AWˬ LAWN 21
KʼA MUIˬ HKAWˇ 107 Gʼuiˬ sha ve haꞈ pehnˇ ve awˬ hkʼaˇ
Nawˬ heuˆ tuˬ ve chaw htaꞈ hkʼaˬ hkʼe te mawˬ daꞈ tuˬ le?
“Kaiˬ ve yaˇ miˇ htaꞈ hkʼaˬ ma ca haˍ jaˇ ve le? Chi hkʼe ve yaˇ miˇ lehˬ shehnˉ shiˍ aꞈ kehˉ awˬ hpfuhˇ hkʼaˆ jaˇ ve yoˬ.”—TAWˇ NAˉ VE 31:10.
A YEˇ UIˍ VE AWˬ LAWN
Liꞈ hpu hkʼaw ve awˬ liˇ awˬ hkʼaˇ nawˬ heuˆ daꞈ tuˬ ve chaw htaꞈ mawˬ daꞈ tuˬ ga laˇ gʼa ve yoˬ. Awˬ viˉ awˬ nyi chaw haˉ yaˇ miˇ haˉ heuˆ daꞈ gaˇ ve chaw htaꞈ ga piˇ gʼa tuˬ, Hkriꞈ yaˇ awˬ moˍ hkʼaw ve chaw hkʼaˬ hkʼe ga piˇ gʼa ve htaꞈ teˇ geh henˇ tuˬ yoˬ.
1-2. (a) Awˬ viˉ awˬ nyi chaw haˉ yaˇ miˇ haˉ maˇ cawˬ sheˍ htaˇ, yawˇ aˬ htoꞈ ma htaꞈ awˉ lawˉ dawˇ nyi cawˇ ve le? (b) Chaw haˉ yaˇ miˇ haˉ te daꞈ ve aˬ htoꞈ ma htaꞈ kʼoˆ gaˇ ve le? (Awˇ ceˍ awˇ fa “Kʼawꞈ kʼoˆ maˍ taˍ ve” hkʼaw nyi sheˍ.)
Nawˬ awˬ hpawˇ awˬ miˇ ma heuˆ gaˇ˗aw laˇ? Heuˆ daꞈ ve lehˬ a shaꞈ teꞈ kuiˬ hkʼaw ha lehˬ jaˇ ve awˬ ceuˬ maˇ hpehꞈ ve htawˇ, awˬ viˉ awˬ nyi chaw haˉ yaˇ miˇ haˉ a shaꞈ i ve, leh a shaꞈ maˇ ve kaꞈ yawˇ hui ve awˬ ca hpehꞈ la tuˬ, teˇ gʼaˇ gʼaˇ htaꞈ ca nyi chehˇ ve yoˬ. Chaw haˉ yaˇ miˇ haˉ maˇ cawˬ sheˍ htaˇ, nawˬ a shu yawˇ awˬ to htaꞈ gʼa hu gʼa ve, yonˍ hkʼaˇ yonˍ yeˬ ve gʼa cawˬ ve, leh chaw mawˇ hkʼe ve dawˇ hkʼaˇ gʼa cawˬ ve yoˬ. a (1 Kawˇrenˍhtuˆ 7:36) Te hkʼaˇ dawˇ hkʼaˇ chi ve teˇ hpaˍ nawˬ cawˬ ve kʼo, nawˬ heuˆ daꞈ ve hkʼaw shoꞈ shaꞈ ve hkʼa dehꞈ maˇ cawˬ.
2 Yaꞈ hkʼaˇ, heuˆ daꞈ tuˬ ve chaw htaꞈ ca gʼa ve lehˬ sha ve maˇ heˆ. (Tawˇ naˉ ve 31:10) Nawˬ awˬ viˉ awˬ nyi teˇ gʼaˇ gʼaˇ htaꞈ hkʼa dehꞈ shiˍ daꞈ gaˇ tuˬ ca gʼa ve htawˇ, chaw haˉ yaˇ miˇ haˉ te daꞈ gʼa tuˬ sha ve maˇ heˆ. b Awˬ viˉ awˬ nyi chaw haˉ yaˇ miˇ haˉ yawˇ heuˆ gaˇ ve chaw htaꞈ ca mawˬ tuˬ, awˬ lawn chi ve hkʼaw teˇ geh henˇ tuˬ yoˬ. Hkʼaˬ hkʼe te tanˬ maˆ daꞈ tuˬ le, leh awˬ viˉ awˬ nyi chaw haˉ yaˇ miˇ haˉ heuˆ daꞈ gaˇ ve chaw htaꞈ Hkriꞈ yaˇ awˬ moˍ hkʼaw ve chaw hkʼaˬ hkʼe ga piˇ gʼa tuˬ, awˬ lawn chi ve hkʼaw teˇ geh henˇ tuˬ yoˬ.
