1-2. Ngaˬ hui Hpeuꞈ maˍ ve liꞈ htaꞈ a yeˇ yuˬ tuˬ te laˇ ve awˉ lawˉ teˇ hkʼaˇ lehˬ aˬ htoꞈ ma le?

 Nawˬ awˬ nu ve awˬ viˉ awˬ nyi ve awˬ han kuˉ htaꞈ nyi jaw˗aw laˇ? Nawˬ awˬ han kuˉ oˇ ve htaꞈ hpeuꞈ nyi htaˇ, laiˉ gʼaˇ ve awˬ han htaꞈ mawˬ ve htawˇ, maˇ˗awˍ ve chaw kʼo nawˬ hkʼa dehꞈ maˇ shiˍ daꞈ ve yoˬ hehˉ. Yaꞈ hkʼaˇ, awˬ han kuˉ teˇ maˬ nawˬ dawˇ cawˇ jaˇ ve yoˬ. Aˬ htoꞈ ma pa taw le? Awˬ lawn kʼo, awˬ han kuˉ oˇ ve hkʼaw nawˬ ve awˬ han kaꞈ cawˬ taˍ ve yoˬ. Awˬ han kuˉ oˇ ve hkʼaˬ teˇ yanˇ htawˍ ve le? Hkʼaˬ kaˬ lo htawˍ ve le? Leh a shu geh htawˍ taˍ ve le? Nawˬ tanˬ dawˇ la ve yoˬ. Awˬ han kuˉ oˇ ve nawˬ awˬ pon awˬ bon cawˬ jaˇ ve yoˬ.

² Hpeuꞈ maˍ ve liꞈ kaꞈ awˬ han kuˉ oˇ ve ngaˬ hui nyi ma pfuhˇ tuˬ te laˇ ve htaꞈ shuˍ ve yoˬ. Aˬ htoꞈ ma pa taw le? Awˬ hkʼaˇ 2 hkʼaˇ cawˬ ve yoˬ. Awˉ lawˉ teˇ hkʼaˇ lehˬ, Hpeuꞈ maˍ ve liꞈ ngaˬ hui awˬ pon bvuhꞈ taˍ ve yoˬ. Liꞈ chi hkʼaw awˉ lawˉ bvuhꞈ taˍ ve lehˬ “Yeˍsuˆ Hkriꞈ hpeuꞈ maˍ laˇ ve awˬ lawn teˇ hpaˍ liꞈ chi awˬ hkʼaw lo bvuhꞈ taˍ ve yoˬ. Maˇ maw maw hpehꞈ la tuˬ ve awˬ lawn teˇ hpaˍ Yeˍsuˆ Hkriꞈ lehˬ, yawˇ ve awˬ ceˬ teˇ hpaˍ htaꞈ maw piˇ tuˬ, hpeuꞈ maˍ laˇ ve awˬ lawn chi teˇ hpaˍ Gʼuiˬ sha Yeˍsuˆ htaꞈ piˇ taˍ ve yoˬ.” (Hpeuꞈ maˍ ve 1:1) Chi htaꞈ pa taw Hpeuꞈ maˍ ve liꞈ lehˬ, awˬ nu ve chaw awˬ pon bvuhꞈ piˇ taˍ ve maˇ heˆ. Yaꞈ hkʼaˇ, Gʼuiˬ sha ve kanˉ te ve chaw awˬ pon bvuhꞈ piˇ taˍ ve yoˬ. Hpeuꞈ maˍ ve liꞈ hkʼaw tcuh kaˍ paˍ ve tawˇ hkawˇ awˬ tehˬ hpehꞈ la chehˇ ve ngaˬ hui kaꞈ teˇ gʼaˇ hpehꞈ ve pa taw anˇ tuˬ maˇ loˍ. Ngaˬ hui kaꞈ “awˬ han kuˉ oˇ ve hkʼaw cawˬ ve hkʼe hpehꞈ ve yoˬ.”

3-4. Hpeuꞈ maˍ ve liꞈ hkʼaw kʼoˆ taˍ ve hkʼe, tcuh kaˍ paˍ ve tawˇ hkawˇ teˇ hpaˍ hkʼaˬ hkʼe htaˇ hpehꞈ la ve le? Leh ngaˬ hui awˬ lawn chi htaꞈ shiˍ ve lehˬ aˬ htoꞈ ma te gaˇ tuˬ te laˇ ve le?

³ Hpeuꞈ maˍ ve liꞈ ngaˬ hui a yeˇ yuˬ gaˇ tuˬ te laˇ ve 2 hkʼaˇ teˇ hkʼaˇ lehˬ, Hpeuꞈ maˍ ve liꞈ hkʼaw tcuh kaˍ paˍ ve tawˇ hkawˇ teˇ hpaˍ awˬ tehˬ hpehꞈ la ve htaꞈ ngaˬ hui a yeˇ yuˬ gaˇ ve yoˬ. Tcuh yaˇ Yoˇhanˬ  awˬ yanˇ oˇ ve htaꞈ, “Jawˇ mawˇ Yeˍsuˆ ve awˬ nyi teˇ nyi htaˇ Awˬ ha hpu awˬ hkʼaw lo ngaˬ chehˇ” ve tehꞈ kʼoˆ ve yoˬ. (Hpeuꞈ maˍ ve 1:10) Yoˇhanˬ Hpeuꞈ maˍ ve liꞈ bvuhꞈ ve 96 hkʼawꞈ C.E. htaˇ, “Jawˇ mawˇ Yeˍsuˆ ve awˬ nyi” gaˬ la tuˬ maw jaˇ sheˍ tehꞈ kʼoˆ ve yoˬ. (Maꞈhtehˍ 25:14, 19; Luˉkaꞈ 19:12) Yaꞈ hkʼaˇ, Liꞈ hpu hkʼaw kʼoˆ taˍ ve hkʼe, Yeˍsuˆ mvuhˇ naw ma hkʼoˆ Jawˇ mawˇ te ve 1914 hkʼawꞈ htaˇ, awˬ nyi oˇ ve tanˬ˗oˬ ve yoˬ. Leh oˇ ve teˇ hkʼawꞈ htaꞈ tanˬ leh Hpeuꞈ maˍ ve liꞈ hkʼaw tcuh kaˍ paˍ ve tawˇ hkawˇ Gʼuiˬ sha ve chaw htaꞈ caˉ daꞈ ve awˬ tehˬ hpehꞈ la ve yoˬ. Chi teˇ hkui ngaˬ hui “Jawˇ mawˇ Yeˍsuˆ ve awˬ nyi” hkʼaw chehˇ taˍ ve yoˬ!

