1. Aˬ htoꞈ ma te Yeˍsuˆ shaˍ tiꞈ peꞈ laˇ ve htaꞈ ngaˬ hui na yuˬ cawˇ ve le?

 Awˬ leh meuˇ ve awˬ yanˇ, Yeˍsuˆ kʼoˆ ve a shaꞈ awˬ pon maˇ gʼa dawˇ haˍ tuˬ shaˍ tiꞈ te˗o. (Luˉkaꞈ 21:34) Shaˍ tiꞈ peꞈ laˇ ve chi ngaˬ hui gʼa na yuˬ cawˇ ve yoˬ. Aˬ htoꞈ ma pa taw le? Chi teˇ hkui teˇ gʼaˇ le le gʼa hpuˇ chehˇ ve dawˇ haˍ ve hkʼe ngaˬ hui kaꞈ gʼa hpuˇ ve yoˬ.

2. Awˬ viˉ awˬ nyi dawˇ haˍ tuˬ shoꞈ shaꞈ ve aˬ htoꞈ ma gʼa hpuˇ ve le?

² Teˇ pawˆ pawˆ kʼo, ngaˬ hui dawˇ haˍ ve laiˉ ceuˬ teˇ geh gʼa hpuˇ ve yoˬ. Awˬ lawn chi htaꞈ dawˇ nyi sheˍ. Shaˉ hkiˆ hkanˍ ve Yoˇhanˬ meh ve teˇ gʼaˇ, * awˬ suhˍ caˆ htaꞈ caˉ daꞈ ve a naˍ hpehꞈ ve, yawˇ ve awˬ miˇ ma heuˆ daꞈ ve 19 hkʼawꞈ gaˬ˗oˬ ve yawˇ htaꞈ baˬ˗aˉ piˇ ve nyi ma luˬ jaˇ. Peuˬ leh yawˇ ve yaˇ miˇ 2 gʼaˇ kaꞈ Yaˬhoˉvaˬ ve kanˉ maˇ te˗o. Awˬ hpawˇ awˬ miˇ ma teˇ ca Bawˆ leh Linˇdaꞈ kaꞈ shoꞈ shaꞈ ve laiˉ ceuˬ gʼa hpuˇ ve yoˬ. Yawˇ huiˉ maˬ kanˉ maˇ cawˬ leh peuˬ hkʼawꞈ nawˉ hpu yehˇ maˇ lawꞈ leh yawˇ hui chehˇ jaw ve yehˬ htaꞈ maˇ kʼawꞈ gʼa chehˇ˗o. Chi hkʼoˆ kaꞈ Linˇdaꞈ nyi ma shiˍ a naˍ hpehꞈ leh awˬ nu ve a naˍ teˇ ceuˬ kʼo, yawˇ awˬ to hkʼaw daꞈ ve htaꞈ te luˬ ve yoˬ.

3. Hpiˇliˇpiˆ liꞈ 4:6, 7 hkʼaw kʼoˆ taˍ ve hkʼe, ngaˬ hui aˬ htoꞈ ma ve awˬ lawn htaꞈ yonˍ gʼa ve le?

³ Yaˬhoˉvaˬ hpanˍ shehˍ hpaˇ leh haꞈ pehnˇ uiˍ jaˇ ve Awˬ pa hpehꞈ leh ngaˬ hui dawˇ haˍ htaˇ, yawˇ na gʼa ve tehꞈ hkʼa dehꞈ yonˍ gʼa ve yoˬ. Ngaˬ hui shoꞈ shaꞈ ve laiˉ ceuˬ gʼa hpuˇ ve htaꞈ tawˍ daꞈ gʼaˇ tuˬ yawˇ ga laˇ gaˇ ve yoˬ. (Hpiˇliˇpiˆ 4:6, 7 gʼaw sheˍ.) Gʼuiˬ sha ve kanˉ te ve chaw shoꞈ shaꞈ ve laiˉ ceuˬ gʼa hpuˇ ve awˬ lawn chi Liꞈ hpu hkʼaw kʼoˆ taˍ ve yoˬ. Yaˬhoˉvaˬ yawˇ ve chaw dawˇ haˍ ve gʼa hpuˇ htaˇ tawˍ daꞈ gʼaˇ tuˬ kaꞈ kʼoˆ taˍ ve yoˬ. Teˇ lawn lawn htaꞈ teˇ geh nyi sheˍ.

