AWˬ LAWN 22
KʼA MUIˬ HKAWˇ 127 Ngaˬ hkʼaˬ hkʼe ve chaw hpehꞈ cawˇ ve le?
Chaw haˉ yaˇ miˇ haˉ te daꞈ htaˇ cuˇ yiˍ cawˬ ve hkʼaw dawˇ cheˆ sheˍ
‘Awˬ hkʼaw hpawˇ awˬ hkiˇ shawˍ ve teˇ ceuˬ maˇ luˬ puiˉ.’—1 PEˍTRUˆ 3:4.
A YEˇ UIˍ VE AWˬ LAWN
Chaw haˉ yaˇ miˇ haˉ te daꞈ ve chaw hkʼaˬ hkʼe te cuˇ yiˍ cawˬ ve hkʼaw dawˇ cheˆ gʼa tuˬ le? Hkriꞈ yaˇ awˬ moˍ hkʼaw ve awˬ viˉ awˬ nyi hkʼaˬ hkʼe te yawˇ hui htaꞈ ga piˇ gʼa tuˬ le?
1-2. Chaw haˉ yaˇ miˇ haˉ te daꞈ ve awˬ yanˇ htaˇ, chaw teˇ hpaˍ hkʼaˬ hkʼe dawˇ ve le?
Chaw haˉ yaˇ miˇ haˉ te daꞈ ve awˬ yanˇ htaˇ, ha lehˬ jaˇ ve yoˬ. Nawˬ chaw teˇ gʼaˇ htaꞈ maˆ daꞈ chehˇ ve kʼo, awˬ yanˇ chi ve hkʼaw nawˬ ha lehˬ ve cawˬ gaˇ leh laiˉ ku kaꞈ chi hkʼe cawˬ tcuh gaˇ ve yoˬ. Ehˇtaˍyoˇpiˆ mvuhˇ miˬ lo chehˇ ve awˬ viˉ awˬ nyi yaˇ miˇ She˗yanˇ a kʼoˆ ve, “ngaˬ ha lehˬ jaˇ ve awˬ yanˇ lehˬ ngaˬ leh ngaˬ hpawˇ maˆ daꞈ htaˇ yoˬ. Awˬ yanˇ chi ve hkʼaw ngaˬ huiˉ maˬ laiˉ lawn hkʼa dehꞈ yaw daꞈ ve htawˇ, ha lehˬ ve cawˬ gʼa ve yoˬ. Ngaˬ haꞈ ve chaw leh ngaˬ htaꞈ haꞈ ve chaw htaꞈ mawˬ daꞈ ve ha lehˬ jaˇ.”
2 Hkʼaˬ hkʼe hpehꞈ ve htawˇ, Nehˬtaˬlehˬ mvuhˇ miˬ lo chehˇ ve awˬ viˉ awˬ nyi hawˉ hkʼaˆ A˗li˗son kʼoˆ ve, “ngaˬ leh ngaˬ miˇ ma maˆ daꞈ htaˇ, hkʼa dehꞈ shiˍ daꞈ tuˬ te ve ha lehˬ jaˇ. Yaꞈ hkʼaˇ, ngaˬ huiˉ maˬ shoꞈ shaꞈ ve kaꞈ gʼa hpuˇ ve yoˬ.” Chaw haˉ yaˇ miˇ haˉ te daꞈ ve chaw shoꞈ shaꞈ ve awˬ lawn aˬ htoꞈ ma cawˬ ve teˇ geh henˇ tuˬ yoˬ. Leh Liꞈ hpu hkʼaw ve awˬ liˇ awˬ hkʼaˇ yawˇ hui cuˇ yiˍ cawˬ ve hkʼaw dawˇ cheˆ gʼa tuˬ, aˬ htoꞈ ma ga piˇ gʼa ve kaꞈ teˇ geh henˇ tuˬ yoˬ. Leh Hkriꞈ yaˇ awˬ moˍ hkʼaw chaw haˉ yaˇ miˇ haˉ te daꞈ ve chaw htaꞈ hkʼaˬ hkʼe ga piˇ gʼa ve kaꞈ teˇ geh henˇ tuˬ yoˬ.
CHAW HAˉ YAˇ MIˇ HAˉ TE DAꞈ HTAˇ DAWˇ TEH TAˍ VE
3. Chaw haˉ yaˇ miˇ haˉ te daꞈ ve lehˬ aˬ htoꞈ ma awˬ pon le? (Tawˇ naˉ ve 20:25)
3 Chaw haˉ yaˇ miˇ haˉ te daꞈ ve awˬ yanˇ htaˇ, ha lehˬ jaˇ ve htawˇ heuˆ daꞈ ve awˬ yanˇ a yeˇ uiˍ jaˇ. Yawˇ hui a shaꞈ teꞈ chehˇ ve teˇ co˗e haꞈ daꞈ leh yawˆ yan daꞈ tuˬ yoˬ tehꞈ yawˇ hui heuˆ daꞈ ve awˬ nyi htaˇ Yaˬhoˉvaˬ geh hkanˍ ve yoˬ. Teˇ gʼaˇ leh teˇ gʼaˇ ka tiꞈ maˇ te daꞈ sheˍ htaˇ awˬ lawn oˇ ve htaꞈ cuˇ yiˍ cawˬ ve hkʼaw hkʼa dehꞈ gʼa dawˇ nyi cawˇ ve yoˬ. (Tawˇ naˉ ve 20:25 gʼaw sheˍ.) Leh chi kaꞈ heuˆ daꞈ htaˇ hkanˍ ve htaꞈ caˉ daꞈ ve yoˬ. Yawˇ hui maˆ daꞈ htaˇ, hkʼa dehꞈ shiˍ daꞈ maˇ la tuˬ te piˇ leh cuˇ yiˍ cawˬ ve hkʼaw dawˇ cheˆ gʼa tuˬ kaꞈ ga piˇ ve yoˬ. Teˇ pawˆ pawˆ kʼo, yawˇ huiˉ maˬ heuˆ daꞈ tuˬ dawˇ cheˆ ve, maˇ heˆ leh maˇ maˆ daꞈ˗o tuˬ kaꞈ dawˇ cheˆ gʼa ve yoˬ. Yawˇ huiˉ maˬ maˇ maˆ daꞈ˗o ve kʼo, chi awˬ yanˇ shonˇ ve htaꞈ ceh kʼoˆ gaˇ ve maˇ heˆ. Yaꞈ hkʼaˇ, yawˇ huiˉ maˬ maˆ daꞈ ve awˬ yanˇ htaˇ laiˉ ceuˬ dawˇ cheˆ gʼa ve yoˬ. Chi ve lehˬ, maˆ daꞈ ve chaw htaꞈ heuˆ daꞈ tuˬ, maˇ heuˆ daꞈ tuˬ cuˇ yiˍ cawˬ ve hkʼaw dawˇ cheˆ gʼa tuˬ ga piˇ ve yoˬ.
