Awˬ Lawn 19
Haꞈ pehnˇ ve leh hteˇ ve cawˇ ve—Haiˬ ve gʼa hpuˇ htaˇ
“Nawˬ lehˬ, chaꞈ chiˆ ve kanˉ htaꞈ nyi ma cawˇ ve Gʼuiˬ sha hpehꞈ ve maˇ heˆ. Nawˬ mehˆ gʼuˇ suhˍ lo chaꞈ chiˆ ve awˬ ceuˬ htaꞈ nawˬ yuˬ baˬ ve yoˬ.”—CHIˇ MVUH VE 5:4.
KʼA MUIˬ HKAWˇ 142 Dawˇ law kuiˬ yeˬ chaweh vawˆ tiˍ ve
HENˇ TUˬ VE TEˇ HPAˍ *
1-3. (a) Chiˇ mvuh ve liꞈ 5:4-6 hkʼaw kʼoˆ taˍ ve hkʼe, chaꞈ chiˆ ve kanˉ hkʼa peu˗eˬ htaꞈ Yaˬhoˉvaˬ hkʼaˬ hkʼe dawˇ ve le? (b) Yaˇ htaꞈ pehꞈ ve tzuhˆ ve hpawˇ naˬ taweh te piˇ ve lehˬ “Hkriꞈ ve awˬ liˇ tawˇ hkawˇ” htaꞈ maˇ hawˍ daꞈ tehꞈ ngaˬ hui hkʼaˬ hkʼe te shiˍ gʼa ve le?
Chaꞈ chiˆ ve kanˉ hkʼa peu˗eˬ htaꞈ Yaˬhoˉvaˬ canˇ jaˇ. (Chiˇ mvuh ve 5:4-6 gʼaw sheˍ.) Hkʼe te leh yaˇ htaꞈ pehꞈ ve tzuhˆ ve hpawˇ naˬ taweh te piˇ ve yawˇ canˇ jaˇ! Ngaˬ hui yawˇ ve Shaˉhkiˆhkanˍ ve chaw hpehꞈ ve pa taw, ngaˬ hui kaꞈ chi ve htaꞈ canˇ leh Hkriꞈ yaˇ awˬ moˍ hkʼaw maˇ hpehꞈ la tcuh.—Roˉmaꞈ 12:9; Heˍbrehˇ 12:15, 16.
2 Yaˇ htaꞈ pehꞈ ve tzuhˆ ve hpawˇ naˬ taweh te piˇ ve lehˬ “Hkriꞈ ve awˬ liˇ tawˇ hkawˇ” htaꞈ maˇ hawˍ daꞈ! (Gaˍlaˍtiˆ 6:2) Ponˬ taˉ ve teˇ lawn hkʼaw ngaˬ hui gʼa henˇ ve, Yeˍsuˆ yawˇ ve awˬ liˇ tawˇ hkawˇ htaꞈ kʼoˆ maˍ leh te maˍ piˇ ve yoˬ. Awˬ liˇ tawˇ hkawˇ chi haꞈ pehnˇ ve htaꞈ cuˇ leh hkʼaˬ htaˆ kaꞈ hteˇ jaˇ cawˇ jaˇ. Awˬ tehˬ ve Hkriꞈ yaˇ awˬ liˇ tawˇ hkawˇ chi htaꞈ na yuˬ ve pa taw, yaˇ ehˉ yaˇ nehˬ shu haꞈ laˇ leh kawˆ tuˬ maˇ cawˬ tehꞈ shiˍ gʼa ve yoˬ. Yaꞈ hkʼaˇ, chi hkʼe te yaꞈ ve chaw lehˬ a shu yawˇ awˬ pon tiˉ dawˇ nyi leh, yaˇ ehˉ yaˇ nehˬ teˇ gʼaˇ ehꞈ kaꞈ yawˇ hui htaꞈ maˇ haꞈ laˇ leh kawˆ tuˬ cawˬ ve tehꞈ dawˇ tuˬ te piˇ ve yoˬ.
3 Yaˇ htaꞈ pehꞈ ve tzuhˆ ve hpawˇ naˬ taweh te piˇ ve miˬ guiˬ hkʼoˆ teˇ kaˬ le le lo cawˬ leh, awˬ tehˬ ve Hkriꞈ yaˇ htawˇ gʼa hpuˇ ve yoˬ. Aˬ htoꞈ ma pa taw le? “Haiˬ ve chaw leh heˍ puiˉ ve chaw” cawˬ maˇ jaˇ leh, yawˇ hui Hkriꞈ yaˇ awˬ moˍ hkʼaw kaꞈ loꞈ la gaˇ ve pa taw yoˬ. (2 Tiˆmoˉseˍ 3:13) Teˇ hpaˍ hpaˍ kʼo yawˇ hui awˬ viˉ awˬ nyi hpehꞈ ve htawˇ, awˬ suhˍ awˬ shaˍ hpawˇ nyi hkʼaˇ suh tuˬ te gaˇ leh oˇ hkʼe te yaꞈ ve yoˬ. Aˬ htoꞈ ma te chi venˇ baˆ uiˍ jaˇ ve le naˍ teˇ geh henˇ tuˬ yoˬ. Peuˬ hkʼawꞈ nawˉ, Hkriꞈ yaˇ awˬ moˍ hkʼaw ve chaw venˇ baˆ uiˍ jaˇ ve htaꞈ te yaꞈ htaˇ, nyi haꞈ shaˉ paˍ hkʼaˬ hkʼe te ve le, leh awˬ pa awˬ e yaˇ htaꞈ hkʼaˬ hkʼe te haꞈ shaˉ gʼa ve le kaꞈ teˇ geh henˇ tuˬ yoˬ. *
VENˇ BAˆ UIˍ JAˇ VE
4-5. Yaˇ htaꞈ pehꞈ ve tzuhˆ ve hpawˇ naˬ taweh te piˇ ve chaw lehˬ hkʼaˬ hkʼe te yaˇ oˇ ve teˇ gʼaˇ htaꞈ venˇ baˆ te yaꞈ ve le?
