1. Hpiˇliˇpiˆ liꞈ 2:3 hkʼaw kʼoˆ taˍ ve hkʼe, nyi ma nuˇ nehˬ ve lehˬ ngaˬ hui shu geh meuˆ daꞈ tuˬ hkʼaˬ hkʼe ga laˇ ve le?

 Ngaˬ hui awˬ pon aˬ htoꞈ ma daꞈ jaˇ ve Yaˬhoˉvaˬ shiˍ ve pa taw, ngaˬ hui nyi ma nuˇ nehˬ leh yawˇ ve tawˇ na yuˬ cawˇ ve yoˬ. (Eˇfeˇsuꞈ 4:22-24) Ngaˬ hui nyi ma nuˇ nehˬ ve kʼo, ngaˬ hui loˍ ve aꞈ kehˉ Yaˬhoˉvaˬ loˍ ve htaꞈ a yeˇ uiˍ jaˇ tehꞈ dawˇ ve yoˬ. Leh shu ngaˬ hui aꞈ kehˉ daꞈ ve kaꞈ dawˇ tuˬ te laˇ ve yoˬ. Chi Yaˬhoˉvaˬ leh Hkriꞈ yaˇ awˬ moˍ hkʼaw meuˆ daꞈ tuˬ te laˇ ve yoˬ.—Hpiˇliˇpiˆ 2:3 gʼaw sheˍ.

2. Pawˇluꞈ aˬ htoꞈ ma ve awˬ lawn htaꞈ na gʼa ve le? Leh awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

² Ngaˬ hui shaˍ tiꞈ maˇ te ve kʼo, uiˍ muiˬ caˆ muiˬ ve lehˬ * miˬ guiˬ yaˇ hkʼe a shu yawˇ awˬ pon tiˉ dawˇ nyi la ve yoˬ. Awˉ lawˉ peuˇ ve Hkriꞈ yaˇ htawˇ chi hkʼe hpehꞈ ve yoˬ hehˉ. Awˬ lawn kʼo, Pawˇluꞈ Roˉmaꞈ venˇ hkʼaw ve awˬ viˉ awˬ nyi htaꞈ shaˍ tiꞈ piˇ ve, ‘nawˬ hui awˬ hkʼaw lo chehˇ ve chaw teˇ gʼaˇ le le htaꞈ ngaˬ chi hkʼe kʼoˆ laˇ ve yoˬ. A shu yawˇ awˬ to awˬ lawn dawˇ keunˍ dawˇ cawˇ ve aꞈ kehˉ leuˉ leh taˇ dawˇ. Dawˇ keunˍ dawˇ cawˇ ve hkʼe ceh dawˇ nyi˗o.’ (Roˉmaꞈ 12:3) Ngaˬ hui a shu yawˇ awˬ pon gʼa dawˇ nyi cawˇ ve tehꞈ Pawˇluꞈ shiˍ ve yoˬ. Yaꞈ hkʼaˇ, nyi ma nuˇ nehˬ ve lehˬ ngaˬ hui a shu yawˇ awˬ to hkʼaˬ hkʼe hpehꞈ chehˇ ve htaꞈ haꞈ yuˬ ve yoˬ. Nyi ma nuˇ nehˬ ve lehˬ a shu yawˇ awˬ pon tiˉ maˇ gʼa dawˇ nyi tuˬ 3 lawn cawˬ ve yoˬ. (1) Awˬ ca, (2) Gʼuiˬ sha ve kanˉ hkʼaw awˬ vuiˬ gʼa htaˇ, (3) awˬ chawˇ htaꞈ caˉ daꞈ tuˬ ve ehˆ yehˇ htaˇ, chi ve teˇ hpaˍ teˇ geh henˇ tuˬ yoˬ.

