1-2. Aˬ htoꞈ ma te Yeˍsuˆ dawˇ haˍ jaˇ ve le?

 Yeˍsuˆ miˬ guiˬ hkʼoˆ chehˇ ve awˬ leh meuˇ teˇ nyi htaˇ yawˇ dawˇ haˍ jaˇ. Maˇ maw maw kʼo, chaw haiˬ yawˇ htaꞈ tuꞈ jaˇ hkanˍ jaˇ ve hkʼaw tiˇ pehˍ piˇ tuˬ yoˬ. Yaꞈ hkʼaˇ, Yeˍsuˆ yawˇ suh˗e ve htaꞈ ceh dawˇ haˍ ve maˇ heˆ. Yawˇ Awˬ pa htaꞈ haꞈ jaˇ leh nyi hkʼaˇ suh tuˬ te piˇ gaˇ ve yoˬ. Tuꞈ jaˇ hkanˍ jaˇ ve chi hkʼaw Yeˍsuˆ ka tiꞈ yeˬ ve kʼo, Awˬ pa ve awˬ meh awˬ meꞈ awˬ hponˇ gʼa tuˬ tehꞈ yawˇ shiˍ ve yoˬ. Yeˍsuˆ chaw yaˇ htaꞈ kaꞈ haꞈ ve yoˬ. Yeˍsuˆ suh htaˇ hkʼa gaˬ Yaˬhoˉvaˬ htaꞈ ka tiꞈ yeˬ ve kʼo, chaw yaˇ co co taiˍ taiˍ ve a shaꞈ gʼa tuˬ awˬ hkʼaˇ cawˬ ve tehꞈ yawˇ shiˍ ve yoˬ.

² Yeˍsuˆ dawˇ haˍ jaˇ ve htawˇ, dawˇ sha gaˇ sha ve cawˬ ve yoˬ. Yawˇ tcuh yaˇ htaꞈ kʼoˆ piˇ ve, “dawˇ sha gaˇ sha ve teˇ ceuˬ ngaˬ nawˬ hui htaꞈ teh taˉ laˇ ve yoˬ.” (Yoˇhanˬ 14:27) Gʼuiˬ sha lo laˬ ve dawˇ sha gaˇ sha ve Yeˍsuˆ cawˬ ve yoˬ. Chi ve tcuhˉ kuiˬ lehˬ, Yaˬhoˉvaˬ leh Yeˍsuˆ meuˆ daꞈ jaˇ ve geh laˬ ve dawˇ sha gaˇ sha ve awˬ hpfuhˇ hkʼaˆ jaˇ ve htaꞈ kʼoˆ gaˇ ve yoˬ. Dawˇ sha gaˇ sha ve chi Yeˍsuˆ maˇ gʼa dawˇ haˍ tuˬ ga piˇ ve yoˬ.—Hpiˇliˇpiˆ 4:6, 7.

3. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

³ Yeˍsuˆ hkʼe taw shu nyiˉ piˇ ve teˇ gʼaˇ kaꞈ maˇ gʼa hpuˇ jaw taˬ. Yaꞈ hkʼaˇ, yawˇ ve awˬ laꞈ gʼawˇ teˇ gʼaˇ le le shoꞈ shaꞈ ve gʼa hpuˇ ve yoˬ. (Maꞈhtehˍ 16:24, 25; Yoˇhanˬ 15:20) Yeˍsuˆ hkʼa shuˍ ngaˬ hui kaꞈ teˇ pawˆ pawˆ kʼo dawˇ haˍ ve yoˬ. Ngaˬ hui maˇ gʼa dawˇ haˍ tuˬ, leh dawˇ sha gawˬ lehˍ ve maˇ gʼa mehˉ kʼai tuˬ, hkʼaˬ hkʼe te cawˇ ve le? Yeˍsuˆ miˬ guiˬ hkʼoˆ chehˇ leh Gʼuiˬ sha ve kanˉ te htaˇ, te ve 3 hkʼaˇ htaꞈ dawˇ nyi sheˍ. Ngaˬ hui shoꞈ shaꞈ ve gʼa hpuˇ htaˇ yawˇ htaꞈ hkʼaˬ hkʼe te henˇ yuˬ gʼa ve teˇ geh henˇ tuˬ yoˬ.

