AWˬ LAWN 23
KʼA MUIˬ HKAWˇ 28 Yaˬhoˉvaˬ ve awˬ chawˇ hpehꞈ ve
Yaˬhoˉvaˬ ngaˬ hui htaꞈ yawˇ ve hkehˉ chaw hpehꞈ tuˬ jehˬ laˇ ve
‘Oˇ kaˬ lo ngaˬ yawˇ hui geh chehˇ taˍ tuˬ yoˬ. Ngaˬ lehˬ yawˇ hui ve Gʼuiˬ sha hpehꞈ ve yoˬ.’—YEˍSAˍKEˍLAˆ 37:27.
A YEˇ UIˍ VE AWˬ LAWN
Yaˬhoˉvaˬ ve aˉ po kʼo hkʼaw hkehˉ chaw hpehꞈ la tuˬ aˬ htoꞈ ma kʼoˆ gaˇ ve, leh yawˇ ngaˬ hui htaꞈ hkʼaˬ hkʼe nyi haꞈ shaˉ laˇ ve ngaˬ hui na gʼa tuˬ ga laˇ ve yoˬ.
1-2. Yaˬhoˉvaˬ ve kanˉ ka tiꞈ yeˬ ve hkʼaw te ve chaw htaꞈ jehˬ piˇ ve tawˇ hkawˇ aˬ htoꞈ ma cawˬ ve le?
Yaˬhoˉvaˬ nawˬ awˬ pon aˬ htoꞈ ma hpehꞈ ve le? Nawˬ hkʼawꞈ piˇ ve, Yaˬhoˉvaˬ Awˬ pa hpehꞈ ve, Gʼuiˬ sha hpehꞈ ve, leh awˬ chawˇ hpehꞈ ve yoˬ. Chi hkʼoˆ kaꞈ, Yaˬhoˉvaˬ lehˬ nawˬ a shaꞈ teꞈ kuiˬ hkʼaw laiˉ ceuˬ hpehꞈ sheˍ ve yoˬ. Yaꞈ hkʼaˇ, Yaˬhoˉvaˬ nawˬ htaꞈ jehˬ laˇ shehˍ hpaˇ hpehꞈ ve tehꞈ nawˬ dawˇ jaw˗aw laˇ?
2 Jawˇ mawˇ Daˍviˆ Yaˬhoˉvaˬ lehˬ jehˬ laˇ shehˍ hpaˇ hpehꞈ ve, leh Yaˬhoˉvaˬ ve kanˉ ka tiꞈ yeˬ ve hkʼaw te ve chaw yawˇ ve hkehˉ chaw hpehꞈ ve tehꞈ tehˆ taˍ ve yoˬ. Daˍviˆ kʼoˆ ve, “Gʼuiˬ sha˗oˬ, nawˬ ve bon yehˬ hkʼaw a shu gʼa loꞈ˗e tuˬ ve le? Nawˬ ve daꞈ kehˬ ve Ziˉonˍ hkʼaw hkʼoˆ lo a shu oˉ kʼoˍ gʼa ca pui tuˬ le?” (Chiˇ mvuh ve 15:1) Tawˇ hkawˇ chi ngaˬ hui awˬ gʼaˇ gʼa jaˇ ve yoˬ. Ngaˬ hui Yaˬhoˉvaˬ ve hkehˉ chaw hpehꞈ ve, maˇ heˆ leh yawˇ ve awˬ chawˇ hpehꞈ gʼa ve tehꞈ gʼa mawˬ ve yoˬ. Yaˬhoˉvaˬ jehˬ laˇ ve tawˇ hkawˇ daꞈ jaˇ ve htaꞈ nawˬ gʼa mawˬ ve maˇ heˆ laˇ?
YAˬHOˉVAˬ NGAˬ HUI HTAꞈ YAWˇ VE HKEHˉ CHAW HPEHꞈ TCUH GAˇ VE
3. Yaˬhoˉvaˬ ve hkehˉ chaw awˉ lawˉ teˇ gʼaˇ a shu hpehꞈ ve le? Hkehˉ chaw chi teˇ gʼaˇ leh Yaˬhoˉvaˬ hkʼaˬ hkʼe meuˆ daꞈ ve le?
3 A shaꞈ teꞈ ve awˬ ceuˬ teˇ hpaˍ htaꞈ Yaˬhoˉvaˬ maˇ hpanˍ sheˍ htaˇ, yawˇ teˇ gʼaˇ ceh tiˉ a shaꞈ teꞈ chehˇ jaw ve yoˬ. Peuˬ hkʼawꞈ nawˉ Yaˬhoˉvaˬ yawˇ ve Yaˇ paˍ htaꞈ awˉ lawˉ hpanˍ leh yawˇ ve Yaˇ paˍ chi teˇ gʼaˇ yawˇ ve aˉ hkʼaw lo ve hkehˉ chaw te la tuˬ jehˬ piˇ ve yoˬ. Yaˬhoˉvaˬ yawˇ ve Yaˇ chi teˇ gʼaˇ htaꞈ “haꞈ” jaˇ ve yoˬ. Leh yawˇ ve Yaˇ chi teˇ gʼaˇ kaꞈ ‘Yaˬhoˉvaˬ geh hkʼaˬ htaˆ kaꞈ gʼa chehˇ ve ha lehˬ jaˇ ve yoˬ.’—Tawˇ naˉ ve 8:30.
