1. Eˇfeˇsuꞈ liꞈ 6:10-13 hkʼaw Yaˬhoˉvaˬ ngaˬ hui htaꞈ dawˇ haˍ ve daꞈ jaˇ ve awˬ hkʼaˇ teˇ hkʼaˇ lehˬ aˬ htoꞈ ma le? Kʼoˆ maˍ laˇ sheˍ.

 Yaˬhoˉvaˬ ngaˬ hui htaꞈ dawˇ haˍ ve daꞈ jaˇ ve awˬ hkʼaˇ teˇ hkʼaˇ lehˬ canˇ paˍ htaꞈ tawˍ daꞈ gʼaˇ tuˬ ga laˇ ve yoˬ. Ngaˬ hui ve canˇ paˍ lehˬ Saˍtanˍ leh neˇ teˇ hpaˍ yoˬ. Canˇ paˍ chi teˇ hpaˍ ve awˬ lawn Yaˬhoˉvaˬ ngaˬ hui htaꞈ shaˍ tiꞈ peꞈ laˇ leh ngaˬ hui neˇ haiˬ htaꞈ tawˍ daꞈ gʼaˇ tuˬ ngaˬ hui loˍ ve yawˇ peꞈ laˇ ve yoˬ. (Eˇfeˇsuꞈ 6:10-13 gʼaw sheˍ) Ngaˬ hui Yaˬhoˉvaˬ htaꞈ ga laˇ tcuh leh yawˇ htaꞈ gʼaˇ hkʼa dehꞈ va ve kʼo, ngaˬ hui neˇ haiˬ htaꞈ tawˍ daꞈ gʼaˇ tuˬ yoˬ. Pawˇluꞈ hkʼa shuˍ ngaˬ hui hkʼa dehꞈ yonˍ gʼa leh yawˇ kʼoˆ ve, “Gʼuiˬ sha ngaˬ hui hpawˇ chehˇ ve kʼo, a shu ngaˬ hui htaꞈ tawˍ daꞈ hpehꞈ tuˬ le?”—Roˉmaꞈ 8:31.

2. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

² Awˬ tehˬ ve Hkriꞈ yaˇ lehˬ Saˍtanˍ leh neˇ teˇ hpaˍ htaꞈ a yeˇ hkʼe taw maˇ yuˬ. Ngaˬ hui a yeˇ yuˬ ve lehˬ Yaˬhoˉvaˬ htaꞈ caˉ daꞈ ve awˬ lawn henˇ ve leh yawˇ ve kanˉ te ve yoˬ. (Chiˇ mvuh ve 25:5) Yaꞈ hkʼaˇ, Saˍtanˍ yehˇ ve awˬ hkʼaˇ teˇ hpaˍ hpaˍ ngaˬ hui gʼa shiˍ cawˇ ve yoˬ. Aˬ htoꞈ ma pa taw le? Ngaˬ hui htaꞈ maˇ gʼa heˍ tuˬ yoˬ. (2 Kawˇrenˍhtuˆ 2:11) Awˬ lawn chi ve hkʼaw Saˍtanˍ leh neˇ teˇ hpaˍ yehˇ leh chaw yaˇ htaꞈ heˍ ve awˬ hkʼaˇ ngaˬ hui henˇ tuˬ yoˬ. Ngaˬ hui hkʼaˬ hkʼe te tawˍ daꞈ gʼaˇ tuˬ kaꞈ henˇ tuˬ yoˬ.

3-4. (a) Neˇ teˇ hpaˍ aˬ htoꞈ ma le? (b) Neˇ teˇ hpaˍ htaꞈ hkʼaˬ hkʼe taw shiˍ leh yonˍ ve le?

