1. Yaˬhoˉvaˬ yawˇ ve kanˉ te ve chaw htaꞈ aˬ htoꞈ ma te tcuh gaˇ ve le? (Awˬ han htaꞈ nyi sheˍ.)

 Ngaˬ hui awˬ gʼaˇ leh beˆ maˍ laˇ hkawˇ gʼa gaˇ htaˇ, ga laˇ tuˬ hkʼaˬ kaˬ lo ca gʼa tuˬ le? Ngaˬ hui htaꞈ ga laˇ gʼa tuˬ Yaˬhoˉvaˬ geh bon gʼa lawˬ ve yoˬ. Leh Yaˬhoˉvaˬ kaꞈ ngaˬ hui yawˇ geh bon lawˬ tcuh gaˇ leh “hkʼaˬ htaˆ kaꞈ bon lawˬ tcuhˉ taˍ” tcuh gaˇ ve yoˬ. (1 Hteˇsaˍlawˇniˆ 5:17) Ngaˬ hui Yaˬhoˉvaˬ geh aˬ htoꞈ ma awˬ lawn leh hkʼaˬ htaˆ lawˬ kaꞈ gʼa ve yoˬ. Ngaˬ hui a shaꞈ teꞈ kuiˬ hkʼaw teˇ lawn le le Yaˬhoˉvaˬ beˆ maˍ laˇ tuˬ kaꞈ lawˬ gʼa ve yoˬ. (Tawˇ naˉ ve 3:5, 6) Yaˬhoˉvaˬ lehˬ piˇ gaˇ puiˉ ve Gʼuiˬ sha hpehꞈ ve yoˬ. Ngaˬ hui yawˇ geh bon hkʼaˬ nyiˇ pawˆ ceh lawˬ gʼa ve maˇ gʼa kʼoˆ laˇ taˍ.

2. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

² Ngaˬ hui Yaˬhoˉvaˬ geh bon lawˬ tcuh laˇ ve yawˇ htaꞈ awˬ bon uiˍ jaˇ tehꞈ kʼoˆ piˇ gaˇ ve yoˬ. Yaꞈ hkʼaˇ, teˇ pawˆ pawˆ kʼo, bon lawˬ tuˬ awˬ yanˇ ca ve haˍ jaˇ tehꞈ dawˇ ve yoˬ. Ngaˬ hui leuˉ leh Yaˬhoˉvaˬ geh bon lawˬ gaˇ tuˬ Liꞈ hpu hkʼaw awˬ hkʼaˇ beˆ maˍ laˇ taˍ ve ngaˬ hui ha lehˬ jaˇ ve yoˬ. Yeˍsuˆ ve awˬ lawn ngaˬ hui bon lawˬ tuˬ awˬ yanˇ hkʼaˬ hkʼe te shawˍ teh tuˬ ga laˇ ve, chi ve hkʼaw teˇ geh henˇ tuˬ yoˬ. Ngaˬ hui ve bon lawˬ hkawˇ hkʼaw kʼoˆ cawˇ ve, a yeˇ uiˍ ve htaꞈ caˉ daꞈ ve 5 lawn htaꞈ teˇ geh henˇ tuˬ yoˬ. Chi ve ngaˬ hui leuˉ leh bon hkʼa dehꞈ lawˬ gʼa tuˬ ga laˇ gʼa ve kaꞈ teˇ geh henˇ tuˬ yoˬ.

3. Yeˍsuˆ aˬ htoꞈ ma ve awˬ lawn htaꞈ hkʼa dehꞈ shiˍ ve le?

³ Ngaˬ hui ve bon lawˬ hkawˇ Yaˬhoˉvaˬ awˬ pon a yeˇ uiˍ jaˇ tehꞈ shawˍ ve Yeˍsuˆ hkʼa dehꞈ shiˍ ve yoˬ. Yeˍsuˆ miˬ guiˬ hkʼoˆ lo maˇ paw la sheˍ htaˇ Yaˬhoˉvaˬ awˬ paˇ lo chehˇ taˍ leh yawˇ ve kanˉ te ve ka tiꞈ yeˬ ve chaw Haˍnaˆ, Daˍviˆ, Eˇliˇyaꞈ leh awˬ nu ve chaw teˇ hpaˍ yawˇ hui bon lawˬ ve htaꞈ Yaˬhoˉvaˬ hkʼawꞈ piˇ ve Yeˍsuˆ gʼa mawˬ ve yoˬ. (1 Saˍmo˗eˍlaˆ 1:10, 11, 20; 1 Jawˇmawˇ 19:4-6; Chiˇ mvuh ve 32:5) Hkʼe te leh, Yeˍsuˆ yawˇ ve awˬ laꞈ gʼawˇ hui htaꞈ hkʼaˬ htaˆ kaꞈ bon  lawˬ tuˬ maˍ piˇ ve anˇ tuˬ maˇ loˍ. Leh Yaˬhoˉvaˬ yawˇ hui ve bon lawˬ hkawˇ htaꞈ kaꞈ hkʼawꞈ laˇ tuˬ yoˬ tehꞈ yonˍ gʼa ve yoˬ.—Maꞈhtehˍ 7:7-11.

