1-2. Baˍbuˍlonˍ venˇ hkʼaw chehˇ ve Yuˇdaꞈ chaw a yeˇ uiˍ ve awˬ lawn aˬ htoꞈ ma htaꞈ gʼa dawˇ cheˆ cawˇ ve le? (Eˇzaˍraˆ 1:2-4)

 Baˍbuˍlonˍ venˇ hkʼaw shu ceˬ te ve 70 hkʼawꞈ gaˬ˗oˬ ve Yuˇdaꞈ chaw htaꞈ yawˇ hui chehˇ kuiˬ Iˉsaˍreˍlaˆ mvuhˇ miˬ lo kʼoꞈ˗e hpehꞈ ve tehꞈ jawˇ mawˇ tawˇ piˇ ve yoˬ. (Eˇzaˍraˆ 1:2-4 gʼaw sheˍ.) Chi hkʼe hpehꞈ ve lehˬ, Yaˬhoˉvaˬ teˇ gʼaˇ ceh tiˉ te gʼa ve yoˬ. Aˬ htoꞈ ma pa taw chi hkʼe kʼoˆ gʼa ve le? Awˬ lawn kʼo, Baˍbuˍlonˍ chaw lehˬ awˬ ceˬ htaꞈ maˇ hpehˇ piˇ. (Iˉsaˍyaˆ 14:4, 17) Yaꞈ hkʼaˇ, Baˍbuˍlonˍ venˇ luˬ kʼai˗oˬ htaˇ, uˉ peunˍ paˍ awˬ suhˉ teˇ gʼaˇ Yuˇdaꞈ chaw Baˍbuˍlonˍ venˇ hkʼaw tawˆ˗e hpehꞈ ve tehꞈ kʼoˆ piˇ ve yoˬ. Yehˬ shehˍ hpaˇ hpehꞈ ve Yuˇdaꞈ chaw lehˬ, yawˇ hui Baˍbuˍlonˍ venˇ hkʼaw chehˇ tuˬ ve laˇ, maˇ heˆ leh tawˆ˗e tuˬ ve laˇ, a yeˇ uiˍ ve awˬ lawn chi htaꞈ gʼa dawˇ cheˆ ve yoˬ. Yaꞈ hkʼaˇ, chi hkʼe dawˇ cheˆ ve sha ve maˇ heˆ. Aˬ htoꞈ ma pa taw le?

² Yuˇdaꞈ chaw chaw mawˇ teˇ hpaˍ kʼo kʼawꞈ˗e vuiˇ jaˇ ve pa taw, maˇ kʼawꞈ˗e ve yoˬ. Chi hkʼoˆ kaꞈ, Yuˇdaꞈ chaw maˇ˗awˍ ve kʼo, Baˍbuˍlonˍ venˇ hkʼaw paw taˍ ve yoˬ. Hkʼe te leh, yawˇ hui Baˍbuˍlonˍ venˇ hkʼaw ve awˬ lawn ceh tiˉ shiˍ ve yoˬ. Iˉsaˍreˍlaˆ mvuhˇ miˬ lo yawˇ hui ve chehˇ kuiˬ tehꞈ maˇ dawˇ leh oˇ kaˬ lo yawˇ hui ve awˬ puˍ awˬ pi chehˇ kuiˬ ceh tiˉ hpehꞈ ve tehꞈ shawˍ ve yoˬ. Leh Yuˇdaꞈ chaw teˇ hpaˍ kʼo Baˍbuˍlonˍ venˇ lo teˇ ceuˬ le le hpawˇ kaꞈ hpehꞈ sha ve pa taw, yawˇ hui ve yehˬ leh tanˇ kaˬ hkʼaˇ htaꞈ baˬ taˉ tuˬ haˍ ve, maˇ heˆ leh yawˇ hui maˇ chehˇ jaw ve mvuhˇ miˬ hkʼaw ca chehˇ˗e tuˬ kaꞈ haˍ ve yoˬ.

