1. Yaˬhoˉvaˬ haꞈ pehnˇ uiˍ jaˇ ve Awˬ pa htaꞈ ngaˬ hui hkʼaˬ hkʼe te henˇ yuˬ gʼa tuˬ le?

 Yaˬhoˉvaˬ ngaˬ hui htaꞈ haꞈ jaˇ. (Yoˇhanˬ 3:16) Haꞈ pehnˇ uiˍ jaˇ ve Awˬ pa htaꞈ ngaˬ hui henˇ yuˬ gaˇ ve yoˬ. Chi htaꞈ pa taw, ngaˬ hui coˇ caˇ leh “awˬ viˉ awˬ nyi teˇ gʼaˇ leh teˇ gʼaˇ ha kʼaˉ daꞈ leh haꞈ daꞈ˗oꞈ.” Ngaˬ hui chi hkʼe te ve lehˬ, “yonˍ ve chaw teˇ hpaˍ awˬ pon leuˉ leh daꞈ ve htaꞈ te˗a veuˬ.” (1 Peˍtruˆ 3:8; Gaˍlaˍtiˆ 6:10) Awˬ viˉ awˬ nyi shoꞈ shaꞈ ve gʼa hpuˇ leh dawˇ haˍ htaˇ, ngaˬ hui ga piˇ gaˇ ve yoˬ.

2. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

² Yaˬhoˉvaˬ ve yehˬ kʼa hkʼaw teˇ gʼaˇ hpehꞈ gaˇ ve kʼo, dawˇ haˍ ve gʼa hpuˇ tuˬ yoˬ. (Maˍkuˆ 10:29, 30) Miˬ guiˬ chi leh la paˇ neˇ ve pa taw, ngaˬ hui beˬ ve lawˇ ve gʼaˇ hteꞈ gʼa hpuˇ ve yoˬ. Teˇ gʼaˇ leh teˇ gʼaˇ hkʼaˬ hkʼe te ga daꞈ gʼa tuˬ le? Lawˇtaˍ, Yawˇbaˆ, leh Nawˉmiꞈ yawˇ hui ve awˬ lawn Liꞈ hpu hkʼaw kʼoˆ taˍ ve ngaˬ hui htaꞈ hkʼaˬ hkʼe maˍ laˇ ve teˇ geh henˇ tuˬ yoˬ. Chi beuꞈ teˇ co˗e awˬ viˉ awˬ nyi shoꞈ shaꞈ ve gʼa hpuˇ chehˇ ve teˇ hpaˍ leh yawˇ hui shoꞈ shaꞈ ve htaꞈ tawˍ daꞈ gʼaˇ tuˬ ngaˬ hui ga piˇ gʼa ve awˬ hkʼaˇ kaꞈ henˇ tuˬ yoˬ.

3. 2 Peˍtruˆ liꞈ 2:7, 8 hkʼaw Lawˇtaˍ dawˇ cheˆ ve hkʼaˬ hkʼe yaꞈ ve le? Hkʼaˬ hkʼe hpehꞈ la ve le?

³ Lawˇtaˍ Sawˉdonˍ venˇ hkʼaw ve chaw pehꞈ ve tzuhˆ ve geh ca chehˇ˗e tuˬ dawˇ cheˆ htaˇ, yaꞈ ve yoˬ. (2 Peˍtruˆ 2:7, 8 gʼaw sheˍ.) Chehˇ kuiˬ oˇ kaˬ lo daꞈ jaˇ ve htawˇ, Lawˇtaˍ tuꞈ ve hkanˍ ve laiˉ ceuˬ gʼa hpuˇ sheˍ. (Awˬ hkuiˉ puiˍ 13:8-13; 14:12) Yawˇ ve awˬ miˇ ma venˇ oˇ ve leh oˇ kaˬ lo chehˇ ve chaw htaꞈ dawˇ cawˇ jaˇ. Awˬ leh meuˇ htaˇ awˬ miˇ ma Yaˬhoˉvaˬ hkawˇ maˇ na yuˬ. Yaˬhoˉvaˬ mvuhˇ naw ma hkʼoˆ aˬ miˍ leh maꞈ shiˉ ce yaꞈ la piˇ lawˬ leh venˇ oˇ ve htaꞈ toꞈ baˬ piˇ htaˇ, awˬ miˇ ma kaꞈ suh˗e ve yoˬ. Lawˇtaˍ ve yaˇ miˇ 2 gʼaˇ htaꞈ kaꞈ  dawˇ nyi sheˍ. Yawˇ hui Sawˉdonˍ venˇ hkʼaw suh˗e ve hawˉ hkʼaˆ 2 gʼaˇ htaꞈ heuˆ tuˬ ka tiꞈ te taˍ ve yoˬ. Yehˬ, hpu shi mawˇ jeˬ shonˇ˗e leh yawˇ ve awˬ miˇ ma kaꞈ suh ve nyi ma luˬ jaˇ. (Awˬ hkuiˉ puiˍ 19:12-14, 17, 26) Dawˇ haˍ jaˇ ve awˬ yanˇ htaˇ Yaˬhoˉvaˬ Lawˇtaˍ htaꞈ maˇ yeunˇ hkanˍ piˇ˗o ve laˇ? Maˇ heˆ.

