1. Ponˬ laˬ ve hkʼaˬ nyiˇ chi hkʼawꞈ maˇ gaˬ sheˍ htaˇ, mvuhˇ miˬ teˇ hpaˍ hkʼaw aˬ htoꞈ ma pa ve le?

 Ponˬ laˬ ve laiˉ hinˉ hkʼawꞈ chaw yaˇ maˇ˗awˍ ve bon liˇ cawˬ ve tehꞈ kʼoˆ ve yoˬ. Yaꞈ hkʼaˇ, hkʼaˬ nyiˇ chi hkʼawꞈ maˇ gaˬ sheˍ htaˇ awˬ ceuˬ teˇ hpaˍ pa kʼai jaˇ. Chaw maˇ maˇ bon liˇ maˇ cawˬ tehꞈ kʼoˆ ve yoˬ. Awˬ tehˬ kʼo mvuhˇ miˬ teˇ hpaˍ hkʼaw, chaw maˇ˗awˍ ve chi hkʼe kʼoˆ ve yoˬ. *—Maꞈhtehˍ 24:12.

2. Chaw maˇ maˇ aˬ htoꞈ ma te yawˇ hui bon liˇ maˇ cawˬ tehꞈ kʼoˆ ve le?

² Aˬ htoꞈ ma te chaw maˇ maˇ bon liˇ maˇ cawˬ tehꞈ kʼoˆ ve le? * Awˉ lawˉ teˇ ceuˬ lehˬ, chi beuꞈ teˇ co˗e maˇ˗awˍ ve chaw pyawˍ ve, leh a shaꞈ teꞈ kuiˬ hkʼaw shoꞈ shaꞈ ve htaꞈ tiˉ dawˇ nyi ve pa taw yoˬ. (Luˉkaꞈ 8:14) Gʼuiˬ sha cawˬ ve yonˍ jaw ve chaw htawˇ, maˇ kʼawꞈ yonˍ˗o. Chi piˍ jaˇ leh chaˬ nyi tehˆ nyi ve hpawˇ maˇ hawˍ daꞈ tehꞈ dawˇ ve yoˬ. A shaꞈ teꞈ ve yawˇ hkʼaˇ yawˇ cawˬ la gʼa ve, awˬ chawˇ, liꞈ maˍ paˍ saˍ laꞈ, awˬ lawn awˬ tanˇ teˇ hpaˍ kʼoˆ laˇ ve htaꞈ yawˇ hui yonˍ ve yoˬ. Yaꞈ hkʼaˇ, Gʼuiˬ sha htaꞈ caˉ daꞈ ve yawˇ hui maˇ gʼa kaˇ jaw. Bon awˬ hoˉ teˇ hpaˍ hpu leh kanˇ paˆ gʼa tuˬ htaꞈ dawˇ nyi ve pa taw, laiˉ gʼaˇ maˇ dawˇ cawˇ. Laiˉ mvuhˇ miˬ hkʼaw bon liˇ teˇ hpaˍ cawˬ tuˬ a hkaw˗anˬ maˇ piˇ.

3. Chi ve hkʼaw ngaˬ hui aˬ htoꞈ ma htaꞈ henˇ tuˬ le?

³ Yeˍsuˆ ngaˬ hui htaꞈ “chaw ceuˬ hkʼa peu˗eˬ ngaˬ ve awˬ laꞈ gʼawˇ hpehꞈ la tuˬ ca te˗o” kʼoˆ laˇ ve yoˬ. (Maꞈhtehˍ 28:19) Hkʼe kʼo, bon  liˇ maˇ cawˬ ve chaw Gʼuiˬ sha htaꞈ haꞈ leh Yeˍsuˆ ve awˬ laꞈ gʼawˇ hpehꞈ la tuˬ hkʼaˬ hkʼe ga piˇ gʼa tuˬ le? Hto maˍ piˇ ve, na tuˬ maˇ na tuˬ yawˇ hui laˬ ve awˬ ti htaꞈ cawˬ ve tehꞈ tawnˇ taˍ cawˇ ve yoˬ. Tawˇ pa haˉ te kʼo, Uˉyawˉpaˆ mvuhˇ miˬ bon liˇ maˇ cawˬ ve geh hto toˇ htaˇ, Aˍshaˆ miˬ guiˬ lo hto toˇ ve hkʼe te ve kʼo, yawˇ hui maˇ na taˬ. Aˬ htoꞈ ma pa taw le? Uˉyawˉpaˆ chaw laiˉ gʼaˇ Liꞈ hpu htaꞈ shiˍ leh, Gʼuiˬ sha hkʼa peu˗eˬ htaꞈ te hpanˍ ve tehꞈ dawˇ ve yoˬ. Yaꞈ hkʼaˇ, Aˍshaˆ miˬ guiˬ lo ve chaw Liꞈ hpu htaꞈ hkʼa dehꞈ maˇ shiˍ leh laiˉ gʼaˇ maˇ kaˇ jaw leh hpanˍ shehˍ hpaˇ htaꞈ kaꞈ maˇ shiˍ. Aˬ ma htaꞈ yonˍ ve, hkʼaˬ kaˬ lo laˬ ve, hto toˇ kuiˬ lo mawˬ ve chaw nyi ma hkʼaw haꞈ yuˬ tuˬ te piˇ ve teˇ geh henˇ tuˬ yoˬ.

