Hkanˍ ve lehˬ “ka tiꞈ te taˍ ve htaꞈ gʼaꞈ te tuˬ yoˬ tehꞈ Gʼuiˬ sha htaꞈ cuˇ leh shaˉ hkiˆ te taˍ ve yoˬ.” Chaw yaˇ hkanˍ htaˇ, kʼoˆ ve leh, liꞈ bvuhꞈ kaꞈ gʼa ve yoˬ.

Chaw teˇ hpaˍ dawˇ ve hkanˍ ve lehˬ yaꞈ ve yoˬ. Awˬ lawn kʼo Yeˍsuˆ kʼoˆ ve, ‘taˇ hkanˍ. Nawˬ ve tawˇ hkawˇ lehˬ, yoˬ kʼo yoˬ, maˇ heˆ kʼo maˇ heˆ tehꞈ ceh tiˉ kʼoˆ loˬ. Chi aꞈ kehˉ leuˉ leh kʼoˆ ve tawˇ hkawˇ teˇ hpaˍ lehˬ, haiˬ ve awˬ hkʼaw lo tawˆ la ve tawˇ hkawˇ hpehꞈ ve yoˬ.’ (Maꞈhtehˍ 5:33-37) Moˉseˍ ve awˬ liˇ tawˇ hkawˇ teˇ lawn lawn htaꞈ gʼa hkanˍ cawˇ ve tehꞈ Yeˍsuˆ shiˍ leh, Gʼuiˬ sha ve kanˉ te ve chaw kaꞈ gʼa hkanˍ cawˇ ve tehꞈ Yeˍsuˆ shiˍ ve yoˬ. (Awˬ hkuiˉ puiˍ 14:22, 23; Tawˆ kʼai ve 22:10, 11) Yaˬhoˉvaˬ kaꞈ hkanˍ ve tehꞈ Yeˍsuˆ shiˍ ve yoˬ. (Heˍbrehˇ 6:13-17) Chi htaꞈ pa taw, ngaˬ hui maˇ hkanˍ cawˇ ve tehꞈ Yeˍsuˆ kʼoˆ gaˇ ve maˇ heˆ. Yaꞈ hkʼaˇ, Yeˍsuˆ ngaˬ hui htaꞈ shaˍ tiꞈ peꞈ laˇ ve, hkanˍ ve htaꞈ a hkʼe leˇ ve awˬ lawn ceh hpehꞈ ve maˇ heˆ leh a yeˇ maˇ uiˍ ve maˇ gʼa dawˇ tuˬ shaˍ tiꞈ gʼa te ve yoˬ. Ngaˬ hui kʼoˆ taˍ ve htaꞈ ka tiꞈ gʼa yeˬ leh, ngaˬ hui kʼoˆ taˍ ve hkʼe gʼa gʼaꞈ te tuˬ a yeˇ uiˍ jaˇ tehꞈ dawˇ ve yoˬ.

Chaw teˇ gʼaˇ nawˬ htaꞈ hkanˍ tcuh laˇ ve kʼo, nawˬ hkʼaˬ hkʼe te cawˇ ve le? Awˉ lawˉ teˇ ceuˬ lehˬ, nawˬ hkanˍ taˍ ve htaꞈ gʼaꞈ te gʼa tuˬ yoˬ tehꞈ gʼa yonˍ gʼa tcuh cawˇ ve yoˬ. Nawˬ hkʼa dehꞈ maˇ yonˍ gʼa ve kʼo, maˇ hkanˍ ve lehˬ daꞈ jaˇ ve yoˬ. Awˬ lawn kʼo, Liꞈ hpu hkʼaw shaˍ tiꞈ peꞈ laˇ ve, “ka tiꞈ maˇ te ve chaw lehˬ, ka tiꞈ te taˍ leh maˇ gʼaꞈ te ve chaw aꞈ kehˉ daꞈ leuˉ ve yoˬ.” (Cuˇ yiˍ piˇ ve 5:5) Nyiˇ ceuˬ lehˬ, nawˬ gʼa hkanˍ cawˇ ve awˬ lawn Liꞈ hpu hkʼaw ve awˬ liˇ awˬ hkʼaˇ htaꞈ nyi sheˍ. Shehˆ ceuˬ lehˬ, nawˬ ve dawˇ shiˍ puiˉ ve nyi ma hkʼe dawˇ cheˆ sheˍ. Hkanˍ ve htaꞈ caˉ daꞈ ve awˬ liˇ awˬ hkʼaˇ aˬ htoꞈ ma cawˬ ve chi teˇ hkui teˇ geh henˇ tuˬ yoˬ.

