1. Chaw yaˇ teˇ gʼaˇ le le a yeˇ uiˍ jaˇ ve awˬ lawn aˬ htoꞈ ma gʼa dawˇ cheˆ cawˇ ve le?

 Chi beuꞈ teˇ co˗e chaw yaˇ teˇ gʼaˇ le le a yeˇ uiˍ jaˇ ve awˬ lawn gʼa dawˇ cheˆ cawˇ ve yoˬ. Yaˬhoˉvaˬ mvuhˇ naw ma miˬ naˆ ma htaꞈ uˉ peunˍ keunˍ ve tehꞈ yawˇ hui awˬ gʼaˇ piˇ leh Saˍtanˍ Gʼuiˬ sha ve canˇ paˍ hpehꞈ ve tehꞈ yawˇ hui awˬ gʼaˇ piˇ tuˬ laˇ? Chaw teˇ gʼaˇ le le hkʼaˬ ve teˇ hpawˇ lo chehˇ tuˬ gʼa leuˆ cawˇ ve yoˬ. Yawˇ hui hkʼaˬ ve hpawˇ chehˇ tuˬ leuˆ ve htawˇ maˇ kʼoˆ, awˬ gʼuˇ suhˍ hpawˇ co co taiˍ taiˍ a shaꞈ gʼa tuˬ ve laˇ? (Maꞈhtehˍ 25:31-33, 46) “Uiˍ jaˇ ve tuꞈ ve hkanˍ ve” awˬ yanˇ htaˇ chaw yaˇ teˇ gʼaˇ le le gʼa ponˬ tuˬ, maˇ heˆ leh te luˬ tuˬ, awˬ maiˉ gʼa tuˬ yoˬ.—Hpeuꞈ maˍ ve 7:14; 14:9-11; Yeˍsaˍkeˍlaˆ 9:4, 6.

2. (a) Heˍbrehˇ liꞈ 10:35-39 hkʼaw ngaˬ hui htaꞈ aˬ htoꞈ ma te kʼoˆ laˇ ve le? (b) Hpeuꞈ maˍ ve liꞈ ngaˬ hui htaꞈ hkʼaˬ hkʼe ga laˇ ve le?

² Heˍbrehˇ liꞈ 10:35-39 gʼaw sheˍ. Yaˬhoˉvaˬ uˉ peunˍ ve hpawˇ awˬ gʼaˇ piˇ tuˬ nawˬ leuˆ ve kʼo, nawˬ leuˆ ve cuˇ yiˍ cawˬ jaˇ. Laiˉ gʼaˇ nawˬ hkʼa shuˍ dawˇ cheˆ tuˬ nawˬ ga piˇ gaˇ ve yoˬ. Hpeuꞈ maˍ ve liꞈ hkʼaw ve awˬ lawn teˇ hpaˍ yehˇ leh ngaˬ hui yawˇ hui htaꞈ ga piˇ gʼa ve yoˬ. Awˬ lawn kʼo, liꞈ chi ve hkʼaw Yaˬhoˉvaˬ htaꞈ tawˍ ve chaw aˬ htoꞈ ma hpehꞈ la tuˬ shiˍ leh Yaˬhoˉvaˬ hpawˇ chehˇ ve chaw aˬ htoꞈ ma awˬ bon gʼa tuˬ kaꞈ shiˍ ve yoˬ. Chi htaꞈ pa taw, awˬ lawn chi htaꞈ caˉ daꞈ ve ngaˬ hui henˇ tuˬ a yeˇ uiˍ jaˇ. Awˬ lawn kʼo, chi ve lehˬ ngaˬ hui Yaˬhoˉvaˬ ve kanˉ caˉ leh hkʼa dehꞈ te gʼa tuˬ ga laˇ ve yoˬ. Awˬ nu ve chaw Yaˬhoˉvaˬ ve hpawˇ chehˇ tuˬ leuˆ leh ngaˬ hui hkʼa shuˍ Yaˬhoˉvaˬ ve kanˉ caˉ leh te tuˬ ga piˇ gʼa ve yoˬ.

3. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

³ Awˬ lawn chi ve hkʼaw na hkawˇ chi ve teˇ hpaˍ htaꞈ ngaˬ hui teˇ geh henˇ tuˬ yoˬ. Gʼuiˬ sha uˉ peunˍ ve htaꞈ awˬ gʼaˇ piˇ ve chaw awˬ gʼuˇ suhˍ hpawˇ hkʼaˬ hkʼe hpehꞈ tuˬ le? Hpeuꞈ maˍ ve liꞈ hkʼaw kʼoˆ taˍ ve hkʼe, nyiˉ˗ehˍ ve haiˬ ve to nuˇ to shaˆ htaꞈ awˬ gʼaˇ piˇ ve chaw hkʼaˬ hkʼe hpehꞈ la tuˬ le?