4. Eˇliˇyaꞈ shoꞈ shaꞈ ve aˬ htoꞈ ma gʼa hpuˇ ve le? Yawˇ Yaˬhoˉvaˬ htaꞈ hkʼaˬ hkʼe dawˇ ve le?

⁴ Eˇliˇyaꞈ tuꞈ hkanˍ ve awˬ yanˇ htaˇ Gʼuiˬ sha ve kanˉ te leh shoꞈ shaꞈ  jaˇ ve laiˉ ceuˬ gʼa hpuˇ ve yoˬ. Jawˇmawˇ Aˍhaˆ Iˉsaˍreˍlaˆ chaw hui ve maˇ daꞈ ve jawˇ mawˇ hpehꞈ leh Baˍlaˆ gʼuiˬ sha htaꞈ oˉ kʼoˍ pui ve yaˇ miˇ Yeˍsaˍbeˍlaˆ htaꞈ heuˆ ve yoˬ. Yawˇ huiˉ maˬ chehˇ ve mvuhˇ miˬ hkʼaw Baˍlaˆ gʼuiˬ sha htaꞈ oˉ kʼoˍ pui ve teˇ kaˬ le le cawˬ tcuh leh Gʼuiˬ sha ve tcuh kaˍ paˍ laiˉ gʼaˇ htaꞈ kaꞈ tiˇ pehˍ ve yoˬ. Eˇliˇyaꞈ hpaw˗e gʼa ve yoˬ. Yawˇ Gʼuiˬ sha htaꞈ gʼaˇ va ve pa taw, meuꞈ lonˉ kaˆ lonˉ htaꞈ ponˬ kʼai gʼa ve yoˬ. (1 Jawˇmawˇ 17:2-4, 14-16) Chi hkʼoˆ kaꞈ, Eˇliˇyaꞈ Baˍlaˆ gʼuiˬ sha htaꞈ oˉ kʼoˍ pui ve chaw leh maˇ heˆ heˆ ve tcuh kaˍ paˍ htaꞈ gʼa hpuˇ htaˇ kaꞈ yawˇ Yaˬhoˉvaˬ htaꞈ gʼaˇ va ve yoˬ. Yawˇ Iˉsaˍreˍlaˆ chaw htaꞈ Yaˬhoˉvaˬ ve kanˉ te tuˬ awˬ gʼaˇ piˇ ve yoˬ. (1 Jawˇmawˇ 18:21-24, 36-38) Eˇliˇyaꞈ dawˇ haˍ htaˇ, Yaˬhoˉvaˬ ga laˇ tuˬ tehꞈ yawˇ shiˍ ve yoˬ.

5-6. 1 Jawˇmawˇ liꞈ 19:1-4 hkʼaw kʼoˆ taˍ ve hkʼe, Eˇliˇyaꞈ hkʼaˬ hkʼe dawˇ ve le? Yaˬhoˉvaˬ Eˇliˇyaꞈ htaꞈ haꞈ sheˍ ve tehꞈ shiˍ tcuh tuˬ yawˇ hkʼaˬ hkʼe te ve le?