4. Chaw haˉ yaˇ miˇ haˉ te daꞈ ve aˬ htoꞈ ma te ngaˬ hui cawˇ ve dawˇ hkʼaˇ gʼa cawˬ cawˇ ve le?
4 Maˆ daꞈ htaˇ cawˇ ve dawˇ hkʼaˇ cawˬ tuˬ, aˬ htoꞈ ma te a yeˇ uiˍ jaˇ ve le? Awˬ lawn chi ve htaꞈ chaw haˉ yaˇ miˇ haˉ cawˇ ve dawˇ hkʼaˇ cawˬ ve kʼo, yawˇ maˇ heuˆ daꞈ tuˬ ve chaw htaꞈ maˇ maˆ daꞈ. Yaꞈ hkʼaˇ, awˬ lawn chi ve htaꞈ cawˇ ve dawˇ hkʼaˇ cawˬ tuˬ chaw haˉ yaˇ miˇ haˉ ceh tiˉ cawˬ cawˇ ve maˇ heˆ. Ngaˬ hui teˇ gʼaˇ le le kaꞈ cawˬ cawˇ ve yoˬ. Tawˇ pa haˉ te kʼo, chaw teˇ hpaˍ dawˇ ve chaw nyiˇ gʼaˇ maˆ daꞈ ve kʼo, yawˇ huiˉ maˬ gʼa heuˆ daꞈ cawˇ ve yoˬ. Yaꞈ hkʼaˇ, chi hkʼe ve dawˇ hkʼaˇ chaw haˉ yaˇ miˇ haˉ htaꞈ heuˆ la kuiˬ hkʼaˬ hkʼe cawˬ ve le? Aˍmeˬriˆkaꞈ mvuhˇ miˬ lo chehˇ ve awˬ viˉ awˬ nyi yaˇ miˇ haˉ Meh˗li˗saˆ kʼoˆ ve, “maˆ daꞈ chehˇ ve chaw lehˬ nyiˉ laˇ jaˇ ve tehꞈ dawˇ ve yoˬ. Teˇ ca ca kʼo, teˇ geh kʼai maˇ gʼa ve htawˇ, maˇ hpaˆ daꞈ. Chi htaꞈ pa taw, chaw teˇ hpaˍ teˇ gʼaˇ geh kaꞈ maˇ maˆ daꞈ haˆ ve yoˬ. Chi hkʼe hpehꞈ htaˇ dawˇ maˇ jaˇ.”
HKʼA DEHꞈ SHIˍ DAꞈ TUˬ TE VE
5-6. Maˆ daꞈ chehˇ ve chaw hkʼa dehꞈ shiˍ daꞈ tuˬ, aˬ htoꞈ ma awˬ lawn htaꞈ yaw daꞈ cawˇ ve le? (1 Peˍtruˆ 3:4)
5 Nawˬ maˆ daꞈ chehˇ ve chaw cawˬ ve kʼo, nawˬ heuˆ daꞈ tuˬ dawˇ cheˆ gʼa tuˬ aˬ htoꞈ ma ga laˇ gʼa ve le? Nawˬ htaꞈ ga laˇ gʼa ve awˬ ceuˬ lehˬ hkʼa dehꞈ shiˍ daꞈ tuˬ gʼa te cawˇ ve yoˬ. Nawˬ yawˇ htaꞈ maˇ maˆ daꞈ sheˍ htaˇ shiˍ daꞈ˗oˬ ve yoˬ. Yaꞈ hkʼaˇ, chi teˇ hkui nawˬ yawˇ htaꞈ hkʼa dehꞈ shiˍ daꞈ tuˬ awˬ yanˇ cawˬ ve yoˬ. (1 Peˍtruˆ 3:4 gʼaw sheˍ.) Yawˇ ve yonˍ hkʼaˇ yonˍ yeˬ˗aw laˇ? Yawˇ ve te hkʼaˇ dawˇ hkʼaˇ hkʼaˬ hkʼe hpehꞈ ve le? Chi ve teˇ hpaˍ kaꞈ gʼa nyi cawˇ ve yoˬ. Awˬ yanˇ ponˬ kʼai htaˇ, chi ve teˇ hpaˍ htaꞈ shiˍ gʼa tuˬ yoˬ. Tawˇ pa haˉ te kʼo, ‘chaw chi teˇ gʼaˇ ngaˬ awˬ pon awˬ tehˬ hpehꞈ ve laˇ?’ (Tawˇ naˉ ve 31:26, 27, 30; Eˇfeˇsuꞈ 5:33; 1 Tiˆmoˉseˍ 5:8) ‘Ngaˬ hui teˇ gʼaˇ leh teˇ gʼaˇ ve dawˇ hkʼaˇ htaꞈ a yeˇ yuˬ daꞈ˗aw laˇ? Teˇ gʼaˇ leh teˇ gʼaˇ ve yaꞈ kuiˬ htaꞈ haꞈ yuˬ daꞈ gʼa˗aw laˇ?’ b (Roˉmaꞈ 3:23) Nawˬ yawˇ htaꞈ shiˍ daꞈ tuˬ coˇ caˇ leh te chehˇ htaˇ, nawˬ huiˉ maˬ shuˍ daꞈ ve htaꞈ a yeˇ uiˍ ve maˇ heˆ tehꞈ tawnˇ taˍ sheˍ. Nawˬ huiˉ maˬ teˇ ceuˬ ceuˬ maˇ shuˍ daꞈ ve htawˇ, teˇ gʼaˇ leh teˇ gʼaˇ hkʼaˬ hkʼe taw na gʼa daꞈ ve htaꞈ cawˬ ve yoˬ.
