1. Pawˇluꞈ aˬ htoꞈ ma htaꞈ haꞈ yuˬ ve le?

 Tcuh yaˇ Pawˇluꞈ yawˇ kaꞈ teˇ pawˆ pawˆ awˬ gʼaˇ nuˇ ve tehꞈ dawˇ ve yoˬ. Pawˇluꞈ yawˇ awˬ to “luˬ kʼai chehˇ ve” pa taw, cawˇ ve htaꞈ te tuˬ haˍ jaˇ tehꞈ dawˇ ve yoˬ. Teˇ pawˆ pawˆ yawˇ dawˇ taˍ ve hkʼe bon lawˬ ve htaꞈ Yaˬhoˉvaˬ maˇ hkʼawꞈ laˇ tehꞈ dawˇ ve yoˬ. (2 Kawˇrenˍhtuˆ 4:16; 12:7-9; Roˉmaꞈ 7:21-23) Chi hkʼoˆ kaꞈ, Pawˇluꞈ awˬ gʼaˇ nuˇ ve * tehꞈ tawˍ taˍ paˍ kaꞈ dawˇ ve yoˬ. Yaꞈ hkʼaˇ, yawˇ awˬ gʼaˇ nuˇ ve leh yawˇ htaꞈ caˉ daꞈ ve awˬ lawn shu kʼoˆ ve yawˇ awˬ hpfuhˇ maˇ cawˬ tehꞈ maˇ te laˇ tcuh.—2 Kawˇrenˍhtuˆ 10:10-12, 17, 18.

2. 2 Kawˇrenˍhtuˆ liꞈ 12:9, 10 hkʼaw kʼoˆ taˍ ve hkʼe, Pawˇluꞈ a yeˇ uiˍ ve awˬ lawn aˬ htoꞈ ma gʼa henˇ ve le?

² Pawˇluꞈ a yeˇ uiˍ jaˇ ve teˇ ceuˬ gʼa henˇ ve lehˬ, yawˇ awˬ gʼaˇ nuˇ ve tehꞈ dawˇ ve htawˇ, awˬ gʼaˇ kʼawꞈ cawˬ la gʼa ve yoˬ. (2 Kawˇrenˍhtuˆ 12:9, 10 gʼaw sheˍ.) Yaˬhoˉvaˬ Pawˇluꞈ htaꞈ kʼoˆ piˇ ve, “awˬ gʼaˇ nuˇ ve teˇ kaˬ awˬ hkʼaw lo ngaˬ ve kanˇ paˆ biˇ la ve yoˬ.” Chi kʼoˆ gaˇ ve lehˬ, Pawˇluꞈ loˍ ve awˬ gʼaˇ Yaˬhoˉvaˬ piˇ ve yoˬ. Shu ngaˬ hui htaꞈ hkʼa mvuhˇ hkʼa na kʼoˆ laˇ htaˇ, hkʼe taw taw maˇ dawˇ haˍ cawˇ ve teˇ geh nyi sheˍ.

3. Hkʼa mvuhˇ hkʼa na kʼoˆ laˇ ve htawˇ, aˬ htoꞈ ma te ngaˬ hui ha lehˬ gʼa ve le?

³ Hkʼa mvuhˇ hkʼa na kʼoˆ laˇ ve htaꞈ dawˇ cawˇ ve teˇ gʼaˇ kaꞈ maˇ cawˬ. Yaꞈ hkʼaˇ, shu ngaˬ hui htaꞈ hkʼa mvuhˇ hkʼa na kʼoˆ laˇ leh awˬ  lawn chi ve htaꞈ dawˇ maˇ jaˇ ve kʼo, awˬ gʼaˇ nuˇ la ve yoˬ. (Tawˇ naˉ ve 24:10) Chi hkʼe hpehꞈ ve kʼo, shu hkʼa mvuhˇ hkʼa na kʼoˆ laˇ htaˇ, hkʼaˬ hkʼe te tuˬ le? Pawˇluꞈ hkʼa shuˍ, shu ngaˬ hui htaꞈ “hkʼa mvuhˇ hkʼa na kʼoˆ laˇ ve . . . ha lehˬ ha kʼa hkanˍ” gʼa ve yoˬ. (2 Kawˇrenˍhtuˆ 12:10) Shu hkʼa mvuhˇ hkʼa na kʼoˆ laˇ leh tawˍ laˇ ve pa taw, ngaˬ hui Yeˍsuˆ ve awˬ laꞈ gʼawˇ awˬ tehˬ hpehꞈ ve yoˬ. (1 Peˍtruˆ 4:14) Leh Yeˍsuˆ kaꞈ kʼoˆ ve, yawˇ awˬ hkʼaˇ suh gʼaꞈ yuˬ ve chaw lehˬ fawˉ mehˍ ve htaꞈ gʼa hkanˍ tuˬ yoˬ. (Yoˇhanˬ 15:18-20) Awˬ lawn chi awˉ lawˉ peuˇ ve Hkriꞈ yaˇ teˇ co˗e htaˇ awˬ tehˬ hpehꞈ ve yoˬ. Heˍlaˍsaˆ ve chaw liˇ vaˇ liˇ geh laˬ ve chaw lehˬ, Hkriꞈ yaˇ awˬ hpfuhˇ maˇ cawˬ tehꞈ yawˇ hui dawˇ ve yoˬ. Yuˇdaꞈ chaw lehˬ Peˍtruˆ leh Yoˇhanˬ “liꞈ maˇ shiˍ ve chaw, teꞈ chiˉ maˇ gʼa henˇ jaw ve chaw hpehꞈ ve” tehꞈ dawˇ ve hkʼe Hkriꞈ yaˇ htaꞈ kaꞈ chi hkʼe dawˇ ve yoˬ. (Tcuh yaˇ 4:13) Chi hkʼoˆ kaꞈ, Hkriꞈ yaˇ lehˬ maꞈ leh mvuhˇ miˬ hpawˇ maˇ caˉ daꞈ ve pa taw, yawˇ hui awˬ to htaꞈ haꞈ shaˉ tuˬ awˬ gʼaˇ maˇ cawˬ ve hkʼe hpehꞈ ve yoˬ. Awˬ nu ve chaw yawˇ hui htaꞈ chaw yaˇ maˇ haꞈ yuˬ ve tehꞈ shawˍ ve yoˬ.

