1. Ngaˬ hui shoꞈ shaꞈ ve aˬ htoꞈ ma gʼa hpuˇ ve le?

 Nawˬ Hkriꞈ yaˇ ve awˬ vuiˬ te tuˬ dawˇ teh taˍ jaw ve hkʼe te maˇ gʼa sheˍ ve laˇ? b Te maˇ gʼa sheˍ ve kʼo nawˬ teˇ gʼaˇ ceh tiˉ chi hkʼe hpehꞈ ve maˇ heˆ. Awˬ viˉ awˬ nyi laiˉ gʼaˇ kaꞈ nawˬ hkʼe hpehꞈ ve yoˬ. Tawˇ pa haˉ te kʼo, Hpiˇliˇ bon hkʼa dehꞈ lawˬ puiˉ gaˇ leh leuˉ leh kʼawꞈ lawˬ gaˇ ve yoˬ. Yaꞈ hkʼaˇ, yawˇ bon lawˬ tuˬ awˬ yanˇ maˇ cawˬ tehꞈ dawˇ ve yoˬ. Eh˗li˗kaˇ kʼo, hto toˇ tuˬ hpawnˬ daꞈ ve htaꞈ gʼaꞈ mi tcuh gaˇ ve yoˬ. Yaꞈ hkʼaˇ, maˇ˗awˍ ve kʼo yawˇ maˇ gʼaꞈ mi. Htoˉmaꞈ kaꞈ Liꞈ hpu teˇ kʼoˆ hkʼa peu˗eˬ gʼaw peuˬ tuˬ laiˉ pawˆ coˇ caˇ˗oˬ ve yoˬ. Yaꞈ hkʼaˇ, yawˇ kʼoˆ ve, “ngaˬ Liꞈ hpu gʼaw ve hkʼa dehꞈ maˇ dawˇ cawˇ. Ngaˬ gʼaw tuˬ coˇ caˇ ve 3 pawˆ gaˬ˗oˬ. Teˇ pawˆ le le ngaˬ Liꞈ hpu gʼaw htaˇ, Oˉ kʼoˍ pui ve liꞈ ceh gʼaw gaˬ˗oˬ kʼo, maˇ kʼawꞈ gʼaw˗o ve yoˬ.”

2. Ngaˬ hui dawˇ teh taˍ ve hkʼe te maˇ gʼa sheˍ ve kʼo, aˬ htoꞈ ma te awˬ gʼaˇ maˇ nuˇ cawˇ ve le?

² Nawˬ dawˇ teh taˍ ve htawˇ te maˇ gʼa sheˍ ve kʼo, nawˬ teꞈ chiˉ te maˇ gʼa ve chaw hpehꞈ ve tehꞈ taˇ dawˇ. Nawˬ dawˇ teh taˍ ve i ve awˬ ceuˬ hpehꞈ ve htawˇ, nawˬ gʼa coˇ caˇ leh awˬ yanˇ gʼa yehˇ ve yoˬ. Nawˬ dawˇ teh taˍ ve htaꞈ gʼaꞈ te gaˇ ve lehˬ, Yaˬhoˉvaˬ htaꞈ daꞈ jaˇ ve awˬ ceuˬ piˇ gaˇ ve tehꞈ hpeuꞈ maw piˇ ve yoˬ. Nawˬ Yaˬhoˉvaˬ geh meuˆ daꞈ ve htaꞈ a yeˇ uiˍ jaˇ tehꞈ shawˍ ve yoˬ. Nawˬ coˇ caˇ ve htaꞈ Yaˬhoˉvaˬ awˬ hpfuhˇ shiˍ ve yoˬ. Nawˬ te maˇ gʼa ve awˬ leuˉ te tuˬ yawˇ maˇ dawˇ law. (Chiˇ mvuh ve 103:14; Miˆhkaˍ 6:8) Chi htaꞈ pa taw, nawˬ te gʼa tuˬ yoˬ tehꞈ dawˇ ve awˬ ceuˬ htaꞈ dawˇ teh taˍ sheˍ. Dawˇ teh taˍ ve  htaꞈ nawˬ hkʼaˬ hkʼe te gʼa tuˬ le? Beˆ maˍ laˇ taˍ ve teˇ hpaˍ htaꞈ teˇ geh nyi sheˍ.

3. Aˬ htoꞈ ma te awˬ gʼaˇ uiˍ la piˇ ve lehˬ a yeˇ uiˍ jaˇ ve le?

³ Awˬ gʼaˇ uiˍ la piˇ ve lehˬ a yeˇ uiˍ jaˇ. Awˬ gʼaˇ uiˍ la ve chaw lehˬ dawˇ teh taˍ ve hkʼe te gʼa gaˇ ve yoˬ. Ngaˬ hui ve awˬ gʼaˇ lehˬ, heuˇ shan hpawˇ ehˉ dawˇ taˍ kuiˬ awˬ ti lo gaˬ tuˬ mvuhˇ haw meuˆ kʼai piˇ ve htaꞈ shuˍ ve yoˬ. Mvuhˇ haw hkʼaˬ htaˆ kaꞈ meuˆ chehˇ ve kʼo, heuˇ shan hpawˇ gʼaꞈ paˍ kaꞈ dawˇ taˍ kuiˬ awˬ ti lo gaˬ˗e gʼa ve yoˬ. Mvuhˇ haw meuˆ hehnˇ ve kʼo, dawˇ taˍ kuiˬ awˬ ti lo haˆ haˆ gaˬ˗e gʼa ve yoˬ. Chi ve hkʼa shuˍ shuˍ, ngaˬ hui leuˉ leh te gaˇ tuˬ awˬ gʼaˇ cawˬ ve kʼo, ngaˬ hui te gʼa tuˬ awˬ hkʼaˇ kaꞈ cawˬ maˇ ve yoˬ. EhˬSaˬveˇdoˬ mvuhˇ miˬ lo chehˇ ve awˬ viˉ awˬ nyi Daˍviˆ kʼoˆ ve, “nawˬ teˇ ceuˬ ceuˬ te gaˇ jaˇ ve kʼo, dawˇ teh taˍ ve hkʼe te gʼa tuˬ gʼa coˇ caˇ ve yoˬ. Leh nawˬ htaꞈ awˬ nu ve awˬ ceuˬ teˇ ceuˬ˗ehꞈ kaꞈ taˇ tawˍ laˇ tcuh.” Nawˬ te gaˇ ve awˬ gʼaˇ cawˬ tuˬ hkʼaˬ hkʼe te gʼa ve le?