4. Yaˬhoˉvaˬ Lawˇtaˍ htaꞈ yeunˇ hkanˍ piˇ ve tehꞈ ngaˬ hui htaꞈ hkʼaˬ hkʼe hpeuꞈ maw laˇ ve le? (Awˬ htaꞈ hpawˇ ve awˬ han htaꞈ nyi sheˍ.)

⁴ Lawˇtaˍ Sawˉdonˍ venˇ hkʼaw chehˇ˗e tuˬ dawˇ cheˆ ve htawˇ, Yaˬhoˉvaˬ haꞈ pehnˇ ve hkʼaw mvuhˇ naw ma tcuh yaˇ htaꞈ cuˇ leh yawˇ ve yehˬ kʼa gʼa ponˬ tuˬ ga piˇ tcuh ve yoˬ. Yaꞈ hkʼaˇ, Lawˇtaˍ mvuhˇ naw ma tcuh yaˇ ve hkawˇ laꞈ haˉ na yuˬ leh venˇ hkʼaw tawˆ˗e ve maˇ heˆ. Yawˇ “haˆ haˆ maˇ te.” Lawˇtaˍ ve yehˬ kʼa venˇ oˇ ve hkʼaw haˆ tawˆ˗e tuˬ mvuhˇ naw ma tcuh yaˇ ga piˇ ve yoˬ. (Awˬ hkuiˉ puiˍ 19:15, 16) Peuˬ leh hkʼaw hkʼoˆ lo hpaw˗e loˬ tehꞈ mvuhˇ naw ma tcuh yaˇ yawˇ htaꞈ kʼoˆ piˇ ve yoˬ. Yaꞈ hkʼaˇ, Lawˇtaˍ Yaˬhoˉvaˬ hkawˇ na cawˇ ve kaꞈ, awˬ paˇ lo ve venˇ hkʼaw hpaw˗e tuˬ lawˬ ve yoˬ. (Awˬ hkuiˉ puiˍ 19:17-20) Yaˬhoˉvaˬ yeunˇ hkanˍ ve hkʼaw na taˍ piˇ leh Lawˇtaˍ venˇ oˇ ve hkʼaw hpaw˗e tcuh ve yoˬ. Peuˬ leh Lawˇtaˍ venˇ oˇ ve hkʼaw chehˇ ve kawˆ jaˇ leh hkʼaw hkʼoˆ lo hpaw˗e ve yoˬ. Oˇ ve awˉ lawˉ htaˇ Yaˬhoˉvaˬ kʼoˆ piˇ kuiˬ awˬ ti hpehꞈ ve yoˬ. (Awˬ hkuiˉ puiˍ 19:30) Yaˬhoˉvaˬ Lawˇtaˍ htaꞈ yeunˇ hkanˍ piˇ jaˇ! Ngaˬ hui hkʼaˬ hkʼe te yawˇ htaꞈ henˇ yuˬ gʼa tuˬ le?

5-6. Ngaˬ hui Gʼuiˬ sha htaꞈ henˇ yuˬ htaˇ 1 Hteˇsaˍlawˇniˆ liꞈ 5:14 hkʼaw beˆ maˍ laˇ hkawˇ htaꞈ hkʼaˬ hkʼe te yuˬ yehˇ gʼa tuˬ le?

⁵ Lawˇtaˍ hkʼa shuˍ awˬ viˉ awˬ nyi dawˇ cheˆ ve maˇ cawˇ leh shoꞈ shaꞈ jaˇ ve htaꞈ gʼa hpuˇ ve yoˬ. Chi hkʼe hpehꞈ ve kʼo, ngaˬ hui hkʼaˬ hkʼe te tuˬ le? Yawˇ dawˇ cheˆ ve maˇ cawˇ ve pa taw, chi hkʼe gʼa hpuˇ ve tehꞈ ngaˬ hui kʼoˆ piˇ gaˇ ve yoˬ. Ngaˬ hui chi hkʼe dawˇ ve kaꞈ maˇ yaꞈ. (Gaˍlaˍtiˆ 6:7) Yaꞈ hkʼaˇ, ngaˬ hui chi aꞈ kehˉ te gʼa ve yoˬ. Yaˬhoˉvaˬ Lawˇtaˍ htaꞈ ga piˇ ve awˬ hkʼaˇ ngaˬ hui henˇ yuˬ gʼa ve yoˬ. Ngaˬ hui hkʼaˬ hkʼe te cawˇ ve le?