Hkanˍ ve teˇ ceuˬ ceuˬ kʼo, Gʼuiˬ sha ve awˬ liˇ awˬ hkʼaˇ htaꞈ maˇ yaꞈ. Tawˇ pa haˉ te kʼo, Yaˬhoˉvaˬ ve Shaˉhkiˆhkanˍ ve chaw heuˆ daꞈ htaˇ ka tiꞈ te daꞈ ve yoˬ. Ka tiꞈ chi hkʼe te ve lehˬ hkanˍ taˍ ve hkʼe hpehꞈ ve yoˬ. Heuˆ daꞈ ve chaw 2 gʼaˇ ka tiꞈ te daꞈ htaˇ, yawˇ hui Yaˬhoˉvaˬ mehˆ gʼuˇ suhˍ leh oˇ kaˬ lo chehˇ ve chaw teˇ gʼaˇ le le mehˆ gʼuˇ suhˍ ka tiꞈ te ve yoˬ. Yawˇ hui teˇ gʼaˇ leh teˇ gʼaˇ hkʼa dehꞈ nyi haꞈ shaˉ daꞈ leh yawˆ yan daꞈ tuˬ ka tiꞈ te taˍ ve yoˬ. Hkʼe te leh, “yawˇ hui miˬ guiˬ hkʼoˆ a shaꞈ teꞈ chehˇ ve teˇ˗co˗e Gʼuiˬ sha gu teh taˍ ve heuˆ daꞈ ve awˬ hkʼaˇ chi yawˇ hui gʼaꞈ te ve yoˬ.” (Awˬ nu ve chaw ceuˬ tawˇ hkawˇ chi maˇ yehˇ ve htawˇ, yawˇ hui Gʼuiˬ sha mehˆ gʼuˇ suhˍ hkanˍ ve yoˬ.) Yawˇ hui ka tiꞈ te daꞈ htaˇ, Yawˇ hui awˬ hpawˇ awˬ miˇ ma hpehꞈ la leh yawˇ hui suh htaˇ hkʼa gaˬ teˇ geh chehˇ tuˬ yoˬ tehꞈ ka tiꞈ te taˍ ve yoˬ. (Awˬ hkuiˉ puiˍ 2:24; 1 Kawˇrenˍhtuˆ 7:39) Heuˆ daꞈ ve hkʼaw ka tiꞈ te ve lehˬ, keunˍ jaˇ cawˇ jaˇ leh Gʼuiˬ sha ve a loˍ htaꞈ kaꞈ cawˇ daꞈ ve tehꞈ ngaˬ hui mawˬ ve yoˬ.

