1. Chiˇ mvuh ve liꞈ 15:1-5 hkʼaw ngaˬ hui aˬ htoꞈ ma awˬ bon gʼa ve le?

 Peuˬ taˉ ve teˇ lawn hkʼaw ngaˬ hui gʼa henˇ˗oˬ ve, Yaˬhoˉvaˬ htaꞈ awˬ to chiˇ aꞈ piˇ˗oˬ ve chaw leh yawˇ geh hkʼaˬ htaˆ kaꞈ meuˆ daꞈ ve chaw, yawˇ ve aˉ hkʼaw lo ve hkehˉ chaw hpehꞈ gʼa ve yoˬ. Yaꞈ hkʼaˇ, caˉ leh Yaˬhoˉvaˬ ve aˉ hkʼaw lo ve hkehˉ chaw hpehꞈ gʼa tuˬ aˬ htoꞈ ma gʼa te cawˇ sheˍ ve le? Chiˇ mvuh ve liꞈ kaˇ nanˉ uiˍ 15 hkʼaw awˬ lawn chi htaꞈ hkʼawꞈ laˇ tuˬ yoˬ. (Chiˇ mvuh ve 15:1-5 gʼaw sheˍ.) Ngaˬ hui Yaˬhoˉvaˬ geh hkʼa dehꞈ meuˆ daꞈ gʼa tuˬ ga laˇ gʼa ve, Chiˇ mvuh ve liꞈ chi teˇ puꞈ hkʼaw beˆ maˍ laˇ hkawˇ laiˉ ceuˬ cawˬ ve yoˬ.

2. Daˍviˆ lehˬ Yaˬhoˉvaˬ ve aˉ po kʼo htaꞈ kʼoˆ htaˇ, yawˇ aˬ htoꞈ ma htaꞈ dawˇ mawˬ ve le?

² Chiˇ mvuh ve liꞈ kaˇ nanˉ uiˍ 15 awˉ lawˉ teˇ tawn hkʼaw kʼoˆ ve, “Gʼuiˬ sha˗oˬ, nawˬ ve bon yehˬ hkʼaw a shu gʼa loꞈ˗e tuˬ ve le? Nawˬ ve daꞈ kehˬ ve Ziˉonˍ hkʼaw hkʼoˆ lo a shu oˉ kʼoˍ gʼa ca pui tuˬ le?” (Chiˇ mvuh ve 15:1) Chiˇ mvuh ve liꞈ chi teˇ tawn bvuhꞈ paˍ Daˍviˆ lehˬ, Yaˬhoˉvaˬ ve “bon yehˬ” htaꞈ kʼoˆ taˍ ve yoˬ. Oˇ ve teˇ yanˇ daꞈ kehˬ ve aˉ po kʼo Giˇdonˍ venˇ lo teh taˍ ve htaꞈ dawˇ mawˬ ve yoˬ. Leh Daˍviˆ Gʼuiˬ sha ve ‘daꞈ kehˬ ve hkʼaw’ htaꞈ kaꞈ kʼoˆ taˍ sheˍ ve yoˬ. Chi ve lehˬ Yeˍruˆsaˍlehnˍ venˇ lo Ziˉonˍ hkʼaw htaꞈ yawˇ kʼoˆ gaˇ ve yoˬ. Hkʼaw chi ve lehˬ Giˇdonˍ venˇ awˬ hawˉ hpawˇ lo cawˬ leh venˇ chi htaꞈ 10 kiˇ loˇ hkʼe vuiˇ daꞈ ve yoˬ. Daˍviˆ lehˬ Yaˬhoˉvaˬ ve ka tiꞈ shaˉ caˆ ta kʼoˍ yawˇ gu taˍ ve aˉ po kʼo hkʼaw teh ve yoˬ. Leh ka tiꞈ shaˉ caˆ ta kʼoˍ chi ve lehˬ, bon yehˬ lonˉ te peuˬ htaˇ hkʼa gaˬ aˉ po kʼo hkʼaw lo teh taˍ ve yoˬ.—2 Saˍmo˗eˍlaˆ 6:17.

3. Aˬ htoꞈ ma te ngaˬ hui Chiˇ mvuh ve liꞈ kaˇ nanˉ uiˍ 15 hkʼaw na gʼa gaˇ ve le? (Awˬ han htaꞈ nyi sheˍ.)

³ Iˉsaˍreˍlaˆ chaw maˇ˗awˍ ve daꞈ kehˬ ve aˉ po kʼo hkʼaw lo kanˉ maˇ te jaw leh aˉ po kʼo chi ve hkʼaw gʼa loꞈ˗e ve chaw hkʼaˬ nyiˇ gʼaˇ maˇ cawˬ. Chi ve lehˬ Yaˬhoˉvaˬ ve ka tiꞈ shaˉ caˆ ta kʼoˍ teh kuiˬ hpehꞈ ve yoˬ. Chi hkʼe hpehꞈ ve htawˇ, Yaˬhoˉvaˬ ve kanˉ ka tiꞈ yeˬ ve hkʼaw te ve chaw teˇ gʼaˇ le le yawˇ ve hkehˉ chaw hpehꞈ gʼa ve yoˬ. Caˉ leh yawˇ ve awˬ chawˇ kaꞈ hpehꞈ gʼa sheˍ ve yoˬ. Chi ve lehˬ ngaˬ hui teˇ gʼaˇ le le hpehꞈ gaˇ ve awˬ ceuˬ yoˬ. Chiˇ mvuh ve liꞈ kaˇ nanˉ uiˍ 15 hkʼaw ngaˬ hui Yaˬhoˉvaˬ ve awˬ chawˇ caˉ leh hpehꞈ gʼa tuˬ, gʼa te cawˇ ve teˇ ceuˬ ceuˬ htaꞈ kʼoˆ taˍ ve yoˬ.

