1. Yaˬhoˉvaˬ ve chaw shoꞈ shaꞈ ve laiˉ ceuˬ gʼa hpuˇ ve htawˇ, caˉ leh yawˇ htaꞈ oˉ kʼoˍ pui gʼa tuˬ aˬ htoꞈ ma ga piˇ ve le?

 Liꞈ hpu hkʼaw ngaˬ hui htaꞈ kʼoˆ laˇ ve, ngaˬ hui chehˇ ve awˬ yanˇ lehˬ “haˍ jaˇ ve awˬ yanˇ gaˬ la tuˬ yoˬ.” (2 Tiˆmoˉseˍ 3:1) Miˬ guiˬ hkʼoˆ lo teˇ gʼaˇ le le shoꞈ shaꞈ ve gʼa hpuˇ chehˇ ve awˬ hkʼoˆ kaꞈ, Yaˬhoˉvaˬ ve chaw lehˬ tawˍ ve tsuhˇ ve leh fawˉ ve mehˍ ve kaꞈ gʼa hpuˇ ve yoˬ. Ngaˬ hui shoꞈ shaꞈ ve gʼa hpuˇ jaˇ ve htawˇ, ngaˬ hui caˉ leh Yaˬhoˉvaˬ htaꞈ oˉ kʼoˍ pui gʼa tuˬ, aˬ htoꞈ ma ga laˇ gʼa ve le? Ngaˬ hui htaꞈ ga laˇ gʼa ve awˬ ceuˬ lehˬ, Yaˬhoˉvaˬ “Gʼuiˬ sha lehˬ teꞈ chehˇ ve” yoˬ tehꞈ ngaˬ hui shiˍ ve yoˬ.—Yeˍraˍmiˆ 10:10; 2 Tiˆmoˉseˍ 1:12.

2. Yaˬhoˉvaˬ htaꞈ caˉ daꞈ ve ngaˬ hui aˬ htoꞈ ma shiˍ ve le? Leh awˬ lawn chi ngaˬ hui htaꞈ hkʼaˬ hkʼe ga laˇ ve le?

² Yaˬhoˉvaˬ lehˬ teꞈ chehˇ ve Gʼuiˬ sha hpehꞈ ve yoˬ. Yawˇ ngaˬ hui shoꞈ shaꞈ ve gʼa hpuˇ chehˇ ve teˇ ceuˬ le le htaꞈ mawˬ leh ga laˇ gaˇ jaˇ ve yoˬ. (2 Raˍsaˍvanˍ 16:9; Chiˇ mvuh ve 23:4) Chi htaꞈ tawnˇ taˍ ve lehˬ, ngaˬ hui yeunˇ hkanˍ gʼaˇ tuˬ ga laˇ leh shoꞈ shaꞈ ve laiˉ ceuˬ htaꞈ tawˍ daꞈ gʼaˇ tuˬ kaꞈ awˬ gʼaˇ cawˬ ve yoˬ. Awˬ lawn chi jawˇ mawˇ Daˍviˆ hkʼaˬ hkʼe gʼa hpuˇ ve htaꞈ teˇ geh nyi sheˍ.

3. Daˍviˆ kʼoˆ ve, ‘Yaˬhoˉvaˬ lehˬ teꞈ chehˇ ve’ Gʼuiˬ sha hpehꞈ ve lehˬ chi yawˇ hkʼaˬ hkʼe kʼoˆ gaˇ ve le?

³ Daˍviˆ lehˬ Yaˬhoˉvaˬ htaꞈ hkʼa dehꞈ shiˍ daꞈ leh yawˇ htaꞈ gʼaˇ va ve yoˬ. Jawˇ mawˇ Sawˉluꞈ leh awˬ nu ve canˇ paˍ teˇ hpaˍ Daˍviˆ htaꞈ tiˇ pehˍ tuˬ gʼaꞈ yuˬ chehˇ htaˇ, Daˍviˆ Yaˬhoˉvaˬ ga laˇ tuˬ bon lawˬ ve yoˬ. (Chiˇ mvuh ve 18:6) Yaˬhoˉvaˬ Daˍviˆ ve bon lawˬ hkawˇ htaꞈ hkʼawꞈ piˇ leh ga piˇ peuˬ hkʼawꞈ nawˉ, Daˍviˆ kʼoˆ ve ‘Yaˬhoˉvaˬ lehˬ teꞈ chehˇ ve yoˬ.’ (Chiˇ mvuh ve 18:46) Chi Daˍviˆ hkʼaˬ hkʼe kʼoˆ gaˇ ve le? Tawˇ hkawˇ chi ve lehˬ, Gʼuiˬ sha lehˬ teꞈ chehˇ ve ceh tiˉ Daˍviˆ kʼoˆ gaˇ ve maˇ heˆ tehꞈ hpeuꞈ maw laˇ ve yoˬ. Liꞈ kʼoˆ teˇ kʼoˆ hkʼaw kʼoˆ maˍ laˇ ve, “Yaˬhoˉvaˬ lehˬ teꞈ chehˇ ve Gʼuiˬ sha hpehꞈ leh yawˇ ve chaw htaꞈ hkʼaˬ htaˆ kaꞈ ga piˇ chehˇ ve tehꞈ Daˍviˆ yonˍ gʼa ve yoˬ.” Daˍviˆ gʼa hpuˇ chehˇ ve htaꞈ Yaˬhoˉvaˬ mawˬ ve tehꞈ shiˍ leh ga laˇ gaˇ jaˇ ve tehꞈ kaꞈ shiˍ ve yoˬ. Chi  Daˍviˆ Yaˬhoˉvaˬ ve kanˉ te tuˬ awˬ gʼaˇ gʼa leh yawˇ htaꞈ caˉ leh chiˇ mvuh gaˇ tuˬ kaꞈ te piˇ ve yoˬ.—Chiˇ mvuh ve 18:28, 29, 49.