4. Yaˬhoˉvaˬ yawˇ ve aˉ hkʼaw lo ve hkehˉ chaw hpehꞈ tuˬ a shu htaꞈ jehˬ piˇ sheˍ ve le?
4 Peuˬ hkʼawꞈ nawˉ Yaˬhoˉvaˬ mvuhˇ naw ma tcuh yaˇ htaꞈ hpanˍ leh yawˇ hui kaꞈ Yaˬhoˉvaˬ ve aˉ hkʼaw lo chehˇ la tuˬ jehˬ piˇ ve htaꞈ gʼa ve yoˬ. Liꞈ hpu hkʼaw mvuhˇ naw ma tcuh yaˇ chi teˇ hpaˍ htaꞈ Gʼuiˬ sha ve yaˇ tehꞈ kʼoˆ leh yawˇ hui Gʼuiˬ sha geh gʼa chehˇ ve ha lehˬ jaˇ ve yoˬ. (Yawˇbaˆ 38:7; Daˍyeˍlaˆ 7:10) Awˉ lawˉ htaˇ Yaˬhoˉvaˬ ve hkehˉ chaw mvuhˇ naw ma hkʼoˆ lo ceh tiˉ cawˬ ve yoˬ. Peuˬ hkʼawꞈ nawˉ Yaˬhoˉvaˬ lehˬ miˬ guiˬ hkʼoˆ lo ve chaw yaˇ htaꞈ hpanˍ leh yawˇ hui yawˇ ve hkehˉ chaw hpehꞈ la tuˬ awˬ yanˇ piˇ ve yoˬ. Tawˇ pa haˉ te kʼo, Eˇnawˆ, Noˉaꞈ, Aˍbraˍhanˍ, leh Yawˇbaˆ yawˇ hui hpehꞈ ve yoˬ. Liꞈ hpu hkʼaw kʼoˆ ve, chaw chi teˇ hpaˍ lehˬ Gʼuiˬ sha ve awˬ chawˇ hpehꞈ ve, maˇ heˆ leh yawˇ hui lehˬ Gʼuiˬ sha nyi hkʼaˇ suh tuˬ te piˇ ve yoˬ.—Awˬ hkuiˉ puiˍ 5:24; 6:9; Yawˇbaˆ 29:4; Iˉsaˍyaˆ 41:8.
5. Yeˍsaˍkeˍlaˆ liꞈ 37:26, 27 hkʼaw ve tcuh kaˍ paˍ tawˇ hkawˇ ngaˬ hui htaꞈ aˬ htoꞈ ma maˍ laˇ ve le?
5 Laiˉ hinˉ hkʼawꞈ peuˬ laˬ˗oˬ ve htawˇ, Yaˬhoˉvaˬ yawˇ ve awˬ chawˇ yawˇ ve hkehˉ chaw te la tuˬ jehˬ piˇ sheˍ ve yoˬ. (Yeˍsaˍkeˍlaˆ 37:26, 27 gʼaw sheˍ.) Tawˇ pa haˉ te kʼo, Yeˍsaˍkeˍlaˆ ve tcuh kaˍ paˍ tawˇ hkawˇ hkʼaw Yaˬhoˉvaˬ yawˇ ve kanˉ ka tiꞈ yeˬ ve hkʼaw te ve chaw yawˇ geh meuˆ daꞈ la tcuh gaˇ ve tehꞈ ngaˬ hui gʼa mawˬ ve yoˬ. Yaˬhoˉvaˬ “yawˇ hui htaꞈ ka tiꞈ te piˇ leh, yawˇ hui lehˬ co co taiˍ taiˍ gawˬ lehˍ gʼa chehˇ tuˬ yoˬ.” Tcuh kaˍ paˍ tawˇ hkawˇ chi mvuhˇ naw ma hkʼoˆ dawˇ law kuiˬ cawˬ ve chaw leh miˬ guiˬ hkʼoˆ dawˇ law kuiˬ cawˬ ve chaw Yaˬhoˉvaˬ ve aˉ hkʼaw lo “teˇ moˍ tiˉ” hpehꞈ la tuˬ awˬ yanˇ teˇ yanˇ cawˬ ve tehꞈ ngaˬ hui mawˬ tuˬ te laˇ ve yoˬ. (Yoˇhanˬ 10:16) Awˬ yanˇ teˇ yanˇ oˇ ve lehˬ chi teˇ hkui htaꞈ kaꞈ kʼoˆ gaˇ ve yoˬ!