6 Maˆ daꞈ chehˇ ve awˬ yanˇ htaˇ, nawˬ aˬ htoꞈ ma ve awˬ lawn htaꞈ yaw daꞈ cawˇ ve le? Nawˬ yawˇ htaꞈ hkʼa dehꞈ maˇ dawˇ cawˇ sheˍ htaˇ, teˇ gʼaˇ leh teˇ gʼaˇ dawˇ teh taˍ ve a yeˇ uiˍ ve awˬ lawn htaꞈ awˉ lawˉ yaw daꞈ cawˇ ve yoˬ. Yaꞈ hkʼaˇ, a shu yawˇ ve awˬ lawn, chehˇ sha cawˬ sha ve, hpu, maˇ heˆ leh oˇ htaˇ ve awˬ lawn hpehꞈ ve kʼo, hkʼaˬ hkʼe te tuˬ le? Tanˬ maˆ daꞈ gehˇ sheˍ htaˇ, awˬ lawn chi ve teˇ hpaˍ hkʼa peu˗eˬ yaw daꞈ tuˬ maˇ loˍ. (Yoˇhanˬ 16:12 htaꞈ tehˆ daꞈ sheˍ.) Nawˬ maˆ daꞈ chehˇ ve chaw, nawˬ maˇ hkʼawꞈ piˇ gaˇ ve awˬ lawn teˇ ceuˬ ceuˬ htaꞈ na laˇ ve kʼo, kʼoˆ piˇ sheˍ. Chi hkʼe hpehꞈ ve htawˇ, yawˇ cuˇ yiˍ cawˬ ve hkʼaw dawˇ cheˆ gʼa tuˬ, nawˬ maˆ daꞈ chehˇ ve chaw awˬ lawn chi teˇ hpaˍ htaꞈ gʼa shiˍ cawˇ ve yoˬ. Chi htaꞈ pa taw, awˬ yanˇ cawˬ htaˇ nawˬ hui hteˇ˗ehˬ yaw daꞈ cawˇ ve yoˬ.
7. Maˆ daꞈ chehˇ ve chaw hkʼa dehꞈ shiˍ daꞈ tuˬ aˬ htoꞈ ma awˬ hkʼaˇ ga piˇ gʼa ve le? (Awˇ ceˍ awˇ fa “ Teˇ gʼaˇ teˇ kaˬ chehˇ ve” htaꞈ nyi sheˍ.) (Awˬ han htaꞈ nyi sheˍ.)
7 Nawˬ maˆ daꞈ chehˇ ve chaw hkʼaˬ hkʼe ve chaw hpehꞈ ve htaꞈ hkʼaˬ hkʼe te hkʼa dehꞈ shiˍ gʼa tuˬ le? Hkʼa dehꞈ shiˍ daꞈ gʼa tuˬ awˬ hkʼaˇ lehˬ, na piˇ leh na taˍ ve yoˬ. (Tawˇ naˉ ve 20:5; Yaˍkoˆ 1:19) Nawˬ tawˇ hkʼa dehꞈ yaw daꞈ gʼa tuˬ ve awˬ yanˇ lehˬ, awˍ teˇ geh caˇ˗e ve, chaw guiˇ kuiˬ lo teˇ geh ca guiˇ˗e ve, maˇ heˆ leh teˇ geh hto toˇ˗e ve yoˬ. Chi hkʼoˆ kaꞈ, nawˬ huiˉ maˬ hkʼa dehꞈ shiˍ daꞈ tuˬ te gʼa ve awˬ yanˇ lehˬ, awˬ chawˇ leh yehˬ kʼa hkʼaw ve chaw geh teˇ geh guiˇ˗e ve yoˬ. Chi hkʼe ceh tiˉ maˇ heˆ. Nawˬ maˆ chehˇ ve chaw hkʼaˬ hkʼe ve chaw hpehꞈ ve htaꞈ shiˍ tuˬ, awˬ nu ve awˬ ceuˬ kaꞈ teˇ geh te gʼa ve yoˬ. Tawˇ pa haˉ te kʼo, awˬ viˉ awˬ nyi chaw ceuˬ maˇ shuˍ daꞈ ve geh kaꞈ laiˉ ceuˬ teˇ geh te ve yoˬ. Nehˬtaˬlehˬ mvuhˇ miˬ lo chehˇ ve A˗cha˗ven leh Eh˗li˗si˗a yawˇ huiˉ maˬ maˆ daꞈ chehˇ ve awˬ yanˇ htaꞈ kʼoˆ ve, “hkʼa dehꞈ shiˍ daꞈ tuˬ teˇ ceuˬ ceuˬ teˇ geh te ve yoˬ. Tawˇ pa haˉ te kʼo, awˬ chiˇ teˇ geh te ve, leh kanˉ teˇ geh te ve yoˬ. Ngaˬ hui chi hkʼe teˇ geh te htaˇ, teˇ gʼaˇ leh teˇ gʼaˇ daꞈ ve leh maˇ daꞈ ve htaꞈ hkʼa tawˍ lehˆ gʼa mawˬ ve yoˬ.”
