AWˬ LAWN 14
Nawˬ Gʼuiˬ sha ve kanˉ te chehˇ ve biˇ la htaˇ hkʼa gaˬ te˗aw laˇ?
“Ha lehˬ ve bon hkawˇ maˍ ve kanˉ htaꞈ te chehˇ˗oˆ. Nawˬ te chehˇ ve kanˉ htaꞈ biˇ la htaˇ hkʼa gaˬ te˗o.”—2 TIˆMOˉSEˍ 4:5.
KʼA MUIˬ HKAWˇ 57 Teˇ chaw ceuˬ le le geh ca hto toˇ ve
HENˇ TUˬ VE TEˇ HPAˍ *
Yeˍsuˆ kʼawꞈ teꞈ tu la peuˬ hkʼawꞈ nawˉ, yawˇ awˬ laꞈ gʼawˇ htaꞈ kʼoˆ piˇ ve, “chaw ceuˬ hkʼa peu˗eˬ ngaˬ ve awˬ laꞈ gʼawˇ hpehꞈ la tuˬ ca te˗o.” (Awˬ tawn 1 nyi sheˍ)
1. Gʼuiˬ sha ve kanˉ te ve chaw aˬ htoꞈ ma te gaˇ ve le? Aˬ htoꞈ ma pa taw le? (Awˬ htaꞈ hpawˇ ve awˬ han htaꞈ nyi sheˍ.)
Yeˍsuˆ yawˇ ve awˬ laꞈ gʼawˇ htaꞈ “chaw ceuˬ hkʼa peu˗eˬ ngaˬ ve awˬ laꞈ gʼawˇ hpehꞈ la tuˬ ca te˗o” tehꞈ kʼoˆ piˇ ve yoˬ. (Maꞈhtehˍ 28:19) Gʼuiˬ sha ve kanˉ te ve ka tiꞈ yeˬ ve chaw teˇ gʼaˇ le le, kanˉ chi “biˇ la htaˇ hkʼa gaˬ” te gʼa tuˬ yawˇ hui henˇ gaˇ ve yoˬ. (2 Tiˆmoˉseˍ 4:5) Kanˉ chi a yeˇ uiˍ jaˇ, awˬ hpfuhˇ hkʼaˆ jaˇ leh, ngaˬ hui a shaꞈ teꞈ kuiˬ hkʼaw kiˍ jaˇ ve kanˉ hpehꞈ ve yoˬ. Yaꞈ hkʼaˇ, ngaˬ hui loˍ ve hkʼe te gʼa tuˬ sha ve maˇ heˆ.
2. Ngaˬ hui Gʼuiˬ sha ve kanˉ te htaˇ shoꞈ shaꞈ ve aˬ htoꞈ ma gʼa hpuˇ ve le?
2 Ngaˬ hui awˬ yanˇ leh awˬ gʼaˇ htaꞈ yehˇ tuˬ awˬ nu ve kanˉ a yeˇ uiˍ ve kaꞈ cawˬ ve yoˬ. Ngaˬ hui ve yehˬ kʼa hkʼaw loˍ ve awˬ ceuˬ htaꞈ lawꞈ tuˬ teˇ nyi ve hkʼaw kanˉ laiˉ naˍ riˍ gʼa te ve yoˬ. Ngaˬ hui yehˬ kʼa hkʼaw awˬ nu ve kanˉ gʼa te ve, maˇ chehˇ sha ve, dawˇ maˇ ve a naˍ cawˬ ve, maˇ heˆ leh a shaꞈ maˇ˗oˬ ve pa taw, naˬ ve yoˬ hehˉ. Ngaˬ hui chi ve teˇ hpaˍ htaꞈ gʼa yeunˇ hkanˍ ve kʼo, Gʼuiˬ sha ve kanˉ biˇ la htaˇ hkʼa gaˬ hkʼaˬ hkʼe te gʼa tuˬ le?