NGAˬ HUI HKʼAˬ KAˬ LO CHEHˇ VE HTAWˇ YAˬHOˉVAˬ NYI HAꞈ SHAˉ LAˇ VE
6. Ngaˬ hui Yaˬhoˉvaˬ ve aˉ hkʼaw lo ve hkehˉ chaw hkʼaˬ hkʼe te hpehꞈ gʼa tuˬ le? Leh Yaˬhoˉvaˬ ve aˉ hkʼaw lehˬ hkʼaˬ kaˬ lo cawˬ ve le?
6 Liꞈ hpu ve awˬ co˗e htaˇ, aˉ po kʼo lehˬ gʼaˇ jehˇ kuiˬ maˇ heˆ leh kawˆ ve maˇ cawˬ tuˬ haꞈ shaˉ piˇ ve yoˬ. Maˇ˗awˍ ve kʼo, hkehˉ chaw aˉ po kʼo hkʼaw haˉ ve lehˬ, yehˬ shehˍ hpaˇ nyi haꞈ shaˉ laˇ ve htaꞈ dawˇ law taˍ ve yoˬ. Ngaˬ hui Yaˬhoˉvaˬ htaꞈ awˬ to chiˇ aꞈ piˇ˗oˬ htaˇ, ngaˬ hui kaꞈ Yaˬhoˉvaˬ ve aˉ hkʼaw lo hkehˉ chaw hpehꞈ la ve yoˬ. (Chiˇ mvuh ve 61:4) Ngaˬ hui caˇ tuˬ gʼa caˇ ve, maˇ heˆ leh yonˍ hkʼaˇ hpawˇ yonˍ yeˬ tuˬ cuˇ yiˍ maˇ maˇ gʼa leh, ngaˬ hui hkʼa shuˍ Yaˬhoˉvaˬ ve aˉ hkʼaw lo hkehˉ chaw hpehꞈ ve awˬ viˉ awˬ nyi geh gʼa chehˇ ve ha lehˬ jaˇ ve yoˬ. Yaꞈ hkʼaˇ, Yaˬhoˉvaˬ ve aˉ hkʼaw lehˬ, awˬ ti teˇ kaˬ kaˬ lo cawˬ ve htaꞈ kʼoˆ gaˇ ve maˇ heˆ. Nawˬ hkʼaˬ teˇ mvuhˇ miˬ lo kʼai ve, maˇ heˆ leh hpawnˬ daꞈ lonˉ hkʼaˬ kaˬ lo kʼai ve htawˇ maˇ kʼoˆ, Yaˬhoˉvaˬ ve aˉ hkʼaw lo chehˇ ve awˬ viˉ awˬ nyi htaꞈ gʼa mawˬ daꞈ ve ha lehˬ jaˇ. Miˬ guiˬ hkʼoˆ lo ngaˬ hui hkʼaˬ kaˬ lo chehˇ ve htawˇ maˇ kʼoˆ, Yaˬhoˉvaˬ ve kanˉ ka tiꞈ yeˬ ve hkʼaw te ve kʼo, yawˇ ve aˉ hkʼaw lo ve hkehˉ chaw hpehꞈ gʼa ve yoˬ.—Hpeuꞈ maˍ ve 21:3.
7. Yaˬhoˉvaˬ ve kanˉ ka tiꞈ yeˬ ve hkʼaw te ve suh˗oˬ ve chaw yawˇ ve aˉ hkʼaw lo ve hkehˉ chaw hpehꞈ sheˍ ve tehꞈ aˬ htoꞈ ma te ngaˬ hui kʼoˆ gʼa ve le? (Awˬ han htaꞈ nyi sheˍ.)
