1-2. Ngaˬ hui a shaꞈ teꞈ kuiˬ hkʼaw laiˉ ceuˬ pa kʼai htaˇ, aˬ htoꞈ ma te Liꞈ hpu hkʼaw ve awˬ liˇ awˬ hkʼaˇ ngaˬ hui awˬ pon awˬ bon cawˬ jaˇ ve le?

 Chaw haˉ yaˇ miˇ haˉ lehˬ heuˆ daꞈ ve awˬ nyi htaˇ, bon maˍ hkawˇ yawˇ hui awˬ pon a yeˇ uiˍ jaˇ. Bon maˍ hkawˇ chi ve yawˇ hui gʼa kaˇ jaw˗oˬ ve yoˬ. Yaꞈ hkʼaˇ, heuˆ daꞈ peuˬ hkʼawꞈ nawˉ bon maˍ hkawˇ chi yawˇ hui awˬ pon a yeˇ uiˍ jaˇ sheˍ. Aˬ htoꞈ ma pa taw le? Yawˇ hui heuˆ daꞈ˗oˬ ve pa taw yoˬ. Hkʼe te leh, bon maˍ hkawˇ chi beˆ maˍ piˇ ve htaꞈ yawˇ hui awˬ tehˬ awˬ na yuˬ yehˇ ve yoˬ.

² Awˬ pa awˬ e hpehꞈ˗a te ve chaw kaꞈ hkʼa shuˍ yoˬ. Yaˇ haꞈ shaˉ ve lehˬ a yeˇ uiˍ jaˇ ve awˬ vuiˬ hpehꞈ ve yoˬ. Ponˬ laˬ ve laiˉ hkʼawꞈ htaˇ, yaˇ htaꞈ haꞈ shaˉ tuˬ ve bon maˍ hkawˇ yawˇ hui laiˉ pawˆ gʼa kaˇ jaw ve yoˬ hehˉ. Yaꞈ hkʼaˇ, bon maˍ hkawˇ chi teˇ hpaˍ chi teˇ hkui yawˇ hui awˬ pon awˬ bon cawˬ jaˇ sheˍ. Chaw yaˇ ve a shaꞈ teꞈ kuiˬ hkʼaw laiˉ ceuˬ pa kʼai htaˇ, Liꞈ hpu hkʼaw beˆ maˍ laˇ ve leh awˬ liˇ awˬ hkʼaˇ teˇ hpaˍ awˬ bon cawˬ jaˇ. Chi htaꞈ pa taw, Yaˬhoˉvaˬ yawˇ htaꞈ oˉ kʼoˍ pui ve chaw htaꞈ kʼoˆ piˇ ve, Liꞈ hpu gʼaw leh hkʼa dehꞈ dawˇ nyi sheˍ. Gʼuiˬ sha Iˉsaˍreˍlaˆ chaw ve jawˇ mawˇ htaꞈ kʼoˆ piˇ ve, ‘yawˇ a shaꞈ teꞈ chehˇ ve teˇ co˗e oˇ kaˬ lo bvuhꞈ taˍ ve tawˇ teˇ hpaˍ htaꞈ gʼa gʼaw nyi tcuhˉ taˍ ve yoˬ.’—Bon maˍ ve 17:19.

3. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

³ Awˬ pa awˬ e˗oˬ, Gʼuiˬ sha ve kanˉ te ve chaw teˇ gʼaˇ daꞈ ve awˬ vuiˬ cawˬ ve hkʼe nawˬ kaꞈ cawˬ gʼa ve lehˬ, yaˇ Yaˬhoˉvaˬ htaꞈ haꞈ tuˬ maˍ piˇ ve yoˬ. Yaꞈ hkʼaˇ, Yaˬhoˉvaˬ htaꞈ caˉ daꞈ ve nawˬ ve yaˇ htaꞈ maˍ piˇ ve ceh tiˉ maˇ heˆ. Yaˇ Yaˬhoˉvaˬ htaꞈ haꞈ tuˬ kaꞈ ga piˇ sheˍ. Nawˬ chi hkʼe te gʼa tuˬ aˬ htoꞈ ma ga laˇ gʼa ve le? Awˬ lawn chi  ve hkʼaw nawˬ htaꞈ ga laˇ gʼa ve awˬ liˇ awˬ hkʼaˇ 4 ceuˬ htaꞈ teˇ geh henˇ tuˬ yoˬ. (2 Tiˆmoˉseˍ 3:16) Hkriꞈ yaˇ hpehꞈ ve awˬ pa awˬ e teˇ hpaˍ Liꞈ hpu hkʼaw beˆ maˍ laˇ ve awˬ liˇ awˬ hkʼaˇ htaꞈ gʼaꞈ te ve pa taw, aˬ htoꞈ ma awˬ bon gʼa ve teˇ geh nyi sheˍ.

