1-2. (a) Saˍtanˍ chaw yaˇ htaꞈ hkʼaˬ hkʼe heˍ ve le? (b) Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

 Saˍtanˍ ‘heˍ ve awˬ pa hpehꞈ ve yoˬ.’ Yawˇ Aˍdanˍ leh Eˇvaꞈ htaꞈ tanˬ heˍ ve yoˬ. (Yoˇhanˬ 8:44) Yawˇ heˍ ve teˇ hpaˍ lehˬ suh ve leh suh peuˬ hkʼawꞈ nawˉ hkʼaˬ hkʼe hpehꞈ ve kaꞈ maˍ ve yoˬ. Maˇ heˆ heˆ maˍ ve chi laiˉ gʼaˇ dawˇ cawˇ ve chaw liˇ vaˇ liˇ leh, awˬ bon daꞈ maˇ daꞈ ve htaꞈ yonˍ ve cawˬ tuˬ te laˇ ve yoˬ. Hkʼe te leh, ngaˬ hui ve awˬ viˉ awˬ nyi teˇ hpaˍ yehˬ kʼa hkʼaw ve chaw maˇ heˆ leh awˬ paˇ awˬ kui chehˇ ve chaw suh˗e htaˇ, yawˇ hui ‘yonˍ ve teˇ ceuˬ awˬ pon gʼaˇ hteꞈ te’ ve yoˬ.—Yuˇdaꞈ 3.

² Nawˬ beˬ ve lawˇ ve gʼa hpuˇ htaˇ, Liꞈ hpu hkʼaw suh ve htaꞈ caˉ daꞈ ve yonˍ yeˬ tuˬ aˬ htoꞈ ma ga laˇ ve le? (Eˇfeˇsuꞈ 6:11) Hkriꞈ yaˇ teˇ hpaˍ Gʼuiˬ sha maˇ dawˇ cawˇ ve awˬ liˇ awˬ hkʼaˇ te tuˬ shu nyiˉ piˇ ve yoˬ hehˉ. Yawˇ hui htaꞈ awˬ gʼaˇ piˇ tuˬ aˬ htoꞈ ma te gʼa ve le? Yaˬhoˉvaˬ hkʼaˬ hkʼe ga laˇ gʼa ve teˇ geh henˇ tuˬ yoˬ. Awˉ lawˉ htaˇ suh peuˬ ve htaꞈ caˉ daꞈ ve Liꞈ hpu hkʼaw hkʼaˬ hkʼe kʼoˆ ve teˇ geh nyi sheˍ.

3. Awˉ lawˉ teˇ pawˆ heˍ peuˬ hkʼawꞈ nawˉ aˬ htoꞈ ma hpehꞈ la ve le?

³ Gʼuiˬ sha chaw yaˇ htaꞈ maˇ suh tcuh gaˇ. Yaꞈ hkʼaˇ, Aˍdanˍ Eˇvaꞈ co co taiˍ taiˍ teꞈ chehˇ tuˬ Yaˬhoˉvaˬ hkawˇ gʼa na yuˬ ve yoˬ. Gʼuiˬ sha kʼoˆ ve, “daꞈ ve leh maˇ daꞈ ve htaꞈ shiˍ puiˉ ve suhˆ cehˬ oˇ ve teˇ cehˬ ve awˬ shiˍ htaꞈ nawˬ taˇ caˇ. Nawˬ lehˬ suhˆ cehˬ oˇ ve teˇ cehˬ ve awˬ shiˍ htaꞈ caˇ ve kʼo, awˬ tehˬ awˬ na gʼa suh tuˬ yoˬ.” Chi gʼaꞈ te tuˬ maˇ haˍ. (Awˬ hkuiˉ puiˍ 2:16, 17) Peuˬ leh Saˍtanˍ shoꞈ shaꞈ tuˬ te ve yoˬ. Yawˇ vuiˬ htaꞈ cuˇ leh Eˇvaꞈ htaꞈ kʼoˆ piˇ tcuh ve, “nawˬ hui maˇ suh taˬ.” Chi htaꞈ Eˇvaꞈ na leh iˉ shiˍ caˇ ve nyi ma luˬ jaˇ. Aˍdanˍ kaꞈ caˇ ve yoˬ. (Awˬ hkuiˉ puiˍ 3:4, 6) Hkʼe te leh venˇ baˆ leh suh ve chaw yaˇ ve yehˬ kʼa hkʼaw tanˬ cawˬ la ve yoˬ.—Roˉmaꞈ 5:12.

4-5. Saˍtanˍ caˉ leh chaw yaˇ htaꞈ hkʼaˬ hkʼe heˍ ve le?

