1-2. Awˬ viˉ awˬ nyi laiˉ gʼaˇ shoꞈ shaꞈ ve aˬ htoꞈ ma gʼa hpuˇ ve le?

 Pawˇluꞈ Tiˆmoˉseˍ htaꞈ Gʼuiˬ sha ve kanˉ hkʼa dehꞈ te˗o tehꞈ kʼoˆ piˇ ve yoˬ. (2 Tiˆmoˉseˍ 4:5) Beˆ maˍ laˇ ve chi htaꞈ ngaˬ hui kaꞈ hkʼa dehꞈ gʼa te cawˇ ve yoˬ. Yaꞈ hkʼaˇ, chi ve htaꞈ te gʼa tuˬ sha ve maˇ heˆ. Tawˇ pa haˉ te kʼo, awˬ viˉ awˬ nyi teˇ hpaˍ hpaˍ kʼo, hto toˇ gʼa tuˬ gʼa haꞈ hanˉ jaˇ. (2 Tiˆmoˉseˍ 4:2) Ngaˬ hui ve awˬ viˉ awˬ nyi Gʼuiˬ sha htaꞈ oˉ kʼoˍ pui ve tawˍ piˇ ve leh, Gʼuiˬ sha ve kanˉ hkʼa dehꞈ te maˇ gʼa ve mvuhˇ miˬ lo chehˇ ve chaw htaꞈ dawˇ nyi sheˍ. Yawˇ hui hto toˇ chehˇ htaˇ, kawˆ tuˬ hkʼaˬ hkʼe taw cawˬ ve htaꞈ dawˇ nyi sheˍ.

² Yaˬhoˉvaˬ ve chaw awˬ gʼaˇ nuˇ tuˬ te piˇ ve shoꞈ shaꞈ ve laiˉ ceuˬ gʼa hpuˇ ve yoˬ. Tawˇ pa haˉ te kʼo, awˬ viˉ awˬ nyi laiˉ gʼa yehˬ kʼa htaꞈ hu tuˬ kanˉ gʼa te hkeuꞈ jaˇ ve htawˇ, yawˇ hui Gʼuiˬ sha ve kanˉ maˇ maˇ te gaˇ ve yoˬ. Yaꞈ hkʼaˇ, hkawꞈ nyi shinˉ nyi gaˬ˗oˬ htaˇ, yawˇ hui heuˬ jaˇ˗oˬ. Laiˉ gʼaˇ kʼo naˬ ve, maˇ heˆ leh a shaꞈ maˇ˗oˬ ve pa taw, Yaˬhoˉvaˬ ve kanˉ oˇ htaˇ hkʼe leˇ te maˇ gʼa ve yoˬ. Teˇ hpaˍ kʼo teˇ kaˬ˗ehˬ kaꞈ kʼai maˇ gʼa, aˉ hkʼaw tiˉ gʼa chehˇ ve yoˬ. Chi hkʼoˆ kaꞈ, teˇ hpaˍ kʼo a shu yawˇ awˬ to awˬ hpfuhˇ maˇ cawˬ tehꞈ dawˇ ve htaꞈ gʼa tawˍ daꞈ ve yoˬ. Mvuhˇ nyi tawˆ hpawˇ lo chehˇ ve awˬ viˉ awˬ nyi Maˍriˆ * kʼoˆ ve, “ngaˬ maˇ daꞈ ve dawˇ hkʼaˇ maˇ cawˬ tuˬ gʼa tawˍ daꞈ jaˇ. Ngaˬ chi htaꞈ tawˍ daꞈ ve heuˬ jaˇ. Ngaˬ Yaˬhoˉvaˬ ve kanˉ te tuˬ awˬ gʼaˇ hkʼa dehꞈ maˇ cawˬ ve pa taw, nyi ma luˬ jaˇ.”

3. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

³ Ngaˬ hui shoꞈ shaꞈ ve aˬ htoꞈ ma gʼa hpuˇ ve htawˇ, ngaˬ hui tawˍ daꞈ gʼaˇ tuˬ Yaˬhoˉvaˬ awˬ gʼaˇ peꞈ laˇ leh Yaˬhoˉvaˬ ve kanˉ te gʼa ve hkʼe te ve yoˬ. Yaˬhoˉvaˬ ngaˬ hui htaꞈ hkʼaˬ hkʼe ga laˇ ve awˉ lawˉ teˇ geh nyi sheˍ. Pawˇluꞈ leh Tiˆmoˉseˍ shoꞈ shaꞈ ve gʼa hpuˇ ve htawˇ, Gʼuiˬ sha ve kanˉ caˉ leh te gʼa tuˬ Gʼuiˬ sha yawˇ huiˉ maˬ htaꞈ awˬ gʼaˇ piˇ ve teˇ geh henˇ tuˬ yoˬ.

