1-2. (a) Chaw yaˇ teˇ gʼaˇ le le awˬ gʼaˇ gʼa tuˬ loˍ leh awˬ gʼaˇ piˇ daꞈ puiˉ ve tehꞈ ngaˬ hui hkʼaˬ hkʼe te shiˍ gʼa tuˬ le? (b) Yaˇ teˇ hpaˍ kʼo aˬ htoꞈ ma te nyi ma naˬ ve le?

 Chaw yaˇ teˇ gʼaˇ le le awˬ gʼaˇ gʼa tuˬ loˍ ve yoˬ. Ngaˬ hui teˇ gʼaˇ leh teˇ gʼaˇ awˬ gʼaˇ piˇ daꞈ puiˉ ve yoˬ. Tawˇ pa haˉ te kʼo, yaˇ ehˉ pfuh˗e leh hkui tcuhˉ kʼu hkʼaw˗e htaˇ, yawˇ hawˬ leh awˬ pa awˬ e geh gʼuiˇ kʼai tuˬ yoˬ. Awˬ pa awˬ e yaˇ htaꞈ gu na˗e piˇ maˇ gʼa ve htawˇ, awˬ gʼaˇ piˇ gʼa ve yoˬ. Aˬ htoꞈ ma hpehꞈ ve le kʼoˆ leh mehˆ gʼuiˬ shiˆ piˇ leh, naˆ tsuhˇ shehˍ leh hpa nehˉ nehˉ piˇ ve yoˬ. Maˇ maw yaˇ hawˬ ve na˗e leh teˇ pawˆ kʼawꞈ leˍ guiˇ ve yoˬ. Hkʼawꞈ nawˉ htaˇ, hkui tcuhˉ kʼu hkʼaw˗aˍ ve kaꞈ na˗e tuˬ yoˬ.

² Yaꞈ hkʼaˇ, yaˇ teˇ gʼaˇ gʼaˇ kʼo chi hkʼa shuˍ a ciˉ ceh tiˉ naˬ ve maˇ heˆ. Shu yawˇ hui htaꞈ pehꞈ ve tzuhˆ ve hpawˇ naˬ taweh te piˇ ve yoˬ. Yaˇ teˇ hpaˍ kʼo chi hkʼe ve teˇ pawˆ ceh tiˉ gʼa hpuˇ ve, teˇ hpaˍ hpaˍ kʼo laiˉ hkʼawꞈ gʼa hpuˇ ve yoˬ. Chi yaˇ htaꞈ nyi ma naˬ jaˇ tuˬ te piˇ ve yoˬ. Teˇ pawˆ pawˆ kʼo te yaꞈ ve chaw htaꞈ yuˬ leh ciˍ yanˍ piˇ gʼa ve yoˬ. Yaꞈ hkʼaˇ, teˇ pawˆ pawˆ kʼo yuˬ maˇ gʼa. Oˇ ve teˇ gʼaˇ htaꞈ yuˬ gʼa ve htawˇ, yaˇ ehˉ htaˇ kaꞈ chi hkʼe gʼa hpuˇ ve chaw lehˬ chaw mawˇ hpehꞈ˗oˬ kaꞈ maˇ na sheˍ.

3. 2 Kawˇrenˍhtuˆ liꞈ 1:3, 4 hkʼaw kʼoˆ taˍ ve hkʼe, Yaˬhoˉvaˬ ve a loˍ aˬ htoꞈ ma le? Ngaˬ hui aˬ htoꞈ ma ve na hkawˇ htaꞈ chaˬ nyi tuˬ le?

³ Awˬ viˉ awˬ nyi teˇ gʼaˇ yaˇ ehˉ htaˇ haiˬ ve gʼa hpuˇ leh chaw mawˇ hpehꞈ htaˇ kaꞈ nyi ma naˬ chehˇ sheˍ ve kʼo, aˬ htoꞈ ma ga piˇ gʼa ve le? (2 Kawˇrenˍhtuˆ 1:3, 4 gʼaw sheˍ.) Yaˬhoˉvaˬ yawˇ ve yawˬ hkʼa  peu˗eˬ htaꞈ haꞈ pehnˇ ve leh awˬ gʼaˇ gʼa tcuh gaˇ ve yoˬ. Hkʼe te leh na hkawˇ chi teˇ hpaˍ htaꞈ teˇ geh chaˬ nyi sheˍ. (1) Yaˇ ehˉ htaˇ haiˬ ve gʼa hpuˇ ve chaw aˬ htoꞈ ma te awˬ gʼaˇ gʼa tuˬ loˍ ve le? (2) Yawˇ htaꞈ a shu awˬ gʼaˇ piˇ gʼa ve le? (3) Yawˇ htaꞈ awˬ gʼaˇ hkʼaˬ hkʼe te hkʼa dehꞈ piˇ gʼa tuˬ le?