NAWˬ HEUˆ TUˬ VE CHAW HTAꞈ CA VE
3. Awˬ viˉ awˬ nyi chaw haˉ yaˇ miˇ haˉ awˬ ca ca htaˇ, aˬ htoꞈ ma htaꞈ dawˇ nyi cawˇ ve le?
3 Nawˬ heuˆ daꞈ gaˇ ve kʼo a shu teˇ gʼaˇ htaꞈ nawˬ chaw haˉ yaˇ miˇ haˉ maˇ te daꞈ sheˍ htaˇ, nawˬ hkʼaˬ hkʼe ve chaw htaꞈ ca ve gʼa shiˍ cawˇ ve yoˬ. Chi hkʼe maˇ heˆ kʼo, nawˬ ve awˬ ca te la keunˍ ve chaw htaꞈ maˇ nyi leh, nawˬ htaꞈ maˇ keunˍ ve chaw htaꞈ nawˬ maˆ la tuˬ yoˬ. Nawˬ lehˬ Baˆtiˆsaˬ haꞈ yuˬ˗oˬ ve chaw htaꞈ gʼa nyi cawˇ ve yoˬ. (1 Kawˇrenˍhtuˆ 7:39) Yaꞈ hkʼaˇ, Baˆtiˆsaˬ haꞈ yuˬ˗oˬ ve chaw teˇ gʼaˇ le le kaꞈ nawˬ htaꞈ keunˍ daꞈ ve maˇ heˆ. Chi htaꞈ pa taw, a shu yawˇ awˬ to htaꞈ na nyi cawˇ ve, ‘ngaˬ a shaꞈ teꞈ kuiˬ hkʼaw dawˇ teh taˍ ve aˬ htoꞈ ma cawˬ ve le? Ngaˬ chaw haˉ yaˇ miˇ haˉ te daꞈ tuˬ ve teˇ gʼaˇ htaꞈ aˬ htoꞈ ma nyi cawˇ ve le? Leh ngaˬ keunˍ daꞈ cawˇ daꞈ ve hkʼaw dawˇ teh taˍ˗aw laˇ?’
4. Awˬ viˉ awˬ nyi teˇ hpaˍ heuˆ daꞈ tuˬ awˬ ca ca chehˇ ve chaw bon hkʼaˬ hkʼe lawˬ ve le?
4 Nawˬ heuˆ daꞈ gaˇ ve kʼo, awˬ lawn chi htaꞈ caˉ daꞈ ve bon lawˬ cawˇ ve yoˬ. (Hpiˇliˇpiˆ 4:6) Yaꞈ hkʼaˇ, Gʼuiˬ sha lehˬ nawˬ hkʼaˬ hkʼe dawˇ ve htaꞈ dawˇ haˍ leh nawˬ loˍ ve awˬ ceuˬ htaꞈ yawˇ a yeˇ yuˬ ve yoˬ. Nawˬ chaw teˇ gʼaˇ gʼaˇ htaꞈ awˬ ca te tuˬ ca nyi chehˇ htaˇ, Gʼuiˬ sha nawˬ htaꞈ ga laˇ tuˬ yoˬ. Chi htaꞈ pa taw, nawˬ hkʼaˬ hkʼe dawˇ ve leh aˬ htoꞈ ma loˍ ve Gʼuiˬ sha htaꞈ kʼoˆ piˇ sheˍ. (Chiˇ mvuh ve 62:8) Nawˬ yeunˇ hkanˍ leh cuˇ yiˍ cawˬ tuˬ Yaˬhoˉvaˬ ga laˇ tuˬ bon lawˬ sheˍ. (Yaˍkoˆ 1:5) Aˍmaˬriˆkaꞈ mvuhˇ miˬ lo chehˇ ve awˬ viˉ awˬ nyi chaw haˉ Yoˇhanˬ kʼoˆ ve, c awˬ lawn chi htaꞈ caˉ daꞈ ve yawˇ bon lawˬ ve yoˬ. Yawˇ kʼoˆ ve, “awˬ viˉ awˬ nyi yaˇ miˇ te hkʼaˇ dawˇ hkʼaˇ hkʼaˬ hkʼe cawˬ ve htaꞈ ngaˬ heuˆ gaˇ ve Yaˬhoˉvaˬ htaꞈ kʼoˆ piˇ leh chi hkʼe ve chaw htaꞈ ngaˬ mawˬ daꞈ tuˬ kaꞈ bon lawˬ ve yoˬ. Awˬ gʼuˇ suhˍ hpawˇ ngaˬ te hkʼaˇ dawˇ hkʼaˇ daꞈ ve awˬ hpawˇ hpehꞈ tuˬ, Yaˬhoˉvaˬ ga laˇ tuˬ bon lawˬ ve yoˬ.” Saˬriˬlaˬkaˬ mvuhˇ miˬ lo chehˇ ve awˬ viˉ awˬ nyi yaˇ miˇ Ta˗yanˇ kʼoˆ ve, “ngaˬ heuˆ gaˇ ve chaw htaꞈ ca chehˇ htaˇ, ngaˬ ka tiꞈ yeˬ ve, daꞈ ve dawˇ hkʼaˇ cawˬ ve, leh hkʼaˬ htaˆ kaꞈ ha lehˬ ve cawˬ tuˬ Yaˬhoˉvaˬ ga laˇ tuˬ bon lawˬ ve yoˬ.” Nawˬ dawˇ taˍ ve aꞈ kehˉ gʼa law maw ve htawˇ, Yaˬhoˉvaˬ nawˬ htaꞈ haꞈ shaˉ laˇ leh nawˬ hkʼaˬ hkʼe dawˇ ve htaꞈ kaꞈ ga laˇ tuˬ yoˬ tehꞈ ka tiꞈ te taˍ laˇ ve yoˬ.—Chiˇ mvuh ve 55:22.
5. Awˬ viˉ awˬ nyi chaw haˉ yaˇ miˇ haˉ Yaˬhoˉvaˬ htaꞈ haꞈ ve chaw htaꞈ mawˬ daꞈ tuˬ hkʼaˬ hkʼe htaˇ le? (1 Kawˇrenˍhtuˆ 15:58) (Awˬ han htaꞈ nyi sheˍ.)