4. Aˬ htoꞈ ma te ngaˬ hui daꞈ ve hpawˇ dawˇ nyi gʼa ve le?

⁴ Daꞈ ve hpawˇ dawˇ nyi ve. Teˇ hkʼawꞈ le le bon liˇ maˇ cawˬ tehꞈ kʼoˆ ve chaw Yaˬhoˉvaˬ ve Shaˉhkiˆhkanˍ ve chaw hpehꞈ la ve yoˬ. Chaw chi teˇ hpaˍ lehˬ pehꞈ ve tzuhˆ ve hpawˇ maˇ te yaꞈ, bon awˬ hoˉ teˇ hpaˍ teˇ gʼaˇ geh kʼo teˇ ceuˬ te ve pa taw, yawˇ hui maˇ dawˇ cawˇ. Chaw teˇ hpaˍ kʼo, pehꞈ ve tzuhˆ ve te jaw leh hkʼawꞈ nawˉ htaˇ maˇ kʼawꞈ te˗o. Yaˬhoˉvaˬ ga laˇ ve pa taw, “co tiꞈ ha tiꞈ htaꞈ gʼa tuˬ awˬ pon hkʼa fuiˍ taˍ ve chaw hui” htaꞈ ngaˬ hui ca gʼa ve tehꞈ hkʼa dehꞈ yonˍ gʼa ve yoˬ.—Tcuh yaˇ 13:48; 1 Tiˆmoˉseˍ 2:3, 4.

5. Ngaˬ hui hto toˇ htaˇ chaw yaˇ na gaˇ tuˬ aˬ htoꞈ ma ga laˇ ve le?

⁵ Tawˇ daꞈ daꞈ yaw leh shu htaꞈ a yeˇ yuˬ piˇ ve. Shu ngaˬ hui ve tawˇ na gaˇ tuˬ, yaw ve awˬ lawn aꞈ kehˉ yaw ve awˬ hkʼaˇ a yeˇ uiˍ ve yoˬ. Ngaˬ hui tawˇ daꞈ daꞈ yaw leh shu htaꞈ a yeˇ yuˬ piˇ ve kʼo, dawˇ cawˇ tuˬ yoˬ. Shu ngaˬ hui ve tawˇ htaꞈ na tuˬ maˇ nyiˉ piˇ, aˬ htoꞈ ma te yawˇ hui bon htaꞈ chi hkʼe dawˇ ve coˇ caˇ leh na gʼa piˇ cawˇ ve yoˬ. Tawˇ pa haˉ te kʼo, chaw teˇ hpaˍ maˇ mawˬ daꞈ jaw ve chaw geh bon awˬ lawn maˇ yaw daꞈ gaˇ. Laiˉ gʼaˇ Gʼuiˬ sha ve awˬ lawn na piˇ htaˇ, awˬ liˇ awˬ hkʼaˇ maˇ daꞈ tehꞈ dawˇ leh Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve shu mawˬ htaˇ, yaꞈ taw jaˇ. Yaꞈ hkʼaˇ, hkʼaˬ hkʼe hpehꞈ ve maˇ kʼoˆ, yawˇ hui ve dawˇ hkʼaˇ htaꞈ na gʼa piˇ cawˇ ve yoˬ.—2 Tiˆmoˉseˍ 2:24.