⁵ 1 Jawˇmawˇ liꞈ 19:1-4 gʼaw sheˍ. Yaꞈ hkʼaˇ, Jawˇmawˇ ma Yeˍsaˍbeˍlaˆ Eˇliˇyaꞈ htaꞈ tiˇ pehˍ tuˬ kʼoˆ piˇ htaˇ yawˇ kawˆ jaˇ. Chi htaꞈ pa taw, yawˇ Beˍraˍsheˍbaˆ venˇ lo hpaw˗e ve yoˬ. Yawˇ dawˇ haˍ jaˇ ve pa taw, “ngaˬ suh gaˇ jaˇ” tehꞈ bon lawˬ ve yoˬ. Aˬ htoꞈ ma pa taw yawˇ chi hkʼe dawˇ ve le? Eˇliˇyaꞈ maˇ biˇ ve chaw hpehꞈ leh “ngaˬ hui hkʼa shuˍ shuˍ chaw yaˇ hpehꞈ” ve yoˬ. (Yaˍkoˆ 5:17) Yawˇ dawˇ haˍ jaˇ leh heuˬ jaˇ ve pa taw, teꞈ chiˉ maˇ te gaˇ˗o ve yoˬ hehˉ. Chaw yaˇ Yaˬhoˉvaˬ htaꞈ oˉ kʼoˍ kʼawꞈ pui la tuˬ Eˇliˇyaꞈ awˬ gʼaˇ piˇ gaˇ ve yoˬ. Yaꞈ hkʼaˇ, yawˇ te ve awˬ bon teꞈ chiˉ maˇ cawˬ tehꞈ dawˇ ve yoˬ. Iˉsaˍreˍlaˆ mvuhˇ miˬ lo teꞈ chiˉ daꞈ la kuiˬ  maˇ cawˬ leh yawˇ teˇ gʼaˇ ceh tiˉ Gʼuiˬ sha htaꞈ oˉ kʼoˍ pui ve tehꞈ dawˇ ve yoˬ. (1 Jawˇmawˇ 18:3, 4, 13; 19:10, 14) Tcuh kaˍ paˍ ka tiꞈ yeˬ ve chi teˇ gʼaˇ chi hkʼe dawˇ ve ngaˬ hui anˇ jaˇ. Yaꞈ hkʼaˇ, Yaˬhoˉvaˬ Eˇliˇyaꞈ ve dawˇ hkʼaˇ htaꞈ shiˍ ve yoˬ.

⁶ Eˇliˇyaꞈ chi hkʼe dawˇ ve htawˇ Yaˬhoˉvaˬ maˇ deˇ piˇ. Yaꞈ hkʼaˇ, Eˇliˇyaꞈ awˬ gʼaˇ kʼawꞈ cawˬ la tuˬ Gʼuiˬ sha ga piˇ ve yoˬ. (1 Jawˇmawˇ 19:5-7) Peuˬ leh Eˇliˇyaꞈ dawˇ hkʼaˇ pa tuˬ, Yaˬhoˉvaˬ nuˇ nehˬ ve hkʼaw kanˇ paˆ hpeuꞈ maw piˇ ve yoˬ. Hkʼe te leh Iˉsaˍreˍlaˆ mvuhˇ miˬ hkʼaw Baˍlaˆ gʼuiˬ sha htaꞈ oˉ kʼoˍ maˇ pui ve chaw 7,000 gʼaˇ cawˬ sheˍ ve tehꞈ, Yaˬhoˉvaˬ yawˇ htaꞈ kʼoˆ piˇ ve yoˬ. (1 Jawˇmawˇ 19:11-18) Yaˬhoˉvaˬ yawˇ htaꞈ haꞈ ve tehꞈ hpeuꞈ maw piˇ ve yoˬ.