 ⁴ Gʼuiˬ sha kʼoˆ taˍ ve hkʼe Aˍdanˍ Eˇvaꞈ suh˗e ve yoˬ. Yaꞈ hkʼaˇ, Saˍtanˍ suh ve htaꞈ caˉ daꞈ ve heˍ chehˇ sheˍ. Peuꞈ leh yawˇ laiˉ ceuˬ kʼawꞈ heˍ ve yoˬ. Teˇ ceuˬ lehˬ suh peuˬ hkʼawꞈ nawˉ awˬ to hkʼaw awˬ han tawˆ˗e leh kʼawꞈ teꞈ chehˇ gʼa ve tehꞈ kʼoˆ ve yoˬ. Chi ve lehˬ suh mvuhˇ miˬ lo chehˇ ve yoˬ hehˉ. Chi beuꞈ hkʼa gaˬ heˍ ve chi laiˉ ceuˬ cawˬ leh chaw yaˇ maˇ maˇ htaꞈ heˍ ve yoˬ.—1 Tiˆmoˉseˍ 4:1.

⁵ Aˬ htoꞈ ma pa taw chaw yaˇ laiˉ gʼaˇ heˍ ve htaꞈ gʼa hpuˇ ve le? Chaw yaˇ hkʼaˬ hkʼe dawˇ ve Saˍtanˍ shiˍ ve pa taw, yawˇ chi ve htaꞈ yehˇ leh heˍ ve yoˬ. Ngaˬ hui co co taiˍ taiˍ chehˇ tuˬ hpanˍ taˍ laˇ ve pa taw, maˇ suh gaˇ. (Cuˇ yiˍ piˇ ve 3:11) Ngaˬ hui awˬ pon kʼo suh ve lehˬ canˇ paˍ hpehꞈ ve yoˬ.—1 Kawˇrenˍhtuˆ 15:26.

6-7. (a) Saˍtanˍ coˇ caˇ leh suh ve htaꞈ caˉ daꞈ ve awˬ tehˬ ve yawˇ heˍ gʼa˗aw laˇ? Kʼoˆ maˍ laˇ sheˍ. (b) Suh˗oˬ ve htaꞈ ngaˬ hui maˇ gʼa kawˆ tuˬ Liꞈ hpu hkʼaw awˬ tehˬ ve aˬ htoꞈ ma maˍ laˇ ve le?

⁶ Saˍtanˍ coˇ caˇ jaˇ ve htawˇ, suh ve htaꞈ caˉ daꞈ ve awˬ tehˬ ve cawˬ sheˍ. Liꞈ hpu hkʼaw kʼoˆ taˍ ve hkʼe suh ve htaꞈ caˉ daꞈ ve awˬ tehˬ ve, leh suh˗oˬ ve chaw dawˇ law kuiˬ, laiˉ gʼaˇ shiˍ leh hto toˇ chehˇ ve yoˬ. (Cuˇ yiˍ piˇ ve 9:5, 10; Tcuh yaˇ 24:15) Suh˗oˬ ve htaꞈ maˇ kawˆ leh, suh˗oˬ ve chaw hkʼaˬ hkʼe hpehꞈ ve htawˇ dawˇ nawˬ dawˇ maˇ cawˬ tuˬ awˬ tehˬ ve chi ga laˇ ve yoˬ. Yawˇ hui a shaꞈ maˇ teꞈ, maˇ daꞈ ve maˇ gʼa hpuˇ, leh shu htaꞈ kaꞈ te luˬ maˇ gʼa tehꞈ ngaˬ hui shiˍ ve yoˬ. Zuhꞈ mehˬ jaˇ ve htaꞈ shuˍ ve yoˬ. (Yoˇhanˬ 11:11-14) Suh˗oˬ ve chaw lehˬ awˬ yanˇ hkʼaˬ hkʼe maw ponˬ kʼai˗oˬ ve maˇ shiˍ ve ngaˬ hui kaꞈ shiˍ ve yoˬ. Hkʼe te leh kʼawꞈ teꞈ tu la piˇ htaˇ, laiˉ gʼaˇ laiˉ ha hkʼawꞈ suh˗oˬ ve htawˇ, awˬ yanˇ chi ve mehˆ teˇ meꞈ tiˉ ve hkʼe yawˇ hui dawˇ tuˬ yoˬ.