4. Shu hkʼa mvuhˇ hkʼa na kʼoˆ piˇ htaˇ, awˉ lawˉ peuˇ ve Hkriꞈ yaˇ hkʼaˬ hkʼe te ve le?

⁴ Shu hkʼa mvuhˇ hkʼa na kʼoˆ piˇ htaˇ, awˉ lawˉ peuˇ ve Hkriꞈ yaˇ hkʼaˬ hkʼe te ve le? Yawˇ hui bon maˍ ve leh Yeˍsuˆ ve awˬ laꞈ gʼawˇ maˇ hpehꞈ tuˬ maˇ te laˇ tcuh. Tawˇ pa haˉ te kʼo, tcuh yaˇ Peˍtruˆ leh Yoˇhanˬ Yeˍsuˆ ve awˬ laꞈ gʼawˇ hpehꞈ leh yawˇ ve awˬ lawn gʼa maˍ ve pa taw shu fawˉ mehˍ piˇ ve htawˇ ha lehˬ jaˇ tehꞈ dawˇ ve yoˬ. (Tcuh yaˇ 4:18-21; 5:27-29, 40-42) Tawˍ taˍ paˍ awˬ nu ve chaw htaꞈ daꞈ ve te piˇ jaw ve aꞈ kehˉ, yawˇ hui te piˇ maˇ ve pa taw, Hkriꞈ yaˇ hpehꞈ ve chaw lehˬ yaꞈ taw tuˬ maˇ cawˬ. Tawˇ pa haˉ te kʼo, chaw teˇ hpaˍ htaꞈ Gʼuiˬ sha ve awˬ ha hpu dawˇ pawnˍ piˇ leh liꞈ bvuhꞈ tcuh taˍ ve chi laiˉ lanˬ gʼaˇ a shaꞈ teꞈ hkʼaˇ daꞈ la leh awˬ gʼuˇ suhˍ hpawˇ awˬ tehˬ awˬ na ve dawˇ law kuiˬ cawˬ tuˬ ga piˇ ve yoˬ. Yawˇ hui hto toˇ ve awˬ lawn Gʼuiˬ sha ve mvuhˇ miˬ lehˬ, chi teˇ hkui mvuhˇ naw ma hkʼoˆ uˉ peunˍ chehˇ˗oˬ. Leh maˇ maw ve awˬ yanˇ mvuhˇ miˬ chi miˬ guiˬ hkʼa peu˗eˬ hkʼoˆ uˉ peunˍ tuˬ yoˬ. (Maꞈhtehˍ 24:14) Roˉmaꞈ mvuhˇ miˬ uˉ peunˍ ve Hkriꞈ yaˇ htaꞈ fawˉ mehˍ piˇ ve luˬ kʼai maw jaˇ˗oˬ. Yaꞈ hkʼaˇ, ka tiꞈ yeˬ ve Hkriꞈ yaˇ chi teˇ hkui mvuhˇ naw ma hkʼoˆ jawˇ mawˇ te leh uˉ peunˍ chehˇ˗oˬ. Yawˇ hui htaꞈ fawˉ mehˍ piˇ jaw ve chaw kʼo, suh peuˬ˗oˬ. Yawˇ hui htaꞈ fawˉ mehˍ piˇ ve chaw hui kʼawꞈ teꞈ tu la htaˇ, Gʼuiˬ sha ve mvuhˇ miˬ uˉ peunˍ ve awˬ hawˉ lo gʼa chehˇ tuˬ yoˬ. Awˬ lawn chi ve hto toˇ ve chaw lehˬ yawˇ hui nyi bawˬ ve chaw hpehꞈ ve yoˬ.—Hpeuꞈ maˍ ve 5:10.