4 Yaˇ htaꞈ pehꞈ ve tzuhˆ ve hpawˇ naˬ taweh te piˇ ve lehˬ maw chaweh nyi ma naˬ tuˬ te piˇ ve yoˬ. Gʼa hpuˇ ve chaw htawˇ nyi ma naˬ leh, yawˇ ve yehˬ kʼa leh Hkriꞈ yaˇ awˬ moˍ hkʼaw ve chaw hui kaꞈ nyi ma naˬ ve yoˬ. Chi lehˬ venˇ baˆ uiˍ jaˇ.
5 Yawˇ yaˇ oˇ ve teˇ gʼaˇ htaꞈ venˇ baˆ te yaꞈ piˇ ve. A shu teˇ gʼaˇ shu htaꞈ naˬ tuˬ leh tuꞈ hkanˍ tuˬ te piˇ ve kʼo venˇ baˆ cawˬ ve chaw hpehꞈ tuˬ yoˬ. Yaˇ htaꞈ pehꞈ ve tzuhˆ ve hpawˇ naˬ taweh te piˇ ve chaw kaꞈ hkʼa shuˍ yoˬ tehꞈ gʼuˇ suhˍ teˇ lawn hkʼaw kʼoˆ maˍ laˇ tuˬ yoˬ. Yaˇ yawˇ htaꞈ yonˍ jaˇ ve htawˇ, yawˇ yaˇ htaꞈ hpfuhˆ leh haiˬ ve hpuˇ tcuh tuˬ nyiˉ piˇ ve yoˬ. Yaˇ teˇ hpaˍ chi hkʼe maˇ gʼa hpuˇ tuˬ ngaˬ hui gʼa haꞈ shaˉ ve yoˬ. Chi hkʼe gʼa hpuˇ ve chaw htaꞈ ngaˬ hui ga piˇ leh awˬ gʼaˇ piˇ cawˇ ve yoˬ.—1 Hteˇsaˍlawˇniˆ 5:14.
6-7. Yaˇ htaꞈ pehꞈ ve tzuhˆ ve hpawˇ naˬ taweh te piˇ ve chaw lehˬ hkʼaˬ hkʼe te Hkriꞈ yaˇ awˬ moˍ leh mvuhˇ miˬ uˉ peunˍ ve htaꞈ venˇ baˆ te yaꞈ piˇ ve le?
6 Yawˇ Hkriꞈ yaˇ awˬ moˍ htaꞈ venˇ baˆ te yaꞈ piˇ ve. Chi hkʼe te yaꞈ ve chaw lehˬ Hkriꞈ yaˇ awˬ moˍ ve awˬ meh luˬ tuˬ te piˇ ve yoˬ. (Maꞈhtehˍ 5:16; 1 Peˍtruˆ 2:12) Yawˇ hui te ve lehˬ, awˬ viˉ awˬ nyi laiˉ lanˬ gʼaˇ ‘yonˍ ve teˇ ceuˬ awˬ pon gʼaˇ hteꞈ te tuˬ’ coˇ caˇ chehˇ ve htaꞈ awˬ meh luˬ tuˬ kaꞈ te piˇ ve yoˬ! (Yuˇdaꞈ 3) Venˇ baˆ te yaꞈ leh maˇ dawˇ hpfuhˆ ve leh Hkriꞈ yaˇ awˬ moˍ ve awˬ meh htaꞈ te luˬ laˇ ve chaw htaꞈ ngaˬ hui Hkriꞈ yaˇ awˬ moˍ hkʼaw maˇ chehˇ tcuh.
7 Yawˇ mvuhˇ miˬ uˉ peunˍ ve htaꞈ venˇ baˆ te yaꞈ piˇ ve. Hkriꞈ yaˇ lehˬ “uˉ peunˍ shehˍ hpaˇ teˇ hpaˍ awˬ hawˉ lo” gʼa chehˇ cawˇ ve yoˬ. (Roˉmaꞈ 13:1) Yawˇ hui awˬ hawˉ lo chehˇ tuˬ, mvuhˇ miˬ awˬ liˇ htaꞈ na yuˬ ve yoˬ. Hkriꞈ yaˇ awˬ moˍ hkʼaw ve chaw teˇ gʼaˇ awˬ liˇ htaꞈ te yaꞈ ve kʼo, yawˇ mvuhˇ miˬ uˉ peunˍ ve htaꞈ venˇ baˆ te yaꞈ chehˇ ve yoˬ. (Tcuh yaˇ liꞈ 25:8 htaꞈ tehˆ nyi sheˍ.) Hkriꞈ yaˇ awˬ moˍ hkʼaw ve nyi haꞈ shaˉ paˍ mvuhˇ miˬ awˬ liˇ htaꞈ cuˇ leh shu htaꞈ ciˍ yanˍ piˇ tuˬ a hkaw˗anˬ maˇ cawˬ. Yaꞈ hkʼaˇ, yawˇ hui te yaꞈ ve chaw htaꞈ mvuhˇ miˬ uˉ peunˍ ve maˇ mawˬ tcuh tuˬ faˉ taˍ ve kaꞈ maˇ te. (Roˉmaꞈ 13:4) Venˇ baˆ te yaꞈ ve chaw lehˬ yawˇ awˬ yawˇ sheˍ ve hkʼe gʼa gʼeuꞈ tuˬ yoˬ.—Gaˍlaˍtiˆ 6:7.
