1. Aˬ htoꞈ ma pa taw fawˉ mehˍ ve htaꞈ gʼa hpuˇ tuˬ ngaˬ hui gu hehnˇ taˍ cawˇ ve le?

 Yeˍsuˆ miˬ guiˬ hkʼoˆ chehˇ ve awˬ leh meuˇ teˇ haˉ htaˇ, yawˇ ve awˬ laꞈ gʼawˇ hpehꞈ ve chaw teˇ gʼaˇ le le htaꞈ shu canˇ tuˬ yoˬ tehꞈ yawˇ kʼoˆ ve yoˬ. (Yoˇhanˬ 17:14) Chi beuꞈ hkʼa gaˬ Yaˬhoˉvaˬ htaꞈ oˉ kʼoˍ maˇ pui ve chaw lehˬ yawˇ ve chaw ka tiꞈ yeˬ ve htaꞈ fawˉ mehˍ ve yoˬ. (2 Tiˆmoˉseˍ 3:12) Chi beuꞈ awˬ leh meuˇ gaˬ la paˇ neˇ ve pa taw, canˇ paˍ ngaˬ hui htaꞈ gʼaˇ hteꞈ tawˍ laˇ tuˬ yoˬ.—Maꞈhtehˍ 24:9.

2-3. (a) Ngaˬ hui kawˆ jaˇ ve kʼo hkʼaˬ hkʼe hpehꞈ la gʼa tuˬ le? (b) Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

² Fawˉ mehˍ ve gʼa hpuˇ tuˬ aˬ htoꞈ ma te chi teˇ hkui kaꞈ ngaˬ hui gu hehnˇ taˍ gʼa ve le? Oˇ ve teˇ yanˇ ngaˬ hui hkʼaˬ hkʼe gʼa hpuˇ tuˬ taˇ dawˇ nyi. Chi hkʼe te ve kʼo, ngaˬ hui kawˆ tuˬ leh dawˇ haˍ ve tiˉ cawˬ tuˬ yoˬ. Fawˉ mehˍ ve maˇ gʼa hpuˇ sheˍ ve kaꞈ ngaˬ hui kawˆ jaˇ ve kʼo, Yaˬhoˉvaˬ ve kanˉ maˇ te la ve yoˬ. (Tawˇ naˉ ve 12:25; 17:22) Kawˆ ve lehˬ ‘canˇ paˍ neˇ haiˬ’ ve laꞈ caˉ hpehꞈ ve yoˬ. Yawˇ laꞈ caˉ chi htaꞈ yehˇ leh ngaˬ hui htaꞈ te luˬ laˇ tuˬ yoˬ. (1 Peˍtruˆ 5:8, 9) Fawˉ mehˍ ve htaꞈ ponˬ tuˬ chi teˇ hkui kaꞈ ngaˬ hui aˬ htoꞈ ma te gʼa ve le?

³ Ngaˬ hui hkʼaˬ hkʼe te leh Yaˬhoˉvaˬ geh meuˆ daꞈ maˇ la tuˬ leh, aˬ htoꞈ ma te chi teˇ hkui kaꞈ Yaˬhoˉvaˬ geh meuˆ daꞈ ve a yeˇ uiˍ jaˇ ve awˬ lawn chi ve hkʼaw henˇ tuˬ yoˬ. Peuˬ leh ngaˬ hui hkʼaˬ hkʼe te haꞈ hanˉ ve cawˬ tuˬ leh, shu ngaˬ hui htaꞈ nyi bawˬ laˇ ve kʼo hkʼaˬ hkʼe gʼa te tuˬ ve kaꞈ henˇ tuˬ yoˬ.

