Awˬ Lawn 22
Nawˬ hkʼaˇ nawˬ Liꞈ hpu henˇ ve awˬ hkʼaˇ gu sheˍ!
“Aˬ htoꞈ ma ve a yeˇ uiˍ ve awˉ lawˉ gʼa shiˍ cawˇ ve yoˬ.”—HPIˇLIˇPIˆ 1:10, Miˬ guiˬ awˬ suhˉ yuˬ tawˆ ve Li hpu.
KʼA MUIˬ HKAWˇ 35 A yeˇ uiˍ ve htaꞈ gʼa shiˍ ve
HENˇ TUˬ VE TEˇ HPAˍ *
1. Aˬ htoꞈ ma pa taw laiˉ gʼaˇ Liꞈ hpu maˇ henˇ gaˇ˗o ve le?
Chi beuꞈ teˇ co˗e a shu yawˇ awˬ to htaꞈ hu gʼa tuˬ gʼa coˇ caˇ jaˇ. Awˬ viˉ awˬ nyi laiˉ gʼaˇ yehˬ kʼa hkʼaw loˍ ve awˬ ceuˬ cawˬ tuˬ kanˉ laiˉ naˍ riˍ gʼa te ve yoˬ. Awˬ nu ve chaw kanˉ te kuiˬ lo kʼai leh kʼawꞈ la tuˬ awˬ yanˇ laiˉ naˍ riˍ gʼa yehˇ ve yoˬ. Laiˉ gʼaˇ a shu yawˇ awˬ to htaꞈ hu gʼa tuˬ kanˉ hehnˇ ve gʼa te ve yoˬ. Ngaˬ hui ve awˬ viˉ awˬ nyi mvuhˇ hpeuꞈ la htaˇ gaˬ kʼo heuˬ jaˇ ve yoˬ hehˉ! Chi hkʼe hpehꞈ htaˇ yawˇ hui a shu yawˇ hkʼaˇ yawˇ Liꞈ hpu henˇ tuˬ awˬ gʼaˇ maˇ cawˬ˗o.
2. Nawˬ Liꞈ hpu henˇ tuˬ awˬ yanˇ hkʼaˬ htaˆ ca ve le?
2 Awˬ tehˬ kʼo, ngaˬ hui a shu yawˇ hkʼaˇ yawˇ Liꞈ hpu henˇ tuˬ awˬ yanˇ ca cawˇ ve yoˬ. Ngaˬ hui Liꞈ hpu leh Hkriꞈ yaˇ ve liꞈ kʼoˆ teˇ hpaˍ htaꞈ hkʼa dehꞈ gʼa henˇ cawˇ ve yoˬ. Ngaˬ hui Yaˬhoˉvaˬ geh meuˆ daꞈ leh co co taiˍ taiˍ ve a shaꞈ gʼa gaˇ ve kʼo, Liꞈ hpu henˇ ve a yeˇ uiˍ jaˇ! (1 Tiˆmoˉseˍ 4:15) Chaw teˇ hpaˍ hpaˍ mvuhˇ shawˉ tu la htaˇ, awˬ yanˇ ca leh Liꞈ hpu henˇ ve yoˬ. Chaw teˇ hpaˍ hpaˍ co ha hpawˇ ve caˇ tuˬ htaꞈ hkʼa dehꞈ dawˇ nyi tuˬ mvuhˇ hpeuꞈ la htaˇ awˬ yanˇ ca leh hkʼaˬ nyiˇ miꞈ niꞈ maˇ henˇ.
3-4. Ngaˬ hui gʼa cawˇ ve htaꞈ caˉ daꞈ ve aˬ htoꞈ ma pa ve le? Aˬ htoꞈ ma pa taw le?
3 Liꞈ hpu henˇ ve awˬ yanˇ a yeˇ uiˍ jaˇ ve tehꞈ nawˬ dawˇ ve yoˬ. Yaꞈ hkʼaˇ, ngaˬ hui aˬ htoꞈ ma htaꞈ henˇ cawˇ ve le? ‘Liꞈ kʼoˆ maˇ jaˇ leh teˇ ceuˬ le le htaꞈ gʼaw tuˬ haˍ jaˇ’ tehꞈ nawˬ dawˇ ve yoˬ hehˉ. Chaw teˇ hpaˍ hpaˍ co ha hpawˇ gu teh taˍ laˇ ve teˇ ceuˬ le le htaꞈ awˬ bon gʼa ve yoˬ. Yaꞈ hkʼaˇ, chi hkʼe ve htaꞈ te tuˬ awˬ yanˇ ca haˍ jaˇ ve tehꞈ laiˉ gʼaˇ kaꞈ dawˇ ve yoˬ hehˉ. Uˉ peunˍ ve kawˍmiˍtiˍ awˬ lawn chi htaꞈ hkʼa dehꞈ shiˍ ve yoˬ. Chi htaꞈ pa taw uˉ peunˍ ve kawˍmiˍtiˍ ngaˬ hui gʼa cawˇ ve liꞈ kʼoˆ leh in˗teu˗neꞈ hkʼaw ve awˬ lawn maˇ cawˬ maˇ tcuh ve yoˬ.