3. Aˬ htoꞈ ma te awˬ ca geh shoꞈ shaꞈ ve cawˬ ve le? Leh chaw teˇ hpaˍ hpaˍ hkʼaˬ hkʼe te ve le?

³ Yaˬhoˉvaˬ lehˬ awˬ hpawˇ awˬ miˇ ma htaꞈ ha lehˬ tcuh gaˇ ve yoˬ. Yaꞈ hkʼaˇ, teˇ gʼaˇ kaꞈ biˇ ve chaw maˇ hpehꞈ. Hkʼe te leh awˬ hpawˇ awˬ miˇ ma deˇ daꞈ ve lehˬ a hkʼe leˇ hpehꞈ ve yoˬ. Awˬ hpawˇ awˬ miˇ ma heuˆ daꞈ ve lehˬ a shaꞈ teꞈ kuiˬ hkʼaw shoꞈ shaꞈ ve gʼa hpuˇ tuˬ yoˬ tehꞈ Pawˇluꞈ kʼoˆ taˍ ve yoˬ. (1 Kawˇrenˍhtuˆ 7:28) Teˇ ca ca kʼo hkʼaˬ htaˆ kaꞈ maˇ hawˍ daꞈ. Chi hkʼe shiˍ ve kʼo awˉ lawˉ htaˇ kaꞈ maˇ heuˆ daꞈ ve lehˬ daꞈ ve law tehꞈ yawˇ dawˇ ve yoˬ. Yawˇ miˬ guiˬ yaˇ hkʼe dawˇ ve kʼo, daꞈ jaˇ ve teˇ hkʼaˇ lehˬ baˬ daꞈ ve yoˬ. Chi hkʼe dawˇ ve chaw lehˬ, a shu yawˇ awˬ pon tiˉ dawˇ nyi leh yawˇ ha lehˬ ve a yeˇ uiˍ jaˇ tehꞈ dawˇ ve yoˬ.

4. Ngaˬ hui aˬ htoꞈ ma maˇ te cawˇ ve le?

⁴ Awˬ ca geh awˬ lawn cawˬ daꞈ htaˇ, teˇ geh kʼai maˇ gʼa˗o tehꞈ taˇ dawˇ. Haˉ chawˇ haˉ paˆ te ve teˇ hkʼaˇ ceh tiˉ baˬ daꞈ gʼa ve yoˬ. (Maꞈhtehˍ 5:32) Chi htaꞈ pa taw, awˬ ca geh awˬ lawn cawˬ daꞈ htaˇ, aˬ htoꞈ ma te awˬ hpawˇ awˬ miˇ ma lehˬ uiˍ muiˬ caˆ muiˬ ve chi hkʼe maˇ dawˇ tcuh cawˇ ve yoˬ. ‘Aˬ htoꞈ ma te awˬ ca ngaˬ loˍ ve hkʼe maˇ hpehꞈ ve le? Aˬ htoꞈ ma te haꞈ ve ngaˬ gʼa cawˇ ve hkʼe maˇ gʼa ve le? Chi hkʼe shiˍ ve kʼo, ngaˬ awˬ nu ve chaw htaꞈ heuˆ ve lehˬ daꞈ ve yoˬ. Ngaˬ chi aꞈ kehˉ ha lehˬ tuˬ yoˬ hehˉ.’ Chi hkʼe dawˇ ve chaw lehˬ a shu yawˇ awˬ pon tiˉ dawˇ nyi leh awˬ ca awˬ pon maˇ dawˇ nyi. Miˬ guiˬ yaˇ ve dawˇ hkʼaˇ lehˬ nawˬ te gaˇ ve hkʼe gʼa te ve kʼo, gʼa baˬ daꞈ ve htawˇ yaˍ piˇ tehꞈ kʼoˆ laˇ ve yoˬ. Chi ha lehˬ tuˬ te laˇ ve kʼo, te loˍ yaˍ piˇ. Yaꞈ hkʼaˇ, Gʼuiˬ sha ve dawˇ hkʼaˇ nawˬ htaꞈ kʼoˆ laˇ ve, “a shu yawˇ awˬ to htaꞈ caˉ daꞈ ve awˬ lawn teˇ hpaˍ htaꞈ ceh tiˉ taˇ dawˇ nyi. Yaꞈ hkʼaˇ, shu htaꞈ caˉ daꞈ ve awˬ lawn teˇ hpaˍ htaꞈ htawˇ dawˇ nyi˗o.” (Hpiˇliˇpiˆ 2:4) Yaˬhoˉvaˬ lehˬ nawˬ htaꞈ maˇ baˬ daꞈ tcuh gaˇ. Caˉ leh teˇ geh chehˇ tcuh gaˇ ve yoˬ. (Maꞈhtehˍ 19:6) Yaˬhoˉvaˬ lehˬ nawˬ awˬ to htaꞈ maˇ heˆ, yawˇ awˬ to htaꞈ awˉ lawˉ dawˇ nyi tcuh gaˇ ve yoˬ.