4. Yaˬhoˉvaˬ lehˬ teꞈ chehˇ ve Gʼuiˬ sha hpehꞈ ve tehꞈ ngaˬ hui yonˍ gʼa ve lehˬ aˬ htoꞈ ma awˬ bon gʼa ve le?

⁴ Yaˬhoˉvaˬ lehˬ teꞈ chehˇ ve Gʼuiˬ sha hpehꞈ leh, ngaˬ hui yawˇ ve kanˉ nyi ma pfuhˇ ve hkʼaw te tuˬ ga laˇ gʼa ve tehꞈ yonˍ gʼa ve yoˬ. Ngaˬ hui shoꞈ shaꞈ ve teˇ hpaˍ htaꞈ yeunˇ hkanˍ gʼaˇ tuˬ, Yaˬhoˉvaˬ ve kanˉ kaiˬ ve hkʼaw te gʼa tuˬ, yawˇ geh hkʼa dehꞈ meuˆ daꞈ tuˬ dawˇ teh taˍ gʼa sheˍ ve, chi ve teˇ hpaˍ te gʼa tuˬ yawˇ ga laˇ gʼa ve tehꞈ yonˍ gʼa ve yoˬ.

TEꞈ CHEHˇ VE GʼUIˬ SHA LEHˬ NAWˬ HTAꞈ AWˬ GʼAˇ PEꞈ LAˇ TUˬ YOˬ

5. Ngaˬ hui shoꞈ shaꞈ ve gʼa hpuˇ htaˇ, maˇ kawˆ tuˬ aˬ htoꞈ ma ga laˇ gʼa ve le? (Hpiˇliˇpiˆ 4:13)

⁵ Yaˬhoˉvaˬ lehˬ teꞈ chehˇ ve Gʼuiˬ sha hpehꞈ leh ngaˬ hui htaꞈ ga laˇ gaˇ jaˇ ve tehꞈ tawnˇ taˍ ve kʼo, ngaˬ hui shoꞈ shaꞈ ve teˇ ceuˬ le le htaꞈ yeunˇ hkanˍ gʼaˇ tuˬ yawˇ ga laˇ gʼa ve yoˬ. Awˬ lawn kʼo, teˇ ceuˬ le le yawˇ te maˇ gʼa ve maˇ cawˬ. Yaˬhoˉvaˬ lehˬ kanˇ paˆ uiˍ jaˇ mvuh jaˇ ve Gʼuiˬ sha hpehꞈ leh ngaˬ hui yeunˇ hkanˍ gʼaˇ tuˬ yawˇ awˬ gʼaˇ peꞈ laˇ gʼa ve yoˬ. (Hpiˇliˇpiˆ 4:13 gʼaw sheˍ.) Chi ngaˬ hui shoꞈ shaꞈ ve gʼa hpuˇ htaˇ, maˇ kawˆ tuˬ leh yeunˇ hkanˍ gʼaˇ tuˬ, Yaˬhoˉvaˬ ga laˇ gʼa ve tehꞈ hkʼa tawˍ lehˆ gʼa mawˬ ve yoˬ. Ngaˬ hui shoꞈ shaꞈ ve gʼa hpuˇ jaˇ ve htaꞈ yawˇ ga laˇ gʼa ve tehꞈ yonˍ gʼa ve yoˬ.

6. Daˍviˆ yaˇ nehˬ htaˇ, yawˇ Yaˬhoˉvaˬ htaꞈ hkʼa dehꞈ yonˍ gʼa tuˬ aˬ htoꞈ ma awˬ lawn gʼa hpuˇ ve le?

⁶ Daˍviˆ Yaˬhoˉvaˬ htaꞈ hkʼa dehꞈ yonˍ gʼa ve 2 lawn htaꞈ teˇ geh nyi sheˍ. Awˉ lawˉ teˇ lawn lehˬ, Daˍviˆ yaˇ nehˬ hpehꞈ leh awˬ pa ve yawˬ hawˉ chehˇ htaˇ, laˇ caˬ shiˉ maˇ heˆ leh yehˬ miˉ tawˍ yawˬ htaꞈ ca cheꞈ la ve teˇ yanˇ, Daˍviˆ haꞈ hanˉ ve hkʼaw gʼaꞈ yuˬ kʼai leh yawˬ htaꞈ ga piˇ gʼa ve yoˬ. Chi hkʼe te gʼa ve lehˬ, Daˍviˆ yawˇ cheuˬ ve tehꞈ maˇ dawˇ. Yaꞈ hkʼaˇ, Yaˬhoˉvaˬ yawˇ htaꞈ awˬ gʼaˇ peꞈ laˇ ve tehꞈ yawˇ shiˍ ve yoˬ. (1 Saˍmo˗eˍlaˆ 17:34-37) Awˬ lawn chi htaꞈ Daˍviˆ maˇ leunˇ gʼa ve pa taw, yawˇ hkʼa dehꞈ dawˇ nyi ve lehˬ Yaˬhoˉvaˬ teꞈ chehˇ ve Gʼuiˬ sha awˬ gʼuˇ suhˍ hpawˇ Daˍviˆ htaꞈ awˬ gʼaˇ peꞈ laˇ gʼa ve tehꞈ yonˍ ve yoˬ.