7. Yaˬhoˉvaˬ Eˇliˇyaꞈ htaꞈ ga piˇ ve awˬ hkʼaˇ ngaˬ hui htaꞈ aˬ htoꞈ ma maˍ laˇ ve le?

⁷ Nawˬ dawˇ haˍ ve gʼa hpuˇ chehˇ˗aw laˇ? Yaˬhoˉvaˬ Eˇliˇyaꞈ ve dawˇ hkʼaˇ htaꞈ na gʼa ve ngaˬ hui shiˍ htaˇ awˬ gʼaˇ gʼa jaˇ! Gʼuiˬ sha ngaˬ hui dawˇ haˍ ve htaꞈ kaꞈ a yeˇ yuˬ laˇ ve tehꞈ shiˍ ve yoˬ. Ngaˬ hui te gʼa ve, te maˇ gʼa ve, leh nyi ma hkʼaw cawˬ ve hkʼa peu˗eˬ Yaˬhoˉvaˬ shiˍ ve yoˬ. (Chiˇ mvuh ve 103:14; 139:3, 4) Eˇliˇyaꞈ htaꞈ henˇ yuˬ leh Yaˬhoˉvaˬ htaꞈ gʼaˇ va ve kʼo, ngaˬ hui dawˇ haˍ ve gʼa hpuˇ htaˇ yawˇ ga laˇ tuˬ yoˬ.—Chiˇ mvuh ve 55:22.

8. Nawˬ dawˇ haˍ ve gu gʼa tuˬ Yaˬhoˉvaˬ hkʼaˬ hkʼe ga laˇ gʼa tuˬ le?

⁸ Ngaˬ hui dawˇ haˍ htaˇ, daꞈ la tuˬ maˇ cawˬ tehꞈ dawˇ ve yoˬ hehˉ. Chi ngaˬ hui awˬ gʼaˇ nuˇ tuˬ te laˇ ve yoˬ. Chi hkʼe hpehꞈ ve kʼo, nawˬ dawˇ haˍ ve gu gʼa tuˬ Yaˬhoˉvaˬ ga laˇ gʼa ve tehꞈ tawnˇ taˍ sheˍ. Yawˇ hkʼaˬ hkʼe te tuˬ le? Nawˬ shoꞈ shaꞈ ve leh dawˇ haˍ ve yawˇ htaꞈ kʼoˆ laˇ tcuh gaˇ ve yoˬ. Yawˇ nawˬ lawˬ ve hkawˇ htaꞈ hkʼawꞈ laˇ tuˬ yoˬ. (Chiˇ mvuh ve 5:3; 1 Peˍtruˆ 5:7) Chi htaꞈ pa taw, nawˬ gʼa hpuˇ ve awˬ lawn yawˇ geh teˇ hkui teˇ hkui bon lawˬ sheˍ. Yawˇ Eˇliˇyaꞈ geh yaw daꞈ ve hkʼe nawˬ geh yaw daꞈ tuˬ ve maˇ heˆ. Yaꞈ hkʼaˇ, yawˇ nawˬ geh yaw daꞈ tuˬ Liꞈ hpu leh Gʼuiˬ sha ve kanˉ hkʼaˇ htaꞈ cuˇ ve yoˬ. Liꞈ hpu hkʼaw ve awˬ lawn nawˬ gʼaw ve kʼo, awˬ gʼaˇ leh dawˇ law kuiˬ peꞈ laˇ tuˬ yoˬ. Awˬ viˉ awˬ nyi kaꞈ nawˬ htaꞈ awˬ gʼaˇ peꞈ laˇ gʼa ve yoˬ.—Roˉmaꞈ 15:4; Heˍbrehˇ 10:24, 25.

9. Yonˍ gʼa ve awˬ chawˇ ngaˬ hui htaꞈ hkʼaˬ hkʼe ga laˇ gʼa tuˬ le?

⁹ Eˇliˇshehˇ htaꞈ kanˉ teˇ ceuˬ ceuˬ te tcuh˗o tehꞈ, Yaˬhoˉvaˬ Eˇliˇyaꞈ htaꞈ kʼoˆ piˇ ve yoˬ. Chi hkʼe te ve lehˬ Eˇliˇyaꞈ daꞈ ve awˬ chawˇ cawˬ ve yoˬ. Awˬ chawˇ chi teˇ gʼaˇ yawˇ awˬ gʼaˇ nuˇ ve htaꞈ ga piˇ gʼa ve yoˬ. Chi ve kaꞈ hkʼa shuˍ, ngaˬ hui dawˇ haˍ ve awˬ chawˇ htaꞈ kʼoˆ piˇ htaˇ, awˬ gʼaˇ gʼa tuˬ yawˇ ga laˇ gʼa ve yoˬ. (2 Jawˇmawˇ 2:2; Tawˇ naˉ ve 17:17) Nawˬ kʼoˆ maˍ piˇ kuiˬ maˇ cawˬ tehꞈ dawˇ htaˇ, nawˬ htaꞈ ga laˇ gʼa tuˬ co ha hpawˇ ve chaw mawˇ awˬ chawˇ cawˬ tuˬ Yaˬhoˉvaˬ geh bon lawˬ sheˍ.