3. Iˉsaˍreˍlaˆ mvuhˇ miˬ lo kʼawꞈ˗e tuˬ dawˇ cheˆ ve ka tiꞈ yeˬ ve Yuˇdaꞈ chaw aˬ htoꞈ ma awˬ bon gʼa ve le?

³ Iˉsaˍreˍlaˆ mvuhˇ miˬ lo kʼawꞈ˗e tuˬ dawˇ cheˆ ve ka tiꞈ yeˬ ve Yuˇdaꞈ chaw lehˬ, yawˇ hui yehˬ leh tanˇ kaˬ hkʼaˇ htaꞈ gʼa baˬ taˉ ve aꞈ kehˉ  Yaˬhoˉvaˬ yawˇ hui htaꞈ awˬ bon naꞈ laˇ maˇ jaˇ tuˬ ve htaꞈ yawˇ hui shiˍ ve yoˬ. A yeˇ uiˍ jaˇ ve teˇ ceuˬ lehˬ Yaˬhoˉvaˬ htaꞈ oˉ kʼoˍ gʼa pui ve yoˬ. Baˍbuˍlonˍ venˇ hkʼaw maˇ heˆ heˆ ve oˉ kʼoˍ pui kuiˬ 50 kaˬ hpaˆ cawˬ ve htawˇ, Yaˬhoˉvaˬ htaꞈ oˉ kʼoˍ pui kuiˬ bon yehˬ maˇ cawˬ. Iˉsaˍreˍlaˆ chaw Moˉseˍ ve awˬ liˇ awˬ hkʼaˇ htaꞈ gʼaꞈ te ve tuˉ tanˇ kuiˬ teˇ kaˬ kaꞈ maˇ cawˬ. Yawˇ hui awˬ pon tuˉ tanˇ laˇ tuˬ, paw hkuˇ ve awˬ vuiˬ htaꞈ te paˍ teˇ gʼaˇ kaꞈ maˇ cawˬ ve yoˬ. Chi hkʼoˆ kaꞈ, Baˍbuˍlonˍ venˇ hkʼaw maˇ heˆ heˆ ve htaꞈ oˉ kʼoˍ pui ve chaw lehˬ, Yaˬhoˉvaˬ htaꞈ yawˆ yan leh yawˇ ve awˬ liˇ awˬ hkʼaˇ htaꞈ gʼaꞈ te ve chaw aꞈ kehˉ cawˬ maˇ jaˇ ve yoˬ. Chi htaꞈ pa taw, Yaˬhoˉvaˬ htaꞈ yawˆ yan ve Yuˇdaꞈ chaw laiˉ meunˍ gʼaˇ daꞈ kehˬ ve oˉ kʼoˍ pui kuiˬ kʼawꞈ gu te gʼa tuˬ mvuhˇ miˬ lo kʼawꞈ˗e tuˬ dawˇ law taˍ ve yoˬ.

4. Iˉsaˍreˍlaˆ mvuhˇ miˬ lo kʼawꞈ˗e ve Yuˇdaꞈ chaw htaꞈ ga piˇ tuˬ yoˬ tehꞈ Yaˬhoˉvaˬ ka tiꞈ hkʼaˬ hkʼe te taˍ piˇ ve le?

⁴ Yuˇdaꞈ chaw Iˉsaˍreˍlaˆ mvuhˇ miˬ lo kʼawꞈ˗e ve aˬ laˬ hkʼe 4 ha pa gʼa yehˇ ve yoˬ. Yawˇ hui kʼawꞈ˗e htaˇ kaꞈ haˍ jaˇ ve yoˬ. Yaꞈ hkʼaˇ, yawˇ hui gʼa hpuˇ ve awˬ ceuˬ htaꞈ Yaˬhoˉvaˬ gu laˇ tuˬ yoˬ tehꞈ ka tiꞈ te piˇ ve yoˬ. Iˉsaˍyaˆ kʼoˆ ve, ‘Gʼuiˬ sha awˬ pon heh puiˉ hkʼaw lo yaꞈ kʼaw teˇ caˆ gu taˍ˗oꞈ. Shehˇ de hkʼaw lo, ngaˬ hui ve Gʼuiˬ sha awˬ pon yaꞈ kʼaw htaꞈ hkʼa dehꞈ gu taˍ˗oꞈ. Hkʼaw pui ehˉ teˇ hpaˍ htawˇ hpiˬ lehˍ hpehꞈ la leh, kʼai haˍ ve chehˇ kuiˬ teˇ hpaˍ htawˇ, tawˬ lehˍ hpehꞈ la tuˬ yoˬ.’ (Iˉsaˍyaˆ 40:3, 4) Nawˬ juˇ toˇ paˍ hpehꞈ leh heh puiˉ hkʼaw leh hkʼaw laiˉ hkʼaw htaꞈ gʼa juˇ kʼai ve htaꞈ dawˇ nyi sheˍ. Yaꞈ kʼaw teˇ caˆ miˬ tawˍ kuiˬ lo hteˇ lehˍ kʼai gʼa ve htaꞈ nawˬ gʼa shiˍ htaˇ, sha jaˇ ve pa taw nawˬ ha lehˬ jaˇ tuˬ yoˬ. Leh nawˬ kʼai ve kaꞈ vaiˇ ve yoˬ.