7. Daˍviˆ hkʼaˬ hkʼe dawˇ ve le? Leh awˬ lawn chi yawˇ Gawˇliˇyaꞈ htaꞈ bawˆ daꞈ˗e htaˇ hkʼaˬ hkʼe ga piˇ ve le?

⁷ 2 lawn teˇ lawn lehˬ, oˇ hkʼe ve gʼa hpuˇ peuˬ hkʼawꞈ nawˉ Daˍviˆ yaˇ nehˬ hpehꞈ leh 20 hkʼawꞈ maˇ gaˬ sheˍ htaˇ, yawˇ Iˉsaˍreˍlaˆ chaw ve maꞈ yaˇ chehˇ taˍ kuiˬ lo kʼai ve yoˬ. Hpiˇliˇtiˆ chaw maꞈ poˍ lonˉ Gawˇliˇyaꞈ “Iˉsaˍreˍlaˆ chaw hui htaꞈ kuˬ chehˇ ve” pa taw, yawˇ hui kawˆ jaˇ ve htaꞈ Daˍviˆ gʼa mawˬ ve yoˬ. (1 Saˍmo˗eˍlaˆ 17:10, 11) Iˉsaˍreˍlaˆ chaw lehˬ Gawˇliˇyaꞈ uiˍ jaˇ mvuh jaˇ leh kʼoˆ guiˇ gʼuiˬ guiˇ laˇ ve tawˇ htaꞈ dawˇ nyi ve pa taw, yawˇ hui kawˆ jaˇ ve yoˬ. (1 Saˍmo˗eˍlaˆ 17:24, 25) Yaꞈ hkʼaˇ, Daˍviˆ yawˇ hui htaꞈ maˇ shuˍ. Gawˇliˇyaꞈ Iˉsaˍreˍlaˆ chaw hui htaꞈ kuˬ leh deˇ chehˇ ve lehˬ, “Gʼuiˬ sha ve maꞈ moˍ htaꞈ maˇ shawˍ maˇ caˆ kʼoˆ chehˇ ve” hkʼe hpehꞈ ve tehꞈ Daˍviˆ gʼa mawˬ ve yoˬ. (1 Saˍmo˗eˍlaˆ 17:26) Daˍviˆ hkʼaˬ htaˆ kaꞈ Yaˬhoˉvaˬ htaꞈ dawˇ nyi ve yoˬ. Leh Daˍviˆ yawˇ awˬ pa ve yawˬ hawˉ chehˇ htaˇ Gʼuiˬ sha ga laˇ ve pa taw, chi teˇ pawˆ kaꞈ Gʼuiˬ sha ga laˇ tuˬ yoˬ tehꞈ yawˇ yonˍ gʼa ve yoˬ. Hkʼe te leh, yawˇ Gawˇliˇyaꞈ htaꞈ bawˆ daꞈ leh gʼaˇ ve yoˬ.—1 Saˍmo˗eˍlaˆ 17:45-51.

