1. Gʼuiˬ sha ve tawˇ hkawˇ ngaˬ hui htaꞈ aˬ htoꞈ ma maˍ laˇ ve le?

 Yaˬhoˉvaˬ uiˍ jaˇ mvuh jaˇ ve saˍ laꞈ lonˉ hpehꞈ ve yoˬ. Hkʼe te leh ngaˬ hui shoꞈ shaꞈ ve aˬ htoꞈ ma gʼa hpuˇ ve htawˇ gu gʼa ve yoˬ. (Iˉsaˍyaˆ 30:20, 21) Liꞈ hpu lehˬ ngaˬ hui “daꞈ ve kanˉ teˇ ceuˬ le le awˬ pon gu taˍ ve chaw hpehꞈ la tuˬ” maˍ laˇ ve yoˬ. (2 Tiˆmoˉseˍ 3:17) Liꞈ hpu hkʼaw maˍ laˇ ve htaꞈ gʼaꞈ te htaˇ, “miˬ guiˬ ve cuˇ yiˍ” yehˇ cawˇ ve tehꞈ kʼoˆ ve chaw aꞈ kehˉ ngaˬ hui cuˇ yiˍ cawˬ tuˬ yoˬ.—1 Kawˇrenˍhtuˆ 3:19; Chiˇ mvuh ve 119:97-100.

2. Awˬ lawn chi ve hkʼaw ngaˬ hui aˬ htoꞈ ma htaꞈ chaˬ nyi tuˬ le?

² Miˬ guiˬ ve cuˇ yiˍ ngaˬ hui awˬ suhˍ awˬ shaˍ hpawˇ nyi hkʼaˇ suh tuˬ te laˇ gʼa ve tehꞈ gʼa henˇ tuˬ yoˬ. Hkʼe te leh miˬ guiˬ yaˇ hkʼe dawˇ leh te ve htaꞈ ngaˬ hui tawˍ baˬ tuˬ haˍ jaˇ ve yoˬ hehˉ. Chi htaꞈ pa taw, Liꞈ hpu hkʼaw kʼoˆ ve, ‘chaw teˇ gʼaˇ kaꞈ cuˇ yiˍ maˍ yiˍ leh tcuhˉ kuiˬ maˇ cawˬ ve heˍ ve tawˇ hkawˇ htaꞈ yehˇ leh nawˬ hui htaꞈ maˇ gʼa hpeh yuˬ veu tuˬ, shaˍ tiꞈ taˍ˗oꞈ. Tawˇ hkawˇ oˇ ve teˇ hpaˍ lehˬ chaw yaˇ teˇ caˉ peuˬ teˇ caˉ piˇ taˍ ve ceh hpehꞈ ve yoˬ.’ (Kawˇlawˇsehˇ 2:8) Chaw yaˇ Saˍtanˍ heˍ ve 2 ceuˬ htaꞈ hkʼaˬ hkʼe tanˬ yonˍ la ve, leh aˬ htoꞈ ma te miˬ guiˬ ve cuˇ yiˍ kʼaˍ jaˇ ve, leh Gʼuiˬ sha ve tawˇ hkawˇ hkʼaw cawˬ ve cuˇ yiˍ daꞈ jaˇ ve awˬ lawn chi ve hkʼaw chaˬ nyi tuˬ yoˬ.

3-4. Aˍmeˬriˆkaꞈ mvuhˇ miˬ lo 1900 hkʼawꞈ htaˇ tanˬ leh teˇ geh zuhꞈ ve htaꞈ caˉ daꞈ ve dawˇ hkʼaˇ hkʼaˬ hkʼe pa kʼai ve le?

³ Aˍmeˬriˆkaꞈ mvuhˇ miˬ lo 1900 hkʼawꞈ htaˇ tanˬ leh teˇ geh zuhꞈ ve htaꞈ caˉ daꞈ ve dawˇ hkʼaˇ pa kʼai ve yoˬ. Oˇ htaˇ lehˬ heuˆ daꞈ˗oˬ ve ceh tiˉ teˇ geh zuhꞈ gʼa ve, leh awˬ nu ve chaw geh kaꞈ tawˇ yaw daꞈ maˇ keunˍ tehꞈ yawˇ hui dawˇ ve yoˬ. Yaꞈ hkʼaˇ, chi ve htaꞈ maˇ te kaꞈ hpehꞈ ve tehꞈ yawˇ hui tanˬ dawˇ ve yoˬ.