5. Eˇfeˇsuꞈ liꞈ 5:33 hkʼaw kʼoˆ taˍ ve hkʼe, awˬ hpawˇ awˬ miˇ ma hkʼaˬ hkʼe te daꞈ cawˇ ve le?

⁵ Awˬ hpawˇ awˬ miˇ ma lehˬ gʼa haꞈ daꞈ leh gʼa yawˆ yan daꞈ ve yoˬ. (Eˇfeˇsuꞈ 5:33 gʼaw sheˍ.) Liꞈ hpu  hkʼaw maˍ laˇ ve, gʼa ve aꞈ kehˉ piˇ ve htaꞈ dawˇ nyi cawˇ ve yoˬ. (Tcuh yaˇ 20:35) Awˬ hpawˇ awˬ miˇ ma haꞈ daꞈ leh yawˆ yan daꞈ tuˬ aˬ htoꞈ ma ga laˇ ve le? Nyi ma nuˇ nehˬ ve yoˬ. Awˬ hpawˇ awˬ miˇ ma nyi ma nuˇ nehˬ ve lehˬ a shu yawˇ awˬ pon tiˉ maˇ dawˇ nyi. “Yaꞈ hkʼaˇ, shu awˬ pon awˬ bon gʼa tuˬ ca” ve yoˬ.—1 Kawˇrenˍhtuˆ 10:24.

6. Saˍteˍhpanˍ leh Sa˗te˗va˗niˍ kʼoˆ ve, nawˬ htaꞈ hkʼaˬ hkʼe maˍ laˇ ve le?

⁶ Nyi ma nuˇ nehˬ ve lehˬ Hkriꞈ yaˇ laiˉ ca a shaꞈ teꞈ chehˇ kuiˬ hkʼaw ha lehˬ tuˬ ga piˇ ve yoˬ. Tawˇ pa haˉ te kʼo, awˬ hpawˇ teˇ gʼaˇ Saˍteˍhpanˍ kʼoˆ ve, “nawˬ teˇ moˍ tiˉ hpehꞈ ve kʼo, shoꞈ shaꞈ ve awˬ lawn cawˬ htaˇ ga daꞈ ve yoˬ. ‘Ngaˬ awˬ pon aˬ htoꞈ ma daꞈ jaˇ ve le?’ dawˇ nyi ve aꞈ kehˉ, ‘ngaˬ hui awˬ pon aˬ htoꞈ ma daꞈ jaˇ ve le?’ nawˬ dawˇ nyi cawˇ ve yoˬ.” Yawˇ ve awˬ miˇ ma Sa˗te˗va˗niˍ kaꞈ hkʼa shuˍ dawˇ ve yoˬ. Yawˇ kʼoˆ ve, “teˇ gʼaˇ leh teˇ gʼaˇ maˇ yawˆ yan daꞈ ve geh chaw teˇ gʼaˇ kaꞈ maˇ chehˇ gaˇ taˬ.” Yawˇ kʼawꞈ kʼoˆ ve, “shoꞈ shaꞈ ve awˬ lawn cawˬ htaˇ hkʼaˬ hkʼe te gu tuˬ dawˇ nyi ve yoˬ. Ngaˬ hui bon teˇ geh lawˬ ve, awˬ lawn chi teˇ geh hpfuhˆ nyi ve, leh hkʼaˬ hkʼe te gu tuˬ teˇ geh yaw daꞈ ve yoˬ. Ngaˬ hui awˬ lawn cawˬ htaˇ, teˇ geh gu ve yoˬ.” Awˬ hpawˇ awˬ miˇ ma a shu yawˇ awˬ pon tiˉ maˇ dawˇ nyi ve kʼo, ha lehˬ jaˇ tuˬ yoˬ.

7. Awˬ viˉ awˬ nyi hawˉ hkʼaˆ daꞈ ve awˬ vuiˬ gʼa htaˇ, hkʼaˬ hkʼe dawˇ nyi cawˇ ve le?

⁷ Ngaˬ hui Yaˬhoˉvaˬ ve kanˉ hkʼaˬ hkʼe ve hpawˇ te ve htawˇ, daꞈ ve awˬ vuiˬ hpehꞈ ve tehꞈ dawˇ taˍ ve yoˬ. (Chiˇ mvuh ve 27:4; 84:10) Awˬ viˉ awˬ nyi hawˉ hkʼaˆ hkʼaˬ ve teˇ gʼaˇ Yaˬhoˉvaˬ ve kanˉ maˇ maˇ te gaˇ ve kʼo, daꞈ ve tehꞈ shawˍ ve yoˬ. Liꞈ hpu hkʼaw kaꞈ chi hkʼe kʼoˆ ve, “Hkriꞈ yaˇ awˬ moˍ htaꞈ nyi haꞈ shaˉ shehˍ hpaˇ te ve kanˉ htaꞈ ca ve chaw lehˬ, daꞈ ve kanˉ htaꞈ ca ve yoˬ.” (1 Tiˆmoˉseˍ 3:1) Yaꞈ hkʼaˇ, yawˇ daꞈ ve awˬ vuiˬ gʼa htaˇ, yawˇ awˬ pon tiˉ maˇ gʼa dawˇ nyi. (Luˉkaꞈ 17:7-10) Yawˇ daꞈ ve awˬ vuiˬ gʼa gaˇ ve awˬ hkʼaˇ lehˬ, yawˇ shu htaꞈ nyi ma nuˇ nehˬ ve hkʼaw ga piˇ gaˇ ve pa taw yoˬ.—2 Kawˇrenˍhtuˆ 12:15.