4. Heˍbrehˇ liꞈ 13:5, 6 hkʼaw kʼoˆ taˍ ve hkʼe, ngaˬ hui aˬ htoꞈ ma htaꞈ yonˍ gʼa ve le? Aˬ htoꞈ ma pa taw le?

⁴ Yaˬhoˉvaˬ nawˬ htaꞈ haꞈ leh maˇ baˬ taˉ laˇ tehꞈ hkʼa dehꞈ yonˍ sheˍ. (Heˍbrehˇ 13:5, 6 gʼaw sheˍ.) Ponˬ laˬ ve laiˉ hkʼawꞈ Shaw nyi kuiˬ Taꞈ yehˬ teˇ kʼoˆ hkʼaw kʼoˆ ve, “Yaˬhoˉvaˬ htaꞈ hkʼa dehꞈ shiˍ ve  chaw lehˬ fawˉ mehˍ ve gʼa hpuˇ htaˇ, yawˇ htaꞈ gʼaˇ va ve yoˬ.” Chi awˬ tehˬ yoˬ! Fawˉ mehˍ ve htaꞈ gʼa ponˬ tuˬ ngaˬ hui Yaˬhoˉvaˬ htaꞈ gʼa haꞈ ve, nyi ma awˬ tawˬ hkʼa gaˬ yawˇ htaꞈ gʼaˇ gʼa va cawˇ ve, ngaˬ hui htawˇ dawˇ nawˬ dawˇ maˇ cawˬ cawˇ.—Maꞈhtehˍ 22:36-38; Yaˍkoˆ 5:11.

5. Yaˬhoˉvaˬ nawˬ htaꞈ haꞈ ve tehꞈ shiˍ tuˬ aˬ htoꞈ ma ga laˇ ve le?

⁵ Teˇ nyi le le Liꞈ hpu gʼaw leh Yaˬhoˉvaˬ geh meuˆ daꞈ maˇ la tuˬ dawˇ teh taˍ sheˍ. (Yaˍkoˆ 4:8) Nawˬ Liꞈ hpu gʼaw htaˇ, Yaˬhoˉvaˬ ve te hkʼaˇ dawˇ hkʼaˇ dawˇ sha gawˬ lehˍ ve daꞈ jaˇ ve htaꞈ dawˇ nyi sheˍ. Yaˬhoˉvaˬ te ve leh kʼoˆ ve awˬ ceuˬ htaꞈ dawˇ nyi htaˇ, yawˇ nawˬ htaꞈ hkʼaˬ hkʼe taw haꞈ ve shiˍ la ve yoˬ. (Tawˆ kʼai ve 34:6) Chaw teˇ hpaˍ hpaˍ shu haꞈ laˇ ve htaꞈ maˇ gʼa jaw ve pa taw, Yaˬhoˉvaˬ haꞈ laˇ tuˬ tehꞈ yawˇ hui maˇ yonˍ gʼa. Nawˬ chi hkʼe dawˇ ve kʼo, Yaˬhoˉvaˬ nawˬ htaꞈ haꞈ leh te laˇ ve awˬ ceuˬ htaꞈ teˇ nyi le le bvuhꞈ nyi sheˍ. (Chiˇ mvuh ve 78:38, 39; Roˉmaꞈ 8:32) Nawˬ a shaꞈ teꞈ kuiˬ hkʼaw hpehꞈ la ve leh Liꞈ hpu hkʼaw ve awˬ lawn teˇ hpaˍ htaꞈ dawˇ nyi htaˇ, nawˬ laiˉ ceuˬ bvuhꞈ tawˆ la gʼa tuˬ yoˬ. Yaˬhoˉvaˬ nawˬ awˬ pon te laˇ ve htaꞈ awˬ hpfuhˇ shiˍ htaˇ, nawˬ yawˇ htaꞈ meuˆ daꞈ maˇ la tuˬ yoˬ.—Chiˇ mvuh ve 116:1, 2.

6. Chiˇ mvuh ve liꞈ 94:17-19 hkʼaw nyi ma awˬ tawˬ hkʼa gaˬ bon lawˬ ve nawˬ htaꞈ hkʼaˬ hkʼe ga laˇ ve le?

⁶ Hkʼaˬ htaˆ kaꞈ bon lawˬ sheˍ. Awˬ pa yawˇ ve yaˇ paˍ htaꞈ kʼuˉ ve dawˇ nyi sheˍ. Oˇ ve teˇ nyi yawˇ aˬ htoꞈ ma gʼa hpuˇ ve maˇ kawˆ leh awˬ pa htaꞈ kʼoˆ piˇ haˆ ve yoˬ. Nawˬ teˇ nyi le le nyi ma awˬ tawˬ hkʼa gaˬ Yaˬhoˉvaˬ geh bon lawˬ leh kʼoˆ piˇ ve kʼo, nawˬ kaꞈ yawˇ geh meuˆ daꞈ tuˬ yoˬ. (Chiˇ mvuh ve 94:17-19 gʼaw sheˍ.) Nawˬ bon lawˬ htaˇ, “nyi ma awˬ tawˬ hkʼa gaˬ yawˇ htaꞈ lawˬ hkawˉ˗oˆ.” Nawˬ aˬ htoꞈ ma kawˆ leh dawˇ haˍ ve awˬ ceuˬ Awˬ pa Yaˬhoˉvaˬ htaꞈ kʼoˆ piˇ sheˍ. (Dawˇ haˍ ve 2:19) Nawˬ chi hkʼe te ve kʼo Liꞈ hpu hkʼaw kʼoˆ ve, “Gʼuiˬ sha lo laˬ ve, chaw yaˇ hui ca dawˇ maˇ gaˬ ve dawˇ sha gaˇ sha ve” hkʼa peu˗eˬ nawˬ cawˬ tuˬ yoˬ. (Hpiˇliˇpiˆ 4:6, 7) Nawˬ bon gʼaˇ hteꞈ lawˬ ve kʼo, Yaˬhoˉvaˬ geh meuˆ daꞈ tuˬ yoˬ.—Roˉmaꞈ 8:38, 39.

