1. Pawˇluꞈ leuˆ yuˬ taˍ ve Hkriꞈ yaˇ htaꞈ aˬ htoꞈ ma ve shaˍ tiꞈ piˇ ve le?

 Ngaˬ hui teˇ ceuˬ ceuˬ maˇ gʼa te tuˬ Pawˇluꞈ shaˍ tiꞈ peꞈ laˇ ve yoˬ. Awˬ ceuˬ oˇ ve aˬ htoꞈ ma le? “Chi miˬ guiˬ yaˇ ve awˬ liˇ awˬ hkʼaˇ teˇ hpaˍ awˬ hkʼaˇ suh taˇ kʼai” tehꞈ kʼoˆ ve yoˬ. (Roˉmaꞈ 12:2) Pawˇluꞈ awˬ lawn chi ve awˉ lawˉ peuˇ ve Hkriꞈ yaˇ htaꞈ kʼoˆ piˇ ve yoˬ. Aˬ htoꞈ ma te chi yawˇ awˬ viˉ awˬ nyi hawˉ hkʼaˆ yaˇ miˇ Gʼuiˬ sha htaꞈ awˬ to chiˇ aꞈ piˇ˗oˬ ve leh, Gʼuiˬ sha ve daꞈ kehˬ ve awˬ ha hpu leuˆ yuˬ ve chaw htaꞈ shaˍ tiꞈ piˇ ve le?—Roˉmaꞈ 1:7.

2-3. Ngaˬ hui Yaˬhoˉvaˬ ve kanˉ maˇ gʼa te tuˬ Saˍtanˍ coˇ caˇ leh hkʼaˬ hkʼe te laˇ ve le? Ngaˬ hui nyi ma hkʼaw cawˬ ve maˇ cawˇ ve dawˇ hkʼaˇ htaꞈ hkʼaˬ hkʼe te yuˬ baˬ gʼa tuˬ le?

² Pawˇluꞈ yawˇ hui htaꞈ dawˇ haˍ ve yoˬ. Hkriꞈ yaˇ teˇ hpaˍ maˇ cawˇ ve dawˇ hkʼaˇ cawˬ ve pa taw, Saˍtanˍ ve miˬ guiˬ te tcuh gaˇ ve hkʼe te ve yoˬ. (Eˇfeˇsuꞈ 4:17-19) Chi ve ngaˬ hui geh kaꞈ hpehꞈ la gʼa ve yoˬ. Ngaˬ hui Yaˬhoˉvaˬ ve kanˉ maˇ gʼa te tuˬ Saˍtanˍ coˇ caˇ jaˇ. Yawˇ miˬ guiˬ ve gʼuiˬ sha hpehꞈ ve pa taw, awˬ hkʼaˇ laiˉ hkʼaˇ yehˇ ve yoˬ. Tawˇ pa haˉ te kʼo, ngaˬ hui a yeˇ uiˍ ve leh awˬ meh bvuhˬ ve chaw hpehꞈ gaˇ ve kʼo, awˬ ceuˬ chi ve htaꞈ yehˇ leh ngaˬ hui Yaˬhoˉvaˬ geh maˇ gʼa meuˆ daꞈ tuˬ te laˇ ve yoˬ. Ngaˬ hui aˉ hkʼaw lo chehˇ htaˇ te ve, liꞈ henˇ yehˬ lo chehˇ htaˇ te ve, leh ngaˬ hui awˬ paˇ awˬ kui lo chehˇ ve chaw te ve awˬ ceuˬ htaꞈ cuˇ leh yawˇ hkʼe dawˇ tuˬ te laˇ ve yoˬ.