4. Yeˍsuˆ ve bon lawˬ hkawˇ ngaˬ hui htaꞈ hkʼaˬ hkʼe maˍ laˇ ve le?

⁴ Yeˍsuˆ lehˬ bon lawˬ ve awˬ laꞈ gʼawˇ awˬ pon daꞈ jaˇ ve henˇ yuˬ tuˬ hpehꞈ ve yoˬ. Yawˇ miˬ guiˬ hkʼoˆ lo Gʼuiˬ sha ve kanˉ te ve awˬ yanˇ htaˇ, yawˇ hkʼaˬ htaˆ kaꞈ bon lawˬ ve yoˬ. Yawˇ kanˉ maˇ jaˇ leh awˬ nu ve chaw yawˇ geh hkʼaˬ htaˆ kaꞈ laˬ ve pa taw, yawˇ bon lawˬ tuˬ awˬ yanˇ ca ve yoˬ. (Maˍkuˆ 6:31, 45, 46) Yeˍsuˆ teˇ gʼaˇ tiˉ bon lawˬ tuˬ awˬ pon mvuhˇ shawˉ teˇ naꞈ tu ve yoˬ. (Maˍkuˆ 1:35) Yeˍsuˆ a yeˇ uiˍ ve awˬ lawn maˇ dawˇ cheˆ sheˍ htaˇ, teˇ haˉ mvuhˇ hkʼa htiˇ Gʼuiˬ sha geh bon lawˬ ve yoˬ. (Luˉkaꞈ 6:12, 13) Yeˍsuˆ miˬ guiˬ hkʼoˆ lo chehˇ ve awˬ leh meuˇ teˇ haˉ htaˇ, yawˇ haˍ jaˇ ve awˬ vuiˬ htaꞈ te gʼa tuˬ, yawˇ Gʼuiˬ sha geh bon laiˉ pawˆ lawˬ ve yoˬ.—Maꞈhtehˍ 26:39, 42, 44.

5. Yeˍsuˆ bon lawˬ ve htaꞈ caˉ daꞈ ve ngaˬ hui htaꞈ hkʼaˬ hkʼe maˍ laˇ ve le?

⁵ Yeˍsuˆ ve awˬ lawn ngaˬ hui htaꞈ maˍ laˇ ve, ngaˬ hui kanˉ maˇ jaˇ ve htawˇ, bon lawˬ tuˬ awˬ yanˇ shawˍ teh cawˇ ve yoˬ. Ngaˬ hui Yeˍsuˆ hkʼa shuˍ gʼa te cawˇ ve lehˬ, hkʼaˬ htaˆ kaꞈ bon lawˬ tuˬ awˬ yanˇ gʼa shawˍ teh cawˇ ve yoˬ. Ngaˬ hui leuˉ leh bon lawˬ gʼa tuˬ, teˇ pawˆ pawˆ kʼo ngaˬ hui teˇ naꞈ tu ve maˇ heˆ leh haˆ maˇ zuhꞈ ve yoˬ. Ngaˬ hui chi hkʼe te ve kʼo, ngaˬ hui bon lawˬ ve htaꞈ awˬ hpfuhˇ shiˍ ve tehꞈ Yaˬhoˉvaˬ mawˬ tuˬ te piˇ ve yoˬ. Awˬ viˉ awˬ nyi yaˇ miˇ Len meh ve bon lawˬ ve htaꞈ caˉ daꞈ ve, yawˇ na gʼa ve awˉ lawˉ teˇ pawˆ hkʼaˬ hkʼe taw ha lehˬ jaˇ ve htaꞈ dawˇ nyi sheˍ. Yawˇ kʼoˆ ve, “ngaˬ Yaˬhoˉvaˬ geh bon hkʼaˬ htaˆ lawˬ kaꞈ gʼa ve tehꞈ shiˍ htaˇ, chi yawˇ ngaˬ geh meuˆ daꞈ jaˇ ve awˬ chawˇ hkʼe hpehꞈ ve tehꞈ dawˇ tuˬ te laˇ ve pa taw, ngaˬ leuˉ leh yawˇ geh bon lawˬ gaˇ ve yoˬ.” Ngaˬ hui kaꞈ chi hkʼe dawˇ ve maˇ heˆ laˇ? Ngaˬ hui bon lawˬ gʼa ve a yeˇ uiˍ ve 5 lawn cawˬ ve htaꞈ teˇ geh henˇ tuˬ yoˬ.