4. Mvuhˇ naw ma hkʼoˆ lo Yeˍsuˆ geh chehˇ ve hkʼaˬ ve teˇ moˍ htaꞈ Yoˇhanˬ mawˬ ve le?

⁴ Yaˬhoˉvaˬ uˉ peunˍ ve htaꞈ awˬ gʼaˇ piˇ ve chaw leh co co taiˍ taiˍ a shaꞈ gʼa tuˬ ve 2 moˍ htaꞈ Yoˇhanˬ zuhꞈ maˆ mawˬ ve yoˬ. Awˉ lawˉ teˇ moˍ lehˬ 144,000 gʼaˇ cawˬ ve yoˬ. (Hpeuꞈ maˍ ve 7:4) Yawˇ hui htaꞈ mvuhˇ naw ma hkʼoˆ Yeˍsuˆ geh teˇ geh uˉ peunˍ tuˬ leuˆ yuˬ leh Gʼuiˬ sha ve mvuhˇ miˬ miˬ guiˬ hkʼoˆ uˉ peunˍ tuˬ ve awˬ moˍ hkʼaw chehˇ ve yoˬ. (Hpeuꞈ maˍ ve 5:9, 10; 14:3, 4) Yawˇ hui Ziˉonˍ hkʼaw hkʼoˆ lo Yeˍsuˆ geh teˇ geh huˉ chehˇ ve htaꞈ Yoˇhanˬ zuhꞈ maˆ mawˬ ve yoˬ.—Hpeuꞈ maˍ ve 14:1.

5. Maˇ maw ve awˬ yanˇ leuˆ yuˬ taˍ ve chaw miˬ guiˬ hkʼoˆ leuˉ taˍ sheˍ ve htaꞈ hkʼaˬ hkʼe hpehꞈ la tuˬ ve le?

⁵ Tcuh yaˇ hui ve awˬ co˗e htaˇ 144,000 gʼaˇ ve hkʼaw chehˇ tuˬ leuˆ ve maˇ ve yoˬ. (Luˉkaꞈ 12:32; Roˉmaꞈ 8:17) Yaꞈ hkʼaˇ, Yoˇhanˬ zuhꞈ maˆ mawˬ ve hkʼaw chaw chi teˇ moˍ miˬ guiˬ hkʼoˆ leuˉ taˍ sheˍ ve yoˬ. Awˬ lawn kʼo, maˇ˗awˍ ve chaw Gʼuiˬ sha ve kanˉ ka tiꞈ yeˬ ve hkʼaw te leh mvuhˇ naw ma hkʼoˆ taˆ˗e peuˬ. “Cawˬ taˍ sheˍ ve” chaw uiˍ jaˇ ve tuꞈ ve hkanˍ ve awˬ leh meuˇ teˇ pawˆ tanˬ˗a te htaˇ, “yinˉ tcuhˉ” piˇ ve htaꞈ gʼa tuˬ yoˬ. (Hpeuꞈ maˍ ve 7:2, 3; 12:17) Uiˍ ve tuꞈ ve hkanˍ ve awˬ yanˇ oˇ ve hkʼaw 144,000 gʼaˇ biˇ htaˇ hkʼa gaˬ leuˆ yuˬ tuˬ yoˬ. Yawˇ hui hkʼa peu˗eˬ Gʼuiˬ sha ve mvuhˇ miˬ hkʼaw Yeˍsuˆ geh teˇ geh uˉ peunˍ tuˬ yoˬ.—Maꞈhtehˍ 24:31; Hpeuꞈ maˍ ve 5:9, 10.

6-7. (a) Yoˇhanˬ mawˬ ve awˬ nu ve teˇ moˍ a shu hpehꞈ ve le? Leh yawˇ hui htaꞈ caˉ daꞈ ve ngaˬ hui aˬ htoꞈ ma shiˍ gʼa ve le? (b) Leuˆ yuˬ taˍ ve chaw leh “chaw awˬ moˍ lonˉ” Hpeuꞈ maˍ ve liꞈ kaˇ nanˉ uiˍ 7 htaꞈ aˬ htoꞈ ma te a yeˇ yuˬ cawˇ ve le?

