1. Aˬ htoꞈ ma te ngaˬ hui teˇ gʼaˇ le le Gʼuiˬ sha ve cuˇ yiˍ gʼa cawˬ cawˇ ve le? (Tawˇ naˉ ve 4:7)

 Nawˬ a shaꞈ teꞈ kuiˬ hkʼaw a yeˇ uiˍ ve awˬ lawn dawˇ cheˆ jaw ve kʼo, nawˬ Yaˬhoˉvaˬ geh cuˇ yiˍ gʼa tuˬ bon lawˬ jaw ve yoˬ hehˉ. Awˬ lawn kʼo, Yaˬhoˉvaˬ geh cuˇ yiˍ gʼa ve lehˬ nawˬ cawˇ ve htaꞈ dawˇ cheˆ gʼa tuˬ ga laˇ gʼa ve tehꞈ shiˍ ve yoˬ. (Yaˍkoˆ 1:5) Jawˇ mawˇ Sawˉlaꞈmonˍ kʼoˆ ve, “cuˇ yiˍ htaꞈ ca ve lehˬ uiˍ jaˇ ve kanˉ teˇ maˬ hpehꞈ ve yoˬ.” (Tawˇ naˉ ve 4:7 gʼaw sheˍ.) Sawˉlaꞈmonˍ awˬ nu ve cuˇ yiˍ teˇ hpaˍ htaꞈ yawˇ kʼoˆ gaˇ ve maˇ heˆ. Gʼuiˬ sha geh laˬ ve cuˇ yiˍ htaꞈ kʼoˆ gaˇ ve yoˬ. (Tawˇ naˉ ve 2:6) Leh Gʼuiˬ sha geh laˬ ve cuˇ yiˍ lehˬ chi beuꞈ teˇ co˗e ngaˬ hui shoꞈ shaꞈ ve gʼa hpuˇ chehˇ ve htaꞈ gu gʼa˗aw laˇ? Gu gʼa ve yoˬ. Chi ve awˬ lawn chi ve hkʼaw teˇ geh henˇ tuˬ yoˬ.

2. Ngaˬ hui cuˇ yiˍ cawˬ ve chaw hpehꞈ tuˬ aˬ htoꞈ ma ga laˇ gʼa ve le?

² Ngaˬ hui cuˇ yiˍ cawˬ tuˬ ga laˇ gʼa ve teˇ ceuˬ lehˬ, hawˉ hkʼaˆ chi 2 gʼaˇ cuˇ yiˍ cawˬ jaˇ ve tehꞈ teˇ gʼaˇ le le kʼoˆ leh yawˇ hui htaꞈ henˇ yuˬ leh beˆ maˍ laˇ ve htaꞈ gʼaꞈ te sheˍ. Awˉ lawˉ teˇ gʼaˇ lehˬ Sawˉlaꞈmonˍ yoˬ. Liꞈ hpu hkʼaw kʼoˆ ve, “Gʼuiˬ sha lehˬ Sawˉlaꞈmonˍ htaꞈ shiˍ puiˉ ve cuˇ yiˍ maˍ yiˍ hkʼa biˇ piˇ taˍ ve yoˬ.” (1 Jawˇ mawˇ 4:29) 2 gʼaˇ teˇ gʼaˇ lehˬ Yeˍsuˆ yoˬ. Miˬ guiˬ hkʼoˆ lo yawˇ lehˬ cuˇ yiˍ cawˬ jaˇ ve chaw teˇ gʼaˇ hpehꞈ ve yoˬ. (Maꞈhtehˍ 12:42) Liꞈ hpu hkʼaw yawˇ htaꞈ caˉ daꞈ ve tcuh kaˍ paˍ ve tawˇ hkawˇ kʼoˆ taˍ ve, “yawˇ ve chaw teˇ hpaˍ htaꞈ uˉ peunˍ tuˬ, Gʼuiˬ sha lehˬ chaw oˇ ve htaꞈ shiˍ puiˉ ve nyi ma leh cuˇ yiˍ hkʼa biˇ piˇ tuˬ yoˬ.”—Iˉsaˍyaˆ 11:2.

3. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

³ Yaˬhoˉvaˬ lehˬ Sawˉlaꞈmonˍ leh Yeˍsuˆ htaꞈ cuˇ yiˍ piˇ ve yoˬ. Hkʼe te leh, yawˇ huiˉ maˬ beˆ maˍ laˇ ve kaꞈ chi beuꞈ teˇ co˗e ngaˬ hui awˬ pon awˬ bon cawˬ jaˇ. Beˆ maˍ laˇ ve chi teˇ hpaˍ lehˬ, hpu, kanˉ, a shu  yawˇ awˬ to, chi htaꞈ caˉ daꞈ ve cawˇ ve dawˇ hkʼaˇ cawˬ tuˬ awˬ lawn chi ve hkʼaw teˇ geh henˇ tuˬ yoˬ.