Nawˬ huiˉ maˬ tawˇ gʼa yaw daꞈ tuˬ kanˉ teˇ ceuˬ ceuˬ teˇ geh te ve kʼo, hkʼa dehꞈ shiˍ daꞈ tuˬ yoˬ (Awˬ tawn 7-8 nyi sheˍ)
8. Maˆ daꞈ chehˇ ve chaw awˬ pon yehˬ kʼa hkʼaw oˉ kʼoˍ pui ve teˇ geh te ve aˬ htoꞈ ma awˬ bon gʼa ve le?
8 Chi hkʼoˆ kaꞈ, nawˬ hui hkʼa dehꞈ shiˍ daꞈ gʼa tuˬ awˬ hkʼaˇ lehˬ, Liꞈ hpu hkʼaw ve awˬ lawn htaꞈ caˉ daꞈ ve yaw daꞈ ve yoˬ. Nawˬ ve yehˬ kʼa awˬ pon Yaˬhoˉvaˬ a yeˇ uiˍ jaˇ ve tehꞈ shawˍ tuˬ, nawˬ heuˆ daꞈ˗oˬ ve kʼo yehˬ kʼa hkʼaw oˉ kʼoˍ pui ve hkʼaˬ htaˆ kaꞈ gʼa te ve yoˬ. (Cuˇ yiˍ piˇ ve 4:12) Chi htaꞈ pa taw, aˬ htoꞈ ma te maˆ daꞈ htaˇ chi ve maˇ te nyi ve le? Maˆ daꞈ chehˇ htaˇ, awˬ hpawˇ awˬ miˇ ma maˇ hpehꞈ leh, awˬ viˉ awˬ nyi hawˉ hkʼaˆ yaˇ miˇ htaꞈ sheh kʼai paˍ kaꞈ maˇ hpehꞈ sheˍ. Yaꞈ hkʼaˇ, yehˬ kʼa hkʼaw hkʼaˬ htaˆ kaꞈ oˉ kʼoˍ pui ve te ve lehˬ, teˇ gʼaˇ yonˍ hkʼaˇ yonˍ yeˬ ve hkʼaˬ hkʼe cawˬ ve htaꞈ mawˬ tuˬ te laˇ ve yoˬ. Aˍmeˬriˆkaꞈ mvuhˇ miˬ lo chehˇ ve Mehˆ leh Li˗saˆ ve awˬ lawn htaꞈ teˇ geh nyi sheˍ. Yawˇ huiˉ maˬ maˆ daꞈ htaˇ Liꞈ hpu hkʼaw ve awˬ lawn yaw daꞈ ve kaꞈ awˬ bon cawˬ ve yoˬ. Mehˆ kʼoˆ ve, “ngaˬ hui tanˬ maˆ daꞈ htaˇ yehˬ kʼa hkʼaw oˉ kʼoˍ pui ve te ve lehˬ, Gʼuiˬ sha ve kanˉ hkʼaˇ hkʼaw ve liꞈ kʼoˆ teˇ hpaˍ htaꞈ yehˇ ve yoˬ. Tawˇ pa haˉ te kʼo, maˆ daꞈ ve, heuˆ daꞈ ve, maˇ heˆ leh yehˬ kʼa hkʼaw ve awˬ lawn henˇ ve yoˬ. Chi ve teˇ hpaˍ ngaˬ huiˉ maˬ a yeˇ uiˍ ve laiˉ lawn htaꞈ caˉ daꞈ ve yaw daꞈ ve yoˬ. Chi hkʼe yaw daꞈ ve lehˬ sha ve maˇ heˆ.”
AWˬ NU VE AWˬ LAWN HTAꞈ DAWˇ NYI VE
9. Nawˬ chaw teˇ gʼaˇ htaꞈ maˆ daꞈ chehˇ ve kʼo, aˬ htoꞈ ma htaꞈ awˉ lawˉ dawˇ nyi cawˇ ve le?
9 Nawˬ chaw teˇ gʼaˇ htaꞈ maˆ daꞈ chehˇ ve tehꞈ a shu htaꞈ kʼoˆ piˇ gʼa ve le? Nawˬ huiˉ maˬ gʼa dawˇ cheˆ ve yoˬ. Awˉ lawˉ htaˇ hkʼaˬ nyiˇ gʼaˇ htaꞈ maˇ kʼoˆ piˇ. (Tawˇ naˉ ve 17:27) Chi hkʼe te ve lehˬ, nawˬ htaꞈ nyiˉ laˇ ve tehꞈ maˇ dawˇ leh shu na laˇ ve htaꞈ teˇ hkui teˇ hkui hkʼawꞈ piˇ tuˬ maˇ loˍ. Yaꞈ hkʼaˇ, nawˬ chaw teˇ gʼaˇ htaꞈ kaꞈ maˇ kʼoˆ piˇ ve kʼo, awˬ nu ve chaw shiˍ la ve htaꞈ kawˆ ve pa taw, shu maˇ mawˬ kuiˬ lo nawˬ huiˉ maˬ ceh tiˉ ca hkʼawˇ yaw daꞈ˗e ve yoˬ. Chi hkʼe te ve lehˬ kawˆ tuˬ cawˬ jaˇ. Nawˬ htaꞈ beˆ maˍ laˇ gʼa leh ga laˇ gʼa ve chaw htaꞈ kʼoˆ maˍ piˇ ve lehˬ, cuˇ yiˍ cawˬ ve yoˬ. (Tawˇ naˉ ve 15:22) Tawˇ pa haˉ te kʼo, yehˬ kʼa hkʼaw ve chaw, co ha hpawˇ ve chaw mawˇ hpehꞈ ve awˬ chawˇ, leh nyi haꞈ shaˉ paˍ, yawˇ hui htaꞈ kʼoˆ maˍ piˇ cawˇ ve yoˬ.
