1. Kawˇlawˇsehˇ liꞈ 2:4, 8 hkʼaw kʼoˆ taˍ ve hkʼe, Saˍtanˍ ngaˬ hui ve dawˇ hkʼaˇ htaꞈ hkʼaˬ hkʼe te uˉ peunˍ chehˇ ve le?

 Ngaˬ hui Yaˬhoˉvaˬ htaꞈ oˉ kʼoˍ maˇ pui tuˬ Saˍtanˍ te tcuh gaˇ ve yoˬ. Chi hkʼe hpehꞈ tuˬ yawˇ coˇ caˇ leh ngaˬ hui ve dawˇ hkʼaˇ htaꞈ pa laˇ ve yoˬ. Ngaˬ hui ve dawˇ hkʼaˇ yawˇ uˉ peunˍ ve awˬ hawˉ lo chehˇ leh yawˇ hkʼe dawˇ tcuh gaˇ ve yoˬ. Saˍtanˍ ngaˬ hui htaꞈ heˍ leh yawˇ hkʼe te tuˬ ngaˬ hui dawˇ cawˇ ve awˬ ceuˬ htaꞈ yehˇ ve yoˬ.—Kawˇlawˇsehˇ 2:4, 8 gʼaw sheˍ.

2-3. (a) Kawˇlawˇsehˇ liꞈ 2:8 hkʼaw shaˍ tiꞈ peꞈ laˇ ve htaꞈ aˬ htoꞈ ma te ngaˬ hui a yeˇ yuˬ cawˇ ve le? (b) Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

² Saˍtanˍ heˍ ve awˬ tehˬ kawˆ tuˬ cawˬ˗aw laˇ? Cawˬ ve yoˬ! Awˬ lawn chi htaꞈ tawnˇ taˍ sheˍ. Kawˇlawˇsehˇ liꞈ 2:8 hkʼaw shaˍ tiꞈ peꞈ laˇ ve chi Pawˇluꞈ maˇ yonˍ ve chaw htaꞈ maˇ gʼa bvuhꞈ piˇ. Yaꞈ hkʼaˇ, yawˇ daꞈ kehˬ ve awˬ ha hpu leuˆ yuˬ taˍ ve Hkriꞈ yaˇ htaꞈ bvuhꞈ piˇ ve yoˬ. (Kawˇlawˇsehˇ 1:2, 5) Awˉ lawˉ peuˇ ve Hkriꞈ yaˇ shaˍ tiꞈ gʼa te leh, chi beuꞈ teˇ co˗e ngaˬ hui kaꞈ hkʼa shuˍ gʼa te ve yoˬ. (1 Kawˇrenˍhtuˆ 10:12) Aˬ htoꞈ ma pa taw le? Saˍtanˍ miˬ guiˬ hkʼoˆ lo chehˇ leh Gʼuiˬ sha ve kanˉ te ve ka tiꞈ yeˬ ve chaw htaꞈ heˍ tuˬ yawˇ dawˇ teh taˍ ve yoˬ. (Hpeuꞈ maˍ ve 12:9, 12, 17) Chi hkʼoˆ kaꞈ “haiˬ ve chaw leh heˍ puiˉ ve chaw teˇ hpaˍ lehˬ, shaˬ te shaˬ haiˬ la tuˬ” ve awˬ yanˇ awˬ hkʼaw lo ngaˬ hui chehˇ ve yoˬ.—2 Tiˆmoˉseˍ 3:1, 13.

³ Saˍtanˍ ngaˬ hui ve dawˇ hkʼaˇ htaꞈ pa laˇ tuˬ yawˇ “tcuhˉ kuiˬ maˇ cawˬ ve heˍ ve tawˇ hkawˇ” htaꞈ hkʼaˬ hkʼe yehˇ ve awˬ lawn chi ve hkʼaw teˇ geh henˇ tuˬ yoˬ. Ngaˬ hui “neˇ haiˬ heˍ yuˬ beˬ yuˬ ve” 3 hkʼaˇ htaꞈ henˇ tuˬ yoˬ. (Eˇfeˇsuꞈ 6:11) Peuˬ hkʼawꞈ nawˉ Saˍtanˍ hkʼe  ve dawˇ hkʼaˇ cawˬ ve htaꞈ yuˬ baˬ tuˬ, ngaˬ hui hkʼaˬ hkʼe gʼa te cawˇ ve gʼuˇ suhˍ teˇ lawn hkʼaw teˇ geh henˇ tuˬ yoˬ. Iˉsaˍreˍlaˆ chaw ka tiꞈ te taˍ ve mvuhˇ miˬ hkʼaw loꞈ˗e peuˬ hkʼawꞈ nawˉ, Saˍtanˍ yawˇ hui htaꞈ heˍ piˇ ve awˬ hkʼaˇ ngaˬ hui htaꞈ hkʼaˬ hkʼe maˍ laˇ gʼa ve awˉ lawˉ teˇ geh dawˇ nyi sheˍ.