³ Saˍtanˍ leh yawˇ ve awˬ laꞈ gʼawˇ hui, chaw yaˇ htaꞈ heˍ ve teˇ hkʼaˇ lehˬ neˇ teˇ hpaˍ htaꞈ caˉ daꞈ ve awˬ hkʼaˇ yoˬ. Neˇ teˇ hpaˍ htaꞈ caˉ daꞈ ve chaw lehˬ chaw yaˇ maˇ shiˍ leh te maˇ gʼa ve awˬ ceuˬ yawˇ hui  shiˍ leh te gʼa ve tehꞈ kʼoˆ ve yoˬ. Tawˇ pa haˉ te kʼo, teˇ hpaˍ hpaˍ kʼo awˬ gʼuˇ suhˍ hpawˇ ve awˬ lawn htaꞈ shiˍ tuˬ, awˬ hkʼawꞈ awˬ nyi leh laꞈ hkʼaˇ nyi gʼa ve tehꞈ kʼoˆ ve yoˬ. Awˬ nu ve chaw teˇ hpaˍ yawˇ hui suh peuˬ ve chaw htaꞈ tawˇ yaw daꞈ gʼa ve hkʼe te ve yoˬ. Chaw teˇ hpaˍ hpaˍ faˍ te ve, mawˉ nyi ve, leh shu htaꞈ kaꞈ hkeu piˇ ve yoˬ. *

⁴ Neˇ teˇ hpaˍ ve kanˇ paˆ htaꞈ hkʼaˬ hkʼe taw taw shiˍ leh yonˍ ve le? 18 mvuhˇ miˬ Laˍtinˍ, Aˍmeˬriˆkaꞈ leh Kaˬriˆbiˬyanˬ hkʼaw chaˬ nyi tehˆ nyi mawˬ ve, 3 gʼaˇ ve hkʼaw 1 gʼaˇ yonˍ ve mawˉ nyi ve, faˍ te ve, maˇ heˆ leh shaˉ hpehˇ pehˍ ve awˬ tehˬ cawˬ ve tehꞈ kʼoˆ ve yoˬ. Leh suh˗oˬ ve chaw htaꞈ tawˇ yaw daꞈ gʼa ve tehꞈ chaw yaˇ teˇ pun tawˬ teˇ pun yonˍ ve yoˬ. 18 mvuhˇ miˬ hkʼaw Aˍfaˍriˆkaˆ miˬ guiˬ awˬ hawˉ hpawˇ lo kaꞈ teˇ maˬ kʼawꞈ chaˬ nyi mawˬ ve yoˬ. Oˇ kaˬ lo maˇ˗awˍ ve chaw mawˉ nyi ve awˬ tehˬ cawˬ ve tehꞈ yonˍ ve yoˬ. Ngaˬ hui hkʼaˬ kaˬ lo chehˇ ve htawˇ, neˇ teˇ hpaˍ htaꞈ shaˍ tiꞈ gʼa te ve yoˬ. Awˬ tehˬ kʼo, Saˍtanˍ coˇ caˇ lehˬ “miˬ guiˬ yaˇ hkʼa peu˗eˬ” htaꞈ heˍ ve yoˬ.—Hpeuꞈ maˍ ve 12:9.

5. Neˇ teˇ hpaˍ htaꞈ Yaˬhoˉvaˬ hkʼaˬ hkʼe dawˇ ve le?

⁵ Yaˬhoˉvaˬ lehˬ “ka tiꞈ yeˬ ve Gʼuiˬ sha hpehꞈ ve yoˬ.” (Chiˇ mvuh ve 31:5) Hkʼe kʼo neˇ teˇ hpaˍ htaꞈ caˉ daꞈ ve yawˇ hkʼaˬ hkʼe dawˇ ve le? Yawˇ nyi bawˬ jaˇ! Yaˬhoˉvaˬ Iˉsaˍreˍlaˆ chaw htaꞈ kʼoˆ piˇ ve, “nawˬ hui ve tuˉ tanˇ kuiˬ hkʼoˆ lo, nawˬ hui ve yaˇ teˇ hpaˍ htaꞈ maˇ gʼa tuˉ tanˇ piˇ. Nawˬ hui ve chaw teˇ hpaˍ htaꞈ htawˇ, neˇ maˇ gʼa te tcuh. Maˇ gʼa mawˉ nyi tcuh. Faˍ maˇ gʼa te tcuh. Suh peuˬ ve chaw htaꞈ tawˇ na nyi ve, chi hkʼe ve teˇ hpaˍ kaꞈ maˇ gʼa te tcuh. Chi hkʼe te ve chaw hui htaꞈ Gʼuiˬ sha canˇ ve yoˬ.” (Bon maˍ ve 18:10-12) Yaˬhoˉvaˬ Iˉsaˍreˍlaˆ chaw htaꞈ awˬ liˇ tawˇ hkawˇ piˇ taˍ ve awˬ hawˉ lo Hkriꞈ yaˇ maˇ kʼawꞈ chehˇ˗o. Yaꞈ hkʼaˇ, neˇ teˇ hpaˍ htaꞈ canˇ ve awˬ hkʼaˇ, yawˇ maˇ pa jaw tehꞈ ngaˬ hui shiˍ ve yoˬ.—Maˍlaˍhkiˆ 3:6.