⁴ Chi htaꞈ pa taw, ngaˬ hui Hpeuꞈ maˍ ve liꞈ 1:3 hkʼaw beˆ maˍ laˇ taˍ ve htaꞈ a yeˇ hkʼa dehꞈ yuˬ cawˇ ve yoˬ. Chi ve teˇ tawn hkʼaw kʼoˆ ve, “Gʼuiˬ sha ve tcuh kaˍ paˍ ve tawˇ hkawˇ chi htaꞈ gʼaw maˍ ve chaw maˇ kʼoˆ, bvuhꞈ taˍ ve teˇ hpaˍ htaꞈ gʼa kaˇ leh te ve chaw teˇ hpaˍ maˇ kʼoˆ, awˬ bon uiˍ ve yoˬ. Awˬ lawn kʼo, awˬ yanˇ gaˬ la paˇ neˇ ve yoˬ.” Chi htaꞈ pa taw, ngaˬ hui “Gʼuiˬ sha ve tcuh kaˍ paˍ ve tawˇ hkawˇ chi htaꞈ gʼaw maˍ” leh “bvuhꞈ taˍ ve teˇ hpaˍ” htaꞈ ngaˬ hui gʼa gʼaꞈ te cawˇ ve yoˬ. Leh ngaˬ hui gʼaꞈ te cawˇ ve aˬ htoꞈ ma cawˬ ve le?

5. Ngaˬ hui oˉ kʼoˍ pui ve htaꞈ Yaˬhoˉvaˬ haꞈ yuˬ laˇ ve tehꞈ yonˍ gʼa tuˬ Hpeuꞈ maˍ ve liꞈ hkʼaw hkʼaˬ hkʼe kʼoˆ taˍ ve le?

⁵ Hkriꞈ yaˇ awˬ moˍ hkʼaw teˇ ceuˬ le le hpehꞈ la ve htaꞈ Yeˍsuˆ mawˬ ve tehꞈ Hpeuꞈ maˍ ve liꞈ awˉ lawˉ teˇ puꞈ hkʼaw ngaˬ hui shiˍ tuˬ te laˇ ve yoˬ. (Hpeuꞈ maˍ ve 1:12-16, 20; 2:1) Yeˍsuˆ Aˍsiˆ mvuhˇ miˬ hkʼaw cawˬ ve Hkriꞈ yaˇ awˬ moˍ 7 moˍ htaꞈ liꞈ bvuhꞈ feu piˇ ve yoˬ. Yawˇ hui oˉ kʼoˍ pui ve htaꞈ Yaˬhoˉvaˬ haꞈ yuˬ laˇ tuˬ, yawˇ hui aˬ htoꞈ ma gʼa te cawˇ ve Yeˍsuˆ hteˇ lehˍ beˆ maˍ piˇ ve yoˬ. Chi hkʼoˆ kaꞈ, Yeˍsuˆ Hkriꞈ yaˇ awˬ moˍ chi teˇ hpaˍ htaꞈ kʼoˆ piˇ ve awˬ ceuˬ lehˬ, ngaˬ hui awˬ co˗e kaꞈ yuˬ yehˇ gʼa sheˍ ve yoˬ. Ngaˬ hui henˇ yuˬ tuˬ awˬ pon aˬ htoꞈ ma le? Yeˍsuˆ lehˬ ngaˬ hui ve sheh kʼai shehˍ hpaˇ hpehꞈ ve yoˬ. Ngaˬ hui Yaˬhoˉvaˬ geh meuˆ daꞈ ve hkʼaˬ hkʼe hpehꞈ ve yawˇ shiˍ ve yoˬ. Yeˍsuˆ lehˬ hkʼa peu˗eˬ htaꞈ mawˬ ve yoˬ. Yawˇ ngaˬ hui htaꞈ hkʼaˬ htaˆ kaꞈ nyi haꞈ shaˉ laˇ ve yoˬ. Yaˬhoˉvaˬ ngaˬ hui htaꞈ haꞈ yuˬ laˇ tuˬ ngaˬ hui hkʼaˬ hkʼe gʼa te cawˇ ve yawˇ shiˍ ve yoˬ. Yeˍsuˆ beˆ maˍ laˇ ve htaꞈ ngaˬ hui gʼaꞈ te cawˇ ve aˬ htoꞈ ma cawˬ ve htaꞈ teˇ geh nyi sheˍ.

6. (a) Hpeuꞈ maˍ ve liꞈ 2:3, 4 hkʼaw kʼoˆ taˍ ve hkʼe, Eˇfeˇsuꞈ venˇ hkʼaw ve Hkriꞈ yaˇ shoꞈ shaꞈ ve awˬ lawn cawˬ ve htaꞈ Yeˍsuˆ hkʼaˬ hkʼe kʼoˆ ve le? (b) Awˬ lawn chi ngaˬ hui htaꞈ aˬ htoꞈ ma maˍ laˇ ve le?

