1-2. Bon lawˬ ve awˬ lawn htaꞈ ngaˬ hui aˬ htoꞈ ma te htawˇ dawˇ nawˬ dawˇ cawˬ ve le?

 Nawˬ ve bon lawˬ hkawˇ htaꞈ Yaˬhoˉvaˬ maˇ hkʼawꞈ laˇ hehˉ tehꞈ nawˬ htawˇ dawˇ nawˬ dawˇ cawˬ˗aw laˇ? Cawˬ jaw ve kʼo chi hkʼe dawˇ ve nawˬ teˇ gʼaˇ tiˉ maˇ heˆ. Ngaˬ hui ve awˬ viˉ awˬ nyi laiˉ gʼaˇ tuꞈ ve hkanˍ ve gʼa hpuˇ htaˇ, nawˬ hkʼa shuˍ dawˇ ve yoˬ. Ngaˬ hui shoꞈ shaꞈ ve gʼa hpuˇ jaˇ ve kʼo, Yaˬhoˉvaˬ ngaˬ hui ve bon lawˬ hkawˇ htaꞈ hkʼawꞈ laˇ tuˬ ve naˍ maˇ heˆ leh maˇ hkʼawꞈ laˇ tuˬ ve naˍ htawˇ dawˇ nawˬ dawˇ cawˬ ve yoˬ.

² Yaˬhoˉvaˬ yawˇ ve kanˉ te ve chaw ve bon lawˬ hkawˇ htaꞈ hkʼaˬ hkʼe hkʼawꞈ piˇ ve ngaˬ hui yonˍ gʼa tuˬ, teˇ geh nyi sheˍ. (1 Yoˇhanˬ 5:15) Chi hkʼoˆ kaꞈ, aˬ htoꞈ ma te teˇ pawˆ pawˆ kʼo Yaˬhoˉvaˬ ngaˬ hui ve bon lawˬ hkawˇ htaꞈ maˇ hkʼawꞈ laˇ ve le? Leh chi beuꞈ teˇ co˗e Yaˬhoˉvaˬ ngaˬ hui ve bon lawˬ hkawˇ htaꞈ hkʼaˬ hkʼe hkʼawꞈ laˇ ve kaꞈ teˇ geh henˇ tuˬ yoˬ.

3. Aˬ htoꞈ ma te Yaˬhoˉvaˬ lehˬ ngaˬ hui yawˇ geh bon lawˬ tcuh gaˇ ve le?

³ Yaˬhoˉvaˬ ngaˬ hui htaꞈ haꞈ jaˇ leh ngaˬ hui lehˬ, yawˇ awˬ pon awˬ hpfuhˇ hkʼaˆ jaˇ ve tehꞈ shawˍ ve, Liꞈ hpu hkʼaw ka tiꞈ te taˍ laˇ ve yoˬ. (Haˆgehˇ 2:7; 1 Yoˇhanˬ 4:10) Hkʼe te leh, ngaˬ hui yawˇ ga laˇ tuˬ yawˇ geh bon lawˬ tcuh gaˇ ve yoˬ. (1 Peˍtruˆ 5:6, 7) Chi hkʼoˆ kaꞈ, ngaˬ hui Yaˬhoˉvaˬ geh meuˆ daꞈ leh shoꞈ shaꞈ ve teˇ hpaˍ htaꞈ yeunˇ hkanˍ gʼaˇ tuˬ kaꞈ yawˇ ga laˇ gaˇ ve yoˬ.

4. Liꞈ hpu ve awˬ co˗e htaˇ Yaˬhoˉvaˬ yawˇ ve kanˉ te ve chaw ve bon lawˬ hkawˇ htaꞈ hkʼawꞈ piˇ ve ngaˬ hui hkʼaˬ hkʼe te shiˍ gʼa ve le? (Awˬ han htaꞈ nyi sheˍ.)

⁴ Liꞈ hpu hkʼaw ngaˬ hui gʼa gʼaw ve, Yaˬhoˉvaˬ lehˬ yawˇ ve kanˉ te ve chaw ve bon lawˬ hkawˇ htaꞈ hkʼawꞈ piˇ ve yoˬ. Jawˇ mawˇ Daˍviˆ a shaꞈ teꞈ chehˇ ve teˇ co˗e canˇ paˍ htaꞈ gʼa tawˍ daꞈ leh Yaˬhoˉvaˬ ga laˇ tuˬ hkʼaˬ htaˆ kaꞈ bon lawˬ ve nawˬ dawˇ mawˬ ve yoˬ. Teˇ pawˆ  htaˇ Daˍviˆ “Gʼuiˬ sha˗oˬ, ngaˬ ve bon lawˬ hkawˇ htaꞈ na leh, ngaˬ lawˬ hkawˉ ve awˬ hkawˇ htaꞈ a ciˉ na yuˬ laˇ˗oˆ. Nawˬ lehˬ ka tiꞈ yeˬ leh hteˇ jaˇ cawˇ jaˇ ve pa taw, ngaˬ htaꞈ a ciˉ kʼawꞈ yaw hkʼawꞈ laˇ˗oˆ” tehꞈ kʼoˆ ve yoˬ. (Chiˇ mvuh ve 143:1) Yaˬhoˉvaˬ Daˍviˆ ve bon lawˬ hkawˇ htaꞈ hkʼawꞈ piˇ ve lehˬ yawˇ htaꞈ ga ponˬ piˇ ve yoˬ. (1 Saˍmo˗eˍlaˆ 19:10, 18-20; 2 Saˍmo˗eˍlaˆ 5:17-25) Hkʼe te leh, Daˍviˆ yonˍ gʼa ve hkʼaw kʼoˆ ve, “[Yaˬhoˉvaˬ] htaꞈ kuˬ ve chaw hui awˬ paˇ lo yawˇ chehˇ taˍ ve yoˬ.” Ngaˬ hui kaꞈ Daˍviˆ hkʼa shuˍ yonˍ gʼa ve yoˬ.—Chiˇ mvuh ve 145:18.