4-5. (a) Yaˇ leh chaw mawˇ peun daꞈ ve tehꞈ aˬ htoꞈ maˬ te ngaˬ hui dawˇ nyi cawˇ ve le? (b) Yaˇ ehˉ htaˇ haiˬ ve gʼa hpuˇ ve kʼo, aˬ htoꞈ ma te shu htaꞈ yonˍ maˇ gʼa ve hehˉ le?

⁴ Yaˇ ehˉ htaˇ haiˬ ve gʼa hpuˇ ve lehˬ chaw mawˇ hpehꞈ˗oˬ ve htawˇ awˬ gʼaˇ gʼa tuˬ loˍ ve yoˬ. Aˬ htoꞈ ma pa taw le? Awˬ lawn chi htaꞈ na gʼa tuˬ, yaˇ leh chaw mawˇ hkʼaˬ hkʼe peun daꞈ ve le, ngaˬ hui awˉ lawˉ dawˇ nyi cawˇ ve yoˬ. Yaˇ ehˉ htaˇ shu maˇ daꞈ ve te piˇ leh chaw mawˇ htaˇ shu maˇ daꞈ ve te piˇ ve nyi ma htaꞈ heuˆ la ve maˇ shuˍ daꞈ. 3 lawn htaꞈ teˇ geh dawˇ nyi sheˍ.

⁵ Yaˇ ehˉ lehˬ yawˇ hui htaꞈ hu piˇ ve chaw htaꞈ gʼa yonˍ leh gʼa meuˆ daꞈ ve yoˬ. Chi hkʼe te htaˇ, yaˇ awˬ nu ve chaw yawˇ htaꞈ haꞈ ve tehꞈ yonˍ la ve yoˬ. (Chiˇ mvuh ve 22:9) Yaꞈ hkʼaˇ, yaˇ haiˬ ve gʼa hpuˇ htaˇ, maˇ˗awˍ ve lehˬ yawˇ aˉ hkʼaw lo hpehꞈ gʼa leh, yehˬ kʼa hkʼaw ve chaw maˇ heˆ kʼo yawˇ ve yehˬ kʼa htaꞈ meuˆ daꞈ ve chaw te piˇ ve yoˬ. Yaˇ ehˉ htaˇ haiˬ ve gʼa hpuˇ ve kʼo, laiˉ hkʼawꞈ gaˬ˗oˬ ve htawˇ yawˇ shu htaꞈ yonˍ maˇ gʼa ve yoˬ hehˉ.

6. Yaˇ pehꞈ ve tzuhˆ ve hpawˇ naˬ taweh te piˇ ve gʼa hpuˇ ve kʼo, heuˆ la kuiˬ hkʼaˬ hkʼe cawˬ ve le?

⁶ Yaˇ ehˉ lehˬ yawˇ awˬ to htaꞈ haꞈ shaˉ maˇ gʼa leh, pehꞈ ve tzuhˆ ve hpawˇ naˬ taweh te piˇ ve gʼa hpuˇ ve kʼo yawˇ htaꞈ heuˆ la kuiˬ cawˬ jaˇ. Yaˇ maˇ uiˍ sheˍ leh shu yawˇ htaꞈ pehꞈ ve tzuhˆ ve hpawˇ nyiˉ te piˇ ve kʼo, maˇ cawˇ ve dawˇ hkʼaˇ cawˬ gʼa ve yoˬ. Teˇ geh zuhꞈ ve hpawˇ yawˇ maˇ daꞈ ve dawˇ hkʼaˇ cawˬ gʼa ve yoˬ hehˉ. Yawˇ awˬ hpfuhˇ maˇ cawˬ tehꞈ shawˍ leh yawˇ yonˍ cawˇ ve chaw htaꞈ maˇ yonˍ gʼa˗o.

7. (a) Haiˬ ve chaw aˬ htoꞈ ma te yaˇ htaꞈ heˍ sha ve le? Yawˇ hkʼaˬ hkʼe heˍ piˇ gʼa ve le? (b) Heˍ ve heuˆ la kuiˬ hkʼaˬ hkʼe cawˬ ve le?

