1. Ngaˬ hui kʼoˆ chehˇ ve awˬ tehˬ ve tawˇ hkawˇ chi hkʼaˬ hkʼe kʼoˆ gaˇ ve le?

 “Nawˬ awˬ tehˬ ve htaꞈ hkʼaˬ hkʼe te shiˍ ve le?” “Nawˬ awˬ tehˬ ve hkʼaw uiˍ la ve laˇ?” “Nawˬ awˬ tehˬ ve hkʼaw chehˇ ve hkʼaˬ nyiˇ hkʼawꞈ gaˬ˗oˬ le?” Nawˬ shu htaꞈ chi hkʼe na piˇ jaw ve maˇ heˆ leh teˇ pawˆ pawˆ shu kaꞈ nawˬ htaꞈ chi hkʼe na nyi laˇ jaw ve yoˬ hehˉ. Yaꞈ hkʼaˇ, ngaˬ hui kʼoˆ chehˇ ve awˬ tehˬ ve chi aˬ htoꞈ ma htaꞈ kʼoˆ gaˇ ve le? Tawˇ hkawˇ chi ve tcuhˉ kuiˬ lehˬ, yonˍ hkʼaˇ, oˉ kʼoˍ pui ve, leh ngaˬ hui ve a shaꞈ teꞈ hkʼaˇ htaꞈ kʼoˆ gaˇ ve yoˬ. Awˬ tehˬ ve hkʼaw chehˇ ve chaw lehˬ, Liꞈ hpu hkʼaw aˬ htoꞈ ma maˍ ve htaꞈ shiˍ leh yawˇ gʼaꞈ te ve yoˬ. Chi yawˇ maˇ heˆ heˆ ve bon liˇ maˍ ve htaꞈ maˇ yonˍ tuˬ te piˇ ve yoˬ. Chi teˇ hkui maˇ biˇ ve chaw hpehꞈ ve htawˇ ha lehˬ gʼa ve yoˬ.—Yoˇhanˬ 8:32.

2. Yoˇhanˬ liꞈ 13:34, 35 hkʼaw kʼoˆ taˍ ve hkʼe, chaw yaˇ awˬ tehˬ ve htaꞈ dawˇ cawˇ tuˬ aˬ htoꞈ ma te piˇ ve le?

² Nawˬ awˬ tehˬ ve htaꞈ dawˇ cawˇ tuˬ aˬ htoꞈ ma te laˇ ve le? Shaˉhkiˆhkanˍ ve chaw te hkʼaˇ dawˇ hkʼaˇ daꞈ ve maˇ heˆ leh, yawˇ hui haꞈ daꞈ ve htaꞈ pa taw nawˬ dawˇ cawˇ ve yoˬ hehˉ. (1 Peˍtruˆ 2:12) Laiˉ gʼaˇ hpawnˬ daꞈ ve awˉ lawˉ teˇ pawˆ laˬ htaˇ, hpawnˬ daꞈ ve oˇ ve hkʼaw aˬ htoꞈ ma ve awˬ lawn maˍ ve tawnˇ maˇ gʼa. Yaꞈ hkʼaˇ, Shaˉhkiˆhkanˍ ve chaw haꞈ daꞈ puiˉ ve htaꞈ yawˇ hui gʼa mawˬ htaˇ leunˇ maˇ gʼa. Chi anˇ tuˬ maˇ loˍ. Yeˍsuˆ kʼoˆ ve, yawˇ hui teˇ gʼaˇ leh teˇ gʼaˇ haꞈ daꞈ ve pa taw, yawˇ ve awˬ laꞈ gʼawˇ hpehꞈ ve tehꞈ hpeuꞈ maw piˇ chehˇ ve yoˬ. (Yoˇhanˬ 13:34, 35 gʼaw sheˍ.) Yaꞈ hkʼaˇ, ngaˬ hui yonˍ yeˬ ve cawˬ maˇ la tuˬ, chi aꞈ kehˉ gʼa te ve yoˬ.