⁶ Hpeuꞈ maˍ ve liꞈ 2:3, 4 gʼaw sheˍ. Ngaˬ hui haꞈ pehnˇ ve awˉ lawˉ htaˇ cawˬ jaw ve hkʼe gʼa cawˬ cawˇ ve. Eˇfeˇsuꞈ venˇ hkʼaw ve Hkriꞈ yaˇ yawˇ hui tuꞈ ve hkanˍ ve laiˉ ceuˬ gʼa hpuˇ ve htawˇ, yawˇ hui yeunˇ hkanˍ leh Yaˬhoˉvaˬ ve kanˉ caˉ leh te ve, yawˇ hui htaꞈ Yeˍsuˆ liꞈ bvuhꞈ piˇ ve ngaˬ hui shiˍ tuˬ te laˇ ve yoˬ. Chi hkʼe hpehꞈ ve htawˇ, yawˇ hui awˉ lawˉ htaˇ haꞈ pehnˇ ve hkʼe leˇ maˇ cawˬ. Yawˇ hui awˉ lawˉ htaˇ hkʼe leˇ haꞈ pehnˇ ve gʼa kʼawꞈ cawˬ cawˇ ve yoˬ. Chi hkʼe maˇ cawˬ ve kʼo, yawˇ hui oˉ kʼoˍ pui ve htaꞈ Yaˬhoˉvaˬ maˇ haꞈ yuˬ. Chi beuꞈ teˇ co˗e kaꞈ hkʼa shuˍ, ngaˬ hui yeunˇ hkanˍ ve ceh tiˉ maˇ heˆ. Yaꞈ hkʼaˇ, ngaˬ hui cawˇ ve hkʼaw awˬ hkʼaˇ ca leh gʼa yeunˇ hkanˍ ve yoˬ. Yaˬhoˉvaˬ lehˬ ngaˬ hui aˬ htoꞈ ma htaꞈ te ve ceh a yeˇ yuˬ ve maˇ heˆ. Ngaˬ hui hkʼaˬ hkʼe te ve htaꞈ kaꞈ a yeˇ yuˬ ve yoˬ. Ngaˬ hui te ve teˇ ceuˬ le le htaꞈ yawˇ a yeˇ yuˬ ve yoˬ. Leh Ngaˬ hui Yaˬhoˉvaˬ htaꞈ haꞈ ve hkʼaw yawˇ ve kanˉ te tcuh gaˇ leh yawˇ ngaˬ hui awˬ pon te laˇ ve htaꞈ awˬ hpfuhˇ shiˍ gaˇ ve yoˬ.—Tawˇ naˉ ve 16:2; Maˍkuˆ 12:29, 30.

7. (a) Hpeuꞈ maˍ ve liꞈ 3:1-3 hkʼaw kʼoˆ taˍ ve hkʼe, Saˍdiˆ venˇ hkʼaw ve Hkriꞈ yaˇ awˬ moˍ shoꞈ shaꞈ ve aˬ htoꞈ ma gʼa hpuˇ ve htaꞈ Yeˍsuˆ kʼoˆ ve le? (b) Ngaˬ hui aˬ htoꞈ ma te cawˇ ve le?

⁷ Hpeuꞈ maˍ ve liꞈ 3:1-3 gʼaw sheˍ. Ngaˬ hui hkʼaˬ htaˆ kaꞈ shaw chehˇ taˍ ve. Saˍdiˆ venˇ hkʼaw ve Hkriꞈ yaˇ awˬ moˍ shoꞈ shaꞈ ve gʼa hpuˇ ve maˇ shuˍ daꞈ. Chi awˬ gʼuˇ suhˍ htaˇ yawˇ hui Yaˬhoˉvaˬ ve kanˉ ha lehˬ ha kʼa ve hkʼaw te ve yoˬ. Yaꞈ hkʼaˇ, hkʼawꞈ nawˉ htaˇ yawˇ hui ha lehˬ ha kʼa ve hkʼaw maˇ te. Hkʼe te lehˬ Yeˍsuˆ yawˇ hui htaꞈ, “shaw chehˇ˗oˆ” tehꞈ kʼoˆ piˇ ve yoˬ. Chi beuꞈ teˇ co˗e awˬ lawn chi ngaˬ hui htaꞈ hkʼaˬ hkʼe maˍ laˇ ve le? Ngaˬ  hui Yaˬhoˉvaˬ awˬ pon kanˉ te ve yawˇ maˇ leunˇ ve htawˇ, ponˬ laˬ htaˇ ngaˬ hui Yaˬhoˉvaˬ ve kanˉ te maˇ jaˇ˗oˬ ve tehꞈ maˇ dawˇ nyi cawˇ. Leh chi teˇ hkui ngaˬ hui teꞈ chiˉ maˇ te cawˇ˗oˬ tehꞈ kaꞈ maˇ dawˇ nyi cawˇ. (Heˍbrehˇ 6:10) Ngaˬ hui te ve peuˬ kuiˬ leh kuiˬ cawˬ leh oˇ htaˇ hkʼe leˇ Gʼuiˬ sha ve kanˉ hkʼa dehꞈ te maˇ gʼa˗oˬ ve htawˇ, ngaˬ hui kaiˬ ve hkʼaw Jawˇ mawˇ Yeˍsuˆ ve kanˉ caˉ leh te cawˇ ve yoˬ. Ngaˬ hui awˬ leh hkʼa gaˬ hkʼaˬ htaˆ kaꞈ shaw chehˇ taˍ cawˇ ve yoˬ.—1 Kawˇrenˍhtuˆ 15:58; Maꞈhtehˍ 24:13; Maˍkuˆ 13:33.