8. Chaw teˇ gʼaˇ awˬ nu ve teˇ gʼaˇ htaꞈ venˇ baˆ te yaꞈ ve kʼo, Yaˬhoˉvaˬ hkʼaˬ hkʼe dawˇ ve le?
8 A yeˇ uiˍ ve lehˬ yawˇ Gʼuiˬ sha htaꞈ venˇ baˆ te yaꞈ piˇ ve. (Chiˇ mvuh ve 51:4) Chaw teˇ gʼaˇ awˬ nu ve teˇ gʼaˇ htaꞈ venˇ baˆ te yaꞈ ve kʼo, yawˇ Yaˬhoˉvaˬ htaꞈ kaꞈ venˇ baˆ te yaꞈ ve yoˬ. Gʼuiˬ sha Iˉsaˍreˍlaˆ chaw htaꞈ awˬ liˇ tawˇ hkawˇ piˇ taˍ ve teˇ maˬ htaꞈ dawˇ nyi sheˍ. Awˬ liˇ tawˇ hkawˇ hkʼaw kʼoˆ taˍ ve, chaw teˇ gʼaˇ mawˇ hkʼawˇ ve maˇ heˆ leh shu ve mawˇ htaꞈ heˍ caˇ ve kʼo, “yawˇ lehˬ Gʼuiˬ sha htaꞈ te yaꞈ” ve yoˬ. (Oˉ kʼoˍ pui ve 6:2-4) Hkʼe kʼo, Hkriꞈ yaˇ awˬ moˍ hkʼaw ve chaw teˇ gʼaˇ yaˇ htaꞈ pehꞈ ve tzuhˆ ve hpawˇ naˬ taweh te piˇ ve kʼo, yawˇ kaꞈ Gʼuiˬ sha htaꞈ te yaꞈ ve yoˬ. Yawˇ Yaˬhoˉvaˬ ve awˬ meh htaꞈ te luˬ piˇ ve yoˬ. Hkʼe te leh chi ve venˇ baˆ uiˍ jaˇ ve tehꞈ ngaˬ hui gʼa shawˍ ve yoˬ.
9. Yaˬhoˉvaˬ ve kanˉ hkʼaˇ Liꞈ hpu htaꞈ cuˇ leh hkʼaˬ hkʼe te shaˍ tiꞈ peꞈ laˇ ve le? Aˬ htoꞈ ma te hkʼaˬ htaˆ kaꞈ maˍ laˇ ve le?
9 Oˇ ve htaꞈ caˉ daꞈ ve awˬ lawn Yaˬhoˉvaˬ ve kanˉ hkʼaˇ Liꞈ hpu htaꞈ cuˇ leh shaˍ tiꞈ peꞈ laˇ ve laiˉ hkʼawꞈ gaˬ˗oˬ. Tawˇ pa haˉ te kʼo, chi hkʼe gʼa hpuˇ ve chaw nyi ma gawˬ lehˍ cawˬ tuˬ hkʼaˬ hkʼe gʼa te cawˇ ve le, awˬ nu ve chaw yawˇ htaꞈ hkʼaˬ hkʼe te ga piˇ leh awˬ gʼaˇ piˇ gʼa tuˬ le, leh awˬ pa awˬ e yaˇ htaꞈ hkʼaˬ hkʼe te haꞈ shaˉ gʼa tuˬ le, Shaw nyi kuiˬ Taꞈ yehˬ leh Tu loˬ! liꞈ hkʼaw beˆ maˍ laˇ taˍ ve yoˬ. Yaˇ htaꞈ pehꞈ ve tzuhˆ ve hpawˇ naˬ taweh te piˇ ve awˬ lawn cawˬ htaˇ hkʼaˬ hkʼe gʼa te cawˇ ve, Gʼuiˬ sha ve kanˉ hkʼaˇ Liꞈ hpu htaꞈ cuˇ leh nyi haꞈ shaˉ paˍ htaꞈ maˍ piˇ ve yoˬ. Awˬ lawn chi hkʼe ve gʼa hpuˇ htaˇ Hkriꞈ yaˇ awˬ moˍ hkʼaˬ hkʼe gʼa te cawˇ ve le, ngaˬ hui ve kanˉ hkʼaˇ hkʼaˬ htaˆ kaꞈ maˍ laˇ ve yoˬ. Aˬ htoꞈ ma pa taw le? Ngaˬ hui gu ve awˬ hkʼaˇ Hkriꞈ ve awˬ liˇ tawˇ hkawˇ htaꞈ hawˍ daꞈ tcuh gaˇ ve pa taw yoˬ.
VENˇ BAˆ UIˍ JAˇ VE CAWˬ LA HTAˇ
10-12. (a) Venˇ baˆ uiˍ jaˇ ve cawˬ la htaˇ, nyi haꞈ shaˉ paˍ aˬ htoꞈ ma htaꞈ dawˇ nyi ve le? Yawˇ hui awˬ pon aˬ htoꞈ ma a yeˇ uiˍ jaˇ ve le? (b) Yaˍkoˆ liꞈ 5:14, 15 hkʼaw kʼoˆ taˍ ve hkʼe, nyi haꞈ shaˉ paˍ hkʼaˬ hkʼe te tuˬ coˇ caˇ ve le?