⁶ Yoˇhanˬ 144,000 gʼaˇ htaꞈ mawˬ peuˬ hkʼawꞈ nawˉ, yawˇ awˬ nu ve teˇ moˍ kaꞈ mawˬ sheˍ ve yoˬ. Yawˇ hui lehˬ, “chaw teˇ gʼaˇ kaꞈ gʼaw maˇ gʼa ve awˬ moˍ lonˉ” hpehꞈ ve yoˬ. (Hpeuꞈ maˍ ve 7:9, 10) Yoˇhanˬ gʼa kaˇ ve, “chaw chi teˇ hpaˍ lehˬ, uiˍ jaˇ ve tuꞈ ve hkanˍ ve awˬ hkʼaw lo tawˆ la leh, a shu yawˇ ve aˉ poꞈ zuhˬ ma htaꞈ Yawˬ ehˉ ve awˬ suhˍ awˬ hkʼaw lo tsuhˇ hpu taˍ peuˬ ve chaw hui hpehꞈ ve yoˬ.” (Hpeuꞈ maˍ ve 7:14) Peuˬ hkʼawꞈ nawˉ “chaw awˬ moˍ lonˉ” uiˍ jaˇ ve tuꞈ ve hkanˍ ve htaꞈ gʼa ponˬ˗oˬ htaˇ, yawˇ hui miˬ guiˬ hkʼoˆ lo awˬ bon maˇ maˇ gʼa tuˬ yoˬ.—Chiˇ mvuh ve 37:9-11, 27-29; Tawˇ naˉ ve 2:21, 22; Hpeuꞈ maˍ ve 7:16, 17.

⁷ Ngaˬ hui mvuhˇ naw ma hkʼoˆ taˆ˗e tuˬ leuˆ laˇ ve, maˇ heˆ leh miˬ guiˬ hkʼoˆ co co taiˍ taiˍ dawˇ law kuiˬ cawˬ ve chaw htawˇ maˇ kʼoˆ, Hpeuꞈ maˍ ve liꞈ kaˇ nanˉ uiˍ 7 hkʼaw kʼoˆ taˍ ve hkʼe awˬ yanˇ oˇ ve teˇ yanˇ nawˬ kaꞈ teˇ gʼaˇ oˇ kaˬ lo chehˇ taˍ ve tehꞈ dawˇ mawˬ cawˇ ve yoˬ. Oˇ ve teˇ yanˇ Gʼuiˬ sha ve kanˉ te ve chaw 2 moˍ moˍ awˬ pon ha lehˬ jaˇ tuˬ yoˬ. Ngaˬ hui Yaˬhoˉvaˬ hpawˇ chehˇ ve hkʼaˬ htaˆ kaꞈ ha lehˬ jaˇ ve yoˬ. Tuꞈ jaˇ hkanˍ jaˇ ve htaꞈ caˉ daꞈ ve Hpeuꞈ maˍ ve liꞈ hkʼaw hkʼaˬ hkʼe kʼoˆ taˍ sheˍ ve htaꞈ teˇ geh henˇ tuˬ yoˬ.—Maꞈhtehˍ 24:21.

8. Uiˍ jaˇ ve tuꞈ ve hkanˍ ve hkʼaˬ hkʼe htaˇ tanˬ tuˬ le? Maˇ˗awˍ ve chaw hkʼaˬ hkʼe hpehꞈ tuˬ le?

⁸ Peuˬ taˉ ve teˇ lawn hkʼaw ngaˬ hui gʼa henˇ ve hkʼe, maˇ maw ve awˬ yanˇ mvuhˇ miˬ hkʼoˆ ve kanˇ paˆ lonˉ Uiˍ ve Baˍbuˍlonˍ venˇ htaꞈ te luˬ tuˬ yoˬ. Chi lehˬ miˬ guiˬ hkʼoˆ ve maˇ heˆ heˆ ve bon liˇ hkʼa peu˗eˬ htaꞈ kʼoˆ gaˇ ve yoˬ. (Hpeuꞈ maˍ ve 17:16, 17) Chi lehˬ uiˍ jaˇ ve tuꞈ ve hkanˍ ve tanˬ ve awˬ yanˇ hpehꞈ ve yoˬ. Chi hkʼe hpehꞈ la htaˇ, chaw maˇ maˇ nyi ma pa leh Yaˬhoˉvaˬ ve kanˉ te tuˬ leuˆ yuˬ˗aw laˇ? Maˇ leuˆ yuˬ. Hpeuꞈ maˍ ve liꞈ kaˇ nanˉ uiˍ 6 hkʼaw kʼoˆ ve, Yaˬhoˉvaˬ ve kanˉ maˇ te ve chaw lehˬ, mvuhˇ miˬ hpawˇ ve awˬ moˍ ga laˇ tuˬ htaꞈ ca leh tanˇ kaˬ hpawˇ ve awˬ moˍ ga laˇ tuˬ kaꞈ ca ve yoˬ. Hkʼaw pui lonˉ hkʼa shuˍ yawˇ hui htaꞈ haꞈ shaˉ laˇ tuˬ kaꞈ ca ve yoˬ. Awˬ lawn kʼo, yawˇ hui Yaˬhoˉvaˬ uˉ peunˍ ve hpawˇ awˬ gʼaˇ maˇ piˇ. Yawˇ hui canˇ paˍ hpehꞈ ve tehꞈ Gʼuiˬ sha shawˍ piˇ tuˬ yoˬ.—Luˉkaꞈ 11:23; Hpeuꞈ maˍ ve 6:15-17.