⁷ Suh˗oˬ ve htaꞈ caˉ daꞈ ve awˬ tehˬ ve htaꞈ hkʼa dehꞈ na gʼa ve awˬ hkʼaˇ cawˬ ve yoˬ. Nawˬ chi hkʼe dawˇ˗aw laˇ? Chi ve lehˬ Saˍtanˍ heˍ ve htaꞈ maˇ shuˍ daꞈ! Tawˇ hkawˇ chi chaw yaˇ htaꞈ heˍ ve yoˬ. Chi hkʼoˆ kaꞈ hpanˍ shehˍ hpaˇ htaꞈ she pfuhˍ piˇ ve yoˬ. Saˍtanˍ heˍ ve chi luˬ tuˬ hkʼaˬ hkʼe taw te laˇ ve ngaˬ hui shiˍ tuˬ awˬ lawn chi ve hkʼaw teˇ geh henˇ tuˬ yoˬ. Saˍtanˍ heˍ ve Yaˬhoˉvaˬ htaꞈ hkʼaˬ hkʼe she pfuhˍ piˇ ve le? Heˍ ve chi laiˉ gʼaˇ Yeˍsuˆ htaiˍ hkʼawꞈ laˇ ve htaꞈ maˇ yonˍ tuˬ hkʼaˬ hkʼe te piˇ ve le? Heˍ ve chi chaw yaˇ nyi ma luˬ leh tuꞈ jaˇ hkanˍ jaˇ tuˬ hkʼaˬ hkʼe te piˇ ve le?

8. Yeˍraˍmiˆ liꞈ 19:5 hkʼaw kʼoˆ taˍ ve hkʼe, suh ve htaꞈ caˉ daꞈ ve Saˍtanˍ heˍ ve Yaˬhoˉvaˬ htaꞈ hkʼaˬ hkʼe she pfuhˍ piˇ ve le?

⁸ Suh ve htaꞈ caˉ daꞈ ve Saˍtanˍ heˍ ve Yaˬhoˉvaˬ  htaꞈ she pfuhˍ piˇ ve yoˬ. Chi lehˬ suh˗oˬ ve kʼo, aˬ miˍ buiˬ hpfuh hkʼaw gʼa hkanˍ ve maˇ heˆ heˆ ve bon maˍ ve htaꞈ kʼoˆ gaˇ ve yoˬ. Maˍ ve chi Gʼuiˬ sha ve awˬ meh luˬ tuˬ te piˇ ve yoˬ! Aˬ htoꞈ ma pa taw le? Awˬ lawn kʼo, haꞈ pehnˇ uiˍ jaˇ ve Gʼuiˬ sha ve te hkʼaˇ dawˇ hkʼaˇ Saˍtanˍ hkʼe cawˬ ve htaꞈ shuˍ ve yoˬ. (1 Yoˇhanˬ 4:8) Chi nawˬ hkʼaˬ hkʼe dawˇ ve le? Yaˬhoˉvaˬ chi htaꞈ hkʼaˬ hkʼe dawˇ ve le? Awˬ tehˬ kʼo, haiˬ ve teˇ ceuˬ le le htaꞈ yawˇ maˇ dawˇ cawˇ.—Yeˍraˍmiˆ 19:5 gʼaw sheˍ.

9. Yoˇhanˬ liꞈ 3:16 leh 15:13 hkʼaw kʼoˆ taˍ ve Yeˍsuˆ htaiˍ hkʼawꞈ laˇ ve htaꞈ maˇ yonˍ tuˬ, Saˍtanˍ heˍ ve hkʼaˬ hkʼe te laˇ ve le?

⁹ Suh ve htaꞈ caˉ daꞈ ve Saˍtanˍ heˍ ve Yeˍsuˆ htaiˍ hkʼawꞈ ve htaꞈ hkʼa dehꞈ maˇ yonˍ tuˬ te laˇ ve yoˬ. (Maꞈhtehˍ 20:28) Heˍ ve awˬ nu ve teˇ ceuˬ lehˬ chaw yaˇ maˇ suh puiˉ ve awˬ ha ku cawˬ ve yoˬ. Chi awˬ tehˬ hpehꞈ ve kʼo, teˇ gʼaˇ le le co co taiˍ taiˍ teꞈ chehˇ gʼa leh Yeˍsuˆ htaiˍ hkʼawꞈ laˇ tuˬ maˇ loˍ. Yeˍsuˆ chi hkʼe te laˇ ve chaw yaˇ awˬ pon a yeˇ uiˍ jaˇ ve tehꞈ taˇ leunˇ. (Yoˇhanˬ 3:16; 15:13 gʼaw sheˍ.) Maˍ ve chi awˬ hpfuhˇ hkʼaˆ jaˇ ve laꞈ shawnˍ, awˬ hpfuhˇ maˇ cawˬ tuˬ te laˇ ve yoˬ. Yaˬhoˉvaˬ leh Yeˍsuˆ hkʼaˬ hkʼe dawˇ ve htaꞈ dawˇ nyi sheˍ!