4. Sawˉlaꞈmonˍ leh Yeˍsuˆ hkʼaˬ hkʼe te maˇ shuˍ daꞈ ve le?

⁴ Sawˉlaꞈmonˍ paw sha jaˇ leh yawˇ ve a shaꞈ teꞈ kuiˬ hkʼaw hpehꞈ sha jaˇ. (1 Jawˇ mawˇ 10:7, 14, 15) Yaꞈ hkʼaˇ, Yeˍsuˆ lehˬ mawˇ yehˇ hkʼeun hkʼaˬ nyiˇ ceuˬ maˇ cawˬ. Chi hkʼoˆ kaꞈ yehˬ kaꞈ maˇ cawˬ. (Maꞈhtehˍ 8:20) Chi hkʼe hpehꞈ ve htawˇ, yawˇ huiˉ maˬ hpu shi mawˇ jeˬ hpawˇ cawˇ ve dawˇ hkʼaˇ cawˬ ve yoˬ. Chi lehˬ yawˇ huiˉ maˬ Yaˬhoˉvaˬ geh cuˇ yiˍ hkʼa shuˍ gʼa ve yoˬ.

5. Sawˉlaꞈmonˍ hpu ve awˬ lawn cawˇ ve dawˇ hkʼaˇ hkʼaˬ hkʼe cawˬ ve le?

⁵ Sawˉlaꞈmonˍ kʼoˆ ve, ‘hpu lehˬ heuˆ gaˇ ve mawˇ htaꞈ vuiˬ gʼa ve yoˬ.’ (Cuˇ yiˍ piˇ ve 7:12) Ngaˬ hui loˍ ve awˬ ceuˬ htaꞈ vuiˬ gʼa tuˬ leh heuˆ gaˇ ve awˬ ceuˬ htaꞈ vuiˬ gʼa tuˬ hpu gʼa cawˬ ve yoˬ. Yaꞈ hkʼaˇ, Sawˉlaꞈmonˍ kʼoˆ ve, hpu aꞈ kehˉ a yeˇ uiˍ ve laiˉ ceuˬ cawˬ sheˍ ve yoˬ. Tawˇ pa haˉ te kʼo, yawˇ kʼoˆ ve, “hpu shi mawˇ jeˬ htaꞈ leuˆ yuˬ tcuh laˇ ve kʼo, daꞈ ve awˬ meh htaꞈ leuˆ yuˬ˗oꞈ.” (Tawˇ naˉ ve 22:1) Chi hkʼoˆ kaꞈ Sawˉlaꞈmonˍ kʼoˆ sheˍ ve, hpu htaꞈ haꞈ ve chaw lehˬ yawˇ ca gʼa taˍ ve hpu htaꞈ nyi hkʼaˇ maˇ suh. (Cuˇ yiˍ piˇ ve 5:10, 12) Leh yawˇ shaˍ tiꞈ peꞈ laˇ sheˍ ve, hpu shi mawˇ jeˬ htaꞈ gʼaˇ taˇ va. Awˬ lawn kʼo, hpu shi mawˇ jeˬ lehˬ teˇ hkui tiˉ mehˉ kʼai puiˉ ve yoˬ.—Tawˇ naˉ ve 23:4, 5.