4. Awˬ pa awˬ e yaˇ Yaˬhoˉvaˬ htaꞈ haꞈ tuˬ maˍ piˇ gʼa ve, ga laˇ gʼa ve awˬ liˇ awˬ hkʼaˇ 1 ceuˬ lehˬ aˬ htoꞈ ma le? (Yaˍkoˆ 1:5)

⁴ Awˬ liˇ awˬ hkʼaˇ awˉ lawˉ 1 ceuˬ lehˬ, beˆ maˍ laˇ ve htaꞈ gʼa tuˬ Yaˬhoˉvaˬ htaꞈ gʼaˇ gʼa va ve. Yaˇ Yaˬhoˉvaˬ htaꞈ haꞈ ve maˍ piˇ tuˬ nawˬ yawˇ geh cuˇ yiˍ lawˬ sheˍ. (Yaˍkoˆ 1:5 gʼaw sheˍ.) Yaˬhoˉvaˬ lehˬ ngaˬ hui htaꞈ daꞈ jaˇ ve beˆ maˍ laˇ ve yoˬ. Chi hkʼe hpehꞈ ve awˬ hkʼaˇ laiˉ hkʼaˇ cawˬ ve yoˬ. Tawˇ pa haˉ te kʼo, 1 Yaˬhoˉvaˬ lehˬ cuˇ yiˍ cawˬ jaˇ ve Awˬ pa hpehꞈ ve yoˬ. (Chiˇ mvuh ve 36:9) Leh 2 yawˇ beˆ maˍ laˇ ve ngaˬ hui awˬ pon hkʼaˬ htaˆ kaꞈ awˬ bon cawˬ jaˇ.—Iˉsaˍyaˆ 48:17.

5. (a) Yaˬhoˉvaˬ ve kanˉ hkʼaˇ awˬ pa awˬ e htaꞈ aˬ htoꞈ ma gu teh taˍ laˇ ve le? (b) Awˬ viˉ awˬ nyi Bi˗ri˗o leh O˗la˗la A˗mo˗ri yaˇ haꞈ shaˉ ve htaꞈ caˉ daꞈ ve VDO hkʼaw nawˬ htaꞈ aˬ htoꞈ ma maˍ laˇ ve le?

⁵ Awˬ pa awˬ e hpehꞈ ve chaw˗oˬ, yaˇ Yaˬhoˉvaˬ htaꞈ haꞈ ve maˍ piˇ tuˬ Yaˬhoˉvaˬ lehˬ Liꞈ hpu hkʼaw beˆ maˍ laˇ hkawˇ maˇ maˇ cawˬ tcuh laˇ ve yoˬ. (Maꞈhtehˍ 24:45) Tawˇ pa haˉ te kʼo, ponˬ laˬ ve laiˉ hkʼawꞈ htaˇ, Tu loˬ! Liꞈ hkʼaw laiˉ tawn cawˬ ve awˬ mehˬ lehˬ “Yehˬ kʼa awˬ pon beˆ maˍ laˇ ve” chi ve lehˬ chi teˇ hkui vehˆsaiˉ jw.org hkʼaw cawˬ ve yoˬ. Chi hkʼoˆ kaꞈ, awˬ pa awˬ e yaˇ haꞈ shaˉ tuˬ Yaˬhoˉvaˬ beˆ maˍ laˇ ve htaꞈ gʼaꞈ te tuˬ, vehˆsaiˉ hkʼaw VDO laiˉ lawn cawˬ ve yoˬ. *—Tawˇ naˉ ve 2:4-6.