6. Hpeuꞈ maˍ ve liꞈ 4:10, 11 hkʼaw kʼoˆ taˍ ve hkʼe, Yaˬhoˉvaˬ aˬ htoꞈ ma htaꞈ gʼa keunˍ ve le?

⁶ Yaˬhoˉvaˬ chiˇ mvuh ve htaꞈ gʼa keunˍ ve. Chaw mawˇ chaw kehˉ 24 gʼaˇ hkui tcuhˉ teh leh Yaˬhoˉvaˬ htaꞈ oˉ kʼoˍ pui chehˇ ve tcuh yaˇ Yoˇhanˬ mawˬ ve yoˬ. Yawˇ hui Yaˬhoˉvaˬ htaꞈ chiˇ mvuh leh kʼoˆ ve, “Gʼuiˬ sha˗oˬ, nawˬ lehˬ awˬ meꞈ awˬ hponˇ teˇ ceuˬ, yawˆ yan ve teˇ ceuˬ leh kanˇ paˆ teˇ ceuˬ htaꞈ gʼa keunˍ ve yoˬ.” (Hpeuꞈ maˍ ve 4:10, 11 gʼaw sheˍ.) Chi hkʼoˆ kaꞈ, ka tiꞈ yeˬ ve mvuhˇ naw ma tcuh yaˇ kaꞈ Yaˬhoˉvaˬ htaꞈ chiˇ mvuh ve yoˬ. Yawˇ hui mvuhˇ naw ma hkʼoˆ Yaˬhoˉvaˬ geh chehˇ leh yawˇ htaꞈ hkʼa dehꞈ shiˍ ve yoˬ. Yawˇ hui Yaˬhoˉvaˬ te ve awˬ ceuˬ htaꞈ mawˬ ve pa taw, yawˇ hkʼaˬ hkʼe ve Gʼuiˬ  sha hpehꞈ ve leh yawˇ ve te hkʼaˇ dawˇ hkʼaˇ hkʼaˬ hkʼe cawˬ ve htaꞈ kaꞈ yawˇ hui hkʼa dehꞈ shiˍ ve yoˬ. Chi ve lehˬ yawˇ hui Yaˬhoˉvaˬ htaꞈ chiˇ mvuh gaˇ tuˬ te piˇ ve yoˬ.—Yawˇbaˆ 38:4-7.

7. Yaˬhoˉvaˬ chiˇ mvuh ve htaꞈ gʼa tuˬ ngaˬ hui hkʼaˬ hkʼe te gʼa ve le?

⁷ Ngaˬ hui ve bon lawˬ hkawˇ hkʼaw Yaˬhoˉvaˬ chiˇ mvuh ve htaꞈ gʼa tcuh gaˇ ve yoˬ. Ngaˬ hui Yaˬhoˉvaˬ htaꞈ haꞈ leh hkʼaˬ hkʼe taw yawˆ yan ve, bon lawˬ hkawˇ hkʼaw kʼoˆ piˇ gaˇ ve yoˬ. Nawˬ Liꞈ hpu gʼaw leh hkʼa dehꞈ hpfuhˆ nyi htaˇ, Yaˬhoˉvaˬ ve te hkʼaˇ dawˇ hkʼaˇ hkʼaˬ ve teˇ ceuˬ nawˬ dawˇ cawˇ jaˇ ve htaꞈ dawˇ nyi sheˍ. (Yawˇbaˆ 37:23; Roˉmaꞈ 11:33) Leh nawˬ bon lawˬ htaˇ, yawˇ ve te hkʼaˇ dawˇ hkʼaˇ htaꞈ nawˬ hkʼaˬ hkʼe dawˇ ve kaꞈ kʼoˆ piˇ sheˍ. Chi hkʼoˆ kaꞈ, ngaˬ hui leh awˬ viˉ awˬ nyi teˇ gʼaˇ le le awˬ pon, yawˇ ngaˬ hui htaꞈ haꞈ ve, dawˇ haˍ laˇ ve, leh hkʼaˬ htaˆ kaꞈ haꞈ shaˉ laˇ ve pa taw, yawˇ htaꞈ chiˇ mvuh piˇ gaˇ ve yoˬ.—1 Saˍmo˗eˍlaˆ 1:27; 2:1, 2.

8. Ngaˬ hui Yaˬhoˉvaˬ htaꞈ awˬ bon uiˍ jaˇ tehꞈ kʼoˆ piˇ tuˬ aˬ htoꞈ ma awˬ hkʼaˇ cawˬ ve le? (1 Hteˇsaˍlawˇniˆ 5:18)

⁸ Yaˬhoˉvaˬ htaꞈ awˬ bon uiˍ jaˇ tehꞈ kʼoˆ piˇ ve. Ngaˬ hui bon lawˬ ve hkʼaw Yaˬhoˉvaˬ htaꞈ awˬ bon uiˍ jaˇ tehꞈ kʼoˆ piˇ gʼa ve laiˉ hkʼaˇ cawˬ ve yoˬ. (1 Hteˇsaˍlawˇniˆ 5:18 gʼaw sheˍ.) Ngaˬ hui cawˬ ve teˇ ceuˬ le le Yaˬhoˉvaˬ geh gʼa taˍ ve pa taw, yawˇ htaꞈ awˬ bon uiˍ jaˇ tehꞈ kʼoˆ piˇ cawˇ ve yoˬ. (Yaˍkoˆ 1:17) Tawˇ pa haˉ te kʼo, Yaˬhoˉvaˬ miˬ guiˬ htaꞈ hpanˍ leh anˇ tuˬ uiˍ jaˇ ve teˇ hpaˍ htaꞈ kaꞈ hpanˍ ve ngaˬ hui yawˇ htaꞈ awˬ bon uiˍ jaˇ tehꞈ kʼoˆ piˇ gaˇ ve yoˬ. Yaˬhoˉvaˬ ngaˬ hui htaꞈ a shaꞈ teꞈ chehˇ tcuh laˇ ve, yehˬ kʼa cawˬ tcuh laˇ ve, awˬ chawˇ cawˬ tcuh laˇ ve, leh dawˇ law kuiˬ cawˬ tcuh laˇ ve, yawˇ htaꞈ awˬ bon uiˍ jaˇ tehꞈ kʼoˆ piˇ gaˇ ve yoˬ. Leh ngaˬ hui yawˇ geh awˬ chawˇ gʼa te ve kaꞈ awˬ bon uiˍ jaˇ tehꞈ kʼoˆ piˇ gaˇ ve yoˬ.