4. Pawˇluꞈ shoꞈ shaꞈ ve aˬ htoꞈ ma gʼa hpuˇ ve le?

⁴ Pawˇluꞈ shoꞈ shaꞈ ve laiˉ ceuˬ gʼa hpuˇ ve yoˬ. Pawˇluꞈ htaꞈ jawꞈ piˇ ve, haˉ pui baˬ piˇ ve, leh htawnˍ hkʼaw yuˬ keu piˇ htaˇ, awˬ gʼaˇ gʼa tuˬ loˍ jaˇ ve yoˬ. (2 Kawˇrenˍhtuˆ 11:23-25) Teˇ pawˆ pawˆ Pawˇluꞈ maˇ daꞈ ve dawˇ hkʼaˇ htaꞈ gʼa tawˍ daꞈ ve htawˇ maˇ yaꞈ taw. (Roˉmaꞈ 7:18, 19, 24) Chi hkʼoˆ kaꞈ, Pawˇluꞈ yawˇ awˬ to hpawˇ maˇ chehˇ sha ve pa taw, “aˉ chuˇ teˇ maˬ tcuhˍ laˇ ve” htaꞈ shuˍ leh Gʼuiˬ sha yuˬ baˬ laˇ tuˬ yawˇ bon lawˬ ve yoˬ.—2 Kawˇrenˍhtuˆ 12:7, 8.

5. Pawˇluꞈ shoꞈ shaꞈ ve laiˉ ceuˬ gʼa hpuˇ ve htawˇ, yawˇ aˬ htoꞈ ma te biˇ gʼa ve le?

⁵ Pawˇluꞈ shoꞈ shaꞈ ve laiˉ ceuˬ gʼa hpuˇ ve htawˇ, yawˇ Gʼuiˬ sha ve kanˉ caˉ leh te gʼa tuˬ Gʼuiˬ sha yawˇ htaꞈ awˬ gʼaˇ piˇ ve yoˬ. Pawˇluꞈ aˬ htoꞈ ma te biˇ gʼa ve le, dawˇ nyi sheˍ. Tawˇ pa haˉ te kʼo, Roˉmaꞈ venˇ hkʼaw aˉ hkʼaw haw tin˗aˬ piˇ htaˇ, Yuˇdaꞈ chaw awˬ hoˉ leh mvuhˇ miˬ kanˉ te paˍ teˇ hpaˍ htaꞈ kaꞈ yawˇ nyi ma pfuhˇ ve hkʼaw bon maˍ piˇ ve yoˬ. (Tcuh yaˇ 28:17; Hpiˇliˇpiˆ 4:21, 22) Chi hkʼe ceh maˇ heˆ, yawˇ geh guiˇ la ve chaw leh Roˉmaꞈ ve maꞈ yaˇ laiˉ gʼaˇ htaꞈ kaꞈ bon maˍ piˇ ve yoˬ. (Tcuh yaˇ 28:30, 31; Hpiˇliˇpiˆ 1:13) Chi hkʼoˆ kaꞈ, oˇ htaˇ teˇ co˗e Hkriꞈ yaˇ awˬ pon awˬ bon cawˬ tuˬ kaꞈ Gʼuiˬ sha Pawˇluꞈ htaꞈ liꞈ bvuhꞈ tcuh ve yoˬ. Leh yawˇ bvuhꞈ ve liꞈ kaꞈ chi beuꞈ teˇ co˗e ngaˬ hui awˬ pon kaꞈ awˬ bon cawˬ ve yoˬ. Leuˉ leh Pawˇluꞈ ve awˬ lawn Roˉmaꞈ venˇ hkʼaw ve awˬ viˉ awˬ nyi htaꞈ kaꞈ awˬ gʼaˇ piˇ ve yoˬ. Leh ‘nyi ma haꞈ hanˉ ve awˬ hkʼaw lo Gʼuiˬ sha ve tawˇ hkawˇ maˍ tuˬ yawˇ hui maˇ kawˆ.’ (Hpiˇliˇpiˆ 1:14) Pawˇluꞈ yawˇ te gaˇ ve hkʼe yawˇ te maˇ gʼa ve htawˇ, yawˇ te gʼa ve hkʼe te leh ‘ha lehˬ ve bon hkawˇ bvuhˬ kʼai piˇ lawˬ ve yoˬ.’—Hpiˇliˇpiˆ 1:12.

6. 2 Kawˇrenˍhtuˆ liꞈ 12:9, 10 hkʼaw kʼoˆ taˍ ve hkʼe, Pawˇluꞈ Gʼuiˬ sha ve kanˉ te biˇ gʼa tuˬ aˬ htoꞈ ma ga piˇ ve le?