5. Yuˇdaꞈ chaw Baˍbuˍlonˍ venˇ lo tawˆ˗e leh Iˉsaˍreˍlaˆ mvuhˇ miˬ lo kʼai ve yaꞈ kʼaw htaꞈ Liꞈ hpu hkʼaw hkʼaˬ hkʼe kʼoˆ ve le?

⁵ Chi beuꞈ teˇ co˗e ve yaꞈ kʼaw lehˬ liꞈ mehˆ maˇ heˆ leh awˬ meh bvuhꞈ mehˉ taˍ ve cawˬ ve yoˬ. Iˉsaˍyaˆ liꞈ hkʼaw ve yaꞈ kʼaw kaꞈ awˬ meh cawˬ ve yoˬ. Liꞈ hpu hkʼaw kʼoˆ ve, “daꞈ kehˬ ve yaꞈ kʼaw, tehꞈ kʼoˆ ve yaꞈ kʼaw teˇ caˆ cawˬ la tuˬ yoˬ. Venˇ baˆ yaˇ teˇ gʼaˇ kaꞈ yaꞈ kʼaw oˇ ve htaꞈ gʼa te toˇ tuˬ ve maˇ heˆ.” (Iˉsaˍyaˆ 35:8) Ka tiꞈ chi ve oˇ htaˇ teˇ co˗e Iˉsaˍreˍlaˆ chaw awˬ pon aˬ htoꞈ ma kʼoˆ gaˇ ve le? Leh chi beuꞈ teˇ co˗e ngaˬ hui awˬ pon kaꞈ aˬ htoꞈ ma kʼoˆ gaˇ ve le?

6. Aˬ htoꞈ ma te yaꞈ kʼaw chi ve htaꞈ “daꞈ kehˬ ve yaꞈ kʼaw” tehꞈ kʼoˆ ve le?

⁶ Iˉsaˍyaˆ liꞈ hkʼaw ve yaꞈ kʼaw lehˬ “daꞈ kehˬ ve yaꞈ kʼaw” tehꞈ kʼoˆ ve yoˬ. Chi hkʼe kʼoˆ ve lehˬ keunˍ jaˇ. Aˬ htoꞈ ma te chi hkʼe kʼoˆ ve le? Awˬ lawn kʼo, Iˉsaˍreˍlaˆ chaw Yaˬhoˉvaˬ htaꞈ oˉ kʼoˍ pui kuiˬ kʼawꞈ gu te ve lehˬ “venˇ baˆ yaˇ” hui maˇ kʼawꞈ cawˬ˗oˬ. Chi ve lehˬ, haˉ chawˇ haˉ paˆ te ve, shaˉ hoꞈ htaꞈ oˉ kʼoˍ pui ve maˇ heˆ leh venˇ baˆ uiˍ jaˇ ve htaꞈ te ve chi ve teˇ hpaˍ maˇ kʼawꞈ cawˬ. Yuˇdaꞈ chaw Iˉsaˍreˍlaˆ mvuhˇ miˬ lo kʼawꞈ˗e ve lehˬ, Yaˬhoˉvaˬ ve “chaw hpehꞈ la piˇ taˍ peuˬ” ve yoˬ. (Bon maˍ ve 7:6) Yaꞈ hkʼaˇ Baˍbuˍlonˍ venˇ hkʼaw tawˆ˗e ve chaw Yaˬhoˉvaˬ nyi hkʼaˇ suh ve te piˇ tuˬ te hkʼaˇ dawˇ hkʼaˇ maˇ gʼa pa˗o ve tehꞈ kʼoˆ gaˇ ve maˇ heˆ.

7. Yuˇdaꞈ chaw teˇ hpaˍ hpaˍ a shu yawˇ ve te hkʼaˇ dawˇ hkʼaˇ hkʼaˬ hkʼe gʼa pa cawˇ ve le? Tawˇ pa haˉ kʼoˆ maˍ laˇ sheˍ.