8. Ngaˬ hui shoꞈ shaꞈ ve gʼa hpuˇ htaˇ, hkʼaˬ hkʼe te Yaˬhoˉvaˬ htaꞈ hkʼa dehꞈ yonˍ gʼa ve le? (Awˬ han htaꞈ nyi sheˍ.)

⁸ Teꞈ chehˇ ve Gʼuiˬ sha lehˬ ngaˬ hui htaꞈ ga laˇ gaˇ jaˇ ve tehꞈ tawnˇ taˍ ve kʼo, ngaˬ hui kaꞈ shoꞈ shaꞈ ve htaꞈ yeunˇ hkanˍ gʼaˇ tuˬ yoˬ. (Chiˇ mvuh ve 118:6) Peuˬ laˬ htaˇ Yaˬhoˉvaˬ hkʼaˬ hkʼe te jaw ve awˬ ceuˬ htaꞈ ngaˬ hui dawˇ nyi ve lehˬ, ngaˬ hui yawˇ htaꞈ hkʼa dehꞈ yonˍ gʼa tuˬ te laˇ ve yoˬ. Ngaˬ hui te gʼa ve teˇ hkʼaˇ lehˬ, Yaˬhoˉvaˬ oˇ htaˇ teˇ co˗e yawˇ ve kanˉ te ve chaw htaꞈ hkʼaˬ hkʼe ga piˇ jaw ve awˬ lawn Liꞈ hpu hkʼaw gʼaw nyi gʼa ve yoˬ. (Iˉsaˍyaˆ 37:17, 33-37) Ngaˬ hui te gʼa ve awˬ nu ve teˇ hkʼaˇ lehˬ, chi beuꞈ teˇ co˗e ve awˬ viˉ awˬ nyi htaꞈ Yaˬhoˉvaˬ hkʼaˬ hkʼe ga piˇ ve ngaˬ hui mawˬ tuˬ, vehˆsaiˉ jw.org hkʼaw nyi gʼa ve yoˬ. Chi hkʼoˆ kaꞈ, Yaˬhoˉvaˬ nawˬ htaꞈ hkʼaˬ hkʼe ga laˇ jaw ve kaꞈ dawˇ nyi sheˍ. Nawˬ gʼa hpuˇ jaw ve awˬ lawn Daˍviˆ laˇ caˬ shiˉ leh yehˬ miˉ tawˍ htaꞈ behˇ daꞈ ve hkʼa shuˍ maˇ gʼa hpuˇ ve htawˇ, teꞈ chiˉ maˇ heˆ. Awˬ lawn kʼo, peuˬ laˬ htaˇ Yaˬhoˉvaˬ nawˬ htaꞈ laiˉ ceuˬ ga laˇ jaw˗oˬ ve yoˬ. Tawˇ pa haˉ te kʼo, nawˬ Yaˬhoˉvaˬ geh jiˆ laˬ leh meuˆ daꞈ tuˬ yawˇ ga laˇ jaw˗oˬ ve yoˬ.  (Yoˇhanˬ 6:44) Chi teˇ hkui hkʼa gaˬ nawˬ awˬ tehˬ ve hkʼaw chehˇ gʼa ve lehˬ Yaˬhoˉvaˬ ga laˇ ve pa taw yoˬ. Chi htaꞈ pa taw, Yaˬhoˉvaˬ nawˬ ve bon lawˬ hkawˇ htaꞈ hkʼawꞈ laˇ ve awˬ lawn htaꞈ dawˇ nyi sheˍ. Nawˬ htaꞈ ga laˇ tuˬ loˍ htaˇ yawˇ ga laˇ ve htaꞈ dawˇ nyi ve, maˇ heˆ leh nawˬ tuꞈ ve hkanˍ ve gʼa hpuˇ htaˇ, yawˇ ga laˇ ve htaꞈ kaꞈ dawˇ nyi sheˍ. Awˬ lawn chi ve teˇ hpaˍ htaꞈ dawˇ nyi ve kʼo, Yaˬhoˉvaˬ caˉ leh nawˬ htaꞈ ga laˇ tuˬ yoˬ tehꞈ yonˍ gʼa ve yoˬ.

9. Ngaˬ hui gʼa hpuˇ chehˇ ve shoꞈ shaꞈ ve awˬ lawn htaꞈ hkʼaˬ hkʼe dawˇ nyi cawˇ ve le? (Tawˇ naˉ ve 27:11)

⁹ Yaˬhoˉvaˬ teꞈ chehˇ ve Gʼuiˬ sha hpehꞈ ve tehꞈ hkʼaˬ htaˆ kaꞈ dawˇ nyi ve lehˬ, ngaˬ hui shoꞈ shaꞈ ve gʼa hpuˇ htaˇ cawˇ ve dawˇ hkʼaˇ cawˬ tuˬ te laˇ ve yoˬ. Chi ve ngaˬ hui cawˇ ve dawˇ hkʼaˇ cawˬ tuˬ hkʼaˬ hkʼe ga laˇ gʼa ve le? Ngaˬ hui shoꞈ shaꞈ ve gʼa hpuˇ jaˇ htaˇ, ngaˬ hui Yaˬhoˉvaˬ htaꞈ baˬ taˉ tuˬ yoˬ tehꞈ Saˍtanˍ kʼoˆ ve htaꞈ ngaˬ hui maˇ leunˇ tuˬ cawˇ ve dawˇ hkʼaˇ cawˬ ve, ngaˬ hui htaꞈ ga laˇ gʼa ve yoˬ. Chi htaꞈ pa taw, ngaˬ hui shoꞈ shaꞈ ve gʼa hpuˇ htaˇ, Yaˬhoˉvaˬ htaꞈ heuˆ la kuiˬ cawˬ la ve yoˬ. (Yawˇbaˆ 1:10, 11; Tawˇ naˉ ve 27:11 gʼaw sheˍ.) Ngaˬ hui shoꞈ shaꞈ ve gʼa hpuˇ ve htawˇ Yaˬhoˉvaˬ htaꞈ ka tiꞈ yeˬ ve kʼo, ngaˬ hui Yaˬhoˉvaˬ htaꞈ haꞈ leh Saˍtanˍ heˍ ve tehꞈ hpeuꞈ maw piˇ ve yoˬ. Chi teˇ hkui nawˬ shoꞈ shaꞈ ve teˇ ceuˬ ceuˬ gʼa hpuˇ chehˇ ve yoˬ hehˉ. Tawˇ pa haˉ te kʼo, mvuhˇ miˬ uˉ peunˍ paˍ tawˍ laˇ ve, kanˉ maˇ gʼa te ve, maˇ heˆ leh nawˬ hto toˇ kuiˬ awˬ ti lo daꞈ ve awˬ lawn sha tanˇ htaꞈ maˇ na laˇ ve, chi ve teˇ hpaˍ gʼa hpuˇ chehˇ˗aw laˇ? Chi hkʼe gʼa hpuˇ chehˇ ve kʼo, awˬ ceuˬ chi ve teˇ hpaˍ nawˬ Yaˬhoˉvaˬ ha lehˬ tuˬ te piˇ gʼa ve tehꞈ tawnˇ taˍ sheˍ. Yaˬhoˉvaˬ lehˬ nawˬ beˬ ve lawˇ ve hkanˍ maˇ gʼaˇ lawꞈ lawꞈ ve maˇ hpuˇ tcuh laˇ taˬ tehꞈ tawnˇ taˍ sheˍ. (1 Kawˇrenˍhtuˆ 10:13) Yaˬhoˉvaˬ lehˬ nawˬ yeunˇ hkanˍ gʼaˇ tuˬ awˬ gʼaˇ peꞈ laˇ tuˬ yoˬ.