10 Venˇ baˆ uiˍ jaˇ ve cawˬ la htaˇ, nyi haꞈ shaˉ paˍ Hkriꞈ ve awˬ liˇ tawˇ hkawˇ htaꞈ dawˇ nyi ve yoˬ. Awˬ liˇ tawˇ hkawˇ chi hkʼaw kʼoˆ taˍ ve, yawˇ hui haꞈ pehnˇ ve hkʼaw yawˬ awˬ moˍ htaꞈ gʼa nyi haꞈ shaˉ leh, Gʼuiˬ sha mehˆ gʼuˇ suhˍ hteˇ ve cawˇ ve gʼa te ve yoˬ. Hkʼe te leh chaw teˇ gʼaˇ venˇ baˆ uiˍ jaˇ ve htaꞈ te yaꞈ ve tehꞈ yawˇ hui shiˍ la htaˇ, hkʼa dehꞈ gʼa dawˇ nyi ve yoˬ. Nyi haꞈ shaˉ paˍ awˬ pon a yeˇ uiˍ jaˇ ve lehˬ Yaˬhoˉvaˬ htaꞈ gʼa yawˆ yan leh yawˇ ve awˬ meh maˇ gʼa luˬ tuˬ gʼa haꞈ shaˉ ve yoˬ. (Oˉ kʼoˍ pui ve 22:31, 32; Maꞈhtehˍ 6:9) Yawˇ hui Hkriꞈ yaˇ awˬ moˍ hkʼaw ve awˬ viˉ awˬ nyi Yaˬhoˉvaˬ geh meuˆ daꞈ tcuh gaˇ leh haiˬ ve gʼa hpuˇ ve chaw htaꞈ ga piˇ gaˇ ve yoˬ.
11 Te yaꞈ ve chaw Hkriꞈ yaˇ awˬ moˍ hkʼaw chehˇ ve kʼo, nyi haꞈ shaˉ paˍ yawˇ htaꞈ kaꞈ ga piˇ tuˬ coˇ caˇ ve yoˬ. (Yaˍkoˆ 5:14, 15 gʼaw sheˍ.) Hkriꞈ yaˇ maˇ daꞈ ve dawˇ hkʼaˇ yawˇ htaꞈ gʼaˇ tcuh leh venˇ baˆ uiˍ jaˇ ve htaꞈ te ve kʼo, co ha hpawˇ maˇ chehˇ sha ve hkʼe hpehꞈ ve yoˬ. Chi kʼoˆ gaˇ ve lehˬ yawˇ Yaˬhoˉvaˬ geh maˇ meuˆ daꞈ˗o. * Nyi haꞈ shaˉ paˍ lehˬ saˍ laꞈ gʼonˍ hkʼe hpehꞈ ve yoˬ. Yawˇ hui “chaw naˬ htaꞈ na˗e la” tcuh gaˇ ve yoˬ. Yawˇ hui Liꞈ hpu htaꞈ cuˇ leh beˆ maˍ piˇ htaˇ, yawˇ awˬ tehˬ awˬ na venˇ baˆ dawˇ hpfuhˆ ve kʼo Gʼuiˬ sha geh kʼawꞈ cawˇ daꞈ gʼa ve yoˬ.—Tcuh yaˇ 3:19; 2 Kawˇrenˍhtuˆ 2:5-10.
12 Nyi haꞈ shaˉ paˍ ve awˬ vuiˬ a yeˇ uiˍ jaˇ. Gʼuiˬ sha ve yawˬ awˬ moˍ yawˇ hui htaꞈ nyi haꞈ shaˉ tcuh taˍ ve, yawˇ hui a yeˇ yuˬ jaˇ. (1 Peˍtruˆ 5:1-3) Yawˇ hui awˬ viˉ awˬ nyi htaꞈ Hkriꞈ yaˇ awˬ moˍ hkʼaw kawˆ tuˬ maˇ cawˬ ve tehꞈ dawˇ tcuh gaˇ ve yoˬ. Hkʼe te leh yaˇ htaꞈ pehꞈ ve tzuhˆ ve hpawˇ naˬ taweh te piˇ ve awˬ lawn maˇ kʼoˆ, awˬ nu ve venˇ baˆ uiˍ jaˇ ve htaꞈ maˇ kʼoˆ, yawˇ hui gʼa kaˇ htaˇ laꞈ haˉ gu piˇ ve yoˬ. Awˬ tawn 13, 15, leh 17 hkʼaw awˉ lawˉ tanˬ ve na hkawˇ htaꞈ teˇ geh chaˬ nyi sheˍ.
13-14. Yaˇ htaꞈ pehꞈ ve tzuhˆ ve hpawˇ naˬ taweh te piˇ ve gʼa kaˇ htaˇ, nyi haꞈ shaˉ paˍ mvuhˇ miˬ ve awˬ liˇ htaꞈ gʼaꞈ te leh mvuhˇ miˬ kanˉ te paˍ htaꞈ kʼoˆ piˇ tuˬ laˇ? Kʼoˆ maˍ laˇ sheˍ.