6. (a) Saˍtanˍ neˇ teˇ hpaˍ ve awˬ hkʼaˇ htaꞈ yehˇ leh chaw yaˇ htaꞈ hkʼaˬ hkʼe heˍ ve le? (b) Cuˇ yiˍ piˇ ve liꞈ 9:5 hkʼaw kʼoˆ taˍ ve hkʼe, suh˗oˬ ve chaw hkʼaˬ hkʼe hpehꞈ ve le?

⁶ Saˍtanˍ yehˇ leh chaw yaˇ htaꞈ te luˬ tuˬ awˬ hkʼaˇ yawˇ shiˍ ve pa taw, neˇ teˇ hpaˍ ve awˬ lawn Yaˬhoˉvaˬ ngaˬ hui htaꞈ shaˍ tiꞈ peꞈ laˇ ve yoˬ. Saˍtanˍ neˇ teˇ hpaˍ ve awˬ hkʼaˇ htaꞈ yehˇ leh heˍ ve yoˬ. Suh˗oˬ ve kʼo, suh mvuhˇ miˬ hkʼaw teˇ kaˬ kaˬ lo teꞈ chehˇ sheˍ ve tehꞈ kʼoˆ leh heˍ ve yoˬ. (Cuˇ yiˍ piˇ ve 9:5 gʼaw sheˍ.) Saˍtanˍ neˇ teˇ hpaˍ ve awˬ hkʼaˇ htaꞈ yehˇ leh chaw yaˇ kawˆ tuˬ leh Yaˬhoˉvaˬ geh maˇ meuˆ daꞈ tuˬ kaꞈ te piˇ ve yoˬ. Neˇ teˇ hpaˍ htaꞈ caˉ daꞈ ve chaw yaˇ lehˬ Yaˬhoˉvaˬ aꞈ kehˉ neˇ teˇ hpaˍ htaꞈ yonˍ tuˬ Saˍtanˍ dawˇ law ve yoˬ.

7. Yaˬhoˉvaˬ ngaˬ hui htaꞈ aˬ htoꞈ ma kʼoˆ laˇ ve le?

⁷ Henˇ peuˬ ve hkʼa shuˍ Saˍtanˍ leh neˇ teˇ hpaˍ maˇ gʼa heˍ tuˬ, ngaˬ hui aˬ htoꞈ ma htaꞈ gʼa shiˍ cawˇ ve Yaˬhoˉvaˬ kʼoˆ laˇ ve yoˬ. Neˇ teˇ hpaˍ leh Saˍtanˍ htaꞈ tawˍ daꞈ gʼaˇ tuˬ ngaˬ hui te gʼa ve awˬ hkʼaˇ teˇ hpaˍ teˇ geh nyi sheˍ.

8. (a) Neˇ teˇ hpaˍ htaꞈ tawˍ baˬ gʼa tuˬ awˉ lawˉ teˇ hkʼaˇ aˬ htoꞈ ma le? (b) Saˍtanˍ suh˗oˬ ve chaw ve awˬ lawn heˍ ve Chiˇ mvuh ve liꞈ 146:4 hkʼaw hkʼaˬ hkʼe maˍ laˇ ve le?

