HPEHꞈ LAˬ JAW VE AWˬ LAWN
Ngaˬ hui “awˬ hpfuhˇ hkʼaˆ jaˇ ve piˉ ko˗eˍ shehnˉ” ca mawˬ ve
Vinˍtonˇ leh Hpaˍmehˍlaˇ (Hpehn) Hpenˬ Awˆsuh˗teˇriˇaˇ awˬ tcuhˆ puiˍ lo kanˉ te chehˇ ve yoˬ. Yawˇ hui ha lehˬ ve htawˇ, haˍ ve laiˉ ceuˬ gʼa hpuˇ jaw ve yoˬ. Chaw liˇ vaˇ liˇ maˇ shuˍ daꞈ ve pa taw gʼa pa leh, yaˇ kaꞈ shawˆ˗e ve yoˬ. Yaꞈ hkʼaˇ, yawˇ hui lehˬ Yaˬhoˉvaˬ, yawˇ ve chaw, leh yawˇ ve kanˉ htaꞈ hkʼaˬ htaˆ kaꞈ haꞈ ve yoˬ. Yawˇ hui gʼa hpuˇ ve awˬ lawn kʼoˆ maˍ laˇ tuˬ yoˬ.
Vinˍtonˇ˗oˬ, nawˬ awˬ tehˬ ve Gʼuiˬ sha htaꞈ hkʼaˬ hkʼe te ca mawˬ ve le?
Ngaˬ Awˆsuh˗teˇriˇaˇ mvuhˇ miˬ Hku˗iˉlehn venˇ heh hkʼaw lo uiˍ la ve yoˬ. Ngaˬ pa ngaˬ e bon htaꞈ maˇ yonˍ. Ngaˬ hui awˬ paˇ awˬ kui lo chaw maˇ chehˇ leh yehˬ kʼa hkʼaw ve chaw geh ceh gʼa yaw daꞈ ve yoˬ. Ngaˬ 12 hkʼawꞈ htaˇ, Gʼuiˬ sha htaꞈ tanˬ ca ve yoˬ. Ngaˬ yawˇ htaꞈ shiˍ gaˇ leh bon lawˬ ve yoˬ. Ngaˬ uiˍ la htaˇ, Aˬdeˬleˇdiˬ venˇ lo kanˉ ca te ve yoˬ. Ngaˬ 21 hkʼawꞈ htaˇ, ngaˬ Hpehn htaꞈ Siˆdaˬniˬ lo mawˬ daꞈ ve yoˬ. Yawˇ Biˆtenˬ˗Iˉsaˍreˍlaˆ meh ve bon awˬ moˍ teˇ moˍ ve awˬ lawn htaꞈ kʼoˆ maˍ laˇ ve yoˬ. Bon awˬ moˍ chi ve Eˍgaˍlanˍ chaw ceuˬ lehˬ Iˉsaˍreˍlaˆ chaw awˬ na hpawˇ 10 chaw ceuˬ geh laˬ ve tehꞈ yonˍ ve yoˬ. Hkʼe te leh ngaˬ Aˬdeˬleˇdiˬ venˇ lo kʼoꞈ˗e htaˇ, awˬ lawn chi kanˉ teˇ geh te ve chaw htaꞈ kʼoˆ maˍ piˇ ve yoˬ. Yawˇ Yaˬhoˉvaˬ ve Shaˉhkiˆhkanˍ ve chaw geh Liꞈ hpu tanˬ henˇ ve yoˬ. Yawˇ geh Shaˉhkiˆhkanˍ ve chaw ve awˬ lawn tawˇ yaw daꞈ ve hkʼaˬ nyiˇ naˍ riˍ maˇ gaˬ sheˍ htaˇ, Hpanˍ shehˍ hpaˇ leh yawˇ ve mvuhˇ miˬ htaꞈ caˉ daꞈ ve awˬ tehˬ ve htaꞈ ngaˬ shiˍ la ve yoˬ! Ngaˬ yaˇ ehˉ htaˇ bon lawˬ ve hkʼawꞈ laˇ˗oˬ. Ngaˬ “awˬ hpfuhˇ hkʼaˆ jaˇ ve piˉ ko˗eˍ shehnˉ” ca mawˬ ve yoˬ.—Maꞈhtehˍ 13:45, 46.