⁷ Yaˇ ehˉ lehˬ hkʼa dehꞈ dawˇ nyi leh dawˇ cheˆ maˇ gʼa sheˍ leh, kawˆ tuˬ htaꞈ kaꞈ jaw hpaw˗e maˇ puiˉ sheˍ. (1 Kawˇrenˍhtuˆ 13:11) Hkʼe te leh haiˬ ve chaw yaˇ ehˉ htaꞈ heˍ sha ve yoˬ. Tawˇ pa haˉ te kʼo, “yaˇ te yaꞈ ve pa taw chi hkʼe gʼa hpuˇ ve”, “shu htaꞈ taˇ kʼoˆ piˇ”, leh “nawˬ kʼoˆ ve kaꞈ shu maˇ yonˍ taˬ” tehꞈ haiˬ ve chaw yaˇ ehˉ htaꞈ heˍ piˇ gʼa ve yoˬ. Maˇ heˆ kʼo, “chaw mawˇ leh yaˇ haꞈ daꞈ ve kʼo chi hkʼe te ve” tehꞈ heˍ piˇ gʼa ve yoˬ. Chi heˍ ve tehꞈ yaˇ na gʼa tuˬ awˬ yanˇ laiˉ hkʼawꞈ gʼa yehˇ ve yoˬ. Yaˇ awˬ to maˇ daꞈ˗o leh shu yawˇ htaꞈ haꞈ laˇ maˇ keunˍ tehꞈ dawˇ ve yoˬ hehˉ.

8. Nyi ma naˬ chehˇ ve chaw htaꞈ Yaˬhoˉvaˬ awˬ gʼaˇ piˇ tuˬ yoˬ tehꞈ aˬ htoꞈ ma te ngaˬ hui hkʼa dehꞈ yonˍ gʼa ve le?

⁸ Ngaˬ hui gʼa mawˬ ve, yaˇ haiˬ ve chi hkʼe gʼa hpuˇ ve kʼo, laiˉ hkʼawꞈ shoꞈ shaꞈ tuˬ te piˇ ve yoˬ. Haiˬ ve chi venˇ baˆ uiˍ jaˇ! Awˬ lawn chi teˇ kaˬ le le lo hpehꞈ la chehˇ ve pa taw, ngaˬ hui awˬ leh meuˇ lo chehˇ taˍ ve tehꞈ shiˍ ve yoˬ. Chi beuꞈ teˇ co˗e, “shu htaꞈ maˇ haꞈ puiˉ ve chaw” cawˬ maˇ la leh “haiˬ ve chaw leh heˍ puiˉ ve chaw teˇ hpaˍ lehˬ shaˬ te shaˬ haiˬ la tuˬ yoˬ” tehꞈ ngaˬ hui shiˍ ve yoˬ. (2 Tiˆmoˉseˍ 3:1-5, 13) Saˍtanˍ ve awˬ hkʼaˇ haiˬ jaˇ leh yawˇ te tcuh gaˇ ve hkʼe chaw yaˇ gʼaꞈ te ve, ngaˬ hui mawˬ htaˇ nyi ma luˬ jaˇ. Yaꞈ hkʼaˇ, Saˍtanˍ leh haiˬ ve chaw aꞈ kehˉ Yaˬhoˉvaˬ kanˇ paˆ uiˍ jaˇ. Yawˇ Saˍtanˍ ve awˬ hkʼaˇ htaꞈ shiˍ ve yoˬ. Ngaˬ hui hkʼaˬ hkʼe taw tuꞈ hkanˍ chehˇ ve yawˇ shiˍ leh awˬ gʼaˇ peꞈ laˇ gʼa ve yoˬ. Ngaˬ hui ve Gʼuiˬ sha lehˬ “dawˇ sha gaˇ sha tuˬ hkʼa peu˗eˬ piˇ shehˍ hpaˇ Gʼuiˬ sha hpehꞈ ve yoˬ. Ngaˬ hui gʼa tuꞈ gʼa hkanˍ ve hkʼa peu˗eˬ awˬ hkʼaw lo yawˇ ngaˬ hui htaꞈ dawˇ sha la piˇ ve yoˬ. Hkʼe te leh, . . . tuꞈ ve hkanˍ ve teˇ ceuˬ le le gʼa hkanˍ ve chaw hui htaꞈ ngaˬ hui htawˇ dawˇ sha la piˇ hpehꞈ ve yoˬ.” (2 Kawˇrenˍhtuˆ  1:3, 4) Nyi ma naˬ chehˇ ve chaw htaꞈ awˬ gʼaˇ piˇ tuˬ, Yaˬhoˉvaˬ a shu htaꞈ cuˇ ve le?

9. Chiˇ mvuh ve liꞈ 27:10 hkʼaw Jawˇmawˇ Daˍviˆ kʼoˆ taˍ ve hkʼe, awˬ pa awˬ e yaˇ htaꞈ maˇ ga piˇ ve kʼo, Yaˬhoˉvaˬ hkʼaˬ hkʼe te piˇ ve le?