10. Suh ve htaꞈ caˉ daꞈ ve Saˍtanˍ heˍ ve chaw yaˇ nyi ma luˬ leh tuꞈ hkanˍ jaˇ tuˬ hkʼaˬ hkʼe te piˇ ve le?

¹⁰ Saˍtanˍ heˍ ve chi chaw yaˇ nyi ma luˬ leh tuꞈ hkanˍ ve cawˬ tuˬ te piˇ ve yoˬ. Yaˇ suh˗e htaˇ, Gʼuiˬ sha mvuhˇ naw ma tcuh yaˇ loˍ leh yaˇ htaꞈ yuˬ kʼai ve tehꞈ shu kʼoˆ piˇ ve yoˬ hehˉ. Saˍtanˍ heˍ ve chi nyi ma sha tuˬ maˇ heˆ leh nyi ma luˬ jaˇ tuˬ te piˇ ve laˇ? Aˬ miˍ buiˬ hpfuh hkʼaw tuꞈ jaˇ hkanˍ jaˇ ve maˇ heˆ heˆ maˍ ve chi nyi˗a kʼo, hpehꞈ kʼai gʼa ve htaꞈ shuˍ˗aˬ. Chi bon yehˬ hkʼaw maˍ ve maˇ na yuˬ ve chaw htaꞈ awˬ teꞈ teꞈ tuˉ baˬ ve htaꞈ kaꞈ kʼoˆ gaˇ ve yoˬ. Shaˉ nanˉ Yonˍ hkʼaˇ meh ve Saˬpenˬ mvuhˇ miˬ hkʼaw cawˬ ve htaꞈ caˉ daꞈ ve liꞈ kʼoˆ teˇ kʼoˆ hkʼaw kʼoˆ ve, haiˬ ve chaw lehˬ bon yehˬ hkʼaw maˍ ve htaꞈ maˇ na yuˬ ve chaw htaꞈ ga piˇ chehˇ ve tehꞈ yonˍ ve yoˬ. Chaw oˇ ve teˇ gʼaˇ htaꞈ awˬ teꞈ teꞈ tuˉ baˬ htaˇ, “aˬ miˍ buiˬ hpfuh” hkʼaˬ hkʼe kʼai ve yawˇ lawˇ nyi ve yoˬ. Yawˇ maˇ suh sheˍ htaˇ venˇ baˆ dawˇ hpfuhˆ leh awˬ tehˬ awˬ na aˬ miˍ buiˬ hpfuh hkʼaw maˇ gʼa loꞈ˗e tuˬ yoˬ hehˉ. Laiˉ mvuhˇ miˬ hkʼaw awˬ puˍ awˬ pi lonˉ htaꞈ oˉ kʼoˍ gʼa pui ve, gʼa yawˆ yan ve, maˇ heˆ leh awˬ bon gʼa tuˬ gʼa lawˬ ve tehꞈ yawˇ hui yonˍ ve yoˬ. Laiˉ gʼaˇ tuꞈ ve hkanˍ ve htaꞈ maˇ hpuˇ gaˇ ve pa taw, awˬ puˍ awˬ pi lonˉ nyi hkʼaˇ suh tuˬ te ve yoˬ. Saˍtanˍ heˍ ve htaꞈ yonˍ ve chaw, yawˇ hui nyi ma sha tuˬ te piˇ ve maˇ heˆ. Yaꞈ hkʼaˇ, chi ve teˇ hpaˍ yawˇ hui kawˆ tuˬ te piˇ ve yoˬ.

11. Ngaˬ hui ve awˬ suhˍ awˬ shaˍ hpawˇ ve awˬ viˉ awˬ nyi leh awˬ chawˇ Gʼuiˬ sha ve tawˇ hkawˇ htaꞈ maˇ gʼaꞈ te tuˬ hkʼaˬ hkʼe nyiˉ laˇ ve le?

¹¹ Awˬ suhˍ awˬ shaˍ hpawˇ ve awˬ viˉ awˬ nyi leh awˬ chawˇ Liꞈ hpu hkʼaw maˇ hawˍ daꞈ ve, suh˗oˬ ve htaꞈ caˉ daꞈ ve chaw liˇ vaˇ liˇ yawˇ hui geh te tuˬ nyiˉ laˇ ve yoˬ hehˉ. Yaꞈ hkʼaˇ, ngaˬ hui Yaˬhoˉvaˬ leh Liꞈ hpu htaꞈ haꞈ ve pa taw, yawˇ ve hkawˇ na yuˬ gaˇ ve yoˬ. Yawˇ hui coˇ caˇ leh yaꞈ tawˍ tuˬ kaꞈ te laˇ ve yoˬ. Ngaˬ hui suh˗oˬ ve htaꞈ maˇ yawˆ yan ve tehꞈ kʼoˆ laˇ ve yoˬ hehˉ. Chi hkʼe te ve kʼo, suh˗oˬ ve teꞈ chehˇ ve chaw htaꞈ te luˬ la ve tehꞈ yawˇ hui kʼoˆ sheˍ ve yoˬ hehˉ. Liꞈ hpu hkʼaw awˬ tehˬ ve htaꞈ hkʼaˬ hkʼe te haꞈ shaˉ gʼa tuˬ le? Awˬ liˇ awˬ hkʼaˇ chi nawˬ hkʼaˬ hkʼe te yehˇ gʼa tuˬ teˇ geh nyi sheˍ.