6. Tcuh yaˇ Pawˇluꞈ tawˇ yaw daꞈ tuˬ awˬ hkʼaˇ hkʼaˬ hkʼe pa ve le? Ngaˬ hui yawˇ htaꞈ hkʼaˬ hkʼe henˇ yuˬ gʼa tuˬ le?

⁶ “Liꞈ hpu,” “hpanˍ ve,” “Gʼuiˬ sha,” “bon liˇ,” chi ve ngaˬ hui kʼoˆ htaˇ laiˉ gʼaˇ maˇ dawˇ cawˇ ve kʼo, hkʼaˬ hkʼe te tuˬ le? Tcuh yaˇ Pawˇluꞈ htaꞈ henˇ yuˬ leh tawˇ yaw ve awˬ hkʼaˇ pa gʼa ve yoˬ. Pawˇluꞈ Yuˇdaꞈ chaw htaꞈ bon maˍ piˇ htaˇ, Liꞈ hpu tawn yehˇ ve yoˬ. Pawˇluꞈ Aˍreˍ hkʼaw teˇ kaˬ lo Heˍlaˍsaˆ chaw cuˇ yiˍ cawˬ ve geh tawˇ yaw daꞈ htaˇ, yawˇ yaw ve tawˇ Liꞈ hpu hkʼaw cawˬ ve tehꞈ maˇ gʼa kʼoˆ piˇ. (Tcuh yaˇ 17:2, 3, 22-31) Nawˬ hkʼaˬ hkʼe te Pawˇluꞈ htaꞈ henˇ yuˬ gʼa tuˬ le? Nawˬ geh Liꞈ hpu gʼaw chehˇ ve chaw, Liꞈ hpu gʼaw ve htaꞈ shu maˇ mawˬ tcuh gaˇ htaˇ, shu maˇ chaˬ nyi gʼa tuˬ te sheˍ. Tawˇ pa haˉ te kʼo, tawˇ yaw tuˬ awˬ hkʼeun maˇ heˆ leh htehˆ leꞈ chi teˇ hpaˍ htaꞈ yehˇ sheˍ.

7. 1 Kawˇrenˍhtuˆ liꞈ 9:20-23 hkʼaw kʼoˆ taˍ ve hkʼe, ngaˬ hui Pawˇluꞈ htaꞈ hkʼaˬ hkʼe henˇ yuˬ gʼa tuˬ le?

⁷ Yawˇ ve awˬ lawn coˇ caˇ leh na gʼa ve leh yawˇ kʼoˆ ve hkʼa dehꞈ na taˍ piˇ ve. Aˬ htoꞈ ma te chaw yaˇ chi hkʼe dawˇ ve htaꞈ ngaˬ hui na gʼa piˇ cawˇ ve le? (Tawˇ naˉ ve 20:5) Pawˇluꞈ ve awˬ lawn htaꞈ dawˇ nyi sheˍ. Pawˇluꞈ Yuˇdaꞈ chaw hkʼaw uiˍ la ve htawˇ, Yaˬhoˉvaˬ leh Liꞈ hpu htaꞈ maˇ shiˍ ve buiˇ shaˆ aˉ naˆ chaw geh bon maˍ piˇ htaˇ pa ve yoˬ. Ngaˬ hui kaꞈ hkʼa shuˍ hto toˇ kuiˬ lo ve chaw hkʼaˬ hkʼe dawˇ ve htaꞈ na gʼa tuˬ, awˬ lawn awˬ tanˇ awˉ lawˉ chaˬ nyi leh Hkriꞈ yaˇ awˬ moˍ hkʼaw hpehꞈ laˬ jaw ve chaw geh beˆ maˍ laˇ tuˬ lawˬ cawˇ ve yoˬ.—1 Kawˇrenˍhtuˆ 9:20-23 gʼaw sheˍ.

8. Ngaˬ hui shu geh Liꞈ hpu htaꞈ caˉ daꞈ ve tanˬ yaw daꞈ gʼa tuˬ hkʼaˬ hkʼe te gʼa ve le?

⁸ Ngaˬ hui ve awˬ vuiˬ lehˬ “keunˍ ve” chaw htaꞈ  ca ve yoˬ. (Maꞈhtehˍ 10:11) Awˬ vuiˬ chi hkʼa dehꞈ te gʼa tuˬ, yawˇ ve dawˇ hkʼaˇ kʼoˆ maˍ laˇ tcuh leh na taˍ sheˍ. Eˍgaˍlanˍ mvuhˇ miˬ lo awˬ viˉ awˬ nyi hawˉ hkʼaˆ teˇ gʼaˇ yehˬ kʼa hkʼaw ha lehˬ tuˬ, yaˇ hu tuˬ, leh maˇ hteˇ maˇ cawˇ ve htaꞈ yeunˇ hkanˍ gʼaˇ tuˬ shu ve dawˇ hkʼaˇ htaꞈ na piˇ ve yoˬ. Shu hkʼawꞈ ve htaꞈ yawˇ na peuˬ hkʼawꞈ nawˉ, yawˇ kʼoˆ ve, “beˆ maˍ laˇ hkawˇ chi bvuhꞈ taˍ ve aˬ laˬ hkʼe 2,000 hkʼawꞈ gaˬ˗oˬ ve nawˬ hkʼaˬ hkʼe dawˇ ve le?” Peuˬ leh Liꞈ hpu hkʼaw hteˇ˗ehˍ laˬ ve tehꞈ maˇ kʼoˆ piˇ ve htawˇ, tawˇ yaw tuˬ awˬ hkʼeun hkʼaw gʼaw maˍ piˇ ve yoˬ.