3. Maꞈhtehˍ liꞈ 13:23 hkʼaw Yeˍsuˆ kʼoˆ ve tawˇ hkawˇ ngaˬ hui aˬ htoꞈ ma na gʼa ve le?
3 Ngaˬ hui shoꞈ shaꞈ ve teˇ ceuˬ ceuˬ gʼa hpuˇ leh Yaˬhoˉvaˬ ve kanˉ dawˇ taˍ ve hkʼe maˇ te gʼa ve kʼo, awˬ gʼaˇ maˇ nuˇ cawˇ. Teˇ gʼaˇ leh teˇ gʼaˇ Gʼuiˬ sha ve mvuhˇ miˬ awˬ pon kanˉ te gʼa ve maˇ shuˍ daꞈ tehꞈ Yeˍsuˆ shiˍ ve yoˬ. (Maꞈhtehˍ 13:23 gʼaw sheˍ.) Te gʼa ve hkʼe hkʼa dehꞈ te ve kʼo, ngaˬ hui te ve hkʼa peu˗eˬ Yaˬhoˉvaˬ awˬ hpfuhˇ shiˍ ve yoˬ. (Heˍbrehˇ 6:10-12) Yaꞈ hkʼaˇ, ngaˬ hui Gʼuiˬ sha ve kanˉ chi aꞈ kehˉ te gʼa ve tehꞈ dawˇ ve yoˬ hehˉ. Ngaˬ hui a shaꞈ teꞈ kuiˬ hkʼaw Gʼuiˬ sha ve kanˉ htaꞈ awˉ lawˉ teh leh a shaꞈ teꞈ hkʼaˇ caˇ lawꞈ dawˬ lawꞈ te ve kʼo, hto toˇ leh maˍ puiˉ ve chaw hpehꞈ la tuˬ ngaˬ hui hkʼaˬ hkʼe gʼa te cawˇ ve teˇ geh henˇ tuˬ yoˬ. Awˉ lawˉ htaˇ na hkawˇ chi htaꞈ hkʼawꞈ leh, Gʼuiˬ sha ve kanˉ biˇ la htaˇ hkʼa gaˬ te ve tcuhˉ kuiˬ hkʼaˬ hkʼe kʼoˆ gaˇ ve le?
4. Ngaˬ hui Gʼuiˬ sha ve kanˉ biˇ la htaˇ hkʼa gaˬ te ve tcuhˉ kuiˬ aˬ htoꞈ ma htaꞈ kʼoˆ gaˇ ve le?
4 Ngaˬ hui Gʼuiˬ sha ve kanˉ biˇ la htaˇ hkʼa gaˬ te ve lehˬ te gʼa ve hkʼe hto toˇ leh gʼa maˍ piˇ ve yoˬ. Yaꞈ hkʼaˇ, chi ngaˬ hui hto toˇ ve awˬ yanˇ htaꞈ ceh kʼoˆ gaˇ ve maˇ heˆ. Aˬ htoꞈ ma te ngaˬ hui kanˉ chi te ve Yaˬhoˉvaˬ a yeˇ yuˬ ve yoˬ. Ngaˬ hui Yaˬhoˉvaˬ leh awˬ chawˇ awˬ paˆ htaꞈ haꞈ ve pa taw, yawˇ ve kanˉ nyi ma awˬ tawˬ hkʼa gaˬ coˇ caˇ leh te gaˇ ve yoˬ. * (Maˍkuˆ 12:30, 31; Kawˇlawˇsehˇ 3:23) Gʼuiˬ sha ve kanˉ nyi ma awˬ tawˬ hkʼa gaˬ te ve lehˬ ngaˬ hui cawˬ taˍ ve awˬ gʼaˇ awˬ shaˉ hkʼa peu˗eˬ te ve htaꞈ kʼoˆ gaˇ ve yoˬ. Ngaˬ hui hto toˇ ve kanˉ awˬ hpfuhˇ shiˍ ve kʼo, ngaˬ hui te gʼa ve hkʼe chaw maˇ maˇ htaꞈ daꞈ ve awˬ lawn sha tanˇ hto piˇ tuˬ yoˬ.
5-6. Chaw teˇ gʼaˇ awˬ yehˇ hkʼa dehꞈ maˇ cawˬ ve htawˇ yawˇ Gʼuiˬ sha ve kanˉ te ve htaꞈ a yeˇ uiˍ jaˇ tehꞈ hkʼaˬ hkʼe te shawˍ gʼa ve le? Tawˇ pa haˉ kʼoˆ maˍ laˇ sheˍ.
5 Yaˇ nehˬ teˇ gʼaˇ tinˍ hteˆ ve dawˇ cawˇ ve htaꞈ dawˇ nyi sheˍ. Yawˇ awˬ yanˇ cawˬ ve kʼo, tinˍ hteˆ gaˇ ve yoˬ. Awˬ leh meuˇ htaˇ yawˇ awˍ caˇ kuiˬ sainˍ hkʼaw kanˉ gʼa te leh hkawꞈ nyi shinˉ nyi htaˇ kanˉ te kuiˬ hkʼaw tinˍ gʼa hteˆ ve yoˬ. Yaꞈ hkʼaˇ, yawˇ gʼa ve hpu maˇ yehˇ lawꞈ. Chi htaꞈ pa taw, yawˇ shinˉ peuˬ teˇ nyi te leh ngaˇ nyi awˬ nu ve teˇ kaˬ lo mawˇ kʼawꞈ hawˇ˗e ve yoˬ. Maˇ˗awˍ ve yawˇ mawˇ hawˇ˗e ve htawˇ, yawˇ tinˍ hteˆ ve htaꞈ dawˇ cawˇ sheˍ. Yawˇ gʼaˇ hteꞈ cheuˬ la tuˬ te leh tinˍ hteˆ caˇ paˍ hpehꞈ gaˇ ve yoˬ. Chi hkʼe hpehꞈ htaˇ yawˇ tinˍ gʼa hteˆ ve awˬ yanˇ maˇ maw ve htawˇ, ha lehˬ jaˇ.