6. Yeˍsuˆ hpu shi mawˇ jeˬ ve awˬ lawn cawˇ ve dawˇ hkʼaˇ hkʼaˬ hkʼe cawˬ ve le? (Maꞈhtehˍ 6:31-33)

⁶ Yeˍsuˆ lehˬ hpu shi mawˇ jeˬ ve awˬ lawn cawˇ ve dawˇ hkʼaˇ cawˬ ve yoˬ. Daꞈ ve caˇ tuˬ dawˬ tuˬ gʼa caˇ htaˇ, yawˇ nyi hkʼaˇ suh ve yoˬ. (Luˉkaꞈ 19:2, 6, 7) Teˇ pawˆ htaˇ Yeˍsuˆ lehˬ iˉ kaˆ htaꞈ daꞈ ve a pehˉ meuˇ gʼuiˬ te gʼa ve yoˬ. Chi lehˬ yawˇ anˇ tuˬ te ve awˉ lawˉ teˇ pawˆ hpehꞈ ve yoˬ. (Yoˇhanˬ 2:10, 11) Leh Yeˍsuˆ yawˇ suh˗e ve teˇ nyi htaˇ, aˉ poꞈ awˬ hpfuhˇ hkʼaˆ jaˇ ve htaꞈ gʼa veuꞈ ve yoˬ. (Yoˇhanˬ 19:23, 24) Yaꞈ hkʼaˇ, Yeˍsuˆ lehˬ hpu shi mawˇ jeˬ yawˇ a shaꞈ teꞈ kuiˬ hkʼaw a yeˇ uiˍ jaˇ ve tehꞈ maˇ shawˍ. Yawˇ awˬ laꞈ gʼawˇ htaꞈ kʼoˆ piˇ ve, ‘chaw teˇ gʼaˇ kaꞈ jawˇ mawˇ 2 gʼaˇ ve awˬ ceˬ te maˇ gʼa. Nawˬ hui lehˬ Gʼuiˬ sha ve awˬ ceˬ kaꞈ, hpu shi mawˇ jeˬ ve awˬ ceˬ kaꞈ, teˇ pawˆ tiˉ teˇ geh te maˇ gʼa.’ (Maꞈhtehˍ 6:24) Ngaˬ hui a shaꞈ teꞈ kuiˬ hkʼaw Gʼuiˬ sha ve mvuhˇ miˬ uˉ peunˍ ve a yeˇ uiˍ  jaˇ tehꞈ shawˍ ve kʼo, ngaˬ hui loˍ ve awˬ ceuˬ cawˬ tuˬ Yaˬhoˉvaˬ peꞈ laˇ tuˬ yoˬ tehꞈ Yeˍsuˆ maˍ laˇ ve yoˬ.—Maꞈhtehˍ 6:31-33 gʼaw sheˍ.

7. Awˬ viˉ awˬ nyi hawˉ hkʼaˆ teˇ gʼaˇ hpu htaꞈ caˉ daꞈ ve awˬ lawn cawˇ ve dawˇ hkʼaˇ cawˬ ve awˬ bon hkʼaˬ hkʼe gʼa ve le?

⁷ Hpu shi mawˇ jeˬ htaꞈ caˉ daꞈ ve awˬ lawn Gʼuiˬ sha beˆ maˍ laˇ ve htaꞈ awˬ viˉ awˬ nyi laiˉ gʼaˇ yuˬ yehˇ htaˇ, awˬ bon gʼa ve yoˬ. Tawˇ pa haˉ te kʼo, awˬ viˉ awˬ nyi yaˇ nehˬ Deh˗ninˇ kʼoˆ ve, “ngaˬ yaˇ nehˬ htaˇ kaꞈ dawˇ cheˆ ve, a shaꞈ teꞈ kuiˬ hkʼaw Yaˬhoˉvaˬ ve kanˉ te tuˬ a yuˇ uiˍ jaˇ tehꞈ shawˍ ve yoˬ.” Deh˗ninˇ yawˇ ve a shaꞈ teꞈ kuiˬ hkʼaw caˇ lawꞈ dawˬ lawꞈ te ve yoˬ. Hkʼe te leh, yawˇ puiˉ ve hpehꞈ ve htaꞈ yehˇ leh Gʼuiˬ sha ve kanˉ hkʼaˇ hkʼaw laiˉ ceuˬ ga piˇ ve yoˬ. Tawˇ pa haˉ te kʼo, mvuhˇ yeˬ mvuhˇ haw gʼa hpuˇ ve hpawˇ leh Beˍteˍlaˆ hkʼaw kaꞈ ga piˇ ve yoˬ. Yawˇ kʼoˆ ve, “ngaˬ chi hkʼe te tuˬ leuˆ yuˬ ve nyi ma maˇ luˬ jaw. Ngaˬ hpu htaꞈ gʼaꞈ ca ve kʼo, hpu gʼa maˇ jaˇ ve yoˬ. Yaꞈ hkʼaˇ, ngaˬ chi hkʼe te ve kʼo, chi teˇ hkui cawˬ ve hkʼe daꞈ ve awˬ chawˇ maˇ cawˬ taˬ. Ngaˬ a shaꞈ teꞈ kuiˬ hkʼaw Gʼuiˬ sha ve mvuhˇ miˬ uˉ peunˍ ve htaꞈ a yeˇ uiˍ jaˇ tehꞈ maˇ shawˍ ve kʼo, chi teˇ hkui ha lehˬ ve hkʼe maˇ ha lehˬ taˬ. Hpu hkʼaˬ ma cawˬ ve htawˇ, Yaˬhoˉvaˬ ngaˬ htaꞈ awˬ bon naꞈ laˇ ve htaꞈ tehˆ maˇ gʼa taˬ.” Ngaˬ hui Gʼuiˬ sha ve kanˉ te ve htaꞈ a yeˇ uiˍ jaˇ tehꞈ shawˍ ve kʼo, daꞈ ve awˬ bon maˇ maˇ gʼa tuˬ yoˬ.