4. Ngaˬ hui bon lawˬ htaˇ aˬ htoꞈ ma awˬ lawn htaꞈ lawˬ gʼa ve le? (Hpiˇliˇpiˆ 2:13) (Awˬ han htaꞈ nyi sheˍ.)

⁴ Te gaˇ ve nyi ma cawˬ tuˬ kaꞈ bon lawˬ gʼa ve. Nawˬ dawˇ teh taˍ ve hkʼe te gʼa tuˬ Yaˬhoˉvaˬ daꞈ kehˬ ve awˬ ha hpu nawˬ htaꞈ peꞈ laˇ tuˬ yoˬ. (Hpiˇliˇpiˆ 2:13 gʼaw sheˍ.) Teˇ pawˆ pawˆ kʼo, ngaˬ hui dawˇ teh taˍ ve awˬ ceuˬ lehˬ ngaˬ hui te cawˇ leh daꞈ ve tehꞈ shiˍ ve yoˬ. Awˬ tehˬ kʼo, ngaˬ hui chi hkʼe ve hkʼa dehꞈ maˇ te gaˇ ve yoˬ. Yuˬganˬdaˬ mvuhˇ miˬ lo chehˇ ve awˬ viˉ awˬ nyi yaˇ miˇ No˗ri˗naˇ chi hkʼe dawˇ ve yoˬ. Yawˇ maˍ ve maˇ cheuˬ tehꞈ dawˇ leh Liꞈ hpu henˇ ve chaw maˇ cawˬ gaˇ ve yoˬ. Yaꞈ hkʼaˇ, yawˇ Liꞈ hpu henˇ ve chaw cawˬ tuˬ dawˇ teh taˍ ve yoˬ. No˗ri˗naˇ kʼoˆ ve, “Yaˬhoˉvaˬ ngaˬ htaꞈ ga laˇ tuˬ teˇ nyi le le bon lawˬ leh Liꞈ hpu henˇ ve chaw cawˬ tuˬ kaꞈ lawˬ ve yoˬ. Ngaˬ kaꞈ bon lawˬ taˍ ve hkʼe gʼaꞈ te ve yoˬ. Ngaˬ Liꞈ hpu maˍ ve cheuˬ la tuˬ coˇ caˇ leh te jawˬ ve yoˬ. Peuˬ hkʼawꞈ nawˉ hkʼaˬ nyiˇ ha pa maˇ gaˬ sheˍ kaꞈ Liꞈ hpu henˇ ve chaw cawˬ gaˇ ve yoˬ. Leh oˇ ve teˇ hkʼawꞈ hkʼaw ngaˬ Liꞈ hpu maˍ piˇ ve chaw 2 gʼaˇ cawˬ ve yoˬ.”

5. Ngaˬ hui dawˇ teh taˍ ve hkʼe te gaˇ ve nyi ma cawˬ tuˬ aˬ htoꞈ ma awˬ lawn htaꞈ dawˇ nyi cawˇ ve le?

⁵ Yaˬhoˉvaˬ nawˬ awˬ pon te laˇ ve awˬ ceuˬ htaꞈ dawˇ nyi sheˍ. (Chiˇ mvuh ve 143:5) Tcuh yaˇ Pawˇluꞈ Yaˬhoˉvaˬ yawˇ htaꞈ awˬ bon peꞈ laˇ ve awˬ ceuˬ htaꞈ dawˇ nyi ve yoˬ. Hkʼe te leh, yawˇ Gʼuiˬ sha ve kanˉ hkʼa dehꞈ te gaˇ ve yoˬ. (1 Kawˇrenˍhtuˆ 15:9, 10; 1 Tiˆmoˉseˍ 1:12-14) Chi ve hkʼa shuˍ shuˍ, Yaˬhoˉvaˬ nawˬ awˬ pon aˬ htoꞈ ma te laˇ ve htaꞈ hkʼa dehꞈ dawˇ nyi htaˇ, nawˬ dawˇ teh taˍ ve htaꞈ te gaˇ tuˬ te laˇ ve yoˬ. (Chiˇ mvuh ve 116:12) Hoˬduˇraˆ mvuhˇ miˬ lo chehˇ ve awˬ viˉ awˬ nyi yaˇ miˇ yawˇ hkʼaˬ htaˆ kaꞈ gʼuˇ suhˍ peuˍ ve te tuˬ dawˇ teh taˍ ve htaꞈ aˬ htoꞈ ma ga piˇ ve teˇ geh nyi sheˍ. Yawˇ kʼoˆ ve, “Yaˬhoˉvaˬ ngaˬ htaꞈ hkʼaˬ hkʼe taw haꞈ ve hkʼaˬ htaˆ kaꞈ dawˇ nyi ve yoˬ. Gʼuiˬ sha lehˬ ngaˬ yawˇ ve chaw htaꞈ mawˬ daꞈ tcuh laˇ leh nyi haꞈ shaˉ laˇ chehˇ ve yoˬ. Chi hkʼe dawˇ nyi htaˇ, yawˇ htaꞈ leuˉ leh haꞈ ve yoˬ. Ngaˬ hkʼaˬ htaˆ kaꞈ gʼuˇ suhˍ peuˍ ve te gʼa tuˬ coˇ caˇ ve yoˬ.”