⁷ Gʼa henˇ peuˬ˗oˬ ve hkʼa shuˍ, Yuˇdaꞈ chaw maˇ˗awˍ ve Baˍbuˍlonˍ venˇ lo paw ve yoˬ. Yuˇdaꞈ chaw laiˉ gʼaˇ Baˍbuˍlonˍ venˇ hkʼaw ve chaw hkʼe awˬ liˇ awˬ hkʼaˇ gʼaꞈ te leh dawˇ hkʼaˇ kaꞈ yawˇ hui htaꞈ shuˍ ve yoˬ. Laiˉ chi hkʼawꞈ peuˬ hkʼawꞈ nawˉ, Yuˇdaꞈ chaw Iˉsaˍreˍlaˆ mvuhˇ miˬ lo kʼawꞈ˗e ve awˉ lawˉ teˇ moˍ lehˬ, yawˇ hui buiˇ shaˆ aˉ naˆ chaw hui htaꞈ heuˆ ve Eˇzaˍraˆ gʼa mawˬ ve yoˬ. (Tawˆ kʼai ve 34:15, 16; Eˇzaˍraˆ 9:1, 2) Peuˬ hkʼawꞈ nawˉ uˉ peunˍ paˍ Neˍhaˍmiˆ Iˉsaˍreˍlaˆ mvuhˇ miˬ lo kʼai htaˇ, choˬ kaˬ lo paw ve yaˇ teˇ hpaˍ Heˍbrehˇ hkawˇ maˇ yaw gʼa ve htaꞈ yawˇ gʼa mawˬ htaˇ cheˆ˗ehˬ kʼai ve yoˬ. (Bon maˍ ve 6:6, 7; Neˍhaˍmiˆ 13:23, 24) Oˇ ve teˇ yanˇ Liꞈ hpu Heˍbrehˇ hkawˇ bvuhꞈ taˍ ve htaꞈ maˇ na gʼa ve kʼo, yaˇ teˇ hpaˍ hkʼaˬ hkʼe te Yaˬhoˉvaˬ htaꞈ haꞈ leh yawˇ htaꞈ oˉ kʼoˍ pui gʼa tuˬ le? (Eˇzaˍraˆ 10:3, 44) Chi htaꞈ pa taw, Yuˇdaꞈ chaw chi teˇ hpaˍ laiˉ ceuˬ gʼa pa ve yoˬ. Daꞈ kehˬ ve oˉ kʼoˍ pui kuiˬ kʼawꞈ gu te chehˇ ve pa taw, yawˇ hui Iˉsaˍreˍlaˆ  mvuhˇ miˬ lo chehˇ htaˇ laiˉ ceuˬ pa tuˬ sha ve yoˬ.—Neˍhaˍmiˆ 8:8, 9.

8. Oˇ htaˇ teˇ co˗e Yuˇdaꞈ chaw gʼa hpuˇ ve awˬ lawn htaꞈ aˬ htoꞈ ma te ngaˬ hui a yeˇ yuˬ cawˇ ve le? (Awˬ htaꞈ hpawˇ ve awˬ han htaꞈ nyi sheˍ.)

⁸ Chaw teˇ hpaˍ dawˇ ve, ‘oˇ htaˇ teˇ co˗e Yuˇdaꞈ chaw gʼa hpuˇ ve awˬ lawn maw jaˇ˗oˬ ve htawˇ, aˬ htoꞈ ma te chi beuꞈ teˇ co˗e ngaˬ hui htaꞈ caˉ daꞈ ve le?’ Awˬ tehˬ kʼo, ngaˬ hui “daꞈ kehˬ ve yaꞈ kʼaw” hkʼoˆ toˇ kʼai chehˇ ve pa taw, awˬ lawn chi ve ngaˬ hui awˬ pon awˬ bon cawˬ jaˇ ve yoˬ. Leuˆ yuˬ taˍ ve chaw maˇ heˆ leh “awˬ kaˍ awˬ nu yawˬ teˇ hpaˍ” hpehꞈ ve htawˇ maˇ kʼoˆ, “daꞈ kehˬ ve yaꞈ kʼaw” hkʼoˆ hkʼaˬ htaˆ kaꞈ gʼa toˇ cawˇ ve yoˬ. Awˬ lawn kʼo, Gʼuiˬ sha ve mvuhˇ miˬ miˬ guiˬ hkʼoˆ daꞈ ve awˬ ceuˬ maˇ maˇ te laˇ htaˇ, ngaˬ hui chi teˇ hkui leh awˬ gʼuˇ suhˍ hpawˇ kaꞈ Yaˬhoˉvaˬ htaꞈ caˉ leh oˉ kʼoˍ pui gʼa tuˬ ga laˇ ve yoˬ. b (Yoˇhanˬ 10:16) 1919 hkʼawꞈ C.E. htaˇ tanˬ leh laiˉ lanˬ gʼaˇ maˇ heˆ heˆ ve bon Uiˍ ve Baˍbuˍlonˍ hkʼaw tawˆ la leh daꞈ kehˬ ve yaꞈ kʼaw hkʼoˆ toˇ la ve yoˬ. Nawˬ kaꞈ yaꞈ kʼaw chi ve hkʼoˆ toˇ chehˇ ve maˇ heˆ laˇ? Yaꞈ kʼaw chi ve hkʼoˆ toˇ ve 100 hkʼawꞈ hpaˆ˗oˬ ve htawˇ, yaꞈ kʼaw chi awˬ gʼuˇ suhˍ laiˉ ha hkʼawꞈ htaˇ kaꞈ gu teh taˍ laˇ˗oˬ ve yoˬ.