⁹ Yaˇ haiˬ ve gʼa hpuˇ leh awˬ pa awˬ e yaˇ hpawˇ maˇ chehˇ leh maˇ ga piˇ ve kʼo, awˬ gʼaˇ gʼa tuˬ loˍ ve yoˬ. Yaˬhoˉvaˬ ngaˬ hui htaꞈ hkʼaˬ htaˆ kaꞈ awˬ gʼaˇ peꞈ laˇ ve tehꞈ Jawˇmawˇ Daˍviˆ shiˍ ve yoˬ. (Chiˇ mvuh ve 27:10 gʼaw sheˍ.) Yehˬ kʼa hkʼaw ve chaw, yaˇ htaꞈ te luˬ piˇ ve kʼo Yaˬhoˉvaˬ yawˇ ve awˬ pa hkʼe hpehꞈ ve tehꞈ Daˍviˆ shiˍ ve yoˬ. Yaˬhoˉvaˬ hkʼaˬ hkʼe te ve le? Yawˇ ve chaw ka tiꞈ yeˬ ve htaꞈ cuˇ tuˬ yoˬ. Hkriꞈ yaˇ awˬ moˍ hkʼaw ve chaw ngaˬ hui ve yehˬ kʼa hkʼaw ve chaw hkʼe hpehꞈ ve yoˬ. Yeˍsuˆ kaꞈ yawˇ geh teˇ geh Yaˬhoˉvaˬ htaꞈ oˉ kʼoˍ pui ve chaw hui yawˇ ve awˬ viˉ awˬ nyi leh awˬ e hkʼe hpehꞈ ve tehꞈ kʼoˆ ve yoˬ.—Maꞈhtehˍ 12:48-50.

10. Nyi haꞈ shaˉ paˍ ve kanˉ htaꞈ tcuh yaˇ Pawˇluꞈ hkʼaˬ hkʼe kʼoˆ maˍ laˇ ve le?

¹⁰ Hkriꞈ yaˇ awˬ moˍ hkʼaw ve chaw hkʼaˬ hkʼe te yehˬ kʼa hkʼaw ve chaw hkʼe hpehꞈ la gʼa ve le? Tcuh yaˇ Pawˇluꞈ ve awˬ lawn dawˇ nyi sheˍ. Yawˇ ka tiꞈ yeˬ leh kaiˬ ve nyi haꞈ shaˉ paˍ hpehꞈ ve yoˬ. Yawˇ daꞈ ve henˇ yuˬ tuˬ hpehꞈ leh, Hkriꞈ te ve hkʼa shuˍ yawˇ te ve hkʼe ngaˬ hui htawˇ yawˇ hkʼe te tcuh gaˇ ve yoˬ. (1 Kawˇrenˍhtuˆ 11:1) Nyi haꞈ shaˉ paˍ ve kanˉ htaꞈ Pawˇluꞈ kʼoˆ htaˇ, “awˬ e teˇ gʼaˇ lehˬ, yawˇ ve yaˇ ehˉ teˇ hpaˍ htaꞈ haꞈ shaˉ ve hkʼe, ngaˬ hui nawˬ hui geh nyi ma nuˇ nehˬ ve awˬ hkʼaw lo chehˇ ve” tehꞈ yawˇ kʼoˆ ve yoˬ. (1 Hteˇsaˍlawˇniˆ 2:7) Chi beuꞈ teˇ co˗e nyi haꞈ shaˉ paˍ kaꞈ Liꞈ hpu htaꞈ cuˇ leh ha kʼaˉ ve hkʼaw awˬ gʼaˇ piˇ gʼa ve yoˬ.

11. Nyi haꞈ shaˉ paˍ ceh awˬ gʼaˇ piˇ gʼa ve maˇ heˆ tehꞈ ngaˬ hui hkʼaˬ hkʼe te shiˍ gʼa ve le?

¹¹ Haiˬ ve gʼa hpuˇ ve chaw htaꞈ awˬ gʼaˇ piˇ gʼa ve nyi haꞈ shaˉ paˍ ceh tiˉ laˇ? Maˇ heˆ. “Teˇ gʼaˇ leh teˇ gʼaˇ awˬ gʼaˇ piˇ daꞈ” tuˬ ngaˬ hui awˬ vuiˬ cawˬ ve yoˬ. (1 Hteˇsaˍlawˇniˆ 4:18) Awˬ viˉ awˬ nyi yaˇ miˇ co ha hpawˇ ve chaw mawˇ, haiˬ ve gʼa hpuˇ ve yaˇ miˇ htaꞈ awˬ gʼaˇ piˇ gʼa ve yoˬ. Awˬ e yaˇ htaꞈ nyi haꞈ shaˉ ve hkʼe Yaˬhoˉvaˬ Gʼuiˬ sha kaꞈ yawˇ htaꞈ tehˆ taˍ ve yoˬ. (Iˉsaˍyaˆ 66:13) Liꞈ hpu hkʼaw yaˇ miˇ shu htaꞈ awˬ gʼaˇ piˇ jaw ve awˬ lawn kʼoˆ taˍ ve yoˬ. (Yawˇbaˆ  42:11) Awˬ viˉ awˬ nyi yaˇ miˇ nyi ma luˬ chehˇ ve yaˇ miˇ htaꞈ awˬ gʼaˇ piˇ ve, Yaˬhoˉvaˬ mawˬ htaˇ ha lehˬ jaˇ! Teˇ pawˆ pawˆ kʼo awˬ viˉ awˬ nyi yaˇ miˇ co ha hpawˇ ve chaw mawˇ, haiˬ ve gʼa hpuˇ ve yaˇ miˇ htaꞈ ga piˇ tuˬ nyi haꞈ shaˉ paˍ lawˬ ve yoˬ. *