13 Yaˇ htaꞈ pehꞈ ve tzuhˆ ve hpawˇ naˬ taweh te piˇ ve gʼa kaˇ htaˇ, nyi haꞈ shaˉ paˍ mvuhˇ miˬ ve awˬ liˇ htaꞈ gʼaꞈ te leh mvuhˇ miˬ kanˉ te paˍ htaꞈ kʼoˆ piˇ tuˬ laˇ? Kʼoˆ piˇ tuˬ yoˬ. Yawˇ hui ve mvuhˇ miˬ hkʼaw awˬ liˇ tawˇ hkawˇ chi hkʼe cawˬ ve kʼo, yawˇ hui gʼa gʼaꞈ te ve yoˬ. (Roˉmaꞈ 13:1) Awˬ liˇ chi teˇ hpaˍ Gʼuiˬ sha ve awˬ liˇ htaꞈ maˇ yaꞈ. (Tcuh yaˇ 5:28, 29) Hkʼe te leh, awˬ lawn chi hkʼe ve nyi haꞈ shaˉ paˍ gʼa kaˇ htaˇ, yawˇ hui hkʼaˬ hkʼe gʼa te cawˇ ve awˬ hkʼaˇ gʼa ca ve yoˬ.
14 Yaˇ haiˬ ve gʼa hpuˇ ve, yaˇ ve awˬ pa awˬ e, leh awˬ nu ve chaw awˬ lawn chi htaꞈ shiˍ ve geh nyi haꞈ shaˉ paˍ tawˇ yaw daꞈ htaˇ, yawˇ hui mvuhˇ miˬ kanˉ te paˍ htaꞈ kʼoˆ piˇ tuˬ a hkaw˗anˬ cawˬ ve tehꞈ haꞈ pehnˇ ve hkʼaw kʼoˆ maˍ piˇ ve yoˬ. Yaꞈ hkʼaˇ, haiˬ ve te ve chaw awˬ viˉ awˬ nyi hpehꞈ leh hkʼawꞈ nawˉ htaˇ chaw laiˉ gʼaˇ shiˍ la ve kʼo hkʼaˬ hkʼe te tuˬ le? Mvuhˇ miˬ kanˉ te paˍ htaꞈ ca kʼoˆ piˇ ve chaw yawˇ Gʼuiˬ sha ve awˬ meh luˬ tuˬ te piˇ ve tehꞈ dawˇ nyi cawˇ˗aw laˇ? Maˇ dawˇ nyi cawˇ. Gʼuiˬ sha ve awˬ meh luˬ tuˬ te piˇ ve chaw lehˬ te yaꞈ ve chaw yoˬ.
15-16. (a) 1 Tiˆmoˉseˍ liꞈ 5:19 hkʼaw kʼoˆ taˍ ve hkʼe, nyi haꞈ shaˉ paˍ suhˉ jehˬ piˇ htaˇ, aˬ htoꞈ ma te shaˉ hkiˆ 2 gʼaˇ gʼa cawˬ ve le? (b) Hkriꞈ yaˇ awˬ moˍ hkʼaw ve chaw teˇ gʼaˇ yaˇ htaꞈ pehꞈ ve tzuhˆ ve hpawˇ naˬ taweh te piˇ ve kʼo nyi haꞈ shaˉ paˍ hkʼaˬ hkʼe te tuˬ le?
15 Hkriꞈ yaˇ awˬ moˍ hkʼaw nyi haꞈ shaˉ paˍ suhˉ jehˬ piˇ htaˇ, aˬ htoꞈ ma te shaˉ hkiˆ 2 gʼaˇ gʼa cawˬ ve le? Awˬ hkʼaˇ chi hkʼe te ve hteˇ ve cawˇ ve tehꞈ Liꞈ hpu hkʼaw kʼoˆ taˍ ve pa taw yoˬ. Chaw teˇ gʼaˇ te yaꞈ ve tehꞈ awˬ nu ve chaw kʼoˆ laˇ leh yawˇ maˇ haꞈ yuˬ ve kʼo, nyi haꞈ shaˉ paˍ suhˉ jehˬ piˇ gʼa tuˬ shaˉ hkiˆ 2 gʼaˇ gʼa cawˬ ve yoˬ. (Bon maˍ ve 19:15; Maꞈhtehˍ 18:16; 1 Tiˆmoˉseˍ 5:19 gʼaw sheˍ.) Mvuhˇ miˬ kanˉ te paˍ htaꞈ kʼoˆ piˇ ve kaꞈ shaˉ hkiˆ 2 gʼaˇ gʼa cawˬ ve tehꞈ kʼoˆ gaˇ ve laˇ? Maˇ heˆ. Mvuhˇ miˬ awˬ liˇ htaꞈ te yaꞈ ve awˬ lawn hpehꞈ ve kʼo, Hkriꞈ yaˇ awˬ moˍ hkʼaw ve awˬ liˇ htaꞈ ngaˬ hui gʼaꞈ te tuˬ maˇ loˍ.
