Hawˉ hkʼaˆ oˇ ve teˇ gʼaˇ awˬ miˇ ma awˬ suhˉ kʼawꞈ heuˆ htaˇ, awˉ lawˉ heuˆ jaw ve teˇ gʼaˇ htaꞈ awˬ hpawˇ awˬ miˇ ma maˇ hpehꞈ˗oˬ ve tehꞈ Hkriꞈ yaˇ awˬ moˍ hkʼaw ve chaw dawˇ ve yoˬ. Leh yawˇ awˬ suhˉ kʼawꞈ heuˆ ve htaꞈ awˬ tehˬ awˬ na awˬ hpawˇ awˬ miˇ ma hpehꞈ ve tehꞈ, Hkriꞈ yaˇ awˬ moˍ hkʼaw ve chaw dawˇ ve yoˬ. Aˬ htoꞈ ma pa taw chi hkʼe kʼoˆ gʼa ve le? Baˬ daꞈ ve leh awˬ suhˉ kʼawꞈ heuˆ ve htaꞈ Yeˍsuˆ hkʼaˬ hkʼe kʼoˆ ve teˇ geh nyi sheˍ.

Maꞈhtehˍ liꞈ 19:9 hkʼaw baˬ daꞈ gʼa ve teˇ hkʼaˇ tiˉ cawˬ ve htaꞈ Yeˍsuˆ kʼoˆ taˍ ve yoˬ. Oˇ kaˬ lo kʼoˆ ve, “haˉ chawˇ haˉ paˆ te ve teˇ ceuˬ maˇ heˆ kʼo, a shu yawˇ awˬ miˇ ma htaꞈ baˬ leh awˬ kaˍ awˬ nu yaˇ miˇ htaꞈ ca heuˆ ve chaw hkʼaˬ ve teˇ gʼaˇ maˇ kʼoˆ, haˉ chawˇ haˉ paˆ te ve yoˬ.” Tawˇ hkawˇ chi ngaˬ hui shiˍ tuˬ te laˇ ve yoˬ. (1) Liꞈ hpu hkʼaw kʼoˆ ve, haˉ chawˇ haˉ paˆ te ve teˇ ceuˬ ceh tiˉ baˬ daꞈ gʼa ve yoˬ. (2) Liꞈ hpu hkʼaw ve awˬ liˇ awˬ hkʼaˇ maˇ cawˇ ve hkʼaw awˬ miˇ ma htaꞈ baˬ leh awˬ suhˉ kʼawꞈ heuˆ ve kʼo, yawˇ haˉ chawˇ haˉ paˆ te ve tehꞈ shawˍ ve yoˬ. a

Hawˉ hkʼaˆ haˉ chawˇ haˉ paˆ te leh awˬ miˇ ma htaꞈ baˬ ve kʼo, Liꞈ hpu hkʼaw ve awˬ liˇ awˬ hkʼaˇ awˬ suhˉ kʼawꞈ heuˆ gʼa ve tehꞈ Yeˍsuˆ kʼoˆ gaˇ ve laˇ? Chi hkʼe kʼoˆ gaˇ ve maˇ heˆ. Hawˉ hkʼaˆ haˉ chawˇ haˉ paˆ te ve kʼo, maˇ te yaꞈ ve awˬ miˇ ma lehˬ awˬ hpawˇ htaꞈ venˇ baˆ hpehˇ piˇ tuˬ laˇ, maˇ hpehˇ piˇ tuˬ laˇ, yawˇ dawˇ cheˆ ve htaꞈ cawˬ ve yoˬ. Yawˇ awˬ hpawˇ htaꞈ maˇ heuˆ leh mvuhˇ miˬ ve awˬ liˇ awˬ hkʼaˇ cawˇ ve hkʼaw baˬ ve kʼo, yawˇ huiˉ maˬ baˬ daꞈ peuˬ hkʼawꞈ nawˉ awˬ suhˉ kʼawꞈ heuˆ hpehꞈ ve yoˬ.