3. Nawˬ awˬ viˉ awˬ nyi haꞈ daꞈ ve htaꞈ mawˬ leh dawˇ cawˇ ve kʼo, Gʼuiˬ sha htaꞈ yonˍ ve hkʼaˬ hkʼe hpehꞈ tuˬ le?

³ Gʼuiˬ sha ve chaw haꞈ daꞈ ve htaꞈ mawˬ ve ceh yonˍ ve maˇ te cawˇ. Aˬ htoꞈ ma pa taw le? Nyi haꞈ shaˉ paˍ, gʼuˇ suhˍ peuˍ ve chaw venˇ baˆ uiˍ jaˇ ve htaꞈ te yaꞈ ve, awˬ viˉ awˬ nyi teˇ hpaˍ nawˬ nyi ma naˬ tuˬ te laˇ ve, Gʼuiˬ sha htaꞈ hpfuhˆ ve chaw nawˬ ve yonˍ hkʼaˇ awˬ tehˬ maˇ heˆ kʼoˆ laˇ ve kʼo, hkʼaˬ hkʼe te tuˬ le? Nawˬ awˬ viˉ awˬ nyi haꞈ daꞈ ve htaꞈ  mawˬ leh Gʼuiˬ sha htaꞈ yonˍ ve kʼo, yawˇ ve kanˉ maˇ te tuˬ hpehꞈ kʼai gʼa˗aw laˇ? A yeˇ uiˍ jaˇ ve lehˬ, nawˬ ve yonˍ hkʼaˇ yonˍ yeˬ tuˬ Yaˬhoˉvaˬ geh meuˆ daꞈ ve htaꞈ cawˬ ve yoˬ. Yaꞈ hkʼaˇ, nawˬ shu te ve htaꞈ mawˬ leh yonˍ ve kʼo, nawˬ ve yonˍ hkʼaˇ yonˍ yeˬ ve maˇ heˆ. Nawˬ yehˬ te ve kʼo, mawˇ daꞈ ve leh yeˬ ve htaꞈ yehˇ leh te tuˬ ve maˇ heˆ laˇ? Nawˬ ve te hkʼaˇ dawˇ hkʼaˇ htaꞈ cuˇ leh yonˍ ve kʼo, mawˇ maˇ daꞈ ve htaꞈ yehˇ leh yehˬ te ve htaꞈ shuˍ ve yoˬ. Yaꞈ hkʼaˇ, nawˬ ve yonˍ hkʼaˇ awˬ tehˬ ve htaꞈ awˬ hkʼaˇ ca leh yonˍ ve kʼo, mawˇ daꞈ ve htaꞈ yehˇ leh yehˬ te ve htaꞈ shuˍ ve yoˬ. Liꞈ hpu hkʼaw Yaˬhoˉvaˬ htaꞈ caˉ daꞈ ve awˬ tehˬ ve htaꞈ maˍ ve naˍ nawˬ hkʼa dehꞈ gʼa chaˬ nyi cawˇ ve yoˬ.—Roˉmaꞈ 12:2.

4. Maꞈhtehˍ liꞈ 13:3-6, 20, 21 hkʼaw kʼoˆ taˍ ve hkʼe, chaw teˇ hpaˍ yawˇ ve yonˍ hkʼaˇ htaꞈ lawˇ nyi piˇ htaˇ hkʼaˬ hkʼe hpehꞈ ve le?

⁴ Chaw teˇ hpaˍ awˬ tehˬ ve htaꞈ “ha lehˬ ha kʼa haꞈ yuˬ ve” htaꞈ Yeˍsuˆ kʼoˆ ve yoˬ. Yaꞈ hkʼaˇ, yawˇ beˬ ve lawˇ ve gʼa hpuˇ htaˇ, yawˇ hkʼa dehꞈ maˇ yonˍ yeˬ. (Maꞈhtehˍ 13:3-6, 20, 21 gʼaw sheˍ.) Chaw teˇ hpaˍ aˬ htoꞈ ma te chi hkʼe hpehꞈ ve le? Yeˍsuˆ awˬ hkʼaˇ suh gʼaꞈ yuˬ ve chaw shoꞈ shaꞈ ve leh tuꞈ ve hkanˍ ve gʼa hpuˇ tuˬ maˇ dawˇ. (Maꞈhtehˍ 16:24) Hkriꞈ yaˇ hpehꞈ ve chaw lehˬ Gʼuiˬ sha geh awˬ bon gʼa leh shoꞈ shaꞈ ve maˇ gʼa hpuˇ tehꞈ yawˇ dawˇ ve yoˬ hehˉ. Yaꞈ hkʼaˇ, ngaˬ hui miˬ guiˬ chi hkʼoˆ chehˇ ve pa taw, hkʼaˬ hkʼe hpehꞈ ve htawˇ shoꞈ shaꞈ ve gʼa hpuˇ ve yoˬ. Ngaˬ hui a shaꞈ teꞈ kuiˬ hkʼaw pa ve awˬ ceuˬ cawˬ htaˇ, ha lehˬ ve hkʼa dehꞈ maˇ cawˬ.—Chiˇ mvuh ve 6:6; Cuˇ yiˍ piˇ ve 9:11.

5. Awˬ viˉ awˬ nyi yawˇ hui ve yonˍ hkʼaˇ awˬ tehˬ hpehꞈ ve tehꞈ hkʼaˬ hkʼe te yonˍ gʼa ve le?

⁵ Awˬ viˉ awˬ nyi maˇ˗awˍ ve yawˇ hui ve yonˍ hkʼaˇ awˬ tehˬ hpehꞈ ve tehꞈ yonˍ yeˬ ve yoˬ. Ngaˬ hui hkʼaˬ hkʼe te shiˍ gʼa ve le? Awˬ viˉ awˬ nyi teˇ hpaˍ te yaꞈ ve maˇ heˆ leh yawˇ hui nyi ma naˬ tuˬ te piˇ ve htawˇ, yawˇ hui ve yonˍ hkʼaˇ maˇ pa. (Chiˇ mvuh ve 119:165) Chi hkʼe ceh maˇ heˆ. Yawˇ hui teˇ pawˆ le le shoꞈ shaꞈ ve leh beˬ ve lawˇ ve gʼa hpuˇ htaˇ, yawˇ hui ve yonˍ hkʼaˇ yonˍ yeˬ la ve yoˬ. (Yaˍkoˆ 1:2-4) Nawˬ ve yonˍ hkʼaˇ hkʼaˬ hkʼe te chi hkʼe cawˬ tuˬ le?