9. Ngaˬ hui daꞈ ve te hkʼaˇ dawˇ hkʼaˇ cawˬ ve htaꞈ awˬ hpfuhˇ shiˍ ve tehꞈ, Yaˬhoˉvaˬ htaꞈ awˬ bon uiˍ jaˇ tehꞈ hkʼaˬ hkʼe hpeuꞈ maw piˇ gʼa tuˬ le?

⁹ Yaˬhoˉvaˬ htaꞈ awˬ bon uiˍ jaˇ tehꞈ kʼoˆ piˇ gʼa tuˬ ngaˬ hui gʼa coˇ caˇ ve yoˬ. Miˬ guiˬ hkʼoˆ lo awˬ bon uiˍ hkawˇ maˇ shiˍ ve chaw hui geh ngaˬ hui chehˇ ve yoˬ. A shu yawˇ loˍ ve awˬ ceuˬ htaꞈ ceh tiˉ gʼa tuˬ yawˇ hui a yeˇ yuˬ ve yoˬ. Yawˇ hui cawˬ taˍ ve awˬ ceuˬ awˬ bon uiˍ hkawˇ shiˍ ve tehꞈ hpeuꞈ maw piˇ tuˬ a yeˇ maˇ yuˬ ve yoˬ. Ngaˬ hui yawˇ hui hkʼa shuˍ dawˇ ve kʼo, ngaˬ hui ve bon lawˬ hkawˇ hkʼaw gʼa tuˬ ve awˬ ceuˬ ceh tiˉ lawˬ la ve yoˬ. Ngaˬ hui chi hkʼe maˇ gʼa te tuˬ, Yaˬhoˉvaˬ peꞈ laˇ ve teˇ ceuˬ le le daꞈ ve te hkʼaˇ dawˇ hkʼaˇ htaꞈ awˬ hpfuhˇ shiˍ leh awˬ bon uiˍ ve tehꞈ gʼa hpeuꞈ maw piˇ ve yoˬ.—Luˉkaꞈ 6:45.

10. Awˬ bon uiˍ hkawˇ shiˍ ve pa taw, awˬ viˉ awˬ nyi yaˇ miˇ teˇ gʼaˇ shoꞈ shaꞈ ve htaꞈ yeunˇ hkanˍ gʼaˇ tuˬ hkʼaˬ hkʼe ga piˇ ve le? (Awˬ han htaꞈ nyi sheˍ.)

¹⁰ Ngaˬ hui awˬ bon uiˍ hkawˇ htaꞈ shiˍ ve lehˬ, tuꞈ ve hkanˍ ve htaꞈ yeunˇ hkanˍ gʼaˇ tuˬ ga laˇ ve yoˬ. Awˬ viˉ awˬ nyi Hkin˗yaw˗suˆ ve awˬ lawn Shaw nyi kuiˬ Taꞈ yehˬ Ha pa 1 maˬ 15 nyi 2015 hkʼawꞈ hkʼaw cawˬ ve htaꞈ teˇ geh nyi sheˍ. Yawˇ awˬ tcuhˇ hpoˆ htaꞈ mvuhˇ haˉ caˇ ve tehꞈ saˍ laꞈ gʼonˍ kʼoˆ piˇ ve yoˬ. Yawˇ kʼoˆ ve, “chi teˇ pawˆ naˬ ve lehˬ ngaˬ dawˇ maˇ jaˇ tuˬ te laˇ ve yoˬ. Ngaˬ teˇ ceuˬ le le luˬ kʼai˗oˬ ve tehꞈ dawˇ ve leh kawˆ jaˇ ve yoˬ.” Yaꞈ hkʼaˇ, Hkin˗yaw˗suˆ yeunˇ hkanˍ gʼaˇ tuˬ aˬ htoꞈ ma ga piˇ ve le? Yawˇ kʼoˆ ve, yawˇ teˇ haˉ le le maˇ zuhꞈ sheˍ htaˇ, yehˬ awˬ na teˇ htehꞈ lo taˆ˗e leh awˬ hkawˇ  bvuhˬ chaweh bon lawˬ ve yoˬ. Oˇ ve teˇ nyi hkʼaw yawˇ Yaˬhoˉvaˬ geh gʼa ve daꞈ ve 5 ceuˬ htaꞈ awˬ bon uiˍ jaˇ tehꞈ kʼoˆ piˇ ve yoˬ. Chi ve lehˬ yawˇ hkʼe taw maˇ dawˇ haˍ tuˬ ga piˇ leh yawˇ Yaˬhoˉvaˬ htaꞈ haꞈ jaˇ ve yoˬ. Yaˬhoˉvaˬ yawˇ ve kanˉ te ve ka tiꞈ yeˬ ve chaw htaꞈ shoꞈ shaꞈ ve gʼa hpuˇ maˇ jaˇ ve htawˇ, ga piˇ chehˇ ve tehꞈ yawˇ mawˬ ve yoˬ. Yawˇ shoꞈ shaꞈ ve gʼa hpuˇ ve aꞈ kehˉ Yaˬhoˉvaˬ geh awˬ bon gʼa maˇ jaˇ ve htaꞈ gʼa mawˬ ve yoˬ. Ngaˬ hui kaꞈ awˬ viˉ awˬ nyi Hkin˗yaw˗suˆ hkʼa shuˍ dawˇ ve yoˬ. Ngaˬ hui shoꞈ shaꞈ ve gʼa hpuˇ ve htawˇ, Yaˬhoˉvaˬ htaꞈ awˬ bon uiˍ jaˇ tehꞈ kʼoˆ piˇ tuˬ laiˉ ceuˬ cawˬ ve yoˬ. Yaˬhoˉvaˬ geh bon lawˬ ve lehˬ, ngaˬ hui yeunˇ hkanˍ leh nyi ma gawˬ lehˍ cawˬ tuˬ ga laˇ ve yoˬ.