³ Ngaˬ hui ve nyi ma hkʼaw cawˬ ve maˇ daꞈ ve awˬ ceuˬ htaꞈ yuˬ baˬ tuˬ te gʼa˗aw laˇ? (2 Kawˇrenˍhtuˆ 10:4) Pawˇluꞈ kʼoˆ ve, “tawˇ gʼawˬ  daꞈ ve awˬ ceuˬ teˇ hpaˍ htaꞈ maˇ kʼoˆ, Gʼuiˬ sha htaꞈ maˇ gʼa shiˍ tuˬ tawˍ taˍ tsuhˇ taˍ ve awˬ ceuˬ teˇ hpaˍ htaꞈ maˇ kʼoˆ, ngaˬ hui yuˬ baˬ hpaˆ baˬ ve yoˬ. Dawˇ hkʼaˇ teˇ maˬ le le htaꞈ ngaˬ hui hpeh yuˬ leh, Hkriꞈ htaꞈ na yuˬ piˇ lawˬ ve yoˬ.” (2 Kawˇrenˍhtuˆ 10:5) Yaˬhoˉvaˬ ga laˇ tcuh ve kʼo, ngaˬ hui maˇ daꞈ ve dawˇ hkʼaˇ yuˬ baˬ gʼa ve yoˬ. Naˆ tsuhˇ awˬ tawꞈ ma htaꞈ tawˍ daꞈ gʼaˇ ve hkʼe, Liꞈ hpu kaꞈ ngaˬ hui miˬ guiˬ ve dawˇ hkʼaˇ htaꞈ tawˍ daꞈ gʼaˇ tuˬ ga laˇ gʼa ve yoˬ.

4. Ngaˬ hui awˬ tehˬ ve tanˬ henˇ htaˇ aˬ htoꞈ ma gʼa pa cawˇ ve le?

⁴ Nawˬ Liꞈ hpu tanˬ henˇ leh Gʼuiˬ sha ve kanˉ te tuˬ dawˇ cheˆ htaˇ, aˬ htoꞈ ma gʼa pa cawˇ ve dawˇ nyi sheˍ. Ngaˬ hui kaꞈ maˇ daꞈ ve dawˇ hkʼaˇ htaꞈ gʼa pa cawˇ ve yoˬ. (1 Kawˇrenˍhtuˆ 6:9-11) Yaˬhoˉvaˬ ngaˬ hui htaꞈ ga laˇ leh maˇ daꞈ ve dawˇ hkʼaˇ yuˬ baˬ gʼa ve ha lehˬ jaˇ!

5. Roˉmaꞈ liꞈ 12:2 hkʼaw kʼoˆ taˍ ve hkʼe, ngaˬ hui aˬ htoꞈ ma gʼa te cawˇ ve le?

⁵ Ngaˬ hui teꞈ chiˉ maˇ gʼa pa cawˇ˗oˬ ve tehꞈ taˇ dawˇ. Ngaˬ hui Baˆtiˆsaˬ maˇ haꞈ yuˬ sheˍ htaˇ venˇ baˆ uiˍ jaˇ ve htaꞈ te yaꞈ jaw ve htawˇ, ngaˬ hui awˉ lawˉ htaˇ hkʼe kʼawꞈ te tuˬ beˬ laˇ ve htaꞈ jaw hpaw˗e cawˇ ve yoˬ. Ngaˬ hui hkʼaˬ hkʼe te tuˬ le? Pawˇluꞈ kʼoˆ ve, “chi miˬ guiˬ yaˇ ve awˬ liˇ awˬ hkʼaˇ teˇ hpaˍ awˬ hkʼaˇ suh taˇ kʼai. . . Nyi ma awˬ suhˉ kʼawꞈ pa leh, chaw awˬ suhˉ hpehꞈ la piˇ˗oˆ.” (Roˉmaꞈ 12:2) Chi htaꞈ pa taw ngaˬ hui nyiˇ ceuˬ htaꞈ gʼa te ve yoˬ. Awˉ lawˉ teˇ ceuˬ “chi miˬ guiˬ yaˇ ve awˬ liˇ awˬ hkʼaˇ teˇ hpaˍ awˬ hkʼaˇ suh taˇ kʼai.” Nyiˇ ceuˬ teˇ ceuˬ “nyi ma awˬ suhˉ kʼawꞈ pa leh, chaw awˬ suhˉ hpehꞈ la piˇ˗oˆ.”