10. Nawˬ chaw teˇ gʼaˇ htaꞈ maˆ daꞈ chehˇ htaˇ, hkʼaˬ hkʼe te yawˆ yan daꞈ gʼa tuˬ le? (Tawˇ naˉ ve 22:3)
10 Nawˬ chaw teˇ gʼaˇ htaꞈ maˆ daꞈ chehˇ htaˇ hkʼaˬ hkʼe te yawˆ yan piˇ gʼa ve le? Nawˬ chaw teˇ gʼaˇ htaꞈ dawˇ cawˇ jaˇ ve kʼo, yawˇ awˬ paˇ lo chehˇ gaˇ ve yoˬ. Nawˬ hui maˇ gʼa te yaꞈ tuˬ, aˬ htoꞈ ma ga laˇ gʼa ve le? Te yaꞈ ve kʼo, Yaˬhoˉvaˬ nyi ma luˬ tuˬ te piˇ la ve yoˬ. (1 Kawˇrenˍhtuˆ 6:18) Te yaꞈ tuˬ ve awˬ lawn taˇ yaw daꞈ. Nawˬ huiˉ maˬ tiˉ teˇ geh taˇ chehˇ. Leh tzuhˬ taˇ dawˬ bvuhˆ. (Eˇfeˇsuꞈ 5:3) Awˬ lawn kʼo, chi ve teˇ hpaˍ teˇ geh zuhꞈ gaˇ tuˬ te laˇ leh, cawˇ ve awˬ ceuˬ htaꞈ te tuˬ haˍ ve yoˬ. Teˇ gʼaˇ leh teˇ gʼaˇ yawˆ yan daꞈ leh, Yaˬhoˉvaˬ ve awˬ liˇ awˬ hkʼaˇ htaꞈ yawˆ yan tuˬ, aˬ htoꞈ ma te gʼa ve nawˬ hui teˇ hkui teˇ hkui yaw daꞈ ve lehˬ cuˇ yiˍ cawˬ ve yoˬ. (Tawˇ naˉ ve 22:3 gʼaw sheˍ.) Ehˇtaˍyoˇpiˆ mvuhˇ miˬ lo chehˇ ve Daˍviˆ leh An˗miˆ yawˇ hui htaꞈ ga laˇ gʼa ve awˬ lawn kʼoˆ maˍ laˇ ve, “ngaˬ huiˉ maˬ teˇ geh chehˇ gaˇ ve kʼo, chaw maˇ kuiˬ lo maˇ heˆ leh, awˬ chawˇ chehˇ taˍ kuiˬ lo chehˇ ve yoˬ. Yehˬ hkʼaw maˇ heˆ leh kaˇ hkʼaw ngaˬ huiˉ maˬ tiˉ maˇ chehˇ jaw. Hkʼe te leh, ngaˬ hui maˇ gʼa te yaꞈ tuˬ jawˬ hpaw˗e gʼa ve yoˬ.”
11. Maˆ daꞈ ve chaw awˬ pon haꞈ daꞈ ve tehꞈ hpeuꞈ maw daꞈ ve lehˬ aˬ htoꞈ ma awˬ lawn htaꞈ dawˇ nyi cawˇ ve le?
11 Haꞈ daꞈ ve tehꞈ hkʼaˬ hkʼe te hpeuꞈ maw piˇ gʼa tuˬ le? Nawˬ huiˉ maˬ hkʼa dehꞈ dawˇ cawˇ daꞈ ve kʼo, keunˍ daꞈ ve hkʼaw haꞈ daꞈ ve tehꞈ hpeuꞈ maw piˇ sheˍ. Teˇ ceuˬ ceuˬ te leh te yaꞈ tuˬ te laˇ ve kʼo, nawˬ cuˇ yiˍ cawˬ ve hkʼaw dawˇ cheˆ gʼa tuˬ haˍ ve yoˬ. (Sawˉlaꞈmonˍ ve kʼa muiˬ hkawˇ 1:2; 2:6) Chi hkʼoˆ kaꞈ, teˇ gʼaˇ leh teˇ gʼaˇ haꞈ daꞈ ve tehꞈ hpeuꞈ maw piˇ tuˬ, awˬ leuˉ te jaˇ ve kʼo, chi Yaˬhoˉvaˬ nyi ma luˬ tuˬ te piˇ la ve yoˬ. (Tawˇ naˉ ve 6:27) Chi htaꞈ pa taw, maˆ daꞈ gehˇ sheˍ htaˇ haꞈ daꞈ ve hkʼaˬ hkʼe taw hpeuꞈ maw daꞈ gʼa tuˬ, Liꞈ hpu hkʼaw ve awˬ liˇ awˬ hkʼaˇ htaꞈ cuˇ leh gʼa yaw daꞈ ve yoˬ. c (1 Hteˇsaˍlawˇniˆ 4:3-7) A shu yawˇ awˬ to htaꞈ na nyi cawˇ ve, ‘ngaˬ chehˇ kuiˬ teˇ tawn lo ve chaw ngaˬ huiˉ maˬ haꞈ daꞈ ve tehꞈ hpeuꞈ maw daꞈ ve htaꞈ hkʼaˬ hkʼe dawˇ ve le? Leh chi hkʼe haꞈ daꞈ ve tehꞈ hpeuꞈ maw daꞈ ve lehˬ, te yaꞈ tuˬ te laˇ˗aw laˇ?’
