1-2. (a) Maꞈhtehˍ liꞈ 28:18-20 hkʼaw Yeˍsuˆ kʼoˆ laˇ ve Hkriꞈ yaˇ ve awˬ vuiˬ a yeˇ uiˍ jaˇ ve aˬ htoꞈ ma le? (b) Awˬ lawn chi ve hkʼaw aˬ htoꞈ ma na hkawˇ htaꞈ teˇ geh henˇ tuˬ le?

 Yeˍsuˆ teꞈ tu la peuˬ hkʼawꞈ nawˉ, awˬ laꞈ gʼawˇ hui hkʼaw pui hkʼoˆ lo laˬ tuˬ Yeˍsuˆ kʼoˆ piˇ ve yoˬ. Yawˇ hui ha lehˬ jaˇ tuˬ yoˬ. (Maꞈhtehˍ 28:16) Chi lehˬ “awˬ viˉ awˬ nyi 500 gʼaˇ hpaˆ htaꞈ kaꞈ yawˇ awˬ to kʼawꞈ maw piˇ” htaˇ yoˬ hehˉ. (1 Kawˇrenˍhtuˆ 15:6) Aˬ htoꞈ ma te Yeˍsuˆ yawˇ hui htaꞈ kuˬ piˇ ve le? Yawˇ hui htaꞈ ha lehˬ jaˇ ve awˬ vuiˬ piˇ tuˬ yoˬ. Yawˇ kʼoˆ ve, “nawˬ hui kʼai leh, chaw ceuˬ hkʼa peu˗eˬ ngaˬ ve awˬ laꞈ gʼawˇ hpehꞈ la tuˬ ca te˗o.”—Maꞈhtehˍ 28:18-20 gʼaw sheˍ.

² Yeˍsuˆ kʼoˆ ve chi htaꞈ gʼa kaˇ ve awˬ laꞈ gʼawˇ hui lehˬ, awˉ lawˉ peuˇ ve Hkriꞈ yaˇ awˬ moˍ hkʼaw ca chehˇ la ve yoˬ. Yawˇ hui ve awˬ vuiˬ lehˬ shu awˬ laꞈ gʼawˇ hpehꞈ la tuˬ ca te ve yoˬ. * Chi beuꞈ teˇ co˗e Hkriꞈ yaˇ awˬ moˍ hkʼa peu˗eˬ teˇ shehnˉ kaˬ hpaˆ cawˬ leh oˇ htaˇ leh chi beuꞈ kaꞈ awˬ vuiˬ shuˍ daꞈ ve yoˬ. Awˬ lawn chi ve hkʼaw ngaˬ hui na hkawˇ 4 maˬ htaꞈ hkʼawꞈ tuˬ yoˬ. Aˬ htoꞈ ma te shu awˬ laꞈ gʼawˇ hpehꞈ la tuˬ ca te ve a yeˇ uiˍ jaˇ ve le? Shu awˬ laꞈ gʼawˇ hpehꞈ la tuˬ ngaˬ hui hkʼaˬ hkʼe gʼa te cawˇ ve le? Hkriꞈ yaˇ teˇ gʼaˇ le le kanˉ chi te tuˬ awˬ vuiˬ cawˬ˗aw laˇ? Kanˉ chi te tuˬ aˬ htoꞈ ma te ngaˬ hui gʼa yeunˇ hkanˍ cawˇ ve le?

3. Yoˇhanˬ liꞈ 14:6 leh 17:3 hkʼaw kʼoˆ taˍ ve hkʼe, aˬ htoꞈ ma te shu awˬ laꞈ gʼawˇ hpehꞈ la tuˬ ca te ve a yeˇ uiˍ jaˇ ve le?