5. Yoˇhanˬ liꞈ 15:19 hkʼaw kʼoˆ taˍ ve hkʼe, aˬ htoꞈ ma te Yaˬhoˉvaˬ ve chaw htaꞈ shu hkʼa mvuhˇ hkʼa na kʼoˆ piˇ ve le?

⁵ Chi teˇ hkui Gʼuiˬ sha ve chaw htaꞈ cuˇ yiˍ maˇ cawˬ leh awˬ hpfuhˇ maˇ cawˬ ve tehꞈ shu hkʼa mvuhˇ hkʼa na kʼoˆ ve yoˬ. Aˬ htoꞈ ma te chi hkʼe hpehꞈ ve le? Chaw yaˇ dawˇ ve hkʼe ngaˬ hui maˇ dawˇ ve pa taw yoˬ. Miˬ guiˬ yaˇ uiˍ muiˬ caˆ muiˬ ve chaw htaꞈ dawˇ cawˇ leh yawˇ hui hpehꞈ chehˇ ve htaꞈ nyi hkʼaˇ suh ve yoˬ. Yawˇ hui shu aꞈ kehˉ cheuˬ ve chaw htaꞈ taˍ uiˍ ve yoˬ. Yaꞈ hkʼaˇ, ngaˬ hui nyi ma nuˇ nehˬ leh na yuˬ ve chaw hpehꞈ cawˇ ve yoˬ. Chi hkʼoˆ kaꞈ, ngaˬ hui mvuhˇ miˬ leh maꞈ hpawˇ maˇ caˉ daꞈ. Shu hkʼa mvuhˇ hkʼa na te leh yawˇ hui hkʼe taw maˇ daꞈ ve kʼoˆ laˇ ve htawˇ, ngaˬ hui anˇ tuˬ maˇ loˍ.—Yoˇhanˬ 15:19 gʼaw sheˍ; Roˉmaꞈ 12:2.

6. Chi beuꞈ teˇ co˗e Yaˬhoˉvaˬ yawˇ ve chaw htaꞈ aˬ htoꞈ ma ve kanˉ te biˇ la tuˬ te tcuh ve le?

⁶ Ngaˬ hui htaꞈ shu hkʼaˬ hkʼe dawˇ ve htawˇ, Yaˬhoˉvaˬ ve kanˉ uiˍ jaˇ ve htaꞈ te gʼa tuˬ ga laˇ ve yoˬ. Yawˇ ve chaw miˬ guiˬ chi hkʼoˆ lo hto toˇ ve zuhˇ kʼai tuˬ ga piˇ ve yoˬ. Gʼuiˬ sha ve chaw liꞈ yuˬ tawˆ maˇ jaˇ leh miˬ guiˬ chi hkʼoˆ lo awˬ nu ve chaw aꞈ kehˉ piˇ maˇ jaˇ. Chi teˇ hkui kaꞈ laiˉ lanˬ gʼaˇ a shaꞈ teꞈ hkʼaˇ daꞈ ve cawˬ tuˬ, yawˇ hui Liꞈ hpu htaꞈ cuˇ leh ga piˇ chehˇ ve yoˬ. Shu mehˆ gʼuˇ suhˍ awˬ gʼaˇ nuˇ ve chaw htaꞈ Yaˬhoˉvaˬ ga piˇ leh chi ve hkʼa peu˗eˬ te gʼa ve yoˬ. Hkʼe kʼo, ngaˬ hui˗ehꞈ? Yaˬhoˉvaˬ ngaˬ hui yonˍ yeˬ gʼa tuˬ ga laˇ gʼa˗aw  laˇ? Yawˇ ga laˇ tuˬ hkʼaˬ hkʼe gʼa te cawˇ ve le? Tcuh yaˇ Pawˇluꞈ htaꞈ henˇ yuˬ gʼa ve 3 hkʼaˇ htaꞈ teˇ geh nyi sheˍ.