12. Ngaˬ hui hkʼaˬ hkʼe ve maˇ te cawˇ ve le?

¹² Ngaˬ hui awˬ viˉ awˬ nyi htaꞈ ga piˇ htaˇ, yawˇ maˇ kʼoˆ laˇ gaˇ ve awˬ ceuˬ htaꞈ maˇ na piˇ cawˇ. (1 Hteˇsaˍlawˇniˆ 4:11) Hkʼe kʼo awˬ gʼaˇ loˍ ve chaw htaꞈ ngaˬ hui hkʼaˬ hkʼe ga piˇ gʼa tuˬ le? Liꞈ hpu htaꞈ cuˇ ve awˬ hkʼaˇ 5 hkʼaˇ htaꞈ teˇ geh dawˇ nyi sheˍ.

13. 1 Jawˇmawˇ liꞈ 19:5-8 hkʼaw kʼoˆ taˍ ve hkʼe, Yaˬhoˉvaˬ ve mvuhˇ naw ma tcuh yaˇ Eˇliˇyaꞈ htaꞈ hkʼaˬ hkʼe ga piˇ ve le? Ngaˬ hui hkʼaˬ hkʼe te mvuhˇ naw ma tcuh yaˇ hkʼe te gʼa tuˬ le?

¹³ Yawˇ loˍ ve htaꞈ ga piˇ sheˍ. Tcuh kaˍ paˍ Eˇliˇyaꞈ yawˇ htaꞈ tiˇ pehˍ gaˇ ve chaw htaꞈ hpaw˗e htaˇ, yawˇ awˬ gʼaˇ nuˇ leh suh˗e gaˇ ve yoˬ. Yaˬhoˉvaˬ mvuhˇ naw ma tcuh yaˇ yawˇ geh kʼai tcuh leh awˬ gʼaˇ ca piˇ tcuh ve yoˬ. Yawˇ Eˇliˇyaꞈ htaꞈ caˇ tuˬ lehˍ lehˍ ve piˇ leh ha kʼaˉ ve hkʼaw caˇ tcuh ve yoˬ. (1 Jawˇmawˇ 19:5-8 gʼaw sheˍ.) Chi ngaˬ hui htaꞈ maˍ laˇ ve, maˇ uiˍ ve awˬ ceuˬ hpehꞈ ve htawˇ, awˬ viˉ awˬ nyi loˍ ve htaꞈ ga piˇ ve kʼo awˬ bon cawˬ jaˇ. Caˇ tuˬ maˇ heˆ leh mawˇ piˇ ve, liꞈ bvuhꞈ piˇ ve kʼo, awˬ viˉ awˬ nyi awˬ gʼaˇ nuˇ ve ngaˬ hui yawˇ htaꞈ haꞈ leh dawˇ haˍ ve tehꞈ shiˍ gʼa ve yoˬ. Yawˇ geh tawˇ yaw daꞈ tuˬ ngaˬ hui maˇ haˆ ve htawˇ, yawˇ loˍ ve htaꞈ ga piˇ gʼa sheˍ.

