1. A yeˇ uiˍ ve hpawnˬ daꞈ ve 2023 hkʼawꞈ htaˇ, ngaˬ hui aˬ htoꞈ ma awˬ lawn gʼa kaˇ ve le?

 A yeˇ uiˍ ve hpawnˬ daꞈ ve 2023 hkʼawꞈ htaˇ, a na gʼa ve awˬ suhˉ pa ve htaꞈ ngaˬ hui gʼa kaˇ leh ngaˬ hui ve kanˉ hto toˇ ve htaꞈ caˉ daꞈ ve kaꞈ gʼa kaˇ ve yoˬ. Tawˇ pa haˉ te kʼo, Uiˍ ve Baˍbuˍlonˍ venˇ te luˬ peuˬ hkʼawꞈ nawˉ, chaw yaˇ Yaˬhoˉvaˬ hpawˇ chehˇ la tuˬ awˬ hkʼaˇ cawˬ sheˍ ve tehꞈ, ngaˬ hui gʼa kaˇ ve yoˬ. 2023 hkʼawꞈ Ha pa 11 maˬ tanˬ leh hto toˇ ve chaw teˇ gʼaˇ le le peuˬ laˬ htaˇ hkʼe, hto toˇ ve kanˉ htaꞈ caˉ daꞈ ve teˇ ceuˬ le le bvuhꞈ tuˬ maˇ loˍ. Chi hkʼe pa ve lehˬ, ngaˬ hui ve kanˉ peuˬ laˬ htaˇ hkʼe a yeˇ maˇ uiˍ ve tehꞈ shawˍ tuˬ te laˇ˗aw laˇ? Maˇ te laˇ?

2. Aˬ htoꞈ ma te ngaˬ hui ve kanˉ haˆ haˆ te cawˇ ve le? (Maˍkuˆ 13:10)

² Awˬ yanˇ gʼaˇ hteꞈ ponˬ kʼai ve kʼo, ngaˬ hui ve kanˉ kaꞈ haˆ haˆ te tuˬ loˍ ve yoˬ. Aˬ htoꞈ ma pa taw le? Awˬ lawn kʼo, awˬ yanˇ peuˬ la paˇ neˇ ve yoˬ. Awˬ leh meuˇ ve awˬ yanˇ hkʼaw hto toˇ ve kanˉ htaꞈ caˉ daꞈ ve, Yeˍsuˆ hkʼaˬ hkʼe kʼoˆ taˍ ve htaꞈ chaˬ nyi sheˍ. (Maˍkuˆ 13:10 gʼaw sheˍ.) Maꞈhtehˍ liꞈ hkʼaw Yeˍsuˆ kʼoˆ ve, “awˬ leh meuˇ” maˇ gaˬ sheˍ htaˇ, miˬ guiˬ chi hkʼoˆ lo Gʼuiˬ sha ve mvuhˇ miˬ daꞈ ve awˬ lawn sha tanˇ teˇ kaˬ le le lo gʼa ca maˍ piˇ ve yoˬ. (Maꞈhtehˍ 24:14) Choˬ kaˬ lo kʼoˆ ve, awˬ leh meuˇ ve awˬ yanˇ chi lehˬ, Saˍtanˍ ve awˬ leh meuˇ ve awˬ yanˇ leh “awˬ nyi awˬ haˉ oˇ ve htaꞈ” caˉ daꞈ ve awˬ leh meuˇ ve awˬ yanˇ Yaˬhoˉvaˬ tinˍ taˍ˗oˬ ve yoˬ. (Maꞈhtehˍ 24:36; 25:13; Tcuh yaˇ 1:7) Teˇ nyi leh teˇ nyi ponˬ kʼai htaˇ, ngaˬ hui awˬ leh meuˇ ve awˬ nyi lo gʼaˇ hteꞈ gaˬ la chehˇ ve yoˬ. (Roˉmaꞈ 13:11) Chi htaꞈ pa taw, awˬ leh meuˇ ve awˬ yanˇ gaˬ la htaˇ hkʼa gaˬ, ngaˬ hui gʼa hto toˇ cawˇ ve yoˬ.