9. Uiˍ jaˇ ve tuꞈ ve hkanˍ ve awˬ yanˇ htaˇ Yaˬhoˉvaˬ ve chaw awˬ nu ve chaw htaꞈ hkʼaˬ hkʼe peun daꞈ tuˬ le? Leh yawˇ hui htaꞈ aˬ htoꞈ ma hpehꞈ la tuˬ le?

⁹ Uiˍ jaˇ ve tuꞈ ve hkanˍ ve awˬ yanˇ htaˇ Yaˬhoˉvaˬ ve chaw awˬ nu ve chaw htaꞈ peun daꞈ tuˬ yoˬ. Yawˇ hui teˇ moˍ ceh tiˉ “haiˬ ve to nuˇ to shaˆ” hpawˇ  maˇ chehˇ leh Yaˬhoˉvaˬ ve kanˉ te chehˇ ve yoˬ. (Hpeuꞈ maˍ ve 13:14-17) Yawˇ hui chi hkʼe te ve pa taw Yaˬhoˉvaˬ htaꞈ tawˍ ve chaw beuꞈ jaˇ tuˬ yoˬ. Laiˉ mvuhˇ miˬ hkʼaw ve kanˇ paˆ cawˬ ve chaw pawnˇ daꞈ leh Yaˬhoˉvaˬ ve chaw htaꞈ te luˬ tuˬ yoˬ. Liꞈ hpu hkʼaw kʼoˆ ve, ca te luˬ la ve chi teˇ moˍ htaꞈ Gawˇgaˆ leh Maˍgawˇgaˆ tehꞈ kuˬ tuˬ yoˬ.—Yeˍsaˍkeˍlaˆ 38:14-16.

10. Hpeuꞈ maˍ ve liꞈ 19:19-21 hkʼaw kʼoˆ taˍ ve hkʼe, Yaˬhoˉvaˬ ve chaw htaꞈ ca te luˬ la ve canˇ paˍ htaꞈ yawˇ hkʼaˬ hkʼe te piˇ tuˬ le?

¹⁰ Peuˬ hkʼawꞈ nawˉ Yaˬhoˉvaˬ hkʼaˬ hkʼe te tuˬ le? Yawˇ kʼoˆ ve, “ngaˬ nyi ma zuhˆ jaˇ tuˬ yoˬ.” (Yeˍsaˍkeˍlaˆ 38:18, 21-23) Hpeuꞈ maˍ ve liꞈ kaˇ nanˉ uiˍ 19 hkʼaw aˬ htoꞈ ma kʼawꞈ hpehꞈ la tuˬ ngaˬ hui htaꞈ kʼoˆ maˍ laˇ taˍ sheˍ ve yoˬ. Yaˬhoˉvaˬ yawˇ ve Yaˇ paˍ htaꞈ peu laˇ leh ngaˬ hui htaꞈ nyi haꞈ shaˉ tcuh leh yawˇ ve canˇ paˍ htaꞈ bawˆ daꞈ tcuh tuˬ yoˬ. Ka tiꞈ yeˬ ve mvuhˇ naw ma tcuh yaˇ leh 144,000 gʼaˇ lehˬ “mvuhˇ naw ma ve maꞈ moˍ maꞈ cuˇ” Yeˍsuˆ geh pawnˇ daꞈ leh Gawˇgaˆ leh Maˍgawˇgaˆ htaꞈ bawˆ tuˬ yoˬ. (Hpeuꞈ maˍ ve 17:14; 19:11-15) Peuˬ leh hkʼaˬ hkʼe hpehꞈ tuˬ le? Yaˬhoˉvaˬ htaꞈ tawˍ ve chaw teˇ gʼaˇ le le co co taiˍ taiˍ te luˬ piˇ tuˬ yoˬ!—Hpeuꞈ maˍ ve 19:19-21 gʼaw sheˍ.

11. Hpeuꞈ maˍ ve liꞈ hkʼaw ve awˬ lawn ngaˬ hui ha lehˬ jaˇ tuˬ te laˇ ve aˬ htoꞈ ma le?

¹¹ Miˬ guiˬ hkʼoˆ lo Gʼuiˬ sha ve kanˉ ka tiꞈ yeˬ ve hkʼaw te ve chaw yawˇ hui gʼa ponˬ ve htaꞈ ha lehˬ jaˇ tuˬ yoˬ. Yaꞈ hkʼaˇ, Gʼuiˬ sha ve canˇ paˍ hkʼa peu˗eˬ htaꞈ te luˬ tuˬ yoˬ. Chi yawˇ hui ha lehꞈ jaˇ tuˬ te piˇ ve yoˬ. Uiˍ ve Baˍbuˍlonˍ venˇ htaꞈ te luˬ htaˇ, mvuhˇ naw ma hkʼoˆ lo ha lehˬ ha kʼa kuˬ ve htawˇ, chi aꞈ kehˉ ha lehˬ jaˇ ve cawˬ sheˍ ve yoˬ. (Hpeuꞈ maˍ ve 19:1-3) Hpeuꞈ maˍ ve liꞈ hkʼaw ha lehˬ jaˇ ve htaꞈ kʼoˆ taˍ ve lehˬ, “yawˬ ehˉ ve hkehˉ caˇ kuiˬ lo kʼai tuˬ kuˬ” laˇ ve yoˬ.—Hpeuꞈ maˍ ve 19:6-9.

