1. Chiˇ mvuh ve liꞈ 18:46 hkʼaw kʼoˆ taˍ ve hkʼe, Daˍviˆ lehˬ Yaˬhoˉvaˬ aˬ htoꞈ ma htaꞈ tehˆ taˍ ve le?

 Ngaˬ hui chehˇ ve miˬ guiˬ hkʼoˆ lo shoꞈ shaꞈ ve cawˬ maˇ jaˇ. Teˇ pawˆ pawˆ kʼo, shoꞈ shaꞈ ve ngaˬ hui gʼa hpuˇ ve tuꞈ ve hkanˍ ve cawˬ tuˬ te laˇ ve, maˇ heˆ leh ngaˬ hui ve a shaꞈ teꞈ hkʼaˇ pa tuˬ kaꞈ te laˇ ve yoˬ. Yaꞈ hkʼaˇ, ngaˬ hui Yaˬhoˉvaˬ ga laˇ tuˬ lawˬ gʼa ve awˬ bon uiˍ jaˇ ve yoˬ. Peuˬ taˉ ve teˇ lawn hkʼaw ngaˬ hui gʼa henˇ ve, Yaˬhoˉvaˬ lehˬ teꞈ chehˇ ve Gʼuiˬ sha hpehꞈ leh ngaˬ hui htaꞈ ga laˇ gaˇ jaˇ ve yoˬ. Ngaˬ hui Gʼuiˬ sha ga laˇ ve htaꞈ gʼa htaˇ, “Gʼuiˬ sha lehˬ teꞈ chehˇ ve yoˬ” tehꞈ ngaˬ hui yonˍ gʼa ve yoˬ. (Chiˇ mvuh ve 18:46 gʼaw sheˍ.) Yaꞈ hkʼaˇ, peuˬ hkʼawꞈ nawˉ Daˍviˆ Yaˬhoˉvaˬ htaꞈ kʼoˆ ve, ‘ngaˬ htaꞈ ponˬ laˇ shehˍ hpaˇ yeˬ jaˇ ve haˉ hpawˇ hkʼe hpehꞈ ve yoˬ.’ Yaˬhoˉvaˬ lehˬ teꞈ chehˇ leh, haˉ pui shiˍ maˇ teꞈ ve htaꞈ aˬ htoꞈ ma te Daˍviˆ tehˆ taˍ ve le?

2. Daˍviˆ lehˬ Yaˬhoˉvaˬ ‘haꞈ shaˉ laˇ shehˍ hpaˇ yeˬ jaˇ ve haˉ hpawˇ’ hkʼe hpehꞈ ve tehꞈ kuˬ ve ngaˬ hui hkʼaˬ hkʼe henˇ yuˬ gʼa ve le?

² Chi ve teˇ lawn hkʼaw Yaˬhoˉvaˬ lehˬ haꞈ shaˉ laˇ shehˍ hpaˇ yeˬ jaˇ ve haˉ hpawˇ htaꞈ hkʼaˬ hkʼe shuˍ ve le? Leh chi hkʼe tehˆ daꞈ ve Yaˬhoˉvaˬ htaꞈ caˉ daꞈ ve ngaˬ hui htaꞈ aˬ htoꞈ ma maˍ laˇ ve, awˬ lawn chi ve hkʼaw teˇ geh henˇ tuˬ yoˬ. Ngaˬ hui awˬ pon Yaˬhoˉvaˬ lehˬ haꞈ shaˉ laˇ shehˍ hpaˇ yeˬ jaˇ ve haˉ hpawˇ htaꞈ hkʼaˬ hkʼe shuˍ ve le? Leh Yaˬhoˉvaˬ lehˬ haꞈ shaˉ laˇ shehˍ hpaˇ yeˬ jaˇ ve haˉ hpawˇ hkʼe hpehꞈ ve te hkʼaˇ dawˇ hkʼaˇ htaꞈ ngaˬ hui hkʼaˬ hkʼe henˇ yuˬ gʼa tuˬ kaꞈ teˇ geh henˇ tuˬ yoˬ.

YAˬHOˉVAˬ HAꞈ SHAˉ LAˇ SHEHˍ HPAˇ YEˬ JAˇ VE HAˉ HPAWˇ HKʼE HPEHꞈ VE

3. Liꞈ hpu hkʼaw ‘haꞈ shaˉ laˇ shehˍ hpaˇ yeˬ jaˇ ve haˉ hpawˇ hkʼe hpehꞈ ve’ tehꞈ hkʼaˬ ve teˇ tawn hkʼaw cawˬ ve le? (Awˬ htaꞈ hpawˇ ve awˬ han htaꞈ nyi sheˍ.)