TEꞈ CHEHˇ VE GʼUIˬ SHA LEHˬ NAWˬ HTAꞈ LAꞈ SHAWNˍ PEꞈ LAˇ TUˬ YOˬ

10. Teꞈ chehˇ ve Gʼuiˬ sha lehˬ yawˇ htaꞈ oˉ kʼoˍ pui ve chaw hui htaꞈ aˬ htoꞈ ma piˇ tuˬ le?

¹⁰ Yaˬhoˉvaˬ lehˬ yawˇ htaꞈ oˉ kʼoˍ pui ve chaw hui htaꞈ laꞈ shawnˍ piˇ tuˬ yoˬ. (Heˍbrehˇ 11:6) Chi teˇ hkui kaꞈ ngaˬ hui ha lehˬ ve cawˬ leh nyi hkʼaˇ suh ve cawˬ tuˬ yawˇ ga laˇ ve yoˬ. Leh awˬ gʼuˇ suhˍ hpawˇ yawˇ ngaˬ hui htaꞈ co co taiˍ taiˍ ve a shaꞈ cawˬ tcuh laˇ tuˬ yoˬ. Awˬ gʼuˇ suhˍ hpawˇ ve dawˇ law kuiˬ kaꞈ ngaˬ hui yawˇ htaꞈ chiˇ aꞈ piˇ gʼa ve yoˬ. Awˬ lawn kʼo, Yaˬhoˉvaˬ ngaˬ hui htaꞈ laꞈ shawnˍ peꞈ laˇ gaˇ leh, yawˇ chi hkʼe te tuˬ kanˇ paˆ cawˬ ve yoˬ. Awˬ lawn chi htaꞈ  ngaˬ hui yonˍ gʼa ve lehˬ, oˇ htaˇ teˇ co˗e Gʼuiˬ sha ve kanˉ te ve chaw hkʼaˬ htaˆ kaꞈ a yeˇ yuˬ chehˇ ve hkʼa shuˍ, ngaˬ hui kaꞈ a yeˇ yuˬ tuˬ awˬ gʼaˇ peꞈ laˇ ve yoˬ. Tiˆmoˉseˍ kaꞈ chi hkʼe te ve yoˬ.—Heˍbrehˇ 6:10-12.

11. Aˬ htoꞈ ma te Tiˆmoˉseˍ Hkriꞈ yaˇ awˬ moˍ hkʼaw kanˉ te hkeuꞈ jaˇ ve le? (1 Tiˆmoˉseˍ 4:10)

¹¹ 1 Tiˆmoˉseˍ liꞈ 4:10 gʼaw sheˍ. Teꞈ chehˇ ve Gʼuiˬ sha lehˬ Tiˆmoˉseˍ htaꞈ laꞈ shawnˍ peꞈ laˇ tuˬ yoˬ tehꞈ yonˍ ve yoˬ. Chi htaꞈ pa taw, yawˇ Yaˬhoˉvaˬ leh awˬ nu ve chaw awˬ pon coˇ caˇ leh kanˉ hkʼa dehꞈ te ve yoˬ. Chi yawˇ hkʼaˬ hkʼe te ve le? Bon maˍ ve leh Hkriꞈ yaˇ awˬ moˍ hkʼaw awˬ vuiˬ hkʼa dehꞈ te gʼa tuˬ, tcuh yaˇ Pawˇluꞈ yawˇ htaꞈ awˬ gʼaˇ piˇ ve yoˬ. Tiˆmoˉseˍ awˬ viˉ awˬ nyi a shaꞈ i ve leh a shaꞈ maˇ ve chaw awˬ pon daꞈ ve henˇ yuˬ tuˬ hpehꞈ tuˬ kaꞈ Pawˇluꞈ kʼoˆ maˍ piˇ ve yoˬ. Chi hkʼoˆ kaꞈ, Tiˆmoˉseˍ haˍ ve awˬ vuiˬ kaꞈ gʼa te ve yoˬ. Tawˇ pa haˉ te kʼo, yawˇ awˬ viˉ awˬ nyi htaꞈ haꞈ pehnˇ ve hkʼaw hteˇ˗ehˍ gʼa beˆ maˍ piˇ ve yoˬ. (1 Tiˆmoˉseˍ 4:11-16; 2 Tiˆmoˉseˍ 4:1-5) Tiˆmoˉseˍ kanˉ te ve teˇ ceuˬ ceuˬ kʼo, awˬ nu ve chaw maˇ mawˬ leh awˬ bon uiˍ hkawˇ maˇ kʼoˆ piˇ ve htawˇ, Yaˬhoˉvaˬ yawˇ htaꞈ laꞈ shawnˍ peꞈ laˇ tuˬ yoˬ tehꞈ yonˍ gʼa ve yoˬ.—Roˉmaꞈ 2:6, 7.