4 Tawˇ pa haˉ te kʼo, chi teˇ hkui Yaˬhoˉvaˬ ve Shaˉhkiˆhkanˍ ve chaw ve teˇ hkʼawꞈ teˇ pawˆ tawˆ ve liꞈ kʼoˆ maˇ cawˬ˗o. Awˬ lawn kʼo, laiˉ gʼaˇ ve hpehꞈ laˬ jaw ve awˬ lawn jw.org® leh teˇ ha pa le le JW awˬ han tawˆ kuiˬ hkʼaw cawˬ ve yoˬ. Shaw nyi kuiˬ Taꞈ yehˬ leh Tu loˬ! ve liꞈ teˇ hkʼawꞈ ve hkʼaw 3 pawˆ ceh tiˉ yanˍ tawˆ ve pa taw yoˬ. Chi hkʼe te ve lehˬ ngaˬ hui awˬ nu ve awˬ ceuˬ htaꞈ te tuˬ awˬ yanˇ cawˬ maˇ ve yoˬ. Chi ngaˬ hui a yeˇ uiˍ ve htaꞈ awˉ lawˉ dawˇ nyi tuˬ ga laˇ ve yoˬ. (Hpiˇliˇpiˆ 1:10) Ngaˬ hui a shaꞈ teꞈ kuiˬ hkʼaw a yeˇ uiˍ jaˇ ve htaꞈ awˉ lawˉ te tuˬ, leh a shu yawˇ hkʼaˇ yawˇ Liꞈ hpu henˇ ve awˬ bon maˇ maˇ gʼa tuˬ ngaˬ hui hkʼaˬ hkʼe te cawˇ ve teˇ geh nyi sheˍ.
A YEˇ UIˍ VE HTAꞈ AWˉ LAWˉ CHAˬ NYI SHEˍ
5-6. Ngaˬ hui hkʼa dehꞈ chaˬ nyi cawˇ ve aˬ htoꞈ ma cawˬ sheˍ ve le?
5 Ngaˬ hui aˬ htoꞈ ma htaꞈ awˉ lawˉ chaˬ nyi cawˇ ve le? Ngaˬ hui teˇ nyi le le Liꞈ hpu htaꞈ chaˬ nyi tuˬ awˬ yanˇ ca cawˇ ve yoˬ. Chi teˇ hkuiˬ ngaˬ hui teˇ shinˉ hkʼaw ve Liꞈ hpu gʼaw tuˬ awˬ lawn maˇ maˇ˗o. Chi ngaˬ hui gʼaw ve htaꞈ dawˇ nyi leh, hpfuhˆ nyi ve awˬ yanˇ cawˬ maˇ tuˬ ga laˇ ve yoˬ. Ngaˬ hui gʼaw peuˬ ve ceh maˇ heˆ, hkʼa dehꞈ na gʼa tcuh cawˇ ve yoˬ. Liꞈ hpu hkʼaw ve awˬ lawn ngaˬ hui ve nyi ma hkʼaw gaˬ tcuh leh Yaˬhoˉvaˬ geh meuˆ daꞈ tcuh sheˍ.—Chiˇ mvuh ve 19:14.
6 Ngaˬ hui hkʼa dehꞈ chaˬ nyi tuˬ aˬ htoꞈ ma cawˬ sheˍ ve le? Ngaˬ hui Shaw nyi kuiˬ Taꞈ yehˬ leh Hkriꞈ yaˇ awˬ moˍ Liꞈ hpu henˇ ve gu gaˇ ve yoˬ. Chi hkʼoˆ kaꞈ mvuhˇ hpeuꞈ haˉ hpawnˬ daꞈ ve htaꞈ caˉ daꞈ ve awˬ nu ve teˇ hpaˍ kaꞈ gu gaˇ ve yoˬ. Ngaˬ hui Shaw nyi kuiˬ Taꞈ yehˬ leh Tu loˬ! liꞈ teˇ pawˆ le le tawˆ la ve kaꞈ gʼaw cawˇ ve yoˬ.
7. Vehˆsaiˉ leh JW awˬ han tawˆ kuiˬ hkʼaw cawˬ ve maˇ nyi peuˬ ve kʼo, ngaˬ hui awˬ gʼaˇ nuˇ cawˇ˗aw laˇ?
7 ‘Chi hkʼe te kaꞈ hpehꞈ ve yoˬ hehˉ tehꞈ’ nawˬ dawˇ ve yoˬ. ‘Yaꞈ hkʼaˇ, vehˆsaiˉ jw.org, leh JW awˬ han tawˆ kuiˬ hkʼaw ve awˬ lawn teˇ hpaˍ˗ehꞈ? Awˬ lawn awˬ tanˇ cawˬ maˇ jaˇ!’ Awˬ lawn teˇ lawn htaꞈ dawˇ nyi sheˍ. Ngaˬ hui awˬ caˇ kuiˬ sainˍ hkʼaw kʼai htaˇ, awˬ chiˇ mehˬ jaˇ ve laiˉ ceuˬ cawˬ ve yoˬ. Vuiˬ caˇ ve chaw sainˍ hkʼaw lo cawˬ ve teˇ ceuˬ le le htaꞈ caˇ nyi tuˬ ve maˇ heˆ. Chi htaꞈ pa taw yawˇ hui teˇ ceuˬ ceuˬ ceh leuˆ caˇ ve yoˬ. Chi ve kaꞈ hkʼa shuˍ nawˬ vehˆsaiˉ leh awˬ han tawˆ kuiˬ hkʼaw nyi leh gʼaw ve maˇ peuˬ ve kʼo awˬ gʼaˇ taˇ nuˇ sheˍ. Nyi leh gʼaw ve nawˬ te gʼa ve hkʼe ceh te sheˍ. Henˇ ve aˬ htoꞈ ma htaꞈ kʼoˆ gaˇ ve le, leh chi ngaˬ hui awˬ bon maˇ maˇ gʼa tuˬ ga laˇ gʼa ve teˇ geh nyi sheˍ.