 DAꞈ VE HTAꞈ TIˉ TE LEH HTEˇ VE CAWˇ VE CHAW

4. Baˆtiˆsaˬ haꞈ yuˬ ve ceh tiˉ Yaˬhoˉvaˬ ngaˬ hui geh loˍ ve maˇ heˆ tehꞈ hkʼaˬ hkʼe te shiˍ gʼa ve le? (Iˉsaˍyaˆ 48:1)

⁴ Chiˇ mvuh ve liꞈ 15:2 hkʼaw Yaˬhoˉvaˬ ve awˬ chawˇ lehˬ, ‘daꞈ ve htaꞈ tiˉ te leh hteˇ ve cawˇ ve chaw’ gʼa hpehꞈ cawˇ ve tehꞈ ngaˬ hui shiˍ tuˬ te laˇ ve yoˬ. Chi ve lehˬ ngaˬ hui hkʼaˬ htaˆ kaꞈ gʼa te cawˇ ve yoˬ. Yaꞈ hkʼaˇ, ngaˬ hui ‘daꞈ ve htaꞈ tiˉ te leh hteˇ ve cawˇ ve chaw’ hkʼaˬ hkʼe te hpehꞈ gʼa tuˬ le? Ngaˬ hui teˇ gʼaˇ le le kaꞈ maˇ biˇ ve chaw hpehꞈ ve yoˬ. Chi hkʼe hpehꞈ ve htawˇ, ngaˬ hui Yaˬhoˉvaˬ ve tawˇ hkawˇ htaꞈ na yuˬ tuˬ coˇ caˇ ve kʼo, ‘daꞈ ve htaꞈ tiˉ te leh hteˇ ve cawˇ ve chaw’ hpehꞈ ve tehꞈ Yaˬhoˉvaˬ shawˍ ve yoˬ. Ngaˬ hui Yaˬhoˉvaˬ htaꞈ awˬ to chiˇ aꞈ piˇ leh Baˆtiˆsaˬ haꞈ yuˬ ve kʼo, chi ve lehˬ yawˇ nyi hkʼaˇ suh tuˬ te piˇ ve awˬ hkuiˉ puiˍ tanˬ ve yoˬ. Liꞈ hpu ve awˬ co˗e htaˇ, Iˉsaˍreˍlaˆ chaw hui ve awˬ lawn lehˬ, yawˇ hui ve chaw ceuˬ Yaˬhoˉvaˬ ve aˉ po kʼo hkʼaw ve hkehˉ chaw hpehꞈ gʼa ve tehꞈ kʼoˆ gaˇ ve maˇ heˆ. Iˉsaˍreˍlaˆ chaw teˇ hpaˍ Yaˬhoˉvaˬ htaꞈ chiˇ mvuh leh ‘yawˇ htaꞈ ceh tiˉ oˉ kʼoˍ pui tuˬ yoˬ tehꞈ kʼoˆ taˍ ve htawˇ, yawˇ hui kʼoˆ taˍ ve hkʼe maˇ te.’ (Iˉsaˍyaˆ 48:1 gʼaw sheˍ.) Chi htaꞈ pa taw, yawˇ hui awˬ tehˬ awˬ na Gʼuiˬ sha ve hkehˉ chaw hpehꞈ gaˇ ve tehꞈ hpeuꞈ maw piˇ cawˇ ve yoˬ. Yaꞈ hkʼaˇ, yawˇ hui lehˬ Gʼuiˬ sha aˬ htoꞈ ma te tcuh gaˇ ve htaꞈ henˇ leh gʼaꞈ te cawˇ ve yoˬ. Chi ve hkʼa shuˍ shuˍ, Yaˬhoˉvaˬ ngaˬ hui htaꞈ nyi hkʼaˇ suh tuˬ, ngaˬ hui Baˆtiˆsaˬ haꞈ yuˬ leh Shaˉhkiˆhkanˍ ve chaw hpehꞈ ve ceh tiˉ maˇ te cawˇ. Ngaˬ hui “hteˇ ve cawˇ ve” awˬ ceuˬ htaꞈ caˉ leh gʼa te cawˇ ve yoˬ. Leh chi ve ngaˬ hui hkʼaˬ hkʼe te gʼa tuˬ le?