12. Aˬ htoꞈ ma pa taw nyi haꞈ shaˉ paˍ Hkriꞈ yaˇ awˬ moˍ hkʼaw kanˉ te hkeuꞈ ve le? (Awˬ han htaꞈ nyi sheˍ.)

¹² Chi beuꞈ teˇ co˗e ve nyi haꞈ shaˉ paˍ kaꞈ yawˇ hui te ve awˬ ceuˬ htaꞈ Yaˬhoˉvaˬ awˬ hpfuhˇ shiˍ ve tehꞈ yonˍ gʼa ve yoˬ. Awˬ viˉ awˬ nyi htaꞈ awˬ gʼaˇ piˇ ve, Liꞈ hpu maˍ ve, leh hto toˇ ve awˬ hkʼoˆ kaꞈ nyi haꞈ shaˉ paˍ laiˉ gʼaˇ Gʼuiˬ sha ve kanˉ hkʼaˇ yehˬ te ve hpawˇ ga piˇ leh, miˬ guiˬ hkʼoˆ lo tuꞈ ve hkanˍ ve hpawˇ kaꞈ ga piˇ ve yoˬ. Nyi haꞈ shaˉ paˍ teˇ hpaˍ hpaˍ naˆ tsuhˇ yehˬ lo caˉ daꞈ ve awˬ moˍ hkʼaw kanˉ te leh, awˬ viˉ awˬ nyi naˬ ve chaw geh kaꞈ ca guiˇ˗e piˇ ve yoˬ. Kanˉ te hkeuꞈ ve nyi haꞈ shaˉ paˍ chi teˇ hpaˍ shiˍ ve, Hkriꞈ yaˇ awˬ moˍ hkʼaw ve awˬ viˉ awˬ nyi lehˬ Yaˬhoˉvaˬ ve chaw hpehꞈ ve yoˬ. Chi ve htaꞈ pa taw, yawˇ hui coˇ caˇ leh kanˉ te hkeuꞈ ve lehˬ, Gʼuiˬ sha yawˇ hui htaꞈ laꞈ shawnˍ peꞈ laˇ tuˬ yoˬ tehꞈ yonˍ gʼa ve yoˬ.—Kawˇlawˇsehˇ 3:23, 24.

13. Ngaˬ hui Yaˬhoˉvaˬ awˬ pon te ve awˬ ceuˬ htaꞈ yawˇ hkʼaˬ hkʼe dawˇ ve le?

¹³ Teˇ gʼaˇ le le nyi haꞈ shaˉ paˍ hpehꞈ gʼa ve maˇ heˆ. Yaꞈ hkʼaˇ, ngaˬ hui teˇ gʼaˇ le le kaꞈ Yaˬhoˉvaˬ htaꞈ teˇ ceuˬ ceuˬ piˇ gʼa ve yoˬ. Ngaˬ hui coˇ caˇ leh Yaˬhoˉvaˬ ve kanˉ te ve htaꞈ yawˇ awˬ hpfuhˇ shiˍ ve yoˬ. Ngaˬ  hui hpu tanˇ tanˇ piˇ ve maˇ maˇ ve htawˇ, miˬ guiˬ hkʼa peu˗eˬ hkʼoˆ kanˉ awˬ pon hpu tanˇ tanˇ piˇ gʼa ve yoˬ. Ngaˬ hui yaꞈ taw puiˉ jaˇ ve htawˇ, hpawnˬ daꞈ kuiˬ hkʼaw laꞈ sheh chiˇ leh hkʼawꞈ ve htaꞈ Yaˬhoˉvaˬ gʼa mawˬ htaˇ, ha lehˬ jaˇ ve yoˬ. Awˬ nu ve chaw te yaꞈ ve htaꞈ ngaˬ hui maˇ nyi leh venˇ baˆ hpehˇ piˇ ve kʼo, Gʼuiˬ sha ha lehˬ jaˇ ve yoˬ. Nawˬ te gʼa ve hkʼe te˗oˬ ve awˬ ceuˬ htaꞈ Yaˬhoˉvaˬ awˬ hpfuhˇ shiˍ ve tehꞈ yonˍ gʼa ve yoˬ. Yaˬhoˉvaˬ nawˬ htaꞈ haꞈ jaˇ leh laꞈ shawnˍ peꞈ laˇ tuˬ yoˬ.—Luˉkaꞈ 21:1-4.

TEꞈ CHEHˇ VE GʼUIˬ SHA GEH MEUˆ DAꞈ SHEˍ

14. Ngaˬ hui Yaˬhoˉvaˬ geh meuˆ daꞈ ve lehˬ yawˇ htaꞈ ka tiꞈ yeˬ tuˬ hkʼaˬ hkʼe ga laˇ gʼa ve le? (Awˬ han htaꞈ nyi sheˍ.)