8. Hpeuꞈ maˍ ve liꞈ 3:15-17 hkʼaw kʼoˆ taˍ ve hkʼe, Lawˍdiˍkiˆ venˇ hkʼaw ve Hkriꞈ yaˇ awˬ moˍ htaꞈ Yeˍsuˆ shaˍ tiꞈ piˇ ve ngaˬ hui htaꞈ hkʼaˬ hkʼe maˍ laˇ ve le?

⁸ Hpeuꞈ maˍ ve liꞈ 3:15-17 gʼaw sheˍ. Ngaˬ hui Yaˬhoˉvaˬ htaꞈ ha lehˬ ha kʼa oˉ kʼoˍ pui leh nyi ma awˬ tawˬ hkʼa gaˬ te cawˇ ve. Lawˍdiˍkiˆ venˇ Hkriꞈ yaˇ awˬ moˍ hkʼaw Yeˍsuˆ liꞈ bvuhꞈ feu piˇ ve lehˬ, yawˇ hui shoꞈ shaꞈ ve awˬ lawn teˇ lawn cawˬ ve tehꞈ hpeuꞈ maw laˇ ve yoˬ. Yawˇ hui oˉ kʼoˍ pui chehˇ ve lehˬ, “chiˆ ve kaꞈ maˇ heˆ, gawˬ ve kaꞈ maˇ heˆ” leh “hkʼaˬ ma ha kʼaˉ tuˬ cawˬ ve” le tehꞈ Yeˍsuˆ kʼoˆ ve yoˬ. Yawˇ hui ha lehˬ ha kʼa ve hkʼaw Yaˬhoˉvaˬ ve kanˉ maˇ maˇ te cawˇ ve yoˬ. (Hpeuꞈ maˍ ve 3:19) Awˬ lawn chi ve ngaˬ hui htaꞈ aˬ htoꞈ ma maˍ laˇ ve le? Ngaˬ hui oˇ htaˇ hkʼe leˇ Gʼuiˬ sha ve kanˉ te tuˬ nyi ma maˇ pfuhˇ ve kʼo, Yaˬhoˉvaˬ leh yawˇ ve kanˉ hkʼaˇ ngaˬ hui awˬ pon daꞈ ve awˬ ceuˬ te laˇ ve htaꞈ gʼa dawˇ nyi cawˇ ve yoˬ. (Hpeuꞈ maˍ ve 3:18) Ngaˬ hui a shaꞈ teꞈ hkʼaˇ hkʼaw hpehꞈ hpehꞈ sha sha ve htaꞈ ca leh ngaˬ hui a shaꞈ teꞈ kuiˬ hkʼaw Yaˬhoˉvaˬ htaꞈ oˉ kʼoˍ pui ve a yeˇ maˇ uiˍ tehꞈ maˇ shawˍ tuˬ taˇ te laˇ tcuh.

9. Peˍraˍgaˍ venˇ leh Saˍtiˍrehˇ venˇ hkʼaw ve Hkriꞈ yaˇ htaꞈ Yeˍsuˆ kʼoˆ piˇ ve hkʼe, aˬ htoꞈ ma te ngaˬ hui shaˍ tiꞈ te cawˇ ve le?

⁹ Gʼuiˬ sha htaꞈ hpfuhˆ ve chaw maˍ ve hkawˇ htaꞈ ngaˬ hui maˇ na cawˇ ve. Peˍraˍgaˍ venˇ hkʼaw ve Hkriꞈ yaˇ awˬ moˍ hkʼaw ve chaw teˇ hpaˍ maˇ cawˇ maˇ hawˍ daꞈ tuˬ te ve pa taw, Yeˍsuˆ kʼoˆ maˍ piˇ ve yoˬ. (Hpeuꞈ maˍ ve 2:14-16) Saˍtiˍrehˇ venˇ hkʼaw ve Hkriꞈ yaˇ awˬ moˍ “Saˍtanˍ ve naˉ jaˇ ve awˬ ceuˬ” htaꞈ yawˇ hui maˇ caˉ daꞈ ve pa taw, Yeˍsuˆ chiˇ mvuh piˇ ve yoˬ. Yawˇ hui awˬ tehˬ ve htaꞈ caˉ leh “hkʼa dehꞈ vawˆ taˍ˗oꞈ” tehꞈ Yeˍsuˆ awˬ gʼaˇ piˇ ve yoˬ. (Hpeuꞈ maˍ ve 2:24-26) Hkriꞈ yaˇ chi teˇ hpaˍ lehˬ yawˇ hui yonˍ ve awˬ gʼaˇ nuˇ leh Gʼuiˬ sha htaꞈ hpfuhˆ ve chaw maˇ heˆ heˆ maˍ ve hkawˇ htaꞈ na ve pa taw, yawˇ hui venˇ baˆ gʼa dawˇ hpfuhˆ cawˇ ve yoˬ. Hkʼe kʼo ngaˬ hui˗ehꞈ? Yaˬhoˉvaˬ maˍ ve tawˇ htaꞈ maˇ hawˍ daꞈ ve ngaˬ hui maˇ na. Gʼuiˬ sha htaꞈ hpfuhˆ ve chaw lehˬ nyi a˗nyi kʼo, “Gʼuiˬ sha htaꞈ yawˆ yan ve htaꞈ” shuˍ ve htawˇ, awˬ tehˬ kʼo yawˇ hui lehˬ “oˇ ve htaꞈ caˉ daꞈ ve kanˇ paˆ htaꞈ yawˇ hui chiˇ baˬ ve chaw hpehꞈ ve yoˬ.” (2 Tiˆmoˉseˍ 3:5) Ngaˬ hui hkʼaˬ htaˆ kaꞈ kaiˬ ve hkʼaw Liꞈ hpu henˇ ve kʼo, yawˇ hui maˇ heˆ heˆ maˍ ve htaꞈ ngaˬ hui shiˍ leh maˇ na.—2 Tiˆmoˉseˍ 3:14-17; Yuˇdaꞈ 3, 4.

