Gʼaw ve chaw na nyi hkawˇ
Chiˇ mvuh ve liꞈ 12:7 hkʼaw hkʼaˬ hkʼe kʼoˆ gaˇ ve le? Chi ve tcuhˉ kuiˬ lehˬ, “haˍ ve gʼawˇ ve chaw” (kaˇ nanˉ ehˉ 5) kʼoˆ gaˇ ve laˇ, maˇ heˆ leh “Gʼuiˬ sha ve ka tiꞈ tawˇ hkawˇ” (kaˇ nanˉ ehˉ 6) kʼoˆ gaˇ ve laˇ?
Liꞈ hpu chi ve teˇ puꞈ lehˬ, Liꞈ hpu chi ve teˇ tawn hkʼaw chaw htaꞈ kʼoˆ gaˇ ve tehꞈ shiˍ tuˬ te laˇ ve yoˬ.
Chiˇ mvuh ve liꞈ 12:1-4 hkʼaw kʼoˆ ve, “hteˇ ve cawˇ ve chaw teˇ gʼaˇ htaꞈ htawˇ ca maˇ mawˬ.” Leh Chiˇ mvuh ve liꞈ 12:5-7 hkʼaw kʼoˆ sheˍ ve.
‘Gʼuiˬ sha kʼoˆ ve, haˍ ve gʼawˇ ve chaw teˇ hpaˍ fawˉ mehˍ ve htaꞈ gʼa hkanˍ ve,
Leh haˍ ve gʼawˇ ve chaw nyi ma nuˇ nehˬ ve,
Yawˇ hui dawˇ law chehˇ ve gawˬ lehˍ ve awˬ ceuˬ,
Ngaˬ yawˇ hui htaꞈ piˇ tuˬ yoˬ.
Gʼuiˬ sha ve ka tiꞈ tawˇ hkawˇ teˇ hpaˍ htaꞈ yonˍ hpehꞈ ve,
Aˬ miˍ hkʼaw lo suhˍ pawˆ hkʼa gaˬ lawˍ taˍ peuˬ ve hpu,
Gʼuiˬ sha˗oˬ, ngaˬ hui htaꞈ hkʼaˬ htaˆ kaꞈ haꞈ shaˉ taˍ laˇ˗oˆ.
Chaw oˇ hkʼe ve teˇ hpaˍ ve laꞈ sheh hkʼaw lo a ciˉ ponˬ laˇ˗oˆ.’
Kaˇ nanˉ ehˉ 5 hkʼaw haˍ ve gʼawˇ ve chaw htaꞈ Yaˬhoˉvaˬ ga piˇ tuˬ ve awˬ ceuˬ htaꞈ kʼoˆ taˍ ve yoˬ.
Kaˇ nanˉ ehˉ 6 hkʼaw kʼoˆ ve, ‘Gʼuiˬ sha ve ka tiꞈ tawˇ hkawˇ aˬ miˍ hkʼaw lawˍ taˍ ve hpu hkʼa shuˍ daꞈ kehˬ ve yoˬ.’ Gʼuiˬ sha ve kanˉ te ve chaw teˇ gʼaˇ le le tawˇ hkawˇ chi htaꞈ yonˍ gʼa ve yoˬ.—Chiˇ mvuh ve 18:30; 119:140.
Chi teˇ hkui Chiˇ mvuh ve liꞈ 12:7 hkʼaw teˇ geh nyi sheˍ. Liꞈ hpu teˇ hpaˍ hpaˍ chi ve teˇ tawn hkʼaw kʼoˆ ve Yaˬhoˉvaˬ yawˇ ve chaw htaꞈ haꞈ shaˉ ve maˇ heˆ, yawˇ ve tawˇ hkawˇ htaꞈ haꞈ shaˉ ve yoˬ. Awˬ lawn kʼo, kaˇ nanˉ ehˉ 6 lehˬ kaˇ nanˉ ehˉ 7 gʼuˇ suhˍ lo cawˬ leh Gʼuiˬ sha ve ka tiꞈ tawˇ hkawˇ htaꞈ kʼoˆ taˍ ve yoˬ. Tawˍ taˍ paˍ laiˉ gʼaˇ Liꞈ hpu maˇ cawˬ tuˬ tawˍ leh te luˬ ve htawˇ, Yaˬhoˉvaˬ Liꞈ hpu htaꞈ ‘haꞈ shaˉ ve’ tehꞈ ngaˬ hui shiˍ ve yoˬ.—Iˉsaˍyaˆ 40:8; 1 Peˍtruˆ 1:25.
Chi hkʼe hpehꞈ ve htawˇ, kaˇ nanˉ ehˉ 5 hkʼaw kʼoˆ taˍ ve chaw htaꞈ kaꞈ Yaˬhoˉvaˬ haꞈ shaˉ piˇ sheˍ ve yoˬ. “Haˍ ve gʼawˇ ve chaw teˇ hpaˍ fawˉ mehˍ ve htaꞈ gʼa hkanˍ” ve chaw htaꞈ Yaˬhoˉvaˬ ga piˇ leh haꞈ shaˉ piˇ jaw˗oˬ ve yoˬ. Leh Yaˬhoˉvaˬ caˉ leh chi hkʼe te tuˬ yoˬ.—Yawˇbaˆ 36:15; Chiˇ mvuh ve 6:4; 31:1, 2; 54:7; 145:20.