 ⁴ 1922 te leh 1929 hkʼawꞈ hkʼa gaˬ yawˇ hui ve te hkʼaˇ dawˇ hkʼaˇ laiˉ ceuˬ pa kʼai ve yoˬ. Chaˬ nyi tehˆ nyi paˍ teˇ gʼaˇ kʼoˆ ve, “awˬ han, liꞈ kʼoˆ, liꞈ hkawˇ, shu heuˆ gaˇ tuˬ te maˍ ve awˬ han kaꞈ pehꞈ ve tzuhˆ ve htaꞈ caˉ daꞈ ve cawˬ la ve yoˬ.” Awˬ yanˇ oˇ ve teˇ yanˇ, veuꞈ kʼaˇ veuꞈ ve leh pawehˇ kaˆ ve kaꞈ pehꞈ ve tzuhˆ ve hpawˇ nyi ma cawˬ la tuˬ te piˇ ve yoˬ. Awˬ leh meuˇ ve awˬ yanˇ hkʼaˬ hkʼe hpehꞈ tuˬ Liꞈ hpu hkʼaw kʼoˆ taˍ ve hkʼe, “miˬ guiˬ ha lehˬ tuˬ teˇ hpaˍ htaꞈ haꞈ ve chaw” cawˬ maˇ la ve yoˬ.—2 Tiˆmoˉseˍ 3:4.

5. 1960 hkʼawꞈ tanˬ leh teˇ geh zuhꞈ ve awˬ lawn miˬ guiˬ yaˇ hkʼaˬ hkʼe dawˇ ve le?

⁵ 1960 hkʼawꞈ tanˬ leh laiˉ gʼaˇ maˇ heuˆ daꞈ sheˍ ve kaꞈ teˇ geh chehˇ ve, hawˉ hkʼaˆ chawˇ hawˉ hkʼaˆ yaˇ miˇ chawˇ yaˇ miˇ teˇ geh zuhꞈ ve, leh baˬ daꞈ ve kaꞈ cawˬ maˇ jaˇ. Pyawˍ ve awˬ ceuˬ kaꞈ pehꞈ ve tzuhˆ ve cawˬ la maˇ jaˇ. Awˬ ceuˬ chi teˇ hpaˍ maˇ daꞈ ve hpawˇ heuˆ la kuiˬ hkʼaˬ hkʼe cawˬ ve le? Liꞈ bvuhꞈ paˍ teˇ gʼaˇ kʼoˆ ve, “chi beuꞈ teˇ co˗e chaw yaˇ pehꞈ ve tzuhˆ ve hpawˇ shaˬ te shaˬ luˬ kʼai ve” pa taw, yehˬ kʼa hkʼaw awˬ pa awˬ e teˇ gʼaˇ tiˉ cawˬ ve, awˬ kʼu nyi ve awˬ han dawˇ cawˇ ve, nyi ma naˬ tuˬ te piˇ ve, leh awˬ nu ve haiˬ ve kaꞈ cawˬ maˇ la ve yoˬ. Chi hkʼoˆ kaꞈ, miˬ guiˬ ve cuˇ yiˍ kʼaˍ jaˇ ve pa taw, eˍ (AIDS) leh teˇ geh zuhꞈ ve a naˍ nehˉ ve awˬ nu ve kaꞈ cawˬ maˇ la ve yoˬ.—2 Peˍtruˆ 2:19.

6. Teˇ geh zuhꞈ ve htaꞈ caˉ daꞈ ve miˬ guiˬ yaˇ ve dawˇ hkʼaˇ htaꞈ Saˍtanˍ dawˇ cawˇ ve tehꞈ ngaˬ hui hkʼaˬ hkʼe te shiˍ gʼa ve le?

⁶ Teˇ geh zuhꞈ ve htaꞈ caˉ daꞈ ve miˬ guiˬ yaˇ ve dawˇ hkʼaˇ htaꞈ Saˍtanˍ dawˇ cawˇ ve yoˬ. Teˇ geh zuhꞈ ve lehˬ heuˆ daꞈ ve chaw awˬ pon Gʼuiˬ sha peꞈ laˇ ve laꞈ shawnˍ hpehꞈ ve htawˇ, chaw yaˇ chi htaꞈ te yaꞈ ve Saˍtanˍ mawˬ htaˇ dawˇ cawˇ jaˇ. (Eˇfeˇsuꞈ 2:2) Chaw teˇ hpaˍ pehꞈ ve tzuhˆ ve te yaꞈ ve kʼo, Yaˬhoˉvaˬ peꞈ laˇ ve yaˇ cawˬ tuˬ ve laꞈ shawnˍ chi htaꞈ awˬ hpfuhˇ maˇ shiˍ. Yawˇ hui co co taiˍ taiˍ ve a shaꞈ maˇ gʼa.—1 Kawˇrenˍhtuˆ 6:9, 10.