11. Yeˍsuˆ mvuhˇ naw ma hkʼoˆ lo taˆ kʼawꞈ˗e peuˬ hkʼawꞈ nawˉ aˬ htoꞈ ma te awˬ laꞈ gʼawˇ hui haꞈ hanˉ ve gʼa cawˬ cawˇ ve le?

¹¹ Yaˬhoˉvaˬ ve kanˉ te ve hkʼaw haꞈ hanˉ ve cawˬ tuˬ yawˇ ga laˇ tuˬ lawˬ sheˍ. Yeˍsuˆ mvuhˇ naw ma hkʼoˆ lo maˇ taˆ kʼawꞈ˗e sheˍ htaˇ, “Yeˍruˆsaˍlehnˍ venˇ htaꞈ tanˬ leh Yuˇdaꞈ mvuhˇ miˬ, Saˍmaˍriˆ mvuhˇ miˬ leh mvuhˇ leh miˬ leh hkʼa gaˬ” nawˬ hui ngaˬ ve shaˉ hkiˆ hkanˍ shehˍ hpaˇ gʼa hpehꞈ tuˬ yoˬ tehꞈ Yeˍsuˆ awˬ laꞈ gʼawˇ hui htaꞈ kʼoˆ piˇ ve yoˬ. (Tcuh yaˇ 1:8; Luˉkaꞈ 24:46-48) Peuˬ hkʼawꞈ nawˉ maˇ maw Yuˇdaꞈ chaw ve bon awˬ hoˉ Peˍtruˆ leh Yoˇhanˬ htaꞈ hpeh yuˬ leh yawˇ hui htaꞈ jehˬ daꞈ shehˍ hpaˇ awˬ moˍ geh shiˍ kʼai leh bon maˇ gʼa maˍ tuˬ tawˇ piˇ ve yoˬ. (Tcuh yaˇ 4:18, 21) Leh yawˇ huiˉ maˬ hkʼaˬ hkʼe te ve le?

12. Tcuh yaˇ liꞈ 4:29, 31 hkʼaw kʼoˆ taˍ ve hkʼe, awˬ laꞈ gʼawˇ hui hkʼaˬ hkʼe te ve le?

¹² Peˍtruˆ leh Yoˇhanˬ Yuˇdaꞈ chaw ve bon awˬ hoˉ htaꞈ kʼoˆ piˇ ve, “Gʼuiˬ sha ve tawˇ hkawˇ htaꞈ na yuˬ ve aꞈ kehˉ nawˬ hui ve tawˇ hkawˇ htaꞈ na yuˬ tuˬ, Gʼuiˬ sha mehˆ gʼuˇ suhˍ cawˇ maˇ cawˇ ve htaꞈ nawˬ hui hkʼaˇ nawˬ hui dawˇ nyi˗o. Ngaˬ huiˉ maˬ lehˬ, gʼa kaˇ gʼa mawˬ ve awˬ lawn teˇ hpaˍ htaꞈ maˇ hto maˇ maˍ ve kʼo, chehˇ maˇ hpehꞈ tehꞈ kʼawꞈ kʼoˆ piˇ ve yoˬ.” (Tcuh yaˇ 4:19, 20) Peˍtruˆ leh Yoˇhanˬ htaꞈ hpehˇ piˇ peuˬ hkʼawꞈ nawˉ, awˬ laꞈ gʼawˇ hkʼa peu˗eˬ Yaˬhoˉvaˬ ve a loˍ htaꞈ gʼaꞈ te gʼa tuˬ yawˇ geh bon lawˬ ve yoˬ. Yawˇ hui bon lawˬ ve hkʼaw kʼoˆ ve, “nawˬ ve awˬ ceˬ hui nyi ma haꞈ hanˉ te leh nawˬ ve tawˇ hkawˇ htaꞈ maˍ piˇ hpehꞈ tuˬ ga laˇ sheˍ.” Leh Yaˬhoˉvaˬ kaꞈ yawˇ hui ve bon lawˬ hkawˇ htaꞈ hkʼawꞈ piˇ ve yoˬ.—Tcuh yaˇ 4:29, 31 gʼaw sheˍ.