Hpehn˗oˬ, nawˬ kaꞈ yaˇ ehˉ htaˇ piˉ ko˗eˍ shehnˉ ca mawˬ ve maˇ heˆ laˇ? Nawˬ hkʼaˬ hkʼe te ca mawˬ ve le?
Ngaˬ Hkawˆ Ha˗beuˇ venˇ lo uiˍ la ve yoˬ. Ngaˬ pa ngaˬ e leh ngaˬ puˍ ngaˬ pi Biˆtenˬ˗Iˉsaˍreˍlaˆ meh ve bon awˬ moˍ hkʼaw chehˇ ve yoˬ. Gʼuiˬ sha Eˍgaˍlanˍ chaw htaꞈ shu aꞈ kehˉ a yeˇ yuˬ jaˇ ve tehꞈ yawˇ hui ngaˬ leh ngaˬ viˉ ngaˬ nyi htaꞈ maˍ laˇ ve yoˬ. Yaꞈ hkʼaˇ, ngaˬ hkʼa dehꞈ maˇ yonˍ leh Gʼuiˬ sha htaꞈ hkʼa dehꞈ maˇ shiˍ daꞈ sheˍ tehꞈ dawˇ ve yoˬ. Ngaˬ 14 hkʼawꞈ htaˇ, ngaˬ bon yehˬ laiˉ kaˬ lo kʼai ve yoˬ. Eˍgaˍlanˍ mvuhˇ miˬ awˬ moˍ, Iˉ kaˆ tuˍ ve awˬ moˍ, leh Hkawꞈ nyi awˬ moˍ kaꞈ ca nyi ve yoˬ. Yaꞈ hkʼaˇ, yawˇ hui ngaˬ Gʼuiˬ sha htaꞈ shiˍ daꞈ tuˬ ga laˇ maˇ gʼa.
Peuˬ hkʼawꞈ nawˉ ngaˬ hui ve yehˬ kʼa Siˆdaˬniˬ venˇ lo ca chehˇ ve yoˬ. Ngaˬ Vinˍtonˇ htaꞈ oˇ kaˬ lo mawˬ daꞈ ve yoˬ. Yawˇ kʼoˆ taˍ ve hkʼe, ngaˬ huiˉ maˬ bon awˬ tehˬ ve htaꞈ ca chehˇ ve pa taw, awˬ leh meuˇ htaˇ yawˇ Shaˉhkiˆhkanˍ ve chaw geh Liꞈ hpu tanˬ henˇ ve yoˬ. Peuˬ hkʼawꞈ nawˉ, yawˇ ngaˬ htaꞈ liꞈ bvuhꞈ laˇ htaˇ, Liꞈ hpu awˬ tawn laiˉ tawn cawˬ ve yoˬ! Awˉ lawˉ htaˇ ngaˬ kawˆ leh yawˇ htaꞈ beuꞈ ve yoˬ. Yaꞈ hkʼaˇ, yawˇ kʼoˆ laˇ ve chi awˬ tehˬ ve tehꞈ a yehˉ yehˉ shiˍ la ve yoˬ.
1962 hkʼawꞈ ngaˬ 18 hkʼawꞈ htaˇ, Vinˍtonˇ awˬ paˇ lo gʼa chehˇ tuˬ, ngaˬ kaꞈ Aˬdeˬleˇdiˬ venˇ lo ca chehˇ ve yoˬ. Yawˇ ngaˬ htaꞈ Shaˉhkiˆhkanˍ ve chaw teˇ ca geh chehˇ tcuh laˇ ve yoˬ. Yawˇ huiˉ maˬ Htoˉmaꞈ leh Cehˇniˆ Saꞈlawˬmanˇ meh ve leh Paˬpu˗a nuˇ iˇniˇ˗a lo miˍshenˍnaˍliˍ te jaw ve yoˬ. Yawˇ huiˉ maˬ nyi ma daꞈ jaˇ leh, ngaˬ co ha hpawˇ uiˍ la mvuh la gʼa tuˬ ga laˇ ve yoˬ. Ngaˬ kaꞈ Liꞈ hpu tanˬ henˇ leh awˬ tehˬ ve htaꞈ ca mawˬ˗oˬ tehꞈ ngaˬ yonˍ gʼa ve yoˬ. Ngaˬ leh Vinˍtonˇ heuˆ daꞈ peuˬ hkʼawꞈ nawˉ, Gʼuiˬ sha ve kanˉ teˇ geh tanˬ te ve yoˬ. Ngaˬ huiˉ maˬ haˍ ve laiˉ ceuˬ gʼa hpuˇ ve pa taw, piˉ ko˗eˍ shehnˉ ca mawˬ ve chi htaꞈ awˬ hpfuhˇ shiˍ jaˇ.
