1. Hpeuꞈ maˍ ve liꞈ lehˬ Gʼuiˬ sha ve chaw htaꞈ caˉ daꞈ ve ngaˬ hui shiˍ tuˬ aˬ htoꞈ ma ga laˇ ve le?

 Gʼuiˬ sha ve mvuhˇ miˬ lehˬ mvuhˇ naw ma hkʼoˆ uˉ peunˍ˗oˬ leh Saˍtanˍ htaꞈ miˬ guiˬ hkʼoˆ lo gʼaꞈ ce˗oˬ ve tehꞈ Hpeuꞈ maˍ ve liꞈ hkʼaw ngaˬ hui shiˍ tuˬ te laˇ ve yoˬ. (Hpeuꞈ maˍ ve 12:1-9) Chi lehˬ mvuhˇ naw ma hkʼoˆ gawˬ lehˍ cawˬ leh ngaˬ hui dawˇ haˍ ve cawˬ tuˬ te laˇ ve yoˬ. Aˬ htoꞈ ma pa taw le? Awˬ lawn kʼo, Saˍtanˍ beuꞈ jaˇ ve yoˬ. Hkʼe te leh, miˬ guiˬ hkʼoˆ lo Yaˬhoˉvaˬ ve kanˉ ka tiꞈ yeˬ ve hkʼaw te ve teˇ gʼaˇ le le htaꞈ Saˍtanˍ maˇ dawˇ cawˇ.—Hpeuꞈ maˍ ve 12:12, 15, 17.

2. Ngaˬ hui Yaˬhoˉvaˬ geh caˉ leh ka tiꞈ yeˬ tuˬ aˬ htoꞈ ma ga laˇ ve le?

² Saˍtanˍ ngaˬ hui htaꞈ ca te luˬ la ve htawˇ, ngaˬ hui caˉ leh Yaˬhoˉvaˬ geh ka tiꞈ yeˬ gʼa tuˬ aˬ htoꞈ ma ga laˇ ve le? (Hpeuꞈ maˍ ve 13:10) Ngaˬ hui htaꞈ ga laˇ gʼa ve teˇ ceuˬ lehˬ, awˬ gʼuˇ suhˍ hpawˇ hkʼaˬ hkʼe hpehꞈ tuˬ ngaˬ hui shiˍ ve yoˬ. Awˬ gʼuˇ suhˍ hpawˇ daꞈ ve awˬ ceuˬ aˬ htoꞈ ma cawˬ tuˬ Hpeuꞈ maˍ ve liꞈ hkʼaw ngaˬ hui htaꞈ hpeuꞈ maw laˇ ve teˇ ceuˬ lehˬ, Gʼuiˬ sha ve canˇ paˍ htaꞈ te luˬ piˇ tuˬ yoˬ. Hpeuꞈ maˍ ve liꞈ hkʼaw Gʼuiˬ sha ve canˇ paˍ htaꞈ hkʼaˬ hkʼe kʼoˆ ve leh yawˇ hui htaꞈ aˬ htoꞈ ma hpehꞈ la tuˬ ve chi teˇ hkui teˇ geh henˇ tuˬ yoˬ.

3. Hpeuꞈ maˍ ve liꞈ hkʼaw Gʼuiˬ sha ve canˇ paˍ aˬ htoꞈ ma htaꞈ tehˆ taˍ ve le?

³ Hpeuꞈ maˍ ve liꞈ awˉ lawˉ teˇ tawn hkʼaw ve lehˬ, Hpeuꞈ maˍ ve liꞈ hkʼaw ve ngaˬ hui shiˍ tuˬ tehˆ maˍ ve “awˬ lawn” htaꞈ yehˇ ve yoˬ. (Hpeuꞈ maˍ ve 1:1) Gʼuiˬ sha ve canˇ paˍ lehˬ haiˬ ve to nuˇ to shaˆ laiˉ hkeh htaꞈ tehˆ taˍ ve yoˬ. Tawˇ pa haˉ te kʼo, ‘laˇ tsuhˇ gʼuiˬ awˬ hkʼaw lo haiˬ ve to nuˇ to shaˆ teˇ hkeh tawˆ la leh yawˇ lehˬ, awˬ hkaw 10 maˬ cawˬ leh oˉ kʼoˍ 7 shiˍ cawˬ ve yoˬ.’ (Hpeuꞈ maˍ ve 13:1) Peuˬ hkʼawꞈ nawˉ, “miˬ guiˬ awˬ hkʼaw lo awˬ kaˍ awˬ nu haiˬ ve to nuˇ to shaˆ teˇ hkeh tawˆ la” ve yoˬ. Yawˇ “cawˇ shehˍ ma tawˇ yaw ve hkʼa shuˍ shuˍ yawˇ tawˇ yaw” leh ‘mvuhˇ naw ma lo te leh miˬ guiˬ hkʼoˆ hkʼa gaˬ, yawˇ aˬ miˍ htaꞈ ce la tcuh ve yoˬ.’  (Hpeuꞈ maˍ ve 13:11-13) Leh haiˬ ve to nuˇ to shaˆ 3 hkeh teˇ hkeh lehˬ, “nyiˉ˗ehˍ ve haiˬ ve to nuˇ to shaˆ” hpehꞈ leh meh maˬ lanˉ lonˉ yawˇ awˬ hkʼoˆ mui taˍ ve yoˬ. Haiˬ ve to nuˇ to shaˆ chi ve 3 hkeh lehˬ, Yaˬhoˉvaˬ ve canˇ paˍ hpehꞈ leh, yawˇ ve mvuhˇ miˬ htaꞈ tawˍ daꞈ chehˇ ve maw jaˇ˗oˬ ve htaꞈ kʼoˆ gaˇ ve yoˬ. Hkʼe te lehˬ, yawˇ hui a shu hpehꞈ ve tehꞈ ngaˬ hui shiˍ tuˬ a yeˇ uiˍ jaˇ.—Hpeuꞈ maˍ ve 17:1, 3.