⁶ Pawˇluꞈ yawˇ Gʼuiˬ sha ve kanˉ te gʼa ve teˇ ceuˬ le le lehˬ, yawˇ ve awˬ gʼaˇ htaꞈ pa taw maˇ heˆ tehꞈ shiˍ ve yoˬ. Yaꞈ hkʼaˇ, Yaˬhoˉvaˬ geh laˬ ve awˬ gʼaˇ htaꞈ pa taw yoˬ. Yawˇ “awˬ gʼaˇ nuˇ ve teˇ kaˬ awˬ hkʼaw lo [Gʼuiˬ sha] ve kanˇ paˆ biˇ la ve yoˬ” tehꞈ yawˇ shiˍ ve yoˬ. (2 Kawˇrenˍhtuˆ 12:9, 10 gʼaw sheˍ.) Pawˇluꞈ htaꞈ fawˉ mehˍ piˇ ve, hkawnˍ hkʼaw yuˬ keu piˇ ve, leh shoꞈ shaꞈ ve laiˉ ceuˬ gʼa hpuˇ ve htawˇ, Yaˬhoˉvaˬ ve daꞈ kehˬ ve awˬ ha hpu Pawˇluꞈ Gʼuiˬ sha ve kanˉ hkʼa dehꞈ te biˇ gʼa tuˬ ga piˇ ve yoˬ.

7. Tiˆmoˉseˍ Gʼuiˬ sha ve kanˉ hkʼa dehꞈ te biˇ maˇ gʼa tuˬ yawˇ shoꞈ shaꞈ ve aˬ htoꞈ ma gʼa hpuˇ ve le?

⁷ Pawˇluꞈ geh kanˉ teˇ geh te ve Tiˆmoˉseˍ kaꞈ Gʼuiˬ sha ve awˬ gʼaˇ htaꞈ gʼaˇ va ve yoˬ. Tiˆmoˉseˍ Pawˇluꞈ  geh shu mvuhˇ miˬ lo laiˉ pawˆ bon teˇ geh maˍ˗e ve yoˬ. Chi hkʼoˆ kaꞈ, Pawˇluꞈ Tiˆmoˉseˍ htaꞈ Hkriꞈ yaˇ awˬ moˍ teˇ hpaˍ htaꞈ awˬ gʼaˇ ca piˇ tuˬ kaꞈ kʼai tcuh ve yoˬ. (1 Kawˇrenˍhtuˆ 4:17) Tiˆmoˉseˍ hkʼa dehꞈ te maˇ gʼa taˬ tehꞈ kaꞈ dawˇ ve yoˬ hehˉ. Hkʼe te leh, Pawˇluꞈ Tiˆmoˉseˍ htaꞈ kʼoˆ piˇ ve, “nawˬ yaˇ nehˬ hpehꞈ ve htaꞈ chaw teˇ gʼaˇ kaꞈ maˇ shawˍ maˇ caˆ maˇ gʼa kʼoˆ maˇ gʼa te tuˬ shaˍ tiꞈ te˗o.” (1 Tiˆmoˉseˍ 4:12) Awˬ yanˇ teˇ yanˇ htaˇ, Tiˆmoˉseˍ kaꞈ awˬ to hkʼaw aˉ chuˇ teˇ maˬ tcuhˍ piˇ ve lehˬ, “teˇ hkui teˇ hkui naˬ chehˇ ve” yoˬ. (1 Tiˆmoˉseˍ 5:23) Tiˆmoˉseˍ bon maˍ gʼa tuˬ leh awˬ viˉ awˬ nyi htaꞈ ga piˇ gʼa tuˬ, Yaˬhoˉvaˬ ve daꞈ kehˬ ve awˬ ha hpu yawˇ htaꞈ peꞈ laˇ ve tehꞈ shiˍ ve yoˬ.—2 Tiˆmoˉseˍ 1:7.

8. Yaˬhoˉvaˬ chi beuꞈ teˇ co˗e yawˇ ve chaw htaꞈ awˬ gʼaˇ hkʼaˬ hkʼe piˇ ve le?

⁸ Chi beuꞈ teˇ co˗e Yaˬhoˉvaˬ ve kanˉ te ve chaw ka tiꞈ yeˬ gʼa tuˬ, yawˇ “uiˍ jaˇ daꞈ jaˇ ve kanˇ paˆ” piˇ ve yoˬ. (2 Kawˇrenˍhtuˆ 4:7) Yaˬhoˉvaˬ ngaˬ hui htaꞈ awˬ gʼaˇ peꞈ laˇ leh yawˇ htaꞈ hkʼaˬ htaˆ kaꞈ ka tiꞈ yeˬ gʼa tuˬ 4 ceuˬ htaꞈ teˇ geh henˇ tuˬ yoˬ. Chi lehˬ bon lawˬ ve, Liꞈ hpu, awˬ viˉ awˬ nyi, Gʼuiˬ sha ve kanˉ te ve chi teˇ hpaˍ yoˬ.