7. Aˬ htoꞈ ma te Gʼuiˬ sha ve mvuhˇ miˬ htaꞈ caˉ daꞈ ve ka tiꞈ te taˍ ve nawˬ yonˍ gʼa ve le?

⁷ Gʼuiˬ sha ve mvuhˇ miˬ htaꞈ caˉ daꞈ ve ka tiꞈ te taˍ ve hkʼa peu˗eˬ awˬ tehˬ hpehꞈ la tuˬ yonˍ sheˍ. (Heh puiˉ hkʼaw 23:19) Gʼuiˬ sha ve mvuhˇ miˬ htaꞈ caˉ daꞈ ve ka tiꞈ te taˍ ve nawˬ hkʼa dehꞈ maˇ yonˍ ve kʼo, Saˍtanˍ leh yawˇ ve chaw nawˬ htaꞈ kawˆ ve te laˇ tuˬ sha jaˇ. (Tawˇ naˉ ve 24:10; Heˍbrehˇ 2:15) Chi teˇ hkui kaꞈ Gʼuiˬ sha ve mvuhˇ miˬ htaꞈ nawˬ yonˍ tuˬ aˬ htoꞈ ma te laˇ ve le? Gʼuiˬ sha ve mvuhˇ miˬ htaꞈ caˉ daꞈ ve ka tiꞈ te taˍ ve leh ka tiꞈ chi nawˬ awˬ pon awˬ tehˬ hpehꞈ gʼa ve htaꞈ a shu yawˇ hkʼaˇ yawˇ Liꞈ hpu henˇ leh dawˇ nyi sheˍ. Chi hkʼe te ve hkʼaˬ hkʼe ga laˇ gʼa ve le? Saꞈtehnˬliˇ Conˍ yonˍ ve htaꞈ pa taw, htawnˍ hkʼaw lo 7 hkʼawꞈ  gʼa chehˇ ve htaꞈ dawˇ nyi sheˍ. * Yawˇ ka tiꞈ yeˬ tuˬ aˬ htoꞈ ma ga piˇ ve le? Yawˇ kʼoˆ ve, “Gʼuiˬ sha ve mvuhˇ miˬ htaꞈ caˉ daꞈ ve ngaˬ shiˍ ve pa taw, chi ngaˬ htawˇ dawˇ nawˬ dawˇ maˇ cawˬ, co ha hpawˇ uiˍ la mvuh la leh ka tiꞈ yeˬ gʼa ve yoˬ.” Gʼuiˬ sha ve mvuhˇ miˬ htaꞈ caˉ daꞈ ve ka tiꞈ te taˍ ve htaꞈ nawˬ hkʼa dehꞈ yonˍ ve kʼo, yawˇ geh gʼaˇ hteꞈ meuˆ daꞈ leh yawˇ ve kanˉ te ve maˇ kawˆ.—Tawˇ naˉ ve 3:25, 26.