6. Maꞈhtehˍ liꞈ 12:43-45 hkʼaw Yeˍsuˆ ve tawˇ hkawˇ ngaˬ hui htaꞈ aˬ htoꞈ ma maˍ laˇ ve le?

⁶ A shu yawˇ awˬ to pa cawˇ ve tehꞈ Pawˇluꞈ kʼoˆ htaˇ, awˬ htaꞈ hpawˇ ceh pa ve maˇ heˆ. Chi ngaˬ hui te ve teˇ ceuˬ le le hpawˇ heuˆ la kuiˬ cawˬ ve yoˬ.  (Awˇ ceˍ awˇ fa “ Ngaˬ hui nyi ma awˬ suhˉ awˬ tehˬ pa˗aw laˇ, maˇ heˆ leh pa ve hkʼe te˗aw laˇ?” htaꞈ nyi sheˍ.) Ngaˬ hui ve dawˇ hkʼaˇ awˬ suhˉ kʼawꞈ pa cawˇ ve yoˬ. Chi ngaˬ hui ve nyi ma hkʼaw cawˬ ve dawˇ hkʼaˇ hkʼa peu˗eˬ htaꞈ kʼoˆ gaˇ ve yoˬ. Chi htaꞈ pa taw, ngaˬ hui a shu yawˇ awˬ to htaꞈ na nyi cawˇ ve, ‘ngaˬ pa chehˇ ve awˬ ceuˬ chi awˬ htaꞈ hpawˇ ceh Hkriꞈ yaˇ hpehꞈ ve, maˇ heˆ leh nyi ma awˬ tawˬ hkʼa gaˬ Hkriꞈ yaˇ hpehꞈ ve laˇ?’ Chi ve nyiˇ ceuˬ peun daꞈ jaˇ. Yeˍsuˆ ve tawˇ hkawˇ Maꞈhtehˍ liꞈ 12:43-45 hkʼaw ngaˬ hui aˬ htoꞈ ma gʼa te cawˇ ve na gʼa tuˬ ga laˇ ve yoˬ. (Gʼaw sheˍ.) Yawˇ ve tawˇ hkawˇ ngaˬ hui henˇ yuˬ tuˬ maˍ laˇ ve yoˬ. Maˇ daꞈ ve dawˇ hkʼaˇ htaꞈ yuˬ baˬ ve ceh maˇ lawꞈ. Ngaˬ hui ve dawˇ hkʼaˇ hkʼaw Gʼuiˬ sha ve dawˇ hkʼaˇ kaꞈ gʼa cawˬ tcuh ve yoˬ.

7. Ngaˬ hui ve nyi ma hkʼaw dawˇ hkʼaˇ htaꞈ hkʼaˬ hkʼe te pa gʼa tuˬ le?

⁷ Ngaˬ hui ve nyi ma hkʼaw dawˇ hkʼaˇ awˬ suhˉ pa gʼa˗aw laˇ? Liꞈ hpu hkʼaw kʼoˆ ve, “nawˬ hui ve nyi ma awˬ hkʼaw lo dawˇ hkʼaˇ awˬ suhˉ cawˬ la piˇ˗oˆ. Awˬ tehˬ awˬ na hteˇ ve cawˇ ve leh daꞈ ve kehˬ ve awˬ hkʼaw lo, Gʼuiˬ sha hpanˍ taˍ ve nyi ma awˬ suhˉ htaꞈ veuꞈ deh˗o.” (Eˇfeˇsuꞈ 4:23, 24) Chi te gʼa ve yoˬ. Yaꞈ hkʼaˇ, maˇ sha. Ngaˬ hui loˍ ve leh maˇ daꞈ ve htaꞈ maˇ te˗o ve, chi ve htaꞈ tawˍ daꞈ ve ceh maˇ lawꞈ. Ngaˬ hui ve “nyi ma awˬ hkʼaw lo dawˇ hkʼaˇ awˬ suhˉ” gʼa pa cawˇ ve yoˬ. Chi ve tcuhˉ kuiˬ lehˬ, ngaˬ hui loˍ ve, dawˇ teh taˍ ve, leh ngaˬ hui ve nyi ma hkʼaw cawˬ ve dawˇ hkʼaˇ htaꞈ gʼa pa cawˇ ve tehꞈ kʼoˆ gaˇ ve yoˬ. Chi caˉ leh gʼa te ve yoˬ.