3. Ngaˬ hui hto toˇ gaˇ tuˬ aˬ htoꞈ ma te laˇ ve le?

³ Gʼuiˬ sha ve kanˉ te ve htaꞈ caˉ daꞈ ve a yeˇ uiˍ ve na hkawˇ teˇ maˬ htaꞈ ngaˬ hui gʼa dawˇ nyi cawˇ ve yoˬ. Chi ve lehˬ, aˬ htoꞈ ma te ngaˬ  hui daꞈ ve awˬ lawn sha tanˇ hto toˇ cawˇ ve le? Haꞈ pehnˇ ve htaꞈ pa taw, ngaˬ hui daꞈ ve awˬ lawn sha tanˇ hto toˇ gaˇ tuˬ te laˇ ve yoˬ. Ngaˬ hui daꞈ ve awˬ lawn sha tanˇ hto toˇ htaˇ, daꞈ ve awˬ lawn sha tanˇ htaꞈ ngaˬ hui haꞈ ve, chaw yaˇ htaꞈ haꞈ ve, tehꞈ hpeuꞈ maw piˇ leh a yeˇ uiˍ jaˇ ve lehˬ ngaˬ hui Yaˬhoˉvaˬ leh yawˇ ve awˬ meh htaꞈ haꞈ ve yoˬ. Awˬ lawn chi ve teˇ hpaˍ htaꞈ teˇ geh henˇ tuˬ yoˬ.

NGAˬ HUI DAꞈ VE AWˬ LAWN SHA TANˇ HTAꞈ HAꞈ VE PA TAW HTO TOˇ VE

4. Daꞈ ve awˬ lawn sha tanˇ awˉ lawˉ gʼa kaˇ htaˇ, ngaˬ hui hkʼaˬ hkʼe dawˇ ve le?

⁴ Nawˬ daꞈ ve awˬ lawn sha tanˇ awˉ lawˉ gʼa kaˇ htaˇ, hkʼaˬ hkʼe dawˇ ve htaꞈ tawnˇ gʼa ve yoˬ. Tawˇ pa haˉ te kʼo, yehˬ kʼa hkʼaw yaˇ paw la gehˇ sheˍ ve maˇ heˆ leh nawˬ teˇ gaˇ ve kanˉ gʼa ve yoˬ. Awˬ lawn chi nawˬ yehˬ kʼa hkʼaw ve chaw maˇ heˆ leh awˬ chawˇ htaꞈ kʼoˆ piˇ gaˇ tuˬ yoˬ. Leh Gʼuiˬ sha ve mvuhˇ miˬ htaꞈ caˉ daꞈ ve, daꞈ ve awˬ lawn sha tanˇ nawˬ gʼa kaˇ htaˇ, nawˬ hkʼaˬ hkʼe dawˇ ve le?

5. Liꞈ hpu hkʼaw awˬ tehˬ ve nawˬ awˉ lawˉ teˇ pawˆ gʼa henˇ htaˇ, hkʼaˬ hkʼe dawˇ ve le? (Awˬ han htaꞈ nyi sheˍ.)

⁵ Nawˬ Liꞈ hpu hkʼaw awˬ tehˬ ve htaꞈ awˉ lawˉ teˇ pawˆ gʼa henˇ htaˇ, nawˬ hkʼaˬ hkʼe dawˇ ve le? Awˬ pa Yaˬhoˉvaˬ nawˬ htaꞈ haꞈ jaˇ ve nawˬ gʼa shiˍ ve yoˬ. Yaˬhoˉvaˬ nawˬ htaꞈ yawˇ ve yehˬ kʼa hkʼaw ve chaw hpehꞈ tcuh gaˇ ve yoˬ. Yawˇ ka tiꞈ te taˍ laˇ ve, naˬ ve gawˬ ve, leh tuꞈ ve hkanˍ ve mehˉ kʼai tuˬ yoˬ. Nawˬ haꞈ ve chaw suh˗oˬ ve miˬ guiˬ awˬ suhˉ hkʼaw kʼawꞈ teꞈ tu la leh, gʼa kʼawꞈ mawˬ daꞈ tuˬ ve dawˇ law kuiˬ htaꞈ gʼa shiˍ ve yoˬ. Leh nawˬ laiˉ ceuˬ kaꞈ gʼa henˇ sheˍ ve yoˬ. (Maˍkuˆ 10:29, 30; Yoˇhanˬ 5:28, 29; Roˉmaꞈ 8:38, 39; Hpeuꞈ maˍ ve 21:3, 4) Awˬ tehˬ ve awˬ lawn chi teˇ hpaˍ nawˬ htaꞈ awˬ gʼaˇ peꞈ laˇ jaˇ ve yoˬ. (Luˉkaꞈ 24:32) Nawˬ gʼa henˇ ve awˬ ceuˬ htaꞈ haꞈ leh awˬ nu ve chaw htaꞈ kaꞈ kʼoˆ piˇ gaˇ ve yoˬ.—Yeˍraˍmiˆ 20:9 htaꞈ tehˆ daꞈ sheˍ.