6. Gʼuiˬ sha ve kanˉ hkʼaˇ hkʼaw beˆ maˍ laˇ ve htaꞈ awˬ hpawˇ awˬ miˇ ma hkʼaˬ hkʼe dawˇ ve le?

⁶ Awˬ pa awˬ e laiˉ gʼaˇ Yaˬhoˉvaˬ yawˇ ve kanˉ hkʼaˇ htaꞈ cuˇ leh ga laˇ ve awˬ bon uiˍ jaˇ tehꞈ kʼoˆ ve yoˬ. Awˬ pa teˇ gʼaˇ Con kʼoˆ ve, “ngaˬ hui yaˇ 3 gʼaˇ cawˬ leh yaˇ Yaˬhoˉvaˬ htaꞈ haꞈ tuˬ maˍ piˇ ve sha ve maˇ heˆ. Ngaˬ leh ngaˬ miˇ ma Yaˬhoˉvaˬ ga laˇ tuˬ hkʼaˬ htaˆ kaꞈ bon lawˬ ve yoˬ. Laiˉ pawˆ ngaˬ hui shoꞈ shaꞈ ve awˬ lawn gʼa hpuˇ chehˇ htaˇ, awˬ lawn teˇ hpaˍ leh VDO tawˆ la ve awˬ yanˇ cawˇ daꞈ jaˇ tehꞈ dawˇ ve yoˬ. Ngaˬ hui ve yehˬ kʼa awˬ pon Yaˬhoˉvaˬ htaꞈ gʼaˇ va leh yawˇ beˆ maˍ laˇ ve htaꞈ gʼaꞈ te ve a yeˇ uiˍ jaˇ.” Con leh yawˇ ve awˬ  miˇ ma lehˬ, Gʼuiˬ sha ve kanˉ hkʼaˇ hkʼaw ve awˬ lawn teˇ hpaˍ leh VDO yawˇ hui ve yaˇ Yaˬhoˉvaˬ geh meuˆ daꞈ maˇ la tuˬ ga laˇ gʼa jaˇ tehꞈ kʼoˆ ve yoˬ.

7. Awˬ pa awˬ e lehˬ yaˇ awˬ pon daꞈ ve henˇ yuˬ tuˬ hpehꞈ tuˬ aˬ htoꞈ ma te gʼa coˇ caˇ jaˇ ve le? (Roˉmaꞈ 2:21)

⁷ Awˬ liˇ awˬ hkʼaˇ 2 ceuˬ teˇ ceuˬ lehˬ, daꞈ ve henˇ yuˬ tuˬ hpehꞈ piˇ sheˍ. Yaˇ lehˬ awˬ pa awˬ e te ve awˬ ceuˬ htaꞈ nyi leh henˇ yuˬ ve yoˬ. Awˬ pa awˬ e biˇ ve chaw teˇ gʼaˇ kaꞈ maˇ hpehꞈ. (Roˉmaꞈ 3:23) Yaꞈ hkʼaˇ, awˬ pa awˬ e cuˇ yiˍ cawˬ ve lehˬ, yaˇ awˬ pon daꞈ ve henˇ tuˬ hpehꞈ tuˬ coˇ caˇ leh te ve yoˬ. (Roˉmaꞈ 2:21 gʼaw sheˍ.) Awˬ pa teˇ gʼaˇ yaˇ htaꞈ caˉ daꞈ ve kʼoˆ ve, “yaˇ teˇ hpaˍ lehˬ hpa htaꞈ shuˍ ve yoˬ. Hpa lehˬ iˉ kaˆ awˬ paˇ lo teh piˇ htaˇ chawꞈ ve yoˬ. Ngaˬ hui maˍ ve hkʼe maˇ gʼaꞈ te ve kʼo, yaˇ ngaˬ hui htaꞈ laꞈ haˉ kʼoˆ laˇ ve yoˬ.” Chi htaꞈ pa taw, nawˬ ve yaˇ Yaˬhoˉvaˬ htaꞈ haꞈ tcuh gaˇ ve kʼo, nawˬ Yaˬhoˉvaˬ htaꞈ haꞈ ve tehꞈ yaˇ mawˬ tuˬ gʼa te maˍ piˇ ve yoˬ.

8-9. Eh˗don leh Eh˗maˇ kʼoˆ ve awˬ lawn nawˬ htaꞈ aˬ htoꞈ ma maˍ laˇ ve le?

⁸ Yaˇ Yaˬhoˉvaˬ htaꞈ haꞈ tuˬ awˬ pa awˬ e maˍ piˇ gʼa ve laiˉ hkʼaˇ cawˬ ve yoˬ. Awˬ viˉ awˬ nyi yaˇ nehˬ Eh˗don meh ve 17 hkʼawꞈ gaˬ˗oˬ ve kʼoˆ ve, “bon lawˬ ve a yeˇ hkʼaˬ hkʼe taw uiˍ ve ngaˬ pa ngaˬ e hkʼaˬ htaˆ kʼaꞈ ngaˬ htaꞈ kʼoˆ laˇ ve yoˬ. Teˇ haˉ le le ngaˬ bon lawˬ˗oˬ ve htawˇ, ngaˬ pa ngaˬ geh bon lawˬ laˇ sheˍ ve yoˬ. Ngaˬ pa ngaˬ e ngaˬ leh ngaˬ nyi ma htaꞈ kʼoˆ laˇ ve, ‘yaˇ˗oˬ Yaˬhoˉvaˬ geh bon hkʼaˬ htaˆ lawˬ kaꞈ gʼa ve mehˬ.’ Chi ve ngaˬ hkʼaˬ htaˆ kaꞈ tawnˇ gʼa ve yoˬ. Awˬ lawn kʼo, ngaˬ yaˇ ehˉ htaˇ kaꞈ bon lawˬ ve ngaˬ pa ngaˬ e hkʼaˬ htaˆ kaꞈ kʼoˆ laˇ ve yoˬ. Hkʼe te leh, chi teˇ hkui ngaˬ Yaˬhoˉvaˬ geh bon lawˬ ve nyi ma sha jaˇ leh Yaˬhoˉvaˬ lehˬ ngaˬ htaꞈ haꞈ jaˇ ve Awˬ pa hpehꞈ ve yoˬ.” Awˬ pa awˬ e hpehꞈ ve chaw˗oˬ, nawˬ Yaˬhoˉvaˬ htaꞈ haꞈ ve nawˬ dawˇ taˍ ve aꞈ kehˉ nawˬ ve yaˇ awˬ pon awˬ bon cawˬ jaˇ.