⁶ Yaˬhoˉvaˬ mvuhˇ naw ma tcuh yaˇ htaꞈ Lawˇtaˍ geh kʼai tcuh leh shaˍ tiꞈ piˇ tcuh ve yoˬ. Yaꞈ hkʼaˇ, Sawˉdonˍ venˇ htaꞈ te luˬ htaˇ Lawˇtaˍ gʼa ponˬ tuˬ kaꞈ ga piˇ tcuh ve yoˬ. Chi ve kaꞈ hkʼa shuˍ awˬ viˉ awˬ nyi shoꞈ shaꞈ ve gʼa hpuˇ˗a te ve ngaˬ hui shiˍ htaˇ, shaˍ tiꞈ piˇ cawˇ ve yoˬ. Yaꞈ hkʼaˇ, ngaˬ hui kaꞈ ga piˇ gʼa ve yoˬ. Liꞈ hpu hkʼaw beˆ maˍ piˇ ve htaꞈ yawˇ haˆ haˆ maˇ gʼaꞈ te ve htawˇ, ngaˬ hui gʼa yeunˇ hkanˍ ve yoˬ. Ngaˬ hui mvuhˇ naw ma tcuh yaˇ oˇ ve 2 gʼaˇ hkʼe te sheˍ. Ngaˬ hui te tcuhˉ taˍ leh awˬ viˉ awˬ nyi htaꞈ maˇ baˬ taˉ. Yawˇ hui htaꞈ ga piˇ tuˬ awˬ hkʼaˇ ca ve yoˬ. (1 Yoˇhanˬ 3:18) Yawˇ hui ve laꞈ sheh htaꞈ gʼawˬ veu leh daꞈ jaˇ ve beˆ maˍ piˇ hkawˇ maˍ piˇ sheˍ.—1 Hteˇsaˍlawˇniˆ 5:14 gʼaw sheˍ.

7. Yaˬhoˉvaˬ Lawˇtaˍ htaꞈ dawˇ ve hkʼe ngaˬ hui yawˇ htaꞈ hkʼaˬ hkʼe henˇ yuˬ gʼa tuˬ le?

⁷ Lawˇtaˍ maˇ biˇ ve htaꞈ Yaˬhoˉvaˬ a yeˇ yuˬ gaˇ kaꞈ gʼa ve yoˬ. Yaꞈ hkʼaˇ, peuˬ hkʼawꞈ nawˉ Lawˇtaˍ ka tiꞈ yeˬ ve chaw hpehꞈ ve tehꞈ Gʼuiˬ sha Peˍtruˆ htaꞈ dawˇ pawnˍ piˇ leh bvuhꞈ tcuh ve yoˬ. Ngaˬ hui te yaꞈ ve htaꞈ Yaˬhoˉvaˬ maˇ tawnˇ taˍ ve ha lehˬ jaˇ! (Chiˇ mvuh ve 130:3) Yaˬhoˉvaˬ Lawˇtaˍ htaꞈ dawˇ ve hkʼe ngaˬ hui yawˇ htaꞈ henˇ yuˬ gʼa˗aw laˇ? Awˬ viˉ awˬ nyi htaꞈ daꞈ ve hpawˇ dawˇ ve kʼo, yeunˇ hkanˍ gʼaˇ ve yoˬ. Chi hkʼe hpehꞈ htaˇ ngaˬ hui yawˇ hui htaꞈ ga piˇ gaˇ ve kʼo, yawˇ hui haꞈ yuˬ tuˬ yoˬ.