4. 1 Hteˇsaˍlawˇniˆ liꞈ 5:17 hkʼaw dawˇ nyi leh Yeˍsuˆ miˬ guiˬ hkʼoˆ chehˇ ve awˬ leh meuˇ teˇ nyi htaˇ, yawˇ hkʼaˬ htaˆ kaꞈ bon lawˬ ve tawˇ pa haˉ kʼoˆ maˍ laˇ sheˍ.

⁴ 1 Hteˇsaˍlawˇniˆliꞈ 5:17 gʼaw sheˍ. Yeˍsuˆ miˬ guiˬ hkʼoˆ chehˇ ve awˬ leh meuˇ teˇ nyi htaˇ, hkʼaˬ htaˆ kaꞈ bon lawˬ ve yoˬ. Yeˍsuˆ yawˇ suh˗e ve dawˇ nawˇ tuˬ hpawnˬ daꞈ ve te htaˇ, hkaoˍ monˇ leh a pehˉ meuˇ gʼuiˬ awˬ pon yawˇ bon htaꞈ chiˇ mvuh ve yoˬ. (1 Kawˇrenˍhtuˆ 11:23-25) Paˍsaˍhkaˍ pawehˇ te ve hkʼaw maˇ tawˆ˗e sheˍ htaˇ, yawˇ kaꞈ tcuh yaˇ geh bon lawˬ ve yoˬ. (Yoˇhanˬ 17:1-26) Yeˍsuˆ leh tcuh yaˇ oˇ ve teˇ haˉ Shaˍlonˍ hkʼaw hkʼoˆ lo gaˬ˗e htaˇ, yawˇ bon laiˉ pawˆ lawˬ ve yoˬ. (Maꞈhtehˍ 26:36-39, 42, 44) Yeˍsuˆ maˇ suh sheˍ htaˇ awˬ leh meuˇ teˇ pawˆ tawˇ yaw ve lehˬ bon lawˬ ve yoˬ. (Luˉkaꞈ 23:46) Awˬ leh meuˇ teˇ nyi yawˇ gʼa hpuˇ ve hkʼa peu˗eˬ, Yeˍsuˆ bon lawˬ ve hkʼaw Yaˬhoˉvaˬ htaꞈ kʼoˆ piˇ ve yoˬ.

5. Aˬ htoꞈ ma te tcuh yaˇ haꞈ hanˉ ve hkʼa dehꞈ maˇ cawˬ ve le?

⁵ Yeˍsuˆ yawˇ Awˬ pa htaꞈ gʼaˇ va leh bon lawˬ ve pa taw, shoꞈ shaꞈ ve htaꞈ yeunˇ hkanˍ gʼaˇ ve yoˬ. Yaꞈ hkʼaˇ, tcuh yaˇ chi hkʼe maˇ te. Yawˇ hui oˇ ve teˇ haˉ bon hkʼa dehꞈ maˇ lawˬ. Yawˇ hui shoꞈ shaꞈ ve gʼa hpuˇ htaˇ haꞈ hanˉ ve hkʼa dehꞈ maˇ cawˬ. (Maꞈhtehˍ 26:40, 41, 43, 45, 56) Ngaˬ hui shoꞈ shaꞈ ve gʼa hpuˇ htaˇ Yeˍsuˆ htaꞈ henˇ yuˬ leh “bon lawˬ leh shaw taˍ” ve kʼo, ka tiꞈ yeˬ tuˬ yoˬ. Ngaˬ hui aˬ htoꞈ ma awˬ pon bon lawˬ gʼa ve le?