4-6. Bon maˍ ve liꞈ 11:10-15 hkʼaw kʼoˆ taˍ ve hkʼe, Iˉsaˍreˍlaˆ chaw ka tiꞈ te taˍ ve mvuhˇ miˬ hkʼaw gaˬ˗oˬ htaˇ, yawˇ hui aˬ htoꞈ ma htaꞈ gʼa henˇ cawˇ ve le?

⁴ Saˍtanˍ lehˆ jaˇ leh Iˉsaˍreˍlaˆ chaw shaˉ hoꞈ htaꞈ oˉ kʼoˍ pui tuˬ heˍ piˇ ve yoˬ. Neˇ haiˬ hkʼaˬ hkʼe te ve le? Yawˇ hui caˇ tuˬ loˍ ve tehꞈ neˇ haiˬ shiˍ ve pa taw, yawˇ loˍ ve hkʼe yawˇ hui gʼaꞈ te tuˬ chi htaꞈ yehˇ ve yoˬ. Iˉsaˍreˍlaˆ chaw ka tiꞈ te taˍ ve mvuhˇ miˬ hkʼaw gaˬ˗oˬ htaˇ, yawˇ hui ti mi te caˇ tuˬ awˬ hkʼaˇ awˬ suhˉ gʼa henˇ ve yoˬ. Iˉsaˍreˍlaˆ chaw Eˇjiˇtuꞈ mvuhˇ miˬ lo chehˇ htaˇ, yawˇ hui ti mi te caˇ tuˬ Niˍlaˆ iˉ kaˆ lawˬ htaꞈ yehˇ ve yoˬ. Yaꞈ hkʼaˇ, ka tiꞈ te taˍ ve mvuhˇ miˬ hkʼaw ti mi te caˇ tuˬ iˉ kaˆ lawˬ oˇ hkʼe ve htaꞈ maˇ yehˇ˗o. Mvuhˇ yeˬ leh ciˬ gʼuiˬ htaꞈ cuˇ ve yoˬ. (Bon maˍ ve 11:10-15; gʼaw sheˍ. Iˉsaˍyaˆ 18:4, 5) Chi htaꞈ pa taw, yawˇ hui ti mi te caˇ tuˬ awˬ hkʼaˇ awˬ suhˉ gʼa henˇ ve yoˬ. Ti mi te caˇ jaw ve chaw maˇ˗awˍ ve heh puiˉ hkʼaw lo suh peuˬ˗oˬ ve pa taw, chi hkʼe te tuˬ maˇ sha.

⁵ Awˬ tcuhˉ awˬ yanˇ pa kʼai˗oˬ tehꞈ Yaˬhoˉvaˬ yawˇ ve chaw htaꞈ kʼoˆ maˍ piˇ ve yoˬ. Yawˇ yawˇ hui htaꞈ teˇ ceuˬ kʼawꞈ kʼoˆ piˇ sheˍ. Awˬ lawn chi ve lehˬ nyi˗a kʼo ti mi te caˇ ve htaꞈ maˇ caˉ daꞈ. Yaꞈ hkʼaˇ, yawˇ kʼoˆ ve, “nawˬ hui shu hkawˇ na leh, awˬ kaˍ awˬ nu gʼuiˬ sha teˇ hpaˍ htaꞈ oˉ kʼoˍ maˇ gʼa pui tuˬ shaˍ tiꞈ taˍ˗oꞈ.” (Bon maˍ ve 11:16, 17) Ti mi te caˇ ve htaꞈ kʼoˆ htaˇ, aˬ htoꞈ ma te Yaˬhoˉvaˬ awˬ nu ve gʼuiˬ sha htaꞈ oˉ kʼoˍ pui ve kaꞈ shaˍ tiꞈ piˇ ve le?