7-8. Teˇ geh zuhꞈ ve htaꞈ caˉ daꞈ ve Liꞈ hpu hkʼaw cawˇ ve awˬ hkʼaˇ hkʼaˬ hkʼe maˍ laˇ ve le?

⁷ Miˬ guiˬ ve cuˇ yiˍ htaꞈ gʼaꞈ te ve chaw hui kʼoˆ ve, teˇ geh zuhꞈ ve htaꞈ caˉ daꞈ ve Liꞈ hpu hkʼaw maˍ ve yehˇ maˇ gʼa. ‘Gʼuiˬ sha chaw yaˇ htaꞈ hpanˍ htaˇ, teˇ geh zuhꞈ gaˇ ve nyi ma cawˬ tcuh laˇ ve htawˇ, peuˬ hkʼawꞈ nawˉ aˬ htoꞈ ma te nyi ma gʼaꞈ te gaˇ ve hkʼe maˇ te tcuh ve le?’ tehꞈ yawˇ hui na laˇ ve yoˬ hehˉ. Chaw yaˇ te gaˇ ve hkʼe te cawˇ ve tehꞈ yawˇ hui dawˇ ve pa taw chi hkʼe na ve yoˬ. Yaꞈ hkʼaˇ,  Liꞈ hpu hkʼaw kʼoˆ ve, ngaˬ hui ve nyi ma maˇ cawˇ ve htaꞈ te gaˇ ve kʼo, chi hkʼe ve dawˇ hkʼaˇ htaꞈ tawˍ daꞈ hpehꞈ ve yoˬ. (Kawˇlawˇsehˇ 3:5) Chi hkʼoˆ kaꞈ, heuˆ daꞈ ve kaꞈ Yaˬhoˉvaˬ peꞈ laˇ ve laꞈ shawnˍ teˇ ceuˬ hpehꞈ ve yoˬ. (1 Kawˇrenˍhtuˆ 7:8, 9) Heuˆ daꞈ˗oˬ htaˇ, awˬ hpawˇ awˬ miˇ ma teˇ geh zuhꞈ gaˇ ve nyi ma htaꞈ cawˇ ve hkʼaw gʼaꞈ te gʼa ve yoˬ. Pehꞈ ve tzuhˆ ve htaꞈ te ve chaw shoꞈ shaꞈ ve gʼa hpuˇ ve hkʼe yawˇ hui dawˇ haˍ tuˬ maˇ loˍ.

⁸ Teˇ geh zuhꞈ ve htaꞈ caˉ daꞈ ve Liꞈ hpu hkʼaw cawˇ ve awˬ hkʼaˇ htaꞈ maˍ laˇ ve yoˬ. Teˇ geh zuhꞈ ve lehˬ ha lehˬ tuˬ te laˇ gʼa ve tehꞈ Liꞈ hpu hkʼaw maˍ laˇ ve yoˬ. (Tawˇ naˉ ve 5:18, 19) Yaꞈ hkʼaˇ, Liꞈ hpu hkʼaw kʼoˆ sheˍ ve, “nawˬ hui teˇ gʼaˇ le le daꞈ ve kehˬ ve leh yawˆ yan ve awˬ hkʼaw lo a shu yawˇ ve awˬ miˇ ma htaꞈ hkʼa dehꞈ heuˆ chehˇ˗oˆ. Gʼuiˬ sha htaꞈ maˇ shiˍ ve buiˇ shaˆ aˉ naˆ chaw teˇ hpaˍ lehˬ, pehꞈ ve tzuhˆ ve awˬ hkʼaˇ suh te kʼai ve yoˬ. Nawˬ hui oˇ hkʼe taˇ te.”—1 Hteˇsaˍlawˇniˆ 4:4, 5.