9. Iˉsaˍyaˆ liꞈ 57:14 hkʼaw kʼoˆ taˍ ve hkʼe, “daꞈ kehˬ ve yaꞈ kʼaw” htaꞈ gu tuˬ hkʼaˬ hkʼe te ve le?

⁹ Yuˇdaꞈ chaw Iˉsaˍreˍlaˆ mvuhˇ miˬ lo kʼawꞈ˗e gʼa tuˬ tawˍ ve tsuhˇ ve hkʼa peu˗eˬ htaꞈ Yaˬhoˉvaˬ gu piˇ ve yoˬ. (Iˉsaˍyaˆ 57:14 gʼaw sheˍ.) Leh chi beuꞈ teˇ co˗e kaꞈ “daꞈ kehˬ ve yaꞈ kʼaw” htaꞈ Yaˬhoˉvaˬ gu laˇ ve laˇ? 1919 hkʼawꞈ maˇ gaˬ sheˍ laiˉ ha hkʼawꞈ htaˇ, Yaˬhoˉvaˬ htaꞈ yawˆ yan ve chaw laiˉ gʼaˇ htaꞈ cuˇ leh Uiˍ ve Baˍbuˍlonˍ hkʼaw tawˆ la tuˬ tawˍ ve tsuhˇ ve gʼa hpuˇ ve chaw htaꞈ ga piˇ ve yoˬ. (Iˉsaˍyaˆ 40:3 htaꞈ tehˆ daꞈ sheˍ.) Nyi ma nuˇ nehˬ ve chaw Uiˍ ve Baˍbuˍlonˍ hkʼaw tawˆ la tuˬ leh Yaˬhoˉvaˬ ve chaw geh teˇ geh oˉ kʼoˍ pui la tuˬ laiˉ ceuˬ gu piˇ ve yoˬ. Chi hkʼe gu piˇ ve aˬ htoꞈ ma cawˬ ve le? Awˬ hawˉ lo teˇ lawn lawn htaꞈ nyi sheˍ.

10-11. Liꞈ yanˍ tawˆ ve, leh liꞈ yuˬ tawˆ ve lehˬ, chaw maˇ maˇ Liꞈ hpu hkʼaw ve cuˇ yiˍ htaꞈ shiˍ la tuˬ hkʼaˬ hkʼe ga piˇ ve le? (Awˬ han htaꞈ nyi sheˍ.)

¹⁰ Liꞈ yanˍ tawˆ ve. 1450 hkʼawꞈ maˇ gaˬ sheˍ htaˇ, Liꞈ hpu laꞈ sheh bvuhꞈ ve pa taw, awˬ yanˇ yehˇ maw jaˇ. Liꞈ hpu hkʼa dehꞈ maˇ cawˬ leh awˬ hpfuhˇ hkʼaˆ jaˇ. Liꞈ hpu htawˆ tuˬ awˬ hkʼeun cawˬ la ve pa taw Liꞈ hpu cawˬ maˇ la ve yoˬ.

¹¹ Liꞈ yuˬ tawˆ ve. Peuˬ laˬ ve laiˉ ha hkʼawꞈ htaˇ, Liꞈ hpu lehˬ maˇ˗awˍ ve Laˍtinˍ tawˇ hkawˇ hpehꞈ ve yoˬ. Chi htaꞈ pa taw, liꞈ henˇ mvuh ve chaw ceh tiˉ gʼaw leh na gʼa ve yoˬ. Yaꞈ hkʼaˇ, Liꞈ hpu yanˍ tawˆ tuˬ awˬ hkʼeun laiˉ kaˬ lo cawˬ la ve pa taw, Gʼuiˬ sha htaꞈ yawˆ yan ve chaw laiˉ gʼaˇ maˇ˗awˍ ve chaw yehˇ ve tawˇ hkawˇ Liꞈ hpu htaꞈ coˇ caˇ leh yuˬ tawˆ ve yoˬ. Liꞈ hpu gʼaw ve chaw Liꞈ hpu hkʼaw awˬ tehˬ ve leh bon awˬ hoˉ maˍ ve htaꞈ tehˆ daꞈ gʼa ve yoˬ.

12-13. 1835 hkʼawꞈ awˬ yanˇ htaˇ Liꞈ hpu htaꞈ hkʼa dehꞈ chaˬ nyi ve chaw, maˇ heˆ heˆ ve bon liˇ maˍ ve awˬ lawn htaꞈ hkʼaˬ hkʼe hpeuꞈ maw piˇ ve le?