Vinˍtonˇ˗oˬ, nawˬ hui awˉ lawˉ htaˇ Yaˬhoˉvaˬ ve kanˉ te ve hkʼaˬ hkʼe kʼai ve a ciˉ kʼoˆ maˍ laˇ sheˍ.
A. Toˇ nyi shehˍ hpaˇ te htaˇ ca guiˇ˗e jaw ve awˬ ti
B. Liꞈ feu piˇ ve nehˉ tuˬ (Stamp) conˇ teˇ hpaˍ hkʼaw yehˇ ve (Kiˬriˬbaˬtiˬ leh Tuˬbaˬluˬ mvuhˇ miˬ lehˬ oˇ htaˇ kʼo Ginˍbeuˍ leh Eˍliˆ conˇ tehꞈ kuˬ ve)
C. Tuˬbaˬluˬ mvuhˇ miˬ hkʼaw cawˬ ve daꞈ jaˇ ve conˇ Fuˬnaˬfuꞈtiˆ meh ve. Miˍshenˍnaˍliˍ maˇ cawˬ sheˍ htaˇ kaꞈ oˇ kaˬ lo ve awˬ viˉ awˬ nyi geh ca guiˇ˗e jaw ve
Hpehn leh ngaˬ heuˆ daꞈ peuˬ hkʼawꞈ nawˉ maˇ maw, ngaˬ hui htaꞈ Yaˬhoˉvaˬ “kʼehˬ jaˇ ve yehˬ miˉ” laiˉ maˬ hpaw laˇ ve yoˬ. (1 Kawˇrenˍhtuˆ 16:9) Awˬ viˉ awˬ nyi Cehˆ Hpaw˗teuˇ yehˬ miˉ awˉ lawˉ teˇ maˬ ngaˬ hui htaꞈ kʼoˆ maˍ laˇ ve yoˬ. Oˇ teˇ yanˇ, yawˇ ngaˬ hui ve toˇ nyi shehˍ hpaˇ hpehꞈ ve yoˬ. (Chi teˇ hkui yawˇ Awˆsuh˗teˇriˇaˇ awˬ tcuhˆ puiˍ lo ve Kawˍmiˍtiˍ hkʼaw kanˉ te ve yoˬ.) Ngaˬ hui hkʼaˬ htaˆ kaꞈ gʼuˇ suhˍ peuˍ ve te tuˬ, Cehˆ leh yawˇ ve awˬ miˇ ma Roˉsaꞈliˍ awˬ gʼaˇ peꞈ laˇ ve yoˬ. Ngaˬ hui gʼuˇ suhˍ peuˍ ve 5 hkʼawꞈ te ve yoˬ. Ngaˬ 29 hkʼawꞈ htaˇ, toˇ nyi shehˍ hpaˇ tanˬ te ve yoˬ. Paˬciˬfeˆ Awˬ naˬ hpawˇ Laˇ tsuhˇ laˉ shaˆ gʼuiˬ hkʼaw ve conˇ laiˉ kaˬ lo ca guiˇ˗e ve yoˬ. Tawˇ pa haˉ te kʼo, Fiˬjiˬ, Aˍmeˬriˆkaꞈ Saˬmoˇaˇ, Saˬmoˇaˇ, Kiˬriˬbaˬtiˬ, Nawˬruˆ, neuˇ˗aˆ, Toˬkeˬlaˇ˗uˆ, Tonˬgaˬ, Tuˬbaˬluˬ, leh Veˬnuˆ˗a tuˬ conˇ lo kʼai ve yoˬ.
Awˬ yanˇ oˇ ve teˇ yanˇ htaˇ, vuiˇ jaˇ kuiˬ conˇ hkʼaw ve chaw Yaˬhoˉvaˬ ve Shaˉhkiˆhkanˍ ve chaw htaꞈ htawˇ dawˇ nawˬ dawˇ cawˬ ve yoˬ. Ngaˬ hui cuˇ yiˍ cawˬ ve hkʼaw yawˇ hui geh ca guiˇ˗e cawˇ ve yoˬ. (Maꞈhtehˍ 10:16) Hkriꞈ yaˇ awˬ moˍ hkʼaw chaw maˇ maˇ leh, teˇ kaˬ kaˬ kʼo haˉ kuiˬ maˇ cawˬ. Hkʼe te leh teˇ pawˆ pawˆ kʼo hkʼaˆ yaˇ geh haˉ tuˬ lawˬ ve yoˬ. Yawˇ hui shiˍ puiˉ jaˇ.