14. Eˇliˇyaꞈ ve awˬ lawn ngaˬ hui htaꞈ aˬ htoꞈ ma maˍ laˇ ve le?

¹⁴ Yawˇ kawˆ ve maˇ dawˇ tuˬ ga piˇ sheˍ. Ngaˬ hui Eˇliˇyaꞈ htaꞈ teˇ pawˆ kʼawꞈ henˇ yuˬ gʼa ve yoˬ. Eˇliˇyaꞈ Siˉnaˆ hkʼaw lo gaˬ˗e tuˬ Yaˬhoˉvaˬ anˇ tuˬ te leh ga piˇ ve yoˬ. Laiˉ ha hkʼawꞈ htaˇ, oˇ kaˬ lo Yaˬhoˉvaˬ yawˇ ve chaw htaꞈ ka tiꞈ te piˇ jaw ve pa taw, Eˇliˇyaꞈ oˇ kaˬ lo kawˆ tuˬ maˇ cawˬ tehꞈ dawˇ ve yoˬ hehˉ. Yawˇ htaꞈ tiˇ pehˍ gaˇ ve chaw vuiˇ jaˇ leh laˬ maˇ gaˬ tehꞈ yawˇ dawˇ ve yoˬ hehˉ. Awˬ lawn chi ngaˬ hui htaꞈ aˬ htoꞈ ma maˍ laˇ ve le? Haiˬ ve gʼa hpuˇ jaw ve chaw htaꞈ ngaˬ hui ga piˇ gaˇ ve kʼo, yawˇ kawˆ ve maˇ gʼa dawˇ tuˬ ngaˬ hui awˉ lawˉ gʼa ga piˇ cawˇ ve yoˬ. Tawˇ pa haˉ te kʼo, awˬ viˉ awˬ nyi yaˇ miˇ haiˬ ve gʼa hpuˇ jaw ve nyi haꞈ shaˉ paˍ yawˇ ve yehˬ lo ca yaw daꞈ˗e ve kʼo, yawˇ nyi ma sha tuˬ yoˬ hehˉ. Yaꞈ hkʼaˇ awˬ viˉ awˬ nyi teˇ hpaˍ kʼo, nyi haꞈ shaˉ paˍ hpawnˬ daꞈ kuiˬ hkʼaw yawˇ geh tawˇ yaw daꞈ ve kʼo, yawˇ nyi ma sha tuˬ yoˬ hehˉ.

15-16. Hkʼa dehꞈ na taˍ piˇ ve lehˬ hkʼaˬ hkʼe kʼoˆ gaˇ ve le?

¹⁵ Hkʼa dehꞈ na taˍ piˇ sheˍ. Liꞈ hpu ngaˬ hui htaꞈ beˆ maˍ laˇ ve, “shu tawˇ yaw ve htaꞈ hkʼa dehꞈ na sheˍ. Tawˇ haˆ haˆ taˇ yaw.” (Yaˍkoˆ 1:19) Ngaˬ hui shu tawˇ yaw ve htaꞈ hkʼa dehꞈ na taˍ piˇ˗aw laˇ? Chaw teˇ hpaˍ hpaˍ dawˇ ve, hkʼa dehꞈ na taˍ piˇ ve lehˬ shu kʼoˆ ve htaꞈ nyi leh taꞈ iˉ chehˇ taˍ ve htaꞈ ceh kʼoˆ gaˇ ve yoˬ. Yaꞈ hkʼaˇ, oˇ hkʼe ceh maˇ heˆ. Tawˇ pa haˉ te kʼo, Eˇliˇyaꞈ nyi ma hkʼaˬ hkʼe taw luˬ ve Yaˬhoˉvaˬ htaꞈ kʼoˆ piˇ htaˇ, yawˇ hkʼa dehꞈ na taˍ piˇ ve yoˬ. Eˇliˇyaꞈ kawˆ leh chehˇ bawˬ ve, leh yawˇ te ve kanˉ awˬ bon maˇ cawˬ tehꞈ yawˇ dawˇ ve htaꞈ Yaˬhoˉvaˬ gʼa mawˬ ve yoˬ. Eˇliˇyaꞈ dawˇ hkʼaˇ chi hkʼe ve htaꞈ gʼaˇ tuˬ, Yaˬhoˉvaˬ haꞈ pehnˇ ve hkʼaw ga piˇ ve yoˬ. Yawˇ Eˇliˇyaꞈ htaꞈ hkʼa dehꞈ na taˍ piˇ ve pa taw chi hkʼe te ve yoˬ.—1 Jawˇmawˇ 19:9-11, 15-18.

¹⁶ Awˬ viˉ awˬ nyi kʼoˆ ve htaꞈ ngaˬ hui haꞈ pehnˇ ve hkʼaw hkʼaˬ hkʼe na taˍ piˇ gʼa ve le? Ngaˬ hui ha kʼaˉ ve hkʼaw tawˇ chi suhˉ˗ehˍ kʼoˆ piˇ gʼa ve yoˬ. Tawˇ pa haˉ te kʼo, “nawˬ chi hkʼe gʼa hpuˇ ve ngaˬ kaꞈ nyi ma luˬ jaˇ” tehꞈ ngaˬ hui yawˇ htaꞈ kʼoˆ piˇ gʼa ve yoˬ. Yawˇ kʼoˆ ve htaꞈ ngaˬ hui hkʼa dehꞈ  na maˇ gʼa ve kʼo, “nawˬ hkʼaˬ hkʼe kʼoˆ gaˇ ve le? Nawˬ . . . tehˬ kʼoˆ gaˇ ve laˇ?” tehꞈ ngaˬ hui yawˇ htaꞈ na piˇ gʼa ve yoˬ. Ngaˬ hui chi hkʼe na piˇ ve kʼo, yawˇ kʼoˆ ve htaꞈ ngaˬ hui hkʼa dehꞈ na chehˇ ve tehꞈ yawˇ shiˍ tuˬ yoˬ.—1 Kawˇrenˍhtuˆ 13:4, 7.