Hkanˍ ve teˇ ceuˬ ceuˬ kʼo, Gʼuiˬ sha ve a loˍ htaꞈ yaꞈ ve. Hkanˍ ve teˇ ceuˬ ceuˬ kʼo, awˬ tehˬ ve Hkriꞈ yaˇ maˇ hkanˍ. Tawˇ pa haˉ te kʼo, laꞈ caˉ htaꞈ yehˇ leh mvuhˇ miˬ htaꞈ haꞈ shaˉ tuˬ, maˇ heˆ leh Gʼuiˬ sha hkawˇ maˇ na tuˬ maˇ hkanˍ. Hkanˍ ve chi hkʼe ve lehˬ Gʼuiˬ sha ve awˬ liˇ tawˇ hkawˇ htaꞈ yaꞈ ve yoˬ. Awˬ tehˬ ve Hkriꞈ yaˇ lehˬ, “miˬ guiˬ htaꞈ maˇ caˉ daꞈ.” Hkʼe te leh, ngaˬ hui maꞈ maˇ te leh maˇ cawˇ maˇ hawˍ daꞈ ve teˇ ceuˬ le le htaꞈ kaꞈ  ngaˬ hui maˇ caˉ daꞈ.—Yoˇhanˬ 15:19; Iˉsaˍyaˆ 2:4; Yaˍkoˆ 1:27.

Hkanˍ ve teˇ ceuˬ ceuˬ kʼo, dawˇ shiˍ puiˉ ve nyi ma htaꞈ cuˇ leh gʼa dawˇ cheˆ ve. Maˇ gʼa hkanˍ sheˍ htaˇ ngaˬ hui Yeˍsuˆ beˆ maˍ laˇ taˍ ve htaꞈ gʼa dawˇ nyi cawˇ sheˍ ve yoˬ. Oˇ kaˬ lo kʼoˆ ve, “jawˇ mawˇ Kehˉsaˍ ve mawˇ jawˇ mawˇ Kehˉsaˍ htaꞈ piˇ˗oˆ. Gʼuiˬ sha ve mawˇ Gʼuiˬ sha htaꞈ piˇ˗oˆ.”—Luˉkaꞈ 20:25.

Tawˇ pa haˉ te kʼo, teˇ mvuhˇ miˬ lo ve mvuhˇ miˬ yaˇ hpehꞈ tuˬ, maˇ heˆ leh shu mvuhˇ miˬ lo kʼai tuˬ ve liꞈ maꞈ te htaˇ, a shu yawˇ awˬ to gʼa hkanˍ ve yoˬ. Mvuhˇ miˬ oˇ ve hkʼaw Gʼuiˬ sha ve awˬ liˇ awˬ hkʼaˇ htaꞈ yaꞈ ve awˬ ceuˬ hkanˍ tcuh laˇ ve kʼo, ngaˬ hui maˇ hkanˍ. Chi ngaˬ hui ve dawˇ shiˍ puiˉ ve nyi ma htaꞈ yaꞈ ve pa taw yoˬ. Ngaˬ hui ve dawˇ shiˍ puiˉ ve nyi ma htaꞈ maˇ gʼa heuˆ la tuˬ, mvuhˇ miˬ uˉ peunˍ paˍ ngaˬ hui hkanˍ ve teˇ ceuˬ ceuˬ htaꞈ gu tcuh laˇ ve yoˬ.

Chi hkʼe hpehꞈ ve kʼo, hkanˍ taˍ ve awˬ lawn Roˉmaꞈ liꞈ 13:1 hkʼaw ve awˬ liˇ awˬ hkʼaˇ htaꞈ hawˍ daꞈ ve hkʼe gʼaꞈ te ve yoˬ. Oˇ kaˬ lo kʼoˆ ve, “chaw teˇ gʼaˇ le le uˉ peunˍ shehˍ hpaˇ teˇ hpaˍ awˬ hawˉ lo hkʼa dehꞈ chehˇ˗oˆ.” Gʼuiˬ sha te kʼoˆ laˇ ve awˬ ceuˬ htaꞈ te tuˬ, hkanˍ ve lehˬ Hkriꞈ yaˇ maˇ yaꞈ tehꞈ dawˇ ve yoˬ.