7. Ngaˬ hui Pawˇluꞈ htaꞈ henˇ yuˬ gʼa ve teˇ hkʼaˇ lehˬ aˬ htoꞈ ma le?

⁷ Ngaˬ hui Pawˇluꞈ htaꞈ henˇ yuˬ gʼa ve teˇ hkʼaˇ lehˬ, Yaˬhoˉvaˬ ve kanˉ te htaˇ ngaˬ hui a shu yawˇ awˬ to htaꞈ gʼaˇ maˇ va cawˇ. Pawˇluꞈ yawˇ awˬ to hpehꞈ chehˇ ve htaꞈ nyi hkʼaˇ suh leh shu htaꞈ gʼaˇ va tuˬ maˇ loˍ ve tehꞈ laiˉ gʼaˇ dawˇ ve yoˬ. Roˉmaꞈ uˉ peunˍ ve Kiˇliˇkiˆ mvuhˇ miˬ Taˍsuˆ venˇ hkʼaw Pawˇluꞈ uiˍ la ve yoˬ. Taˍsuˆ venˇ lehˬ hpehꞈ sha paw sha jaˇ. Liꞈ henˇ yehˬ lonˉ awˬ meh bvuhˬ jaˇ ve kaꞈ cawˬ ve yoˬ. Pawˇluꞈ lehˬ liꞈ henˇ mvuh jaˇ. Oˇ ve teˇ co˗e Yuˇdaꞈ chaw awˬ hoˉ shu yawˆ yan jaˇ ve Gaˍmaˍleˍlaˆ geh yawˇ liꞈ henˇ ve yoˬ. (Tcuh yaˇ 5:34; 22:3) Chi hkʼoˆ kaꞈ, Pawˇluꞈ Yuˇdaꞈ chaw awˬ moˍ awˬ hkʼaw lo yawˇ a yeˇ uiˍ ve chaw hpehꞈ ve yoˬ. Yawˇ kʼoˆ ve, “ngaˬ ve chaw ceuˬ awˬ hkʼaw lo a shaꞈ ngaˬ hkʼe ceh ve chaw maˇ˗awˍ ve aꞈ kehˉ Yuˇdaꞈ awˬ liˇ htaꞈ ngaˬ te ve yoˬ.” (Gaˍlaˍtiˆ 1:13, 14; Tcuh yaˇ 26:4) Yaꞈ hkʼaˇ, Pawˇluꞈ yawˇ awˬ to htaꞈ gʼaˇ maˇ va.

8. Hpiˇliˇpiˆ liꞈ 3:8 hkʼaw kʼoˆ taˍ ve hkʼe, Pawˇluꞈ yawˇ baˬ taˉ ve awˬ ceuˬ htaꞈ hkʼaˬ hkʼe dawˇ ve le? Awˬ gʼaˇ nuˇ ve teˇ yanˇ “ngaˬ ha lehˬ” ve, aˬ htoꞈ ma te Pawˇluꞈ chi hkʼe kʼoˆ ve le?

⁸ Pawˇluꞈ shu mehˆ gʼuˇ suhˍ lo a yeˇ uiˍ jaˇ ve awˬ ceuˬ htaꞈ baˬ taˉ ve yawˇ nyi ma maˇ luˬ. Chi lehˬ chaꞈ chiˆ ve mawˇ hkʼe hpehꞈ ve tehꞈ yawˇ dawˇ ve yoˬ. (Hpiˇliˇpiˆ 3:8 gʼaw sheˍ.) Pawˇluꞈ Yeˍsuˆ awˬ hkʼaˇ suh gʼaꞈ yuˬ ve pa taw, shoꞈ shaꞈ ve laiˉ ceuˬ gʼa hpuˇ ve yoˬ. Yawˇ chehˇ kuiˬ mvuhˇ miˬ hkʼaw ve chaw yawˇ htaꞈ maˇ dawˇ cawˇ. (Tcuh yaˇ 23:12-14) Yawˇ Roˉmaꞈ chaw hpehꞈ ve htawˇ, yawˇ htaꞈ Roˉmaꞈ chaw jawꞈ leh htawnˍ hkʼaw yuˬ keu piˇ ve yoˬ. (Tcuh yaˇ 16:19-24, 37) Chi hkʼoˆ kaꞈ, Pawˇluꞈ kʼoˆ ve, cawˇ ve htaꞈ te tuˬ yawˇ awˬ pon kʼo haˍ jaˇ. (Roˉmaꞈ 7:21-25) Chi yawˇ Yeˍsuˆ awˬ hkʼaˇ suh maˇ gʼaꞈ kʼai tuˬ maˇ te laˇ tcuh. Yawˇ shoꞈ shaꞈ ve gʼa hpuˇ leh yawˇ awˬ to awˬ hpfuhˇ maˇ cawˬ tehꞈ dawˇ ve yoˬ. Yawˇ kʼoˆ ve, awˬ gʼaˇ nuˇ ve teˇ yanˇ “ngaˬ ha lehˬ” ve yoˬ. Hkʼaˬ hkʼe te chi hkʼe hpehꞈ gʼa ve le? Yawˇ awˬ gʼaˇ nuˇ ve teˇ yanˇ Gʼuiˬ sha ve awˬ ha hpu yawˇ htaꞈ ga piˇ ve gʼa mawˬ ve yoˬ.—2 Kawˇrenˍhtuˆ 4:7; 12:10.