10. Peˍraˍgaˍ venˇ leh Saˍtiˍrehˇ venˇ hkʼaw ve Hkriꞈ yaˇ awˬ moˍ htaꞈ Yeˍsuˆ kʼoˆ piˇ ve, ngaˬ hui htaꞈ aˬ htoꞈ ma maˍ laˇ ve le?

 ¹⁰ Pehꞈ ve tzuhˆ ve leh haˉ chawˇ haˉ paˆ teˇ ceuˬ le le hpawˇ kaꞈ ngaˬ hui maˇ te ve. Peˍraˍgaˍ venˇ leh Saˍtiˍrehˇ venˇ hkʼaw ve Hkriꞈ yaˇ awˬ moˍ awˬ nu ve shoꞈ shaꞈ ve kaꞈ cawˬ sheˍ ve yoˬ. Yeˍsuˆ kʼoˆ ve, Hkriꞈ yaˇ awˬ moˍ hkʼaw chaw teˇ hpaˍ pehꞈ ve tzuhˆ ve te ve yoˬ. (Hpeuꞈ maˍ ve 2:14, 20) Ngaˬ hui htaꞈ aˬ htoꞈ ma maˍ laˇ ve le? Ngaˬ hui haˉ chawˇ haˉ paˆ te ve kʼo, ngaˬ hui Yaˬhoˉvaˬ ve kanˉ laiˉ hkʼawꞈ te leh daꞈ ve awˬ vuiˬ laiˉ ceuˬ gʼa ve htawˇ, ngaˬ hui te ve awˬ ceuˬ htaꞈ Yaˬhoˉvaˬ maˇ haꞈ yuˬ laˇ taˬ. (1 Saˍmo˗eˍlaˆ 15:22; 1 Peˍtruˆ 2:16) Miˬ guiˬ chi ve hkʼaˬ hkʼe taw luˬ kʼai chehˇ ve htawˇ, Yaˬhoˉvaˬ lehˬ ngaˬ hui yawˇ ve awˬ liˇ awˬ hkʼaˇ htaꞈ haꞈ shaˉ tcuh gaˇ ve yoˬ.—Eˇfeˇsuꞈ 6:11-13.

11. Ngaˬ hui aˬ htoꞈ ma gʼa henˇ˗oˬ ve le? (Awˇ ceˍ awˇ fa “ Chi beuꞈ teˇ co˗e ngaˬ hui henˇ yuˬ tuˬ awˬ pon aˬ htoꞈ ma le?” htaꞈ nyi sheˍ.)

¹¹ Ngaˬ hui aˬ htoꞈ ma gʼa henˇ˗oˬ ve le? A yeˇ uiˍ jaˇ ve lehˬ, ngaˬ hui oˉ kʼoˍ pui ve htaꞈ Yaˬhoˉvaˬ haꞈ yuˬ laˇ ve tehꞈ gʼa yonˍ gʼa tcuh ve yoˬ. Ngaˬ hui te ve teˇ ceuˬ ceuˬ Yaˬhoˉvaˬ maˇ haꞈ yuˬ laˇ ve htaꞈ mawˬ htaˇ, ngaˬ hui laꞈ haˉ gu leh gʼa pa cawˇ ve yoˬ. (Hpeuꞈ maˍ ve 2:5, 16; 3:3, 16) Yaꞈ hkʼaˇ, chi Hkriꞈ yaˇ awˬ moˍ oˇ ve teˇ hpaˍ htaꞈ Yeˍsuˆ hkʼa peu˗eˬ kʼoˆ piˇ ve maˇ heˆ. Yeˍsuˆ aˬ htoꞈ ma kʼawꞈ kʼoˆ piˇ ve teˇ geh nyi sheˍ.

12. Saˍmuˇraˍnaˆ venˇ leh Hpiˇlaˍdeˍhpiˆ venˇ hkʼaw ve Hkriꞈ yaˇ awˬ moˍ htaꞈ Yeˍsuˆ kʼoˆ piˇ ve ngaˬ hui htaꞈ aˬ htoꞈ ma maˍ laˇ ve le? (Hpeuꞈ maˍ ve 2:10)

¹² Saˍmuˇraˍnaˆ venˇ leh Hpiˇlaˍdeˍhpiˆ venˇ hkʼaw ve Hkriꞈ yaˇ awˬ moˍ htaꞈ Yeˍsuˆ kʼoˆ piˇ ve htaꞈ teˇ geh nyi sheˍ. Yeˍsuˆ yawˇ hui htaꞈ kʼoˆ piˇ ve, fawˉ ve mehˍ ve gʼa hpuˇ tuˬ ve htaꞈ taˇ kawˆ. Awˬ lawn kʼo, yawˇ hui ka tiꞈ yeˬ ve kʼo, Yaˬhoˉvaˬ yawˇ hui htaꞈ awˬ tehˬ awˬ na laꞈ shawnˍ piˇ tuˬ yoˬ. (Hpeuꞈ maˍ ve 2:10 gʼaw sheˍ; 3:10) Ngaˬ hui henˇ yuˬ tuˬ awˬ pon aˬ htoꞈ ma le? Teˇ nyi kʼo, ngaˬ hui fawˉ ve mehˍ ve gʼa hpuˇ htaˇ yeunˇ hkanˍ cawˇ ve tehꞈ tawnˇ taˍsheˍ. (Maꞈhtehˍ 24:9, 13; 2 Kawˇrenˍhtuˆ 12:10) Aˬ htoꞈ ma te awˬ lawn chi a yeˇ uiˍ jaˇ ve le?