5. Yaˬhoˉvaˬ ve tawˇ hkawˇ teˇ lawn le le htaꞈ na yuˬ ve aˬ htoꞈ ma htaꞈ kʼoˆ gaˇ ve le?

⁵ Yaˬhoˉvaˬ awˬ pon kʼo, ‘daꞈ ve htaꞈ tiˉ te leh hteˇ ve cawˇ ve chaw’ lehˬ, hpawnˬ daꞈ kuiˬ lo hkʼaˬ htaˆ kaꞈ hpawnˬ daꞈ˗e ve htaꞈ kʼoˆ gaˇ ve maˇ heˆ. (1 Saˍmo˗eˍlaˆ 15:22) Yaꞈ hkʼaˇ, ngaˬ hui a shaꞈ teꞈ kuiˬ hkʼaw Yaˬhoˉvaˬ ve tawˇ hkawˇ htaꞈ teˇ lawn le le na yuˬ tuˬ coˇ caˇ leh ngaˬ hui teˇ gʼaˇ tiˉ chehˇ htaˇ kaꞈ yawˇ ve hkawˇ na yuˬ ve yoˬ. (Tawˇ naˉ ve 3:6; Cuˇ yiˍ piˇ ve 12:13, 14) I ve awˬ lawn hpehꞈ ve htawˇ, ngaˬ hui yawˇ ve tawˇ hkawˇ htaꞈ na yuˬ ve a yeˇ uiˍ jaˇ. Ngaˬ hui chi hkʼe te ve kʼo, Yaˬhoˉvaˬ htaꞈ awˬ tehˬ awˬ na haꞈ ve tehꞈ hpeuꞈ maw piˇ ve yoˬ. Leh chi yawˇ ngaˬ hui htaꞈ leuˉ leh haꞈ tuˬ te piˇ ve yoˬ.—Yoˇhanˬ 14:23; 1 Yoˇhanˬ 5:3.

6. Heˍbrehˇ liꞈ 6:10-12 hkʼaw kʼoˆ taˍ ve hkʼe, oˇ htaˇ ngaˬ hui Yaˬhoˉvaˬ awˬ pon te jaw ve awˬ ceuˬ a yeˇ uiˍ jaˇ ve aˬ htoꞈ ma le?

 ⁶ Oˇ htaˇ ngaˬ hui Yaˬhoˉvaˬ awˬ pon te jaw ve awˬ ceuˬ htaꞈ yawˇ awˬ hpfuhˇ shiˍ ve yoˬ. Yaꞈ hkʼaˇ, ngaˬ hui chi hkʼe te htaˇ, Yaˬhoˉvaˬ ve aˉ hkʼaw lo hkʼaˬ htaˆ kaꞈ hkehˉ chaw hpehꞈ gʼa ve htaꞈ kʼoˆ gaˇ ve maˇ heˆ. Awˬ lawn chi ve Heˍbrehˇ liꞈ 6:10-12 hkʼaw ngaˬ hui hkʼa dehꞈ na gʼa ve yoˬ. (Gʼaw sheˍ.) Ngaˬ hui Yaˬhoˉvaˬ awˬ pon te ve awˬ ceuˬ htaꞈ yawˇ maˇ leunˇ ve tehꞈ yonˍ gʼa ve yoˬ. Yaꞈ hkʼaˇ, Yaˬhoˉvaˬ lehˬ ngaˬ hui htaꞈ awˬ leh hkʼa gaˬ yawˇ ve kanˉ nyi ma awˬ tawˬ hkʼa gaˬ te tcuh gaˇ ve yoˬ. Ngaˬ hui “awˬ gʼaˇ maˇ nuˇ leh te” ve kʼo, Yaˬhoˉvaˬ ngaˬ hui htaꞈ laꞈ shawnˍ peꞈ laˇ ve lehˬ, hkʼaˬ htaˆ kaꞈ yawˇ ve awˬ chawˇ te tcuh laˇ ve yoˬ.—Gaˍlaˍtiˆ 6:9.

HTEˇ VE CAWˇ VE TAWˇ HTAꞈ TIˉ YAW VE

7. Na sha ve tawˇ htaꞈ tiˉ yaw ve aˬ htoꞈ ma kʼoˆ gaˇ ve le?

⁷ A shu Yaˬhoˉvaˬ ve aˉ hkʼaw lo ve hkehˉ chaw hpehꞈ gaˇ ve kʼo, yawˇ ‘hteˇ ve cawˇ ve tawˇ htaꞈ tiˉ gʼa yaw ve yoˬ.’ (Chiˇ mvuh ve 15:2) Chi hkʼe ve lehˬ maˇ heˍ ve ceh tiˉ maˇ heˆ. Yaˬhoˉvaˬ lehˬ ngaˬ hui htaꞈ tawˇ yaw ve leh te ve teˇ lawn le le hkʼaw ka tiꞈ yeˬ tcuh gaˇ ve yoˬ. (Heˍbrehˇ 13:18) Chi ve a yeˇ uiˍ jaˇ. “Awˬ lawn kʼo, Gʼuiˬ sha lehˬ haiˬ ve kanˉ htaꞈ te ve chaw htaꞈ canˇ leh, hteˇ ve cawˇ ve chaw htaꞈ awˬ chawˇ te piˇ ve yoˬ.”—Tawˇ naˉ ve 3:32.