6. Yonˍ ve ngaˬ hui dawˇ sha gaˇ sha ve cawˬ tuˬ hkʼaˬ hkʼe ga laˇ gʼa ve le?

⁶ Ngaˬ hui “yonˍ ve teˇ ceuˬ maˇ la tuˬ” Yaˬhoˉvaˬ geh bon lawˬ gʼa ve yoˬ. (Luˉkaꞈ 17:5; Yoˇhanˬ 14:1) Saˍtanˍ lehˬ Yeˍsuˆ ve awˬ laꞈ gʼawˇ hkʼa peu˗eˬ htaꞈ lawˇ nyi piˇ tuˬ ve pa taw, ngaˬ hui yonˍ ve gʼa cawˬ cawˇ ve yoˬ. (Luˉkaꞈ 22:31) Ngaˬ hui shoꞈ shaꞈ ve laiˉ ceuˬ gʼa hpuˇ htaˇ, yonˍ ve lehˬ  dawˇ sha gaˇ sha ve cawˬ tuˬ ga laˇ ve yoˬ. Chi hkʼaˬ hkʼe kʼoˆ gaˇ ve le? Ngaˬ hui shoꞈ shaꞈ ve gʼa hpuˇ leh te gʼa ve hkʼe te˗oˬ htaˇ, yonˍ ve chi ngaˬ hui teˇ ceuˬ le le Yaˬhoˉvaˬ htaꞈ chiˇ aꞈ piˇ tuˬ ga laˇ gʼa ve yoˬ. Yaˬhoˉvaˬ ngaˬ hui aꞈ kehˉ shoꞈ shaꞈ ve htaꞈ gu gʼa ve tehꞈ yonˍ ve pa taw, dawˇ sha gaˇ sha ve cawˬ gʼa ve yoˬ.—1 Peˍtruˆ 5:6, 7.

7. Roˍbeuˍ ve awˬ lawn nawˬ htaꞈ aˬ htoꞈ ma maˍ laˇ ve le?

⁷ Ngaˬ hui shoꞈ shaꞈ ve aˬ htoꞈ ma gʼa hpuˇ ve htawˇ, bon lawˬ ve lehˬ ngaˬ hui dawˇ sha gaˇ sha ve cawˬ tuˬ ga laˇ gʼa ve yoˬ. Roˍbeuˍ ve awˬ lawn htaꞈ dawˇ nyi sheˍ. Yawˇ 80 hkʼawꞈ hpaˆ˗oˬ ve htawˇ nyi haꞈ shaˉ paˍ ka tiꞈ yeˬ ve hpehꞈ gʼa ve yoˬ. Yawˇ kʼoˆ ve, “ngaˬ shoꞈ shaꞈ ve teˇ hpaˍ htaꞈ gu gʼa tuˬ Hpiˇliˇpiˆ liꞈ 4:6, 7 hkʼaw ngaˬ htaꞈ ga laˇ gʼa ve yoˬ. Ngaˬ hpu hpawˇ dawˇ haˍ jaw ve yoˬ. Ngaˬ teˇ tcuhˉ teˇ yanˇ nyi haꞈ shaˉ paˍ maˇ gʼa te˗o.” Roˍbeuˍ dawˇ sha gaˇ sha ve cawˬ tuˬ aˬ htoꞈ ma ga piˇ ve le? Yawˇ kʼoˆ ve, “ngaˬ dawˇ haˍ dawˇ hkiˉ htaˇ bon laꞈ haˉ lawˬ ve yoˬ. Ngaˬ bon hkʼaˬ htaˆ kaꞈ lawˬ htaˇ, dawˇ sha gaˇ sha ve cawˬ la ve yoˬ.”