6. Ui˗neˆ leh Ronˆ ve awˬ lawn nawˬ htaꞈ hkʼaˬ hkʼe maˍ laˇ ve le?

⁶ Ui˗neˆ ve awˬ lawn htaꞈ teˇ geh nyi sheˍ. Ui˗neˆ b a shaꞈ 10 hkʼawꞈ htaˇ yawˇ ve awˬ pa suh˗e ve yoˬ. Yawˇ kʼoˆ ve, “oˇ htaˇ ngaˬ htawˇ dawˇ nawˬ dawˇ cawˬ ve, ‘ngaˬ pa mvuhˇ naw ma hkʼoˆ taˆ˗e˗oˬ ve laˇ? Maˇ heˆ  leh ngaˬ pa co co taiˍ taiˍ mehˉ kʼai˗oˬ ve laˇ?’ Awˬ nu ve yaˇ awˬ pa cawˬ ve ngaˬ hkawehˉ jaˇ.’ Ui˗neˆ yawˇ awˬ pa tuˍ kuiˬ lo hkʼaˬ htaˆ kaꞈ kʼai leh yawˇ awˬ pa tuˍ hpfuh gʼuˇ suhˍ lo hkui tcuhˉ teh leh bon lawˬ ve hkʼaw kʼoˆ ve, “Gʼuiˬ sha˗oˬ chi teˇ hkui ngaˬ pa hkʼaˬ kaˬ lo chehˇ taˍ ve htaꞈ ngaˬ shiˍ gaˇ ve yoˬ.” Ui˗neˆ ve awˬ pa suh˗e ve 17 hkʼawꞈ peuˬ hkʼawꞈ nawˉ, Shaˉhkiˆhkanˍ ve chaw yawˇ geh ca hto toˇ la leh yawˇ Liꞈ hpu henˇ tuˬ kʼoˆ piˇ ve yoˬ. Suh˗oˬ ve chaw teꞈ chiˉ maˇ shiˍ leh zuhꞈ meuˉ kʼa mehˬ jaˇ ve htaꞈ shuˍ ve tehꞈ Ui˗neˆ gʼa shiˍ ve yoˬ. Leh Yaˬhoˉvaˬ ka tiꞈ te taˍ laˇ ve, awˬ gʼuˇ suhˍ hpawˇ suh˗oˬ ve chaw htaꞈ kʼawꞈ teꞈ tu la piˇ tuˬ yoˬ. Awˬ tehˬ ve awˬ lawn chi yawˇ ha lehˬ jaˇ tuˬ te piˇ ve yoˬ. Awˬ lawn kʼo, yawˇ gʼaꞈ ca maw jaˇ˗oˬ ve na hkawˇ htaꞈ gʼa shiˍ ve yoˬ. (Cuˇ yiˍ piˇ ve 9:5, 10; Tcuh yaˇ 24:15) Awˬ lawn chi Ui˗neˆ gʼa shi htaˇ, ha lehˬ jaˇ leh yawˇ ve awˬ miˇ ma Ronˆ kaꞈ Liꞈ hpu henˇ leh dawˇ cawˇ jaˇ ve yoˬ. 1978 hkʼawꞈ htaˇ, yawˇ huiˉ maˬ Baˆtiˆsaˬ haꞈ yuˬ ve yoˬ. Yawˇ huiˉ maˬ Liꞈ hpu hkʼaw awˬ tehˬ ve awˬ lawn yehˬ kʼa hkʼaw ve chaw, awˬ chawˇ, leh awˬ nu ve chaw htaꞈ kaꞈ kʼoˆ piˇ ve yoˬ. Ui˗neˆ leh awˬ miˇ ma 70 gʼaˇ hpaˆ uiˍ la mvuh la leh Baˆtiˆsaˬ haꞈ yuˬ tuˬ ga piˇ ve yoˬ.

7. Liꞈ hpu hkʼaw awˬ tehˬ ve htaꞈ ngaˬ hui haꞈ˗oˬ htaˇ, ngaˬ hui aˬ htoꞈ ma te gaˇ tuˬ te laˇ ve le? (Luˉkaꞈ 6:45)

⁷ Liꞈ hpu hkʼaw awˬ tehˬ ve htaꞈ ngaˬ hui haꞈ˗oˬ htaˇ, shu htaꞈ kʼoˆ piˇ gaˇ jaˇ ve yoˬ. (Luˉkaꞈ 6:45 gʼaw sheˍ.) Ngaˬ hui kaꞈ awˉ lawˉ peuˇ ve Yeˍsuˆ ve awˬ laꞈ gʼawˇ hkʼa shuˍ dawˇ ve yoˬ. Oˇ kaˬ lo kʼoˆ ve, ‘ngaˬ hui lehˬ gʼa kaˇ gʼa mawˬ ve awˬ lawn teˇ hpaˍ htaꞈ maˇ hto maˇ maˍ ve kʼo, chehˇ maˇ hpehꞈ ve yoˬ.’ (Tcuh yaˇ 4:20) Ngaˬ hui Liꞈ hpu hkʼaw awˬ tehˬ ve htaꞈ haꞈ jaˇ ve pa taw, awˬ nu ve chaw htaꞈ kʼoˆ piˇ gaˇ jaˇ ve yoˬ.