8. Ngaˬ hui hkʼaˬ hkʼe ve chaw maˇ hpehꞈ cawˇ ve le?

⁸ ‘Hteˇ ve cawˇ ve tawˇ htaꞈ tiˉ yaw ve chaw’ lehˬ, shu mehˆ gʼuˇ suhˍ chehˇ htaˇ kʼo, Yaˬhoˉvaˬ ve tawˇ hkawˇ htaꞈ na yuˬ ve yoˬ. Yaꞈ hkʼaˇ, yawˇ teˇ gʼaˇ ceh tiˉ chehˇ htaˇ kʼo, maˇ daꞈ ve awˬ ceuˬ htaꞈ te ve, chi hkʼe ve htaꞈ kʼoˆ gaˇ ve maˇ heˆ. (Iˉsaˍyaˆ 29:13) ‘Hteˇ ve cawˇ ve tawˇ htaꞈ tiˉ yaw ve chaw’ lehˬ, haiˬ ve awˬ ceuˬ htaꞈ maˇ te ve chaw hpehꞈ ve yoˬ. Haiˬ ve htaꞈ te ve chaw lehˬ, Yaˬhoˉvaˬ ve awˬ liˇ tawˇ hkawˇ teˇ hpaˍ awˬ tehˬ yehˇ gʼa ve laˇ tehꞈ htawˇ dawˇ nawˬ dawˇ cawˬ ve yoˬ hehˉ. (Yaˍkoˆ 1:5-8) Yawˇ awˉ lawˉ htaˇ i ve awˬ ceuˬ htaꞈ maˇ na yuˬ ve yoˬ. Peuˬ hkʼawꞈ nawˉ heuˆ la kuiˬ maˇ cawˬ ve htaꞈ yawˇ gʼa mawˬ htaˇ, Yaˬhoˉvaˬ ve awˬ liˇ tawˇ hkawˇ uiˍ ve awˬ ceuˬ htaꞈ yawˇ maˇ na yuˬ tuˬ haꞈ hanˉ ve yoˬ. Yawˇ Yaˬhoˉvaˬ ve kanˉ te chehˇ ve tehꞈ dawˇ ve htawˇ, yawˇ te ve awˬ ceuˬ htaꞈ Yaˬhoˉvaˬ maˇ haꞈ yuˬ ve yoˬ. (Cuˇ yiˍ piˇ ve 8:11) Ngaˬ hui chi hkʼe ve chaw maˇ hpehꞈ gaˇ. Teˇ lawn le le hkʼaw ngaˬ hui ka tiꞈ yeˬ ve chaw hpehꞈ gaˇ ve yoˬ.

9. Yeˍsuˆ Naˍtaˍneˍlaˆ htaꞈ mawˬ daꞈ ve awˉ lawˉ teˇ pawˆ htaˇ, ngaˬ hui htaꞈ aˬ htoꞈ ma maˍ laˇ ve le? (Awˬ han htaꞈ nyi sheˍ.)

⁹ Ngaˬ hui na sha ve tawˇ htaꞈ tiˉ yaw ve lehˬ a yeˇ uiˍ jaˇ. Hpiˇliˇpuˆ yawˇ ve awˬ chawˇ Naˍtaˍneˍlaˆ Yeˍsuˆ geh shiˍ laˬ htaˇ ve awˬ lawn htaꞈ dawˇ nyi sheˍ. Yeˍsuˆ  Naˍtaˍneˍlaˆ htaꞈ maˇ mawˬ jaw ve htawˇ, Yeˍsuˆ kʼoˆ ve, “yawˇ awˬ hkʼaw lo heˍ ve a ciˉ kaꞈ maˇ cawˬ ve, Iˉsaˍreˍlaˆ chaw awˬ tehꞈ awˬ na ve teˇ gʼaˇ htaꞈ nyi˗o.” (Yoˇhanˬ 1:47) Yeˍsuˆ ve awˬ laꞈ gʼawˇ hui heˍ ve a ciˉ kaꞈ maˇ cawˬ ve shuˍ daꞈ ve htawˇ, Yeˍsuˆ awˬ nu ve awˬ laꞈ gʼawˇ aꞈ kehˉ Naˍtaˍneˍlaˆ htaꞈ daꞈ ve hpawˇ nyi ve yoˬ. Naˍtaˍneˍlaˆ kaꞈ ngaˬ hui hkʼa shuˍ maˇ biˇ ve chaw hpehꞈ ve yoˬ. Yawˇ heˍ ve a ciˉ kaꞈ maˇ cawˬ leh teˇ lawn le le hkʼaw ka tiꞈ yeˬ ve yoˬ. Naˍtaˍneˍlaˆ chi hkʼe hpehꞈ ve pa taw, Yeˍsuˆ chiˇ mvuh piˇ ve yoˬ. Yeˍsuˆ Naˍtaˍneˍlaˆ hkʼa shuˍ ngaˬ hui htaꞈ kaꞈ nyi tcuh gaˇ ve yoˬ.