4-5. Hpeuꞈ maˍ ve liꞈ hkʼaw haiˬ ve to nuˇ to shaˆ ve awˬ lawn ngaˬ hui na gʼa tuˬ Daˍyeˍlaˆ liꞈ 7:15-17 hkʼaw hkʼaˬ hkʼe ga laˇ ve le?

⁴ Gʼuiˬ sha ve canˇ paˍ chi teˇ hpaˍ a shu hpehꞈ ve tehꞈ ngaˬ hui na gʼa tuˬ, “awˬ lawn” oˇ ve teˇ hpaˍ ve tcuhˉ kuiˬ gʼa na gʼa tcuh ve yoˬ. Ngaˬ hui shiˍ tuˬ ga laˇ gʼa ve teˇ hkʼaˇ lehˬ, awˬ nu ve Liꞈ hpu awˬ tawn teˇ hpaˍ Hpeuꞈ maˍ ve liꞈ hkʼaw ve kʼoˆ maˍ laˇ taˍ ve yoˬ. Liꞈ kʼoˆ chi ve hkʼaw awˬ han tehˆ maˍ laˇ taˍ ve laiˉ ceuˬ lehˬ, Liꞈ hpu hkʼaw ve awˬ lawn awˬ nu ve liꞈ kʼoˆ hkʼaw kaꞈ kʼoˆ maˍ laˇ taˍ ve yoˬ. Tawˇ pa haˉ te kʼo, “uiˍ jaˇ ve to nuˇ to shaˆ 4 hkeh laˇ tsuhˇ gʼuiˬ hkʼaw tawˆ la ve” htaꞈ Daˍyeˍlaˆ zuhꞈ maˆ mawˬ ve yoˬ. (Daˍyeˍlaˆ 7:1-3) Leh yawˇ kʼawꞈ kʼoˆ ve, to nuˇ to shaˆ 4 hkeh chi lehˬ, “awˬ hkʼawꞈ nawˉ cawˬ la tuˬ ve mvuhˇ miˬ lonˉ 4 peˆ” mvuhˇ miˬ hkʼoˆ uˉ peunˍ ve htaꞈ kʼoˆ gaˇ ve yoˬ. (Daˍyeˍlaˆ 7:15-17 gʼaw sheˍ.) Chi ngaˬ hui na gʼa tuˬ Hpeuꞈ maˍ ve liꞈ hkʼaw ve haiˬ ve to nuˇ to shaˆ lehˬ, mvuhˇ miˬ uˉ peunˍ ve htaꞈ kaꞈ caˉ daꞈ ve yoˬ.

⁵ Chi teˇ hkui Hpeuꞈ maˍ ve liꞈ hkʼaw ve awˬ lawn teˇ ceuˬ ceuˬ htaꞈ nyi leh, awˬ lawn chi ve teˇ hpaˍ hkʼaˬ hkʼe kʼoˆ gaˇ ve Liꞈ hpu hkʼaw ngaˬ hui na gʼa tuˬ ga laˇ ve teˇ geh nyi sheˍ. Awˉ lawˉ htaˇ haiˬ ve to nuˇ to shaˆ htaꞈ caˉ daꞈ ve teˇ geh henˇ tuˬ yoˬ. Haiˬ ve to nuˇ to shaˆ a shu htaꞈ kʼoˆ gaˇ ve kaꞈ teˇ geh henˇ tuˬ yoˬ. Peuˬ hkʼawꞈ nawˉ, yawˇ hui htaꞈ aˬ htoꞈ ma hpehꞈ la ve kaꞈ teˇ geh henˇ tuˬ yoˬ. Leh awˬ leh meuˇ htaˇ, awˬ lawn chi ve ngaˬ hui awˬ pon tcuhˉ kuiˬ hkʼaˬ hkʼe cawˬ ve kaꞈ teˇ geh henˇ tuˬ yoˬ.