9. Bon lawˬ ve ngaˬ hui htaꞈ hkʼaˬ hkʼe ga laˇ ve le?

⁹ Bon lawˬ htaˇ awˬ gʼaˇ gʼa ve. Eˇfeˇsuꞈ liꞈ 6:18 hkʼaw Pawˇluꞈ ngaˬ hui htaꞈ kʼoˆ laˇ ve, “hkʼaˬ htaˆ kaꞈ bon lawˬ” chehˇ˗oˆ. Ngaˬ hui chi hkʼe te ve kʼo, Gʼuiˬ sha awˬ gʼaˇ peꞈ laˇ tuˬ yoˬ. Boˬliˇviˇ˗aˇ mvuhˇ miˬ hkʼaw chehˇ ve awˬ viˉ awˬ nyi Caw˗niˇ kaꞈ shoꞈ shaꞈ ve laiˉ ceuˬ gʼa hpuˇ ve yoˬ. Yaꞈ hkʼaˇ, Yaˬhoˉvaˬ yawˇ htaꞈ hkʼaˬ hkʼe ga laˇ ve gʼa mawˬ ve yoˬ. Awˬ pa, awˬ e, leh awˬ miˇ ma kaꞈ teˇ pawˆ tiˉ teˇ geh naˬ ve yoˬ. Oˇ ve teˇ yanˇ yawˇ 3 gʼaˇ htaꞈ gʼa nyi haꞈ shaˉ ve haˍ jaˇ. Awˬ e suh˗e leh awˬ pa leh awˬ miˇ ma na˗e la tuˬ nyi haꞈ shaˉ ve awˬ yanˇ yehˇ maw jaˇ. Peuˬ taˉ ve htaꞈ kʼawꞈ dawˇ nyi htaˇ Caw˗niˇ kʼoˆ ve, “chi teˇ hkui ngaˬ dawˇ maˇ jaˇ. Teˇ pawˆ le le ngaˬ htaꞈ ga laˇ ve awˬ ceuˬ lehˬ ngaˬ Yaˬhoˉvaˬ geh bon lawˬ leh hkʼaˬ hkʼe dawˇ ve yawˇ htaꞈ kʼoˆ piˇ ve yoˬ.” Caw˗niˇ yeunˇ hkanˍ gʼaˇ tuˬ Yaˬhoˉvaˬ awˬ gʼaˇ piˇ ve yoˬ. Boˬliˇviˇ˗aˇ mvuhˇ miˬ lo chehˇ ve nyi haꞈ shaˉ paˍ Rawˍnanˍ yawˇ awˬ e mvuhˇ haˉ caˇ ve shiˍ la leh teˇ ha pa peuˬ hkʼawꞈ nawˉ suh˗e ve yoˬ. Yawˇ tawˍ daꞈ gʼa tuˬ aˬ htoꞈ ma ga piˇ ve le? Yawˇ kʼoˆ ve, “ngaˬ Yaˬhoˉvaˬ geh bon lawˬ htaˇ, ngaˬ nyi ma hkʼaw cawˬ ve awˬ ceuˬ hkʼa peu˗eˬ kʼoˆ maˍ piˇ ve yoˬ. Ngaˬ awˬ to aꞈ kehˉ Gʼuiˬ sha lehˬ teˇ ceuˬ le le htaꞈ shiˍ ve yoˬ.” Teˇ pawˆ pawˆ ngaˬ hui dawˇ maˇ jaˇ leh shoꞈ shaꞈ ve htaꞈ yeunˇ hkanˍ maˇ gʼaˇ˗o tehꞈ dawˇ ve yoˬ. Leh Yaˬhoˉvaˬ htaꞈ kaꞈ hkʼaˬ hkʼe kʼoˆ piˇ tuˬ maˇ shiˍ ve yoˬ. Ngaˬ hui hkʼaˬ hkʼe dawˇ ve kʼoˆ piˇ tuˬ maˇ shiˍ ve htawˇ, Yaˬhoˉvaˬ ngaˬ hui yawˇ geh bon lawˬ tcuh gaˇ ve yoˬ.—Roˉmaꞈ 8:26, 27.

10. Heˍbrehˇ liꞈ 4:12 hkʼaw kʼoˆ taˍ ve hkʼe, aˬ htoꞈ ma te Liꞈ hpu gʼaw ve leh hkʼa dehꞈ dawˇ nyi ve a yeˇ uiˍ jaˇ ve le?

¹⁰ Liꞈ hpu gʼaw htaˇ awˬ gʼaˇ gʼa ve. Pawˇluꞈ Liꞈ hpu gʼaw htaˇ awˬ gʼaˇ gʼa ve yoˬ. Ngaˬ hui kaꞈ hkʼa shuˍ gʼa te ve yoˬ. (Roˉmaꞈ 15:4) Ngaˬ hui Liꞈ hpu gʼaw leh gʼaw taˍ ve awˬ ceuˬ htaꞈ dawˇ nyi htaˇ, ngaˬ hui gʼa hpuˇ chehˇ ve shoꞈ shaꞈ ve htaꞈ Liꞈ hpu hkʼaw beˆ maˍ laˇ ve hkʼaˬ hkʼe yuˬ yehˇ gʼa tuˬ, Yaˬhoˉvaˬ daꞈ kehˬ ve awˬ ha hpu ga laˇ ve yoˬ. (Heˍbrehˇ 4:12 gʼaw sheˍ.) Rawˍnanˍ kʼoˆ ve, “ngaˬ Liꞈ hpu teˇ haˉ le le hkʼaˬ htaˆ kaꞈ gʼaw ve ha lehˬ jaˇ. Yaˬhoˉvaˬ ve te hkʼaˇ dawˇ hkʼaˇ htaꞈ caˉ daꞈ ve ngaˬ dawˇ nyi leh Yaˬhoˉvaˬ yawˇ ve kanˉ te ve chaw htaꞈ haꞈ leh hkʼaˬ hkʼe taw dawˇ haˍ ve kaꞈ ngaˬ dawˇ nyi ve yoˬ. Chi teˇ hkui kaꞈ ngaˬ chi hkʼe te chehˇ sheˍ leh chi ngaˬ awˬ gʼaˇ kʼawꞈ cawˬ tuˬ ga laˇ ve yoˬ.”