13-14. Hpeuꞈ maˍ ve liꞈ kaˇ nanˉ uiˍ 12 hkʼaw kʼoˆ taˍ ve hkʼe, Yaˬhoˉvaˬ ve chaw htaꞈ heuˆ la kuiˬ hkʼaˬ hkʼe cawˬ ve le?

¹³ Yaˬhoˉvaˬ ve chaw lehˬ, “Jawˇ mawˇ Yeˍsuˆ ve awˬ nyi teˇ nyi” htaˇ fawˉ ve mehˍ ve gʼa hpuˇ tuˬ yoˬ tehꞈ, Hpeuꞈ maˍ ve liꞈ hkʼaw kʼoˆ taˍ ve yoˬ. Chi lehˬ ngaˬ hui a shaꞈ teꞈ chehˇ htaˇ ve awˬ yanˇ htaꞈ kʼoˆ gaˇ ve yoˬ. Hpeuꞈ maˍ ve liꞈ kaˇ nanˉ uiˍ 12 hkʼaw kʼoˆ taˍ ve, Yeˍsuˆ mvuhˇ naw ma hkʼoˆ lo Jawˇ mawˇ te htaˇ maꞈ laꞈ haˉ hpehꞈ la ve yoˬ. Yeˍsuˆ ve awˬ meh awˬ nu ve teˇ meh lehˬ Miˆhkeˍlaˆ meh leh yawˇ leh yawˇ hpawˇ chehˇ ve tcuh yaˇ lehˬ, Saˍtanˍ leh haiˬ ve mvuhˇ naw ma tcuh yaˇ htaꞈ bawˆ ve yoˬ. (Hpeuꞈ maˍ ve 12:7, 8) Saˍtanˍ leh Saˍtanˍ hpawˇ chehˇ ve maˇ gʼaˇ leh miˬ guiˬ hkʼoˆ lo gʼaꞈ ce piˇ ve yoˬ. Hkʼe te leh, miˬ guiˬ hkʼoˆ chehˇ ve chaw yaˇ htaꞈ dawˇ haˍ tuˬ te piˇ ve yoˬ. (Hpeuꞈ maˍ ve 12:9, 12) Hkʼe kʼo Yaˬhoˉvaˬ ve chaw˗ehꞈ, yawˇ hui hkʼaˬ hkʼe hpehꞈ la tuˬ le?

¹⁴ Hpeuꞈ maˍ ve liꞈ hkʼaw kʼawꞈ kʼoˆ sheˍ ve, mvuhˇ naw ma hkʼoˆ lo Saˍtanˍ awˬ pon chehˇ kuiˬ maˇ  kʼawꞈ cawˬ˗o. Hkʼe te leh, Saˍtanˍ lehˬ miˬ guiˬ hkʼoˆ lo leuˉ taˍ sheˍ ve leuˆ yuˬ taˍ ve chaw htaꞈ te luˬ ve yoˬ. Yawˇ hui lehˬ Gʼuiˬ sha ve mvuhˇ miˬ awˬ tan te leh “Yeˍsuˆ awˬ pon shaˉ hkiˆ hkanˍ ve chaw teˇ hpaˍ” hpehꞈ ve yoˬ. (Hpeuꞈ maˍ ve 12:17; 2 Kawˇrenˍhtuˆ 5:20; Eˇfeˇsuꞈ 6:19, 20) Tcuh kaˍ paˍ ve tawˇ hkawˇ chi awˬ tehˬ hkʼaˬ hkʼe hpehꞈ la ve le?

15. Hpeuꞈ maˍ ve liꞈ kaˇ nanˉ uiˍ 11 hkʼaw “tcuh kaˍ paˍ oˇ ve 2 gʼaˇ” a shu le? Leh yawˇ hui htaꞈ aˬ htoꞈ ma hpehꞈ la ve le?

¹⁵ Oˇ ve teˇ yanˇ lehˬ leuˆ yuˬ taˍ ve chaw hto toˇ ve htaꞈ shehˍ kʼai ve, Saˍtanˍ lehˬ Gʼuiˬ sha ve canˇ paˍ htaꞈ cuˇ leh yawˇ hui htaꞈ te luˬ tcuh ve yoˬ. Hpeuꞈ maˍ ve liꞈ hkʼaw yawˇ hui htaꞈ tiˇ pehˍ piˇ ve “tcuh kaˍ paˍ oˇ ve 2 gʼaˇ” tehꞈ kʼoˆ ve yoˬ. * (Hpeuꞈ maˍ ve 11:3, 7-11) 1918 hkʼawꞈ htaˇ, awˬ viˉ awˬ nyi hawˉ hkʼaˆ 8 gʼaˇ Gʼuiˬ sha ve kanˉ hkʼaˇ hkʼaw sheh kʼai chehˇ ve htaꞈ maˇ heˆ heˆ she pfuhˍ piˇ ve yoˬ. Leh yawˇ hui htaꞈ maˇ hteˇ maˇ cawˇ ve hkʼaw suhˉ jehˬ cheˆ piˇ leh htawnˍ hkʼaw laiˉ hkʼawꞈ gʼa chehˇ ve yoˬ. Maˇ˗awˍ ve chaw dawˇ ve yawˇ hui ve kanˉ lehˬ te kʼai maˇ gʼa˗o.