7 Yaˬhoˉvaˬ ve kanˉ ka tiꞈ yeˬ ve hkʼaw te ve chaw awˬ pon kʼo, suh˗oˬ ve chaw hkʼaˬ hkʼe hpehꞈ tuˬ le? Yawˇ hui Yaˬhoˉvaˬ ve aˉ hkʼaw lo ve hkehˉ chaw hpehꞈ sheˍ ve laˇ? Hpehꞈ sheˍ ve yoˬ. Aˬ htoꞈ ma te ngaˬ hui chi hkʼe kʼoˆ gʼa ve le? Awˬ lawn kʼo, Yaˬhoˉvaˬ awˬ pon yawˇ hui a shaꞈ teꞈ chehˇ sheˍ leh Yaˬhoˉvaˬ yawˇ hui htaꞈ maˇ leunˇ jaw. Yeˍsuˆ kʼoˆ ve, “suh ve chaw hui kʼawꞈ teꞈ tu la ve yoˬ tehꞈ, aˉ chuˇ buiˇ awˬ lawn bvuhꞈ taˍ ve teˇ tawn awˬ hkʼaw lo Moˉseˍ hpeuꞈ maˍ laˇ ve yoˬ. Yawˇ lehˬ Jawˇ mawˇ Gʼuiˬ sha htaꞈ, Aˍbraˍhanˍ ve Gʼuiˬ sha, Iˉcaˆ ve Gʼuiˬ sha leh Yaˍkoˆ ve Gʼuiˬ sha hpehꞈ ve yoˬ tehꞈ kʼoˆ taˍ ve yoˬ. Gʼuiˬ sha lehˬ suh peuˬ ve chaw hui ve Gʼuiˬ sha hpehꞈ ve maˇ heˆ. Teꞈ chehˇ ve chaw hui ve Gʼuiˬ sha hpehꞈ ve yoˬ. Yawˇ htaꞈ pa taw chaw hkʼa peu˗eˬ teꞈ chehˇ ve yoˬ tehꞈ, yawˇ hui htaꞈ kʼoˆ piˇ ve yoˬ.”—Luˉkaꞈ 20:37, 38.
Yaˬhoˉvaˬ ve kanˉ ka tiꞈ yeˬ ve hkʼaw te ve chaw suh˗oˬ ve htawˇ, yawˇ hui lehˬ yawˇ ve aˉ hkʼaw lo ve hkehˉ chaw hpehꞈ ve tehꞈ shawˍ sheˍ ve (Awˬ tawn 7 nyi sheˍ)
AWˬ VUIˬ CAWˬ HTAWˇ AWˬ BON GʼA VE
8. Yaˬhoˉvaˬ ve hkehˉ chaw yawˇ ve aˉ hkʼaw lo gʼa chehˇ ve aˬ htoꞈ ma awˬ bon gʼa ve le?
8 Aˉ po kʼo lehˬ gʼaˇ jehˇ kuiˬ leh kawˆ ve maˇ cawˬ tuˬ haꞈ shaˉ laˇ kuiˬ hkʼe hpehꞈ ve yoˬ. Yaˬhoˉvaˬ aˉ hkʼaw lo kaꞈ yawˇ ve hkehˉ chaw yawˇ hui Yaˬhoˉvaˬ geh meuˆ daꞈ ve htaꞈ heuˆ la kuiˬ maˇ cawˬ tuˬ haꞈ shaˉ piˇ leh awˬ gʼuˇ suhˍ hpawˇ dawˇ law kuiˬ htaꞈ caˉ daꞈ ve, yawˇ hui cawˬ tuˬ ga piˇ ve yoˬ. Ngaˬ hui Yaˬhoˉvaˬ geh meuˆ daꞈ htaˇ, maˇ meuˆ daꞈ tuˬ Saˍtanˍ co co taiˍ taiˍ te luˬ laˇ maˇ gʼa. (Chiˇ mvuh ve 31:23; 1 Yoˇhanˬ 3:8) Yawˇ hui Yaˬhoˉvaˬ geh meuˆ daꞈ ve ceh tiˉ haꞈ shaˉ piˇ ve maˇ heˆ. Miˬ guiˬ awˬ suhˉ hkʼaw Yaˬhoˉvaˬ yawˇ ve awˬ chawˇ htaꞈ caˉ leh haꞈ shaˉ piˇ tuˬ yoˬ. Yawˇ hui maˇ kʼawꞈ gʼa suh tuˬ kaꞈ ga piˇ tuˬ yoˬ.—Hpeuꞈ maˍ ve 21:4.