⁶ Iˉsaˍreˍlaˆ chaw yawˇ hui awˬ paˇ awˬ kui lo chehˇ ve geh ti mi te caˇ ve awˬ hkʼaˇ awˬ suhˉ henˇ ve htawˇ, beˬ ve lawˇ ve gʼa hpuˇ tuˬ ve tehꞈ Yaˬhoˉvaˬ shiˍ ve yoˬ. Yawˇ hui awˬ paˇ awˬ kui chehˇ  ve chaw awˬ lawn chi htaꞈ hkʼa dehꞈ shiˍ leh Gʼuiˬ sha ve chaw kaꞈ yawˇ hui htaꞈ henˇ yuˬ gʼa ve yoˬ. Yaꞈ hkʼaˇ, awˬ lawn chi kaꞈ kawˆ tuˬ cawˬ ve yoˬ. Hkaˍnanˍ chaw ti mi te caˇ ve Baˍlaˆ gʼuiˬ sha htaꞈ yonˍ ve yoˬ. Baˍlaˆ gʼuiˬ sha lehˬ mvuhˇ naw ma ve gʼuiˬ sha leh mvuhˇ yeˬ peꞈ laˇ shehˍ hpaˇ hpehꞈ ve tehꞈ yawˇ hui yonˍ ve yoˬ. Chi hkʼe ve Yaˬhoˉvaˬ yawˇ ve chaw htaꞈ maˇ heˍ tcuh gaˇ. Yaꞈ hkʼaˇ, Iˉsaˍreˍlaˆ chaw Baˍlaˆ gʼuiˬ sha htaꞈ oˉ kʼoˍ pui tuˬ kʼawꞈ leuˆ yuˬ ve yoˬ. (Heh puiˉ hkʼaw 25:3, 5; Suhˉ jehˬ ve 2:13; 1 Jawˇmawˇ 18:18) Saˍtanˍ Iˉsaˍreˍlaˆ chaw htaꞈ hkʼaˬ hkʼe te hpeh yuˬ veu gʼa ve le teˇ geh nyi sheˍ.

7. Iˉsaˍreˍlaˆ chaw ka tiꞈ te taˍ ve mvuhˇ miˬ hkʼaw gaˬ˗oˬ htaˇ, yawˇ hui yonˍ ve htaꞈ beˬ ve lawˇ ve hkʼaˬ hkʼe gʼa hpuˇ ve le?

⁷ Saˍtanˍ yehˇ ve awˉ lawˉ teˇ ceuˬ lehˬ, chaw yaˇ teˇ gʼaˇ le le loˍ ve awˬ ceuˬ htaꞈ cuˇ ve yoˬ. Ka tiꞈ te taˍ ve mvuhˇ miˬ hkʼaw teˇ hkʼawꞈ le le Ha pa 4 maˬ te leh 9 maˬ hkʼa gaˬ mvuhˇ yeˬ hkʼa dehꞈ maˇ laˬ. Iˉsaˍreˍlaˆ chaw mvuhˇ yeˬ laˬ tcuh gaˇ ve yoˬ. A shaꞈ gʼa ponˬ tuˬ leh gʼawˇ caˉ leh iˉ shiˍ daꞈ la tuˬ mvuhˇ yeˬ laˬ tuˬ loˍ ve yoˬ. Ha pa 10 maˬ gaˬ htaˇ hehꞈ mvuhˇ yeˬ tanˬ laˬ ve yoˬ. Iˉsaˍreˍlaˆ chaw awˬ paˇ awˬ kui lo chehˇ ve maˇ heˆ heˆ ve awˬ liˇ awˬ hkʼaˇ hkʼe gʼaꞈ te htaˇ hehꞈ, awˬ ceuˬ oˇ ve teˇ hpaˍ daꞈ la gʼa tuˬ tehꞈ Saˍtanˍ yawˇ hui htaꞈ yonˍ tcuh ve yoˬ. Awˬ liˇ awˬ hkʼaˇ teˇ ceuˬ ceuˬ te htaˇ hehꞈ Gʼuiˬ sha mvuhˇ yeˬ laˬ tcuh laˇ ve tehꞈ awˬ paˇ awˬ kui chehˇ ve chaw yonˍ ve yoˬ. Yaˬhoˉvaˬ htaꞈ maˇ yonˍ ve chaw yawˇ hui mvuhˇ goˇ ve htaꞈ gu gʼa tuˬ chi hkʼe gʼa te ve tehꞈ yonˍ ve yoˬ. Hkʼe te leh yawˇ hui Baˍlaˆ gʼuiˬ sha htaꞈ yawˆ yan tuˬ maˇ heˆ heˆ ve awˬ liˇ awˬ hkʼaˇ htaꞈ tanˬ te ve yoˬ.