13. Awˬ viˉ awˬ nyi Jin˗hin ve awˬ lawn ngaˬ hui htaꞈ hkʼaˬ hkʼe maˍ laˇ ve le?

¹³ Mvuhˇ miˬ uˉ peunˍ paˍ ngaˬ hui htaꞈ maˇ hto toˇ tcuh laˇ ve htawˇ, ngaˬ hui Yeˍsuˆ ve awˬ laꞈ gʼawˇ hui htaꞈ henˇ yuˬ leh caˉ leh hto toˇ cawˇ ve yoˬ. Awˬ viˉ awˬ nyi Jin˗hin maꞈ yaˇ maˇ te ve pa taw, htawnˍ hkʼaw lo gʼa chehˇ ve awˬ lawn htaꞈ teˇ geh nyi sheˍ. Yawˇ htawnˍ hkʼaw lo chehˇ ve awˬ yanˇ htaˇ, htawnˍ yaˇ teˇ gʼaˇ tiˉ haw tiˍ taˍ ve htaꞈ nyi haꞈ shaˉ tuˬ awˬ vuiˬ gʼa ve yoˬ. Htawnˍ yaˇ aˬ htoꞈ ma loˍ ve htaꞈ yawˇ na piˇ tuˬ, htawnˍ awˬ hoˉ yawˇ htaꞈ awˬ vuiˬ te tcuh ve yoˬ. Yaꞈ hkʼaˇ, yawˇ lehˬ htawnˍ yaˇ chi teˇ hpaˍ htaꞈ Liꞈ hpu hkʼaw ve awˬ lawn maˇ kʼoˆ maˍ piˇ tcuh. Jin˗hin haꞈ hanˉ ve cawˬ tuˬ Yaˬhoˉvaˬ geh bon lawˬ leh Liꞈ hpu hkʼaw awˬ tehˬ ve awˬ lawn awˬ hkʼaˇ ca leh htawnˍ yaˇ htaꞈ kʼoˆ maˍ piˇ ve yoˬ. (Tcuh yaˇ 5:29) Yawˇ kʼoˆ ve, “Yaˬhoˉvaˬ ngaˬ ve bon lawˬ hkawˇ htaꞈ hkʼawꞈ laˇ ve yoˬ. Hkʼe te leh, ngaˬ haꞈ hanˉ ve leh cuˇ yiˍ cawˬ ve hkʼaw htawnˍ yaˇ htaꞈ yehˬ miˉ paˇ lo 5 miꞈ niꞈ ceh gʼa mawˬ daꞈ ve kaꞈ Liꞈ hpu maˍ piˇ gʼa ve yoˬ. Mvuhˇ shawˉ gaˬ kʼo, htawnˍ yaˇ htaꞈ liꞈ yuˬ piˇ gʼa tuˬ mvuhˇ hpeuꞈ htaˇ ngaˬ liꞈ bvuhꞈ ve yoˬ.” Ngaˬ hui kaꞈ Yaˬhoˉvaˬ ve kanˉ caˉ leh te gʼa tuˬ yawˇ ga laˇ tuˬ yoˬ tehꞈ yonˍ gʼa ve yoˬ. Ngaˬ hui haꞈ hanˉ ve leh cuˇ yiˍ cawˬ gʼa tuˬ Jin˗hin hkʼa shuˍ bon lawˬ gʼa ve yoˬ.

14. Ngaˬ hui shoꞈ shaꞈ ve htaꞈ yeunˇ hkanˍ gʼaˇ tuˬ Yaˬhoˉvaˬ hkʼaˬ hkʼe ga laˇ gʼa ve le? (Chiˇ mvuh ve 37:3, 5)

¹⁴ Ngaˬ hui shoꞈ shaꞈ ve htaꞈ yeunˇ hkanˍ gʼaˇ tuˬ Yaˬhoˉvaˬ ga laˇ tuˬ lawˬ sheˍ. Ngaˬ hui laiˉ gʼaˇ awˬ to hpawˇ maˇ heˆ leh nyi ma hpawˇ naˬ ve, haꞈ ve chaw suh˗e ve, yehˬ kʼa hkʼaw shoꞈ shaꞈ ve awˬ lawn gʼa hpuˇ ve, fawˉ ve mehˍ ve gʼa hpuˇ ve, maˇ heˆ leh shoꞈ shaꞈ ve awˬ nu ve, leh chi ve hkʼa peu˗eˬ ngaˬ hui gʼa hpuˇ ve yoˬ hehˉ. Naˬ beuˬ a  naˍ maˇ heˆ leh maꞈ te daꞈ ve gʼa hpuˇ ve kʼo, chi ve teˇ hpaˍ htaꞈ yeunˇ hkanˍ gʼaˇ tuˬ haˍ ve yoˬ. Chi ve teˇ hpaˍ nawˬ gʼa hpuˇ chehˇ ve kʼo, nawˬ hkʼaˬ hkʼe gʼa hpuˇ chehˇ ve leh hkʼaˬ hkʼe dawˇ ve meuˆ daꞈ jaˇ ve awˬ chawˇ htaꞈ kʼoˆ maˍ piˇ ve hkʼe, bon lawˬ ve hkʼaw Yaˬhoˉvaˬ htaꞈ kʼoˆ maˍ piˇ sheˍ. Leh Yaˬhoˉvaˬ “nawˬ htaꞈ ga laˇ tuˬ yoˬ” tehꞈ yonˍ gʼa ve yoˬ.—Chiˇ mvuh ve 37:3, 5 gʼaw sheˍ.