LIꞈ HPU HENˇ TUˬ GʼA COˇ CAˇ JAˇ!
8. Shaw nyi kuiˬ Taꞈ yehˬ gu htaˇ nawˬ aˬ htoꞈ ma te tuˬ le? Chi hkʼe te htaˇ, nawˬ aˬ htoꞈ ma awˬ bon gʼa ve le?
8 Nawˬ Liꞈ hpu henˇ htaˇ, a yeˇ uiˍ ve awˬ lawn htaꞈ gʼa chaˬ nyi cawˇ ve yoˬ. Liꞈ hpu henˇ htaˇ, haˆ gʼaw peuˬ leh maiˉ taˍ ve ceh maˇ heˆ. Tawˇ pa haˉ te kʼo, Shaw nyi kuiˬ Taꞈ yehˬ gu htaˇ, henˇ tuˬ ve awˬ lawn htaꞈ hkʼa dehꞈ chaˬ nyi sheˍ. Peuˬ leh awˬ tawn hkʼaw ve awˬ lawn lonˉ ma, awˬ lawn ehˉ leh na hkawˇ teˇ hpaˍ htaꞈ kaꞈ nyi sheˍ. Awˬ lawn chi ve teˇ hpaˍ htaꞈ a yehˉ yehˉ gʼaw leh hkʼa dehꞈ na gʼa tcuh ve yoˬ. Maˇ˗awˍ ve kʼo, a yeˇ uiˍ ve awˉ lawˉ teˇ cawˆ hpehꞈ ve pa taw chi htaꞈ dawˇ nyi sheˍ. A yeˇ uiˍ ve awˬ tawn chi aˬ htoꞈ ma kʼoˆ gaˇ ve nawˬ na gʼa tuˬ ga laˇ ve yoˬ. Nawˬ henˇ tuˬ ve awˬ lawn htaꞈ gʼaw nyi htaˇ, teˇ tawn le le, awˬ lawn ehˉ leh awˬ tawn hkʼaw ve awˬ lawn lonˉ ma htaꞈ hkʼaˬ hkʼe caˉ daꞈ ve dawˇ nyi sheˍ. Nawˬ maˇ gʼa kaˇ jaw ve leh awˬ leuˉ kʼawꞈ hpfuhˆ nyi gaˇ ve kʼo bvuhꞈ taˍ sheˍ.
9. (a) Ngaˬ hui Shaw nyi kuiˬ Taꞈ yehˬ henˇ htaˇ, aˬ htoꞈ ma te Liꞈ hpu awˬ tawn htaꞈ a yeˇ yuˬ cawˇ ve le? Hkʼaˬ hkʼe te gʼa ve le? (b) Yawˇsuˆ liꞈ 1:8 hkʼaw kʼoˆ taˍ ve hkʼe, Liꞈ hpu gʼaw ve awˬ hkʼoˆ kaꞈ ngaˬ hui aˬ htoꞈ ma te cawˇ sheˍ ve le?
9 Ngaˬ hui hpawnˬ daꞈ kuiˬ lo Shaw nyi kuiˬ Taꞈ yehˬ henˇ htaˇ, chi ngaˬ hui Liꞈ hpu hkʼaw na gʼa tuˬ ga laˇ ve yoˬ. Chi htaꞈ pa taw, nawˬ Liꞈ hpu awˬ tawn htaꞈ a yeˇ yuˬ sheˍ. Leuˉ leh kʼo Liꞈ hpu awˬ tawn gʼaw sheˍ kʼoˆ ve htaꞈ yoˬ. A yeˇ uiˍ ve awˬ lawn oˇ ve Liꞈ hpu htaꞈ hkʼaˬ hkʼe caˉ daꞈ ve dawˇ nyi sheˍ. Chi hkʼoˆ kaꞈ nawˬ gʼaw ve Liꞈ hpu awˬ tawn htaꞈ hkʼa dehꞈ dawˇ nyi leh nawˬ a shaꞈ teꞈ kuiˬ hkʼaw hkʼaˬ hkʼe yuˬ yehˇ gʼa ve htaꞈ chaˬ nyi sheˍ.—Yawˇsuˆ 1:8 gʼaw sheˍ.
Awˬ pa awˬ e˗oˬ, nawˬ ve yaˇ hkʼaˬ hkʼe henˇ cawˇ ve maˍ piˇ sheˍ (Awˬ tawn 10 nyi sheˍ) *
10. Heˍbrehˇ liꞈ 5:14 hkʼaw kʼoˆ taˍ ve hkʼe, yehˬ kʼa hkʼaw oˉ kʼoˍ pui htaˇ awˬ pa awˬ e yaˇ htaꞈ henˇ tuˬ leh hpfuhˆ nyi tuˬ aˬ htoꞈ ma te maˍ piˇ cawˇ ve le?