8. Hpawnˬ daꞈ˗e ve htaꞈ caˉ daꞈ ve ngaˬ hui hkʼaˬ hkʼe dawˇ ve le? Tawˇ pa haˉ kʼoˆ maˍ laˇ sheˍ.

⁸ Hkʼaˬ htaˆ kaꞈ hpawnˬ daꞈ˗e sheˍ. Hpawnˬ daꞈ˗e ve ngaˬ hui Yaˬhoˉvaˬ geh meuˆ daꞈ tuˬ ga laˇ ve yoˬ. Fawˉ mehˍ ve htaꞈ ngaˬ hui ponˬ gʼa tuˬ, maˇ ponˬ gʼa tuˬ hpawnˬ daꞈ˗e ve htaꞈ ngaˬ hui hkʼaˬ hkʼe dawˇ ve htaꞈ caˉ daꞈ ve yoˬ. (Heˍbrehˇ 10:24, 25) Aˬ htoꞈ ma te chi hkʼe kʼoˆ ve le? Ngaˬ hui chi teˇ hkui kaꞈ awˬ lawn maˇ uiˍ ve htaꞈ pa taw maˇ hpawnˬ daꞈ˗e ve kʼo, awˬ gʼuˇ suhˍ hpawˇ awˬ viˉ awˬ nyi geh hpawnˬ daꞈ˗e ve a shaꞈ gʼa shonˇ la ve kʼo hkʼaˬ hkʼe te tuˬ le? Yaꞈ hkʼaˇ, chi teˇ hkui kaꞈ ngaˬ hui hkʼaˬ htaˆ kaꞈ hpawnˬ daꞈ˗e ve kʼo, tawˍ taˍ paˍ ngaˬ hui htaꞈ tawˍ laˇ ve htawˇ, hpawnˬ daꞈ ve hkʼaˬ htaˆ kaꞈ kʼai tuˬ yoˬ. Chi teˇ hkui ngaˬ hui hpawnˬ daꞈ ve htaꞈ haꞈ tuˬ te sheˍ. Hpawnˬ daꞈ˗e ve htaꞈ ngaˬ hui haꞈ ve kʼo, mvuhˇ miˬ uˉ peunˍ ve tawˍ laˇ leh hkʼaˬ hkʼe ve gʼa hpuˇ ve htawˇ, chaw yaˇ ve tawˇ hkawˇ na ve aꞈ kehˉ Gʼuiˬ sha ve tawˇ hkawˇ htaꞈ na tuˬ yoˬ.—Tcuh yaˇ 5:29.

9. Aˬ htoꞈ ma te Liꞈ hpu awˬ tawn tawnˇ gʼa ve ngaˬ hui fawˉ mehˍ ve htaꞈ ponˬ gʼa tuˬ ga laˇ ve le?

⁹ Coˇ caˇ leh Liꞈ hpu awˬ tawn dawˇ cawˇ ve tawnˇ taˍ sheˍ. (Maꞈhtehˍ 13:52) Nawˬ tawnˇ maˇ gʼa ve htawˇ, Yaˬhoˉvaˬ ve daꞈ kehˬ ve awˬ ha hpu nawˬ htaꞈ ga laˇ leh tawnˇ gʼa tuˬ yoˬ. (Yoˇhanˬ 14:26) Jaˬmaˬniˬ mvuhˇ nyi tawˆ hpawˇ mvuhˇ miˬ lo awˬ viˉ awˬ nyi hawˉ hkʼaˆ teˇ gʼaˇ tiˉ haw ti taˍ ve htaꞈ dawˇ nyi sheˍ. Yawˇ kʼoˆ ve, “chi awˬ gʼuˇ suhˍ htaˇ, ngaˬ Liꞈ hpu laiˉ ha tawn tawnˇ gʼa ve daꞈ jaˇ. Teˇ nyi le le ngaˬ teˇ gʼaˇ tiˉ chehˇ htaˇ, Liꞈ hpu hkʼaw ve awˬ lawn htaꞈ dawˇ nyi ve yoˬ.” Liꞈ hpu awˬ tawn chi ve teˇ hpaˍ awˬ viˉ awˬ nyi chi teˇ gʼaˇ Yaˬhoˉvaˬ geh meuˆ daꞈ tuˬ leh ka tiꞈ yeˬ gʼa tuˬ ga piˇ ve yoˬ.