11. Awˬ viˉ awˬ nyi yaˇ miˇ teˇ gʼaˇ Liꞈ hpu gʼaw ve htaꞈ awˬ gʼaˇ hkʼaˬ hkʼe gʼa ve le?

¹¹ Liꞈ hpu hkʼaw ngaˬ hui gʼaw ve awˬ ceuˬ htaꞈ hkʼa dehꞈ dawˇ nyi ve teˇ yanˇ, shoꞈ shaꞈ ve htaꞈ caˉ daꞈ ve cawˇ ve hpawˇ dawˇ nyi tuˬ ga laˇ ve yoˬ. Mehˇ chawˇ ma teˇ gʼaˇ nyi ma luˬ chehˇ ve htaꞈ Liꞈ hpu gʼaw htaˇ, hkʼaˬ hkʼe ga piˇ ve teˇ geh nyi sheˍ. Nyi haꞈ shaˉ paˍ yawˇ Yawˇbaˆ ve awˬ lawn gʼaw tuˬ beˆ maˍ piˇ ve yoˬ. Yawˇ gʼaw˗oˬ htaˇ, awˉ lawˉ htaˇ aˬ htoꞈ ma te Yawˇbaˆ chi hkʼe dawˇ ve le,  tehꞈ yawˇ dawˇ ve yoˬ. Yawˇ nyi ma hkʼaw dawˇ ve, “Yawˇbaˆ˗oˬ chi hkʼe taˇ dawˇ!” Aˬ htoꞈ ma te a shu yawˇ ve shoꞈ shaꞈ ve htaꞈ tiˉ dawˇ nyi ve le? Leh yawˇ dawˇ gʼa ve, yawˇ kaꞈ Yawˇbaˆ htaꞈ maˇ peun daꞈ. Hkʼe te leh, yawˇ yawˇ ve awˬ lawn htaꞈ tiˉ maˇ dawˇ nyi leh Yaˬhoˉvaˬ htaꞈ dawˇ nyi ve yoˬ. Chi ve lehˬ yawˇ awˬ hpawˇ suh˗oˬ ve nyi ma luˬ chehˇ ve htaꞈ awˬ gʼaˇ gʼa leh tawˍ daꞈ gʼaˇ tuˬ ga piˇ ve yoˬ.

12. Yaˬhoˉvaˬ ngaˬ hui htaꞈ awˬ gʼaˇ peꞈ laˇ tuˬ awˬ viˉ awˬ nyi htaꞈ hkʼaˬ hkʼe yehˇ ve le?

¹² Awˬ viˉ awˬ nyi geh awˬ gʼaˇ gʼa ve. Yaˬhoˉvaˬ ngaˬ hui htaꞈ awˬ gʼaˇ peꞈ laˇ ve teˇ hkʼaˇ lehˬ, awˬ viˉ awˬ nyi htaꞈ cuˇ ve yoˬ. Pawˇluꞈ bvuhꞈ ve, “teˇ gʼaˇ htaꞈ teˇ gʼaˇ awˬ gʼaˇ piˇ daꞈ tuˬ” ngaˬ awˬ viˉ awˬ nyi htaꞈ mawˬ gaˇ jaˇ. (Roˉmaꞈ 1:11, 12) Chi awˬ gʼuˇ suhˍ htaˇ kʼoˆ kʼai peuˬ ve Maˍriˆ awˬ viˉ awˬ nyi geh awˬ chawˇ te ve dawˇ cawˇ jaˇ. Yawˇ kʼoˆ ve, “ngaˬ htaꞈ awˬ gʼaˇ peꞈ laˇ tuˬ Yaˬhoˉvaˬ awˬ viˉ awˬ nyi htaꞈ yehˇ ve yoˬ. Ngaˬ aˬ htoꞈ ma gʼa hpuˇ chehˇ ve yawˇ hui maˇ shiˍ ve htawˇ, laiˉ pawˆ kʼo tawˇ yaw laˇ ve maˇ heˆ leh liꞈ bvuhꞈ laˇ ve yoˬ. Chi lehˬ ngaˬ loˍ chehˇ htaˇ ve awˬ ceuˬ hpehꞈ ve yoˬ. Awˬ viˉ awˬ nyi yaˇ miˇ ngaˬ hkʼa shuˍ shoꞈ shaꞈ ve gʼa hpuˇ ve htaꞈ tawˇ yaw daꞈ leh, yawˇ hui shoꞈ shaꞈ ve htaꞈ hkʼaˬ hkʼe gu gʼa ve gʼa shiˍ ve yoˬ. Chi ngaˬ htaꞈ ga laˇ gʼa jaˇ. Leh nyi haꞈ shaˉ paˍ kaꞈ awˬ viˉ awˬ nyi teˇ gʼaˇ le le ngaˬ htaꞈ haꞈ leh Hkriꞈ yaˇ awˬ moˍ hkʼaw ngaˬ awˬ hpfuhˇ cawˬ ve tehꞈ dawˇ tuˬ te laˇ ve yoˬ.”