NGAˬ HUI CHAW YAˇ HTAꞈ HAꞈ VE PA TAW HTO TOˇ VE

8. Aˬ htoꞈ ma te ngaˬ hui awˬ nu ve chaw htaꞈ daꞈ ve awˬ lawn sha tanˇ hto maˍ piˇ gaˇ tuˬ te laˇ ve le? (Awˇ ceˍ awˇ fa “ Chaw yaˇ htaꞈ haꞈ ve—Awˬ laꞈ gʼawˇ hpehꞈ la tuˬ maˍ piˇ˗oˆ” htaꞈ nyi sheˍ.) (Awˬ han htaꞈ nyi sheˍ.)

⁸ Yaˬhoˉvaˬ leh Yeˍsuˆ chaw yaˇ htaꞈ haꞈ ve hkʼe ngaˬ hui kaꞈ haꞈ ve yoˬ. (Tawˇ naˉ ve 8:31; Yoˇhanˬ 3:16) “Dawˇ law kuiˬ kaꞈ maˇ cawˬ leh Gʼuiˬ sha kaꞈ maˇ cawˬ ve” tehꞈ dawˇ ve chaw htaꞈ ngaˬ hui ha kʼaˉ ve yoˬ. (Eˇfeˇsuꞈ 2:12) Iˉ kaˆ kʼa ve hkʼa shuˍ, chaw chi teˇ hpaˍ a shaꞈ teꞈ kuiˬ lo shoꞈ shaꞈ ve cawˬ maˇ jaˇ ve yoˬ. Yaꞈ hkʼaˇ, ngaˬ hui Gʼuiˬ sha ve mvuhˇ miˬ daꞈ ve awˬ lawn sha tanˇ cawˬ ve yoˬ. Chi ve lehˬ iˉ kaˆ lawehˇ tuˬ aˉ poꞈ htaꞈ shuˍ leh yawˇ hui dawˇ law kuiˬ cawˬ tuˬ ga piˇ gʼa ve yoˬ. Haꞈ pehnˇ ve leh ha kʼaˉ ve, ngaˬ hui yawˇ hui htaꞈ daꞈ ve awˬ lawn sha tanˇ hto maˍ piˇ gaˇ tuˬ te laˇ ve yoˬ. Liꞈ hpu hkʼaw daꞈ ve awˬ lawn sha tanˇ yawˇ hui dawˇ law kuiˬ cawˬ tuˬ ga piˇ gʼa ve yoˬ. Tawˇ pa haˉ te kʼo, chi teˇ hkui kaꞈ yawˇ hui ha lehˬ ve cawˬ tuˬ leh, yawˇ hui htaꞈ “awˬ tehˬ awˬ na yeˬ ve a shaꞈ” dawˇ law kuiˬ cawˬ tuˬ kaꞈ ga piˇ gʼa ve yoˬ. Chi miˬ guiˬ awˬ suhˉ hkʼaw co co taiˍ taiˍ ve a shaꞈ gʼa tuˬ yoˬ.—1 Tiˆmoˉseˍ 6:19.

9. Awˬ gʼuˇ suhˍ hpawˇ ve awˬ lawn ngaˬ hui chaw yaˇ htaꞈ aˬ htoꞈ ma shaˍ tiꞈ piˇ ve le? Leh aˬ htoꞈ ma te chi hkʼe te ve le? (Yeˍsaˍkeˍlaˆ 33:7, 8)