9. Ngaˬ hui teˇ ceuˬ ceuˬ shu hkʼe leˇ maˇ cawˬ ve kʼo, hkʼaˬ hkʼe dawˇ tuˬ le?

⁹ Ngaˬ hui Yaˬhoˉvaˬ geh awˬ gʼaˇ gʼa gaˇ ve kʼo,  chehˇ sha cawˬ sha ve, liꞈ tanˇ mvuh ve, paw sha ve, maˇ heˆ leh ngaˬ hui gʼa hpuˇ jaw ve chi ve teˇ hpaˍ a yeˇ uiˍ ve tehꞈ maˇ dawˇ nyi cawˇ. Chi ve teˇ hpaˍ cawˬ ve pa taw, Yaˬhoˉvaˬ ngaˬ hui htaꞈ a yeˇ yuˬ ve maˇ heˆ. Awˬ tehˬ kʼo, Yaˬhoˉvaˬ ve chaw lehˬ, “cuˇ yiˍ maˍ yiˍ cawˬ ve chaw hui maˇ ve maˇ heˆ. Kanˇ paˆ uiˍ ve chaw hui kaꞈ maˇ ve maˇ heˆ. Jawˇmawˇ ve awˬ ceuˬ awˬ hkʼaˇ hui htawˇ maˇ ve maˇ heˆ.” Yaꞈ hkʼaˇ, “miˬ guiˬ hkʼoˆ lo awˬ gʼaˇ nuˇ ve chaw hui htaꞈ Gʼuiˬ sha leuˆ yuˬ ve yoˬ.” (1 Kawˇrenˍhtuˆ 1:26, 27) Chi ve teˇ hpaˍ nawˬ shu hkʼe leˇ maˇ cawˬ ve kʼo, Yaˬhoˉvaˬ ve kanˉ te maˇ gʼa taˬ tehꞈ taˇ dawˇ. Yaꞈ hkʼaˇ, Yaˬhoˉvaˬ ve daꞈ kehˬ ve awˬ ha hpu nawˬ htaꞈ hkʼaˬ hkʼe ga laˇ ve htaꞈ nyi sheˍ. Tawˇ pa haˉ te kʼo, nawˬ yonˍ ve awˬ ceuˬ awˬ tehˬ maˇ heˆ tehꞈ shu kʼoˆ laˇ ve kʼo, nawˬ kaꞈ kawˆ ve yoˬ. Yaꞈ hkʼaˇ, nawˬ yonˍ ve awˬ ceuˬ htaꞈ haꞈ hanˉ ve hkʼaw haꞈ shaˉ gʼa tuˬ, Yaˬhoˉvaˬ geh bon lawˬ sheˍ. (Eˇfeˇsuꞈ 6:19, 20) Nawˬ naˬ ve gʼaˇ hteꞈ kʼawꞈ naˬ ve kʼo, haꞈ yuˬ haˍ jaˇ tehꞈ dawˇ ve yoˬ. Yaˬhoˉvaˬ ve kanˉ maˇ maˇ te leh nawˬ ve awˬ lawn htaꞈ tiˉ maˇ dawˇ nyi tuˬ, Yaˬhoˉvaˬ ga laˇ tuˬ bon lawˬ sheˍ. Yaˬhoˉvaˬ ga laˇ ve teˇ pawˆ le le htaꞈ nawˬ mawˬ htaˇ, nawˬ awˬ gʼaˇ gʼa leh yonˍ hkʼaˇ kaꞈ yonˍ yeˬ ve yoˬ.

10. Heˍbrehˇ liꞈ 11:32-34 hkʼaw Gʼuiˬ sha ve kanˉ te ve ka tiꞈ yeˬ ve chaw awˬ lawn aˬ htoꞈ ma te ngaˬ hui henˇ cawˇ ve le?

¹⁰ Pawˇluꞈ Liꞈ hpu hkʼaw chaˬ nyi ve kaiˬ jaˇ. Yawˇ Liꞈ hpu hkʼaw awˬ tehˬ ve htaꞈ ceh tiˉ henˇ ve maˇ heˆ. Yaꞈ hkʼaˇ, Gʼuiˬ sha ve kanˉ te ve ka tiꞈ yeˬ ve chaw awˬ lawn kaꞈ henˇ ve yoˬ. Pawˇluꞈ Heˍbrehˇ chaw Hkriꞈ yaˇ htaꞈ liꞈ bvuhꞈ piˇ htaˇ, Yaˬhoˉvaˬ ve kanˉ te ve ka tiꞈ yeˬ ve chaw laiˉ gʼaˇ ve awˬ lawn, Hkriꞈ yaˇ dawˇ nyi tuˬ kʼoˆ piˇ ve yoˬ. (Heˍbrehˇ 11:32-34 gʼaw sheˍ.) Jawˇmawˇ Daˍviˆ ve awˬ lawn htaꞈ teˇ geh nyi sheˍ. Yawˇ canˇ paˍ geh ceh shoꞈ shaꞈ ve gʼa hpuˇ ve maˇ heˆ. Yaꞈ hkʼaˇ, yawˇ ve awˬ chawˇ geh kaꞈ gʼa hpuˇ ve yoˬ. Daˍviˆ ve awˬ lawn htaꞈ ngaˬ hui dawˇ nyi tuˬ yoˬ. Pawˇluꞈ Daˍviˆ ve awˬ lawn htaꞈ dawˇ nyi ve teˇ yanˇ, Pawˇluꞈ yonˍ yeˬ tuˬ hkʼaˬ hkʼe ga piˇ ve le? Leh yawˇ ve awˬ lawn ngaˬ hui htaꞈ hkʼaˬ hkʼe maˍ laˇ ve le? ngaˬ hui gʼa henˇ tuˬ yoˬ.