5 Liꞈ hpu hkʼaw ngaˬ hui htaꞈ kʼoˆ laˇ ve, “Jawˇ mawˇ Yeˍsuˆ ve kanˉ htaꞈ hkʼaˬ htaˆ kaꞈ gʼaˇ hteꞈ te chehˇ ve chaw hpehꞈ piˇ˗oˆ.” (1 Kawˇrenˍhtuˆ 15:58 gʼaw sheˍ.) Nawˬ kaiˬ ve hkʼaw Gʼuiˬ sha ve kanˉ te leh awˬ viˉ awˬ nyi hawˉ hkʼaˆ leh yaˇ miˇ geh awˬ chawˇ te ve kʼo, nawˬ awˬ viˉ awˬ nyi geh ha lehˬ ve ceh tiˉ gʼa ve maˇ heˆ. Yaꞈ hkʼaˇ, awˬ viˉ awˬ nyi chaw haˉ yaˇ miˇ haˉ nawˬ hkʼa shuˍ, Yaˬhoˉvaˬ ve kanˉ hkʼa dehꞈ te ve chaw htaꞈ kaꞈ mawˬ daꞈ tuˬ yoˬ. Nawˬ Yaˬhoˉvaˬ nyi hkʼaˇ suh tuˬ coˇ caˇ leh te piˇ ve kʼo, nawˬ awˬ tehˬ ha lehˬ ve cawˬ tuˬ yoˬ.
Nawˬ Yaˬhoˉvaˬ ve kanˉ te leh Hkriꞈ yaˇ ve awˬ vuiˬ htaꞈ tiˉ te chehˇ ve kʼo, nawˬ heuˆ daꞈ gaˇ ve chaw htaꞈ mawˬ daꞈ tuˬ yoˬ hehˉ (Awˬ tawn 5 nyi sheˍ)
6. Awˬ viˉ awˬ nyi chaw haˉ yaˇ miˇ haˉ awˬ ca ca chehˇ htaˇ, yawˇ aˬ htoꞈ ma htaꞈ tawnˇ taˍ cawˇ ve le?
6 Yaꞈ hkʼaˇ, nawˬ awˬ ca ca ve htaꞈ ceh tiˉ taˇ dawˇ nyi. (Hpiˇliˇpiˆ 1:10) Awˬ tehˬ ha lehˬ ve lehˬ, nawˬ heuˆ daꞈ˗oˬ ve maˇ heˆ leh chaw haˉ yaˇ miˇ haˉ hpehꞈ ve htaꞈ cawˬ ve maˇ heˆ. Yaꞈ hkʼaˇ, nawˬ Yaˬhoˉvaˬ geh meuˆ daꞈ ve htaꞈ cawˬ ve yoˬ. (Maꞈhtehˍ 5:3) Nawˬ awˬ ca maˇ cawˬ sheˍ htaˇ, Yaˬhoˉvaˬ ve kanˉ te tuˬ awˬ yanˇ cawˬ maˇ ve yoˬ. (1 Kawˇrenˍhtuˆ 7:32, 33) Awˬ yanˇ chi ve htaꞈ yehˇ leh awˬ bon cawˬ tuˬ te sheˍ. Aˍmaˬriˆkaꞈ mvuhˇ miˬ lo chehˇ ve awˬ viˉ awˬ nyi yaˇ miˇ Ceh˗si˗kaˇ yawˇ aˬ laˬ hkʼe 40 hkʼawꞈ gaˬ la yoˬ te htaˇ, awˬ hpawˇ heuˆ ve yoˬ. Yawˇ kʼoˆ ve, “ngaˬ yaˇ miˇ haˉ htaˇ Gʼuiˬ sha ve kanˉ te ve htaꞈ a yeˇ hkʼa dehꞈ yuˬ ve pa taw, oˇ ve teˇ yanˇ ngaˬ awˬ hpawˇ heuˆ gaˇ ve htawˇ, ha lehˬ ve cawˬ tuˬ te laˇ ve yoˬ.”
AWˬ YANˇ YEHˇ LEH CHAˬ NYI VE
7. Nawˬ yawˇ htaꞈ dawˇ cawˇ ve tehꞈ maˇ kʼoˆ piˇ sheˍ htaˇ, awˬ yanˇ yehˇ leh hkʼa dehꞈ chaˬ nyi ve lehˬ aˬ htoꞈ ma te cuˇ yiˍ cawˬ ve le? (Tawˇ naˉ ve 13:16)
7 Nawˬ htaꞈ keunˍ daꞈ ve chaw teˇ gʼaˇ gʼaˇ htaꞈ mawˬ daꞈ ve kʼo, nawˬ hkʼaˬ hkʼe te tuˬ le? Nawˬ yawˇ htaꞈ dawˇ cawˇ ve tehꞈ laꞈ haˉ kʼoˆ piˇ cawˇ˗aw laˇ? Liꞈ hpu hkʼaw kʼoˆ ve, cuˇ yiˍ cawˬ ve chaw lehˬ hkʼa dehꞈ dawˇ nyi ve yoˬ. (Tawˇ naˉ ve 13:16 gʼaw sheˍ.) Chi htaꞈ pa taw, nawˬ awˬ yanˇ yehˇ leh yawˇ htaꞈ teˇ tcuhˉ teˇ yanˇ hkʼa dehꞈ chaˬ nyi ve kʼo, cuˇ yiˍ cawˬ ve yoˬ. Peuˬ hkʼawꞈ nawˉ nawˬ yawˇ htaꞈ dawˇ cawˇ ve tehꞈ kʼoˆ piˇ gʼa ve yoˬ. Nehˬtaˬlehˬ mvuhˇ miˬ lo chehˇ ve A˗cha˗vi kʼoˆ ve, “yawˇ yaˇ miˇ daꞈ ve htaꞈ mawˬ kʼo, laꞈ haˉ dawˇ cawˇ ve yoˬ. Yaꞈ hkʼaˇ, nyi ma pa vaiˇ jaˇ.” Yawˇ kʼawꞈ kʼoˆ sheˍ ve, “nawˬ yawˇ htaꞈ chaˬ nyi tuˬ awˬ yanˇ a ciˉ yehˇ ve kʼo, nawˬ chaw teˇ gʼaˇ htaꞈ maˆ tuˬ haˆ maˇ dawˇ cheˆ.” Chi hkʼoˆ kaꞈ, nawˬ awˬ yanˇ a ciˉ yehˇ leh chaˬ nyi ve kʼo, chaw oˇ ve teˇ gʼaˇ nawˬ htaꞈ maˇ keunˍ ve tehꞈ nawˬ gʼa shiˍ tuˬ yoˬ.