16. 1919 hkʼawꞈ htaˇ maˇ dawˇ maˇ gaˇ ve aˬ htoꞈ ma hpehꞈ la ve le? Oˇ ve teˇ yanˇ tanˬ leh Saˍtanˍ aˬ htoꞈ ma te ve le?

¹⁶ Hpeuꞈ maˍ ve liꞈ kaˇ nanˉ uiˍ 11 hkʼaw kʼawꞈ kʼoˆ ve, “tcuh kaˍ paˍ oˇ ve 2 gʼaˇ” lehˬ teˇ hkui teˇ yanˇ a shaꞈ kʼawꞈ teꞈ chehˇ ve yoˬ. Awˬ lawn chi awˬ tehˬ hkʼaˬ hkʼe hpehꞈ la ve le? Teˇ hkʼawꞈ maˇ gaˬ sheˍ kaꞈ maˇ dawˇ maˇ gaˇ ve awˬ ceuˬ hpehꞈ la ve yoˬ. Ha pa 3 maˬ 1919 hkʼawꞈ htaˇ, awˬ viˉ awˬ nyi hawˉ hkʼaˆ 8 gʼaˇ htaꞈ hpehˇ piˇ leh shaˉ nanˉ yawˇ hui htaꞈ she pfuhˍ piˇ taˍ ve teˇ ceuˬ le le htaꞈ awˬ lawn maˇ te piˇ˗oˬ. Yawˇ hui Gʼuiˬ sha ve kanˉ hkʼaˇ hkʼaw laꞈ haˉ kʼawꞈ sheh kʼai ve yoˬ. Yaꞈ hkʼaˇ, Saˍtanˍ kaꞈ maˇ jehˇ sheˍ. Oˇ ve teˇ yanˇ taˍ lehˬ Saˍtanˍ lehˬ ‘iˉ kaˆ lawˬ lonˉ hkʼa shuˍ shuˍ iˉ kaˆ hpeꞈ baˬ ve yoˬ.’ Leh Yaˬhoˉvaˬ ve chaw htaꞈ fawˉ mehˍ piˇ jaˇ. (Hpeuꞈ maˍ ve 12:15) Ngaˬ hui teˇ gʼaˇ le le yeunˇ hkanˍ leh yonˍ ve gʼa cawˬ tcuh ve yoˬ.—Hpeuꞈ maˍ ve 13:10.

17. Yaˬhoˉvaˬ ve chaw htaꞈ Saˍtanˍ te luˬ piˇ ve htawˇ, yawˇ hui maˇ dawˇ maˇ gaˇ ve hkʼaw ga laˇ ve htaꞈ hkʼaˬ hkʼe gʼa ve le?

¹⁷ Hpeuꞈ maˍ ve liꞈ kaˇ nanˉ uiˍ 12 hkʼaw kʼoˆ ve, Yaˬhoˉvaˬ ve chaw lehˬ maˇ dawˇ maˇ gaˇ ve hkʼaw ga laˇ ve htaꞈ gʼa ve yoˬ. Chi ve teˇ tawn hkʼaw kʼoˆ ve, ‘miˬ guiˬ lehˬ, yawˇ ve mawꞈ kʼaw ngaˉ leh, iˉ kaˆ htaꞈ hehˆ dawˬ ve yoˬ.’ Chi ve lehˬ fawˉ ve mehˍ ve htaꞈ kʼoˆ gaˇ ve yoˬ. (Hpeuꞈ maˍ ve 12:16) Chi lehˬ awˬ tehˬ hpehꞈ la ve yoˬ. Oˇ ve teˇ yenˇ tanˬ leh Saˍtanˍ ve miˬ guiˬ aꞈ kehˉ shaˉ nanˉ hkʼaw ve chaw awˬ hkʼaˇ ca leh Gʼuiˬ sha ve chaw htaꞈ laiˉ pawˆ ga piˇ ve yoˬ. Yaˬhoˉvaˬ ve kanˉ te ve chaw shaˉ nanˉ hkʼaw awˬ lawn te daꞈ htaˇ laiˉ lawn htaꞈ gʼaˇ leh yawˇ hui Yaˬhoˉvaˬ ve kanˉ hkʼa dehꞈ kʼawꞈ te gʼa ve yoˬ. Leh yawˇ hui chi ve hkʼaˬ hkʼe te ve le? Yawˇ  hui awˬ yanˇ chi htaꞈ yehˇ leh Yaˬhoˉvaˬ yawˇ hui htaꞈ awˬ vuiˬ piˇ taˍ ve te gʼa ve hkʼe hkʼa dehꞈ te ve yoˬ. (1 Kawˇrenˍhtuˆ 16:9) Gʼuiˬ sha yawˇ hui htaꞈ piˇ ve kanˉ aˬ htoꞈ ma cawˬ ve le?