³ Aˬ htoꞈ ma te shu awˬ laꞈ gʼawˇ hpehꞈ la tuˬ ca te ve a yeˇ uiˍ jaˇ ve le? Ngaˬ hui Gʼuiˬ sha ve awˬ chawˇ hpehꞈ gʼa tuˬ, yawˇ Yeˍsuˆ ve awˬ laꞈ gʼawˇ gʼa hpehꞈ ve yoˬ. Chi hkʼoˆ kaꞈ Yeˍsuˆ awˬ hkʼaˇ suhˍ gʼaꞈ yuˬ ve chaw lehˬ, chi teˇ hkui kaꞈ a shaꞈ teꞈ hkʼaˇ ha lehˬ leh awˬ gʼuˇ suhˍ hpawˇ htawˇ co co taiˍ taiˍ a shaꞈ gʼa tuˬ yoˬ. (Yoˇhanˬ 14:6; 17:3 gʼaw sheˍ) Yeˍsuˆ a yeˇ uiˍ jaˇ ve awˬ vuiˬ chi ngaˬ hui htaꞈ peꞈ laˇ ve yoˬ. Yaꞈ hkʼaˇ, kanˉ chi ngaˬ hui hkʼaˇ ngaˬ hui te maˇ gʼa. Tcuh yaˇ Pawˇluꞈ Hkriꞈ yaˇ htaꞈ kʼoˆ piˇ ve, “teˇ geh Gʼuiˬ sha ve kanˉ te shehˍ hpaˇ hpehꞈ ve yoˬ.” (1 Kawˇrenˍhtuˆ 3:9) Chaw yaˇ maˇ biˇ ve htawˇ, Yaˬhoˉvaˬ leh Yeˍsuˆ geh kanˉ teˇ geh gʼa te ve daꞈ jaˇ ve awˬ vuiˬ hpehꞈ ve yoˬ!

4. I˗vehˆ leh Maˆtiˬdehˆ ve awˬ lawn ngaˬ hui htaꞈ aˬ htoꞈ ma maˍ laˇ ve le?

⁴ Shu awˬ laꞈ gʼawˇ hpehꞈ la tuˬ ngaˬ hui maˍ piˇ ve ha lehˬ jaˇ. Koˬlam˗biˬ˗a mvuhˇ miˬ lo chehˇ ve I˗vehˆ leh Maˆtiˬdehˆ ve awˬ lawn htaꞈ dawˇ nyi sheˍ. Yawˇ hui yaˇ nehˬ teˇ gʼaˇ Deh˗vi˗uˇ htaꞈ hto maˍ piˇ ve yoˬ. Yaˇ nehˬ chi teˇ gʼaˇ yawˇ hui htaꞈ kʼoˆ piˇ ve, “ngaˬ awˬ to pa gaˇ ve, hkʼaˬ hkʼe te kaꞈ pa maˇ gʼa.” Deh˗vi˗uˇ chu˗eˬ daꞈ ve, naˆ tsuhˆ awˬ yeꞈ caˆ ve, tzuhˬ dawˬ bvuhˆ ve, leh yawˇ maˇ heuˆ daꞈ sheˍ ve yaˇ miˇ haˉ Eh˗riˇkaꞈ geh chehˇ ve yoˬ. I˗vehˆ kʼoˆ ve, “Deh˗vi˗uˇ ve hkʼaˆ vuiˇ jaˇ kuiˬ lo yawˇ geh Liꞈ hpu ca maˍ˗e tuˬ, Jeꞈ nehˆ nehˉ jaˇ ve ngaˬ hui laiˉ naˍ riˍ sho kuˇ gʼaꞈ kʼai ve yoˬ. Peuˬ leh Eh˗riˇkaꞈ yawˇ ve chaw haˉ te hkʼaˇ dawˇ hkʼaˇ pa ve htaꞈ gʼa mawˬ htaˇ yawˇ kaꞈ Liꞈ hpu henˇ ve yoˬ.” Awˬ leh meuˇ htaˇ, Deh˗vi˗uˇ kaꞈ naˆ tsuhˇ yeꞈ maˇ caˆ˗o, leh tzuhˬ maˇ dawˬ˗o, leh maˇ chu˗eˬ daꞈ˗o. Yawˇ Eh˗riˇkaꞈ htaꞈ kaꞈ awˬ liˇ awˬ hkʼaˇ cawˇ ve hkʼe heuˆ daꞈ ve yoˬ. Maˆtiˬdehˆ kʼoˆ ve, “2016 hkʼawꞈ Deh˗vi˗uˇ leh Eh˗riˇkaꞈ Baˆtiˆsaˬ haꞈ yuˬ htaˇ, ngaˬ hui yawˇ kʼoˆ ve tawˇ hkawˇ htaꞈ tawnˇ gʼa ve yoˬ. Yawˇ kʼoˆ ve, ‘ngaˬ awˬ to pa gaˇ ve, hkʼaˬ hkʼe te kaꞈ pa maˇ gʼa.’ Tawˇ hkawˇ chi ve htaꞈ gʼa kaˇ htaˇ ngaˬ hui hawˬ ve yoˬ.” Chaw teˇ hpaˍ htaꞈ ngaˬ hui ga piˇ leh Yeˍsuˆ ve awˬ laꞈ gʼawˇ hpehꞈ la ve ha lehˬ jaˇ.