5. Liꞈ hpu ve awˬ co˗e htaˇ Yaˬhoˉvaˬ ve kanˉ te ve chaw yawˇ hui bon lawˬ ve hkʼe teˇ pawˆ le le Yaˬhoˉvaˬ hkʼawꞈ piˇ˗aw laˇ? Tawˇ pa haˉ kʼoˆ maˍ laˇ sheˍ. (Awˬ han htaꞈ nyi sheˍ.)

⁵ Yaˬhoˉvaˬ lehˬ ngaˬ hui dawˇ taˍ ve hkʼe teˇ pawˆ le le ngaˬ hui ve bon lawˬ hkawˇ htaꞈ maˇ hkʼawꞈ laˇ? Pawˇluꞈ kaꞈ chi hkʼe gʼa hpuˇ jaw ve yoˬ. Yawˇ ve awˬ to hkʼaw ‘aˉ chuˇ teˇ maˬ ciˬ laˇ ve htaꞈ’ Yaˬhoˉvaˬ yuˬ baˬ laˇ tuˬ, yawˇ bon 3 pawˆ lawˬ ve yoˬ. Yaˬhoˉvaˬ Pawˇluꞈ ve bon lawˬ hkawˇ htaꞈ hkʼawꞈ piˇ˗aw laˇ? Hkʼawꞈ piˇ ve yoˬ. Yaꞈ hkʼaˇ, yawˇ dawˇ taˍ ve hkʼe hkʼawꞈ piˇ ve maˇ heˆ. Pawˇluꞈ shoꞈ shaꞈ ve maˇ gʼa hpuˇ tuˬ te piˇ cawˇ ve aꞈ kehˉ, Yaˬhoˉvaˬ lehˬ caˉ leh yawˇ htaꞈ ka tiꞈ yeˬ tuˬ ga piˇ ve yoˬ.—2 Kawˇrenˍhtuˆ 12:7-10.

6. Aˬ htoꞈ ma te teˇ pawˆ pawˆ kʼo, Yaˬhoˉvaˬ lehˬ ngaˬ hui ve bon lawˬ hkawˇ htaꞈ maˇ hkʼawꞈ laˇ ve le?

⁶ Teˇ pawˆ pawˆ kʼo, Yaˬhoˉvaˬ lehˬ ngaˬ hui ve bon lawˬ hkawˇ htaꞈ maˇ dawˇ maˇ gaˇ ve hkʼaw hkʼawꞈ laˇ ve yoˬ. Ngaˬ hui htaꞈ ga laˇ tuˬ hkʼaˬ ve teˇ hkʼaˇ daꞈ jaˇ ve htaꞈ yawˇ shiˍ ve tehꞈ ngaˬ hui yonˍ gʼa ve yoˬ. “Ngaˬ hui lawˬ ve leh dawˇ taˍ ve hkʼa peu˗eˬ aꞈ kehˉ” yawˇ te laˇ gʼa ve yoˬ. (Eˇfeˇsuꞈ 3:20) Chi htaꞈ pa taw, Yaˬhoˉvaˬ lehˬ ngaˬ hui bon lawˬ ve htaꞈ maˇ dawˇ maˇ gaˇ ve hkʼaw hkʼawꞈ laˇ ve yoˬ.