8. Awˬ viˉ awˬ nyi chaw haˉ yaˇ miˇ haˉ yawˇ dawˇ cawˇ ve chaw htaꞈ hkʼaˬ hkʼe chaˬ nyi gʼa ve le? (Awˬ han htaꞈ nyi sheˍ.)
8 Nawˬ maˆ gaˇ ve chaw teˇ gʼaˇ htaꞈ hkʼaˬ hkʼe te hkʼa dehꞈ chaˬ nyi gʼa tuˬ le? Hpawnˬ daꞈ kuiˬ lo maˇ heˆ leh awˬ viˉ awˬ nyi geh awˍ teˇ geh caˇ htaˇ, yawˇ yonˍ hkʼaˇ yonˍ yeˬ ve laˇ tehꞈ nawˬ chaˬ nyi gʼa ve yoˬ. Yawˇ hkʼaˬ hkʼe ve chaw hpehꞈ leh te hkʼaˇ dawˇ hkʼaˇ hkʼaˬ hkʼe cawˬ ve le? Yawˇ ve awˬ chawˇ a shu le? Yawˇ aˬ htoꞈ ma ve awˬ lawn yaw ve htaꞈ dawˇ cawˇ ve le? Chi ve teˇ hpaˍ kaꞈ chaˬ nyi gʼa ve yoˬ. (Luˉkaꞈ 6:45) Yawˇ dawˇ teh taˍ ve nawˬ htaˬ shuˍ daꞈ˗aw laˇ? Yawˇ ve Hkriꞈ yaˇ awˬ moˍ hkʼaw ve nyi haꞈ shaˉ paˍ geh nawˬ tawˇ yaw daꞈ ve maˇ heˆ leh yawˇ htaꞈ shiˍ daꞈ ve awˬ viˉ awˬ nyi co ha hpawˇ ve chaw mawˇ geh kaꞈ nawˬ tawˇ yaw daꞈ gʼa ve yoˬ. (Tawˇ naˉ ve 20:18) Yawˇ hkʼaˬ hkʼe hpehꞈ ve le? Te hkʼaˇ dawˇ hkʼaˇ hkʼaˬ hkʼe cawˬ ve le? Nawˬ yawˇ hui htaꞈ na nyi piˇ gʼa ve yoˬ. (Ruˉhtaˆ 2:11) Nawˬ dawˇ cawˇ ve chaw htaꞈ chaˬ nyi chehˇ htaˇ, yawˇ nyi ma maˇ sha tuˬ taˇ te piˇ. Yawˇ ve te hkʼaˇ dawˇ hkʼaˇ htaꞈ yawˆ yan piˇ leh 2 gʼaˇ ceh tiˉ teˇ geh taˇ chehˇ.
Chaw teˇ gʼaˇ htaꞈ dawˇ cawˇ ve tehꞈ maˇ hpeuꞈ maw piˇ sheˍ htaˇ, chaw oˇ ve teˇ gʼaˇ hkʼaˬ hkʼe hpehꞈ ve teˇ tcuhˉ teˇ yanˇ chaˬ nyi sheˍ (Awˬ tawn 7-8 nyi sheˍ)
9. Chaw teˇ gʼaˇ htaꞈ nawˬ dawˇ cawˇ ve tehꞈ maˇ kʼoˆ piˇ sheˍ htaˇ, nawˬ aˬ htoꞈ ma htaꞈ awˉ lawˉ gʼa yonˍ gʼa cawˇ ve le?
9 Nawˬ yawˇ htaꞈ dawˇ cawˇ ve tehꞈ maˇ kʼoˆ piˇ sheˍ htaˇ, awˬ yanˇ hkʼaˬ hkʼe maw yehˇ leh chaˬ nyi cawˇ ve le? Nawˬ kʼoˆ piˇ vaiˇ jaˇ ve kʼo, nawˬ tawˇ maˇ ce leh haˆ kʼoˆ ve, cuˇ yiˍ maˇ cawˬ ve, leh nyi ma haw puiˉ jaˇ ve, chi hkʼe hpehꞈ ve tehꞈ yawˇ shiˍ gʼa tuˬ te piˇ gʼa ve yoˬ. (Tawˇ naˉ ve 29:20) Nawˬ yawˇ htaꞈ dawˇ cawˇ ve kaꞈ awˬ yanˇ yehˇ maw jaˇ ve kʼo, nawˬ htawˇ dawˇ nawˬ dawˇ cawˬ leh a yeˇ maˇ te ve tehꞈ yawˇ dawˇ la gʼa ve yoˬ. (Cuˇ yiˍ piˇ ve 11:4) Nawˬ yawˇ htaꞈ dawˇ cawˇ ve tehꞈ maˇ kʼoˆ piˇ sheˍ htaˇ, tawnˇ taˍ cawˇ ve lehˬ yawˇ htaꞈ maˇ heuˆ daꞈ sheˍ htaˇ kaꞈ dawˇ cawˇ ve tehꞈ kʼoˆ piˇ cawˇ ve yoˬ. Chaw oˇ ve teˇ gʼaˇ htaꞈ nawˬ heuˆ daꞈ tuˬ gu hehnˇ˗oˬ leh, nawˬ htaꞈ keunˍ daꞈ ve tehꞈ yonˍ gʼa ve yoˬ.