5. Shu awˬ laꞈ gʼawˇ hpehꞈ la tuˬ ca te ve awˉ lawˉ teˇ ceuˬ lehˬ aˬ htoꞈ ma le?

⁵ Awˉ lawˉ teˇ ceuˬ lehˬ ngaˬ hui Yaˬhoˉvaˬ htaꞈ shiˍ gaˇ ve chaw htaꞈ gʼa ca ve yoˬ. (Maꞈhtehˍ 10:11) Ngaˬ hui Yaˬhoˉvaˬ ve awˬ lawn shu htaꞈ kʼoˆ piˇ htaˇ, Yaˬhoˉvaˬ ve Shaˉhkiˆhkanˍ ve chaw hpehꞈ ve tehꞈ hpeuꞈ maw piˇ ve yoˬ. Yeˍsuˆ hto toˇ kʼoˆ laˇ ve te htaˇ, ngaˬ hui awˬ tehˬ ve Hkriꞈ yaˇ hpehꞈ ve tehꞈ shu htaꞈ hpeuꞈ maw piˇ ve yoˬ.

6. Ngaˬ hui Gʼuiˬ sha ve kanˉ hkʼa dehꞈ te gʼa tuˬ aˬ htoꞈ ma ga laˇ ve le?

⁶ Chaw teˇ hpaˍ awˉ lawˉ htaˇ kaꞈ Liꞈ hpu hkʼaw awˬ tehˬ ve htaꞈ shiˍ gaˇ ve yoˬ. Yaꞈ hkʼaˇ, teˇ hpaˍ nyi˗a kʼo a yeˇ maˇ te. Chi htaꞈ pa taw, yawˇ a yeˇ te tuˬ awˬ gʼaˇ gʼa piˇ ve yoˬ. Gʼuiˬ sha ve kanˉ hkʼa dehꞈ te gʼa tuˬ ngaˬ hui gʼa gu hehnˇ taˍ ve yoˬ. Nawˬ hto toˇ kuiˬ awˬ ti lo shu aˬ ma dawˇ cawˇ ve awˬ lawn htaꞈ ca leh yawˇ hui geh hkʼaˬ hkʼe yaw daꞈ tuˬ ve hkʼa dehꞈ gu hehnˇ taˍ cawˇ ve yoˬ.

7. (a) Nawˬ yehˬ shehˍ hpaˇ geh tawˇ tanˬ yaw daꞈ gʼa tuˬ aˬ htoꞈ ma ve awˉ lawˉ yaw cawˇ ve le? (b) Yehˬ shehˍ hpaˇ ve tawˇ htaꞈ na leh yawˆ yan piˇ ve aˬ htoꞈ ma te a yeˇ uiˍ ve le?