Vinˍtonˇ˗oˬ, nawˬ liꞈ yuˬ tawˆ ve kanˉ dawˇ cawˇ ve maˇ heˆ laˇ? Aˬ htoꞈ ma pa taw le?
Saˬmoˇaˇ mvuhˇ miˬ chehˇ htaˇ, Vinˍtonˇ nyi haꞈ shaˉ paˍ liꞈ henˇ yehˬ hkʼaw maˍ ve
Oˇ htaˇ, awˬ viˉ awˬ nyi Tonˬgaˬ conˇ lo chehˇ ve yawˇ hui ve chaw ceuˬ tawˇ hkawˇ hkʼaw liꞈ kʼoˆ ehˉ maˇ cawˬ maˇ sheˍ. Hto toˇ˗e htaˇ, kaˇ laˇ hkawˇ Awˬ tehˬ ve lehˬ Co co taiˍ taiˍ a shaꞈ gʼa tuˬ shehˍ kʼai laˇ ve liꞈ kʼoˆ gʼa yehˇ ve yoˬ. Hkʼe te leh nyi haꞈ shaˉ paˍ ve liꞈ henˇ yehˬ cawˬ htaˇ, nyi haꞈ shaˉ paˍ 3 gʼaˇ kaˇ laˇ hkawˇ a ciˉ ceh shiˍ ve, yawˇ hui liꞈ kʼoˆ oˇ ve Tonˬgaˬ hkawˇ yuˬ tawˆ tuˬ kanˉ chi htaꞈ haꞈ yuˬ ve yoˬ. Hpehn liꞈ kʼoˆ oˇ ve htaꞈ htawˆ tawˆ leh liꞈ kʼoˆ te tawˆ la gʼa tuˬ Aˍmeˬriˆkaꞈ awˬ tcuhˆ puiˍ lo feu piˇ ve yoˬ. Kanˉ chi te ve awˬ yanˇ 2 ha pa ceh yehˇ ve yoˬ. Liꞈ yuˬ tawˆ ve hkʼa dehꞈ maˇ daꞈ ve htawˇ, liꞈ kʼoˆ chi Tonˬgaˬ chaw laiˉ gʼaˇ awˬ tehˬ ve htaꞈ henˇ tuˬ ga piˇ ve yoˬ. Ngaˬ leh Hpehn liꞈ yuˬ tawˆ ve chaw maˇ hpehꞈ ve htawˇ, kanˉ chi htaꞈ dawˇ cawˇ ve yoˬ.
Hpehn˗oˬ, Awˆsuh˗teˇriˇaˇ mvuhˇ miˬ leh conˇ hkʼaw chehˇ ve hkʼaˬ hkʼe te peun daꞈ ve le?
Toˇ nyi shehˍ hpaˇ te htaˇ chi hkʼe ve hkʼaw kaꞈ haˉ jaw ve
Peun daꞈ jaˇ! Puiˉ cheꞈ jaˇ, haw chiˆ haw moꞈ hpehꞈ ve, faˆ kaꞈ peh jaˇ. A naˍ laiˉ ceuˬ cawˬ leh, teˇ pawˆ pawˆ kʼo caˇ tuˬ maˇ lawꞈ. Ngaˬ hui ve yehˬ zuhˇ yehˬ hpehꞈ leh gʼoꞈ pa kaꞈ maˇ cawˬ. Yaꞈ hkʼaˇ, teˇ nyi le le mvuhˇ hpeuꞈ la htaˇ, ngaˬ hui yehˬ hkʼaw mui leh laˇ tsuhˇ gʼuiˬ hpawˇ lo nyi peu htaˇ, nyi ma sha jaˇ. Ha pa laˇ tsuhˇ gʼuiˬ htaꞈ awˬ gʼeuˆ hte leh maꞈ paoˍ cehˬ ve aˉ gʼuiˬ ha htaꞈ kaꞈ mawˬ ve yoˬ. Ngaˬ hui chi hkʼe ve htaꞈ mawˬ htaˇ hkʼa dehꞈ dawˇ nyi leh bon lawˬ gaˇ tuˬ te laˇ leh, maˇ daꞈ ve awˬ ceuˬ htaꞈ maˇ dawˇ nyi leh daꞈ ve awˬ ceuˬ htaꞈ tiˉ dawˇ nyi tuˬ ga laˇ ve yoˬ.