12. Maˆ daꞈ ve chaw shoꞈ shaꞈ ve awˬ lawn cawˬ ve kʼo, yawˇ hui aˬ htoꞈ ma awˬ lawn htaꞈ dawˇ nyi cawˇ ve le?
12 Nawˬ huiˉ maˬ shoꞈ shaꞈ ve awˬ lawn cawˬ leh deˇ daꞈ ve kʼo hkʼaˬ hkʼe te cawˇ ve le? Nawˬ huiˉ maˬ maˇ maw maˇ maw deˇ daꞈ ve kʼo, chi nawˬ huiˉ maˬ teˇ geh kʼai maˇ gʼa˗o ve tehꞈ kʼoˆ gaˇ ve laˇ? Chi hkʼe maˇ heˆ. Awˬ lawn kʼo, teˇ ca˗ehˬ kaꞈ teˇ lawn le le hkʼa shuˍ˗ehˍ tiˉ dawˇ ve maˇ heˆ. Awˬ hpawˇ awˬ miˇ ma haꞈ daꞈ jaˇ ve lehˬ, teˇ gʼaˇ leh teˇ gʼaˇ yawˆ yan daꞈ leh, teˇ gʼaˇ dawˇ cawˇ ve awˬ ceuˬ htaꞈ te tuˬ pa ve yoˬ. Chi htaꞈ pa taw, chi teˇ hkui nawˬ shoꞈ shaꞈ ve awˬ lawn htaꞈ coˇ caˇ leh gu ve lehˬ, nawˬ heuˆ daꞈ peuˬ hkʼawꞈ nawˉ hkʼaˬ hkʼe te tuˬ ve awˬ hkʼaˇ htaꞈ shiˍ tuˬ ga laˇ ve yoˬ. Nawˬ huiˉ maˬ a shu yawˇ awˬ to htaꞈ na nyi cawˇ ve, ‘ngaˬ hui nyi ma gawˬ lehˍ te leh teˇ gʼaˇ leh teˇ gʼaˇ yawˆ yan daꞈ ve hkʼaw tawˇ yaw daꞈ˗aw laˇ? Ngaˬ hui yaꞈ ve htaꞈ haꞈ yuˬ leh, a shu yawˇ awˬ to daꞈ la tuˬ pa˗aw laˇ? Teˇ gʼaˇ leh teˇ gʼaˇ hkawˇ na daꞈ ve, lawˬ hkawˉ daꞈ ve, leh venˇ baˆ hpehˇ daꞈ˗aw laˇ?’ (Eˇfeˇsuꞈ 4:31, 32) Maˆ daꞈ htaˇ kaꞈ nawˬ huiˉ maˬ shoꞈ shaꞈ ve awˬ lawn cawˬ leh hkʼaˬ htaˆ kaꞈ deˇ daꞈ ve kʼo, heuˆ daꞈ peuˬ hkʼawꞈ nawˉ daꞈ la tuˬ tehꞈ taˇ dawˇ. Yawˇ nawˬ htaꞈ maˇ keunˍ ve tehꞈ mawˬ ve kʼo, maˇ maˆ daꞈ˗o tuˬ dawˇ cheˆ ve lehˬ, nyiˇ hpawˇ hpawˇ daꞈ ve yoˬ. d
13. Hkʼaˬ hkʼe maw maˆ daꞈ cawˇ ve htaꞈ shiˍ tuˬ aˬ htoꞈ ma ga laˇ ve le?
13 Nawˬ hui hkʼaˬ hkʼe maw maˆ daꞈ cawˇ ve le? Haˆ dawˇ cheˆ ve lehˬ heuˆ la kuiˬ cawˬ ve yoˬ. (Tawˇ naˉ ve 21:5) Chi htaꞈ pa taw, nawˬ hui hkʼa dehꞈ shiˍ daꞈ tuˬ maˆ daꞈ ve awˬ yanˇ gʼa yehˇ ve yoˬ. Yaꞈ hkʼaˇ, awˬ yanˇ taˇ maw jaˇ tcuh. Liꞈ hpu hkʼaw kʼoˆ ve, “dawˇ law tuˬ mehˉ kʼai ve kʼo, nyi ma htawˇ luˬ kʼai ve yoˬ.” (Tawˇ naˉ ve 13:12) Chi hkʼoˆ kaꞈ, maˆ daꞈ maw jaˇ ve kʼo, te yaꞈ la tuˬ awˬ hkʼaˇ cawˬ ve yoˬ. (1 Kawˇrenˍhtuˆ 7:9) Hkʼaˬ hkʼe maw maˆ daꞈ ve htaꞈ a yeˇ yuˬ ve aꞈ kehˉ, nawˬ a shu yawˇ awˬ to htaꞈ na nyi cawˇ ve, ‘ngaˬ dawˇ cheˆ gʼa tuˬ yawˇ htaꞈ chi aꞈ kehˉ gʼa shiˍ daꞈ tuˬ aˬ htoꞈ ma cawˬ sheˍ ve le?’
AWˬ VIˉ AWˬ NYI CHAW HAˉ YAˇ MIˇ HAˉ HTAꞈ HKʼAˬ HKʼE GA PIˇ GʼA VE LE?
