1. Liꞈ hpu hkʼaw awˬ tehˬ haꞈ daꞈ ve htaꞈ hkʼaˬ hkʼe kʼoˆ taˍ ve le?

 Liꞈ hpu hkʼaw kʼoˆ ve, ‘haꞈ ve teˇ ceuˬ lehˬ, Yaˬhoˉvaˬ ve aˬ miˍ toꞈ tawˆ la chehˇ ve htaꞈ shuˍ ve yoˬ. Iˉ kaˆ hkʼaˬ ma nyiˉ pfuhˍ ve kaꞈ suh˗e tuˬ ve maˇ heˆ.’ b (Sawˉlaꞈmonˍ ve kʼa muiˬ hkawˇ 8:6, 7) Chi ve lehˬ awˬ tehˬ haꞈ ve tehꞈ kʼoˆ gʼa ve yoˬ. Heuˆ daꞈ˗oˬ ve chaw awˬ pon kʼo, teˇ gʼaˇ leh teˇ gʼaˇ awˬ tehˬ haꞈ ve co co taiˍ taiˍ yeˬ gʼa ve tehꞈ awˬ lawn chi ve nawˬ yonˍ gʼa tuˬ te laˇ ve yoˬ.

2. Awˬ hpawˇ awˬ miˇ ma hkʼaˬ htaˆ kaꞈ haꞈ daꞈ tuˬ hkʼaˬ hkʼe te gʼa ve le?

² Awˬ hpawˇ awˬ miˇ ma hkʼaˬ htaˆ kaꞈ haꞈ daꞈ tuˬ yawˇ huiˉ maˬ htaꞈ cawˬ ve yoˬ. Awˬ lawn chi ve htaꞈ dawˇ nyi sheˍ. Ngaˬ hui aˬ miˍ ceh htaˇ suhˆ hteh awˬ meu˗eˇ awˬ meu˗eˇ gʼawˆ keu ve kʼo, aˬ miˍ hkʼaˬ htaˆ kaꞈ toꞈ chehˇ tuˬ yoˬ. Yaꞈ hkʼaˇ, ngaˬ hui chi hkʼe maˇ te ve kʼo, aˬ miˍ suh˗e tuˬ yoˬ. Chi ve hkʼa shuˍ shuˍ, awˬ hpawˇ awˬ miˇ ma teˇ gʼaˇ leh teˇ gʼaˇ hkʼaˬ htaˆ kaꞈ haꞈ daꞈ gʼa tuˬ, yawˇ hui a yeˇ gʼa yuˬ daꞈ leh haꞈ daꞈ ve tehꞈ gʼa te tawˆ la tcuh ve yoˬ. Yaꞈ hkʼaˇ, awˬ hpawˇ awˬ miˇ ma teˇ pawˆ pawˆ kʼo, shoꞈ shaꞈ ve awˬ lawn gʼa hpuˇ jaˇ leh yawˇ hui hkʼa dehꞈ maˇ haꞈ daꞈ ve yoˬ hehˉ. Tawˇ pa haˉ te kʼo, hpu maˇ yehˇ lawꞈ ve, maˇ chehˇ sha ve, maˇ heˆ leh yaˇ htaꞈ maˍ piˇ tuˬ awˬ hkʼaˇ kaꞈ dawˇ haˍ ve yoˬ. Nawˬ heuˆ daꞈ˗oˬ ve kʼo, nawˬ ve awˬ ca geh ‘Yaˬhoˉvaˬ ve aˬ miˍ hkʼaˬ htaˆ kaꞈ toꞈ tawˆ la” tuˬ hkʼaˬ hkʼe gʼa te ve le? Awˬ hpawˇ awˬ miˇ ma hkʼa dehꞈ haꞈ daꞈ leh yawˇ hui ha lehˬ gʼa tuˬ ga laˇ gʼa ve awˬ lawn chi ve hkʼaw teˇ geh henˇ tuˬ yoˬ. c

3. Yaˬhoˉvaˬ geh meuˆ daꞈ ve lehˬ awˬ hpawˇ awˬ miˇ ma haꞈ daꞈ tuˬ hkʼaˬ hkʼe ga laˇ gʼa ve le? (Cuˇ yiˍ piˇ ve 4:12) (Awˬ han htaꞈ nyi sheˍ.)