8. Saˍtanˍ yehˇ ve nyiˇ ceuˬ teˇ ceuˬ aˬ htoꞈ ma le? Kʼoˆ maˍ laˇ sheˍ.

⁸ Saˍtanˍ yehˇ ve nyiˇ ceuˬ teˇ ceuˬ lehˬ pehꞈ ve tzuhˆ ve hpawˇ te gaˇ ve nyi ma htaꞈ cuˇ ve yoˬ. Awˬ nu ve mvuhˇ miˬ hkʼaw chehˇ ve chaw yawˇ hui ve gʼuiˬ sha htaꞈ oˉ kʼoˍ pui leh pehꞈ ve tzuhˆ ve hpawˇ te gaˇ ve nyi ma htaꞈ kaꞈ caˉ daꞈ ve yoˬ. Yawˇ hui oˉ kʼoˍ pui kuiˬ hkʼaw yaˇ miˇ leh hawˉ hkʼaˆ awˬ to hawˇ ve kaꞈ cawˬ ve yoˬ. Hawˉ hkʼaˆ chawˇ hawˉ hkʼaˆ yaˇ miˇ chawˇ yaˇ miˇ pehꞈ ve tzuhˆ ve htaꞈ te leh pehꞈ ve tzuhˆ ve hpawˇ te gaˇ ve awˬ nu ve kaꞈ a hkʼe leˇ ceh hpehꞈ ve yoˬ! (Bon maˍ ve 23:17, 18; 1 Jawˇmawˇ 14:24) Maˇ heˆ heˆ ve gʼuiˬ sha htaꞈ yonˍ ve chaw yawˇ hui kʼoˆ ve, chi hkʼe te htaˇ mvuhˇ miˬ daꞈ la tuˬ tehꞈ yonˍ ve yoˬ. Iˉsaˍreˍlaˆ chaw laiˉ gʼaˇ htaꞈ pehꞈ ve tzuhˆ ve awˬ liˇ awˬ hkʼaˇ te tuˬ heˍ piˇ leh, maˇ heˆ heˆ ve gʼuiˬ sha htaꞈ kaꞈ oˉ kʼoˍ pui ve yoˬ. Awˬ tehˬ kʼo, yawˇ hui Saˍtanˍ hpeh yuˬ veu ve yoˬ.

9. Hawˇseˍ liꞈ 2:16, 17 hkʼaw kʼoˆ taˍ ve hkʼe, Saˍtanˍ Iˉsaˍreˍlaˆ chaw Yaˬhoˉvaˬ htaꞈ leunˇ˗e tuˬ hkʼaˬ hkʼe te piˇ ve le?

⁹ Saˍtanˍ yehˇ ve shehˆ ceuˬ teˇ ceuˬ lehˬ, Iˉsaˍreˍlaˆ chaw Yaˬhoˉvaˬ htaꞈ leunˇ˗e tuˬ te piˇ ve yoˬ. Tcuh kaˍ paˍ Yeˍraˍmiˆ ve awˬ co˗e htaˇ, “Baˍlaˆ gʼuiˬ sha htaꞈ” pa taw, Yaˬhoˉvaˬ ve chaw yawˇ ve awˬ meh htaꞈ leunˇ˗e tuˬ, maˇ heˆ heˆ ve tcuh kaˍ paˍ te piˇ tuˬ yoˬ tehꞈ Yaˬhoˉvaˬ kʼoˆ taˍ ve yoˬ. (Yeˍraˍmiˆ 23:27) Yaˬhoˉvaˬ ve chaw yawˇ ve awˬ meh awˬ tan, Baˍlaˆ gʼuiˬ sha ve awˬ meh htaꞈ tanˬ yehˇ leh chi ve tcuhˉ kuiˬ lehˬ “awˬ shehˍ hpaˇ” maˇ heˆ leh “paw leˍ” tehꞈ kʼoˆ gaˇ ve yoˬ. Chi hkʼe te ve lehˬ yawˇ hui Yaˬhoˉvaˬ hkʼaˬ hkʼe dawˇ ve htaꞈ leunˇ˗e leh Baˍlaˆ gʼuiˬ sha htaꞈ tiˉ dawˇ nyi ve yoˬ. Chi Iˉsaˍreˍlaˆ chaw Baˍlaˆ gʼuiˬ sha htaꞈ oˉ kʼoˍ pui leh, Yaˬhoˉvaˬ htaꞈ oˉ kʼoˍ pui ve tanˬ hpawˇ daꞈ ve yoˬ.—Hawˇseˍ 2:16, 17 gʼaw sheˍ.