³ Yaˬhoˉvaˬ ve te hkʼaˇ dawˇ hkʼaˇ ngaˬ hui htaꞈ ga laˇ gʼa tuˬ Liꞈ hpu hkʼaw kʼoˆ ve, ‘ponˬ laˇ shehˍ hpaˇ yeˬ jaˇ ve haˉ hpawˇ hkʼe hpehꞈ ve yoˬ.’ Gʼuiˬ sha htaꞈ teˇ gʼaˇ˗ehˬ kaꞈ tehˆ maˇ gʼa ve tehꞈ ngaˬ hui mawˬ tuˬ, yawˇ lehˬ ponˬ laˇ shehˍ hpaˇ haˉ hpawˇ hkʼe hpehꞈ ve tehꞈ Liꞈ hpu awˬ tawn hkʼaw tehˆ taˍ ve htaꞈ ngaˬ hui mawˬ ve yoˬ. Bon maˍ ve liꞈ 32:4 hkʼaw Yaˬhoˉvaˬ lehˬ ‘haꞈ shaˉ laˇ shehˍ hpaˇ yeˬ jaˇ ve haˉ hpawˇ hkʼe hpehꞈ ve’ tehꞈ awˉ lawˉ teˇ pawˆ kʼoˆ taˍ ve yoˬ. Chi hkʼoˆ kaꞈ, Haˍnaˆ ve bon lawˬ hkawˇ hkʼaw yawˇ kʼoˆ ve, ‘ngaˬ hui ve  Gʼuiˬ sha lehˬ haꞈ shaˉ laˇ puiˉ shehˍ hpaˇ yeˬ jaˇ ve haˉ hpawˇ hkʼe hpehꞈ ve yoˬ.’ (1 Saˍmo˗eˍlaˆ 2:2) Haˍbaˍkuˆ kaꞈ Yaˬhoˉvaˬ lehˬ ‘haꞈ shaˉ laˇ chehˇ ve yeˬ jaˇ ve haˉ hpawˇ hkʼe hpehꞈ ve’ tehꞈ kʼoˆ ve yoˬ. (Haˍbaˍkuˆ 1:12) Chi hkʼoˆ kaꞈ, Chiˇ mvuh ve liꞈ 73 bvuhꞈ paˍ kaꞈ ‘Gʼuiˬ sha lehˬ ngaˬ ve nyi ma htaꞈ haꞈ shaˉ laˇ shehˍ hpaˇ yeˬ jaˇ ve haˉ hpawˇ hkʼe hpehꞈ ve yoˬ’ tehꞈ kʼoˆ ve yoˬ. (Chiˇ mvuh ve 73:26) Leh Yaˬhoˉvaˬ kaꞈ yawˇ awˬ to htaꞈ yeˬ jaˇ ve haˉ hpawˇ hkʼe hpehꞈ ve tehꞈ kʼoˆ ve yoˬ. (Iˉsaˍyaˆ 44:8) Yaˬhoˉvaˬ yeˬ jaˇ ve haˉ hpawˇ hkʼe hpehꞈ ve te hkʼaˇ dawˇ hkʼaˇ 3 ceuˬ htaꞈ ngaˬ hui teˇ geh henˇ tuˬ yoˬ. “Ngaˬ hui ve Gʼuiˬ sha lehˬ yeˬ jaˇ ve haˉ hpawˇ hkʼe hpehꞈ ve” kaꞈ teˇ geh henˇ tuˬ yoˬ.—Bon maˍ ve 32:31. (MGS)

4. Yaˬhoˉvaˬ lehˬ ngaˬ hui ve vaꞈ taˍ kuiˬ hkʼaˬ hkʼe hpehꞈ ve le? (Chiˇ mvuh ve 94:22)

⁴ Yaˬhoˉvaˬ vaꞈ taˍ kuiˬ hpehꞈ ve lehˬ mvuhˇ yeˬ mvuhˇ haw lonˉ laˬ htaˇ ngaˬ hui vaꞈ taˍ kuiˬ haˉ pui shiˍ lonˉ hkʼe hpehꞈ ve yoˬ. Ngaˬ hui a shaꞈ teꞈ kuiˬ hkʼaw tuꞈ ve hkanˍ ve gʼa hpuˇ htaˇ, Yaˬhoˉvaˬ lehˬ ngaˬ hui vaꞈ taˍ kuiˬ hpehꞈ ve yoˬ. (Chiˇ mvuh ve 94:22 gʼaw sheˍ.) Yaˬhoˉvaˬ lehˬ ngaˬ hui yawˇ geh meuˆ daꞈ ve htaꞈ haꞈ shaˉ laˇ shehˍ hpaˇ hpehꞈ leh, chi teˇ hkui ngaˬ hui gʼa hpuˇ ve tuꞈ ve hkanˍ ve lehˬ hkʼaˬ htaˆ kaꞈ maˇ cawˬ tehꞈ ngaˬ hui yonˍ gʼa tuˬ te laˇ ve yoˬ. Chi hkʼe ceh tiˉ maˇ heˆ. Ngaˬ hui dawˇ haˍ dawˇ hkiˉ ve leh tuꞈ ve hkanˍ ve gʼa hpuˇ ve teˇ ceuˬ le le htaꞈ awˬ gʼuˇ suhˍ hpawˇ Yaˬhoˉvaˬ te mehˉ laˇ tuˬ yoˬ tehꞈ ka tiꞈ te taˍ laˇ ve yoˬ.—Yeˍsaˍkeˍlaˆ 34:25, 26.