6. Hpeuꞈ maˍ ve liꞈ 13:1-4 hkʼaw haiˬ ve to nuˇ to shaˆ oˉ kʼoˍ 7 shiˍ cawˬ ve a shu htaꞈ kʼoˆ gaˇ ve le?

⁶ Haiˬ ve to nuˇ to shaˆ oˉ kʼoˍ 7 shiˍ cawˬ ve a shu htaꞈ kʼoˆ gaˇ ve le? (Hpeuꞈ maˍ ve 13:1-4 gʼaw sheˍ.) Haiˬ ve to nuˇ to shaˆ chi teˇ hkeh lehˬ laˇ ku˗i htaꞈ shuˍ ve yoˬ. Yaꞈ hkʼaˇ, yawˇ ve hkui sheh lehˬ, yehˬ miˉ tawˍ hkui sheh htaꞈ shuˍ ve yoˬ. Yawˇ ve mawꞈ kʼaw lehˬ, laˇ caˬ shiˉ mawꞈ kʼaw htaꞈ shuˍ leh yawˇ ve awˬ hkaw 10 maˬ cawˬ ve yoˬ. Chi ve 4 ceuˬ lehˬ, Daˍyeˍlaˆ liꞈ hkʼaw haiˬ ve to nuˇ to shaˆ 4 hkeh htaꞈ shuˍ daꞈ ve yoˬ. Yaꞈ hkʼaˇ, maˇ shuˍ daꞈ ve lehˬ, haiˬ ve to nuˇ to shaˆ chi ve teˇ hkeh awˬ to hkʼaw maˇ shuˍ daꞈ ve 4 ceuˬ cawˬ ve yoˬ. Chi htaꞈ pa taw, mvuhˇ miˬ teˇ peˆ tiˉ ve maˇ heˆ leh kanˇ paˆ teˇ maˬ tiˉ ve awˬ hawˉ lo chehˇ ve htaꞈ kʼoˆ gaˇ ve maˇ heˆ. Leh Hpeuꞈ maˍ ve liꞈ hkʼaw ve, haiˬ ve to nuˇ to shaˆ chi ve lehˬ, “awˬ ceuˬ awˬ hkʼaˇ teˇ ceuˬ le le, chaw ceuˬ teˇ ceuˬ le le, tawˇ hkawˇ teˇ ceuˬ le le leh mvuhˇmiˬ teˇ peˆ le le” htaꞈ uˉ peunˍ chehˇ ve yoˬ. Chi ve lehˬ mvuhˇ miˬ teˇ mvuhˇ miˬ uˉ peunˍ ve aꞈ kehˉ uiˍ ve htaꞈ kʼoˆ gaˇ ve yoˬ. (Hpeuꞈ maˍ ve 13:7) Hkʼe te leh, haiˬ ve to nuˇ to shaˆ chi ve teˇ hkeh lehˬ, miˬ guiˬ hkʼoˆ lo chaw yaˇ uˉ peunˍ chehˇ ve hkʼa peu˗eˬ htaꞈ ngaˬ hui kʼoˆ gʼa ve yoˬ. *—Cuˇ yiˍ piˇ ve 8:9.

7. Haiˬ ve to nuˇ to shaˆ oˉ kʼoˍ 7 shiˍ aˬ htoꞈ ma htaꞈ kʼoˆ gaˇ ve le?

⁷ Oˉ kʼoˍ 7 shiˍ aˬ htoꞈ ma htaꞈ kʼoˆ gaˇ ve le? Hpeuꞈ maˍ ve liꞈ kaˇ nanˉ uiˍ 17 hkʼaw ngaˬ hui na gʼa tuˬ ga laˇ ve yoˬ. Awˬ lawn kʼo chi teˇ tawn hkʼaw, Hpeuꞈ maˍ ve liꞈ kaˇ nanˉ 13 hkʼaw ve haiˬ ve to nuˇ to shaˆ htaꞈ caˉ daꞈ ve kʼoˆ maˍ laˇ taˍ ve yoˬ. Hpeuꞈ maˍ ve liꞈ 17:10 hkʼaw kʼoˆ ve, ‘hkunˉ hawˉ hkanˇ 7 gʼaˇ leh 5 gʼaˇ lehˬ, ce kʼai peuˬ. Chi beuꞈ teˇ gʼaˇ chehˇ taˍ sheˍ ve yoˬ. Teˇ gʼaˇ lehˬ, maˇ gaˬ la sheˍ. Yawˇ gaˬ la ve teˇ yanˇ, teˇ hkui ceh tiˉ gʼa chehˇ tuˬ yoˬ.’ “Oˉ kʼoˍ” htaꞈ shuˍ ve 7 mvuhˇ miˬ kanˇ paˆ cawˬ ve htaꞈ Saˍtanˍ yehˇ chehˇ ve yoˬ. Chi ve lehˬ awˬ nu ve mvuhˇ miˬ aꞈ kehˉ kanˇ paˆ cawˬ jaˇ leh 7 mvuhˇ miˬ chi ve mvuhˇ miˬ hkʼoˆ ve kanˇ paˆ lonˉ hpehꞈ leh Yaˬhoˉvaˬ ve kanˉ te ve chaw htaꞈ heuˆ la kuiˬ cawˬ jaˇ. Yoˇhanˬ ve awˬ co˗e htaˇ lehˬ, Eˇjiˇtuꞈ, Aˍsuˇriˆ, Baˍbuˍlonˍ, Meˍdiˆ leh Paˇshaˇ, Heˍlaˍsaˆ mvuhˇ miˬ chi teˇ hpaˍ kanˇ paˆ cawˬ jaˇ ve  yoˬ. Yoˇhanˬ zuhꞈ maˆ chi mawˬ htaˇ, Roˉmaꞈ mvuhˇ miˬ lehˬ miˬ guiˬ hkʼoˆ lo ve kanˇ paˆ lonˉ 6 gʼaˇ teˇ gʼaˇ hpehꞈ˗a te chehˇ ve yoˬ. Hkʼe kʼo miˬ guiˬ hkʼoˆ lo ve kanˇ paˆ lonˉ 7 gʼaˇ teˇ gʼaˇ a shu hpehꞈ ve le, leh awˬ leh meuˇ teˇ gʼaˇ a shu hpehꞈ tuˬ le?