⁹ Eh˗maˇ ve awˬ lawn htaꞈ teˇ geh nyi sheˍ. Yawˇ ve awˬ pa yehˬ kʼa htaꞈ baˬ taˉ laˇ leh jeˬ kaꞈ cha jaˇ leh awˬ e teˇ gʼaˇ tiˉ gʼa shehˍ ve yoˬ. Eh˗maˇ kʼoˆ ve, “laiˉ pawˆ kʼo ngaˬ e hpu maˇ cawˬ. Yaˬhoˉvaˬ yawˇ ve kanˉ te ve chaw htaꞈ hkʼaˬ hkʼe nyi haꞈ shaˉ piˇ ve ngaˬ e ngaˬ htaꞈ hkʼaˬ htaˆ kaꞈ kʼoˆ maˍ laˇ ve yoˬ. Leh ngaˬ e awˬ tehˬ awˬ na chi hkʼe yonˍ ve tehꞈ ngaˬ mawˬ tuˬ te laˇ ve yoˬ. Ngaˬ e ngaˬ htaꞈ maˍ laˇ ve hkʼe hkʼaˬ htaˆ kaꞈ te ve yoˬ.” Chi aˬ htoꞈ ma henˇ yuˬ gʼa ve le? Tuꞈ ve hkanˍ ve gʼa hpuˇ ve htawˇ, awˬ pa awˬ e lehˬ yaˇ awˬ pon daꞈ ve henˇ yuˬ tuˬ hpehꞈ gʼa ve yoˬ.—Gaˍlaˍtiˆ 6:9.

10. Iˉsaˍreˍlaˆ chaw yaˇ geh Yaˬhoˉvaˬ ve awˬ lawn yaw daꞈ ve hkʼaˬ hkʼe htaˇ le? (Bon maˍ ve 6:6, 7)

¹⁰ Awˬ liˇ awˬ hkʼaˇ 3 ceuˬ teˇ ceuˬ lehˬ, yaˇ geh hkʼaˬ htaˆ kaꞈ yaw daꞈ sheˍ. Yaˬhoˉvaˬ Iˉsaˍreˍlaˆ chaw htaꞈ kʼoˆ piˇ ve, yawˇ htaꞈ caˉ daꞈ ve awˬ lawn yaˇ htaꞈ hkʼaˬ htaˆ kaꞈ maˍ piˇ sheˍ. (Bon maˍ ve 6:6, 7 gʼaw sheˍ.) Awˬ pa awˬ e lehˬ yaˇ Yaˬhoˉvaˬ htaꞈ haꞈ tuˬ maˍ piˇ ve awˬ yanˇ cawˬ maˇ jaˇ. Tawˇ pa haˉ te kʼo, Iˉsaˍreˍlaˆ chaw ve awˬ co˗e htaˇ, muiˬ caˇ vaˇ caˇ ve hpawˇ yaˇ paˍ lehˬ awˬ pa geh gʼa ga ve yoˬ. Yaˇ miˇ kʼo awˬ e geh mawˇ gʼa tawˉ leh aˉ hkʼaw ve kanˉ kaꞈ gʼa ga te ve yoˬ. Awˬ pa awˬ e yaˇ geh tawˇ yaw daꞈ ve awˬ yanˇ cawˬ htaˇ, yawˇ hui yaˇ htaꞈ a yeˇ uiˍ ve laiˉ lawn maˍ piˇ tuˬ awˬ yanˇ cawˬ ve yoˬ. Tawˇ pa haˉ te kʼo, Yaˬhoˉvaˬ yawˇ hui ve yehˬ kʼa htaꞈ hkʼaˬ hkʼe te nyi haꞈ shaˉ laˇ ve leh Yaˬhoˉvaˬ hkʼaˬ hkʼe ma daꞈ ve teˇ geh yaw daꞈ ve awˬ yanˇ cawˬ ve yoˬ.