7. Aˬ htoꞈ ma te ngaˬ hui bon lawˬ ve hkʼaw teˇ ceuˬ ceuˬ pa cawˇ ve le? Tawˇ pa haˉ kʼoˆ maˍ laˇ sheˍ.

⁷ Yaˬhoˉvaˬ aˬ htoꞈ ma loˍ ve ngaˬ hui hkʼa dehꞈ shiˍ htaˇ, ngaˬ hui ve bon lawˬ hkawˇ hkʼaw yawˇ a loˍ cawˇ ve hkʼe gʼa lawˬ ve yoˬ. Awˬ viˉ awˬ nyi Ma˗tiˆ Hpi˗sin˗geuˇ ve awˬ lawn htaꞈ teˇ geh nyi sheˍ. Yawˇ awˬ miˇ ma heuˆ peuˬ hkʼawꞈ nawˉ maˇ maw Naˍziˬ ve htawnˍ hkʼaw lo yawˇ htaꞈ hpeh keu piˇ ve yoˬ. Yawˇ htaꞈ htawnˍ hkʼaw lo hpehˇ piˇ leh awˬ miˇ ma htaꞈ nyi haꞈ shaˉ leh teˇ pawˆ gʼa kʼawꞈ hto toˇ tuˬ Yaˬhoˉvaˬ geh bon lawˬ ve yoˬ. Yaꞈ hkʼaˇ, 2 shinˉ peuˬ hkʼawꞈ nawˉ yawˇ htawnˍ hkʼaw lo gʼa tawˆ˗e tuˬ Yaˬhoˉvaˬ ga laˇ tuˬ awˬ hkʼaˇ maˇ mawˬ. Hkʼe te leh, yawˇ Yaˬhoˉvaˬ geh bon lawˬ ve, “Yaˬhoˉvaˬ˗oˬ nawˬ ngaˬ htaꞈ aˬ htoꞈ ma te tcuh gaˇ ve a ciˉ kʼoˆ laˇ sheˍ.” Peuˬ leh htawnˍ hkʼaw lo chehˇ ve awˬ viˉ awˬ nyi aˬ htoꞈ ma gʼa hpuˇ ve htaꞈ yawˇ mawˬ ve yoˬ. Awˬ viˉ awˬ nyi laiˉ gʼaˇ yawˇ hui ve awˬ miˇ ma leh yaˇ htaꞈ dawˇ haˍ jaˇ ve yoˬ. Hkʼe te leh, awˬ viˉ awˬ nyi Ma˗tiˆ bon lawˬ ve, “Yaˬhoˉvaˬ˗oˬ nawˬ ngaˬ htaꞈ awˬ vuiˬ awˬ suhˉ kʼawꞈ peꞈ laˇ ve awˬ bon uiˍ jaˇ. Gʼuiˬ sha˗oˬ ngaˬ awˬ viˉ awˬ nyi awˬ gʼaˇ gʼa tuˬ ga piˇ leh yonˍ hkʼaˇ yonˍ yeˬ tuˬ ga piˇ gʼa tuˬ kaꞈ ngaˬ htaꞈ ga  laˇ sheˍ.” Ma˗tiˆ htawnˍ hkʼaw lo chehˇ ve 9 hkʼawꞈ ve awˬ yanˇ awˬ viˉ awˬ nyi htaꞈ ga piˇ ve yoˬ.

8. Ngaˬ hui bon lawˬ htaˇ a yeˇ uiˍ jaˇ ve teˇ ceuˬ gʼa tawnˇ taˍ cawˇ ve aˬ htoꞈ ma le?

⁸ Yaˬhoˉvaˬ ve a loˍ biˇ la tuˬ yawˇ tinˍ taˍ ve awˬ yanˇ gaˬ kʼo, awˬ tehˬ hpehꞈ la tuˬ yoˬ tehꞈ ngaˬ hui tawnˇ taˍ cawˇ ve yoˬ. Yawˇ te luˬ gaˇ jaˇ ve awˬ ceuˬ lehˬ, mvuhˇ yeˬ mvuhˇ haw lonˉ, naˬ ve gawˬ ve, leh suh ve chi ve teˇ hpaˍ yoˬ. Yaˬhoˉvaˬ yawˇ ve mvuhˇ miˬ htaꞈ cuˇ leh yawˇ ve a loˍ biˇ la tuˬ awˬ tehˬ te tuˬ yoˬ. (Daˍyeˍlaˆ 2:44; Hpeuꞈ maˍ ve 21:3, 4) Yaꞈ hkʼaˇ, oˇ ve teˇ yanˇ maˇ gaˬ sheˍ htaˇ, Yaˬhoˉvaˬ lehˬ miˬ guiˬ chi Saˍtanˍ htaꞈ uˉ peunˍ tcuh sheˍ ve yoˬ. b (Yoˇhanˬ 12:31; Hpeuꞈ maˍ ve 12:9) Yaˬhoˉvaˬ lehˬ chaw yaˇ gʼa hpuˇ chehˇ ve shoꞈ shaꞈ ve hkʼa peu˗eˬ htaꞈ chi teˇ hkui kaꞈ gu laˇ ve kʼo, Saˍtanˍ uˉ peunˍ ve daꞈ jaˇ ve htaꞈ shuˍ ve yoˬ. Chi htaꞈ pa taw, Yaˬhoˉvaˬ ka tiꞈ te taˍ ve awˬ tehˬ hpehꞈ la tuˬ ngaˬ hui gʼa law cawˇ ve yoˬ. Ngaˬ hui law chehˇ ve awˬ yanˇ htaˇ yawˇ ngaˬ hui htaꞈ nyi haꞈ shaˉ laˇ ve yoˬ. Yaˬhoˉvaˬ ngaˬ hui htaꞈ hkʼaˬ hkʼe nyi haꞈ shaˉ laˇ ve teˇ geh nyi sheˍ.

