Oˇ teˇ haˉ, ngaˬ ve a shaꞈ teꞈ hkʼaˇ htaꞈ pa laˇ jaˇ. Awˬ lawn kʼo, ngaˬ Gʼuiˬ sha htaꞈ shiˍ gaˇ tuˬ te laˇ ve yoˬ. Oˇ ve hkʼawꞈ nawˉ, aˬ htoꞈ ma kʼawꞈ hpehꞈ la ve kʼawꞈ kʼoˆ maˍ laˇ gaˇ ve yoˬ. Ngaˬ yaˇ ehˉ htaˇ a shaꞈ teꞈ hkʼaˇ hkʼaˬ hkʼe kʼai ve leh ngaˬ Gʼuiˬ sha htaꞈ shiˍ gaˇ tuˬ te laˇ ve kʼoˆ maˍ laˇ shaˍ.

Hpaˉlanˍ mvuhˇ miˬ awˬ na hpawˇ Geh˗neh venˇ lo ngaˬ 1937 hkʼawꞈ htaˇ paw ve yoˬ. Ngaˬ pa haˉ pui naˆ duˇ kuiˬ lo kanˉ te ve yoˬ. Ngaˬ pa kanˉ te hkeuꞈ ve htaꞈ awˬ hpfuhˇ shiˍ tuˬ maˍ laˇ leh maˇ hteˇ maˇ cawˇ ve htaꞈ nyi bawˬ tuˬ maˍ laˇ ve yoˬ. Haˉ pui naˆ kanˉ te kuiˬ lo laiˉ gʼaˇ htaꞈ maˇ hteˇ maˇ cawˇ te piˇ leh kawˆ tuˬ cawˬ kuiˬ lo kaꞈ kanˉ te tcuh ve htaꞈ ngaˬ pa gʼa mawˬ ve yoˬ. Yawˇ hui htaꞈ ga piˇ tuˬ haˉ pui naˆ lo kanˉ te ve chaw hteˇ ve cawˇ ve gʼa tuˬ awˬ pon ngaˬ pa awˬ moˍ chi hkʼaw loꞈ˗e leh tawˍ daꞈ ve yoˬ. Chi hkʼoˆ kaꞈ, ngaˬ pa chehˇ kuiˬ awˬ paˇ lo bon awˬ hoˉ teˇ hpaˍ teˇ gʼaˇ geh kʼo teˇ ceuˬ te ve pa taw, maˇ dawˇ cawˇ ve yoˬ. Bon awˬ hoˉ chi teˇ hpaˍ kanˉ maˇ te leh hkʼa dehꞈ gʼa caˇ ve htawˇ, haˉ pui naˆ kanˉ te kuiˬ lo ve chaw caˇ tuˬ maˇ cawˬ ve chaw geh kaꞈ yawˇ hui caˇ tuˬ leh hpu ca lawˬ˗e ve yoˬ. Ngaˬ pa bon awˬ hoˉ teˇ hpaˍ htaꞈ nyi bawˬ jaˇ leh ngaˬ pa bon awˬ lawn kaꞈ ngaˬ htaꞈ maˇ maˍ laˇ jaw. Ngaˬ hui Gʼuiˬ sha ve awˬ lawn kaꞈ maˇ yaw daꞈ jaw ve yoˬ.

 Ngaˬ uiˍ la˗oˬ htaˇ, ngaˬ kaꞈ maˇ hteˇ maˇ cawˇ ve htaꞈ nyi bawˬ ve yoˬ. Ngaˬ maˇ dawˇ cawˇ ve teˇ ceuˬ lehˬ, chaw teˇ hpaˍ kʼo Hpaˉlanˍ mvuhˇ miˬ lo buiˇ shaˆ aˉ naˆ chaw ca chehˇ la ve htaꞈ nyi cha ve yoˬ. Yaꞈ hkʼaˇ, ngaˬ yawˇ hui ve yaˇ geh bawˉ shiˍ leˍ guiˇ ve dawˇ cawˇ ve yoˬ. Chi hkʼoˆ kaꞈ, ngaˬ e Poˬlan chaw hpehꞈ ve yoˬ. Hkʼe te leh, ngaˬ teˇ chaw ceuˬ le le htaꞈ gawˬ lehˍ ve hkʼaw chehˇ tcuh gaˇ leh hkʼa shuˍ˗ehˬ hpehꞈ tcuh gaˇ ve yoˬ.