³ ‘Yaˬhoˉvaˬ ve aˬ miˍ’ awˬ hpawˇ awˬ miˇ ma geh hkʼaˬ htaˆ kaꞈ toꞈ chehˇ tcuh tuˬ yawˇ geh gʼa meuˆ daꞈ ve yoˬ. Yaˬhoˉvaˬ geh meuˆ daꞈ ve lehˬ awˬ ca htaꞈ hkʼaˬ hkʼe ga laˇ gʼa ve le? Awˬ hpawˇ awˬ miˇ ma Yaˬhoˉvaˬ geh meuˆ daꞈ ve lehˬ, yawˇ hui a shaꞈ teꞈ kuiˬ hkʼaw a yeˇ uiˍ jaˇ ve tehꞈ shawˍ ve kʼo, yawˇ hui kaꞈ yawˇ beˆ maˍ laˇ ve awˬ liˇ awˬ hkʼaˇ htaꞈ yuˬ yehˇ ve yoˬ. Chi ve lehˬ yawˇ hui hkʼaˬ htaˆ kaꞈ haꞈ daꞈ tuˬ ga piˇ ve yoˬ. Maˇ heˆ leh yawˇ hui shoꞈ shaꞈ ve awˬ lawn gʼa hpuˇ ve kʼo, gu gʼa tuˬ kaꞈ ga piˇ ve yoˬ. (Cuˇ yiˍ piˇ ve 4:12 gʼaw sheˍ.) Chi hkʼoˆ kaꞈ, Yaˬhoˉvaˬ geh meuˆ daꞈ ve chaw lehˬ, Yaˬhoˉvaˬ htaꞈ henˇ yuˬ leh yawˇ hkʼe ve te hkʼaˇ dawˇ hkʼaˇ cawˬ tuˬ coˇ coˇ leh hpeuꞈ maw piˇ ve yoˬ. Tawˇ pa haˉ te kʼo, haꞈ daꞈ ve, yeunˇ hkanˍ daꞈ ve, leh venˇ baˆ hpehˇ daꞈ ve yoˬ. (Eˇfeˇsuꞈ 4:32–5:1) Awˬ hpawˇ awˬ miˇ ma te hkʼaˇ dawˇ hkʼaˇ chi ve teˇ hpaˍ hpeuꞈ maw daꞈ ve kʼo, yawˇ hui hkʼa dehꞈ haꞈ daꞈ tuˬ sha ve yoˬ. Awˬ viˉ awˬ nyi yaˇ miˇ Len˗naiˇ yawˇ heuˆ daꞈ ve 25 hkʼawꞈ hpaˆ gaˬ˗oˬ ve kʼoˆ ve, “Yaˬhoˉvaˬ htaꞈ meuˆ daꞈ ve chaw geh haꞈ daꞈ leh yawˆ yan daꞈ tuˬ sha ve yoˬ.”

4. Aˬ htoꞈ ma te Yaˬhoˉvaˬ lehˬ Yoˇsehꞈ leh Maˍriˆ htaꞈ leuˆ yuˬ leh Yeˍsuˆ ve awˬ pa awˬ e hpehꞈ tcuh ve le?

⁴ Liꞈ hpu hkʼaw ve teˇ lawn htaꞈ teˇ geh nyi sheˍ. Yaˬhoˉvaˬ lehˬ Yoˇsehꞈ leh Maˍriˆ htaꞈ leuˆ yuˬ leh Yeˍsuˆ ve awˬ pa awˬ e hpehꞈ tcuh ve yoˬ. Leh Yeˍsuˆ Meˍsiˉyaꞈ kaꞈ hpehꞈ ve yoˬ. Awˬ tehˬ kʼo, Daˍviˆ ve awˬ yaˇ awˬ duˬ cawˬ maˇ jaˇ ve htawˇ, aˬ htoꞈ ma te Yaˬhoˉvaˬ chi ve 2 gʼaˇ htaꞈ leuˆ yuˬ ve le? Awˬ lawn kʼo, yawˇ huiˉ maˬ Yaˬhoˉvaˬ geh meuˆ daꞈ jaˇ ve yoˬ. Leh yawˇ huiˉ maˬ a shaꞈ teꞈ kuiˬ hkʼaw Yaˬhoˉvaˬ htaꞈ a yeˇ uiˍ jaˇ tehꞈ shawˍ ve yawˇ shiˍ ve yoˬ. Awˬ hpawˇ awˬ miˇ ma hpehꞈ ve chaw˗oˬ, Yoˇsehꞈ leh Maˍriˆ htaꞈ hkʼaˬ hkʼe te henˇ yuˬ gʼa tuˬ le?

5. Awˬ hpawˇ hpehꞈ ve chaw˗oˬ, Yoˇsehꞈ ve awˬ lawn htaꞈ hkʼaˬ hkʼe henˇ yuˬ gʼa ve le?

⁵ Yoˇsehꞈ lehˬ Yaˬhoˉvaˬ beˆ maˍ piˇ hkawˇ laꞈ haˉ yuˬ yehˇ leh chi yawˇ daꞈ ve awˬ hpawˇ hpehꞈ tuˬ ga piˇ ve yoˬ. Yoˇsehꞈ ve yehˬ kʼa htaꞈ caˉ daꞈ ve Yaˬhoˉvaˬ beˆ maˍ piˇ ve 3 pawˆ cawˬ leh Yaˬhoˉvaˬ yawˇ htaꞈ beˆ maˍ piˇ ve maˇ sha leh a shaꞈ teꞈ kuiˬ hkʼaw gʼa pa jaˇ ve htawˇ, yawˇ na yuˬ leh laꞈ haˉ gʼaꞈ te ve yoˬ. (Maꞈhtehˍ 1:20, 24; 2:13-15, 19-21) Yoˇsehꞈ lehˬ Yaˬhoˉvaˬ beˆ maˍ piˇ ve htaꞈ gʼaꞈ te htaˇ, chi yawˇ ve awˬ miˇ ma htaꞈ haꞈ shaˉ gʼa tuˬ ga piˇ ve yoˬ. Yoˇsehꞈ te ve awˬ ceuˬ Maˍriˆ yawˇ htaꞈ haꞈ leh yawˆ yan tuˬ te piˇ ve yoˬ. Awˬ hpawˇ hpehꞈ ve chaw˗oˬ, yehˬ kʼa htaꞈ caˉ daꞈ ve beˆ maˍ laˇ hkawˇ Liꞈ hpu hkʼaw hpfuhˆ nyi leh Yoˇsehꞈ htaꞈ henˇ yuˬ gʼa˗aw laˇ? d Liꞈ hpu hkʼaw beˆ maˍ laˇ hkawˇ nawˬ yuˬ yehˇ htaˇ, nawˬ laiˉ ceuˬ gʼa pa ve tehꞈ shiˍ ve htawˇ, nawˬ awˬ miˇ ma htaꞈ haꞈ ve, leh teˇ geh chehˇ ve htaꞈ ha lehˬ gʼa ve yoˬ. Awˬ viˉ awˬ nyi yaˇ miˇ Va˗na˗a˗to meh ve heuˆ daꞈ ve 20 hkʼawꞈ hpaˆ gaˬ˗oˬ ve kʼoˆ ve, “ngaˬ ve awˬ hpawˇ Yaˬhoˉvaˬ ve beˆ maˍ laˇ hkawˇ htaꞈ ca leh yuˬ yehˇ htaˇ, ngaˬ yawˇ htaꞈ yawˆ yan leh yawˇ dawˇ cheˆ ve htaꞈ yonˍ gʼa ve yoˬ.”