8. Awˬ viˉ awˬ nyi htaꞈ ha kʼaˉ ve kʼo, hkʼaˬ hkʼe hpeuꞈ maw piˇ gʼa tuˬ le?

⁸ Lawˇtaˍ hkʼa shuˍ, Yawˇ baˆ dawˇ cheˆ ve maˇ cawˇ leh tuꞈ hkanˍ ve gʼa hpuˇ ve maˇ heˆ. Yaꞈ hkʼaˇ, yawˇ kaꞈ shoꞈ shaꞈ ve laiˉ ceuˬ gʼa hpuˇ ve yoˬ. Hpu shi mawˇ jeˬ, awˬ meh bvuhˬ ve, leh chehˇ sha cawˬ sha ve hkʼa peu˗eˬ kaꞈ shonˇ kʼai ve yoˬ. Nyi ma luˬ jaˇ ve lehˬ yawˇ huiˉ maˬ ve yaˇ hkʼa peu˗eˬ suh˗e  ve yoˬ. Chi hkʼoˆ kaꞈ awˬ tehˬ maˇ heˆ ve awˬ chawˇ 3 gʼaˇ Yawˇbaˆ htaꞈ kʼoˆ guiˇ gʼuiˬ guiˇ piˇ ve yoˬ. Aˬ htoꞈ ma pa taw awˬ chawˇ yawˇ htaꞈ maˇ ha kʼaˉ piˇ ve le? Yawˇ hui awˬ htaꞈ hpawˇ ceh tiˉ nyi ve pa taw yoˬ. Chi htaꞈ pa taw, yawˇ hui maˇ daꞈ ve dawˇ hkʼaˇ cawˬ leh Yawˇbaˆ htaꞈ maˇ daꞈ ve hpawˇ dawˇ cheˆ piˇ ve yoˬ. Ngaˬ hui chi hkʼe maˇ gʼa te tuˬ hkʼaˬ hkʼe te cawˇ ve le? Yaˬhoˉvaˬ teˇ gʼaˇ tiˉ chaw yaˇ hpehꞈ chehˇ ve hkʼa peu˗eˬ htaꞈ shiˍ gʼa ve tehꞈ, ngaˬ hui tawnˇ taˍ cawˇ ve yoˬ. Awˬ viˉ awˬ nyi shoꞈ shaꞈ ve hpuˇ ve kʼo, hkʼa dehꞈ na taˍ piˇ cawˇ ve yoˬ. Yaꞈ hkʼaˇ, na taˍ ve ceh maˇ lawꞈ ngaˬ hui coˇ caˇ leh na gʼa cawˇ ve yoˬ. Ngaˬ hui chi hkʼe te ve kʼo, awˬ viˉ awˬ nyi htaꞈ ha kʼaˉ ve tehꞈ hpeuꞈ maw piˇ gʼa ve yoˬ.

9. Awˬ viˉ awˬ nyi htaꞈ ha kʼaˉ ve kʼo aˬ htoꞈ ma maˇ te cawˇ ve le? Aˬ htoꞈ ma pa taw le?

⁹ Awˬ viˉ awˬ nyi htaꞈ ha kʼaˉ ve kʼo, yawˇ hui gʼa hpuˇ chehˇ ve shu htaꞈ maˇ kʼoˆ piˇ. Hkʼaiˉ daꞈ ve chaw lehˬ, Hkriꞈ yaˇ awˬ moˍ hkʼaw daꞈ la tuˬ te maˇ gʼa. Yawˇ Hkriꞈ yaˇ awˬ moˍ htaꞈ te luˬ piˇ ve yoˬ. (Tawˇ naˉ ve 20:19; Roˉmaꞈ 14:19) Yawˇ nyi ma maˇ daꞈ. Yaꞈ hkʼaˇ, yawˇ maˇ dawˇ nyi leh yaw ve tawˇ leh awˬ viˉ awˬ nyi gʼa hpuˇ leh nyi ma naˬ jaˇ ve htaꞈ kʼawꞈ naˬ tuˬ te piˇ ve yoˬ. (Tawˇ naˉ ve 12:18; Eˇfeˇsuꞈ 4:31, 32) Awˬ viˉ awˬ nyi gʼa hpuˇ chehˇ ve htaꞈ dawˇ nyi leh tawˍ daꞈ gʼaˇ tuˬ ga piˇ cawˇ ve yoˬ. Ngaˬ hui chi hkʼe te ve kʼo daꞈ jaˇ!