10 Yehˬ kʼa hkʼaw oˉ kʼoˍ pui htaˇ yaˇ ha lehˬ tuˬ awˬ pa awˬ e te piˇ gaˇ ve yoˬ. Yehˬ kʼa hkʼaw oˉ kʼoˍ pui htaˇ awˬ pa awˬ e teˇ ceuˬ ceuˬ gʼa ca piˇ ve htawˇ, pyawˍ ve leˍ guiˇ tuˬ maˇ heˆ leh teˇ shinˉ le le hkʼaw ha lehˬ ve gʼa cawˬ cawˇ ve tehꞈ taˇ dawˇ. Yehˬ kʼa hkʼaw oˉ kʼoˍ pui htaˇ, teˇ ha pa le le ve JW awˬ han tawˆ kuiˬ nyi ve, maˇ heˆ leh teˇ pawˆ pawˆ kʼo, Liꞈ hpu hkʼaw ve awˬ lawn awˬ tanˇ htaꞈ teˇ geh dawˇ nyi cawˇ ve yoˬ. Tawˇ pa haˉ te kʼo, Noˉaꞈ haw loꞈ kʼoˍ te ve awˬ lawn htaꞈ dawˇ nyi leh te ve yoˬ. Henˇ tuˬ ve awˬ hkʼaˇ kaꞈ yaˇ htaꞈ maˍ piˇ cawˇ ve yoˬ. Yawˇ hui hpawnˬ daꞈ tuˬ gu ve awˬ hkʼaˇ leh hpawnˬ daꞈ ve hkʼaw liꞈ henˇ yaˇ te tuˬ gu ve awˬ hkʼaˇ gʼa henˇ ve yoˬ. (Heˍbrehˇ 5:14 gʼaw sheˍ.) Yawˇ hui aˉ hkʼaw lo chehˇ htaˇ a shu yawˇ hkʼaˇ yawˇ Liꞈ hpu henˇ ve kʼo, hpawnˬ daꞈ kuiˬ, hpawnˬ daꞈ lonˉ teˇ nyi, leh hpawnˬ daꞈ lonˉ shehˆ nyi hkʼaw awˬ lawn oˇ ve htaꞈ caˉ daꞈ ve gʼa kaˇ htaˇ yawˇ hui hkʼa dehꞈ na gʼa tuˬ yoˬ. Hpawnˬ daꞈ ve teˇ pawˆ le le VDO maˇ cawˬ. Yaꞈ hkʼaˇ, henˇ ve chi awˬ yanˇ hkʼaˬ hkʼe maw yehˇ tuˬ yaˇ ve a shaꞈ leh te hkʼaˇ dawˇ hkʼaˇ htaꞈ kaꞈ cawˬ ve yoˬ.
11. Ngaˬ hui geh Liꞈ hpu henˇ ve chaw a shu yawˇ hkʼaˇ yawˇ Liꞈ hpu hkʼa dehꞈ henˇ tuˬ maˍ piˇ ve aˬ htoꞈ ma te a yeˇ uiˍ jaˇ ve le?
11 Ngaˬ hui geh Liꞈ hpu henˇ ve chaw henˇ tuˬ ve awˬ hkʼaˇ htaꞈ kaꞈ gʼa te jawˬ cawˇ ve yoˬ. Yawˇ hui hpawnˬ daꞈ kuiˬ lo laˬ ve maˇ maw sheˍ ve kʼo, hpawnˬ daꞈ kuiˬ hkʼaw leh Liꞈ hpu henˇ tuˬ ve htaꞈ hkʼawꞈ tuˬ maiˉ taˍ ve ngaˬ hui mawˬ htaˇ ha lehˬ jaˇ. Yaꞈ hkʼaˇ, hpfuhˆ nyi tuˬ leh a shu yawˇ hkʼaˇ yawˇ Liꞈ hpu henˇ tuˬ ngaˬ hui geh Liꞈ hpu henˇ ve chaw htaꞈ kaꞈ gʼa maˍ piˇ ve yoˬ. Ngaˬ hui chi hkʼe te ve kʼo yawˇ hui shoꞈ shaꞈ ve gʼa hpuˇ htaˇ, Hkriꞈ yaˇ awˬ moˍ hkʼaw awˬ viˉ awˬ nyi geh laꞈ haˉ na nyi ve aꞈ kehˉ, beˆ maˍ laˇ hkawˇ chi yawˇ hkʼaˇ yawˇ ngaˬ hui ve liꞈ kʼoˆ hkʼaw hpfuhˆ nyi tuˬ yoˬ.
LIꞈ HPU HENˇ HTAˇ DAWˇ TEH TAˍ SHEˍ
12. Nawˬ Liꞈ hpu henˇ htaˇ aˬ htoꞈ ma dawˇ teh taˍ gʼa ve le?
12 Nawˬ liꞈ gʼaw ve maˇ dawˇ cawˇ ve kʼo, Liꞈ hpu henˇ ve te maˇ gʼa taˍ tehꞈ dawˇ ve yoˬ hehˉ. Yaꞈ hkʼaˇ, te gʼa ve yoˬ. Nawˬ Liꞈ hpu henˇ htaˇ chi suhˉ˗ehˍ henˇ leh awˬ meu˗eˇ meu˗eˇ kʼawꞈ henˇ sheˍ. Nyi ma hkʼaw dawˇ teh taˍ sheˍ. Ngaˬ hui dawˇ teh taˍ ve a yeˇ uiˍ jaˇ ve lehˬ Yaˬhoˉvaˬ geh meuˆ daꞈ tuˬ yoˬ. Yaꞈ hkʼaˇ, shu ve na hkawˇ htaꞈ hkʼawꞈ tuˬ maˇ heˆ leh ngaˬ hui gʼa hpuˇ chehˇ ve htaꞈ hpfuhˆ nyi tuˬ dawˇ teh taˍ gʼa ve yoˬ.