12. Hpeuꞈ maˍ ve liꞈ 21:1, 2 hkʼaw kʼoˆ taˍ ve hkʼe, Gʼuiˬ sha ve Yawˬ ehˉ hkehˉ hkʼaˬ htaˆ caˇ tuˬ ve le?

¹² Hkehˉ caˇ ve chi hkʼaˬ hkʼe htaˇ tanˬ tuˬ le? Aˍmaˍgeˍdonˍ tanˬ htaˇ 144,000 gʼaˇ mvuhˇ naw ma hkʼoˆ hkʼa peu˗eˬ chehˇ peuˬ. Yaꞈ hkʼaˇ, awˬ yanˇ chi ve teˇ yanˇ yawˇ hui Gʼuiˬ sha ve Yawˬ ehˉ htaꞈ hkehˉ caˇ ve awˬ yanˇ maˇ gaˬ sheˍ. (Hpeuꞈ maˍ ve 21:1, 2 gʼaw sheˍ.) Aˍmaˍgeˍdonˍ peuˬ hkʼawꞈ nawˉ leh Gʼuiˬ sha ve canˇ paˍ hkʼa peu˗eˬ htaꞈ te luˬ peuˬ hkʼawꞈ nawˉ Gʼuiˬ sha ve Yawˬ ehˉ hkehˉ caˇ tuˬ yoˬ.—Chiˇ mvuh ve 45:3, 4, 13-17.

13. Gʼuiˬ sha ve Yawˬ ehˉ hkehˉ caˇ ve, chaw haˉ yaˇ miˇ haˉ awˬ pon tcuhˉ kuiˬ aˬ htoꞈ ma cawˬ ve le?

¹³ Gʼuiˬ sha ve Yawˬ ehˉ hkehˉ caˇ ve, chaw haˉ yaˇ miˇ haˉ awˬ pon tcuhˉ kuiˬ aˬ htoꞈ ma cawˬ ve le? Chaw haˉ yaˇ miˇ haˉ heuˆ daꞈ leh teˇ suhˍ teˇ shaˍ tiˉ hpehꞈ ve hkʼa shuˍ, Gʼuiˬ sha ve Yawˬ ehˉ hkehˉ caˇ ve kaꞈ Yeˍsuˆ Jawˇ mawˇ hpehꞈ tuˬ te piˇ leh 144,000 gʼaˇ “yaˇ miˇ haˉ” hpehꞈ leh yawˇ hui teˇ suhˍ teˇ shaˍ tiˉ hpehꞈ tuˬ kaꞈ te piˇ ve yoˬ. Chi lehˬ ha lehˬ jaˇ ve awˬ yanˇ hpehꞈ leh Yeˍsuˆ leh 144,000 gʼaˇ miˬ guiˬ hkʼoˆ 1,000 hkʼawꞈ uˉ peunˍ tuˬ yoˬ.—Hpeuꞈ maˍ ve 20:6.

14-15. Hpeuꞈ maˍ ve liꞈ kaˇ nanˉ uiˍ 21 hkʼaw 144,000 gʼaˇ htaꞈ aˬ htoꞈ ma tehˆ taˍ ve le? (Awˬ htaꞈ hpawˇ ve awˬ han htaꞈ nyi sheˍ.)

¹⁴ Peuˬ hkʼawꞈ nawˉ Hpeuꞈ maˍ ve liꞈ kaˇ nanˉ uiˍ 21 hkʼaw 144,000 gʼaˇ htaꞈ “Yeˍruˆsaˍlehnˍ venˇ awˬ suhˉ” daꞈ jaˇ ve htaꞈ tehˆ taˍ ve yoˬ. (Hpeuꞈ maˍ ve 21:2, 9) Venˇ oˇ ve lehˬ, “awˬ hkuiˉ puiˍ kawˍ taˍ ve haˉ pui 12 shiˍ cawˬ leh, oˇ ve teˇ hpaˍ awˬ hkʼoˆ htaꞈ Yawˬ ehˉ ve tcuh yaˇ 12 gʼaˇ ve awˬ meh cawˬ taˍ ve yoˬ.” Chi aˬ htoꞈ ma te Yoˇhanˬ awˬ pon a yeˇ uiˍ jaˇ ve le? Awˬ lawn kʼo, yawˇ ve awˬ meh kaꞈ haˉ pui teˇ shiˍ hkʼoˆ lo bvuhꞈ taˍ ve htaꞈ gʼa mawˬ ve yoˬ. Yoˇhanˬ yawˇ ve awˬ meh haˉ pui oˇ ve teˇ shiˍ hkʼoˆ bvuhꞈ taˍ ve htaꞈ gʼa mawˬ ve hkʼaˬ hkʼe taw ha lehˬ ve dawˇ nyi sheˍ!—Hpeuꞈ maˍ ve 21:10-14; Eˇfeˇsuꞈ 2:20.