10. Nawˬ htaꞈ dawˇ cawˇ ve chaw cawˬ ve tehꞈ nawˬ dawˇ htaˇ, nawˬ yawˇ htaꞈ maˇ dawˇ cawˇ ve kʼo hkʼaˬ hkʼe te tuˬ le?
10 Chaw teˇ gʼaˇ nawˬ htaꞈ dawˇ cawˇ ve tehꞈ dawˇ ve kʼo, nawˬ hkʼaˬ hkʼe te tuˬ le? Nawˬ yawˇ htaꞈ maˇ dawˇ cawˇ ve kʼo, hteˇ˗ehꞈ kʼoˆ piˇ sheˍ. Nawˬ yawˇ htaꞈ maˇ dawˇ cawˇ ve kaꞈ dawˇ law kuiˬ piˇ ve kʼo, chi hkʼe maˇ te cawˇ.—1 Kawˇrenˍhtuˆ 10:24; Eˇfeˇsuꞈ 4:25.
11. Chaw haˉ yaˇ miˇ haˉ htaꞈ awˬ ca ca piˇ tuˬ nawˬ htaꞈ te tcuh laˇ ve kʼo, nawˬ aˬ htoꞈ ma htaꞈ tawnˇ taˍ cawˇ ve le?
11 Mvuhˇ miˬ teˇ hpaˍ hpaˍ hkʼaw kʼo, awˬ pa awˬ e maˇ heˆ leh chaw mawˇ, yehˬ kʼa hkʼaw ve chaw haˉ yaˇ miˇ haˉ htaꞈ awˬ ca ca piˇ ve yoˬ. Leh mvuhˇ miˬ teˇ hpaˍ hpaˍ hkʼaw kʼo, yehˬ kʼa hkʼaw ve chaw maˇ heˆ leh awˬ chawˇ chaw haˉ yaˇ miˇ haˉ htaꞈ awˬ ca ca piˇ ve pa taw, tinˍ daꞈ leh mawˬ daꞈ la tcuh ve yoˬ. Chaw haˉ yaˇ miˇ haˉ htaꞈ awˬ ca ca piˇ tuˬ nawˬ htaꞈ te tcuh laˇ ve kʼo, 2 gʼaˇ gʼaˇ dawˇ cawˇ leh cawˇ ve hkʼaw te piˇ tuˬ, dawˇ nyi sheˍ. Nawˬ htaꞈ keunˍ daꞈ ve chaw htaꞈ ca mawˬ˗oˬ ve tehꞈ dawˇ ve kʼo, chaw oˇ ve teˇ gʼaˇ htaꞈ caˉ daꞈ ve awˬ lawn awˬ tanˇ htaꞈ coˇ caˇ leh gʼaꞈ ca sheˍ. Tawˇ pa haˉ te kʼo, chaw oˇ ve teˇ gʼaˇ hkʼaˬ hkʼe hpehꞈ ve, yawˇ ve te hkʼaˇ dawˇ hkʼaˇ hkʼaˬ hkʼe cawˬ ve, leh a yeˇ uiˍ jaˇ ve lehˬ yawˇ ve yonˍ hkʼaˇ hkʼaˬ hkʼe hpehꞈ ve kaꞈ chaˬ nyi sheˍ. Yawˇ Yaˬhoˉvaˬ geh meuˆ daꞈ ve, hpu, liꞈ henˇ ve, maˇ heˆ leh paw sha ve, chi ve teˇ hpaˍ aꞈ kehˉ a yeˇ uiˍ ve tehꞈ shawˍ ve laˇ kaꞈ chaˬ nyi sheˍ. Yaꞈ hkʼaˇ, heuˆ daꞈ tuˬ, maˇ heuˆ daꞈ tuˬ dawˇ cheˆ ve lehˬ, yawˇ hui htaꞈ cawˬ ve tehꞈ tawnˇ taˍ sheˍ.—Gaˍlaˍtiˆ 6:5.
CHAW HAˉ YAˇ MIˇ HAˉ TANˬ MAˆ DAꞈ VE
12. Nawˬ dawˇ cawˇ ve chaw teˇ gʼaˇ htaꞈ maˆ daꞈ gaˇ ve kʼo, nawˬ yawˇ htaꞈ hkʼaˬ hkʼe kʼoˆ piˇ cawˇ ve le?
12 Nawˬ dawˇ cawˇ ve chaw teˇ gʼaˇ htaꞈ maˆ daꞈ gaˇ ve kʼo, nawˬ yawˇ htaꞈ hkʼaˬ hkʼe kʼoˆ piˇ cawˇ ve le? d Chaw guiˇ kuiˬ lo nawˬ yawˇ htaꞈ mawˬ daꞈ tuˬ awˬ yanˇ tinˍ daꞈ ve, maˇ heˆ leh tawˇ yaw tuˬ awˬ hkʼeun hkʼaw yaw daꞈ kaꞈ gʼa ve yoˬ. Nawˬ yawˇ htaꞈ dawˇ cawˇ leh hkʼa dehꞈ shiˍ daꞈ gaˇ ve tehꞈ kʼoˆ piˇ sheˍ. (1 Kawˇrenˍhtuˆ 14:9) Hpehꞈ gʼa ve kʼo yawˇ htaꞈ awˬ yanˇ piˇ leh dawˇ nyi tcuh sheˍ kaꞈ gʼa ve yoˬ. (Tawˇ naˉ ve 15:28) Leh yawˇ nawˬ htaꞈ maˇ dawˇ cawˇ ve kʼo, yawˇ dawˇ cheˆ ve htaꞈ yawˆ yan piˇ sheˍ.