9. Gʼuiˬ sha ve awˬ lawn maˇ yaw daꞈ gaˇ ve chaw geh hkʼaˬ hkʼe hto maˍ piˇ gʼa tuˬ le?

⁹ Gʼuiˬ sha ve awˬ lawn maˇ yaw daꞈ gaˇ ve chaw nyi ma hkʼaw haꞈ yuˬ tuˬ awˬ paˇ awˬ kui cawˬ ve htaꞈ kʼoˆ leh yaw daꞈ sheˍ. Tawˇ pa haˉ te kʼo, suhˆ cehˬ hawˆ cehˬ leh chaw yaˇ awˬ to hkʼaw cawˬ ve htaꞈ laiˉ gʼaˇ dawˇ cawˇ ve yoˬ. Chi htaꞈ dawˇ cawˇ ve chaw mawˬ htaˇ, chi hkʼe kʼoˆ piˇ gʼa ve, “cawˬ taˍ ve laiˉ ceuˬ lehˬ suhˆ cehˬ hawˆ cehˬ leh chaw yaˇ htaꞈ henˇ yuˬ leh te taˍ ve yoˬ. Tawˇ yaw tuˬ te paˍ lehˬ naˍ paw htaꞈ hawˍ daꞈ tuˬ gʼa chaˬ nyi ve yoˬ. Awˬ han htawnˍ tuˬ te paˍ lehˬ mehˆ shiˍ htaꞈ hawˍ daꞈ tuˬ gʼa chaˬ nyi ve yoˬ. Awˉ lawˉ htaˇ mehˆ shiˍ leh naˍ paw te hpanˍ shehˍ hpaˇ nawˬ dawˇ kʼo, a shu hpehꞈ ve le?” Hkʼawꞈ laˇ htaꞈ na leh ngaˬ hui kʼawꞈ kʼoˆ gʼa ve, “liꞈ kʼoˆ awˬ piˍ teˇ kʼoˆ hkʼaw bvuhꞈ taˍ ve htaꞈ ngaˬ dawˇ cawˇ jaˇ. Oˇ kaˬ lo kʼoˆ ve, ‘Gʼuiˬ sha ngaˬ hui htaꞈ naˍ paw piˇ laˇ taˍ ve yoˬ. Yawˇ maˇ kaˇ puiˉ ve laˇ? Gʼuiˬ sha ngaˬ hui htaꞈ mehˆ shiˍ piˇ laˇ taˍ ve yoˬ. Yawˇ maˇ mawˬ puiˉ ve laˇ? . . . Yawˇ lehˬ, chaw hkʼa peu˗eˬ ve saˍ laꞈ hpehꞈ ve yoˬ.’ Chaˬ nyi tehˆ nyi paˍ laiˉ gʼaˇ kaꞈ mehˆ shiˍ leh naˍ paw hpanˍ shehˍ hpaˇ cawˬ ve tehꞈ Liꞈ hpu chi teˇ tawn hkʼe yonˍ ve nawˬ shiˍ˗aˬ laˇ?” (Chiˇ mvuh ve 94:9, 10) Peuˬ leh ngaˬ hui “Awˬ hkuiˉ pui ve a shaꞈ chaw teˇ hpaˍ hkʼaˬ hkʼe dawˇ ve le?” jw.org^® hkʼaw VDO laiˉ tawn cawˬ ve htaꞈ nyi tcuh sheˍ. (LIꞈ TEˇ HPAˍ > AWˬ HAN TEˇ HPAˍ hkʼaw nyi sheˍ.) Maˇ heˆ leh Awˬ hkuiˉ puiˍ ve a shaꞈ—na hkawˇ 5 maˬ dawˇ nyi cawˇ ve maˇ heˆ leh A shaꞈ teꞈ ve awˬ ceuˬ te hpanˍ shehˍ hpaˇ cawˬ˗aw laˇ? yawˇ htaꞈ piˇ sheˍ.