16 Hkriꞈ yaˇ awˬ moˍ hkʼaw ve chaw teˇ gʼaˇ yaˇ htaꞈ pehꞈ ve tzuhˆ ve hpawˇ naˬ taweh te piˇ ve tehꞈ nyi haꞈ shaˉ paˍ gʼa kaˇ htaˇ, yawˇ hui mvuhˇ miˬ ve awˬ liˇ htaꞈ gʼaꞈ te leh yawˇ ve awˬ lawn mvuhˇ miˬ kanˉ te paˍ htaꞈ kʼoˆ piˇ tuˬ yoˬ. Peuˬ hkʼawꞈ nawˉ yawˇ hui awˬ lawn chi htaꞈ hkʼa dehꞈ chaˬ nyi leh, Liꞈ hpu htaꞈ cuˇ leh suhˉ jehˬ ve awˬ moˍ cawˬ cawˇ˗aw laˇ tehꞈ dawˇ cheˆ tuˬ yoˬ. Awˉ lawˉ htaˇ, yawˇ te yaꞈ ve laˇ tehꞈ nyi haꞈ shaˉ paˍ na piˇ ve yoˬ. Yawˇ maˇ gʼa te tehꞈ kʼoˆ ve kʼo, nyi haꞈ shaˉ paˍ yawˇ ve awˬ lawn awˬ nu ve chaw htaꞈ kaꞈ ca na nyi tuˬ yoˬ. Nyi haꞈ shaˉ paˍ htaꞈ kʼoˆ laˇ ve chaw, leh awˬ nu ve teˇ gʼaˇ kaꞈ chaw chi teˇ gʼaˇ “awˬ nu ve awˬ yanˇ htaˇ kaꞈ” yaˇ htaꞈ pehꞈ ve tzuhˆ ve hpawˇ naˬ taweh te piˇ jaw ve tehꞈ kʼoˆ maˍ laˇ gʼa ve kʼo, yawˇ hui 2 gʼaˇ teˇ geh shaˉ hkiˆ hpehꞈ gʼa leh suhˉ jehˬ ve awˬ moˍ teh gʼa ve yoˬ. * Yaˇ ca kʼoˆ la ve yawˇ shaˉ hkiˆ maˇ cawˬ ve htawˇ, yawˇ heˍ chehˇ ve tehꞈ kʼoˆ gaˇ ve maˇ heˆ. Shaˉ hkiˆ maˇ lawꞈ leh suhˉ jehˬ ve awˬ moˍ teh maˇ gʼa ve htawˇ, venˇ baˆ uiˍ jaˇ ve chi yaˇ nyi ma naˬ jaˇ tuˬ te piˇ gʼa ve tehꞈ nyi haꞈ shaˉ paˍ tawnˇ taˍ cawˇ ve yoˬ. Haiˬ ve gʼa hpuˇ ve chaw htaꞈ nyi haꞈ shaˉ paˍ caˉ leh ga piˇ tuˬ yoˬ. Chi hkʼoˆ kaꞈ, Hkriꞈ yaˇ awˬ moˍ htaꞈ haꞈ shaˉ tuˬ, nyi haꞈ shaˉ paˍ oˇ ve teˇ gʼaˇ te yaꞈ ve tehꞈ shu kʼoˆ laˇ ve htaꞈ caˉ leh hkʼa dehꞈ gʼa chaˬ nyi ve yoˬ.—Tcuh yaˇ 20:28.
17-18. Suhˉ jehˬ ve awˬ moˍ aˬ htoꞈ ma awˬ vuiˬ cawˬ ve le?
17 Suhˉ jehˬ ve awˬ moˍ aˬ htoꞈ ma awˬ vuiˬ cawˬ ve le? Venˇ baˆ uiˍ jaˇ ve htaꞈ te yaꞈ ve chaw chi teˇ gʼaˇ Hkriꞈ yaˇ awˬ moˍ hkʼaw kʼawꞈ chehˇ hpehꞈ ve laˇ, tawˆ˗e tcuh cawˇ ve laˇ, yawˇ hui gʼa dawˇ cheˆ ve yoˬ. Yawˇ mvuhˇ miˬ awˬ liˇ htaꞈ te yaꞈ ve pa taw hkʼaˬ hkʼe ve gʼa hkanˍ tuˬ, yawˇ hui suhˉ jehˬ cheˆ piˇ ve maˇ heˆ. Yawˇ hui mvuhˇ miˬ suhˉ jehˬ cheˆ paˍ htaꞈ te tcuh ve yoˬ.—Roˉmaꞈ 13:2-4; Tiˇtuˆ 3:1.
18 Nyi haꞈ shaˉ paˍ yawˇ hui suhˉ jehˬ ve awˬ moˍ hkʼaw awˬ vuiˬ te htaˇ, chaw oˇ ve teˇ gʼaˇ leh Gʼuiˬ sha htaꞈ meuˆ daꞈ ve awˬ lawn ceh suhˉ jehˬ piˇ ve yoˬ. Yaˇ htaꞈ pehꞈ ve tzuhˆ ve hpawˇ naˬ taweh te piˇ ve chaw venˇ baˆ dawˇ hpfuhˆ maˇ dawˇ hpfuhˆ ve yawˇ hui Liꞈ hpu htaꞈ cuˇ leh suhˉ jehˬ piˇ ve yoˬ. Yawˇ venˇ baˆ maˇ dawˇ hpfuhˆ ve kʼo, yawˇ htaꞈ Hkriꞈ yaˇ awˬ moˍ hkʼaw gʼaꞈ tawˆ tcuh leh awˬ viˉ awˬ nyi htaꞈ shiˍ piˇ kaˇ piˇ tuˬ yoˬ. (1 Kawˇrenˍhtuˆ 5:11-13) Yawˇ dawˇ hpfuhˆ ve kʼo, Hkriꞈ yaˇ awˬ moˍ hkʼaw kʼawꞈ chehˇ gʼa ve yoˬ. Yaꞈ hkʼaˇ, yawˇ awˬ vuiˬ laiˉ hkʼawꞈ maˇ heˆ kʼoˆ teˇ co˗e maˇ gʼa te˗o ve tehꞈ nyi haꞈ shaˉ paˍ yawˇ htaꞈ kʼoˆ piˇ tuˬ yoˬ. Nyi haꞈ shaˉ paˍ Hkriꞈ yaˇ awˬ moˍ hkʼaw ve yaˇ teˇ gʼaˇ le le htaꞈ haꞈ shaˉ gaˇ ve pa taw, yaˇ oˇ ve teˇ gʼaˇ awˬ paˇ lo chehˇ htaˇ shaˍ tiꞈ te cawˇ ve tehꞈ, yaˇ cawˬ ve chaw teˇ gʼaˇ le le htaꞈ kʼoˆ piˇ tuˬ yoˬ. Yawˇ hui chi hkʼe te htaˇ, yaˇ haiˬ ve gʼa hpuˇ ve a shu hpehꞈ ve tehꞈ awˬ nu ve awˬ pa awˬ e htaꞈ maˇ shiˍ tcuh piˇ cawˇ.