6 Awˬ lawn chi ve hkʼa shuˍ nawˬ Gʼuiˬ sha ve kanˉ te ve awˬ yanˇ hkʼa dehꞈ maˇ cawˬ. Yaꞈ hkʼaˇ, nawˬ kanˉ chi htaꞈ kaꞈ haꞈ leh te gaˇ ve yoˬ. Nawˬ maˍ puiˉ la tuˬ coˇ caˇ leh daꞈ ve awˬ lawn sha tanˇ shu nyi ma hkʼaw gaˬ tuˬ te ve yoˬ. Nawˬ laiˉ ceuˬ gʼa te ve pa taw, hto toˇ ve kanˉ nawˬ a shaꞈ teꞈ kuiˬ hkʼaw a yeˇ uiˍ jaˇ tehꞈ hkʼaˬ hkʼe te shawˍ gʼa tuˬ, htawˇ dawˇ nawˬ dawˇ cawˬ ve yoˬ.
GʼUIˬ SHA VE KANˉ TE VE NAWˬ AWˬ PON A YEˇ UIˍ JAˇ TEHꞈ SHAWˍ˗Oꞈ
7-8. Gʼuiˬ sha ve kanˉ te ve hkʼaw Yeˍsuˆ dawˇ ve hkʼe ngaˬ hui hkʼaˬ hkʼe te henˇ yuˬ gʼa tuˬ le?
7 Gʼuiˬ sha ve kanˉ te ve htaꞈ dawˇ nyi htaˇ, Yeˍsuˆ daꞈ jaˇ ve te maˍ laˇ ve yoˬ. Yawˇ awˬ pon a yeˇ uiˍ jaˇ ve lehˬ Gʼuiˬ sha ve mvuhˇ miˬ awˬ lawn kʼoˆ maˍ ve yoˬ. (Yoˇhanˬ 4:34, 35) Yawˇ te gʼa ve hkʼe chaw maˇ maˇ htaꞈ bon maˍ piˇ gʼa tuˬ laiˉ ha kiˇ loˇ juˇ kʼai ve yoˬ. Yawˇ chaw yaˇ htaꞈ bon maˍ piˇ gʼa tuˬ yawˇ hui ve aˉ hkʼaw lo leh awˬ kaˍ awˬ nu ve chehˇ kuiˬ lo awˬ hkʼaˇ ca leh hkʼaˬ htaˆ kaꞈ maˍ piˇ ve yoˬ. Yeˍsuˆ te ve hkʼa peu˗eˬ lehˬ Gʼuiˬ sha ve kanˉ htaꞈ caˉ daꞈ ve yoˬ.
8 Ngaˬ hui Yeˍsuˆ htaꞈ henˇ yuˬ leh shu htaꞈ gʼa yaw daꞈ tuˬ, teˇ kaˬ le le leh teˇ yanˇ le le shu htaꞈ daꞈ ve awˬ lawn sha tanˇ hto maˍ piˇ gʼa tuˬ awˬ hkʼaˇ ca ve yoˬ. Ngaˬ hui hpehꞈ sha ve htaꞈ yuˬ tanˇ leh hto toˇ ve yoˬ. (Maˍkuˆ 6:31-34; 1 Peˍtruˆ 2:21) Hkriꞈ yaˇ awˬ moˍ hkʼaw ve chaw teˇ hpaˍ tcuh peu ve gʼuˇ suhˍ peuˍ ve, hkʼaˬ htaˆ kaꞈ gʼuˇ suhˍ peuˍ ve, maˇ heˆ leh teˇ tcuhˉ teˇ yanˇ gʼuˇ suhˍ peuˍ ve te ve yoˬ. Awˬ nu ve chaw tawˇ hkawˇ awˬ suhˉ henˇ leh hto toˇ ve chaw loˍ jaˇ kuiˬ lo kʼai ve yoˬ. Yaꞈ hkʼaˇ, Gʼuiˬ sha kanˉ maˇ˗awˍ ve lehˬ hto toˇ ve chaw te gʼa ve hkʼe te ve geh laˬ ve yoˬ. Awˬ tcuhˉ awˬ yanˇ hkʼaˬ hkʼe hpehꞈ ve htawˇ, ngaˬ hui te maˇ gʼa ve awˬ leuˉ Yaˬhoˉvaˬ maˇ dawˇ law. Daꞈ ve awˬ lawn sha tanˇ ha lehˬ ve Gʼuiˬ sha ngaˬ hui htaꞈ peꞈ laˇ ve shu htaꞈ kʼoˆ piˇ htaˇ, kanˉ chi htaꞈ te ve chaw teˇ gʼaˇ le le Gʼuiˬ sha ha lehˬ tcuh gaˇ ve yoˬ.—1 Tiˆmoˉseˍ 1:11; Bon maˍ ve 30:11.