¹⁴ Yaˬhoˉvaˬ lehˬ teꞈ chehˇ ve Gʼuiˬ sha hpehꞈ ve tehꞈ ngaˬ hui yonˍ ve kʼo, ngaˬ hui yawˇ htaꞈ ka tiꞈ yeˬ tuˬ sha ve yoˬ. Chi Yoˇsehꞈ ve awˬ lawn htaꞈ ngaˬ hui mawˬ gʼa ve yoˬ. Yaˬhoˉvaˬ lehˬ awˬ tehˬ teꞈ chehˇ ve tehꞈ Yoˇsehꞈ yonˍ leh, yawˇ Yaˬhoˉvaˬ nyi ma luˬ tuˬ maˇ te piˇ gaˇ ve pa taw, yawˇ haˉ chawˇ haˉ paˆ maˇ te tuˬ laꞈ haˉ tawˍ baˬ gʼa ve yoˬ. (Awˬ hkuiˉ puiˍ 39:9) Yaˬhoˉvaˬ awˬ tehˬ teꞈ chehˇ ve tehꞈ ngaˬ hui shawˍ ve kʼo, bon lawˬ tuˬ, Liꞈ hpu gʼaw tuˬ awˬ yanˇ shawˍ teh ve yoˬ. Ngaˬ hui chi hkʼe te ve kʼo, yawˇ geh hkʼa dehꞈ meuˆ daꞈ tuˬ yoˬ. Yoˇsehꞈ hkʼa shuˍ ngaˬ hui Yaˬhoˉvaˬ geh meuˆ daꞈ ve kʼo, ngaˬ hui kaꞈ yawˇ nyi ma luˬ tuˬ maˇ te piˇ.—Yaˍkoˆ 4:8.

15. Iˉsaˍreˍlaˆ chaw heh puiˉ hkʼaw lo chehˇ htaˇ ve awˬ lawn ngaˬ hui htaꞈ aˬ htoꞈ ma maˍ laˇ ve le? (Heˍbrehˇ 3:12)

¹⁵ Yaˬhoˉvaˬ teꞈ chehˇ ve Gʼuiˬ sha hpehꞈ ve tehꞈ leunˇ kʼai ve chaw lehˬ, yawˇ Yaˬhoˉvaˬ geh awˬ meu˗eˇ awˬ meu˗eˇ maˇ meuˆ daꞈ leh yawˇ ve kanˉ maˇ te tuˬ yoˬ. Iˉsaˍreˍlaˆ chaw gʼa hpuˇ ve awˬ ceuˬ htaꞈ dawˇ nyi sheˍ. Yawˇ hui heh puiˉ hkʼaw lo chehˇ htaˇ, Yaˬhoˉvaˬ lehˬ awˬ tehˬ teꞈ chehˇ ve tehꞈ yawˇ hui hkʼa dehꞈ shiˍ ve htawˇ, Yaˬhoˉvaˬ yawˇ hui htaꞈ nyi haꞈ shaˉ laˇ tuˬ ve laˇ tehꞈ, yawˇ hui htawˇ dawˇ nawˬ dawˇ cawˬ ve yoˬ. Hkʼe te leh, yawˇ hui na hkawˇ cawˬ ve, “Gʼuiˬ sha ngaˬ hui geh chehˇ laˇ, maˇ chehˇ laˇ?” (Tawˆ kʼai ve 17:2, 7) Awˬ leh meuˇ htaˇ yawˇ hui Yaˬhoˉvaˬ htaꞈ hpfuhˆ ve yoˬ. Iˉsaˍreˍlaˆ chaw maˇ daꞈ ve awˬ lawn htaꞈ ngaˬ hui maˇ henˇ yuˬ gaˇ.—Heˍbrehˇ liꞈ 3:12 gʼaw sheˍ.

16. Ngaˬ hui ve yonˍ hkʼaˇ htaꞈ lawˇ nyi laˇ gʼa ve aˬ htoꞈ ma cawˬ ve le?

¹⁶ Saˍtanˍ ve miˬ guiˬ hkʼoˆ lo ngaˬ hui Yaˬhoˉvaˬ geh meuˆ daꞈ tuˬ maˇ sha. Awˬ lawn kʼo, laiˉ gʼaˇ Gʼuiˬ sha awˬ tehˬ cawˬ ve tehꞈ maˇ yonˍ leh, nyi˗a kʼo yawˇ hui ve a shaꞈ teꞈ hkʼaˇ kaꞈ ha lehˬ ve htaꞈ shuˍ ve yoˬ. Ngaˬ hui chi hkʼe gʼa mawˬ htaˇ, ngaˬ hui ve yonˍ hkʼaˇ  htaꞈ lawˇ nyi laˇ gʼa ve yoˬ. Gʼuiˬ sha awˬ tehˬ cawˬ ve tehꞈ ngaˬ hui yonˍ ve htawˇ, Yaˬhoˉvaˬ ngaˬ hui htaꞈ nyi haꞈ shaˉ laˇ tuˬ ve laˇ tehꞈ, ngaˬ hui htawˇ dawˇ nawˬ dawˇ cawˬ la ve yoˬ. Chiˇ mvuh ve liꞈ kaˇ nanˉ uiˍ 73 bvuhꞈ paˍ kaꞈ awˬ lawn chi hkʼe ve htaꞈ htawˇ dawˇ nawˬ dawˇ cawˬ ve yoˬ. Yawˇ awˬ paˇ awˬ kui lo chehˇ ve chaw Gʼuiˬ sha ve awˬ liˇ tawˇ hkawˇ htaꞈ maˇ na yuˬ ve gʼa mawˬ ve htawˇ, yawˇ hui a shaꞈ teꞈ kuiˬ hkʼaw hpehꞈ sha ve htaꞈ kaꞈ gʼa mawˬ ve yoˬ. Heuˆ la kuiˬ lehˬ Chiˇ mvuh ve liꞈ bvuhꞈ paˍ chi teˇ gʼaˇ Yaˬhoˉvaˬ ve kanˉ te ve awˬ bon cawˬ˗aw laˇ tehꞈ, htawˇ dawˇ nawˬ dawˇ cawˬ la ve yoˬ.—Chiˇ mvuh ve 73:11-13.