8. Daˍyawˇtaˍraˆ, Awˇziˆ, leh Aˍbaˆsaˍlonˍ yawˇ hui ve awˬ lawn ngaˬ hui htaꞈ hkʼaˬ hkʼe maˍ laˇ ve le?

⁸ Liꞈ hpu hkʼaw ngaˬ hui htaꞈ shaˍ tiꞈ peꞈ laˇ ve awˬ lawn cawˬ ve yoˬ. A shu yawˇ awˬ pon tiˉ dawˇ nyi ve awˬ lawn hpehꞈ ve yoˬ. Daˍyawˇtaˍraˆ lehˬ nyi ma nuˇ nehˬ ve chaw maˇ hpehꞈ. Yawˇ Hkriꞈ yaˇ awˬ moˍ hkʼaw uiˍ gaˇ ve yoˬ. (3 Yoˇhanˬ 9) Awˇziˆ lehˬ caˆ muiˬ puiˉ jaˇ. Yawˇ Yaˬhoˉvaˬ maˇ te tcuh ve awˬ ceuˬ htaꞈ te ve yoˬ. (2 Raˍsaˍvanˍ 26:16-21) Aˍbaˆsaˍlonˍ lehˬ jawˇ mawˇ te tuˬ ve htaꞈ shu gʼa ga ha lehˬ leh dawˇ cawˇ tuˬ heˍ piˇ ve yoˬ. (2 Saˍmo˗eˍlaˆ 15:2-6) A shu yawˇ awˬ pon awˬ meꞈ awˬ hponˇ gʼa tuˬ ca ve chaw lehˬ Yaˬhoˉvaˬ maˇ dawˇ cawˇ ve awˬ lawn chi teˇ hpaˍ hkʼa tawˍ lehˆ hpeuꞈ maw laˇ ve yoˬ. (Tawˇ naˉ ve 25:27) Awˬ leh meuˇ htaˇ, uiˍ muiˬ caˆ muiˬ ve leh shu dawˇ cawˇ tuˬ te ve chaw lehˬ, shoꞈ shaꞈ ve gʼa hpuˇ tuˬ yoˬ.—Tawˇ naˉ ve 16:18.

9. Yeˍsuˆ daꞈ ve henˇ yuˬ tuˬ hkʼaˬ hkʼe hpehꞈ ve le?

⁹ Awˬ lawn chi ve hkʼaw uiˍ muiˬ caˆ muiˬ ve chaw hkʼe Yeˍsuˆ maˇ shuˍ. Liꞈ hpu hkʼaw kʼoˆ ve, “yawˇ lehˬ Gʼuiˬ sha ve awˬ hoꞈ awˬ han awˬ hkʼaw lo chehˇ ve htawˇ, Gʼuiˬ sha hkʼa shuˍ shuˍ hpehꞈ chehˇ ve teˇ ceuˬ htaꞈ gʼaˇ hteꞈ vawˆ taˍ cawˇ ve yoˬ tehꞈ yawˇ maˇ dawˇ.” (Hpiˇliˇpiˆ 2:6) Yeˍsuˆ aꞈ kehˉ kanˇ paˆ uiˍ jaˇ ve Yaˬhoˉvaˬ teˇ gʼaˇ tiˉ cawˬ ve htawˇ, Yeˍsuˆ yawˇ awˬ pon tiˉ maˇ dawˇ nyi jaw. Yawˇ awˬ laꞈ gʼawˇ htaꞈ kʼoˆ piˇ ve, “nawˬ hui awˬ hkʼaw lo shu aꞈ kehˉ i ve chaw teˇ gʼaˇ lehˬ, shu aꞈ kehˉ uiˍ ve chaw teˇ gʼaˇ hpehꞈ ve yoˬ.” (Luˉkaꞈ 9:48) Gʼuˇ suhˍ peuˍ ve chaw, ga piˇ shehˍ hpaˇ, nyi haꞈ shaˉ paˍ, toˇ nyi shehˍ hpaˇ, chi ve teˇ hpaˍ Yeˍsuˆ hkʼa shuˍ nyi ma nuˇ nehˬ ve geh ngaˬ hui Gʼuiˬ sha ve kanˉ gʼa te htaˇ, chi Yaˬhoˉvaˬ geh gʼa ve laꞈ shawnˍ hkʼe hpehꞈ ve yoˬ. Gʼuiˬ sha ve kanˉ te ve chaw nyi ma nuˇ nehˬ ve kʼo, yawˇ hui teˇ gʼaˇ leh teˇ gʼaˇ haꞈ daꞈ ve tehꞈ hpeuꞈ maw laˇ tuˬ yoˬ. Chi lehˬ yawˇ hui Gʼuiˬ sha ve kanˉ te ve chaw hpehꞈ ve tehꞈ hpeuꞈ maw laˇ ve yoˬ.—Yoˇhanˬ 13:35.