9. (a) Pawˇluꞈ kanˉ gʼa te ve htawˇ, bon maˍ ve a yeˇ uiˍ jaˇ tehꞈ hkʼaˬ hkʼe te shawˍ ve le? (b) Tcuh yaˇ liꞈ 28:16, 30, 31 hkʼaw Pawˇluꞈ bon maˍ ve htaꞈ hkʼaˬ hkʼe dawˇ ve le?
9 Tcuh yaˇ Pawˇluꞈ daꞈ ve henˇ yuˬ tuˬ hpehꞈ ve yoˬ. Yawˇ Gʼuiˬ sha ve kanˉ a yeˇ uiˍ jaˇ tehꞈ shawˍ ve yoˬ. Yawˇ miˍshenˍnaˍliˍ te leh 2 pawˆ teˇ pawˆ kʼai htaˇ, Kawˇrenˍhtuˆ venˇ hkʼaw chehˇ leh hpu hkʼa dehꞈ maˇ cawˬ leh yawˇ hpa aˉ po kʼo tawˉ ve kanˉ tanˬ te ve yoˬ. Yaꞈ hkʼaˇ, Pawˇluꞈ hpa aˉ po kʼo tawˉ ve chi hkʼaˬ htaˆ kaꞈ yawˇ ve kanˉ tehꞈ maˇ shawˍ. Yawˇ kanˉ oˇ ve te ve lehˬ yawˇ awˬ to hu gʼa tuˬ awˬ pon leh, awˬ viˉ awˬ nyi yawˇ awˬ pon hpu maˇ yehˇ ve htawˇ, yawˇ Kawˇrenˍhtuˆ chaw htaꞈ bon maˍ piˇ gʼa ve yoˬ. (2 Kawˇrenˍhtuˆ 11:7) Pawˇluꞈ kanˉ teˇ ceuˬ ceuˬ gʼa te ve htawˇ, yawˇ Gʼuiˬ sha ve kanˉ htaꞈ a yeˇ uiˍ jaˇ tehꞈ shawˍ leh shinˉ nyi kaꞈ bon maˍ ve yoˬ. Oˇ htaˇ hkʼe taw kanˉ maˇ gʼa te˗o htaˇ, Pawˇluꞈ hto toˇ ve kanˉ htaꞈ oˇ htaˇ aꞈ kehˉ kʼawꞈ te maˇ la ve yoˬ. “Yawˇ lehˬ gʼaˇ hteꞈ bon maˍ chehˇ leh, Yeˍsuˆ lehˬ Hkriꞈ hpehꞈ ve yoˬ tehꞈ, Yuˇdaꞈ chaw hui htaꞈ coˇ caˇ leh shaˉ hkiˆ hkanˍ chehˇ ve yoˬ.” (Tcuh yaˇ 18:3-5; 2 Kawˇrenˍhtuˆ 11:9) Peuˬ hkʼawꞈ nawˉ Roˉmaꞈ chaw ve yehˬ hkʼaw lo haw tiˍ˗aˬ htaˇ, yawˇ geh hkʼa guiˇ la ve chaw htaꞈ bon maˍ piˇ leh liꞈ laiˉ kʼoˆ bvuhꞈ ve yoˬ. (Tcuh yaˇ 28:16, 30, 31 gʼaw sheˍ.) Pawˇluꞈ Gʼuiˬ sha ve kanˉ htaꞈ a yeˇ uiˍ jaˇ tehꞈ shawˍ ve yoˬ. Yawˇ kʼoˆ ve kanˉ chi htaꞈ pa taw, “ngaˬ hui nyi ma maˇ luˬ.” (2 Kawˇrenˍhtuˆ 4:1) Yawˇ hkʼa shuˍ ngaˬ hui a shu yawˇ awˬ to gʼa hu ve htawˇ, Gʼuiˬ sha ve mvuhˇ miˬ awˬ lawn sha tanˇ hto toˇ ve ngaˬ hui a shaꞈ teꞈ kuiˬ hkʼaw a yeˇ uiˍ jaˇ tehꞈ shawˍ gʼa ve yoˬ.
Ngaˬ hui Gʼuiˬ sha ve kanˉ biˇ la htaˇ hkʼa gaˬ te gʼa tuˬ awˬ hkʼaˇ laiˉ hkʼaˇ cawˬ ve (Awˬ tawn 10-11 nyi sheˍ)
10-11. Ngaˬ hui maˇ chehˇ sha leh hkʼa dehꞈ hto toˇ maˇ gʼa ve htawˇ, Gʼuiˬ sha ve kanˉ biˇ la htaˇ hkʼa gaˬ hkʼaˬ hkʼe te gʼa tuˬ le?