⁷ Tawˇ pa haˉ te kʼo, nawˬ yehˬ shehˍ hpaˇ htaꞈ na piˇ ve, “laiˉ gʼaˇ yehˬ kʼa htaꞈ hu tuˬ kanˉ gʼa te hkeuꞈ jaˇ ve kaꞈ hpu a ciˉ ceh tiˉ gʼa leh awˬ gʼaˇ nuˇ  ve yoˬ. Nawˬ dawˇ kʼo chaw yaˇ teˇ gʼaˇ le le ha lehˬ jaˇ tuˬ awˬ nyi cawˬ˗aw hehˉ laˇ?” Peuˬ leh Iˉsaˍyaˆ liꞈ 65: 21, 22 hkʼaw yaw daꞈ sheˍ. Maˇ heˆ leh nawˬ yehˬ shehˍ hpaˇ htaꞈ na piˇ ve, “yaˇ awˬ liˇ awˬ hkʼaˇ daꞈ la tuˬ nawˬ dawˇ kʼo ga piˇ gʼa tuˬ awˬ hkʼaˇ cawˬ˗aw laˇ? Nawˬ hkʼaˬ hkʼe dawˇ ve le?” Peuˬ leh Bon maˍ ve liꞈ 6:6, 7 hkʼaw yaw daꞈ sheˍ. Nawˬ hkʼaˬ ve teˇ lawn awˉ lawˉ yaw daꞈ ve kaꞈ yehˬ shehˍ hpaˇ htaꞈ dawˇ nyi piˇ sheˍ. Nawˬ dawˇ kʼo yawˇ Liꞈ hpu gʼa henˇ ve kʼo, awˬ bon hkʼaˬ hkʼe cawˬ tuˬ hehˉ le? Yawˇ ve tawˇ htaꞈ nawˬ hkʼa dehꞈ na leh yawˇ hkʼawꞈ laˇ ve htaꞈ yawˆ yan piˇ ve a yeˇ uiˍ jaˇ. Chi hkʼe te ve kʼo, nawˬ yawˇ htaꞈ hkʼa dehꞈ na gʼa leh yawˇ kaꞈ nawˬ ve hkawˇ na gaˇ tuˬ yoˬ.

8. Aˬ htoꞈ ma te ngaˬ hui laiˉ pawˆ kʼawꞈ guiˇ˗e cawˇ ve le?

⁸ Chaw teˇ gʼaˇ Liꞈ hpu henˇ tuˬ maˇ dawˇ cheˆ sheˍ htaˇ, nawˬ yawˇ geh laiˉ pawˆ gʼa guiˇ˗e ve yoˬ. Aˬ htoꞈ ma pa taw le? Ngaˬ hui yawˇ geh guiˇ˗e htaˇ, aˉ hkʼaw maˇ chehˇ ve maˇ heˆ leh kanˉ maˇ tanˇ ve pa taw yoˬ. Chi hkʼoˆ kaꞈ yehˬ shehˍ hpaˇ nyi ma sha leh Liꞈ hpu henˇ gaˇ tuˬ nawˬ yawˇ geh laiˉ pawˆ gʼa kʼawꞈ gui˗e ve yoˬ. Suhˆ cehˬ iˉ kaˆ hkʼaˬ htaˆ kaꞈ pfuhˍ chehˇ ve kʼo, hkʼa dehꞈ uiˍ la gʼa ve htaꞈ tawnˇ taˍ sheˍ. Nyi ma pfuhˇ ve chaw Yaˬhoˉvaˬ leh Yeˍsuˆ htaꞈ a yeˇ yuˬ tuˬ, chaw oˇ ve teˇ gʼaˇ geh hkʼaˬ htaˇ kaꞈ Liꞈ hpu ve awˬ lawn gʼa yaw daꞈ cawˇ ve tehꞈ tawnˇ taˍ sheˍ.

9-10. Aˬ htoꞈ ma te Hkriꞈ yaˇ teˇ gʼaˇ le le nyi ma nuˇ nehˬ ve chaw htaꞈ ca ve tehꞈ ngaˬ hui kʼoˆ gʼa ve le?

⁹ Hkriꞈ yaˇ teˇ le le nyi ma nuˇ nehˬ ve chaw htaꞈ ca ve awˬ vuiˬ cawˬ ve yoˬ. Tawˇ pa haˉ chi ve, yaˇ ehˉ mehˉ˗e ve htaꞈ tehˆ taˍ ve yoˬ. Awˬ lawn chi hkʼa hkʼe shuˍ daꞈ ve le? Awˬ tehˬ ve awˬ lawn teˇ lawn htaꞈ dawˇ nyi sheˍ. Yaˇ paˍ ehˉ 3 hkʼawꞈ ve teˇ gʼaˇ mehˉ˗e ve yoˬ. Chaw 500 gʼaˇ hpaˆ yawˇ htaꞈ ca  hpfuhˆ˗e ve yoˬ. Ponˬ kʼai ve awˬ yanˇ 20 naˍ riˍ gaˬ leh yaˇ ehˉ htaꞈ sha ma miˬ hkʼaw mawˬ ve yoˬ. Ca hpfuhˆ ve chaw teˇ gʼaˇ yawˇ htaꞈ mawˬ ve yoˬ. Yaꞈ hkʼaˇ, yawˇ chiˇ mvuh piˇ ve htaꞈ maˇ haꞈ yuˬ. Yawˇ kʼoˆ ve, “ngaˬ hui yaˇ ehˉ chi teˇ gʼaˇ htaꞈ ca mawˬ ve lehˬ laiˉ ha gʼaˇ teˇ moˍ tiˉ te ve htaꞈ pa taw yoˬ.”