6. Ngaˬ hui te gaˇ ve nyi ma cawˬ tuˬ hkʼaˬ hkʼe ga laˇ sheˍ ve le?

⁶ Dawˇ teh taˍ ve htaꞈ gʼaꞈ te htaˇ aˬ htoꞈ ma awˬ bon gʼa tuˬ le, dawˇ nyi sheˍ. Eh˗li˗kaˇ ve awˬ lawn htaꞈ teˇ geh kʼawꞈ nyi sheˍ. Yawˇ awˬ yanˇ cawˇ cawˇ kʼai gʼa tuˬ dawˇ teh taˍ ve yoˬ. Yawˇ htaꞈ aˬ htoꞈ  ma ga piˇ ve le? Yawˇ kʼoˆ ve, “ngaˬ hto toˇ˗e tuˬ hpawnˬ daꞈ ve maˇ gʼaꞈ mi ve pa taw, daꞈ ve laiˉ ceuˬ htaꞈ ngaˬ maˇ gʼa kaˇ ve yoˬ. Yaꞈ hkʼaˇ, ngaˬ awˉ lawˉ gaˬ˗e ve kʼo, awˬ viˉ awˬ nyi htaꞈ tawˇ yaw daꞈ tuˬ, ngaˬ Gʼuiˬ sha ve kanˉ te ve hkʼaw ha lehˬ gʼa tuˬ, hto toˇ kuiˬ hkʼaw yuˬ yehˇ tuˬ daꞈ ve beˆ maˍ laˇ hkawˇ kaꞈ gʼa kaˇ ve yoˬ.” Eh˗li˗kaˇ awˬ yanˇ cawˇ cawˇ kʼai ve kʼo, aˬ htoꞈ ma awˬ bon gʼa tuˬ leh yawˇ dawˇ teh taˍ ve htaꞈ gʼaꞈ te gʼa tuˬ kaꞈ dawˇ nyi ve yoˬ. Nawˬ dawˇ teh taˍ ve htaꞈ gʼaꞈ te gʼa˗oˬ htaˇ, aˬ htoꞈ ma awˬ bon gʼa ve htaꞈ dawˇ nyi sheˍ. Nawˬ dawˇ teh taˍ ve lehˬ, Liꞈ hpu gʼaw ve maˇ heˆ leh bon lawˬ ve, awˬ ceuˬ chi ve teˇ hpaˍ lehˬ nawˬ Yaˬhoˉvaˬ geh hkʼaˬ hkʼe taw meuˆ daꞈ tuˬ ga laˇ gʼa ve htaꞈ dawˇ nyi sheˍ. (Chiˇ mvuh ve 145:18, 19) Nawˬ dawˇ teh taˍ ve lehˬ, Hkriꞈ yaˇ ve te hkʼaˇ dawˇ hkʼaˇ cawˬ tuˬ coˇ caˇ ve, nawˬ te gʼa ve kʼo awˬ viˉ awˬ nyi geh hkʼaˬ hkʼe taw meuˆ daꞈ gʼa ve htaꞈ dawˇ nyi sheˍ. (Kawˇlawˇsehˇ 3:14) Nawˬ dawˇ teh taˍ ve htaꞈ hkʼa dehꞈ te gʼa ve kʼo, nawˬ te gʼa leh awˬ bon gʼa ve hkʼa peu˗eˬ htaꞈ bvuhꞈ nyi sheˍ. Nawˬ te gaˇ ve nyi ma cawˬ tuˬ, bvuhꞈ keu taˍ ve htaꞈ maˇ maw maˇ maw kʼo hpeuꞈ nyi sheˍ. Htoˉmaꞈ kʼawꞈ kʼoˆ ve, “ngaˬ awˬ bon gʼa ve htaꞈ mawˬ htaˇ, te gʼa tuˬ te laˇ ve yoˬ.”