10. Aˬ htoꞈ ma te nawˬ Yaˬhoˉvaˬ htaꞈ kʼa muiˬ hkawˇ kʼa chiˇ mvuh piˇ ve tawnˇ gʼa tcuh cawˇ ve le?

¹⁰ Yaˬhoˉvaˬ htaꞈ kʼa muiˬ hkawˇ kʼa piˇ leh noꞈ mehˆ tawnˇ gʼa tcuh sheˍ. Pawˇluꞈ leh Sheˍlaˆ Hpiˇliˇpiˆ venˇ htawnˍ hkʼaw lo chehˇ htaˇ, yawˇ huiˉ maˬ tawnˇ gʼa ve kʼa muiˬ hkawˇ htaꞈ kʼa ve yoˬ. (Tcuh yaˇ 16:25) Oˇ htaˇ ve awˬ viˉ awˬ nyi Soˍviˉ˗e mvuhˇ miˬ chehˇ ve Saiˬ˗biˬ˗ri˗aˬ lo gʼawˬ  baˬ˗aˉ piˇ htaˇ kaꞈ shuˍ daꞈ ve yoˬ. Yawˇ hui ve yonˍ hkʼaˇ uiˍ la mvuh la tuˬ hkʼaˬ hkʼe te ve le? Awˬ viˉ awˬ nyi Maˍriˆyaˍ Fe˗dun kʼoˆ ve, “kʼa muiˬ hkawˇ tawnˇ gʼa ve teˇ maˬ le le ngaˬ hui kʼa ve yoˬ.” Yawˇ kʼoˆ ve, kʼa muiˬ hkawˇ chi teˇ hpaˍ ngaˬ hui awˬ gʼaˇ gʼa leh Yaˬhoˉvaˬ geh meuˆ daꞈ maˇ la ve yoˬ. Nawˬ dawˇ cawˇ ve kʼa muiˬ hkawˇ kʼa htaˇ, nawˬ ve yonˍ hkʼaˇ uiˍ la mvuh la ve tehꞈ dawˇ˗aw laˇ? Chi teˇ hkui kaꞈ Yaˬhoˉvaˬ htaꞈ kʼa muiˬ hkawˇ kʼa piˇ ve tawnˇ taˍ sheˍ!—Awˇ ceˍ awˇ fa “ Ngaˬ htaꞈ haꞈ hanˉ tuˬ cawˬ tcuh laˇ˗oˆ” htaꞈ nyi sheˍ.

11-12. (a) 1 Saˍmo˗eˍlaˆ liꞈ 17:37, 45-47 hkʼaw aˬ htoꞈ ma te Daˍviˆ haꞈ hanˉ ve cawˬ ve le? (b) Daˍviˆ ve te hkʼaˇ dawˇ hkʼaˇ ngaˬ hui htaꞈ aˬ htoꞈ ma maˍ laˇ ve le?

¹¹ Fawˉ mehˍ ve htaꞈ ponˬ tuˬ nawˬ haꞈ hanˉ ve gʼa cawˬ ve yoˬ. Nawˬ haꞈ hanˉ ve maˇ cawˬ tehꞈ dawˇ ve kʼo, hkʼaˬ hkʼe te gʼa tuˬ le? Awˬ tehˬ haꞈ hanˉ ve lehˬ ngaˬ hui awˬ to hkʼaˬ hkʼe taw uiˍ ve, awˬ gʼaˇ hkʼaˬ hkʼe taw cawˬ ve, leh hkʼaˬ hkʼe taw cheuˬ ve htaꞈ maˇ caˉ daꞈ tehꞈ tawnˇ taˍ sheˍ. Daˍviˆ yaˇ nehˬ htaˇ, Gawˇliˇyaˆ geh hpuˇ daꞈ˗e ve awˬ lawn htaꞈ dawˇ nyi sheˍ. Daˍviˆ Gawˇliˇyaˆ htaꞈ tehˆ ve kʼo, awˬ gʼaˇ leh laꞈ caˉ kaꞈ maˇ cawˬ. Daˍviˆ aˉ htaw teˇ taˬ kaꞈ maˇ cawˬ. Yaꞈ hkʼaˇ, yawˇ haꞈ hanˉ jaˇ. Uiˍ muiˬ caˆ muiˬ jaˇ ve Gawˇliˇyaˆ geh yawˇ vaˇ daꞈ ve yoˬ.

¹² Aˬ htoꞈ ma pa taw Daˍviˆ haꞈ hanˉ jaˇ ve le? Yaˬhoˉvaˬ yawˇ geh chehˇ ve tehꞈ yonˍ ve pa taw yoˬ. (1 Saˍmo˗eˍlaˆ 17:37, 45-47 gʼaw sheˍ.) Daˍviˆ lehˬ Gawˇliˇyaˆ uiˍ jaˇ ve htawˇ maˇ kawˆ. Chi hkʼoˆ kaꞈ Gawˇliˇyaˆ Yaˬhoˉvaˬ hkʼe taw kanˇ paˆ maˇ cawˬ ve htaꞈ Daˍviˆ shiˍ ve yoˬ. Ngaˬ hui htaꞈ aˬ htoꞈ ma maˍ laˇ ve le? Yaˬhoˉvaˬ ngaˬ hui geh chehˇ ve kʼo haꞈ hanˉ ve cawˬ leh, ngaˬ hui ve canˇ paˍ Gʼuiˬ sha hkʼe taw kanˇ paˆ maˇ cawˬ ve tehꞈ yonˍ gʼa ve yoˬ. (2 Raˍsaˍvanˍ 20:15; Chiˇ mvuh ve 16:8) Fawˉ mehˍ ve maˇ gaˬ la sheˍ htaˇ, ngaˬ hui chi teˇ hkui kaꞈ haꞈ hanˉ ve cawˬ tuˬ hkʼaˬ hkʼe te gʼa ve le?