6. Awˉ lawˉ peuˇ ve Hkriꞈ yaˇ yawˇ hui ve yonˍ hkʼaˇ hkʼaˬ kaˬ lo laˬ ve le?

⁶ Awˉ lawˉ peuˇ ve Hkriꞈ yaˇ Liꞈ hpu hkʼaw leh Yeˍsuˆ Hkriꞈ htaꞈ caˉ daꞈ ve “ha lehˬ ve bon hkawˇ ve hteˇ ve cawˇ ve teˇ ceuˬ” htaꞈ shiˍ ve pa taw, yawˇ hui ve yonˍ hkʼaˇ yonˍ yeˬ ve yoˬ. (Gaˍlaˍtiˆ 2:5) Awˬ tehˬ ve chi Hkriꞈ yaˇ yonˍ leh maˍ ve hkʼa peu˗eˬ lehˬ, Yeˍsuˆ htaiˍ hkʼawꞈ laˇ leh kʼawꞈ teꞈ tu la ve htaꞈ kʼoˆ ve yoˬ. Chi ve teˇ hpaˍ awˬ tehˬ ve hpehꞈ ve tehꞈ tcuh yaˇ Pawˇluꞈ yonˍ ve yoˬ. Ngaˬ hui hkʼaˬ hkʼe te shiˍ gʼa ve le? “Hkriꞈ lehˬ, tuꞈ ve hkanˍ ve htaꞈ gʼa hkanˍ leh, suh kuiˬ lo gʼa kʼawꞈ teꞈ tu la ve yoˬ tehꞈ” Pawˇluꞈ Liꞈ hpu laiˉ tawn htaꞈ chaˬ nyi leh hkʼa tawˍ lehˆ hpeuꞈ maˍ piˇ ve yoˬ. (Tcuh yaˇ 17:2, 3) Awˉ lawˉ peuˇ ve Hkriꞈ yaˇ maˍ ve chi htaꞈ ha lehˬ ha kʼa haꞈ yuˬ leh yawˇ hui Liꞈ hpu htaꞈ na gʼa tuˬ daꞈ kehˬ ve awˬ ha hpu htaꞈ cuˇ ve yoˬ. Maˍ ve chi teˇ hpaˍ Liꞈ hpu hkʼaw laˬ ve tehꞈ shiˍ tuˬ, yawˇ hui a shu yawˇ hkʼaˇ yawˇ hkʼa dehꞈ chaˬ nyi ve yoˬ. (Tcuh yaˇ 17:11, 12; Heˍbrehˇ 5:14) Yawˇ hui ve yonˍ hkʼaˇ te hkʼaˇ dawˇ hkʼaˇ geh ceh laˬ ve maˇ heˆ. Yawˇ hui awˬ viˉ awˬ nyi geh chehˇ htaˇ nyi ma sha ve pa taw, yawˇ hui Yaˬhoˉvaˬ ve kanˉ te ve ceh maˇ heˆ. Yaꞈ hkʼaˇ yawˇ hui “leuˉ leh Gʼuiˬ sha htaꞈ shiˍ maˇ la” ve pa taw yonˍ ve yoˬ.—Kawˇlawˇsehˇ 1:9, 10.

7. Liꞈ hpu hkʼaw awˬ tehˬ ve ngaˬ hui htaꞈ hkʼaˬ hkʼe ga laˇ gʼa ve le?

⁷ Liꞈ hpu hkʼaw awˬ tehˬ ve lehˬ, pa kʼai tuˬ awˬ nyi maˇ cawˬ. (Chiˇ mvuh ve 119:160) Tawˇ pa haˉ te kʼo, awˬ viˉ awˬ nyi teˇ hpaˍ venˇ baˆ uiˍ jaˇ ve htaꞈ te yaꞈ ve, nyi ma naˬ tuˬ te laˇ ve, ngaˬ hui shoꞈ shaꞈ ve hkʼaˬ hkʼe ve gʼa hpuˇ ve htawˇ Liꞈ hpu hkʼaw awˬ tehˬ ve maˇ pa. Chi htaꞈ pa taw, ngaˬ hui Liꞈ hpu hkʼaw awˬ tehˬ ve hkʼa dehꞈ gʼa shiˍ leh chi awˬ tehˬ hpehꞈ ve tehꞈ gʼa yonˍ ve yoˬ. Heuˇ shan hpawˇ mvuhˇ yeˬ mvuhˇ haw lonˉ gʼa hpuˇ htaˇ, heuˇ shan hpawˇ ve sho kʼuˉ kʼawehꞈ lehˬ heuˇ shan hpawˇ chehˇ yeˬ tuˬ te piˇ ve hkʼa shuˍ, Liꞈ hpu hkʼaw awˬ tehˬ ve kaꞈ ngaˬ hui beˬ ve lawˇ ve gʼa hpuˇ htaˇ, yonˍ yeˬ tuˬ ga laˇ ve yoˬ. Nawˬ ve yonˍ hkʼaˇ awˬ tehˬ ve hpehꞈ ve tehꞈ yonˍ gʼa tuˬ, hkʼaˬ hkʼe te cawˇ ve le?