12. Liꞈ hpu hkʼaw maˇ hawˍ daꞈ ve suh˗oˬ ve htaꞈ caˉ daꞈ ve awˬ liˇ awˬ hkʼaˇ aˬ htoꞈ ma cawˬ ve le?

¹² Yonˍ ve leh chaw liˇ vaˇ liˇ Liꞈ hpu htaꞈ maˇ hawˍ daꞈ ve geh ngaˬ hui “hpaˆ daꞈ chehˇ taˍ˗oꞈ.” (2 Kawˇrenˍhtuˆ 6:17) Kaˬriˆbiˬyanˬ mvuhˇ miˬ hkʼaw laiˉ gʼaˇ yonˍ ve, chaw teˇ gʼaˇ suh˗oˬ ve kʼo “awˬ ha ku” oˇ kaˬ lo chehˇ leh yawˇ htaꞈ maˇ daꞈ ve te laˇ ve chaw htaꞈ te luˬ piˇ ve yoˬ. Liꞈ kʼoˆ teˇ kʼoˆ  hkʼaw kʼoˆ ve, “awˬ ha ku chi ve oˇ kaˬ lo chehˇ ve chaw htaꞈ kaꞈ shoꞈ shaꞈ tuˬ te piˇ ve yoˬ.” Aˍfaˍriˆkaˆ miˬ guiˬ lo suh˗oˬ ve chaw yehˬ hkʼaw mehˆ gʼeuˆ htaꞈ hoˆ beh leh awˬ han gʼoꞈ pa hpawˇ lo hpfuhˆ peu ve yoˬ. Aˬ htoꞈ ma pa taw le? Laiˉ gʼaˇ kʼoˆ ve suh˗oˬ ve chaw a shu yawˇ awˬ to htaꞈ maˇ mawˬ cawˇ! Ngaˬ hui Yaˬhoˉvaˬ ve chaw hpehꞈ ve pa taw, Saˍtanˍ heˍ ve htaꞈ caˉ daꞈ ve kaˇ puiˇ kaˇ lao maˇ yonˍ leh maˇ gʼaꞈ te!—1 Kawˇrenˍhtuˆ 10:21, 22.

13. Yaˍkoˆ liꞈ 1:5 hkʼawꞈ kʼoˆ taˍ ve hkʼe, Awˬ liˇ awˬ hkʼaˇ teˇ ceuˬ ceuˬ nawˬ hkʼa dehꞈ maˇ yonˍ gʼa ve kʼo, hkʼaˬ hkʼe te cawˇ ve le?

¹³ Awˬ liˇ awˬ hkʼaˇ teˇ ceuˬ ceuˬ te gʼa ve leh naˍ maˇ shiˍ ve kʼo, Yaˬhoˉvaˬ geh cuˇ yiˍ lawˬ sheˍ. (Yaˍkoˆ 1:5 gʼaw sheˍ.) Ngaˬ hui ve liꞈ kʼoˆ teˇ hpaˍ htaꞈ hpfuhˆ nyi sheˍ. Hpehꞈ gʼa ve kʼo, Hkriꞈ yaˇ awˬ moˍ hkʼaw nyi haꞈ shaˉ paˍ htaꞈ na nyi sheˍ. Nawˬ hkʼaˬ hkʼe te cawˇ ve yawˇ hui maˇ kʼoˆ laˇ. Yaꞈ hkʼaˇ, ngaˬ hui henˇ peuˬ ve hkʼe yawˇ hui Liꞈ hpu hkʼaw hawˍ daꞈ ve awˬ liˇ awˬ hkʼaˇ nawˬ htaꞈ beˆ maˍ laˇ tuˬ yoˬ. Nawˬ chi hkʼe te ve kʼo, “puiˉ la tuˬ laiˉ pawˆ te jawˬ” leh “daꞈ ve leh maˇ daꞈ ve htaꞈ fuiˍ daꞈ pehˬ daꞈ gʼa” tuˬ chi ga laˇ ve yoˬ.—Heˍbrehˇ 5:14.