Yaꞈ hkʼaˇ, awˬ miˇ ma lehˬ awˬ hpawˇ geh kʼawꞈ chehˇ gaˇ leh venˇ baˆ hpehˇ piˇ ve kʼo, awˬ hpawˇ awˬ miˇ ma venˇ baˆ hpehˇ piˇ ve htaꞈ maˇ haꞈ yuˬ leh, awˬ hpawˇ awˬ miˇ ma htaꞈ suhˉ taˆ leh baˬ piˇ ve kʼo˗ehꞈ? Yawˇ ve awˬ hpawˇ htaꞈ venˇ baˆ hpehˇ piˇ ve lehˬ teˇ geh kʼawꞈ chehˇ gaˇ ve pa taw, awˬ hpawˇ lehˬ Liꞈ hpu hkʼaw kʼoˆ taˍ ve hkʼe, awˬ miˇ ma awˬ suhˉ kʼawꞈ heuˆ maˇ gʼa. Yawˇ awˬ suhˉ maˇ heuˆ gʼa ve htawˇ, kʼawꞈ heuˆ ve kʼo, yawˇ haˉ chawˇ haˉ paˆ te ve yoˬ. Chi hkʼe hpehꞈ ve kʼo, awˬ lawn chi ve htaꞈ gu tuˬ nyi haꞈ shaˉ paˍ lehˬ Hkriꞈ yaˇ awˬ moˍ hkʼaw suhˉ jehˬ ve awˬ moˍ gʼa teh ve yoˬ.—1 Kawˇrenˍhtuˆ 5:1, 2; 6:9, 10.

Hawˉ hkʼaˆ teˇ gʼaˇ Liꞈ hpu hkʼaw kʼoˆ taˍ ve hkʼe leˇ yawˇ awˬ miˇ maˬ awˬ suhˉ maˇ heuˆ gʼa ve htawˇ, yawˇ awˬ miˇ ma awˬ suhˉ kʼawꞈ heuˆ ve kʼo, awˬ lawn chi ve htaꞈ Hkriꞈ yaˇ awˬ moˍ hkʼaw ve chaw hkʼaˬ hkʼe dawˇ tuˬ le? Yawˇ awˉ lawˉ teˇ gʼaˇ heuˆ ve htaꞈ Liꞈ hpu hkʼaw ve awˬ liˇ awˬ hkʼaˇ htaꞈ cawˇ daꞈ ve hkʼe, awˬ tehˬ awˬ na awˬ hpawˇ awˬ miˇ ma hpehꞈ sheˍ ve laˇ? Maˇ gʼa te yaꞈ ve awˬ miˇ ma lehˬ, awˬ hpawˇ htaꞈ venˇ baˆ hpehˇ piˇ tuˬ laˇ, maˇ hpehˇ piˇ kaꞈ gʼa ve laˇ? Yawˇ awˬ suhˉ kʼawꞈ heuˆ ve htaꞈ caˉ leh haˉ chawˇ haˉ paˆ te chehˇ sheˍ ve tehꞈ, Hkriꞈ yaˇ awˬ moˍ hkʼaw ve chaw dawˇ˗aw laˇ?

Oˇ htaˇ lehˬ maˇ te yaꞈ ve chaw a shaꞈ teꞈ chehˇ sheˍ ve, yawˇ awˬ suhˉ maˇ kʼawꞈ heuˆ ve, leh yawˇ haˉ chawˇ haˉ paˆ maˇ te ve kʼo, teꞈ yaꞈ ve chaw awˬ suhˉ kʼawꞈ heuˆ ve htaꞈ caˉ leh haˉ chawˇ haˉ paˆ te chehˇ sheˍ ve tehꞈ, Hkriꞈ yaˇ awˬ moˍ hkʼaw ve chaw dawˇ ve yoˬ. Yaꞈ hkʼaˇ, baˬ daꞈ ve leh awˬ suhˉ kʼawꞈ heuˆ ve  htaꞈ Yeˍsuˆ kʼoˆ ve ngaˬ hui chaˬ nyi sheˍ. Maˇ gʼa te yaꞈ ve chaw htaꞈ Yeˍsuˆ kʼoˆ gaˇ ve maˇ heˆ. Yaꞈ hkʼaˇ, hawˉ hkʼaˆ lehˬ Liꞈ hpu hkʼaw ve awˬ liˇ awˬ hkʼaˇ maˇ cawˇ ve hkʼaw awˬ miˇ ma htaꞈ baˬ leh awˬ suhˉ kʼawꞈ leuˆ ve kʼo, yawˇ haˉ chawˇ haˉ paˆ te ve tehꞈ Yeˍsuˆ kʼoˆ gaˇ ve yoˬ. Yawˇ awˬ suhˉ kʼawꞈ heuˆ ve kʼo, awˉ lawˉ teˇ gʼaˇ htaꞈ awˬ hpawˇ awˬ miˇ ma maˇ kʼawꞈ hpehꞈ˗o.

