Liꞈ hpu hkʼaw “ngaˬ hui hkʼa shuˍ shuˍ” dawˇ ve chaw tawˇ yaw taˍ ve awˬ lawn cawˬ ve yoˬ. (Yaˍkoˆ 5:17) Tawˇ pa haˉ te kʼo, Roˉmaꞈ liꞈ 7:21-24 hkʼaw Pawˇluꞈ kʼoˆ taˍ ve tawˇ hkawˇ ngaˬ hui hkʼa dehꞈ na gʼa ve yoˬ. “Ngaˬ daꞈ ve htaꞈ te gaˇ ve teˇ yanˇ, awˬ haiˬ teˇ ceuˬ ngaˬ geh chehˇ taˍ ve awˬ liˇ htaꞈ ngaˬ gʼa mawˬ ve yoˬ. Ngaˬ lehˬ hpehꞈ bawˬ jaˇ, dawˇ haˍ jaˇ ve chaw teˇ gʼaˇ hpehꞈ ve yoˬ.” Chi hkʼe ve dawˇ hkʼaˇ lehˬ ngaˬ hui maˇ biˇ ve dawˇ hkʼaˇ htaꞈ tawˍ daꞈ gʼaˇ tuˬ ga laˇ gʼa ve yoˬ.

Chi hkʼoˆ kaꞈ, Gaˍlaˍtiˆ liꞈ 2:20 hkʼaw Pawˇluꞈ kʼoˆ sheˍ ve, ‘Yeˍsuˆ ngaˬ htaꞈ haꞈ leh ngaˬ awˬ pon yawˇ awˬ to tanˇ laˇ peuˬ ve yoˬ.’ Ngaˬ hui yawˇ hkʼe dawˇ˗aw laˇ? Teˇ pawˆ pawˆ kʼo ngaˬ hui yawˇ hkʼe dawˇ tuˬ haˍ jaˇ.

Ngaˬ hui venˇ baˆ te yaꞈ jaw leh a shu yawˇ awˬ to awˬ hpfuhˇ maˇ cawˬ tehꞈ dawˇ ve kʼo, Yaˬhoˉvaˬ venˇ baˆ hpehˇ laˇ leh haꞈ laˇ ve htaꞈ haꞈ yuˬ tuˬ maˇ sha ve yoˬ hehˉ. “Htaiˍ hkʼawꞈ laˇ ve lehˬ ngaˬ awˬ pon laꞈ shawnˍ hpehꞈ ve” tehꞈ ngaˬ hui dawˇ maˇ gʼa ve yoˬ hehˉ. Htaiˍ hkʼawꞈ ve awˬ hpfuhˇ htaꞈ Yeˍsuˆ hkʼaˬ hkʼe dawˇ tcuh gaˇ ve le? Ngaˬ hui hkʼaˬ hkʼe te chi hkʼe dawˇ gʼa tuˬ le? Teˇ geh chaˬ nyi sheˍ.

Htaiˍ hkʼawꞈ ve nawˬ awˬ pon laꞈ shawnˍ hpehꞈ ve tehꞈ Yeˍsuˆ dawˇ tcuh gaˇ ve yoˬ. Ngaˬ hui hkʼaˬ hkʼe te shiˍ gʼa ve le? Luˉkaꞈ liꞈ 23:39-43 hkʼaw ve awˬ lawn htaꞈ dawˇ nyi sheˍ. Yeˍsuˆ awˬ paˇ lo suhˆ hkuiˉ daw hkʼoˆ htaꞈ keu taˍ ve hawˉ hkʼaˆ teˇ gʼaˇ yawˇ te yaꞈ jaw ve tehꞈ haꞈ yuˬ ve yoˬ. Suhˆ hkuiˉ daw hkʼoˆ htaꞈ keu ve lehˬ yawˇ venˇ baˆ uiˍ jaˇ ve tehꞈ hpeuꞈ maw laˇ ve yoˬ. Yawˇ dawˇ haˍ jaˇ leh Yeˍsuˆ geh lawˬ hkawˉ leh kʼoˆ ve, “nawˬ hkunˉ hawˉ hkanˇ te la ve teˇ yanˇ, ngaˬ htaꞈ dawˇ nawˇ laˇ˗oˆ.”