8. Sawˉlaꞈmonˍ kanˉ htaꞈ caˉ daꞈ ve cawˇ ve dawˇ hkʼaˇ cawˬ ve tehꞈ ngaˬ hui hkʼaˬ hkʼe te shiˍ gʼa ve le? (Cuˇ yiˍ piˇ ve 5:18, 19)

⁸ Sawˉlaꞈmonˍ kʼoˆ ve, kanˉ te hkeuꞈ leh ha lehˬ gʼa ve lehˬ “Gʼuiˬ sha geh gʼa taˍ ve laꞈ shawnˍ hpehꞈ ve yoˬ.” (Cuˇ yiˍ piˇ ve 5:18, 19 gʼaw sheˍ.) Yawˇ kʼoˆ ve, ‘kanˉ te kaiˬ ve kʼo a shaꞈ htaꞈ hu gʼa tuˬ yoˬ.’ (Tawˇ naˉ ve 14:23) Awˬ lawn kʼo, Sawˉlaꞈmonˍ kanˉ te kaiˬ ve chaw hpehꞈ ve pa taw, awˬ lawn chi yawˇ hkʼa dehꞈ shiˍ ve yoˬ. Tawˇ pa haˉ te kʼo, hawˉ yehˬ te ve, a pehˉ meuˇ hko te ve, leh iˉ kaˆ gʼui po duˇ ve yoˬ. Awˬ hkʼoˆ kaꞈ, yawˇ venˇ laiˉ venˇ te ve yoˬ. (1 Jawˇ mawˇ 9:19; Cuˇ yiˍ piˇ ve 2:4-6) Chi ve hkʼa peu˗eˬ te ve lehˬ kanˉ hkeuꞈ jaˇ. Leh chi ve teˇ hpaˍ lehˬ Sawˉlaꞈmonˍ ha lehˬ tuˬ te piˇ ve yoˬ. Yaꞈ hkʼaˇ, yawˇ awˬ tehˬ ha lehˬ ve cawˬ gaˇ ve kʼo, awˬ nu ve awˬ ceuˬ kaꞈ gʼa te sheˍ ve tehꞈ shiˍ ve yoˬ. Tawˇ pa haˉ te kʼo, Sawˉlaꞈmonˍ Yaˬhoˉvaˬ awˬ pon bon yehˬ lonˉ te ve awˬ yanˇ 7 hkʼawꞈ yehˇ ve yoˬ. (1 Jawˇ mawˇ 6:38; 9:1) Sawˉlaꞈmonˍ kanˉ te ve hkʼa peu˗eˬ lehˬ, Yaˬhoˉvaˬ awˬ pon te piˇ ve pa taw, yawˇ ha lehˬ jaˇ. Yawˇ kʼoˆ ve, “awˬ leh meuˇ ve teˇ ceuˬ lehˬ chi hkʼe yoˬ. Gʼuiˬ sha htaꞈ kawˆ leh yawˇ ve awˬ liˇ tawˇ hkawˇ teˇ hpaˍ htaꞈ na yuˬ˗oꞈ.”—Cuˇ yiˍ piˇ ve 12:13.