¹⁰ Chi beuꞈ ve chaw laiˉ ha gʼaˇ yaˇ ehˉ oˇ ve teˇ gʼaˇ yaꞈ kaw yaꞈ chehˇ ve hkʼe hpehꞈ ve yoˬ. Yawˇ hui dawˇ law kuiˬ maˇ cawˬ leh ga laˇ tcuh gaˇ ve yoˬ. (Eˇfeˇsuꞈ 2:12) Ngaˬ hui 8 lanˬ gʼaˇ hpaˆ, nyi ma pfuhˇ leh haꞈ yuˬ gaˇ ve chaw htaꞈ ca chehˇ ve yoˬ. Nawˬ geh Liꞈ hpu henˇ gaˇ ve chaw ca maˇ gʼa ve yoˬ hehˉ. Yaꞈ hkʼaˇ, hto toˇ kuiˬ awˬ ti hkʼaw teˇ geh hto toˇ ve chaw Liꞈ hpu hkʼaw awˬ tehˬ shiˍ gaˇ ve chaw htaꞈ ca mawˬ ve yoˬ hehˉ. Awˬ viˉ awˬ nyi teˇ gʼaˇ nyi ma pfuhˇ ve chaw htaꞈ ca mawˬ leh awˬ leh meuˇ htaˇ Yeˍsuˆ ve awˬ laꞈ gʼawˇ hpehꞈ la ve pa taw, awˬ viˉ awˬ nyi teˇ gʼaˇ le le kaꞈ ha lehˬ ve yoˬ.

11. Nawˬ geh Liꞈ hpu henˇ ve chaw maˇ cawˬ ve htawˇ, hkʼaˬ hkʼe te leh shu awˬ laꞈ gʼawˇ hpehꞈ la tuˬ ca te ve nawˬ kaꞈ awˬ vuiˬ cawˬ ve le?

¹¹ Chi teˇ hkui nawˬ geh Liꞈ hpu henˇ ve chaw maˇ cawˬ ve htawˇ, nawˬ shu awˬ laꞈ gʼawˇ hpehꞈ la tuˬ ca te ve awˬ vuiˬ cawˬ ve yoˬ. Hpawnˬ daꞈ la gehˇ sheˍ ve chaw htaꞈ haꞈ yuˬ leh nawˬ awˬ chawˇ te piˇ sheˍ. Awˬ tehˬ ve Hkriꞈ yaˇ teˇ gʼaˇ leh teˇ gʼaˇ haꞈ daꞈ ve pa taw, yawˇ yonˍ gʼa tuˬ te piˇ ve yoˬ. (Yoˇhanˬ 13:34, 35) Chi hkʼoˆ kaꞈ hpawnˬ daꞈ kuiˬ hkʼaw nawˬ ve dawˇ hkʼaˇ chi˗suhˉ˗ehˍ hkʼawꞈ ve kʼo, hpawnˬ daꞈ la gehˇ sheˍ ve chaw awˬ gʼaˇ gʼa leh yawˆ yan tuˬ te piˇ ve yoˬ. Awˬ nu ve teˇ hkʼaˇ lehˬ hto toˇ ve chaw awˬ suhˉ geh hto toˇ leh yawˇ Liꞈ hpu hkʼaw ve awˬ lawn yehˬ shehˍ hpaˇ htaꞈ kʼoˆ maˍ piˇ puiˉ tuˬ ga piˇ ve yoˬ. Chi hkʼe te htaˇ, yawˇ Yeˍsuˆ Hkriꞈ htaꞈ henˇ yuˬ chehˇ ve nawˬ maˍ piˇ gʼa ve yoˬ.—Luˉkaꞈ 10:25-28.