9. (a) 1900 hkʼawꞈ htaˇ tanˬ leh Yaˬhoˉvaˬ ve chaw Liꞈ hpu hkʼaw cawˬ ve cuˇ yiˍ htaꞈ gʼaꞈ te tuˬ, ngaˬ hui ve liꞈ kʼoˆ hkʼaw hkʼaˬ hkʼe beˆ maˍ piˇ ve le? (b) 1 Yoˇhanˬ liꞈ 2:15, 16 hkʼaw daꞈ ve beˆ maˍ laˇ hkawˇ aˬ htoꞈ ma cawˬ ve le? (c) Roˉmaꞈ liꞈ 1:24-27 hkʼaw kʼoˆ taˍ ve hkʼe, ngaˬ hui aˬ htoꞈ ma htaꞈ gʼa tawˍ daꞈ cawˇ ve le?

⁹ Miˬ guiˬ yaˇ laiˉ gʼaˇ 1900 hkʼawꞈ htaˇ tanˬ leh ‘yaꞈ taw puiˉ ve teˇ ceuˬ maˇ cawˬ˗o’ ve htawˇ, Yaˬhoˉvaˬ ve chaw yawˇ hui hkʼe maˇ dawˇ. (Eˇfeˇsuꞈ 4:19) Yawˇ hui coˇ caˇ leh Yaˬhoˉvaˬ ve awˬ liˇ awˬ hkʼaˇ htaꞈ gʼaꞈ te ve yoˬ. Shaw nyi kuiˬ Taꞈ yehˬ Ha pa 5 maˬ 15 nyi 1926 hkʼawꞈ hkʼaw kʼoˆ ve, “hawˉ hkʼaˆ yaˇ miˇ htawˇ maˇ kʼoˆ, ngaˬ hui te hkʼaˇ dawˇ hkʼaˇ gʼa daꞈ kehˬ cawˇ ve yoˬ.” Awˬ paˇ awˬ kui chehˇ ve chaw hkʼaˬ hkʼe te chehˇ ve htawˇ maˇ kʼoˆ, Yaˬhoˉvaˬ ve chaw Liꞈ hpu hkʼaw cawˬ ve cuˇ yiˍ htaꞈ gʼaꞈ te ve yoˬ. (1 Yoˇhanˬ 2:15, 16 gʼaw sheˍ.) Gʼuiˬ sha Liꞈ hpu peꞈ laˇ ve ngaˬ hui ha lehˬ jaˇ! Miˬ guiˬ yaˇ ve dawˇ hkʼaˇ chi htaꞈ tawˍ daꞈ tuˬ, Yaˬhoˉvaˬ cawˇ ve awˬ yanˇ htaˇ co ha hpawˇ ve caˇ tuˬ peꞈ laˇ ve ngaˬ hui awˬ bon uiˍ jaˇ kʼoˆ piˇ gaˇ ve yoˬ. *—Roˉmaꞈ 1:24-27 gʼaw sheˍ.

10-11. Awˬ leh meuˇ ve awˬ yanˇ htaˇ hkʼaˬ hkʼe hpehꞈ tuˬ Liꞈ hpu hkʼaw aˬ htoꞈ ma kʼoˆ maˍ laˇ taˍ ve le?

¹⁰ Liꞈ hpu hkʼaw kʼoˆ ve, awˬ leh meuˇ ve awˬ yanˇ htaˇ, chaw yaˇ lehˬ “a shu yawˇ awˬ to htaꞈ haꞈ” tuˬ yoˬ. (2 Tiˆmoˉseˍ 3:1, 2) Miˬ guiˬ yaˇ a shu yawˇ awˬ pon tiˉ dawˇ nyi ve ngaˬ hui gʼa mawˬ maˇ jaˇ. Liꞈ kʼoˆ teˇ kʼoˆ hkʼaw kʼoˆ ve, 1970 hkʼawꞈ tanˬ leh dawˇ taˍ ve hkʼe te gʼa tuˬ beˆ maˍ laˇ ve liꞈ kʼoˆ cawˬ maˇ jaˇ. Liꞈ kʼoˆ teˇ kʼoˆ kʼoˆ hkʼaw, yaꞈ kuiˬ maˇ cawˬ leh pa tuˬ maˇ loˍ tehꞈ gʼaw ve chaw htaꞈ maˍ piˇ ve yoˬ. Tawˇ pa haˉ te kʼo, liꞈ kʼoˆ teˇ kʼoˆ hkʼaw kʼoˆ ve, “a shu yawˇ awˬ to htaꞈ haꞈ sheˍ. Nawˬ shu aꞈ kehˉ daꞈ jaˇ leh awˬ hpfuhˇ hkʼaˆ jaˇ.” Liꞈ chi teˇ kʼoˆ hkʼaw kʼoˆ sheˍ ve, teˇ gʼaˇ leh teˇ gʼaˇ a shu yawˇ te gaˇ ve hkʼe dawˇ cheˆ cawˇ ve yoˬ. Yawˇ cawˇ ve tehꞈ dawˇ leh puiˉ ve hpehꞈ ve hkʼe te ve yoˬ.