Ngaˬ hui oˇ kaˬ lo ve yaˇ geh chehˇ ve kaꞈ dawˇ cawˇ jaˇ. Ngaˬ hui kaˇ laˇ hpu hpehꞈ ve pa taw, yawˇ hui kaꞈ ngaˬ hui geh chehˇ gaˇ ve yoˬ. Ngaˬ hui neuˇ˗aˆ conˇ hkʼaw ve Hkriꞈ yaˇ awˬ moˍ geh ca guiˇ˗e htaˇ, yaˇ paˍ teˇ gʼaˇ Vinˍtonˇ ve laꞈ sheh awˬ mvuh maˇ jaˇ leh ca shoˆ nyi la leh kʼoˆ ve, “ngaˬ nawˬ ve ngaˆ mvuh htaꞈ dawˇ cawˇ jaˇ.” Yawˇ laꞈ sheh awˬ mvuh maˇ jaˇ ve htaꞈ maˇ mawˬ jaw ve pa taw, hkʼaˬ hkʼe kʼoˆ tuˬ naˍ maˇ shiˍ ve yoˬ hehˉ!
Oˇ kaˬ lo ve chaw haˍ gʼawˇ jaˇ leh ngaˬ hui gʼa mawˬ htaˇ nyi ma maˇ sha. Awˬ paˇ awˬ kui lo daꞈ jaˇ ve htawˇ, iˉ kaˆ dawˬ tuˬ maˇ lawꞈ leh naˆ tsuhˇ gu kuiˬ kaꞈ maˇ lawꞈ. Yaꞈ hkʼaˇ awˬ viˉ awˬ nyi maˇ dawˇ haˍ. Yawˇ hui yehˬ kʼa hkʼaw hkʼa geh gʼa chehˇ leh, hpawnˬ daꞈ leh Yaˬhoˉvaˬ htaꞈ chiˇ mvuh kuiˬ cawˬ ve ceh kaꞈ ha lehˬ jaˇ. A shaꞈ teꞈ hkʼaˇ cawˇ lawꞈ dawˬ lawꞈ te leh Gʼuiˬ sha ve mvuhˇ miˬ htaꞈ awˉ lawˉ te tuˬ ve awˬ hkʼaˇ yawˇ hui ngaˬ hui htaꞈ maˍ laˇ ve yoˬ.
Hpehn˗oˬ, teˇ pawˆ pawˆ kʼo nawˬ iˉ kaˆ leh caˇ tuˬ a shu yawˇ hkʼaˇ gʼa ca ve yoˬ leˇ? Nawˬ hkʼaˬ hkʼe te gʼa ve le?
Tonˬgaˬ mvuhˇ miˬ lo Hpehn mawˇ tsuhˇ ve
Ngaˬ pa ngaˬ htaꞈ laiˉ ceuˬ maˍ laˇ ve ha lehˬ jaˇ. Aˬ miˍ ceh leh awˬ chiˇ awˍ te tuˬ awˬ hkʼaˇ leh mawˇ hkʼa dehꞈ pehˇ yehˇ tuˬ awˬ hkʼaˇ kaꞈ maˍ laˇ ve yoˬ. Kiˬriˬbaˬtiˬ conˇ hkʼaw ve Hkriꞈ yaˇ awˬ moˍ geh ca guiˇ˗e htaˇ, zuhˇ yehˬ vaˇ hpiˇ ko˗aˍ ve hkʼaw haˉ ve yoˬ. Awˬ chiˇ te tuˬ, ngaˬ miˬ kʼoˍ duˇ leh maꞈ paoˍ guiˬ kʼuˉ yuˬ leh aˬ miˍ ceh ve yoˬ. Hkʼaˆ hkʼaw ve yaˇ miˇ hkʼaˇ suh kʼai leh nanˬ bawˍ hkʼaw iˉ kaˆ hkʼo˗e ve yoˬ. Yawˇ hui pfuhˇ kʼoˍ htaꞈ hpeh taˍ ve aˉ hkeh htaꞈ cawˬ leh iˉ kaˆ nyiˉ yuˬ tuˬ nanˬ bawˍ hkʼaw baˬ keu leh jawˆ nyiˉ yuˬ ve yoˬ. Nyi˗a kʼo sha jaˇ ve htawˇ, ngaˬ te˗a nyi htaˇ te maˇ gʼa! Ngaˬ ve pfuhˇ kʼoˍ iˉ kaꞈ hkʼaw maˇ loꞈ˗e laˇ. Teˇ gʼaˇ le le gʼuiˬ peuˬ hkʼawꞈ nawˉ teˇ gʼaˇ ngaˬ htaꞈ ga laˇ ve yoˬ. Yawˇ hui shiˍ puiˉ jaˇ leh hkʼaˬ htaˆ kaꞈ ga laˇ ve yoˬ.