6. Awˬ miˇ ma hpehꞈ ve chaw˗oˬ, Maˍriˆ ve awˬ lawn htaꞈ hkʼaˬ hkʼe henˇ yuˬ gʼa ve le?

 ⁶ Maˍriˆ kaꞈ Yaˬhoˉvaˬ geh meuˆ daꞈ ve yoˬ. Yawˇ ve awˬ hpawˇ yonˍ leh yonˍ ve ceh maˇ heˆ. Yaꞈ hkʼaˇ, yawˇ ve yonˍ hkʼaˇ kaꞈ yonˍ yeˬ jaˇ ve yoˬ. Maˍriˆ Liꞈ hpu hkʼaw hkʼa dehꞈ shiˍ ve yoˬ. (Luˉkaꞈ 1:46 Liꞈ hpu henˇ tuˬ ve liꞈ hkʼaw nyi sheˍ.) Leh yawˇ Liꞈ hpu hkʼaw hkʼa dehꞈ dawˇ nyi ve yoˬ. (Luˉkaꞈ 2:19, 51) Maˍriˆ Yaˬhoˉvaˬ geh hkʼa dehꞈ meuˆ daꞈ ve pa taw, daꞈ ve awˬ miˇ ma hpehꞈ tuˬ te piˇ ve yoˬ. Chi beuꞈ teˇ co˗e awˬ miˇ ma laiˉ gʼaˇ kaꞈ Maˍriˆ htaꞈ henˇ yuˬ ve yoˬ. Tawˇ pa haˉ te kʼo, awˬ viˉ awˬ nyi yaˇ miˇ teˇ gʼaˇ Eh˗mi˗koꞈ kʼoˆ ve, “ngaˬ awˬ hpawˇ maˇ heuˆ sheˍ htaˇ Hkriꞈ yaˇ ve awˬ vuiˬ htaꞈ hkʼaˬ htaˆ kaꞈ te ve yoˬ. Yaꞈ hkʼaˇ, ngaˬ awˬ hpawˇ heuˆ peuˬ hkʼawꞈ nawˉ ngaˬ ve awˬ hpawˇ bon lawˬ htaˇ leh yehˬ kʼa hkʼaw oˉ kʼoˍ pui htaˇ kaꞈ sheh kʼai ve yoˬ. Awˬ yanˇ maw la htaˇ, ngaˬ ve yonˍ hkʼaˇ yonˍ yeˬ tuˬ, maˇ heˆ leh maˇ yonˍ yeˬ tuˬ, ngaˬ ve awˬ hpawˇ htaꞈ cawˬ ve tehꞈ dawˇ la ve yoˬ. Hkʼe te leh, ngaˬ dawˇ ve Yaˬhoˉvaˬ geh meuˆ daꞈ tuˬ ve awˬ lawn ngaˬ hkʼaˇ ngaˬ gʼa te cawˇ ve yoˬ. Yaˬhoˉvaˬ geh bon lawˬ ve, Liꞈ hpu gʼaw ve, hkʼa dehꞈ dawˇ nyi ve leh hpfuhˆ nyi ve, chi ve teˇ hpaˍ htaꞈ te tuˬ awˬ yanˇ shawˍ teh ve yoˬ.” (Gaˍlaˍtiˆ 6:5) Awˬ miˇ ma hpehꞈ ve chaw˗oˬ, nawˬ Yaˬhoˉvaˬ geh hkʼa dehꞈ meuˆ daꞈ ve kʼo, nawˬ ve awˬ hpawˇ nawˬ htaꞈ haꞈ leh chiˇ mvuh tuˬ yoˬ.—Tawˇ naˉ ve 31:30.