¹⁵ Venˇ oˇ ve lehˬ awˬ nu ve venˇ htaꞈ maˇ shuˍ. Venˇ oˇ ve awˬ hkʼaw lo cawˬ ve yaꞈ kʼaw lonˉ lehˬ daꞈ jaˇ ve shiˍ hpehꞈ ve yoˬ. Yehˬ miˉ 12 maˬ lehˬ piˉ ko˗eˍ shehnˉ 12 shiˍ cawˬ ve yoˬ. Lanˇ venˇ awˬ  hkuiˉ puiˍ kawˍ taˍ ve teˇ hpaˍ awˬ hpfuhˇ hkʼaˆ jaˇ ve piˉ ko˗eˍ shehnˉ yuˬ te taˍ ve yoˬ. Venˇ oˇ ve lehˬ kʼehˬ hpawˇ, zuhˬ hpawˇ, mvuh hpawˇ hkʼa shuˍ hpehꞈ ve yoˬ. (Hpeuꞈ maˍ ve 21:15-21) Yaꞈ hkʼaˇ, venˇ oˇ ve teˇ ceuˬ ceuˬ maˇ cawˬ ve htaꞈ Yoˇhanˬ mawˬ ve yoˬ. Yawˇ kʼoˆ ve, “venˇ oˇ ve awˬ hkʼaw lo bon yehˬ lonˉ htaꞈ ngaˬ maˇ mawˬ. Awˬ lawn kʼo, kanˇ paˆ uiˍ jaˇ ve Jawˇ mawˇ Gʼuiˬ sha leh Yawˬ ehˉ lehˬ, venˇ oˇ ve awˬ hkʼaw lo bon yehˬ lonˉ hpehꞈ ve yoˬ. Venˇ oˇ ve awˬ hkʼaw lo mvuhˇ nyi leh ha pa awˬ gʼeuˆ ba tuˬ maˇ loˍ. Awˬ lawn kʼo, Gʼuiˬ sha ve awˬ meꞈ awˬ hponˇ lehˬ, venˇ oˇ ve htaꞈ awˬ gʼeuˆ ba piˇ leh, Yawˬ ehˉ lehˬ, venˇ oˇ ve awˬ pon kawˆ faiˇ hpehꞈ ve yoˬ.” (Hpeuꞈ maˍ ve 21:22, 23) Yeˍruˆsaˍlehnˍ venˇ awˬ suhˉ htaꞈ shuˍ ve 144,000 gʼaˇ lehˬ Yaˬhoˉvaˬ geh hkʼaˬ htaˆ kaꞈ kʼai gʼa ve yoˬ. Hkʼe te leh, yawˇ hui bon yehˬ lonˉ cawˬ tuˬ maˇ loˍ. Chi hkʼoˆ kaꞈ, yawˇ hui Gʼuiˬ sha ve kanˉ daꞈ kehˬ ve htaꞈ te tuˬ mvuhˇ naw ma hkʼoˆ lo ve Paw hkuˇ lonˉ Yeˍsuˆ lehˬ yawˇ hui htaꞈ sheh kʼai chehˇ ve yoˬ. Hkʼe te leh, Hpeuꞈ maˍ ve liꞈ hkʼaw kʼoˆ ve Yaˬhoˉvaˬ leh Yeˍsuˆ lehˬ venˇ oˇ ve hkʼaw ve bon yehˬ lonˉ hpehꞈ ve yoˬ.—Heˍbrehˇ 7:27; Hpeuꞈ maˍ ve 22:3, 4.