8. Yoˇhanˬ liꞈ 8:29 hkʼaw kʼoˆ taˍ ve hkʼe, aˬ htoꞈ ma te Yeˍsuˆ dawˇ sha gaˇ sha ve cawˬ gʼa ve le?

⁸ Yoˇhanˬ liꞈ 8:29 gʼaw sheˍ. Yeˍsuˆ fawˉ mehˍ ve gʼa hpuˇ ve htawˇ, dawˇ sha gaˇ sha ve cawˬ gʼa ve yoˬ. Yawˇ Awˬ pa nyi hkʼaˇ suh tuˬ te piˇ ve tehꞈ shiˍ ve pa taw yoˬ. Yaꞈ hkʼaˇ, teˇ pawˆ pawˆ na yuˬ ve maˇ sha ve htawˇ, yawˇ te ve yoˬ. Yawˇ Awˬ pa htaꞈ haꞈ jaˇ leh yawˇ a shaꞈ teꞈ kuiˬ hkʼaw Yaˬhoˉvaˬ ve kanˉ htaꞈ awˉ lawˉ teh ve yoˬ. Yeˍsuˆ miˬ guiˬ hkʼoˆ maˇ laˬ sheˍ htaˇ, yawˇ Gʼuiˬ sha ve laꞈ shaˉ maˉ hpehꞈ ve yoˬ. (Tawˇ naˉ ve 8:30) Miˬ guiˬ hkʼoˆ chehˇ htaˇ, yawˇ ve Awˬ pa htaꞈ caˉ daꞈ ve nyi ma  pfuhˇ ve hkʼaw bon maˍ ve yoˬ. (Maꞈhtehˍ 6:9; Yoˇhanˬ 5:17) Kanˉ chi ve Yeˍsuˆ ha lehˬ jaˇ tuˬ te piˇ ve yoˬ.—Yoˇhanˬ 4:34-36.

9. Ngaˬ hui hto toˇ ve hkʼaˬ htaˆ kaꞈ gʼaˇ hteꞈ te chehˇ ve kʼo, nyi ma gawˬ lehˍ cawˬ tuˬ hkʼaˬ hkʼe ga laˇ ve le?

⁹ Ngaˬ hui Yeˍsuˆ htaꞈ henˇ yuˬ gʼa tuˬ, Yaˬhoˉvaˬ hkawˇ na yuˬ leh “Jawˇmawˇ Yeˍsuˆ ve kanˉ htaꞈ hkʼaˬ htaˆ kaꞈ gʼaˇ hteꞈ te chehˇ ve chaw hpehꞈ” cawˇ ve yoˬ. (1 Kawˇrenˍhtuˆ 15:58) Ngaˬ hui hto toˇ ve htaꞈ “hkʼaˬ htaˆ kaꞈ gʼaˇ hteꞈ te chehˇ” ve kʼo, shoꞈ shaꞈ ve htaꞈ daꞈ ve hpawˇ dawˇ gʼa ve yoˬ. (Tcuh yaˇ 18:5) Tawˇ pa haˉ te kʼo, hto toˇ kuiˬ lo mawˬ daꞈ ve chaw ngaˬ hui aꞈ kehˉ shoꞈ shaꞈ ve cawˬ maˇ jaˇ. Yaꞈ hkʼaˇ, yawˇ hui Yaˬhoˉvaˬ htaꞈ haꞈ tuˬ henˇ leh beˆ maˍ piˇ ve htaꞈ yuˬ yehˇ htaˇ, a shaꞈ teꞈ hkʼaˇ kaꞈ daꞈ la leh ha lehˬ ve yoˬ. Chi hkʼe ve ngaˬ hui gʼa mawˬ htaˇ, Yaˬhoˉvaˬ nyi haꞈ shaˉ laˇ ve tehꞈ yonˍ gʼa ve yoˬ. Yonˍ ve chi ngaˬ hui nyi ma gawˬ lehˍ cawˬ tuˬ ga laˇ gʼa ve yoˬ. Awˬ viˉ awˬ nyi yaˇ miˇ dawˇ maˇ ve a naˍ cawˬ leh yawˇ awˬ to htaꞈ awˬ hpfuhˇ maˇ cawˬ tehꞈ dawˇ ve htaꞈ gʼa tawˍ daꞈ ve, chi awˬ tehˬ hpehꞈ ve tehꞈ shiˍ la ve yoˬ. Yawˇ kʼoˆ ve, “ngaˬ hto toˇ ve kanˉ maˇ maˇ te htaˇ, ngaˬ ve dawˇ hkʼaˇ daꞈ la ve ha lehˬ jaˇ. Ngaˬ hto toˇ˗e htaˇ, Yaˬhoˉvaˬ geh gʼaˇ hteꞈ meuˆ daꞈ la ve tehꞈ dawˇ ve yoˬ.”