10. Eˇliˇyaꞈ ve awˬ lawn ngaˬ hui htaꞈ dawˇ law kuiˬ aˬ htoꞈ ma peꞈ laˇ ve le? Iˉsaˍyaˆ liꞈ 40:28, 29 hkʼaw ve ka tiꞈ te taˍ ve ngaˬ hui htaꞈ hkʼaˬ hkʼe ga laˇ ve le?

¹⁰ Eˇliˇyaꞈ dawˇ haˍ ve htaꞈ gu gʼa tuˬ leh ka tiꞈ yeˬ ve hkʼaw Gʼuiˬ sha ve kanˉ laiˉ hkʼawꞈ te gʼa tuˬ Yaˬhoˉvaˬ yawˇ htaꞈ ga piˇ ve yoˬ. Eˇliˇyaꞈ ve awˬ lawn ngaˬ hui htaꞈ dawˇ law kuiˬ peꞈ laˇ ve yoˬ. Ngaˬ hui shoꞈ shaꞈ ve laiˉ ceuˬ gʼa hpuˇ ve pa taw, dawˇ haˍ leh heuˬ tuˬ te laˇ ve yoˬ. Yaꞈ hkʼaˇ, ngaˬ hui Yaˬhoˉvaˬ htaꞈ gʼaˇ va ve kʼo, yawˇ ve kanˉ caˉ leh te gʼa tuˬ awˬ gʼaˇ peꞈ laˇ tuˬ yoˬ.—Iˉsaˍyaˆ 40:28, 29 gʼaw sheˍ.

11-13. Gʼuiˬ sha ve kanˉ te ve chaw 3 gʼaˇ dawˇ haˍ ve pa taw heuˆ la kuiˬ hkʼaˬ hkʼe cawˬ ve le?

¹¹ Liꞈ hpu hkʼaw awˬ nu ve chaw dawˇ haˍ ve gʼa hpuˇ ve kaꞈ cawˬ ve yoˬ. Tawˇ pa haˉ te kʼo, Haˍnaˆ  lehˬ chaw meh ma hpehꞈ ve pa taw, yawˇ ve awˬ hpawˇ ve awˬ miˇ ma awˬ nu ve teˇ gʼaˇ yawˇ htaꞈ kʼoˆ guiˇ gʼuiˬ guiˇ piˇ ve yoˬ. (1 Saˍmo˗eˍlaˆ 1:2, 6) Haˍnaˆ dawˇ haˍ jaˇ leh awˬ gʼaˇ nuˇ jaˇ. Yawˇ hawˬ leh teꞈ chiˉ kaꞈ maˇ caˇ.—1 Saˍmo˗eˍlaˆ 1:7, 10.