8-9. Awˬ viˉ awˬ nyi hawˉ hkʼaˆ teˇ gʼaˇ hpehꞈ laˬ jaw ve awˬ lawn ngaˬ hui ve nyi ma awˬ hkʼaw lo dawˇ hkʼaˇ awˬ suhˉ cawˬ la tuˬ hkʼaˬ hkʼe ga laˇ ve le?

⁸ Awˬ viˉ awˬ nyi hawˉ hkʼaˆ teˇ gʼaˇ haiˬ ve te jaw ve htaꞈ dawˇ nyi sheˍ. Yawˇ tzuhˬ maˇ dawˬ˗o leh shu htaꞈ maˇ yaꞈ daꞈ˗o htaˇ Baˆtiˆsaˬ haꞈ yuˬ ve yoˬ. Chi yawˇ awˬ paˇ awˬ kui chehˇ ve chaw htaꞈ daꞈ ve awˬ lawn sha tanˇ hto maˍ piˇ gʼa ve yoˬ. Yaꞈ hkʼaˇ, yawˇ Baˆtiˆsaˬ haꞈ yuˬ peuˬ hkʼawꞈ nawˉ maˇ maw beˬ ve lawˇ ve gʼa hpuˇ ve yoˬ. Tzuhˬ bvuhˆ paˍ teˇ gʼaˇ yawˇ yehˬ lo laˬ leh ca na dawˆ la ve yoˬ. Awˉ lawˉ htaˇ awˬ viˉ awˬ nyi yeunˇ hkanˍ gʼaˇ ve yoˬ. Yaꞈ hkʼaˇ, oˇ ve teˇ gʼaˇ Yaˬhoˉvaˬ ve awˬ meh htaꞈ maˇ daꞈ ve kʼoˆ leh awˬ viˉ awˬ nyi yeunˇ keunˍ maˇ gʼaˇ. Yawˇ tawˆ˗e leh oˇ ve teˇ gʼaˇ htaꞈ dawˆ ve yoˬ. Hkʼaˬ hkʼe hpehꞈ la ve le? Liꞈ hpu henˇ ve yawˇ ve dawˇ hkʼaˇ haiˬ ve htaꞈ pa gʼa tuˬ ga piˇ ve htawˇ, yawˇ awˬ tehˬ awˬ na nyi ma hkʼaw ve dawˇ hkʼaˇ maˇ pa gʼa sheˍ.

⁹ Yaꞈ hkʼaˇ, awˬ viˉ awˬ nyi chi teˇ gʼaˇ te tcuhˉ taˍ ve yoˬ. (Tawˇ naˉ ve 24:16) Nyi haꞈ shaˉ pa ga laˇ tcuh ve pa taw, yawˇ co ha hpawˇ uiˍ la mvuh la ve yoˬ. Awˬ leh meuˇ htaˇ yawˇ nyi haꞈ shaˉ paˍ gʼa te ve yoˬ. Peuˬ hkʼawꞈ nawˉ, mvuhˇ hpeuꞈ la htaˇ hpawnˬ daꞈ kuiˬ gʼuˇ suhˍ lo yawˇ gʼa hpuˇ jaw ve hkʼe gʼa kʼawꞈ hpuˇ ve yoˬ. Tzuhˬ bvuhˆ paˍ teˇ gʼaˇ nyi haꞈ shaˉ paˍ hui htaꞈ dawˆ˗a te ve yoˬ. Awˬ viˉ awˬ nyi chi teˇ gʼaˇ hkʼaˬ hkʼe te ve le? Yawˇ tzuhˬ bvuhˆ paˍ htaꞈ nyi ma gawˬ lehˍ ve hkʼaw tawˇ yaw piˇ leh, maˇ daꞈ ve dawˇ hkʼaˇ maˇ cawˬ tcuh leh, tzuhˬ bvuhˆ paˍ htaꞈ aˉ hkʼaw kʼawꞈ˗e tuˬ ga piˇ ve yoˬ. Awˬ bon hkʼaˬ hkʼe gʼa ve le? Awˬ viˉ awˬ nyi chi teˇ gʼaˇ nyi ma hkʼaw dawˇ hkʼaˇ awˬ suhˉ cawˬ ve yoˬ. Nyi ma hkʼaw yawˇ dawˇ sha gawˬ lehˍ ve leh nyi ma nuˇ nehˬ ve cawˬ ve yoˬ. Chi awˬ tehˬ awˬ na Yaˬhoˉvaˬ awˬ meꞈ awˬ hponˇ gʼa jaˇ!