10. Gʼuiˬ sha ve awˬ lawn maˇ yaw daꞈ gaˇ ve chaw geh aˬ htoꞈ ma ve awˬ lawn tanˬ yaw daꞈ cawˇ ve le?

¹⁰ Laiˉ gʼaˇ awˬ gʼuˇ suhˍ hpawˇ daꞈ la ve htaꞈ mawˬ gaˇ ve yoˬ. Yaꞈ hkʼaˇ, laiˉ gʼaˇ miˬ guiˬ chi gʼaˇ hteꞈ luˬ kʼai leh chehˇ maˇ gʼa ve htaꞈ kawˆ ve yoˬ. Nawˬgʼo˗eˇ mvuhˇ miˬ lo toˇ nyi shehˍ hpaˇ kʼoˆ ve, chaw teˇ gʼaˇ Gʼuiˬ sha ve awˬ lawn maˇ yaw daꞈ gaˇ ve htawˇ, awˬ paˇ awˬ kui hpehꞈ chehˇ ve kʼo, yaw daꞈ gaˇ ve yoˬ. Yawˇ yehˬ shehˍ hpaˇ htaꞈ na piˇ ve, “awˬ gʼuˇ suhˍ hpawˇ daꞈ la gʼa˗aw hehˉ laˇ? Mvuhˇ  miˬ uˉ peunˍ paˍ, chaˬ nyi tehˆ nyi paˍ, leh teˇ gʼaˇ gʼaˇ ga laˇ gʼa aw˗laˇ?” Yehˬ shehˍ hpaˇ hkʼawꞈ laˇ ve htaꞈ na leh, Liꞈ hpu tawn awˬ gʼuˇ suhˉ hpawˇ caˉ daꞈ ve kʼoˆ piˇ ve yoˬ. Liꞈ hpu hkʼaw ka tiꞈ te taˍ laˇ ve, miˬ guiˬ chi co co yeˬ chehˇ leh hteˇ ve cawˇ ve chaw hui oˇ kaˬ lo co co taiˍ taiˍ gʼa chehˇ tuˬ ve htaꞈ laiˉ gʼaˇ shiˍ gaˇ ve yoˬ.—Chiˇ mvuh ve 37:29; Cuˇ yiˍ piˇ ve 1:4.

11. Shu geh tawˇ tanˬ yaw daꞈ tuˬ aˬ htoꞈ ma te laiˉ hkʼaˇ gʼa yehˇ cawˇ ve le? Roˉmaꞈ liꞈ 1:14-16 hkʼaw kʼoˆ taˍ ve hkʼe, Pawˇluꞈ htaꞈ ngaˬ hui hkʼaˬ hkʼe henˇ yuˬ gʼa ve le?

¹¹ Shu geh tawˇ tanˬ yaw daꞈ tuˬ laiˉ hkʼaˇ yehˇ sheˍ. Aˬ htoꞈ ma pa taw le? Teˇ gʼaˇ leh teˇ gʼaˇ maˇ shuˍ daꞈ ve pa taw yoˬ. Teˇ gʼaˇ na gaˇ ve kʼo awˬ nu ve teˇ gʼaˇ maˇ na gaˇ. Teˇ hpaˍ kʼo, Liꞈ hpu hkʼaw ve awˬ lawn leh Gʼuiˬ sha ve awˬ lawn ngaˬ hui geh yaw daꞈ gaˇ ve yoˬ. Yaꞈ hkʼaˇ, teˇ hpaˍ kʼo awˬ nu ve awˬ lawn awˉ lawˉ gʼa yaw daꞈ sheˍ. Hkʼaˬ hkʼe hpehꞈ ve htawˇ, teˇ chaw ceuˬ le le htaꞈ ngaˬ hui tawˇ gʼa yaw daꞈ ve yoˬ. (Roˉmaꞈ 1:14-16 gʼaw sheˍ.) Cawˇ ve htaꞈ haꞈ ve chaw nyi ma hkʼaw uiˍ la mvuh la piˇ shehˍ hpaˇ Yaˬhoˉvaˬ teˇ gʼaˇ ceh tiˉ te gʼa ve tehꞈ ngaˬ hui tawnˇ taˍ cawˇ ve yoˬ.—1 Kawˇrenˍhtuˆ 3:6, 7.