⁸ Liꞈ hpu gʼaw leh hkʼa dehꞈ dawˇ nyi ve yoˬ. Neˇ teˇ hpaˍ yehˇ leh heˍ ve htaꞈ tawˍ baˬ gʼa tuˬ, chi ve awˉ lawˉ teˇ hkʼaˇ hpehꞈ ve yoˬ. Liꞈ hpu lehˬ aˉ htaw tcuhˆ jaˇ ve hkʼe hpehꞈ leh Saˍtanˍ heˍ ve tawˇ htaꞈ tawˆ baˬ gʼa ve yoˬ. (Eˇfeˇsuꞈ 6:17) Tawˇ pa haˉ te  kʼo, suh˗oˬ ve lehˬ teꞈ chehˇ ve chaw htaꞈ caˉ daꞈ gʼa ve tehꞈ Saˍtanˍ heˍ ve htaꞈ Liꞈ hpu lehˬ hkʼa tawˍ lehˆ hpeuꞈ maw piˇ gʼa ve yoˬ. (Chiˇ mvuh ve 146:4 gʼaw sheˍ.) Chi hkʼoˆ kaꞈ Liꞈ hpu ngaˬ hui htaꞈ shaˍ tiꞈ peꞈ laˇ ve Yaˬhoˉvaˬ teˇ gʼaˇ ceh tiˉ awˬ gʼuˇ suhˍ hpawˇ shiˍ gʼa ve yoˬ. (Iˉsaˍyaˆ 45:21; 46:10) Ngaˬ hui Liꞈ hpu gʼaw leh hkʼa dehꞈ dawˇ nyi ve kʼo, neˇ teˇ hpaˍ heˍ ve htaꞈ ngaˬ hui hkʼaˬ htaˆ kaꞈ tawˍ baˬ gʼa tuˬ gu hehnˇ taˍ˗oˬ ve yoˬ.

9. Hkʼaˬ hkʼe ve teˇ hpaˍ htaꞈ ngaˬ hui maˇ caˉ daꞈ cawˇ ve le?

⁹ Neˇ teˇ hpaˍ htaꞈ caˉ daꞈ ve awˬ hkʼaˇ maˇ te. Awˬ tehˬ ve Hkriꞈ yaˇ lehˬ neˇ teˇ hpaˍ htaꞈ caˉ daꞈ ve hkʼa peu˗eˬ maˇ te. Tawˇ pa haˉ te kʼo, ngaˬ hui mawˉ nyi ve geh maˇ kʼai leh suh peuˬ ve chaw htaꞈ tawˇ na nyi ve maˇ te. Peuˬ taˉ ve teˇ lawn hkʼaw gʼa henˇ ve hkʼe, suh˗e ve awˬ liˇ awˬ hkʼaˇ leh suh peuˬ kʼo awˬ ha ku teˇ kaˬ kaˬ lo teꞈ chehˇ sheˍ kʼoˆ ve geh ngaˬ hui maˇ caˉ daꞈ. Laꞈ hkʼaˇ nyi ve leh awˬ gʼuˇ suhˍ hpawˇ hkʼaˬ hkʼe hpehꞈ la tuˬ ve htaꞈ shiˍ tuˬ ngaˬ hui maˇ nyi. (Iˉsaˍyaˆ 8:19) Saˍtanˍ leh neˇ teˇ hpaˍ htaꞈ ngaˬ hui caˉ daꞈ tuˬ te laˇ ve chi ve hkʼa peu˗eˬ kawˆ tuˬ cawˬ ve tehꞈ ngaˬ hui shiˍ ve yoˬ.

10-11. (a) Awˉ lawˉ peuˇ ve Hkriꞈ yaˇ teˇ hpaˍ yawˇ hui awˬ tehˬ ve htaꞈ shiˍ la htaˇ aˬ htoꞈ ma te ve le? (b) 1 Kawˇrenˍhtuˆ liꞈ 10:21 hkʼaw kʼoˆ taˍ ve hkʼe aˬ htoꞈ ma te ngaˬ hui awˉ lawˉ peuˇ ve Hkriꞈ yaˇ htaꞈ henˇ yuˬ cawˇ ve le? Hkʼaˬ hkʼe te henˇ yuˬ gʼa tuˬ le?

¹⁰ Faˍ te ve hkʼa peu˗eˬ htaꞈ ngaˬ hui maˇ caˉ daꞈ. Eˇfeˇsuꞈ venˇ hkʼaw chehˇ ve awˉ lawˉ peuˇ ve Hkriꞈ yaˇ neˇ teˇ hpaˍ htaꞈ caˉ daꞈ ve yoˬ. Yawˇ hui awˬ tehˬ ve htaꞈ shiˍ la htaˇ, a shu yawˇ awˬ to pa jaˇ. “Faˍ te paˍ laiˉ gʼaˇ htawˇ, yawˇ hui ve liꞈ teˇ hpaˍ htaꞈ yuˬ laˬ leh, chaw hkʼa peu˗eˬ mehˆ gʼuˇ suhˍ tuˉ baˬ ve yoˬ.” (Tcuh yaˇ 19:19) Chaw chi ve teˇ hpaˍ neˇ teˇ hpaˍ htaꞈ tawˍ daꞈ tuˬ coˇ caˇ jaˇ. Faˍ te paˍ teˇ hpaˍ ve liꞈ kʼoˆ awˬ hpfuhˇ hkʼaˆ jaˇ. Yaꞈ hkʼaˇ, yawˇ hui ve liꞈ kʼoˆ shu htaꞈ piˇ ve leh hawˇ ve maˇ te. Yawˇ hui te luˬ ve yoˬ. Yawˇ hui Yaˬhoˉvaˬ nyi hkʼaˇ suh tuˬ te piˇ gaˇ ve pa taw, liꞈ kʼoˆ oˇ ve awˬ hpfuhˇ hkʼaˬ hkʼe taw hkʼaˆ ve maˇ sheˉ lai.