1957 hkʼawꞈ htaˇ ngaˬ maꞈ yaˇ te tuˬ kuˬ laˇ ve yoˬ. Hkʼe te leh, chi awˬ gʼuˇ suhˍ htaˇ kʼoˆ kʼai peuˬ ve hkʼe Ehˬgiˇriˇ˗aˇ hkʼaw hkʼoˆ teˇ tawn lo ca chehˇ˗e ve yoˬ. “Oˇ Gʼuiˬ sha˗oˬ! Ngaˬ htaꞈ ga laˇ˗oˆ!” kʼoˆ peuˬ hkʼawꞈ nawˉ, ngaˬ mawˬ ve awˬ ceuˬ lehˬ awˬ nu ve canˇ paˍ maꞈ yaˇ maˇ heˆ law. Piˉ laˬ teˇ hkeh hpehꞈ ve yoˬ. Ngaˬ ha lehˬ jaˇ. Maꞈ bawˆ daꞈ ve leh oˇ teˇ haˉ hpehꞈ la ve awˬ ceuˬ ngaˬ a shaꞈ htaꞈ caˉ daꞈ ve hkʼa dehꞈ dawˇ nyi tuˬ te laˇ ve yoˬ. Ngaˬ hui aˬ htoꞈ ma te paw la ve le? Gʼuiˬ sha ngaˬ hui htaꞈ awˬ tehˬ a yeˇ yuˬ laˇ˗aw laˇ? Leh ngaˬ hui co co taiˍ taiˍ ha lehˬ ve cawˬ tuˬ hpehꞈ kʼai gʼa˗aw laˇ? Chi teˇ hpaˍ htaꞈ ngaˬ shiˍ gaˇ ve yoˬ.

Ngaˬ ngaˬ pa ngaˬ e geh ca guiˇ la htaˇ, ngaˬ Yaˬhoˉvaˬ ve Shaˉhkiˆhkanˍ ve chaw teˇ gʼaˇ htaꞈ gʼa mawˬ daꞈ ve yoˬ. Hpaˉlanˍ ve tawˇ hkawˇ Caˬbuˉ yuˬ tawˆ taˍ ve Liꞈ hpu teˇ kʼoˆ yawˇ ngaˬ htaꞈ peꞈ laˇ ve yoˬ. Ngaˬ Ehˬgiˇriˇ˗aˇ lo kʼoꞈ˗e htaˇ, Liꞈ hpu tanˬ gʼaw ve yoˬ. Ngaˬ jehˇ leh dawˇ nyi tuˬ te laˇ ve, Liꞈ hpu awˬ tawn lehˬ Hpeuꞈ maˍ ve liꞈ 21:3, 4 yoˬ. Chi teˇ tawn hkʼaw kʼoˆ ve, ‘Gʼuiˬ sha ve chehˇ kuiˬ chaw yaˇ hui geh cawˬ leh yawˇ lehˬ, yawˇ hui ve mehˆ gʼuiˬ hkʼa peu˗eˬ htaꞈ shiˆ baˬ piˇ tuˬ yoˬ. Suh ve teˇ ceuˬ maˇ kʼawꞈ cawˬ. Dawˇ haˍ ve, paˆ hawˬ ve, naˬ ve, awˬ ceuˬ chi teˇ hpaˍ htawˇ maˇ kʼawꞈ cawˬ.’ * Chi hkʼe ve ngaˬ maˇ kaˇ jaw ve yoˬ. ‘Awˬ lawn chi hpehꞈ kʼai maˇ gʼa taˬ’ tehꞈ ngaˬ dawˇ ve yoˬ. Oˇ ve teˇ yanˇ Gʼuiˬ sha leh Liꞈ hpu htaꞈ ngaˬ maˇ shiˍ ve yoˬ.