10. Behnˍdaˇ ve awˬ lawn nawˬ htaꞈ aˬ htoꞈ ma maˍ laˇ ve le?

¹⁰ Awˬ viˉ awˬ nyi Behnˍdaˇ ve awˬ lawn htaꞈ dawˇ nyi sheˍ. Yawˇ leh yawˇ ve yaˇ miˇ a naˍ cawˬ ve yoˬ. Behnˍdaˇ mui kuiˬ caꞈ tuˬ hkʼoˆ mui leh awˬ gʼaˇ hkʼa dehꞈ maˇ cawˬ. Yawˇ te gʼa ve hkʼe, teˇ yehˬ peuˬ teˇ yehˬ hto toˇ ve yoˬ. Yaꞈ hkʼaˇ, maˇ˗awˍ ve kʼo, hto toˇ tuˬ awˬ pon yawˇ liꞈ bvuhꞈ ve yoˬ. Yawˇ kʼoˆ ve, “ngaˬ hpehꞈ chehˇ ve a naˍ chi teˇ hkui gu maˇ gʼa˗o ve tehꞈ shiˍ la htaˇ, hkʼa dehꞈ hto toˇ ve yoˬ. Ngaˬ hto toˇ˗e htaˇ ngaˬ ve awˬ lawn htaꞈ maˇ dawˇ nyi˗o. Hkriꞈ yaˇ awˬ moˍ hkʼaw hto toˇ kuiˬ lo ve ngaˬ caˉ daꞈ leh ga piˇ ve chaw htaꞈ kaꞈ dawˇ nyi ve yoˬ. Chi ve ngaˬ awˬ gʼuˇ suhˍ hpawˇ ve dawˇ law kuiˬ htaꞈ hkʼaˬ htaˆ kaꞈ dawˇ nyi tuˬ shaˍ tiꞈ peꞈ laˇ ve yoˬ.”

11-13. (a) Tcuh yaˇ leh awˬ nu ve chaw awˬ tehˬ awˬ na Yeˍsuˆ ve awˬ chawˇ hpehꞈ ve tehꞈ hkʼaˬ hkʼe hpeuꞈ maw piˇ ve le? (b) Yeˍsuˆ ve awˬ chawˇ yawˇ hkʼaˬ hkʼe dawˇ tuˬ te piˇ ve le?

¹¹ Yeˍsuˆ bon maˍ ve awˬ yanˇ htaˇ ka tiꞈ yeˬ ve tcuh yaˇ, Yeˍsuˆ ve awˬ chawˇ hpehꞈ ve tehꞈ hpeuꞈ maw piˇ ve yoˬ. Yawˇ hui tawˇ naˉ ve liꞈ hkʼaw kʼoˆ taˍ ve hkʼe, “chaw teˇ hpaˍ hpaˍ awˬ chawˇ te daꞈ ve lehˬ, awˬ viˉ awˬ nyi aꞈ kehˉ ka tiꞈ yeˬ puiˉ ve yoˬ.” (Tawˇ naˉ ve 18:24) Yeˍsuˆ awˬ chawˇ chi hkʼe cawˬ ve ha lehˬ jaˇ. Yeˍsuˆ bon maˍ toˇ htaˇ yawˇ ve awˬ viˉ awˬ nyi yawˇ htaꞈ maˇ yonˍ. (Yoˇhanˬ 7:3-5) Yawˇ ve awˬ viˉ awˬ nyi yawˇ gʼuˇ ve tehꞈ dawˇ jaw ve yoˬ. (Maˍkuˆ 3:21) Yaꞈ hkʼaˇ, yawˇ maˇ suh sheˍ ve teˇ haˉ htaˇ ka tiꞈ yeˬ ve tcuh yaˇ htaꞈ kʼoˆ piˇ ve, “beˬ ve lawˇ ve htaꞈ ngaˬ gʼa hkanˍ ve teˇ yanˇ, nawˬ hui lehˬ ngaˬ geh hkʼa geh hkʼaˬ htaˆ kaꞈ chehˇ taˍ” ve yoˬ.—Luˉkaꞈ 22:28.