13. (a) Yaˇ ehˉ yaˇ nehˬ liꞈ henˇ kuiˬ lo yonˍ hkʼaˇ htaꞈ haꞈ shaˉ ve awˬ lawn kʼoˆ maˍ laˇ sheˍ. (b) Nawˬ Kawˇlawˇsehˇ liꞈ 4:6 hkʼaw beˆ maˍ laˇ hkawˇ htaꞈ hkʼaˬ hkʼe yuˬ yehˇ gʼa tuˬ le?
13 Yaˇ ehˉ yaˇ nehˬ liꞈ henˇ kuiˬ lo daꞈ ve henˇ yuˬ tuˬ hpehꞈ gʼa˗aw laˇ? Nawˬ liꞈ teˇ geh henˇ chehˇ ve a shaꞈ teꞈ ve yawˇ hkʼaˇ yawˇ cawˬ la gʼa ve htaꞈ yonˍ ve yoˬ hehˉ. Liꞈ hpu hkʼaw awˬ tehˬ ve htaꞈ nawˬ kʼoˆ maˍ piˇ gaˇ ve yoˬ hehˉ. Yaꞈ hkʼaˇ, nawˬ hkʼa dehꞈ maˇ kʼoˆ maˍ puiˉ tehꞈ dawˇ ve yoˬ hehˉ. Chi a shu yawˇ hkʼaˇ yawˇ Liꞈ hpu henˇ htaˇ hpfuhˆ nyi gʼa ve yoˬ! Nawˬ 2 ceuˬ dawˇ teh taˍ gʼa ve yoˬ. (1) Gʼuiˬ sha teˇ ceuˬ le le htaꞈ hpanˍ ve nawˬ yonˍ gʼa tuˬ te laˇ leh (2) Liꞈ hpu hkʼaw awˬ tehˬ ve htaꞈ kʼoˆ maˍ puiˉ tuˬ awˬ hkʼaˇ maˇ maˇ henˇ gʼa ve yoˬ. (Roˉmaꞈ 1:20; 1 Peˍtruˆ 3:15) Nawˬ a shu yawˇ awˬ to htaꞈ na nyi cawˇ ve, ‘a shaꞈ teꞈ ve yawˇ hkʼaˇ yawˇ cawˬ la gʼa ve ngaˬ ve awˬ chawˇ kʼoˆ ve htaꞈ hkʼaˬ hkʼe te hpeuꞈ maw piˇ gʼa tuˬ le?’ Peuˬ leh ngaˬ hui ve liꞈ kʼoˆ hkʼaw hkʼa dehꞈ chaˬ nyi sheˍ. Liꞈ hpu hkʼaw awˬ tehˬ ve htaꞈ kʼoˆ maˍ piˇ tuˬ nawˬ dawˇ taˍ ve hkʼe maˇ heˆ. A shaꞈ teꞈ ve yawˇ hkʼaˇ yawˇ cawˬ la gʼa ve tehꞈ yawˇ hui yawˆ yan ve chaw oˇ hkʼe kʼoˆ piˇ ve pa taw laiˉ gʼaˇ yonˍ ve yoˬ. Nawˬ awˬ tehˬ ve 1-2 ceuˬ shu htaꞈ kʼoˆ piˇ gʼa ve kʼo, Liꞈ hpu henˇ gaˇ tuˬ te piˇ ve yoˬ.—Kawˇlawˇsehˇ 4:6 gʼaw sheˍ.
LIꞈ HPU HENˇ HTAˇ SHIˍ MAˇ LA TUˬ DAWˇ TEH TAˍ SHEˍ
14-16. (a) Liꞈ hpu bvuhꞈ paˍ nawˬ hkʼa dehꞈ maˇ shiˍ ve htaꞈ shiˍ maˇ la tuˬ hkʼaˬ hkʼe gʼa te cawˇ ve le? (b) Liꞈ hpu awˬ tawn yuˬ laˬ taˍ ve nawˬ Aˍmoˆ ve liꞈ htaꞈ hkʼa dehꞈ na gʼa tuˬ kʼoˆ maˍ laˇ sheˍ. (Awˇ ceˍ awˇ fa “ Liꞈ hpu lehˬ nawˬ awˬ pon awˬ tehˬ hpehꞈ piˇ˗oˆ!” htaꞈ nyi sheˍ.)
14 Awˬ lawn chi htaꞈ dawˇ nyi sheˍ. Gʼuˇ suhˍ teˇ pawˆ hpawnˬ daꞈ ve hkʼaw nawˬ hkʼa dehꞈ maˇ shiˍ ve tcuh kaˍ paˍ ve awˬ lawn htaꞈ henˇ ve yoˬ. Nawˬ te cawˇ ve awˉ lawˉ teˇ ceuˬ lehˬ tcuh kaˍ paˍ oˇ ve teˇ gʼaˇ htaꞈ hkʼa dehꞈ shiˍ la tuˬ te sheˍ. Nawˬ hkʼaˬ hkʼe te gʼa tuˬ le?