¹¹ Chi hkʼe leˇ ve kaˇ jaw˗aw laˇ? Saˍtanˍ kaꞈ Eˇvaꞈ htaꞈ chi hkʼe te tcuh ve yoˬ. ‘Gʼuiˬ sha hkʼe hpehꞈ la leh maˇ daꞈ ve awˬ ceuˬ htaꞈ shiˍ la tuˬ yoˬ’ tehꞈ Saˍtanˍ kʼoˆ piˇ ve yoˬ. (Awˬ hkuiˉ puiˍ 3:5) Chi beuꞈ teˇ co˗e laiˉ gʼaˇ a shu yawˇ awˬ to daꞈ leh cawˇ ve tehꞈ dawˇ leh, aˬ htoꞈ ma cawˇ maˇ cawˇ ve awˬ nu ve chaw leh Gʼuiˬ sha htawˇ yawˇ htaꞈ kʼoˆ piˇ maˇ gʼa. Tawˇ pa haˉ te kʼo, heuˆ daꞈ ve htaꞈ caˉ daꞈ ve awˬ lawn yawˇ hui chi hkʼe dawˇ ve yoˬ.

12. Heuˆ daꞈ ve htaꞈ caˉ daꞈ ve miˬ guiˬ yaˇ hkʼaˬ hkʼe maˍ ve le?

¹² Awˬ hpawˇ awˬ miˇ ma yawˆ yan daꞈ cawˇ leh heuˆ daꞈ htaˇ hkanˍ taˍ ve htaꞈ gʼaꞈ te cawˇ ve tehꞈ Liꞈ hpu hkʼaw maˍ laˇ ve yoˬ. Yawˇ huiˉ maˬ coˇ caˇ leh hkʼaˬ htaˆ kaꞈ teˇ geh chehˇ tuˬ Liꞈ hpu hkʼaw  beˆ maˍ laˇ ve yoˬ. “Hawˉ hkʼaˆ lehˬ yawˇ ve awˬ pa awˬ e htaꞈ hpaˆ daꞈ taˉ leh, yawˇ ve awˬ miˇ ma htaꞈ caˉ daꞈ ve awˬ hkʼaw lo yawˇ huiˉ maˬ teˇ suhˍ teˇ shaˍ tiˉ hpehꞈ la tuˬ yoˬ.” (Awˬ hkuiˉ puiˍ 2:24) Yaꞈ hkʼaˇ, miˬ guiˬ ve cuˇ yiˍ gʼaꞈ te ve chaw kʼoˆ ve, awˬ hpawˇ awˬ miˇ ma a shu yawˇ loˍ ve htaꞈ awˉ lawˉ dawˇ nyi cawˇ ve yoˬ. Baˬ daꞈ ve htaꞈ caˉ daꞈ ve liꞈ kʼoˆ teˇ kʼoˆ hkʼaw kʼoˆ ve, “chaw liˇ vaˇ liˇ teˇ ceuˬ ceuˬ kʼo, yawˇ hui heuˆ daꞈ htaˇ hkanˍ taˍ ve hkʼaw ‘a shaꞈ teꞈ chehˇ ve teˇ co˗e’ tawˇ hkawˇ chi lehˬ ‘haꞈ daꞈ chehˇ sheˍ ve’ tehꞈ kʼawꞈ pa ve yoˬ.” Dawˇ hkʼaˇ chi hkʼe ve htaꞈ pa taw, yehˬ kʼa hpaˆ daꞈ tuˬ leh laiˉ gʼaˇ nyi ma naˬ jaˇ tuˬ te piˇ ve yoˬ. Heuˆ daꞈ ve htaꞈ caˉ daꞈ ve miˬ guiˬ ve dawˇ hkʼaˇ cuˇ yiˍ maˇ cawˬ ve tehꞈ ngaˬ hui hkʼa dehꞈ gʼa mawˬ ve yoˬ.