9. Yeˍsuˆ awˬ pon kanˉ a yeˇ uiˍ ve tehꞈ maˇ shawˍ tuˬ hkʼaˬ hkʼe te ve le?

⁹ Yeˍsuˆ yaˇ ehˉ htaˇ kaꞈ laꞈ shaˉ maˉ te paˍ hpehꞈ ve pa taw, yawˇ kanˉ te hkeuꞈ jaˇ. (Maˍkuˆ 6:3) Yehˬ kʼa hkʼaw laiˉ gʼaˇ htaꞈ hu tuˬ Yeˍsuˆ gʼa ga piˇ ve pa taw awˬ pa awˬ e ha lehˬ jaˇ ve yoˬ. Yeˍsuˆ lehˬ biˇ ve chaw hpehꞈ ve yoˬ. Yawˇ kanˉ te ve kaꞈ daꞈ jaˇ leh yawˇ te taˍ ve laꞈ shaˉ maˉ htaꞈ a shu teˇ gʼaˇ kaꞈ vuiˬ gaˇ ve yoˬ. Yeˍsuˆ yawˇ te taˍ ve kanˉ htaꞈ nyi hkʼaˇ suh jaˇ ve yoˬ. Yaꞈ hkʼaˇ, yehˬ kʼa hkʼaw ve chaw htaꞈ hu tuˬ yawˇ kanˉ te htaˇ, Gʼuiˬ sha ve kanˉ te tuˬ kaꞈ awˬ yanˇ gʼa shawˍ teh ve yoˬ. (Yoˇhanˬ 7:15) Peuˬ leh Yeˍsuˆ Gʼuiˬ sha ve kanˉ awˬ yanˇ hkʼa biˇ te htaˇ, na taˍ ve chaw htaꞈ yawˇ beˆ maˍ piˇ ve, ‘luˬ puiˉ sheˆ puiˉ ve caˇ tuˬ htaꞈ gʼa tuˬ awˬ pon gʼaˇ hteꞈ taˇ te. Co tiꞈ ha tiꞈ gʼa tuˬ awˬ pon yeˬ ve caˇ tuˬ dawˬ tuˬ’ htaꞈ gʼa tuˬ gʼaˇ hteꞈ te˗o. (Yoˇhanˬ 6:27) Yeˍsuˆ hkʼaw pui hkʼoˆ lo bon maˍ htaˇ yawˇ kʼoˆ ve, “mvuhˇ naw ma hkʼoˆ lo nawˬ hui ve mawˇ jeˬ shaw hpoˆ taˍ loˬ.”—Maꞈhtehˍ 6:20.

10. Kanˉ htaꞈ caˉ daꞈ ve awˬ lawn aˬ htoꞈ ma te ngaˬ hui keunˍ lawꞈ cawˇ lawꞈ ve dawˇ hkʼaˇ cawˬ cawˇ ve le?

¹⁰ Gʼuiˬ sha geh gʼa ve cuˇ yiˍ lehˬ ngaˬ hui kanˉ htaꞈ caˉ daꞈ ve cawˇ ve dawˇ hkʼaˇ cawˬ leh keunˍ lawꞈ cawˇ lawꞈ ve chaw hpehꞈ tuˬ ga laˇ ve yoˬ. Gʼuiˬ sha ngaˬ hui htaꞈ maˍ laˇ ve, “daꞈ ve kanˉ teˇ hpaˍ  htaꞈ te˗o.” (Eˇfeˇsuꞈ 4:28) Ngaˬ hui hteˇ ve cawˇ ve chaw hpehꞈ ve, kaiˬ ve chaw hpehꞈ leh ngaˬ hui kanˉ te ve htaꞈ paw leˍ dawˇ cawˇ ve yoˬ. Hkʼe te leh, paw leˍ Shaˉhkiˆhkanˍ ve chaw htaꞈ daꞈ ve hpawˇ dawˇ tuˬ, ngaˬ hui coˇ caˇ leh kanˉ maˇ maˇ te ve yoˬ. Yaꞈ hkʼaˇ, ngaˬ hui yehˬ kʼa awˬ pon leh Gʼuiˬ sha htaꞈ oˉ kʼoˍ pui tuˬ awˬ pon te tuˬ awˬ yanˇ hkʼa dehꞈ maˇ cawˬ la ve yoˬ. Chi hkʼe hpehꞈ ve kʼo, keunˍ lawꞈ cawˇ lawꞈ ve chaw hpehꞈ leh kanˉ te ve htaꞈ caˉ daꞈ ve cawˇ ve dawˇ hkʼaˇ cawˬ tuˬ, ngaˬ hui ve te hkʼaˇ dawˇ hkʼaˇ gʼa pa ve yoˬ.

11. Awˬ viˉ awˬ nyi hawˉ hkʼaˆ teˇ gʼaˇ kanˉ te ve htaꞈ caˉ daꞈ ve cawˇ ve dawˇ hkʼaˇ cawˬ tuˬ aˬ htoꞈ ma henˇ yuˬ gʼa ve le?

¹¹ Awˬ viˉ awˬ nyi yaˇ nehˬ Vi˗linˇ lehˬ, nyi haꞈ shaˉ paˍ teˇ gʼaˇ kanˉ htaꞈ caˉ daꞈ ve cawˇ ve dawˇ hkʼaˇ cawˬ leh keunˍ lawꞈ cawˇ lawꞈ ve chaw hpehꞈ ve awˬ lawn yawˇ henˇ yuˬ gʼa ve yoˬ. Vi˗linˇ kʼoˆ ve, “awˬ viˉ awˬ nyi paw leˍ hpehꞈ ve teˇ gʼaˇ geh ngaˬ kanˉ te jaw ve yoˬ. Leh awˬ viˉ awˬ nyi chi ve teˇ gʼaˇ lehˬ, kanˉ htaꞈ caˉ daꞈ ve hpawˇ daꞈ ve henˇ yuˬ tuˬ hpehꞈ ve yoˬ. Yawˇ kanˉ te kaiˬ ve pa taw, yawˇ geh mawˇ vuiˬ la ve chaw kaꞈ dawˇ cawˇ jaˇ. Mvuhˇ hpeuꞈ la kanˉ te peuˬ hkʼawꞈ nawˉ, yehˬ kʼa awˬ pon leh Gʼuiˬ sha htaꞈ oˉ kʼoˍ pui tuˬ awˬ pon te tuˬ awˬ yanˇ yehˇ ve yoˬ. Nawˬ shiˍ˗aˬ laˇ? Yawˇ lehˬ ngaˬ shiˍ daꞈ jaˇ ve chaw teˇ gʼaˇ hpehꞈ ve yoˬ!” *