5. Yaˬhoˉvaˬ lehˬ ngaˬ hui ve vaꞈ taˍ kuiˬ yeˬ jaˇ ve haˉ hpawˇ hkʼe hpehꞈ tuˬ hkʼaˬ hkʼe gʼa te ve le?

⁵ Yaˬhoˉvaˬ lehˬ yeˬ jaˇ ve haˉ hpawˇ hkʼe hpehꞈ tuˬ te piˇ ve teˇ hkʼaˇ lehˬ, ngaˬ hui yawˇ geh bon lawˬ ve yoˬ. Ngaˬ hui Yaˬhoˉvaˬ geh bon lawˬ htaˇ, ‘yawˇ geh lo laˬ ve dawˇ sha gaˇ sha ve’ ngaˬ hui ve nyi ma leh dawˇ hkʼaˇ htaꞈ haꞈ shaˉ laˇ tuˬ yoˬ. (Hpiˇliˇpiˆ 4:6, 7) Awˬ viˉ awˬ nyi hawˉ hkʼaˆ An˗teh yonˍ ve htaꞈ pa taw, htawnˍ hkʼaw lo gʼa chehˇ ve awˬ lawn htaꞈ teˇ geh nyi sheˍ. Yawˇ htaꞈ suhˉ jehˬ kuiˬ lo laiˉ pawˆ kuˬ leh na piˇ ve yoˬ. Mvuhˇ miˬ kanˉ te paˍ yawˇ htaꞈ nyiˉ piˇ leh kʼoˆ guiˇ gʼuiˬ guiˇ piˇ sheˍ ve yoˬ. An˗teh kʼoˆ ve, “suhˉ jehˬ kuiˬ lo teˇ pawˆ le le kuˬ leh na laˇ ve ngaˬ dawˇ maˇ jaˇ ve pa taw, Yaˬhoˉvaˬ geh bon lawˬ ve yoˬ. Ngaˬ cuˇ yiˍ leh nyi ma gawˬ lehˍ ve cawˬ tuˬ kaꞈ lawˬ ve yoˬ. Maꞈ yaˇ ngaˬ htaꞈ hkʼaˬ hkʼe te laˇ ve htawˇ, yawˇ hui dawˇ taˍ ve hkʼe te maˇ gʼa. Yaˬhoˉvaˬ ga laˇ ve pa taw, ngaˬ htaꞈ haꞈ shaˉ laˇ gʼa tuˬ haˉ pui yehˇ leh hko ko taˍ ve hkʼe hpehꞈ ve yoˬ.”

6. Aˬ htoꞈ ma te ngaˬ hui hkʼaˬ htaˆ kaꞈ Yaˬhoˉvaˬ htaꞈ gʼaˇ va gʼa ve le? (Iˉsaˍyaˆ 26:3, 4)

⁶ Yaˬhoˉvaˬ htaꞈ gʼaˇ va ve lehˬ haˉ pui shiˍ lonˉ maˇ heˆ leh hkʼaw lonˉ htaꞈ chaw teˇ gʼaˇ kaꞈ yuˬ jiˆ piˇ maˇ gʼa ve htaꞈ shuˍ ve yoˬ. Yaˬhoˉvaˬ lehˬ teˇ kaꞈ˗ehˬ kaꞈ maˇ jiˆ hpaw˗e. Yawˇ ngaˬ hui htaꞈ ga laˇ tuˬ law taˍ ve yoˬ. Awˬ lawn kʼo, Yaˬhoˉvaˬ lehˬ “hkʼaˬ htaˆ kaꞈ haꞈ shaˉ laˇ gʼa” ve yoˬ tehꞈ ngaˬ hui yonˍ gʼa ve yoˬ. (Iˉsaˍyaˆ 26:3, 4 gʼaw sheˍ.) Yaˬhoˉvaˬ lehˬ hkʼaˬ htaˆ kaꞈ teꞈ chehˇ ve pa taw, yawˇ ka tiꞈ te taˍ ve htaꞈ gʼaꞈ te ve yoˬ. Yawˇ ngaˬ hui ve bon lawˬ hkawˇ htaꞈ na laˇ leh ngaˬ hui ga laˇ tuˬ loˍ htaˇ yawˇ ga laˇ ve yoˬ. Chi hkʼoˆ kaꞈ, Yaˬhoˉvaˬ yawˇ ve kanˉ te ve chaw teˇ gʼaˇ le le htaꞈ ka tiꞈ yeˬ ve tehꞈ ngaˬ hui yonˍ gʼa ve yoˬ. (2 Saˍmo˗eˍlaˆ 22:26) Ngaˬ hui te ve awˬ ceuˬ htaꞈ yawˇ maˇ leunˇ laˇ leh laꞈ shawnˍ peꞈ laˇ ve yoˬ.—Heˍbrehˇ 6:10; 11:6.

7. Ngaˬ hui Yaˬhoˉvaˬ htaꞈ gʼaˇ va htaˇ aˬ htoꞈ ma awˬ bon gʼa ve le? (Awˬ han htaꞈ nyi sheˍ.)

⁷ Ngaˬ hui Yaˬhoˉvaˬ htaꞈ gʼaˇ hkʼa dehꞈ va htaˇ, yawˇ yeˬ jaˇ ve haˉ hpawˇ hkʼe hpehꞈ tuˬ te piˇ ve yoˬ. Ngaˬ hui tuꞈ ve hkanˍ ve gʼa hpuˇ ve htawˇ, Yaˬhoˉvaˬ ve hkawˇ na yuˬ ve kʼo, ngaˬ hui awˬ bon gʼa tuˬ yoˬ tehꞈ yonˍ gʼa ve yoˬ. (Iˉsaˍyaˆ 48:17, 18) Yaˬhoˉvaˬ ngaˬ hui htaꞈ hkʼaˬ hkʼe ga laˇ ve gʼa mawˬ ve teˇ pawˆ le le yawˇ htaꞈ gʼaˇ hkʼa dehꞈ va gʼa ve yoˬ. Awˬ gʼuˇ suhˍ hpawˇ ngaˬ hui shoꞈ shaꞈ ve gʼa hpuˇ htaˇ, teˇ ceuˬ le le htaꞈ ngaˬ hui yeunˇ hkanˍ gʼaˇ tuˬ, Yaˬhoˉvaˬ ga laˇ tuˬ yoˬ tehꞈ yonˍ gʼa ve yoˬ. Ngaˬ hui htaꞈ chaw teˇ gʼaˇ kaꞈ ga laˇ maˇ gʼa ve awˬ lawn htaꞈ shuˍ ve teˇ ceuˬ ceuˬ ngaˬ hui gʼa hpuˇ htaˇ, Yaˬhoˉvaˬ ngaˬ hui htaꞈ  hkʼaˬ htaˆ kaꞈ ga laˇ tuˬ yoˬ tehꞈ yonˍ gʼa ve yoˬ. Va˗la˗ti˗mi kʼoˆ ve, “ngaˬ htawnˍ hkʼaw lo chehˇ htaˇ, Gʼuiˬ sha geh meuˆ daꞈ jaˇ ve awˬ yanˇ hpehꞈ ve yoˬ. Htawnˍ hkʼaw lo ngaˬ teˇ gʼaˇ tiˉ chehˇ leh ngaˬ dawˇ taˍ ve hkʼe te maˇ gʼa ve pa taw, Yaˬhoˉvaˬ htaꞈ gʼaˇ hkʼa dehꞈ va tuˬ te laˇ ve yoˬ.”