9. Yaˬhoˉvaˬ yawˇ ve hkehˉ chaw htaꞈ te hkʼaˇ dawˇ hkʼaˇ hkʼaˬ hkʼe ve cawˬ tcuh gaˇ ve le?
9 Yaˬhoˉvaˬ ve aˉ hkʼaw lo ngaˬ hui gʼa chehˇ ve ha lehˬ jaˇ ve yoˬ. Chi ve yawˇ geh hkʼaˬ htaˆ kaꞈ meuˆ daꞈ tuˬ te laˇ ve yoˬ. Yaˬhoˉvaˬ ve aˉ hkʼaw lo hkʼaˬ htaˆ kaꞈ hkehˉ chaw hpehꞈ gaˇ ve kʼo, ngaˬ hui hkʼaˬ hkʼe gʼa te cawˇ ve le? Tawˇ pa haˉ te kʼo, nawˬ htaꞈ yehˬ teˇ yehˬ hkʼaw laˬ tuˬ jehˬ laˇ ve kʼo, yehˬ shehˍ hpaˇ nawˬ htaꞈ aˬ htoꞈ ma te tcuh gaˇ ve nawˬ shiˍ gaˇ ve yoˬ. Tawˇ pa haˉ te kʼo, aˉ hkʼaw lo maˇ loꞈ˗e sheˍ htaˇ, yawˇ nawˬ htaꞈ hkuiˉ nuˆ hkehˆ teh tcuh gaˇ ve laˇ? Hkehˆ teh tcuh gaˇ ve kʼo, yawˇ te tcuh gaˇ ve hkʼe nawˬ gʼaꞈ te tuˬ yoˬ. Chi ve hkʼa shuˍ shuˍ, ngaˬ hui Yaˬhoˉvaˬ ve aˉ hkʼaw lo ve hkehˉ chaw hpehꞈ ve kʼo, chi ve hkʼaw ngaˬ hui caˉ leh chehˇ gʼa tuˬ yawˇ hkʼaˬ hkʼe te tcuh gaˇ ve ngaˬ hui gʼa shiˍ cawˇ ve yoˬ. Ngaˬ hui shiˍ˗oˬ ve kʼo, haꞈ pehnˇ ve lehˬ ngaˬ hui Yaˬhoˉvaˬ “nyi hkʼaˇ suh tuˬ” te piˇ gaˇ tuˬ te laˇ ve yoˬ. (Kawˇlawˇsehˇ 1:10) Yaˬhoˉvaˬ lehˬ ngaˬ hui ve awˬ chawˇ hpehꞈ ve tehꞈ shawˍ ve kʼo, yawˇ Gʼuiˬ sha hpehꞈ leh ngaˬ hui yawˆ yan keunˍ jaˇ ve Awˬ pa hpehꞈ ve tehꞈ maˇ leunˇ cawˇ ve yoˬ. (Chiˇ mvuh ve 25:14) Ngaˬ hui hkʼaˬ htaˆ kaꞈ chi hkʼe dawˇ ve kʼo, ngaˬ hui yawˇ htaꞈ yawˆ yan leh yawˇ a shu hpehꞈ ve htaꞈ maˇ leunˇ. Chi hkʼe te ve lehˬ, Gʼuiˬ sha maˇ dawˇ cawˇ ve awˬ ceuˬ htaꞈ ngaˬ hui maˇ te tuˬ ga laˇ ve yoˬ. Ngaˬ hui “nuˇ nehˬ ve awˬ hkʼaw lo Gʼuiˬ sha ve tawˇ hkawˇ htaꞈ na yuˬ” gaˇ ve yoˬ.—Miˆhkaˍ 6:8.
YAˬHOˉVAˬ IˉSAˍREˍLAˆ CHAW HTAꞈ HKʼA SHUˍ TE PIˇ VE
10-11. Yaˬhoˉvaˬ Iˉsaˍreˍlaˆ chaw htaꞈ Siˉnaˆ heh puiˉ hkʼaw lo te piˇ ve awˬ ceuˬ yawˇ chaw mehˆ hpfuhˇ htaꞈ maˇ nyi ve tehꞈ hkʼaˬ hkʼe hpeuꞈ maw piˇ ve le?
10 Yaˬhoˉvaˬ chaw mehˆ hpfuhˇ htaꞈ maˇ nyi ve yoˬ. Yawˇ ve hkehˉ chaw teˇ gʼaˇ le le htaꞈ hkʼa shuˍ te piˇ ve yoˬ. (Roˉmaꞈ 2:11) Yaˬhoˉvaˬ chaw mehˆ hpfuhˇ htaꞈ maˇ nyi ve tehꞈ ngaˬ hui hkʼa dehꞈ na gʼa ve yoˬ. Chi ve lehˬ, Iˉsaˍreˍlaˆ chaw Siˉnaˆ heh puiˉ hkʼaw lo chehˇ htaˇ, Gʼuiˬ sha yawˇ hui htaꞈ te piˇ ve awˬ ceuˬ ngaˬ hui shiˍ gʼa ve yoˬ.
11 Yaˬhoˉvaˬ Iˉsaˍreˍlaˆ chaw Eˇjiˇtuꞈ mvuhˇ miˬ lo awˬ ceˬ te ve htaꞈ ga piˇ peuˬ hkʼawꞈ nawˉ, yawˇ ve daꞈ kehˬ ve aˉ po kʼo hkʼaw lo kanˉ te la tuˬ paw hkuˇ teˇ hpaˍ leuˆ yuˬ ve yoˬ. Leh Yaˬhoˉvaˬ lehˬ, Leˍviˆ chaw daꞈ kehˬ ve aˉ po kʼo htaꞈ caˉ daꞈ ve awˬ nu ve kanˉ te tuˬ awˬ vuiˬ piˇ ve yoˬ. Daꞈ kehˬ ve aˉ po kʼo chi ve hkʼaw kanˉ te ve chaw, maˇ heˆ leh daꞈ kehˬ ve aˉ po kʼo chi ve awˬ paˇ lo maˇ chehˇ ve chaw Yaˬhoˉvaˬ hkʼa shuˍ nyi haꞈ shaˉ piˇ ve htaꞈ gʼa˗aw laˇ? Gʼa ve yoˬ. Awˬ lawn kʼo, Yaˬhoˉvaˬ chaw mehˆ hpfuhˇ htaꞈ maˇ nyi ve yoˬ.