7. Ho˗li˗o leh yawˇ ve awˬ miˇ ma dawˇ teh taˍ ve htaꞈ te gʼa tuˬ aˬ htoꞈ ma ga piˇ ve le?

⁷ Nawˬ htaꞈ awˬ gʼaˇ peꞈ laˇ ve chaw geh awˬ chawˇ te sheˍ. (Tawˇ naˉ ve 13:20) Ho˗li˗o leh yawˇ ve awˬ miˇ ma Gʼuiˬ sha ve kanˉ hkʼa dehꞈ te gʼa tuˬ dawˇ teh taˍ ve htaꞈ aˬ htoꞈ ma ga piˇ ve teˇ geh nyi sheˍ. Ho˗li˗o kʼoˆ ve, “ngaˬ hui dawˇ teh taˍ ve htaꞈ te gʼa tuˬ ga laˇ gʼa ve chaw geh awˬ chawˇ te ve yoˬ. Leh ngaˬ hui dawˇ teh taˍ ve yawˇ hui htaꞈ kʼoˆ maˍ piˇ ve yoˬ. Ngaˬ hui ve awˬ chawˇ laiˉ gʼaˇ ngaˬ hui hkʼa shuˍ dawˇ teh taˍ leh te gʼa˗oˬ ve yoˬ. Hkʼe te leh, yawˇ hui ngaˬ hui htaꞈ daꞈ ve beˆ maˍ laˇ gʼa ve yoˬ. Leh ngaˬ hui ve awˬ chawˇ kaꞈ dawˇ teh taˍ ve htaꞈ te gʼa˗oˬ laˇ tehꞈ na laˇ leh ngaˬ hui htaꞈ awˬ gʼaˇ peꞈ laˇ ve yoˬ.”

8. Ngaˬ hui dawˇ teh taˍ ve htaꞈ te gaˇ ve awˬ nyi htaꞈ ceh tiˉ te ve kʼo, hkʼaˬ hkʼe hpehꞈ tuˬ le? (Awˬ han htaꞈ nyi sheˍ.)

⁸ Teˇ nyi nyi kʼo, ngaˬ hui dawˇ teh taˍ ve htaꞈ te tuˬ awˬ gʼaˇ maˇ cawˬ leh te gaˇ tuˬ nyi ma kaꞈ maˇ cawˬ. Chi ngaˬ hui dawˇ teh taˍ ve htaꞈ te maˇ gʼa˗o ve tehꞈ kʼoˆ gaˇ ve laˇ? Maˇ heˆ. Heuˇ shan hpawˇ ehˉ ve hpa htaꞈ teˇ pawˆ kʼawꞈ dawˇ nyi sheˍ. Heuˇ shan hpawˇ dawˇ taˍ kuiˬ awˬ ti lo gaˬ˗e tuˬ hpa htaꞈ mvuhˇ haw meuˆ ve lehˬ a yeˇ uiˍ jaˇ ve yoˬ. Yaꞈ hkʼaˇ, teˇ nyi nyi kʼo mvuhˇ haw hehnˇ jaˇ. Teˇ nyi nyi kʼo, maˇ hehnˇ ve yoˬ. Maˇ heˆ leh teˇ nyi nyi kʼo, mvuhˇ haw maˇ cawˬ ve yoˬ. Chi hkʼe hpehꞈ ve kʼo, heuˇ shan hpawˇ gʼaꞈ paˍ heuˇ shan hpawˇ maˇ kʼai gʼa˗o ve tehꞈ kʼoˆ gaˇ ve laˇ? Maˇ heˆ. Heuˇ shan hpawˇ ehˉ teˇ hpaˍ kʼo awˬ hkʼeun cawˬ ve, caˉ pehˆ cawˬ ve, leh gʼaꞈ paˍ kaꞈ chi teˇ hpaˍ htaꞈ yehˇ leh dawˇ taˍ kuiˬ awˬ ti lo gaˬ˗e gʼa ve yoˬ. Te gaˇ ve nyi ma kaꞈ mvuhˇ haw htaꞈ shuˍ ve yoˬ. Ngaˬ hui dawˇ teh taˍ ve htaꞈ te gaˇ tuˬ, teˇ nyi nyi kʼo ngaˬ hui te gaˇ ve nyi ma cawˬ ve yoˬ. Teˇ nyi nyi kʼo te gaˇ ve nyi ma maˇ cawˬ ve yoˬ. Dawˇ teh taˍ ve htaꞈ ngaˬ hui te gaˇ ve nyi ma cawˬ htaˇ hehꞈ te ve kʼo, te maˇ gʼa taˬ. Chi htaꞈ pa taw, heuˇ shan hpawˇ gʼa paˍ dawˇ teh taˍ ve awˬ ti lo gaˬ˗e tuˬ awˬ hkʼaˇ laiˉ hkʼaˇ ca ve hkʼa shuˍ, dawˇ teh taˍ ve htaꞈ ngaˬ hui gʼaꞈ te tuˬ, oˇ ve teˇ nyi hkʼaw ngaˬ hui maˇ te gaˇ ve htawˇ, coˇ caˇ leh te gʼa tuˬ awˬ hkʼaˇ ca cawˇ ve yoˬ. Chi hkʼe te tuˬ maˇ sha ve htawˇ, a shu yawˇ hkʼaˇ yawˇ awˬ to  htaꞈ awˬ liˇ gʼa teh ve yoˬ. Yaꞈ hkʼaˇ, chi hkʼe te ve lehˬ awˬ hpfuhˇ hkʼawꞈ jaˇ. Ngaˬ hui hkʼaˬ hkʼe gʼa te tuˬ teˇ geh nyi sheˍ.

9. Ngaˬ hui dawˇ teh taˍ ve htaꞈ hkʼa dehꞈ maˇ te gaˇ ve htawˇ, coˇ caˇ leh gʼaꞈ te ve kʼo yaꞈ˗aw laˇ? Tawˇ pa haˉ kʼoˆ maˍ laˇ sheˍ.