8. (a) Aˬ htoꞈ ma te Yaˬhoˉvaˬ yeˬ jaˇ ve tehꞈ ngaˬ hui kʼoˆ gʼa ve le? (b) Yaˬhoˉvaˬ haꞈ shaˉ laˇ shehˍ hpaˇ yeˬ jaˇ ve haˉ hpawˇ hkʼe hpehꞈ ve lehˬ ngaˬ hui aˬ htoꞈ ma awˬ bon gʼa ve le? (Chiˇ mvuh ve 62:6, 7)

⁸ Yaˬhoˉvaˬ lehˬ yeˬ jaˇ ve haˉ pui shiˍ lonˉ htaꞈ shuˍ ve yoˬ. Yaˬhoˉvaˬ yawˇ ve te hkʼaˇ dawˇ hkʼaˇ maˇ pa leh yawˇ ve a loˍ kaꞈ maˇ pa jaw. (Maˍlaˍhkiˆ 3:6) Aˍdanˍ leh Eˇvaꞈ Yaˬhoˉvaˬ htaꞈ hpfuhˆ htaˇ, Yaˬhoˉvaˬ yawˇ ve a loˍ chaw yaˇ htaꞈ dawˇ law taˍ ve maˇ pa. Leh tcuh yaˇ Pawˇluꞈ bvuhꞈ ve, Yaˬhoˉvaˬ lehˬ “yawˇ awˬ to htaꞈ yawˇ chiˇ baˬ maˇ hpehꞈ.” (2 Tiˆmoˉseˍ 2:13) Yaˬhoˉvaˬ yawˇ ve te hkʼaˇ dawˇ hkʼaˇ, yawˇ ve a loˍ leh yawˇ ve awˬ liˇ awˬ hkʼaˇ, shu aˬ htoꞈ ma te piˇ ve htawˇ maˇ kʼoˆ, chi ve teˇ hpaˍ maˇ pa tehꞈ kʼoˆ gaˇ ve yoˬ. Yaˬhoˉvaˬ yeˬ jaˇ ve tehꞈ ngaˬ hui yonˍ gʼa ve kʼo, ngaˬ hui tuꞈ ve hkanˍ ve gʼa hpuˇ htaˇ, yawˇ htaꞈ gʼaˇ va leh awˬ gʼuˇ suhˍ hpawˇ ve htaꞈ caˉ daꞈ ve Yaˬhoˉvaˬ ka tiꞈ te taˍ ve htaꞈ gʼaꞈ te tuˬ yoˬ tehꞈ yonˍ gʼa ve yoˬ.—Chiˇ mvuh ve liꞈ 62:6, 7 gʼaw sheˍ.

9. Ta˗ya˗na ve awˬ lawn nawˬ htaꞈ hkʼaˬ hkʼe maˍ laˇ ve le?

⁹ Yaˬhoˉvaˬ ve te hkʼaˇ dawˇ hkʼaˇ leh yawˇ ve a loˍ chaw yaˇ leh miˬ guiˬ htaꞈ dawˇ law taˍ ve ngaˬ hui yawˇ htaꞈ gʼaˇ va tuˬ ga laˇ ve yoˬ. Leh Yaˬhoˉvaˬ yeˬ jaˇ ve haˉ hpawˇ hkʼe hpehꞈ ve, chi htaꞈ ngaˬ hui hkʼa dehꞈ dawˇ nyi gʼa ve yoˬ. Chi hkʼe te htaˇ ngaˬ hui nyi ma gawˬ lehˍ ve cawˬ tuˬ te laˇ leh ngaˬ hui tuꞈ ve hkanˍ ve gʼa hpuˇ ve htawˇ, Yaˬhoˉvaˬ htaꞈ ka tiꞈ yeˬ gʼa sheˍ ve yoˬ. (Chiˇ mvuh ve 16:8) Chi hkʼe ve awˬ viˉ awˬ nyi yaˇ miˇ Ta˗ya˗na gʼa hpuˇ ve yoˬ. Yawˇ Yaˬhoˉvaˬ ve Shaˉhkiˆhkanˍ ve chaw hpehꞈ ve pa taw, aˉ hkʼaw lo tiˉ haw tiˍ taˍ piˇ ve yoˬ. Yawˇ kʼoˆ ve, “ngaˬ teˇ gʼaˇ tiˉ chehˇ ve tehꞈ dawˇ leh awˉ lawˉ htaˇ, dawˇ haˍ jaˇ leh awˬ gʼaˇ nuˇ jaˇ ve yoˬ.” Yaꞈ hkʼaˇ, Ta˗ya˗na yawˇ gʼa hpuˇ ve awˬ ceuˬ Yaˬhoˉvaˬ htaꞈ hkʼaˬ hkʼe te caˉ daꞈ ve leh, Yaˬhoˉvaˬ ve a loˍ chaw yaˇ leh miˬ guiˬ htaꞈ caˉ daꞈ ve kaꞈ yawˇ hkʼa dehꞈ dawˇ nyi ve yoˬ. Chi yawˇ yeunˇ hkanˍ gʼaˇ tuˬ te piˇ leh nyi ma gawˬ lehˍ kʼawꞈ cawˬ ve yoˬ. Yawˇ kʼawꞈ kʼoˆ sheˍ ve, “aˬ htoꞈ ma te ngaˬ chi hkʼe gʼa hpuˇ ve le tehꞈ na gʼa htaˇ, ngaˬ htaꞈ shaˍ tiꞈ peꞈ laˇ ve yoˬ. Laiˉ ceuˬ ve awˬ lawn htaꞈ ngaˬ gʼa yeunˇ hkanˍ ve lehˬ, chi ve hkʼa peu˗eˬ Yaˬhoˉvaˬ ve awˬ pon hpehꞈ ve yoˬ. Chi ve ngaˬ awˬ to htaꞈ tiˉ maˇ gʼa dawˇ nyi tuˬ ga laˇ ve yoˬ.”