14. Ngaˬ hui shu htaꞈ maˇ nyi cha tcuh gaˇ ve kʼo aˬ htoꞈ ma gʼa te cawˇ ve le?

¹⁴ Nawˬ te ve hkʼa peu˗eˬ awˬ hkʼaw lo Gʼuiˬ sha ve awˬ meꞈ awˬ hponˇ tawˆ la tuˬ te˗o. Gʼuiˬ sha ve chaw nyi ma maˇ sha tuˬ taˇ te. (1 Kawˇrenˍhtuˆ 10:31, 32) Awˬ liˇ awˬ hkʼaˇ leh chaw liˇ vaˇ liˇ teˇ ceuˬ ceuˬ ngaˬ hui te tuˬ maˇ te tuˬ dawˇ cheˆ htaˇ, chi awˬ viˉ awˬ nyi leh awˬ nu ve chaw dawˇ shiˍ puiˉ ve nyi ma htaꞈ maˇ gʼa heuˆ tuˬ hkʼaˬ hkʼe te cawˇ ve dawˇ nyi sheˍ. Teˇ gʼaˇ htaꞈ kaꞈ maˇ nyi cha tcuh gaˇ! (Maˍkuˆ 9:42) Chi hkʼoˆ kaꞈ, Shaˉhkiˆhkanˍ ve chaw maˇ hpehꞈ ve chaw htaꞈ beuꞈ tuˬ maˇ te piˇ gaˇ. Yawˇ hui htaꞈ haꞈ ve kʼo yawˆ yan ve hkʼaw tawˇ yaw piˇ ve yoˬ. Chi hkʼe te ve kʼo, Yaˬhoˉvaˬ awˬ meꞈ awˬ hponˇ gʼa tuˬ yoˬ. Yawˇ hui htaꞈ maˇ deˇ leh chaw liˇ vaˇ liˇ htaꞈ maˇ kʼoˆ guiˇ piˇ. Haꞈ pehnˇ ve lehˬ kanˇ paˆ cawˬ jaˇ ve tehꞈ taˇ leunˇ piˇ! Ngaˬ hui haꞈ pehnˇ ve cawˬ ve kʼo, shu geh tawˇ yaw daꞈ htaˇ yawˆ yan piˇ ve yoˬ. Chi hkʼe te htaˇ, tawˍ laˇ paˍ ve nyi ma nuˇ tuˬ te piˇ gʼa ve yoˬ hehˉ.

15-16. (a) Aˬ htoꞈ ma te nawˬ ve yonˍ hkʼaˇ shu htaꞈ kʼoˆ maˍ piˇ ve cuˇ yiˍ cawˬ ve le? Tawˇ pa haˉ kʼoˆ maˍ laˇ sheˍ. (b) Pawˇluꞈ ve tawˇ hkawˇ Roˉmaꞈ liꞈ 1:16 hkʼaw kʼoˆ taˍ ve hkʼe ngaˬ hui htaꞈ hkʼaˬ hkʼe caˉ daꞈ ve le?

¹⁵ Nawˬ chehˇ kuiˬ awˬ paˇ lo ve chaw htaꞈ nawˬ Yaˬhoˉvaˬ ve Shaˉhkiˆhkanˍ ve chaw hpehꞈ ve tehꞈ shiˍ tcuh sheˍ. (Iˉsaˍyaˆ 43:10) Nawˬ viˉ nawˬ nyi nawˬ Yaˬhoˉvaˬ htaꞈ oˉ kʼoˍ pui ve shiˍ htaˇ, nyi ma maˇ sha ve awˬ lawn cawˬ ve kʼo nawˬ  haꞈ yuˬ sha ve yoˬ. Moˬzanˇbiˆ mvuhˇ miˬ hkʼaw chehˇ ve awˬ viˉ awˬ nyi teˇ gʼaˇ Fanˬsiˆkoˬ kʼoˆ ve, “ngaˬ miˇ ma Hkeh˗ro˗laiˇna Liꞈ hpu tanˬ henˇ htaˇ, ngaˬ hui suh˗oˬ ve htaꞈ oˉ kʼoˍ maˇ kʼawꞈ pui˗o ve tehꞈ yehˬ kʼa hkʼaw ve chaw htaꞈ kʼoˆ piˇ ve yoˬ. Hkeh˗ro˗laiˇna ve awˬ viˉ ma suh˗e htaˇ ngaˬ hui ve yonˍ hkʼaˇ htaꞈ lawˇ nyi laˇ ve yoˬ. Oˇ kaˬ lo chehˇ ve suh˗oˬ ve htaꞈ iˉ kaˆ hehˉ piˇ ve awˬ liˇ cawˬ ve yoˬ. Peuˬ hkʼawꞈ nawˉ iˉ kaˆ oˇ ve hkehˇ hpu ma lonˉ hkʼaw ngeuˍ keu leh awˬ viˉ awˬ nyi meuˆ daꞈ jaˇ ve oˇ kaˬ lo 3 nyi gʼa zuhꞈ ve yoˬ. Awˬ liˇ awˬ hkʼaˇ chi ve lehˬ suh˗oˬ ve chaw nyi hkʼaˇ suh ve tehꞈ oˇ kaˬ lo chehˇ ve chaw yonˍ ve yoˬ. Hkeh˗ro˗laiˇna ve yehˬ kʼa yawˇ chi hkʼe te tuˬ tehꞈ dawˇ law ve yoˬ.”