10. Chi beuꞈ teˇ co˗e Saˍtanˍ aˬ htoꞈ ma ve awˬ hkʼaˇ htaꞈ yehˇ ve le?

¹⁰ Saˍtanˍ awˬ hkʼaˇ awˬ piˍ hkʼe kʼawꞈ yehˇ sheˍ ve  yoˬ. Chaw yaˇ htaꞈ hpeh yuˬ veu tuˬ, teˇ gʼaˇ le le loˍ ve, pehꞈ ve tzuhˆ ve hpawˇ te gaˇ ve nyi ma, leh Yaˬhoˉvaˬ hkʼaˬ hkʼe dawˇ ve htaꞈ chaw yaˇ leunˇ˗e tuˬ awˬ hkʼaˇ chi teˇ hpaˍ htaꞈ Saˍtanˍ cuˇ ve yoˬ. Awˬ leh meuˇ ve awˬ hkʼaˇ htaꞈ teˇ geh chaˬ nyi sheˍ.

11. Yaˬhoˉvaˬ hkʼaˬ hkʼe hpehꞈ ve, chaw yaˇ leunˇ˗e tuˬ Saˍtanˍ hkʼaˬ hkʼe te piˇ ve le?

¹¹ Yaˬhoˉvaˬ hkʼaˬ hkʼe hpehꞈ ve, chaw yaˇ leunˇ˗e tuˬ Saˍtanˍ te piˇ ve yoˬ. Yeˍsuˆ ve awˬ laꞈ gʼawˇ awˬ leh meuˇ teˇ gʼaˇ suh peuˬ hkʼawꞈ nawˉ, chaw teˇ hpaˍ hpaˍ Hkriꞈ yaˇ hpehꞈ ve tehꞈ kʼoˆ leh maˇ heˆ heˆ ve tanˬ maˍ ve yoˬ. (Tcuh yaˇ 20:29, 30; 2 Hteˇsaˍlawˇniˆ 2:3) Yaˬhoˉvaˬ ve kenˉ hkʼaˇ htaꞈ tawˍ daꞈ ve chaw teˇ hpaˍ lehˬ, chaw yaˇ awˬ tehˬ ve Gʼuiˬ sha htaꞈ maˇ shiˍ tuˬ te piˇ ve yoˬ. Tawˇ pa haˉ te kʼo, yawˇ hui Liꞈ hpu hkʼaw Gʼuiˬ sha ve awˬ meh htaꞈ maˇ yehˇ˗oˬ leh yawˇ ve awˬ meh awˬ tan “Jawˇmawˇ” tehꞈ yehˇ ve yoˬ. Chi hkʼe te ve lehˬ, Liꞈ hpu gʼaw ve chaw teˇ hpaˍ Yaˬhoˉvaˬ lehˬ “Jawˇmawˇ teˇ hpaˍ” htaꞈ hkʼaˬ hkʼe peun daꞈ ve maˇ nyi mawˬ tuˬ yawˇ hui te piˇ ve yoˬ. (1 Kawˇrenˍhtuˆ 8:5) Yawˇ hui Yaˬhoˉvaˬ leh Yeˍsuˆ htaꞈ kaꞈ “Jawˇmawˇ” tehꞈ kʼoˆ ve yoˬ. Chi htaꞈ pa taw Yaˬhoˉvaˬ leh yawˇ ve Yaˇ paˍ teˇ gʼaˇ tiˉ maˇ heˆ ve htaꞈ chaw yaˇ shiˍ tuˬ haˍ jaˇ. (Yoˇhanˬ 17:3) Chi htawˇ dawˇ nawˬ dawˇ cawˬ la leh 3 gʼaˇ teˇ to tiˉ maˍ ve cawˬ la ve yoˬ. Maˍ ve chi Liꞈ hpu hkʼaw maˇ cawˬ. Chi htaꞈ pa taw laiˉ gʼaˇ dawˇ ve Gʼuiˬ sha lehˬ yawˇ htaꞈ maˇ shiˍ tuˬ te laˇ leh yawˇ hui Gʼuiˬ sha htaꞈ maˇ shiˍ gʼa. Chi lehˬ heˍ puiˉ jaˇ!—Tcuh yaˇ 17:27.