10 Ngaˬ hui a shaꞈ maˇ leh maˇ chehˇ sha ve pa taw, dawˇ taˍ ve hkʼe teˇ yehˬ peuˬ teˇ yehˬ hto toˇ maˇ gʼa ve kʼo, awˬ nu ve awˬ hkʼaˇ te gʼa ve yoˬ. Awˉ lawˉ peuˇ ve Hkriꞈ yaˇ teˇ kaˬ le le lo bon maˍ ve yoˬ. Yawˇ hui awˬ yanˇ cawˬ ve kʼo, teˇ yehˬ peuˬ teˇ yehˬ, chaw guiˇ kuiˬ lo, leh chaw chehˇ kuiˬ teˇ kaˬ le le lo awˬ tehˬ ve maˍ piˇ ve yoˬ. (Tcuh yaˇ 17:17; 20:20) Ngaˬ hui hkʼa dehꞈ juˇ maˇ gʼa ve kʼo, chaw guiˇ kuiˬ lo mui taˍ leh hkʼa laˬ ve chaw htaꞈ hto maˍ piˇ gʼa ve yoˬ. Ngaˬ hui hto toˇ kuiˬ lo maˇ gʼa chehˇ ve htawˇ hto maˍ piˇ gʼa leh, liꞈ bvuhꞈ piˇ ve, maˇ heˆ leh awˬ hkʼeun hkʼaw maˍ piˇ kaꞈ gʼa ve yoˬ. Hto toˇ ve chaw laiˉ gʼaˇ maˇ chehˇ sha leh, shoꞈ shaꞈ ve cawˬ leh teˇ yehˬ peuˬ teˇ yehˬ maˇ hto toˇ gʼa ve htawˇ, yawˇ hui hto toˇ ve awˬ nu ve awˬ hkʼaˇ te gʼa ve ha lehˬ jaˇ.
11 Nawˬ hkʼa dehꞈ maˇ chehˇ sha ve htawˇ, hto toˇ ve biˇ la htaˇ hkʼa gaˬ te gʼa ve yoˬ. Tcuh yaˇ Pawˇluꞈ ve awˬ lawn htaꞈ teˇ pawˆ kʼawꞈ dawˇ nyi sheˍ. Yawˇ kʼoˆ ve, “ngaˬ htaꞈ awˬ gʼaˇ awˬ shaˉ peꞈ laˇ shehˍ hpaˇ htaꞈ cuˇ ve awˬ hkʼaw lo, hkʼa peu˗eˬ htaꞈ ngaˬ te puiˉ te hpehꞈ ve yoˬ.” (Hpiˇliˇpiˆ 4:13) Pawˇluꞈ teˇ pawˆ kʼawꞈ kʼai htaˇ naˬ leh awˬ gʼaˇ gʼa tuˬ loˍ ve yoˬ. Yawˇ awˬ viˉ awˬ nyi Gaˍlaˍtiˆ chaw htaꞈ kʼoˆ piˇ ve, “ngaˬ awˬ to naˬ ve pa taw, ngaˬ nawˬ hui htaꞈ awˉ lawˉ teˇ pawˆ ha lehˬ ve bon hkawˇ gʼa maˍ laˇ” ve yoˬ. (Gaˍlaˍtiˆ 4:13) Chi hkʼa shuˍ shuˍ nawˬ maˇ chehˇ sha ve htawˇ, shu htaꞈ hto maˍ piˇ tuˬ awˬ hkʼaˇ cawˬ ve yoˬ. Tawˇ pa haˉ te kʼo saˍ laꞈ gʼonˍ leh, saˍ laꞈ gʼonˍ htaꞈ ga piˇ ve chaw, leh nawˬ htaꞈ haꞈ shaˉ laˇ ve chaw htaꞈ hto maˍ piˇ gʼa ve yoˬ. Hto toˇ ve chaw yawˇ hui yehˬ lo hto toˇ˗e htaˇ yawˇ hui maˇ chehˇ.