18. Awˬ leh meuˇ ve awˬ yanˇ hkʼaw ngaˬ hui ve kanˉ lehˬ aˬ htoꞈ ma le?

¹⁸ Yeˍsuˆ kʼoˆ ve yawˇ ve chaw lehˬ, awˬ leh meuˇ maˇ gaˬ la sheˍ htaˇ “ha lehˬ ve bon hkawˇ chi, miˬ guiˬ hkʼoˆ teˇ kaˬ le le lo ca maˍ piˇ tuˬ yoˬ.” (Maꞈhtehˍ 24:14) Yawˇ hui chi hkʼe te htaˇ, mvuhˇ naw ma tcuh yaˇ teˇ gʼaˇ maˇ heˆ leh mvuhˇ naw ma tcuh yaˇ laiˉ gʼaˇ ga piˇ ve htaꞈ gʼa ve yoˬ. Chi lehˬ, “miˬ guiˬ hkʼoˆ lo chehˇ ve chaw hkʼa peu˗eˬ, mvuhˇ miˬ teˇ peˆ le le htaꞈ maˇ kʼoˆ, awˬ ceuˬ awˬ hkʼaˇ teˇ ceuˬ le le htaꞈ maˇ kʼoˆ, tawˇ hkawˇ teˇ ceuˬ le le htaꞈ maˇ kʼoˆ, chaw ceuˬ teˇ ceuˬ le le htaꞈ maˇ kʼoˆ, co co taiˍ taiˍ yeˬ ve ha lehˬ ve bon hkawˇ maˍ piˇ tuˬ” yoˬ.—Hpeuꞈ maˍ ve 14:6.

19. Yaˬhoˉvaˬ htaꞈ haꞈ ve chaw aˬ htoꞈ ma awˬ lawn gʼa hto toˇ sheˍ ve le?

¹⁹ Gʼuiˬ sha ve chaw lehˬ yawˇ ve mvuhˇ miˬ daꞈ ve awˬ lawn sha tanˇ ceh tiˉ maˍ ve maˇ heˆ. Hpeuꞈ maˍ ve liꞈ kaˇ nanˉ uiˍ 8 te leh 10 hkʼaw kʼoˆ taˍ ve, mvuhˇ naw ma tcuh yaˇ kanˉ te ve htaꞈ yawˇ hui gʼa ga piˇ ve yoˬ. Gʼuiˬ sha ve mvuhˇ miˬ htaꞈ maˇ haꞈ yuˬ ve chaw lehˬ, mvuhˇ naw ma tcuh yaˇ suhˉ jehˬ ve awˬ lawn hto maˍ piˇ ve yoˬ. Yaˬhoˉvaˬ ve Shaˉhkiˆhkanˍ ve chaw lehˬ, “vaˇ shiˍ leh aˬ miˍ” htaꞈ shuˍ ve hkʼe hto toˇ chehˇ ve yoˬ. Chi lehˬ Saˍtanˍ uˉ peunˍ ve haiˬ jaˇ ve htaꞈ Gʼuiˬ sha te luˬ piˇ tuˬ yoˬ tehꞈ hpeuꞈ maw laˇ ve yoˬ. (Hpeuꞈ maˍ ve 8:7, 13) Gʼuiˬ sha ve awˬ nyi gaˬ la paˇ neˇ jaˇ˗oˬ ve tehꞈ yawˇ hui gʼa shiˍ cawˇ ve yoˬ. Awˬ lawn kʼo, Yaˬhoˉvaˬ ciˍ yanˍ ve awˬ nyi htaꞈ gʼa ponˬ tuˬ yawˇ hui ve te hkʼaˇ dawˇ hkʼaˇ laꞈ haˉ gʼa pa cawˇ ve yoˬ. (Zeˍhpaˍniˆ 2:2, 3) Teˇ gʼaˇ le le Gʼuiˬ sha suhˉ jehˬ ve awˬ lawn hto toˇ ve htaꞈ maˇ dawˇ cawˇ. Hkʼe te leh, ngaˬ hui hto toˇ ve gʼa haꞈ hanˉ cawˇ ve yoˬ. Uiˍ jaˇ ve tuꞈ ve hkanˍ ve awˬ yanˇ htaˇ, suhˉ jehˬ ve awˬ lawn hto toˇ ve htaꞈ haꞈ yuˬ gʼa tuˬ haˍ jaˇ tuˬ te piˇ ve yoˬ.—Hpeuꞈ maˍ ve 16:21.

20. Gʼuˇ suhˍ 2 lawn hkʼaw ngaˬ hui aˬ htoꞈ ma htaꞈ henˇ tuˬ le?

²⁰ Ngaˬ hui “tcuh kaˍ paˍ ve tawˇ hkawˇ” chi htaꞈ gʼaꞈ te cawˇ ve yoˬ. Awˬ lawn kʼo, Hpeuꞈ maˍ ve liꞈ hkʼaw tcuh kaˍ paˍ ve tawˇ hkawˇ awˬ tehˬ hpehꞈ la chehˇ ve hkʼaw ngaˬ hui kaꞈ teˇ gʼaˇ hpehꞈ ve yoˬ. (Hpeuꞈ maˍ ve 1:3) Yaꞈ hkʼaˇ, ngaˬ hui fawˉ ve mehˍ ve htaꞈ gʼa hpuˇ htaˇ, ka tiꞈ yeˬ ve hkʼaw hkʼaˬ hkʼe te yeunˇ hkanˍ gʼaˇ tuˬ le? Leh ngaˬ hui haꞈ hanˉ ve hkʼaw caˉ leh hkʼaˬ hkʼe te hto toˇ gʼa tuˬ le? Awˬ lawn 2 lawn htaꞈ ngaˬ hui awˬ gʼaˇ gʼa tuˬ ve lehˬ (1) Hpeuꞈ maˍ ve liꞈ hkʼaw Gʼuiˬ sha ve canˇ paˍ htaꞈ caˉ daꞈ ve kʼoˆ taˍ ve, leh (2) ngaˬ hui ka tiꞈ yeˬ ve kʼo, awˬ gʼuˇ suhˍ hpawˇ kaꞈ daꞈ ve awˬ ceuˬ htaꞈ gʼa tuˬ yoˬ. Gʼuˇ suhˍ 2 lawn hkʼaw awˬ lawn chi htaꞈ caˉ daꞈ ve teˇ geh henˇ tuˬ yoˬ.