10. Aˬ htoꞈ ma te ngaˬ hui tawˇ yaw ve htaꞈ shaˍ tiꞈ te cawˇ ve le? (Yaˍkoˆ 1:26)

¹⁰ Chiˇ mvuh ve liꞈ kaˇ nanˉ uiˍ 15 hkʼaw ngaˬ hui htaꞈ te tcuh gaˇ ve awˬ ceuˬ lehˬ, awˬ nu ve chaw htaꞈ te piˇ ve awˬ lawn htaꞈ caˉ daꞈ ve yoˬ. Chiˇ mvuh ve liꞈ 15:3 hkʼaw kʼoˆ ve, Yaˬhoˉvaˬ ve aˉ hkʼaw lo ve hkehˉ chaw hpehꞈ ve lehˬ, ‘shu htaꞈ hkʼa mvuhˇ hkʼa na maˇ kʼoˆ puiˉ ve, shu htaꞈ maˇ yaꞈ puiˉ ve, leh shu ve awˬ lawn maˇ heˆ heˆ ve htaꞈ maˇ ca kʼoˆ puiˉ ve chaw hpehꞈ ve yoˬ.’ Ngaˬ hui shu htaꞈ hkʼa mvuhˇ hkʼa na kʼoˆ ve kʼo, yawˇ nyi ma naˬ jaˇ tuˬ te piˇ leh ngaˬ hui kaꞈ Yaˬhoˉvaˬ ve aˉ hkʼaw lo ve hkehˉ chaw caˉ leh maˇ hpehꞈ gʼa ve yoˬ.—Yaˍkoˆ 1:26 gʼaw sheˍ.

11. Awˬ nu ve chaw htaꞈ hkʼa mvuhˇ hkʼa na kʼoˆ ve hkʼaˬ hkʼe kʼoˆ gaˇ ve le? Leh awˬ nu ve chaw htaꞈ hkʼa mvuhˇ hkʼa na kʼoˆ leh venˇ baˆ maˇ dawˇ hpfuhˆ ve chaw htaꞈ hkʼaˬ hkʼe hpehꞈ la tuˬ ve le?

¹¹ Chi teˇ tawn hkʼaw hkʼa mvuhˇ hkʼa na kʼoˆ ve chaw htaꞈ Chiˇ mvuh ve liꞈ bvuhꞈ paˍ kʼoˆ taˍ ve yoˬ. Shu htaꞈ hkʼa mvuhˇ hkʼa na kʼoˆ ve hkʼaˬ hkʼe kʼoˆ gaˇ ve le? Awˬ nu ve teˇ gʼaˇ ve awˬ meh luˬ tuˬ heˍ ve htaꞈ kʼoˆ gaˇ ve yoˬ. Awˬ nu ve chaw htaꞈ hkʼa mvuhˇ hkʼa na kʼoˆ leh venˇ baˆ maˇ dawˇ hpfuhˆ ve kʼo, yawˇ Yaˬhoˉvaˬ ve Shaˉhkiˆhkanˍ ve chaw maˇ kʼawꞈ hpehꞈ gʼa.—Yeˍraˍmiˆ 17:10.

12-13. Ngaˬ hui maˇ dawˇ maˇ gaˇ ve hkʼaw awˬ viˉ awˬ nyi htaꞈ hkʼa mvuhˇ hkʼa na kʼoˆ la ve hkʼaˬ hkʼe ve awˬ lawn hpehꞈ ve le? (Awˬ han htaꞈ nyi sheˍ.)

¹² Chiˇ mvuh ve liꞈ 15:3 hkʼaw ngaˬ hui htaꞈ shaˍ tiꞈ peꞈ laˇ sheˍ ve, Yaˬhoˉvaˬ ve hkehˉ chaw hpehꞈ ve chaw lehˬ, awˬ chawˇ awˬ paˆ htaꞈ haiˬ ve maˇ te piˇ leh awˬ chawˇ htaꞈ hkʼa mvuhˇ hkʼa na maˇ kʼoˆ ve yoˬ. Chi hkʼaˬ hkʼe kʼoˆ gaˇ ve le?

¹³ Awˬ viˉ awˬ nyi ve maˇ heˆ heˆ ve awˬ lawn ngaˬ hui  maˇ dawˇ maˇ gaˇ ve hkʼaw awˬ nu ve chaw htaꞈ kʼoˆ piˇ la ve yoˬ hehˉ. Tawˇ pa haˉ te kʼo, (1) awˬ viˉ awˬ nyi yaˇ miˇ teˇ gʼaˇ hkʼaˬ htaˆ kaꞈ tcuh peu ve gʼuˇ suhˍ peuˍ ve maˇ kʼawꞈ gʼa te˗o ve, (2) awˬ viˉ awˬ nyi teˇ ca Beˍteˍlaˆ hkʼaw kanˉ maˇ kʼawꞈ gʼa te˗o ve, maˇ heˆ leh (3) awˬ viˉ awˬ nyi hawˉ hkʼaˆ teˇ gʼaˇ nyi haꞈ shaˉ paˍ maˇ heˆ leh ga piˇ shehˍ hpaˇ maˇ kʼawꞈ gʼa te˗o ve yoˬ. Awˬ viˉ awˬ nyi teˇ ceuˬ ceuˬ te yaꞈ leh yawˇ hui Gʼuiˬ sha ve kanˉ maˇ kʼawꞈ gʼa te˗o ve tehꞈ ngaˬ hui hkʼaˇ ngaˬ hui dawˇ ve lehˬ maˇ cawˇ ve awˬ lawn hpehꞈ ve yoˬ. Ngaˬ hui hkʼaˇ ngaˬ hui dawˇ ve awˬ lawn kaꞈ awˬ nu ve chaw htaꞈ ca kʼoˆ piˇ ve lehˬ maˇ cawˇ ve yoˬ. Awˬ viˉ awˬ nyi chi ve teˇ hpaˍ yawˇ hui Gʼuiˬ sha ve kanˉ te ve, aˬ htoꞈ ma te gʼa pa cawˇ ve ngaˬ hui maˇ shiˍ ve laiˉ ceuˬ cawˬ ve yoˬ. Hkʼaˬ hkʼe hpehꞈ ve htawˇ maˇ kʼoˆ, Yaˬhoˉvaˬ ve aˉ hkʼaw lo hkehˉ chaw hpehꞈ ve lehˬ, “shu htaꞈ maˇ yaꞈ puiˉ ve chaw shu awˬ lawn maˇ heˆ heˆ ve htaꞈ maˇ ca kʼoˆ puiˉ ve chaw hpehꞈ ve yoˬ.”