8. 2 Tiˆmoˉseˍ liꞈ 3:14, 15 hkʼaw kʼoˆ taˍ ve hkʼe, Tiˆmoˉseˍ yawˇ yonˍ ve awˬ tehˬ hpehꞈ ve tehꞈ yonˍ yeˬ tuˬ aˬ htoꞈ ma ga piˇ ve le?

⁸ Tiˆmoˉseˍ yawˇ yonˍ ve awˬ ceuˬ awˬ tehˬ hpehꞈ ve tehꞈ yonˍ yeˬ ve yoˬ. Yawˇ chi hkʼe yonˍ gʼa tuˬ aˬ htoꞈ ma ga piˇ ve le? (2 Tiˆmoˉseˍ 3:14, 15 gʼaw sheˍ.) Tiˆmoˉseˍ ve awˬ e leh awˬ pi “daꞈ ve kehˬ ve Liꞈ hpu” yawˇ shiˍ tuˬ maˍ piˇ ve yoˬ. Yaꞈ hkʼaˇ, Tiˆmoˉseˍ kaꞈ chi ve htaꞈ henˇ tuˬ awˬ yanˇ yehˇ ve yoˬ. Maˍ ve chi teˇ hpaˍ awˬ tehˬ hpehꞈ ve tehꞈ “hkʼa dehꞈ gʼa yonˍ” tuˬ ga piˇ ve yoˬ. Peuˬ hkʼawꞈ nawˉ Tiˆmoˉseˍ, awˬ e, leh awˬ pi, Hkriꞈ yaˇ htaꞈ shiˍ la leh Yeˍsuˆ ve awˬ laꞈ gʼawˇ teˇ gʼaˇ leh teˇ gʼaˇ haꞈ daꞈ ve htaꞈ dawˇ cawˇ ve yoˬ. Chi yawˇ awˬ viˉ awˬ nyi htaꞈ awˬ chawˇ te daꞈ leh ga piˇ gaˇ tuˬ te piˇ ve yoˬ. (Hpiˇliˇpiˆ 2:19, 20) Yaꞈ hkʼaˇ, yawˇ ve yonˍ hkʼaˇ awˬ viˉ awˬ nyi haꞈ daꞈ ve geh laˬ ve maˇ heˆ. Yawˇ ve yonˍ hkʼaˇ Liꞈ hpu hkʼaw awˬ tehˬ ve maˍ ve htaꞈ yonˍ gʼa ve yoˬ. Chi yawˇ Yaˬhoˉvaˬ geh meuˆ daꞈ gaˇ tuˬ te piˇ ve yoˬ. Yaˬhoˉvaˬ htaꞈ caˉ daꞈ ve nawˬ gʼa henˇ ve awˬ tehˬ hpehꞈ ve tehꞈ, nawˬ yonˍ gʼa htaˇ hkʼa gaˬ Liꞈ hpu gʼa henˇ ve yoˬ.

9. Nawˬ yonˍ gʼa htaˇ hkʼa gaˬ hpfuhˆ nyi leh gʼa henˇ cawˇ ve a yeˇ uiˍ ve 3 hkʼaˇ aˬ htoꞈ ma le?

⁹ Nawˬ yonˍ ve awˬ tehˬ hpehꞈ ve tehꞈ yonˍ gʼa tuˬ a yeˇ uiˍ ve 3 hkʼaˇ htaꞈ teˇ geh nyi sheˍ. (1) Yaˬhoˉvaˬ hkʼa peu˗eˬ htaꞈ hpanˍ shehˍ hpaˇ hpehꞈ ve tehꞈ nawˬ gʼa yonˍ ve yoˬ. (Tawˆ kʼai ve 3:14, 15; Heˍbrehˇ 3:4; Hpeuꞈ maˍ ve 4:11) (2) Liꞈ hpu lehˬ Yaˬhoˉvaˬ dawˇ pawnˍ piˇ leh chaw yaˇ teˇ gʼaˇ le le awˬ pon bvuhꞈ tcuh taˍ ve tehꞈ nawˬ gʼa yonˍ ve yoˬ. (2 Tiˆmoˉseˍ 3:16, 17) (3) Yaˬhoˉvaˬ ve Shaˉhkiˆhkanˍ ve chaw lehˬ yawˇ ve chaw hpehꞈ leh, Yeˍsuˆ beˆ maˍ laˇ ve awˬ hawˉ lo Yaˬhoˉvaˬ htaꞈ oˉ kʼoˍ pui chehˇ ve teˇ moˍ hpehꞈ ve tehꞈ nawˬ gʼa yonˍ ve yoˬ. (Iˉsaˍyaˆ 43:10-12; Yoˇhanˬ 14:6; Tcuh yaˇ 15:14) Nawˬ awˬ tehˬ ve chi 3 ceuˬ htaꞈ yonˍ˗oˬ htaˇ, Liꞈ hpu hkʼa peu˗eˬ gʼa shiˍ cawˇ ve tehꞈ kʼoˆ gaˇ ve maˇ heˆ. Nawˬ ve yonˍ hkʼaˇ awˬ tehˬ hpehꞈ ve tehꞈ yonˍ yeˬ tuˬ, nawˬ hpfuhˆ nyi leh henˇ tuˬ dawˇ teh taˍ ve htaꞈ awˬ hkʼaˇ ca puiˉ tuˬ te cawˇ ve yoˬ.—Roˉmaꞈ 12:1.