7. Awˬ hpawˇ awˬ miˇ ma oˉ kʼoˍ teˇ geh pui ve awˬ lawn Yoˇsehꞈ leh Maˍriˆ htaꞈ hkʼaˬ hkʼe te henˇ yuˬ gʼa ve le?

⁷ Yoˇsehꞈ leh Maˍriˆ lehˬ Yaˬhoˉvaˬ geh hkʼa dehꞈ meuˆ daꞈ tuˬ ga daꞈ ve yoˬ. Gʼuiˬ sha htaꞈ teˇ geh oˉ kʼoˍ pui ve a yeˇ uiˍ jaˇ tehꞈ yawˇ hui shiˍ ve yoˬ. (Luˉkaꞈ 2:22-24, 41; 4:16) Chi hkʼe te ve lehˬ yawˇ hui yaˇ laiˉ gʼaˇ cawˬ ve pa taw sha ve maˇ heˆ. Yaꞈ hkʼaˇ, yawˇ hui te gʼa ve yoˬ. Yawˇ hui lehˬ chi beuꞈ teˇ co˗e awˬ hpawˇ awˬ miˇ ma awˬ pon daꞈ ve henˇ yuˬ tuˬ kaꞈ hpehꞈ ve yoˬ. Nawˬ Yoˇsehꞈ leh Maˍriˆ hkʼa shuˍ yaˇ cawˬ ve kʼo, hpawnˬ daꞈ˗e ve, maˇ heˆ leh yehˬ kʼa hkʼaw oˉ kʼoˍ pui ve te tuˬ awˬ yanˇ shawˍ teh ve haˍ ve yoˬ hehˉ. Chi hkʼoˆ kaꞈ, a shu yawˇ hkʼaˇ yawˇ Liꞈ hpu henˇ tuˬ awˬ yanˇ shawˍ teh leh, awˬ hpawˇ awˬ miˇ ma ceh tiˉ teˇ geh bon lawˬ tuˬ awˬ yanˇ shawˍ teh ve kaꞈ haˍ ve yoˬ. Yaꞈ hkʼaˇ, nawˬ huiˉ maˬ teˇ geh Yaˬhoˉvaˬ htaꞈ oˉ kʼoˍ pui ve kʼo, nawˬ Yaˬhoˉvaˬ geh meuˆ daꞈ leh nawˬ huiˉ maˬ kaꞈ meuˆ daꞈ jaˇ tuˬ yoˬ tehꞈ tawnˇ taˍ sheˍ. Chi htaꞈ pa taw, nawˬ a shaꞈ teꞈ kuiˬ hkʼaw Yaˬhoˉvaˬ htaꞈ oˉ kʼoˍ pui ve a yeˇ uiˍ jaˇ tehꞈ gʼa shawˍ ve yoˬ.

8. Awˬ hpawˇ awˬ miˇ ma shoꞈ shaꞈ ve awˬ lawn cawˬ ve kʼo, yehˬ kʼa hkʼaw hkʼaˬ htaˆ kaꞈ teˇ geh oˉ kʼoˍ pui tuˬ hkʼaˬ hkʼe te gʼa ve le?

⁸ Nawˬ ve awˬ ca geh maˇ cawˇ maˇ hawˍ daꞈ ve kʼo, yehˬ kʼa hkʼaw teˇ geh oˉ kʼoˍ pui tuˬ nawˬ maˇ te gaˇ taˬ. Chi hkʼe hpehꞈ ve kʼo, yehˬ kʼa hkʼaw oˉ kʼoˍ pui htaˇ, awˬ yanˇ maˇ yehˇ maw leh nawˬ huiˉ maˬ dawˇ cawˇ ve awˬ lawn htaꞈ te sheˍ. Chi ve nawˬ huiˉ maˬ hkʼa dehꞈ haꞈ daꞈ tuˬ ga laˇ leh Hkriꞈ yaˇ ve awˬ vuiˬ teˇ hpaˍ htaꞈ teˇ geh te gaˇ tuˬ kaꞈ ga laˇ ve yoˬ.

9. Aˬ htoꞈ ma te awˬ hpawˇ awˬ miˇ ma teˇ geh chehˇ tuˬ awˬ yanˇ ca cawˇ ve le?

⁹ Awˬ hpawˇ awˬ miˇ ma teˇ geh chehˇ ve lehˬ, yawˇ huiˉ maˬ gʼaˇ hteꞈ haꞈ daꞈ tuˬ te piˇ leh nawˬ ve awˬ ca aˬ htoꞈ ma dawˇ chehˇ ve leh hkʼaˬ hkʼe dawˇ ve htaꞈ nawˬ shiˍ tuˬ te laˇ ve yoˬ. (Awˬ hkuiˉ puiˍ 2:24) Liˆle˗ya leh La˗lehn heuˆ daꞈ ve 15 hkʼawꞈ pawˆ gaˬ˗oˬ ve htaꞈ teˇ geh nyi sheˍ. Liˆle˗ya yawˇ hui heuˆ daꞈ peuˬ hkʼawꞈ nawˉ yawˇ hkʼaˬ hkʼe dawˇ ve htaꞈ kʼoˆ maˍ laˇ ve yoˬ. Yawˇ kʼoˆ ve, “ngaˬ hui teˇ geh te gaˇ ve awˬ ceuˬ htaꞈ te tuˬ awˬ yanˇ hkʼa dehꞈ maˇ cawˬ ve tehꞈ dawˇ ve yoˬ. Ngaˬ hui teˇ nyi le le kanˉ te ve, leh aˉ hkʼaw kanˉ te ve htaꞈ awˬ yanˇ yehˇ maˇ jaˇ ve yoˬ. Leh ngaˬ hui yaˇ cawˬ peuˬ hkʼawꞈ nawˉ kaꞈ kanˉ maˇ jaˇ ve yoˬ. Ngaˬ huiˉ maˬ 2 gʼaˇ gʼaˇ ceh tiˉ teˇ geh maˇ gʼa chehˇ leh hkʼa dehꞈ maˇ meuˆ daꞈ ve yoˬ.”