Hkʼe te leh, aˬ htoꞈ ma te kaˇ nanˉ ehˉ 7 hkʼaw chaw htaꞈ kʼoˆ taˍ ve tehꞈ ngaˬ hui yonˍ gʼa ve le?
Ngaˬ hui chi hkʼe kʼoˆ gʼa ve lehˬ, Chiˇ mvuh ve liꞈ kaˇ nanˉ uiˍ 12 hkʼaw ngaˬ hui shiˍ tuˬ te laˇ ve pa taw yoˬ.
Chiˇ mvuh ve liꞈ 12:1 hkʼaw kʼoˆ ve, “hteˇ ve cawˇ ve chaw” htaꞈ caˉ daꞈ ve heˍ ve tawˇ hkawˇ awˬ nu ve chaw kʼoˆ sheˍ ve yoˬ. Leh peuˬ hkʼawꞈ nawˉ kʼawꞈ kʼoˆ ve, Yaˬhoˉvaˬ ve kanˉ te ve chaw htaꞈ caˉ daꞈ ve maˇ daꞈ ve kʼoˆ ve chaw htaꞈ yawˇ te luˬ piˇ tuˬ yoˬ. Chiˇ mvuh ve liꞈ chi teˇ puꞈ hkʼaw ngaˬ hui yonˍ gʼa tuˬ ka tiꞈ te taˍ laˇ ve, Yaˬhoˉvaˬ yawˇ ve chaw htaꞈ ga piˇ tuˬ yoˬ. Awˬ lawn kʼo, Gʼuiˬ sha ve ka tiꞈ tawˇ hkawˇ daꞈ jaˇ ve yoˬ.
Kaˇ nanˉ ehˉ 7 hkʼaw kʼoˆ ve, “haˍ ve gʼawˇ ve chaw” htaꞈ haiˬ ve chaw hui ve laꞈ sheh hkʼaw Yaˬhoˉvaˬ ponˬ piˇ tuˬ yoˬ.
Hkʼe kʼo, aˬ htoꞈ ma te Liꞈ hpu teˇ hpaˍ hpaˍ chi ve teˇ tawn hkʼaw Yaˬhoˉvaˬ yawˇ ve chaw htaꞈ haꞈ shaˉ ve maˇ heˆ, yawˇ ve tawˇ hkawˇ htaꞈ haꞈ shaˉ ve tehꞈ kʼoˆ ve le? Awˬ lawn kʼo Heˍbrehˇ ve Liꞈ hpu teˇ hpaˍ hkʼaw chi hkʼe kʼoˆ ve tehꞈ yawˇ hui dawˇ ve yoˬ. Yaꞈ hkʼaˇ, Sehˆhtu˗aˬcinˬ (Septuagint) ve liꞈ hkʼaw Heˍlaˍsaˆ hkawˇ hkʼaw “ngaˬ hui” tehꞈ kʼoˆ ve tawˇ hkawˇ 2 pawˆ yehˇ ve yoˬ. Chi ve lehˬ haˍ ve gʼawˇ ve chaw fawˉ ve mehˍ ve gʼa hkanˍ ve htaꞈ kʼoˆ gaˇ ve yoˬ. Kaˇ nanˉ ehˉ 7 hkʼaw kʼoˆ sheˍ ve, haiˬ ve awˬ ceuˬ htaꞈ gʼa ga piˇ ve “chaw oˇ hkʼe” ve geh yawˇ hui htaꞈ ponˬ piˇ tuˬ Yaˬhoˉvaˬ ga piˇ tuˬ yoˬ. (Chiˇ mvuh ve 12:7, 8) Kaˇ nanˉ ehˉ 7 hkʼaw Aˍraˍmiˆ ve tawˇ hkawˇ Hta˗kon (Targums) liꞈ hk’aw kʼoˆ ve, “Jawˇ mawˇ Gʼuiˬ sha lehˬ hteˇ ve cawˇ ve chaw htaꞈ haꞈ shaˉ piˇ tuˬ yoˬ. Chi beuꞈ teˇ co˗e haiˬ ve chaw geh yawˇ hui htaꞈ Gʼuiˬ sha ponˬ piˇ tuˬ ve yoˬ.” Kaˇ nanˉ ehˉ 7 hkʼaw Gʼuiˬ sha ve tawˇ hkawˇ hpehꞈ ve maˇ heˆ tehꞈ, chi ngaˬ hui mawˬ tuˬ shaˉ hkiˆ hpehꞈ ve yoˬ.
Chi htaꞈ pa taw, Liꞈ hpu chi teˇ tawn hkʼaw “hteˇ ve cawˇ ve chaw” lehˬ, Yaˬhoˉvaˬ yawˇ hui htaꞈ ga laˇ tuˬ yoˬ tehꞈ yonˍ gʼa ve yoˬ.