10. Hkriꞈ yaˇ awˬ moˍ hkʼaw shoꞈ shaꞈ ve awˬ lawn cawˬ leh nyi haꞈ shaˉ paˍ hkʼa dehꞈ maˇ gu ve kʼo, nawˬ hkʼaˬ hkʼe dawˇ tuˬ le?

¹⁰ Hkriꞈ yaˇ awˬ moˍ hkʼaw shoꞈ shaꞈ ve teˇ ceuˬ ceuˬ cawˬ leh nyi haꞈ shaˉ paˍ hkʼa dehꞈ maˇ gu ve tehꞈ  nawˬ dawˇ ve kʼo, nawˬ hkʼaˬ hkʼe te tuˬ le? Nawˬ diˇ ve aꞈ kehˉ, Hkriꞈ yaˇ awˬ moˍ hkʼaw shehˍ kʼai paˍ htaꞈ nawˬ nyi ma nuˇ nehˬ ve hkʼaw ga piˇ gʼa ve yoˬ. (Heˍbrehˇ 13:17) Chi hkʼe te gʼa tuˬ nawˬ a shu yawˇ awˬ to htaꞈ na nyi cawˇ ve, ‘awˬ lawn chi shoꞈ shaꞈ jaˇ leh teˇ gʼaˇ gʼa gu piˇ cawˇ ve laˇ? Chi teˇ hkui gʼa gu cawˇ ve laˇ? Leh ngaˬ ve awˬ vuiˬ hpehꞈ ve laˇ? Awˬ tehˬ kʼo, Hkriꞈ yaˇ awˬ moˍ hkʼaw teˇ moˍ tiˉ hpehꞈ tuˬ, maˇ heˆ leh ngaˬ a yeˇ uiˍ ve chaw hpehꞈ ve tehꞈ shu dawˇ tcuh gaˇ ve laˇ?’

11. Eˇfeˇsuꞈ liꞈ 4:2, 3 hkʼaw kʼoˆ taˍ ve hkʼe, ngaˬ hui Yaˬhoˉvaˬ ve kanˉ nyi ma nuˇ nehˬ ve hkʼaw te ve kʼo, awˬ bon hkʼaˬ hkʼe gʼa tuˬ le?

¹¹ Ngaˬ hui puiˉ ve hpehꞈ ve aꞈ kehˉ nyi ma nuˇ nehˬ ve lehˬ a yeˇ uiˍ jaˇ leh cawˇ daꞈ hawˍ daꞈ ve lehˬ kanˉ te tawˆ la ve aꞈ kehˉ daꞈ ve tehꞈ Yaˬhoˉvaˬ dawˇ ve yoˬ. Chi htaꞈ pa taw, Yaˬhoˉvaˬ ve kanˉ nyi ma nuˇ nehˬ ve hkʼaw te gʼa ve hkʼe te sheˍ. Nawˬ chi hkʼe te ve kʼo, Hkriꞈ yaˇ awˬ moˍ hkʼaw cawˇ daꞈ hawˍ daꞈ leh teˇ moˍ tiˉ hpehꞈ tuˬ nawˬ ga piˇ chehˇ ve yoˬ. (Eˇfeˇsuꞈ 4:2, 3 gʼaw sheˍ.) Kaiˬ ve hkʼaw hto toˇ sheˍ. Shu awˬ pon daꞈ ve awˬ ceuˬ ca leh ga piˇ sheˍ. Chaw teˇ gʼaˇ Hkriꞈ yaˇ awˬ moˍ hkʼaw a yeˇ uiˍ ve awˬ vuiˬ maˇ cawˬ ve htawˇ haꞈ yuˬ piˇ sheˍ. (Maꞈhtehˍ 6:1-4; Luˉkaꞈ 14:12-14) Nawˬ awˬ viˉ awˬ nyi geh kanˉ teˇ geh te htaˇ nyi ma nuˇ nehˬ ve kʼo, nawˬ puiˉ ve hpehꞈ ve ceh yawˇ hui nyi ve maˇ heˆ, nawˬ nyi ma nuˇ nehˬ ve htaꞈ kaꞈ yawˇ hui nyi tuˬ yoˬ.