¹⁶ Fanˬsiˆkoˬ leh awˬ miˇ ma aˬ htoꞈ ma te ve le? Fanˬsiˆkoˬ kʼoˆ ve, “ngaˬ hui Yaˬhoˉvaˬ htaꞈ haꞈ leh yawˇ nyi hkʼaˇ suh tuˬ te piˇ gaˇ ve pa taw, awˬ liˇ awˬ hkʼaˇ oˇ ve htaꞈ maˇ caˉ daꞈ. Ngaˬ miˇ ma ve yehˬ kʼa hkʼaw ve chaw beuꞈ jaˇ. Ngaˬ hui suh˗oˬ ve htaꞈ maˇ yawˆ yan ve tehꞈ yawˇ hui shawˍ leh, yehˬ kʼa hkʼaw ve chaw ngaˬ hui geh maˇ guiˇ la leh maˇ ga laˇ˗o tehꞈ kʼoˆ laˇ ve yoˬ. Ngaˬ hui ve yonˍ hkʼaˇ kʼoˆ maˍ piˇ˗oˬ ve pa taw, yawˇ hui beuꞈ˗a htaˇ tawˇ maˇ ca yaw˗e. Ngaˬ viˉ ngaˬ nyi teˇ hpaˍ hpaˍ kʼo ngaˬ hui hpawˇ chehˇ leh ngaˬ hui ve yonˍ hkʼaˇ kʼoˆ maˍ piˇ jaw˗oˬ. Maˇ maw Hkeh˗ro˗laiˇna ve awˬ viˉ awˬ nyi kaꞈ nyi ma sha la leh ngaˬ hui teˇ pawˆ kʼawꞈ hawˍ daꞈ ve yoˬ. Awˬ tehˬ kʼo, chaw teˇ hpaˍ ngaˬ hui ve yehˬ lo laˬ leh Liꞈ hpu htaꞈ caˉ daꞈ ve liꞈ kʼoˆ kaꞈ lawˬ ve yoˬ.” Suh ve htaꞈ caˉ daꞈ ve awˬ tehˬ ve ngaˬ hui kʼoˆ maˍ piˇ ve taˇ yaꞈ taw sheˍ.—Roˉmaꞈ 1:16 gʼaw sheˍ.

17. Awˬ viˉ awˬ nyi nyi ma luˬ ve kʼo, awˬ tehˬ ve awˬ chawˇ hpehꞈ gʼa tuˬ ngaˬ hui htaꞈ aˬ htoꞈ ma ga laˇ gʼa ve le?

¹⁷ Awˬ viˉ awˬ nyi yawˇ hui haꞈ ve chaw suh˗e htaˇ, awˬ tehˬ ve awˬ chawˇ lehˬ teˇ gʼaˇ loˍ htaˇ teˇ gʼaˇ maˇ ga daꞈ ve kʼo, awˬ viˉ awˬ nyi hpehꞈ ve htawˇ awˬ bon maˇ cawˬ. (Tawˇ naˉ ve 17:17) Liꞈ hpu hkʼaw maˇ hawˍ daꞈ ve htaꞈ te tuˬ shu awˬ viˉ awˬ nyi htaꞈ nyiˉ piˇ leh nyi ma luˬ chehˇ ve kʼo, ngaˬ hui yawˇ hui geh hkʼaˬ hkʼe te awˬ tehˬ ve awˬ chawˇ hpehꞈ gʼa tuˬ le? Yawˇ hui haꞈ ve chaw suh˗e leh nyi ma luˬ chehˇ ve htaꞈ awˬ gʼaˇ piˇ gʼa tuˬ, Liꞈ hpu ve awˬ liˇ awˬ hkʼaˇ nyiˇ hkʼaˇ ngaˬ hui htaꞈ ga laˇ gʼa ve teˇ geh nyi sheˍ.