17. Ngaˬ hui Yaˬhoˉvaˬ geh meuˆ daꞈ tuˬ aˬ htoꞈ ma ga laˇ gʼa ve le?

¹⁷ Awˬ leh meuˇ htaˇ, Chiˇ mvuh ve liꞈ bvuhꞈ paˍ cawˇ ve dawˇ hkʼaˇ cawˬ tuˬ aˬ htoꞈ ma ga piˇ ve le? Yaˬhoˉvaˬ htaꞈ leunˇ kʼai ve chaw aˬ htoꞈ ma gʼa hpuˇ tuˬ ve htaꞈ yawˇ hkʼa dehꞈ dawˇ nyi ve yoˬ. (Chiˇ mvuh ve 73:18, 19, 27) Chi hkʼoˆ kaꞈ, yawˇ Yaˬhoˉvaˬ ve kanˉ te ve awˬ bon gʼa ve htaꞈ kaꞈ dawˇ nyi ve yoˬ. (Chiˇ mvuh ve 73:24) Ngaˬ hui kaꞈ Yaˬhoˉvaˬ peꞈ laˇ ve awˬ ceuˬ teˇ hpaˍ htaꞈ hkʼa dehꞈ dawˇ nyi gʼa ve yoˬ. Ngaˬ hui Yaˬhoˉvaˬ ve kanˉ maˇ te ve kʼo, hkʼaˬ hkʼe hpehꞈ tuˬ ve htaꞈ dawˇ nyi sheˍ. Ngaˬ hui Yaˬhoˉvaˬ ve kanˉ te htaˇ, a shaꞈ teꞈ hkʼaˇ hkʼaˬ hkʼe daꞈ la ve htaꞈ tawnˇ taˍ ve kʼo, chi ngaˬ hui yawˇ geh ka tiꞈ yeˬ gʼa tuˬ ga laˇ leh, Chiˇ mvuh ve liꞈ bvuhꞈ paˍ “ngaˬ lehˬ Gʼuiˬ sha awˬ paˇ neˇ lo gʼa chehˇ ve pa taw, hkʼaˬ ma daꞈ jaˇ ve le?” tehꞈ kʼoˆ ve hkʼe ngaˬ hui kaꞈ kʼoˆ gʼa ve yoˬ.—Chiˇ mvuh ve 73:28.

18. Aˬ htoꞈ ma te awˬ gʼuˇ suhˍ hpawˇ hpehꞈ la tuˬ ve awˬ ceuˬ htaꞈ ngaˬ hui maˇ kawˆ cawˇ ve le?

¹⁸ Awˬ leh meuˇ ve awˬ yanˇ hkʼaw ngaˬ hui shoꞈ shaꞈ ve aˬ htoꞈ ma htaꞈ gʼa hpuˇ ve htawˇ maˇ kʼoˆ, ngaˬ hui maˇ kawˆ cawˇ ve yoˬ. Awˬ lawn kʼo, “teꞈ chehˇ ve leh awˬ tehˬ awˬ na ve Gʼuiˬ sha awˬ pon kanˉ” ngaˬ hui te chehˇ ve yoˬ. (1 Hteˇsaˍlawˇniˆ 1:9) Ngaˬ hui ve Gʼuiˬ sha awˬ tehˬ awˬ na teꞈ chehˇ leh ngaˬ hui htaꞈ ga laˇ gaˇ jaˇ ve yoˬ. Yaˬhoˉvaˬ oˇ htaˇ teˇ co˗e yawˇ ve kanˉ te ve chaw htaꞈ hkʼaˬ hkʼe ga piˇ jaw ve ngaˬ hui mawˬ tuˬ te laˇ leh chi beuꞈ teˇ co˗e ngaˬ hui htaꞈ kaꞈ yawˇ ga laˇ ve yoˬ. Maˇ maw ve awˬ yanˇ miˬ guiˬ hkʼoˆ lo teˇ pawˆ kaꞈ maˇ hpehꞈ la jaw sheˍ ve tuꞈ jaˇ hkanˍ jaˇ ve ngaˬ hui gʼa hpuˇ tuˬ yoˬ. Yaꞈ hkʼaˇ, chi hkʼe ve ngaˬ hui teˇ gʼaˇ tiˉ gʼa hpuˇ ve maˇ heˆ. (Iˉsaˍyaˆ 41:10) ‘Gʼuiˬ sha lehˬ ngaˬ htaꞈ ga laˇ shehˍ hpaˇ hpehꞈ leh ngaˬ teꞈ chiˉ kawˆ tuˬ maˇ cawˬ tehꞈ nyi ma haꞈ hanˉ ve awˬ hkʼaw lo kʼoˆ ve hkʼe’ ngaˬ hui kʼoˆ gʼa ve yoˬ.—Heˍbrehˇ 13:5, 6.