⁹ Chi hkʼoˆ kaꞈ, chaw yaˇ htaꞈ haꞈ ve pa taw, maˇ maw maw kʼo, awˬ leh meuˇ ve awˬ yanˇ gaˬ la tuˬ yoˬ tehꞈ ngaˬ hui yawˇ hui htaꞈ shaˍ tiꞈ piˇ gaˇ  tuˬ te laˇ ve yoˬ. (Yeˍsaˍkeˍlaˆ 33:7, 8 gʼaw sheˍ.) Shaˉhkiˆhkanˍ ve chaw maˇ hpehꞈ ve awˬ chawˇ, awˬ viˉ awˬ nyi htaꞈ ngaˬ hui ha kʼaˉ ve yoˬ. Yawˇ hui “miˬ guiˬ htaꞈ te hpanˍ ve teˇ nyi htaꞈ tanˬ leh yaꞈ nyi hkʼa gaˬ maˇ hpehꞈ la jaw sheˍ leh, awˬ hkʼawꞈ nawˉ kaꞈ maˇ kʼawꞈ hpehꞈ la tuˬ ve tuꞈ jaˇ hkanˍ jaˇ ve teˇ ceuˬ” gaˬ la chehˇ ve htaꞈ yawˇ hui maˇ shiˍ ve yoˬ. (Maꞈhtehˍ 24:21) Yaˬhoˉvaˬ suhˉ jehˬ ve awˬ nyi maˇ heˆ heˆ ve bon liˇ htaꞈ te luˬ leh, peuˬ hkʼawꞈ nawˉ Saˍtanˍ ve awˬ yanˇ Aˍmaˍgeˍdonˍ hkʼaw te luˬ ve yawˇ hui htaꞈ shiˍ tcuh gaˇ ve yoˬ. (Hpeuꞈ maˍ ve 16:14, 16; 17:16, 17; 19:11, 19, 20) Chaw yaˇ maˇ maˇ Yaˬhoˉvaˬ shaˍ tiꞈ piˇ ve htaꞈ na tuˬ leh, chi teˇ hkui kaꞈ awˬ tehˬ ve htaꞈ oˉ kʼoˍ pui la tuˬ, ngaˬ hui bon lawˬ ve yoˬ. Yaꞈ hkʼaˇ, awˬ suhˍ awˬ shaˍ hpawˇ ngaˬ hui haꞈ ve awˬ viˉ awˬ nyi shaˍ tiꞈ piˇ ve htaꞈ maˇ na yuˬ ve kʼo, hkʼaˬ hkʼe te tuˬ le? Yawˇ hui awˬ pon awˬ yanˇ cawˬ sheˍ ve laˇ?

10. Awˬ gʼuˇ suhˍ hpawˇ hpehꞈ la tuˬ ve awˬ ceuˬ htaꞈ caˉ daꞈ ve, shaˍ tiꞈ peꞈ laˇ ve aˬ htoꞈ ma te ngaˬ hui hto toˇ cawˇ ve le?

¹⁰ Peuˬ taˉ ve teˇ lawn hkʼaw gʼa henˇ˗oˬ ve hkʼa shuˍ, Uiˍ ve Baˍbuˍlonˍ venˇ htaꞈ te luˬ ve yawˇ hui gʼa mawˬ peuˬ hkʼawꞈ nawˉ, venˇ baˆ dawˇ hpfuhˆ ve chaw htaꞈ Yaˬhoˉvaˬ ga piˇ tuˬ hpehꞈ kʼai gʼa ve yoˬ. Chi hkʼe hpehꞈ ve kʼo, ngaˬ hui hto toˇ ve haˆ haˆ te cawˇ ve yoˬ. Ngaˬ hui chi teˇ hkui yawˇ hui htaꞈ kʼoˆ piˇ ve awˬ ceuˬ awˬ gʼuˇ suhˍ hpawˇ yawˇ hui dawˇ nawˇ la tuˬ yoˬ hehˉ. (Yeˍsaˍkeˍlaˆ 33:33 htaꞈ tehˆ daꞈ sheˍ.) Teˇ pawˆ pawˆ ngaˬ hui shaˍ tiꞈ piˇ ve tawˇ hkawˇ htaꞈ yawˇ hui dawˇ nawˇ la leh chi ve teˇ ceuˬ le le awˬ leh meuˇ maˇ gaˬ sheˍ htaˇ, yawˇ hui Yaˬhoˉvaˬ htaꞈ oˉ kʼoˍ pui la gaˇ tuˬ te piˇ ve yoˬ. “Miˬ hiˆ” jaˇ ve peuˬ hkʼawꞈ nawˉ Hpiˇliˇpiˆ venˇ hkʼaw ve htawnˍ awˬ hoˉ venˇ baˆ dawˇ hpfuhˆ ve hkʼa shuˍ shuˍ, chi teˇ hkui awˬ tehˬ ve htaꞈ maˇ haꞈ yuˬ ve chaw htawˇ, Uiˍ ve Baˍbuˍlonˍ venˇ htaꞈ te luˬ ve gʼa mawˬ peuˬ hkʼawꞈ nawˉ, yawˇ venˇ baˆ dawˇ hpfuhˆ tuˬ yoˬ hehˉ.—Tcuh yaˇ 16:25-34.

NGAˬ HUI YAˬHOˉVAˬ LEH YAWˇ VE AWˬ MEH HTAꞈ HAꞈ VE PA TAW HTO TOˇ VE

11. Yaˬhoˉvaˬ lehˬ awˬ meꞈ awˬ hponˇ teˇ ceuˬ, yawˆ yan ve teˇ ceuˬ leh kanˇ paˆ teˇ ceuˬ htaꞈ gʼa keunˍ ve tehꞈ ngaˬ hui hkʼaˬ hkʼe te piˇ gʼa ve le? (Hpeuꞈ maˍ ve 4:11) (Awˬ han htaꞈ nyi sheˍ.)