11. Aˬ htoꞈ ma te nyi˗a kʼo, Daˍviˆ awˬ gʼaˇ nuˇ ve htaꞈ shuˍ ve le? (Awˬ htaꞈ hpawˇ ve awˬ han htaꞈ nyi sheˍ.)

¹¹ Daˍviˆ Gawˇliˇyaꞈ maꞈ poˍ lonˉ awˬ gʼaˇ uiˍ jaˇ ve htaꞈ tehˆ htaˇ, Daˍviˆ lehˬ i jaˇ. Gawˇliˇyaꞈ uiˍ jaˇ ve, laꞈ caˉ hkʼa dehꞈ cawˬ ve, maꞈ bawˆ tuˬ hkʼa dehꞈ gu hehnˇ taˍ˗oˬ leh “yawˇ Daˍviˆ htaꞈ gʼa mawˬ ve teˇ yanˇ, gʼuiˬ yawˬ jaˇ.” Yaꞈ hkʼaˇ, Daˍviˆ yaˇ nehˬ hpehꞈ leh maꞈ maˇ te jaw. Gawˇliˇyaꞈ htaꞈ bawˆ daꞈ tuˬ teꞈ chiˉ laꞈ caˉ maˇ cawˬ. Nyi˗a kʼo, Daˍviˆ awˬ gʼaˇ nuˇ ve htaꞈ shuˍ ve htawˇ, yawˇ Yaˬhoˉvaˬ htaꞈ gʼaˇ va ve pa taw, awˬ gʼaˇ uiˍ jaˇ. Chi yawˇ canˇ paˍ htaꞈ gʼaˇ ve yoˬ.—1 Saˍmo˗eˍlaˆ 17:41-45, 50.

12. Daˍviˆ aˬ htoꞈ ma gʼa hpuˇ sheˍ ve le?

¹² Daˍviˆ awˬ gʼaˇ nuˇ tuˬ te piˇ ve teˇ ceuˬ gʼa kʼawꞈ hpuˇ sheˍ ve yoˬ. Yaˬhoˉvaˬ leuˆ yuˬ taˍ ve jawˇ mawˇ Sawˉluꞈ htaꞈ Daˍviˆ ka tiꞈ yeˬ ve yoˬ. Awˉ lawˉ htaˇ Sawˉluꞈ Daˍviˆ htaꞈ nyi hkʼaˇ suh jaˇ. Yaꞈ hkʼaˇ, hkʼawꞈ nawˉ htaˇ Sawˉluꞈ uiˍ muiˬ caˆ muiˬ ve chaw hpehꞈ leh Daˍviˆ htaꞈ hkawehˉ ve yoˬ. Yawˇ Daˍviˆ htaꞈ maˇ daꞈ ve te piˇ leh tiˇ pehˍ gaˇ ve yoˬ.—1 Saˍmo˗eˍlaˆ 18:6-9, 29; 19:9-11.

13. Sawˉluꞈ Daˍviˆ htaꞈ maˇ daꞈ ve te piˇ htaˇ, yawˇ hkʼaˬ hkʼe te ve le?

¹³ Sawˉluꞈ Daˍviˆ htaꞈ maˇ daꞈ ve te piˇ ve htawˇ, Daˍviˆ yawˇ htaꞈ yawˆ yan sheˍ. Yawˇ Yaˬhoˉvaˬ leuˆ yuˬ taˍ ve chaw hpehꞈ ve pa taw yoˬ. (1 Saˍmo˗eˍlaˆ 24:6) Sawˉluꞈ Daˍviˆ htaꞈ maˇ daꞈ ve awˬ ceuˬ te piˇ ve htawˇ, Daˍviˆ gʼa yeunˇ hkanˍ leh Yaˬhoˉvaˬ htaꞈ venˇ baˆ maˇ taˍ. Daˍviˆ awˬ gʼaˇ gʼa leh shoꞈ shaꞈ ve htaꞈ yeunˇ hkanˍ gʼaˇ tuˬ Gʼuiˬ sha htaꞈ gʼaˇ va ve yoˬ.—Chiˇ mvuh ve 18:1.