¹² Teˇ pawˆ pawˆ kʼo, Jawˇmawˇ Daˍviˆ kaꞈ dawˇ haˍ ve pa taw, awˬ gʼaˇ nuˇ ve yoˬ. Yawˇ gʼa hpuˇ ve awˬ lawn teˇ hpaˍ htaꞈ dawˇ nyi sheˍ. Yawˇ laiˉ ceuˬ te yaꞈ ve pa taw, nyi ma luˬ ve yoˬ. (Chiˇ mvuh ve 40:12) Yawˇ haꞈ jaˇ ve yaˇ paˍ Aˍbaˆsaˍlonˍ yawˇ htaꞈ hpfuhˆ leh awˬ leh meuˇ htaˇ suh˗e ve yoˬ. (2 Saˍmo˗eˍlaˆ 15:13, 14; 18:33) Yawˇ meuˆ daꞈ jaˇ ve awˬ chawˇ teˇ gʼaˇ yawˇ htaꞈ hpfuhˆ piˇ ve yoˬ. (2 Saˍmo˗eˍlaˆ 16:23–17:2; Chiˇ mvuh ve 55:12-14) Yawˇ bvuhꞈ taˍ ve chiˇ mvuh ve liꞈ laiˉ pfuhꞈ hkʼaw awˬ gʼaˇ nuˇ leh yawˇ Yaˬhoˉvaˬ htaꞈ gʼaˇ hkʼa dehꞈ va ve awˬ lawn kʼoˆ taˍ ve yoˬ.—Chiˇ mvuh ve 38:5-10; 94:17-19.

¹³ Peuˬ hkʼawꞈ nawˉ chiˇ mvuh ve liꞈ bvuhꞈ paˍ awˬ nu ve teˇ gʼaˇ, haiˬ ve chaw a shaꞈ teꞈ hkʼaˇ htaꞈ hkawehˉ ve yoˬ. Chi teˇ gʼaˇ Leˍviˆ chaw Aˍsaˆ ve awˬ yaˇ awˬ duˬ hpehꞈ leh, Gʼuiˬ sha ve bon yehˬ hkʼaw kanˉ te ve yoˬ hehˉ. Yawˇ dawˇ haˍ ve gʼa hpuˇ ve pa taw, ha lehˬ kuiˬ maˇ cawˬ. Yawˇ Gʼuiˬ sha ve kanˉ te ve hkʼaw awˬ bon maˇ naꞈ laˇ ve tehꞈ htawˇ dawˇ nawˬ dawˇ tanˬ cawˬ la ve yoˬ.—Chiˇ mvuh ve 73:2-5, 7, 12-14, 16, 17, 21.

14-15. Yaˬhoˉvaˬ ga laˇ tuˬ lawˬ ve 3 gʼaˇ ve awˬ lawn chi ngaˬ hui htaꞈ aˬ htoꞈ ma maˍ laˇ ve le?

¹⁴ Yaˬhoˉvaˬ htaꞈ awˬ tehˬ oˉ kʼoˍ pui ve chaw 3 gʼaˇ yawˇ ga laˇ tuˬ law taˍ ve yoˬ. Yawˇ hui bon lawˬ leh dawˇ haˍ ve hkʼa peu˗eˬ Gʼuiˬ sha htaꞈ kʼoˆ piˇ ve yoˬ. Hkʼe te leh Yawˇ hui hkʼaˬ htaˆ kaꞈ Yaˬhoˉvaˬ htaꞈ oˉ kʼoˍ pui˗e ve yoˬ.—1 Saˍmo˗eˍlaˆ 1:9, 10; Chiˇ mvuh ve 55:22; 73:17; 122:1.