A SHAꞈ TEꞈ HKʼAˇ CAˇ LAWꞈ DAWˬ LAWꞈ TE VE
12. Ngaˬ hui ve mehˆ shiˍ teˇ ceuˬ htaꞈ ceh tiˉ nyi ve aˬ htoꞈ ma htaꞈ kʼoˆ gaˇ ve le?
12 Yeˍsuˆ kʼoˆ ve, mehˆ shiˍ lehˬ, awˬ to ve kawˆ faiˇ yoˬ. Hkʼe te leh, nawˬ ve mehˆ shiˍ teˇ ceuˬ ceh tiˉ nyi ve kʼo, awˬ to hkʼa peu˗eˬ kaꞈ awˬ gʼeuˆ ba tuˬ yoˬ. (Maꞈhtehˍ 6:22) Yawˇ hkʼaˬ hkʼe kʼoˆ gaˇ ve le? Ngaˬ hui a shaꞈ teꞈ hkʼaˇ caˇ lawꞈ dawˬ lawꞈ te leh teˇ ceuˬ ceh tiˉ nyi ve htaꞈ kʼoˆ gaˇ ve yoˬ. A yeˇ maˇ uiˍ ve awˬ ceuˬ htaꞈ maˇ nyi. Yeˍsuˆ Yaˬhoˉvaˬ ve kanˉ htaꞈ a yeˇ uiˍ jaˇ tehꞈ shawˍ ve daꞈ jaˇ ve henˇ yuˬ tuˬ hpehꞈ leh, awˬ laꞈ gʼawˇ kaꞈ Yaˬhoˉvaˬ ve mvuhˇ miˬ htaꞈ a yeˇ yuˬ tuˬ maˍ piˇ ve yoˬ. Ngaˬ hui Yeˍsuˆ htaꞈ henˇ yuˬ leh a shaꞈ teꞈ kuiˬ hkʼaw Gʼuiˬ sha ve kanˉ te ve a yeˇ uiˍ jaˇ tehꞈ shawˍ ve yoˬ. Ngaˬ hui “Gʼuiˬ sha ve mvuhˇ miˬ leh yawˇ ve hteˇ ve cawˇ ve teˇ ceuˬ htaꞈ awˉ lawˉ ca˗o.”—Maꞈhtehˍ 6:33.
13. Ngaˬ hui hkʼaˬ htaˆ kaꞈ Gʼuiˬ sha ve kanˉ htaꞈ dawˇ nyi tuˬ ga laˇ gʼa ve aˬ htoꞈ ma cawˬ ve le?
13 Ngaˬ hui hkʼaˬ htaˆ kaꞈ Gʼuiˬ sha ve kanˉ htaꞈ awˉ lawˉ dawˇ nyi gʼa ve teˇ ceuˬ lehˬ a shaꞈ teꞈ hkʼaˇ caˇ lawꞈ dawˬ lawꞈ te ve yoˬ. Ngaˬ hui chi hkʼe te ve kʼo, chaw maˇ maˇ Yaˬhoˉvaˬ htaꞈ shiˍ la leh haꞈ tuˬ ga piˇ gʼa ve yoˬ. * Tawˇ pa haˉ te kʼo, shinˉ peuˬ teˇ nyi te leh ngaˇ nyi ve hkʼaw ngaˬ hui gʼaˇ hteꞈ hto toˇ gʼa tuˬ kanˉ te ve awˬ yanˇ pa gʼa˗aw laˇ? Ngaˬ hui tanˇ htaˇ te ve awˬ ceuˬ awˬ yanˇ yehˇ maˇ jaˇ ve kʼo, pa gʼa˗aw laˇ?
14. Awˬ hpawˇ awˬ miˇ ma teˇ ca Gʼuiˬ sha ve kanˉ gʼaˇ hteꞈ te gʼa tuˬ hkʼaˬ hkʼe te ve le?
14 Nyi haꞈ shaˉ paˍ teˇ gʼaˇ Eˍliˍaˆ leh yawˇ ve awˬ miˇ ma chi hkʼe te ve yoˬ. Yawˇ kʼoˆ ve, “oˇ ve teˇ yanˇ ngaˬ hui laꞈ tcuh laꞈ haˉ gʼuˇ suhˍ peuˍ ve te maˇ gʼa. Yaꞈ hkʼaˇ, ngaˬ hui hto toˇ ve awˬ yanˇ cawˬ maˇ la tuˬ awˬ nu ve awˬ hkʼaˇ te gʼa ve yoˬ. Tawˇ pa haˉ te kʼo, ngaˬ hui hpu pehˇ yehˇ ve, a yeˇ maˇ uiˍ tehꞈ dawˇ ve awˬ ceuˬ htaꞈ maˇ te, kanˉ nyi paˍ awˬ hoˉ geh ngaˬ hui ve kanˉ awˬ yanˇ pa laˇ tuˬ kaꞈ lawˬ ve yoˬ. Chi hkʼe te htaˇ mvuhˇ hpeuꞈ la htaˇ hto toˇ gʼa leh, Liꞈ hpu henˇ ve chaw cawˬ maˇ la ve, leh teˇ ha pa ve hkʼaw shinˉ peuˬ teˇ nyi te leh ngaˇ nyi ve hkʼaw nyiˇ nyi hto toˇ˗e gʼa ve ha lehˬ jaˇ!”