8. Haiˬ ve to nuˇ to shaˆ oˉ kʼoˍ 7 shiˍ teˇ shiˍ a shu htaꞈ kʼoˆ gaˇ ve le?

⁸ Maˇ maw maw kʼo, haiˬ ve to nuˇ to shaˆ oˉ kʼoˍ 7 shiˍ leh, awˬ leh meuˇ ve oˉ kʼoˍ a shu htaꞈ kʼoˆ gaˇ ve Daˍyeˍlaˆ liꞈ hkʼaw ngaˬ hui shiˍ tuˬ te laˇ ve yoˬ. Awˬ leh meuˇ ve awˬ yanˇ miˬ guiˬ hkʼoˆ lo kanˇ paˆ lonˉ uˉ peunˍ chehˇ ve a shu le? Chi ve lehˬ, “Jawˇ mawˇ Yeˍsuˆ ve awˬ nyi teˇ nyi htaˇ” hpehꞈ ve tehꞈ dawˇ nyi sheˍ. (Hpeuꞈ maˍ ve 1:10) Oˇ ve lehˬ, mvuhˇ miˬ hkʼoˆ ve kanˇ paˆ lonˉ Eaˍgaˍlanˍ˗Aˍmeˬriˆkaꞈ hpehꞈ ve yoˬ. Hpeuꞈ maˍ ve liꞈ 13:1-4 hkʼaw haiˬ ve to nuˇ to shaˆ oˉ kʼoˍ 7 shiˍ cawˬ ve lehˬ, miˬ guiˬ hkʼoˆ lo ve kanˇ paˆ lonˉ Eaˍgaˍlanˍ˗Aˍmeˬriˆkaꞈ htaꞈ kʼoˆ gaˇ ve yoˬ.

9. Haiˬ ve to nuˇ to shaˆ “yawˬ ehˉ ve awˬ hkaw htaꞈ shuˍ ve awˬ hkaw 2 maˬ” a shu htaꞈ kʼoˆ gaˇ ve le?

⁹ Hpeuꞈ maˍ ve liꞈ kaˇ nanˉ uiˍ 13 hkʼaw haiˬ ve to nuˇ to shaˆ oˉ kʼoˍ 7 shiˍ cawˬ ve htaꞈ kʼoˆ taˍ ve yoˬ. Chi ve lehˬ miˬ guiˬ hkʼoˆ lo ve kanˇ paˆ lonˉ Eaˍgaˍlanˍ˗Aˍmeˬriˆkaꞈ htaꞈ kʼoˆ gaˇ ve yoˬ. Yawˇ hui lehˬ haiˬ ve to nuˇ to shaˆ htaꞈ shuˍ leh ‘yawˬ ehˉ ve awˬ hkaw htaꞈ shuˍ ve awˬ hkaw 2 maˬ cawˬ leh cawˇ shehˍ ma tawˇ yaw ve hkʼa shuˍ shuˍ yawˇ hui tawˇ yaw ve yoˬ.’ Leh “uiˍ ve awˬ heˆ teˇ hpaˍ htaꞈ yawˇ te maˍ ve yoˬ. Hkʼaˬ hkʼe le tehꞈ kʼoˆ kʼo, mvuhˇ naw ma lo te leh miˬ guiˬ hkʼoˆ hkʼa gaˬ, chaw yaˇ mehˆ gʼuˇ suhˍ yawˇ aˬ miˍ htaꞈ ce la tcuh ve yoˬ.” (Hpeuꞈ maˍ ve 13:11-15) Hpeuꞈ maˍ ve liꞈ kaˇ nanˉ uiˍ 16 leh 19 hkʼaw haiˬ ve to nuˇ to shaˆ chi ve teˇ hkeh lehˬ “maˇ heˆ heˆ ve tcuh kaˍ paˍ” htaꞈ kʼoˆ gaˇ ve yoˬ. (Hpeuꞈ maˍ ve 16:13; 19:20) Mvuhˇ miˬ hkʼoˆ ve kanˇ paˆ lonˉ Eaˍgaˍlanˍ˗Aˍmeˬriˆkaꞈ “te luˬ te sheˆ” tuˬ ve tehꞈ Daˍyeˍlaˆ liꞈ hkʼaw kaꞈ kʼoˆ taˍ ve yoˬ. (Daˍyeˍlaˆ 8:19, 23, 24) Awˬ lawn chi ve maꞈ lonˉ 2 pawˆ teˇ pawˆ htaˇ awˬ tehˬ hpehꞈ la ve yoˬ. Eaˍgaˍlanˍ˗Aˍmeˬriˆkaꞈ hkʼaw cuˇ yiˍ cawˬ paˍ aˬ miˍ shiˍ lonˉ 2 shiˍ te tawˆ leh maꞈ lonˉ 2 pawˆ teˇ pawˆ peuˬ˗e tuˬ te piˇ ve yoˬ. Hkʼe te leh, Mvuhˇ miˬ hkʼoˆ ve kanˇ paˆ lonˉ Eaˍgaˍlanˍ˗Aˍmeˬriˆkaꞈ mvuhˇ naw ma hkʼoˆ lo aˬ miˍ ce yaꞈ la tuˬ te piˇ ve tehꞈ ngaˬ hui mawˬ ve yoˬ.