Hawˉ hkʼaˆ awˬ miˇ ma htaꞈ baˬ peuˬ hkʼawꞈ nawˉ awˬ suhˉ kʼawꞈ heuˆ ve kʼo, maˇ te yaꞈ ve awˬ miˇ ma lehˬ yawˇ htaꞈ venˇ baˆ hpehˇ piˇ tuˬ laˇ, maˇ heˆ leh maˇ hpehˇ piˇ tuˬ laˇ, awˬ miˇ ma awˬ hkʼoˆ awˬ vuiˬ maˇ cawˬ˗oˬ. Yawˇ chi hkʼe dawˇ cheˆ tuˬ chi taw taw maˇ gʼa shoꞈ shaꞈ˗oˬ. Maˇ te yaꞈ ve awˬ miˇ ma suh ve, yawˇ awˬ suhˉ kʼawꞈ heuˆ ve, maˇ heˆ leh yawˇ haˉ chawˇ haˉ paˆ te ve kʼo, hawˉ hkʼaˆ chi teˇ gʼaˇ awˬ miˇ ma awˬ suhˉ kʼawꞈ heuˆ ve kʼo, Hkriꞈ yaˇ awˬ moˍ hkʼaw ve chaw htaꞈ heuˆ la kuiˬ maˇ cawˬ. b

Chi awˬ gʼuˇ suhˍ htaˇ hawˉ hkʼaˆ haˉ chawˇ haˉ paˆ te leh awˬ miˇ ma htaꞈ baˬ ve ngaˬ hui gʼa henˇ kʼai peuˬ˗oˬ. Yaꞈ hkʼaˇ, yawˇ haˉ chawˇ haˉ paˆ maˇ te leh, awˬ miˇ ma htaꞈ baˬ leh, awˬ suhˉ kʼawꞈ heuˆ ve kʼo˗ehꞈ? Maˇ heˆ leh yawˇ htaꞈ baˬ peuˬ hkʼawꞈ nawˉ awˬ hpawˇ haˉ chawˇ haˉ paˆ te leh awˬ miˇ ma venˇ baˆ hpehˇ piˇ˗oˬ ve kaꞈ, yawˇ awˬ suhˉ kʼawꞈ heuˆ ve kʼo˗ehꞈ? Baˬ daꞈ ve leh awˬ suhˉ kʼawꞈ heuˆ ve kaꞈ haˉ chawˇ haˉ paˆ te leh awˉ lawˉ heuˆ ve teˇ gʼaˇ htaꞈ awˬ hpawˇ awˬ miˇ ma maˇ hpehꞈ daꞈ˗o tehꞈ shawˍ ve yoˬ. Leh awˬ suhˉ kʼawꞈ heuˆ ve lehˬ mvuhˇ miˬ ve awˬ liˇ awˬ hkʼaˇ htaꞈ cawˇ ve yoˬ. Shaw nyi kuiˬ Taꞈ yehˬ Ha pa 6 maˬ 15 nyi 1980 hkʼawꞈ Liꞈ mehˆ hpfuhˇ 30 hkʼaw kʼoˆ ve, “chi teˇ hkui yawˇ awˬ suhˉ kʼawꞈ heuˆ ve yoˬ. Leh yawˇ kʼawꞈ baˬ leh awˬ miˇ ma awˬ piˍ geh kʼawꞈ kʼawꞈ˗e maˇ hpehꞈ. Awˬ lawn kʼo, yawˇ baˬ daꞈ ve, yawˇ haˉ chawˇ haˉ paˆ te ve, leh awˬ suhˉ kʼawꞈ heuˆ ve pa taw, awˉ lawˉ heuˆ daꞈ ve teˇ gʼaˇ htaꞈ awˬ hpawˇ awˬ miˇ ma maˇ hpehꞈ daꞈ˗o.”