YAˬHOˉVAˬ VE TAWˇ HKAWˇ HTAꞈ NA YUˬ PUIˉ VE CHAW HTAꞈ TAˬ UIˍ TAˍ MVUH PIˇ VE

14. “Gʼuiˬ sha chiˇ baˬ taˍ ve chaw hui htaꞈ awˬ chawˇ maˇ te ve” hkʼaˬ hkʼe kʼoˆ gaˇ ve le?

¹⁴ Chiˇ mvuh ve liꞈ 15:4 hkʼaw kʼoˆ ve, Yaˬhoˉvaˬ ve hkehˉ chaw lehˬ ‘yawˇ chiˇ baˬ taˍ ve chaw hui htaꞈ awˬ chawˇ maˇ te ve yoˬ.’ Hkʼe kʼo, Gʼuiˬ sha chiˇ baˬ taˍ ve a shu hpehꞈ ve tehꞈ ngaˬ hui hkʼaˬ hkʼe te shiˍ gʼa tuˬ le? Yawˇ Yaˬhoˉvaˬ ve kanˉ te chehˇ ve tehꞈ dawˇ ve htawˇ, a shu Gʼuiˬ sha chiˇ baˬ taˍ ve chaw hpehꞈ ve ngaˬ hui kʼoˆ maˇ gʼa. Aˬ htoꞈ ma pa taw le? Awˬ lawn kʼo, ngaˬ hui maˇ biˇ ve chaw hpehꞈ ve yoˬ. Hkʼe te lehˬ, ngaˬ hui tawˇ yaw daꞈ sha ve chaw geh chehˇ gaˇ ve yoˬ. Ngaˬ hui maˇ dawˇ cawˇ ve awˬ ceuˬ te laˇ ve chaw htaꞈ nyi bawˬ ve yoˬ. Yaꞈ hkʼaˇ, ‘yawˇ chiˇ baˬ taˍ ve chaw hui htaꞈ’ Yaˬhoˉvaˬ kʼoˆ ve chaw tiˉ ngaˬ hui awˬ chawˇ maˇ te ve yoˬ. (1 Kawˇrenˍhtuˆ 5:11) Yaˬhoˉvaˬ chiˇ baˬ taˍ ve chaw lehˬ, ngaˬ hui ve yonˍ hkʼaˇ htaꞈ maˇ yawˆ yan ve chaw, maˇ heˆ leh ngaˬ hui Yaˬhoˉvaˬ geh maˇ meuˆ daꞈ tuˬ coˇ caˇ leh te laˇ ve chaw, haiˬ ve awˬ ceuˬ htaꞈ te leh venˇ baˆ maˇ dawˇ hpfuhˆ ve chaw hpehꞈ ve yoˬ.—Tawˇ naˉ ve 13:20.

15. “Gʼuiˬ sha ve tawˇ hkawˇ htaꞈ na yuˬ puiˉ ve chaw htaꞈ” ngaˬ hui yawˆ yan tuˬ awˬ hkʼaˇ teˇ hkʼaˇ lehˬ aˬ htoꞈ ma le?

¹⁵ Chiˇ mvuh ve liꞈ 15:4 hkʼaw ngaˬ hui htaꞈ kʼoˆ laˇ ve, ‘Gʼuiˬ sha ve tawˇ hkawˇ htaꞈ na yuˬ puiˉ ve chaw hui htaꞈ taˍ uiˍ taˍ mvuh piˇ˗oˆ.’ Ngaˬ hui chi hkʼe te gʼa tuˬ, Yaˬhoˉvaˬ ve awˬ chawˇ htaꞈ daꞈ ve awˬ ceuˬ te piˇ leh yawˆ yan ve tehꞈ gʼa hpeuꞈ maw piˇ ve yoˬ. (Roˉmaꞈ 12:10) Ngaˬ hui chi hkʼe te gʼa ve teˇ hkʼaˇ lehˬ, Chiˇ mvuh ve liꞈ 15:4 hkʼaw cawˬ ve yoˬ. Choˬ kaˬ lo kʼoˆ ve, Yaˬhoˉvaˬ ve aˉ hkʼaw lo ve hkehˉ chaw lehˬ, “hkʼaˬ ma haˍ ve htawˇ, yawˇ kʼoˆ taˍ ve hkʼe te ve chaw hpehꞈ ve yoˬ.” Ngaˬ hui ka tiꞈ te taˍ ve htaꞈ maˇ gʼaꞈ te ve kʼo, awˬ nu ve chaw nyi ma luˬ jaˇ tuˬ yoˬ. (Maꞈhtehˍ 5:37) Tawˇ pa haˉ te kʼo, Yaˬhoˉvaˬ lehˬ awˬ hpawˇ awˬ miˇ ma yawˇ hui heuˆ daꞈ htaˇ, ka tiꞈ te taˍ ve htaꞈ gʼaꞈ te tuˬ dawˇ law taˍ ve yoˬ. Chi hkʼoˆ kaꞈ, awˬ pa awˬ e yaˇ geh ka tiꞈ te taˍ ve hkʼe gʼaꞈ te ve kʼo, Yaˬhoˉvaˬ ha lehˬ jaˇ ve yoˬ. Ngaˬ hui Yaˬhoˉvaˬ leh awˬ nu ve chaw htaꞈ haꞈ ve pa taw, ka tiꞈ te taˍ ve htaꞈ haꞈ shaˉ tuˬ coˇ caˇ ve yoˬ.