¹¹ Ngaˬ hui daꞈ ve awˬ lawn sha tanˇ hto toˇ ve a yeˇ uiˍ jaˇ ve lehˬ, Yaˬhoˉvaˬ leh yawˇ ve awˬ meh daꞈ kehˬ ve htaꞈ haꞈ ve yoˬ. Hto toˇ˗e ve lehˬ Yaˬhoˉvaˬ htaꞈ chiˇ mvuh ve tehꞈ ngaˬ hui shawˍ ve yoˬ. (Hpeuꞈ maˍ ve 4:11 gʼaw sheˍ.) Yaˬhoˉvaˬ lehˬ “awˬ meꞈ awˬ hponˇ teˇ ceuˬ, yawˆ yan ve teˇ ceuˬ leh kanˇ paˆ teˇ ceuˬ htaꞈ gʼa keunˍ ve” tehꞈ ngaˬ hui kaꞈ dawˇ ve yoˬ. Gʼuiˬ sha ve kanˉ ka tiꞈ yeˬ ve hkʼaw te ve chaw awˬ pon Yaˬhoˉvaˬ ‘awˬ ceuˬ hkʼa peu˗eˬ htaꞈ hpanˍ shehˍ hpaˇ’ leh ngaˬ hui ve a shaꞈ htaꞈ kaꞈ yawˇ hpanˍ taˍ ve tehꞈ awˬ nu ve chaw htaꞈ hto piˇ htaˇ, yawˇ hui Yaˬhoˉvaˬ htaꞈ chiˇ mvuh leh yawˆ yan piˇ gʼa ve yoˬ. Ngaˬ hui Yaˬhoˉvaˬ htaꞈ awˬ meꞈ awˬ hponˇ piˇ gʼa ve lehˬ, awˬ yanˇ yehˇ ve, awˬ gʼaˇ yehˇ ve, leh te gʼa ve hkʼe coˇ caˇ leh hto toˇ ve yoˬ. (Maꞈhtehˍ 6:33; Luˉkaꞈ 13:24; Kawˇlawˇsehˇ 3:23) Ngaˬ hui htaꞈ haꞈ ve Gʼuiˬ sha ve awˬ lawn htaꞈ caˉ daꞈ ve ngaˬ hui awˬ nu ve chaw htaꞈ hto maˍ piˇ ve dawˇ cawˇ jaˇ. Gʼuiˬ sha ve awˬ meh tcuhˉ kuiˬ hkʼaˬ hkʼe cawˬ ve ngaˬ hui awˬ nu ve chaw htaꞈ kʼoˆ maˍ piˇ leh yawˇ hkʼaˬ hkʼe ve Gʼuiˬ sha hpehꞈ  ve kaꞈ kʼoˆ maˍ piˇ ve yoˬ. Aˬ htoꞈ ma pa taw ngaˬ hui chi hkʼe te gaˇ ve le?

12. Ngaˬ hui Gʼuiˬ sha ve kanˉ te htaˇ, yawˇ ve awˬ meh htaꞈ hkʼaˬ hkʼe te yawˆ yan piˇ gʼa tuˬ le?

¹² Ngaˬ hui Yaˬhoˉvaˬ htaꞈ haꞈ ve pa taw, ngaˬ hui yawˇ ve awˬ meh htaꞈ yawˆ yan tuˬ te piˇ gaˇ ve yoˬ. (Maꞈhtehˍ 6:9) Saˍtanˍ Yaˬhoˉvaˬ htaꞈ caˉ daꞈ ve maˇ heˆ heˆ kʼoˆ ve htaꞈ ngaˬ hui maˇ dawˇ cawˇ. (Awˬ hkuiˉ puiˍ 3:1-5; Yawˇbaˆ 2:4; Yoˇhanˬ 8:44) Ngaˬ hui hto toˇ˗e htaˇ, Yaˬhoˉvaˬ htaꞈ caˉ daꞈ ve awˬ tehˬ ve awˬ lawn teˇ gʼaˇ le le htaꞈ hto maˍ piˇ gaˇ ve yoˬ. Yawˇ lehˬ haꞈ pehnˇ ve Gʼuiˬ sha hpehꞈ ve tehꞈ teˇ gʼaˇ le le htaꞈ shiˍ tcuh gaˇ ve yoˬ. Chi ve lehˬ, Yaˬhoˉvaˬ ve te hkʼaˇ dawˇ hkʼaˇ daꞈ jaˇ ve awˬ ceuˬ hpehꞈ ve yoˬ. Yawˇ hteˇ ve cawˇ ve suhˉ jehˬ shehˍ hpaˇ Gʼuiˬ sha hpehꞈ ve tehꞈ, teˇ gʼaˇ le le htaꞈ shiˍ tcuh gaˇ ve yoˬ. Maˇ maw ve awˬ yanˇ Gʼuiˬ sha ve mvuhˇ miˬ tuꞈ ve hkanˍ ve teˇ ceuˬ le le htaꞈ te luˬ leh chaw yaˇ htaꞈ dawˇ sha gawˬ lehˍ ve, leh ha lehˬ ve tiˉ cawˬ tcuh tuˬ yoˬ. (Chiˇ mvuh ve 37:10, 11, 29; 1 Yoˇhanˬ 4:8) Ngaˬ hui hto toˇ˗e htaˇ Yaˬhoˉvaˬ ve awˬ meh htaꞈ haꞈ shaˉ ve kʼo, yawˇ ve awˬ meh htaꞈ yawˆ yan tuˬ ngaˬ hui te piˇ chehˇ ve yoˬ. Ngaˬ hui a shaꞈ teꞈ kuiˬ hkʼaw Yaˬhoˉvaˬ ve Shaˉhkiˆhkanˍ ve chaw hpehꞈ ve tehꞈ hpeuꞈ maw piˇ chehˇ ve kʼo, ngaˬ hui ha lehˬ jaˇ ve yoˬ. Aˬ htoꞈ ma te ngaˬ hui chi hkʼe kʼoˆ gʼa ve le?