13. Awˬ nu ve chaw nawˬ htaꞈ dawˇ cawˇ ve tehꞈ kʼoˆ laˇ htaˇ, nawˬ hkʼaˬ hkʼe te tuˬ le? (Kawˇlawˇsehˇ 4:6)
13 Chaw teˇ gʼaˇ nawˬ htaꞈ dawˇ cawˇ ve tehꞈ kʼoˆ laˇ ve kʼo, nawˬ hkʼaˬ hkʼe te tuˬ le? Chaw oˇ ve teˇ gʼaˇ nawˬ htaꞈ chi hkʼe kʼoˆ laˇ tuˬ yawˇ haꞈ hanˉ ve gʼa cawˬ ve yoˬ. Chi htaꞈ pa taw, nawˬ yawˇ ve dawˇ hkʼaˇ htaꞈ haꞈ pehnˇ ve leh yawˆ yan ve hkʼaw te piˇ sheˍ. (Kawˇlawˇsehˇ 4:6 gʼaw sheˍ.) Nawˬ awˬ yanˇ a ciˉ yehˇ leh dawˇ nyi gaˇ ve kʼo, yawˇ htaꞈ kʼoˆ piˇ sheˍ. Yaꞈ hkʼaˇ, te gʼa ve kʼo yawˇ htaꞈ haˆ haˆ hkʼawꞈ piˇ sheˍ. (Tawˇ naˉ ve 13:12) Nawˬ yawˇ htaꞈ maˇ maˆ gaˇ ve kʼo, yawˇ htaꞈ nuˇ nehˬ ve hkʼaw hkʼa tawˍ lehˆ kʼoˆ piˇ sheˍ. Awˆsuh˗teˇriˇ˗aˇ mvuhˇ miˬ lo chehˇ ve awˬ viˉ awˬ nyi hawˉ hkʼaˆ Han meh ve awˬ viˉ awˬ nyi yaˇ miˇ teˇ gʼaˇ yawˇ htaꞈ dawˇ cawˇ ve tehꞈ kʼoˆ laˇ ve htaꞈ yawˇ hkʼaˬ hkʼe hkʼawꞈ piˇ ve teˇ geh nyi sheˍ. Yawˇ kʼoˆ ve, “ngaˬ hkʼaˬ hkʼe dawˇ ve hkʼa tawˍ lehˆ kʼoˆ piˇ ve yoˬ. Yaꞈ hkʼaˇ, nuˇ nehˬ ve hkʼaw te ve yoˬ. Ngaˬ yawˇ htaꞈ dawˇ law kuiˬ maˇ piˇ gaˇ ve pa taw, laꞈ haˉ hkʼawꞈ piˇ ve yoˬ. Aˬ htoꞈ ma kʼoˆ ve maˇ heˆ leh te ve htawˇ, ngaˬ ve dawˇ hkʼaˇ pa ve tehꞈ yawˇ htaꞈ maˇ gʼa te piˇ tuˬ, shaˍ tiꞈ gʼa te ve yoˬ.” Nawˬ chaw oˇ ve teˇ gʼaˇ htaꞈ maˆ gaˇ ve kʼo, nawˬ hkʼaˬ hkʼe dawˇ ve yawˇ htaꞈ kʼoˆ piˇ leh, maˆ daꞈ htaˇ hkʼaˬ hkʼe gʼa te daꞈ cawˇ ve yaw daꞈ sheˍ. Awˬ lawn chi htaꞈ pa taw, nawˬ huiˉ maˬ dawˇ hkʼaˇ maˇ shuˍ daꞈ la ve yoˬ.
AWˬ VIˉ AWˬ NYI CHAW HAˉ YAˇ MIˇ HAˉ HTAꞈ HKʼAˬ HKʼE GA PIˇ GʼA TUˬ LE?