12. Ngaˬ hui cheuˬ htaˇ hehꞈ shu awˬ laꞈ gʼawˇ hpehꞈ la tuˬ maˍ piˇ gʼa ve laˇ? Tawˇ pa haˉ kʼoˆ maˍ laˇ sheˍ.

¹² Ngaˬ hui cheuˬ htaˇ hehꞈ shu Yeˍsuˆ ve awˬ laꞈ gʼawˇ hpehꞈ la tuˬ maˍ piˇ gʼa ve tehꞈ taˇ dawˇ. Aˬ htoꞈ ma pa taw le? Boˬliˇviˇ˗aˇ mvuhˇ miˬ hkʼaw chehˇ ve Fawˉsaˆtiˉnaˆ ve awˬ lawn htaꞈ dawˇ nyi sheˍ. Shaˉhkiˆhkanˍ ve chaw yawˇ geh awˉ lawˉ teˇ pawˆ hto toˇ maˍ piˇ htaˇ, yawˇ liꞈ maˇ gʼaw puiˉ. Oˇ htaˇ taˬ leh yawˇ liꞈ gʼaw jawˬ leh gʼaw puiˉ la ve yoˬ. Chi teˇ hkui yawˇ Baˆtiˆsaˬ haꞈ yuˬ˗oˬ leh Liꞈ hpu maˍ ve dawˇ cawˇ jaˇ. Teˇ shinˉ le le yawˇ Liꞈ hpu maˍ piˇ ve chaw 5 gʼaˇ cawˬ ve yoˬ. Maˇ˗awˍ ve kʼo yawˇ Liꞈ hpu maˍ piˇ chehˇ ve chaw hkʼe taw yawˇ liꞈ maˇ gʼaw puiˉ. Yaꞈ hkʼaˇ, 6 gʼaˇ uiˍ la mvuh la leh Baˆtiˆsaˬ haꞈ yuˬ ve yoˬ.—Luˉkaꞈ 10:21.

13. Ngaˬ hui kanˉ maˇ jaˇ ve htawˇ shu awˬ laꞈ gʼawˇ hpehꞈ la tuˬ ca te ve aˬ htoꞈ ma awˬ bon gʼa ve le?

¹³ Hkriꞈ yaˇ laiˉ gʼaˇ kanˉ maˇ jaˇ ve pa taw maˇ tanˇ. Yaꞈ hkʼaˇ, yawˇ hui awˬ yanˇ yuˬ tanˇ leh shu htaꞈ Liꞈ hpu maˍ piˇ ve ha lehˬ jaˇ. Aˍla˗sa˗ka lo  chehˇ ve Meh˗la˗neˬ ve awˬ lawn htaꞈ dawˇ nyi sheˍ. Yawˇ mehˇ chawˇ ma hpehꞈ leh yaˇ miˇ 8 hkʼawꞈ gaˬ˗oˬ ve teˇ gʼaˇ cawˬ ve yoˬ. Meh˗la˗neˬ teˇ nyi le le kanˉ te leh yawˇ awˬ pa mvuhˇ haˉ caˇ ve htaꞈ gʼa nyi haꞈ shaˉ ve yoˬ. Meh˗la˗neˬ chehˇ kuiˬ vuiˇ jaˇ leh Shaˉhkiˆhkanˍ ve yawˇ teˇ gʼaˇ tiˉ hpehꞈ ve yoˬ. Yawˇ hto toˇ˗e htaˇ nyi ma pfuhˇ ve chaw htaꞈ mawˬ gaˇ ve pa taw, kaˆ jaˇ ve htaꞈ tawˍ daꞈ gʼaˇ tuˬ bon lawˬ ve yoˬ. Awˬ leh meuˇ htaˇ yawˇ Saˍrehˇ htaꞈ mawˬ daꞈ leh yawˇ Gʼuiˬ sha ve awˬ meh htaꞈ shiˍ gaˇ ve ha lehˬ jaˇ. Saˍrehˇ kaꞈ Liꞈ hpu henˇ gaˇ ve yoˬ. Meh˗la˗neˬ kʼoˆ ve, “teˇ shinˉ le le ngaˇ nyi mvuhˇ hpeuꞈ gaˬ kʼo ngaˬ heuˬ jaˇ. Yaꞈ hkʼaˇ, ngaˬ leh ngaˬ yaˇ miˇ Liꞈ hpu maˍ˗e tuˬ coˇ caˇ ve yoˬ. Ngaˬ huiˉ maˬ awˬ bon gʼa jaˇ. Saˍrehˇ na hkawˇ laiˉ hkawˇ cawˬ ve pa taw, yawˇ htaꞈ hkʼawꞈ piˇ tuˬ ngaˬ huiˉ maˬ hpfuhˆ nyi ve yoˬ. Saˍrehˇ Yaˬhoˉvaˬ ve awˬ chawˇ hpehꞈ la ve ngaˬ huiˉ maˬ ha lehˬ jaˇ.” Saˍrehˇ tawˍ ve tsuhˇ ve gʼa hpuˇ ve htawˇ yawˇ haꞈ hanˉ ve yoˬ. Awˬ leh meuˇ htaˇ, yawˇ bon yehˬ hkʼaw lawˬ tawˆ leh Baˆtiˆsaˬ haꞈ yuˬ ve yoˬ.