12. Iˉsaˍreˍlaˆ chaw heh puiˉ hkʼaw lo chehˇ htaˇ, Yaˬhoˉvaˬ yawˇ hui htaꞈ hkʼa shuˍ nyi haꞈ shaˉ piˇ ve tehꞈ hkʼaˬ hkʼe hpeuꞈ maw laˇ ve le? (Tawˆ kʼai ve 40:38) (Awˬ han htaꞈ nyi sheˍ.)
12 Iˉsaˍreˍlaˆ chaw daꞈ kehˬ ve aˉ po kʼo hkʼaw kanˉ te ve chaw maˇ heˆ leh maˇ te ve chaw htawˇ, teˇ gʼaˇ le le Yaˬhoˉvaˬ geh meuˆ daꞈ gʼa ve yoˬ. Daˬ kehˬ ve aˉ po kʼo awˬ paˇ lo chehˇ ve maˇ heˆ leh maˇ chehˇ ve htawˇ, Yaˬhoˉvaˬ geh meuˆ daꞈ gʼa ve yoˬ. Tawˇ pa haˉ te kʼo, Iˉsaˍreˍlaˆ chaw ceuˬ hkʼa peu˗eˬ lehˬ, daꞈ kehˬ ve aˉ po kʼo hkʼoˆ lo mvuhˇ lawꞈ kʼaw kʼo moˬ yehˬ daw jehˇ taˍ leh, mvuhˇ hpeuꞈ kʼo aˬ miˍ yehˬ hkuiˉ daw jehˇ taˍ ve htaꞈ yawˇ hui mawˬ gʼa tuˬ Yaˬhoˉvaˬ te piˇ ve yoˬ. (Tawˆ kʼai ve 40:38 gʼaw sheˍ.) Hkʼaˬ hkʼe htaˇ leh moˬ yehˬ hkuiˉ daw jiˆ kʼai ve kʼo, daꞈ kehˬ ve aˉ po kʼo htaꞈ chehˇ vuiˇ ve chaw htawˇ mawˬ gʼa leh yawˇ hui ve mawˇ gu ve, fa la gʼawˆ gu leh teˇ geh kʼai ve yoˬ. (Heh puiˉ hkʼaw 9:15-23) Iˉsaˍreˍlaˆ chaw hkʼa peu˗eˬ hpu yuˬ leh behˬ heh ma 2 maˬ te taˍ ve meuˆ ve awˬ hkawˇ gʼa kaˇ htaˇ, awˬ gʼuˇ suhˍ kʼai tuˬ shiˍ gʼa ve yoˬ. (Heh puiˉ hkʼaw 10:2) Iˉsaˍreˍlaˆ chaw daꞈ kehˬ ve aˉ po kʼo awˬ paˇ lo chehˇ ve maˇ heˆ leh maˇ chehˇ ve chaw htawˇ, Yaˬhoˉvaˬ geh hkʼa shuˍ meuˆ daꞈ ve tehꞈ gʼa mawˬ ve yoˬ. Yaꞈ hkʼaˇ, yawˇ hui hkʼa peu˗eˬ Yaˬhoˉvaˬ ve hkehˉ chaw hpehꞈ ve pa taw, beˆ maˍ piˇ ve htaꞈ gʼa ve, leh haꞈ shaˉ piˇ ve kaꞈ hkʼa shuˍ gʼa ve yoˬ. Chi beuꞈ teˇ co˗e kaꞈ hkʼa shuˍ, miˬ guiˬ hkʼoˆ hkʼaˬ kaˬ lo chehˇ ve htawˇ maˇ kʼoˆ, Yaˬhoˉvaˬ haꞈ pehnˇ ve hkʼaw hkʼa shuˍ nyi haꞈ shaˉ laˇ ve htaꞈ gʼa ve yoˬ.
Yaˬhoˉvaˬ ve daꞈ kehˬ ve aˉ po kʼo htaꞈ caˉ daꞈ ve gu teh taˍ laˇ ve yawˇ teˇ gʼaˇ le le htaꞈ hkʼa shuˍ te piˇ ve tehꞈ hpeuꞈ maw laˇ ve (Awˬ tawn 12 nyi sheˍ)
