Eˇjiˇtuꞈ chaw liꞈ bvuhꞈ tuˬ awˬ pon lo cehˬ htaꞈ yehˇ ve tehꞈ laiˉ gʼaˇ shiˍ ve yoˬ. Heˍlaˍsaˆ chaw leh Roˉmaꞈ chaw kaꞈ lo cehˬ te taˍ ve liꞈ kʼoˆ htaꞈ yehˇ ve yoˬ. * Yaꞈ hkʼaˇ, lo cehˬ lehˬ liꞈ bvuhꞈ tuˬ ve liꞈ kʼoˆ ceh te ve maˇ heˆ tehꞈ chaw yaˇ hkʼa dehꞈ maˇ shiˍ. Haw loꞈ kʼoˍ kaꞈ te ve yoˬ.

Ponˬ taˉ ve 2,500 hkʼawꞈ hpaˆ htaˇ, tcuh kaˍ paˍ Iˉsaˍyaˆ bvuhꞈ taˍ ve, “Ehˇtaˍyoˇpiˆ iˉ kaˆ lawˬ coˇ paˉ” lo chehˇ ve chaw “awˬ tan te shehˍ hpaˇ teˇ hpaˍ lehˬ, lo cehˬ yuˬ te taˍ ve haw loꞈ kʼoˍ htaꞈ ciˇ leh” kʼai ve yoˬ. Peuˬ leh, Yeˍraˍmiˆ kaꞈ tcuh kaˍ paˍ tawˇ hkawˇ kʼoˆ taˍ ve, Meˍdiˆ chaw leh Paˇshaˇ chaw Baˍbuˍlonˍ venˇ htaꞈ bawˆ la htaˇ, Baˍbuˍlonˍ chaw hpaw˗e maˇ gʼa tuˬ yawˇ hui ve “lo cehˬ yuˬ te taˍ ve haw loꞈ kʼoˍ” htaꞈ tuˉ baˬ piˇ ve yoˬ.—Iˉsaˍyaˆ 18:1, 2; Yeˍraˍmiˆ 51:32.

Liꞈ hpu lehˬ Gʼuiˬ sha dawˇ pawnˍ piˇ taˍ ve yoˬ. Liꞈ hpu ve awˬ co˗e htaˇ, lo cehˬ yuˬ leh haw loꞈ kʼoˍ te taˍ ve tehꞈ oˇ htaˇ teˇ co˗e ve chaˬ nyi paˍ shaˉ hkiˆ hpeuꞈ maw laˇ ve pa taw, Liꞈ hpu henˇ ve chaw anˇ tuˬ maˇ loˍ. (2 Tiˆmoˉseˍ 3:16) Leh oˇ htaˇ teˇ co˗e ve chaˬ nyi paˍ shaˉ hkiˆ awˬ tehˬ mawˬ ve laˇ? Mawˬ ve yoˬ. Eˇjiˇtuꞈ chaw haw loꞈ kʼoˍ te tuˬ lo cehˬ htaꞈ yehˇ ve tehꞈ yawˇ hui shaˉ hkiˆ mawˬ ve yoˬ.

Eˇjiˇtuꞈ chaw ve tuˍ hpfuh awˬ hkʼoˆ lo awˬ han shawehˇ taˍ ve leh suhˆ htawˆ taˍ ve awˬ han lehˬ oˇ htaˇ teˇ co˗e lo cehˬ yuˬ leh haw loꞈ kʼoˍ te taˍ ve tehꞈ kʼoˆ laˇ taˍ ve yoˬ. Hawˉ hkʼaˆ lo cehˬ chaw leh awˬ kʼaꞈ awˬ kʼaꞈ te tsuhꞈ leh teˇ kʼaꞈ leh teˇ kʼaꞈ yuˬ pawnˇ daꞈ leh tsuhꞈ ve yoˬ. Lo cehˬ shehˆ ceˬ shehˆ hpawˇ te tsuhꞈ leh yeˬ jaˇ. Liꞈ kʼoˆ teˇ kʼoˆ hkʼaw kʼoˆ ve, lo cehˬ yuˬ leh te taˍ ve haw loꞈ kʼoˍ lehˬ zuhˬ hpawˇ 17 meˆ cawˬ ve yoˬ. Gʼawehˆ tuˬ ve caˉ behˆ kaꞈ teˇ hpawˇ ve 10 maˬ maˇ heˆ leh 12 maˬ cawˬ ve yoˬ.

Eˇjiˇtuꞈ iˉ kaˆ lawˬ paˇ lo, lo cehˬ tawˆ la maˇ jaˇ. Chi hkʼoˆ kaꞈ, lo cehˬ yuˬ leh haw loꞈ kʼoˍ te ve kaꞈ sha ve yoˬ. Peuˬ hkʼawꞈ nawˉ, haw loꞈ kʼoˍ lonˉ te tuˬ chaw yaˇ suhˆ htaꞈ tanˬ yehˇ ve htawˇ, ngaˇ ca paˍ leh shaˍ bawˆ paˍ lehˬ ciˇ tuˬ ve pehˇ leh haw loꞈ kʼoˍ ehˉ lo cehˬ yuˬ leh te yehˇ sheˍ ve yoˬ.

Lo cehˬ yuˬ te taˍ ve haw loꞈ kʼoˍ htaꞈ laiˉ gʼaˇ laiˉ hkʼawꞈ yehˇ ve yoˬ. Heˍlaˍsaˆ chaw liꞈ bvuhꞈ paˍ Pon˗htanˍ 200 hkʼawꞈ htaˇ a shaꞈ teꞈ chehˇ jaw ve kʼoˆ ve, yawˇ ve awˬ co˗e htaˇ ve chaw lo cehˬ yuˬ leh haw loꞈ kʼoˍ te taˍ ve htaꞈ yehˇ chehˇ sheˍ ve yoˬ.