Nawˬ hui conˇ hkʼaw ve awˬ vuiˬ dawˇ cawˇ jaˇ ve maˇ heˆ laˇ? Nawˬ tawnˇ gʼa sheˍ ve awˬ lawn aˬ htoꞈ ma cawˬ sheˍ ve le?
Vinˍtonˇ: Yawˇ hui ve chaw liˇ vaˇ liˇ htaꞈ shiˍ tuˬ awˬ yanˇ gʼa yehˇ ve yoˬ. Tawˇ pa haˉ te kʼo, awˬ viˉ awˬ nyi ngaˬ hui htaꞈ awˬ chiˇ te laˇ htaˇ, yawˇ hui cawˬ taˍ ve hkʼa peu˗eˬ te laˇ ve yoˬ. Awˉ lawˉ htaˇ, yawˇ hui htaꞈ gʼa teh˗aˉ piˇ ve ngaˬ hui maˇ shiˍ. Yawˇ hui gu laˇ ve hkʼa peu˗eˬ caˇ peuˬ ve yoˬ! Peuˬ hkʼawꞈ nawˉ shiˍ˗oˬ htaˇ, yawˇ hui awˬ pon kaꞈ gʼa teh˗aˉ piˇ ve yoˬ. Ngaˬ hui maˇ shiˍ ve htaꞈ yawˇ hui na gʼa ve yoˬ. 6 ha pa kʼo teˇ pawˆ yawˇ hui htaꞈ gʼa mawˬ daꞈ ve yawˇ hui ha lehˬ jaˇ. Ngaˬ hui htaꞈ maˇ heˆ kʼo yawˇ hui awˬ kaˍ awˬ nu ve awˬ viˉ awˬ nyi htaꞈ maˇ mawˬ jaw.
Neuˇ˗aˆ conˇ lo ca guiˇ˗e htaˇ, awˬ viˉ awˬ nyi geh teˇ geh hto toˇ˗e ve
Ngaˬ hui Hkriꞈ yaˇ awˬ moˍ hkʼaw ca kʼawꞈ guiˇ la htaˇ, hkʼaˆ yaˇ awˬ pon kaꞈ awˬ bon cawˬ jaˇ. Awˬ viˉ awˬ nyi ve bon yawˇ hui hkʼaˇ yawˇ hui dawˇ leh te ve tehꞈ hkʼaˆ yaˇ laiˉ gʼaˇ kʼoˆ ve yoˬ. Hkʼe te leh shu mvuhˇ miˬ lo laˬ ve Shaˉhkiˆhkanˍ ve chaw teˇ ca awˬ viˉ awˬ nyi geh ca guiˇ la htaˇ, yawˇ hui hkʼaˇ yawˇ hui dawˇ tawˆ leh te˗aˍ ve maˇ heˆ tehꞈ hkʼaˆ yaˇ shiˍ la ve yoˬ.
Hpehn: Ngaˬ hui Kiˬriˬbaˬtiˬ conˇ hkʼaw ve Hkriꞈ yaˇ awˬ moˍ geh ca guiˇ˗e htaˇ ve awˬ lawn hkʼa dehꞈ tawnˇ gʼa ve yoˬ. Oˇ kaˬ lo awˬ viˉ awˬ nyi maˇ maˇ leh nyi haꞈ shaˉ paˍ teˇ gʼaˇ tiˉ cawˬ ve yoˬ Yawˇ I˗tin˗Iˉkai Ma˗tehˇraˆ meh leh ngaˬ hui htaꞈ nyi haꞈ shaˉ laˇ daꞈ jaˇ. Teˇ nyi htaˇ, yawˇ ngaˬ hui geh ca guiˇ la leh yawˇ ve hkʼawˍ lawˇ hkʼaw gʼaˆ u 1 shiˍ tiˉ cawˬ ve yoˬ. Yawˇ kʼoˆ ve, “chi nawˬ awˬ pon yoˬ.” Oˇ htaˇ lehˬ gʼaˆ u ca haˍ jaˇ. Yawˇ te laˇ ve chi ngaˬ hui nyi ma hkʼaw gaˬ jaˇ.