12. Aˍshaˆ miˬ guiˬ lo uiˍ la ve chaw hpanˍ shehˍ hpaˇ cawˬ ve tehꞈ maˇ dawˇ jaw ve htaꞈ ngaˬ hui hkʼaˬ hkʼe te maˍ piˇ gʼa ve le?

¹² Miˬ guiˬ chi hkʼoˆ lo awˬ viˉ awˬ nyi laiˉ gʼaˇ, Aˍshaˆ miˬ guiˬ lo laˬ ve chaw leh mvuhˇ miˬ hkʼaw bon liˇ teˇ hpaˍ cawˬ tuˬ a hkaw˗anˬ maˇ piˇ ve chaw htaꞈ kaꞈ gʼa mawˬ daꞈ ve yoˬ. Aˍshaˆ miˬ guiˬ lo uiˍ la ve chaw teˇ hpaˍ lehˬ hpanˍ shehˍ hpaˇ cawˬ ve tehꞈ maˇ dawˇ jaw. Teˇ hpaˍ kʼo shiˍ gaˇ leh Liꞈ hpu henˇ gaˇ ve yoˬ. Yaꞈ hkʼaˇ, teˇ hpaˍ kʼo dawˇ hkʼaˇ awˬ suhˉ maˇ shiˍ gaˇ. Hkʼe kʼo ngaˬ hui yawˇ hui ve nyi ma hkʼaw haꞈ yuˬ tuˬ hkʼaˬ hkʼe te piˇ gʼa tuˬ le? Hto toˇ ve chaw teˇ hpaˍ kʼoˆ ve, daꞈ ve awˬ hkʼaˇ teˇ hkʼaˇ lehˬ yehˬ shehˍ hpaˇ geh awˬ chawˇ hkʼe tawˇ yaw daꞈ ve, a yeˇ yuˬ piˇ ve, leh te gʼa ve kʼo Liꞈ hpu hkʼaw ve awˬ liˇ awˬ hkʼaˇ yawˇ hui ve a shaꞈ teꞈ hkʼaˇ hkʼaˬ hkʼe daꞈ la gʼa tuˬ kʼoˆ maˍ piˇ gʼa ve yoˬ.

13. Shu Liꞈ hpu htaꞈ shiˍ gaˇ tuˬ aˬ htoꞈ ma ga piˇ gʼa ve le? (Awˬ htaꞈ hpawˇ ve awˬ han htaꞈ nyi sheˍ.)

¹³ Awˉ lawˉ teˇ ceuˬ laiˉ gʼaˇ dawˇ cawˇ ve lehˬ Liꞈ hpu hkʼaw awˬ tehˬ yehˇ gʼa ve yoˬ. (Cuˇ yiˍ piˇ ve 7:12) Awˬ viˉ awˬ nyi yaˇ miˇ teˇ gʼaˇ Neuˆyawˆ venˇ lo Hehˆpaˍ hkawˇ yaw gʼa ve geh kʼai leh kʼoˆ ve, “yawˇ hui yaw ve htaꞈ ngaˬ a yeˇ yuˬ leh hkʼa dehꞈ na taˍ ve tehꞈ shiˍ tcuh ve yoˬ. Yawˇ hui chehˇ la gehˇ sheˍ ve ngaˬ shiˍ htaˇ, na piˇ gaˇ ve, ‘chehˇ gʼa aˬ˗laˇ, hkʼaˬ hkʼe kʼai le? Kanˉ gʼa˗oˬ laˇ? Choˬ ve chaw nyi ma daꞈ˗aˬ laˇ?’” Chi hkʼe te htaˇ, Liꞈ hpu hkʼaw ve awˬ lawn yaw daꞈ tuˬ awˬ yanˇ cawˬ ve yoˬ. Yawˇ na gaˇ sheˍ ve kʼo awˬ viˉ awˬ nyi kʼawꞈ na piˇ ve, “nawˬ dawˇ kʼo shu geh shoꞈ shaꞈ ve maˇ cawˬ tuˬ aˬ htoꞈ ma ga laˇ gʼa ve le? Liꞈ hpu hkʼaw teˇ geh nyi hpehꞈ aw˗laˇ? Choˬ kʼoˆ ve, ‘tawˇ gʼawˬ daꞈ ve lehˬ, iˉ kaˆ gʼuiˬ hkʼaˇ peꞈ tawˆ la ve hkʼe hpehꞈ ve yoˬ. Maˇ jaˇ la sheˍ htaˇ kaꞈ haˆ haˆ hpehˇ cawˇ ve yoˬ.’ Nawˬ dawˇ kʼo, beˆ maˍ laˇ hkawˇ chi daꞈ˗aˬ laˇ?” (Tawˇ naˉ ve 17:14) Tawˇ chi hkʼe tanˬ yaw ve lehˬ a shu teˇ gʼaˇ geh kʼawꞈ guiˇ˗e gʼa tuˬ shiˍ ve yoˬ.