CHI BEUꞈ TEˇ CO˗E KAꞈ YAˬHOˉVAˬ NGAˬ HUI HTAꞈ HKʼA SHUˍ TE LAˇ VE
13. Chi beuꞈ teˇ co˗e Yaˬhoˉvaˬ teˇ gʼaˇ le le htaꞈ hkʼa shuˍ te piˇ ve tehꞈ hpeuꞈ maw laˇ ve aˬ htoꞈ ma le?
13 Chi beuꞈ teˇ co˗e ve awˬ viˉ awˬ nyi teˇ hpaˍ Yaˬhoˉvaˬ ve ShaˉHkiˆhkanˍ ve chaw ve awˬ tcuhˆ puiˍ lonˉ hkʼaw kanˉ ve, maˇ heˆ leh Beˍteˍlaˆ hkʼaw te ve yoˬ. Awˬ viˉ awˬ nyi teˇ hpaˍ kʼo, chi ve teˇ hpaˍ awˬ paˇ lo chehˇ ve yoˬ. Chi ve yawˇ hui awˬ tcuhˆ puiˍ hkʼaw kanˉ laiˉ ceuˬ ga piˇ gʼa leh Gʼuiˬ sha ve kanˉ hkʼaˇ hkʼaw sheh kʼai paˍ geh kaꞈ meuˆ daꞈ ve yoˬ. Chi hkʼoˆ kaꞈ, teˇ hpaˍ kʼo toˇ nyi shehˍ hpaˇ maˇ heˆ leh Gʼuiˬ sha ve kanˉ awˬ nu ve awˬ ceuˬ awˬ yanˇ hkʼa biˇ te ve yoˬ. Nawˬ awˬ viˉ awˬ nyi hpehꞈ leh awˬ tcuhˆ puiˍ paˇ lo maˇ chehˇ ve pa taw, kanˉ chi ve teˇ hpaˍ maˇ gʼa te ve kʼo, nawˬ Yaˬhoˉvaˬ ve hkehˉ chaw hpehꞈ sheˍ leh yawˇ ve kanˉ te ve chaw teˇ gʼaˇ le le htaꞈ hkʼa shuˍ haꞈ ve tehꞈ nawˬ yonˍ gʼa ve yoˬ. (1 Peˍtruˆ 5:7) Gʼuiˬ sha ve kanˉ te ve chaw yonˍ hkʼaˇ hpawˇ ve cuˇ yiˍ gʼa ve, beˆ maˍ laˇ ve htaꞈ gʼa ve, leh teˇ gʼaˇ le le hkʼa shuˍ haꞈ shaˉ laˇ ve htaꞈ kaꞈ gʼa ve yoˬ.
14. Yaˬhoˉvaˬ teˇ gʼaˇ le le htaꞈ hkʼa shuˍ te piˇ ve tehꞈ hpeuꞈ maw laˇ ve awˬ hkʼaˇ lehˬ aˬ htoꞈ ma le?
14 Yaˬhoˉvaˬ teˇ gʼaˇ le le htaꞈ hkʼa shuˍ te piˇ ve hpeuꞈ maw laˇ ve awˬ hkʼaˇ lehˬ, miˬ guiˬ chi hkʼoˆ lo aˬ htoꞈ ma ve tawˇ hkawˇ yaw ve htawˇ maˇ kʼoˆ, teˇ gʼaˇ le le Liꞈ hpu ca leh gʼaw gʼa ve yoˬ. Awˉ lawˉ htaˇ Liꞈ hpu lehˬ, Heˍbrehˇ hkawˇ, Aˍraˍmiˆ hkawˇ, Heˍlaˍsaˆ hkawˇ cawˬ tcuh ve yoˬ. Yaꞈ hkʼaˇ, Liꞈ hpu chi teˇ hpaˍ gʼaw gʼa ve chaw, maˇ gʼaw gʼa ve chaw aꞈ kehˉ, Yaˬhoˉvaˬ geh meuˆ daꞈ ve laˇ? Maˇ heˆ.—Maꞈhtehˍ 11:25.
15. Yaˬhoˉvaˬ teˇ gʼaˇ le le htaꞈ hkʼa shuˍ te piˇ ve tehꞈ shaˉ hkiˆ mawˬ tuˬ aˬ htoꞈ ma hpeuꞈ maw laˇ ve le? (Awˬ han htaꞈ nyi sheˍ.)
15 Ngaˬ hui Yaˬhoˉvaˬ haꞈ yuˬ laˇ tuˬ maˇ haꞈ yuˬ laˇ tuˬ, liꞈ hkʼaˬ hkʼe mvuh henˇ ve maˇ heˆ leh Liꞈ hpu Heˍbrehˇ hkawˇ, Aˍraˍmiˆ hkawˇ, Heˍlaˍsaˆ hkawˇ gʼaw ve htaꞈ cawˬ ve maˇ heˆ. Yaˬhoˉvaˬ Liꞈ hpu cawˬ tcuh laˇ ve lehˬ, yawˇ ve cuˇ yiˍ liꞈ tanˇ mvuh ve chaw htaꞈ shiˍ tcuh ve aꞈ kehˉ, Liꞈ hpu laiˉ hinˉ chaw ceuˬ tawˇ hkawˇ yuˬ tawˆ tcuh leh miˬ guiˬ hkʼoˆ lo chehˇ ve teˇ gʼaˇ le le Liꞈ hpu ca leh gʼaw gʼa tcuh ve yoˬ. Teˇ gʼaˇ le le Liꞈ hpu hkʼaw maˍ laˇ ve tawˇ hkawˇ htaꞈ awˬ bon gʼa leh, yawˇ hui hkʼaˬ hkʼe te Yaˬhoˉvaˬ geh awˬ chawˇ te la tuˬ te piˇ ve yoˬ.—2 Tiˆmoˉseˍ 3:16, 17.