9. Ngaˬ hui a yeˇ uiˍ ve awˬ lawn dawˇ cheˆ htaˇ, Yaˬhoˉvaˬ hkʼaˬ hkʼe ga laˇ ve le? Tawˇ pa haˉ kʼoˆ maˍ laˇ sheˍ.

⁹ Yaˬhoˉvaˬ ngaˬ hui htaꞈ cuˇ yiˍ peꞈ laˇ ve. Ngaˬ hui cawˇ ve hkʼaw dawˇ cheˆ gʼa tuˬ Yaˬhoˉvaˬ cuˇ yiˍ peꞈ laˇ tuˬ yoˬ tehꞈ ka tiꞈ te taˍ laˇ ve yoˬ. Ngaˬ hui heuˆ daꞈ tuˬ maˇ heˆ leh maˇ heuˆ daꞈ tuˬ a yeˇ uiˍ ve awˬ lawn dawˇ cheˆ htaˇ, Yaˬhoˉvaˬ geh cuˇ yiˍ gʼa lawˬ cawˇ ve yoˬ. (Yaˍkoˆ 1:5) Awˬ viˉ awˬ nyi yaˇ miˇ Maˍriˆ meh ve awˬ lawn htaꞈ teˇ geh nyi sheˍ. c Maˍriˆ hkʼaˬ htaˆ kaꞈ gʼuˇ suhˍ peuˍ ve te htaˇ ha lehˬ jaˇ. Yawˇ awˬ viˉ awˬ nyi hawˉ hkʼaˆ teˇ gʼaˇ geh tawˇ tanˬ yaw daꞈ ve yoˬ. Yawˇ kʼoˆ ve, “awˉ lawˉ htaˇ, ngaˬ hui awˬ chehˇ ceh te daꞈ ve yoˬ. Yaꞈ hkʼaˇ, ngaˬ hui leuˉ leh meuˆ daꞈ la htaˇ, ngaˬ hui ve dawˇ hkʼaˇ kaꞈ pa kʼai ve yoˬ. Awˬ lawn chi gʼa dawˇ cheˆ cawˇ ve tehꞈ ngaˬ shiˍ ve yoˬ. Ngaˬ hkʼaˬ hkʼe te tuˬ Yaˬhoˉvaˬ beˆ maˍ laˇ tcuh gaˇ ve pa taw, ngaˬ leuˉ leh yawˇ geh bon lawˬ ve yoˬ. Yaˬhoˉvaˬ ngaˬ awˬ tan maˇ dawˇ cheˆ laˇ taˬ tehꞈ ngaˬ shiˍ ve yoˬ.” Yawˇ Yaˬhoˉvaˬ geh cuˇ yiˍ gʼa tuˬ lawˬ taˍ ve hkʼe hkʼawꞈ laˇ ve tehꞈ yonˍ ve yoˬ. Aˬ htoꞈ ma te yawˇ chi hkʼe yonˍ ve le? Awˬ lawn kʼo, yawˇ Gʼuiˬ sha ve kanˉ hkʼaˇ hkʼaw ve liꞈ kʼoˆ htaꞈ hpfuhˆ nyi htaˇ, awˬ lawn chi htaꞈ kʼoˆ taˍ ve laiˉ lawn htaꞈ yawˇ mawˬ ve yoˬ. Chi hkʼoˆ kaꞈ, Maˍriˆ yawˇ ve awˬ e ka tiꞈ yeˬ ve Shaˉhkiˆhkanˍ ve chaw hpehꞈ ve pa taw awˬ e htaꞈ kʼoˆ maˍ piˇ ve yoˬ. Leh awˬ e kaꞈ yawˇ htaꞈ daꞈ ve hpawˇ beˆ maˍ piˇ ve yoˬ. Beˆ maˍ piˇ hkawˇ chi htaꞈ Maˍriˆ hkʼa dehꞈ dawˇ nyi tuˬ te piˇ ve yoˬ. Leh peuˬ hkʼawꞈ nawˉ yawˇ kaꞈ cuˇ yiˍ cawˬ ve hkʼaw dawˇ cheˆ gʼa ve yoˬ.

10. Hpiˇliˇpiˆ liꞈ 4:13 hkʼaw kʼoˆ taˍ ve hkʼe, Yaˬhoˉvaˬ lehˬ yawˇ ve kanˉ te ve chaw htaꞈ hkʼaˬ hkʼe ga piˇ ve le? Tawˇ pa haˉ kʼoˆ maˍ laˇ sheˍ. (Awˬ han htaꞈ nyi sheˍ.)