12. Liꞈ hpu hkʼaw ngaˬ hui awˬ chawˇ cawˬ tuˬ kʼoˆ laˇ˗aw laˇ? Kʼoˆ maˍ laˇ sheˍ.

¹² Yaˬhoˉvaˬ lehˬ ngaˬ hui awˬ chawˇ leh yehˬ kʼa geh gʼa chehˇ ve htaꞈ ha lehˬ tcuh gaˇ ve yoˬ. (Chiˇ mvuh ve 133:1) Yeˍsuˆ kaꞈ daꞈ ve awˬ chawˇ cawˬ ve yoˬ. (Yoˇhanˬ 15:15) Liꞈ hpu hkʼaw kʼoˆ ve daꞈ ve awˬ chawˇ cawˬ ve lehˬ ngaˬ hui awˬ pon hkʼaˬ hkʼe daꞈ ve le? (Tawˇ naˉ ve 17:17; 18:24) Leh teˇ gʼaˇ tiˉ chehˇ ve ngaˬ hui awˬ pon hkʼaˬ hkʼe maˇ daꞈ ve kaꞈ kʼoˆ laˇ  sheˍ ve yoˬ. (Tawˇ naˉ ve 18:1) Awˬ chawˇ htaꞈ caˉ daꞈ tuˬ ve ehˆ yehˇ ve lehˬ awˬ chawˇ cawˬ maˇ leh maˇ chehˇ bawˬ tehꞈ laiˉ gʼaˇ dawˇ ve yoˬ. Yaꞈ hkʼaˇ, ngaˬ hui shaˍ tiꞈ gʼa te ve yoˬ.

13. Aˬ htoꞈ ma te chaw teˇ hpaˍ awˬ chawˇ htaꞈ caˉ daꞈ tuˬ ve ehˆ yehˇ htaˇ chehˇ bawˬ ve le?

¹³ Liꞈ kʼoˆ teˇ kʼoˆ hkʼaw kʼoˆ ve, awˬ chawˇ htaꞈ caˉ daꞈ tuˬ ve ehˆ hkʼaw awˬ han keu taˍ ve maˇ heˆ leh awˬ nu ve chaw awˬ han chi htaꞈ caˉ daꞈ ve kʼoˆ ve htaꞈ nyi htaˇ, awˬ yanˇ yehˇ maˇ ve chaw lehˬ chehˇ bawˬ ve yoˬ. Aˬ htoꞈ ma te chi hkʼe hpehꞈ ve le? Awˬ lawn kʼo, yawˇ a shaꞈ teꞈ kuiˬ hkʼaw a yeˇ uiˍ ve awˬ han, awˬ chawˇ geh guiˇ toˇ ve awˬ han, leh yawˇ kʼai jaw ve daꞈ ve awˬ ti awˬ chawˇ htaꞈ caˉ daꞈ tuˬ ve ehˆ hkʼaw keu ve dawˇ cawˇ ve yoˬ. Awˬ han chi hkʼe ve htaꞈ nyi ve chaw teˇ hpaˍ lehˬ, yawˇ awˬ to shu htaꞈ tehˆ daꞈ leh ngaˬ a shaꞈ teꞈ kuiˬ lo teꞈ chiˉ daꞈ kuiˬ maˇ cawˬ tehꞈ dawˇ leh chehˇ bawˬ ve yoˬ. Awˬ viˉ awˬ nyi yaˇ miˇ teˇ gʼaˇ 19 hkʼawꞈ gaˬ˗oˬ ve kʼoˆ ve, “hkawꞈ nyi shinˉ nyi shu guiˇ˗e leh pyawˍ ve htaꞈ ngaˬ gʼa mawˬ ve yoˬ. Ngaˬ kʼo teˇ kaˬ kaꞈ maˇ gʼa kʼai leh aˉ hkʼaw tiˉ chehˇ leh yawˇ hui htaꞈ hkawehˉ la ve yoˬ.”

14. 1 Peˍtruˆ liꞈ 3:8 hkʼaw ngaˬ hui awˬ chawˇ htaꞈ caˉ daꞈ tuˬ ve ehˆ yehˇ htaˇ hkʼaˬ hkʼe ga laˇ ve le?