10. Yawˇbaˆ liꞈ 6:2, 3 hkʼaw ngaˬ hui htaꞈ aˬ htoꞈ ma maˍ laˇ ve le?

¹⁰ Yawˇbaˆ liꞈ 6:2, 3 gʼaw sheˍ. Teˇ pawˆ pawˆ kʼo, Yawˇbaˆ maˇ dawˇ nyi leh yaw ve yoˬ. Yaꞈ hkʼaˇ, peuˬ hkʼawꞈ nawˉ yawˇ yaw ve maˇ cawˇ ve tehꞈ haꞈ yuˬ ve yoˬ. (Yawˇbaˆ 42:6) Chi beuꞈ teˇ co˗e Yawˇbaˆ hkʼa shuˍ chaw teˇ hpaˍ dawˇ haˍ jaˇ leh maˇ dawˇ nyi leh tawˇ yaw ve yoˬ. Yawˇ chi hkʼe yaw ve hkʼawꞈ nawˉ htaˇ nyi ma luˬ ve yoˬ. Ngaˬ hui hkʼaˬ hkʼe te cawˇ ve le? Yawˇ htaꞈ deˇ piˇ ve aꞈ kehˉ  ha kʼaˉ piˇ cawˇ ve yoˬ. Yaˬhoˉvaˬ ngaˬ hui htaꞈ shoꞈ shaꞈ ve leh dawˇ haˍ ve maˇ hpuˇ tcuh gaˇ ve tehꞈ tawnˇ taˍ sheˍ. Chi htaꞈ pa taw, Gʼuiˬ sha ve kanˉ te ve chaw maˇ dawˇ nyi leh yaw ve kʼo, yawˇ hui dawˇ haˍ ve pa taw yoˬ. Ngaˬ hui awˬ lawn chi htaꞈ na gʼa cawˇ ve yoˬ. Yawˇ Yaˬhoˉvaˬ maˇ heˆ leh ngaˬ hui htaꞈ caˉ daꞈ ve maˇ daꞈ ve kʼoˆ ve htawˇ, yawˇ yaw ve tawˇ htaꞈ pa taw ngaˬ hui nyi ma maˇ zuhˆ leh yawˇ htaꞈ maˇ dawˇ cheˆ piˇ cawˇ.—Tawˇ naˉ ve 19:11.

11. Nyi haꞈ shaˉ paˍ beˆ maˍ piˇ htaˇ Eˇliˇhuˆ htaꞈ hkʼaˬ hkʼe te henˇ yuˬ gʼa tuˬ le?

¹¹ Teˇ pawˆ pawˆ kʼo dawˇ haˍ jaˇ ve chaw lehˬ awˬ bon cawˬ ve beˆ maˍ piˇ hkawˇ gʼa cawˇ ve yoˬ. (Gaˍlaˍtiˆ 6:1) Nyi haꞈ shaˉ paˍ awˬ vuiˬ chi htaꞈ hkʼaˬ hkʼe te gʼa tuˬ le? Eˇliˇhuˆ Yawˇbaˆ yaw ve htaꞈ hkʼa dehꞈ na taˍ piˇ ve htaꞈ yawˇ hui henˇ yuˬ cawˇ ve yoˬ. (Yawˇbaˆ 33:6, 7) Eˇliˇhuˆ Yawˇbaˆ hkʼaˬ hkʼe dawˇ ve htaꞈ na gʼa˗oˬ htaˇ yawˇ beˆ maˍ piˇ ve yoˬ. Nyi haꞈ shaˉ paˍ Eˇliˇhuˆ htaꞈ henˇ yuˬ ve kʼo, awˬ viˉ awˬ nyi yaw ve htaꞈ hkʼa dehꞈ na taˍ piˇ tuˬ coˇ caˇ ve yoˬ. Peuˬ hkʼawꞈ nawˉ yawˇ hui beˆ maˍ piˇ htaˇ, chi na taˍ ve chaw nyi ma hkʼaw gaˬ tuˬ yoˬ.

12. Nawˉmiꞈ awˬ hpawˇ leh yaˇ paˍ 2 gʼaˇ suh peuˬ hkʼawꞈ nawˉ yawˇ hkʼaˬ hkʼe te ve le?

¹² Nawˉmiꞈ lehˬ ka tiꞈ yeˬ leh Yaˬhoˉvaˬ htaꞈ haꞈ ve yoˬ. Yaꞈ hkʼaˇ, yawˇ ve awˬ hpawˇ leh yaˇ paˍ 2 gʼaˇ suh peuˬ hkʼawꞈ nawˉ, yawˇ ve awˬ meh Nawˉmiꞈ “Maˍraˆ” tehꞈ kʼawꞈ pa ve yoˬ. Awˬ meh chi ve tcuhˉ kuiˬ lehˬ “hkʼaˇ” ve tehꞈ kʼoˆ gaˇ ve yoˬ. (Ruˉhtaˆ 1:3, 5, 20, 21) Nawˉmiꞈ ve awˬ hkuiˇ ma Ruˉhtaˆ Nawˉmiꞈ shoꞈ shaꞈ ve cawˬ ve htawˇ yawˇ geh tiˉ chehˇ ve yoˬ. Ruˉhtaˆ Nawˉmiꞈ htaꞈ ga piˇ ve htawˇ, nyi ma sha tuˬ tawˇ kaꞈ yaw piˇ sheˍ. Ruˉhtaˆ nyi ma hkʼaw tawˆ la ve tawˇ yaw piˇ ve yoˬ. Yaꞈ hkʼaˇ, Ruˉhtaˆ Nawˉmiꞈ htaꞈ haꞈ leh awˬ gʼaˇ piˇ laˇ gaˇ ve tehꞈ yawˇ shiˍ ve yoˬ.—Ruˉhtaˆ 1:16, 17.