14. Maˆ daꞈ chehˇ ve chaw htaꞈ ngaˬ hui hkʼaˬ hkʼe ga piˇ gʼa tuˬ le? (Awˬ han htaꞈ nyi sheˍ.)
14 Maˆ daꞈ chehˇ ve chaw htaꞈ ngaˬ hui shiˍ daꞈ ve kʼo, yawˇ hui htaꞈ hkʼaˬ hkʼe ga piˇ gʼa tuˬ le? Yawˇ hui htaꞈ jehˬ leh awˍ teˇ geh caˇ ve, yehˬ kʼa hkʼaw oˉ kʼoˍ pui ve teˇ geh te ve, maˇ heˆ leh teˇ ceuˬ ceuˬ teˇ geh te ve yoˬ. (Roˉmaꞈ 12:13) Chi hkʼe te ve lehˬ, yawˇ hui hkʼa dehꞈ shiˍ daꞈ tuˬ ga piˇ ve yoˬ. Yawˇ hui htaꞈ awˬ chawˇ te laˇ tuˬ loˍ˗aw laˇ? Yawˇ hui htaꞈ ca gʼawˬ˗e leh, shiˍ kʼoˬ piˇ tuˬ loˍ˗aw laˇ? Yawˇ huiˉ maˬ tiˉ tawˇ yaw daꞈ gaˇ ve kʼo, chaw mawˬ kuiˬ lo gʼa chehˇ cawˇ˗aw laˇ? Chi hkʼe hpehꞈ ve kʼo, nawˬ yawˇ hui htaꞈ ga piˇ gʼa˗aw laˇ? (Gaˍlaˍtiˆ 6:10) Eh˗li˗si˗a yawˇ A˗cha˗ven htaꞈ maˆ daꞈ htaˇ ve awˬ lawn kʼawꞈ kʼoˆ maˍ laˇ ve yoˬ. Yawˇ hui awˬ viˉ awˬ nyi ga laˇ ve htaꞈ awˬ hpfuhˇ shiˍ jaˇ. Eh˗li˗si˗a kʼoˆ ve, “shu mawˬ kuiˬ lo ngaˬ huiˉ maˬ ve awˬ lawn gʼa yaw daꞈ cawˇ ve kʼo, awˬ viˉ awˬ nyi yawˇ hui ve aˉ hkʼaw lo laˬ hpehꞈ ve tehꞈ kʼoˆ laˇ ve htaꞈ ngaˬ hui ha lehˬ jaˇ.” Maˆ daꞈ ve chaw nawˬ yawˇ hui geh awˬ chawˇ te laˇ tuˬ lawˬ laˇ ve kʼo, chi nawˬ yawˇ hui htaꞈ ga piˇ gʼa ve tehꞈ shawˍ cawˇ ve yoˬ. Nawˬ yawˇ hui htaꞈ awˬ yanˇ piˇ leh chaw mawˬ kuiˬ lo tawˇ yaw daꞈ tcuh gʼa ve yoˬ. Yaꞈ hkʼaˇ, nawˬ yawˇ huiˉ maˬ htaꞈ chaw maˇ mawˬ kuiˬ lo maˇ kʼai tcuh tuˬ shaˍ tiꞈ gʼa te ve yoˬ.—Hpiˇliˇpiˆ 2:4.
Awˬ viˉ awˬ nyi maˆ daꞈ chehˇ ve chaw htaꞈ ngaˬ hui ga piˇ gʼa ve (Awˬ tawn 14-15 nyi sheˍ)
15. Maˆ daꞈ chehˇ ve chaw htaꞈ awˬ viˉ awˬ nyi hkʼaˬ hkʼe ga piˇ gʼa sheˍ ve le? (Tawˇ naˉ ve 12:18)
15 Chi hkʼoˆ kaꞈ, maˆ daꞈ chehˇ ve chaw htaꞈ ngaˬ hui ga piˇ gʼa tuˬ, kʼoˆ cawˇ ve, leh maˇ kʼoˆ cawˇ ve htaꞈ dawˇ nyi cawˇ ve yoˬ. Teˇ pawˆ pawˆ kʼo, ngaˬ hui a shu yawˇ awˬ to htaꞈ yuˬ tiˍ leh teꞈ chiˉ maˇ kʼoˆ. (Tawˇ naˉ ve 12:18 gʼaw sheˍ.) Tawˇ pa haˉ te kʼo, yawˇ huiˉ maˬ maˆ daꞈ chehˇ ve ngaˬ hui awˬ nu ve chaw htaꞈ kʼoˆ piˇ gaˇ ve yoˬ. Yaꞈ hkʼaˇ, yawˇ hui awˬ lawn chi awˬ nu ve chaw htaꞈ yawˇ hui hkʼaˇ yawˇ hui kʼoˆ piˇ gaˇ leh, yawˇ hui ve awˬ lawn awˬ nu ve chaw htaꞈ maˇ kʼoˆ piˇ leh maˇ hkʼaiˉ daꞈ cawˇ. (Tawˇ naˉ ve 20:19; Roˉmaꞈ 14:10; 1 Hteˇsaˍlawˇniˆ 4:11) Chi hkʼoˆ kaꞈ, yawˇ hui heuˆ daꞈ tuˬ ve awˬ lawn htaꞈ ngaˬ hui maˇ na piˇ cawˇ. Chi yawˇ hui htaꞈ nyiˉ piˇ ve hkʼe hpehꞈ la gʼa ve yoˬ. Awˬ viˉ awˬ nyi yaˇ miˇ teˇ gʼaˇ Eh˗liˇ leh yawˇ ve awˬ hpawˇ kʼoˆ ve, “ngaˬ huiˉ maˬ heuˆ daꞈ tuˬ ve awˬ lawn maˇ yaw daꞈ sheˍ ve kaꞈ, hkʼaˬ hkʼe htaˇ heuˆ daꞈ tuˬ ve le tehꞈ awˬ nu ve chaw na laˇ htaˇ hpehꞈ haˍ jaˇ ve yoˬ.”