⁹ Yaˬhoˉvaˬ lehˬ ngaˬ hui htaꞈ yawˇ ve kanˉ ha lehˬ ha kʼa ve hkʼaw te tcuh gaˇ ve yoˬ. (Chiˇ mvuh ve 100:2; 2 Kawˇrenˍhtuˆ 9:7) Yaꞈ hkʼaˇ, ngaˬ hui Hkriꞈ yaˇ ve dawˇ teh taˍ ve htaꞈ hkʼa dehꞈ maˇ gʼaꞈ te gaˇ ve kʼo, gʼa coˇ caˇ cawˇ sheˍ ve laˇ? Tcuh yaˇ Pawˇluꞈ ve awˬ lawn htaꞈ teˇ geh nyi sheˍ. Yawˇ kʼoˆ ve, “ngaˬ awˬ to shawˍ baˬ taˍ ve chaw maˇ gʼa hpehꞈ tuˬ, ngaˬ ve awˬ to htaꞈ chu˗eˬ leh, ngaˬ ve awˬ to htaꞈ uˉ peunˍ tuˬ te ve yoˬ.” (1 Kawˇrenˍhtuˆ 9:25-27) Pawˇluꞈ teˇ pawˆ pawˆ kʼo yawˇ maˇ te gaˇ ve htawˇ, cawˇ ve awˬ ceuˬ htaꞈ te tuˬ yawˇ awˬ to htaꞈ uˉ peunˍ ve yoˬ. Pawˇluꞈ Yaˬhoˉvaˬ awˬ pon te ve htaꞈ yawˇ ha lehˬ˗aw laˇ? Ha lehˬ ve yoˬ. Yaˬhoˉvaˬ yawˇ htaꞈ laꞈ shawnˍ piˇ ve yoˬ.—2 Tiˆmoˉseˍ 4:7, 8.

10. Dawˇ teh taˍ ve htaꞈ ngaˬ hui hkʼa dehꞈ maˇ te gaˇ ve htawˇ, coˇ caˇ leh gʼaꞈ te ve kʼo aˬ htoꞈ ma awˬ bon gʼa tuˬ le?

¹⁰ Pawˇluꞈ ve awˬ lawn hkʼa shuˍ ngaˬ hui dawˇ teh taˍ ve htaꞈ hkʼa dehꞈ maˇ te gaˇ ve htawˇ, ngaˬ hui coˇ caˇ leh gʼaꞈ te ve kʼo Yaˬhoˉvaˬ ha lehˬ jaˇ tuˬ yoˬ. Awˬ ceuˬ chi hkʼe ve te tuˬ ngaˬ hui maˇ dawˇ cawˇ ve htawˇ, ngaˬ hui te ve lehˬ yawˇ htaꞈ haꞈ ve pa taw yoˬ. Yaˬhoˉvaˬ Pawˇluꞈ htaꞈ awˬ bon naꞈ piˇ ve hkʼe, ngaˬ hui htaꞈ kaꞈ awˬ bon naꞈ laˇ tuˬ yoˬ. (Chiˇ mvuh ve 126:5) Ngaˬ hui Yaˬhoˉvaˬ awˬ bon naꞈ laˇ ve htaꞈ gʼa ve kʼo, ngaˬ hui te gaˇ ve nyi ma cawˬ tuˬ yoˬ. Poˬlan mvuhˇ miˬ lo chehˇ ve awˬ viˉ awˬ nyi Lo˗se˗naˇ kʼoˆ ve, “ngaˬ heuˬ htaˇ, teˇ pawˆ pawˆ kʼo hto toˇ ve maˇ kʼai gaˇ ve yoˬ. Yaꞈ hkʼaˇ, ngaˬ hto toˇ˗e htaˇ ha lehˬ jaˇ ve yoˬ. Chi lehˬ Yaˬhoˉvaˬ geh gʼa ve laꞈ shawnˍ hkʼe hpehꞈ ve yoˬ.” Ngaˬ hui te gaˇ ve nyi ma maˇ cawˬ ve kʼo, aˬ htoꞈ ma te gʼa ve teˇ geh nyi sheˍ.

11. Yaˬhoˉvaˬ lehˬ ngaˬ hui a shu yawˇ awˬ to htaꞈ uˉ peunˍ gʼa tuˬ hkʼaˬ hkʼe ga laˇ gʼa ve le?

¹¹ A shu yawˇ awˬ to htaꞈ uˉ peunˍ gʼa tuˬ bon lawˬ sheˍ. A shu yawˇ awˬ to htaꞈ uˉ peunˍ ve lehˬ maˇ daꞈ ve htaꞈ maˇ gʼa te tuˬ kʼoˆ gaˇ ve yoˬ. Yaꞈ hkʼaˇ, a shu yawˇ awˬ to htaꞈ uˉ peunˍ ve lehˬ, haˍ jaˇ ve maˇ heˆ leh hkʼa dehꞈ maˇ te gaˇ ve awˬ ceuˬ htaꞈ kaꞈ te cawˇ ve tehꞈ kʼoˆ gaˇ ve yoˬ. A shu yawˇ awˬ to htaꞈ uˉ peunˍ ve lehˬ, Gʼuiˬ sha geh gʼa ve daꞈ kehˬ ve awˬ ha hpu hpehꞈ ve tehꞈ tawnˇ taˍ cawˇ ve yoˬ. Chi htaꞈ pa taw, nawˬ te hkʼaˇ dawˇ hkʼaˇ a yeˇ uiˍ jaˇ ve cawˬ gʼa tuˬ, Yaˬhoˉvaˬ geh daꞈ kehˬ ve awˬ ha hpu gʼa tuˬ lawˬ sheˍ. (Luˉkaꞈ 11:13; Gaˍlaˍtiˆ 5:22, 23) Daˍviˆ kʼawꞈ kʼoˆ ve, a shu yawˇ hkʼaˇ yawˇ hkʼaˬ htaˆ kaꞈ Liꞈ hpu henˇ tuˬ dawˇ teh taˍ gaˇ ve yoˬ. Bon lawˬ ve lehˬ yawˇ htaꞈ ga laˇ gʼa jaˇ. Yawˇ kʼoˆ ve, “ngaˬ awˬ to htaꞈ uˉ peunˍ gʼa tuˬ Yaˬhoˉvaˬ geh lawˬ leh yawˇ ga laˇ ve yoˬ. Ngaˬ a shu yawˇ hkʼaˇ yawˇ Liꞈ hpu henˇ tuˬ awˬ yanˇ shawˍ teh leh hkʼaˬ htaˆ kaꞈ te gʼa ve yoˬ.”