12. Awˉ lawˉ htaˇ Sawˉlaꞈmonˍ yawˇ awˬ to htaꞈ cawˇ ve dawˇ hkʼaˇ hkʼaˬ hkʼe cawˬ ve le? Leh yawˇ hkʼaˬ hkʼe pa ve le?

¹² Sawˉlaꞈmonˍ Yaˬhoˉvaˬ htaꞈ ka tiꞈ yeˬ htaˇ, yawˇ cawˇ ve dawˇ hkʼaˇ cawˬ ve yoˬ. Yawˇ a shaꞈ i leh jawˇ mawˇ tanˬ te htaˇ, yawˇ nyi ma nuˇ nehˬ leh teˇ ceuˬ le le htaꞈ maˇ shiˍ ve tehꞈ haꞈ yuˬ ve yoˬ. Leh Yaˬhoˉvaˬ ga laˇ tuˬ lawˬ ve yoˬ. (1 Jawˇ mawˇ 3:7-9) Yawˇ kʼoˆ ve, uiˍ muiˬ caˆ muiˬ ve lehˬ kawˆ tuˬ cawˬ jaˇ. Leh “caˆ muiˬ ve chaw lehˬ luˬ kuiˬ sheˆ kuiˬ lo gaˬ puiˉ ve yoˬ. Nyi ma uiˍ ve mvuh ve chaw htawˇ nyiˉ yaꞈ ve htaꞈ gʼa hkanˍ ve yoˬ.” (Tawˇ naˉ ve 16:18) Yaꞈ hkʼaˇ, peuˬ hkʼawꞈ nawˉ yawˇ kʼoˆ taˍ ve hkʼe maˇ gʼaꞈ te. Tawˇ pa haˉ te kʼo, Gʼuiˬ sha ve awˬ liˇ tawˇ hkawˇ 1 maˬ hkʼaw kʼoˆ ve, Iˉsaˍreˍlaˆ chaw ve jawˇ mawˇ lehˬ “awˬ miˇ ma laiˉ gʼaˇ maˇ gʼa heuˆ. Yawˇ chi hkʼe te ve kʼo, Gʼuiˬ sha htaꞈ yawˇ baˬ taˉ tuˬ yoˬ.” (Bon maˍ ve 17:17)  Yaꞈ hkʼaˇ, Sawˉlaꞈmonˍ awˬ liˇ tawˇ hkawˇ chi 1 maˬ htaꞈ a yeˇ maˇ yuˬ. Yawˇ awˬ miˇ ma 700 gʼaˇ cawˬ leh, awˬ miˇ ma i 300 gʼaˇ cawˬ ve yoˬ. Leh yaˇ miˇ chi ve teˇ hpaˍ laiˉ gʼaˇ buiˇ shaˆ aˉ naˆ chaw hpehꞈ leh Yaˬhoˉvaˬ htaꞈ oˉ kʼoˍ maˇ pui. (1 Jawˇ mawˇ 11:1-3) Oˇ ve teˇ yanˇ yawˇ dawˇ ve, ‘chi hkʼe ceh ve ngaˬ awˬ pon teꞈ chiˉ maˇ heˆ.’ Yawˇ Yaˬhoˉvaˬ ve hkawˇ maˇ na yuˬ ve pa taw, luˬ ve sheˆ ve laiˉ ceuˬ gʼa hpuˇ ve tehꞈ ngaˬ hui gʼa mawˬ ve yoˬ.—1 Jawˇmawˇ 11:9-13.