17. Aˬ htoꞈ ma te ngaˬ hui yeunˇ hkanˍ ve hkʼaw “tawˇ haˆ haˆ maˇ yaw” cawˇ ve le?

¹⁷ Yaꞈ hkʼaˇ, ngaˬ hui tawnˇ taˍ cawˇ ve, “tawˇ haˆ haˆ taˇ yaw.” Yawˇ kʼoˆ chehˇ htaˇ, yawˇ htaꞈ beˆ maˍ piˇ tuˬ leh yawˇ ve dawˇ hkʼaˇ pa piˇ tuˬ tawˇ taˇ yaw keu piˇ. Ngaˬ hui yeunˇ hkanˍ cawˇ ve yoˬ! Eˇliˇyaꞈ yawˇ nyi ma hkʼaˬ hkʼe taw luˬ ve Yaˬhoˉvaˬ htaꞈ kʼoˆ piˇ htaˇ, yawˇ tawˇ kehˇ kʼoˆ puiˉ jaˇ. Leh Yaˬhoˉvaˬ Eˇliˇyaꞈ htaꞈ awˬ gʼaˇ piˇ peuˬ hkʼawꞈ nawˉ kaꞈ Eˇliˇyaꞈ hkʼa shuˍ teˇ pawˆ kʼawꞈ kehˇ kʼoˆ sheˍ ve yoˬ. (1 Jawˇmawˇ 19:9, 10, 13, 14) Awˬ lawn chi ngaˬ hui htaꞈ hkʼaˬ hkʼe maˍ laˇ ve le? Yaˬhoˉvaˬ hkʼa shuˍ ngaˬ hui kaꞈ yeunˇ hkanˍ ve hkʼaw shu kʼoˆ ve htaꞈ na taˍ piˇ cawˇ ve yoˬ. Yawˇ hkʼaˬ hkʼe pa tuˬ maˇ beˆ maˍ piˇ cawˇ, yawˇ htaꞈ ha kʼaˉ piˇ cawˇ ve yoˬ.—1 Peˍtruˆ 3:8.

18. Ngaˬ hui bon lawˬ htaˇ, nyi ma luˬ chehˇ ve chaw htaꞈ hkʼaˬ hkʼe te ga piˇ gʼa ve le?

¹⁸ Nyi ma luˬ chehˇ ve chaw geh bon teˇ geh lawˬ sheˍ. Nyi ma luˬ chehˇ ve chaw teˇ pawˆ pawˆ kʼo bon maˇ lawˬ haˆ. Yawˇ Yaˬhoˉvaˬ geh bon maˇ lawˬ keunˍ tehꞈ dawˇ ve yoˬ hehˉ. Ngaˬ hui yawˇ htaꞈ awˬ gʼaˇ piˇ gaˇ ve kʼo, yawˇ ve awˬ meh kʼoˆ leh bon teˇ geh lawˬ gʼa ve yoˬ. Ngaˬ hui bon lawˬ htaˇ, ngaˬ hui leh Hkriꞈ yaˇ awˬ moˍ hkʼaw ve awˬ viˉ awˬ nyi yawˇ htaꞈ hkʼaˬ hkʼe taw haꞈ ve tehꞈ Yaˬhoˉvaˬ htaꞈ kʼoˆ maˍ piˇ gʼa ve yoˬ. Yawˇ Yaˬhoˉvaˬ awˬ pon awˬ hpfuhˇ hkʼaˆ jaˇ ve pa taw, yawˇ htaꞈ awˬ gʼaˇ piˇ tuˬ ngaˬ hui lawˬ gʼa ve yoˬ. Bon chi hkʼe lawˬ ve lehˬ yawˇ nyi ma sha tuˬ ga piˇ gʼa ve yoˬ.—Yaˍkoˆ 5:16.

19. Ngaˬ hui shu htaꞈ awˬ gʼaˇ piˇ gʼa tuˬ aˬ htoꞈ ma ga laˇ gʼa ve le?

¹⁹ Yawˇ nyi ma sha tuˬ ve tawˇ yaw piˇ sheˍ. Tawˇ maˇ yaw sheˍ htaˇ kaꞈ awˉ lawˉ dawˇ nyi sheˍ. Maˇ dawˇ nyi leh yaw ve tawˇ lehˬ yawˇ htaꞈ nyi ma naˬ tuˬ te piˇ lawˬ gʼa ve yoˬ. Ha kʼaˉ ve hkʼaw yaw ve tawˇ lehˬ na˗e la piˇ gʼa ve yoˬ. (Tawˇ naˉ ve 12:18)  Ngaˬ hui ve tawˇ hkawˇ yawˇ nyi ma sha tuˬ te piˇ leh awˬ gʼaˇ piˇ gʼa tuˬ, Yaˬhoˉvaˬ ga laˇ tuˬ bon lawˬ sheˍ. Chi hkʼoˆ kaꞈ, Yaˬhoˉvaˬ ve tawˇ hkawˇ yawˇ htaꞈ ga piˇ gʼa jaˇ tehꞈ ngaˬ hui tawnˇ taˍ cawˇ ve yoˬ.—Heˍbrehˇ 4:12.