13. Hpawnˬ daꞈ kuiˬ hkʼaw ngaˬ hui hkʼaˬ hkʼe te awˬ gʼaˇ piˇ daꞈ gʼa tuˬ le?

¹³ Ngaˬ hui awˬ gʼaˇ piˇ daꞈ gʼa ve daꞈ jaˇ ve teˇ hkʼaˇ lehˬ, hpawnˬ daꞈ kuiˬ hkʼaw yoˬ. Nawˬ hpawnˬ daꞈ˗e htaˇ coˇ caˇ leh awˬ nu ve chaw htaꞈ awˬ gʼaˇ piˇ nyi sheˍ. Nawˬ awˬ viˉ awˬ nyi htaꞈ haꞈ ve kʼoˆ piˇ leh yawˇ te ve awˬ ceuˬ htaꞈ awˬ bon uiˍ jaˇ kʼoˆ piˇ sheˍ. Tawˇ pa haˉ te kʼo, hpawnˬ daꞈ ve maˇ taˬ sheˍ htaˇ, nyi haꞈ shaˉ paˍ Peˍtruˆ meh ve awˬ viˉ awˬ nyi yaˇ miˇ teˇ gʼaˇ awˬ hpawˇ Shaˉhkiˆhkanˍ ve chaw maˇ hpehꞈ ve geh tawˇ ca yaw daꞈ˗e ve yoˬ. Peˍtruˆ yawˇ htaꞈ kʼoˆ piˇ ve, “nawˬ yaˇ 6 gʼaˇ htaꞈ shiˍ veu laˇ leh hpawnˬ daꞈ la ve ngaˬ hui awˬ gʼaˇ gʼa jaˇ. Teˇ pawˆ le le yawˇ hui veuꞈ kʼaˇ veuꞈ ve kaꞈ nyi sha leh hkʼawꞈ ve kaꞈ cheuˬ jaˇ. Nawˬ yawˇ hui htaꞈ nyi haꞈ shaˉ piˇ daꞈ jaˇ.” Chi hkʼe gʼa kaˇ htaˇ, yawˇ ha lehˬ jaˇ leh kʼoˆ ve, “awˬ viˉ awˬ nyi Peˍtruˆ˗oˬ shiˍ˗aˬ laˇ, tawˇ hkawˇ chi ngaˬ loˍ chehˇ ve awˬ yanˇ htaꞈ cawˇ daꞈ ve yoˬ.”

14. Hto toˇ ve ngaˬ hui htaꞈ hkʼaˬ hkʼe ga laˇ ve le?

¹⁴ Gʼuiˬ sha ve kanˉ te ve geh awˬ gʼaˇ gʼa ve. Ngaˬ hui Liꞈ hpu hkʼaw awˬ tehˬ ve shu htaꞈ kʼoˆ piˇ htaˇ, ngaˬ hui tawˇ yaw daꞈ ve chaw na ve, maˇ na ve htawˇ ngaˬ hui nyi ma sha jaˇ. (Tawˇ naˉ ve 11:25) Awˬ viˉ awˬ nyi yaˇ miˇ Seh˗di˗seˇ Gʼuiˬ sha ve kanˉ te ve hkʼaw yawˇ awˬ gʼaˇ gʼa jaˇ ve yoˬ. Yawˇ ve yehˬ kʼa hkʼaw ve chaw Hkriꞈ yaˇ awˬ moˍ hkʼaw tawˆ cheˆ piˇ htaˇ, yawˇ nyi ma luˬ jaˇ. ‘Ngaˬ yawˇ htaꞈ chi aꞈ kehˉ ga piˇ gʼa tuˬ ve htaꞈ tiˉ dawˇ nyi ve yoˬ.’ Awˬ lawn chi yawˇ dawˇ maˇ jaˇ. Yaꞈ hkʼaˇ, yawˇ nyi ma sha la tuˬ aˬ htoꞈ ma ga piˇ ve le? Gʼuiˬ sha ve kanˉ te ve yoˬ. Yawˇ hto toˇ˗e htaˇ, yawˇ ve awˬ lawn htaꞈ maˇ dawˇ nyi. Yaꞈ hkʼaˇ, hto toˇ kuiˬ awˬ ti lo ve chaw htaꞈ dawˇ nyi leh yawˇ hui htaꞈ hkʼaˬ hkʼe ga piˇ gʼa tuˬ dawˇ nyi ve yoˬ. Yawˇ kʼoˆ ve, “oˇ ve teˇ yanˇ Liꞈ hpu henˇ ve chaw uiˍ la mvuh la vaiˇ jaˇ ve teˇ gʼaˇ awˬ viˉ awˬ nyi ngaˬ htaꞈ peꞈ laˇ ve yoˬ. Ngaˬ awˬ gʼaˇ gʼa jaˇ. Ngaˬ a shaꞈ teꞈ kuiˬ hkʼaw aˬ htoꞈ ma gʼa hpuˇ ve htawˇ maˇ kʼoˆ, ngaˬ htaꞈ ga laˇ gʼa jaˇ ve lehˬ hto toˇ˗e ve yoˬ.”