10. Eˇfeˇsuꞈ liꞈ 5:15, 16 hkʼaw ve awˬ liˇ awˬ hkʼaˇ htaꞈ awˬ hpawˇ awˬ miˇ ma hkʼaˬ hkʼe yuˬ yehˇ gʼa ve le?

¹⁰ Awˬ hpawˇ awˬ miˇ ma teˇ geh chehˇ ve awˬ yanˇ cawˬ tuˬ hkʼaˬ hkʼe gʼa te cawˇ ve le? Awˬ hpawˇ awˬ miˇ ma laiˉ ceuˬ teˇ geh te tuˬ nawˬ awˬ yanˇ gʼa shawˍ teh cawˇ ve yoˬ. (Eˇfeˇsuꞈ 5:15, 16 gʼaw sheˍ.) Nai˗jeˇriˇ˗aˇ mvuhˇ miˬ lo chehˇ ve awˬ viˉ awˬ nyi  hawˉ hkʼaˆ U˗sha˗du kʼoˆ ve, “ngaˬ hkʼaˇ ngaˬ awˬ yanˇ cawˬ tuˬ shawˍ teh leh ngaˬ miˇ ma geh laiˉ ceuˬ teˇ geh te tuˬ kaꞈ awˬ yanˇ shawˍ teh ve yoˬ. Chi ve teˇ hpaˍ htaꞈ te tuˬ awˬ nu ve awˬ ceuˬ maˇ shoꞈ shaꞈ laˇ tcuh.” (Hpiˇliˇpiˆ 1:10) Awˬ nu ve teˇ lawn lehˬ Monˍdoˬvaˬ mvuhˇ miˬ lo chehˇ ve toˇ nyi shehˍ hpaˇ ve awˬ miˇ ma A˗naˆta˗si ve awˬ lawn hpehꞈ ve yoˬ. Awˬ bon cawˬ tuˬ yawˇ awˬ yanˇ htaꞈ hkʼa dehꞈ shawˍ teh ve yoˬ. Yawˇ kʼoˆ ve, “ngaˬ ve awˬ hpawˇ yawˇ ve awˬ vuiˬ htaꞈ te chehˇ htaˇ, ngaˬ te tuˬ cawˬ ve awˬ ceuˬ htaꞈ te ve yoˬ. Leh ngaˬ hpawˇ tanˇ˗oˬ htaˇ ngaˬ huiˉ maˬ teˇ geh chehˇ ve yoˬ.” Yaꞈ hkʼaˇ, nawˬ kanˉ maˇ jaˇ leh teˇ geh tawˇ yaw daꞈ tuˬ awˬ yanˇ hkʼa dehꞈ maˇ cawˬ ve kʼo, nawˬ hkʼaˬ hkʼe te tuˬ le?

11. Aˍkuˉlaˆ leh Piˇkiˇlaˆ aˬ htoꞈ ma ve awˬ ceuˬ htaꞈ teˇ geh te ve le?

¹¹ Awˬ hpawˇ awˬ miˇ ma kaꞈ Aˍkuˉlaˆ leh Piˇkiˇlaˆ htaꞈ henˇ yuˬ gʼa ve yoˬ. Awˉ lawˉ peuˇ ve Hkriꞈ yaˇ yawˇ huiˉ maˬ htaꞈ haꞈ jaˇ. (Roˉmaꞈ 16:3, 4) Yawˇ huiˉ maˬ ve awˬ lawn Liꞈ hpu hkʼaw hkʼa dehꞈ maˇ kʼoˆ laˇ taˍ ve htawˇ, yawˇ huiˉ maˬ bon teˇ geh maˍ ve, kanˉ teˇ geh te ve, leh awˬ nu ve chaw htaꞈ kaꞈ ga piˇ ve tehꞈ ngaˬ hui shiˍ ve yoˬ. (Tcuh yaˇ 18:2, 3, 24-26) Liꞈ hpu hkʼaw Aˍkuˉlaˆ leh Piˇkiˇlaˆ htaꞈ kʼoˆ htaˇ, yawˇ huiˉ maˬ 2 gʼaˇ gʼaˇ htaꞈ teˇ geh kʼoˆ ve ngaˬ hui gʼa mawˬ ve yoˬ.

12. Awˬ hpawˇ awˬ miˇ ma teˇ geh chehˇ tuˬ awˬ yanˇ hkʼaˬ hkʼe te shawˍ teh gʼa ve le? (Awˬ han htaꞈ nyi sheˍ.)

¹² Awˬ hpawˇ awˬ miˇ ma Aˍkuˉlaˆ leh Piˇkiˇlaˆ htaꞈ hkʼaˬ hkʼe te henˇ yuˬ gʼa tuˬ le? Nawˬ huiˉ maˬ teˇ geh te tuˬ aˬ htoꞈ ma cawˬ ve htaꞈ dawˇ nyi sheˍ. Teˇ gʼaˇ tiˉ te ve aꞈ kehˉ teˇ geh te gʼa˗aw laˇ? Tawˇ pa haˉ te kʼo, Aˍkuˉlaˆ leh Piˇkiˇlaˆ lehˬ bon teˇ geh maˍ˗e ve yoˬ. Nawˬ hkʼaˬ htaˆ kaꞈ chi hkʼe te tuˬ awˬ hkʼaˇ gu teh˗aw laˇ? Chi hkʼoˆ kaꞈ, Aˍkuˉlaˆ leh Piˇkiˇlaˆ kaꞈ kanˉ teˇ geh te ve yoˬ. Nawˬ leh nawˬ ve awˬ ca kanˉ teˇ geh maˇ gʼa te ve htawˇ, aˉ hkʼaw ve kanˉ teˇ geh te gʼa˗aw laˇ? (Cuˇ yiˍ piˇ ve 4:9) Nawˬ hui kanˉ te ve ga daꞈ ve kʼo, tawˇ yaw daꞈ tuˬ awˬ yanˇ cawˬ ve yoˬ. Lo˗beuꞈ leh Linˇdaꞈ heuˆ daꞈ ve 50 hkʼawꞈ hpaˆ gaˬ˗oˬ ve awˬ lawn htaꞈ teˇ geh nyi sheˍ. Lo˗beuꞈ kʼoˆ ve, “ngaˬ huiˉ maˬ tanˇ˗a htaˇ teˇ geh te ve awˬ yanˇ hkʼa dehꞈ maˇ cawˬ. Yaꞈ hkʼaˇ, ngaˬ hkehˇ tsuhˇ htaˇ ngaˬ miˇ ma hkehˇ shiˆ vi ve yoˬ. Ngaˬ yehˬ jaˇ lo daꞈ kehˬ tuˬ te htaˇ, ngaˬ miˇ ma kaꞈ ngaˬ paˇ lo te ve yoˬ. Chi ngaˬ ha lehˬ tuˬ te laˇ jaˇ. Ngaˬ hui laiˉ ceuˬ teˇ geh te htaˇ, meuˆ daꞈ leh kʼawꞈ haꞈ daꞈ tuˬ te laˇ ve yoˬ.”