16. Gʼuiˬ sha ve mvuhˇ miˬ uˉ peunˍ ve 1,000 hkʼawꞈ ve awˬ yanˇ hkʼaw chaw yaˇ hkʼaˬ hkʼe hpehꞈ tuˬ le?

¹⁶ Leuˆ yuˬ taˍ ve chaw venˇ oˇ ve htaꞈ dawˇ nyi htaˇ, yawˇ hui ha lehˬ jaˇ ve yoˬ. Yaꞈ hkʼaˇ, miˬ guiˬ hkʼoˆ lo co co taiˍ taiˍ dawˇ law kuiˬ cawˬ ve chaw kaꞈ venˇ oˇ ve htaꞈ a yeˇ yuˬ ve yoˬ. Aˬ htoꞈ ma pa taw le? Awˬ lawn kʼo, Gʼuiˬ sha ve mvuhˇ miˬ uˉ peunˍ ve 1,000 hkʼawꞈ ve awˬ yanˇ hkʼaw “Yeˍruˆsaˍlehnˍ venˇ awˬ suhˉ” miˬ guiˬ hkʼoˆ lo awˬ bon maˇ maˇ gʼa tuˬ te laˇ tuˬ yoˬ. Yoˇhanˬ mawˬ ve, ‘a shaꞈ teꞈ piˇ lawˬ ve iˉ kaˆ lawˬ’ leh ‘iˉ kaˆ lawˬ oˇ ve nyiˇ hpawˇ hpawˇ lo a shaꞈ teꞈ piˇ lawˬ ve iˉ shiˍ cehˬ cawˬ ve yoˬ.’ Oˇ kaˬ lo ve suhˆ cehˬ “awˬ hpaꞈ teˇ hpaˍ lehˬ, chaw ceuˬ teˇ hpaˍ ve naˬ ve gawˬ ve htaꞈ gu na˗e piˇ tuˬ awˬ pon” hpehꞈ ve tehꞈ Yoˇhanˬ mawˬ ve yoˬ. (Hpeuꞈ maˍ ve 22:1, 2) Oˇ ve teˇ yanˇ a shaꞈ teꞈ ve chaw lehˬ daꞈ ve awˬ bon maˇ maˇ gʼa tuˬ yoˬ. Yaˬhoˉvaˬ hkawˇ na yuˬ ve chaw teˇ gʼaˇ le le awˬ meu˗eˇ awˬ meu˗eˇ biˇ ve chaw hpehꞈ la tuˬ yoˬ. Naˬ ve gawˬ ve, nyi ma luˬ ve, chaw teˇ gʼaˇ kaꞈ gʼa kʼawꞈ hpuˇ tuˬ ve maˇ heˆ.—Hpeuꞈ maˍ ve 21:3-5.

17. Hpeuꞈ maˍ ve liꞈ 20:11-13 hkʼaw kʼoˆ taˍ ve hkʼe, 1,000 hkʼawꞈ ve awˬ yanˇ hkʼaw a shu awˬ bon gʼa tuˬ le?

¹⁷ Daꞈ ve awˬ ceuˬ chi teˇ hpaˍ htaꞈ awˬ bon gʼa tuˬ a shu le? Awˉ lawˉ teˇ moˍ lehˬ Aˍmaˍgeˍdonˍ htaꞈ ponˬ ve chaw awˬ moˍ lonˉ leh miˬ guiˬ awˬ suhˉ hkʼaw paw la ve yaˇ ehˉ teˇ hpaˍ yoˬ. Yaꞈ hkʼaˇ, chi hkʼe ceh tiˉ maˇ heˆ. Hpeuꞈ maˍ ve liꞈ kaˇ nanˉ uiˍ 20 hkʼaw suh ve chaw teˇ hpaˍ kaꞈ kʼawꞈ teꞈ tu la piˇ tuˬ  ka tiꞈ te taˍ ve yoˬ. (Hpeuꞈ maˍ ve 20:11-13 gʼaw sheˍ.) “Hteˇ ve chaw” lehˬ Yaˬhoˉvaˬ ve kanˉ suh htaˇ hkʼa gaˬ te ve chaw htaꞈ kʼoˆ gaˇ ve yoˬ. “Maˇ hteˇ ve chaw” lehˬ Yaˬhoˉvaˬ ve awˬ lawn maˇ gʼa kaˇ jaw ve chaw htaꞈ miˬ guiˬ hkʼoˆ teˇ pawˆ kʼawꞈ teꞈ tu la piˇ tuˬ ve htaꞈ kʼoˆ gaˇ ve yoˬ. (Tcuh yaˇ 24:15; Yoˇhanˬ 5:28, 29) Chi kʼoˆ gaˇ ve lehˬ, suh˗oˬ ve chaw teˇ gʼaˇ le le htaꞈ 1,000 hkʼawꞈ ve awˬ yanˇ hkʼaw kʼawꞈ teꞈ tu la piˇ tcuh˗aw laˇ? Maˇ teꞈ tu la tcuh piˇ. Yaˬhoˉvaˬ htaꞈ shiˍ˗oˬ ve chaw lehˬ yawˇ ve kanˉ te tuˬ maˇ leuˆ yuˬ ve pa taw miˬ guiˬ awˬ suhˉ hkʼaw chehˇ maˇ keunˍ.—Maꞈhtehˍ 25:46; 2 Hteˇsaˍlawˇniˆ 1:9; Hpeuꞈ maˍ ve 17:8; 20:15.