10. Awˬ tehˬ ve shiˍ ve awˬ hkʼoˆ kaꞈ, ngaˬ hui aˬ htoꞈ ma gʼa te cawˇ ve le?

¹⁰ Gʼuiˬ sha htaꞈ caˉ daꞈ ve, Liꞈ hpu, leh Gʼuiˬ sha ve chaw lehˬ, a yeˇ uiˍ ve chi ve teˇ hpaˍ htaꞈ nawˬ yonˍ peuˬ hkʼawꞈ nawˉ, awˬ tehˬ hpehꞈ ve tehꞈ shu htaꞈ hpeuꞈ maw piˇ gʼa tuˬ, nawˬ Liꞈ hpu htaꞈ yehˇ tuˬ gʼa gu hehnˇ taˍ ve yoˬ. Aˬ htoꞈ ma pa taw le? Ngaˬ  hui Hkriꞈ yaˇ hpehꞈ ve pa taw, ngaˬ hui hkawˇ na gaˇ ve chaw htaꞈ awˬ tehˬ ve maˍ piˇ tuˬ awˬ vuiˬ cawˬ ve yoˬ. * (1 Tiˆmoˉseˍ 4:16) Shu Liꞈ hpu hkʼaw awˬ tehˬ ve htaꞈ yonˍ tuˬ ngaˬ hui coˇ caˇ leh ga piˇ˗oˬ htaˇ, ngaˬ hui yonˍ ve awˬ tehˬ hpehꞈ ve tehꞈ kʼawꞈ yonˍ maˇ la ve yoˬ.

11. Pawˇluꞈ shu htaꞈ maˍ piˇ htaˇ yawˇ hkʼaˬ hkʼe te ve le? Ngaˬ hui yawˇ htaꞈ hkʼaˬ hkʼe te henˇ yuˬ gʼa tuˬ le?

¹¹ Tcuh yaˇ Pawˇluꞈ shu htaꞈ maˍ piˇ htaˇ, “yawˇ hui Yeˍsuˆ htaꞈ yonˍ la tuˬ Moˉseˍ ve awˬ liˇ tawˇ hkawˇ leh tcuh kaˍ paˍ hui ve liꞈ htaꞈ cuˇ ve awˬ hkʼaw lo, yawˇ hui htaꞈ hpeuꞈ maˍ piˇ ve yoˬ.” (Tcuh yaˇ 28:23) Ngaˬ hui shu htaꞈ awˬ tehˬ ve maˍ piˇ htaˇ, ngaˬ hui hkʼaˬ hkʼe te Pawˇluꞈ htaꞈ henˇ yuˬ gʼa tuˬ le? Liꞈ hpu henˇ ve chaw Liꞈ hpu hkʼaw shiˍ ve ceh maˍ piˇ ve maˇ lawꞈ. Yaˬhoˉvaˬ geh meuˆ daꞈ gʼa tuˬ, yawˇ hui awˬ hkʼaˇ ca puiˉ tuˬ kaꞈ gʼa maˍ piˇ ve yoˬ. Yawˇ hui awˬ tehˬ ve htaꞈ haꞈ yuˬ tcuh gaˇ ve yoˬ. Yawˇ hui ngaˬ hui htaꞈ dawˇ cawˇ tuˬ ceh maˇ heˆ. Yaꞈ hkʼaˇ, Gʼuiˬ sha htaꞈ caˉ daꞈ ve awˬ tehˬ ve yawˇ yonˍ htaˇ hkʼa gaˬ gʼa henˇ ve pa taw yoˬ.

12-13. Yaˇ awˬ tehˬ ve hkʼaw maˇ tawˆ˗e tuˬ awˬ pa awˬ e hkʼaˬ hkʼe ga piˇ gʼa ve le?

¹² Awˬ pa awˬ e lehˬ yaˇ awˬ tehˬ ve hkʼaw maˇ tawˆ˗e tcuh gaˇ. Yaˇ Hkriꞈ yaˇ awˬ moˍ hkʼaw daꞈ ve awˬ chawˇ cawˬ ve kʼo, yawˇ co ha hpawˇ uiˍ la mvuh la tuˬ ga piˇ leh awˬ tehˬ ve hkʼaw maˇ tawˆ˗e taˬ tehꞈ nawˬ dawˇ ve yoˬ hehˉ. Yaꞈ hkʼaˇ, chi hkʼe ceh maˇ lawꞈ. A yeˇ uiˍ jaˇ ve lehˬ yawˇ Gʼuiˬ sha htaꞈ gʼa meuˆ daꞈ leh Liꞈ hpu hkʼaw maˍ ve awˬ tehˬ hpehꞈ ve tehꞈ yonˍ gʼa tcuh ve yoˬ.