 ¹¹ Awˉ lawˉ peuˇ ve Hkriꞈ yaˇ htaꞈ ngaˬ hui hkʼaˬ hkʼe te henˇ yuˬ gʼa tuˬ le? Faˍ te ve htaꞈ caˉ daꞈ ve awˬ ceuˬ ngaˬ hui cawˬ ve kʼo, yuˬ baˬ cawˇ ve yoˬ. Chi ve teˇ hpaˍ lehˬ shehnˉ, shaˉ hoꞈ, awˬ nu ve mawˇ neˇ teˇ hpaˍ maˇ gʼa te luˬ laˇ tuˬ pfuhˇ taˍ ve htaꞈ kʼoˆ gaˇ ve yoˬ.—1 Kawˇrenˍhtuˆ 10:21 gʼaw sheˍ.

12. Pyawˍ ve awˬ ceuˬ htaꞈ caˉ daꞈ ve ngaˬ hui a shu yawˇ awˬ to htaꞈ hkʼaˬ hkʼe na nyi cawˇ ve le?

¹² Pyawˍ ve awˬ ceuˬ htaꞈ leuˆ htaˇ hkʼa dehꞈ chaˬ nyi sheˍ. Ngaˬ hui a shu yawˇ awˬ to htaꞈ na nyi cawˇ ve, ‘liꞈ leh In˗teu˗neꞈ hkʼaw faˍ te ve htaꞈ caˉ daꞈ ve ngaˬ gʼaw˗aw laˇ? Ngaˬ liꞈ hkawˇ hkʼaˬ hkʼe ve na ve le, awˬ han hkʼaˬ hkʼe ve nyi ve le, leh VDO kenˍ (game) hkʼaˬ hkʼe ve leˍ guiˇ ve le? Ngaˬ pyawˍ ve awˬ ceuˬ htaꞈ leuˆ ve neˇ teˇ hpaˍ htaꞈ caˉ daꞈ˗aw laˇ? Awˬ ceuˬ chi ve teˇ hpaˍ neˇ suhˍ chawꞈ ve, chaw suh ku te toˇ ve, maˇ heˆ leh chaw yaˇ te maˇ gʼa ve aꞈ kehˉ te gʼa ve htaꞈ caˉ daꞈ˗aw laˇ? Pyawˍ ve chi teˇ hpaˍ lehˬ faˍ te ve leh hkeu ve kawˆ tuˬ maˇ cawˬ tehꞈ ngaˬ htaꞈ dawˇ tcuh laˇ ve laˇ?’ Pyawˍ ve awˬ ceuˬ htaꞈ dawˇ nyi ve teˇ ceuˬ le le maˇ heˆ leh a ponˬ hkʼai ve, neˇ teˇ hpaˍ htaꞈ caˉ daꞈ ve maˇ heˆ. Nawˬ pyawˍ ve awˬ ceuˬ leuˆ ve htaꞈ chaˬ nyi htaˇ, nawˬ te ve awˬ ceuˬ Yaˬhoˉvaˬ maˇ dawˇ cawˇ ve htaꞈ jaw kʼai cawˇ ve yoˬ. Teꞈ chiˉ maˇ heˆ tehꞈ dawˇ ve chi ngaˬ hui ve dawˇ shiˍ puiˉ ve nyi ma htaꞈ maˇ gʼa shoꞈ shaꞈ laˇ tuˬ leh Gʼuiˬ sha htaꞈ maˇ gʼa te yaꞈ tuˬ ngaˬ hui coˇ caˇ leh daꞈ jaˇ ve htaꞈ te gaˇ ve yoˬ.—Tcuh yaˇ 24:16. *