15. Ngaˬ hui tuꞈ ve hkanˍ ve gʼa hpuˇ htaˇ, bon lawˬ ve hkʼaˬ hkʼe ga laˇ gʼa ve le? Tawˇ pa haˉ kʼoˆ maˍ laˇ sheˍ.

¹⁵ “Tuꞈ ve hkanˍ ve htaꞈ gʼa hkanˍ ve teˇ yanˇ” yeunˇ hkanˍ gʼaˇ tuˬ hkʼaˬ htaˆ kaꞈ bon lawˬ ve lehˬ ngaˬ hui htaꞈ ga laˇ gʼa ve yoˬ. (Roˉmaꞈ 12:12) Yaˬhoˉvaˬ yawˇ ve kanˉ te ve chaw aˬ htoꞈ ma gʼa hpuˇ chehˇ ve htaꞈ shiˍ leh “yawˇ hui kuˬ hkawˇ htaꞈ yawˇ na yuˬ leh ponˬ piˇ ve yoˬ.” (Chiˇ mvuh ve 145:18, 19) Gʼuˇ suhˍ peuˍ ve Hkiˆtinˇ 29 hkʼawꞈ gaˬ˗oˬ ve teˇ gʼaˇ yawˇ awˬ lawn chi hkʼe ve gʼa hpuˇ ve yoˬ. Yawˇ maˇ dawˇ maˇ gaˇ ve hkʼaw naˬ jaˇ ve yoˬ. Chi ve htaꞈ pa taw, yawˇ dawˇ maˇ jaˇ ve yoˬ. Chi hkʼe ceh tiˉ maˇ heˆ. Peuˬ hkʼawꞈ nawˉ yawˇ ve awˬ e kaꞈ naˬ jaˇ ve yoˬ. Yawˇ kʼoˆ ve, “ngaˬ Yaˬhoˉvaˬ geh bon leuˉ leh lawˬ ve yoˬ. Ngaˬ teˇ nyi leh teˇ nyi yeunˇ hkanˍ gʼaˇ tuˬ Yaˬhoˉvaˬ ga laˇ tuˬ kaꞈ lawˬ ve yoˬ. Ngaˬ hpawnˬ daꞈ˗e ve kʼai gʼa tuˬ leh a shu yawˇ hkʼaˇ yawˇ Liꞈ hpu henˇ ve hkʼaˬ htaˆ kaꞈ te gʼa tuˬ coˇ caˇ ve yoˬ.” Yawˇ kʼawꞈ kʼoˆ ve, “bon lawˬ ve lehˬ ngaˬ dawˇ maˇ tawˆ ve awˬ yanˇ htaꞈ yeunˇ hkanˍ gʼaˇ tuˬ ga laˇ ve yoˬ. Yaˬhoˉvaˬ ngaˬ geh hkʼaˬ htaˆ kaꞈ chehˇ ve tehꞈ shiˍ ve yoˬ. Chi ngaˬ nyi ma sha jaˇ tuˬ te laˇ ve yoˬ. Yaˬhoˉvaˬ lehˬ ngaˬ naˬ chehˇ ve htaꞈ laꞈ haˉ maˇ na˗e tcuh laˇ ve htawˇ, yawˇ ngaˬ ve bon lawˬ hkawˇ htaꞈ hkʼawꞈ laˇ leh ngaˬ nyi ma gawˬ lehˍ cawˬ tuˬ ga laˇ ve yoˬ.” Leh “Gʼuiˬ sha htaꞈ yawˆ yan ve chaw teˇ hpaˍ lehˬ, beˬ ve lawˇ ve htaꞈ gʼa hpuˇ htaˇ, yawˇ hui htaꞈ hkʼaˬ hkʼe te ponˬ piˇ tuˬ, Jawˇ mawˇ Gʼuiˬ sha shiˍ taˍ ve yoˬ” tehꞈ hkʼaˬ htaˆ kaꞈ ngaˬ hui tawnˇ taˍ sheˍ.—2 Peˍtruˆ 2:9.

16. Ngaˬ hui beˬ ve lawˇ ve htaꞈ yeunˇ hkanˍ gʼaˇ tuˬ aˬ htoꞈ ma te Yaˬhoˉvaˬ ga laˇ tuˬ lawˬ cawˇ ve le?

¹⁶ Beˬ ve lawˇ ve htaꞈ yeunˇ hkanˍ gʼaˇ tuˬ Yaˬhoˉvaˬ ga laˇ tcuh sheˍ. Ngaˬ hui lehˬ maˇ biˇ ve chaw hpehꞈ ve pa taw, maˇ gʼa te yaꞈ tuˬ hkʼaˬ htaˆ kaꞈ gʼa tawˍ daꞈ chehˇ ve yoˬ. Yaꞈ hkʼaˇ, chi hkʼe ceh tiˉ maˇ heˆ. Ngaˬ hui beˬ ve lawˇ ve htaꞈ maˇ tawˍ daꞈ gʼaˇ tuˬ, Saˍtanˍ awˬ hkʼaˇ laiˉ hkʼaˇ yehˇ ve  yoˬ. Saˍtanˍ yehˇ ve awˬ hkʼaˇ teˇ hkʼaˇ lehˬ, pyawˍ ve awˬ ceuˬ hpehꞈ ve yoˬ. Pyawˍ ve chi hkʼe ve lehˬ ngaˬ hui maˇ daꞈ ve dawˇ hkʼaˇ cawˬ tuˬ te laˇ ve yoˬ. Chi ve lehˬ ngaˬ hui Yaˬhoˉvaˬ mehˆ gʼuˇ suhˍ lo maˇ daꞈ kehˬ tuˬ te laˇ leh venˇ baˆ uiˍ jaˇ ve htaꞈ te yaꞈ tuˬ kaꞈ te laˇ ve yoˬ.—Maˍkuˆ 7:21-23; Yaˍkoˆ 1:14, 15.