13. Ngaˬ hui hkʼaˬ hkʼe te haꞈ hanˉ ve cawˬ gʼa tuˬ le? Tawˇ pa haˉ te maˍ laˇ sheˍ.

¹³ Chi teˇ hkui kaꞈ ngaˬ hui Gʼuiˬ sha ve mvuhˇ miˬ daꞈ ve awˬ lawn hto toˇ ve kʼo, haꞈ hanˉ ve cawˬ gʼa ve yoˬ. Aˬ htoꞈ ma pa taw le? Ngaˬ hui hto toˇ ve lehˬ Yaˬhoˉvaˬ htaꞈ gʼaˇ va ve pa taw chaw yaˇ htaꞈ maˇ kawˆ. (Tawˇ naˉ ve 29:25) Ngaˬ hui awˬ gʼaˇ caw ve kʼo, awˬ gʼaˇ cawˬ ve yoˬ. Chi hkʼa shuˍ shuˍ teˇ yehˬ peuˬ teˇ yehˬ, chaw guiˇ kuiˬ lo, hto toˇ kuiˬ maˇ chehˇ htaˇ, leh tanˇ kaˬ hkʼaˇ te kuiˬ hkʼaw hto toˇ htaˇ ngaˬ hui haꞈ hanˉ ve cawˬ gʼa ve yoˬ. Chi teˇ hkui kaꞈ ngaˬ hui hto toˇ ve haꞈ hanˉ ve kʼo, awˬ gʼuˇ suhˍ hpawˇ ngaˬ hui ve kanˉ htaꞈ tawˍ laˇ ve htawˇ hto toˇ ve haꞈ hanˉ tuˬ yoˬ.—1 Hteˇsaˍlawˇniˆ 2:1, 2.

14-15. Awˬ viˉ awˬ nyi chi 2 gʼaˇ htaꞈ ngaˬ hui hkʼaˬ hkʼe te henˇ yuˬ gʼa ve le?

 ¹⁴ Awˬ viˉ awˬ nyi ka tiꞈ yeˬ ve yaˇ miˇ 2 gʼaˇ haꞈ hanˉ ve awˬ lawn ngaˬ hui htaꞈ laiˉ ceuˬ maˍ laˇ ve yoˬ. Teˇ gʼaˇ lehˬ Nehnˉsiˍ Yu˗en meh leh mvuh hpawˇ 150 meˆ (cm.) ceh cawˬ ve yoˬ. Yaꞈ hkʼaˇ, yawˇ teꞈ chiˉ kaꞈ maˇ kawˆ. * Yawˇ Gʼuiˬ sha ve mvuhˇ miˬ daꞈ ve awˬ lawn caˉ leh hto toˇ ve pa taw, Hehˆpaˍ mvuhˇ miˬ maꞈ yaˇ uˉ peunˍ ve awˬ hawˉ lo, yawˇ htawnˍ hkʼaw 20 hkʼawꞈ gʼa chehˇ ve yoˬ. Hehˆpaˍ mvuhˇ miˬ hkʼaw ve maꞈ yaˇ kʼoˆ ve, “nawˬ shu aꞈ kehˉ tawˇ yaw haˍ jaˇ!”

¹⁵ Awˬ nu ve teˇ gʼaˇ lehˬ awˬ viˉ awˬ nyi yaˇ miˇ Va˗len˗ti˗naˇ Ga˗nawˆsaꞈkaˍyaˍ htawnˍ hkʼaw lo 3 pawˆ gʼa chehˇ ve yoˬ. Yawˇ gʼa chehˇ ve awˬ yanˇ hkʼa peu˗eˬ 21 hkʼawꞈ yoˬ. * Aˬ htoꞈ ma te yawˇ chi hkʼe gʼa hpuˇ ve le? Maꞈ yaˇ yawˇ htaꞈ “chaw haiˬ” hpehꞈ ve tehꞈ kʼoˆ piˇ ve htawˇ, yawˇ caˉ leh hto toˇ sheˍ. Aˬ htoꞈ ma te awˬ viˉ awˬ nyi yaˇ miˇ chi 2 gʼaˇ haꞈ hanˉ jaˇ ve le? Yaˬhoˉvaˬ yawˇ hui geh chehˇ ve tehꞈ hkʼa dehꞈ yonˍ ve yoˬ.