Hpehn˗oˬ, nawˬ yaˇ shawˆ˗e jaw ve maˇ heˆ laˇ? Nawˬ nyi ma luˬ˗aˬ laˇ?
1973 hkʼawꞈ Paˬciˬfeˆ Awˬ naˬ hpawˇ Laˇ tsuhˇ laˉ shaˆ gʼuiˬ hkʼaw ve conˇ lo chehˇ htaˇ ngaˬ yaˇ hu ve yoˬ. Awˆsuh˗teˇriˇaˇ mvuhˇ miˬ lo kʼoꞈ˗e tuˬ ngaˬ hui dawˇ cheˆ ve yoˬ. Yaꞈ hkʼaˇ, 4 ha pa gaˬ leh ngaˬ yaˇ shawˆ˗e laˇ ve yoˬ. Ngaˬ leh Vinˍtonˇ kaꞈ nyi ma luˬ jaˇ. Awˬ yanˇ maw la htaˇ nyi ma sha la ve htawˇ, hkʼa dehꞈ maˇ sha sheˍ. Yaꞈ hkʼaˇ, Shaw nyi kuiˬ Taꞈ yehˬ Ha pa 4 maˬ 15 nyi 2009 hkʼawꞈ “Gʼaw ve chaw na nyi hkawˇ” ve awˬ lawn ngaˬ htaꞈ ga laˇ jaˇ. Oˇ kaˬ lo kʼoˆ taˍ ve, “yaˇ awˬ e gʼoˇ peˬ hkʼaw suh˗e ve kʼo, kʼawꞈ teꞈ tu la gʼa˗aw laˇ?” Awˬ lawn oˇ ve hkʼaw kʼoˆ ve, hkʼaˬ hkʼe te tuˬ Yaˬhoˉvaˬ dawˇ cheˆ gʼa leh yawˇ hkʼaˬ htaˆ kaꞈ cawˇ ve htaꞈ tiˉ te ve yoˬ. Yaˬhoˉvaˬ yawˇ ve Yaˇ hpu htaꞈ cuˇ leh “neˇ haiˬ ve kanˉ teˇ hpaˍ htaꞈ te luˬ” leh, haiˬ ve miˬ guiˬ chi htaꞈ pa taw nyi ma luˬ ve chaw htaꞈ Yaˬhoˉvaˬ nyi ma sha la tcuh tuˬ yoˬ. (1 Yoˇhanˬ 3:8) Awˬ lawn chi ngaˬ hui htaꞈ maˍ laˇ ve, Yaˬhoˉvaˬ yawˇ ve chaw htaꞈ peꞈ laˇ ve “piˉ ko˗eˍ shehnˉ” lehˬ awˬ hpfuhˇ hkʼaˆ jaˇ! Gʼuiˬ sha ve Mvuhˇ miˬ dawˇ law kuiˬ maˇ cawˬ ve kʼo, ngaˬ hui teꞈ chiˉ kaꞈ te maˇ gʼa.
Yaˇ shawˆ peuˬ hkʼawꞈ nawˉ, ngaˬ hui Gʼuiˬ sha ve kanˉ awˬ yanˇ hkʼa biˇ teˇ pawˆ kʼawꞈ te ve yoˬ. Awˉ lawˉ htaˇ ngaˬ hui Awˆsuh˗teˇriˇaˇ Beˍteˍlaˆ hkʼaw kanˉ te leh, peuˬ hkʼawꞈ nawˉ toˇ nyi shehˍ hpaˇ teˇ pawˆ kʼawꞈ te ve yoˬ. 1981 hkʼawꞈ Neuˇ Saoˉ Venˍ leh Siˆdaˬniˬ venˇ lo toˇ nyi shehˍ hpaˇ 4 hkʼawꞈ te peuˬ hkʼawꞈ nawˉ, Awˆsuh˗teˇriˇaˇ Beˍteˍlaˆ hkʼaw ngaˬ hui awˬ vuiˬ awˬ suhˉ kʼawꞈ gʼa leh chi teˇ hkui hkʼa gaˬ kaꞈ chehˇ sheˍ ve yoˬ.