HTO TOˇ LEH MAˍ PUIˉ LA TUˬ VE AWˬ HKʼAˇ
Mvuhˇ hpeuꞈ haˉ hpawnˬ daꞈ ve hkʼaw ngaˬ hui gʼa henˇ taˍ ve htaꞈ yuˬ yehˇ ve kʼo, hto toˇ leh maˍ puiˉ ve chaw hpehꞈ la tuˬ yoˬ (Awˬ tawn 15-16 nyi sheˍ) *
15-16. 1 Tiˆmoˉseˍ liꞈ 4:13, 15 hkʼaw kʼoˆ taˍ ve hkʼe, ngaˬ hui hto toˇ leh maˍ puiˉ ve chaw hkʼaˬ hkʼe te hpehꞈ gʼa tuˬ le? (Awˇ ceˍ awˇ fa “ Gʼuiˬ sha ve kanˉ biˇ la htaˇ hkʼa gaˬ te tuˬ awˬ hkʼaˇ” htaꞈ nyi sheˍ.)
15 Ngaˬ hui Gʼuiˬ sha ve kanˉ biˇ la htaˇ hkʼa gaˬ te ve awˬ hkʼaˇ teˇ hkʼaˇ lehˬ coˇ caˇ leh hto toˇ puiˉ la tuˬ te ve yoˬ. Chaw teˇ hpaˍ hpaˍ kanˉ te htaˇ, yawˇ hui awˬ hkʼaˇ shiˍ la leh kanˉ hkʼa dehꞈ te gʼa tuˬ awˬ hkʼaˇ awˬ suhˉ gʼa henˇ ve yoˬ. Gʼuiˬ sha ve mvuhˇ miˬ daꞈ ve awˬ lawn sha tanˇ hto toˇ ve chaw kaꞈ hkʼa shuˍ gʼa te ve yoˬ. Hto toˇ ve awˬ hkʼaˇ puiˉ la tuˬ ngaˬ hui hkʼaˬ htaˆ kaꞈ gʼa henˇ cawˇ ve yoˬ.—Tawˇ naˉ ve 1:5; 1 Tiˆmoˉseˍ 4:13, 15 gʼaw sheˍ.
16 Yaꞈ hkʼaˇ, ngaˬ hui Gʼuiˬ sha ve kanˉ te ve hkʼaw uiˍ la mvuh la leh hkʼaˬ hkʼe te gʼaˇ hteꞈ cheuˬ la tuˬ le? Hkriꞈ yaˇ a shaꞈ teꞈ hkʼaˇ leh Gʼuiˬ sha ve kanˉ te ve hkʼaw hpawnˬ daꞈ htaˇ ngaˬ hui henˇ ve htaꞈ a yeˇ gʼa yuˬ ve yoˬ. Hpawnˬ daꞈ ve chi ngaˬ hui hkʼa dehꞈ yuˬ yehˇ gʼa leh hto toˇ puiˉ la tuˬ maˍ laˇ ve yoˬ. Tawˇ pa haˉ te kʼo, liꞈ henˇ yaˇ te jawˬ ve htaꞈ mui hkʼawˇ mui paˍ beˆ maˍ piˇ htaˇ, ngaˬ hui hto toˇ puiˉ la tuˬ awˬ hkʼaˇ gʼa henˇ ve yoˬ. Beˆ maˍ laˇ ve chi ngaˬ hui gʼuˇ suhˍ teˇ pawˆ Gʼuiˬ sha ve mvuhˇ miˬ hto toˇ˗e htaˇ yuˬ yehˇ gʼa ve yoˬ. Gʼuiˬ sha ve kanˉ te laˬ maw jaˇ˗oˬ ve chaw, gʼuˇ suhˍ peuˍ ve chaw, maˇ heˆ leh toˇ nyi shehˍ hpaˇ geh teˇ geh gʼa hto toˇ tuˬ, hto toˇ ve awˬ moˍ ehˉ hkʼaw nyi haꞈ shaˉ paˍ ga laˇ tuˬ ngaˬ hui lawˬ gʼa ve yoˬ. Maˍ piˇ tuˬ ve laꞈ caˉ hkʼaw ve liꞈ kʼoˆ teˇ hpaˍ ngaˬ hui yehˇ puiˉ la htaˇ hto toˇ leh maˍ ve hkʼaw ha lehˬ tuˬ yoˬ.