12. Cuˇ yiˍ piˇ ve liꞈ 11:4 hkʼaw ve awˬ liˇ awˬ hkʼaˇ ngaˬ hui dawˇ teh taˍ ve htaꞈ gʼaꞈ te gʼa tuˬ hkʼaˬ hkʼe ga laˇ ve le?

¹² Teˇ ceuˬ le le cawˬ˗oˬ htaˇ hehꞈ te˗a tehꞈ taˇ dawˇ. Ngaˬ hui Saˍtanˍ uˉ peunˍ ve awˬ hawˉ lo chehˇ ve yoˬ. Ngaˬ hui a shaꞈ teꞈ chehˇ kuiˬ hkʼaw shoꞈ shaꞈ ve maˇ gʼa hpuˇ taˬ tehꞈ taˇ dawˇ. Ngaˬ hui teˇ ceuˬ le le cawˬ˗oˬ htaˇ hehꞈ te ve kʼo, dawˇ teh taˍ ve htaꞈ te maˇ gʼa taˬ. (Cuˇ yiˍ piˇ ve 11:4 gʼaw sheˍ.) Awˬ viˉ awˬ nyi Daˍyeˍlaˆ kʼoˆ ve, “ngaˬ hui teˇ ceuˬ le le cawˬ˗oˬ htaˇ hehꞈ te ve kʼo, te maˇ gʼa taˬ. Ngaˬ hui aˬ htoꞈ ma te gaˇ ve kʼo haˆ te loˬ. Taˇ law chehˇ.” Yuˬganˬdaˬ mvuhˇ miˬ lo chehˇ ve awˬ viˉ awˬ nyi Pawˇluꞈ kʼoˆ ve, yaꞈ nyi te tuˬ ve awˬ ceuˬ shawˉ pawˍ taˇ law chehˇ. Yawˇ kʼoˆ ve, “ngaˬ hui shoꞈ shaꞈ ve cawˬ ve htawˇ laꞈ haˉ gʼaꞈ te ve kʼo, Yaˬhoˉvaˬ ngaˬ hui htaꞈ awˬ bon naꞈ laˇ tuˬ awˬ hkʼaˇ cawˬ ve yoˬ.”—Maˍlaˍhkiˆ 3:10.

13. I ve awˬ ceuˬ htaꞈ tanˬ te ve aˬ htoꞈ ma awˬ bon cawˬ ve le?

¹³ I ve awˬ ceuˬ htaꞈ tanˬ te ve. Ngaˬ hui dawˇ teh taˍ ve te gʼa tuˬ haˍ jaˇ teh dawˇ ve pa taw, ngaˬ hui te gaˇ ve nyi ma maˇ cawˬ ve yoˬ. Nawˬ chi hkʼe dawˇ ve kʼo, i ve awˬ ceuˬ leh sha ve awˬ ceuˬ htaꞈ awˉ lawˉ te nyi sheˍ. Nawˬ dawˇ teh taˍ ve lehˬ, Hkriꞈ yaˇ ve te hkʼaˇ dawˇ hkʼaˇ cawˬ tuˬ coˇ caˇ ve kʼo, nawˬ dawˇ teh taˍ ve i ve awˬ ceuˬ htaꞈ awˉ lawˉ te nyi sheˍ. Maˇ heˆ leh nawˬ Liꞈ hpu hkʼa peu˗eˬ gʼaw peuˬ tuˬ dawˇ teh taˍ ve kʼo, nawˬ maˇ gʼaw maˇ leh hkʼaˬ htaˆ kaꞈ gʼaw tuˬ awˬ yanˇ shawˍ teh sheˍ. Awˬ viˉ awˬ nyi Htoˉmaꞈ yawˇ 1 hkʼawꞈ ve awˬ yanˇ hkʼaw Liꞈ hpu hkʼa peu˗eˬ gʼaw peuˬ tuˬ haˍ jaˇ tehꞈ dawˇ ve kʼoˆ maˍ laˇ ve yoˬ.  Yawˇ kʼoˆ ve, “1 hkʼawꞈ ve hkʼaw Liꞈ hpu teˇ kʼoˆ hkʼa peu˗eˬ gʼaw peuˬ˗e tuˬ dawˇ teh taˍ ve ngaˬ awˬ pon kʼo haˆ haˆ gʼa gʼaw tuˬ te laˇ ve yoˬ. Chi ngaˬ awˬ pon haˍ jaˇ. Hkʼe te leh, ngaˬ awˬ nu ve teˇ ceuˬ kʼawꞈ dawˇ teh taˍ ve yoˬ. Chi teˇ pawˆ lehˬ teˇ nyi ve hkʼaw hkʼaˬ nyiˇ tawn maˇ gʼaw leh hkʼa dehꞈ dawˇ nyi tuˬ kaꞈ dawˇ teh taˍ ve yoˬ. Chi teˇ hkui ngaˬ Liꞈ hpu gʼaw ve htaꞈ dawˇ cawˇ˗oˬ ve yoˬ.” Htoˉmaꞈ Liꞈ hpu leuˉ leh gʼaw gaˇ htaˇ, yawˇ awˬ yanˇ maw chaweh gʼaw gʼa ve yoˬ. Leh peuˬ hkʼawꞈ nawˉ yawˇ Liꞈ hpu teˇ kʼoˆ hkʼa peu˗eˬ gʼaw peuˬ gʼa ve yoˬ. c