11. Awˬ pa awˬ e yaˇ geh tawˇ yaw daꞈ gʼa tuˬ awˬ yanˇ cawˬ ve hkʼaˬ hkʼe htaˇ le?

¹¹ Chi beuꞈ teˇ co˗e awˬ pa awˬ e leh yaˇ hkʼaˬ htaˆ kaꞈ teˇ geh maˇ gʼa chehˇ. Awˬ pa awˬ e kanˉ te ve leh yaˇ kʼo liꞈ henˇ˗e ve yoˬ. Hkʼe te leh, awˬ pa awˬ e yaˇ geh tawˇ yaw daꞈ tuˬ awˬ yanˇ gʼa ca ve yoˬ. (Eˇfeˇsuꞈ 5:15, 16; Hpiˇliˇpiˆ 1:10) Awˬ pa awˬ e lehˬ yehˬ kʼa hkʼaw oˉ kʼoˍ pui htaˇ, awˬ yanˇ chi ve htaꞈ yehˇ leh yaˇ geh tawˇ yaw daꞈ ve yoˬ. Awˬ viˉ awˬ nyi yaˇ nehˬ A˗leˆ˗sai˗dawˆ meh ve kʼoˆ ve, “ngaˬ pa lehˬ yehˬ kʼa hkʼaw oˉ kʼoˍ pui ve hkʼaˬ  htaˆ kaꞈ a yeˇ uiˍ jaˇ tehꞈ shawˍ ve yoˬ. Awˬ yanˇ chi ve htaꞈ ngaˬ pa lehˬ teˇ ceuˬ kaꞈ maˇ tawˍ laˇ tcuh. Yehˬ kʼa hkʼaw oˉ kʼoˍ pui ve te peuˬ hkʼawꞈ nawˉ, tawˇ teˇ geh yaw daꞈ sheˍ ve yoˬ.”

12. Yehˬ kʼa hkʼaw oˉ kʼoˍ pui htaˇ, yehˬ shehˍ hpaˇ lehˬ coˇ caˇ leh aˬ htoꞈ ma te cawˇ ve le?

¹² Nawˬ yehˬ shehˍ hpaˇ hpehꞈ ve kʼo, yehˬ kʼa hkʼaw oˉ kʼoˍ pui htaˇ yaˇ dawˇ cawˇ tuˬ nawˬ hkʼaˬ hkʼe te cawˇ ve le? Nawˬ ve a shaꞈ co co taiˍ taiˍ ha lehˬ gʼa ve! tehꞈ kʼoˆ ve liꞈ kʼoˆ yehˬ kʼa hkʼaw oˉ kʼoˍ pui htaˇ yehˇ jaw˗oˬ laˇ? Liꞈ kʼoˆ chi ve lehˬ nawˬ hui tawˇ hkʼa dehꞈ yaw daꞈ gʼa tuˬ ga laˇ ve yoˬ. Yaˇ hkʼaˬ hkʼe dawˇ ve leh aˬ htoꞈ ma awˬ lawn htaꞈ dawˇ hkiˉ ve nawˬ htaꞈ kʼoˆ laˇ tcuh gaˇ ve kʼo, yehˬ kʼa hkʼaw oˉ kʼoˍ pui htaˇ yaˇ htaꞈ taˇ deˇ. Yaˇ kʼoˆ ve awˬ ceuˬ teˇ ceuˬ ceuˬ Liꞈ hpu hkʼaw ve awˬ liˇ awˬ hkʼaˇ htaꞈ maˇ hawˍ daꞈ ve kʼo, yaˇ hkʼaˬ hkʼe dawˇ ve hteˇ˗ehˬ kʼoˆ laˇ haˆ ve awˬ bon uiˍ jaˇ tehꞈ kʼoˆ piˇ sheˍ. Yaˇ kʼoˆ laˇ ve awˬ ceuˬ hkʼaˬ htaˆ kaꞈ na gaˇ ve tehꞈ kʼoˆ piˇ sheˍ. Yaˇ aˬ htoꞈ ma dawˇ ve nawˬ shiˍ htaˇ, nawˬ yaˇ htaꞈ hkʼa dehꞈ ga piˇ gʼa tuˬ yoˬ.