16. Ngaˬ hui Yaˬhoˉvaˬ ve awˬ chawˇ htaꞈ yawˆ yan piˇ tuˬ awˬ hkʼaˇ teˇ hkʼaˇ lehˬ aˬ htoꞈ ma le?

¹⁶ Ngaˬ hui Yaˬhoˉvaˬ ve awˬ chawˇ htaꞈ yawˆ yan tuˬ awˬ hkʼaˇ teˇ hkʼaˇ lehˬ, hkehˉ chaw htaꞈ haꞈ yuˬ leh piˇ gaˇ puiˉ ve nyi ma cawˬ ve yoˬ. (Roˉmaꞈ 12:13) Ngaˬ hui awˬ viˉ awˬ nyi geh awˬ chawˇ te htaˇ, ngaˬ hui hkʼa dehꞈ meuˆ daꞈ leh Yaˬhoˉvaˬ geh kaꞈ meuˆ daꞈ tuˬ yoˬ. A yeˇ uiˍ jaˇ ve lehˬ, ngaˬ hui hkehˉ chaw htaꞈ haꞈ yuˬ piˇ ve kʼo, Yaˬhoˉvaˬ htaꞈ henˇ yuˬ chehˇ ve yoˬ.

HPU HTAꞈ MAˇ HAꞈ VE CHAW HPEHꞈ VE

17. Aˬ htoꞈ ma te Chiˇ mvuh ve liꞈ kaˇ nanˉ uiˍ 15 hkʼaw hpu ve awˬ lawn kʼoˆ taˍ ve le?

¹⁷ Chi hkʼoˆ kaꞈ, Yaˬhoˉvaˬ ve hkehˉ chaw lehˬ, ‘shu htaꞈ chiˇ piˇ ngaˍ piˇ htaˇ, awˬ yawˬ maˇ yuˬ caˇ puiˉ ve, shaˉ hkiˆ hkanˍ piˇ htaˇ laꞈ shawnˍ maˇ yuˬ caˉ puiˉ ve chaw hpehꞈ ve yoˬ.’ (Chiˇ mvuh ve 15:5) Chiˇ mvuh ve liꞈ kaˇ nanˉ uiˍ 15 maˇ zuhˬ ve teˇ puꞈ hpehꞈ ve htawˇ, aˬ htoꞈ ma te hpu awˬ lawn htaꞈ kʼoˆ taˍ ve le? Awˬ lawn kʼo, ngaˬ hui hpu htaꞈ haꞈ ve kʼo, ngaˬ hui shu nyi ma luˬ tuˬ te piˇ la leh Yaˬhoˉvaˬ geh meuˆ daꞈ ve kaꞈ te luˬ laˇ gʼa ve yoˬ. (1 Tiˆmoˉseˍ 6:10) Liꞈ hpu ve awˬ co˗e htaˇ, chaw teˇ hpaˍ haˍ ve gʼawˇ ve chaw htaꞈ hpu chiˇ piˇ ngaˍ piˇ htaˇ awˬ yawˬ yuˬ caˇ ve yoˬ. Chi hkʼoˆ kaꞈ, suhˉ jehˬ paˍ teˇ hpaˍ laꞈ shawnˍ yuˬ caˇ˗oˬ ve htawˇ, hteˇ ve cawˇ ve chaw htaꞈ suhˉ jehˬ ve maˇ hteˇ maˇ cawˇ te piˇ ve yoˬ. Chi hkʼe ve te hkʼaˇ htaꞈ Yaˬhoˉvaˬ maˇ dawˇ cawˇ.—Yeˍsaˍkeˍlaˆ 22:12.

18. Hpu ve awˬ lawn htaꞈ ngaˬ hui hkʼaˬ hkʼe dawˇ ve a shu yawˇ awˬ to htaꞈ chaˬ nyi tuˬ na hkawˇ hkʼaˬ hkʼe ve ga laˇ ve le? (Heˍbrehˇ 13:5)