13. Aˬ htoꞈ ma te Yaˬhoˉvaˬ nyi ma uiˍ ve chaw hui htaꞈ canˇ ve le?

¹³ Liꞈ hpu hkʼaw kʼoˆ ve, “nyi ma uiˍ ve chaw hui htaꞈ Gʼuiˬ sha canˇ ve yoˬ.” (Tawˇ naˉ ve 16:5) Aˬ htoꞈ ma te Yaˬhoˉvaˬ yawˇ hui htaꞈ canˇ ve le? Uiˍ muiˬ caˆ muiˬ ve chaw lehˬ Saˍtanˍ hkʼe hpehꞈ leh yawˇ awˬ to htaꞈ haꞈ jaˇ. Dawˇ nyi sheˍ. Yaˬhoˉvaˬ Yeˍsuˆ htaꞈ cuˇ leh teˇ ceuˬ le le hpanˍ tcuh ve htawˇ, Saˍtanˍ Yeˍsuˆ hkui tcuhˉ teh leh yawˇ htaꞈ oˉ kʼoˍ pui cawˇ ve tehꞈ dawˇ sheˍ ve yoˬ! (Maꞈhtehˍ 4:8, 9; Kawˇlawˇsehˇ 1:15, 16) Nyi ma uiˍ ve chaw te hkʼaˇ dawˇ hkʼaˇ ngaˬ hui htaꞈ hpeuꞈ maw laˇ ve, miˬ guiˬ ve cuˇ yiˍ Gʼuiˬ sha mehˆ gʼuˇ suhˍ lo cuˇ yiˍ maˇ cawˬ.

14. Ngaˬ hui a shu yawˇ awˬ to htaꞈ keunˍ lawꞈ cawˇ lawꞈ ve hkʼe dawˇ tuˬ, Roˉmaꞈ liꞈ 12:3 hkʼaw hkʼaˬ hkʼe maˍ laˇ ve le?

¹⁴ Ngaˬ hui a shu yawˇ awˬ to htaꞈ keunˍ lawꞈ cawˇ lawꞈ ve hkʼe dawˇ tuˬ leh haꞈ shaˉ tuˬ kaꞈ Liꞈ hpu hkʼaw maˍ laˇ ve yoˬ. “Nawˬ awˬ to htaꞈ haꞈ ve hkʼe nawˬ awˬ paˇ awˬ kui chehˇ ve chaw htaꞈ haꞈ˗oꞈ” tehꞈ Yeˍsuˆ kʼoˆ ve yoˬ. (Maꞈhtehˍ 19:19) Chi kʼoˆ gaˇ ve lehˬ ngaˬ hui a shu yawˇ loˍ ve htaꞈ kaꞈ dawˇ nyi cawˇ ve yoˬ. Yaꞈ hkʼaˇ, ngaˬ hui shu aꞈ kehˉ a yeˇ uiˍ ve tehꞈ maˇ gʼa dawˇ tuˬ Liꞈ hpu hkʼaw maˍ laˇ ve yoˬ. Liꞈ hpu hkʼaw kʼoˆ sheˍ ve, “hkʼaˬ ve teˇ ceuˬ htawˇ maˇ kʼoˆ, tawˇ gʼawˬ daꞈ leh nyi ma uiˍ ve awˬ hkʼaw lo taˇ te. Yaꞈ hkʼaˇ, nyi ma nuˇ nehˬ ve awˬ  hkʼaw lo, teˇ gʼaˇ leh teˇ gʼaˇ a shu yawˇ awˬ to aꞈ kehˉ shu htaꞈ taˍ uiˍ taˍ mvuh piˇ˗oˆ.”—Hpiˇliˇpiˆ 2:3; Roˉmaꞈ 12:3 gʼaw sheˍ.