13. Yaˇ Yaˬhoˉvaˬ geh hkʼa dehꞈ meuˆ daꞈ gʼa tuˬ, awˬ pa awˬ e ga piˇ gʼa ve awˬ yanˇ hkʼaˬ hkʼe htaˇ cawˬ sheˍ ve le?

¹³ Awˬ pa awˬ e hpehꞈ ve chaw˗oˬ, yaˇ Yaˬhoˉvaˬ geh hkʼa dehꞈ meuˆ daꞈ gʼa tuˬ nawˬ ga piˇ gʼa ve awˬ yanˇ hkʼaˬ htaˆ kaꞈ ca sheˍ. Yaˇ htaꞈ Liꞈ hpu maˍ piˇ htaˇ ceh tiˉ Yaˬhoˉvaˬ ve awˬ lawn maˍ piˇ ve taˇ te. Awˬ e teˇ gʼaˇ Li˗shaˇ kʼoˆ ve, “ngaˬ hui awˬ paˇ awˬ kui lo ve awˬ ceuˬ teˇ hpaˍ htaꞈ yehˇ leh yaˇ htaꞈ Yaˬhoˉvaˬ ve awˬ lawn hkʼaˬ htaˆ kaꞈ maˍ piˇ ve yoˬ. Tawˇ pa haˉ te kʼo, hpuiˇ yaˇ gʼuiˬ yawˬ tuˬ te maˍ piˇ htaˇ mawˬ˗aw laˇ, Yaˬhoˉvaˬ Gʼuiˬ sha lehˬ ha lehˬ ve Gʼuiˬ sha hpehꞈ ve tehꞈ yaˇ htaꞈ kʼoˆ maˍ piˇ ve yoˬ. Yaˬhoˉvaˬ lehˬ nyi ma daꞈ leh chi hkʼe ve htaꞈ dawˇ cawˇ ve yoˬ. Ngaˬ hui kaꞈ yawˇ htaꞈ shuˍ daꞈ ve yoˬ.”

14. Yaˇ daꞈ ve awˬ chawˇ leuˆ tuˬ awˬ pa awˬ e ga piˇ ve aˬ htoꞈ ma te daꞈ jaˇ ve le? (Tawˇ naˉ ve 13:20)

¹⁴ Awˬ liˇ awˬ hkʼaˇ 4 ceuˬ teˇ ceuˬ lehˬ, yaˇ daꞈ ve awˬ chawˇ cawˬ tuˬ ga piˇ sheˍ. Liꞈ hpu hkʼaw kʼoˆ ve, awˬ chawˇ lehˬ daꞈ ve hpawˇ leh maˇ daꞈ ve hpawˇ kaꞈ heuˆ la kuiˬ cawˬ jaˇ. (Tawˇ naˉ ve 13:20 gʼaw sheˍ.) Chi hkʼe hpehꞈ ve kʼo awˬ pa awˬ e hpehꞈ ve chaw˗oˬ, yaˇ ve awˬ chawˇ htaꞈ shiˍ daꞈ˗aw laˇ? Yawˇ hui htaꞈ mawˬ jaw˗aw laˇ? Nawˬ yawˇ hui geh tawˇ yaw daꞈ jaw˗aw laˇ? Yaˇ Yaˬhoˉvaˬ htaꞈ haꞈ ve awˬ chawˇ cawˬ tuˬ nawˬ gʼa ga piˇ cawˇ ve yoˬ. Yaꞈ hkʼaˇ, chi ve nawˬ hkʼaˬ hkʼe te gʼa tuˬ le? (1 Kawˇrenˍhtuˆ 15:33) Awˬ hkʼaˇ 1  hkʼaˇ lehˬ Yaˬhoˉvaˬ htaꞈ haꞈ ve chaw nawˬ ve aˉ hkʼaw lo teˇ ceuˬ ceuˬ teˇ geh te tuˬ jehˬ piˇ sheˍ.—Chiˇ mvuh ve 119:63.