14. (a) Shu awˬ laꞈ gʼawˇ hpehꞈ la tuˬ ca te ve lehˬ ngaˇ ca ve htaꞈ hkʼaˬ hkʼe shuˍ daꞈ ve le? (b) 2 Tiˆmoˉseˍ liꞈ 4:1, 2 hkʼaw Pawˇluꞈ kʼoˆ ve htaꞈ nawˬ hkʼaˬ hkʼe dawˇ ve le?

¹⁴ Liꞈ hpu henˇ gaˇ ve chaw htaꞈ nawˬ maˇ mawˬ ve htawˇ, caˉ leh nyi ma pfuhˇ ve chaw htaꞈ ca sheˍ. Yeˍsuˆ ve awˬ laꞈ gʼawˇ hpehꞈ la tuˬ ca te ve lehˬ ngaˇ ca ve htaꞈ shuˍ ve tehꞈ tawnˇ taˍ sheˍ. Ngaˇ ca paˍ lehˬ ngaˇ gʼa tuˬ awˬ yanˇ laiˉ naˍ riˍ gʼa yehˇ ve yoˬ. Yawˇ hui tanˇ hkuinˇ maˇ heˆ leh mvuhˇ shawˉ teˇ naꞈ haw loꞈ kʼoˍ gʼa gʼaꞈ kʼai leh teˇ pawˆ pawˆ kʼo gʼa kʼai vuiˇ jaˇ. (Luˉkaꞈ 5:5) Chi ve  hkʼa shuˍ awˬ viˉ awˬ nyi laiˉ gʼaˇ kʼo, chaw htaꞈ ca tuˬ laiˉ kaˬ lo kʼai leh awˬ yanˇ laiˉ niˍ riˍ yehˇ ve gʼa yeunˇ hkanˍ jaˇ. Aˬ htoꞈ ma pa taw le? Chaw maˇ maˇ htaꞈ mawˬ daꞈ tuˬ ve pa taw yoˬ. Chi hkʼe te ve chaw lehˬ awˬ bon maˇ maˇ gʼa leh nyi ma pfuhˇ ve chaw htaꞈ mawˬ daꞈ tuˬ yoˬ. Chaw maˇ jaˇ kuiˬ lo nawˬ gʼa hteꞈ hto toˇ tuˬ maˇ heˆ leh chaw maˇ maˇ gʼa mawˬ daꞈ kuiˬ awˬ ti lo nawˬ kʼai gʼa˗aw laˇ?—2 Tiˆmoˉseˍ 4:1, 2 gʼaw sheˍ.