¹⁴ Awˬ tehˬ kʼo, awˬ chawˇ htaꞈ caˉ daꞈ tuˬ ve ehˆ kaꞈ awˬ bon cawˬ ve yoˬ. Tawˇ pa haˉ te kʼo, awˬ chawˇ htaꞈ caˉ daꞈ tuˬ ve ehˆ lehˬ, yehˬ kʼa leh awˬ chawˇ htaꞈ caˉ daꞈ gʼa ve yoˬ. Chaw teˇ hpaˍ kʼo, awˬ chawˇ htaꞈ caˉ daꞈ tuˬ ve ehˆ hkʼaw yawˇ awˬ to htaꞈ mawˬ tcuh gaˇ ve awˬ han keu ve nawˬ mawˬ jaw˗aw laˇ? Ngaˬ htaꞈ nyi˗a nyi sheˍ tehꞈ yawˇ kʼoˆ gaˇ ve yoˬ. Chaw teˇ hpaˍ kʼo a shu yawˇ ve awˬ han awˬ hawˉ lo awˬ chawˇ htaꞈ caˉ daꞈ tuˬ ve ehˆ hkʼaw awˬ han keu ve, leh shu htaꞈ caˉ daꞈ ve maˇ na sha ve tawˇ bvuhꞈ keu taˍ ve yoˬ. Chi hkʼe te ve lehˬ, nyi ma nuˇ nehˬ ve maˇ cawˬ leh Hkriꞈ yaˇ ha kʼaˉ puiˉ ve cawˬ cawˇ ve htaꞈ maˇ gʼaꞈ te.—1 Peˍtruˆ 3:8 gʼaw sheˍ.

15. Ehˆ hkʼaw yawˇ awˬ to htaꞈ mawˬ tcuh gaˇ ve awˬ han maˇ gʼa keu tuˬ Liꞈ hpu hkʼaw ngaˬ hui htaꞈ hkʼaˬ hkʼe ga laˇ ve le?

¹⁵ Nawˬ awˬ chawˇ htaꞈ caˉ daꞈ tuˬ ve ehˆ yehˇ htaˇ, a shu yawˇ awˬ to htaꞈ na nyi cawˇ ve ‘awˬ han, VDO maˇ heˆ leh liꞈ bvuhꞈ keu˗a ve lehˬ, ngaˬ cheuˬ ve tehꞈ shu htaꞈ dawˇ tcuh ve laˇ? Shu hkawehˉ tuˬ te piˇ ve laˇ?’ Liꞈ hpu hkʼaw kʼoˆ ve, “miˬ guiˬ hkʼoˆ cawˬ ve awˬ ceuˬ hkʼa peu˗eˬ, awˬ suhˍ awˬ shaˍ a loˍ te gaˇ ve maˇ kʼoˆ, mehˆ shiˍ mawˬ leh heuˆ gaˇ ve maˇ kʼoˆ, hpu shi mawˇ jeˬ htaꞈ pa taw nyi ma uiˍ ve maˇ kʼoˆ, Awˬ pa Gʼuiˬ sha lo tawˆ la ve maˇ heˆ. Miˬ guiˬ lo tawˆ la ve yoˬ.” (1 Yoˇhanˬ 2:16) Liꞈ hpu teˇ kʼoˆ hkʼaw kʼoˆ ve, “hpu shi mawˇ jeˬ htaꞈ pa taw nyi ma uiˍ ve” chaw lehˬ “shu mehˆ gʼuˇ suhˍ lo a yeˇ uiˍ ve chaw hpehꞈ ve” tehꞈ kʼoˆ gaˇ ve yoˬ. Yaꞈ hkʼaˇ, Hkriꞈ yaˇ lehˬ awˬ chawˇ htaꞈ caˉ daꞈ  tuˬ ve ehˆ hkʼaw yawˇ awˬ to htaꞈ mawˬ tcuh gaˇ ve awˬ han keu tuˬ maˇ loˍ tehꞈ dawˇ ve yoˬ. Yawˇ hui Liꞈ hpu hkʼaw beˆ maˍ laˇ ve htaꞈ gʼaꞈ te ve yoˬ. Oˇ kaˬ lo kʼoˆ ve, “ngaˬ hui nyi ma uiˍ ve maˇ kʼoˆ, teˇ gʼaˇ leh teˇ gʼaˇ yaꞈ daꞈ tuˬ te ve maˇ kʼoˆ, teˇ gʼaˇ leh teˇ gʼaˇ hkawehˉ daꞈ ve maˇ kʼoˆ, chi teˇ hpaˍ htaꞈ ngaˬ hui baˬ taˉ˗a veuˬ.” (Gaˍlaˍtiˆ 5:26) Miˬ guiˬ yaˇ ehˆ hkʼaw yawˇ awˬ to htaꞈ mawˬ tcuh gaˇ ve awˬ han keu ve hkʼe, ngaˬ hui maˇ gʼa te tuˬ nyi ma nuˇ nehˬ ve ga laˇ gʼa ve yoˬ.