¹³ Gʼuiˬ sha htaꞈ caˉ daꞈ ve awˬ tehˬ ve awˬ pa awˬ e yaˇ htaꞈ gʼa maˍ piˇ ve yoˬ. Chi hkʼe te gʼa tuˬ, awˬ pa awˬ e daꞈ ve Liꞈ hpu henˇ ve chaw hpehꞈ ve yaˇ mawˬ tuˬ, gʼa te maˍ piˇ ve yoˬ. Yawˇ gʼa henˇ taˍ ve htaꞈ hkʼa dehꞈ dawˇ nyi ve, yawˇ chi hkʼe te htaˇ, yaˇ kaꞈ hkʼa shuˍ te gʼa tuˬ maˍ piˇ gʼa ve yoˬ. Liꞈ hpu henˇ ve chaw hpfuhˆ nyi tuˬ awˬ hkʼaˇ maˍ piˇ ve hkʼe, yaˇ liꞈ kʼoˆ, VDO, leh laꞈ caˉ teˇ hpaˍ htaꞈ yehˇ puiˉ tuˬ awˬ hkʼaˇ kaꞈ gʼa maˍ piˇ ve yoˬ. Chi hkʼe te htaˇ yaˇ Yaˬhoˉvaˬ htaꞈ haꞈ tuˬ leh ngaˬ hui Liꞈ hpu na gʼa tuˬ awˬ pon Gʼuiˬ sha “ka tiꞈ yeˬ leh cuˇ yiˍ cawˬ ve awˬ ceˬ” htaꞈ yehˇ ve tehꞈ yaˇ yonˍ gʼa tuˬ awˬ pa awˬ e ga piˇ gʼa ve yoˬ. (Maꞈhtehˍ 24:45-47) Awˬ pa awˬ e lehˬ Liꞈ hpu hkʼaw a yeˇ uiˍ ve awˬ tehˬ ve chi teˇ hpaˍ ceh yaˇ htaꞈ maˍ piˇ ve maˇ lawꞈ. Yawˇ yonˍ hkʼaˇ yonˍ yeˬ tuˬ kaꞈ nawˬ gʼa maˍ piˇ ve yoˬ. Yaˇ “Gʼuiˬ sha ve naˉ jaˇ ve awˬ ceuˬ teˇ hpaˍ” teˇ gʼaˇ leh teˇ gʼaˇ ve a shaꞈ htaꞈ nyi leh gʼa maˍ piˇ ve yoˬ.—1 Kawˇrenˍhtuˆ 2:10.

14. Aˬ htoꞈ ma te Liꞈ hpu hkʼaw tcuh kaˍ paˍ ve tawˇ hkawˇ htaꞈ ngaˬ hui henˇ cawˇ ve le? (Awˇ ceˍ awˇ fa “ Nawˬ tcuh kaˍ paˍ ve tawˇ hkawˇ chi teˇ hpaˍ kʼoˆ maˍ laˇ hpehꞈ˗aw laˇ?” htaꞈ nyi sheˍ.)

¹⁴ Liꞈ hpu hkʼaw a yeˇ uiˍ jaˇ ve tcuh kaˍ paˍ ve tawˇ hkawˇ kaꞈ teˇ ceuˬ hpehꞈ ve yoˬ. Tcuh kaˍ paˍ ve tawˇ hkawˇ teˇ hpaˍ ngaˬ hui Yaˬhoˉvaˬ htaꞈ yonˍ maˇ la  tuˬ ga laˇ ve yoˬ. Nawˬ ve yonˍ hkʼaˇ yonˍ maˇ la tuˬ ga laˇ ve tcuh kaˍ paˍ ve tawˇ hkawˇ hkʼaˬ ve teˇ maˬ le? “Awˬ leh meuˇ ve” awˬ yanˇ tcuh kaˍ paˍ ve tawˇ hkawˇ htaꞈ nawˬ dawˇ nyi tuˬ yoˬ hehˉ. (2 Tiˆmoˉseˍ 3:1-5; Maꞈhtehˍ 24:3, 7) Yaꞈ hkʼaˇ, tcuh kaˍ paˍ ve tawˇ hkawˇ hkʼaˬ ve teˇ maˬ cawˬ sheˍ ve le? Tawˇ pa haˉ te kʼo, Daˍyeˍlaˆ liꞈ 2 leh 11 hkʼaw ve tcuh kaˍ paˍ ve tawˇ hkawˇ hkʼaˬ hkʼe hpehꞈ la˗oˬ ve le, leh chi teˇ hkui hkʼaˬ hkʼe hpehꞈ la chehˇ ve le, nawˬ kʼoˆ maˍ laˇ hpehꞈ˗aw laˇ? * Liꞈ hpu hkʼaw kʼoˆ laˇ ve htaꞈ nawˬ awˬ tehˬ yonˍ ve kʼo, nawˬ ve yonˍ hkʼaˇ htaꞈ teˇ ceuˬ kaꞈ te luˬ laˇ maˇ gʼa. Jaˬmaˬniˬ mvuhˇ miˬ lo maꞈ lonˉ 2 pawˆ teˇ pawˆ htaˇ, awˬ viˉ awˬ nyi htaꞈ shu fawˉ mehˍ piˇ jaˇ ve awˬ lawn htaꞈ teˇ geh nyi sheˍ. Yawˇ hui awˬ leh meuˇ ve awˬ yanˇ tcuh kaˍ paˍ ve tawˇ hkawˇ hkʼa dehꞈ maˇ shiˍ ve htawˇ, yawˇ hui Liꞈ hpu hkʼaw gʼa henˇ ve pa taw, hkʼa dehꞈ yonˍ yeˬ ve yoˬ.