10. Ngaˬ hui ve nyi ma hkʼaw dawˇ hkʼaˇ htaꞈ pa ve aˬ htoꞈ ma kaꞈ cawˬ sheˍ ve le?

¹⁰ Pa ve chi hkʼe ve teˇ hkui teˇ yanˇ leh yawˇ hkʼaˇ yawˇ hpehꞈ la gʼa ve maˇ heˆ. Ngaˬ hui laiˉ hkʼawꞈ “gʼaˇ hteꞈ coˇ caˇ” leh gʼa te cawˇ ve yoˬ.  (2 Peˍtruˆ 1:5) Ngaˬ hui Yaˬhoˉvaˬ ve kanˉ te laˬ maw jaˇ˗oˬ leh chi hkʼe pa laˇ ve maˇ heˆ. Ngaˬ hui ve nyi ma hkʼaw dawˇ hkʼaˇ htaꞈ pa tuˬ gʼaˇ hteꞈ gʼa coˇ caˇ jaˇ. Chi hkʼe te gʼa tuˬ ngaˬ hui htaꞈ ga laˇ gʼa ve laiˉ hkʼaˇ cawˬ ve yoˬ. Teˇ lawn lawn htaꞈ chaˬ nyi sheˍ.

11. Ngaˬ hui bon lawˬ htaˇ, ngaˬ hui ve nyi ma hkʼaw dawˇ hkʼaˇ awˬ suhˉ kʼawꞈ pa tuˬ hkʼaˬ hkʼe ga laˇ ve le?

¹¹ A yeˇ uiˍ ve awˉ lawˉ teˇ ceuˬ lehˬ bon lawˬ ve yoˬ. Chiˇ mvuh ve liꞈ bvuhꞈ paˍ kʼoˆ ve, “Gʼuiˬ sha˗oˬ, ngaˬ awˬ hkʼaw lo hpu ve kehˬ ve nyi ma cawˬ la piˇ leh, ka tiꞈ yeˬ ve dawˇ hkʼaˇ awˬ suhˉ cawˬ la piˇ˗oˆ.” (Chiˇ mvuh ve 51:10) Ngaˬ hui ve nyi ma hkʼaw dawˇ hkʼaˇ awˬ suhˉ pa gʼa tuˬ Yaˬhoˉvaˬ ga laˇ tcuh cawˇ ve yoˬ. Ngaˬ hui pa gʼa tuˬ Yaˬhoˉvaˬ ga laˇ gʼa ve tehꞈ hkʼaˬ hkʼe te yonˍ gʼa tuˬ le? Yeˍsaˍkeˍlaˆ ve awˬ co˗e htaˇ Iˉsaˍreˍlaˆ chaw nyi ma uiˍ ve htawˇ, Yaˬhoˉvaˬ ga piˇ tuˬ yoˬ tehꞈ ka tiꞈ te taˍ ve yoˬ. Yawˇ ka tiꞈ te taˍ laˇ ve ngaˬ hui gʼaw htaˇ awˬ gʼaˇ gʼa jaˇ. Yawˇ kʼoˆ ve, “ngaˬ yawˇ hui htaꞈ nyi ma awˬ suhˉ leh dawˇ hkʼaˇ awˬ suhˉ cawˬ la piˇ . . . leh, na yuˬ puiˉ ve nyi ma cawˬ la piˇ tuˬ yoˬ.” (Yeˍsaˍkeˍlaˆ 11:19) Chi ve tcuhˉ kuiˬ lehˬ Gʼuiˬ sha beˆ maˍ piˇ ve htaꞈ na yuˬ puiˉ ve nyi ma htaꞈ kʼoˆ gaˇ ve yoˬ. Iˉsaˍreˍlaˆ chaw pa tuˬ Yaˬhoˉvaˬ ha lehˬ ve hkʼaw ga piˇ leh yawˇ ngaˬ hui htaꞈ kaꞈ ha lehˬ ve hkʼaw ga laˇ tuˬ yoˬ.