10. “Haiˬ ve to nuˇ to shaˆ” aˬ htoꞈ ma htaꞈ kʼoˆ gaˇ ve le? (Hpeuꞈ maˍ ve 13:14, 15; 17:3, 8, 11)

¹⁰ Chi teˇ hkui haiˬ ve to nuˇ to shaˆ awˬ nu ve teˇ hkeh htaꞈ nyi sheˍ. Yawˇ lehˬ haiˬ ve to nuˇ to shaˆ oˉ kʼoˍ 7 shiˍ cawˬ ve htaꞈ shuˍ leh yawˇ awˬ to nyiˉ˗ehˍ cawˬ ve yoˬ. Leh yawˇ htaꞈ “haiˬ ve to nuˇ to shaˆ” tehꞈ kuˬ leh ‘jawˇ mawˇ 8 gʼaˇ teˇ gʼaˇ hpehꞈ ve yoˬ.’ * (Hpeuꞈ maˍ ve 13:14, 15; 17:3, 8, 11 gʼaw sheˍ.) Liꞈ hpu hkʼaw kʼoˆ ve, jawˇ mawˇ chi teˇ gʼaˇ a shaꞈ teꞈ chehˇ jaw ve yoˬ. Yaꞈ hkʼaˇ, chi teˇ hkui yawˇ kanˇ paˆ maˇ cawˬ˗oˬ. Leh yawˇ kanˇ paˆ teˇ pawˆ kʼawꞈ cawˬ tuˬ yoˬ. Chi ve lehˬ mvuhˇ miˬ hkʼoˆ ve kanˇ paˆ lonˉ kʼawꞈ cawˬ la tuˬ kʼoˆ ve htaꞈ cawˇ daꞈ jaˇ ve yoˬ. Awˬ moˍ chi lehˬ mvuhˇ miˬ teˇ hpaˍ htaꞈ awˬ gʼaˇ piˇ ve yoˬ. Awˉ lawˉ htaˇ awˬ moˍ chi htaꞈ mvuhˇ miˬ hkʼoˆ ve kanˇ paˆ lonˉ tehꞈ kuˬ ve yoˬ. Yaꞈ hkʼaˇ, maꞈ lonˉ 2 pawˆ teˇ pawˆ htaˇ kanˇ paˆ maˇ kʼawꞈ cawˬ˗o. Leh chi teˇ hkui awˬ moˍ chi mvuhˇ miˬ hkʼoˆ ve kanˇ paˆ lonˉ kʼawꞈ hpehꞈ ve yoˬ.

11. Haiˬ ve to nuˇ to shaˆ aˬ htoꞈ ma te tuˬ le? Leh aˬ htoꞈ ma te ngaˬ hui yawˇ htaꞈ maˇ kawˆ cawˇ ve le?

¹¹ Haiˬ ve to nuˇ to shaˆ lehˬ mvuhˇ miˬ teˇ hpaˍ htaꞈ maˇ cawˇ maˇ hawˍ daꞈ tuˬ te piˇ leh Yaˬhoˉvaˬ leh yawˇ ve chaw htaꞈ tawˍ piˇ ve yoˬ. Yawˇ lehˬ, “hkunˉ hawˉ hkanˇ teˇ hpaˍ” htaꞈ maꞈ Aˍmaˍgeˍdonˍ hkʼaw hpawnˬ daꞈ la piˇ law ve yoˬ. Chi ve lehˬ, “Kanˇ paˆ uiˍ ve Gʼuiˬ sha ve awˬ nyi uiˍ ve teˇ nyi awˬ hkʼaw lo maꞈ bawˆ tuˬ awˬ pon” hpehꞈ ve yoˬ. (Hpeuꞈ maˍ ve 16:13, 14, 16) Yaꞈ hkʼaˇ, ngaˬ hui chi htaꞈ maˇ kawˆ cawˇ. Awˬ lawn kʼo, Yaˬhoˉvaˬ lehˬ yawˇ uˉ peunˍ ve hpawˇ chehˇ ve chaw htaꞈ laꞈ haˉ ga piˇ tuˬ yoˬ.—Yeˍsaˍkeˍlaˆ 38:21-23.

12. Haiˬ ve to nuˇ to shaˆ hkʼa peu˗eˬ htaꞈ aˬ htoꞈ ma hpehꞈ la tuˬ le?

¹² Haiˬ ve to nuˇ to shaˆ hkʼa peu˗eˬ htaꞈ aˬ htoꞈ ma  hpehꞈ la tuˬ le? Hpeuꞈ maˍ ve liꞈ 19:20 hkʼaw kʼoˆ ve, “haiˬ ve to nuˇ to shaˆ htaꞈ hpeh yuˬ leh, maˇ heˆ heˆ ve tcuh kaˍ paˍ htaꞈ htawˇ yawˇ geh teˇ geh hpeh yuˬ ve yoˬ. Maˇ heˆ heˆ ve tcuh kaˍ paˍ oˇ ve lehˬ, haiˬ ve to nuˇ to shaˆ ve yinˉ htaꞈ hkanˍ yuˬ leh yawˇ ve shaˉ hoꞈ htaꞈ oˉ kʼoˍ pui ve chaw teˇ hpaˍ htaꞈ heˍ yuˬ beˬ yuˬ tuˬ, haiˬ ve to nuˇ to shaˆ mehˆ gʼuˇ suhˍ awˬ heˆ teˇ hpaˍ htaꞈ te maˍ piˇ paˍ teˇ gʼaˇ yoˬ. Aˬ miˍ toꞈ chehˇ ve maꞈ shiˉ gʼuiˬ po awˬ hkʼaw lo yawˇ huiˉ maˬ htaꞈ awˬ teꞈ teꞈ baˬ keu ve yoˬ.” Chi htaꞈ pa taw, mvuhˇ miˬ teˇ hpaˍ uˉ peunˍ chehˇ sheˍ htaˇ, yawˇ hui htaꞈ Gʼuiˬ sha co co taiˍ taiˍ te luˬ piˇ tuˬ yoˬ.