Vinˍtonˇ˗oˬ, Paˬciˬfeˆ Awˬ naˬ hpawˇ Laˇ tsuhˇ laˉ shaˆ gʼuiˬ hkʼaw ve conˇ lo chehˇ htaˇ ve awˬ vuiˬ chi nawˬ Awˬ tcuhˆ puiˍ Kawˍmiˍtiˍ hkʼaw kanˉ te ve htaꞈ ga laˇ ve laˇ?
Ga laˇ ve yoˬ. Awˉ lawˉ htaˇ, Uˉ peunˍ ve Kawˍmiˍtiˍ Awˆsuh˗teˇriˇaˇ ve awˬ tcuhˆ puiˍ Saˬmoˇaˇ conˇ htaꞈ nyi haꞈ shaˉ tcuh ve yoˬ. Peuˬ hkʼawꞈ nawˉ Nuˇziˬlehˬ ve awˬ tcuhˆ puiˍ leh Awˆsuh˗teˇriˇaˇ ve awˬ tcuhˆ puiˍ teˇ kaˬ tiˉ te ve yoˬ. Chi beuꞈ, Awˆsuh˗teˇriˇaˇ ve awˬ tcuhˆ puiˍ lehˬ Awˆsuh˗teˇriˇaˇ, Aˍmeˬriˆkaꞈ Saˬmoˇaˇ, Saˬmoˇaˇ, Hkuˆ conˇ, Nuˇziˬlehˬ, neuˇ˗aˆ, Tiˬmawˇ Lehˆ, Toˬkeˬlaˇ˗uˆ, leh Tonˬgaˬ mvuhˇ miˬ htaꞈ nyi haꞈ shaˉ chehˇ ve yoˬ. Ngaˬ kaꞈ laiˉ mvuhˇ miˬ hkʼaw ve awˬ viˉ awˬ nyi geh ca guiˇ˗e gʼa ve yoˬ. Conˇ hkʼaw ve awˬ viˉ awˬ nyi ka tiꞈ yeˬ ve geh ngaˬ Gʼuiˬ sha ve kanˉ teˇ geh te jaw ve lehˬ chi teˇ hkui yawˇ hui awˬ pon kanˉ hkʼa dehꞈ te piˇ tuˬ ga laˇ gʼa ve yoˬ.
Vinˍtonˇ leh Hpehn Awˆsuh˗teˇriˇaˇ awˬ tcuhˆ puiˍ hkʼaw chehˇ ve
Ngaˬ leh Hpehn gʼa hpuˇ ve awˬ ceuˬ ngaˬ hui htaꞈ maˍ laˇ ve, chaw mawˇ ceh tiˉ Gʼuiˬ sha htaꞈ ca ve maˇ heˆ. Yaˇ nehˬ kaꞈ “awˬ hpfuhˇ hkʼaˆ jaˇ ve piˉ ko˗eˍ shehnˉ” htaꞈ ca gaˇ ve yoˬ. Yehˬ kʼa hkʼaw ve chaw a yeˇ maˇ yuˬ ve htawˇ kaꞈ. (2 Jawˇmawˇ 5:2, 3; 2 Raˍsaˍvanˍ 34:1-3) Yaˬhoˉvaˬ lehˬ haꞈ pehnˇ ve Gʼuiˬ sha hpehꞈ leh, yaˇ nehˬ, chaw mawˇ maˇ kʼoˆ, teˇ gʼaˇ le le co co taiˍ taiˍ ve a shaꞈ gʼa tcuh gaˇ ve yoˬ!
Peuˬ laˬ ve 50 hkʼawꞈ ngaˬ leh Hpehn Gʼuiˬ sha htaꞈ tanˬ ca ve teˇ yanˇ, ngaˬ hui aˬ htoꞈ ma ca mawˬ tuˬ naˍ maˇ shiˍ. Gʼuiˬ sha ve Mvuhˇ miˬ awˬ tehˬ ve lehˬ awˬ hpfuhˇ hkʼaˆ jaˇ ve piˉ ko˗eˍ shehnˉ hpehꞈ ve yoˬ! Ngaˬ hui piˉ ko˗eˍ shehnˉ chi htaꞈ maˇ baˬ taˬ!