14. Aˍshaˆ miˬ guiˬ mvuhˇ nyi tawˆ hpawˇ lo awˬ viˉ awˬ nyi hawˉ hkʼaˆ teˇ gʼaˇ Gʼuiˬ sha htaꞈ maˇ yonˍ ve chaw htaꞈ hkʼaˬ hkʼe ga piˇ ve le?

¹⁴ Gʼuiˬ sha htaꞈ maˇ yonˍ ve chaw kʼo, hkʼaˬ hkʼe ga piˇ gʼa tuˬ le? Aˍshaˆ miˬ guiˬ mvuhˇ nyi tawˆ hpawˇ lo awˬ viˉ awˬ nyi hawˉ hkʼaˆ teˇ gʼaˇ bon liˇ maˇ cawˬ tehꞈ kʼoˆ ve chaw geh hto maˍ piˇ ve, “choˬ teˇ hkʼaˇ lo ve chaw Gʼuiˬ sha htaꞈ maˇ yonˍ kʼoˆ laˇ ve kʼo, laiˉ gʼaˇ yonˍ ve shaˉ hoꞈ htaꞈ maˇ yonˍ tehꞈ kʼoˆ gaˇ ve yoˬ. Chi hkʼe hpehꞈ ve kʼo yawˇ hui oˉ kʼoˍ pui chehˇ ve shaˉ hoꞈ lehˬ chaw yaˇ te taˍ ve pa taw, awˬ tehˬ ve gʼuiˬ sha maˇ heˆ tehꞈ ngaˬ kaꞈ dawˇ ve yoˬ. Peuˬ leh Yeˍraˍmiˆ liꞈ 16:20 hkʼaw ngaˬ gʼaw maˍ piˇ ve ‘chaw yaˇ lehˬ, a shu yawˇ ve gʼuiˬ sha  htaꞈ te gʼa˗aw laˇ? Oˇ ve teˇ hpaˍ lehˬ, maˇ heˆ heˆ ve gʼuiˬ sha tiˉ hpehꞈ ve yoˬ.’ Kʼawꞈ na piˇ ve ‘hkʼaˬ ve teˇ maˬ awˬ tehˬ ve Gʼuiˬ sha hpehꞈ leh, hkʼaˬ ve teˇ maˬ chaw yaˇ te taˍ ve tehꞈ ngaˬ hui hkʼaˬ hkʼe te shiˍ gʼa tuˬ le?’ Yawˇ hui hkʼawꞈ laˇ ve htaꞈ ngaˬ na peuˬ hkʼawꞈ nawˉ, Iˉsaˍyaˆ liꞈ 41:23 hkʼaw ‘oˇ hkʼe te ve kʼo, nawˬ hui lehˬ gʼuiˬ sha hpehꞈ ve htaꞈ ngaˬ hui gʼa shiˍ tuˬ yoˬ.’ Peuˬ leh Yaˬhoˉvaˬ awˬ gʼuˇ hpawˇ kʼoˆ taˍ ve htaꞈ nyi tcuh ve yoˬ.”

15. Aˍshaˆ miˬ guiˬ mvuhˇ nyi tawˆ hpawˇ lo ve awˬ viˉ awˬ nyi hawˉ hkʼaˆ teˇ gʼaˇ htaꞈ hkʼaˬ hkʼe henˇ yuˬ gʼa ve le?

¹⁵ Aˍshaˆ miˬ guiˬ mvuhˇ nyi tawˆ hpawˇ lo awˬ viˉ awˬ nyi hawˉ hkʼaˆ teˇ gʼaˇ ca kʼawꞈ guiˇ˗e htaˇ awˬ hkʼaˇ chi htaꞈ dawˇ cawˇ ve yoˬ. Yawˇ kʼoˆ ve, “Liꞈ hpu hkʼaw awˬ tehˬ yehˇ gʼa ve, tcuh kaˬ paˍ ve tawˇ hkawˇ awˬ tehˬ hpehꞈ ve, leh mvuhˇ naw ma miˬ naˆ ma htaꞈ caˉ daꞈ ve awˬ liˇ yehˬ shehˍ hpaˇ htaꞈ kʼoˆ maˍ piˇ gʼa ve yoˬ. Yaꞈ hkʼaˇ, chi htaꞈ nyi kʼo hpanˍ shehˍ hpaˇ cawˬ leh kanˇ paˆ uiˍ jaˇ ve tehꞈ hpeuꞈ maw piˇ ve yoˬ. Chi yawˇ yonˍ ve kʼo, ngaˬ Yaˬhoˉvaˬ htaꞈ caˉ daꞈ ve Liꞈ hpu hkʼaw gʼaw maˍ piˇ tuˬ yoˬ.”