15. Nawˬ dawˇ kʼo, Liꞈ hpu hkʼaw beˆ maˍ laˇ ve a shu yawˇ awˬ to htaꞈ dawˇ ve awˬ hkʼaˇ aˬ htoꞈ ma te daꞈ ve le?

¹⁵ Chi beuꞈ teˇ co˗e laiˉ gʼaˇ liꞈ henˇ mvuh leh cuˇ yiˍ cawˬ ve htawˇ, Liꞈ hpu hkʼaw beˆ maˍ piˇ ve htaꞈ cuˇ yiˍ maˇ cawˬ tehꞈ kʼoˆ ve yoˬ. Yawˇ hui kʼoˆ ve, ‘shu nawˬ aꞈ kehˉ a yeˇ uiˍ ve tehꞈ shawˍ ve kʼo, yawˇ hui nawˬ htaꞈ maˇ shawˍ maˇ caˆ te laˇ tuˬ yoˬ.’ Saˍtanˍ ve miˬ guiˬ geh laˬ ve dawˇ hkʼaˇ chi hkʼe ve lehˬ chaw yaˇ hkʼaˬ hkʼe hpehꞈ tuˬ te piˇ ve le? A shu yawˇ awˬ pon tiˉ dawˇ nyi ve chaw lehˬ ha lehˬ˗aw laˇ? Yawˇ hui ve yehˬ kʼa ha lehˬ˗aw laˇ? Yawˇ hui awˬ tehˬ ve awˬ chawˇ cawˬ˗aw laˇ? Yawˇ hui Gʼuiˬ sha ve awˬ chawˇ hpehꞈ˗aw laˇ? Nawˬ dawˇ kʼo, miˬ guiˬ ve cuˇ yiˍ gʼaꞈ te ve leh Gʼuiˬ sha geh laˬ ve cuˇ yiˍ gʼaꞈ te ve hkʼaˬ ve teˇ maˬ awˬ bon cawˬ ve le?

16-17. Aˬ htoꞈ ma ve awˬ lawn htaꞈ ngaˬ hui ha lehˬ ve le? Aˬ htoꞈ ma pa taw le?

¹⁶ Miˬ guiˬ ve cuˇ yiˍ cawˬ ve chaw beˆ maˍ piˇ ve hkʼe gʼaꞈ te ve chaw hui lehˬ, guiˇ toˇ paˍ teˇ gʼaˇ yaꞈ kʼaw yaꞈ chehˇ ve awˬ nu ve guiˇ toˇ paˍ htaꞈ yaꞈ kʼaw kʼai tuˬ na piˇ ve hkʼe hpehꞈ ve yoˬ. Yeˍsuˆ kʼoˆ maˍ laˇ ve, “yawˇ hui mehˆ cuˉ ve kaꞈ, yaꞈ kʼaw maˍ piˇ paˍ te ve yoˬ. Mehˆ cuˉ ve chaw lehˬ, mehˆ cuˉ ve chaw htaꞈ yaꞈ kʼaw maˍ piˇ ve kʼo, yawˇ huiˉ maˬ nyiˇ gʼaˇ gʼaˇ miˬ kʼoˍ hkʼaw ce loꞈ˗e tuˬ yoˬ.” (Maꞈhtehˍ 15:14) Chi miˬ guiˬ ve cuˇ yiˍ lehˬ Gʼuiˬ sha mehˆ gʼuˇ suhˍ lo cuˇ yiˍ a ciˉ kaꞈ maˇ cawˬ.

¹⁷ Liꞈ hpu hkʼaw laˬ ve cuˇ yiˍ lehˬ “maˍ piˇ ve, venˇ baˆ hpeuꞈ maˍ piˇ ve, kʼawꞈ daꞈ la piˇ ve leh, hteˇ ve cawˇ ve htaꞈ te tuˬ maˍ piˇ ve yoˬ.” (2 Tiˆmoˉseˍ 3:17) Yaˬhoˉvaˬ yawˇ ve kanˉ hkʼaˇ htaꞈ cuˇ leh, miˬ guiˬ ve cuˇ yiˍ maˇ heuˆ la tcuh tuˬ haꞈ shaˉ laˇ ve, ngaˬ hui ha lehˬ jaˇ! (Eˇfeˇsuꞈ 4:14) Liꞈ hpu hkʼaw ve awˬ liˇ awˬ hkʼaˇ htaꞈ ngaˬ hui gʼaꞈ te tuˬ, Yaˬhoˉvaˬ co ha hpawˇ ve caˇ tuˬ leh awˬ gʼaˇ peꞈ laˇ ve yoˬ. Yaˬhoˉvaˬ Liꞈ hpu htaꞈ cuˇ leh cuˇ yiˍ leh beˆ maˍ laˇ hkawˇ daꞈ jaˇ ve peꞈ laˇ ve ngaˬ hui ha lehˬ jaˇ!