10. Yaˬhoˉvaˬ ngaˬ hui awˬ pon yeˬ jaˇ ve haˉ hpawˇ hpehꞈ ve tehꞈ chi teˇ hkui kaꞈ hkʼaˬ hkʼe te gʼa ve le?

¹⁰ Maˇ maw ve awˬ yanˇ ngaˬ hui tuꞈ jaˇ hkanˍ jaˇ ve htaꞈ gʼa hpuˇ leh peuˬ laˬ htaˇ aꞈ kehˉ ngaˬ hui Yaˬhoˉvaˬ htaꞈ gʼaˇ gʼa va cawˇ ve yoˬ. Chi htaꞈ pa taw, chi teˇ hkui kaꞈ ngaˬ hui Yaˬhoˉvaˬ htaꞈ gʼaˇ va tuˬ a yeˇ uiˍ jaˇ. Ngaˬ hui aˬ htoꞈ ma gʼa hpuˇ ve htawˇ maˇ kʼoˆ, ka tiꞈ yeˬ gʼa tuˬ Yaˬhoˉvaˬ ga laˇ tuˬ yoˬ tehꞈ yonˍ gʼa ve yoˬ. Chi ve ngaˬ hui hkʼaˬ hkʼe te gʼa tuˬ le? Liꞈ hpu ve awˬ co˗e htaˇ leh chi beuꞈ teˇ co˗e ve chaw, Yaˬhoˉvaˬ ve kanˉ te ve chaw ve awˬ lawn ngaˬ hui gʼaw gʼa ve yoˬ. Yaˬhoˉvaˬ ngaˬ hui awˬ pon yeˬ jaˇ ve haˉ hpawˇ hkʼaˬ hkʼe te hpehꞈ ve htaꞈ teˇ geh nyi leh, awˬ lawn chi ve nawˬ awˬ pon a yeˇ hkʼaˬ hkʼe taw uiˍ ve htaꞈ kaꞈ nyi sheˍ. Chi hkʼe te htaˇ Yaˬhoˉvaˬ nawˬ awˬ pon yeˬ jaˇ ve haˉ hpawˇ hpehꞈ ve tehꞈ shawˍ tuˬ ga laˇ ve yoˬ.

YAˬHOˉVAˬ HAꞈ SHAˉ LAˇ PUIˉ SHEHˍ HPAˇ YEˬ JAˇ VE HAˉ HPAWˇ HKʼE HPEHꞈ VE TE HKʼAˇ DAWˇ HKʼAˇ HTAꞈ HENˇ YUˬ SHEˍ

11. Aˬ htoꞈ ma te ngaˬ hui Yaˬhoˉvaˬ ve te hkʼaˇ dawˇ hkʼaˇ yeˬ jaˇ ve haˉ hpawˇ hkʼe hpehꞈ ve htaꞈ henˇ yuˬ gaˇ ve le? (Awˇ ceˍ awˇ fa “ Awˬ viˉ awˬ nyi yaˇ nehˬ dawˇ teh taˍ ve” htaꞈ nyi sheˍ.)

¹¹ Yaˬhoˉvaˬ ve te hkʼaˇ dawˇ hkʼaˇ ngaˬ hui awˬ pon yeˬ jaˇ ve haˉ hpawˇ hkʼe hpehꞈ ve htaꞈ gʼa mawˬ˗oˬ ve yoˬ. Chi teˇ hkui hkʼaˬ hkʼe te leh te hkʼaˇ dawˇ hkʼaˇ chi ve teˇ hpaˍ htaꞈ henˇ yuˬ gʼa tuˬ teˇ geh kʼawꞈ nyi sheˍ. Yaˬhoˉvaˬ  ve te hkʼaˇ dawˇ hkʼaˇ htaꞈ henˇ yuˬ tuˬ ngaˬ hui coˇ caˇ ve kʼo, awˬ viˉ awˬ nyi yonˍ hkʼaˇ hpawˇ yonˍ yeˬ tuˬ ngaˬ hui ga piˇ gʼa ve yoˬ. Tawˇ pa haˉ te kʼo, Yeˍsuˆ Siˉmonˍ htaꞈ “Keˍhpaˆ” tehꞈ meh piˇ ve yoˬ. Chi (Heˍlaˍsaˆ hkawˇ “Peˍtruˆ”) tcuhˉ kuiˬ lehˬ “haˉ pui” htaꞈ kʼoˆ gaˇ ve yoˬ. (Yoˇhanˬ 1:42) Yeˍsuˆ Peˍtruˆ htaꞈ awˬ meh chi hkʼe meh piˇ ve lehˬ, Peˍtruˆ awˬ viˉ awˬ nyi htaꞈ awˬ gʼaˇ piˇ tuˬ a yeˇ uiˍ ve awˬ vuiˬ cawˬ leh Hkriꞈ yaˇ awˬ moˍ hkʼaw yonˍ yeˬ ve cawˬ tuˬ ga piˇ tuˬ kaꞈ awˬ vuiˬ cawˬ ve yoˬ. Hkriꞈ yaˇ awˬ moˍ hkʼaw ve nyi haꞈ shaˉ paˍ lehˬ “haˉ pui shiˍ lonˉ hkʼa shuˍ” hpehꞈ ve tehꞈ kʼoˆ taˍ ve yoˬ. Chi kʼoˆ gaˇ ve lehˬ, yawˇ hui Hkriꞈ yaˇ awˬ moˍ hkʼaw ve awˬ viˉ awˬ nyi htaꞈ haꞈ shaˉ ve yoˬ. (Iˉsaˍyaˆ 32:2) Yaꞈ hkʼaˇ, Yaˬhoˉvaˬ ve te hkʼaˇ dawˇ hkʼaˇ yeˬ jaˇ ve haˉ hpawˇ lonˉ hkʼe hpehꞈ ve htaꞈ ngaˬ hui henˇ yuˬ ve kʼo, Hkriꞈ yaˇ awˬ moˍ hkʼaw ve awˬ viˉ awˬ nyi teˇ gʼaˇ le le htaꞈ ngaˬ hui awˬ gʼaˇ piˇ gʼa ve yoˬ.—Eˇfeˇsuꞈ 5:1.