NAWˬ YAˇ HTAꞈ HKʼAˬ HKʼE TE HAꞈ SHAˉ GʼA TUˬ LE?
Awˬ pa awˬ e pehꞈ ve tzuhˆ ve hpawˇ keunˍ lawꞈ cawˇ lawꞈ ve awˬ hkʼaˇ yaˇ htaꞈ maˍ piˇ ve yoˬ. Yaˇ htaꞈ chi hkʼe maˍ piˇ gʼa tuˬ, Gʼuiˬ sha ve kanˉ hkʼaˇ gu teh taˍ laˇ ve liꞈ kʼoˆ teˇ hpaˍ htaꞈ yehˇ sheˍ (Awˬ lawn 19, awˬ tawn 19-22 nyi sheˍ)
19-22. Awˬ pa awˬ e yaˇ htaꞈ hkʼaˬ hkʼe te haꞈ shaˉ gʼa tuˬ le? (Awˬ htaꞈ hpawˇ ve awˬ han htaꞈ nyi sheˍ.)
19 Yaˇ htaꞈ haꞈ shaˉ tuˬ a shu awˬ vuiˬ cawˬ ve le? Awˬ pa awˬ e yoˬ. * “Yaˇ ehˉ teˇ hpaˍ lehˬ Gʼuiˬ sha peꞈ laˇ ve laꞈ shawnˍ hpehꞈ ve yoˬ.” (Chiˇ mvuh ve 127:3) Laꞈ shawnˍ chi htaꞈ haꞈ shaˉ tuˬ nawˬ ve awˬ vuiˬ yoˬ. Nawˬ hkʼaˬ hkʼe te haꞈ shaˉ gʼa tuˬ le?
20 Awˉ lawˉ teˇ ceuˬ lehˬ, yaˇ htaꞈ pehꞈ ve tzuhˆ ve hpawˇ naˬ taweh te piˇ ve awˬ lawn nawˬ hkʼaˇ nawˬ kaꞈ hkʼa dehꞈ na gʼa cawˇ ve yoˬ. Chi hkʼe te yaꞈ ve lehˬ hkʼaˬ hkʼe ve chaw le? Yawˇ hui yaˇ htaꞈ hkʼaˬ hkʼe heˍ piˇ ve le? Hkʼaˬ hkʼe ve awˬ yanˇ htaˇ kawˆ tuˬ cawˬ ve ngaˬ hui hkʼa dehꞈ gʼa chaˬ nyi ve yoˬ. (Tawˇ naˉ ve 22:3; 24:3) Chi hkʼe te yaꞈ ve chaw lehˬ maˇ˗awˍ ve kʼo yaˇ shiˍ leh meuˆ daꞈ ve chaw hpehꞈ ve tehꞈ tawnˇ taˍ sheˍ.
21 Nyiˇ ceuˬ teˇ ceuˬ lehˬ, yaˇ geh hkʼaˬ htaˆ kaꞈ tawˇ yaw daꞈ cawˇ ve yoˬ. (Bon maˍ ve 6:6, 7) Chi kʼoˆ gaˇ ve lehˬ nawˬ hui yaˇ htaꞈ hkʼa dehꞈ na taˍ piˇ cawˇ ve yoˬ. (Yaˍkoˆ 1:19) Yaˇ chi hkʼe gʼa hpuˇ ve kʼo, maˇ kʼoˆ haˆ tehꞈ tawnˇ taˍ sheˍ. Yaˇ shu maˇ yonˍ la ve htaꞈ kawˆ ve, maˇ heˆ kʼo haiˬ ve te piˇ ve chaw, yaˇ htaꞈ nyiˉ piˇ leh maˇ kʼoˆ tcuh ve yoˬ hehˉ. Yaˇ teˇ pawˆ le le htaꞈ maˇ shuˍ ve kʼo, laiˉ ceuˬ na piˇ leh yeunˇ hkanˍ ve hkʼaw hkʼa dehꞈ na taˍ piˇ sheˍ.
22 Shehˆ ceuˬ teˇ ceuˬ lehˬ, yaˇ htaꞈ hkʼa dehꞈ maˍ piˇ cawˇ ve yoˬ. Nawˬ ve yaˇ htaꞈ hawˉ hkʼaˆ yaˇ miˇ teˇ geh zuhꞈ ve awˬ lawn keunˍ ve hkʼe maˍ piˇ cawˇ ve yoˬ. Chaw teˇ gʼaˇ yaˇ htaꞈ maˇ keunˍ ve hkʼaw ca shoˆ la ve kʼo, hkʼaˬ hkʼe gʼa kʼoˆ leh te cawˇ ve kaꞈ yaˇ htaꞈ maˍ piˇ cawˇ ve yoˬ. Gʼuiˬ sha ve kanˉ hkʼaˇ peꞈ laˇ ve awˬ ceuˬ teˇ hpaˍ htaꞈ cuˇ leh yaˇ htaꞈ maˍ piˇ sheˍ.—Awˇ ceˍ awˇ fa “ Nawˬ awˬ to leh yaˇ kaꞈ maˍ piˇ sheˍ” ve htaꞈ nyi sheˍ.