Ngaˬ hui hkanˍ htaˇ, mawˇ teˇ ceuˬ ceuˬ htaꞈ gʼa yehˇ ve maˇ heˆ leh awˬ heˆ teˇ ceuˬ ceuˬ htaꞈ gʼa te ve kʼo, ngaˬ hui dawˇ cheˆ htaˇ dawˇ shiˍ puiˉ ve nyi ma htaꞈ gʼa yehˇ ve yoˬ. Roˉmaꞈ chaw leh chaw hteunˍ yawˇ hui hkanˍ htaˇ aˉ htaw htaꞈ yehˇ leh yawˇ hui hteˇ cawˇ ve chaw leh yonˍ gʼa ve chaw hpehꞈ ve tehꞈ maꞈ te ve gʼuiˬ sha geh yawˇ hui awˬ gʼaˇ lawˬ leh hkanˍ ve yoˬ. Heˍlaˍsaˆ chaw yawˇ hui hkanˍ htaˇ lehˬ yawˇ hui ve laꞈ sheh mvuhˇ naw ma hkʼoˆ lo chiˇ taˆ ve yoˬ. Yawˇ hui ve gʼuiˬ sha lehˬ yawˇ hui kʼoˆ ve awˬ ceuˬ htaꞈ kaˇ leh te ve awˬ ceuˬ htaꞈ mawˬ ve tehꞈ yonˍ ve yoˬ. Hkʼe te leh, yawˇ hui te ve awˬ ceuˬ yawˇ hui ve gʼuiˬ sha htaꞈ gʼa kaoˍ maˍ piˇ ve tehꞈ yonˍ ve yoˬ.

Yaˬhoˉvaˬ ve kanˉ te ve chaw lehˬ mvuhˇ miˬ ve awˬ heˆ htaꞈ caˉ daꞈ ve maˇ heˆ heˆ ve htaꞈ oˉ kʼoˍ pui tuˬ maˇ hkanˍ. Yaꞈ hkʼaˇ, shaˉ nanˉ hkʼaw ve kanˉ te paˍ nawˬ ve laꞈ sheh Liꞈ hpu hkʼoˆ teh leh hkanˍ tcuh laˇ htaˇ hkʼaˬ hkʼe te tuˬ le? Nawˬ kaꞈ chi hkʼe te gʼa ve yoˬ hehˉ. Liꞈ hpu hkʼaw kʼoˆ ve, Gʼuiˬ sha ve kanˉ te ve chaw teˇ hpaˍ lehˬ, hkanˍ htaˇ awˬ heˆ teˇ ceuˬ ceuˬ te ve yoˬ. (Awˬ hkuiˉ puiˍ 24:2, 3, 9; 47:29-31) Nawˬ chi hkʼe te htaˇ, awˬ tehˬ ve htaꞈ kʼoˆ tuˬ yoˬ tehꞈ nawˬ Gʼuiˬ sha geh hkanˍ ve yoˬ. Chi htaꞈ pa taw, shu nawˬ htaꞈ aˬ htoꞈ ma awˬ lawn na laˇ ve htawˇ maˇ kʼoˆ, awˬ tehˬ ve htaꞈ kʼoˆ tuˬ gu hehnˇ taˍ˗oꞈ.

Ngaˬ hui Yaˬhoˉvaˬ geh meuˆ daꞈ ve awˬ hpfuhˇ hkʼaˆ jaˇ. Chi htaꞈ pa taw, ngaˬ hui maˇ hkanˍ sheˍ htaˇ, teˇ pawˆ le le hkʼa dehꞈ dawˇ nyi leh bon gʼa lawˬ ve yoˬ. Hkʼe te leh, ngaˬ hui hkanˍ taˍ ve awˬ ceuˬ Gʼuiˬ sha ve awˬ liˇ awˬ hkʼaˇ htaꞈ maˇ yaꞈ ve tehꞈ ngaˬ hui hkʼa dehꞈ gʼa yonˍ gʼa tcuh leh ngaˬ hui ve dawˇ shiˍ puiˉ ve nyi ma htaꞈ gʼa yehˇ ve yoˬ. Ngaˬ hui hkanˍ taˍ ve kʼo, hkanˍ taˍ ve htaꞈ gʼa gʼaꞈ te ve yoˬ.—1 Peˍtruˆ 2:12.