¹⁰ Yaˬhoˉvaˬ lehˬ yeunˇ hkanˍ gʼaˇ tuˬ awˬ gʼaˇ peꞈ laˇ ve. Yaˬhoˉvaˬ Pawˇluꞈ htaꞈ awˬ gʼaˇ piˇ jaw˗oˬ ve hkʼa shuˍ, ngaˬ hui kaꞈ tuꞈ ve hkanˍ ve htaꞈ yeunˇ hkanˍ gʼaˇ tuˬ Yaˬhoˉvaˬ awˬ gʼaˇ peꞈ laˇ tuˬ yoˬ. (Hpiˇliˇpiˆ 4:13 gʼaw sheˍ.) Awˬ viˉ awˬ nyi Beˍyaˍmenˍ tuꞈ ve hkanˍ ve htaꞈ yeunˇ hkanˍ gʼaˇ tuˬ Yaˬhoˉvaˬ hkʼaˬ  hkʼe ga piˇ ve htaꞈ teˇ geh nyi sheˍ. Beˍyaˍmenˍ yaˇ ehˉ htaˇ yawˇ ve yehˬ kʼa geh Aˍfaˍriˆkaˆ miˬ guiˬ chaw hpaw hkʼoˇ chehˇ kuiˬ lo chehˇ ve yoˬ. Yawˇ kʼoˆ ve, “ngaˬ Yaˬhoˉvaˬ geh bon teˇ hkui teˇ hkui lawˬ ve yoˬ. Ngaˬ Yaˬhoˉvaˬ ve a loˍ htaꞈ te gʼa tuˬ yawˇ ga laˇ tuˬ kaꞈ bon lawˬ ve yoˬ. Peuˬ hkʼawꞈ nawˉ, Yaˬhoˉvaˬ ngaˬ ve bon lawˬ hkawˇ htaꞈ hkʼawꞈ laˇ ve yoˬ. Ngaˬ nyi ma gawˬ lehˍ cawˬ leh haꞈ hanˉ ve hkʼaw caˉ leh hto toˇ gʼa tuˬ yawˇ ga laˇ ve yoˬ. Yawˇ geh hkʼaˬ htaˆ kaꞈ meuˆ daꞈ gʼa tuˬ yawˇ ve kanˉ hkʼaˇ hkʼaw ve liꞈ cawˬ tcuh laˇ ve yoˬ.” Beˍyaˍmenˍ kʼawꞈ kʼoˆ ve, “awˬ viˉ awˬ nyi hpehꞈ laˬ jaw ve awˬ lawn gʼaw leh Yaˬhoˉvaˬ yawˇ hui htaꞈ ga piˇ leh hkʼaˬ hkʼe yeunˇ hkanˍ gʼaˇ ve shiˍ htaˇ, ngaˬ Yaˬhoˉvaˬ htaꞈ hkʼaˬ htaˆ kaꞈ ka tiꞈ yeˬ tuˬ ga laˇ ve yoˬ.”

11-12. Yaˬhoˉvaˬ awˬ viˉ awˬ nyi htaꞈ cuˇ leh ngaˬ hui ve bon lawˬ hkawˇ htaꞈ hkʼaˬ hkʼe hkʼawꞈ laˇ ve le? (Awˬ han htaꞈ nyi sheˍ.)

¹¹ Yaˬhoˉvaˬ awˬ viˉ awˬ nyi htaꞈ cuˇ leh ngaˬ hui htaꞈ ga laˇ tcuh ve. Yeˍsuˆ miˬ guiˬ hkʼoˆ chehˇ ve awˬ leh meuˇ teˇ haˉ htaˇ, yawˇ bon laiˉ pawˆ lawˬ ve yoˬ. Yawˇ htaꞈ pa taw Yaˬhoˉvaˬ htaꞈ maˇ gʼa nyi chaˬ tuˬ bon lawˬ ve yoˬ. Yaꞈ hkʼaˇ, Yeˍsuˆ lawˬ ve hkʼe Yaˬhoˉvaˬ ga piˇ cawˇ ve htawˇ, Yeˍsuˆ htaꞈ ga piˇ tuˬ Yaˬhoˉvaˬ mvuhˇ naw ma tcuh yaˇ htaꞈ kʼai tcuh leh Yeˍsuˆ htaꞈ awˬ gʼaˇ piˇ tcuh ve yoˬ. (Luˉkaꞈ 22:42, 43) Chi ve hkʼa shuˍ Yaˬhoˉvaˬ kaꞈ ngaˬ hui htaꞈ ga laˇ ve yoˬ. Yaˬhoˉvaˬ awˬ viˉ awˬ nyi htaꞈ cuˇ leh ngaˬ hui geh awˬ hkʼeun hkʼaw te laˬ tcuh ve, awˬ gʼaˇ peꞈ laˇ ve, maˇ heˆ leh aˉ hkʼaw ca guiˇ la tcuh ve yoˬ. Ngaˬ hui teˇ gʼaˇ le le awˬ yanˇ ca leh “na sha ve tawˇ” yaw ve hkʼaw awˬ gʼaˇ piˇ daꞈ gʼa ve yoˬ.—Tawˇ naˉ ve 12:25.