13. Awˬ hpawˇ awˬ miˇ ma hkʼa dehꞈ haꞈ daꞈ tuˬ yawˇ hui aˬ htoꞈ ma gʼa te cawˇ ve le?

¹³ Awˬ hpawˇ awˬ miˇ ma teˇ geh chehˇ ve lehˬ, hkʼa dehꞈ meuˆ daꞈ tuˬ te laˇ ve maˇ heˆ ve tehꞈ tawnˇ taˍ cawˇ ve yoˬ. Baˬraˬziˇ mvuhˇ miˬ lo chehˇ ve awˬ miˇ ma teˇ gʼaˇ kʼoˆ ve, “chi beuꞈ teˇ co˗e a shaꞈ teꞈ kuiˬ hkʼaw kanˉ maˇ jaˇ tuˬ te laˇ ve laiˉ ceuˬ cawˬ ve yoˬ. Teˇ yehˬ kʼa hkʼaw tiˉ chehˇ ve kʼo, meuˆ daꞈ˗oˬ ve tehꞈ ngaˬ dawˇ tuˬ te laˇ ve yoˬ. Teˇ geh chehˇ ve aꞈ kehˉ ngaˬ gʼa te cawˇ sheˍ ve lehˬ, ngaˬ hpawˇ aˬ htoꞈ ma loˍ ve htaꞈ ngaˬ a yeˇ gʼa yuˬ cawˇ sheˍ ve yoˬ.” Bon˗nuˇ leh yawˇ ve awˬ miˇ ma Htin yawˇ huiˉ maˬ awˬ tehˬ awˬ na a yeˇ yuˬ daꞈ ve tehꞈ gʼa te ve yoˬ. Bon˗nuˇ kʼoˆ ve, “ngaˬ huiˉ maˬ teˇ geh chehˇ htaˇ, tawˇ yaw tuˬ awˬ hkʼeun awˬ paˇ  lo maˇ teh ve yoˬ. Ngaˬ hui teˇ geh chehˇ ve htaꞈ ha lehˬ gaˇ ve yoˬ.”

14. Awˬ hpawˇ awˬ miˇ ma teˇ geh maˇ chehˇ gaˇ ve kʼo yawˇ hui aˬ htoꞈ ma te la ve hehˉ le?

¹⁴ Nawˬ huiˉ maˬ teˇ geh maˇ chehˇ gaˇ ve kʼo, teˇ pawˆ pawˆ kʼo nawˬ dawˇ cawˇ ve maˇ shuˍ daꞈ ve, maˇ heˆ leh teˇ gʼaˇ leh teˇ gʼaˇ nyi bawˬ daꞈ ve yoˬ. Nawˬ aˬ htoꞈ ma te gʼa sheˍ ve le? Awˬ lawn chi ve hkʼaw aˬ miˍ ceh htaˇ ve awˬ lawn htaꞈ kʼawꞈ dawˇ nyi sheˍ. Nawˬ aˬ miˍ ceh gehˇ sheˍ htaˇ laꞈ haˉ maˇ toꞈ hehnˇ. Nawˬ aˬ miˍ suhˆ hteh jeˆ tuˉ leh gʼa chiˇ tuˉ ve yoˬ. Peuˬ hkʼawꞈ nawˉ suhˆ hteh uiˍ ve a yehˉ yehˉ keu htaˇ aˬ miˍ kʼawꞈ toꞈ hehnˇ la ve yoˬ. Chi htaꞈ pa taw, awˬ hpawˇ awˬ miˇ ma teˇ nyi ve hkʼaw awˬ yanˇ yehˇ leh dawˇ cawˇ ve awˬ lawn yaw daꞈ sheˍ. Nawˬ huiˉ maˬ te ve awˬ ceuˬ deˇ daꞈ tuˬ taˇ te laˇ tcuh. (Yaˍkoˆ 3:18) Awˬ meu˗eˇ awˬ meu˗eˇ chi hkʼe te ve kʼo, nawˬ huiˉ maˬ awˉ lawˉ htaˇ hkʼe kʼawꞈ haꞈ daꞈ tuˬ te laˇ ve yoˬ.