14. Awˬ viˉ awˬ nyi chaw haˉ yaˇ miˇ haˉ htaꞈ ngaˬ hui tawˇ hkʼaˬ hkʼe yaw piˇ cawˇ ve le?
14 Awˬ viˉ awˬ nyi chaw haˉ yaˇ miˇ haˉ heuˆ daꞈ gaˇ ve chaw htaꞈ ngaˬ hui hkʼaˬ hkʼe awˬ gʼaˇ piˇ gʼa tuˬ le? Awˬ hkʼaˇ teˇ hkʼaˇ lehˬ, ngaˬ hui tawˇ yaw ve shaˍ tiꞈ gʼa te ve yoˬ. (Eˇfeˇsuꞈ 4:29) Ngaˬ hui a shu yawˇ awˬ to htaꞈ na nyi cawˇ ve, ‘awˬ viˉ awˬ nyi awˬ hpawˇ awˬ miˇ ma heuˆ gaˇ ve chaw htaꞈ ngaˬ kʼoˆ guiˇ piˇ˗aw laˇ? Awˬ viˉ awˬ nyi chaw haˉ yaˇ miˇ haˉ tawˇ yaw daꞈ chehˇ ve htaꞈ ngaˬ gʼa mawˬ htaˇ, yawˇ hui dawˇ cawˇ daꞈ ve tehꞈ ngaˬ hkʼaˇ ngaˬ dawˇ ve laˇ?’ (1 Tiˆmoˉseˍ 5:13) Chi hkʼoˆ kaꞈ, awˬ viˉ awˬ nyi chaw haˉ yaˇ miˇ haˉ yawˇ maˇ heuˆ daꞈ sheˍ ve pa taw, teˇ ceuˬ ceuˬ maˇ lawꞈ ve tehꞈ dawˇ tuˬ ngaˬ hui maˇ te piˇ cawˇ. Han kʼawꞈ kʼoˆ ve, “awˬ viˉ awˬ nyi teˇ hpaˍ kʼoˆ ve, ‘aˬ htoꞈ ma te nawˬ awˬ miˇ ma maˇ heuˆ sheˍ ve le? Nawˬ a shaꞈ kaꞈ maˇ˗oˬ mehˍ.’ Tawˇ hkawˇ chi hkʼe ve, chaw haˉ yaˇ miˇ haˉ awˬ hpfuhˇ maˇ cawˬ ve tehꞈ dawˇ tuˬ te piˇ leh, haˆ gʼa heuˆ daꞈ cawˇ ve tehꞈ dawˇ tuˬ nyiˉ piˇ ve hkʼe te piˇ ve yoˬ.” Chaw haˉ yaˇ miˇ haˉ htaꞈ ngaˬ hui chiˇ mvuh piˇ ve kʼo, daꞈ jaˇ ve yoˬ.—1 Hteˇsaˍlawˇniˆ 5:11.
15. (a) Roˉmaꞈ liꞈ 15:2 hkʼaw ve awˬ liˇ awˬ hkʼaˇ, awˬ viˉ awˬ nyi chaw haˉ yaˇ miˇ haˉ htaꞈ awˬ ca ca piˇ ve, ngaˬ hui aˬ htoꞈ ma htaꞈ awˉ lawˉ dawˇ nyi cawˇ ve le? (Awˬ han htaꞈ nyi sheˍ.) (b) VDO chi ve hkʼaw nawˬ dawˇ cawˇ jaˇ ve aˬ htoꞈ ma cawˬ ve le?
15 Awˬ viˉ awˬ nyi chaw haˉ leh yaˇ miˇ haˉ 2 gʼaˇ keunˍ daꞈ jaˇ ve htaꞈ ngaˬ hui gʼa mawˬ htaˇ, hkʼaˬ hkʼe te tuˬ le? Liꞈ hpu hkʼaw kʼoˆ ve, awˬ nu ve chaw ve dawˇ hkʼaˇ htaꞈ dawˇ nyi piˇ sheˍ. (Roˉmaꞈ 15:2 gʼaw sheˍ.) Awˬ viˉ awˬ nyi chaw haˉ yaˇ miˇ haˉ laiˉ gʼaˇ awˬ nu ve chaw awˬ ca ca laˇ ve htaꞈ maˇ dawˇ cawˇ leh, yawˇ dawˇ cheˆ ve htaꞈ ngaˬ hui yawˆ yan piˇ cawˇ ve yoˬ. (2 Hteˇsaˍlawˇniˆ 3:11) Leh chaw haˉ yaˇ miˇ haˉ teˇ hpaˍ kʼo, ga laˇ tcuh gaˇ ve yoˬ. Yaꞈ hkʼaˇ, yawˇ ga laˇ tuˬ lawˬ htaˇ, ngaˬ hui ga piˇ cawˇ ve yoˬ. e (Tawˇ naˉ ve 3:27) Awˬ viˉ awˬ nyi chaw haˉ yaˇ miˇ haˉ teˇ hpaˍ hpaˍ kʼo, awˬ nu ve chaw awˬ ceh yuˬ ceh laˇ ve htaꞈ maˇ dawˇ cawˇ ve yoˬ. Jaˬmaˬniˬ mvuhˇ miˬ lo chehˇ ve awˬ viˉ awˬ nyi yaˇ miˇ haˉ Luˍdiˇ kʼoˆ ve, “awˬ viˉ awˬ nyi laiˉ gʼaˇ teˇ geh mawˬ daꞈ leh pyawˍ ve awˬ ceuˬ te tuˬ, nawˬ gu ve yoˬ hehˉ. Awˬ viˉ awˬ nyi chaw haˉ yaˇ miˇ haˉ dawˇ cawˇ daꞈ ve teˇ geh guiˇ la tuˬ kaꞈ jehˬ piˇ ve yoˬ. Leh laˬ tuˬ maˇ laˬ tuˬ yawˇ hui htaꞈ cawˬ ve yoˬ.”
Awˬ viˉ awˬ nyi teˇ geh awˬ moˍ lonˉ chehˇ ve lehˬ, chaw haˉ yaˇ miˇ haˉ mawˬ daꞈ tuˬ awˬ hkʼaˇ cawˬ ve (Awˬ tawn 15 nyi sheˍ)