15. Maˍriˆ ve tawˇ hkawˇ htaꞈ nawˬ aˬ htoꞈ ma henˇ yuˬ gʼa ve le?

¹⁵ Chaw teˇ hpaˍ Gʼuiˬ sha ve kanˉ yawˇ te gaˇ ve hkʼe hkʼa dehꞈ te maˇ gʼa tehꞈ dawˇ ve yoˬ. Nawˬ chi hkʼe dawˇ ve kʼo, nawˬ coˇ caˇ leh te gʼa ve hkʼe te˗oˬ ve kʼo, nawˬ Yaˬhoˉvaˬ nyi hkʼaˇ suh tuˬ te piˇ˗oˬ ve tehꞈ tawnˇ taˍ sheˍ. Maˍriˆ ve awˬ lawn htaꞈ teˇ pawˆ kʼawꞈ nyi sheˍ. Yawˇ awˬ nu ve tawˇ hkawˇ yaw ve awˬ ti lo ca chehˇ˗e htaˇ, yawˇ hkʼa dehꞈ ga piˇ maˇ gʼa tehꞈ dawˇ ve yoˬ. Yawˇ kʼoˆ ve, “awˬ yanˇ teˇ yanˇ htaˇ, hpawnˬ daꞈ ve hkʼaw ngaˬ hkʼa sha sha˗ehˬ ve ceh hkʼawꞈ gʼa ve maˇ haˆ leh Liꞈ hpu awˬ tawn ceh tiˉ gʼaw ve yoˬ. Hto toˇ˗e htaˇ kaꞈ liꞈ kʼoˆ ehˉ ceh piˇ gʼa ve yoˬ.” Chaw ceuˬ tawˇ hkawˇ oˇ ve htaꞈ yaw cheuˬ ve chaw htaꞈ tehˆ ve kʼo, yawˇ hkʼa dehꞈ maˇ cheuˬ tehꞈ dawˇ ve yoˬ. Yaꞈ hkʼaˇ, yawˇ ve dawˇ hkʼaˇ kʼawꞈ  pa ve yoˬ. Yawˇ chaw ceuˬ tawˇ hkawˇ oˇ ve yaw maˇ cheuˬ ve htawˇ, Yaˬhoˉvaˬ yawˇ htaꞈ yehˇ chehˇ sheˍ ve tehꞈ mawˬ ve yoˬ. Yawˇ kʼoˆ ve, “Liꞈ hpu hkʼaw awˬ tehˬ ve na gʼa sha leh maˇ na gʼa ve maˇ cawˬ. Awˬ tehˬ ve chi lehˬ chaw yaˇ a shaꞈ teꞈ hkʼaˇ htaꞈ pa piˇ leh chaw ceuˬ tawˇ hkawˇ yaw cheuˬ ve htaꞈ cawˬ ve maˇ heˆ.”

16. Aˉ hkʼaw tiˉ chehˇ ve chaw awˬ gʼaˇ gʼa tuˬ aˬ htoꞈ ma ga piˇ ve le?

¹⁶ Chaw teˇ hpaˍ aˉ hkʼaw tiˉ chehˇ ve htawˇ, ngaˬ hui coˇ caˇ leh hto toˇ ve htaꞈ Yaˬhoˉvaˬ awˬ hpfuhˇ shiˍ ve yoˬ. Saˍ laꞈ gʼonˍ, saˍ laꞈ gʼonˍ htaꞈ ga piˇ ve chaw, maˇ heˆ leh ngaˬ hui htaꞈ nyi haꞈ shaˉ laˇ gʼa ve chaw, ngaˬ hui chi teˇ hpaˍ htaꞈ hto maˍ piˇ gʼa tuˬ Gʼuiˬ sha ga laˇ ve yoˬ. Oˇ htaˇ ngaˬ hui hkʼaˬ hkʼe taw te gʼa ve htaꞈ dawˇ nyi leh tehˆ daꞈ ve kʼo, ngaˬ hui awˬ gʼaˇ nuˇ ve yoˬ. Chi teˇ hkui Yaˬhoˉvaˬ ngaˬ hui htaꞈ hkʼaˬ hkʼe ga laˇ ve htaꞈ chaˬ nyi ve kʼo, ngaˬ hui shoꞈ shaꞈ ve gʼa hpuˇ ve htaꞈ yeunˇ hkanˍ gʼaˇ tuˬ awˬ gʼaˇ gʼa leh ha lehˬ gʼa ve yoˬ.