13. Awˬ ca suh˗oˬ ve chaw ngaˬ hui geh aˬ htoꞈ ma te awˬ gʼaˇ gʼa tuˬ loˍ ve le?

¹³ Awˬ viˉ awˬ nyi yawˇ ve awˬ ca suh peuˬ hkʼawꞈ nawˉ awˬ gʼaˇ peꞈ laˇ tuˬ loˍ ve yoˬ. Awˬ hpawˇ awˬ miˇ ma lehˬ suhˆ cehˬ nyiˇ cehˬ teˇ geh uiˍ la ve htaꞈ shuˍ ve yoˬ. Laiˉ hkʼawꞈ gaˬ leh awˬ geu htawˇ hawˆ daꞈ ve yoˬ. Suhˆ cehˬ teˇ cehˬ htu baˬ leh suh˗e kʼo awˬ nu ve teˇ cehˬ htaꞈ heuˆ la kuiˬ cawˬ jaˇ. Chi ve kaꞈ hkʼa shuˍ a shu teˇ gʼaˇ awˬ ca suh˗e ve kʼo, awˬ yanˇ maw chaweh nyi ma luˬ ve yoˬ. Paw˗laˇ ve awˬ hpawˇ  * maˇ dawˇ maˇ gaˇ ve hkʼaw suh˗e ve yoˬ. Yawˇ kʼoˆ ve, “ngaˬ ve a shaꞈ teꞈ hkʼaˇ pa kʼai jaˇ leh dawˇ law kuiˬ maˇ cawˬ tehꞈ dawˇ ve yoˬ. Ngaˬ daꞈ jaˇ ve awˬ chawˇ shonˇ kʼai ve yoˬ. Ngaˬ hpawˇ geh teˇ ceuˬ le le yaw daꞈ ve yoˬ. Ngaˬ ha lehˬ htaˇ yawˇ htaꞈ kʼoˆ maˍ piˇ leh ngaˬ shoꞈ shaꞈ ve cawˬ htaˇ kaꞈ yawˇ ga laˇ ve yoˬ. Yawˇ ngaˬ ve shoꞈ shaꞈ ve htaꞈ hkʼaˬ htaˆ kaꞈ na taˍ laˇ ve yoˬ. Ngaˬ awˬ to teˇ tawn cheˆ ve hkʼe hpehꞈ ve yoˬ.”

14-15. Awˬ ca suh gehˇ sheˍ ve chaw htaꞈ ngaˬ hui hkʼaˬ hkʼe te awˬ gʼaˇ piˇ gʼa tuˬ le?

¹⁴ Awˬ ca suh gehˇ sheˍ ve chaw htaꞈ ngaˬ hui hkʼaˬ hkʼe te awˬ gʼaˇ piˇ gʼa tuˬ le? A yeˇ uiˍ jaˇ ve lehˬ nawˬ nyi ma maˇ sha leh hkʼaˬ hkʼe kʼoˆ piˇ tuˬ maˇ shiˍ ve htawˇ, yawˇ geh yaw daꞈ cawˇ ve yoˬ. Paw˗laˇ kʼawꞈ kʼoˆ ve, “chaw suh˗e ve kʼo awˬ nu ve chaw kaꞈ nyi ma maˇ sha ve tehꞈ ngaˬ na gʼa ve yoˬ. Yawˇ hui maˇ cawˇ ve tawˇ yaw la ve htaꞈ kawˆ ve yoˬ. Yaꞈ hkʼaˇ, yawˇ hui yaw ve tawˇ maˇ cawˇ ve kaꞈ maˇ yaw ve aꞈ kehˉ daꞈ ve yoˬ.” Nyi ma luˬ chehˇ ve chaw lehˬ ngaˬ hui cuˇ yiˍ cawˬ ve hkʼaw tawˇ yaw laˇ tuˬ maˇ dawˇ law. Paw˗laˇ kʼoˆ ve, “awˬ chawˇ kʼoˆ ve lehˬ ‘ngaˬ kaꞈ nyi ma luˬ aˬ mehˍ’ chi hkʼe ceh kʼoˆ laˇ ve kaꞈ ngaˬ awˬ gʼaˇ gʼa jaˇ.”