16. Chaw haˉ yaˇ miˇ haˉ aˬ htoꞈ ma htaꞈ tawnˇ taˍ cawˇ ve le?
16 Chaw haˉ yaˇ miˇ haˉ maˇ heˆ leh, heuˆ daꞈ˗oˬ ve chaw teˇ gʼaˇ le le htawˇ, a shaꞈ teꞈ kuiˬ hkʼaw ha lehˬ ve cawˬ gʼa ve yoˬ. (Chiˇ mvuh ve 128:1) Nawˬ heuˆ daꞈ gaˇ ve htawˇ, heuˆ gaˇ ve chaw htaꞈ ca maˇ gʼa sheˍ ve yoˬ. Chi hkʼe hpehꞈ ve htawˇ, Gʼuiˬ sha ve kanˉ htaꞈ caˉ leh te sheˍ. Hehˆ paˍ mvuhˇ miˬ Ma˗konˉ venˇ lo chehˇ ve awˬ viˉ awˬ nyi yaˇ miˇ Si˗yinˇ kʼoˆ ve, “nawˬ ve awˬ ca geh miˬ guiˬ awˬ suhˉ hkʼaw chehˇ ve awˬ yanˇ htaꞈ tehˆ daꞈ ve kʼo, chi teˇ hkui nawˬ chaw haˉ yaˇ haˉ hpehꞈ ve lehˬ, awˬ yanˇ a ciˉ ceh tiˉ hpehꞈ ve yoˬ. Chi teˇ hkui ve awˬ yanˇ htaꞈ ha lehˬ ve cawˬ leh awˬ bon cawˬ tuˬ te sheˍ.” Yaꞈ hkʼaˇ, chi teˇ hkui nawˬ dawˇ cawˇ ve chaw htaꞈ mawˬ daꞈ leh tanˬ maˆ daꞈ˗oˬ ve kʼo, hkʼaˬ hkʼe te tuˬ le? Chaw haˉ yaˇ miˇ haˉ te daꞈ ve awˬ yanˇ htaˇ, cuˇ yiˍ cawˬ ve hkʼaw dawˇ cheˆ gʼa tuˬ hkʼaˬ hkʼe ga laˇ gʼa ve, gʼuˇ suhˍ teˇ lawn hkʼaw teˇ geh henˇ tuˬ yoˬ.
KʼA MUIˬ HKAWˇ 137 Ka tiꞈ yeˬ ve yaˇ miˇ leh awˬ viˉ awˬ nyi yaˇ miˇ
a Nawˬ awˬ hpawˇ awˬ miˇ ma heuˆ gaˇ˗oˬ ve tehꞈ a shu yawˇ awˬ to shiˍ ve kʼo, vehˆsaiˉ jw.org hkʼaw awˬ lawn “Chaw haˉ yaˇ miˇ haˉ—Awˬ tawn 1: Ngaˬ chaw haˉ yaˇ miˇ haˉ cawˬ cawˇ˗aw laˇ?” hkʼaw nyi sheˍ.
b KʼAWꞈ KʼOˆ MAˍ TAˍ VE: Chi ve teˇ lawn leh gʼuˇ suhˍ teˇ lawn hkʼaw chaw haˉ yaˇ miˇ haˉ te daꞈ ve tcuhˉ kuiˬ lehˬ, yawˇ dawˇ cawˇ ve chaw yawˇ heuˆ daꞈ keunˍ˗aw laˇ tehꞈ nyi tuˬ yawˇ huiˉ maˬ hkʼa dehꞈ shiˍ daꞈ tuˬ te cawˇ ve yoˬ. Chi hkʼe ve htaꞈ mvuhˇ miˬ teˇ hpaˍ hpaˍ hkʼaw kʼo, teˇ geh ca guiˇ˗e ve, maˇ heˆ leh nawˬ hkʼaˬ hkʼe ve dawˇ cawˇ ve htaꞈ shiˍ tuˬ tawˇ yaw daꞈ ve tehꞈ kʼoˆ ve yoˬ. Chaw haˉ yaˇ miˇ haˉ te daꞈ htaˇ hawˉ hkʼaˆ leh yaˇ miˇ maˆ daꞈ tuˬ yoˬ tehꞈ hkʼa tawˍ lehˆ kʼoˆ piˇ daꞈ ve yoˬ. Chaw haˉ yaˇ miˇ haˉ te daꞈ ve peuˬ˗e ve lehˬ, yawˇ huiˉ maˬ heuˆ daꞈ ve maˇ heˆ leh maˇ maˆ daꞈ˗oˬ htaˇ hpehꞈ ve yoˬ.
c Awˬ lawn chi ve hkʼaw awˬ meh teˇ hpaˍ hpaˍ pa ve.
d Chaw liˇ vaˇ liˇ teˇ hpaˍ hpaˍ kʼo, awˬ viˉ awˬ nyi hawˉ hkʼaˆ awˬ viˉ awˬ nyi yaˇ miˇ geh chaw haˉ yaˇ miˇ haˉ te daꞈ tuˬ awˉ lawˉ kʼoˆ piˇ ve yoˬ. Chi hkʼe hpehꞈ ve htawˇ, awˬ viˉ awˬ nyi yaˇ miˇ kaꞈ awˬ viˉ awˬ nyi hawˉ hkʼaˆ geh hkʼa shuˍ kʼoˆ piˇ tuˬ a hkaw˗anˬ cawˬ ve yoˬ. (Ruˉhtaˆ 3:1-13) Awˬ leuˉ kʼawꞈ shiˍ gaˇ ve kʼo, Tu loˬ! liꞈ Ha pa 11 maˬ 8 nyi 2004 hkʼawꞈ “Yaˇ nehˬ na ve na hkawˇ . . . Ngaˬ nyi ma hkʼaw cawˬ ve yawˇ htaꞈ hkʼaˬ hkʼe kʼoˆ piˇ gʼa tuˬ le?” hkʼaw nyi sheˍ. (Laˇhuˍ hkawˇ maˇ cawˬ.)
e Vehˆsaiˉ jw.org hkʼaw Yonˍ ve awˬ pon tawˍ daꞈ gaˇ ve chaw teˇ hpaˍ—Awˬ hpawˇ awˬ miˇ ma maˇ heuˆ ve chaw hkʼaw nyi sheˍ.