15 Awˉ lawˉ teˇ ceuˬ, a shu yawˇ awˬ to htaꞈ na nyi cawˇ ve, ‘liꞈ chi teˇ kʼoˆ bvuhꞈ paˍ ve awˬ lawn htaꞈ nawˬ aˬ htoꞈ ma shiˍ ve le? Yawˇ a shu hpehꞈ ve le? Hkʼaˬ kaˬ lo chehˇ ve le? Yawˇ aˬ htoꞈ ma ve kanˉ te caˇ ve le?’ Tcuh kaˍ paˍ oˇ ve teˇ gʼaˇ ve awˬ lawn htaꞈ shiˍ maˇ la htaˇ, aˬ htoꞈ ma pa taw yawˇ tawˇ hkawˇ leh tawˇ pa haˉ oˇ hkʼe yehˇ ve tehꞈ, ngaˬ hui shiˍ la tuˬ yoˬ. Nawˬ Liꞈ hpu gʼaw htaˇ, liꞈ bvuhꞈ paˍ ve te hkʼaˇ dawˇ hkʼaˇ htaꞈ dawˇ nyi sheˍ.
16 Peuˬ leh liꞈ oˇ ve hkʼaˬ htaˆ bvuhꞈ peuˬ ve nawˬ shiˍ kʼo daꞈ ve yoˬ. Nawˬ shiˍ gʼa tuˬ, Miˬ guiˬ awˬ suhˉ yuˬ tawˆ ve Liꞈ hpu hkʼawꞈ nawˉ hpawˇ lo nyi gʼa ve yoˬ. (Liꞈ hpu ve awˬ meh hkʼaw cawˬ ve) Chi hkʼoˆ kaꞈ, tcuh kaˍ paˍ leh Jawˇmawˇ teˇ hpaˍ ve awˬ lawn awˬ tawn A6 hkʼaw chaˬ nyi gʼa ve yoˬ. Nawˬ henˇ chehˇ ve liꞈ tcuh kaˍ paˍ htaꞈ caˉ daꞈ ve kʼo, yawˇ hui liꞈ bvuhꞈ ve awˬ yanˇ a shaꞈ teꞈ hkʼaˇ hkʼaˬ hkʼe hpehꞈ ve nawˬ chaˬ nyi ve kʼo daꞈ ve yoˬ. Chaw yaˇ dawˇ ve leh te ve maˇ daꞈ ve cawˬ ve kʼo, tcuh kaˍ paˍ hui hkʼaˬ hkʼe gu piˇ cawˇ ve le? Liꞈ bvuhꞈ paˍ ve awˬ co˗e htaˇ a shu a shaꞈ teꞈ chehˇ ve le? Awˬ lawn hkʼa peu˗eˬ ve htaꞈ nawˬ na gʼa tuˬ liꞈ kʼoˆ laiˉ kʼoˆ gʼa yehˇ ve yoˬ. Tawˇ pa haˉ te kʼo, tcuh kaˍ paˍ Aˍmoˆ a shaꞈ teꞈ chehˇ htaˇ aˬ htoꞈ ma hpehꞈ ve shiˍ tuˬ, 2 Jawˇmawˇ leh 2 Raˍsaˍvanˍ liꞈ htaꞈ nawˬ chaˬ nyi gʼa ve yoˬ. Liꞈ hpu awˬ tawn chi ve teˇ hpaˍ Aˍmoˆ liꞈ 1:1 hkʼaw cawˬ ve yoˬ. Chi hkʼoˆ kaꞈ nawˬ Hawˇseˍ bvuhꞈ ve liꞈ htaꞈ chaˬ nyi gʼa ve yoˬ. Yawˇ Aˍmoˆ ve teˇ co˗e htaˇ a shaꞈ teꞈ chehˇ ve pa taw yoˬ. Chi hkʼe te ve lehˬ Aˍmoˆ a shaꞈ teꞈ chehˇ htaˇ ve awˬ co˗e htaꞈ nawˬ hkʼa dehꞈ na gʼa tuˬ yoˬ.—2 Jawˇmawˇ 14:25-28; 2 Raˍsaˍvanˍ 26:1-15; Hawˇseˍ 1:1-11; Aˍmoˆ 1:1.
AWˬ LAWN MAˇ UIˍ VE HTAꞈ A YEˇ YUˬ SHEˍ
17-18. Tawˇ pa haˉ chi ve nyiˇ maˬ maˇ heˆ leh nawˬ ve awˬ lawn htaꞈ cuˇ leh, awˬ lawn hkʼaˬ peu˗eˬ htaꞈ a yeˉ te ve kʼo a shu yawˇ hkʼaˇ yawˇ Liꞈ hpu henˇ ve hkʼaˬ hkʼe te pyawˍ gʼa tuˬ le? Kʼoˆ maˍ laˇ sheˍ.