15. Liꞈ hpu henˇ ve chaw geh maˍ piˇ htaˇ aˬ htoꞈ ma te ngaˬ hui yeunˇ hkanˍ cawˇ ve le?

¹⁵ Liꞈ hpu maˍ htaˇ aˬ htoꞈ ma te gʼa yeunˇ hkanˍ cawˇ ve le? Awˉ lawˉ teˇ ceuˬ lehˬ Liꞈ hpu henˇ ve chaw Liꞈ hpu htaꞈ shiˍ tuˬ leh Liꞈ hpu hkʼaw haꞈ tuˬ ceh ngaˬ hui maˍ piˇ ve maˇ heˆ. Yaꞈ hkʼaˇ, Liꞈ hpu henˇ ve chaw Liꞈ hpu ve awˬ shehˍ hpaˇ Yaˬhoˉvaˬ htaꞈ shiˍ leh haꞈ tuˬ kaꞈ ga piˇ sheˍ. Chi hkʼoˆ kaꞈ Yeˍsuˆ awˬ laꞈ gʼawˇ htaꞈ aˬ htoꞈ ma te tcuh gaˇ ve, ngaˬ hui Liꞈ hpu henˇ ve chaw htaꞈ maˍ piˇ ve ceh maˇ heˆ. Yaꞈ hkʼaˇ, awˬ tehˬ ve Hkriꞈ yaˇ a shaꞈ teꞈ hkʼaˇ hkʼaˬ hkʼe gʼa te cawˇ ve kaꞈ yawˇ htaꞈ maˍ piˇ cawˇ ve yoˬ. Yawˇ Liꞈ hpu hkʼaw ve awˬ liˇ awˬ hkʼaˇ yuˬ yehˇ tuˬ, ngaˬ hui yeunˇ hkanˍ leh ga piˇ sheˍ. Liꞈ hpu henˇ ve chaw teˇ hpaˍ kʼo hkʼaˬ nyiˇ ha pa maˇ gaˬ sheˍ kaꞈ te hkʼaˇ dawˇ hkʼaˇ pa gʼa ve yoˬ. Yaꞈ hkʼaˇ, laiˉ gʼaˇ kʼo awˬ yanˇ maw chaweh gʼa yehˇ ve yoˬ.

16. Raˬuˆ ve awˬ lawn nawˬ htaꞈ aˬ htoꞈ ma maˍ laˇ ve le?

¹⁶ Peˬruˆ mvuhˇ miˬ lo miˍsheuˍnaˍliˍ teˇ gʼaˇ yawˇ yeunˇ hkanˍ ve daꞈ ve awˬ lawn htaꞈ dawˇ nyi sheˍ. Yawˇ kʼoˆ ve, “ngaˬ Raˬuˆ geh Liꞈ hpu maˍ piˇ ve liꞈ kʼoˆ nyiˇ kʼoˆ peuˬ˗oˬ. Yaꞈ hkʼaˇ, yawˇ a shaꞈ teꞈ kuiˬ hkʼaw shoꞈ shaꞈ ve cawˬ maˇ jaˇ. Yawˇ awˬ miˇ ma geh maˇ cawˇ daꞈ, maˇ daꞈ ve tawˇ yaw leh yaˇ yawˇ htaꞈ maˇ yawˆ yan. Yaꞈ hkʼaˇ, yawˇ hkʼaˬ htaˆ kaꞈ hpawnˬ daꞈ la ve yoˬ. Yawˇ ve yehˬ kʼa htaꞈ ga piˇ tuˬ ngaˬ ca kʼawꞈ guiˇ˗e ve yoˬ. Yawˇ htaꞈ Liꞈ hpu maˍ piˇ ve shehˆ hkʼawꞈ gaˬ peuˬ hkʼawꞈ nawˉ, yawˇ Baˆtiˆsaˬ haꞈ yuˬ keunˍ ve yoˬ.”

17. Gʼuˇ suhˍ teˇ lawn hkʼaw ngaˬ hui aˬ htoꞈ ma htaꞈ henˇ tuˬ le?

¹⁷ Yeˍsuˆ ngaˬ hui htaꞈ “chaw ceuˬ hkʼa peu˗eˬ ngaˬ ve awˬ laꞈ gʼawˇ hpehꞈ la tuˬ ca te˗o” tehꞈ kʼoˆ laˇ ve yoˬ. Kanˉ chi te biˇ gʼa tuˬ laiˉ pawˆ ngaˬ hui hkʼe maˇ dawˇ ve chaw geh yaw daꞈ ve yoˬ. Gʼuiˬ sha maˇ cawˬ tehˬ yonˍ ve leh bon liˇ htaꞈ maˇ yonˍ ve chaw hui htaꞈ kaꞈ kʼoˆ gaˇ ve yoˬ. Chi hkʼe ve chaw htaꞈ ngaˬ hui hkʼaˬ hkʼe te leh daꞈ ve awˬ lawn hto maˍ piˇ gʼa tuˬ gʼuˇ suhˍ teˇ lawn hkʼaw henˇ tuˬ yoˬ.