14. Pawˇluꞈ Daˍviˆ hkʼa shuˍ aˬ htoꞈ ma awˬ lawn gʼa hpuˇ ve le?

¹⁴ Tcuh yaˇ Pawˇluꞈ kaꞈ Daˍviˆ hkʼa shuˍ gʼa hpuˇ jaw ve yoˬ. Yawˇ ve canˇ paˍ yawˇ aꞈ kehˉ kanˇ paˆ cawˬ jaˇ. Oˇ htaˇ teˇ co˗e ve bon awˬ hoˉ Pawˇluꞈ htaꞈ nyi bawˬ leh teˇ pawˆ pawˆ yawˇ htaꞈ dawˆ leh htawnˍ hkʼaw lo yuˬ keu piˇ ve yoˬ. Daˍviˆ hkʼa shuˍ yawˇ ve awˬ chawˇ tehꞈ dawˇ ve htawˇ, yawˇ htaꞈ  maˇ daꞈ ve te piˇ ve yoˬ. Hkriꞈ yaˇ awˬ moˍ hkʼaw ve chaw teˇ hpaˍ hpaˍ kaꞈ yawˇ htaꞈ tawˍ piˇ ve yoˬ. (2 Kawˇrenˍhtuˆ 12:11; Hpiˇliˇpiˆ 3:18) Yaꞈ hkʼaˇ, chi hkʼe ve chaw htaꞈ yawˇ haꞈ yuˬ gʼa ve yoˬ. Yawˇ tawˍ ve gʼa hpuˇ ve htawˇ, caˉ leh bon maˍ sheˍ. Awˬ viˉ awˬ nyi teˇ hpaˍ yawˇ htaꞈ nyi ma luˬ tuˬ te piˇ ve htawˇ, yawˇ maˇ baˬ taˉ. A yeˇ uiˍ jaˇ ve lehˬ, yawˇ suh htaˇ hkʼa gaˬ Gʼuiˬ sha htaꞈ ka tiꞈ yeˬ ve yoˬ. (2 Tiˆmoˉseˍ 4:8) Pawˇluꞈ yawˇ te ve hkʼa peu˗eˬ lehˬ yawˇ cheuˬ ve leh yawˇ ve awˬ gʼaˇ htaꞈ gʼaˇ va ve pa taw maˇ heˆ. Yaˬhoˉvaˬ htaꞈ gʼaˇ va ve pa taw yoˬ.

15. Ngaˬ hui dawˇ teh taˍ ve aˬ htoꞈ ma le? Leh ngaˬ hui hkʼaˬ hkʼe te chi hkʼe te gʼa tuˬ le?

¹⁵ Liꞈ henˇ kuiˬ lo ve awˬ chawˇ, kanˉ te kuiˬ lo ve awˬ chawˇ, maˇ heˆ leh Shaˉhkiˆhkanˍ ve chaw maˇ heˆ ve awˬ viˉ awˬ nyi tawˍ laˇ leh hkʼa mvuhˇ hkʼa na kʼoˆ laˇ ve htaꞈ nawˬ gʼa hpuˇ jaw˗aw laˇ? Maˇ heˆ leh Hkriꞈ yaˇ awˬ moˍ hkʼaw ve chaw nawˬ htaꞈ maˇ daꞈ ve te laˇ ve gʼa hpuˇ jaw˗aw laˇ? Nawˬ chi hkʼe gʼa hpuˇ jaw ve kʼo, Daˍviˆ leh Pawˇluꞈ ve awˬ lawn htaꞈ dawˇ nyi sheˍ. Nawˬ “daꞈ ve htaꞈ cuˇ leh haiˬ ve htaꞈ gʼaˇ” hpehꞈ ve yoˬ. (Roˉmaꞈ 12:21) Nawˬ dawˇ teh taˍ ve lehˬ Daˍviˆ hkʼa shuˍ, shu ve oˉ kʼoˍ htaꞈ haˉ pui baˬ hpehˇ ve maˇ heˆ. Yaꞈ hkʼaˇ, Liꞈ hpu hkʼaw cawˬ ve awˬ ceuˬ shu ve nyi ma hkʼaw cawˬ tuˬ nawˬ gʼa coˇ caˇ ve yoˬ. Chi hkʼe dawˇ ve chaw htaꞈ nawˬ Liꞈ hpu htaꞈ cuˇ leh hkʼawꞈ piˇ gʼa tuˬ yoˬ. Yawˇ nawˬ ve canˇ paˍ hpehꞈ leh nawˬ htaꞈ maˇ daꞈ ve te laˇ ve htawˇ, yawˆ yan leh teˇ gʼaˇ le le htaꞈ daꞈ ve te piˇ ve tehꞈ hpeuꞈ maw piˇ gʼa ve yoˬ.—Maꞈhtehˍ 5:44; 1 Peˍtruˆ 3:15-17.

16-17. Pawˇluꞈ aˬ htoꞈ ma ve awˬ lawn htaꞈ maˇ leunˇ jaw ve le?

¹⁶ Pawˇluꞈ tcuh yaˇ maˇ hpehꞈ sheˍ htaˇ, yawˇ uiˍ muiˬ caˆ muiˬ ve chaw hpehꞈ leh Yeˍsuˆ ve awˬ laꞈ gʼawˇ htaꞈ fawˉ mehˍ jaw ve yoˬ. (Tcuh yaˇ 7:58; 1 Tiˆmoˉseˍ 1:13) Yaꞈ hkʼaˇ, Pawˇluꞈ Hkriꞈ yaˇ awˬ moˍ htaꞈ maˇ gʼa fawˉ mehˍ tuˬ Yeˍsuˆ te piˇ ve yoˬ. Mvuhˇ maw ma lo awˬ hkawˇ bvuhˬ tawˆ la leh Pawˇluꞈ htaꞈ mehˆ cuˉ piˇ law ve yoˬ. Hkʼe te leh yawˇ fawˉ mehˍ piˇ jaw ve chaw yawˇ htaꞈ ga laˇ tuˬ ca lawˬ˗e ve yoˬ. Awˬ leh meuˇ htaˇ yawˇ nyi ma nuˇ nehˬ ve pa taw, Aˍnaˍniˆ ga piˇ leh yawˇ mehˆ teˇ pawˆ kʼawꞈ mawˬ la ve yoˬ.—Tcuh yaˇ 9:3-9, 17, 18.