1959 hkʼawꞈ ngaˬ maꞈ yaˇ te peuˬ hkʼawꞈ nawˉ, ngaˬ Shaˉhkiˆhkanˍ ve chaw Fan˗chu˗aw htaꞈ mawˬ daꞈ ve yoˬ. Yawˇ Liꞈ hpu hkʼaw awˬ tehˬ ve ngaˬ htaꞈ laiˉ ceuˬ maˍ laˇ ve yoˬ. Tawˇ pa haˉ te kʼo, Liꞈ hpu hkʼaw Gʼuiˬ sha ve awˬ meh Yaˬhoˉvaˬ meh ve tehꞈ maˍ laˇ ve yoˬ. (Chiˇ mvuh ve 83:18) Yaˬhoˉvaˬ miˬ guiˬ chi hkʼoˆ lo hteˇ ve cawˇ ve cawˬ tcuh tuˬ te leh, miˬ guiˬ hkʼoˆ lo Paˍraˍdiˇsuˆ hpehꞈ la tcuh tuˬ te leh, Hpeuꞈ maˍ liꞈ ve 21:3, 4 hkʼaw awˬ tehˬ hpehꞈ la tcuh tuˬ yoˬ tehꞈ, yawˇ ngaˬ htaꞈ kʼoˆ maˍ laˇ ve yoˬ.

Maˍ laˇ ve tawˇ hkawˇ chi teˇ hpaˍ htaꞈ ngaˬ dawˇ cawˇ jaˇ. Na nyi kʼo daꞈ leh awˬ bon cawˬ ve yoˬ. Caˬbuˉ awˬ hoˉ hui maˍ ve Liꞈ hpu hkʼaw maˇ hawˍ daꞈ ve pa taw, ngaˬ yawˇ hui htaꞈ deˇ gaˇ jaˇ. Oˇ ve teˇ yanˇ ngaˬ ngaˬ pa hkʼe dawˇ ve pa taw, ngaˬ law maˇ gʼaˇ leh maˇ hteˇ maˇ cawˇ ve htaꞈ laꞈ haˉ gu gaˇ ve yoˬ.

Fan˗chu˗aw leh awˬ viˉ awˬ nyi leh awˬ chawˇ awˬ suhˉ ngaˬ nyi ma gawˬ lehˍ cawˬ tuˬ ga laˇ ve yoˬ. Yawˇ hui kʼoˆ laˇ ve, shu htaꞈ dawˇ cheˆ piˇ ve lehˬ ngaˬ hui ve awˬ vuiˬ maˇ heˆ. Yaꞈ hkʼaˇ, Gʼuiˬ sha ve mvuhˇ miˬ dawˇ law kuiˬ shu htaꞈ kʼoˆ maˍ piˇ ve lehˬ, ngaˬ hui ve awˬ vuiˬ hpehꞈ ve yoˬ. Chi lehˬ Yeˍsuˆ te ve kanˉ hpehꞈ leh awˬ laꞈ gʼawˇ hui kaꞈ kanˉ chi ve te tuˬ awˬ vuiˬ piˇ ve yoˬ. (Maꞈhtehˍ 24:14; Luˉkaꞈ 4:43) Ngaˬ shu htaꞈ hkʼaˬ hkʼe yaw tuˬ gʼa henˇ ve yoˬ. Yawˇ hui yonˍ ve awˬ ceuˬ htaꞈ ngaˬ maˇ yonˍ ve htawˇ, ngaˬ yawˇ hui htaꞈ tawˇ daꞈ daꞈ gʼa yaw piˇ ve yoˬ. Liꞈ hpu hkʼaw kʼoˆ ve, ‘Jawˇmawˇ Yeˍsuˆ ve awˬ ceˬ lehˬ, deˇ daꞈ yaꞈ daꞈ ve chaw maˇ gʼa hpehꞈ. Yawˇ lehˬ, nyi ma nuˇ nehˬ ve chaw gʼa hpehꞈ ve yoˬ.’—2 Tiˆmoˉseˍ 2:24.