¹⁵ Ponˬ laˬ ve hkʼaˬ nyiˇ hkʼawꞈ maˇ gaˬ sheˍ htaˇ,  Viˆliˇ˗an ve awˬ miˇ ma suh˗e ve yoˬ. Yawˇ kʼoˆ ve, “awˬ viˉ awˬ nyi ngaˬ miˇ ma ve daꞈ ve awˬ ceuˬ kʼoˆ laˇ htaˇ, ngaˬ kaꞈ nyi ma sha jaˇ. Yawˇ shu htaꞈ haꞈ leh yawˆ yan puiˉ ve tehꞈ ngaˬ kaꞈ yonˍ gʼa ve yoˬ. Chi hkʼe ga laˇ ve lehˬ ngaˬ awˬ pon a yeˇ uiˍ jaˇ. Ngaˬ ha kʼaˉ laˇ ve htaꞈ gʼa ve yoˬ. Ngaˬ miˇ ma lehˬ ngaˬ awˬ pon a yeˇ uiˍ jaˇ.” Mehˇ chawˇ ma teˇ gʼaˇ Biˬ˗kanˇ kʼoˆ ve, “awˬ viˉ awˬ nyi ngaˬ geh teˇ geh bon lawˬ htaˇ, leh Liꞈ hpu 1-2 tawn teˇ geh gʼaw htaˇ, ngaˬ ha kʼaˉ laˇ ve htaꞈ gʼa ve yoˬ. Yawˇ hui ngaˬ hpawˇ htaꞈ caˉ daꞈ ve kʼoˆ htaˇ, leh ngaˬ hpawˇ ve awˬ lawn kʼoˆ maˍ piˇ ve yawˇ hui na taˍ laˇ ve kaꞈ awˬ gʼaˇ gʼa jaˇ.”

16. (a) Awˬ ca suh ve chaw htaꞈ ngaˬ hui hkʼaˬ hkʼe ga piˇ cawˇ ve le? (b) Yaˍkoˆ liꞈ 1:27 hkʼaw kʼoˆ taˍ ve hkʼe, ngaˬ hui aˬ htoꞈ ma ve awˬ vuiˬ cawˬ ve le?

¹⁶ Mehˇ chawˇ ma Nawˉmiˆ htaꞈ Ruˉhtaˆ ga piˇ ve hkʼa shuˍ, awˬ ca suh ve chaw htaꞈ ngaˬ hui caˉ leh ga piˇ cawˇ ve yoˬ. Paw˗laˇ teˇ pawˆ kʼawꞈ kʼoˆ ve, “ngaˬ hpawˇ suh˗e peuˬ hkʼawꞈ nawˉ htaˇ, awˬ viˉ awˬ nyi ga laˇ jaˇ. Ponˬ kʼai ve awˬ yanˇ nyi˗a kʼo, awˬ nu ve chaw awˉ lawˉ htaˇ hkʼe kʼawꞈ hpehꞈ ve yoˬ. Yaꞈ hkʼaˇ, ngaˬ pa kʼai jaˇ. Haꞈ ve chaw suh peuˬ hkʼawꞈ nawˉ, nyi ma luˬ chehˇ ve chaw laiˉ ha pa maˇ heˆ leh laiˉ hkʼawꞈ awˬ gʼaˇ gʼa tuˬ loˍ ve tehꞈ, awˬ viˉ awˬ nyi shiˍ ve pa taw ngaˬ htaꞈ ga laˇ gʼa jaˇ.” Teˇ gʼaˇ leh teˇ gʼaˇ maˇ shuˍ daꞈ. Teˇ hpaˍ kʼo awˬ nu ve chaw aꞈ kehˉ pa gʼa vaiˇ jaˇ. Yaꞈ hkʼaˇ teˇ hpaˍ kʼo, yawˇ ve awˬ ca geh te jaw ve hkʼe kʼawꞈ te htaˇ, awˉ lawˉ htaˇ ve htaꞈ kʼawꞈ dawˇ nawˇ leh nyi ma luˬ ve yoˬ. Teˇ gʼaˇ leh teˇ gʼaˇ nyi ma luˬ ve kaꞈ maˇ shuˍ daꞈ. Yaꞈ hkʼaˇ, awˬ ca suh ve chaw htaꞈ ga piˇ ve awˬ vuiˬ lehˬ Yaˬhoˉvaˬ geh laˬ ve daꞈ jaˇ ve tehꞈ tawnˇ taˍ sheˍ.—Yaˍkoˆ 1:27 gʼaw sheˍ.