¹⁷ Pawˇluꞈ Hkriꞈ yaˇ hpehꞈ leh laiˉ gʼaˇ shiˍ daꞈ ve yoˬ. Yaꞈ hkʼaˇ, yawˇ Daˍmaˍsehˆ venˇ lo kʼai ve yaꞈ kʼaw kʼaˉ lo Yeˍsuˆ yawˇ htaꞈ tawˇ yaw piˇ ve maˇ leunˇ jaw. Pawˇluꞈ nyi ma nuˇ nehˬ leh awˬ viˉ awˬ  nyi leh awˬ nu ve chaw ga piˇ ve htaꞈ haꞈ yuˬ ve yoˬ. Yawˇ kʼoˆ ve, “yawˇ hui htaꞈ pa taw ngaˬ maˇ maˇ dawˇ sha la ve yoˬ.”—Kawˇlawˇsehˇ 4:10, 11.

18. Aˬ htoꞈ ma te ngaˬ hui awˬ nu ve chaw maˇ ga laˇ tcuh gaˇ ve hehˉ le?

¹⁸ Pawˇluꞈ ve awˬ lawn ngaˬ hui htaꞈ aˬ htoꞈ ma maˍ laˇ ve le? Ngaˬ hui awˬ tehˬ ve tanˬ henˇ htaˇ, ngaˬ hui gʼa henˇ cawˇ ve cawˬ maˇ jaˇ sheˍ ve pa taw, shu ga laˇ tuˬ lawˬ gʼa ve yoˬ. (1 Kawˇrenˍhtuˆ 3:1, 2) Chi teˇ hkui˗ehꞈ? Awˬ tehˬ ve hkʼaw chehˇ maw jaˇ˗oˬ leh shu maˇ ga laˇ tcuh gaˇ ve yoˬ hehˉ. Ngaˬ hui hkʼe taw awˬ tehˬ ve hkʼaw maˇ chehˇ maw sheˍ ve chaw htaꞈ maˇ ga laˇ tcuh gaˇ ve yoˬ hehˉ. Yaꞈ hkʼaˇ, Yaˬhoˉvaˬ lehˬ ngaˬ hui ve awˬ gʼaˇ leh co ha hpawˇ uiˍ la mvuh la tuˬ awˬ viˉ awˬ nyi htaꞈ cuˇ leh ga laˇ ve yoˬ. (Roˉmaꞈ 1:11, 12) Chi htaꞈ pa taw ngaˬ hui Yaˬhoˉvaˬ geh awˬ gʼaˇ gʼa gaˇ ve kʼo, awˬ viˉ awˬ nyi gʼa ga laˇ tcuh ve yoˬ.

19. Aˬ htoꞈ ma te Pawˇluꞈ laiˉ ceuˬ te gʼa ve le?

¹⁹ Pawˇluꞈ awˬ tehˬ ve Hkriꞈ yaˇ hpehꞈ la peuˬ hkʼawꞈ nawˉ, daꞈ ve laiˉ ceuˬ te gʼa ve yoˬ. Aˬ htoꞈ ma te yawˇ chi hkʼe te gʼa ve le? Chehˇ sha cawˬ sha ve, liꞈ tanˇ mvuh ve, paw sha ve, ngaˬ hui gʼa hpuˇ jaw ve, chi ve teˇ hpaˍ chaw yaˇ te gʼa ve geh laˬ ve maˇ heˆ, nyi ma nuˇ nehˬ leh Yaˬhoˉvaˬ htaꞈ gʼaˇ va ve geh laˬ ve tehꞈ Pawˇluꞈ shiˍ ve yoˬ. Ngaˬ hui Pawˇluꞈ htaꞈ henˇ yuˬ gʼa tuˬ, awˬ hkʼaˇ chi teˇ hpaˍ htaꞈ yehˇ gʼa ve yoˬ. (1) Yaˬhoˉvaˬ htaꞈ gʼaˇ va ve, (2) Liꞈ hpu hkʼaw ve awˬ lawn htaꞈ henˇ yuˬ ve, leh (3) awˬ viˉ awˬ nyi ga laˇ tcuh ve yoˬ. Ngaˬ hui chi hkʼe te ve kʼo, co ha hpawˇ awˬ gʼaˇ nuˇ ve htawˇ, Yaˬhoˉvaˬ ga laˇ tuˬ yoˬ.