¹² Liꞈ hpu henˇ yaˇ hpfuhˆ nyi tuˬ ga piˇ ve laꞈ caˉ. Liꞈ hpu hkʼaw hkʼa dehꞈ chaˬ nyi ve chaw Liꞈ hpu hkʼaw awˬ tehˬ ve laiˉ lawn htaꞈ gʼa henˇ ve yoˬ. Hkʼe te leh, yawˇ hui gʼa shiˍ ve awˬ lawn awˬ nu ve chaw htaꞈ kʼoˆ maˍ piˇ ve yoˬ. Chi bon awˬ hoˉ teˇ hpaˍ maˇ dawˇ cawˇ tuˬ te piˇ ve yoˬ. Tawˇ pa haˉ te kʼo, 1835 hkʼawꞈ ve awˬ yanˇ htaˇ, yawˇ hui hkʼaw ve chaw teˇ hpaˍ liꞈ kʼoˆ ehˉ yanˍ tawˆ leh maˇ heˆ heˆ ve bon maˍ yaꞈ ve tehꞈ hpeuꞈ maw piˇ ve yoˬ.

¹³ Aˬ laˬ hkʼe 1835 hkʼawꞈ htaˇ, Hehn˗li Koˆ Gʼuiˬ sha htaꞈ yawˆ yan ve chaw hpehꞈ leh chaw suh ve htaꞈ caˉ daꞈ ve liꞈ kʼoˆ ehˉ yanˍ tawˆ ve yoˬ. Chaw yaˇ maˇ suh puiˉ ve awˬ han ku cawˬ ve tehꞈ maˇ heˆ heˆ ve bon liˇ maˍ ve, Liꞈ hpu hkʼaw maˇ hawˍ daꞈ ve htaꞈ yawˇ hkʼa dehꞈ chaˬ nyi mawˬ ve yoˬ. Yaꞈ hkʼaˇ, chaw yaˇ maˇ suh puiˉ ve cawˬ gʼa tuˬ Gʼuiˬ sha piˇ htaˇ hehꞈ cawˬ gʼa ve yoˬ. 1837 hkʼawꞈ htaˇ, bon awˬ hoˉ teˇ gʼaˇ Cawn Sha˗taw meh ve aˬ miˍ lawˬ ciˇ htaˇ chi htaꞈ caˉ daꞈ ve liꞈ kʼoˆ ehˉ mawˬ ve yoˬ. Yawˇ liꞈ  kʼoˆ ehˉ chi hkʼaw hkʼa peu˗eˬ gʼaw leh awˬ tehˬ ve htaꞈ mawˬ˗oˬ ve tehꞈ yonˍ gʼa ve yoˬ. Hkʼe te leh, yawˇ awˬ lawn chi awˬ nu ve chaw htaꞈ kʼoˆ piˇ gaˇ jaˇ ve yoˬ. 1842 hkʼawꞈ htaˇ, yawˇ laiˉ tawn cawˬ ve bon maˍ hkawˇ awˬ lawn lonˉ ma “Na ve—Haiˬ ve chaw lehˬ maˇ suh puiˉ ve cawˬ˗aw laˇ?” tehꞈ kʼoˆ ve awˬ lawn maˍ piˇ ve yoˬ. Cawn Sha˗taw bvuhꞈ taˍ ve liꞈ htaꞈ yaˇ nehˬ teˇ gʼaˇ ChanˍHtehˍ Raˆsenˍ meh ve dawˇ cawˇ jaˇ ve yoˬ.

14. Chi awˬ gʼuˇ suhˍ htaˇ gu teh taˍ laˇ ve awˬ ceuˬ awˬ viˉ awˬ nyi Raˆsenˍ leh awˬ chawˇ teˇ hpaˍ awˬ bon hkʼaˬ hkʼe gʼa ve le? (Awˬ han htaꞈ nyi sheˍ.)