15-17. Naˍziˬ fawˉ mehˍ piˇ htaˇ Liꞈ hpu henˇ ve ngaˬ hui ve awˬ viˉ awˬ nyi htaꞈ hkʼaˬ hkʼe ga piˇ ve le?

¹⁵ Jaˬmaˬniˬ mvuhˇ miˬ lo Naˍziˬ uˉ peunˍ htaˇ ngaˬ hui ve awˬ viˉ awˬ nyi laiˉ hinˉ gʼaˇ Naˍziˬ ve htawnˍ hkʼaw yuˬ keu piˇ ve yoˬ. Hiˆleuˇ leh Hain˗riꞈ Hin˗leunˆ lehˬ maꞈ awˬ hoˉ hpehꞈ leh Yaˬhoˉvaˬ ve Shaˉhkiˆhkanˍ ve chaw htaꞈ nyi bawˬ jaˇ. Awˬ viˉ awˬ nyi yaˇ miˇ teˇ gʼaˇ kʼoˆ ve, Naˍziˬ ve htawnˍ hkʼaw chehˇ ve awˬ viˉ awˬ nyi yaˇ miˇ teˇ moˍ htaꞈ Hain˗riꞈ Hin˗leunˆ kʼoˆ piˇ jaw ve “nawˬ hui ve Yaˬhoˉvaˬ Gʼuiˬ sha lehˬ mvuhˇ naw ma hkʼoˆ uˉ peunˍ ve yoˬ. Yaꞈ hkʼaˇ, miˬ guiˬ chi hkʼoˆ uˉ peunˍ ve lehˬ ngaˬ hui yoˬ. Awˬ leh meuˇ htaˇ, a shu leuˉ taˉ tuˬ ve htaꞈ shiˍ tuˬ yoˬ!” Yaˬhoˉvaˬ ve chaw ka tiꞈ yeˬ gʼa tuˬ aˬ htoꞈ ma ga piˇ ve le?

¹⁶ Gʼuiˬ sha ve mvuhˇ miˬ 1914 hkʼawꞈ htaˇ kaꞈ tanˬ uˉ peunˍ˗oˬ ve tehꞈ Liꞈ hpu henˇ yaˇ shiˍ˗oˬ. Hkʼe te leh, yawˇ hui fawˉ mehˍ ve gʼa hpuˇ jaˇ ve anˇ tuˬ maˇ loˍ. Yaꞈ hkʼaˇ, Gʼuiˬ sha ve mvuhˇ miˬ htaꞈ chaw teˇ gʼaˇ kaꞈ tawˍ piˇ maˇ gʼa ve tehꞈ yawˇ hui yonˍ ve yoˬ. Awˬ tehˬ ve oˉ kʼoˍ pui ve htaꞈ te luˬ tuˬ Hiˆleuˇ awˬ moˍ teˇ moˍ teh tuˬ loˍ ve yoˬ. Yaꞈ hkʼaˇ, yawˇ te maˇ gʼa taˬ tehꞈ Gʼuiˬ sha ve chaw hkʼa dehꞈ shiˍ ve yoˬ. Hkʼaˬ hkʼe hpehꞈ ve htawˇ, Hiˆleuˇ hkʼaˬ htaˆ kaꞈ uˉ peunˍ maˇ gʼa tehꞈ yawˇ hui yonˍ ve yoˬ.