¹⁵ Haꞈ pehnˇ ve hkʼaw Yaˬhoˉvaˬ teˇ gʼaˇ leh teˇ gʼaˇ  ve bon lawˬ hkawˇ htaꞈ hkʼawꞈ piˇ ve yoˬ. Haˍnaˆ nyi ma gawˬ lehˍ cawˬ la ve yoˬ. (1 Saˍmo˗eˍlaˆ 1:18) Daˍviˆ kʼoˆ ve, “daꞈ ve chaw lehˬ dawˇ haˍ tuˬ awˬ ceuˬ laiˉ ceuˬ htaꞈ gʼa hpuˇ ve yoˬ. Yaꞈ hkʼaˇ, Gʼuiˬ sha yawˇ htaꞈ ponˬ piˇ ve yoˬ.” (Chiˇ mvuh ve 34:19) Chiˇ mvuh ve liꞈ bvuhꞈ paˍ kʼoˆ ve, Yaˬhoˉvaˬ˗oˬ ‘ngaˬ ve laꞈ sheh htaꞈ vawˆ taˍ laˇ˗oˆ.’ Chi kʼoˆ gaˇ ve lehˬ, Yaˬhoˉvaˬ haꞈ pehnˇ ve hkʼaw yawˇ htaꞈ beˆ maˍ piˇ ve yoˬ. Yawˇ kʼawꞈ kʼoˆ ve, ‘ngaˬ lehˬ, Gʼuiˬ sha awˬ paˇ neˇ lo gʼa chehˇ ve pa taw, hkʼaˬ ma daꞈ jaˇ ve le. Yawˇ awˬ hkʼaw lo ponˬ kuiˬ htaꞈ ngaˬ gʼa mawˬ ve yoˬ.’ (Chiˇ mvuh ve 73:23, 24, 28) Chi teˇ hpaˍ ngaˬ hui htaꞈ aˬ htoꞈ ma maˍ laˇ ve le? Laiˉ pawˆ kʼo, ngaˬ hui shoꞈ shaꞈ ve gʼa hpuˇ ve pa taw, dawˇ haˍ leh awˬ gʼaˇ nuˇ ve yoˬ. Yaꞈ hkʼaˇ, Yaˬhoˉvaˬ awˬ nu ve chaw htaꞈ ga piˇ ve awˬ hkʼaˇ dawˇ nyi htaˇ, yawˇ geh bon lawˬ ve, leh yawˇ kʼoˆ laˇ ve awˬ ceuˬ htaꞈ ngaˬ hui gʼaꞈ te htaˇ tawˍ daꞈ gʼaˇ tuˬ yoˬ.—Chiˇ mvuh ve 143:1, 4-8.

16-17. (a) Aˬ htoꞈ ma te ngaˬ hui teˇ gʼaˇ tiˉ maˇ chehˇ cawˇ ve le? (b) Ngaˬ hui hkʼaˬ hkʼe te leh awˬ gʼaˇ kʼawꞈ cawˬ la gʼa tuˬ le?

¹⁶ 3 gʼaˇ ve awˬ lawn a yeˇ uiˍ ve henˇ yuˬ tuˬ ngaˬ hui htaꞈ maˍ laˇ sheˍ ve yoˬ. Yaˬhoˉvaˬ leh yawˇ ve chaw geh ngaˬ hui maˇ hpaˆ daꞈ chehˇ cawˇ. (Tawˇ naˉ ve 18:1) Nehˉseˍ awˬ hpawˇ baˬ˗aˉ piˇ htaˇ dawˇ haˍ jaˇ. Yawˇ kʼoˆ ve, “teˇ nyi nyi kʼo ngaˬ shu geh  tawˇ maˇ yaw daꞈ gaˇ leh maˇ mawˬ gaˇ. Yaꞈ hkʼaˇ, ngaˬ teˇ gʼaˇ tiˉ chehˇ htaˇ gʼaˇ hteꞈ kʼawꞈ dawˇ haˍ ve yoˬ.” Nehˉseˍ shu shoꞈ shaꞈ ve gʼa hpuˇ ve chaw htaꞈ ga piˇ htaˇ, yawˇ ve dawˇ hkʼaˇ kaꞈ pa ve yoˬ. Yawˇ kʼawꞈ kʼoˆ ve, “shu gʼa hpuˇ ve awˬ lawn ngaˬ htaꞈ kʼoˆ laˇ htaˇ ngaˬ na taˍ ve yoˬ. Yawˇ hui dawˇ haˍ ve htaꞈ ngaˬ hkʼa dehꞈ na gʼa htaˇ, ngaˬ ve awˬ lawn maˇ kʼawꞈ dawˇ haˍ jaˇ˗o.”