15. Yaˇ daꞈ ve awˬ chawˇ cawˬ tuˬ awˬ pa awˬ e hkʼaˬ hkʼe ga piˇ gʼa ve le?

¹⁵ Awˬ pa teˇ gʼaˇ Hto˗niˇ meh ve awˬ lawn htaꞈ teˇ geh nyi sheˍ. Yawˇ leh awˬ miˇ ma yaˇ daꞈ ve awˬ chawˇ cawˬ tuˬ ga piˇ ve yoˬ. Yawˇ kʼoˆ ve, “peuˬ laˬ ve laiˉ hkʼawꞈ htaˇ, ngaˬ leh ngaˬ miˇ ma lehˬ, hawˉ hkʼaˆ, yaˇ miˇ, yaˇ ehˉ, leh chaw mawˇ ngaˬ hui ve aˉ hkʼaw lo guiˇ la tuˬ jehˬ piˇ ve yoˬ. Yawˇ hui ngaˬ hui geh awˍ teˇ geh caˇ leh yehˬ kʼa hkʼaw oˉ kʼoˍ pui ve teˇ geh te ve yoˬ. Chi hkʼe te htaˇ ngaˬ hui ve yehˬ kʼa Yaˬhoˉvaˬ htaꞈ haꞈ ve chaw htaꞈ shiˍ daꞈ leh yawˇ ve kanˉ gʼa te ve ha lehˬ jaˇ. Laiˉ pawˆ kʼo, toˇ nyi shehˍ hpaˇ, miˍshenˍnaˍliˍ, leh awˬ nu ve awˬ viˉ awˬ nyi ngaˬ hui ve aˉ hkʼaw lo haˉ la tuˬ jehˬ piˇ ve yoˬ. Yawˇ hui Yaˬhoˉvaˬ ve kanˉ htaꞈ haꞈ ve, kaiˬ ve hkʼaw Yaˬhoˉvaˬ ve kanˉ te ve, leh awˬ yanˇ hkʼaˬ hkʼe taw yuˬ tanˇ ve htaꞈ yaˇ teˇ hpaˍ gʼa kaˇ leh gʼa mawˬ ve yoˬ. Chi ngaˬ hui ve yaˇ Yaˬhoˉvaˬ geh hkʼa dehꞈ meuˆ daꞈ tuˬ ga piˇ gʼa jaˇ.” Awˬ pa awˬ e hpehꞈ ve chaw˗oˬ, nawˬ ve yaˇ daꞈ ve awˬ chawˇ cawˬ tuˬ gʼa ga piˇ cawˇ ve yoˬ.

16. Yaˇ Yaˬhoˉvaˬ ve kanˉ maˇ te gaˇ˗oˬ ve tehꞈ kʼoˆ laˇ ve kʼo, awˬ pa awˬ e hkʼaˬ hkʼe te cawˇ ve le?

¹⁶ Nawˬ te gʼa ve hkʼe coˇ caˇ leh te˗oˬ htaˇ, yaˇ Yaˬhoˉvaˬ ve kanˉ maˇ te gaˇ˗oˬ ve tehꞈ kʼoˆ laˇ ve kʼo, hkʼaˬ hkʼe te tuˬ ve le? Nawˬ daꞈ ve awˬ pa awˬ e maˇ hpehꞈ ve tehꞈ taˇ dawˇ. Ngaˬ hui teˇ gʼaˇ le le Yaˬhoˉvaˬ ve kanˉ te tuˬ ve laˇ, a shu yawˇ hkʼaˇ yawˇ dawˇ cheˆ tuˬ Yaˬhoˉvaˬ a hkaw˗anˬ peꞈ laˇ ve yoˬ. Nawˬ ve yaˇ kaꞈ yawˇ hkʼaˇ yawˇ gʼa leuˆ yuˬ cawˇ ve yoˬ. Yawˇ Yaˬhoˉvaˬ ve kanˉ te tuˬ maˇ leuˆ yuˬ ve kʼo, yawˇ htaꞈ maˇ dawˇ law ve taˇ te. Teˇ nyi kʼo, yawˇ kaꞈ Yaˬhoˉvaˬ geh kʼawꞈ kʼawꞈ la tuˬ naˍ maˇ shiˍ. Yeˍsuˆ tawˇ pa haˉ tehˆ maˍ laˇ taˍ ve hkʼaw mehˉ kʼai taˍ ve yaˇ paˍ hkʼa shuˍ yawˇ lehˬ miˬ guiˬ ha lehˬ tuˬ te ponˬ te leuˉ ve yoˬ. Yaꞈ hkʼaˇ, awˬ leh meuˇ htaˇ yawˇ awˬ pa geh kʼawꞈ kʼawꞈ la ve yoˬ. (Luˉkaꞈ 15:11-19, 22-24) Leh chaw teˇ hpaˍ kʼoˆ ve, “chi lehˬ tawˇ pa haˉ tehˆ maˍ laˇ ve ceh hpehꞈ ve yoˬ. Ngaˬ ve yaˇ awˬ tehˬ awˬ na chi hkʼe te kʼawꞈ la tuˬ ve laˇ?” Awˬ viˉ awˬ nyi Eˇliˇ ve awˬ lawn chi hkʼe hpehꞈ ve tehꞈ ngaˬ hui na gʼa tuˬ ga laˇ ve yoˬ.