13. Yeˍsuˆ nyi ma nuˇ nehˬ ve htaꞈ ngaˬ hui dawˇ nyi htaˇ, aˬ htoꞈ ma henˇ yuˬ gʼa ve le?

¹³ Yeˍsuˆ yawˇ awˬ to htaꞈ cawˇ ve hpawˇ dawˇ hkʼaˇ cawˬ leh hkʼaˬ htaˆ kaꞈ nyi ma nuˇ nehˬ jaˇ. Leh yawˇ miˬ guiˬ hkʼoˆ maˇ laˬ sheˍ htaˇ, Yaˬhoˉvaˬ awˬ pon daꞈ jaˇ ve kanˉ laiˉ ceuˬ te piˇ ve yoˬ. Tawˇ pa haˉ te kʼo, “mvuhˇ naw ma hkʼoˆ leh miˬ guiˬ hkʼoˆ ve awˬ ceuˬ teˇ hpaˍ” Gʼuiˬ sha Yeˍsuˆ htaꞈ hpanˍ tcuh taˍ ve yoˬ. (Kawˇlawˇsehˇ 1:16) Leh Yeˍsuˆ Baˆtiˆsaˬ haꞈ yuˬ peuˬ hkʼawꞈ nawˉ, mvuhˇ naw ma hkʼoˆ Yaˬhoˉvaˬ geh chehˇ htaˇ ve awˬ lawn htaꞈ kʼawꞈ tawnˇ gʼa la ve yoˬ. (Maꞈhtehˍ 3:16; Yoˇhanˬ 17:5) Yaꞈ hkʼaˇ, yawˇ uiˍ muiˬ caˆ muiˬ ve maˇ cawˬ leh shu aꞈ kehˉ cheuˬ ve kaꞈ maˇ dawˇ. Yawˇ awˬ laꞈ gʼawˇ htaꞈ kʼoˆ piˇ ve, yawˇ miˬ guiˬ hkʼoˆ lo laˬ ve lehˬ “shu yawˇ awˬ pon kanˉ te tuˬ laˬ ve maˇ heˆ. Yawˇ shu awˬ pon kanˉ te tuˬ laˬ leh, chaw maˇ maˇ htaꞈ htaiˍ hkʼawꞈ piˇ tuˬ yawˇ ve a shaꞈ piˇ tuˬ awˬ pon laˬ ve yoˬ.” (Maꞈhtehˍ 20:28) Yawˇ hkʼaˇ yawˇ te puiˉ te hpehꞈ leh shu htaꞈ maˇ cuˇ cawˇ ve tehꞈ kaꞈ yawˇ maˇ dawˇ. Yaꞈ hkʼaˇ, yawˇ nyi ma nuˇ nehˬ leh Awˬ pa kʼoˆ piˇ ve awˬ ceuˬ htaꞈ hkʼaˬ htaˆ kaꞈ gʼaꞈ te ve yoˬ. (Yoˇhanˬ 5:19) Yeˍsuˆ nyi ma nuˇ nehˬ jaˇ leh daꞈ jaˇ ve henˇ yuˬ tuˬ hpehꞈ ve yoˬ.

14. A shu yawˇ awˬ to htaꞈ cawˇ ve hpawˇ dawˇ nyi tuˬ Yeˍsuˆ ngaˬ hui htaꞈ hkʼaˬ hkʼe maˍ laˇ ve le?

¹⁴ Awˬ laꞈ gʼawˇ a shu yawˇ awˬ to htaꞈ cawˇ ve hpawˇ dawˇ nyi tuˬ Yeˍsuˆ maˍ piˇ ve yoˬ. Yawˇ kʼoˆ ve, ‘nawˬ hui ve uˉ hkeh mvuh hkʼa peu˗eˬ htaꞈ htawˇ Gʼuiˬ sha gʼaw nyi taˍ peuˬ.’ (Maꞈhtehˍ 10:30) Ngaˬ hui a shu yawˇ awˬ to htaꞈ cawˇ ve hpawˇ dawˇ nyi ve kʼo, awˬ lawn chi ngaˬ hui htaꞈ awˬ gʼaˇ peꞈ laˇ jaˇ. Yaˬhoˉvaˬ ngaˬ hui htaꞈ haꞈ leh a yeˇ yuˬ laˇ ve tehꞈ Liꞈ hpu awˬ tawn chi ngaˬ hui yonˍ gʼa tuˬ te laˇ ve yoˬ. Leh yawˇ ngaˬ hui htaꞈ awˬ hpfuhˇ cawˬ ve tehꞈ shawˍ laˇ ve yoˬ. Ngaˬ hui oˉ kʼoˍ pui ve htaꞈ Yaˬhoˉvaˬ haꞈ yuˬ laˇ tcuh gaˇ ve kʼo,  ngaˬ hui awˬ to awˬ hpfuhˇ maˇ cawˬ tehꞈ maˇ dawˇ nyi cawˇ. Leh Yaˬhoˉvaˬ ka tiꞈ te taˍ laˇ ve miˬ guiˬ awˬ suhˉ hkʼaw ngaˬ hui maˇ chehˇ keunˍ ve tehꞈ kaꞈ htawˇ dawˇ nawˬ dawˇ maˇ cawˬ cawˇ.

