼaw beˆ maˍ laˇ ve htaꞈ ngaˬ hui coˇ caˇ leh gʼaꞈ te tuˬ gʼa henˇ˗oˬ ve htawˇ, teˇ pawˆ pawˆ ngaˬ hui awˬ gʼaˇ nuˇ leh Yaˬhoˉvaˬ ngaˬ hui htaꞈ nyi hkʼaˇ suh ve laˇ tehꞈ, htawˇ dawˇ nawˬ dawˇ cawˬ sheˍ ve yoˬ. Chi hkʼe hpehꞈ ve kʼo, Yaˬhoˉvaˬ lehˬ ‘yawˇ htaꞈ haꞈ ve chaw htaꞈ haꞈ ve’ tehꞈ tawnˇ taˍ sheˍ. (Yaˍkoˆ 1:12) Chi htaꞈ pa taw, nawˬ coˇ caˇ leh Yaˬhoˉvaˬ geh meuˆ daꞈ tuˬ te leh yawˇ nawˬ htaꞈ nyi hkʼaˇ suh ve tehꞈ, hkʼaˬ hkʼe hpeuꞈ maw laˇ ve htaꞈ kaꞈ dawˇ nyi sheˍ. Yaˬhoˉvaˬ lehˬ “ngaˬ hui hkʼaˬ ve teˇ gʼaˇ htaꞈ htawˇ vuiˇ daꞈ ve maˇ heˆ.”—Tcuh yaˇ 17:27.