¹⁷ Hkriꞈ yaˇ hpawnˬ daꞈ ve kʼai ve kʼo ngaˬ hui awˬ gʼaˇ kʼawꞈ gʼa ve yoˬ. Hpawnˬ daꞈ htaˇ, Yaˬhoˉvaˬ lehˬ ngaˬ hui htaꞈ ‘dawˇ sha la piˇ leh ga laˇ shehˍ hpaˇ’ hkʼe hpehꞈ ve yoˬ. (Chiˇ mvuh ve 86:17) Ngaˬ hui htaꞈ awˬ gʼaˇ peꞈ laˇ tuˬ yawˇ daꞈ kehˬ ve awˬ hpu, Liꞈ hpu, leh yawˇ ve chaw htaꞈ cuˇ ve yoˬ. Hpawnˬ daꞈ htaˇ, “teˇ gʼaˇ htaꞈ teˇ gʼaˇ awˬ gʼaˇ piˇ daꞈ” gʼa ve yoˬ. (Roˉmaꞈ 1:11, 12) Awˬ viˉ awˬ nyi Soˍfiˇ˗aꞈ kʼoˆ ve, “Yaˬhoˉvaˬ leh awˬ viˉ awˬ nyi ngaˬ yeunˇ hkanˍ gʼaˇ tuˬ ga laˇ ve yoˬ. Hkriꞈ yaˇ hpawnˬ daꞈ ve ngaˬ awˬ pon a yeˇ uiˍ jaˇ. Ngaˬ gʼaˇ hteꞈ hto toˇ˗e leh Hkriꞈ yaˇ awˬ moˍ geh chehˇ htaˇ, dawˇ haˍ ve kaꞈ hkʼa dehꞈ maˇ cawˬ˗o.”

18. Ngaˬ hui awˬ gʼaˇ nuˇ htaˇ Yaˬhoˉvaˬ aˬ htoꞈ ma peꞈ laˇ tuˬ le?

¹⁸ Ngaˬ hui awˬ gʼaˇ nuˇ htaˇ chi htaꞈ tawnˇ taˍ sheˍ. Awˬ gʼuˇ suhˍ hpawˇ ngaˬ hui maˇ kʼawꞈ gʼa dawˇ haˍ˗o tehꞈ Yaˬhoˉvaˬ ka tiꞈ te taˍ laˇ ve yoˬ. Yaꞈ hkʼaˇ, chi teˇ hkui ngaˬ hui dawˇ haˍ ve gu gʼa tuˬ kaꞈ Yaˬhoˉvaˬ ka tiꞈ te taˍ laˇ ve yoˬ. Ngaˬ hui awˬ gʼaˇ nuˇ leh dawˇ law kuiˬ maˇ cawˬ ve htaꞈ tawˍ daꞈ gʼaˇ tuˬ “te gaˇ ve nyi ma” kʼawꞈ cawˬ tuˬ yawˇ peꞈ laˇ tuˬ yoˬ.—Hpiˇliˇpiˆ 2:13.

19. Roˉmaꞈ liꞈ 8:37-39 hkʼaw ngaˬ hui htaꞈ aˬ htoꞈ ma maˍ laˇ ve le?

¹⁹ Roˉmaꞈ liꞈ 8:37-39 gʼaw sheˍ. Tcuh yaˇ Pawˇluꞈ kʼoˆ ve, Gʼuiˬ sha ve haꞈ pehnˇ ve htaꞈ teˇ ceuˬ kaꞈ ngaˬ hui htaꞈ yuˬ hpaˆ laˇ maˇ gʼa. Awˬ viˉ awˬ nyi dawˇ haˍ ve htaꞈ tawˍ daꞈ chehˇ ve ngaˬ hui hkʼaˬ hkʼe ga piˇ gʼa tuˬ le? Haꞈ pehnˇ ve hpeuꞈ maw piˇ tuˬ leh awˬ viˉ awˬ nyi dawˇ haˍ chehˇ ve htaꞈ ga piˇ tuˬ ngaˬ hui Yaˬhoˉvaˬ htaꞈ hkʼaˬ hkʼe henˇ yuˬ gʼa tuˬ le? Gʼuˇ suhˍ teˇ lawn hkʼaw henˇ tuˬ yoˬ.