20. Chaw teˇ hpaˍ yaˇ ehˉ htaˇ haiˬ ve gʼa hpuˇ ve pa taw, hkʼaˬ hkʼe dawˇ gʼa ve le? Ngaˬ hui yawˇ htaꞈ hkʼaˬ hkʼe shiˍ tcuh gaˇ ve le?

²⁰ Chaw teˇ hpaˍ yaˇ ehˉ htaˇ haiˬ ve gʼa hpuˇ ve kʼo, awˬ hpfuhˇ maˇ cawˬ leh shu haꞈ laˇ maˇ gʼa taˬ tehꞈ dawˇ la ve yoˬ. Yaꞈ hkʼaˇ, chi awˬ tehˬ maˇ heˆ! Liꞈ hpu htaꞈ cuˇ leh yawˇ hui Yaˬhoˉvaˬ mehˆ gʼuˇ suhˍ awˬ hpfuhˇ hkʼaˆ jaˇ tehꞈ yawˇ htaꞈ shiˍ tcuh cawˇ ve yoˬ. (Awˇ ceˍ awˇ fa “ Liꞈ hpu awˬ tawn awˬ gʼaˇ peꞈ laˇ ve” htaꞈ nyi sheˍ.) Tcuh kaˍ paˍ Daˍyeˍlaˆ awˬ gʼaˇ nuˇ htaˇ, mvuhˇ naw ma tcuh yaˇ ha kʼaˉ ve hkʼaw awˬ gʼaˇ hkʼaˬ hkʼe piˇ ve kaꞈ tawnˇ taˍ sheˍ. Daˍyeˍlaˆ awˬ hpfuhˇ hkʼaˆ jaˇ ve tehꞈ Yaˬhoˉvaˬ yawˇ htaꞈ shiˍ tcuh gaˇ ve yoˬ. (Daˍyeˍlaˆ 10:2, 11, 19) Awˬ viˉ awˬ nyi nyi ma luˬ chehˇ ve chaw htaꞈ kaꞈ Yaˬhoˉvaˬ hkʼa shuˍ dawˇ ve yoˬ!

21. Te yaꞈ ve chaw venˇ baˆ maˇ dawˇ hpfuhˆ ve kʼo, awˬ gʼuˇ suhˍ hpawˇ yawˇ hui hkʼaˬ hkʼe hpehꞈ tuˬ le? Awˬ yanˇ oˇ ve hkʼa gaˬ ngaˬ hui aˬ htoꞈ ma te gaˇ ve le?

²¹ Ngaˬ hui shu htaꞈ awˬ gʼaˇ piˇ htaˇ, Yaˬhoˉvaˬ haꞈ pehnˇ ve htaꞈ yawˇ dawˇ nyi tcuh gaˇ ve yoˬ. Yaˬhoˉvaˬ lehˬ hteˇ ve cawˇ ve Gʼuiˬ sha kaꞈ hpehꞈ ve yoˬ. Shu maˇ shiˍ ve htawˇ, haiˬ ve gʼa hpuˇ jaw ve teˇ gʼaˇ le le htaꞈ yawˇ shiˍ ve yoˬ. Yaˬhoˉvaˬ lehˬ hkʼa peu˗eˬ htaꞈ mawˬ leh, te yaꞈ ve chaw venˇ baˆ maˇ dawˇ hpfuhˆ ve kʼo ciˍ yanˍ piˇ tuˬ yoˬ. (Heh puiˉ hkʼaw 14:18) Yaˇ ehˉ htaˇ pehꞈ ve tzuhˆ ve hpawˇ naˬ taweh te piˇ ve gʼa hpuˇ ve chaw htaꞈ haꞈ pehnˇ ve hkʼaw hkʼa dehꞈ ga piˇ sheˍ. Saˍtanˍ ve miˬ guiˬ lo haiˬ ve gʼa hpuˇ ve chaw nyi ma luˬ ve teˇ gʼaˇ le le htaꞈ awˬ gʼuˇ suhˍ hpawˇ Yaˬhoˉvaˬ gu na˗e piˇ tuˬ yoˬ! Maˇ maw ve awˬ yanˇ, chi hkʼe ve htaꞈ teˇ gʼaˇ˗ehꞈ kaꞈ dawˇ nawˇ tuˬ ve maˇ heˆ.—Iˉsaˍyaˆ 65:17.