16. Heˍbrehˇ liꞈ 11:6 hkʼaw hkʼaw kʼoˆ taˍ ve hkʼe, aˬ htoꞈ ma te Liꞈ hpu henˇ ve chaw Gʼuiˬ sha leh Liꞈ hpu htaꞈ gʼa yonˍ cawˇ ve le? Chi hkʼe te gʼa tuˬ, yawˇ hui htaꞈ hkʼaˬ hkʼe ga piˇ gʼa ve le?

¹⁶ Bon liˇ maˇ cawˬ tehꞈ kʼoˆ ve chaw geh ngaˬ hui Liꞈ hpu maˍ piˇ htaˇ, Liꞈ hpu htaꞈ shiˍ la tuˬ, Gʼuiˬ sha cawˬ ve tehꞈ yonˍ tuˬ caˉ leh ga piˇ cawˇ ve yoˬ. (Heˍbrehˇ 11:6 gʼaw sheˍ) Awˬ lawn teˇ lawn htaꞈ na gʼa tuˬ ngaˬ hui laiˉ pawˆ kʼoˆ piˇ ve yoˬ. Tawˇ pa haˉ te kʼo, ngaˬ hui Liꞈ hpu maˍ htaˇ teˇ pawˆ le le Liꞈ hpu chi Gʼuiˬ sha geh laˬ ve tehꞈ yawˇ htaꞈ shiˍ tcuh sheˍ. Liꞈ hpu hkʼaw tcuh kaˍ paˍ ve tawˇ hkawˇ awˬ tehˬ hpehꞈ la ve, chaˬ nyi tehˆ paˍ kʼoˆ ve htaꞈ hkʼaˬ hkʼe te Liꞈ hpu htaꞈ hawˍ daꞈ ve, leh a shaꞈ teꞈ kuiˬ hkʼaw hkʼaˬ hkʼe te yuˬ yehˇ ve chi suhˉ˗ehˍ yaw daꞈ sheˍ.

17. Ngaˬ hui yawˇ hui htaꞈ a yeˇ yuˬ piˇ ve kʼo aˬ htoꞈ ma awˬ bon cawˬ ve le?

¹⁷ Shu Yeˍsuˆ ve awˬ laꞈ gʼawˇ hpehꞈ la tuˬ bon liˇ cawˬ ve, maˇ cawˬ ve htawˇ, ngaˬ hui haꞈ pehnˇ ve hkʼaw ga piˇ ve yoˬ. (1 Kawˇrenˍhtuˆ 13:1) Ngaˬ hui maˍ piˇ htaˇ, Gʼuiˬ sha yawˇ hui htaꞈ haꞈ ve tehꞈ shiˍ tcuh leh yawˇ hui kaꞈ Gʼuiˬ sha htaꞈ haꞈ tuˬ dawˇ law ve yoˬ. Teˇ hkʼawꞈ le le bon liˇ htaꞈ hkʼa dehꞈ maˇ yonˍ ve, leh a yeˇ maˇ te ve chaw laiˉ hinˉ gʼaˇ Baˆtiˆsaˬ haꞈ yuˬ leh Yaˬhoˉvaˬ ve Shaˉhkiˆhkanˍ ve chaw hpehꞈ la ve yoˬ. Awˬ lawn kʼo, yawˇ hui awˬ tehˬ ve htaꞈ gʼa henˇ leh Yaˬhoˉvaˬ htaꞈ haꞈ ve yoˬ. Hkʼe te leh, daꞈ ve hpawˇ hkʼaˬ htaˆ kaꞈ dawˇ nyi sheˍ. Teˇ chaw ceuˬ le le htaꞈ a yeˇ yuˬ leh haꞈ sheˍ. Yawˇ hui ve awˬ lawn shiˍ tuˬ na taˍ piˇ sheˍ. Nawˬ te ve lehˬ shu Yeˍsuˆ ve awˬ laꞈ gawˇ hpehꞈ la tuˬ ga piˇ ve yoˬ.