12. Ngaˬ hui awˬ viˉ awˬ nyi vaꞈ taˍ kuiˬ hkʼaˬ hkʼe te hpehꞈ gʼa tuˬ le?

¹² Vaꞈ taˍ kuiˬ hpehꞈ ve lehˬ mvuhˇ yeˬ mvuhˇ haw lonˉ maˇ heˆ leh maꞈ bawˆ daꞈ ve gʼa hpuˇ ve pa taw, awˬ viˉ awˬ nyi yehˬ luˬ kʼai ve maˇ heˆ leh yehˬ hkʼaw gʼa hpaw tawˆ˗e ve yoˬ. Leh ngaˬ hui awˬ viˉ awˬ nyi vaꞈ taˍ kuiˬ hpehꞈ piˇ gʼa tuˬ aˉ hkʼaw lo chehˇ la tcuh ve yoˬ. Leh “awˬ leh meuˇ ve awˬ nyi awˬ haˉ teˇ hpaˍ awˬ hkʼaw lo” haiˬ jaˇ ve awˬ ceuˬ gʼaˇ hteꞈ hpehꞈ la tuˬ yoˬ. Chi htaꞈ pa taw, awˬ viˉ awˬ nyi loˍ ve awˬ ceuˬ htaꞈ ngaˬ hui ga piˇ gʼa ve yoˬ. (2 Tiˆmoˉseˍ 3:1) Chi hkʼoˆ kaꞈ, awˬ viˉ awˬ nyi ve te hkʼaˇ dawˇ hkʼaˇ leh yonˍ hkʼaˇ hpawˇ kaꞈ ngaˬ hui ga piˇ gʼa sheˍ ve yoˬ. Ngaˬ hui te gʼa ve awˬ hkʼaˇ lehˬ, yawˇ hui htaꞈ ha lehˬ ha kʼa ve hkʼaw haꞈ yuˬ piˇ leh hpawnˬ daꞈ kuiˬ yehˬ hkʼaw nyi ma sha ve tawˇ yaw daꞈ ve yoˬ. Miˬ guiˬ chi hkʼoˆ lo haiˬ jaˇ ve chaw nyiˉ laˇ ve, chi hkʼe ve chaw teˇ hpaˍ geh ngaˬ hui gʼa chehˇ ve pa taw, awˬ viˉ awˬ nyi haꞈ pehnˇ ve, nyi ma sha ve, kawˆ tuˬ maˇ cawˬ ve htaꞈ gʼa tuˬ ngaˬ hui teˇ ceuˬ le le te piˇ gaˇ ve yoˬ.

13. Nyi haꞈ shaˉ paˍ lehˬ awˬ viˉ awˬ nyi vaꞈ taˍ kuiˬ hkʼaˬ hkʼe hpehꞈ gʼa ve le? (Awˬ han htaꞈ nyi sheˍ.)

¹³ Awˬ viˉ awˬ nyi mvuhˇ yeˬ mvuhˇ haw lonˉ maˇ heˆ leh, tuꞈ ve hkanˍ ve mvuhˇ yeˬ mvuhˇ haw lonˉ hkʼe ve gʼa hpuˇ htaˇ, nyi haꞈ shaˉ paˍ lehˬ awˬ viˉ awˬ nyi awˬ pon vaꞈ taˍ kuiˬ hpehꞈ ve yoˬ. Tawˇ pa haˉ te kʼo, awˬ viˉ awˬ nyi mvuhˇ yeˬ mvuhˇ haw lonˉ gʼa hpuˇ ve maˇ heˆ leh maˇ dawˇ maˇ gaˇ ve hkʼaw naˬ ve gʼa hpuˇ htaˇ, nyi haꞈ shaˉ paˍ lehˬ awˬ viˉ awˬ nyi chi teˇ hpaˍ htaꞈ laꞈ haˉ ga piˇ gʼa ve yoˬ. Chi hkʼoˆ kaꞈ, nyi haꞈ shaˉ paˍ lehˬ awˬ viˉ  awˬ nyi yonˍ hkʼaˇ hpawˇ kaꞈ ga piˇ gʼa sheˍ ve yoˬ. Nyi haꞈ shaˉ paˍ nyi ma nuˇ nehˬ ve, ha kʼaˉ puiˉ ve, leh awˬ viˉ awˬ nyi hkawˇ hkʼa dehꞈ na taˍ piˇ ve kʼo, awˬ viˉ awˬ nyi kaꞈ nyi haꞈ shaˉ paˍ htaꞈ ga laˇ tcuh gaˇ ve yoˬ. Te hkʼaˇ dawˇ hkʼaˇ chi ve teˇ hpaˍ lehˬ awˬ viˉ awˬ nyi nyi haꞈ shaˉ paˍ yawˇ hui htaꞈ haꞈ ve tehꞈ shiˍ tuˬ te piˇ leh nyi haꞈ shaˉ paˍ Liꞈ hpu htaꞈ cuˇ leh beˆ maˍ piˇ ve htaꞈ yawˇ hui gʼaꞈ te tuˬ sha ve yoˬ.—1 Hteˇsaˍlawˇniˆ 2:7, 8, 11.