14. Ngaˬ hui dawˇ teh taˍ ve htaꞈ te maˇ gʼa tuˬ aˬ htoꞈ ma te laˇ ve le?

¹⁴ Ngaˬ hui dawˇ teh taˍ ve htaꞈ te gaˇ ve nyi ma hkʼaˬ hkʼe taw cawˬ ve, maˇ heˆ leh a shu yawˇ awˬ to htaꞈ awˬ liˇ hkʼaˬ hkʼe taw teh ve htawˇ, ngaˬ hui dawˇ teh taˍ ve htaꞈ maˇ te gʼa tuˬ teˇ ceuˬ ceuˬ te laˇ ve yoˬ. Tawˇ pa haˉ te kʼo, “maˇ dawˇ maˇ gaˇ ve awˬ lawn” ngaˬ hui dawˇ teh taˍ ve htaꞈ ceh tiˉ maˇ dawˇ nyi tuˬ leh dawˇ teh taˍ ve htaꞈ te tuˬ awˬ yanˇ kaꞈ maˇ cawˬ tuˬ te laˇ ve yoˬ hehˉ. (Cuˇ yiˍ piˇ ve 9:11) Leh ngaˬ hui awˬ gʼaˇ nuˇ tuˬ te laˇ ve shoꞈ shaꞈ ve awˬ lawn kaꞈ gʼa hpuˇ ve yoˬ hehˉ. (Tawˇ naˉ ve 24:10) Leh ngaˬ hui maˇ biˇ ve chaw hpehꞈ ve pa taw, ngaˬ hui te yaꞈ leh dawˇ teh taˍ ve htaꞈ te maˇ gʼa tuˬ te laˇ ve yoˬ hehˉ. (Roˉmaꞈ 7:23) Leh ngaˬ hui heuˬ jaˇ ve yoˬ hehˉ. (Maꞈhtehˍ 26:43) Hkʼe kʼo, ngaˬ hui htaꞈ aˬ htoꞈ ma ga laˇ gʼa ve le?

15. Ngaˬ hui dawˇ teh taˍ ve htaꞈ te maˇ gʼa sheˍ ve kʼo aˬ htoꞈ ma te awˬ gʼaˇ maˇ nuˇ cawˇ ve le? (Chiˇ mvuh ve 145:14)

¹⁵ Nawˬ dawˇ teh taˍ ve htaꞈ gʼaꞈ te maˇ gʼa sheˍ ve kʼo, aˬ htoꞈ ma te awˬ gʼaˇ maˇ nuˇ cawˇ ve htaꞈ tawnˇ taˍ cawˇ ve. Liꞈ hpu hkʼaw kʼoˆ ve ngaˬ hui shoꞈ shaꞈ ve laiˉ ceuˬ gʼa hpuˇ leh laiˉ pawˆ paiˍ˗e ve yoˬ. Yaꞈ hkʼaˇ, Yaˬhoˉvaˬ ngaˬ hui htaꞈ cawˍ tu laˇ leh dawˇ taˍ ve awˬ ti lo gaˬ˗e tuˬ ga laˇ tuˬ yoˬ. (Chiˇ mvuh ve 145:14 gʼaw sheˍ.) Hpiˇliˇ kʼawꞈ kʼoˆ ve, “ngaˬ dawˇ taˍ ve htaꞈ te gʼa ve lehˬ ngaˬ paiˍ˗e ve htawˇ, kʼawꞈ tu la ve htaꞈ cawˬ ve yoˬ.” Daˍviˆ kʼawꞈ kʼoˆ ve, “teˇ nyi nyi kʼo ngaˬ te maˇ daꞈ ve awˬ ceuˬ htaꞈ maˇ nyi leh ngaˬ dawˇ teh taˍ ve awˬ ceuˬ htaꞈ te maˇ gʼa tuˬ te laˇ ve awˬ ceuˬ htaꞈ kaꞈ maˇ nyi ve yoˬ. Yaꞈ  hkʼaˇ, chi ngaˬ Yaˬhoˉvaˬ htaꞈ hkʼaˬ hkʼe taw haꞈ ve hpeuꞈ maw piˇ tuˬ awˬ hkʼaˇ hpehꞈ ve tehꞈ dawˇ ve yoˬ.” Nawˬ dawˇ teh taˍ ve haˍ jaˇ tehꞈ dawˇ ve htawˇ coˇ caˇ leh te ve kʼo, nawˬ Yaˬhoˉvaˬ ha lehˬ tcuh gaˇ ve tehꞈ hpeuꞈ maw piˇ chehˇ ve yoˬ. Nawˬ chi hkʼe te htaˇ, yawˇ hkʼaˬ hkʼe taw nyi hkʼaˇ suh ve htaꞈ dawˇ nyi sheˍ.