¹² Teˇ pawˆ pawˆ kʼo tcuh yaˇ kaꞈ Yeˍsuˆ nyi ma luˬ tuˬ te piˇ ve yoˬ. Yaꞈ hkʼaˇ, Yeˍsuˆ yawˇ hui te yaꞈ ve htaꞈ maˇ nyi leh yawˇ hui yawˇ htaꞈ yonˍ maˇ la ve yoˬ. (Maꞈhtehˍ 26:40; Maˍkuˆ 10:13, 14; Yoˇhanˬ 6:66-69) Yeˍsuˆ shu maˇ tiˇ pehˍ sheˍ teˇ haˉ htaˇ, ka tiꞈ yeˬ ve chaw chi teˇ hpaˍ htaꞈ yawˇ kʼoˆ piˇ ve, “ngaˬ nawˬ hui htaꞈ awˬ chawˇ tehꞈ kʼoˆ ve yoˬ. Awˬ lawn kʼo, Awˬ pa geh ngaˬ gʼa kaˇ ve hkʼa peu˗eˬ ngaˬ nawˬ hui htaꞈ hto laˇ peuˬ.” (Yoˇhanˬ 15:15) Yeˍsuˆ ve awˬ chawˇ yawˇ htaꞈ awˬ gʼaˇ piˇ ve tehꞈ ngaˬ hui hkʼa dehꞈ shiˍ ve yoˬ. Yeˍsuˆ bon maˍ toˇ htaˇ yawˇ hui yawˇ htaꞈ ga piˇ ve awˬ gʼaˇ gʼa jaˇ.—Luˉkaꞈ 10:17, 21.

¹³ Tcuh yaˇ maˇ heˆ kaꞈ yawˇ awˬ kaˍ awˬ nu ve awˬ  chawˇ cawˬ sheˍ. Hawˉ hkʼaˆ leh yaˇ miˇ yawˇ geh bon maˍ leh awˬ nu ve hpawˇ ga piˇ ve kaꞈ cawˬ ve yoˬ. Teˇ hpaˍ hpaˍ yawˇ hui ve aˉ hkʼaw lo awˍ caˇ la tuˬ Yeˍsuˆ htaꞈ jehˬ piˇ ve yoˬ. (Luˉkaꞈ 10:38-42; Yoˇhanˬ 12:1, 2) Teˇ hpaˍ hpaˍ yawˇ awˬ hkʼaˇ suh kʼai leh yawˇ loˍ ve awˬ ceuˬ ga piˇ ve yoˬ. (Luˉkaꞈ 8:3) Yeˍsuˆ daꞈ ve chaw hpehꞈ ve pa taw, daꞈ ve awˬ chawˇ cawˬ ve yoˬ. Yawˇ awˬ chawˇ htaꞈ daꞈ ve te piˇ leh awˬ chawˇ maˇ te gʼa ve awˬ leuˉ yawˇ maˇ dawˇ law. Yeˍsuˆ biˇ ve chaw hpehꞈ ve htawˇ, maˇ biˇ ve awˬ chawˇ ga piˇ ve htaꞈ awˬ hpfuhˇ shiˍ ve yoˬ. Yawˇ nyi ma gawˬ lehˍ cawˬ tuˬ yawˇ hui ga piˇ ve tehꞈ ngaˬ hui yonˍ gʼa ve yoˬ.

14-15. Ngaˬ hui hkʼaˬ hkʼe te daꞈ ve awˬ chawˇ cawˬ gʼa tuˬ le? Yawˇ hui ngaˬ hui htaꞈ hkʼaˬ hkʼe ga laˇ gʼa tuˬ le?