15. Aˬ htoꞈ ma te yawˆ yan daꞈ ve lehˬ awˬ hpawˇ awˬ miˇ ma haꞈ daꞈ maˇ la tuˬ ga laˇ ve le?

¹⁵ Yawˆ yan daꞈ ve lehˬ awˬ ca awˬ pon a yeˇ uiˍ jaˇ ve awˬ ceuˬ hpehꞈ ve yoˬ. Aˬ miˍ hkʼa dehꞈ toꞈ gʼa tuˬ mvuhˇ haw awˬ shaˉ hkʼa dehꞈ gʼa loꞈ la tcuh ve yoˬ. Yaꞈ hkʼaˇ, mvuhˇ haw awˬ shaˉ maˇ loꞈ la ve kʼo, aˬ miˍ suh˗e tuˬ yoˬ. Chi ve hkʼa shuˍ shuˍ, awˬ hpawˇ awˬ miˇ ma maˇ yawˆ yan daꞈ ve kʼo, haꞈ daꞈ ve hkʼa dehꞈ maˇ cawˬ. Yaꞈ hkʼaˇ, yawˇ hui hkʼaˬ htaˆ kaꞈ yawˆ yan daꞈ ve kʼo, yawˇ hui hkʼa dehꞈ haꞈ daꞈ tuˬ yoˬ. Chi hkʼe hpehꞈ ve htawˇ, a yeˇ uiˍ jaˇ ve lehˬ nawˬ ve awˬ ca nawˬ yawˇ htaꞈ yawˆ yan piˇ ve shiˍ˗aw laˇ tehꞈ gʼa tawnˇ taˍ cawˇ ve yoˬ. Nawˬ yawˇ htaꞈ yawˆ yan piˇ˗oˬ ve tehꞈ nawˬ hkʼaˇ nawˬ maˇ gʼa dawˇ nyi cawˇ. Hpeh˗ni leh A˗leˆ heuˆ daꞈ ve 25 hkʼawꞈ hpaˆ gaˬ˗oˬ ve awˬ lawn htaꞈ teˇ geh nyi sheˍ. Hpeh˗ni kʼoˆ ve, “ngaˬ huiˉ maˬ yawˆ yan daꞈ ve pa taw, yehˬ kʼa hkʼaw gawˬ lehˍ cawˬ ve yoˬ. Ngaˬ hui aˬ htoꞈ ma dawˇ ve htawˇ kʼoˆ maˍ daꞈ gʼa ve yoˬ. Awˬ lawn kʼo, ngaˬ hkʼaˬ hkʼe dawˇ ve ngaˬ ve awˬ ca shiˍ gaˇ ve yoˬ.” Chi htaꞈ pa taw, nawˬ ve awˬ ca nawˬ yawˇ htaꞈ yawˆ yan piˇ˗oˬ ve tehꞈ shiˍ gʼa tuˬ, nawˬ aˬ htoꞈ ma te gʼa ve le? Aˍbraˍhanˍ leh Saˍraˇ ve awˬ lawn htaꞈ teˇ geh nyi sheˍ.

16. Awˬ hpawˇ hpehꞈ ve chaw˗oˬ, Aˍbraˍhanˍ ve awˬ lawn htaꞈ aˬ htoꞈ ma henˇ yuˬ gʼa ve le? (1 Peˍtruˆ 3:7) (Awˬ han htaꞈ nyi sheˍ.)

¹⁶ Aˍbraˍhanˍ Saˍraˇ htaꞈ yawˆ yan piˇ ve lehˬ, yawˇ kʼoˆ ve htaꞈ na leh yawˇ ve te hkʼaˇ dawˇ hkʼaˇ htaꞈ hkʼaˬ htaˆ kaꞈ dawˇ nyi piˇ ve yoˬ. Teˇ pawˆ htaˇ Saˍraˇ dawˇ maˇ jaˇ ve pa taw, yawˇ tawˇ hehnˇ chaweh yaw leh Aˍbraˍhanˍ htaꞈ nawˬ hkʼaˬ hkʼe dawˇ ve le tehꞈ kʼoˆ leh, Aˍbraˍhanˍ htaꞈ venˇ baˆ taˍ ve yoˬ. Aˍbraˍhanˍ nyi ma zuhˆ leh Saˍraˇ htaꞈ deˇ piˇ˗aw laˇ? Yawˇ chi hkʼe maˇ te. Saˍraˇ lehˬ awˬ hpawˇ ve kanˇ paˆ awˬ hawˉ lo chehˇ leh hkʼaˬ htaˆ kaꞈ yawˇ hkawˇ na ve tehꞈ yawˇ shiˍ ve yoˬ. Aˍbraˍhanˍ Saˍraˇ hkawˇ na leh shoꞈ shaꞈ ve awˬ lawn htaꞈ kaꞈ gu piˇ ve yoˬ. (Awˬ hkuiˉ puiˍ 16:5, 6) Awˬ lawn chi ngaˬ hui htaꞈ hkʼaˬ hkʼe maˍ laˇ ve le? Awˬ hpawˇ hpehꞈ ve chaw˗oˬ, yehˬ kʼa hkʼaw dawˇ cheˆ tuˬ Gʼuiˬ sha nawˬ htaꞈ kanˇ paˆ peꞈ laˇ taˍ ve yoˬ. (1 Kawˇrenˍhtuˆ 11:3) Yaꞈ hkʼaˇ, nawˬ awˬ miˇ ma htaꞈ haꞈ leh awˬ lawn chi yawˇ htaꞈ heuˆ la kuiˬ cawˬ ve kʼo, nawˬ maˇ dawˇ cheˆ sheˍ htaˇ  yawˇ ve hkawˇ na tuˬ yoˬ. (1 Kawˇrenˍhtuˆ 13:4, 5) Chi hkʼoˆ kaꞈ, awˬ miˇ ma dawˇ maˇ ve maˇ heˆ leh yawˇ hkʼaˬ hkʼe dawˇ ve kʼoˆ maˍ laˇ gaˇ ve kʼo, nawˬ yawˇ htaꞈ dawˇ nyi piˇ leh yawˇ kʼoˆ ve hkawˇ htaꞈ hkʼa dehꞈ na piˇ˗aw laˇ? (1 Peˍtruˆ 3:7 gʼaw sheˍ.) Ehn˗ce˗la leh Dehˬniˆ heuˆ daꞈ˗oˬ ve aˬ laˬ hkʼe 30 hkʼawꞈ gaˬ˗oˬ ve awˬ lawn htaꞈ teˇ geh nyi sheˍ. Ehn˗ce˗la awˬ hpawˇ yawˇ htaꞈ hkʼaˬ hkʼe yawˆ yan laˇ ve htaꞈ kʼoˆ maˍ laˇ ve yoˬ. Yawˇ kʼoˆ ve, “ngaˬ dawˇ maˇ jaˇ ve maˇ heˆ leh teˇ pawˆ pawˆ kʼo ngaˬ tawˇ yaw ve htaꞈ ngaˬ hpawˇ hkʼaˬ htaˆ kaꞈ na taˍ laˇ ve yoˬ. Ngaˬ nyi ma zuhˆ jaˇ ve htawˇ, yawˇ yeunˇ hkanˍ laˇ jaˇ.”