13. Hkriꞈ yaˇ lehˬ mvuhˇ miˬ uˉ peunˍ ve awˬ hawˉ lo shoꞈ shaꞈ ve aˬ htoꞈ ma gʼa hpuˇ ve le?

¹³ Awˬ lawn chi ve ngaˬ hui awˬ pon tcuhˉ kuiˬ hkʼaˬ hkʼe cawˬ ve le? Hkriꞈ yaˇ lehˬ Gʼuiˬ sha leh yawˇ ve mvuhˇ miˬ htaꞈ ka tiꞈ gʼa yeˬ ve yoˬ. (Yoˇhanˬ 18:36) Ngaˬ hui chi hkʼe te gʼa tuˬ mvuhˇ miˬ uˉ peunˍ ve choˬ paˉ oˇ paˉ maˇ chehˇ. Chi hkʼe te ve lehˬ haˍ jaˇ ve yoˬ. Awˬ lawn kʼo, mvuhˇ miˬ teˇ hpaˍ hpaˍ ngaˬ hui kʼoˆ ve leh te ve awˬ ceuˬ yawˇ hui hpawˇ hkʼa dehꞈ chehˇ tcuh gaˇ ve yoˬ. Mvuhˇ miˬ uˉ peunˍ ve hpawˇ chehˇ ve chaw lehˬ, haiˬ ve to nuˇ to shaˆ ve awˬ maiˉ htaꞈ gʼa tuˬ yoˬ. (Hpeuꞈ maˍ ve 13:16, 17) Yaꞈ hkʼaˇ, yawˇ hui htaꞈ Yaˬhoˉvaˬ nyi hkʼaˇ maˇ suh leh co co taiˍ taiˍ ve a shaꞈ kaꞈ maˇ gʼa tuˬ yoˬ. (Hpeuꞈ maˍ ve 14:9, 10; 20:4) Chi htaꞈ pa taw mvuhˇ miˬ uˉ peunˍ ve chaw ngaˬ hui htaꞈ nyiˉ laˇ ve htawˇ, mvuhˇ miˬ hpawˇ choˬ paˉ oˇ paˉ maˇ chehˇ tuˬ a yeˇ uiˍ jaˇ!

14. Hpeuꞈ maˍ ve liꞈ 17:3-5 hkʼaw kʼoˆ taˍ ve hkʼe, tcuh yaˇ Yoˇhanˬ anˇ lawꞈ lawꞈ ve awˬ ceuˬ aˬ htoꞈ ma mawˬ sheˍ ve le?

¹⁴ Tcuh yaˇ Yoˇhanˬ “anˇ jaˇ ve” teˇ ceuˬ htaꞈ kʼawꞈ mawˬ ve yoˬ. Oˇ ve lehˬ aˬ htoꞈ ma le? Haiˬ ve to nuˇ to shaˆ hkʼoˆ yaˇ miˇ teˇ gʼaˇ mui chehˇ ve htaꞈ yawˇ gʼa mawˬ ve yoˬ. (Hpeuꞈ maˍ ve 17:1, 2, 6) Yawˇ lehˬ “meh maˬ lanˉ lonˉ” hpehꞈ leh “Uiˍ ve Baˍbuˍlonˍ venˇ” tehꞈ kuˬ ve yoˬ. Yawˇ lehˬ, ‘miˬ guiˬ hkʼoˆ chehˇ ve hkunˉ hawˉ hkanˇ teˇ hpaˍ geh haˉ chawˇ haˉ paˆ te peuˬ ve yoˬ.’—Hpeuꞈ maˍ ve 17:3-5 gʼaw sheˍ.

15-16. “Uiˍ ve Baˍbuˍlonˍ venˇ” lehˬ a shu le? Leh ngaˬ hui hkʼaˬ hkʼe te shiˍ gʼa ve le?

¹⁵ “Uiˍ ve Baˍbuˍlonˍ venˇ” lehˬ a shu le? Yaˇ miˇ chi teˇ gʼaˇ lehˬ mvuhˇ miˬ uˉ peunˍ paˍ htaꞈ kʼoˆ gaˇ ve maˇ heˆ. Awˬ lawn kʼo, yawˇ lehˬ uˉ peunˍ paˍ htaꞈ haˉ chawˇ haˉ paˆ te ve yoˬ. Hpeuꞈ maˍ ve liꞈ hkʼaw kʼoˆ taˍ ve hkʼe, yawˇ yawˇ hui htaꞈ uˉ peunˍ leh haiˬ ve to nuˇ to shaˆ hkʼoˆ yawˇ mui chehˇ ve yoˬ. (Hpeuꞈ maˍ ve 18:9) Yaˇ miˇ chi lehˬ miˬ guiˬ hkʼoˆ Saˍtanˍ ve tanˇ kaˬ hpawˇ htaꞈ kaꞈ kʼoˆ gaˇ ve maˇ heˆ. Awˬ lawn kʼo, Hpeuꞈ maˍ ve liꞈ hkʼaw awˬ moˍ chi htaꞈ “miˬ guiˬ ve tanˇ kaˬ paˍ teˇ hpaˍ” hpehꞈ ve tehꞈ kʼoˆ ve yoˬ.—Hpeuꞈ maˍ ve 18:11, 15, 16.