¹² Awˬ viˉ awˬ nyi yaˇ miˇ Meˇriˆanˍ ve awˬ lawn htaꞈ teˇ geh nyi sheˍ. Yawˇ awˬ hpawˇ suh peuˬ hkʼawꞈ nawˉ hkʼaˬ nyiˇ shinˉ maˇ gaˬ sheˍ htaˇ, yawˇ teˇ gʼaˇ tiˉ aˉ hkʼaw lo chehˇ ve pa taw, nyi ma luˬ jaˇ leh dawˇ maˇ jaˇ ve yoˬ. Yawˇ gʼaˇ hteꞈ hawˬ leh teˇ gʼaˇ gʼaˇ geh tawˇ yaw daꞈ gaˇ ve yoˬ. Yawˇ kʼoˆ ve, “ngaˬ awˬ hkʼeun hkʼaw teˇ gʼaˇ˗ehꞈ geh kaꞈ te kʼai maˇ haˆ ve yoˬ. Hkʼe te leh, ngaˬ Yaˬhoˉvaˬ geh bon lawˬ ve yoˬ. Ngaˬ hawˬ leh bon lawˬ htaˇ, ngaˬ meuˆ daꞈ jaˇ ve nyi haꞈ shaˉ paˍ teˇ gʼaˇ awˬ hkʼeun hkʼaw te laˬ ve yoˬ.” Meˇriˆanˍ lehˬ nyi haꞈ shaˉ paˍ leh yawˇ ve awˬ miˇ ma geh awˬ gʼaˇ gʼa ve yoˬ. Yaˬhoˉvaˬ nyi haꞈ shaˉ paˍ htaꞈ cuˇ leh awˬ hkʼeun hkʼaw yawˇ geh te laˬ tcuh ve tehꞈ yawˇ yonˍ gʼa ve yoˬ.

13. Yaˬhoˉvaˬ yawˇ htaꞈ oˉ kʼoˍ maˇ pui ve chaw htaꞈ cuˇ leh ngaˬ hui ve bon lawˬ hkawˇ htaꞈ hkʼaˬ hkʼe hkʼawꞈ laˇ tcuh ve le? Tawˇ pa haˉ kʼoˆ maˍ laˇ sheˍ.

¹³ Yaˬhoˉvaˬ yawˇ htaꞈ oˉ kʼoˍ maˇ pui ve chaw htaꞈ cuˇ leh ngaˬ hui htaꞈ ga laˇ tcuh ve. (Tawˇ naˉ ve 21:1) Teˇ pawˆ pawˆ kʼo, Yaˬhoˉvaˬ yawˇ ve kanˉ te ve  chaw ve bon lawˬ hkawˇ htaꞈ hkʼawꞈ piˇ tuˬ yawˇ htaꞈ oˉ kʼoˍ maˇ pui ve chaw htaꞈ cuˇ ve yoˬ. Tawˇ pa haˉ te kʼo, Neˍhaˍmiˆ Yeˍruˆsaˍlehnˍ venˇ lo kʼoꞈ˗e leh bon yehˬ lonˉ kʼawꞈ gu te tuˬ, Neˍhaˍmiˆ lawˬ ve hkʼe jawˇ mawˇ Aˍtaˍyeˍziˆ gʼaꞈ te tuˬ Yaˬhoˉvaˬ ga piˇ ve yoˬ. (Neˍhaˍmiˆ 2:3-6) Chi beuꞈ teˇ co˗e kaꞈ ngaˬ hui loˍ htaˇ, Yaˬhoˉvaˬ htaꞈ oˉ kʼoˍ maˇ pui ve chaw htaꞈ cuˇ leh ngaˬ hui htaꞈ ga laˇ tcuh ve yoˬ.