¹⁴ Chi awˬ gʼuˇ suhˍ htaˇ gu teh taˍ laˇ ve awˬ ceuˬ awˬ viˉ awˬ nyi Raˆsenˍ leh awˬ chawˇ teˇ hpaˍ awˬ bon hkʼaˬ hkʼe gʼa ve le? Yawˇ hui lehˬ oˇ ve htaꞈ caˉ daꞈ ve Liꞈ hpu hkʼaw ve tcuhˉ kuiˬ ve liꞈ teˇ hpaˍ, Liꞈ hpu hkʼaw hkʼaˬ teˇ tawn lo cawˬ ve tawˇ hkawˇ teˇ hpaˍ, leh Liꞈ hpu yuˬ tawˆ taˍ ve teˇ hpaˍ hkʼaw kaꞈ hpfuhˆ nyi ve yoˬ. Chi ve lehˬ yawˇ hui htaꞈ awˬ gʼuˇ suhˍ htaˇ kaꞈ gu teh taˍ piˇ peuˬ ve yoˬ. Chi hkʼoˆ kaꞈ, yawˇ hui lehˬ Hehn˗li Koˆ, Cawn Sha˗taw, leh awˬ nu ve chaw teˇ hpaˍ ve liꞈ htaꞈ hpfuhˆ nyi ve kaꞈ awˬ bon gʼa ve yoˬ. Peuˬ hkʼawꞈ nawˉ Raˆsenˍ leh awˬ chawˇ teˇ hpaˍ kaꞈ “daꞈ kehˬ ve yaꞈ kʼaw” htaꞈ gu tuˬ ga piˇ leh Liꞈ hpu hkʼaw kʼoˆ maˍ laˇ taˍ ve htaꞈ caˉ daꞈ ve liꞈ kʼoˆ leh liꞈ kʼoˆ ehˉ yuˬ tawˆ ve yoˬ.

15. 1919 hkʼawꞈ htaˇ, a yeˇ uiˍ ve awˬ lawn aˬ htoꞈ ma hpehꞈ la ve le?

¹⁵ 1919 hkʼawꞈ htaˇ, Gʼuiˬ sha ve chaw lehˬ, Uiˍ ve Baˍbuˍlonˍ hkʼaw tawˆ la ve yoˬ. Leh oˇ ve teˇ hkʼawꞈ hkʼaw “ka tiꞈ yeˬ leh cuˇ yiˍ cawˬ ve awˬ ceˬ” cawˬ la ve yoˬ. Yawˇ hui nyi ma nuˇ nehˬ ve chaw “daꞈ kehˬ ve yaꞈ kʼaw” hpaw gehˇ sheˍ ve hkʼoˆ toˇ tuˬ ga piˇ ve yoˬ. (Maꞈhtehˍ 24:45-47) Oˇ htaˇ teˇ co˗e ve chaw awˬ gʼuˇ suhˍ htaˇ gu teh taˍ laˇ ve awˬ ceuˬ, chaw laiˉ gʼaˇ Yaˬhoˉvaˬ htaꞈ shiˍ la leh yawˇ ve a loˍ htaꞈ te gʼa tuˬ kaꞈ ga piˇ ve yoˬ. (Tawˇ naˉ ve 4:18) Yawˇ hui ve a shaꞈ teꞈ hkʼaˇ Gʼuiˬ sha ve a loˍ htaꞈ gʼaꞈ te gʼa tuˬ kaꞈ ga piˇ ve yoˬ. Yaꞈ hkʼaˇ, Yaˬhoˉvaˬ ve chaw te hkʼaˇ dawˇ hkʼaˇ teˇ pawˆ tiˉ pa gʼa tuˬ yawˇ maˇ dawˇ law. Yawˇ htaꞈ oˉ kʼoˍ pui ve chaw awˬ meu˗eˇ awˬ meu˗eˇ daꞈ kehˬ la tuˬ yawˇ ga piˇ ve yoˬ. (Awˇ ceˍ awˇ fa “ Yaˬhoˉvaˬ yawˇ ve chaw yawˇ htaꞈ oˉ kʼoˍ pui ve awˬ meu˗eˇ awˬ meu˗eˇ daꞈ kehˬ la tuˬ te piˇ ve” htaꞈ nyi sheˍ.) Ngaˬ hui te ve teˇ ceuˬ le le Gʼuiˬ sha nyi hkʼaˇ suh tuˬ te piˇ ve kʼo, ngaˬ hui hkʼaˬ hkʼe taw  ha lehˬ jaˇ tuˬ ve htaꞈ dawˇ nyi sheˍ!—Kawˇlawˇsehˇ 1:10.