16. Aˬ htoꞈ ma te ngaˬ hui uiˍ muiˬ caˆ muiˬ ve chaw maˇ hpehꞈ cawˇ ve le?

¹⁶ Uiˍ muiˬ caˆ muiˬ ve chaw lehˬ “dawˇ keunˍ dawˇ cawˇ ve” hkʼe maˇ dawˇ ve pa taw, ngaˬ hui nyi ma gʼa nuˇ nehˬ cawˇ ve yoˬ. (Roˉmaꞈ 12:3) Uiˍ muiˬ caˆ muiˬ ve chaw lehˬ yawˇ awˬ to a yeˇ uiˍ ve tehꞈ dawˇ leh shu geh enˍ daꞈ gaˇ ve yoˬ. Yawˇ dawˇ leh te ve awˬ ceuˬ yawˇ leh shu awˬ to htaꞈ naˬ tuˬ te piˇ ve yoˬ. Yawˇ maˇ pa ve kʼo, “naˆ hoꞈ piˇ lawˬ” leh “dawˇ hkʼaˇ luˬ kʼai” tuˬ Sanˍtanˍ te piˇ tuˬ yoˬ. (2 Kawˇrenˍhtuˆ 4:4; 11:3) Nyi ma nuˇ nehˬ ve chaw lehˬ dawˇ keunˍ dawˇ cawˇ ve hkʼe ceh dawˇ tuˬ yoˬ. Yawˇ awˬ to hpehꞈ chehˇ ve htaꞈ haꞈ yuˬ leh shu yawˇ aꞈ kehˉ laiˉ hpawˇ lo daꞈ ve tehꞈ dawˇ ve yoˬ. (Hpiˇliˇpiˆ 2:3) “Gʼuiˬ sha lehˬ nyi ma uiˍ ve chaw teˇ hpaˍ htaꞈ tawˍ taˍ ve yoˬ. Yaꞈ hkʼaˇ, nyi ma nuˇ nehˬ ve chaw teˇ hpaˍ htaꞈ awˬ bon piˇ ve yoˬ” tehꞈ yawˇ shiˍ ve yoˬ. (1 Peˍtruˆ 5:5) Keunˍ lawꞈ cawˇ lawꞈ dawˇ ve chaw lehˬ, Yaˬhoˉvaˬ ve canˇ paˍ maˇ hpehꞈ gaˇ.

17. Ngaˬ hui hkʼaˬ htaˆ kaꞈ nyi ma nuˇ nehˬ ve chaw hpehꞈ tuˬ hkʼaˬ hkʼe gʼa te cawˇ ve le?

¹⁷ Ngaˬ hui hkʼaˬ htaˆ kaꞈ nyi ma nuˇ nehˬ tuˬ Liꞈ hpu hkʼaw beˆ maˍ laˇ ve htaꞈ gʼa gʼaꞈ te ve yoˬ. Oˇ kaˬ lo kʼoˆ ve, “nawˬ hui lehˬ chaw awˬ piˍ htaꞈ kaꞈ, chaw awˬ piˍ ve awˬ liˇ awˬ hkʼaˇ teˇ hpaˍ htaꞈ kaꞈ kʼehˆ baˬ peuˬ leh, chaw awˬ suhˉ htaꞈ veuꞈ deh taˍ peuˬ.” Chi hkʼe te ve lehˬ gʼa coˇ caˇ jaˇ leh Yeˍsuˆ te maˍ laˇ ve htaꞈ ngaˬ hui te gʼa ve hkʼe gʼa henˇ yuˬ ve yoˬ. (Kawˇlawˇsehˇ 3:9, 10; 1 Peˍtruˆ 2:21) Maˇ sha ve htawˇ, chi hkʼe te ve awˬ hpfuhˇ hkʼawꞈ jaˇ tuˬ yoˬ. Ngaˬ hui nyi ma nuˇ nehˬ ve chaw hpehꞈ htaˇ, yehˬ kʼa hkʼaw kaꞈ ha lehˬ jaˇ tuˬ leh Hkriꞈ yaˇ awˬ moˍ cawˇ daꞈ hawˍ daꞈ tuˬ te gʼa leh ngaˬ hui awˬ chawˇ htaꞈ caˉ daꞈ tuˬ ve ehˆ yehˇ htaˇ shu hkawehˉ tuˬ maˇ te leh ngaˬ hui shu aꞈ kehˉ a yeˇ uiˍ ve chaw hpehꞈ ve tehꞈ shu dawˇ tuˬ kaꞈ maˇ te tuˬ yoˬ. A yeˇ uiˍ jaˇ ve lehˬ, ngaˬ hui Yaˬhoˉvaˬ nyi hkʼaˇ suh tuˬ leh awˬ bon naꞈ laˇ tuˬ te piˇ ve yoˬ.