 ¹⁸ Hpu ve awˬ lawn ngaˬ hui hkʼaˬ hkʼe dawˇ ve a shu yawˇ awˬ to htaꞈ chaˬ nyi ve kʼo, daꞈ ve yoˬ. A shu yawˇ awˬ to htaꞈ na nyi cawˇ ve, ‘ngaˬ hpu ve awˬ lawn tiˉ dawˇ nyi leh mawˇ vuiˬ gaˇ ve awˬ ceuˬ htaꞈ ceh tiˉ a yeˇ yuˬ ve laˇ? Ngaˬ shu geh hpu chiˇ ve kʼo haˆ maˇ hkʼawꞈ piˇ ve, maˇ heˆ leh chaw oˇ ve teˇ gʼaˇ hpu maˇ yehˇ loˍ ve tehꞈ ngaˬ dawˇ˗aw laˇ? Hpu cawˬ ve ngaˬ a yeˇ uiˍ ve chaw hpehꞈ tuˬ te laˇ leh, ngaˬ tuˬ jaˇ ve chaw hpehꞈ tuˬ kaꞈ te laˇ˗aw laˇ? Hpu cawˬ ve chaw lehˬ mawˇ jehˬ htaꞈ sheˉ lai puiˉ jaˇ ve tehꞈ ngaˬ dawˇ tuˬ te laˇ˗aw laˇ? Ngaˬ paw sha ve chaw geh awˬ chawˇ te leh haˍ gʼawˇ ve chaw htaꞈ a yeˇ maˇ yuˬ tuˬ te laˇ˗aw laˇ?’ Chi ve teˇ hpaˍ a shu yawˇ awˬ to htaꞈ na nyi ve a yeˇ uiˍ jaˇ. Awˬ lawn kʼo, ngaˬ hui Yaˬhoˉvaˬ ve hkehˉ chaw hpehꞈ tuˬ jehˬ laˇ˗oˬ ve yoˬ. Ngaˬ hui hpu htaꞈ haꞈ ve chaw maˇ gʼa hpehꞈ tuˬ coˇ caˇ ve yoˬ. Ngaˬ hui chi hkʼe te ve kʼo, Yaˬhoˉvaˬ ngaˬ hui htaꞈ maˇ chiˇ baˬ laˇ taˬ.—Heˍbrehˇ 13:5 gʼaw sheˍ.

YAˬHOˉVAˬ YAWˇ VE AWˬ CHAWˇ HTAꞈ HAꞈ VE

19. Chiˇ mvuh ve liꞈ kaˇ nanˉ uiˍ 15 hkʼaw kʼoˆ taˍ ve teˇ ceuˬ le le Yaˬhoˉvaˬ ngaˬ hui htaꞈ aˬ htoꞈ ma te tcuh gaˇ ve le?

¹⁹ Chiˇ mvuh ve liꞈ kaˇ nanˉ uiˍ 15 awˬ leh meuˇ teˇ tawn ka tiꞈ te taˍ laˇ ve hkʼaw kʼoˆ ve, “chi hkʼe ve chaw teˇ gʼaˇ lehˬ, gawˬ lehˍ gʼa chehˇ tuˬ yoˬ.” (Chiˇ mvuh ve 15:5) Aˬ htoꞈ ma te Chiˇ mvuh ve liꞈ chi teˇ puꞈ hkʼaw bvuhꞈ taˍ ve Yaˬhoˉvaˬ ngaˬ hui htaꞈ te tcuh gaˇ ve teˇ ceuˬ le le, chi ve teˇ tawn hkʼaw Chiˇ mvuh ve liꞈ bvuhꞈ paˍ ngaˬ hui na gʼa tuˬ ga laˇ ve yoˬ. Awˬ lawn kʼo, chi ve lehˬ Yaˬhoˉvaˬ ngaˬ hui htaꞈ ha lehˬ ve cawˬ tcuh gaˇ ve yoˬ. Hkʼe te lehˬ, yawˇ ngaˬ hui htaꞈ laiˉ ceuˬ beˆ maˍ laˇ ve yoˬ. Chi ve lehˬ yawˇ ngaˬ hui htaꞈ awˬ bon naꞈ laˇ leh haꞈ shaˉ laˇ ve yoˬ.—Iˉsaˍyaˆ 48:17.

20. Yaˬhoˉvaˬ ve hkehˉ chaw aˬ htoꞈ ma ve awˬ lawn htaꞈ yonˍ gʼa ve le?

²⁰ Yaˬhoˉvaˬ ve hkehˉ chaw lehˬ, awˬ gʼuˇ suhˍ hpawˇ daꞈ ve laiˉ ceuˬ gʼa tuˬ yoˬ tehꞈ yonˍ gʼa ve yoˬ. Leuˆ yuˬ taˍ ve chaw ka tiꞈ yeˬ ve htaꞈ Yeˍsuˆ mvuhˇ naw ma hkʼoˆ lo chehˇ kuiˬ ‘maˇ maˇ’ gu teh taˍ piˇ ve yoˬ. (Yoˇhanˬ 14:2) Miˬ guiˬ hkʼoˆ lo dawˇ law kuiˬ cawˬ ve chaw kaꞈ Hpeuꞈ maˍ ve liꞈ 21:3 hkʼaw ve ka tiꞈ tawˇ hkawˇ awˬ tehˬ hpehꞈ la tuˬ yoˬ tehꞈ yonˍ gʼa ve yoˬ. Yaˬhoˉvaˬ ngaˬ hui yawˇ ve awˬ chawˇ hpehꞈ tuˬ jehˬ laˇ ve, leh yawˇ ve aˉ hkʼaw lo ve hkehˉ chaw hkʼaˬ htaˆ kaꞈ hpehꞈ tuˬ jehˬ laˇ ve, chi ve ngaˬ hui teˇ gʼaˇ le le kaꞈ ha lehˬ jaˇ ve yoˬ.