Awˬ leh meuˇ htaˇ, ngaˬ ve te hkʼaˇ dawˇ hkʼaˇ pa gʼa leh 1959 hkʼawꞈ htaˇ hpawnˬ daꞈ lonˉ teˇ nyi hkʼaw ngaˬ Baˆtiˆsaˬ haꞈ yuˬ leh, Yaˬhoˉvaˬ ve Shaˉhkiˆhkanˍ ve  chaw hpehꞈ la ve yoˬ. Hpawnˬ daꞈ ve chi ve hkʼaw awˬ viˉ awˬ nyi yaˇ miˇ En˗cen htaꞈ ngaˬ mawˬ daꞈ ve yoˬ. Ngaˬ yawˇ htaꞈ awˉ lawˉ teˇ pawˆ mawˬ daꞈ htaˇ kaꞈ dawˇ cawˇ jaˇ. Peuˬ leh yawˇ chehˇ ve Hkriꞈ yaˇ awˬ moˍ hkʼaw ngaˬ ca hpawnˬ daꞈ˗e ve yoˬ. Leh 1960 hkʼawꞈ gaˬ leh ngaˬ hui heuˆ daꞈ ve yoˬ. Yawˇ lehˬ daꞈ jaˇ ve awˬ miˇ ma hpehꞈ leh Yaˬhoˉvaˬ geh gʼa ve awˬ hpfuhˇ hkʼaˆ jaˇ ve laꞈ shawnˍ hpehꞈ ve yoˬ.—Tawˇ naˉ ve 19:14.

Awˬ viˉ awˬ nyi cuˇ yiˍ cawˬ leh hpehꞈ laˬ jaw ve awˬ lawn cawˬ ve laiˉ gʼaˇ geh, laiˉ hkʼawꞈ ve awˬ yanˇ hkʼaw a yeˇ uiˍ ve awˬ ceuˬ laiˉ ceuˬ gʼa henˇ ve yoˬ. A yeˇ uiˍ jaˇ ve teˇ ceuˬ lehˬ, haˍ jaˇ ve awˬ vuiˬ htaꞈ te gʼa tuˬ ngaˬ hui nyi ma nuˇ nehˬ leh Tawˇ naˉ ve liꞈ 15:22 hkʼaw beˆ maˍ laˇ taˍ ve htaꞈ gʼa gʼaꞈ te ve yoˬ. Oˇ kaˬ lo kʼoˆ ve, “ca gʼa ve hkʼe daꞈ ve dawˇ hkʼaˇ htaꞈ ca˗o. Nawˬ uiˍ la daꞈ la tuˬ yoˬ.”

1964 hkʼawꞈ gaˬ leh Liꞈ hpu awˬ tawn oˇ ve awˬ tehˬ hpehꞈ la ve htaꞈ ngaˬ shiˍ la ve yoˬ. Oˇ ve teˇ hkʼawꞈ htaˇ ngaˬ toˇ nyi shehˍ hpaˇ tanˬ te ve yoˬ. Awˬ viˉ awˬ nyi htaꞈ awˬ gʼaˇ piˇ tuˬ leh yawˇ hui ve yonˍ hkʼaˇ yonˍ yeˬ la tuˬ, ngaˬ Hkriꞈ yaˇ awˬ moˍ teˇ hpaˍ hkʼaw ca guiˇ˗e ve yoˬ. Oˇ ve teˇ yanˇ ngaˬ 27 hkʼawꞈ ceh sheˍ leh awˬ lawn hkʼa dehꞈ maˇ shiˍ sheˍ ve pa taw, laiˉ ceuˬ te yaꞈ ve yoˬ. Chi hkʼe hpehꞈ ve htawˇ, te yaꞈ ve awˬ ceuˬ ngaˬ htaꞈ kʼawꞈ maˍ laˇ ve yoˬ. A yeˇ uiˍ jaˇ ve lehˬ, ‘ca gʼa ve hkʼe daꞈ ve dawˇ hkʼaˇ htaꞈ ca ve’ cuˇ yiˍ leh hpehꞈ laˬ jaw ve awˬ lawn chi ve teˇ hpaˍ ngaˬ htaꞈ maˍ laˇ ve yoˬ.

Ngaˬ toˇ nyi shehˍ hpaˇ te ve maˇ maw sheˍ htaˇ ve htaꞈ dawˇ nawˇ ve yoˬ. Pehˇriˆ venˇ hkʼaw ve Hkriꞈ yaˇ awˬ moˍ teˇ hpaˍ geh ngaˬ ca guiˇ˗e htaˇ, awˬ viˉ awˬ nyi hpehꞈ laˬ jaw ve awˬ lawn cawˬ maˇ jaˇ ve teˇ gʼaˇ ngaˬ geh tawˇ yaw daꞈ gaˇ ve yoˬ. Ngaˬ kʼoˆ piˇ ve, “eˬ hpehꞈ˗aw.”