12. Maˇ heˆ heˆ ve bon aˬ htoꞈ ma htaꞈ te tcuh gaˇ ve le? Roˉmaꞈ liꞈ 1:28-31 hkʼaw kʼoˆ taˍ ve hkʼe, aˬ htoꞈ ma hpehꞈ la ve le?

¹² Saˍtanˍ pehꞈ ve tzuhˆ ve hpawˇ te gaˇ ve nyi ma htaꞈ kaꞈ cuˇ ve yoˬ. Iˉsaˍreˍlaˆ chaw ve awˬ co˗e htaˇ, Saˍtanˍ maˇ heˆ heˆ ve bon htaꞈ cuˇ leh pehꞈ ve tzuhˆ ve hpawˇ te gaˇ tuˬ te piˇ ve yoˬ. Chi beuꞈ teˇ co˗e kaꞈ te chehˇ sheˍ. Maˇ heˆ heˆ ve bon pehꞈ ve tzuhˆ ve te gaˇ tuˬ kaꞈ te piˇ ve yoˬ. Laiˉ gʼaˇ Gʼuiˬ sha ve kanˉ te ve tehꞈ kʼoˆ ve htawˇ, Gʼuiˬ sha ve awˬ liˇ awˬ hkʼaˇ cawˇ ve htaꞈ maˇ gʼaꞈ te. Aˬ htoꞈ ma hpehꞈ la ve le? Tcuh yaˇ Pawˇluꞈ yawˇ Roˉmaꞈ Hkriꞈ yaˇ htaꞈ liꞈ bvuhꞈ piˇ ve hkʼaw kʼoˆ taˍ ve yoˬ. (Roˉmaꞈ 1:28-31 gʼaw sheˍ.) “Maˇ keunˍ maˇ cawˇ ve” lehˬ pehꞈ ve tzuhˆ ve hpawˇ teˇ ceuˬ le le leh hawˉ hkʼaˆ chawˇ hawˉ hkʼaˆ leh yaˇ miˇ chawˇ yaˇ miˇ teˇ geh zuhꞈ ve kaꞈ yoˬ. (Roˉmaꞈ 1:24-27, 32; Hpeuꞈ maˍ ve 2:20) Ngaˬ hui Liꞈ hpu hkʼaw maˍ laˇ taˍ ve htaꞈ a yeˇ gʼa yuˬ ve yoˬ. Chi a yeˇ uiˍ jaˇ!

13. Saˍtanˍ kʼawꞈ cuˇ sheˍ ve awˬ nu ve teˇ ceuˬ aˬ htoꞈ ma le?

¹³ Chaw yaˇ teˇ gʼaˇ le le loˍ ve awˬ ceuˬ htaꞈ Saˍtanˍ cuˇ ve yoˬ. A shu yawˇ awˬ to leh yehˬ kʼa  htaꞈ hu tuˬ, chaw yaˇ teˇ gʼaˇ le le loˍ ve awˬ ceuˬ htaꞈ gʼa henˇ ve yoˬ. (1 Tiˆmoˉseˍ 5:8) Laiˉ pawˆ kʼo liꞈ henˇ˗e ve maˇ heˆ leh na yuˬ puiˉ ve geh laˬ ve tehꞈ ngaˬ hui htaꞈ maˍ laˇ ve yoˬ. Yaꞈ hkʼaˇ, ngaˬ hui shaˍ tiꞈ gʼa te cawˇ ve yoˬ. Laiˉ mvuhˇ miˬ hkʼaw liꞈ henˇ ve, liꞈ henˇ yaˇ awˬ bon cawˬ tuˬ maˍ piˇ ve htawˇ, chaw yaˇ ve dawˇ hkʼaˇ kaꞈ maˍ piˇ ve yoˬ. Gʼuiˬ sha awˬ tehˬ cawˬ˗aw laˇ tehꞈ, liꞈ henˇ yaˇ laiˉ gʼaˇ htawˇ dawˇ nawˬ dawˇ cawˬ tuˬ te piˇ leh Liꞈ hpu htaꞈ maˇ yawˆ yan. A shaꞈ awˬ hkuiˉ puiˍ htaˇ hkʼaˬ kaˬ lo laˬ ve shiˍ tuˬ, a shaꞈ lehˬ yawˇ hkʼaˇ yawˇ cawˬ la gʼa ve awˬ lawn chi ve ceh tiˉ kʼoˆ maˍ laˇ gʼa ve tehꞈ, yawˇ hui gʼa henˇ ve yoˬ. (Roˉmaꞈ 1:21-23) Maˍ ve chi lehˬ “Gʼuiˬ sha dawˇ cheˆ taˍ ve cuˇ yiˍ” htaꞈ tawˍ daꞈ ve yoˬ.—1 Kawˇrenˍhtuˆ 1:19-21; 3:18-20.