12-13. (a) Chiˇ mvuh ve liꞈ 119:59 hkʼaw kʼoˆ taˍ ve hkʼe, ngaˬ hui aˬ htoꞈ ma ve htaꞈ hkʼa dehꞈ dawˇ nyi cawˇ ve le? (b) Ngaˬ hui a shu yawˇ awˬ to htaꞈ hkʼaˬ hkʼe na nyi cawˇ ve le?

¹² A yeˇ uiˍ ve nyiˇ ceuˬ teˇ ceuˬ lehˬ hkʼa dehꞈ dawˇ nyi ve yoˬ. Ngaˬ hui teˇ nyi le le Liꞈ hpu gʼaw htaˇ, hkʼa dehꞈ dawˇ nyi tuˬ awˬ yanˇ gʼa yehˇ ve yoˬ. Chi hkʼe te htaˇ, ngaˬ hui dawˇ hkʼaˇ hkʼaˬ hkʼe ve gʼa pa cawˇ ve shiˍ la ve yoˬ. (Chiˇ mvuh ve 119:59; gʼaw sheˍ. Heˍbrehˇ 4:12; Yaˍkoˆ 1:25) Chaw yaˇ loˍ ve hkʼe nyi ma hkʼaw cawˬ tcuh ve kʼo, ngaˬ hui gʼa pa cawˇ ve yoˬ. Ngaˬ hui awˬ gʼaˇ nuˇ kuiˬ cawˬ ve kʼo nyi ma nuˇ nehˬ ve hkʼaw haꞈ yuˬ leh chi ve htaꞈ yuˬ baˬ gʼa tuˬ gʼaˇ hteꞈ gʼa coˇ caˇ ve yoˬ.

¹³ Tawˇ pa haˉ te kʼo, a shu yawˇ awˬ to htaꞈ na nyi cawˇ ve, ‘ngaˬ ve nyi ma hkʼaw hkawehˉ ve cawˬ sheˍ laˇ?’ (1 Peˍtruˆ 2:1) ‘Ngaˬ gʼa hpuˇ jaw ve, gʼa henˇ jaw ve, hpu shi mawˇ jeˬ htaꞈ pa taw uiˍ muiˬ caˆ muiˬ ve cawˬ˗aw laˇ?’ (Tawˇ naˉ ve 16:5) ‘Shu ngaˬ hkʼe leˇ maˇ hpehꞈ sha ve, chaw ceuˬ maˇ shuˍ daꞈ ve, ngaˬ yawˇ hui htaꞈ nyi cha˗aw laˇ?’ (Yaˍkoˆ 2:2-4) ‘Miˬ guiˬ yaˇ dawˇ ve hkʼe ngaˬ dawˇ cawˇ˗aw laˇ?’ (1 Yoˇhanˬ 2:15-17) ‘Pyawˍ ve, pehꞈ ve tzuhˆ ve leh, haiˬ ve awˬ han htaꞈ ngaˬ dawˇ cawˇ˗aw laˇ?’ (Chiˇ mvuh ve 97:10; 101:3; Aˍmoˆ 5:15) Ngaˬ hui na hkawˇ chi ve teˇ hpaˍ htaꞈ hkʼawꞈ htaˇ, aˬ htoꞈ ma gʼa pa cawˇ ve shiˍ la ve yoˬ. Ngaˬ hui nyi ma hkʼaw cawˬ ve chi ve hkʼa peu˗eˬ htaꞈ yuˬ baˬ gʼa ve kʼo, mvuhˇ naw ma hkʼoˆ chehˇ ve Awˬ pa ha lehˬ jaˇ tuˬ yoˬ.—Chiˇ mvuh ve 19:14.