16. Ngaˬ hui awˬ tehˬ haꞈ hanˉ ve cawˬ tuˬ awˬ hkʼaˇ aˬ htoꞈ ma ga laˇ ve le?

¹⁶ Ngaˬ hui henˇ peuˬ ve hkʼa shuˍ haꞈ hanˉ ve cawˬ tuˬ ngaˬ hui ve awˬ gʼaˇ htaꞈ gʼaˇ maˇ va cawˇ. Yaꞈ hkʼaˇ, Yaˬhoˉvaˬ ngaˬ hui geh chehˇ leh ngaˬ hui awˬ pon maꞈ bawˆ tuˬ yoˬ tehꞈ yonˍ gʼa ve yoˬ. (Bon maˍ ve 1:29, 30; Zaˍhkaˍriˆ 4:6) Chi ngaˬ hui awˬ tehˬ haꞈ hanˉ ve cawˬ tuˬ awˬ hkʼaˇ hpehꞈ ve yoˬ.

17-18. Yoˇhanˬ liꞈ 15:18-21 hkʼaw Yeˍsuˆ ngaˬ hui htaꞈ shaˍ tiꞈ hkʼaˬ hkʼe peꞈ laˇ ve le? Tawˇ pa haˉ kʼoˆ maˍ laˇ sheˍ.

¹⁷ Shu ngaˬ hui htaꞈ yawˆ yan laˇ htaˇ ha lehˬ ve htawˇ, shu ngaˬ hui htaꞈ maˇ yawˆ yan htaˇ awˬ hpfuhˇ maˇ cawˬ ve tehꞈ kʼoˆ gaˇ ve maˇ heˆ. Yeˍsuˆ kʼoˆ ve, “chaw yaˇ ve Yaˇ hpu htaꞈ pa taw shu nawˬ hui htaꞈ canˇ laˇ ve, shawˍ baˬ laˇ ve, hkʼa mvuhˇ hkʼa na kʼoˆ laˇ ve, leh nawˬ hui ve awˬ meh htaꞈ te luˬ laˇ ve kʼo, nawˬ hui awˬ bon uiˍ ve yoˬ.” (Luˉkaꞈ 6:22) Yeˍsuˆ hkʼaˬ hkʼe kʼoˆ gaˇ ve le?

¹⁸ Hkriꞈ yaˇ shu nyi bawˬ laˇ htaˇ, ha lehˬ ve tehꞈ Yeˍsuˆ kʼoˆ gaˇ ve maˇ heˆ. Yaꞈ hkʼaˇ, chi awˬ tehˬ  hpehꞈ la tuˬ yoˬ tehꞈ yawˇ kʼoˆ gaˇ ve yoˬ. Ngaˬ hui miˬ guiˬ chi htaꞈ maˇ caˉ daꞈ. Ngaˬ hui Yeˍsuˆ maˍ laˇ ve hkʼe gʼaꞈ te leh Yeˍsuˆ hkʼa shuˍ ngaˬ hui hto toˇ ve pa taw, miˬ guiˬ yaˇ canˇ tuˬ yoˬ. (Yoˇhanˬ 15:18-21 gʼaw sheˍ.) Ngaˬ hui ve Awˬ pa Yaˬhoˉvaˬ ha lehˬ tcuh gaˇ ve yoˬ. Chi htaꞈ pa taw ngaˬ hui Yaˬhoˉvaˬ htaꞈ haꞈ leh shu nyi bawˬ laˇ ve pa taw, ngaˬ hui awˬ hpfuhˇ maˇ cawˬ ve tehꞈ maˇ dawˇ.