¹⁴ Daꞈ ve awˬ chawˇ ngaˬ hui Yaˬhoˉvaˬ geh ka tiꞈ yeˬ tuˬ ga laˇ ve yoˬ. Nawˬ daꞈ ve awˬ chawˇ cawˬ gaˇ ve kʼo, nawˬ shu htaꞈ daꞈ ve awˬ chawˇ awˉ lawˉ gʼa hpehꞈ piˇ sheˍ ve yoˬ. (Maꞈhtehˍ 7:12) Tawˇ pa haˉ te kʼo, ngaˬ hui ve awˬ gʼaˇ leh awˬ yanˇ htaꞈ yehˇ leh “loˍ ve chaw” htaꞈ ga piˇ tuˬ Liꞈ hpu hkʼaw kʼoˆ laˇ ve yoˬ. (Eˇfeˇsuꞈ 4:28) Nawˬ ve Hkriꞈ yaˇ awˬ moˍ hkʼaw ga laˇ tuˬ loˍ ve a shu cawˬ ve le? Hto toˇ ve chaw aˉ hkʼaw tiˉ chehˇ ve htaꞈ mawˇ ca vuiˬ piˇ gʼa˗aw laˇ? Hpu maˇ yehˇ lawꞈ ve chaw htaꞈ nawˬ awˍ kuˬ caˍ piˇ gʼa˗aw laˇ? Nawˬ jw.org^® maˇ heˆ leh JW Laiˉbaˍliˍ yehˇ tuˬ awˬ hkʼaˇ shiˍ ve kʼo, Hkriꞈ yaˇ awˬ moˍ hkʼaw ve chaw htaꞈ maˍ piˇ gʼa˗aw laˇ? Ngaˬ hui shu htaꞈ ga piˇ tuˬ awˬ yanˇ yuˬ tanˇ ve kʼo, ha lehˬ gʼa ve yoˬ.—Tcuh yaˇ 20:35.

¹⁵ Ngaˬ hui shoꞈ shaꞈ ve gʼa hpuˇ htaˇ, awˬ chawˇ ga laˇ leh nyi ma gawˬ lehˍ ve cawˬ ve yoˬ. Yawˇbaˆ yawˇ ve awˬ lawn kʼoˆ htaˇ Eˇliˇhuˆ na taˍ piˇ ve yoˬ. Ngaˬ hui dawˇ haˍ ve cawˬ leh kʼoˆ piˇ htaˇ, awˬ chawˇ yeunˇ hkanˍ ve hkʼaw na taˍ laˇ ve yoˬ. (Yawˇbaˆ 32:4) Awˬ chawˇ ngaˬ hui ve awˬ tan  dawˇ cheˆ laˇ tuˬ tehꞈ maˇ dawˇ law. Yaꞈ hkʼaˇ, Liꞈ hpu hkʼaw beˆ maˍ laˇ ve htaꞈ nga hui na yuˬ htaˇ cuˇ yiˍ cawˬ ve yoˬ. (Tawˇ naˉ ve 15:22) Jawˇmawˇ Daˍviˆ ve awˬ chawˇ yawˇ htaꞈ ga piˇ htaˇ, yawˇ nyi ma nuˇ nehˬ ve hkʼaw haꞈ yuˬ ve hkʼa shuˍ, ngaˬ hui kaꞈ caˆ muiˬ puiˉ ve chaw maˇ hpehꞈ leh awˬ chawˇ ga laˇ ve htaꞈ haꞈ yuˬ cawˇ ve yoˬ. (2 Saˍmo˗eˍlaˆ 17:27-29) Awˬ tehˬ kʼo, daꞈ ve awˬ chawˇ chi hkʼe ve lehˬ Yaˬhoˉvaˬ geh laˬ ve laꞈ shawnˍ hpehꞈ ve yoˬ.—Yaˍkoˆ 1:17.

16. Hpiˇliˇpiˆ liꞈ 4:6, 7 hkʼaw kʼoˆ taˍ ve hkʼe, ngaˬ hui nyi ma gawˬ lehˍ cawˬ tuˬ te laˇ gʼa ve teˇ hkʼaˇ lehˬ aˬ htoꞈ ma le? Kʼoˆ maˍ laˇ sheˍ.