16. Maˆ daꞈ ve chaw maˇ maˆ daꞈ˗o tuˬ dawˇ cheˆ ve kʼo, ngaˬ hui hkʼaˬ hkʼe te cawˇ ve le?
16 Maˆ daꞈ chehˇ ve chaw maˇ maˆ daꞈ˗o tuˬ dawˇ cheˆ htaˇ, a shu teˇ gʼaˇ yaꞈ ve le tehꞈ ngaˬ hui maˇ na nyi piˇ cawˇ. (1 Peˍtruˆ 4:15) Awˬ viˉ awˬ nyi yaˇ miˇ teˇ gʼaˇ Li˗a kʼoˆ ve, “awˬ viˉ awˬ nyi hawˉ hkʼaˆ oˇ ve htaꞈ ngaˬ maˇ maˆ daꞈ˗o htaˇ, chi htaꞈ caˉ daꞈ ve awˬ nu ve chaw teˇ gʼaˇ teˇ ceuˬ kʼoˆ ve htaꞈ ngaˬ gʼa kaˇ ve yoˬ. Chi ngaˬ nyi ma naˬ jaˇ tuˬ te laˇ ve yoˬ.” Chi awˬ gʼuˇ suhˍ htaˇ kʼoˆ kʼai peuˬ ve hkʼa shuˍ, maˇ maˆ daꞈ˗o ve lehˬ awˬ yanˇ shonˇ ve tehꞈ kʼoˆ gaˇ ve maˇ heˆ. Yaꞈ hkʼaˇ, awˬ tehˬ kʼo yawˇ hui htaꞈ laiˉ ceuˬ maˍ piˇ ve yoˬ. Chi ve lehˬ, yawˇ huiˉ maˬ cuˇ yiˍ cawˬ ve hkʼaw dawˇ cheˆ gʼa tuˬ ga piˇ ve yoˬ. Chi hkʼe hpehꞈ ve htawˇ, maˇ maˆ daꞈ˗o ve lehˬ nyi ma luˬ ve maˇ heˆ leh, chehˇ bawˬ tuˬ kaꞈ te piˇ ve yoˬ hehˉ. Hkʼe te leh, ngaˬ hui yawˇ hui htaꞈ ga piˇ gʼa tuˬ awˬ hkʼaˇ ca cawˇ ve yoˬ.—Tawˇ naˉ ve 17:17.
17. Maˆ daꞈ chehˇ ve chaw caˉ leh aˬ htoꞈ ma te cawˇ ve le?
17 Ngaˬ hui gʼa henˇ˗oˬ ve hkʼa shuˍ, maˆ daꞈ chehˇ ve awˬ yanˇ htaˇ, shoꞈ shaꞈ ve laiˉ ceuˬ cawˬ ve yoˬ. Yaꞈ hkʼaˇ, ha lehˬ tuˬ kaꞈ te piˇ ve yoˬ. Ceh˗si˗kaˇ kʼoˆ ve, “maˆ daꞈ chehˇ ve awˬ yanˇ htaˇ, shoꞈ shaꞈ ve awˬ lawn cawˬ maˇ jaˇ. Yaꞈ hkʼaˇ, teˇ geh chehˇ leh hkʼa dehꞈ shiˍ daꞈ tuˬ te ve awˬ hpfuhˆ hkʼawꞈ jaˇ.” Nawˬ chaw haˉ yaˇ miˇ haˉ cawˬ ve kʼo, hkʼa dehꞈ shiˍ daꞈ tuˬ coˇ caˇ leh te sheˍ. Chi hkʼe te ve kʼo, nawˬ huiˉ maˬ maˆ daꞈ ve cuˇ yiˍ cawˬ ve hkʼaw dawˇ cheˆ gʼa tuˬ ga laˇ ve yoˬ.
KA MUIˬ HKAWˇ 49 Yaˬhoˉvaˬ nyi hkʼaˇ suh tuˬ te piˇ ve
a Awˬ lawn chi ve hkʼaw awˬ meh teˇ hpaˍ hpaˍ pa ve.
b Awˬ leuˉ kʼawꞈ shiˍ gaˇ ve kʼo, Yaˇ nehˬ na ve na hkawˇ—Hkʼawꞈ laˇ hkawˇ yehˇ gʼa ve liꞈ kʼoˆ 2 kʼoˆ teˇ kʼoˆ liꞈ mehˆ hpfuhˇ 39-40 hkʼaw nyi sheˍ.
c Chaw haˉ yaˇ miˇ haˉ teˇ gʼaˇ ve hpaˇ kʼaˍ htawˇ ve kʼo, pehꞈ ve tzuhˆ ve hpawˇ te yaꞈ tuˬ te piˇ ve yoˬ. Chi hkʼe hpehꞈ la puiˉ ve kʼo, nyi haꞈ shaˉ paˍ awˬ moˍ suhˉ jehˬ paˍ gʼa teh ve yoˬ. Chi hkʼoˆ kaꞈ, cuˉ htawˇ ve maˇ heˆ leh, tawˇ yaw tuˬ awˬ hkʼeun hkʼaw pehꞈ ve tzuhˆ ve awˬ lawn tawˇ yaw daꞈ ve, maˇ heˆ leh pehꞈ ve tzuhˆ ve awˬ lawn liꞈ bvuhꞈ feu piˇ ve kaꞈ, suhˉ jehˬ paˍ awˬ moˍ gʼa teh ve yoˬ. Chi ve lehˬ teˇ lawn leh teˇ lawn htaꞈ cawˬ ve yoˬ.
d Awˬ leuˉ kʼawꞈ shiˍ gaˇ ve kʼo, awˬ lawn Shaw nyi kuiˬ Taꞈ yehˬ Ha pa 8 maˬ 15 nyi 1999 hkʼawꞈ “Gʼaw ve chaw na nyi hkawˇ” hkʼaw nyi sheˍ. (Laˇhuˍ hkawˇ maˇ cawˬ.)