23. Yaˇ htaꞈ pehꞈ ve tzuhˆ ve hpawˇ naˬ taweh te piˇ ve awˬ lawn htaꞈ ngaˬ hui hkʼaˬ hkʼe shawˍ ve le? Gʼuˇ suhˍ teˇ lawn hkʼaw aˬ htoꞈ ma gʼa henˇ tuˬ le?
23 Ngaˬ hui Yaˬhoˉvaˬ ve Shaˉhkiˆhkanˍ ve chaw hpehꞈ ve pa taw, yaˇ htaꞈ pehꞈ ve tzuhˆ ve hpawˇ naˬ taweh te piˇ ve awˬ lawn, venˇ baˆ uiˍ jaˇ leh haiˬ jaˇ ve awˬ lawn hpehꞈ ve tehꞈ shawˍ ve yoˬ. Hkriꞈ ve awˬ liˇ tawˇ hkawˇ maˍ laˇ ve hkʼe, ngaˬ hui ve Hkriꞈ yaˇ awˬ moˍ chi hkʼe te yaꞈ ve chaw ve venˇ baˆ htaꞈ maˇ faˉ taˬ. Chi hkʼoˆ kaꞈ, chi hkʼe gʼa hpuˇ jaw ve chaw htaꞈ ngaˬ hui hkʼaˬ hkʼe te ga piˇ gʼa ve le? Gʼuˇ suhˍ teˇ lawn hkʼaw kʼoˆ maˍ laˇ tuˬ yoˬ.
KʼA MUIˬ HKAWˇ 103 Yawˬ hawˉ shehˍ hpaˇ lehˬ laꞈ shawnˍ hpehꞈ ve
^ Yaˇ pehꞈ ve tzuhˆ ve hpawˇ naˬ taweh te piˇ ve maˇ gʼa hpuˇ tuˬ, ngaˬ hui hkʼaˬ hkʼe te haꞈ shaˉ gʼa tuˬ le awˬ lawn chi ve hkʼaw kʼoˆ maˍ laˇ tuˬ yoˬ. Nyi haꞈ shaˉ paˍ Hkriꞈ yaˇ awˬ moˍ htaꞈ hkʼaˬ hkʼe te nyi haꞈ shaˉ piˇ ve le, awˬ pa awˬ e yaˇ htaꞈ hkʼaˬ hkʼe te haꞈ shaˉ gʼa tuˬ le kaꞈ teˇ geh henˇ tuˬ yoˬ.
^ KʼAWꞈ KʼOˆ MAˍ TAˍ VE: Yaˇ htaꞈ pehꞈ ve tzuhˆ ve hpawˇ naˬ taweh te piˇ ve lehˬ, chaw mawˇ yaˇ htaꞈ cuˇ leh pehꞈ ve tzuhˆ ve hpawˇ te gaˇ ve nyi ma htaꞈ gʼaꞈ te ve htaꞈ kʼoˆ gaˇ ve yoˬ. Chi lehˬ yaˇ htaꞈ nyiˉ behˇ ve, mawꞈ kʼaw maˇ heˆ leh hkʼehˇ hkʼaw yehˇ leh te yaꞈ ve, yaˇ ve hpaˇ kʼaˍ, cuˉ, leh hkʼehˇ hkʼaw diˬ htaꞈ shoˆ ve kaꞈ caˉ daꞈ ve yoˬ. Chi hkʼe ve gʼa hpuˇ ve yaˇ ehˉ yaˇ nehˬ maˇ˗awˍ ve lehˬ yaˇ miˇ hpehꞈ ve htawˇ, teˇ pawˆ pawˆ kʼoˆ hawˉ hkʼaˆ kaꞈ hpehꞈ gʼa ve yoˬ. Leh chi hkʼe te ve chaw mawˇ maˇ˗awˍ ve lehˬ hawˉ hkʼaˆ hpehꞈ ve htawˇ, teˇ pawˆ pawˆ kʼo yaˇ miˇ kaꞈ te gʼa ve yoˬ. Yaˇ chi hkʼe gʼa hpuˇ htaˇ, yawˇ nyi ma naˬ ve lehˬ yawˇ ve yaꞈ kuiˬ htaꞈ maˇ heˆ tehꞈ hkʼa dehꞈ tawnˇ taˍ cawˇ ve yoˬ.
^ Chaw teˇ gʼaˇ yawˇ co ha hpawˇ maˇ chehˇ sha ve pa taw venˇ baˆ uiˍ jaˇ ve htaꞈ te yaꞈ ve htawˇ, yawˇ awˬ vuiˬ yawˇ gʼa pfuhˇ ve yoˬ.—Roˉmaꞈ 14:12.
^ Nyi haꞈ shaˉ paˍ chaw teˇ gʼaˇ te yaꞈ ve tehꞈ shu kʼoˆ laˇ ve geh yaw daꞈ htaˇ, ca kʼoˆ la ve yaˇ yawˇ hui geh maˇ chehˇ tcuh cawˇ. Yaˇ ve awˬ pa awˬ e maˇ heˆ kʼo awˬ nu ve chaw mawˇ yaˇ ve awˬ tan nyi haꞈ shaˉ paˍ geh kʼawꞈ kʼoˆ maˍ piˇ gʼa ve yoˬ. Chi hkʼe te ve kʼo yaˇ nyi ma maˇ kʼawꞈ naˬ jaˇ.
^ Chi ve hkʼaw awˬ pa awˬ e htaꞈ kʼoˆ ve htawˇ, mvuhˇ miˬ awˬ liˇ hpawˇ yaˇ nyi haꞈ shaˉ tuˬ awˬ vuiˬ cawˬ ve chaw htaꞈ kaꞈ kʼoˆ gaˇ ve yoˬ.