17 Ngaˬ hui Liꞈ hpu gʼaw htaˇ chi aꞈ kehˉ shiˍ gaˇ ve nyi ma cawˬ ve kʼo daꞈ ve yoˬ. Tawˇ pa haˉ te kʼo, nawˬ Zaˍhkaˍriˆ liꞈ kaˇ nanˉ uiˍ 12 gʼaw htaˇ, Meˍsiˉyaꞈ suh˗e tuˬ ve tcuh kaˍ paˍ ve tawˇ hkawˇ gʼa mawˬ tuˬ yoˬ. (Zaˍhkaˍriˆ 12:10) Nawˬ kaˇ nanˉ ehˉ 12 gʼaw gaˬ˗oˬ htaˇ, “Naˍtanˍ ve awˬ ceuˬ awˬ hkʼaˇ” Meˍsiˉyaꞈ suh˗e ve pa taw, nyi ma luˬ jaˇ ve htaꞈ gʼa mawˬ ve yoˬ. Chi ve teˇ tawn htaꞈ haˆ haˆ gʼaw kʼai ve aꞈ kehˉ jehˇ leh a shu yawˇ awˬ to htaꞈ na nyi cawˇ ve yoˬ. ‘Naˍtanˍ ve awˬ ceuˬ awˬ hkʼaˇ Meˍsiˉyaꞈ htaꞈ hkʼaˬ hkʼe caˉ daꞈ ve le? Awˬ lawn chi aꞈ kehˉ ca gʼa tuˬ ngaˬ hkʼaˬ hkʼe te gʼa tuˬ le?’ Tawˇ pa haˉ te kʼo, Miˬ guiˬ awˬ suhˉ yuˬ tawˆ ve Liꞈ hpu hkʼaw awˬ maiˉ htaꞈ nyi gʼa ve yoˬ. Zaˍhkaˍriˆ liꞈ 12:12 hkʼaw awˬ maiˉ nyiˇ maˬ cawˬ ve yoˬ. Awˉ lawˉ teˇ maˬ lehˬ 2 Saˍmo˗eˍlaˆ liꞈ 5:13, 14 yoˬ. Oˇ kaˬ lo kʼoˆ ve, Naˍtanˍ kaꞈ jawˇ mawˇ Daˍviˆ ve yaˇ teˇ gʼaˇ hpehꞈ ve yoˬ. Nyiˇ maˬ teˇ maˬ lehˬ Luˉkaꞈ liꞈ 3:23, 31 yoˬ. Oˇ kaꞈ lo kʼoˆ ve, Yeˍsuˆ lehˬ Maˍriˆ ve yaˇ Naˍtanˍ ve awˬ ceuˬ awˬ hkʼaˇ hpehꞈ ve yoˬ. (“Yoˇsehꞈ lehˬ Eˇliˆ ve yaˇ” Luˉkaꞈ 3:23 nwtsty˗E henˇ tuˬ ve awˬ lawn hkʼaw cawˬ ve.) Chi lehˬ nawˬ ha lehˬ tuˬ te laˇ ve yoˬ! Yeˍsuˆ lehˬ Daˍviˆ ve awˬ ceuˬ awˬ hkʼaˇ geh laˬ ve tehꞈ tcuh kaˍ paˍ ve tawˇ hkawˇ kʼoˆ taˍ ve htaꞈ nawˬ shiˍ ve yoˬ. (Maꞈhtehˍ 22:42) Yaꞈ hkʼaˇ, Daˍviˆ ve yaˇ paˍ 20 gʼaˇ hpaˆ cawˬ ve yoˬ. Naˍtanˍ ve awˬ ceuˬ awˬ hkʼaˇ Yeˍsuˆ suh˗e ve pa taw, nyi ma luˬ leh hawˬ ve tehꞈ, Zaˍhkaˍriˆ hkʼa dehꞈ kʼoˆ taˍ laˇ gʼa ve chi anˇ tuˬ hpehꞈ ve maˇ heˆ laˇ?
18 Awˬ nu ve teˇ lawn htaꞈ kʼawꞈ dawˇ nyi sheˍ. Luˉkaꞈ liꞈ kaˇ nanˉ uiˍ 1 hkʼaw ngaˬ hui gʼa gʼaw ve, mvuhˇ naw ma tcuh yaˇ Gaˍbeˍlaˆ Maˍriˆ geh kʼai leh nawˬ yaˇ paˍ paw la tuˬ yoˬ tehꞈ kʼoˆ piˇ ve yoˬ. “Yaˇ paˍ oˇ ve lehˬ, chaw uiˍ chaw mvuh hpehꞈ leh, uiˍ jaˇ mvuh jaˇ ve Awˬ shehˍ hpaˇ ve Yaˇ hpu hpehꞈ ve yoˬ tehꞈ shu kʼoˆ tuˬ yoˬ. Jawˇmawˇ Gʼuiˬ sha lehˬ, yaˇ paˍ oˇ ve htaꞈ yawˇ awˬ pa Daˍviˆ ve kʼaw jaw piˇ tuˬ yoˬ. Yawˇ lehˬ, Yaˍkoˆ ve yehˬ awˬ hkʼoˆ htaꞈ co co taiˍ taiˍ uˉ peunˍ tuˬ yoˬ.” (Luˉkaꞈ 1:32, 33) Gaˍbeˍlaˆ awˉ lawˉ htaˇ yaw ve tawˇ htaꞈ dawˇ nyi sheˍ. Yawˇ kʼoˆ ve Yeˍsuˆ ve awˬ meh lehˬ “uiˍ jaˇ mvuh jaˇ ve Awˬ shehˍ hpaˇ ve Yaˇ hpu” tehꞈ kuˬ ve yoˬ. Chi hkʼoˆ kaꞈ, Gaˍbeˍlaˆ kʼawꞈ kʼoˆ ve Yeˍsuˆ lehˬ “Jawˇmawˇ hpehꞈ ve yoˬ.” Chi htaꞈ pa taw, nawˬ dawˇ kʼo Gaˍbeˍlaˆ kʼoˆ ve htaꞈ Maˍriˆ hkʼaˬ hkʼe dawˇ ve le? Yeˍsuˆ Heˍroˆ ve awˬ tan Jawˇmawˇ te ve maˇ heˆ leh Iˉsaˍreˍlaˆ mvuhˇ miˬ hkʼaw jawˇ mawˇ teˇ gʼaˇ hpehꞈ ve tehꞈ yawˇ dawˇ˗aw laˇ? Yeˍsuˆ awˬ tehˬ awˬ na Jawˇmawˇ hpehꞈ ve kʼo, Maˍriˆ Jawˇmawˇ ve awˬ e hpehꞈ leh yawˇ ve yaˇ kaꞈ hawˉ yehˬ hkʼaw gʼa chehˇ tuˬ yoˬ. Yaꞈ hkʼaˇ, awˬ lawn chi Maˍriˆ Gaˍbeˍlaˆ geh yaw daꞈ ve tehꞈ Liꞈ hpu hkʼaw maˇ kʼoˆ taˍ laˇ? Yeˍsuˆ ve awˬ laꞈ gʼawˇ 2 gʼaˇ hkʼe leˇ, Maˍriˆ mvuhˇ naw ma hkʼoˆ uˉ peunˍ tuˬ ve aˉ yaˇ lawˬ ve tehꞈ Liꞈ hpu hkʼaw maˇ kʼoˆ taˍ laˇ. (Maꞈhtehˍ 20:20-23) Awˬ lawn chi ve hkʼa peu˗eˬ Maˍriˆ nyi ma nuˇ nehˬ jaˇ ve yaˇ miˇ hpehꞈ ve tehꞈ, ngaˬ hui htaꞈ hpeuꞈ maw laˇ ve yoˬ!