13. Aˬ htoꞈ ma te Yaˬhoˉvaˬ ve Shaˉhkiˆhkanˍ ve chaw hpehꞈ ve tehꞈ kuˬ laˇ ve htaꞈ ngaˬ hui ha lehˬ jaˇ ve le? (Iˉsaˍyaˆ 43:10-12)

¹³ Yaˬhoˉvaˬ lehˬ, ngaˬ hui htaꞈ yawˇ ve “shaˉ hkiˆ” hpehꞈ tuˬ leuˆ yuˬ laˇ ve yoˬ. (Iˉsaˍyaˆ 43:10-12 gʼaw sheˍ.) Maˇ maw ve awˬ yanˇ Uˉ peunˍ ve Kawˍmiˍtiˍ liꞈ bvuhꞈ laˇ ve hkʼaw kʼoˆ ve, “ngaˬ hui gʼa ve awˬ meꞈ hponˇ uiˍ jaˇ ve lehˬ, ngaˬ hui kaꞈ teˇ gʼaˇ Yaˬhoˉvaˬ ve Shaˉhkiˆhkanˍ ve chaw hpehꞈ ve tehꞈ kuˬ laˇ ve yoˬ.” c Aˬ htoꞈ ma pa taw chi hkʼe kuˬ laˇ ve le? Awˬ lawn teˇ lawn htaꞈ teˇ geh dawˇ nyi sheˍ. Shaˉ nanˉ hkʼaw nawˬ htaꞈ chaw teˇ gʼaˇ gʼaˇ shaˉ hkiˆ te laˇ tcuh gaˇ ve kʼo, nawˬ shiˍ daꞈ ve leh yonˍ gʼa ve chaw htaꞈ leuˆ tuˬ yoˬ. Yawˇ daꞈ ve awˬ meh cawˬ leh yawˇ kʼoˆ ve tawˇ shu yawˆ yan tuˬ te piˇ gʼa ve chaw htaꞈ nawˬ leuˆ tuˬ yoˬ. Chi ve hkʼa shuˍ shuˍ, ngaˬ hui Yaˬhoˉvaˬ yawˇ  ve shaˉ hkiˆ hpehꞈ tuˬ leuˆ yuˬ laˇ htaˇ, chi yawˇ ngaˬ hui htaꞈ shiˍ daꞈ leh yonˍ gʼa ve tehꞈ hpeuꞈ maw laˇ ve yoˬ. Yaˬhoˉvaˬ lehˬ awˬ tehˬ awˬ na ve Gʼuiˬ sha teˇ gʼaˇ tiˉ hpehꞈ ve tehꞈ ngaˬ hui awˬ nu ve chaw htaꞈ kʼoˆ piˇ sheˍ. Ngaˬ hui Yaˬhoˉvaˬ ve Shaˉhkiˆhkanˍ ve chaw hpehꞈ ve ha lehˬ jaˇ ve yoˬ. Ngaˬ hui Yaˬhoˉvaˬ ve shaˉ hkiˆ hpehꞈ ve tehꞈ hpeuꞈ maw piˇ gʼa tuˬ, awˬ nu ve chaw yawˇ ve awˬ meh htaꞈ shiˍ tuˬ ngaˬ hui teˇ yanˇ le le hto maˍ piˇ ve yoˬ. Gʼuiˬ sha htaꞈ caˉ daꞈ ve awˬ nu ve chaw maˇ heˆ heˆ kʼoˆ leh heˍ ve htaꞈ ngaˬ hui maˇ kʼoˆ tcuh gaˇ. Ngaˬ hui chi hkʼe te htaˇ, Yaˬhoˉvaˬ ve Shaˉhkiˆhkanˍ ve chaw hpehꞈ ve tehꞈ keunˍ daꞈ ve hkʼaw te chehˇ ve yoˬ. Chi ve lehˬ, ngaˬ hui ha lehˬ jaˇ tuˬ te laˇ ve yoˬ.—Chiˇ mvuh ve 83:18; Roˉmaꞈ 10:13-15.