Yaˬhoˉvaˬ teˇ gʼaˇ le le htaꞈ Liꞈ hpu ca leh gʼaw gʼa tcuh ve lehˬ, yawˇ teˇ gʼaˇ le le htaꞈ hkʼa shuˍ te piˇ ve tehꞈ hkʼaˬ hkʼe hpeuꞈ maw laˇ ve le? (Awˬ tawn 15 nyi sheˍ)
YAˬHOˉVAˬ “NYI MA CAWˇ VE” CHAW CAˉ LEH HPEHꞈ SHEˍ
16. Tcuh yaˇ liꞈ 10:34, 35 hkʼaw kʼoˆ taˍ ve hkʼe, ngaˬ hui caˉ leh Yaˬhoˉvaˬ haꞈ yuˬ laˇ ve chaw hkʼaˬ hkʼe te hpehꞈ gʼa tuˬ le?
16 Ngaˬ hui Yaˬhoˉvaˬ ve aˉ hkʼaw lo ve hkehˉ chaw gʼa hpehꞈ ve daꞈ jaˇ ve awˬ vuiˬ gʼa ve yoˬ. Yawˇ lehˬ nyi ma daꞈ jaˇ ve yehˬ shehˍ hpaˇ hpehꞈ ve, ngaˬ hui htaꞈ haꞈ jaˇ ve, leh ngaˬ hui htaꞈ hkʼa dehꞈ haꞈ yuˬ laˇ ve yoˬ. Chi hkʼoˆ kaꞈ, ngaˬ hui hkʼaˬ kaˬ lo laˬ ve maˇ heˆ leh chaw liˇ vaˇ liˇ hkʼaˬ hkʼe hpehꞈ ve htawˇ, yawˇ ngaˬ hui teˇ gʼaˇ le le htaꞈ hkʼa shuˍ te laˇ leh haꞈ yuˬ laˇ ve yoˬ. Liꞈ henˇ mvuh ve, mvuhˇ miˬ maˇ shuˍ daꞈ ve, chaw ceuˬ maˇ shuˍ daꞈ ve, a shaꞈ maˇ shuˍ daꞈ ve, maˇ heˆ leh hawˉ hkʼaˆ yaˇ miˇ, chi ve teˇ hpaˍ peun daꞈ ve htawˇ, ngaˬ hui Yaˬhoˉvaˬ ve hkehˉ chaw hpehꞈ gʼa ve yoˬ. Hkʼe te leh, ngaˬ hui yawˇ ve tawˇ hkawˇ htaꞈ na yuˬ leh yawˇ ve awˬ liˇ awˬ hkʼaˇ htaꞈ gʼaꞈ te cawˇ ve yoˬ.—Tcuh yaˇ 10:34, 35 gʼaw sheˍ.
17. Yaˬhoˉvaˬ aˉ hkʼaw lo ve a shu hkehˉ chaw hpehꞈ tuˬ hkʼawꞈ laˇ hkawˇ hkʼaˬ kaˬ lo ca gʼa ve le?
17 Chiˇ mvuh ve liꞈ 15:1 hkʼaw Daˍviˆ na ve, “Gʼuiˬ sha˗oˬ, nawˬ ve bon yehˬ hkʼaw a shu gʼa loꞈ˗e tuˬ ve le? Nawˬ ve daꞈ kehˬ ve Ziˉonˍ hkʼaw hkʼoˆ lo a shu oˉ kʼoˍ gʼa ca pui tuˬ le?” Leh Yaˬhoˉvaˬ kaꞈ Chiˇ mvuh ve liꞈ kaˇ nanˉ uiˍ 15 Daˍviˆ na ve na hkawˇ htaꞈ hkʼawꞈ piˇ ve yoˬ. Gʼuˇ suhˍ teˇ lawn hkʼaw Yaˬhoˉvaˬ haꞈ yuˬ laˇ ve chaw caˉ leh hpehꞈ tuˬ, ngaˬ hui gʼa te cawˇ ve teˇ ceuˬ ceuˬ htaꞈ teˇ geh henˇ tuˬ yoˬ.
KʼA MUIˬ HKAWˇ 32 Yaˬhoˉvaˬ hpawˇ chehˇ˗oˆ