19-20. Yaˍkoˆ liꞈ 1:22-25 leh 4:8, hkʼaw kʼoˆ taˍ ve hkʼe, ngaˬ hui Liꞈ hpu henˇ ve dawˇ teh taˍ ve aˬ htoꞈ ma le?
19 Hkriꞈ yaˇ dawˇ teh taˍ ve a yeˇ uiˍ jaˇ ve lehˬ Liꞈ hpu leh ngaˬ hui ve liꞈ kʼoˆ htaꞈ henˇ leh Yaˬhoˉvaˬ geh meuˆ daꞈ ve awˬ lawn chi htaꞈ taˇ leunˇ sheˍ. Ngaˬ hui Gʼuiˬ sha nyi hkʼaˇ suh tuˬ “awˬ hoꞈ awˬ han hkʼaˬ hkʼe cawˬ ve” gʼa pa cawˇ ve kaꞈ shiˍ gaˇ ve yoˬ. (Yaˍkoˆ 1:22-25; 4:8 gʼaw sheˍ.) Teˇ pawˆ le le Liꞈ hpu henˇ ve awˉ lawˉ htaˇ ngaˬ hui Yaˬhoˉvaˬ geh daꞈ kehˬ ve awˬ ha hpu lawˬ cawˇ ve yoˬ. Ngaˬ hui gʼaw chehˇ ve htaꞈ awˬ bon hkʼa dehꞈ gʼa tuˬ Gʼuiˬ sha dawˇ ve hkʼe ngaˬ hui dawˇ tuˬ yawˇ ga laˇ tuˬ lawˬ sheˍ.
20 Teˇ gʼaˇ le le Chiˇ mvuh ve liꞈ bvuhꞈ paˍ hawˉ hkʼaˆ teˇ gʼaˇ kʼoˆ taˍ ve hkʼe hpehꞈ piˇ sheˍ. Gʼuiˬ sha ve mehˆ gʼuˇ suhˍ “chaw oˇ hkʼe ve teˇ gʼaˇ lehˬ, Gʼuiˬ sha ve awˬ liˇ tawˇ hkawˇ htaꞈ na yuˬ leh, mvuhˇ lawꞈ kʼaw mvuhˇ hpeuꞈ henˇ yuˬ tcuhˉ taˍ ve yoˬ. . . . Yawˇ te ve kanˉ teˇ ceuˬ le le uiˍ la daꞈ la ve yoˬ.”—Chiˇ mvuh ve 1:2, 3.
KʼA MUIˬ HKAWˇ 88 Nawˬ ve yaꞈ kʼaw maˍ laˇ˗oˆ
^ Nyi tuˬ, gʼaw tuˬ, leh henˇ tuˬ ve Yaˬhoˉvaˬ ngaˬ hui htaꞈ maˇ maˇ peꞈ laˇ ve yoˬ. Nawˬ henˇ leh aˬ htoꞈ ma dawˇ cheˆ gʼa tuˬ awˬ lawn chi ve hkʼaw maˍ laˇ tuˬ yoˬ. Chi hkʼoˆ kaꞈ nawˬ henˇ htaˇ, hkʼaˬ hkʼe te leh awˬ bon maˇ maˇ gʼa tuˬ kaꞈ maˍ laˇ tuˬ yoˬ.
^ AWˬ HAN HTAꞈ KʼOˆ MAˍ TAˍ VE: Shaw nyi kuiˬ Taꞈ yehˬ gu tuˬ awˬ pa awˬ e yaˇ htaꞈ maˍ piˇ ve.
^ AWˬ HAN HTAꞈ KʼOˆ MAˍ TAˍ VE: Hawˉ hkʼaˆ teˇ gʼaˇ Aˍmoˆ ve liꞈ bvuhꞈ paˍ htaꞈ caˉ daꞈ ve hpfuhˆ nyi chehˇ ve. Hkʼawꞈ nawˉ paˉ lo ve awˬ ha awˬ viˉ awˬ nyi chi teˇ gʼaˇ Liꞈ hpu gʼaw htaˇ Liꞈ hpu hkʼaw ve awˬ lawn awˬ tanˇ htaꞈ dawˇ mawˬ leh hkʼa dehꞈ dawˇ nyi ve.