NGAˬ HUI AWˬ LEH MEUˇ VE AWˬ YANˇ GAˬ LA HTAˇ HKʼA GAˬ HTO TOˇ VE

14. Awˬ gʼuˇ suhˍ hpawˇ awˬ heˆ laiˉ ceuˬ htaꞈ ngaˬ hui gʼa mawˬ tuˬ aˬ htoꞈ ma le?

¹⁴ Awˬ gʼuˇ suhˍ hpawˇ awˬ heˆ laiˉ ceuˬ htaꞈ ngaˬ hui gʼa mawˬ tuˬ ve ha lehˬ jaˇ ve yoˬ. Yaˬhoˉvaˬ awˬ bon naꞈ laˇ ve kʼo, tuꞈ jaˇ hkanˍ jaˇ ve tanˬ htaˇ, chaw laiˉ gʼaˇ awˬ tehˬ ve htaꞈ haꞈ yuˬ tuˬ, ngaˬ hui gʼa mawˬ tuˬ dawˇ law taˍ ve yoˬ. Chi hkʼoˆ kaꞈ, teˇ co˗e peuˬ teˇ co˗e maˇ hpehꞈ la jaw sheˍ ve tuꞈ jaˇ hkanˍ jaˇ ve awˬ yanˇ htaˇ, chaw maˇ maˇ Saˍtanˍ ve miˬ guiˬ lo tawˆ la leh ngaˬ hui geh teˇ geh Yaˬhoˉvaˬ htaꞈ chiˇ mvuh la tuˬ gʼa mawˬ htaˇ ha lehˬ jaˇ ve yoˬ!—Tcuh yaˇ 13:48.

15-16. Ngaˬ hui caˉ leh aˬ htoꞈ ma te tuˬ le? Leh hkʼaˬ hkʼe htaˇ hkʼa gaˬ te tuˬ le?

¹⁵ Awˬ heˆ chi ve teˇ hpaˍ maˇ gaˬ la sheˍ htaˇ, ngaˬ hui gʼa te cawˇ ve kanˉ cawˬ sheˍ ve yoˬ. Miˬ guiˬ chi hkʼoˆ teˇ kaˬ le le lo Gʼuiˬ sha ve mvuhˇ miˬ daꞈ ve awˬ lawn sha tanˇ hto toˇ tuˬ, ngaˬ hui daꞈ jaˇ ve awˬ vuiˬ cawˬ ve yoˬ. Kanˉ chi lehˬ kʼawꞈ te tuˬ ve maˇ heˆ. Awˬ yanˇ chi ve hkʼaw ngaˬ hui awˬ nu ve chaw htaꞈ daꞈ ve awˬ lawn sha tanˇ gʼa hto maˍ piˇ cawˇ ve yoˬ. Miˬ guiˬ awˬ leh meuˇ ve awˬ yanˇ gʼaˇ hteꞈ gaˬ la paˇ neˇ˗oˬ ve htaꞈ yawˇ hui gʼa shiˍ cawˇ ve yoˬ. Leh chi ve gaˬ la htaˇ, ngaˬ hui hto toˇ ve awˬ lawn Yaˬhoˉvaˬ geh laˬ ve tehꞈ teˇ gʼaˇ le le gʼa mawˬ tuˬ yoˬ.—Yeˍsaˍkeˍlaˆ 38:23.

¹⁶ Chi htaꞈ pa taw, ngaˬ hui teˇ gʼaˇ le le coˇ caˇ leh aˬ htoꞈ ma te gaˇ ve le? Ngaˬ hui daꞈ ve awˬ lawn sha tanˇ htaꞈ haꞈ ve, chaw yaˇ htaꞈ haꞈ ve, leh a yeˇ uiˍ jaˇ ve lehˬ ngaˬ hui Yaˬhoˉvaˬ leh yawˇ ve awˬ meh htaꞈ haꞈ ve pa taw, ngaˬ hui kaiˬ ve hkʼaw hto toˇ gaˇ tuˬ te laˇ ve yoˬ. Leh Yaˬhoˉvaˬ “pehˇ˗o” maˇ kʼoˆ laˇ sheˍ ve ceh ceh ngaˬ hui haˆ haˆ hto toˇ gaˇ tuˬ kaꞈ te laˇ ve yoˬ.