19. Ngaˬ hui tcuh yaˇ hui htaꞈ hkʼaˬ hkʼe henˇ yuˬ gʼa tuˬ le?

¹⁹ Shu kʼoˆ ve leh te ve htaꞈ pa taw, nawˬ Yaˬhoˉvaˬ ve Shaˉhkiˆhkanˍ ve chaw hpehꞈ ve taˇ yaꞈ taw. (Miˆhkaˍ 4:5) Yeˍsuˆ suh peuˬ hkʼawꞈ nawˉ tcuh yaˇ hui Yeˍruˆsaˍlehnˍ venˇ hkʼaw te ve awˬ ceuˬ, ngaˬ hui kawˆ ve maˇ cawˬ tuˬ maˍ laˇ ve yoˬ. Yuˇdaꞈ chaw bon awˬ hoˉ yawˇ hui htaꞈ hkʼaˬ hkʼe taw nyi bawˬ ve yawˇ hui shiˍ ve yoˬ. (Tcuh yaˇ 5:17, 18, 27, 28) Yaꞈ hkʼaˇ, tcuh yaˇ hui bon yehˬ lonˉ hkʼaw teˇ nyi le le bon maˍ leh, Yeˍsuˆ ve awˬ laꞈ gʼawˇ hpehꞈ ve tehꞈ shu htaꞈ hpeuꞈ maw piˇ ve yoˬ. (Tcuh yaˇ 5:42) Kawˆ ve htaꞈ pa taw, yawˇ hui bon maˇ maˍ haˆ tuˬ maˇ te laˇ tcuh. Liꞈ henˇ kuiˬ, kanˉ te kuiˬ, ngaˬ hui awˬ paˇ awˬ kui chehˇ ve chaw htaꞈ ngaˬ hui Yaˬhoˉvaˬ ve Shaˉhkiˆhkanˍ ve chaw hpehꞈ ve tehꞈ shiˍ tcuh tuˬ taˇ kawˆ.—Tcuh yaˇ 4:29; Roˉmaꞈ 1:16.

20. Tcuh yaˇ hui shu nyi bawˬ piˇ ve htawˇ aˬ htoꞈ ma pa taw yawˇ hui ha lehˬ ve le?

²⁰ Tcuh yaˇ hui shu nyi bawˬ piˇ ve htawˇ, aˬ htoꞈ ma te ha lehˬ ve le? Yawˇ hui Yaˬhoˉvaˬ ve a loˍ htaꞈ gʼaꞈ te ve pa taw, shu nyi bawˬ leh fawˉ mehˍ piˇ ve htawˇ ha lehˬ ve yoˬ. (Luˉkaꞈ 6:23; Tcuh yaˇ 5:41) Peuˬ leh tcuh yaˇ Peˍtruˆ kʼoˆ ve, “hteˇ ve cawˇ ve htaꞈ pa taw nawˬ hui gʼa tuꞈ gʼa hkanˍ puiˉ ve law kʼo, awˬ bon uiˍ ve yoˬ.” (1 Peˍtruˆ 2:19-21; 3:14) Ngaˬ hui cawˇ ve htaꞈ te ve pa taw shu nyi bawˬ laˇ ve htawˇ, Yaˬhoˉvaˬ ve kanˉ caˉ leh te tuˬ yoˬ.

21-22. (a) Fawˉ mehˍ ve htaꞈ gʼa ponˬ tuˬ gu hehnˇ taˍ tuˬ aˬ htoꞈ ma te gʼa ve le? (b) Gʼuˇ suhˍ teˇ lawn hkʼaw aˬ htoꞈ ma htaꞈ henˇ tuˬ le?

²¹ Fawˉ mehˍ ve maˇ heˆ leh mvuhˇ miˬ uˉ peunˍ ve ngaˬ hui oˉ kʼoˍ pui ve a hkaw˗anˬ maˇ peꞈ laˇ ve hkʼaˬ htaˇ hpehꞈ la tuˬ naˍ maˇ shiˍ. Yaꞈ hkʼaˇ, chi teˇ hkui ngaˬ hui Yaˬhoˉvaˬ geh hkʼa dehꞈ meuˆ daꞈ tuˬ, haꞈ hanˉ ve cawˬ tuˬ, leh shu nyi bawˬ laˇ ve kaꞈ jaw kʼai gʼa tuˬ gu hehnˇ taˍ gʼa ve yoˬ. Chi teˇ hkui kaꞈ gu hehnˇ taˍ ve kʼo, awˬ gʼuˇ suhˍ hpawˇ kaꞈ yeˬ chehˇ gʼa tuˬ yoˬ.

²² Tawˍ laˇ ve awˬ tehˬ hpehꞈ la htaˇ ngaˬ hui hkʼaˬ hkʼe te tuˬ le? Ngaˬ hui ve kanˉ htaꞈ tawˍ laˇ ve htawˇ, Liꞈ hpu hkʼaw ve awˬ liˇ awˬ hkʼaˇ ngaˬ hui htaꞈ ga laˇ leh Yaˬhoˉvaˬ ve kanˉ caˉ leh te gʼa tuˬ, gʼuˇ suhˍ teˇ lawn hkʼaw henˇ tuˬ yoˬ.