17. Cuˇ yiˍ piˇ ve liꞈ 11:6 hkʼaw kʼoˆ taˍ ve hkʼe, ngaˬ hui awˬ bon gʼa ve htaꞈ laꞈ haˉ maˇ mawˬ ve htawˇ, aˬ htoꞈ ma te caˉ leh hto toˇ cawˇ ve le?

¹⁷ Ngaˬ hui awˬ yawˇ sheˍ htaˇ, awˬ yawˇ hkʼaˬ ve teˇ yawˇ awˬ yeˬ yeˬ la leh uiˍ la tuˬ ngaˬ hui maˇ shiˍ. Chi ve ngaˬ hui hto toˇ˗e htaˇ ve htaꞈ shuˍ ve yoˬ. Awˬ leh meuˇ htaˇ hkʼaˬ ve teˇ gʼaˇ awˬ tehˬ ve htaꞈ haꞈ yuˬ tuˬ ngaˬ hui maˇ shiˍ. (Cuˇ yiˍ piˇ ve 11:6 gʼaw sheˍ.) Awˬ viˉ awˬ nyi yaˇ miˇ teˇ gʼaˇ Ba˗ba˗laˇ meh ve awˬ lawn htaꞈ dawˇ nyi sheˍ. Yawˇ 80 hkʼawꞈ hpaˆ gaˬ˗oˬ leh yawˇ hkʼaˬ htaˆ kaꞈ awˬ hkʼeun hkʼaw hto toˇ leh liꞈ bvuhꞈ piˇ ve yoˬ. Yawˇ liꞈ bvuhꞈ peuˬ leh liꞈ hpui hkʼaw Shaw nyi kuiˬ Taꞈ yehˬ Ha pa 3 maˬ 2014 hkʼawꞈ ve liꞈ kʼoˆ kaꞈ teˇ geh keu ve yoˬ. Chi ve hkʼaw ve awˬ lawn “Gʼuiˬ sha nawˬ awˬ pon aˬ htoꞈ ma te laˇ ve le?” (Laˇhuˍ hkawˇ maˇ cawˬ.) Yaꞈ hkʼaˇ, liꞈ chi teˇ kʼoˆ gʼa ve chaw lehˬ awˬ hpawˇ awˬ miˇ ma Hkriꞈ yaˇ awˬ moˍ hkʼaw tawˆ cheˆ taˍ ve 27 hkʼawꞈ gaˬ˗oˬ ve yoˬ. Yawˇ hui liꞈ kʼoˆ chi ve htaꞈ laiˉ pawˆ gʼaw ve yoˬ. Awˬ hpawˇ liꞈ kʼoˆ chi htaꞈ gʼaw htaˇ, Yaˬhoˉvaˬ yawˇ htaꞈ tawˇ yaw laˇ chehˇ ve tehꞈ yawˇ dawˇ ve yoˬ. Peuˬ hkʼawꞈ nawˉ awˬ hpawˇ awˬ miˇ ma chi ve teˇ ca lehˬ, hpawnˬ daꞈ la ve yoˬ. Awˬ leh meuˇ htaˇ, Yaˬhoˉvaˬ ve Shaˉhkiˆhkanˍ ve chaw teˇ pawˆ kʼawꞈ te la ve yoˬ. Ba˗ba˗laˇ yawˇ liꞈ bvuhꞈ ve awˬ bon gʼa ve htaꞈ gʼa mawˬ htaˇ, hkʼaˬ hkʼe taw ha lehˬ ve htaꞈ dawˇ nyi sheˍ.

18. Gʼuiˬ sha geh awˬ gʼaˇ gʼa tuˬ ngaˬ hui hkʼaˬ hkʼe gʼa te cawˇ ve le?

¹⁸ Ngaˬ hui awˬ gʼaˇ gʼa tuˬ Yaˬhoˉvaˬ ngaˬ hui htaꞈ laiˉ ceuˬ peꞈ laˇ ve yoˬ. Tawˇ pa haˉ te kʼo, bon lawˬ ve, Liꞈ hpu, awˬ viˉ awˬ nyi leh Gʼuiˬ sha ve kanˉ te ve yoˬ. Ngaˬ hui chi ve teˇ hpaˍ htaꞈ yehˇ htaˇ, Gʼuiˬ sha ngaˬ hui htaꞈ ga laˇ gaˇ ve tehꞈ hkʼa tawˍ lehˆ yonˍ gʼa ve yoˬ. Gʼuiˬ sha ngaˬ hui htaꞈ ga laˇ gʼa ve tehꞈ yonˍ ve yoˬ. Ngaˬ hui ve Awˬ pa Yaˬhoˉvaˬ Gʼuiˬ sha htaꞈ hkʼaˬ htaˆ kaꞈ gʼaˇ va sheˍ. Gʼuiˬ sha lehˬ haꞈ pehnˇ uiˍ ve Gʼuiˬ sha hpehꞈ leh “yawˇ htaꞈ ka tiꞈ yeˬ chehˇ ve chaw htaꞈ yawˇ awˬ gʼaˇ uiˍ la piˇ ve yoˬ.”—2 Raˍsaˍvanˍ 16:9.