¹⁶ Liꞈ hpu hkʼaw “meh maˬ lanˉ lonˉ” lehˬ, Gʼuiˬ sha ve kanˉ te ve tehꞈ kʼoˆ ve chaw htaꞈ kʼoˆ gaˇ ve yoˬ. Yaꞈ hkʼaˇ, yawˇ hui shaˉ hoꞈ htaꞈ oˉ kʼoˍ pui leh “miˬ guiˬ awˬ liˇ htaꞈ awˬ chawˇ te gaˇ ve chaw” hpehꞈ ve yoˬ. (1 Raˍsaˍvanˍ 5:25; Yaˍkoˆ 4:4) Liꞈ hpu hkʼaw daꞈ kehˬ ve yaˇ miˇ haˉ tehꞈ kʼoˆ htaˇ, Gʼuiˬ sha ve kanˉ ka tiꞈ yeˬ ve hkʼaw te ve chaw htaꞈ kʼoˆ gaˇ ve yoˬ. (2 Kawˇrenˍhtuˆ 11:2; Hpeuꞈ maˍ ve 14:4) Chi hkʼoˆ kaꞈ, oˇ htaˇ teˇ co˗e Baˍbuˍlonˍ venˇ lehˬ, maˇ heˆ heˆ ve oˉ kʼoˍ pui kuiˬ hpehꞈ ve yoˬ. Chi htaꞈ pa taw, Uiˍ ve Baˍbuˍlonˍ venˇ lehˬ, maˇ heˆ heˆ ve oˉ kʼoˍ pui ve teˇ ceuˬ le le leh miˬ guiˬ hkʼoˆ lo ve maˇ heˆ heˆ ve bon liˇ hkʼa peu˗eˬ htaꞈ kʼoˆ gaˇ ve yoˬ. “Uiˍ ve Baˍbuˍlonˍ venˇ lehˬ aˬ htoꞈ ma le?” Vehˆsaiˉ jw.org hkʼaw nyi sheˍ.—Hpeuꞈ maˍ ve 17:5, 18.

17. Uiˍ ve Baˍbuˍlonˍ venˇ htaꞈ aˬ htoꞈ ma hpehꞈ la tuˬ le?

¹⁷ Uiˍ ve Baˍbuˍlonˍ venˇ htaꞈ aˬ htoꞈ ma hpehꞈ la tuˬ le? Hpeuꞈ maˍ ve liꞈ 17:16, 17 hkʼaw kʼoˆ ve, “nawˬ gʼa mawˬ ve awˬ hkaw 10 maˬ leh haiˬ ve to nuˇ to shaˆ lehˬ, meh maˬ lanˉ htaꞈ canˇ tuˬ yoˬ. Yawˇ hui lehˬ, yawˇ htaꞈ gawˬ cu gawˬ pehˆ hpehꞈ piˇ lawˬ leh, awˬ kʼu nyi te piˇ tuˬ yoˬ. Yawˇ ve awˬ shaˍ htaꞈ yawˇ hui caˇ leh, yawˇ htaꞈ aˬ miˍ tuˉ baˬ tuˬ yoˬ. Awˬ lawn kʼo, Gʼuiˬ sha nyi ma cawˇ ve htaꞈ yawˇ hui te tuˬ, yawˇ hui ve nyi ma htaꞈ Gʼuiˬ sha dawˇ pawnˍ piˇ ve yoˬ.” Yaˬhoˉvaˬ lehˬ mvuhˇ miˬ teˇ hpaˍ ve awˬ moˍ htaꞈ dawˇ pawnˍ piˇ tuˬ yoˬ. Chi ve lehˬ nyiˉ˗ehˍ ve haiˬ ve to nuˇ to shaˆ miˬ guiˬ hkʼoˆ lo maˇ heˆ heˆ ve bon liˇ hkʼa peu˗eˬ htaꞈ te luˬ piˇ tuˬ yoˬ.—Hpeuꞈ maˍ ve 18:21-24.

18. Ngaˬ hui Uiˍ ve Baˍbuˍlonˍ venˇ htaꞈ maˇ caˉ daꞈ ve tehꞈ hkʼaˬ hkʼe te yonˍ gʼa ve le?

 ¹⁸ Awˬ lawn chi ve ngaˬ hui awˬ pon tcuhˉ kuiˬ hkʼaˬ hkʼe cawˬ ve le? Ngaˬ hui oˉ kʼoˍ pui ve lehˬ, “Awˬ pa Gʼuiˬ sha mehˆ gʼuˇ suhˍ chaꞈ chiˆ ve maˇ cawˬ leh daꞈ kehˬ ve oˉ kʼoˍ pui ve awˬ liˇ” gʼa hpehꞈ cawˇ ve yoˬ. (Yaˍkoˆ 1:27) Maˇ heˆ heˆ ve bon liˇ leh, awˬ liˇ awˬ hkʼaˇ maˇ daꞈ ve ngaˬ hui htaꞈ maˇ heuˆ la tcuh cawˇ. Chaw liˇ vaˇ liˇ Gʼuiˬ sha maˇ dawˇ cawˇ ve awˬ ceuˬ htaꞈ ngaˬ hui maˇ caˉ daꞈ leh Uiˍ ve Baˍbuˍlonˍ htaꞈ caˉ daꞈ ve neˇ te ve htaꞈ kaꞈ ngaˬ hui maˇ te cawˇ. Chi hkʼoˆ kaꞈ, venˇ chi ve hkʼaw chehˇ ve tehꞈ Gʼuiˬ sha maˇ gʼa shawˍ laˇ leh “venˇ oˇ ve hkʼaw tawˆ la” tuˬ ngaˬ hui shu htaꞈ shaˍ tiꞈ gʼa piˇ ve yoˬ.—Hpeuꞈ maˍ ve 18:4.