18. 1,000 hkʼawꞈ peuˬ hkʼawꞈ nawˉ miˬ guiˬ hkʼoˆ hkʼaˬ hkʼe hpehꞈ tuˬ le?

¹⁸ 1,000 hkʼawꞈ peuˬ hkʼawꞈ nawˉ miˬ guiˬ hkʼoˆ chehˇ ve chaw teˇ gʼaˇ le le biˇ ve chaw hpehꞈ tuˬ yoˬ. Aˍdanˍ te taˍ ve venˇ baˆ chaw teˇ gʼaˇ kaꞈ gʼa kʼawꞈ hpuˇ tuˬ ve maˇ heˆ. (Roˉmaꞈ 5:12) Aˍdanˍ te taˍ ve venˇ baˆ hkʼa peu˗eˬ htaꞈ te luˬ piˇ tuˬ yoˬ. Chi Hpeuꞈ maˍ ve liꞈ hkʼaw kʼoˆ taˍ ve hkʼe, yawˇ hui “kʼawꞈ teꞈ tu la” tuˬ yoˬ. Awˬ lawn kʼo, 1,000 hkʼawꞈ ve awˬ yanˇ peuˬ hkʼawꞈ nawˉ teˇ gʼaˇ le le biˇ ve chaw hpehꞈ tuˬ yoˬ.—Hpeuꞈ maˍ ve 20:5.

19. Aˬ htoꞈ ma pa taw awˬ leh meuˇ teˇ pawˆ lawˇ nyi piˇ ve cawˬ tuˬ le?

¹⁹ Saˍtanˍ Yeˍsuˆ htaꞈ lawˇ nyi piˇ ve htawˇ Yeˍsuˆ ka tiꞈ yeˬ gʼa ve tehꞈ ngaˬ hui shiˍ ve yoˬ. Chi kʼoˆ gaˇ ve lehˬ, chaw yaˇ teˇ gʼaˇ le le biˇ ve chaw hpehꞈ˗oˬ ve htawˇ, Yeˍsuˆ hkʼa shuˍ Saˍtanˍ lawˇ nyi piˇ ve htaꞈ gʼaˇ˗aw laˇ? 1,000 hkʼawꞈ peuˬ hkʼawꞈ nawˉ Saˍtanˍ htaꞈ naˉ jaˇ ve miˬ kʼoˍ hkʼaw hpehˇ piˇ htaˇ, a shu yawˇ hkʼaˇ yawˇ gʼa dawˇ cheˆ ve yoˬ. (Hpeuꞈ maˍ ve 20:7) Ka tiꞈ yeˬ leh awˬ leh meuˇ teˇ pawˆ lawˇ nyi piˇ ve htaꞈ tawˍ daꞈ gʼaˇ ve chaw co co taiˍ taiˍ a shaꞈ gʼa tuˬ yoˬ. (Roˉmaꞈ 8:21) Gʼuiˬ sha htaꞈ hpfuhˆ ve chaw yawˇ hui htaꞈ Saˍtanˍ leh haiˬ ve mvuhˇ naw ma tcuh yaˇ geh teˇ geh co co taiˍ taiˍ te luˬ piˇ tuˬ yoˬ.—Hpeuꞈ maˍ ve 20:8-10.

20. Hpeuꞈ maˍ ve liꞈ hkʼaw tcuh kaˍ paˍ ve tawˇ hkawˇ teˇ hpaˍ htaꞈ nawˬ hkʼaˬ hkʼe dawˇ ve le?

²⁰ Hpeuꞈ maˍ ve liꞈ hkʼaw awˬ lawn teˇ hpaˍ htaꞈ gʼa henˇ˗oˬ ve nawˬ hkʼaˬ hkʼe dawˇ ve le? Tcuh kaˍ paˍ ve tawˇ hkawˇ teˇ hpaˍ hkʼaw nawˬ kaꞈ teˇ gʼaˇ chehˇ ve tehꞈ gʼa mawˬ htaˇ ha lehˬ˗aw laˇ? Leh awˬ nu ve chaw kaꞈ nawˬ geh teˇ geh Gʼuiˬ sha htaꞈ oˉ kʼoˍ pui la tuˬ ga piˇ gaˇ˗aw laˇ? (Hpeuꞈ maˍ ve 22:17) Hpeuꞈ maˍ ve liꞈ hkʼaw kʼoˆ taˍ ve, awˬ gʼuˇ suhˍ hpawˇ ve awˬ lawn ngaˬ hui gʼa henˇ htaˇ ngaˬ hui ha lehˬ jaˇ leh “a menˬ, Jawˇ mawˇ Yeˍsuˆ˗oˬ, laˬ˗oꞈ” Yoˇhanˬ kʼoˆ ve hkʼa shuˍ ngaˬ hui kaꞈ kʼoˆ gʼa ve yoˬ.—Hpeuꞈ maˍ ve 20:8-10.