Yeˍsuˆ hkʼaˬ hkʼe te ve le? Dawˇ nyi sheˍ. Yawˇ naˬ jaˇ ve htawˇ, chaw haiˬ oˇ ve teˇ gʼaˇ hpawˇ lo hpfuhˆ peu leh yawˇ htaꞈ awˬ gʼaˇ piˇ ve yoˬ. Yawˇ kʼoˆ ve, ‘yaꞈ nyi ngaˬ nawˬ htaꞈ awˬ tehˬ awˬ na kʼoˆ laˇ ve, nawˬ ngaˬ geh teˇ geh Paˍraˍdiˇsuˆ awˬ hkʼaw lo gʼa chehˇ tuˬ yoˬ.’ “Chaw yaˇ ve Yaˇ hpu lehˬ . . . chaw maˇ maˇ htaꞈ htaiˍ hkʼawꞈ piˇ tuˬ yawˇ ve a shaꞈ piˇ tuˬ awˬ pon laˬ ve” tehꞈ chi hkʼe ceh kʼoˆ ve maˇ heˆ. (Maꞈhtehˍ 20:28) Yeˍsuˆ ha kʼaˉ ve hkʼaw “nawˬ” leh “ngaˬ” kʼoˆ ve lehˬ yawˇ te ve awˬ ceuˬ chaw oˇ ve teˇ gʼaˇ awˬ pon hpehꞈ ve tehꞈ shiˍ tcuh tuˬ hpeuꞈ maw piˇ ve yoˬ. Yawˇ kʼoˆ sheˍ ve, chaw oˇ ve teˇ gʼaˇ miˬ guiˬ awˬ suhˉ hkʼaw co co taiˍ taiˍ gʼa chehˇ tuˬ yoˬ.

Yeˍsuˆ ve a shaꞈ tanˇ laˇ ve, chaw oˇ ve teˇ gʼaˇ awˬ pon awˬ bon cawˬ ve tehꞈ yawˇ shiˍ tcuh gaˇ ve yoˬ. Venˇ baˆ maˇ dawˇ hpfuhˆ sheˍ ve chaw chi teˇ gʼaˇ htaꞈ Yeˍsuˆ chi hkʼe kʼoˆ piˇ ve kʼo, chi aꞈ kehˉ leuˉ leh venˇ baˆ dawˇ hpfuhˆ leh Baˆtiˆsaˬ haꞈ yuˬ˗oˬ ve Hkriꞈ yaˇ htaꞈ kaꞈ Yeˍsuˆ chi hkʼe dawˇ tuˬ ve maˇ heˆ laˇ? Hkʼe kʼo, Yeˍsuˆ a shaꞈ tanˇ laˇ ve ngaˬ hui a shu yawˇ hkʼaˇ yawˇ awˬ pon awˬ bon cawˬ ve tehꞈ hkʼa dehꞈ na gʼa tuˬ, aˬ htoꞈ ma ga laˇ ve le?

Pawˇluꞈ bon maˍ tuˬ Yeˍsuˆ awˬ bon piˇ ve pa taw, Yeˍsuˆ yawˇ awˬ pon suh piˇ ve yawˇ hkʼa dehꞈ na gʼa ve yoˬ. Yawˇ kʼoˆ ve, ‘ngaˬ htaꞈ awˬ gʼaˇ peꞈ laˇ ve,  ngaˬ hui ve Jawˇmawˇ Yeˍsuˆ Hkriꞈ htaꞈ ngaˬ chiˇ mvuh ve yoˬ. Awˬ lawn kʼo, ngaˬ lehˬ ponˬ laˬ htaˇ Yeˍsuˆ htaꞈ maˇ shawˍ maˇ caˆ kʼoˆ ve, yawˇ htaꞈ fawˉ mehˍ ve leh, hkʼa mvuhˇ hkʼa na kʼoˆ ve htawˇ, kanˉ chi htaꞈ te tuˬ ngaˬ ka tiꞈ yeˬ ve yoˬ tehꞈ, yawˇ dawˇ taˍ leh ngaˬ htaꞈ leuˆ yuˬ laˇ ve yoˬ.’ (1 Tiˆmoˉseˍ 1:12-14) Pawˇluꞈ maˇ daꞈ ve laiˉ ceuˬ te yaꞈ jaw ve htawˇ, Yeˍsuˆ yawˇ htaꞈ awˬ vuiˬ chi piˇ ve yoˬ. Hkʼe te leh Yeˍsuˆ ha kʼaˉ puiˉ leh yawˇ htaꞈ haꞈ leh yonˍ gʼa ve tehꞈ hkʼa dehꞈ gʼa shiˍ ve yoˬ. Yeˍsuˆ ngaˬ hui htaꞈ kaꞈ awˬ vuiˬ shuˍ daꞈ ve peꞈ laˇ ve yoˬ. (Maꞈhtehˍ 28:19, 20) Ngaˬ hui kaꞈ Pawˇluꞈ hkʼe dawˇ gʼa˗aw laˇ?