Yawˇ na laˇ ve “Lon˗iˉ˗oˬ, maˇ˗awˍ ve kʼo saˍ laꞈ gʼonˍ a shu geh ca guiˇ˗e ve le?”

Ngaˬ hkʼawꞈ piˇ ve “chaw naˬ geh yoˬ.”

Yawˇ kʼoˆ ve, “yoˬ. Nawˬ nyi haꞈ shaˉ paˍ yonˍ hkʼaˇ yonˍ yeˬ ve chaw geh awˬ chawˇ te ve ngaˬ mawˬ ve yoˬ. Yaꞈ hkʼaˇ, ngaˬ hui ve Hkriꞈ yaˇ awˬ moˍ hkʼaw awˬ viˉ awˬ nyi awˬ gʼaˇ nuˇ ve, awˬ viˉ awˬ nyi awˬ suhˉ, leh awˬ viˉ awˬ nyi yaꞈ taw puiˉ ve chaw kaꞈ cawˬ ve yoˬ. Nawˬ yawˇ hui geh awˬ chawˇ te ve leh yawˇ hui ve aˉ hkʼaw lo awˍ caˇ˗e ve kʼo, yawˇ hui awˬ gʼaˇ gʼa jaˇ tuˬ yoˬ hehˉ.”

Awˬ viˉ awˬ nyi chi teˇ gʼaˇ beˆ maˍ piˇ ve awˬ bon cawˬ jaˇ leh awˬ hpfuhˇ hkʼaˆ jaˇ. Yawˇ Yaˬhoˉvaˬ ve yawˬ htaꞈ haꞈ jaˇ ve, ngaˬ dawˇ cawˇ jaˇ. Ngaˬ awˬ to te yaꞈ ve tehꞈ haꞈ yuˬ tuˬ haˍ jaˇ ve htawˇ, yawˇ beˆ maˍ laˇ ve htaꞈ ngaˬ laꞈ haˉ gʼaꞈ te ve yoˬ. Awˬ viˉ awˬ nyi daꞈ ve chi hkʼe cawˬ ve ngaˬ Yaˬhoˉvaˬ htaꞈ awˬ bon uiˍ jaˇ.

1969 hkʼawꞈ te leh 1973 hkʼawꞈ htaˇ, Pehˇriˆ venˇ hkʼaw laiˉ mvuhˇ miˬ lo laˬ ve hpawnˬ daꞈ lonˉ caˇ tuˬ dawˬ tuˬ  hpawˇ ngaˬ htaꞈ nyi haꞈ shaˉ tcuh laˇ ve yoˬ. 1973 hkʼawꞈ 5 nyi ve hkʼaw chaw 60,000 gʼaˇ hpaˆ htaꞈ caˇ tuˬ dawˬ tuˬ gʼa te caˍ piˇ ve yoˬ. Oˇ ve teˇ yanˇ, ngaˬ hui hkʼaˬ hkʼe te tuˬ dawˇ maˇ tawˆ. Yaꞈ hkʼaˇ, chi ve kaꞈ teˇ pawˆ Tawˇ naˉ ve liꞈ 15:22 hkʼaw beˆ maˍ laˇ taˍ ve hkʼe, ca gʼa ve hkʼe daꞈ ve dawˇ hkʼaˇ ca ve awˬ tehˬ yehˇ gʼa ve htaꞈ ngaˬ gʼa mawˬ ve yoˬ. Awˬ viˉ awˬ nyi awˬ chiˇ te jaw ve chaw ngaˬ htaꞈ beˆ maˍ laˇ tuˬ lawˬ ve yoˬ. Yawˇ hui shaˍ hawˇ ve, gʼawˇ caˉ ti ve, awˬ chiˇ te ve, leh mawˇ vuiˬ ve chaw kaꞈ cawˬ ve yoˬ. Haˍ jaˇ ve kanˉ chi te gʼa ve ngaˬ hui ga daꞈ ve pa taw yoˬ.