13. Ngaˬ hui aˬ htoꞈ ma ve awˬ lawn htaꞈ jaw kʼai cawˇ ve le?

¹³ Neˇ teˇ hpaˍ ve awˬ lawn kʼoˆ daꞈ ve htaꞈ jaw kʼai˗oˆ. Awˬ lawn chi ve hkʼaw Yeˍsuˆ ve awˬ lawn  htaꞈ ngaˬ hui henˇ yuˬ gaˇ ve yoˬ. (1 Peˍtruˆ 2:21) Yeˍsuˆ miˬ guiˬ hkʼoˆ maˇ laˬ sheˍ htaˇ yawˇ mvuhˇ naw ma hkʼoˆ chehˇ leh Saˍtanˍ leh neˇ teˇ hpaˍ ve awˬ lawn yawˇ shiˍ ve yoˬ. Yaꞈ hkʼaˇ, yawˇ hui aˬ htoꞈ ma te ve Yeˍsuˆ maˇ gʼa kʼoˆ laˇ taˍ. Yeˍsuˆ Yaˬhoˉvaˬ ve awˬ lawn shaˉ hkiˆ hkanˍ gaˇ ve, Saˍtanˍ htaꞈ awˬ gʼaˇ maˇ piˇ gaˇ. Ngaˬ hui Yeˍsuˆ htaꞈ henˇ yuˬ gaˇ ve pa taw, neˇ ve awˬ lawn maˇ kʼoˆ daꞈ. Yaꞈ hkʼaˇ, daꞈ ve awˬ lawn teˇ hpaˍ hpehꞈ la ve pa taw ngaˬ hui ha lehˬ ve yoˬ. Chi lehˬ awˬ tehˬ ve htaꞈ kʼoˆ ve yoˬ.—Chiˇ mvuh ve 45:1.

14-15. (a) Aˬ htoꞈ ma te ngaˬ hui neˇ teˇ hpaˍ htaꞈ maˇ kawˆ cawˇ ve le? (b) Chi beuꞈ teˇ co˗e Yaˬhoˉvaˬ yawˇ ve chaw htaꞈ haꞈ shaˉ chehˇ ve tehꞈ aˬ htoꞈ ma ve shaˉ hkiˆ cawˬ ve le?

¹⁴ Neˇ teˇ hpaˍ htaꞈ taˇ kawˆ. Miˬ guiˬ hkʼoˆ maˇ biˇ ve pa taw ngaˬ hui htaꞈ maˇ daꞈ ve heuˆ la ve yoˬ. Kawˆ tuˬ, naˬ ve gawˬ ve, maˇ heˆ leh suh ve ngaˬ hui maˇ dawˇ maˇ gaˇ ve hkʼaw hpehꞈ la gʼa ve yoˬ. Yaꞈ hkʼaˇ, maˇ mawˬ gʼa ve awˬ ha ku chi hkʼe te laˇ ve tehꞈ ngaˬ hui maˇ dawˇ cawˇ. Liꞈ hpu hkʼaw kʼoˆ ve, awˬ ceuˬ chi ve teˇ gʼaˇ le le maˇ dawˇ maˇ gaˇ ve hkʼaw hpehꞈ la puiˉ ve yoˬ. (Cuˇ yiˍ piˇ ve 9:11) Yaˬhoˉvaˬ lehˬ neˇ teˇ hpaˍ aꞈ kehˉ kanˇ paˆ cawˬ jaˇ. Tawˇ pa haˉ te kʼo, Gʼuiˬ sha lehˬ Saˍtanˍ Yawˆbaˆ htaꞈ maˇ tiˇ pehˍ tcuh. (Yawˇbaˆ 2:6) Moˉseˍ ve awˬ co˗e htaˇ Eˇjiˇtuꞈ mvuhˇ miˬ hkʼaw faˍ te puiˉ paˍ teˇ hpaˍ aꞈ kehˉ Yaˬhoˉvaˬ kanˇ paˆ cawˬ ve tehꞈ hpeuꞈ maw piˇ ve yoˬ. (Tawˆ kʼai ve 8:18; 9:11) Yeˍsuˆ Yaˬhoˉvaˬ geh kanˇ paˆ gʼa htaˇ, yawˇ Saˍtanˍ leh neˇ teˇ hpaˍ aꞈ kehˉ kanˇ paˆ cawˬ leh yawˇ hui htaꞈ miˬ guiˬ hkʼoˆ lo yuˬ baˬ ve yoˬ. Maˇ maw ve awˬ yanˇ yawˇ hui htaꞈ leh kuiˬ maˇ cawˬ ve miˬ kʼoˍ hkʼaw baˬ keu leh teˇ gʼaˇ htaꞈ kaꞈ te luˬ maˇ gʼa.—Hpeuꞈ maˍ ve 12:9; 20:2, 3.