14. Awˬ viˉ awˬ nyi Sho˗Hin ve awˬ lawn nawˬ htaꞈ awˬ gʼaˇ hkʼaˬ hkʼe peꞈ laˇ ve le? (Awˬ han htaꞈ nyi sheˍ.)

¹⁴ Awˬ viˉ awˬ nyi Sho˗Hin Yaˬhoˉvaˬ lehˬ saˍ laꞈ gʼonˍ htaꞈ cuˇ leh yawˇ htaꞈ ga laˇ ve tehꞈ shiˍ ve yoˬ. Yawˇ ve yaˇ paˍ yaˇ ehˉ htaˇ kaꞈ nyi ma shiˍ hpawˇ a naˍ laiˉ ceuˬ cawˬ ve yoˬ. Peuˬ hkʼawꞈ nawˉ yawˇ ve yaˇ paˍ maˇ dawˇ maˇ gaˇ ve hkʼaw shoꞈ shaꞈ ve gʼa hpuˇ jaˇ leh yawˇ hui ve yaˇ htaꞈ nyi haꞈ shaˉ tuˬ kanˉ te kuiˬ lo gʼa tawˆ la ve yoˬ. Chi htaꞈ pa taw, yawˇ ve yehˬ kʼa hkʼaw hpu yehˇ maˇ lawꞈ. Oˇ ve teˇ yanˇ Sho˗Hin yeunˇ hkanˍ maˇ˗o tehꞈ dawˇ ve yoˬ. Yawˇ awˬ to lehˬ tcuhˉ kʼehꞈ gʼawˬ kiˇ jaˇ leh cheˆ la yoˬ te chehˇ ve htaꞈ shuˍ ve yoˬ. Yawˇ nyi ma hkʼaw cawˬ ve awˬ ceuˬ bon lawˬ ve hkʼaw Yaˬhoˉvaˬ htaꞈ kʼoˆ maˍ piˇ leh yawˇ ga laˇ tuˬ kaꞈ lawˬ ve yoˬ. Yawˇ saˍ laꞈ gʼonˍ htaꞈ kʼoˆ maˍ piˇ htaˇ, saˍlaꞈ gʼonˍ kaꞈ yawˇ ve yehˬ kʼa htaꞈ ga piˇ tuˬ awˬ hkʼaˇ ca leh mvuhˇ miˬ kanˉ te paˍ htaꞈ kʼoˆ piˇ ve pa taw, mvuhˇ miˬ kanˉ te paˍ kaꞈ yawˇ ve yehˬ kʼa htaꞈ ga piˇ leh chehˇ kuiˬ cawˬ ve yoˬ. Sho˗Hin kʼoˆ ve, “Yaˬhoˉvaˬ ngaˬ hui htaꞈ ga laˇ ve yoˬ. Chi ve lehˬ, yawˇ ngaˬ hui ve ‘bon lawˬ hkawˇ htaꞈ na laˇ ve’ tehꞈ shiˍ ve yoˬ.” —Chiˇ mvuh ve 65:2.

15. Awˬ viˉ awˬ nyi yaˇ miˇ teˇ gʼaˇ Yaˬhoˉvaˬ yawˇ ve bon lawˬ hkawˇ htaꞈ hkʼawꞈ laˇ ve tehꞈ shiˍ tuˬ aˬ htoꞈ ma ga piˇ ve le?

¹⁵ Maˇ˗awˍ ve kʼo Yaˬhoˉvaˬ ngaˬ hui ve bon lawˬ hkawˇ htaꞈ laꞈ haˆ maˇ hkʼawꞈ laˇ ve yoˬ. Yaꞈ hkʼaˇ, ngaˬ hui yawˇ htaꞈ ka tiꞈ yeˬ gʼa tuˬ ngaˬ hui loˍ jaˇ ve awˬ yanˇ htaˇ yawˇ hkʼawꞈ laˇ ve yoˬ. Chi lehˬ Yaˬhoˉvaˬ hkʼawꞈ laˇ ve tehꞈ ngaˬ hui gʼa shiˍ cawˇ ve yoˬ. Awˬ viˉ awˬ nyi yaˇ miˇ Yo˗koꞈ Yaˬhoˉvaˬ yawˇ ve bon lawˬ hkawˇ htaꞈ maˇ hkʼawꞈ laˇ ve tehꞈ dawˇ ve yoˬ. Hkʼe te leh, yawˇ Yaˬhoˉvaˬ geh bon lawˬ taˍ ve awˬ lawn liꞈ kʼoˆ hkʼaw bvuhꞈ keu ve yoˬ. Ponˬ kʼai ve awˬ yanˇ liꞈ kʼoˆ hkʼaw yawˇ bvuhꞈ keu taˍ ve htaꞈ kʼawꞈ hpeuꞈ nyi ve yoˬ. Yaˬhoˉvaˬ yawˇ ve bon lawˬ hkawˇ maˇ˗awˍ ve hkʼawꞈ laˇ˗oˬ ve htaꞈ gʼa mawˬ ve yoˬ. Yawˇ bon lawˬ ve awˬ lawn teˇ lawn lawn leunˇ˗oˬ ve htawˇ, Yaˬhoˉvaˬ hkʼawꞈ laˇ sheˍ ve yoˬ. Chi htaꞈ pa taw, Yaˬhoˉvaˬ ngaˬ hui ve bon lawˬ hkawˇ htaꞈ hkʼaˬ hkʼe hkʼawꞈ laˇ˗oˬ ve teˇ hkui teˇ hkui dawˇ nyi sheˍ.—Chiˇ mvuh ve 66:19, 20.