14. Ngaˬ hui yonˍ gʼa ve chaw hpehꞈ ve tehꞈ hkʼaˬ hkʼe hpeuꞈ maw piˇ gʼa ve le?

¹⁴ Yonˍ gʼa ve chaw hpehꞈ ve lehˬ awˬ viˉ awˬ nyi tuꞈ ve hkanˍ ve gʼa hpuˇ htaˇ, ngaˬ hui ga piˇ gaˇ jaˇ ve tehꞈ yawˇ hui yonˍ gʼa tcuh sheˍ. (Tawˇ naˉ ve 17:17) Yonˍ gʼa ve chaw hpehꞈ tuˬ ngaˬ hui hkʼaˬ hkʼe gʼa te cawˇ ve le? Chi hkʼe te gʼa tuˬ, Yaˬhoˉvaˬ htaꞈ teˇ nyi le le coˇ caˇ leh henˇ yuˬ gʼa ve yoˬ. Tawˇ pa haˉ te kʼo, ngaˬ hui ka tiꞈ gʼa yeˬ leh kʼoˆ taˍ ve hkʼe gʼa gʼaꞈ te ve yoˬ. (Maꞈhtehˍ 5:37) Chi hkʼoˆ kaꞈ, awˬ viˉ awˬ nyi loˍ ve awˬ ceuˬ htaꞈ ngaˬ hui ga piˇ tuˬ kʼoˆ piˇ gʼa ve yoˬ. Chi hkʼe ceh tiˉ maˇ heˆ. Hkriꞈ yaˇ awˬ moˍ hkʼaw ngaˬ hui awˬ vuiˬ teˇ hpaˍ gʼa htaˇ, ngaˬ hui coˇ caˇ leh hkʼa dehꞈ te leh beˆ maˍ laˇ taˍ ve htaꞈ gʼaꞈ te sheˍ.

15. Nyi haꞈ shaˉ paˍ yonˍ gʼa ve chaw hpehꞈ htaˇ Hkriꞈ yaˇ awˬ moˍ hkʼaw aˬ htoꞈ ma awˬ bon gʼa ve le?

¹⁵ Yonˍ gʼa ve nyi haꞈ shaˉ paˍ lehˬ, Hkriꞈ yaˇ awˬ moˍ hkʼaw awˬ bon cawˬ tuˬ hkʼaˬ hkʼe ga piˇ gʼa ve le? Awˬ viˉ awˬ nyi loˍ htaˇ nyi haꞈ shaˉ paˍ htaꞈ hkʼaˬ htaˆ kaꞈ caˉ daꞈ gʼa ve tehꞈ awˬ viˉ awˬ nyi shiˍ htaˇ nyi ma sha jaˇ ve yoˬ. Leh nyi haꞈ shaˉ paˍ kaꞈ awˬ viˉ awˬ nyi htaꞈ ga piˇ gaˇ jaˇ ve yoˬ. Awˬ viˉ awˬ nyi htaꞈ beˆ maˍ piˇ tuˬ nyi haꞈ shaˉ paˍ lehˬ, Liꞈ hpu leh Gʼuiˬ sha ve kanˉ hkʼaˇ hkʼaw ve liꞈ teˇ hpaˍ htaꞈ yehˇ htaˇ, yawˇ hui ve dawˇ hkʼaˇ htaꞈ  maˇ yehˇ ve tehꞈ awˬ viˉ awˬ nyi shiˍ htaˇ yawˇ hui htaꞈ hkʼa dehꞈ yonˍ gʼa ve yoˬ. Chi hkʼoˆ kaꞈ, awˬ viˉ awˬ nyi shoꞈ shaꞈ ve awˬ lawn gʼa hpuˇ ve nyi haꞈ shaˉ paˍ htaꞈ kʼoˆ maˍ piˇ leh, nyi haꞈ shaˉ paˍ awˬ nu ve chaw htaꞈ maˇ kʼoˆ maˍ piˇ ve pa taw, awˬ viˉ awˬ nyi kaꞈ yawˇ hui htaꞈ hkʼa dehꞈ yonˍ gʼa ve yoˬ.