Na gʼa ve awˬ suhˉ chi ve lehˬ heuˆ daꞈ ve a yeˇ maˇ uiˍ tuˬ maˇ te piˇ leh, haˉ chawˇ haˉ paˆ te ve htaꞈ a yeˇ maˇ uiˍ ve tehꞈ dawˇ tuˬ kaꞈ maˇ te piˇ. Hawˉ hkʼaˆ teˇ gʼaˇ awˬ miˇ ma htaꞈ baˬ leh Liꞈ hpu hkʼaw ve awˬ liˇ awˬ hkʼaˇ htaꞈ maˇ hawˍ ve hkʼaw awˬ suhˉ kʼawꞈ heuˆ ve kʼo, yawˇ haˉ chawˇ haˉ paˆ te ve tehꞈ shawˍ leh chi htaꞈ gu tuˬ suhˉ jehˬ ve awˬ moˍ kʼawꞈ teh ve yoˬ. (Yawˇ ve awˬ miˇ ma awˬ suhˉ Shaˉhkiˆhkanˍ ve chaw hpehꞈ ve kʼo, suhˉ jehˬ ve awˬ moˍ gʼa cawˬ tcuh ve yoˬ.) Awˬ suhˉ kʼawꞈ heuˆ ve lehˬ haˉ chawˇ haˉ paˆ te ve tehꞈ maˇ gʼa kʼawꞈ shawˍ tuˬ te piˇ ve htawˇ, hawˉ hkʼaˆ chi teˇ gʼaˇ Hkriꞈ yaˇ awˬ moˍ hkʼaw awˬ vuiˬ laiˉ hkʼawꞈ maˇ gʼa te ve yoˬ. Awˬ lawn kʼo, awˬ nu ve chaw yawˇ ve awˬ lawn maˇ kʼoˆ daꞈ˗o ve, yawˇ htaꞈ maˇ beuꞈ˗o ve, leh yawˇ htaꞈ yawˆ yan gʼa˗oˬ htaˇ hkʼa gaˬ awˬ yanˇ gʼa yehˇ maw ve yoˬ. Chi hkʼoˆ kaꞈ, awˬ miˇ ma htaꞈ hpfuhˆ piˇ ve, leh yaˇ htaꞈ kaꞈ baˬ˗aˉ piˇ ve, chi teˇ hkui yawˇ hui hkʼaˬ hkʼe hpehꞈ chehˇ ve htaꞈ gʼa dawˇ nyi piˇ ve yoˬ.—Maˍlaˍhkiˆ 2:14-16.

Liꞈ hpu hkʼaw ve awˬ liˇ awˬ hkʼaˇ htaꞈ maˇ cawˇ ve, baˬ daꞈ ve leh awˬ suhˉ kʼawꞈ heuˆ ve lehˬ, heuˆ la kuiˬ laiˉ ceuˬ cawˬ ve pa taw, cuˇ yiˍ cawˬ ve Hkriꞈ yaˇ Yaˬhoˉvaˬ htaꞈ henˇ yuˬ leh heuˆ daꞈ ve lehˬ Yaˬhoˉvaˬ gu teh taˍ laˇ ve daꞈ jaˇ ve awˬ ceuˬ hpehꞈ ve tehꞈ shawˍ ve yoˬ.—Cuˇ yiˍ piˇ ve 5:4, 5; Heˍbrehˇ 13:4.