14. Chaw yaˇ hkʼe dawˇ ve lehˬ yawˇ hui hkʼaˬ hkʼe kʼai tuˬ te piˇ ve le?

¹⁴ Chaw yaˇ ve dawˇ hkʼaˇ Gʼuiˬ sha ve awˬ liˇ awˬ hkʼaˇ cawˇ ve htaꞈ maˇ hawˍ daꞈ. Chi ve ngaˬ hui Gʼuiˬ sha ve daꞈ kehˬ ve awˬ ha hpu cawˬ la tuˬ te laˇ maˇ gʼa leh “awˬ suhˍ awˬ shaˍ ve kanˉ teˇ hpaˍ hkʼa tawˍ lehˆ tawˆ la” tuˬ yoˬ. (Gaˍlaˍtiˆ 5:19-23) Chaw yaˇ ve dawˇ hkʼaˇ uiˍ muiˬ caˆ muiˬ ve cawˬ tuˬ te piˇ ve yoˬ. Laiˉ gʼaˇ “a shu yawˇ awˬ to htaꞈ haꞈ ve” chaw hpehꞈ ve yoˬ. (2 Tiˆmoˉseˍ 3:2-4) Yaꞈ hkʼaˇ, Gʼuiˬ sha yawˇ ve chaw htaꞈ nyi ma nuˇ nehˬ cawˬ tcuh gaˇ ve yoˬ. (2 Saˍmo˗eˍlaˆ 22:28) Hkriꞈ yaˇ teˇ hpaˍ hpaˍ liꞈ tanˇ mvuh ve kʼawꞈ henˇ leh yawˇ hui ve dawˇ hkʼaˇ Gʼuiˬ sha hkʼe dawˇ cawˇ ve htawˇ, chaw yaˇ hkʼe dawˇ tuˬ te piˇ ve yoˬ. Hpehꞈ la gʼa ve awˬ lawn teˇ lawn htaꞈ teˇ geh dawˇ nyi sheˍ.

15-16. Awˬ viˉ awˬ nyi yaˇ miˇ teˇ gʼaˇ ve awˬ lawn nawˬ htaꞈ aˬ htoꞈ ma maˍ laˇ ve le?

¹⁵ Awˬ viˉ awˬ nyi yaˇ miˇ Gʼuiˬ sha ve kanˉ awˬ yanˇ hkʼa biˇ 15 hkʼawꞈ hpaˆ te˗oˬ ve kʼoˆ ve, “shaˉ hkiˆ hkanˍ ve chaw Baˆtiˆsaˬ haꞈ yuˬ˗oˬ ve liꞈ henˇ  mvuh ve kʼo kawˆ tuˬ cawˬ ve tehꞈ ngaˬ gʼaw leh gʼa kaˇ jaw˗oˬ. Yaꞈ hkʼaˇ, shaˍ tiꞈ peꞈ laˇ ve chi htaꞈ ngaˬ a yeˇ maˇ te. Chi ve lehˬ ngaˬ awˬ pon beˆ maˍ laˇ ve maˇ heˆ tehꞈ dawˇ ve yoˬ.” Yawˇ aˬ htoꞈ ma ve awˬ lawn htaꞈ gʼa hpuˇ ve le? Yawˇ kʼoˆ ve, “ngaˬ liꞈ henˇ ve htaꞈ awˬ yanˇ yehˇ maˇ jaˇ ve pa taw, oˇ htaˇ hkʼe leˇ Yaˬhoˉvaˬ geh bon chi maw maw lawˬ tuˬ te maˇ gʼa, heuˬ jaˇ leh Liꞈ hpu gʼaw ve ha lehˬ tuˬ maˇ cawˬ, leh hpawnˬ daꞈ˗e tuˬ hkʼa dehꞈ gu ve kaꞈ awˬ yanˇ maˇ cawˬ. Yaꞈ hkʼaˇ, liꞈ henˇ mvuh ve kʼo ngaˬ Yaˬhoˉvaˬ geh meuˆ daꞈ ve luˬ kʼai tuˬ te laˇ ve tehꞈ ngaˬ shiˍ leh pa ve yoˬ.”