16. Dawˇ teh taˍ ve htaꞈ gʼaꞈ te maˇ gʼa htaˇ ngaˬ hui htaꞈ aˬ htoꞈ ma maˍ laˇ ve le?

¹⁶ Ngaˬ hui dawˇ teh taˍ ve htaꞈ te gʼa tuˬ maˍ laˇ ve. Nawˬ dawˇ teh taˍ ve htaꞈ te maˇ gʼa tuˬ aˬ htoꞈ ma te laˇ ve htaꞈ dawˇ nyi sheˍ. Leh a shu yawˇ awˬ to htaꞈ na nyi cawˇ ve, ‘ngaˬ awˉ lawˉ htaˇ hkʼe leˇ maˇ te tuˬ aˬ htoꞈ ma gʼa te cawˇ ve le?’ (Tawˇ naˉ ve 27:12) Yaꞈ hkʼaˇ, teˇ pawˆ pawˆ kʼo ngaˬ hui dawˇ teh taˍ ve htaꞈ te maˇ gʼa ve lehˬ, ngaˬ hui awˬ tehˬ te gʼa tuˬ maˇ dawˇ teh taˍ ve pa taw yoˬ. Nawˬ chi hkʼe hpehꞈ ve tehꞈ dawˇ ve kʼo, chi teˇ hkui nawˬ hpehꞈ chehˇ ve awˬ ceuˬ nawˬ dawˇ teh taˍ ve htaꞈ te gʼa˗aw laˇ tehꞈ kʼawꞈ dawˇ nyi sheˍ. d Nawˬ dawˇ teh taˍ ve htaꞈ te gʼa tuˬ haˍ jaˇ leh nawˬ dawˇ teh taˍ ve htaꞈ pa tuˬ te laˇ ve kʼo, Yaˬhoˉvaˬ nawˬ htaꞈ na gʼa leh nawˬ teꞈ chiˉ te maˇ gʼa ve chaw hpehꞈ ve tehꞈ yawˇ maˇ shawˍ.—2 Kawˇrenˍhtuˆ 8:12.

17. Ngaˬ hui te gʼa˗oˬ ve awˬ ceuˬ htaꞈ aˬ htoꞈ ma te maˇ leunˇ cawˇ ve le?

¹⁷ Nawˬ te gʼa˗oˬ ve awˬ ceuˬ htaꞈ maˇ leunˇ cawˇ ve. Liꞈ hpu hkʼaw kʼoˆ ve, ‘Gʼuiˬ sha lehˬ maˇ hteˇ maˇ cawˇ ve Gʼuiˬ sha hpehꞈ ve maˇ heˆ. Ponˬ laˬ htaˇ nawˬ hui te taˍ ve kanˉ Gʼuiˬ sha yawˇ leunˇ tuˬ ve maˇ heˆ.’ (Heˍbrehˇ 6:10) Chi htaꞈ pa taw, nawˬ te gʼa˗oˬ ve awˬ ceuˬ htaꞈ taˇ leunˇ sheˍ. Nawˬ laiˉ ceuˬ htaꞈ te gʼa˗oˬ ve maˇ heˆ laˇ? Tawˇ pa haˉ te kʼo, nawˬ Yaˬhoˉvaˬ geh meuˆ daꞈ ve, yawˇ ve awˬ lawn awˬ nu ve chaw htaꞈ kʼoˆ maˍ piˇ ve, leh Baˆtiˆsaˬ haꞈ yuˬ˗oˬ ve yoˬ. Nawˬ Hkriꞈ yaˇ ve awˬ vuiˬ te tuˬ dawˇ teh taˍ leh te gʼa˗oˬ ve kʼo, nawˬ caˉ leh co ha hpawˇ uiˍ la mvuh la gʼa leh chi teˇ hkui nawˬ dawˇ teh taˍ ve htaꞈ awˬ tehˬ awˬ na te gʼa tuˬ yoˬ.—Hpiˇliˇpiˆ 3:16.

18. Ngaˬ hui dawˇ teh taˍ ve htaꞈ te gʼa tuˬ coˇ caˇ htaˇ aˬ htoꞈ ma gʼa te cawˇ ve le? (Awˬ han htaꞈ nyi sheˍ.)

¹⁸ Heuˇ shan hpawˇ gʼaꞈ paˍ dawˇ taˍ ve awˬ ti lo awˬ tehˬ gaˬ˗e ve hkʼa shuˍ, nawˬ htaꞈ Yaˬhoˉvaˬ ga laˇ tcuh ve kʼo, dawˇ teh taˍ ve htaꞈ te gʼa tuˬ yoˬ. Chi hkʼoˆ kaꞈ, heuˇ shan hpawˇ gʼaꞈ paˍ kʼai chehˇ htaˇ daꞈ jaˇ ve laiˉ ceuˬ htaꞈ mawˬ leh ha lehˬ ve hkʼa shuˍ, Yaˬhoˉvaˬ nawˬ htaꞈ ga laˇ leh awˬ bon hkʼaˬ hkʼe naꞈ laˇ chehˇ ve htaꞈ dawˇ nyi sheˍ. Nawˬ chi hkʼe te ve kʼo, dawˇ teh taˍ ve htaꞈ te chehˇ ve awˬ yanˇ htaˇ ha lehˬ gʼa ve yoˬ. (2 Kawˇrenˍhtuˆ 4:7) Chi nawˬ caˉ leh te ve kʼo awˬ bon maˇ maˇ gʼa tuˬ yoˬ.—Gaˍlaˍtiˆ 6:9.