14. Aˬ htoꞈ ma te daꞈ ve chaw htaꞈ awˬ chawˇ te ve a yeˇ uiˍ jaˇ ve le?

¹⁴ A yeˇ uiˍ ve shehˆ ceuˬ teˇ ceuˬ lehˬ daꞈ ve chaw htaꞈ awˬ chawˇ te ve yoˬ. Awˬ chawˇ ngaˬ hui htaꞈ heuˆ la kuiˬ cawˬ jaˇ. (Tawˇ naˉ ve 13:20) Kanˉ te kuiˬ, liꞈ henˇ kuiˬ ngaˬ hui Gʼuiˬ sha hkʼe dawˇ tuˬ te laˇ maˇ gʼa. Yaꞈ hkʼaˇ, Hkriꞈ yaˇ hpawnˬ daꞈ kuiˬ lo ngaˬ hui daꞈ ve awˬ chawˇ cawˬ ve yoˬ. Oˇ kaˬ lo ngaˬ hui “haꞈ pehnˇ ve nyi ma cawˬ leh” a yeˇ yuˬ daꞈ ve yoˬ.—Heˍbrehˇ 10:24, 25.

15-16. Saˍtanˍ coˇ caˇ leh ngaˬ hui ve dawˇ hkʼaˇ htaꞈ hkʼaˬ hkʼe pa laˇ gaˇ ve le?

¹⁵ Saˍtanˍ coˇ caˇ leh ngaˬ hui ve dawˇ hkʼaˇ htaꞈ pa laˇ gaˇ ve tehꞈ taˇ leunˇ sheˍ. Liꞈ hpu hkʼaw awˬ  tehˬ ve htaꞈ tawˍ daꞈ tuˬ yawˇ awˬ hkʼaˇ teˇ ceuˬ le le htaꞈ yehˇ ve yoˬ.

¹⁶ Saˍtanˍ Eˍdehˍ hko hkʼaw Eˇvaꞈ htaꞈ na piˇ jaw ve yoˬ. Chi beuꞈ teˇ co˗e kaꞈ yawˇ kʼawꞈ na chehˇ sheˍ ve awˬ tehˬ laˇ? (Awˬ hkuiˉ puiˍ 3:1) Miˬ guiˬ hkʼoˆ Saˍtanˍ uˉ peunˍ ve pa taw, na hkawˇ chi hkʼe ve teˇ hkui teˇ hkui ngaˬ hui gʼa kaˇ ve yoˬ. ‘Gʼuiˬ sha hawˉ hkʼaˆ chawˇ hawˉ hkʼaˆ leh yaˇ miˇ chawˇ yaˇ miˇ heuˆ daꞈ ve maˇ haꞈ yuˬ ve awˬ tehˬ laˇ? Gʼuiˬ sha nawˬ htaꞈ Hkiˇsuhˍmaˆ leh paw ve awˬ nyi maˇ te tcuh gaˇ ve awˬ tehˬ laˇ? Nawˬ ve Gʼuiˬ sha awˬ suhˍ keu ve maˇ haꞈ yuˬ ve awˬ tehˬ laˇ? Nawˬ haꞈ ve chaw Hkriꞈ yaˇ awˬ moˍ hkʼaw tawˆ cheˆ ve geh Gʼuiˬ sha awˬ chawˇ maˇ te tcuh laˇ ve awˬ tehˬ laˇ?’

17. Ngaˬ hui ve yonˍ hkʼaˇ htaꞈ beˬ ve lawˇ ve gʼa hpuˇ ve kʼo Kawˇlawˇsehˇ liꞈ 2:6, 7 hkʼaw awˬ bon gʼa tuˬ hkʼaˬ hkʼe hpeuꞈ maw laˇ ve le?