16. Ngaˬ hui yonˍ yeˬ ve chaw hpehꞈ ve kʼo, ngaˬ hui leh awˬ nu ve chaw aˬ htoꞈ ma awˬ bon gʼa tuˬ le?

¹⁶ Yonˍ yeˬ ve chaw hpehꞈ ve lehˬ ngaˬ hui Yaˬhoˉvaˬ ve hkawˇ teˇ lawn le le na yuˬ ve yoˬ. Leh dawˇ cheˆ htaˇ Liꞈ hpu hkʼaw ve awˬ liˇ awˬ hkʼaˇ htaꞈ yehˇ ve kʼo, ngaˬ hui awˬ nu ve chaw awˬ pon daꞈ ve henˇ yuˬ tuˬ hpehꞈ ve yoˬ. Ngaˬ hui Liꞈ hpu gʼaw ve, hkʼa dehꞈ hpfuhˆ nyi ve, yonˍ hkʼaˇ hpawˇ yonˍ yeˬ tuˬ te ve kʼo, Yaˬhoˉvaˬ leh yawˇ ve awˬ liˇ awˬ hkʼaˇ htaꞈ ka tiꞈ yeˬ tuˬ yoˬ. Ngaˬ hui chi hkʼe te ve kʼo, htawˇ dawˇ nawˬ dawˇ cawˬ ve chaw maˇ hpehꞈ leh, miˬ guiˬ hkʼoˆ lo chaw yaˇ maˍ yaꞈ ve leh chaw yaˇ ve dawˇ hkʼaˇ hkʼe ngaˬ hui maˇ te. (Eˇfeˇsuꞈ 4:14; Yaˍkoˆ 1:6-8) Ngaˬ hui Yaˬhoˉvaˬ leh yawˇ ve ka tiꞈ htaꞈ yonˍ ve kʼo, awˬ lawn sha tanˇ maˇ daꞈ ve gʼa kaˇ ve htawˇ, ngaˬ hui nyi ma gawˬ lehˍ cawˬ gʼa ve yoˬ. (Chiˇ mvuh ve 112:7, 8) Leh awˬ nu ve chaw shoꞈ shaꞈ ve awˬ lawn gʼa hpuˇ htaˇ kaꞈ, nyi ma gawˬ lehˍ ve cawˬ tuˬ ga piˇ gʼa ve yoˬ.—1 Hteˇsaˍlawˇniˆ 3:2, 3.

17. Nyi haꞈ shaˉ paˍ lehˬ awˬ viˉ awˬ nyi awˬ pon daꞈ ve henˇ yuˬ tuˬ aˬ htoꞈ ma ga piˇ gʼa ve le?

¹⁷ Nyi haꞈ shaˉ paˍ lehˬ a shu yawˇ awˬ to htaꞈ shawˍ nyi puiˉ ve, daꞈ ve te hkʼaˇ dawˇ hkʼaˇ cawˬ ve, hteˇ hteˇ shawˇ shawˇ cawˬ ve, leh awˬ hkʼaˇ ca puiˉ ve yoˬ. Nyi haꞈ shaˉ paˍ lehˬ, “ka tiꞈ yeˬ ve tawˇ hkawˇ htaꞈ yeˬ chaweh vawˆ taˍ ve chaw” hpehꞈ ve kʼo, yawˇ hui awˬ viˉ awˬ nyi awˬ pon daꞈ ve henˇ yuˬ tuˬ hpehꞈ leh yonˍ hkʼaˇ yonˍ yeˬ tuˬ kaꞈ ga piˇ gʼa ve yoˬ. (Tiˇtuˆ 1:9; 1 Tiˆmoˉseˍ 3:1-3) Nyi haꞈ shaˉ paˍ awˬ viˉ awˬ nyi htaꞈ awˬ gʼaˇ ca piˇ htaˇ, hpawnˬ daꞈ la tuˬ, Gʼuiˬ sha ve kanˉ te gʼa tuˬ, leh a shu yawˇ hkʼaˇ yawˇ Liꞈ hpu henˇ tuˬ kaꞈ ga piˇ gʼa ve yoˬ. Nyi haꞈ shaˉ paˍ lehˬ chi ve teˇ hpaˍ daꞈ ve henˇ yuˬ tuˬ gʼa hpehꞈ piˇ ve yoˬ. Awˬ viˉ awˬ nyi shoꞈ shaꞈ ve awˬ lawn cawˬ leh nyi ma maˇ sha htaˇ, awˬ viˉ awˬ nyi Yaˬhoˉvaˬ htaꞈ gʼaˇ va tuˬ yawˇ hui awˬ gʼaˇ piˇ gʼa leh Yaˬhoˉvaˬ ka tiꞈ te taˍ laˇ ve htaꞈ awˬ viˉ awˬ nyi dawˇ nyi tuˬ kaꞈ awˬ gʼaˇ piˇ gʼa ve yoˬ.

18. Aˬ htoꞈ ma te ngaˬ hui Yaˬhoˉvaˬ htaꞈ chiˇ mvuh leh yawˇ geh hkʼa dehꞈ meuˆ daꞈ gaˇ ve le? (Awˇ ceˍ awˇ fa “ Yaˬhoˉvaˬ geh hkʼa dehꞈ meuˆ daꞈ tuˬ ga laˇ ve awˬ hkʼaˇ” htaꞈ nyi sheˍ.)

¹⁸ Yaˬhoˉvaˬ ve te hkʼaˇ dawˇ hkʼaˇ daꞈ jaˇ ve htaꞈ ngaˬ hui gʼa henˇ˗oˬ htaˇ, jawˇ mawˇ Daˍviˆ kʼoˆ ve, “ngaˬ htaꞈ haꞈ shaˉ laˇ shehˍ hpaˇ Gʼuiˬ sha htaꞈ chiˇ mvuh˗o” tehꞈ ngaˬ hui kaꞈ kʼoˆ gaˇ ve yoˬ. (Chiˇ mvuh ve 144:1) Leh ngaˬ hui hkʼaˬ htaˆ kaꞈ Yaˬhoˉvaˬ htaꞈ gʼaˇ va gʼa ve yoˬ. Ngaˬ hui a shaꞈ maˇ la˗oˬ ve htawˇ, Yaˬhoˉvaˬ htaꞈ hkʼaˬ htaˆ kaꞈ gʼaˇ va gʼa leh yawˇ geh hkʼa dehꞈ meuˆ daꞈ tuˬ ga laˇ gʼa ve yoˬ. Leh ngaˬ hui kʼoˆ gʼa ve, ‘Yaˬhoˉvaˬ lehˬ ngaˬ hui htaꞈ haꞈ shaˉ laˇ shehˍ hpaˇ yeˬ jaˇ ve haˉ hpawˇ hkʼe hpehꞈ ve yoˬ.’—Chiˇ mvuh ve 92:14, 15.