¹⁵ Chi beuꞈ teˇ co˗e Yaˬhoˉvaˬ yawˇ ve chaw htaꞈ haꞈ shaˉ chehˇ ve tehꞈ ngaˬ hui shaˉ hkiˆ laiˉ ceuˬ mawˬ ve yoˬ. Awˬ lawn chi htaꞈ dawˇ nyi sheˍ. Ngaˬ hui miˬ guiˬ chi hkʼoˆ lo hto toˇ leh awˬ tehˬ ve htaꞈ maˍ chehˇ ve yoˬ. (Maꞈhtehˍ 28:19, 20) Chi htaꞈ pa taw Saˍtanˍ ve awˬ lawn ngaˬ hui hpeuꞈ maw piˇ chehˇ ve yoˬ. Saˍtanˍ te gʼa ve kʼo, ngaˬ hui ve kanˉ htaꞈ jehˇ tcuh gaˇ ve yoˬ. Yaꞈ hkʼaˇ, yawˇ te maˇ gʼa. Hkʼe te leh neˇ teˇ hpaˍ htaꞈ ngaˬ hui kawˆ tuˬ maˇ loˍ. “[Yaˬhoˉvaˬ] lehˬ, miˬ guiˬ chaw yaˇ hkʼa peu˗eˬ ve htaꞈ hkʼa dehꞈ nyi haꞈ shaˉ piˇ chehˇ ve yoˬ. Yawˇ htaꞈ ka tiꞈ yeˬ chehˇ ve chaw htaꞈ yawˇ awˬ gʼaˇ uiˍ la piˇ ve yoˬ” tehꞈ ngaˬ hui shiˍ ve yoˬ. (2 Raˍsaˍvanˍ 16:9) Ngaˬ hui Yaˬhoˉvaˬ htaꞈ ka tiꞈ  yeˬ ve kʼo, neˇ teˇ hpaˍ ngaˬ hui htaꞈ co co taiˍ taiˍ te luˬ laˇ maˇ gʼa.

16-17. Haꞈ hanˉ ve chi neˇ teˇ hpaˍ htaꞈ tawˍ daꞈ gʼaˇ ve tehꞈ tawˇ pa haˉ kʼoˆ maˍ laˇ sheˍ.

¹⁶ Neˇ teˇ hpaˍ htaꞈ tawˍ daꞈ gʼaˇ tuˬ haꞈ hanˉ ve gʼa cawˬ cawˇ ve yoˬ. Teˇ pawˆ pawˆ kʼo, ngaˬ viˉ ngaˬ nyi leh awˬ chawˇ kaꞈ maˇ dawˇ cawˇ. Yaꞈ hkʼaˇ, haꞈ hanˉ ve chaw htaꞈ Yaˬhoˉvaˬ awˬ bon naꞈ piˇ tuˬ yoˬ. Jaˬmaˬniˬ mvuhˇ miˬ hkʼaw chehˇ ve Eh˗riˇkaꞈ ve awˬ lawn htaꞈ dawˇ nyi sheˍ. Eh˗riˇkaꞈ 21 hkʼawꞈ htaˇ Liꞈ hpu tanˬ henˇ ve yoˬ. Yawˇ awˬ pa caˬbuˉ awˬ hoˉ faˍ te paˍ hpehꞈ ve pa taw, Eh˗riˇkaꞈ neˇ teˇ hpaˍ htaꞈ caˉ daꞈ leh yawˇ awˬ pa ve gʼuiˬ sha htaꞈ tuˉ tanˇ taˍ ve shaˍ caˇ tuˬ tehꞈ yawˇ hui dawˇ law ve yoˬ. chi hkʼe maˇ te tuˬ kʼoˆ piˇ htaˇ, yawˇ hui ve gʼuiˬ sha teˇ hpaˍ htaꞈ Eh˗riˇkaꞈ nyi cha ve tehꞈ kʼoˆ ve yoˬ. Eh˗riˇkaꞈ ve awˬ to leh nyi ma htaꞈ yawˇ hui ve gʼuiˬ sha teˇ hpaˍ te luˬ piˇ tuˬ tehꞈ yehˬ kʼa hkʼaw ve chaw yonˍ ve yoˬ.