¹⁷ Ngaˬ hui yonˍ ve teˇ ceuˬ awˬ hkʼaw lo yeˬ chaweh gʼa chehˇ ve yoˬ. Ngaˬ hui htawˇ dawˇ nawˬ dawˇ cawˬ ve htaꞈ leuˉ leh kʼawꞈ cawˬ tcuh ve kʼo, chi ve kawˆ tuˬ cawˬ jaˇ. Chi ve ngaˬ hui ve dawˇ hkʼaˇ maˇ daꞈ ve cawˬ tcuh laˇ leh yonˍ hkʼaˇ htaꞈ te luˬ laˇ ve yoˬ. Hkʼe kʼo ngaˬ hui hkʼaˬ hkʼe te cawˇ ve le? Liꞈ hpu hkʼaw kʼoˆ ve ngaˬ hui ve nyi ma dawˇ hkʼaˇ awˬ suhˉ gʼa pa ve yoˬ. Chi htaꞈ pa taw, “Gʼuiˬ sha ve daꞈ jaˇ ve nyi ma cawˇ jaˇ ve leh biˇ jaˇ ve a loˍ” hkʼaˬ hkʼe kʼoˆ gaˇ ve le hkʼawꞈ laˇ hkawˇ chi ngaˬ hui gʼa ca ve yoˬ. (Roˉmaꞈ 12:2) Liꞈ hpu hkʼaw awˬ tehˬ ve hteˇ cawˇ jaˇ ve tehꞈ ngaˬ hui yonˍ gʼa tuˬ hkʼaˬ htaˆ kaꞈ Liꞈ hpu gʼa henˇ ve yoˬ. Yaˬhoˉvaˬ ve awˬ liˇ awˬ hkʼaˇ hteˇ cawˇ jaˇ ve tehꞈ ngaˬ hui hkʼa dehꞈ yonˍ gʼa ve yoˬ. Chi htaꞈ pa taw, suhˆ cehˬ awˬ geu tcuhˆ naˉ ve hkʼe ngaˬ hui ve yonˍ hkʼaˇ awˬ geu tcuhˆ naˉ leh “yeˬ chaweh” cawˬ tuˬ yoˬ.—Kawˇlawˇsehˇ 2:6, 7 gʼaw sheˍ.

18. Miˬ guiˬ lo laˬ ve awˬ tawꞈ ma cawˬ ve htaꞈ tawˍ daꞈ gʼaˇ tuˬ ngaˬ hui htaꞈ aˬ htoꞈ ma ga laˇ gʼa ve le?

¹⁸ Nawˬ ve yonˍ hkʼaˇ yonˍ yeˬ tuˬ shu te laˇ maˇ gʼa. Chi htaꞈ pa taw, nyi ma hkʼaw cawˬ ve dawˇ hkʼaˇ awˬ suhˉ pa tuˬ caˉ leh te sheˍ. Hkʼaˬ htaˆ kaꞈ bon lawˬ ve, Yaˬhoˉvaˬ ve daꞈ kehˬ ve awˬ ha hpu ga laˇ tuˬ lawˬ sheˍ. Hkʼa dehꞈ dawˇ nyi ve, nawˬ ve nyi ma hkʼaw cawˬ ve dawˇ hkʼaˇ htaꞈ chaˬ nyi sheˍ. Daꞈ ve chaw htaꞈ awˬ chawˇ te ve, nawˬ ve dawˇ hkʼaˇ pa laˇ gʼa tuˬ ga laˇ gʼa ve chaw geh awˬ chawˇ te sheˍ. Nawˬ chi hkʼe te ve kʼo miˬ guiˬ lo laˬ ve awˬ tawꞈ ma cawˬ ve leh ‘tawˇ gʼawˬ daꞈ ve awˬ ceuˬ leh Gʼuiˬ sha htaꞈ maˇ gʼa shiˍ tuˬ tawˍ taˍ tsuhˇ taˍ ve awˬ ceuˬ teˇ hpaˍ htaꞈ yuˬ baˬ’ leh tawˍ daꞈ gʼaˇ ve yoˬ.—2 Kawˇrenˍhtuˆ 10:5.