1973 hkʼawꞈ ngaˬ leh ngaˬ miˇ ma Hpaˉlanˍ mvuhˇ miˬ Beˍteˍlaˆ hkʼaw kanˉ te tuˬ kuˬ laˇ ve yoˬ. Ngaˬ ve awˬ vuiˬ awˉ lawˉ teˇ ceuˬ lehˬ haˍ jaˇ ve kanˉ hpehꞈ ve yoˬ. Keˬmaˬronˇ mvuhˇ miˬ lo awˬ viˉ awˬ nyi htaꞈ liꞈ kʼoˆ feu piˇ gʼa tuˬ ngaˬ awˬ hkʼaˇ gʼa ca ve yoˬ. 1970 hkʼawꞈ te leh 1993 hkʼawꞈ hkʼa gaˬ, oˇ kaˬ lo ngaˬ hui ve kanˉ te tuˬ a hkaw˗anˬ maˇ peꞈ laˇ. Hkʼaˬ hkʼe te tuˬ maˇ shiˍ ve teˇ pawˆ kʼawꞈ gʼa hpuˇ ve yoˬ. Ngaˬ hkʼaˬ hkʼe dawˇ ve awˬ tcuhˆ puiˍ lo ve nyi haꞈ shaˉ paˍ nyi mawˬ leh ngaˬ htaꞈ awˬ gʼaˇ peꞈ laˇ leh kʼoˆ ve, “Keˬmaˬronˇ mvuhˇ miˬ lo awˬ viˉ awˬ nyi meuꞈ jehˇ chehˇ ve yoˬ. Co ha hpawˇ ve caˇ tuˬ yawˇ hui htaꞈ feu piˇ gʼa tuˬ teˇ geh gʼa ga daꞈ la sheˍ.”

Keˬmaˬronˇ mvuhˇ miˬ awˬ paˇ awˬ kui lo cawˬ ve mvuhˇ miˬ teˇ hpaˍ hkʼaw ngaˬ kʼai leh Keˬmaˬronˇ mvuhˇ miˬ lo ve nyi haꞈ shaˉ paˍ teˇ hpaˍ hpaˍ htaꞈ mawˬ daꞈ tuˬ miˬ tcuhˉ lo tinˍ daꞈ ve yoˬ. Yawˇ hui cuˇ yiˍ cawˬ leh haꞈ hanˉ jaˇ. Keˬmaˬronˇ mvuhˇ miˬ lo hkʼaˬ htaˆ kaꞈ liꞈ kʼoˆ feu piˇ gʼa tuˬ yawˇ hui awˬ hkʼaˇ gʼa ca laˇ ve yoˬ. Yaˬhoˉvaˬ ngaˬ hui htaꞈ awˬ bon naꞈ laˇ jaˇ. Keˬmaˬronˇ mvuhˇ miˬ hkʼaw 20 hkʼawꞈ ve awˬ yanˇ awˬ hkʼaw lo awˬ viˉ awˬ nyi Shaw nyi kuiˬ Taꞈ yehˬ leh Gʼuiˬ sha ve mvuhˇ miˬ kanˉ te ve liꞈ kʼoˆ hkʼaˬ htaˆ kaꞈ gʼa ve yoˬ.

Ngaˬ leh En˗cen tanˬ maˆ daꞈ htaˇ, yawˇ Yaˬhoˉvaˬ geh meuˆ daꞈ jaˇ ve tehꞈ te hkʼaˇ dawˇ hkʼaˇ daꞈ ve laiˉ ceuˬ ngaˬ mawˬ tuˬ te laˇ ve yoˬ. Leh ngaˬ hui heuˆ daꞈ peuˬ hkʼawꞈ nawˉ kaꞈ, awˬ lawn chi hkʼa tawˍ lehˆ gʼa mawˬ tuˬ te laˇ sheˍ ve yoˬ. Ngaˬ hui heuˆ daꞈ ve teˇ nyi mvuhˇ hpeuꞈ la htaˇ, ngaˬ hui Yaˬhoˉvaˬ ve kanˉ te gʼa ve hkʼe te tuˬ yawˇ ngaˬ htaꞈ bon lawˬ tcuh laˇ ve yoˬ. Leh Yaˬhoˉvaˬ kaꞈ ngaˬ hui ve bon lawˬ hkawˇ htaꞈ hkʼawꞈ laˇ ve yoˬ.