18. Aˬ htoꞈ ma te Yeˍsuˆ mehˆ gʼuiˬ yaꞈ la ve le? Yawˇ ve awˬ lawn ngaˬ hui htaꞈ aˬ htoꞈ ma maˍ laˇ ve le?

 ¹⁸ “Hawˬ ve chaw hui geh teˇ geh haw˗oꞈ.” (Roˉmaꞈ 12:15) Chaw teˇ gʼaˇ nyi ma luˬ jaˇ htaˇ, yawˇ geh tawˇ yaw daꞈ tuˬ maˇ sha ve tehꞈ ngaˬ hui dawˇ ve yoˬ hehˉ. Teˇ pawˆ pawˆ kʼo, ngaˬ hui mehˆ gʼuiˬ lehˬ tawˇ yaw ve aꞈ kehˉ daꞈ ve yoˬ. Laˍzaˍruˆ suh˗e htaˇ, Maˍriˆ, Maˍhtaˆ, leh awˬ nu ve chaw yawˇ hui haꞈ ve awˬ nyi paˍ suh˗e htaˇ nyi ma luˬ leh hawˬ ve yoˬ. 4 nyi peuˬ hkʼawꞈ nawˉ Yeˍsuˆ gaˬ˗e htaˇ, Laˍzaˍruˆ htaꞈ kʼawꞈ teꞈ tu la piˇ gʼa ve tehꞈ shiˍ ve htawˇ, Yeˍsuˆ kaꞈ “mehˆ gʼuiˬ yaꞈ la ve yoˬ.” (Yoˇhanˬ 11:17, 33-35) Yeˍsuˆ ve mehˆ gʼuiˬ yawˇ Awˬ pa hkʼaˬ hkʼe dawˇ ve hpeuꞈ maw laˇ ve yoˬ. Yeˍsuˆ yehˬ kʼa chi htaꞈ haꞈ jaˇ ve tehꞈ hpeuꞈ maw laˇ ve yoˬ. Maˍriˆ leh Maˍhtaˆ chi hkʼe gʼa mawˬ htaˇ awˬ gʼaˇ gʼa jaˇ. Chi hkʼa shuˍ awˬ viˉ awˬ nyi yawˇ hui htaꞈ haꞈ leh dawˇ haˍ ve tehꞈ shiˍ tcuh htaˇ, yawˇ hui teˇ gʼaˇ tiˉ chehˇ ve maˇ dawˇ leh awˬ gʼaˇ peꞈ laˇ leh ga laˇ gʼa ve awˬ chawˇ cawˬ ve tehꞈ dawˇ tuˬ yoˬ.

19. Awˬ viˉ awˬ nyi nyi ma luˬ chehˇ ve chaw htaꞈ awˬ gʼaˇ piˇ tuˬ Cuˇ yiˍ piˇ ve liꞈ 3:7 hkʼaw hkʼaˬ hkʼe yehˇ gʼa tuˬ le?

¹⁹ “Taꞈ iˉ gawˬ lehˍ chehˇ tuˬ ve awˬ yanˇ leh tawˇ yaw tuˬ ve awˬ yanˇ” cawˬ ve yoˬ. (Cuˇ yiˍ piˇ ve 3:7) Awˬ viˉ awˬ nyi nyi ma luˬ ve htaꞈ awˬ gʼaˇ piˇ gʼa ve teˇ hkʼaˇ lehˬ hkʼa dehꞈ na taˍ piˇ ve yoˬ. Yawˇ hui kʼoˆ gaˇ ve hkʼe kʼoˆ tcuh sheˍ. Taˇ nyi bawˬ. (Yawˇbaˆ 6:2, 3) Yehˬ kʼa hkʼaw Shaˉhkiˆhkanˍ ve chaw maˇ hpehꞈ ve chaw nyiˉ piˇ ve pa taw, dawˇ haˍ jaˇ ve yoˬ hehˉ. Yawˇ awˬ gʼaˇ gʼa tuˬ, “bon lawˬ hkawˇ htaꞈ na yuˬ laˇ” shehˍ hpaˇ geh lawˬ sheˍ. Yawˇ geh teˇ geh bon lawˬ sheˍ. (Chiˇ mvuh ve 65:2) Te gʼa ve kʼo teˇ geh Liꞈ hpu gʼaw sheˍ. Hpehꞈ laˬ jaw ve awˬ lawn leh ngaˬ hui ve liꞈ kʼoˆ hkʼaw awˬ nu ve liꞈ kaꞈ teˇ geh gʼaw leh awˬ gʼaˇ piˇ gʼa ve yoˬ.

20. Gʼuˇ suh teˇ lawn hkʼaw ngaˬ hui aˬ htoꞈ ma htaꞈ henˇ tuˬ le?

²⁰ Suh˗oˬ ve leh awˬ gʼuˇ suhˍ hpawˇ kʼawꞈ teꞈ tu la ve dawˇ law kuiˬ ngaˬ hui hkʼa dehꞈ gʼa shiˍ ve daꞈ jaˇ. (Yoˇhanˬ 5:28, 29) Chi htaꞈ pa taw, yaw ve leh te ve awˬ tehˬ ve htaꞈ haꞈ shaˉ tuˬ gʼa haꞈ hanˉ ve yoˬ. Awˬ yanˇ cawˬ ve kʼo, chi shu htaꞈ kʼoˆ maˍ piˇ cawˇ ve yoˬ. Saˍtanˍ kʼawꞈ yehˇ sheˍ ve teˇ hkʼaˇ lehˬ chaw yaˇ co ha hpawˇ kawˆ tuˬ te piˇ ve yoˬ. Awˬ hkʼaˇ oˇ ve neˇ teˇ hpaˍ htaꞈ caˉ daꞈ ve yoˬ. Chi gʼuˇ suhˍ teˇ lawn hkʼaw henˇ tuˬ yoˬ. Neˇ teˇ hpaˍ htaꞈ caˉ daꞈ ve te ve leh pyawˍ ve aˬ htoꞈ ma te ngaˬ hui jaw kʼai cawˇ ve le, chi kaꞈ teˇ geh henˇ tuˬ yoˬ.