17. Nawˬ Gʼuiˬ sha ve kanˉ biˇ la htaˇ hkʼa gaˬ te ve kʼo, aˬ htoꞈ ma gʼa tuˬ le?
17 Yaˬhoˉvaˬ geh kanˉ “teˇ geh” gʼa te ve lehˬ daꞈ jaˇ ve awˬ vuiˬ hpehꞈ ve yoˬ! (1 Kawˇrenˍhtuˆ 3:9) Aˬ htoꞈ ma a yeˇ uiˍ ve awˉ lawˉ nawˬ shiˍ leh, a shaꞈ teꞈ kuiˬ hkʼaw Gʼuiˬ sha ve kanˉ te ve a yeˇ uiˍ jaˇ tehꞈ nawˬ shawˍ ve kʼo, Yaˬhoˉvaˬ htaꞈ oˉ kʼoˍ pui ve ha lehˬ jaˇ tuˬ yoˬ. (Hpiˇliˇpiˆ 1:10; Chiˇ mvuh ve 100:2) Nawˬ Gʼuiˬ sha ve kanˉ te ve chaw hpehꞈ ve kʼo, shoꞈ shaꞈ ve gʼa hpuˇ ve htawˇ te gʼa ve hkʼe ceh te leh, nawˬ Gʼuiˬ sha ve kanˉ biˇ la htaˇ hkʼa gaˬ te gʼa tuˬ nawˬ loˍ ve hkʼe Gʼuiˬ sha ga laˇ tuˬ yoˬ tehꞈ yonˍ gʼa ve yoˬ. (2 Kawˇrenˍhtuˆ 4:1, 7; 6:4) Nawˬ hkʼa dehꞈ hto toˇ maˇ gʼa ve htawˇ, nawˬ nyi ma awˬ tawˬ hkʼa gaˬ te ve kʼo “ha lehˬ tuˬ yoˬ.” (Gaˍlaˍtiˆ 6:4) Nawˬ Gʼuiˬ sha ve kanˉ biˇ la htaˇ hkʼa gaˬ te ve kʼo, Yaˬhoˉvaˬ leh awˬ chawˇ awˬ paˆ htaꞈ haꞈ ve tehꞈ hpeuꞈ maw piˇ ve yoˬ. “Nawˬ awˬ to htaꞈ maˇ kʼoˆ, nawˬ ve hkawˇ htaꞈ gʼa kaˇ ve chaw teˇ hpaˍ htaꞈ maˇ kʼoˆ, nawˬ htaiˍ hkʼawꞈ piˇ tuˬ yoˬ.”—1 Tiˆmoˉseˍ 4:16.
KʼA MUIˬ HKAWˇ 58 Teˇ chaw ceuˬ le le geh ca hto toˇ ve
^ Ngaˬ hui Gʼuiˬ sha ve mvuhˇ miˬ hto toˇ leh shu awˬ laꞈ gʼawˇ hpehꞈ la tuˬ te ve awˬ vuiˬ cawˬ ve yoˬ. Ngaˬ hui shoꞈ shaꞈ ve laiˉ ceuˬ cawˬ ve htawˇ, ngaˬ hui Gʼuiˬ sha ve kanˉ biˇ la htaˇ hkʼa gaˬ te tuˬ awˬ lawn chi ve hkʼaw awˬ hkʼaˇ maˍ laˇ tuˬ yoˬ. Ngaˬ hui hto toˇ ve hkʼa dehꞈ te puiˉ la tuˬ leh, hkʼaˬ hkʼe te ha lehˬ gʼa tuˬ kaꞈ henˇ tuˬ yoˬ.
^ KʼAWꞈ KʼOˆ MAˍ TAˍ VE: Ngaˬ hui Gʼuiˬ sha ve kanˉ te ve tcuhˉ kuiˬ lehˬ hto toˇ leh maˍ ve, Gʼuiˬ sha ve kanˉ hkʼaˇ yehˬ te ve hpawˇ haꞈ shaˉ ve, leh tuꞈ ve hkanˍ ve teˇ ceuˬ le le hpawˇ gʼa hpuˇ chehˇ ve htaꞈ ga piˇ ve yoˬ.—2 Kawˇrenˍhtuˆ 5:18, 19; 8:4.
^ Shaw nyi kuiˬ Taꞈ yehˬ Ha pa 7 maˬ 2016 hkʼawꞈ liꞈ mehˆ hpfuhˇ 10 hkʼaw ve awˇ ceˍ awˇ fa “A shaꞈ teꞈ hkʼaˇ caˇ lawꞈ dawˬ lawꞈ te ve” hkʼaw kʼoˆ maˍ laˇ taˍ ve awˬ hkʼaˇ 7 hkʼaˇ htaꞈ nyi sheˍ.
^ AWˬ HAN HTAꞈ KʼOˆ MAˍ TAˍ VE: Awˬ viˉ awˬ nyi yaˇ miˇ teˇ gʼaˇ mvuhˇ hpeuꞈ haˉ hpawnˬ daꞈ ve hkʼaw ca kʼawꞈ guiˇ˗e ve te ve. Peuˬ hkʼawꞈ nawˉ mui hkʼawˇ mui paˍ beˆ maˍ piˇ ve htaꞈ yawˇ ve Gʼaw ve leh maˍ ve liꞈ kʼoˆ hkʼaw bvuhꞈ keu ve. Peuˬ leh hkawꞈ nyi shinˉ nyi hto toˇ˗e htaˇ, hpawnˬ daꞈ kuiˬ hkʼaw gʼa henˇ taˍ ve htaꞈ yawˇ yuˬ yehˇ ve.