¹⁷ Eh˗riˇkaꞈ ve yehˬ kʼa coˇ caˇ leh yawˇ awˬ liˇ awˬ hkʼaˇ htaꞈ te tuˬ nyiˉ piˇ ve yoˬ. Yaꞈ hkʼaˇ, yehˬ kʼa hkʼaw gʼaꞈ tawˆ piˇ ve htawˇ yawˇ maˇ te. Shaˉ hkiˆ hkanˍ ve chaw teˇ hpaˍ Eh˗riˇkaꞈ htaꞈ yawˇ hui geh chehˇ tcuh ve yoˬ. Chi hkʼe te ve pa taw Eh˗riˇkaꞈ Yaˬhoˉvaˬ awˬ bon naꞈ piˇ leh yehˬ kʼa awˬ suhˉ cawˬ tcuh ve yoˬ. Yawˇ hkʼa shuˍ yonˍ ve chaw awˬ viˉ paˍ awˬ viˉ ma hkʼe hpehꞈ ve yoˬ. (Maˍkuˆ 10:29, 30) Yawˇ ve awˬ viˉ awˬ nyi yawˇ htaꞈ maˇ haꞈ yuˬ leh, yawˇ ve mawˇ tuˉ baˬ piˇ ve htawˇ, Eh˗riˇkaꞈ Yaˬhoˉvaˬ htaꞈ ka tiꞈ yeˬ ve, Baˆtiˆsaˬ haꞈ yuˬ ve, leh chi teˇ hkui hkʼaˬ htaˆ kaꞈ gʼuˇ suhˍ peuˍ ve chaw te chehˇ ve yoˬ. Yawˇ neˇ teˇ hpaˍ htaꞈ maˇ kawˆ. Yehˬ kʼa htaꞈ kʼoˆ htaˇ Eh˗riˇkaꞈ kʼoˆ ve, “Yaˬhoˉvaˬ htaꞈ shiˍ leh yawˇ ve kanˉ te ve kʼo awˬ tehˬ ha lehˬ gʼa ve tehꞈ ngaˬ ve yehˬ kʼa shiˍ tuˬ, teˇ nyi le le ngaˬ bon lawˬ ve yoˬ.”

18. Ngaˬ hui Yaˬhoˉvaˬ htaꞈ gʼaˇ va ve kʼo, aˬ htoꞈ ma awˬ bon gʼa tuˬ le?

¹⁸ Teˇ gʼaˇ le le beˬ ve lawˇ ve chi hkʼe ve gʼa hpuˇ ve maˇ heˆ. Yaꞈ hkʼaˇ, teˇ gʼaˇ le le neˇ teˇ hpaˍ htaꞈ tawˍ daꞈ leh Yaˬhoˉvaˬ htaꞈ gʼaˇ va sheˍ. Ngaˬ hui chi hkʼe te ve kʼo, awˬ bon maˇ maˇ gʼa leh, Saˍtanˍ ngaˬ hui htaꞈ maˇ heˍ laˇ gʼa. Chi hkʼoˆ kaꞈ ngaˬ hui neˇ teˇ hpaˍ htaꞈ kawˆ leh teꞈ chiˉ te maˇ gʼa ve maˇ heˆ. A yeˇ uiˍ jaˇ ve lehˬ ngaˬ hui Yaˬhoˉvaˬ geh meuˆ daꞈ ve yoˬ. Yaˍkoˆ kʼoˆ ve, “Gʼuiˬ sha uˉ peunˍ ve awˬ hawˉ lo hkʼa dehꞈ chehˇ˗oˆ. Neˇ haiˬ htaꞈ tawˍ taˍ˗oꞈ. Nawˬ hui lo yawˇ hpaw tawˆ˗e tuˬ yoˬ. Gʼuiˬ sha geh jiˆ laˬ˗oꞈ. Hkʼe te kʼo, yawˇ nawˬ hui geh jiˆ laˬ tuˬ yoˬ.”—Yaˍkoˆ 4:7, 8.