¹⁶ Liꞈ henˇ mvuh ve awˬ viˉ awˬ nyi yaˇ miˇ chi teˇ gʼaˇ ve dawˇ hkʼaˇ htaꞈ heuˆ la kuiˬ hkʼaˬ hkʼe cawˬ ve le? Yawˇ kʼoˆ ve, “liꞈ henˇ mvuh ve pa taw awˬ viˉ awˬ nyi leh shu htaꞈ hkʼaiˉ puiˉ ve ngaˬ yaꞈ taw jaˇ. Ngaˬ yawˇ hui geh dawˇ law jaˇ leh yawˇ hui geh maˇ caˉ daꞈ gaˇ. Ngaˬ dawˇ hkʼaˇ chi hkʼe ve htaꞈ pa gʼa tuˬ gʼa coˇ caˇ jaˇ. Awˬ yanˇ oˇ ve teˇ yanˇ, mvuhˇ naw ma hkʼoˆ ve Awˬ pa, Gʼuiˬ sha ve kanˉ hkʼaˇ htaꞈ cuˇ leh shaˍ tiꞈ peꞈ laˇ ve htaꞈ ngaˬ maˇ na yuˬ leh kawˆ tuˬ cawˬ jaˇ ve tehꞈ shiˍ la ve yoˬ. Ngaˬ awˬ to ngaˬ shiˍ ve aꞈ kehˉ Yaˬhoˉvaˬ ngaˬ htaꞈ shiˍ ve yoˬ. Ngaˬ awˉ lawˉ htaˇ kaꞈ yawˇ hkawˇ na cawˇ ve law!”

17. (a) Ngaˬ hui aˬ htoꞈ ma te tuˬ dawˇ law taˍ ve le? (b) Gʼuˇ suhˍ teˇ lawn hkʼaw aˬ htoꞈ ma htaꞈ henˇ tuˬ le?

¹⁷ Saˍtanˍ ve miˬ guiˬ “tcuhˉ kuiˬ maˇ cawˬ ve heˍ ve tawˇ hkawˇ” nawˬ htaꞈ maˇ gʼa hpeh yuˬ veu tuˬ shaˍ tiꞈ te˗o. Saˍtanˍ ve awˬ hkʼaˇ htaꞈ caˉ leh tawˍ daꞈ sheˍ. (1 Kawˇrenˍhtuˆ 3:18; 2 Kawˇrenˍhtuˆ 2:11) Nawˬ Yaˬhoˉvaˬ htaꞈ leunˇ˗e tuˬ neˇ haiˬ taˇ te laˇ tcuh. Yaˬhoˉvaˬ ve awˬ liˇ awˬ hkʼaˇ daꞈ jaˇ ve htaꞈ gʼaꞈ te leh nawˬ Yaˬhoˉvaˬ beˆ maˍ laˇ ve htaꞈ maˇ na tuˬ Saˍtanˍ taˇ te laˇ tcuh. Yaꞈ hkʼaˇ, nawˬ miˬ guiˬ yaˇ hkʼe dawˇ˗oˬ ve kʼo˗ehꞈ? Ngaˬ hui nyi ma hkʼaw cawˬ ve maˇ daꞈ ve dawˇ hkʼaˇ htaꞈ“te luˬ tuˬ awˬ pon” Liꞈ hpu hkʼaˬ hkʼe ga laˇ gʼa ve gʼuˇ suhˍ teˇ lawn hkʼaw henˇ tuˬ yoˬ.—2 Kawˇrenˍhtuˆ 10:4, 5.