16. Bon lawˬ ve awˬ lawn ngaˬ hui yonˍ ve tehꞈ hkʼaˬ hkʼe hpeuꞈ maw piˇ cawˇ ve le? (Heˍbrehˇ 11:6)

¹⁶ Ngaˬ hui Yaˬhoˉvaˬ geh bon lawˬ ve ceh tiˉ maˇ heˆ. Ngaˬ hui yonˍ ve tehꞈ gʼa hpeuꞈ maw piˇ cawˇ ve yoˬ. Yaꞈ hkʼaˇ, yawˇ ngaˬ hui ve bon lawˬ  hkawˇ htaꞈ hkʼawꞈ laˇ htaˇ, yawˇ loˍ ve hkʼe ngaˬ hui gʼaꞈ te ve tehꞈ gʼa hpeuꞈ maw piˇ cawˇ ve yoˬ. (Heˍbrehˇ 11:6 gʼaw sheˍ.) Maiˉ leh yawˇ ve awˬ miˇ ma Hkiˆsheˇ ve awˬ lawn htaꞈ teˇ geh nyi sheˍ. Yawˇ huiˉ maˬ Beˍteˍlaˆ hkʼaw kanˉ te gaˇ jaˇ. Maiˉ kʼoˆ ve, “ngaˬ hui Beˍteˍlaˆ hkʼaw kanˉ gʼa te tuˬ liꞈ laiˉ pawˆ bvuhꞈ feu piˇ leh Yaˬhoˉvaˬ geh bon laiˉ pawˆ lawˬ ve yoˬ. Yaꞈ hkʼaˇ, ngaˬ hui Beˍteˍlaˆ hkʼaw kanˉ maˇ gʼa te sheˍ.” Chi hkʼe hpehꞈ ve htawˇ, yawˇ hui Yaˬhoˉvaˬ ve kanˉ hkʼaˬ hkʼe ve htaꞈ te cawˇ ve yawˇ hkʼa dehꞈ shiˍ ve tehꞈ yawˇ hui yonˍ gʼa ve yoˬ. Hkʼe te leh, yawˇ hui Gʼuiˬ sha ve kanˉ te gʼa ve hkʼe hkʼa dehꞈ te ve yoˬ. Yawˇ hui hkʼaˬ htaˆ kaꞈ gʼuˇ suhˍ peuˍ ve te leh hto toˇ ve chaw loˍ jaˇ kuiˬ lo Gʼuiˬ sha ve kanˉ te ve yoˬ. Leh Gʼuiˬ sha ve kanˉ yehˬ te ve hpawˇ kaꞈ ga piˇ ve yoˬ. Chi teˇ hkui yawˇ huiˉ maˬ toˇ nyi shehˍ hpaˇ te ve yoˬ. Maiˉ kʼoˆ ve, “ngaˬ hui bon lawˬ taˍ ve hkʼe teˇ pawˆ le le Yaˬhoˉvaˬ maˇ hkʼawꞈ laˇ ve yoˬ. Yaꞈ hkʼaˇ, ngaˬ hui dawˇ taˍ ve aꞈ kehˉ hkʼawꞈ laˇ sheˍ ve yoˬ.”

17-18. Chiˇ mvuh ve liꞈ 86:6, 7 hkʼaw kʼoˆ taˍ ve hkʼe, ngaˬ hui aˬ htoꞈ ma ve awˬ lawn htaꞈ yonˍ gʼa ve le?

¹⁷ Chiˇ mvuh ve liꞈ 86:6, 7 gʼaw sheˍ. Chiˇ mvuh ve liꞈ bvuhꞈ paˍ Daˍviˆ yonˍ ve Yaˬhoˉvaˬ lehˬ yawˇ ve bon lawˬ hkawˇ htaꞈ na leh hkʼawꞈ laˇ ve yoˬ. Nawˬ kaꞈ yawˇ hkʼa shuˍ yonˍ gʼa ve yoˬ. Awˬ lawn chi ve hkʼaw ngaˬ hui yonˍ gʼa ve laiˉ lawn cawˬ ve lehˬ, cuˇ yiˍ cawˬ leh yeunˇ hkanˍ gʼaˇ tuˬ Yaˬhoˉvaˬ awˬ gʼaˇ peꞈ laˇ ve yoˬ. Yaˬhoˉvaˬ lehˬ awˬ viˉ awˬ nyi htaꞈ cuˇ ve, maˇ heˆ leh yawˇ htaꞈ oˉ kʼoˍ maˇ pui sheˍ ve chaw htaꞈ cuˇ leh ngaˬ hui htaꞈ ga laˇ kaꞈ gʼa ve yoˬ.

¹⁸ Ngaˬ hui bon lawˬ taˍ ve hkʼe Yaˬhoˉvaˬ teˇ pawˆ le le maˇ hkʼawꞈ laˇ ve htawˇ, yawˇ awˬ tehˬ hkʼawꞈ laˇ tuˬ yoˬ tehꞈ ngaˬ hui yonˍ ve yoˬ. Ngaˬ hui loˍ ve awˬ yanˇ htaˇ yawˇ ga laˇ tuˬ yoˬ. Chi htaꞈ pa taw, nawˬ hkʼaˬ htaˆ kaꞈ bon lawˬ leh yawˇ hkʼawꞈ laˇ tuˬ yoˬ tehꞈ nawˬ yonˍ gʼa ve yoˬ. Chi teˇ hkui Yaˬhoˉvaˬ nawˬ htaꞈ a yeˇ yuˬ leh dawˇ haˍ ve tehꞈ yonˍ gʼa ve yoˬ. Gʼuiˬ sha lehˬ miˬ guiˬ awˬ suhˉ hkʼaw teˇ gʼaˇ le le “nyi hkʼaˇ suh htaˇ hkʼa gaˬ” piˇ tuˬ yoˬ.—Chiˇ mvuh ve 145:16.