 Chi hkʼe ceh maˇ heˆ. Ngaˬ Yaˬhoˉvaˬ htaꞈ gʼaˇ hkʼa dehꞈ va tuˬ kaꞈ En˗cen ga laˇ ve yoˬ. Tawˇ pa haˉ te kʼo, 1973 hkʼawꞈ htaˇ, ngaˬ hui Beˍteˍlaˆ lo laˬ tuˬ kuˬ laˇ ve yoˬ. Ngaˬ toˇ nyi shehˍ hpaˇ te ve htaꞈ dawˇ cawˇ jaˇ ve pa taw, awˉ lawˉ htaˇ ngaˬ htawˇ dawˇ nawˬ dawˇ cawˬ ve yoˬ. Yaꞈ hkʼaˇ, En˗cen ngaˬ htaꞈ kʼoˆ laˇ ve, ngaˬ hui ve awˬ to Yaˬhoˉvaˬ htaꞈ chiˇ aꞈ piˇ˗oˬ ve mehˍ. Gʼuiˬ sha ve kanˉ hkʼaˇ ngaˬ hui htaꞈ te tcuh laˇ ve teˇ ceuˬ le le ngaˬ hui te cawˇ ve maˇ heˆ laˇ? (Heˍbrehˇ 13:17) Yawˇ chi hkʼe kʼoˆ htaˇ, ngaˬ hkʼaˬ hkʼe te yawˇ htaꞈ kʼawꞈ kʼoˆ hkʼawꞈ gʼa tuˬ le? Hkʼe te leh, ngaˬ huiˉ maˬ Beˍteˍlaˆ lo kʼai ve yoˬ. Ngaˬ ve awˬ miˇ ma cuˇ yiˍ cawˬ ve, awˬ hkʼaˇ ca puiˉ ve, leh Yaˬhoˉvaˬ htaꞈ haꞈ jaˇ. Te hkʼaˇ dawˇ hkʼaˇ chi ve teˇ hpaˍ htaꞈ pa taw, ngaˬ huiˉ maˬ meuˆ daꞈ leh ha lehˬ jaˇ. Leh ngaˬ huiˉ maˬ teˇ geh chehˇ ve awˬ yanˇ laiˉ hkʼawꞈ ve hkʼaw dawˇ cheˆ ve daꞈ jaˇ.

Chi teˇ hkui ngaˬ huiˉ maˬ mawˇ˗oˬ ve htawˇ En˗cen daꞈ ve awˬ miˇ ma hpehꞈ sheˍ leh ngaˬ htaꞈ ga laˇ gʼa jaˇ. Gʼuiˬ sha ve kanˉ hkʼaˇ liꞈ henˇ yehˬ laiˉ kaˬ lo Kaˇlaˇ hkawˇ henˇ ve yoˬ. Ngaˬ leh En˗cen kaꞈ coˇ caˇ leh Kaˇlaˇ hkawˇ henˇ leh oˇ ve teˇ yanˇ 70 hkʼawꞈ hpaˆ gaˬ˗oˬ ve htawˇ, Kaˇlaˇ ve Hkriꞈ yaˇ awˬ moˍ hkʼaw chehˇ˗e tuˬ jiˆ kʼai ve yoˬ. Hpaˉlanˍ mvuhˇ miˬ awˬ tcuhˆ puiˍ ngaˬ Kawˍ miˍ tiˍ ve kanˉ te ve pa taw, gʼa te cawˇ ve awˬ vuiˬ laiˉ ceuˬ cawˬ ve yoˬ. Awˬ nu ve teˇ chaw ceuˬ tawˇ hkawˇ kʼawꞈ henˇ htaˇ sha ve maˇ heˆ. Yaꞈ hkʼaˇ, ngaˬ huiˉ maˬ ga daꞈ ve yoˬ. Chi teˇ hkui ngaˬ hui 80 hkʼawꞈ hpaˆ˗oˬ. Ngaˬ hui Kaˇlaˇ ve Hkriꞈ yaˇ awˬ moˍ hkʼaw chehˇ sheˍ. Yaꞈ hkʼaˇ, hpawnˬ daꞈ tuˬ gu htaˇ ngaˬ hui Hpaˉlanˍ ve liꞈ kaꞈ nyi sheˍ ve yoˬ. Hkriꞈ yaˇ awˬ moˍ hkʼaw ngaˬ hui awˬ gʼaˇ piˇ daꞈ leh Hkriꞈ yaˇ awˬ moˍ hkʼaw hto toˇ ve kaꞈ te gʼa ve hkʼe te ve yoˬ. Ngaˬ hui Kaˇlaˇ ve liꞈ henˇ ve coˇ caˇ jaˇ leh Yaˬhoˉvaˬ awˬ bon naꞈ laˇ ve htaꞈ gʼa mawˬ ve yoˬ.