17. Eˇliˇ ve awˬ lawn nawˬ htaꞈ awˬ gʼaˇ hkʼaˬ hkʼe peꞈ laˇ ve le?

 ¹⁷ Eˇliˇ yawˇ awˬ pa awˬ e htaꞈ kʼoˆ ve, “ngaˬ pa ngaˬ e ngaˬ Yaˬhoˉvaˬ htaꞈ haꞈ leh Liꞈ hpu hkʼaw yawˇ ve tawˇ hkawˇ htaꞈ haꞈ tuˬ kaꞈ maˍ laˇ ve yoˬ. Yaꞈ hkʼaˇ, ngaˬ yaˇ nehˬ hpehꞈ htaˇ, ngaˬ pa ngaˬ e hkawˇ maˇ na.” Yawˇ maˇ daꞈ ve laiˉ ceuˬ te leh awˬ pa awˬ e maˇ shiˍ tuˬ faˉ taˍ ve yoˬ. Awˬ pa awˬ e shiˍ htaˇ yawˇ hui coˇ caˇ leh yawˇ htaꞈ ga piˇ ve yoˬ. Yaꞈ hkʼaˇ, yawˇ maˇ na. Peuˬ hkʼawꞈ nawˉ, yawˇ yehˬ hkʼaw tawˆ˗e leh maˇ daꞈ ve laiˉ ceuˬ kʼawꞈ te sheˍ ve yoˬ. Yaꞈ hkʼaˇ, laiˉ pawˆ kʼo Liꞈ hpu hkʼaw ve awˬ lawn yawˇ awˬ chawˇ teˇ gʼaˇ geh kʼawꞈ yaw daꞈ sheˍ ve yoˬ. Yawˇ kʼoˆ ve, “ngaˬ Yaˬhoˉvaˬ ve awˬ lawn awˬ chawˇ htaꞈ hkʼa dehꞈ kʼoˆ maˍ piˇ htaˇ, Yaˬhoˉvaˬ htaꞈ kʼawꞈ dawˇ nawˇ la ve yoˬ. Liꞈ hpu hkʼaw awˬ tehˬ ve awˬ lawn ngaˬ pa ngaˬ e coˇ caˇ leh ngaˬ ve nyi ma hkʼaw awˬ meu˗eˇ awˬ meu˗eˇ cawˬ tuˬ ga laˇ ve yoˬ. Peuˬ hkʼawꞈ nawˉ nyi˗a kʼo hpehꞈ kʼai maˇ gʼa ve awˬ ceuˬ kʼawꞈ hpehꞈ la ve yoˬ. Maˇ maw gaˬ leh Eˇliˇ kaꞈ Yaˬhoˉvaˬ geh kʼawꞈ kʼawꞈ la ve yoˬ.” * Yawˇ ve awˬ pa awˬ e ha lehˬ jaˇ leh yawˇ yaˇ ehˉ htaˇ Yaˬhoˉvaˬ htaꞈ haꞈ tuˬ coˇ caˇ leh maˍ piˇ ve awˬ hpfuhˇ hkʼawꞈ jaˇ!—2 Tiˆmoˉseˍ 3:14, 15.

18. Awˬ pa awˬ e coˇ caˇ leh yaˇ Yaˬhoˉvaˬ htaꞈ haꞈ tuˬ maˍ piˇ ve nawˬ hkʼaˬ hkʼe dawˇ ve le?

¹⁸ Awˬ pa awˬ e hpehꞈ ve chaw˗oˬ, nawˬ daꞈ jaˇ ve awˬ vuiˬ cawˬ ve yoˬ. Yaˇ Yaˬhoˉvaˬ ve kanˉ te tuˬ maˍ piˇ ve nawˬ awˬ vuiˬ cawˬ ve yoˬ. (Chiˇ mvuh ve 78:4-6) Chi sha ve maˇ heˆ tehꞈ ngaˬ hui shiˍ ve yoˬ. Yaˇ htaꞈ maˍ piˇ tuˬ nawˬ awˬ gʼaˇ awˬ shaˉ yuˬ tanˇ ve htaꞈ ngaˬ hui chiˇ mvuh laˇ gaˇ ve yoˬ. Yaˇ Yaˬhoˉvaˬ htaꞈ haꞈ leh yawˇ ve hkawˇ na yuˬ tuˬ nawˬ te gʼa ve hkʼe coˇ caˇ leh maˍ piˇ ve kʼo, nawˬ htaꞈ haꞈ ve Yaˬhoˉvaˬ nawˬ htaꞈ nyi hkʼaˇ suh jaˇ tehꞈ yonˍ gʼa ve yoˬ.—Eˇfeˇsuꞈ 6:4.