17. Beˬ ve lawˇ ve htaꞈ ngaˬ hui gʼaˇ tuˬ bon lawˬ taˍ ve hkʼe, hkʼaˬ hkʼe gʼaꞈ cawˇ ve le? (Awˬ han htaꞈ nyi sheˍ.)

¹⁷ Beˬ ve lawˇ ve htaꞈ ngaˬ hui gʼaˇ tuˬ Yaˬhoˉvaˬ gʼa ga laˇ tcuh ve yoˬ. Yeˍsuˆ ve bon lawˬ hkawˇ hkʼaw awˬ laꞈ gʼawˇ awˬ lawn chi ve htaꞈ lawˬ tuˬ kaꞈ maˍ piˇ ve yoˬ. Yawˇ kʼoˆ ve, “venˇ baˆ beˬ ve awˬ hkʼaˇ suh ngaˬ hui htaꞈ taˇ kʼai piˇ. Yaꞈ hkʼaˇ, haiˬ ve awˬ hkʼaw lo ngaˬ hui htaꞈ ponˬ laˇ˗oˆ.” (Maꞈhtehˍ 6:13) Yaˬhoˉvaˬ ngaˬ hui htaꞈ ga laˇ gaˇ ve yoˬ. Leh ngaˬ hui kaꞈ bon lawˬ taˍ ve hkʼe gʼa gʼaꞈ te cawˇ ve yoˬ. Maˇ˗awˍ ve chaw dawˇ cawˇ ve awˬ lawn ngaˬ hui maˇ gʼaw leh maˇ na cawˇ ve yoˬ. (Chiˇ mvuh ve 97:10) Chi hkʼoˆ kaꞈ, ngaˬ hui daꞈ ve dawˇ hkʼaˇ cawˬ tuˬ gʼa te cawˇ ve yoˬ. Ngaˬ hui Liꞈ hpu gʼaw leh gʼa hpfuhˆ nyi cawˇ ve, gʼa hpawnˬ daꞈ˗e ve, leh hkʼaˬ htaˆ kaꞈ gʼa hto toˇ˗e cawˇ ve yoˬ. Ngaˬ hui chi hkʼe te ve kʼo, Yaˬhoˉvaˬ ka tiꞈ te taˍ laˇ ve ngaˬ hui hkanˍ maˇ gʼaˇ lawꞈ lawꞈ ve beˬ ve lawˇ ve htaꞈ yawˇ maˇ hpuˇ tcuh laˇ taˍ.—1 Kawˇrenˍhtuˆ 10:12, 13.

18. Bon lawˬ ve awˬ lawn htaꞈ ngaˬ hui teˇ gʼaˇ le le hkʼaˬ hkʼe te cawˇ ve le?

¹⁸ Tuꞈ ve hkanˍ ve awˬ leh meuˇ ve awˬ yanˇ hkʼaw ngaˬ hui teˇ gʼaˇ le le Yaˬhoˉvaˬ htaꞈ ka tiꞈ yeˬ gʼa tuˬ hkʼaˬ htaˆ kaꞈ bon gʼa lawˬ cawˇ ve yoˬ. Yaˬhoˉvaˬ geh nyi ma awˬ tawˍ hkʼa gaˬ hkʼaˬ htaˆ kaꞈ bon lawˬ tuˬ awˬ yanˇ shawˍ teh cawˇ ve yoˬ. Yawˇ ngaˬ hui htaꞈ “dawˇ haˍ tuˬ hkʼa peu˗eˬ yawˇ htaꞈ hto piˇ” tcuh gaˇ ve yoˬ. (Chiˇ mvuh ve 62:8) Yaˬhoˉvaˬ nawˬ awˬ pon te laˇ ve teˇ ceuˬ le le htaꞈ yawˇ htaꞈ chiˇ mvuh leh awˬ bon uiˍ jaˇ tehꞈ kʼoˆ piˇ cawˇ ve yoˬ. Nawˬ Gʼuiˬ sha ve kanˉ te ve hkʼaw haꞈ hanˉ ve cawˬ tuˬ, shoꞈ shaꞈ ve htaꞈ yeunˇ hkanˍ gʼaˇ tuˬ, leh nawˬ gʼa hpuˇ chehˇ ve beˬ ve lawˇ ve htaꞈ yeunˇ hkanˍ gʼaˇ tuˬ, Yaˬhoˉvaˬ ga laˇ tuˬ bon lawˬ sheˍ. Aˬ htoꞈ ma ve teˇ ceuˬ htawˇ maˇ kʼoˆ, nawˬ hkʼaˬ htaˆ kaꞈ bon maˇ gʼa lawˬ tuˬ taˇ te laˇ tcuh. Leh Yaˬhoˉvaˬ ngaˬ hui ve bon lawˬ hkawˇ htaꞈ hkʼaˬ hkʼe hkʼawꞈ laˇ ve le? Awˬ lawn chi htaꞈ caˉ daꞈ ve a yeˇ uiˍ ve gʼuˇ suhˍ teˇ lawn hkʼaw teˇ geh henˇ tuˬ yoˬ.