2017 hkʼawꞈ htaˇ ngaˬ awˬ bon gʼa ve teˇ ceuˬ lehˬ ngaˬ leh En˗cen awˬ tcuhˆ puiˍ ve Kawˍmiˍtiˍ liꞈ henˇ yehˬ lo gʼa kʼai leh Neuˇyawˆ venˇ Vawˆcheuˬhtao˗veuˇbaiˬbeunˇeuˬhtehꞈ awˬ moˍ liꞈ henˇ yehˬ lo ngaˬ miˇ ma kaꞈ gʼa kʼai ve yoˬ.

Yaˬhoˉvaˬ lehˬ daꞈ jaˇ ve Saˍ laꞈ lonˉ hpehꞈ ve yoˬ. (Iˉsaˍyaˆ 30:20) Gʼuiˬ sha ve chaw a shaꞈ i ve leh a shaꞈ maˇ ve htawˇ maˇ kʼoˆ, daꞈ jaˇ ve liꞈ henˇ yehˬ chi hkʼe ve hkʼaw gʼa kʼai ve anˇ tuˬ maˇ loˍ. (Bon maˍ ve 4:5-8) Yaˇ nehˬ Yaˬhoˉvaˬ ve hkawˇ leh awˬ viˉ awˬ nyi hpehꞈ laˬ jaw ve awˬ lawn cawˬ ve chaw hkawˇ na ve kʼo, yawˇ hui a shaꞈ teꞈ hkʼaˇ hkʼaw daꞈ ve, dawˇ cheˆ gʼa leh, Gʼuiˬ sha ve kanˉ hkʼaˇ hkʼaw uiˍ la mvuh la tuˬ yoˬ tehꞈ ngaˬ mawˬ ve yoˬ. Tawˇ naˉ ve liꞈ 9:9 hkʼaw kʼoˆ ve, “cuˇ yiˍ cawˬ ve chaw htaꞈ nawˬ maˍ piˇ ve kʼo, yawˇ leuˉ leh cuˇ yiˍ kʼawꞈ cawˬ la tuˬ yoˬ. Hteˇ ve cawˇ ve chaw hui htaꞈ nawˬ maˍ piˇ ve tawˇ lehˬ, yawˇ htaꞈ leuˉ leh kʼawꞈ hteˇ cawˇ la piˇ tuˬ yoˬ.”

Peuˬ taˉ ve 60 hkʼawꞈ htaˇ, Ehˬgiˇriˇ˗aˇ hkʼaw hkʼoˆ lo oˇ teˇ haˉ naˆ hoꞈ jaˇ ve htaꞈ ngaˬ teˇ pawˆ pawˆ dawˇ mawˬ ve yoˬ. Daꞈ jaˇ ve awˬ ceuꞈ ngaˬ htaꞈ law taˍ sheˍ ve tehꞈ, oˇ ve teˇ haˉ ngaˬ dawˇ maˇ gʼa. Ngaˬ shu geh laiˉ ceuˬ gʼa henˇ ve yoˬ. Yaˬhoˉvaˬ ngaˬ huiˉ maˬ htaꞈ daꞈ jaˇ ve a shaꞈ peꞈ laˇ leh ngaˬ huiˉ maˬ ha lehˬ jaˇ. Ngaˬ hui mvuhˇ naw ma hkʼoˆ ve Awˬ pa htaꞈ henˇ yuˬ tuˬ, dawˇ teh taˍ leh awˬ viˉ awˬ nyi cuˇ yiˍ cawˬ leh Gʼuiˬ sha htaꞈ haꞈ ve hpehꞈ laˬ jaw ve awˬ lawn cawˬ ve chaw htaꞈ henˇ yuˬ tuˬ dawˇ teh taˍ ve yoˬ.