16. 1919 hkʼawꞈ tanˬ leh “daꞈ kehˬ ve yaꞈ kʼaw” htaꞈ hkʼaˬ hkʼe kʼawꞈ nyi haꞈ shaˉ ve le? (Iˉsaˍyaˆ 48:17; 60:17)

¹⁶ Yaꞈ kʼaw hkʼaˬ htaˆ kaꞈ daꞈ tuˬ hkʼa dehꞈ gʼa nyi haꞈ shaˉ ve yoˬ. Chaw maˇ maˇ Uiˍ ve Baˍbuˍlonˍ hkʼaw tawˆ la tuˬ 1919 hkʼawꞈ tanˬ leh ka tiꞈ yeˬ leh cuˇ yiˍ cawˬ ve awˬ ceˬ lehˬ daꞈ kehˬ ve yaꞈ kʼaw htaꞈ caˉ leh gu ve yoˬ. Chaw maˇ maˇ Liꞈ hpu hkʼaw awˬ tehˬ ve htaꞈ gʼa henˇ tuˬ 1921 hkʼawꞈ gaˬ htaˇ, yawˇ hui lehˬ Liꞈ hpu htaꞈ caˉ daꞈ ve liꞈ kʼoˆ Gʼuiˬ sha ve tinˍ tehꞈ kʼoˆ ve te tawˆ ve yoˬ. Liꞈ kʼoˆ chi lehˬ 36 chaw ceuˬ tawˇ hkawˇ cawˬ leh aˬ laˬ hkʼe 6 lanˬ kʼoˆ piˇ kʼai ve yoˬ. Chi teˇ hkui Liꞈ hpu henˇ ve chaw htaꞈ maˍ piˇ tuˬ daꞈ jaˇ ve liꞈ kʼoˆ cawˬ ve yoˬ. Awˬ meh lehˬ Nawˬ ve a shaꞈ co co taiˍ taiˍ ha lehˬ gʼa ve! tehꞈ kʼoˆ ve yoˬ. Awˬ leh meuˇ ve awˬ yanˇ hkʼaw Yaˬhoˉvaˬ yawˇ ve kanˉ hkʼaˇ htaꞈ cuˇ leh caˇ tuˬ htaꞈ shuˍ ve co ha hpawˇ ve cuˇ yiˍ maˇ maˇ gu teh taˍ laˇ ve htaꞈ ngaˬ hui gʼa mawˬ ve yoˬ. Chi ve lehˬ ngaˬ hui teˇ gʼaˇ le le “daꞈ kehˬ ve yaꞈ kʼaw” hkʼoˆ caˉ leh toˇ kʼai tuˬ ga laˇ ve yoˬ.—Iˉsaˍyaˆ 48:17; 60:17 gʼaw sheˍ.

17-18. “Daꞈ kehˬ ve yaꞈ kʼaw” awˬ leh meuˇ lo gaˬ tuˬ hkʼaˬ kaˬ lo le?

¹⁷ A shu teˇ gʼaˇ Liꞈ hpu tanˬ henˇ chehˇ ve kʼo, yawˇ lehˬ “daꞈ kehˬ ve yaꞈ kʼaw” hkʼoˆ toˇ la ve yoˬ. Yaꞈ hkʼaˇ, chaw teˇ hpaˍ kʼo yaꞈ kʼaw chi ve hkʼoˆ toˇ ve maˇ maw, peuˬ hkʼawꞈ nawˉ tawˆ˗e ve yoˬ. Chaw teˇ hpaˍ kʼo yaꞈ kʼaw chi htaꞈ awˬ leh meuˇ hkʼa gaˬ toˇ ve yoˬ. Hkʼe kʼo yaꞈ kʼaw chi ve awˬ leh meuˇ hkʼaˬ kaˬ lo le?

¹⁸ Mvuhˇ naw ma hkʼoˆ taˆ˗e tuˬ dawˇ law taˍ ve chaw lehˬ “daꞈ kehˬ ve yaꞈ kʼaw” mvuhˇ naw ma hkʼoˆ lo “Gʼuiˬ sha ve Paˍraˍdiˇsuˆ awˬ hkʼaw lo” yawˇ hui htaꞈ shiˍ kʼai ve yoˬ. (Hpeuꞈ maˍ ve 2:7) Miˬ guiˬ hkʼoˆ lo co co taiˍ taiˍ chehˇ tuˬ dawˇ law kuiˬ cawˬ ve chaw kʼo, yaꞈ kʼaw chi ve lehˬ Yeˍsuˆ uˉ peunˍ ve 1,000 hkʼawꞈ ve awˬ leh meuˇ awˬ yanˇ hkʼaw lo yawˇ hui htaꞈ shiˍ kʼai ve yoˬ. Oˇ ve teˇ yanˇ biˇ ve chaw hpehꞈ tuˬ yoˬ. Nawˬ yaꞈ kʼaw chi ve htaꞈ kʼai chehˇ ve kʼo, hkʼawꞈ nawˉ lo taˇ hpfuhˆ nyi. Miˬ guiˬ awˬ suhˉ gaˬ htaˇ hkʼa gaˬ yaꞈ kʼaw chi ve htaꞈ nawˬ toˇ kʼai cawˇ ve yoˬ.