17. Awˬ ca baˬ taˉ piˇ ve chaw aˬ htoꞈ ma te ngaˬ hui geh awˬ gʼaˇ gʼa tuˬ loˍ ve le?

 ¹⁷ Chaw teˇ hpaˍ yawˇ hui ve awˬ ca baˬ aˉ piˇ htaˇ, beuˬ jaˇ leh laiˉ hkʼawꞈ nyi ma luˬ ve yoˬ. Caweh ve awˬ hpawˇ yawˇ htaꞈ baˬ taˉ leh awˬ nu ve yaˇ miˇ geh ca chehˇ˗e ve yoˬ. Yawˇ kʼoˆ ve, “baˬ daꞈ ve lehˬ ngaˬ nyi ma luˬ jaˇ. Ngaˬ hpawˇ suh˗e ve kʼo, chi aꞈ kehˉ daꞈ ve hehˉ tehꞈ ngaˬ dawˇ ve yoˬ. Yawˇ maˇ dawˇ maˇ ga leh suh˗e ve maˇ heˆ leh naˬ leh suh˗e ve kʼo, yawˇ hkʼaˇ yawˇ leuˆ yuˬ ve maˇ heˆ. Yaꞈ hkʼaˇ, yawˇ ngaˬ htaꞈ baˬ taˉ laˇ tuˬ heuˆ yuˬ ve yoˬ. Ngaˬ yaꞈ taw jaˇ.”

18. Awˬ ca maˇ cawˬ˗o ve chaw htaꞈ ngaˬ hui hkʼaˬ hkʼe ga piˇ gʼa tuˬ le?

¹⁸ Awˬ ca maˇ cawˬ˗o ve chaw htaꞈ ngaˬ hui haꞈ pehnˇ ve hkʼaw teˇ ceuˬ ceuˬ te piˇ ve kʼo, ngaˬ hui yawˇ hui htaꞈ haꞈ sheˍ ve tehꞈ shiˍ gʼa ve yoˬ. Chi hkʼoˆ kaꞈ yawˇ hui daꞈ ve awˬ chawˇ cawˬ gaˇ ve yoˬ. (Tawˇ naˉ ve 17:17) Nawˬ yawˇ hui ve awˬ chawˇ hpehꞈ ve tehꞈ hkʼaˬ hkʼe te hpeuꞈ maw piˇ gʼa tuˬ le? Nawˬ ve aˉ hkʼaw lo awˍ caˇ la tuˬ jehˬ piˇ gʼa ve yoˬ. Yawˇ hui htaꞈ jehˬ leh gʼaˇ jehˇ˗e ve maˇ heˆ kʼo, teˇ geh hto toˇ˗e ve yoˬ. Awˬ nu ve teˇ hkʼaˇ lehˬ teˇ pawˆ pawˆ yehˬ kʼa hkʼaw oˉ kʼoˍ pui htaˇ jehˬ piˇ gʼa ve yoˬ. Nawˬ chi hkʼe te ve kʼo Yaˬhoˉvaˬ ha lehˬ tuˬ te piˇ ve yoˬ. Yawˇ “nyi ma luˬ chehˇ ve chaw hui awˬ paˇ neˇ lo chehˇ” leh “mehˇ chawˇ ma teˇ hpaˍ htaꞈ haꞈ shaˉ chehˇ ve” pa taw yoˬ.—Chiˇ mvuh ve 34:18; 68:5.

19. 1 Peˍtruˆ liꞈ 3:8 hkʼaw kʼoˆ taˍ ve hkʼe, nawˬ aˬ htoꞈ ma te tuˬ dawˇ teh taˍ ve le?

¹⁹ Maˇ maw ve awˬ yanˇ Gʼuiˬ sha ve mvuhˇ miˬ, miˬ guiˬ chi htaꞈ uˉ peunˍ leh “ponˬ taˉ peuˬ ve awˬ yanˇ awˬ hkʼaw lo ve dawˇ haˍ tuˬ teˇ hpaˍ mehˉ kʼai tuˬ yoˬ.” Ngaˬ hui “ponˬ laˬ peuˬ ve awˬ ceuˬ teˇ hpaˍ htaꞈ kʼawꞈ dawˇ nawˇ tuˬ ve maˇ heˆ.” Awˬ yanˇ chi ve htaꞈ law taˍ ve yoˬ. (Iˉsaˍyaˆ 65:16, 17) Oˇ ve teˇ nyi maˇ gaˬ sheˍ htaˇ teˇ gʼaˇ leh teˇ gʼaˇ ga daꞈ leh, kʼoˆ ve, te ve, co ha hpawˇ ve yehˬ kʼa htaꞈ ngaˬ hui awˬ tehˬ haꞈ ve tehꞈ hpeuꞈ maw piˇ sheˍ.—1 Peˍtruˆ 3:8 gʼaw sheˍ.