19. “Nyiˉ˗ehˍ ve cawˇ shehˍ ma lonˉ” lehˬ a shu le?

¹⁹ Hpeuꞈ maˍ ve liꞈ hkʼaw “nyiˉ˗ehˍ ve cawˇ shehˍ ma lonˉ” htaꞈ kaꞈ kʼoˆ sheˍ ve yoˬ. (Hpeuꞈ maˍ ve 12:3) Yawˇ lehˬ Yeˍsuˆ leh mvuhˇ naw ma tcuh yaˇ htaꞈ kaꞈ bawˆ daꞈ ve yoˬ. (Hpeuꞈ maˍ ve 12:7-9) Leh yawˇ Yaˬhoˉvaˬ ve chaw htaꞈ kaꞈ bawˆ leh haiˬ ve to nuˇ to shaˆ htaꞈ kanˇ paˆ piˇ ve lehˬ, mvuhˇ miˬ uˉ peunˍ ve teˇ hpaˍ htaꞈ kaꞈ kʼoˆ gaˇ ve yoˬ. (Hpeuꞈ maˍ ve 12:17; 13:4) Cawˇ shehˍ ma lonˉ a shu htaꞈ kʼoˆ gaˇ ve le? “Cawˇ shehˍ ma oˇ ve lehˬ, aˬ sho˗eˬ htaˇ ve vuiˬ haiˬ hpehꞈ ve yoˬ.” (Hpeuꞈ maˍ ve 12:9; 20:2) Yawˇ lehˬ Yaˬhoˉvaˬ ve canˇ paˍ hkʼa peu˗eˬ hkʼawꞈ nawˉ lo awˬ gʼaˇ piˇ chehˇ ve yoˬ.

20. Cawˇ shehˍ ma lonˉ htaꞈ aˬ htoꞈ ma hpehꞈ la tuˬ le?

²⁰ Cawˇ shehˍ ma lonˉ htaꞈ aˬ htoꞈ ma hpehꞈ la tuˬ le? Hpeuꞈ maˍ ve liꞈ 20:1-3 hkʼaw kʼoˆ ve, mvuhˇ naw ma tcuh yaˇ teˇ gʼaˇ Saˍtanˍ htaꞈ miˬ kʼoˍ naˉ jaˇ ve hkʼaw baˬ keu leh haw tiˍ taˍ tuˬ yoˬ. Awˬ yanˇ oˇ ve teˇ yanˇ Saˍtanˍ lehˬ, “1,000 hkʼawꞈ maˇ peuˬ ve ceh ceh, chaw ceuˬ teˇ hpaˍ htaꞈ yawˇ maˇ gʼa heˍ yuˬ beˬ yuˬ” tuˬ yoˬ. Awˬ leh meuˇ htaˇ Saˍtanˍ leh neˇ teˇ hpaˍ htaꞈ co co taiˍ taiˍ te luˬ piˇ tuˬ yoˬ. Awˬ lawn kʼo, Hpeuꞈ maˍ ve liꞈ hkʼaw kʼoˆ ve yawˇ hui htaꞈ, “aˬ miˍ leh maꞈ shiˉ gʼuiˬ po awˬ hkʼaw lo baˬ keu ve yoˬ.” (Hpeuꞈ maˍ ve 20:10) Miˬ guiˬ hkʼoˆ lo Saˍtanˍ leh neˇ teˇ hpaˍ maˇ cawˬ ve kʼo, hkʼaˬ ma daꞈ jaˇ ve htaꞈ dawˇ nyi sheˍ!

21. Aˬ htoꞈ ma te ngaˬ hui Hpeuꞈ maˍ ve liꞈ hkʼaw gʼa gʼaw ve ha lehˬ jaˇ ve le?

²¹ Hpeuꞈ maˍ ve liꞈ hkʼaw ve awˬ heˆ teˇ hpaˍ ve tcuhˉ kuiˬ htaꞈ ngaˬ hui na gʼa htaˇ, ngaˬ hui awˬ gʼaˇ gʼa jaˇ. Yaˬhoˉvaˬ ve canˇ paˍ a shu hpehꞈ ve htaꞈ ceh ngaˬ hui shiˍ ve maˇ heˆ. Yawˇ hui htaꞈ aˬ htoꞈ ma hpehꞈ la tuˬ ve htaꞈ kaꞈ ngaˬ hui shiˍ ve yoˬ. Hpeuꞈ maˍ ve liꞈ hkʼaw kʼoˆ ve, “Hpeuꞈ maˍ ve liꞈ chi teˇ hkui nawˬ htaꞈ heuˆ la kuiˬ hkʼaˬ hkʼe cawˬ ve le?” (Hpeuꞈ maˍ ve 1:3) Chi hkʼoˆ kaꞈ, Gʼuiˬ sha ve canˇ paˍ hkʼa peu˗eˬ htaꞈ laꞈ haˉ te luˬ piˇ htaˇ, Gʼuiˬ sha ve kanˉ te ve chaw daꞈ ve awˬ ceuˬ hkʼa biˇ gʼa tuˬ yoˬ. Leh gʼuˇ suhˍ teˇ lawn hkʼaw awˬ lawn chi htaꞈ caˉ daꞈ ve awˬ leh meuˇ teˇ lawn htaꞈ teˇ geh henˇ tuˬ yoˬ.