15. (a) A shu yawˇ awˬ to htaꞈ cawˇ ve hpawˇ dawˇ nyi tuˬ, Shaw nyi kuiˬ Taꞈ yehˬ hkʼaw hkʼaˬ hkʼe beˆ maˍ laˇ jaw ve le? (b) Liꞈ mehˆ hpfuhˇ 24 hkʼaw ve awˬ han ngaˬ hui a shu yawˇ awˬ to htaꞈ a yeˇ yuˬ jaˇ ve kʼo, daꞈ ve awˬ ceuˬ aˬ htoꞈ ma htaꞈ maˇ gʼa la ve le?

¹⁵ Ngaˬ hui a shu yawˇ awˬ to htaꞈ cawˇ ve hpawˇ dawˇ nyi tuˬ, Shaw nyi kuiˬ Taꞈ yehˬ laiˉ hkʼawꞈ htaˇ ve hkʼaw beˆ maˍ laˇ ve, “Ngaˬ hui shu aꞈ kehˉ daꞈ ve tehꞈ dawˇ leh a shu yawˇ awˬ to htaꞈ chiˇ mvuh jaˇ ve maˇ te cawˇ. Leh ngaˬ hui a shu yawˇ awˬ to htaꞈ taˍ nehˬ jaˇ leh awˬ hpfuhˇ maˇ cawˬ ve tehꞈ kaꞈ maˇ dawˇ nyi cawˇ. Chi hkʼe te ve aꞈ kehˉ a shu yawˇ awˬ to cawˇ ve hpawˇ dawˇ hkʼaˇ cawˬ tuˬ dawˇ teh taˍ cawˇ ve yoˬ. Chi ve lehˬ, ngaˬ hui awˬ to hkʼaw daꞈ ve leh hkʼaˬ hkʼe taw˗ehˬ te gʼa ve htaꞈ shiˍ ve kʼoˆ gaˇ ve yoˬ. Awˬ lawn chi htaꞈ caˉ daꞈ ve Hkriꞈ yaˇ hpehꞈ ve yaˇ miˇ teˇ gʼaˇ kʼoˆ maˍ laˇ ve, ‘ngaˬ haiˬ ve chaw maˇ hpehꞈ ve htawˇ, daꞈ jaˇ ve chaw kaꞈ maˇ hpehꞈ. Ngaˬ lehˬ daꞈ ve leh maˇ daꞈ ve kaꞈ cawˬ ve yoˬ. Leh teˇ gʼaˇ le le kaꞈ chi hkʼe hpehꞈ ve yoˬ.’” * Ngaˬ hui a shu yawˇ awˬ to htaꞈ cawˇ ve dawˇ hkʼaˇ cawˬ ve kʼo, awˬ bon gʼa jaˇ ve yoˬ tehꞈ nawˬ shiˍ˗aˬ laˇ?

16. Aˬ htoꞈ ma te Yaˬhoˉvaˬ ngaˬ hui htaꞈ beˆ maˍ laˇ ve le?

¹⁶ Yaˬhoˉvaˬ ngaˬ hui htaꞈ haꞈ jaˇ leh ngaˬ hui htaꞈ ha lehˬ tcuh gaˇ ve yoˬ. Hkʼe te leh, Liꞈ hpu hkʼaw daꞈ jaˇ ve beˆ maˍ laˇ hkawˇ laiˉ ceuˬ yawˇ ngaˬ hui htaꞈ peꞈ laˇ ve yoˬ. (Iˉsaˍyaˆ 48:17, 18) Ngaˬ hui a shaꞈ teꞈ kuiˬ hkʼaw Yaˬhoˉvaˬ htaꞈ a yeˇ uiˍ jaˇ tehꞈ shawˍ ve kʼo, cuˇ yiˍ cawˬ ve hkʼaw dawˇ cheˆ gʼa leh ngaˬ hui ha lehˬ tuˬ te laˇ gʼa ve yoˬ. Ngaˬ hui chi hkʼe te ve kʼo, hpu, kanˉ, leh a shu yawˇ awˬ to htaꞈ a yeˇ yuˬ ve chaw aꞈ kehˉ, ngaˬ hui shoꞈ shaꞈ ve hkʼe taw maˇ gʼa hpuˇ. Chi htaꞈ pa taw, ngaˬ hui cuˇ yiˍ cawˬ ve hkʼaw Yaˬhoˉvaˬ ha lehˬ tuˬ teˇ ceuˬ le le te sheˍ!—Tawˇ naˉ ve 23:15.