Aˬbeuˬ Hkriꞈ yaˇ awˬ moˍ hkʼaw tawˆ cheˆ ve 34 hkʼawꞈ gaˬ leh Yaˬhoˉvaˬ geh kʼawꞈ la ve maˇ maw sheˍ. Yawˇ kʼoˆ ve, “maˇ daꞈ ve awˬ ceuˬ ngaˬ te ve htaꞈ maˇ leunˇ gʼa. Yaꞈ hkʼaˇ, Gʼuiˬ sha ve kanˉ te htaˇ, tcuh yaˇ Pawˇluꞈ hkʼa shuˍ, ngaˬ kaꞈ Yeˍsuˆ geh awˬ vuiˬ gʼa ve yoˬ. Chi teˇ hkui leh awˬ gʼuˇ suhˍ hpawˇ kaꞈ chi ngaˬ ha lehˬ jaˇ tuˬ te laˇ ve yoˬ.”—Chiˇ mvuh ve 51:3.

A˗lan awˬ tehˬ ve maˇ henˇ sheˍ htaˇ, yawˇ haiˬ jaˇ leh awˬ liˇ htaꞈ laiˉ pawˆ te yaꞈ ve yoˬ. Yawˇ kʼoˆ ve, “shu htaꞈ maˇ daꞈ ve te piˇ ve ngaˬ dawˇ nawˇ sheˍ ve yoˬ. Teˇ pawˆ pawˆ kʼo ngaˬ awˬ gʼaˇ nuˇ ve yoˬ. Yaꞈ hkʼaˇ, Yaˬhoˉvaˬ lehˬ ngaˬ hkʼe te yaꞈ ve chaw htaꞈ kaꞈ cuˇ leh daꞈ ve awˬ lawn sha tanˇ hto maˍ tcuh laˇ ve ha lehˬ jaˇ. Daꞈ ve awˬ lawn chi shu na htaˇ, Yaˬhoˉvaˬ daꞈ jaˇ leh haꞈ pehnˇ uiˍ jaˇ ve ngaˬ tawnˇ gʼa ve yoˬ. Ngaˬ dawˇ ve, Yaˬhoˉvaˬ ngaˬ htaꞈ cuˇ leh ngaˬ hkʼe te yaꞈ ve chaw htaꞈ ga tcuh laˇ ve yoˬ hehˉ.”

Ngaˬ hui Gʼuiˬ sha ve kanˉ te htaˇ, ngaˬ hui daꞈ ve te hkʼaˇ dawˇ hkʼaˇ cawˬ gʼa ve yoˬ. Chi Yeˍsuˆ ha kʼaˉ puiˉ leh ngaˬ hui htaꞈ haꞈ leh yonˍ gʼa ve tehꞈ shiˍ tcuh laˇ ve yoˬ.

Saˍtanˍ ve miˬ guiˬ htaꞈ te luˬ htaˇ hkʼa gaˬ, ngaˬ hui te yaꞈ jaw ve htaꞈ nyi ma luˬ sheˍ ve yoˬ hehˉ. Ngaˬ hui dawˇ hkʼaˇ chi hkʼe ve htaꞈ hkʼaˬ hkʼe te gʼaˇ tuˬ le?

Cin yaˇ nehˬ htaˇ teˇ gʼaˇ geh kʼo teˇ ceuˬ te ve pa taw, chi teˇ hkui kaꞈ teˇ pawˆ pawˆ kʼo nyi ma maˇ sha. Yaꞈ hkʼaˇ yawˇ kʼoˆ ve, “ngaˬ hui ve nyi ma aꞈ kehˉ Gʼuiˬ sha lehˬ uiˍ jaˇ daꞈ jaˇ tawˇ chi ve ngaˬ dawˇ cawˇ jaˇ.” (1 Yoˇhanˬ 3:19, 20) Cin hkʼa shuˍ, Yaˬhoˉvaˬ leh Yeˍsuˆ ngaˬ hui htaꞈ maˇ biˇ tehꞈ shiˍ ve pa taw, ngaˬ hui nyi ma luˬ tuˬ maˇ loˍ. Venˇ baˆ dawˇ hpfuhˇ ve maˇ biˇ ve chaw awˬ pon yawˇ huiˉ maˬ htaiˍ hkʼawꞈ ve gu teh taˍ laˇ ve, biˇ ve chaw awˬ pon maˇ heˆ.—1 Tiˆmoˉseˍ 1:15.

Yeˍsuˆ maˇ biˇ ve chaw awˬ pon te piˇ ve ngaˬ hui bon lawˬ leh dawˇ nyi htaˇ, yawˇ peꞈ laˇ ve awˬ vuiˬ ngaˬ hui coˇ caˇ leh te htaˇ, htaiˍ hkʼawꞈ ve ngaˬ hui a shu yawˇ hkʼaˇ yawˇ awˬ pon hpehꞈ ve tehꞈ hkʼa dehꞈ gʼa shiˍ ve yoˬ. Nawˬ Pawˇluꞈ hkʼa shuˍ kʼoˆ gʼa ve yoˬ. ‘Yeˍsuˆ ngaˬ htaꞈ haꞈ leh ngaˬ awˬ pon yawˇ awˬ to tanˇ laˇ peuˬ ve yoˬ.’