17. Awˬ miˇ ma hpehꞈ ve chaw˗oˬ, Saˍraˇ ve awˬ lawn htaꞈ hkʼaˬ hkʼe henˇ yuˬ gʼa ve le? (1 Peˍtruˆ 3:5, 6)

¹⁷ Saˍraˇ Aˍbraˍhanˍ htaꞈ yawˆ yan ve lehˬ, yawˇ dawˇ cheˆ ve teˇ ceuˬ le le htaꞈ na yuˬ ve yoˬ. (Awˬ hkuiˉ puiˍ 12:5) Teˇ pawˆ htaˇ Aˍbraˍhanˍ maˇ dawˇ maˇ gaˇ ve hkʼaw hkehˉ chaw htaꞈ gʼa haꞈ yuˬ ve yoˬ. Leh yawˇ Saˍraˇ htaꞈ hkaoˍ monˇ haˆ haˆ te tcuh ve yoˬ. (Awˬ hkuiˉ puiˍ 18:6) Saˍraˇ awˬ hpawˇ dawˇ cheˆ ve htaꞈ na yuˬ leh laꞈ haˉ gʼaꞈ te ve yoˬ. Awˬ miˇ ma hpehꞈ ve chaw˗oˬ, nawˬ Saˍraˇ htaꞈ henˇ yuˬ gʼa ve lehˬ awˬ hpawˇ dawˇ cheˆ ve htaꞈ na yuˬ ve yoˬ. Nawˬ chi hkʼe te ve kʼo, nawˬ ve awˬ ca geh hkʼaˬ htaˇ kaꞈ teˇ geh chehˇ gʼa tuˬ ga piˇ chehˇ ve yoˬ. (1 Peˍtruˆ 3:5, 6 gʼaw sheˍ.) Chi awˬ gʼuˇ suhˍ htaˇ kʼoˆ kʼai peuˬ ve Dehˬniˆ lehˬ, awˬ miˇ ma yawˇ htaꞈ hkʼaˬ hkʼe yawˆ yan laˇ ve htaꞈ kʼoˆ maˍ laˇ ve yoˬ. Yawˇ kʼoˆ ve, “Ehn˗ce˗la ngaˬ dawˇ cheˆ ve htaꞈ yawˇ maˇ dawˇ cawˇ ve htawˇ, hkʼaˬ htaˆ kaꞈ na yuˬ laˇ ve ngaˬ yawˇ htaꞈ awˬ bon uiˍ jaˇ ve yoˬ. Ngaˬ dawˇ cheˆ ve hkʼa dehꞈ maˇ cawˇ ve htawˇ, yawˇ maˇ deˇ laˇ jaw.” Ngaˬ hui haꞈ ve chaw htaꞈ yawˆ yan piˇ ve lehˬ sha ve tehꞈ nawˬ mawˬ˗aw laˇ?

18. Awˬ hpawˇ awˬ miˇ ma hkʼa dehꞈ haꞈ daꞈ tuˬ laiˉ ceuˬ teˇ geh te ve kʼo, yawˇ hui aˬ htoꞈ ma awˬ bon gʼa ve le?

¹⁸ Saˍtanˍ lehˬ Hkriꞈ yaˇ hpehꞈ ve awˬ hpawˇ awˬ miˇ ma htaꞈ maˇ haꞈ daꞈ tcuh gaˇ ve yoˬ. Yawˇ hui maˇ haꞈ daꞈ ve kʼo, Yaˬhoˉvaˬ geh maˇ meuˆ daꞈ tuˬ yoˬ tehꞈ Saˍtanˍ shiˍ ve yoˬ. Yaꞈ hkʼaˇ, nawˬ awˬ tehˬ haꞈ ve kʼo, teˇ ceuˬ˗ehˬ kaꞈ te luˬ laˇ maˇ gʼa. Chi htaꞈ pa taw, nawˬ haꞈ ve chi Sawˉlaꞈmonˍ ve kʼa muiˬ hkawˇ hkʼaw kʼoˆ taˍ ve hkʼe hpehꞈ sheˍ. Nawˬ ve awˬ ca awˬ pon Yaˬhoˉvaˬ htaꞈ a yeˇ uiˍ jaˇ tehꞈ shawˍ ve, nawˬ ve awˬ ca geh teˇ geh chehˇ ve, yawˆ yan daꞈ ve, nawˬ ve awˬ ca hkʼaˬ hkʼe dawˇ ve htaꞈ dawˇ nyi piˇ ve, leh yawˇ loˍ ve htaꞈ kaꞈ dawˇ nyi piˇ ve yoˬ. Nawˬ chi hkʼe te ve kʼo, nawˬ huiˉ maˬ Yaˬhoˉvaˬ chiˇ uiˍ chiˇ mvuh ve htaꞈ gʼa tuˬ te piˇ chehˇ ve yoˬ. Awˬ lawn kʼo, Yaˬhoˉvaˬ lehˬ haꞈ daꞈ ve peꞈ laˇ shehˍ hpaˇ hpehꞈ ve yoˬ. Aˬ miˍ suhˆ hteh hkʼaˬ htaꞈ kaꞈ chiˇ tuˉ ve hkʼa shuˍ, nawˬ hui haꞈ daꞈ ve hkʼaˬ htaˆ kaꞈ yeˬ tuˬ yoˬ.