¹⁷ Awˬ viˉ awˬ nyi yonˍ ve awˬ tehˬ hpehꞈ la ve yoˬ. Maˇ maw Naˍziˬ uˉ peunˍ ve kaꞈ luˬ kʼai ve yoˬ. Leh Hain˗riꞈ Hin˗leunˆ kʼoˆ ve, “miˬ guiˬ chi htaꞈ uˉ peunˍ  ve lehˬ ngaˬ hui yoˬ” tehꞈ kʼoˆ shehˍ hpaˇ kaꞈ gʼa hpaw˗e ve yoˬ. Yawˇ hpaw˗e htaˇ kaꞈ awˬ viˉ awˬ nyi Luˆhki htawnˍ yaˇ hpehꞈ jaw ve htaꞈ gʼa mawˬ daꞈ ve yoˬ. Chi teˇ gʼaˇ Shaˉhkiˆhkanˍ ve chaw hpehꞈ ve yawˇ tawnˇ gʼa ve yoˬ. Hkʼe te leh, yawˇ nyi ma luˬ ve hkʼaw na piˇ ve “Liꞈ hpu henˇ yaˇ˗oˬ hkʼaˬ hkʼe kʼawꞈ hpehꞈ kʼai tuˬ le?” a ciˉ kʼoˆ˗a. Awˬ viˉ awˬ nyi Luˆhki kʼoˆ maˍ piˇ ve, Naˍziˬ uˉ peunˍ ve lehˬ luˬ kʼai leh Yaˬhoˉvaˬ ve Shaˉhkiˆhkanˍ ve chaw htaꞈ hpehˇ laˇ tuˬ yoˬ tehꞈ, yawˇ hui shiˍ maw jaˇ˗oˬ. Hain˗riꞈ Hin˗leunˆ oˇ htaˇ Yaˬhoˉvaˬ ve Shaˉhkiˆhkanˍ ve chaw awˬ lawn kʼoˆ maˇ jaˇ ve kaꞈ chi teˇ hkui teꞈ chiˉ kʼoˆ maˇ gʼa˗o. Leh peuˬ hkʼawꞈ nawˉ maˇ maw yawˇ hkʼaˇ yawˇ tiˇ pehˍ ve yoˬ. Chi ngaˬ hui htaꞈ aˬ htoꞈ ma maˍ laˇ ve le? Beˬ ve lawˇ ve leh fawˉ mehˍ ve gʼa hpuˇ htaˇ, Liꞈ hpu leh tcuh kaˍ paˍ ve tawˇ hkawˇ henˇ ve ngaˬ hui Gʼuiˬ sha htaꞈ yonˍ yeˬ tuˬ ga laˇ ve yoˬ.—2 Peˍtruˆ 1:19-21.

18. Yoˇhanˬ liꞈ 6:67, 68 hkʼaw kʼoˆ taˍ ve hkʼe, “daꞈ ve awˬ ceuˬ htaꞈ shiˍ puiˉ tuˬ, cuˇ yiˍ maˍ yiˍ teˇ ceuˬ” aˬ htoꞈ ma te ngaˬ hui cawˬ cawˇ ve le?

¹⁸ Ngaˬ hui awˬ tehˬ ve Hkriꞈ yaˇ hpehꞈ ve kʼo, haꞈ pehnˇ ve cawˬ ve tehꞈ gʼa hpeuꞈ maw piˇ ve yoˬ. Yaꞈ hkʼaˇ, ngaˬ hui “daꞈ ve awˬ ceuˬ htaꞈ shiˍ puiˉ tuˬ, cuˇ yiˍ maˍ yiˍ teˇ ceuˬ” kaꞈ gʼa cawˬ cawˇ ve yoˬ (Hpiˇliˇpiˆ 1:9) Chi hkʼe maˇ te ve kʼo, Gʼuiˬ sha htaꞈ hpfuhˆ ve chaw “laꞈ lehnˉ ve chaw teˇ hpaˍ cuˇ yiˍ te leh heˍ ve awˬ hkʼaw lo laiˉ ceuˬ htaꞈ maˍ ve” awˬ hkʼaˇ suh gʼaꞈ kʼai la tuˬ yoˬ. (Eˇfeˇsuꞈ 4:14) Awˬ laꞈ gʼawˇ laiˉ gʼaˇ Yeˍsuˆ awˬ hkʼaˇ suh maˇ gʼaꞈ kʼai˗o ve htawˇ, tcuh yaˇ Peˍtruˆ yonˍ gʼa ve hkʼaw kʼoˆ ve, Yeˍsuˆ lehˬ “co tiꞈ ha tiꞈ ve tawˇ hkawˇ cawˬ taˍ ve yoˬ.” (Yoˇhanˬ 6:67, 68 gʼaw sheˍ.) Tcuh yaˇ Peˍtruˆ chi hkʼe kʼoˆ ve htawˇ, Yeˍsuˆ maˍ ve tawˇ hkawˇ hkʼa peu˗eˬ htaꞈ na gʼa ve maˇ heˆ. Yeˍsuˆ lehˬ Hkriꞈ hpehꞈ ve yoˬ tehꞈ yawˇ yonˍ ve pa taw, yawˇ Yeˍsuˆ htaꞈ ka tiꞈ yeˬ leh maˇ chiˇ baˬ. Nawˬ kaꞈ hkʼa shuˍ yoˬ. Liꞈ hpu hkʼaw maˍ ve awˬ ceuˬ awˬ tehˬ ve tehꞈ nawˬ yonˍ gʼa tuˬ teˇ ceuˬ ceuˬ te gʼa ve yoˬ. Nawˬ chi hkʼe te ve kʼo, hkʼaˬ hkʼe hpehꞈ ve htawˇ nawˬ ve yonˍ hkʼaˇ yonˍ yeˬ tuˬ yoˬ. Leh shu kaꞈ yonˍ hkʼaˇ yonˍ yeˬ tuˬ nawˬ ga piˇ gʼa ve yoˬ.—2 Yoˇhanˬ 1, 2.