¹⁶ Hpiˇliˇpiˆ liꞈ 4:6, 7 gʼaw sheˍ. Yaˬhoˉvaˬ kʼoˆ ve ngaˬ hui yawˇ ve dawˇ sha gaˇ sha ve cawˬ tuˬ, “Yeˍsuˆ Hkriꞈ awˬ hkʼaw lo haꞈ shaˉ laˇ tuˬ yoˬ.” Aˬ htoꞈ ma te yawˇ chi hkʼe kʼoˆ ve le? Ngaˬ hui Yeˍsuˆ ve te hkʼaˇ dawˇ hkʼaˇ htaꞈ na gʼa leh yonˍ ve pa taw, nyi ma gawˬ lehˍ cawˬ gʼa ve yoˬ. Tawˇ pa haˉ te kʼo, Yeˍsuˆ htaiˍ hkʼawꞈ laˇ ve chi ngaˬ hui ve venˇ baˆ hkʼa peu˗eˬ htaꞈ hpehˇ laˇ gʼa ve yoˬ. (1 Yoˇhanˬ 2:12) Ngaˬ hui awˬ lawn chi htaꞈ shiˍ˗oˬ htaˇ awˬ gʼaˇ gʼa jaˇ! Yeˍsuˆ Gʼuiˬ sha ve mvuhˇ miˬ hkʼaw Jawˇmawˇ te leh, Saˍtanˍ leh yawˇ ve miˬ guiˬ ngaˬ hui htaꞈ te luˬ laˇ ve hkʼa peu˗eˬ Yeˍsuˆ gu tuˬ yoˬ. (Iˉsaˍyaˆ 65:17; 1 Yoˇhanˬ 3:8; Hpeuꞈ maˍ ve 21:3, 4) Chi ngaˬ hui daꞈ jaˇ ve dawˇ law kuiˬ cawˬ tuˬ te laˇ ve yoˬ! Yeˍsuˆ ngaˬ hui htaꞈ awˬ vuiˬ peꞈ laˇ ve haˍ jaˇ ve htawˇ, yawˇ awˬ leh meuˇ ve awˬ yanˇ ngaˬ hui geh hkʼaˬ htaˆ kaꞈ chehˇ leh ga laˇ tuˬ yoˬ. (Maꞈhtehˍ 28:19, 20) Awˬ ceuˬ chi ngaˬ hui haꞈ hanˉ ve cawˬ tuˬ ga laˇ jaˇ! Ngaˬ hui nyi ma gawˬ lehˍ, awˬ gʼaˇ, dawˇ law kuiˬ, leh haꞈ hanˉ ve cawˬ tuˬ a yeˇ uiˍ jaˇ.

17. (a) Hkriꞈ yaˇ nyi ma gawˬ lehˍ cawˬ tuˬ hkʼaˬ hkʼe te gʼa ve le? (b) Yoˇhanˬ liꞈ 16:33 hkʼaw ka tiꞈ te taˍ laˇ ve hkʼe ngaˬ hui aˬ htoꞈ ma te gʼa ve le?

¹⁷ Yaꞈ hkʼaˇ, ngaˬ hui shoꞈ shaꞈ jaˇ ve htaꞈ gʼa hpuˇ htaˇ, hkʼaˬ hkʼe te nyi ma gawˬ lehˍ cawˬ gʼa tuˬ le? Ngaˬ hui Yeˍsuˆ htaꞈ gʼa henˇ yuˬ ve yoˬ. (1) Hkʼaˬ htaˆ kaꞈ bon gʼa lawˬ ve yoˬ. (2) Haˍ jaˇ ve htawˇ, ngaˬ hui Yaˬhoˉvaˬ ve hkawˇ gʼa na yuˬ leh gʼaˇ hteꞈ hto toˇ cawˇ ve yoˬ. (3) Shoꞈ shaꞈ ve htaꞈ gu gʼa tuˬ awˬ chawˇ ga laˇ ve htaꞈ haꞈ yuˬ ve yoˬ. Ngaˬ hui chi hkʼe te ve kʼo, Gʼuiˬ sha lo laˬ ve dawˇ sha gaˇ sha ve ngaˬ hui ve nyi ma leh dawˇ hkʼaˇ htaꞈ haꞈ shaˉ laˇ tuˬ yoˬ. Yeˍsuˆ hkʼa shuˍ ngaˬ hui shoꞈ shaꞈ ve hkʼa peu˗eˬ htaꞈ gʼaˇ tuˬ yoˬ.—Yoˇhanˬ 16:33 gʼaw sheˍ.